အခန်း ၁၆၁၇

အခန်း ( ၁၆၁၇ ) ရှန်းလဲ့၏ ဖိနှိပ်ခြင်း။

စူးယုက ဆွဲဆောင်မှုရှိစွာ ပြုံးလိုက်သည်။

သူ၏ မျက်ဝန်းအိမ်များမှာ ကြည်လင်နေလေ၏။

သူ့အနေဖြင့် ဤကဲ့သို့သော တောင်းဆိုမှုကို ပြုလုပ်ခဲ့လျှင်...

အကယ်၍ သာမန်အမျိုးသမီးတစ်ဦး ဖြစ်ပါက ချက်ချင်းပင် သဘောတူမိကောင်း သဘောတူမိလိမ့်မည်။

ကံဆိုးစွာပင်၊ ယွင်ရှီ၏ အမြင်က သာမန်အမျိုးသမီးများထက် အဆပေါင်းများစွာ သာလွန်မြင့်မားနေခဲ့သည်။

ရုပ်ရည်အရဆိုလျှင်၊ သူမ၏ အစ်ကိုကြီးမှာ အထွတ်အထိပ် ရောက်ရှိနေသူ ဖြစ်သည်။

သူ့အရှေ့ရှိ ကောင်လေးမှာမူ ကြည့်ကောင်းသည်ဟု ဆိုနိုင်သော်လည်း သူမ၏ အစ်ကိုကြီးကို ယှဉ်နိုင်ရန် အဝေးကြီး ဖြစ်သည်။

ပါရမီအရဆိုလျှင်လည်း သူမ၏ အစ်ကိုကြီးက မွေးရာပါ မြင့်မြတ်ခန္ဓာ တာအိုသန္ဓေ ဖြစ်ပြီး ဤကောင်လေးမှာ လုံးဝ နှိုင်းယှဉ်၍ မရနိုင်ချေ။

စွမ်းအားအရဆိုလျှင်မူ၊ သူမ၏ အစ်ကိုကြီးမှာ အသက်တစ်ဆယ့်ငါးနှစ်အရွယ်နှင့် အဓိပတိတစ်ဦးဖြစ်ပြီး တောင်ပိုင်းကြယ်စင်စုလောကတစ်ခုလုံးတွင် အနှိုင်းမဲ့သူ ဖြစ်သည်။

ဤလူငယ်လေးက နှိုင်းယှဉ်ရန်ပင် အရည်အချင်း မပြည့်မီပါ။

ထို့ကြောင့်၊ ယွင်ရှီက စူးယုအပေါ်တွင် စိတ်ဝင်စားမှု လုံးဝ ရှိမနေခဲ့ချေ။

ယွင်ရှီက မည်သို့မျှ တုံ့ပြန်မှုမရှိဘဲ တည်ငြိမ်နေသည်ကို မြင်ရသည့်အခါ...

စူးယုက မသိစိတ်၏ စေ့ဆော်မှုဖြင့် လက်ကို လှမ်းဆန့်လိုက်ပြီး ယွင်ရှီကို ဆွဲကိုင်ရန် ကြိုးပမ်းလိုက်သည်။

ထိုစဉ်... အေးစက်သော ဟိန်းဟောက်သံတစ်ခု ထွက်ပေါ်လာတော့သည်။

"ဘယ်ကလာတဲ့ အမှိုက်က အရှင်မင်းသမီးကို ပြစ်မှားစော်ကားဖို့ ကြိုးစားဝံ့နေတာလဲ"

"ဝုန်း"

စွမ်းအားကြီးမားသော စွမ်းအင်လှိုင်းတစ်ခုကလည်း ပြင်းထန်စွာ တိုးဝင်လာခဲ့သည်။

သတိမထားမိဘဲ အဆင်သင့်မဖြစ်ခဲ့သဖြင့်၊ စူးယုမှာ လွင့်ထွက်သွားခဲ့ရပြီး သွေးများ အန်ထွက်လာတော့သည်။

သူသည် ဤကာလအတွင်း၌ အခွင့်အရေး အမြောက်အမြားကို ဆုံတွေ့ခဲ့ရပြီး သူစွမ်းအားက အကြီးအကျယ် တိုးတက်လာခဲ့သည်မှာ မှန်သော်လည်း...

သူ၏ စတင်ရာအမှတ်က နိမ့်ကျလွန်းသည့်အပြင် လင်းယွင်ဂြိုဟ်ဟူသော ရှေးဟောင်းဂြိုဟ်ငယ်လေးကလည်း သူ၏ ပါရမီကို ကန့်သတ်ထားခဲ့သည်။

ထို့ကြောင့်၊ စူးယုသည် ထိုအင်မော်တယ်အင်အားစုများမှ တပည့်များကို ယှဉ်ပြိုင်နိုင်စွမ်း မရှိသေးပါချေ။

လှုပ်ရှားမှုကို ပြုလုပ်ခဲ့သူမှာ သဘာဝအတိုင်း ရှန်းလဲ့ ဖြစ်သည်။

ရှန်းလဲ့က အရပ်ရှည်ပြီး သန်မာကာ ရဲရင့်သော ဟန်အမူအရာမျိုး ရှိပေသည်။

သူသည် စီးဆင်းနေသော ရွန်းစာလုံးများဖြင့် တောက်ပနေသည့် ချပ်ဝတ်တန်ဆာကို ဝတ်ဆင်ထားသည်။

သူ့ခန္ဓာကိုယ်ပေါ်တွင် တိုက်ပွဲ၏ သွေးမျိုးဆက် အငွေ့အသက်များ စွန်းထင်နေ၏။

သူက အေးစက်သော အကြည့်များဖြင့် စူးယုကို စိုက်ကြည့်နေတော့သည်။

၎င်းက မိလ္လာမြောင်းထဲမှ နံစော်နေသော ကြွက်တစ်ကောင်ကို ကြည့်နေသကဲ့သို့ပင်။

ယွင်ရှီကား သူကိုယ်တိုင်ပင် အဝေးမှသာ ငေးမောကြည့်ရှုခွင့်ရှိသည့် နတ်ဘုရားမတစ်ပါး ဖြစ်သည်။

အောက်ခြေလောကမှ ဤကဲ့သို့နိမ့်ကျသည့် လူတစ်ဦးမှ သူမ၏ အဖိုးတန်ခန္ဓာကိုယ်အား ထိတွေ့ခွင့် မည်သို့ ပြုနိုင်ပါမည်နည်း။

"မင်း..."

စူးယုက သူ့ရင်ဘတ်ကို လက်တစ်ဖက်ဖြင့် ဖိထားပြီး အခြားလက်တစ်ဖက်ဖြင့် သူ၏ နှုတ်ခမ်းထောင့်မှ သွေးများကို သုတ်လိုက်သည်။

သူ၏ အကြည့်များကလည်း ရှန်းလဲ့နည်းတူ အေးစက်သွား၏။

ငယ်စဉ်ကတည်းက နေရာအတည်တကျမရှိ လွင့်ပါးခဲ့ရပြီး အနှိမ့်အချ ခံခဲ့ရသဖြင့်၊ သူ အမုန်းဆုံးအရာမှာ ဤကဲ့သို့သော အထက်စီးဆန်သည့် အကြည့်မျိုး ဖြစ်သည်။

သူ့ကို ကြွက်တစ်ကောင် သို့မဟုတ် ပိုးကောင်တစ်ကောင်ကဲ့သို့ ကြည့်နေသည့် ပုံစံက သူ့သွေးကြောများကို ပေါက်ကွဲထွက်လုမတတ် ဒေါသဖြစ်စေခဲ့၏။

သို့သော်လည်း၊ ယွင်ရှီနှင့် တစ်ဖက်လူထံတွင် ထူးခြားသော နောက်ခံများ ရှိနေနိုင်သည်ကို သူ ခံစားမိသည်။

စူးယုလည်း အသက်ကို ပြင်းထန်စွာ ရှူသွင်းလိုက်ရင်း သူ၏ ဒေါသစိတ်ကို အနိုင်နိုင် ဖိနှိပ်လိုက်ရပေသည်။

"ကောင်လေး... မင်းရဲ့ အကြည့်က ငါ့အပေါ် မကျေမနပ် ဖြစ်နေတာလား"

ရှန်းလဲ့၏ မျက်ဝန်းအိမ်များက အနည်းငယ် ကျဉ်းမြောင်းသွားသည်။ အေးစက်သော အငွေ့အသက်များ ဖြာထွက်လာ၏။

စူးယုက အံကိုသာကြိတ်ထားပြီး ပြန်မဖြေပေ။

"ဟမ့်... သိပ်ပြီး ရဲတင်းမနေနဲ့။ မင်း အရှင်မင်းသမီးကို ပြစ်မှားစော်ကားဝံ့ရင် မင်းလို ပုရွက်ဆိတ်ငယ်လေးကို မပြောနဲ့..."

"လင်းယွင်ဂြိုဟ် တစ်ခုလုံးတောင်မှ ပြိုလဲပျက်စီးပြီး ဖုန်မှုန့်အဖြစ် ပြောင်းလဲသွားလိမ့်မယ်"

ရှန်းလဲ့က အထင်သေးဟန်ဖြင့် လှောင်ပြုံးပြုံးလိုက်သည်။

ဘေးတွင် ရပ်နေသော ယွင်ရှီမှာမူ အနည်းငယ် မျက်မှောင်ကုတ်မိသွားလေသည်။

"ရှန်းလဲ့... တော်တော့"

ယွင်ရှီသည် စူးယု၏ ဇွဲနပဲကြီးစွာ လိုက်ပါနေမှုအပေါ် အနည်းငယ် စိတ်အနှောင့်အယှက် ဖြစ်မိသည်။

သို့သော်လည်း သူမအနေဖြင့် ဤကဲ့သို့သော အသေးအဖွဲ ကိစ္စရပ်ကြောင့် လူတစ်ယောက်ကို သတ်ဖြတ်ပစ်ရန်တော့ မလိုလားပါချေ။

နှုတ်ခမ်းထောင့်တွင် သွေးများ စီးကျနေသော စူးယုကို ကြည့်ရင်း...

ယွင်ရှီက ခဏမျှ တွေးတောလိုက်ပြီးနောက် ဤကောင်လေးအပေါ်တွင် မည်သည့်အကြွေးမျှ မတင်ရှိ‌‌‌စေရန် ဆုံးဖြတ်လိုက်သည်။

သူမ၏ ကျောက်စိမ်းကဲ့သို့ နုနယ်သော လက်ချောင်းလေးများကို တစ်ချက်တောက်လိုက်ရုံဖြင့်၊ သူတော်စင်ဆေးလုံး တစ်လုံးက စူးယုထံသို့ လွင့်ပျံကျဆင်းသွား၏။

စူးယုလည်း ၎င်းကို မှင်တက်စွာဖြင့် ဖမ်းယူလိုက်မိသည်။

"ဒီသူတော်စင်ဆေးလုံးက လင်းယွင်ဂြိုဟ်တစ်ခုလုံးမှာ တစ်လုံးတည်းသော အရာ ဖြစ်လိမ့်မယ်။ ဒါကို ရှင့်ရဲ့ ဒဏ်ရာတွေအတွက် လျော်ကြေးအဖြစ် သတ်မှတ်လိုက်ပါ"

ယွင်ရှီ တည်ငြိမ်စွာ ပြောဆိုလိုက်သည်။

စူးယု မှင်တက်သွားခဲ့၏။

သူမက ဘယ်လိုတောင် ကြင်နာတတ်ပြီး ကောင်းကင်တမန်လို မိန်းကလေးမျိုးလဲ။

"အရှင်မင်းသမီး... ဘာဖြစ်လို့..."

ရှန်းလဲ့က တွန့်ဆုတ်နေပြီး တစ်ခုခု ပြောလိုသေးသည်။

သို့သော်လည်း ယွင်ရှီက နောက်ထပ် အချိန်မဆွဲချင်တော့ပါချေ။

"ကဲပါ... သွားကြရအောင်"

သူက သူမ၏ အစ်ကိုကြီးထံသို့ အမြန်ဆုံး ပြန်သွားနိုင်ရန်အတွက် လေ့ကျင့်မှုကို မြန်မြန်ဆန်ဆန် အဆုံးသတ်ချင်သည်။

ယွင်ရှီက ရေပြင်ပေါ်တွင် ပျံဝဲနေသော နတ်သမီးတစ်ပါးကဲ့သို့ ပေါ့ပါးပြီး ကျော့ရှင်းသော ခြေလှမ်းများဖြင့် ထွက်ခွာသွားတော့သည်။

ရှန်းလဲ့ကမူ စူးယုကို တစ်ချက်ကြည့်ကာ နှာခေါင်းရှုံ့ပြီး ပြောလိုက်သည်။

"အရှင်မင်းသမီးက ကြင်နာတတ်တာ မင်းလို ပိုးကောင်လေး ကံကောင်းသွားတယ်"

ထိုသို့ ပြောဆိုပြီးနောက်မှာတော့ ရှန်းလဲ့က နောက်ကွယ်မှ ထပ်ချပ်မကွာ လိုက်ပါသွားတော့သည်။

သို့သော်လည်း စူးယုမှာ ရှန်းလဲ့၏ စကားများကို ကြားသိပုံမရပါချေ။

အကြောင်းမူ ယခုအခါတွင်၊ သူ၏ ဦးနှောက်တစ်ခုလုံး၌ ယွင်ရှီမှ သူ့အား ဆေးလုံးပေးခဲ့သည့် ပုံရိပ်များဖြင့်သာ ပြည့်နှက်နေသောကြောင့် ဖြစ်သည်။

ဤမိန်းကလေးက ထူးခြားသော မိသားစုတွင် မွေးဖွားလာခဲ့ပြီး အံ့မခန်း အလှတရားကို ပိုင်ဆိုင်ထားရုံမျှမက၊ အနှိုင်းမဲ့ ပါရမီကိုလည်း ပိုင်ဆိုင်ထားသေးသည်။

ထို့ပြင် ဤကဲ့သို့သော ကြင်နာတတ်သည့် နှလုံးသားမျိုးနှင့်...

သူမက လူ့လောကသို့ သက်ဆင်းလာသည့် ကောင်းကင်တမန် နတ်သမီးလေးတစ်ပါးနှင့်အမှန်တကယ် တူလှသည်။

ဤ‌အခြေအနေမျိုးတွင် မည်သည့်အမျိုးသားမဆို ရင်ခုန်မိသွားလိမ့်မည်။

"ဒီမိန်းကလေးက သာမန်လူတော့ ဟုတ်ပုံမရဘူး၊ ဒါပေမဲ့ ငါ သူ့ရဲ့ နှလုံးသားကို သေချာပေါက် အရယူနိုင်ရမယ်။"

"နောက်ပြီးတော့ ငါ့ရဲ့ ကံကောင်းမှုတွေက ရှိနေသေးတယ်"

စူးယုက သူ့လက်ထဲမှ ရှားပါးလှသည့် သူတော်စင်ဆေးလုံးကို ကြည့်လိုက်သည်။

လင်းယွင်ဂြိုဟ်တစ်ခုလုံးတွင် ဤကဲ့သို့သော အရာမျိုး တစ်လုံးမျှ ရှိမနေပါချေ။

ဒါက သူ့ထံတွင် ကြီးမားသော ကံကြမ္မာအခွင့်အလမ်းများ ရှိနေသည်ကို ညွှန်ပြနေခြင်း မဟုတ်ပါလား။

သူက ထူးချွန်သော မိန်းက‌လေးတစ်ဦးနှင့် ဆုံတွေ့ခဲ့ရရုံမျှမက၊ အရည်အ‌သွေးမြင့် သူတော်စင်ဆေးကိုလည်း ရရှိခဲ့သည်။

"အဲဒီ အထက်စီးဆန်တဲ့ ကောင်ကိုတော့လား... ငါ သူ့ကို ဘယ်တော့မှ မေ့ပစ်လို့မရမယ့် သင်ခန်းစာတစ်ခု ပေးရမယ်။ လူငယ်တစ်ယောက်ရဲ့ အလားအလာကို ဘယ်တော့မှ အထင်မသေးစမ်းနဲ့"

ပြတ်သားသော အကြည့်တစ်ခုက စူးယု၏ မျက်ဝန်းထဲတွင် ထွက်ပေါ်လာခဲ့သည်။

ယခင်က၊ သူသည် ဟင်းလင်းပြင်အက်ကွဲကြောင်း၏ အနက်ရှိုင်းဆုံးအပိုင်းက လွန်စွာ အန္တရာယ်များနေမလားဟု တွေးတောကာ တွန့်ဆုတ်မှုအချို့ ရှိနေခဲ့သည်။

ယခုမူ၊ သူ၏ မျက်ဝန်းထဲတွင် ပြတ်သားမှုများသာ ရှိနေခဲ့ချေပြီ။

သူတို့ ပိုမို၍ နှိပ်ကွပ်ခြင်းနှင့် ခွဲခြားဆက်ဆံခြင်း ခံရလေလေ...

သူတို့၏ အတွင်းစိတ် အလားအလာများကို ပိုမို ထုတ်ဖော်နိုင်လေလေဖြစ်ကာ အလှည့်အပြောင်းတစ်ခုကို ဖန်တီးနိုင်လေလေ ဖြစ်သည်။

ဒါက ကံကောင်းခြင်းကြယ်ပွင့်အောက်တွင် မွေးဖွားလာသူများ၏ ထင်ရှားသော လက္ခဏာတစ်ခုပင်။

စူးယုလည်း သူတော်စင်ဆေးလုံးကို မျိုချလိုက်ပြီး သူ့ဒဏ်ရာများကို ကုသလိုက်သည်။

ထို့နောက်မှာတော့ အံကိုတင်းတင်းကြိတ်ကာ ဟင်းလင်းပြင်အက်ကွဲကြောင်း၏ အနက်ရှိုင်းဆုံးအပိုင်းသို့ ဆက်လက်၍ ဝင်ရောက်ခဲ့တော့သည်။

မျက်စိတစ်မှိတ်အတွင်းမှာပင်၊ တစ်လတာ အချိန်ကာလ ကုန်လွန်သွားခဲ့သည်။

ဤစမ်းသပ်မှုမှာလည်း နောက်ဆုံးတွင် အဆုံးသတ်သို့ ရောက်ရှိလာခဲ့ပြီ။

အကြောင်းမှာ၊ ဟင်းလင်းပြင်အက်ကွဲကြောင်းထဲမှ ပါ့မျိုးနွယ်၏ တည်ရှိမှုများ စတင်ထွက်ပေါ်လာခဲ့သောကြောင့် ဖြစ်သည်။

အနက်ရောင်ကပ်ဘေးမျိုးနွယ်မှာ မျိုးဆက်သစ် ပါရမီရှင်များ ကိုင်တွယ်နိုင်သော အရာမျိုး မဟုတ်ချေ။

ထို့ကြောင့်၊ မျိုးဆက်ဟောင်းမှ အစွမ်းထက် ပုဂ္ဂိုလ်ကြီးများလည်း လှုပ်ရှားမှု ပြုလုပ်ခဲ့ကြသည်။

ဆန်းကျယ်ကောင်းကင်အဓိပတိ၊ နတ်ဖန်ဆင်းခြင်းအဓိပတိနှင့် ပျက်စီးခြင်းတာအိုသခင်အဆင့်ရှိ အစွမ်းထက် ပုဂ္ဂိုလ်ကြီးများအားလုံး လှုပ်ရှားခဲ့ကြ၏။

ဤကာလအတွင်း၊ စူးယုသည် အမျိုးမျိုးသော တိုက်ဆိုင်မှုများနှင့် မမျှော်လင့်ထားသော ဖြစ်ရပ်များမှတစ်ဆင့်၊ ဟင်းလင်းပြင်အက်ကွဲကြောင်း၏ အနက်ရှိုင်းဆုံးအပိုင်းသို့ အမှန်တကယ်ပင် ရောက်ရှိသွားခဲ့သည်။

ဤနေရာက ယွင်ရှီနှင့် အခြားသူများပင်လျှင် တစ်ခါမျှ မစူးစမ်းခဲ့ဖူးသော နေရာ ဖြစ်ပေသည်။

၎င်းက တောင်ပိုင်းကြယ်စင်စုလောကရှိ အသီးသီးသော အင်မော်တယ်အင်အားစုများမှ ကျွမ်းကျင်သူနှင့် ပါ့မျိုးနွယ်မှ စွမ်းအားကြီး အဖွဲ့ဝင်များ တိုက်ပွဲဆင်နွှဲခဲ့ကြသည့် နေရာလည်း ဖြစ်သည်။

"ဝုန်း"

ကြောက်မက်ဖွယ်ကောင်းသော ပေါက်ကွဲမှုများ ဟင်းလင်းပြင်ထဲမှ ထွက်ပေါ်လာခဲ့သည်။

ထိပ်တိုက်တွေ့ဆုံမှုမှ ထွက်ပေါ်လာသော နောက်ဆက်တွဲ စွမ်းအင်လှိုင်းများမှာ မုန်တိုင်းတစ်ခုကဲ့သို့ ကုန်းမြေကြီးတစ်ခုလုံးကို ဖုံးလွှမ်းသွားခဲ့၏။

ကြီးမားသော ဟင်းလင်းပြင်အက်ကွဲကြောင်းများမှာ ကောင်းကင်နှင့် မြေပြင်အနှံ့ ပျံ့နှံ့သွားတော့သည်။

ဤမြင်ကွင်းက လောကကြီးတစ်ခုလုံး ပြိုလဲပျက်စီးသွားသကဲ့သို့ပင် ဖြစ်သည်။

စူးယုပင်လျှင် ထိတ်လန့်တုန်လှုပ်သွားခဲ့ရ၏။

ထိုအခိုက်အတန့်မှာပင်၊ ထိုထိပ်တိုက်တွေ့ဆုံမှု မုန်တိုင်း၏ အလယ်ဗဟိုတည့်တည့်၌...

ပုံရိပ်နှစ်ခုက အတူတကွ ပျက်စီးသွားကြပုံရပြီး ဥက္ကာခဲများကဲ့သို့ ကျဆင်းလာတော့သည်။

စူးယု၏ မျက်ဝန်းများ တောက်ပသွားခဲ့ရသည်။

သူ တိတ်တဆိတ် ချဉ်းကပ်သွားခဲ့၏။

ထို့နောက် သက်ငင်နေဆဲဖြစ်သော ပုံရိပ်နှစ်ခုကို မမျှော်လင့်ဘဲ တွေ့လိုက်ရတော့သည်။

သူတို့ကတော့ အင်မော်တယ်အင်အားစုတစ်ခုမှ ဆန်းကျယ်ကောင်းကင်အဓိပတိ တစ်ဦးနှင့် ပါ့မျိုးနွယ်မှ စွမ်းအားကြီး အဖွဲ့ဝင်တစ်ဦးတို့ ဖြစ်ကြသည်။

"ဒါက ကောင်းကင်က ပေးသနားတဲ့ အခွင့်အရေးတစ်ခု ဖြစ်နေမလား..."

စူးယုကိုယ်တိုင်ပင် သူက ဤမျှအထိ ကံကောင်းလိမ့်မည်ဟု ဘယ်တုန်းကမှ မျှော်လင့်မထားခဲ့ချေ။

ထိုပုံရိပ်နှစ်ခုထံမှ ထွက်ပေါ်နေသော အရှိန်အဝါက သူ၏ ကျောရိုးကို စိမ့်တက်သွားစေခဲ့သည်။

သို့သော်လည်း သူ့ထံတွင် အမျိုးမျိုးသော စွမ်းအားများကို သန့်စင်ပေးနိုင်ပြီး မိမိကိုယ်ပိုင်အဖြစ် ပြောင်းလဲပေးနိုင်သည့် ကျောက်စိမ်းဆွဲပြား ရှိနေသေးကြောင်း သိထားကြရမည်။

စူးယုက အနည်းငယ်မျှ မတုံ့ဆိုင်းဘဲ ကျောက်စိမ်းဆွဲပြားကို ထုတ်ယူလိုက်ပြီး ထိုနတ်ဆိုးသတ္တဝါကို တိုက်ရိုက် သန့်စင်ပစ်လိုက်သည်။

သူတို့၏ အထွတ်အထိပ် အခြေအနေတွင်မူ၊ ဤပုံရိပ်နှစ်ခုမှာ သူတို့၏ အရှိန်အဝါတစ်ခုတည်းဖြင့်ပင် စူးယုကို သတ်ဖြတ်နိုင်လိမ့်မည်။

သို့သော်လည်း ယခုအခါတွင်မူ၊ သူတို့က လုံးဝ အားအင်ကုန်ခမ်းနေခဲ့ကြပြီဖြစ်ရာ သန့်စင်ခြင်းခံရသည်ကို ကူကယ်ရာမဲ့စွာဖြင့်သာ စိုက်ကြည့်နေနိုင်ကြတော့သည်။

နတ်ဆိုးကောင် သန့်စင်ခြင်း ခံရပြီးနောက်၊ စူးယုကကျောက်စိမ်းဆွဲပြားအတွင်း၌ စီးဆင်းနေသော ကြောက်မက်ဖွယ်ကောင်းပြီး သန့်စင်သော စွမ်းအားကို ခံစားလိုက်ရသည်။

သူက ၎င်းကို မည်သည့်အချိန်တွင်မဆို သန့်စင် စုပ်ယူနိုင်စွမ်းရှိ၏။

တစ်ချိန်တည်းမှာပင်၊ အင်မော်တယ်အင်အားစုမှ ပုဂ္ဂိုလ်ကြီးသည်လည်း စူးယုက ပါ့မျိုးနွယ် သတ္တဝါကို သန့်စင်ရန်အတွက် ကျောက်စိမ်းဆွဲပြားကို အသုံးပြုနေသည်ကို မြင်တွေ့ရသည့်အခါ သူ၏ မျက်ဝန်းထဲတွင် အံ့အားသင့်မှု အရိပ်အယောင်တစ်ခု ထွက်ပေါ်လာခဲ့သည်။

ထို့နောက်၊ ထိုအင်မော်တယ်အင်အားစုမှ စွမ်းအားကြီး ပုဂ္ဂိုလ်ကြီးက ရုတ်တရက် ပြုံးလိုက်ပြီး ပြောဆိုလိုက်၏။

"မိတ်ဆွေလေး... မင်းသာ ဒီအဘိုးကြီးကို ကူညီပေးမယ်ဆိုရင်၊ ငါ မင်းကို သေချာပေါက် ရက်ရက်ရောရော ပြန်လည် ပေးဆပ်ပါ့မယ်……"

ဤအင်မော်တယ်အင်အားစုမှ ကျွမ်းကျင်သူက ပြင်းထန်စွာ ဒဏ်ရာရရှိထားပြီး၊ သူ၏ ရှေးဦးဝိညာဉ်မှာလည်း ပျက်စီးဆုံးရှုံးထားခဲ့ရသည်။

သို့သော်လည်း၊ စူးယု၏ မျက်နှာအမူအရာမှာ အေးစက်သွားခဲ့၏။

သူက ကျောက်စိမ်းဆွဲပြားကို တိုက်ရိုက် ထုတ်ယူလိုက်ကာ ဤအင်မော်တယ်အင်အားစုမှ စွမ်းအားကြီး ပုဂ္ဂိုလ်ကြီးကိုပါ တိုက်ရိုက် သန့်စင်ရန် စတင်လိုက်တော့သည်။

"မင်း"

အင်မော်တယ်အင်အားစုမှ ပုဂ္ဂိုလ်ကြီးမှာ မျက်လုံးများပြူးကျယ်လျက် စိုက်ကြည့်ရင်း၊ အကြီးအကျယ် ဒေါသထွက်သွားခဲ့ရသည်။

"ဟမ့်... မင်းတို့ အင်မော်တယ်အင်အားစုက လူတွေက အမြဲတမ်း တခြားသူတွေကို အထင်သေးနေကြတာ မဟုတ်ဘူးလား။ အခုကျမှ မင်းတို့ကို ကယ်တင်ဖို့ ပုရွက်ဆိတ်တွေကို လိုအပ်နေရတာလား"

"ဒါ့အပြင်... မင်းက ငါ့ရဲ့ ကျောက်စိမ်းဆွဲပြားကို မျက်စိကျနေတယ်ဆိုတာ ငါမသိဘူးလို့ မင်း ထင်နေတာလား"

စူးယု၏ မျက်နှာပြင်မှာ တည်ငြိမ်အေးစက်နေခဲ့သည်။

သူသည် ခရီးရှည်ကြီးကို ဖြတ်သန်းလာခဲ့သူဖြစ်ရာ၊ ယခင်ကကဲ့သို့ နုနယ်သော လူငယ်လေးတစ်ဦး မဟုတ်တော့ချေ။

မကြာမီမှာပင်၊ ထိုအင်မော်တယ်အင်အားစုမှ ပုဂ္ဂိုလ်ကြီးသည်လည်း ကျောက်စိမ်းဆွဲပြား၏ သန့်စင်ခြင်းကို ခံလိုက်ရတော့သည်။

လူသားမျိုးနွယ်နှင့် နတ်ဆိုးမျိုးနွယ်ဟူသော မျိုးနွယ်စုကြီးနှစ်ခု၏ စွမ်းအားများကို ကျောက်စိမ်းဆွဲပြားက သန့်စင်ပေးခဲ့သည်။

စူးယုက ဤစွမ်းအားကို အပြည့်အဝ စုပ်ယူပြီးသွားသည်နှင့်တစ်ပြိုင်နက်၊ သူ၏ ကျင့်ကြံမှုအဆင့်နှင့် စွမ်းအားမှာ သေချာပေါက် အရှိန်အဟုန်ဖြင့် တိုးတက်လာလိမ့်မည်။

သူ့ကို ယခင်က ဒဏ်ရာရစေခဲ့သည့် ရှန်းလဲ့မှာလည်း သူ့အတွက် ပြိုင်ဘက် ဖြစ်လာလိမ့်မည် မဟုတ်တော့ပါချေ။

"ငါ သေချာပေါက် ပိုပြီး သန်မာလာရမယ်၊ ပြီးရင် သူ့ကို သွားရှာမယ်။ ငါ့လမ်းကို ပိတ်ဆို့တဲ့သူမှန်သမျှ ငါ့ခြေဖဝါးအောက်မှာ နင်းခြေခံရစေရမယ်"

စူးယု ကျောက်စိမ်းဆွဲပြားကို တင်းတင်းကြပ်ကြပ် ဆုပ်ကိုင်လိုက်သည်။

သူ၏ လေသံမှာလည်း ပြတ်သားလျက် ရှိနေခဲ့တော့သည်။