အခန်း ၉၁၀

အခန်း (၉၁၀) - မိစ္ဆာအရှင်သခင်ကို အမဲလိုက်ခြင်း၊ ဝိညာဉ်ခွဲထွက်အဆင့် နီးကပ်လာပြီ (အပိုင်း- ၂)

တာ့ယန်အင်မော်တယ်မင်းဆက်အပြင် ချန်ကျိုးနယ်မြေ၏ အခြားသော ဒေသများဖြစ်ကြသည့် ချန်ကုအင်မော်တယ်မြို့တော် အပါအဝင် နေရာအနှံ့အပြားမှ ကျင့်ကြံသူ များစွာသည် ဖူလင်းပင်လယ် နယ်မြေဆီသို့ သွားရောက်ကာ ကံကြမ္မာအခွင့်အရေးများ ရှာဖွေရန် နည်းလမ်းမျိုးစုံဖြင့် ကြိုးပမ်းနေကြ၏။

ချန်ကုအင်မော်တယ်မြို့တော်။

စုယွီ၏ တာအို ရုပ်သေးသည် လင်းလုံအဆောင်လက်ဖွဲ့စံအိမ် အတွင်းမှနေ၍ အပြင်ဘက်သို့ စစ်ဆေးကြည့်လိုက်၏။

ကောင်းကင်ယံထက်တွင် လှေပျံများ၊ စစ်သင်္ဘောများနှင့် ဧရာမ သားရဲပျံကြီးများပင်လျှင် မြို့ပြင်ရှိ နေရာ ရွှေ့ပြောင်း အခင်းအကျင်း စင်မြင့်ဆီသို့ တဟုန်ထိုး ဦးတည်ပျံသန်းသွားနေကြသည်ကို မြင်တွေ့လိုက်ရ၏။

မိသားစုကြီး ငါးခုသာမက ချန်ကုအင်မော်တယ်မြို့တော်ရှိ အခြားသော အင်အားစုများနှင့် ကျင့်ကြံသူများသည်လည်း ခွန်းလင်ဝိညာဉ်သိုက်၏ ဆွဲဆောင်မှုနောက်သို့ ကောက်ကောက်ပါအောင် လိုက်သွားကြတော့သည်။

လင်းလုံအဆောင်လက်ဖွဲ့စံအိမ်၏ အင်အားနှင့် အခြေခံအုတ်မြစ်မှာ သိပ်မခိုင်မာလှဘဲ အဆင့်သုံးနှင့် အဆင့်လေး အဆောင်လက်ဖွဲ့ အနည်းငယ်သာ ရှိသော်လည်း ခွန်းလင်ဝိညာဉ်သိုက် ပေါ်ထွက်လာသည့် သတင်းများ ပျံ့နှံ့သွားသည်နှင့် တစ်ပြိုင်နက် စံအိမ်အတွင်းရှိ အဆင့်သုံးနှင့် အဆင့်လေး အဆောင်လက်ဖွဲ့များအားလုံး မျက်စိတစ်မှိတ်အတွင်း ရောင်းထွက်သွားခဲ့၏။

ဈေးနှုန်းများ နှစ်ဆနီးပါး မြင့်တက်သွားသည့်တိုင်အောင် ပင်လယ်ပြင်သို့ ထွက်ခွာမည့် ကျင့်ကြံသူများက အလုအယက် ဝယ်ယူနေကြ၏။

ဆေးလုံးများ၊ မှော်ရတနာများ၊ အခင်းအကျင်းများ စသည့် အခြားသော ကျင့်ကြံခြင်း အရင်းအမြစ်များဆိုလျှင် မည်မျှပင် ရှားပါးပြီး ရူးသွပ်ဖွယ်ရာ ကောင်းလောက်အောင် အလုအယက် ဖြစ်နေကြမည်ကို တွေးကြည့်ရုံဖြင့် သိနိုင်ပါသည်။

"ဟူး..."

ဆိုင်တာဝန်ခံက စုယွီ၏ဘေးတွင် ပေါ်လာပြီး ခေါင်းရမ်းကာ သက်ပြင်းချလိုက်ရင်း ရှင်းပြလိုက်၏။

"အဆောင်လက်ဖွဲ့ဆရာ ထူနဲ့ အဆောင်လက်ဖွဲ့ဆရာ ယွီတို့ နှစ်ယောက်စလုံးက တစ်သီးပုဂ္ဂလ ကျင့်ကြံသူတွေရဲ့ အဖွဲ့တစ်ဖွဲ့နဲ့ ပူးပေါင်းပြီး ဖူလင်းပင်လယ် နယ်မြေဆီ သွားဖို့ ရွေးချယ်လိုက်ကြပြီ..."

"သူတို့ရဲ့ ဒီခရီးစဉ်က သေချာပေါက် သေလမ်းကို သွားနေတာပါပဲ..."

"ဆရာပိုင်ကတော့ တည်ငြိမ်ပြီး ပညာရှိလွန်းပါတယ်... ခွန်းလင်ဝိညာဉ်သိုက်ရဲ့ အခွင့်အရေးက ဆွဲဆောင်မှု ရှိပေမယ့် လူတိုင်း ဝင်ပါလို့ ရတဲ့အရာမှ မဟုတ်တာ..."

စုယွီ၏ တာအို ရုပ်သေးက အကြည့်ကို ပြန်ရုပ်သိမ်းလိုက်ပြီး ခေါင်းကို အနည်းငယ် ရမ်းပြကာ တုံ့ပြန်လိုက်၏။

"အဆောင်လက်ဖွဲ့ဆရာ ထူနဲ့ အဆောင်လက်ဖွဲ့ဆရာ ယွီတို့က လွန်ခဲ့တဲ့ အချိန်အတန်ကြာကတည်းက သူတို့ရဲ့ သားမြေးတွေအတွက် အပြင်မြို့တော်မှာ ဒုတိယအဆင့် ဂူစံအိမ် တစ်ခု ဝယ်ပေးပြီး စီစဉ်ပေးခဲ့ကြတာလေ..."

"ဒါ့အပြင် သူတို့ရဲ့ သက်တမ်းကလည်း သိပ်မကျန်တော့ဘူး... ဒီလို မစွန့်စားရင်တောင် သူတို့ သိပ်ကြာကြာ အသက်ရှင်ရတော့မှာ မဟုတ်ဘူးလေ..."

"ဒါကြောင့်မို့ ခွန်းလင်အသိုက်မှာ တစ်ခေါက်လောက် သွားပြီး စွန့်စားကြည့်တာက တန်ကောင်း တန်နိုင်ပါတယ်..."

"တခြားသူတွေ မလိုချင်တဲ့ အခွင့်အရေး အသေးအမွှားလေး တစ်ခုကို ရခဲ့ရင်တောင် အမြုတေ ဖွဲ့စည်း အဆင့်ကို ချိုးဖောက် ဝင်ရောက်ဖို့ လုံလောက်သွားပြီး ပြန်လာနိုင်ခဲ့ရင် ဒါက ကြီးမားတဲ့ အမြတ်အစွန်းကြီး တစ်ခုပဲပေါ့..."

"သေဆုံးသွားခဲ့ရင်တောင်... မိသားစု ကိစ္စတွေကို သေချာ စီစဉ်ပေးခဲ့ပြီးပြီ ဆိုတော့ နောင်တရစရာ မရှိတော့ဘူးပေါ့..."

စုယွီက ထိုကိစ္စများကို ပြောနေသည်ကို ကြားလိုက်ရသောအခါ ဆိုင်တာဝန်ခံမှာ သူ့ကို အံ့သြတကြီး လှမ်းကြည့်လိုက်မိသည်။

ခဏအကြာတွင် သူက ခေါင်းညိတ်လိုက်ပြီး ချီးကျူးလိုက်၏။

"ဆရာပိုင်က အရာရာကို ရှင်းရှင်းလင်းလင်း မြင်နိုင်တာပဲ..."

ထိုအချိန်တွင် စုယွီက ရုတ်တရက် မေးခွန်းတစ်ခု ထုတ်လိုက်၏။

"တာဝန်ခံ... အစောပိုင်းတုန်းက လူသားမျိုးနွယ်စုရဲ့ အစွမ်းထက် ပုဂ္ဂိုလ်ကြီး တစ်ပါး ရောက်လာပြီး ချန်ကျိုးနယ်မြေကို မိစ္ဆာမျိုးနွယ်စုနဲ့ ငြိမ်းချမ်းရေး ယူခိုင်းခဲ့တယ်လို့ ပြောခဲ့တယ်နော်... မိစ္ဆာမျိုးနွယ်စုရဲ့ ဒေါသကို မဆွမိစေဖို့နဲ့ ပဋိပက္ခ မဖြစ်စေဖို့အထိတောင် တားမြစ်ခဲ့တယ်လို့ ဆိုတယ်..."

"အခု ပင်လယ် နယ်မြေထဲမှာ ခွန်းလင်ဝိညာဉ်သိုက်ကြီး ပေါ်ထွက်လာပြီ... ဒီလို အခွင့်အရေးမျိုးကို ကျွန်တော်တို့ လူသားမျိုးနွယ် အင်မော်တယ်ဂိုဏ်းတွေအနေနဲ့ သွားရောက် ယှဉ်ပြိုင်ဖို့ တကယ်ပဲ အခွင့်အရေး ရှိသေးရဲ့လား..."

တာဝန်ခံမှာ အချိန်အတန်ကြာ ဆွံ့အသွားရှာတော့၏။

သည်မေးခွန်း၏ အဖြေကို သူက ဘယ်လို သိနိုင်မည်နည်း။

ထိုလူသားမျိုးနွယ် အစွမ်းထက် ပုဂ္ဂိုလ်ကြီးက မည်သူမည်ဝါ ဖြစ်ကြောင်းကိုပင် သူ မသိသလို ချန်ကုအင်မော်တယ်မြို့တော်ကို အဘယ်ကြောင့် ဤသို့ အမိန့်ပေးခဲ့သည်ကိုလည်း သူ မသိချေ။

သို့သော် စုယွီ၏ မေးခွန်းကို ကြားလိုက်ရသောအခါ ဆိုင်တာဝန်ခံ ကိုယ်တိုင်လည်း အနည်းငယ် စိုးရိမ်ပူပန်သွားမိသည်။

'ဘာပြဿနာမှတော့ မရှိလောက်ပါဘူးနော်...'

*

ဖူလင်းပင်လယ် နယ်မြေ။

ချင်းရွှမ်အင်မော်တယ်ဂိုဏ်း။

စုယွီသည် ချင်းရွှမ်အင်မော်တယ်ဂိုဏ်း အတွင်းရှိ ဂူကောင်းကင် လျှို့ဝှက်နယ်မြေ ဆီသို့ တိတ်တဆိတ် ပြန်လာခဲ့သည်။

“ဖျောက်”

လက်တစ်ချက် ဝှေ့ယမ်းလိုက်ရာ ယွင်ချန်လက်စွပ် အတွင်းမှ ပင်လယ်မျိုးနွယ်စု၏ အဆင့်ငါး အဆင့်နိမ့် မိစ္ဆာအရှင်သခင် တစ်ပါး၏ ရုပ်အလောင်း ထွက်ပေါ်လာ၏။ ဂဏန်းမိစ္ဆာ တစ်ကောင်နှင့် တူသော ထိုသားရဲ၏ မူလဝိညာဉ်ကို သူက အပြည့်အဝ ဖမ်းဆီးချုပ်နှောင်ပြီး သယ်ဆောင်လာခဲ့လေသည်။

၎င်းမှာ ခြောက်လအတွင်း ဖူလင်းပင်လယ် နယ်မြေ ၌ သူ အမဲလိုက် သတ်ဖြတ်ခဲ့သော တတိယမြောက် ပင်လယ်မျိုးနွယ်စု မိစ္ဆာအရှင်သခင် ပင် ဖြစ်၏။

ဤခြောက်လတာ ကာလအတွင်း ချင်းရွှမ်ကျွန်းစု အနီးတစ်ဝိုက်ရှိ ပင်လယ်မျိုးနွယ်စုများ၏ အခြေအနေကို စောင့်ကြည့်လေ့လာခဲ့ရာ ပင်လယ်မျိုးနွယ်စု အစွမ်းထက် ပုဂ္ဂိုလ်ကြီး အများစုမှာ သူတို့၏ နယ်မြေများကို စွန့်ခွာသွားကြကြောင်း တွေ့ရှိခဲ့ရသည်။

ရွှမ်လိပ်မျိုးနွယ်စု နယ်မြေရှိ ခွန်းလင်ဝိညာဉ်သိုက် အတွင်းမှ အခွင့်အရေးများကို လုယူရန် ထွက်ခွာသွားကြသဖြင့် သူတို့၏ မူလနယ်မြေ ကာကွယ်ရေးမှာ အလွန်တရာ အားနည်းနေခဲ့ပြီပင်။

ဤအခြေအနေများကြောင့် စုယွီသည် ချင်းရွှမ်ကျွန်းစု နှင့် အနည်းငယ် ဝေးကွာသော ပင်လယ် နယ်မြေ အချို့ကို ရွေးချယ်ကာ နောက်ချန်ရစ်ခဲ့သော အဆင့်ငါး မိစ္ဆာအရှင်သခင် များကို လိုက်လံ အမဲလိုက် သတ်ဖြတ်ခဲ့သည်။

လမ်းခရီးတစ်လျှောက်တွင် ပင်လယ်မျိုးနွယ်စု၏ ရတနာတိုက်အချို့ကိုပါ သူ ဝင်ရောက် လုယက်ခဲ့သေး၏။ နယ်မြေဖြတ်ကျော် နေရာရွှေ့ပြောင်းအခင်းအကျင်း တစ်ခုအတွက် လိုအပ်သော ဟင်းလင်းပြင် ကျောက်တုံးများ ကဲ့သို့သော ပစ္စည်းများကို အဆုံးတွင် အပြည့်အစုံ စုဆောင်းနိုင်ခဲ့လေပြီ။

"ဝှီး..."

စုယွီက တင်ပျဉ်ခွေ ထိုင်ချလိုက်ပြီး နတ်ဘုရားဖြစ်တည်ခြင်းသိုင်းကျမ်း ကို စတင် လည်ပတ်စေကာ သူ၏ ရှေ့မှောက်ရှိ မိစ္ဆာအရှင်သခင် ၏ ခန္ဓာကိုယ်ကို စတင် သန့်စင်လိုက်၏။ ၎င်းကို မူလစွမ်းအားအဖြစ် ဖန်တီးပြီး ကိုယ်ပိုင် ကျင့်ကြံခြင်းကို အထောက်အကူပြုရန် အသုံးပြုလိုက်၏။

အချိန်များ ဖြည်းညင်းစွာ ကုန်ဆုံးသွားပြီး တစ်လမပြည့်မီ အချိန်အတွင်းမှာပင် စုယွီသည် မိစ္ဆာအရှင်သခင် ၏ မူလဝိညာဉ် ကို အပြည့်အဝ သန့်စင်လိုက်နိုင်သည်။ သူ၏ ခန္ဓာကိုယ်အတွင်းရှိ ချီစွမ်းအားများမှာ ကြီးမားသော တိုးတက်မှု တစ်ရပ်ကို ထပ်မံ ရရှိသွားကာ သိသိသာသာ မြင့်တက်လာခဲ့သည်။

သူ၏ ခန္ဓာကိုယ် ပတ်လည်ရှိ အရှိန်အဝါများက တဖြည်းဖြည်း အတွင်းသို့ စုစည်းဝင်ရောက်သွား၏။ သူ၏ ကျွမ်းကျင်မှု မျက်နှာပြင်အား စစ်ဆေးကြည့်လိုက်၏။

[ကျင့်ကြံခြင်း သိုင်းကျမ်း - ဓာတ်ကြီးငါးပါးကျင့်စဉ် (မူလဝိညာဉ်အဆင့် ကိုးဆင့်၊ ကျွမ်းကျင်မှု ၂၄.၈၅ ရာခိုင်နှုန်း)]

ဝိညာဉ်ခွဲထွက်အဆင့် သို့ တက်လှမ်းရန် လိုအပ်သော ကျွမ်းကျင်မှု၏ လေးပုံတစ်ပုံကို စုဆောင်းရရှိပြီး ဖြစ်၏။

ဤနှစ်အနည်းငယ်အတွင်း ကျင့်ကြံခြင်းက အနည်းဆုံး ဆယ်နှစ် သို့မဟုတ် ထို့ထက်ပို၍ တံခါးပိတ် ကျင့်ကြံခြင်းနှင့် ညီမျှနေခဲ့ပြီ ဖြစ်၏။

"နတ်ဘုရားဖြစ်တည်ခြင်းသိုင်းကျမ်း ကို သုံးပြီး နောက်ထပ် မိစ္ဆာအရှင်သခင် ဆယ်ကောင် ဒါမှမဟုတ် ရှစ်ကောင်လောက်ရဲ့ ကျင့်ကြံခြင်းကို လုယူပြီးသွားရင် ဝိညာဉ်ခွဲထွက်အဆင့် က သိပ်မဝေးတော့ဘူး ထင်ပါရဲ့..."

စုယွီက သူ၏ မျက်လုံးများထဲတွင် ရောင်စုံအလင်းတန်း ငါးဖြာ တလက်လက် တောက်ပလာကာ မျှော်လင့်ချက်များ ပိုမို ကြီးမားလာရင်း ရေရွတ်လိုက်၏။

ခွန်းလင်ဝိညာဉ်သိုက် ပေါ်ထွက်လာခြင်းနှင့်အတူ ဖူလင်းပင်လယ် နယ်မြေ ရှိ ပင်လယ်မျိုးနွယ်စု အင်အားစု အများစုမှာ ခွန်းလင်ဝိညာဉ်သိုက် ရှိရာသို့ ပြောင်းရွှေ့သွားခဲ့ကြပြီ ဖြစ်သည်။

ကျန်ရစ်ခဲ့သော အင်အားစုများမှာ အားနည်းလှပြီး အများဆုံး အဆင့်ငါး မိစ္ဆာအရှင်သခင် နှစ်ပါး၊ သုံးပါးခန့်သာ စောင့်ကြပ်ရန် ကျန်ရစ်ခဲ့သည်။

ထိုသို့သော အခြေအနေမျိုးတွင် သူက ၎င်းတို့ကို တစ်ကောင်ပြီးတစ်ကောင် လိုက်လံ အမဲလိုက်နိုင်၏။

ပင်လယ်မျိုးနွယ်စုများ သတိမထားမိမီ အချိန်လေးတွင်ပင် စုယွီက သူ၏ ရည်မှန်းချက်ကို အောင်မြင်စွာ အကောင်အထည်ဖော်ပြီး ဆုတ်ခွာသွားနိုင်ပေလိမ့်မည်။

ဖူလင်းပင်လယ် နယ်မြေ ရှိ ပင်လယ်မျိုးနွယ်စု ၏ အဆင့်ငါး မိစ္ဆာအရှင်သခင် များကို အမဲလိုက်ခြင်းဖြင့် ပင်လယ်မျိုးနွယ်စု ၏ အင်အားကို အားနည်းသွားစေရန်လည်း အခွင့်အရေး ယူနိုင်၏။

ဤနည်းအားဖြင့် ခွန်းလင်ဝိညာဉ်သိုက် နေရာဟောင်း၏ ကိစ္စရပ်များ ပြီးဆုံးသွားပြီးနောက် ရွှမ်လိပ်မျိုးနွယ်စု သည် တာ့ချန် ကျင့်ကြံခြင်း ကမ္ဘာ အပေါ်သို့ ကြီးမားသော စစ်ပွဲကြီးတစ်ခု ထပ်မံ ဖန်တီးနိုင်စွမ်း ရှိတော့မည် မဟုတ်ပေ။

ထိုအကြောင်းအရာများကို စဉ်းစားသုံးသပ်ပြီးနောက် စုယွီသည် တံခါးပိတ်ကျင့်ကြံခြင်းမှ ထွက်ပေါ်လာခဲ့သည်။

ယခင်က သတင်းအချက်အလက်များ စုံစမ်းရန် ရွှမ်ထျန်းအင်မော်တယ်ဂိုဏ်း သို့ သွားရောက်ခဲ့သော တာအိုဆရာ ချင်းရွှမ် လည်း ပြန်လည်ရောက်ရှိနေပြီ ဖြစ်၏။ စုယွီ တံခါးပိတ်ကျင့်ကြံခြင်းမှ ထွက်ပေါ်လာပြီးနောက် သူက စုယွီအား အရိုအသေပေးရန် အလျင်စလို ရောက်ရှိလာခဲ့သည်။

*

ချင်းရွှမ်အင်မော်တယ်နန်းတော်။

စုယွီက စားပွဲတစ်လုံး၏ နောက်တွင် ထိုင်နေပြီး ကောင်းနျန်အာ နှင့် တာအိုဆရာမ ချင်းယွီ တို့က သူ့ဘေး တစ်ဖက်တစ်ချက်စီတွင် ရိုသေစွာဖြင့် ခစားနေကြသည်။ တစ်ယောက်က ဝိညာဉ်သစ်သီးများ ပြင်ဆင်ပေးနေပြီး အခြားတစ်ယောက်က ဝိညာဉ်လက်ဖက်ရည် ဖျော်စပ်ပေးနေ၏။

သူ၏ရှေ့မှောက်တွင် တာအိုဆရာ ချင်းရွှမ် က ရိုသေစွာဖြင့် ခေါင်းကို ငုံ့ထားကာ သူ၏အကြည့်ကို ကြမ်းပြင်ပေါ်တွင်သာ စိုက်ထား၏။ စုယွီအား ခစားနေသော တာအိုဆရာမ ချင်းယွီ နှင့် ကောင်းနျန်အာ ကိုပင် လှမ်းမကြည့်ရဲပေ။

တာအိုဆရာ ချင်းရွှမ် ၏ အစီရင်ခံစာကို နားထောင်ရင်း စုယွီ၏ မျက်ခုံးများ အနည်းငယ် တွန့်ကွေးသွားပြီးနောက် သူက မေးမြန်းလိုက်၏။

"ဒါဆို... မင်း ပြောချင်တာက ကုန်းတွင်းပိုင်း အင်မော်တယ်ဂိုဏ်းတွေက အင်အားစု အများအပြား ရွှမ်ထျန်း အင်မော်တယ်ကျွန်း ဆီကို ရောက်နေကြပြီပေါ့..."

"ချန်ကျိုးနယ်မြေ ကတင် မဟုတ်ဘူးလား..."

တာအိုဆရာ ချင်းရွှမ် က ခေါင်းညိတ်လိုက်ပြီး ရိုသေစွာ ပြန်ဖြေလိုက်၏။

"ဟုတ်ပါတယ် စီနီယာကြီး... အစတုန်းက ရွှမ်ထျန်း အင်မော်တယ်ကျွန်း ကို အင်အားစု ဘယ်လောက် ရောက်လာလဲဆိုတာ ရေတွက်ကြည့်ချင်ခဲ့တာ... ဒါပေမယ့် နောက်ပိုင်းကျတော့ သူတို့ရဲ့ အရေအတွက်က သိပ်ကို များလွန်းလို့ ကျွန်တော် လုံးဝ မရေတွက်နိုင်တော့ဘူး..."

စုယွီက အကြောင်းအရာ များစွာကို မေးမြန်းခဲ့ပြီးနောက် မြေကမ္ဘာအင်မော်တယ်စံအိမ် အပါအဝင် ချန်ကျိုးနယ်မြေ မှ အင်မော်တယ်ဂိုဏ်း အင်အားစု အများအပြား ရွှမ်ထျန်း အင်မော်တယ်ကျွန်း သို့ ဆင်းသက်လာကြကြောင်း သိရှိခဲ့ရသည်။

သူတို့က ခွန်းလင်ဝိညာဉ်သိုက် ယူဆောင်လာမည့် အခွင့်အရေးကို ယှဉ်ပြိုင်လုယူရန် ဖူလင်းပင်လယ် နယ်မြေ အတွင်းပိုင်းအထိ ဝင်ရောက်သွားကြခြင်း ဖြစ်၏။

သူ၏ မျက်ခုံးများ တွန့်ကွေးသွားသော်လည်း မကြာမီ ပြန်လည် ပြေလျော့သွားတော့သည်။

ခွန်းလင်ဝိညာဉ်သိုက် ၏ ကံကြမ္မာက ခန့်မှန်းရ ခက်ခဲလှသည်။ အတွင်းထဲတွင် ကောင်းကင်ကို အန်တုနိုင်မည့် အခွင့်အရေး အချို့ ရှိနေနိုင်သည် ဆိုသည်မှာ မဖြစ်နိုင်သောအရာ မဟုတ်ပေ။

မြေကမ္ဘာအင်မော်တယ်စံအိမ် က ဤအဖြစ်အပျက်များကို သိရှိနေမှတော့ သူတို့က သေချာပေါက် လက်လွတ်ခံမည် မဟုတ်ချေ။

ဤကဲ့သို့သော အခွင့်အရေးတွင် ပါဝင်ဆင်နွှဲသူများ အနေဖြင့် အန္တရာယ်နှင့် ရင်ဆိုင်ရမည်လား သို့မဟုတ် အကျိုးအမြတ် ရရှိမည်လား ဆိုသည်ကိုတော့... သူ မသိနိုင်ပေ။

ထို့ပြင် သူက သူတို့ကို အကြောင်းပြချက် မရှိဘဲ ထင်သလို တားဆီးပိတ်ပင်၍လည်း မရနိုင်ချေ။

ခွန်းလင်ဝိညာဉ်သိုက် တွင် အခွင့်အရေး ရယူလိုသော ကောင်းယွမ်ယွမ် ကို သူ မတားပါ။

လွန်ခဲ့သော အချိန်အတန်ကြာက ကောင်းယွမ်ယွမ် သည် ခွန်းလင်ဝိညာဉ်သိုက် တွင် ကံစမ်းရန် ရွှမ်ထျန်း အင်မော်တယ်ကျွန်း သို့ သွားရောက်ခဲ့၏။ သူမထံတွင် စုယွီ ချီးမြှင့်ထားသော အဆောင်လက်ဖွဲ့များ၊ အခင်းအကျင်းများနှင့် အခြား ရတနာအချို့ ပါသွားခဲ့သည်။

ကောင်းနျန်အာ က စုယွီ အတွက် ဝိညာဉ်လက်ဖက်ရည် တစ်ခွက် ငှဲ့ပေးလိုက်ပြီး တာအိုဆရာမ ချင်းယွီ ကမူ အကောင်းဆုံး ဝိညာဉ်သစ်သီးကို စုယွီ၏ နှုတ်ခမ်းဝသို့ ခွံ့ကျွေးလိုက်၏။

ထပ်မံ မေးမြန်းစုံစမ်းပြီးနောက် စုယွီက တာအိုဆရာ ချင်းရွှမ် ကို ထွက်ခွာခွင့် ပြုလိုက်ပြီး ရွှမ်ထျန်း အင်မော်တယ်ကျွန်း တွင် ခွန်းလင်ဝိညာဉ်သိုက် ၏ အခြေအနေနှင့် ပတ်သက်သည့် သတင်းအချက်အလက်များကို ဆက်လက် စုဆောင်းရန် ညွှန်ကြားလိုက်၏။

ခွန်းလင်ဝိညာဉ်သိုက် ရှိ မဟာတိုက်ပွဲကြီး စတင်သည်နှင့် တစ်ပြိုင်နက် ချက်ချင်း ပြန်လာပြီး အစီရင်ခံရန်လည်း မှာကြားလိုက်သည်။

*

ရှားပါးလှသော အားလပ်ချိန်လေး တစ်ခုပင်။

စုယွီသည် အင်မော်တယ်နန်းတော် အတွင်း၌ နေ့ဝက်ခန့် နေထိုင်ပြီးနောက် ဆက်လက် တံခါးပိတ်ကျင့်ကြံရန် ဂူစံအိမ်ဆီသို့ ပြန်သွားခဲ့သည်။

အချိန်များ ကုန်ဆုံးသွားသည်နှင့်အမျှ ချင်းရွှမ်ကျွန်းစု ပင်လယ် နယ်မြေ သည် ရွှမ်လိပ်မျိုးနွယ်စု ၏ ခွန်းလင်ဝိညာဉ်သိုက် နှင့် အလွန်တရာ ဝေးကွာနေသော်လည်း ပင်လယ်ပြင်ထက်ရှိ လေးလံသော လေထုကြီးက ချင်းရွှမ်ကျွန်းစု ဆီသို့ ပျံ့နှံ့လာကာ လူတိုင်း၏ ရင်ထဲတွင် တိမ်မည်းကြီး တစ်အုပ် ဖုံးလွှမ်းလာသကဲ့သို့ ခံစားလာကြရသည်။

နောက်ထပ် တစ်နှစ် ကုန်ဆုံးသွားခဲ့၏။

ရွှေကျားဝိညာဉ်ငါးမန်းမျိုးနွယ်စု နယ်မြေ။

လူရိပ်တစ်ခုက တိတ်တဆိတ် ရောက်ရှိလာပြီး လက်တစ်ချက် ဝှေ့ယမ်းလိုက်ကာ အစွမ်းထက်သော အခင်းအကျင်း များစွာ တည်ဆောက်လိုက်၏။ ဟင်းလင်းပြင်နှင့် အချိန် နယ်မြေများက ကောင်းကင်နှင့် မြေကြီးကို ဖုံးလွှမ်းသွားပြီး နယ်မြေအတွင်းရှိ အချိန်စီးဆင်းမှုက ဂယက်ထကာ နှေးကွေးသွားတော့၏။

ရှေ့ရှိ ဂူစံအိမ် တစ်ခုအတွင်း ဝိညာဉ်ရေကန်၏ အောက်ခြေတွင် နက်ရှိုင်းစွာ တရားထိုင်နေသော အဆင့်ငါး အထွတ်အထိပ် ရွှေကျားဝိညာဉ်ငါးမန်းမျိုးနွယ်စု မှ မိစ္ဆာအရှင်သခင် ရုတ်တရက် နိုးထလာခဲ့သည်။

ခေါင်းကို မော့ကာ ကြွေးကြော်လိုက်ချိန်မှာပင်...

"ဝုန်း..."

နောက်တစ်ခဏတွင် ဆေးမီးဖိုကြီး တစ်ခုက ၎င်း၏ ခေါင်းပေါ်သို့ ကျဆင်းလာခဲ့သည်။

ဟင်းလင်းပြင်က မျက်စိတစ်မှိတ်အတွင်း ကွဲအက်သွားပြီး ဖျက်ဆီးခြင်း စွမ်းအားများက အဆင့်ငါး အထွတ်အထိပ် ရွှေကျားဝိညာဉ်ငါးမန်းမျိုးနွယ်စု မိစ္ဆာအရှင်သခင် ၏ ကာကွယ်ရေးများကို ဆုတ်ဖြဲပစ်လိုက်၏။ အသားနှင့် သွေးများ လွင့်စင်သွားကာ ၎င်း၏ ဦးခေါင်းခွံမှာ ဂျွတ်ခနဲ မြည်ရင်း ကွဲအက်သွားတော့သည်။

"ဒိုင်း..."

ဆေးမီးဖိုကြီး၏ ဖိအားအောက်တွင် ဧရာမ ခန္ဓာကိုယ်ကြီးက မြေပြင်ပေါ်သို့ ပြုတ်ကျသွားပြီး ဂူစံအိမ် တစ်ခုလုံးကို ပြင်းထန်စွာ တုန်ခါသွားစေသည်။

ဟင်းလင်းပြင် စွမ်းအားများ၏ ကြောက်မက်ဖွယ်ကောင်းသော စွမ်းအားက အဆင့်ငါး အထွတ်အထိပ် ရွှေကျားဝိညာဉ်ငါးမန်းမျိုးနွယ်စု မိစ္ဆာအရှင်သခင် ကို တွေဝေသွားစေပြီး ၎င်း၏ အောက်ရှိ မြေပြင် ပြိုကျသွားချိန်တွင် ခေါင်းမူးမိုက်သွားစေ၏။

အထက်တွင်မူ လူရိပ်၏ လက်ထဲ၌ မီးတောက်အလင်းတန်း တစ်ခု ပေါ်ထွက်လာသည်။

အလွန်တရာ အင်အားကြီယ အင်မော်တယ် အရှိန်အဝါ ကိန်းဝပ်နေသော အင်မော်တယ် လေးတစ်လက် ပေါ်ထွက်လာတော့သည်။