အခန်း ၉၉၄

အခန်း (၉၉၄) - နင်ချီ ၏ ဒဏ္ဍာရီ

"ဒါ က လေ နတ်ဘုရား နယ်မြေလား"

စစ်မြေပြင်နယ်မြေ အတွင်း၌ သူ ပထမဆုံး သတ်ဖြတ် ခဲ့သော နယ်မြေအရှင်သခင် မှာ လေ နတ်ဘုရား နယ်မြေ မှ ဖြစ်သည် ဟု သူ မှတ်မိနေသည်။

ဟုတ်လောက် ပါတယ်လေ... သူတို့ ၏ နာမည်များကို သူ သိပ်ပြီး သေချာ မမှတ်မိတော့ပါ။

အောက်ဘက်ရှိ လူအုပ်ကြီး မှာ နင်ချီ နှင့် ပတ်သက်သော ဒဏ္ဍာရီ အမျိုးမျိုး ကို ဆက်လက် ပြောပြနေကြဆဲ ဖြစ်၏။

"နင်ချီ က အဲဒီလောက်တောင် အစွမ်းထက်နေမှတော့... ဘာဖြစ်လို့ အဆင့်မြင့် နယ်ပယ် က ကျင့်ကြံသူ တွေ အများကြီး ပူးပေါင်း ပြီး သူ့ကို မသတ်ကြတာလဲ"

"သူတော်စင် ဘိုးဘေးကြီး နဲ့ ကမ္ဘာ့အရှင်သခင် တို့ စဉ်းစား လို့ မရနိုင်တဲ့ ကိစ္စ တွေကို မင်း က စဉ်းစားနိုင်တယ် ဆိုရင်တော့... မင်း လည်း သေချာပေါက် ကြိုးစား ခဲ့ဖူးမှာပေါ့။ နင်ချီ က ပေါင်းစည်းခြင်း နယ်ပယ် မှာ ရှိနေတုန်း က... သူ့ကို သတ်ဖို့ အတွက် ကိုယ့်ကိုယ်ကိုယ် အဆင့်ချ ထားတဲ့ တာအို အယောက် နှစ်ဆယ် ကို ငါ စေလွှတ် ခဲ့တယ်။ ဒါပေမဲ့... သူတို့ ဆီမှာ သူတော်စင် ဘိုးဘေးကြီး ရဲ့ ရတနာ တွေ သာ မပါခဲ့ဘူး ဆိုရင် သူတို့ အားလုံး နင်ချီ ရဲ့ လက်ချက် နဲ့ သေကုန်လောက်ပြီ"

လူအုပ်ကြီး ထဲမှ လေကို ပြင်းပြင်း ရှူသွင်းသံ တစ်ခု ချက်ချင်း ထွက်ပေါ်လာတော့၏။

"နင်ချီ က တကယ်ပဲ အဲဒီလောက်တောင် ကြောက်စရာ ကောင်းတာလား"

"အဲဒါက နောက်လာမယ့် အရာ တွေ နဲ့ ယှဉ်ရင် ဘာမှ မဟုတ်သေးဘူး"

တည်ငြိမ်သော ကျင့်ကြံသူ ၏ မျက်လုံးများ ကျဉ်းမြောင်းသွားပြီး... သူသည်လည်း ကြောက်မက်ဖွယ် ကောင်းသော အတိတ်များကို ပြန်လည် အမှတ်ရနေသည့်အလား ပင်။

"သူ က အရင်က တစ်ခါမှ မရှိဖူးသေးတဲ့ မိုးကြိုးကပ်ဘေးကြီးကနေ အသက်ရှင် လွတ်မြောက် ခဲ့တယ်။ ငါတို့ကျယ်ပြန့်သော ကမ္ဘာ က တာအို ထောင်ပေါင်းများစွာကို မျိုးတုံး သတ်ဖြတ် ခဲ့ပြီး... သူ ကိုယ်တိုင် ကတော့ အောင်မြင်စွာ အဆင့် တက်လှမ်းသွားခဲ့တယ်"

"ဘာ..."

"သူ က သူတော်စင် ဘိုးဘေးကြီးရဲ့ ကိုယ်ပွား က တာအို ပုံရိပ်ယောင်တွေကို ဆင့်ခေါ် တာကို တားဆီးနိုင်ခဲ့ရုံ သာမက... သူတော်စင် ဘိုးဘေးကြီးရဲ့ ကိုယ်ပွား နဲ့တောင် ဟင်းလင်းပြင် တစ်ခု ထဲမှာ အချိန် အတော်ကြာ တိုက်ခိုက် ခဲ့ပြီး မရှုံးနိမ့် ခဲ့ဘူးလေ"

"..."

အောက်ဘက်ရှိ လူများ မှာ ဤ စကားများကို ကြားလိုက်ရသဖြင့်... သူတို့ ၏ နှလုံးသား များ အသက်ရှူ ကျပ်မတတ် ဖြစ်သွားကြတော့၏။

ခုလေးတင် မှ နင်ချီ မည်သူ မည်ဝါ ဖြစ်ကြောင်း ကို ဒေါသတကြီး မေးခွန်း ထုတ်ရဲ ခဲ့ကြသော်ငြားလည်း... ယခုအခါ နင်ချီသည် သူတော်စင် ဘိုးဘေးကြီး ၏ ကိုယ်ပွား နှင့် တိုက်ခိုက် ရာတွင် မရှုံးနိမ့် ခဲ့ကြောင်း ကြားလိုက်ရသောအခါ သူတို့ အားလုံး လုံးဝ တိတ်ဆိတ် ငြိမ်သက်သွားကြတော့သည်။

မည်သို့ပင် ဆိုစေကာမူ... သူတို့ ၏ နှလုံးသား ထဲတွင် သူတော်စင် ဘိုးဘေးကြီးသည် တစ်ဦးတည်းသော စစ်မှန်သည့် နတ်ဘုရား ဖြစ်ပြီး အစွမ်းအထက်ဆုံး ကျင့်ကြံသူ လည်း ဖြစ်သည်။ သူသည် အလွန်တရာ အစွမ်းထက် လွန်းလှသဖြင့်... သူ၏ နာမည် ကို ကြားလိုက်ရုံ ဖြင့်ပင် မည်သူ ကမျှ သစ္စာဖောက် လိုသော အတွေးမျိုး ကို မမွေးမြူ ရဲကြ။ သူသည် လူတိုင်း က သူ၏ တန်ဖိုး ကို အပြည့်အဝ ယုံကြည် လက်ခံ ထားသည့် အဆင့် အထိ ရောက်ရှိနေခဲ့လေပြီ။

ထို့ကြောင့်... သူတို့သည် နင်ချီ က သူတော်စင် ဘိုးဘေးကြီး ၏ ကိုယ်ပွား နှင့် တိုက်ခိုက် ရာတွင် မရှုံးနိမ့် ခဲ့ဘူး ဆိုသည့် အချက် ကို အလွန်အမင်း အံ့အားသင့်သွားကြပြီး... ၎င်းကို လက်ခံ ရန် လုံးဝ (လုံးဝ) ခက်ခဲနေကြတော့သည်။

အပေါ် တွင် ပုံပြင် ပြောပြနေသူများသည်လည်း... တစ်ယောက်ကို တစ်ယောက် မချိ‌သော အကြည့် ဖြင့် ကြည့်လိုက်ကြပြီး ဆက်လက် စကား မပြောကြတော့ချေ။

သူတော်စင် ဘိုးဘေးကြီး ၏ ကိုယ်ပွား က ရုပ်ပျက်ဆင်းပျက် မိစ္ဆာကောင်များကို ဆင့်ခေါ် ခဲ့သည့် ကိစ္စ ကိုတော့ သူတို့ ဖွင့်ပြောပြ မည် မဟုတ်ပေ။ အကြောင်းမူကား ၎င်းမှာ ကျယ်ပြန့်သော ကမ္ဘာ ၏ ပြင်ပ ရှိ အပြင်ဘက် ပင်လယ် များနှင့် သက်ဆိုင်နေပြီး ၎င်းကို အပြင် သို့ မပေါက်ကြား စေသင့်သောကြောင့်ပါလေ။

ထို့အပြင်... ကမ္ဘာ့အရှင်သခင် က သူတို့ အပေါ် လျှို့ဝှက်ချက် ထိန်းသိမ်းရန် အမိန့် တစ်ခု ကို ချမှတ် ထားပြီး ဖြစ်ရာ... သတင်း အချက်အလက် များ ပေါက်ကြား သူတိုင်း သတ်ဖြတ် ခံရမည် သာ ဖြစ်သည်။

“ပြီးတော့ ဘာဆက်ဖြစ်သေးလဲ”

အောက်ဘက်ရှိ နားထောင်နေကြသူများ က ဆက်လက် မေးခွန်း ထုတ်နေကြဆဲ ပင်။

သို့သော် မည်သူ ကမျှ ပုံပြင် ကို ဆက်လက် မပြောပြ ရဲကြတော့ပါ။ သူတို့ အားလုံး က ဤသို့သာ ပြောလိုက်ကြ၏။

"နောက်ပိုင်း မှာ... ရန်သူ ရဲ့ ဘိုးဘေးကြီး တွေကလည်း ကိုယ်ပွား တွေ စေလွှတ် ခဲ့လို့... သူတော်စင် ဘိုးဘေးကြီးက အလဟဿ အသက်စတေး ရမှာကို ရှောင်လွှဲဖို့ အတွက်... ငါတို့ကို ကျယ်ပြန့်သော ကမ္ဘာ ထဲကို အရင် ပြန်ပို့ပေးလိုက်တာပဲ"

"နင်ချီ ကရော ဘယ်လိုနေလဲ"

"သူ က လုံးဝ အကောင်း ပကတိ ပါပဲ"

နားထောင်နေကြသူ အားလုံး မှာ တစ်ယောက် မျက်နှာ တစ်ယောက် ပြန်ကြည့်နေမိကြပြီး... ခေါင်းများကို ကုတ်ကာ သူတို့ ၏ ရင်တွင်း၌ ဟာလာဟင်းလင်း ဖြစ်သွားသကဲ့သို့ ခံစားလိုက်ကြရ၏။

‘ပုံပြင် က အဲဒီမှာတင် ပြီးသွားပြီလား။ အရေးကြီးဆုံး အချိန် ရောက်မှ ဘာလို့ ရပ်သွားရတာလဲ’

သူတို့က နောက်ထပ် မေးခွန်းများကို ဆက်လက် မမေးမြန်း ရဲကြတော့။ အကြောင်းမူကား ဤ ကျင့်ကြံသူများ အားလုံး မှာ သူတို့ ထက် ပိုမို အစွမ်းထက် ကြပြီး... တိုက်ပွဲ အကြောင်း ကို ဤမျှလောက် အထိ ပြောပြ ခဲ့ခြင်း ကပင် အတော်လေး အံ့မခန်း ဖြစ်နေခဲ့ပြီ မဟုတ်ပါလော။

သူတို့ ၏ ရင်တွင်း၌ ဟာလာဟင်းလင်း ဖြစ်နေသကဲ့သို့ ခံစားနေရစဉ် မှာပင်... သူတို့သည် နာမည် တစ်ခု ကို အသေအချာ မှတ်သားလိုက်ကြ၏။

‘နင်ချီ တဲ့’