အခန်း ၉၁၂

အခန်း (၉၁၂) - အင်မော်တယ်တာအို၏ ကံကြမ္မာအခွင့်အရေးများ၊ လရောင် နတ်ဘုရား သိုင်းကျမ်း (အပိုင်း - ၂)

သို့သော် မျိုးနွယ်စုခေါင်းဆောင်၏ အမိန့်တံဆိပ်ပြားကို အသုံးပြုကာ ရတနာတိုက်၏ အခင်းအကျင်းကို ပူးပေါင်းဖွင့်လှစ်လိုက်ချိန်တွင်မူ အတွင်း၌ ဘာဆိုဘာမျှ မရှိတော့ဘဲ လုံးဝ ဟာလာဟင်းလင်း ဖြစ်နေသည်ကို တွေ့လိုက်ကြရ၏။

"ရတနာတိုက်ရဲ့ အချက်ပေးအခင်းအကျင်းကို ဘယ်သူ ဖြတ်ကျော်သွားတာလဲ..."

အဆင့်ငါး မိစ္ဆာအရှင်သခင်တစ်ပါးက ဒေါသတကြီး ဟိန်းဟောက်လိုက်၏။

"မြန်မြန်... ဘာတွေ ပျောက်သွားလဲဆိုတာ အမြန်စစ်ဆေးကြစမ်း..."

ရှာဖွေမှုများ ပြုလုပ်ပြီးနောက် ရွှေကျားဝိညာဉ်ငါးမန်းမျိုးနွယ်စုမှ မိစ္ဆာအရှင်သခင် လေးပါးသည် လျှို့ဝှက်အခင်းအကျင်းရှေ့တွင် ရပ်တန့်သွားကြ၏။ ဟာလာဟင်းလင်း ဖြစ်နေသော နေရာလွတ်ငယ်လေးကို ကြည့်ကာ သူတို့၏ မျက်နှာအမူအရာများက အလွန်တရာ အကျည်းတန် ရုပ်ဆိုးသွားတော့သည်။

"မပြည့်စုံတဲ့ စာရွက်အပိုင်းအစလေး ပျောက်သွားပြီ..."

"ထပ်ရှာကြစမ်း... ငါတို့ မျိုးနွယ်စုပိုင်နက်တစ်ခုလုံးကို နှံ့စပ်အောင်ရှာ... အဲဒီ ခွေးသူခိုးကို မရရအောင် ရှာကြစမ်း..."

မိစ္ဆာအရှင်သခင်များက တစ်ပါးပြီးတစ်ပါး ဒေါသတကြီး ကြွေးကြော်လိုက်ကြရာ ရွှေကျားဝိညာဉ်ငါးမန်းမျိုးနွယ်စု တစ်ခုလုံး ဆူပူအုံကြွသွားတော့၏။

ရက်အတော်ကြာအောင် ရှာဖွေပြီးသည့်တိုင်အောင် မည်သည့်အရာကိုမျှ မတွေ့ရှိခဲ့ကြပေ။

သူတို့ သိရှိထားသည်မှာ ရတနာတိုက်အတွင်းမှ အလွန် အရေးကြီးသော ရတနာတစ်ခု ပျောက်ဆုံးသွားကြောင်းသာ ဖြစ်သည်။ ထိုအရာက သူတို့၏ မျိုးနွယ်စုခေါင်းဆောင် ရှေးဟောင်းအပျက်အစီးနယ်မြေမှ ရရှိခဲ့ပြီး ရတနာတိုက်၏ ဗဟိုအခင်းအကျင်းတွင် သိုဝှက်ထားခဲ့သော အမွေအနှစ်တစ်ခု ဖြစ်၏။

"နေပါဦး... ဒုတိယအကြီးအကဲရော ဘယ်ရောက်နေလဲ... သူ ဘာလို့ ထွက်မလာသေးတာလဲ..."

ထိုအခိုက်အတန့်တွင် ရွှေကျားဝိညာဉ်ငါးမန်းမျိုးနွယ်စုမှ မိစ္ဆာအရှင်သခင်တစ်ပါးက ရုတ်တရက် သတိပြုမိသွားကာ မေးမြန်းလိုက်၏။

မျိုးနွယ်စုနယ်မြေကို စောင့်ကြပ်ရန် ကျန်ရစ်ခဲ့သော အကြီးအကဲငါးပါးစလုံးသည် ပြဿနာဖြစ်ဖြစ်ချင်း အပြေးအလွှား ထွက်လာခဲ့ကြ၏။ ဂုဏ်သတင်းအကြီးမားဆုံးဖြစ်သည့် ဒုတိယအကြီးအကဲ တစ်ပါးတည်းသာလျှင် အရိပ်အယောင်မျှပင် မတွေ့ရပေ။

ယခင်က ရတနာတိုက်ကိစ္စကြောင့် သူတို့သည် သတိမထားမိဘဲ တုံ့ပြန်နိုင်စွမ်း ကင်းမဲ့နေခဲ့ကြသည်။ သို့သော် ရက်အတော်ကြာ ရှာဖွေပြီးနောက် ရင်တွင်းမှ ကြမ်းကြုတ်သော ဒေါသများ အနည်းငယ် ငြိမ်သက်သွားချိန်တွင် သူတို့၏ စိတ်အာရုံများ ကြည်လင်လာပြီး ဒုတိယအကြီးအကဲ ပျောက်ဆုံးနေဆဲဖြစ်ကြောင်းကို ထိတ်လန့်တကြား သတိပြုမိသွားကြတော့၏။

ဤအချက်ကို သဘောပေါက်သွားသည်နှင့် သူတို့၏ မျက်နှာအမူအရာများက သိသိသာသာ ပြောင်းလဲသွားကြသည်။ ထို့နောက် ဒုတိယအကြီးအကဲ တံခါးပိတ်ကျင့်ကြံနေသော ဂူစံအိမ်ဆီသို့ အပြေးအလွှား သွားရောက်ကြတော့သည်။

အပြင်ဘက်မှ အတန်ကြာအောင် ခေါ်ဝေါ်နေသော်လည်း ဒုတိယအကြီးအကဲ ထွက်လာမည့် အရိပ်အယောင် မတွေ့ရသလို တုံ့ပြန်သံလည်း မကြားရပေ။ နောက်ဆုံးတွင် သူတို့သည် အင်အားသုံး၍ ဖောက်ဝင်ရန်မှတစ်ပါး အခြားရွေးချယ်စရာ မရှိတော့ချေ။

သူတို့အားလုံး ပူးပေါင်းကာ ဒုတိယအကြီးအကဲ၏ ဂူစံအိမ်အခင်းအကျင်းကို ဖျက်ဆီးရန်အတွက် သုံးရက်နီးပါးခန့် အချိန်ယူလိုက်ရ၏။

အခင်းအကျင်း ကျိုးပေါက်သွားသည်နှင့် တစ်ပြိုင်နက် အတွင်း၌ ပြိုကျပျက်စီးနေသော အပျက်အစီးများကိုသာ တွေ့လိုက်ကြရသည်။ တိုက်ပွဲမြေပြင်ကို ရှင်းလင်းထားပြီးဖြစ်ကြောင်း ထင်ရှားနေပြီး မြေပြင်ပေါ်ရှိ အက်ကွဲကြောင်းများမှလွဲ၍ အခြားခြေရာလက်ရာအားလုံးကို ဖျောက်ဖျက်ထားခဲ့ပြီ ဖြစ်၏။

လေထုထဲတွင် ချီစွမ်းအင် သို့မဟုတ် မိစ္ဆာစွမ်းအင်၏ အရိပ်အယောင် အနည်းငယ်မျှပင် ကျန်ရှိမနေတော့ချေ။

ရွှေကျားဝိညာဉ်ငါးမန်းမျိုးနွယ်စုမှ မိစ္ဆာအရှင်သခင်များ၏ မျက်နှာများ အကြီးအကျယ် ပြောင်းလဲသွားကြပြီး အလန့်တကြား အော်မိလိုက်ကြသည်။

"ဒုက္ခပဲ... ဒုတိယအကြီးအကဲ အန္တရာယ်ကြုံသွားပြီ..."

အခြားတစ်ဖက်တွင်မူ... စုယွီက ဝေးကွာလှသော ချင်းရွှမ်ကျွန်းစုရှိ ချင်းရွှမ်အင်မော်တယ်ဂိုဏ်း၏ ဂူကောင်းကင်လျှို့ဝှက်နယ်မြေသို့ တိတ်တဆိတ် ပြန်လည်ရောက်ရှိနေခဲ့ပြီ ဖြစ်သည်။ ဂူစံအိမ်အတွင်း၌ အရှိန်အဝါကို ဖုံးကွယ်ရန် အဆင့်ငါး အဆင့်နိမ့် အခင်းအကျင်း အချို့ကို အသက်သွင်းလိုက်၏။

ဟင်းလင်းပြင်ကြေးအိုးငယ်ကိုပါ ဆင့်ခေါ်လိုက်ပြီး သူ့ပတ်ဝန်းကျင်ရှိ လေဟာနယ်ကို ချိတ်ပိတ်ရန် ဟင်းလင်းပြင် တာအို နယ်မြေ စွမ်းအားကို အသုံးပြုလိုက်၏။

အရာအားလုံး နေရာတကျ ရှိသွားပြီးနောက် စုယွီက ယွင်ချန်လက်စွပ်ထဲမှ ငွေဖြူရောင် စာရွက်အပိုင်းအစကို ထုတ်ယူလိုက်၏။

ထိုစာရွက်အပိုင်းအစထံမှ အနည်းငယ် ရင်းနှီးနေသော အင်မော်တယ်အရှိန်အဝါများ ထွက်ပေါ်လာသည်ကို အာရုံခံမိပြီး သူ အံ့ဩသွားရသည်။

ထင်ရှားပေါ်လွင်ခြင်း ၊ ဖိနှိပ်လွှမ်းမိုးခြင်း မရှိသော်လည်း ၎င်းက အဆုံးအစမဲ့ ကျယ်ပြောလှကာ တွေ့မြင်ရသူတိုင်းကို ရိုသေလေးစားသွားစေနိုင်လောက်၏။

'ဒါက အင်မော်တယ်အမွေအနှစ်များ ဖြစ်နေမလား...'

စုယွီ တကိုယ်တည်း တိုးတိုးရေရွတ်လိုက်၏။

သူ၏ စိတ်အာရုံက စာရွက်ကို ထိတွေ့ရန် ကြိုးပမ်းလိုက်သော်လည်း မည်သည့်တုံ့ပြန်မှုမှ မရှိချေ။

သူ၏ နတ်ဘုရားဝိညာဉ်က စာရွက်ကို လွှမ်းခြုံထားသော်လည်း စာရွက်ကပင် လျှို့ဝှက်ဆန်းကြယ်သော စွမ်းအားတစ်ခုကို ထိန်းသိမ်းထားဆဲ။ အရာအားလုံးကို ပိတ်ဆို့ထားကြောင်း စုယွီ ခံစားမိနေသည်။

ဤစွမ်းအားကို မချေဖျက်နိုင်သရွေ့ ၎င်းအတွင်းရှိ လျှို့ဝှက်ဆန်းကြယ်သော အင်မော်တယ်အမွေအနှစ်ကို သူ မရယူနိုင်

ဤအချက်ကို သဘောပေါက်သွားသောအခါ စုယွီ၏ ရင်တွင်း၌ လှုပ်ခတ်သွားသည်။ သူ၏ စိတ်အာရုံက ဒန်တျန်အတွင်းရှိ တာ့ယွဲ့ လျှို့ဝှက်နယ်မြေမှ သူရရှိခဲ့သော အင်မော်တယ်စာသား အပိုင်းအစလေးကို သွားရောက်ထိတွေ့လိုက်၏။

သူ၏ နတ်ဘုရားဝိညာဉ်ကို လွှမ်းခြုံထားရန်အတွက် ထိုအပိုင်းအစလေးအတွင်းရှိ အကြွင်းအကျန် အင်မော်တယ်အနှစ်သာရများကို အသက်သွင်းလိုက်သည်။ ထို့နောက် တစ်ဝက်နီးပါး ပျောက်ဆုံးနေသော ထိုမပြည့်စုံသည့် စာရွက်အပိုင်းအစဆီသို့ စုယွီက နောက်တစ်ကြိမ် လှမ်း၍ ထိတွေ့လိုက်ပြန်၏။

"ဝှီး..."

ထိုခဏတွင် စုယွီ၏ စိတ်အာရုံတစ်ခုလုံး တုန်ခါသွားတော့သည်။

တာအို နှလုံးသားနှင့် နတ်ဘုရားဝိညာဉ်ကိုပင် အေးခဲသွားစေနိုင်လောက်သည့် အလွန်တရာ အေးစက်လှသော ပင်လယ်နယ်မြေကြီးတစ်ခုအတွင်းသို့ ကျဆင်းသွားရသည့်နှယ်။

ပင်လယ်ရေများက တောက်ပလှသော အင်မော်တယ်အလင်းရောင်များ ထုတ်လွှတ်နေပြီး စုယွီကို အသက်ရှူရ ကြပ်သွားစေ၏။

စုယွီ၏ မျက်နှာအမူအရာ အနည်းငယ် ပြောင်းလဲသွားချိန်တွင် သူ၏ရှေ့ရှိ တောက်ပနေသော ရေများက တစ်စုတစ်စည်းတည်း ပေါင်းဆုံသွားသကဲ့သို့ ဖြစ်သွား၏။ ထို့နောက် အင်မော်တယ်စာသားများနှင့် တူသော အက္ခရာများအဖြစ်သို့ ပြောင်းလဲသွားကာ သူ၏ သိစိတ်ပင်လယ်ထဲသို့ အဟုန်ပြင်းစွာ ဝင်ရောက်လာတော့သည်။

"ဝုန်း..."

ခေါင်းတစ်ခုလုံး ပြင်းထန်စွာ နာကျင်ကိုက်ခဲသွား၏။ အချိန်မည်မျှကြာသွားသည်ကိုပင် စုယွီ မသိလိုက်ချေ။ တွေဝေရှုပ်ထွေးမှုများနှင့် ထိန်းချုပ်မှု ကင်းမဲ့နေသည့် ခံစားချက်များ အနည်းငယ် မှေးမှိန်သွားတော့မှသာ သူ သတိပြန်လည်လာတော့သည်။

[လရောင် နတ်ဘုရား မန္တန်။]

[လရောင် နတ်ဘုရားသိုင်းကျမ်း။]

အဆုံးအစမဲ့ ကျယ်ပြောလှသော အမွေအနှစ် သတင်း

အချက်အလက်များက စုယွီ၏ စိတ်ထဲသို့ လှိုင်းလုံးကြီးများအလား ဝင်ရောက်လာကာ သူ့အား ခေါင်းများ မူးဝေ ကိုက်ခဲနေစေဆဲပင်။

အချိန်အတော်ကြာပြီးနောက် စုယွီ၏ အာရုံများ တဖြည်းဖြည်း ပြန်လည်ကြည်လင်လာပြီး သူ၏ မျက်နှာအမူအရာကလည်း ဖြည်းညင်းစွာ ပြောင်းလဲသွား၏။

လရောင် နတ်ဘုရား သိုင်းကျမ်းက မပြည့်စုံချေ။

ထိုစာရွက်များတွင် ပထမ ခြောက်လွှာသာ ပါဝင်ပြီး ပကတိဟင်းလင်းပြင် အဆင့်အထိ ကျင့်ကြံနိုင်ကာ အခြား ရေစွမ်းအင်

တစ်မျိုးဖြစ်သည့် လရောင် စွမ်းအားကို ဖော်ထုတ်ပေးနိုင်စွမ်း ရှိသည်။

လရောင်နတ်ဘုရားမန္တန်..မပြည့်စုံချေ။

၎င်းမှာ ရေဝိညာဉ်၏ နတ်ဘုရားစွမ်းအား သိုင်းပညာရပ် တစ်ခု ဖြစ်ပြီး လရောင် နတ်ဘုရား သိုင်းကျမ်း၏ လရောင်ရေစင်ကို အသုံးပြုကာ မန္တန်များ ဖန်တီးနိုင်စွမ်းရှိသည်။

၎င်းက မူလဝိညာဉ် တစ်ခု၏ ဝိညာဉ်ကိုပင် အေးခဲစေပြီး တိုက်စား ဖျက်ဆီးပစ်နိုင်စွမ်း ရှိသည်။

လရောင်နတ်ဘုရားမန္တန်၏ မပြည့်စုံသော အမွေအနှစ်တစ်ခုသာ ဖြစ်သော်လည်း ဤမပြည့်စုံသော မန္တန်၏ စွမ်းအားကို စုယွီ အာရုံခံမိလိုက်၏။

သူ၏ လက်ရှိ အဆင့်ငါး ရွှေပုစဉ်းရင်ကွဲ နတ်ဘုရားဝိညာဉ် စွမ်းအားနှင့်ဆိုလျှင် ဝိညာဉ်ခွဲထွက် နှောင်းပိုင်းအဆင့် အရှင်သခင်များ၏ နတ်ဘုရားဝိညာဉ်များကိုပင် ခြိမ်းခြောက်နိုင်စွမ်းရှိကြောင်း စုယွီ သိလိုက်၏။

ဤသည်က ရွှေပုစဉ်းရင်ကွဲကျင့်စဉ်၏ သံသရာဘေးဒုက္ခ စိတ်ဝိညာဉ် တိုက်ကွက်နှင့် ခြားနားလေသည်။

သံသရာဘေးဒုက္ခက သန့်စင်သော ဝိညာဉ်နတ်ဘုရားစွမ်းအား သက်သက်သာ ဖြစ်၏။

လရောင်နတ်ဘုရားမန္တန်က ရေစွမ်းအင် နတ်ဘုရားစွမ်းအား ဖြစ်သည်။ ၎င်းက လရောင်ရေစင်ကို စုစည်းနိုင်ပြီး မူလဝိညာဉ်များနှင့် ဝိညာဉ်များကို တိုက်စား အေးခဲသွားစေနိုင်သည်။

၎င်းတို့မှာ ကွဲပြားခြားနားသော စွမ်းအားနှစ်မျိုး၏ နတ်ဘုရားစွမ်းအား သိုင်းပညာရပ်များ ဖြစ်ကြ၏။

စုယွီ၏ မျက်နှာအမူအရာ ပြောင်းလဲသွားပြီး သူက တီးတိုးရေရွတ်လိုက်၏။

"ကောင်းကင်နေမင်းသစ္စာတရားကျင့်စဉ်... နေရောင်ရေစင်က အသားနဲ့ အရိုးတွေကို တိုက်စားနိုင်တယ်... လရောင် နတ်ဘုရား သိုင်းကျမ်း... လရောင်ရေစင်ကကျတော့ မူလဝိညာဉ်တွေနဲ့ ဝိညာဉ်တွေကို တိုက်စားအေးခဲစေနိုင်တယ်..."

"ဒီကျင့်စဉ်နှစ်ခုက သာမန် ဆက်စပ်မှုမျိုး ရှိနေတာတော့ မဖြစ်နိုင်ဘူး..."

လရောင် နတ်ဘုရား သိုင်းကျမ်း၏ အမွေအနှစ်ကို သူ သေချာစွာ စဉ်းစားသုံးသပ်ကြည့်ရာ နေနှင့်လ၏ မွေးရာပါ သင်ကြားမှုများနှင့် ထူးကဲသော ဆက်စပ်မှုတစ်ခုကို ခံစားလိုက်ရ၏။

ဤကျင့်စဉ်နှစ်ခုကိုလည်း ပေါင်းစပ်နိုင်ကောင်း ပေါင်းစပ်နိုင်ပေလိမ့်မည်။

'ဆက်ပြီး ကျင့်ကြံရမယ်...'

'စကားမစပ်... ဒီလရောင် နတ်ဘုရား သိုင်းကျမ်းကို ဓာတ်ကြီးငါးပါးကျင့်စဉ်ထဲ ပေါင်းစပ်ထည့်သွင်းလို့ ရမလား ကြည့်ရမယ်... ပြီးတော့ ကောင်းကင်နေမင်းသစ္စာတရားကျင့်စဉ်နဲ့ ပေါင်းစပ်ပြီး ထူးခြားတဲ့ ရေစွမ်းအင် နှစ်မျိုးကို ကျင့်ကြံရမယ်...'

စုယွီသည် သူ၏ စိတ်အာရုံကို ရှင်းလင်းရန်အတွက် ရွှေပုစဉ်းရင်ကွဲကျင့်စဉ်ကို ဖော်ဆောင်လိုက်၏။

ထို့အပြင် ရွှေကျားဝိညာဉ်ငါးမန်းမျိုးနွယ်စုမှ မိစ္ဆာအရှင်သခင်၏ ခန္ဓာကိုယ်နှင့် မူလဝိညာဉ်ကိုပါ ထုတ်ယူလိုက်ပြီး နတ်ဘုရားဖြစ်တည်ခြင်းသိုင်းကျမ်းကို အသက်သွင်း သန့်စင်လိုက်၏။

၎င်း၏ မူလဝိညာဉ်ကို သန့်စင်နေစဉ်အတွင်း သူ ဖမ်းဆီးလာခဲ့သူမှာ မျိုးနွယ်စုနယ်မြေကို စောင့်ကြပ်ရန် ကျန်ရစ်ခဲ့သော ကျားငါးမန်းမျိုးနွယ်စု၏ ဒုတိယအကြီးအကဲ ဖြစ်ကြောင်း စုယွီ သိရှိသွား၏။

သူတို့၏ နောက်ထပ် ဒုတိယအကြီးအကဲဖြစ်သူ မိစ္ဆာအရှင်သခင်တစ်ပါးကို ထပ်မံသတ်ဖြတ်လိုက်ခြင်းကြောင့် ကျားငါးမန်းမျိုးနွယ်စုမှာ ကြီးမားသော ဆုံးရှုံးမှုကို ခံစားနေရမည်မှာ အသေအချာပင်။

ဤအရာများအပြင် အကျဉ်းချခံထားရသော လူသားမျိုးနွယ်စု ကျင့်ကြံသူလေးဦး၏ နောက်ခံများကိုပါ စုယွီ ရှာဖွေတွေ့ရှိလိုက်သည်။

၎င်းတို့အထဲမှ တစ်ယောက်မှာ လွန်ခဲ့သော နှစ်ပေါင်းသုံးရာကျော်က အင်မော်တယ်ဂိုဏ်း၏ ဖူလင်းပင်လယ်နယ်မြေရှိ ရှန်းရှင်းအင်မော်တယ်ကျွန်းမှ ထွက်ပေါ်လာခဲ့သော ပြိုင်ဘက်ကင်း ပါရမီရှင်တစ်ဦး ဖြစ်သည်။ ရှန်းရှင်းကောဟု လူသိများပြီး အသက်လေးရာ အရွယ်၌ပင် အဆင့်ငါး ရှေးဟောင်းအင်မော်တယ်ခန္ဓာ

သန့်စင်ကျင့်စဉ်ကို ကျင့်ကြံအောင်မြင်ထားသူ ဖြစ်၏။

သူ၏ ရုပ်ခန္ဓာဖြင့်ပင် သတ်ဖြတ်နိုင်စွမ်းရှိပြီး အဆင့်ငါး မိစ္ဆာအရှင်သခင်များနှင့်ပင် ယှဉ်ပြိုင်တိုက်ခိုက်နိုင်စွမ်း ရှိသည်။ ကျင့်ကြံခြင်းအဆင့်တူသူများကြားတွင် အရှုံးမရှိ အနေအထားကိုပင် ပြသနိုင်ခဲ့၏။

ကျားငါးမန်းမျိုးနွယ်စုမှ အဆင့်လေး ပါရမီရှင်နှစ်ဦးကို တစ်ခါက သတ်ဖြတ်ခဲ့ဖူးသဖြင့် မျိုးနွယ်စု၏ ဒုတိယအကြီးအကဲ ကိုယ်တိုင် ချုံခိုတိုက်ခိုက်ကာ ဖမ်းဆီးခဲ့ခြင်း ဖြစ်သည်။ ထိုအချိန်မှ စ၍ ဤမှော်ရတနာထဲတွင် အကျဉ်းချခံရပြီး နှိပ်စက်ညှဉ်းပန်းခံနေရခြင်းပင်။

ယခုအခါ သူ၏ အရှိန်အဝါများမှာ မူလဝိညာဉ် အဆင့်သို့တိုင်အောင် ကျဆင်းသွားသည်အထိ နှိပ်စက်ခံထားရလေသည်။

အခြားသုံးယောက်အနက် တစ်ယောက်မှာ ရွှမ်ထျန်းအင်မော်တယ်ဂိုဏ်းမှ ဝိညာဉ်ခွဲထွက်အဆင့် ကနဦးအလွှာ ကျင့်ကြံခြင်းရှိသည့် ဝိညာဉ်ခွဲထွက်အဆင့် အရှင်သခင် ဘိုးဘေးတစ်ပါး ဖြစ်ပြီး မကြာသေးမီ နှစ်များအတွင်းက ကျားငါးမန်းမျိုးနွယ်စု၏ ဖမ်းဆီးခြင်းကို ခံခဲ့ရသူ ဖြစ်သည်။

ကျားငါးမန်းမျိုးနွယ်စုက သူ့ကို အညံ့ခံစေရန် အတင်းအကျပ် ဖိအားပေးပြီး ရွှမ်ထျန်းအင်မော်တယ်ဂိုဏ်း၏ လျှို့ဝှက်ချက်အချို့ကို ဖွင့်ဟခိုင်းကာ ရွှမ်ထျန်းအင်မော်တယ်ဂိုဏ်းအတွင်းသို့ စိမ့်ဝင်ထိုးဖောက်ရန် သူတို့၏ ရုပ်သေးရုပ်အဖြစ် အသုံးပြုလို၏။

သို့သော် ဤဘိုးဘေးက ယခုအချိန်အထိ အညံ့ခံခြင်း မရှိသေးဘဲ ဆက်လက်ခုခံနေဆဲဖြစ်သဖြင့် ထိုရတနာထဲတွင် ဆက်လက် အကျဉ်းချခံနေသည်။

အခြား နှစ်ယောက်၏ နောက်ခံများကမူ စုယွီကို အံ့အားသင့်သွားစေခဲ့၏။

ထိုနှစ်ယောက်မှာ ဖူလင်းပင်လယ်နယ်မြေရှိ စိမ်းပြာငရဲ

အင်မော်တယ်နန်းတော်မှ ပုဂ္ဂိုလ်များ ဖြစ်နေကြသည်။ အရှင်လတ်လတ် ဖမ်းဆီးမခံရမီက ကျားငါးမန်းမျိုးနွယ်စုအပေါ် တစ်စုံတစ်ခု ကြံစည်နေခဲ့ပုံရ၏။

ဤနှစ်ယောက်မှာ အကျဉ်းချခံရသည့် အချိန်အကြာဆုံးဖြစ်ပြီး နှစ်ပေါင်း လေးရာကျော်တိုင် ရှိနေပြီပင်။

တစ်ယောက်က ဝိညာဉ်ခွဲထွက်အဆင့် ကနဦးအလွှာ ကျင့်ကြံခြင်းရှိပြီး အခြားတစ်ယောက်မှာ ဝိညာဉ်ခွဲထွက်အဆင့် အလယ်အလတ်အလွှာ၌ ရှိလေသည်။

ဤလေးယောက်၏ နောက်ခံများကို သိရှိသွားသော်လည်း စုယွီက ၎င်းတို့ကို ချက်ချင်း မဖြေရှင်းချေ။ ထိုသို့ ပြုလုပ်မည့်အစား ဆက်လက် ကျင့်ကြံနေခဲ့၏။

ကျားငါးမန်းမျိုးနွယ်စု၏ ဒုတိယအကြီးအကဲကို သန့်စင်ပြီးနောက် လရောင် နတ်ဘုရား သိုင်းကျမ်းနှင့် လရောင်နတ်ဘုရားမန္တန်တို့ကို စတင်ကျင့်ကြံတော့သည်။

စုယွီက သူ၏ စွမ်းအားကို မြှင့်တင်ရန်အတွက် လုံ့လစိုက်ကာ ကျင့်ကြံနေစဉ် ဖူလင်းပင်လယ်နယ်မြေ၏ အခြားတစ်နေရာ.. ရွှမ်လိပ်ပင်လယ်မျိုးနွယ်စု နယ်မြေ၏ အနက်ရှိုင်းဆုံးနေရာတွင်မူ...။

ယခုအချိန်၌ ဤပင်လယ်နယ်မြေ၏ အစိတ်အပိုင်းတစ်ခုမှာ တားမြစ်နယ်မြေ တစ်ခု ဖြစ်လာခဲ့ပြီတည်း။

အဆုံးအစမဲ့ အမှောင်မိုးကြိုးများက ကောင်းကင်ယံကို လွှမ်းခြုံထားပြီး မိုးကြိုးနဂါးကြီးများ အဟုန်ပြင်းစွာ ကျဆင်းလာကြ၏။ ကောင်းကင်နှင့် မြေကြီးကြားတွင် တဝူးဝူး ဟိန်းဟောက်မြည်ဟည်းနေကာ လောက တစ်ခုလုံးကို တုန်လှုပ်သွားစေသည်။

တစ်ချိန်တည်းမှာပင် ဟင်းလင်းပြင်က ရုတ်တရက် ပေါက်ကွဲထွက်သွားပြီး ၎င်း၏ လမ်းကြောင်းရှိ အရာအားလုံးကို ဖျက်ဆီး၏။

နက်နဲသည့် မဟာတာအိုစွမ်းအားကြီး တစ်ခုက ထိုနယ်မြေကို လွှမ်းခြုံထား၏။ ထိုနယ်မြေအတွင်းသို့ ဝင်ရောက်လာသည့် မည်သည့်သက်ရှိမဆို ထိုရှေးဟောင်း မဟာတာအိုစွမ်းအား အကြွင်းအကျန်ကို အနှောင့်အယှက်ပေးမိကာ ၎င်း၏ တိုက်ခိုက်ခံရနိုင်ခြေ ရှိလေသည်။

ဤဒိုမိန်း၏ အနက်ရှိုင်းဆုံးနေရာ၊ လောကကြီး၏ မထင်ရှားသော အစိတ်အပိုင်းတစ်ခုအတွင်း၌ ဖုံးကွယ်နေသော ကြမ်းကြုတ်ရက်စက်မှုကြီး တစ်ခု ပေါ်ထွက်လာပြီး သက်ရှိအားလုံးကို ရိုသေကြောက်ရွံ့မှုများ ခံစားသွားရစေတော့၏။

အပြင်ဘက်တွင်မူ မြောက်မြားစွာသော လူသားမျိုးနွယ်စု ကျင့်ကြံသူများအပြင် မိစ္ဆာနှင့် ပင်လယ်မျိုးနွယ်စုတို့ကလည်း ပင်လယ်သားရဲကြီးများနှင့်အတူ ဆင်းသက် ရောက်ရှိလာကြလေပြီ။