အခန်း ၄၆၁

အခန်း ၄၆၁ ချီဖျင်တောက်ကို သတ်ဖြတ်ခြင်း၊ အရပ်လေးမျက်နှာကို လွှမ်းခြုံသွားခြင်း

တိုက်ပွဲ ဆက်လက် ပြင်းထန်လာသည်နှင့်အမျှ ချီဖျင်တောက်၏ ရင်ထဲတွင် ပို၍ပို၍ လေးလံလာတော့သည်။

မူလက သူ၏ ကျင့်စဉ်အဆင့်မှာ ကျန်းချဲ့ထက် အများကြီး သာလွန်နေသဖြင့် တစ်ဖက်လူ၏ နည်းလမ်းများ မည်မျှပင် အစွမ်းထက်စေကာမူ နောက်ဆုံးတွင် သူကသာ အသာစီးရမည်ဟု မိမိကိုယ်ကိုယ် ယုံကြည်ထားခဲ့သည်။ သို့သော် တကယ်တမ်း တိုက်ခိုက်ပြီးနောက်မှသာ ကျန်းချဲ့ကို အထင်သေးလွန်းမိကြောင်း သူ သိလိုက်ရသည်။

ထိုလူငယ်တွင် မည်သည့် အားနည်းချက်မှ မရှိပေ။

ရုပ်ခန္ဓာကိုယ်၊ နတ်စွမ်းရည်၊ နတ်လက်နက်။ အားလုံးက သူ့ထက် မနိမ့်ကျသည့်အပြင် အချို့သော အပိုင်းများတွင် သူ့ထက်ပင် သာလွန်နေသေးသည်။

နောက်ဆုံးတွင် သူက သွေးချီစွမ်းအင်များကို လောင်ကျွမ်း၍ပင် အတင်းအကျပ် ခုခံနေရသည်။ သို့သော် ၎င်းမှာ ရေငတ်ပြေရုံ အဆိပ်သောက်ခြင်းသာ ဖြစ်ကြောင်း သူ ကောင်းကောင်း သိထားသည်။ သွေးချီစွမ်းအင်များ ကုန်ခမ်းပြီး မူလဝိညာဉ် ပြိုကွဲသွားချိန်တွင် သူ မလွဲမသွေ ကျရှုံးရမည်သာ ဖြစ်သည်။ ထိုအရာက သေချာပေါက် ဖြစ်လာမည့် အရာဖြစ်ကြောင်းလည်း သူ သိမြင်နေသည်။

ဤအချက်ကို တွေးမိသောအခါ သူ၏ ရင်ထဲတွင် အံ့ဩဒေါသထွက်မှုများနှင့်အတူ နောင်တရမှုများပါ ပေါ်ပေါက်လာသည်။ အစောကတည်းက သေချာ စဉ်းစားချင့်ချိန်ခြင်း မရှိဘဲ ဤကဲ့သို့သော အခက်အခဲထဲသို့ ကိုယ်တိုင် ဝင်ရောက်လာမိခြင်းကို သူ အလွန် နောင်တရနေမိသည်။ အကယ်၍သာ သူ အစောကတည်းက အနည်းငယ် သတိထားခဲ့ပါက ဤကဲ့သို့သော အခြေအနေမျိုးသို့ ရောက်လာမည် မဟုတ်ပေ။

"ဘုန်း"

ကြီးမားသော ပေါက်ကွဲသံကြီး ထပ်မံ ထွက်ပေါ်လာပြီး လေဟာနယ် တစ်ခုလုံး ပြိုကွဲသွားသည်။ ကျန်းချဲ့က ချီဖျင်တောက်၏ အနီးသို့ ရောက်ရှိလာပြီး တောင်တန်းတစ်ခုအလား လေးလံလှသော နတ်လှံတံကြီးကို ရိုက်ချလိုက်ရာ ချီဖျင်တောက်က အနက်ရောင် တောင်ဝှေးဖြင့် ကာကွယ်လိုက်သော်လည်း လေဟာနယ်ထက်မှ မြေကြီးပေါ်သို့ တိုက်ရိုက် ရိုက်ချခံလိုက်ရသည်။

လေဟာနယ်ထက်ရှိ ထိုမောက်မာခန့်ညားသော ပုံရိပ်ကို ကြည့်ရင်း ချီဖျင်တောက်၏ ဦးနှောက်များ အလျင်အမြန် အလုပ်လုပ်နေပြီး ယခုအချိန်တွင် ဆုတ်ခွာရန် အတွေးအချို့ ပေါ်ပေါက်လာခဲ့သည်။ ဆက်တိုက်ပါက သူ မလွဲမသွေ ကျရှုံးရမည်ကို သူ သိထားသည်။

သို့သော် ပြဿနာမှာ ကျန်းချဲ့က ဤအခြေအနေအတွက် သေချာ ကြိုတင်ပြင်ဆင်ထားခြင်းပင်။ ကောင်းကင်နှင့် မြေကြီးကို ဖုံးလွှမ်းထားသော အဖြူအမည်း မီးတောက်ပင်လယ်ကြီး ရှိနေရုံသာမက ပတ်ဝန်းကျင်တွင် အားမနည်းလှသော မဟာသိုင်းသခင်ကြီး တစ်ဦး၏ အရှိန်အဝါကိုပါ သူ ခံစားမိနေသည်။

ထိုသူမှာ ချီရွှယ်မိစ္ဆာသခင် ဖြစ်နိုင်ခြေ အများဆုံးဖြစ်ကြောင်း သူ သေချာ သိထားသည်။ သူ့ကို အသက်လု ထွက်ပြေးခွင့် မပေးရန် တားဆီးထားခြင်း ဖြစ်သည်။

အရေးအကြီးဆုံးမှာ သူ ဖန်တီးထားသော ခရမ်းရောင်လင်းယုန် ဓမ္မရုပ်တုကြီးမှာလည်း ယခုအခါ အတော်လေး အားနည်းနေပြီ ဖြစ်သည်။ လူပုံစံ ဓမ္မရုပ်တုကြီး၏ ဆွဲဖြဲမှုကြောင့် လက်တစ်ဖက် ပြတ်ထွက်သွားခဲ့သည်။ ပြန်လည် ကောင်းမွန်အောင် လုပ်နိုင်သော်လည်း ဓမ္မရုပ်တုပေါ်ရှိ နတ်ဘုရား အလင်းတန်းများ အများကြီး မှေးမှိန်သွားသည်ကို ရှင်းလင်းစွာ မြင်တွေ့နေရသည်။ စွမ်းအား ကွာဟချက် အလွန် ကြီးမားနေကြောင်း ထင်ရှားနေသည်။

ဤအချက်ကို တွေးမိသောအခါ သူ၏ ရင်ထဲတွင် မုန်တိုင်းများ ထန်လာတော့သည်။ စက္ကန့်အနည်းငယ်မျှ တွေးတောနေပြီးနောက် ကျန်းချဲ့၏ တိုက်ခိုက်မှုကို ရှောင်ရှားကာ ချီဖျင်တောက်က လေဟာနယ်ထက်သို့ ထပ်မံ ပျံတက်သွားသည်။ အောက်ဘက်ရှိ နန်ယွဲ့ မြို့တော် တစ်ခုလုံးကို ဝေ့ကြည့်လိုက်ရာ သူ၏ မျက်ဝန်းအောက်ခြေတွင် အလွန်တရာ အေးစက်သော သတ်ဖြတ်လိုစိတ်များ ဖြတ်ပြေးသွားသည်။

ထို့နောက် ခေါင်းမော့ကာ ကျန်းချဲ့ကို တည့်တည့်စိုက်ကြည့်လိုက်သည်။

"ငါ မင်းကို အထင်သေးလွန်းသွားခဲ့တယ်"

"ဝမ်းနည်းစရာပဲ ခင်ဗျားမှာ နောင်တရခွင့် မရှိတော့ဘူး"

ကျန်းချဲ့၏ အသံက လူသေတစ်ယောက်ကို စကားပြောနေသည့်အလား အလွန် အေးစက်နေသည်။

စကားသံ အဆုံးမှာပင် လေဟာနယ်ထဲမှ နဂါးဟိန်းသံ တစ်ခု ထပ်မံ ပေါက်ကွဲထွက်ပေါ်လာပြီး ပတ်ဝန်းကျင်တွင် ဖန်တီးထားသော ယင်ယန် အစီအရင်ကြီးက ပေါက်ကွဲထွက်လာကာ လေဟာနယ်ထဲတွင် ချည်နှောင်ထားသော သံကြိုးများအဖြစ် ပြောင်းလဲသွားသည်။

ထိုသံကြိုးများက ပေရာချီ ကြီးမားသော ခရမ်းရောင်လင်းယုန် ဓမ္မရုပ်တုကြီးကို တင်းကျပ်စွာ ချည်နှောင်လိုက်သည်။ ထို့နောက် ကြီးမားလှသော လူပုံစံ ဓမ္မရုပ်တုကြီးက ခရမ်းရောင်လင်းယုန် ဓမ္မရုပ်တု အပေါ်သို့ လက်သီးဖြင့် တစ်ချက်ပြီးတစ်ချက် ဆက်တိုက် ထိုးချလိုက်တော့သည်။

"ဘုန်း"

"ဘုန်း"

စစ်စည်သံများ တီးခတ်နေသည့်အလား မိုးကြိုးပစ်သံများ ကျယ်လောင်စွာ ထွက်ပေါ်နေသည်။

ချီဖျင်တောက်၏ မျက်နှာက ချက်ချင်း ဖြူရော်သွားပြီး ကြီးမားသော ဒဏ်ရာကို ရရှိသွားသည့်အလား ဖြစ်သွားသည်။ ဓမ္မရုပ်တုနှင့် အစစ်အမှန် ခန္ဓာကိုယ်မှာ တစ်ခုနှင့်တစ်ခု ဆက်စပ်နေပြီး စိတ်ဝိညာဉ်ချင်း ချိတ်ဆက်နေကြရာ ဓမ္မရုပ်တု ပြင်းထန်စွာ ဒဏ်ရာရပါက သို့မဟုတ် ဖျက်ဆီးခံရပါက အစစ်အမှန် ခန္ဓာကိုယ်မှာလည်း တန်ပြန်သက်ရောက်မှုကို ခံရမည်ဖြစ်ပြီး ပြင်းထန်စွာ ဒဏ်ရာရသကဲ့သို့ ဖြစ်သွားမည် ဖြစ်သည်။

ယခုအခိုက်အတန့်တွင် ချီဖျင်တောက်မှာ လှောင်ချိုင့်ထဲ ပိတ်မိနေသော သားကောင် တစ်ကောင်နှင့် မခြားနားတော့ဟု ဆိုနိုင်ပေသည်။ သို့သော် ကျန်းချဲ့က အနည်းငယ်မျှ ပေါ့ဆခြင်း မရှိသေးပေ။

မည်သို့ပင်ပြောစေ ချီဖျင်တောက်က ထိပ်တန်း ယွမ်ရှန်းအဆင့် စစ်မှန်သောသခင် တစ်ဦး ဖြစ်ပြီး နိုင်ငံတစ်နိုင်ငံ၏ ဘိုးဘေး တစ်ဦးလည်း ဖြစ်ရာ သာမန် စစ်မှန်သောသခင်များနှင့် ယှဉ်ပြိုင်၍ မရနိုင်ပေ။ ထိုသူ့တွင် ဖုံးကွယ်ထားသော လှည့်ကွက်များ မရှိတော့ဟု ကျန်းချဲ့ လုံးဝ မယုံကြည်ချေ။ ထို့ကြောင့် ချက်ချင်းပင် အသာစီးရနေချိန်တွင် ဆက်လက် တိုက်ခိုက်ပြီး ချီဖျင်တောက်ကို အမြန်ဆုံး သတ်ဖြတ်ကာ အငြိုးအာဃာတများကို အဆုံးသတ်ရန် ပြင်ဆင်လိုက်သည်။

မျက်တောင်တစ်ခတ်အတွင်း ကျန်းချဲ့၏ ခန္ဓာကိုယ်က အရိပ်တစ်ခုအဖြစ် ပြောင်းလဲသွားပြီး နေရာရွှေ့ပြောင်းသွားသည့်အလား ချီဖျင်တောက်၏ အရှေ့သို့ တိုက်ရိုက် ရောက်ရှိသွားသည်။ လက်နှစ်ဖက်ဖြင့် နတ်လှံတံကို ကိုင်ဆောင်ကာ ကြီးမားကျယ်ပြန့်သော အရှိန်အဝါများဖြင့် အရာအားလုံးကို ဖိနှိပ်ပစ်လိုက်သည်။ ကောင်းကင်ကြီး ပြိုကျလာသည့်အလား ချီဖျင်တောက်၏ ဦးခေါင်းပေါ်သို့ တိုက်ရိုက် ထိုးချလိုက်တော့သည်။

"ဘုန်း"

ပေါက်ကွဲသံကြီး ထွက်ပေါ်လာသည်။ ချီဖျင်တောက် လက်ထဲရှိ အနက်ရောင် တောင်ဝှေးမှာ မျက်တောင်တစ်ခတ်အတွင်း အပိုင်းပိုင်း အစစ ပြတ်ထွက်သွားသည်။ ကောင်းကင်ကို ဖိနှိပ်နိုင်စွမ်းရှိသော ကျန်းချဲ့၏ အစွမ်းအောက်တွင် တိုက်ရိုက် အဖျက်ဆီးခံလိုက်ရခြင်းပင်။

ချီဖျင်တောက်မှာမူ ကြိုးပြတ်သွားသော စွန်တစ်ကောင်အလား လေဟာနယ်ထဲမှ မြေကြီးပေါ်သို့ တိုက်ရိုက် ပြုတ်ကျသွားတော့သည်။ "ဘုန်း" ဆိုသော အသံနှင့်အတူ မြေကြီးနှင့် ရိုက်မိသွားပြီး မြေပြင် တစ်ခုလုံး ပေါက်ကွဲသွားသည်။ ပေဆယ်နှင့်ချီ မြင့်မားသော အမည်းရောင် ပြာမှုန့်များပင် လွင့်စင်ထွက်ပေါ်လာသည်။ ၎င်းတို့မှာ နန်းတော် အပျက်အစီးများ၏ ပြာမှုန့်များပင် ဖြစ်၏။

ချီဖျင်တောက်က မြေကြီးပေါ်သို့ ပြုတ်ကျသွားပြီးနောက် မည်သည့် အသက်ရှူသံမျှ မရှိတော့ဘဲ လုံးဝ ကျဆုံးသွားသည့်အလား ဖြစ်နေသည်။

ဤအခြေအနေကို ကျန်းချဲ့က အနည်းငယ်မျှ မယုံကြည်ဘဲ နှုတ်ခမ်းထောင့်တွင် အေးစက်သော အပြုံးတစ်ခု ပေါ်လာသည်။

"ထွက်ပြေးချင်နေတာလား"

အတွေးတစ်ချက်နှင့်အတူ မျက်တောင်တစ်ခတ်အတွင်း မြေကြီးပေါ်တွင် ယင်ယန် မီးတောက်ပင်လယ်ကြီး ထပ်မံ ပေါ်ထွက်လာသည်။ ထို့အပြင် အဖြူနှင့် အမည်း နှစ်ရောင်ကြားတွင် ထူးဆန်းသော သွေးရောင် အလင်းတန်းများလည်း ရောယှက်နေသည်။

ချီဖျင်တောက်ကို ချောင်းမြောင်းသတ်ဖြတ်ရန်အတွက် ကျန်းချဲ့က မည်သို့များ သေချာ ပြင်ဆင်မထားဘဲ နေမည်နည်း။ လေလုံအောင် ပိတ်လှောင်ထားသည်ဟု ဆိုလျှင်ပင် လွန်မည်မဟုတ်ပေ။ ရုပ်ခန္ဓာကိုယ်ကို ထားလိုက်တော့ မူလဝိညာဉ် ပင် ထွက်ပြေးနိုင်မည် မဟုတ်ပေ။

"ထွက်ပြေးမယ် ဟုတ်လား ထွက်ပြေးရမယ့်သူက မင်းပဲ"

ရုတ်တရက် အက်ကွဲနေသော အသံတစ်သံ ထွက်ပေါ်လာသည်။ ချီဖျင်တောက်၏ အသံနှင့် တူသော်လည်း မတူညီသည့်အလား တမင်တကာ အသံကို နှိမ့်ထားသကဲ့သို့ ဖြစ်နေသည်။

"ဟန်ဆောင် ပန်ဆောင်တွေ လာလုပ်မနေနဲ့"

ကျန်းချဲ့၏ မျက်နှာထားက အေးစက်စူးရှနေပြီး အနည်းငယ်မျှပင် ဂရုမစိုက်သည့်ဟန် ပေါ်နေသည်။

သူ၏ စကားသံ အဆုံးမှာပင် ရုတ်တရက် ကောင်းကင်ယံသို့ ထိုးတက်သွားသော ရွှေရောင် အလင်းတိုင်ကြီးတစ်ခု ပေါက်ကွဲထွက်ပေါ်လာပြီး မြေကြီးထဲမှနေ၍ ကောင်းကင်ဘုံအထိ တိုက်ရိုက် ထိုးဖောက်သွားကာ လူကို ထိတ်လန့်စေသော စွမ်းအားများကို ထုတ်လွှတ်နေသည်။

"ဘုန်း"

"ဘုန်း"

ထို ရွှေရောင် အလင်းတိုင်မှာ အစပြုမှု တစ်ခုသာ ဖြစ်သည့်အလား နောက်တစ်ခဏတွင် ရွှေရောင် အလင်းတိုင်များ အဆက်မပြတ် ပေါက်ကွဲထွက်ပေါ်လာသည်။ အကြမ်းဖျင်း ရေတွက်ကြည့်လိုက်ရာ ကိုးတိုင် တိတိ ရှိနေသည်။ သမုဒ္ဒရာကို ငြိမ်သက်စေသော နတ်တိုင်ကြီး ကိုးတိုင်အလား မြို့တော်တစ်ခုလုံးကို ဖုံးလွှမ်းထားလိုက်သည်။ ထိုရွှေရောင် အလင်းတိုင် တစ်ခု၏ အတွင်း၌ ချီဖျင်တောက်က မတ်မတ် ရပ်နေသည်။

ယခုအချိန်တွင် သူ၏ တစ်ကိုယ်လုံး၌ ရွှေရောင်အလင်းတန်းများ တောက်ပနေပြီး အရှိန်အဝါများကလည်း အဆက်မပြတ် မြင့်တက်လာကာ မျက်တောင်တစ်ခတ်အတွင်း အထွတ်အထိပ် အခြေအနေသို့ ရောက်ရှိသွားသည့်အလားပင်။

မျက်လုံးများကို ဖွင့်လိုက်ရာ ချီဖျင်တောက်၏ မျက်ဝန်းများက ရေတွင်းဟောင်းတစ်ခုအလား ငြိမ်သက်နေပြီး အေးစက်စွာ ပြောလိုက်သည်။

"မင်းက တစ်ယောက်တည်းနဲ့ ငါတို့ နန်ယွဲ့ တော်ဝင်မိသားစုကို လာပြီး ဖျက်ဆီးရဲတယ် သေလမ်းကို ရှာနေတာနဲ့ ဘာမှ မကွာဘူး မူလကတော့ ငါက မြေကြော စွမ်းအားတွေကို အပြည့်အဝ မထုတ်ဖော်ချင်ခဲ့ပါဘူး ဒါပေမဲ့ ဝမ်းနည်းစရာက မင်းက သေချင်နေတော့လည်း ဘယ်သူ့ကိုမှ အပြစ်တင်လို့ မရတော့ဘူးပေါ့ ဒီနေ့ မင်းကို ထားလိုက်ဦး သိုင်းသူတော်စင် လာရင်တောင် ဒီနေရာမှာ သေရမှာပဲ"

"လေလုံးထွားနေတာပဲ"

ကျန်းချဲ့က အေးစက်စွာ နှာခေါင်းရှုံ့လိုက်သော်လည်း မျက်ဝန်းများထဲတွင်တော့ လေးနက်သော အရိပ်အယောင်များ တောက်ပနေသည်။ အဘယ်ကြောင့်ဆိုသော် ထို ရွှေရောင် အလင်းတိုင် ကိုးတိုင် အတွင်းမှ အလွန် ကြီးမားလှသော အန္တရာယ် အငွေ့အသက်ကို သူ ခံစားမိနေသောကြောင့်ပင်။

ရှင်းလင်းစွာပင် ဤသည်က ချီဖျင်တောက်၏ နောက်ဆုံး အသက်ကယ် ဖဲချပ်ပင် ဖြစ်သည်။ သို့သော် မည်သည့်အတွက်ကြောင့် အစောကတည်းက မသုံးခဲ့သနည်း။ ကျန်းချဲ့၏ ရင်ထဲတွင် အတွေးများစွာ ဝင်ရောက်လာပြီး ဤအခြေအနေကို ဖြိုခွဲရန် နည်းလမ်း ရှာဖွေနေသည်။

"လေလုံးထွားနေတာ ဟုတ် မဟုတ် မင်း ကိုယ်တိုင် ခံစားကြည့်လိုက်ရင် သိလာမှာပါ"

ချီဖျင်တောက်၏ လေသံက အေးစက်နေပြီး အသေးအမွှား ကိစ္စလေး တစ်ခုကို ပြောနေသည့်အလား ယခင်က ထိတ်လန့်ဒေါသထွက်နေမှုများ လုံးဝ မရှိတော့ပေ။ သေချာသည်မှာ ဤသည်က သူ ဟန်ဆောင်ထားခြင်းသာ ဖြစ်သည်။

ပတ်ဝန်းကျင်ရှိ မြေကြော အစီအရင်ကြီးက သိုင်းသူတော်စင်ကို ဒဏ်ရာရစေနိုင်သော စွမ်းအား ရှိသည်မှာ အမှန်ပင် ဖြစ်သည်။ သို့သော် ပြဿနာမှာ ထိုသိုင်းသူတော်စင်က ပစ်မှတ်တစ်ခုအဖြစ် မတ်တပ်ရပ်နေပေးမှသာ ရနိုင်မည်ဖြစ်ပြီး အစစ်အမှန် သိုင်းသူတော်စင် တစ်ပါးကို လုံးဝ ယှဉ်ပြိုင်နိုင်စွမ်း မရှိပေ။

ဤအစီအရင်ကို ချမှတ်ထားခြင်းမှာ မည်သူ့ကိုမျှ ကာကွယ်ရန် မဟုတ်ပေ။ အမှန်တကယ်တော့ နောင်တစ်ချိန် ယန်ဝိညာဉ် မိုးကြိုးကပ်ဘေးကို ကျော်ဖြတ်ရန်အတွက် ပြင်ဆင်ထားခြင်း ဖြစ်သည်။

ဤတိုက်ပွဲတွင် သူ မလွဲမသွေ ကျရှုံးတော့မည်ကို သူ သိထားသည်။ နောက်ထပ် တစ်နာရီ နှစ်နာရီခန့် ဆက်လက် တိုက်ခိုက်နေလျှင်တောင် ရလဒ်က ပြောင်းလဲသွားမည် မဟုတ်ပေ။ လူအိုကြီးမင်ကို အားကိုးရန် ဆိုသည်မှာ ပို၍ပင် မဖြစ်နိုင်ချေ။ တစ်ဖက်လူက မြို့ပြင်ရှိ မြွေနဂါးကို လုံးဝ မနိုင်နိုင်ပေ။ ထို့ကြောင့် မတတ်သာသည့်အဆုံး ဤအစီအရင်ကို အသုံးပြု၍ ကျန်းချဲ့ကို ဖိအားပေးကာ ထွက်ပြေးစေရန် ပြင်ဆင်လိုက်ခြင်း ဖြစ်သည်။

ဤနည်းဖြင့် သူက လုံခြုံစွာ လွတ်မြောက်နိုင်မည် ဖြစ်သည်။ သေချာသည်မှာ အကယ်၍ ကျန်းချဲ့က အမှန်တကယ် မကြောက်မရွံ့ဘဲ ဆက်နေမည်ဆိုပါက ဤအခွင့်အရေးကို အသုံးချ၍ သူ့ကို သတ်ဖြတ်ရန် လုပ်ဆောင်နိုင်သေးသည်။ သို့သော် ပြဿနာမှာ ကျန်းချဲ့သာ အခြေအနေ မဟန်သည်ကို မြင်ပါက ထွက်ပြေးရန် မခက်ခဲလှပေ။

ရွှေရောင် အလင်းတိုင် ကိုးတိုင်က ကောင်းကင်ယံသို့ ထိုးတက်သွားပြီး တိမ်မည်းများကို မွှေနှောက်လိုက်သည်။ တစ်ချိန်တည်းမှာပင် အခြား တိမ်မည်းများကိုပါ သယ်ဆောင်လာကာ မိုးကြိုးများ လင်းလက်နေပြီး လေဟာနယ်ထက်တွင် တိမ်ပင်လယ်ကြီး တစ်ခုအဖြစ် ရုတ်တရက် ပြောင်းလဲသွားတော့သည်။

ချီဖျင်တောက်က ရွှေရောင် အလင်းတန်းများ အတွင်းတွင် ရပ်နေကာ လောကကြီး တစ်ခုလုံးတွင် ပြိုင်ဘက်ကင်းနေသည့်အလား အေးစက်သော မျက်ဝန်းများဖြင့် ကျန်းချဲ့ကို ကြည့်ရင်း စကားတစ်ခွန်း ဖြည်းညင်းစွာ ဖွင့်ဟလိုက်သည်။

"သေစမ်း"

ရုတ်တရက် ပြောင်းလဲသွားသော မြင်ကွင်းက နန်ယွဲ့ မြို့တော် အပြင်ဘက်တွင် အသေအလဲ တိုက်ခိုက်နေသော အောက်ခွန်းနှင့် မင်ယွဲ့ ဘိုးဘေးတို့ကိုပါ အံ့အားသင့်သွားစေသည်။ ဤအခိုက်အတန့်တွင် သူတို့နှစ်ဦးက တိုက်ပွဲကို ခေတ္တရပ်နားလိုက်ပြီး လှည့်ကြည့်လိုက်ကြသည်။ မျက်ဝန်းများထဲတွင် ထိတ်လန့်သွားသော အရိပ်အယောင်များ အသီးသီး ဖြတ်ပြေးသွားကြသည်။

ချီဖျင်တောက်တွင် ဤကဲ့သို့သော သတ်ဖြတ်ရေး နည်းလမ်းများ ရှိနေလိမ့်မည်ဟု မည်သူကမျှ မထင်မှတ်ထားခဲ့ပေ။

"သေစမ်း"

အောက်ခွန်းက ဒေါသတကြီး ဟိန်းဟောက်လိုက်သည်။ သို့သော် ရွှေရောင်အလင်းတန်းများ ဖုံးလွှမ်းနေသော နေရာကို ခံစားမိသောအခါ ထိုနေရာသို့ ဝင်ရောက်ရန် အနည်းငယ် မဝံ့မရဲ ဖြစ်သွားပြီး မြို့အပြင်ဘက်တွင်သာ အဆက်မပြတ် ဟိန်းဟောက်နေတော့သည်။

၎င်းနှင့် နှိုင်းယှဉ်ပါက မင်ယွဲ့ ဘိုးဘေးက အလွန် ဝမ်းသာသွားသည်။ ဤတိုက်ပွဲတွင် သေချာပေါက် နိုင်ပြီဟု တွေးလိုက်မိသည်။ ချီဖျင်တောက်က ထိုကျန်းချဲ့ ဆိုသော ကောင်လေးကို သတ်နိုင်သည်နှင့် တစ်ပြိုင်နက် ဤမြွေနဂါးမှာ သေချာပေါက် ထွက်ပြေးနိုင်တော့မည် မဟုတ်ပေ။

"ဒုက္ခပဲ ဒီနေရာကနေ မြန်မြန် ထွက်ပြေးကြစို့ ဒီအစီအရင်က ချီဖျင်တောက်က မြေကြောတွေနဲ့ ချိတ်ဆက်ပြီး ဖန်တီးထားတဲ့ အစီအရင်ကြီးပဲ သတ်ဖြတ်နိုင်စွမ်း အရမ်း မြင့်မားတဲ့အပြင် ကောင်းကင်မိုးကြိုးကိုပါ ခေါ်ယူနိုင်တဲ့ စွမ်းအားရှိတယ် သိုင်းသူတော်စင် စွမ်းအား မရှိရင် လုံးဝ တောင့်ခံနိုင်မှာ မဟုတ်ဘူး ဒီသရဲအိုကြီးက အသေအလဲ လုပ်တော့မယ်"

မြို့တော် အပြင်ဘက်ရှိ ချီရွှယ်မိစ္ဆာသခင်က ထိုအစီအရင်၏ စွမ်းအားကို လျင်မြန်စွာ ခွဲခြားသိမြင်သွားပြီး ကျန်းချဲ့ကို အလျင်အမြန် သတိပေးလိုက်သည်။ သူ့ကို အလျင်စလို မလုပ်ရန်နှင့် နောင်တွင် အခွင့်အရေး ရှိသေးကြောင်း တိုက်တွန်းလိုက်သည်။

ကျန်းချဲ့၏ မျက်နှာက မည်းမှောင်သွားပြီး ဤကဲ့သို့ ရခဲသော အခွင့်အရေးကို လုံးဝ လက်လွှတ်မခံချင်သဖြင့် အလျင်အမြန် မေးလိုက်သည်။

"ဒီအစီအရင်ကို ဖျက်ဆီးဖို့ နည်းလမ်း ရှိလား"

"မင်းနဲ့ငါ့ရဲ့ စွမ်းအားနဲ့ကတော့ ဖျက်ဆီးလို့ မရဘူး အခု အချိန်မီ ထွက်ပြေးဖို့ပဲ ရတော့မယ်"

"အလွယ်တကူ ထွက်ပြေးလို့ ရနိုင်လား"

ကျန်းချဲ့က ရုတ်တရက် မျက်မှောင်ကြုတ်လိုက်သည်။

"မိုးကြိုးတွေ မကျလာခင် ထွက်ပြေးရင် အချိန်မီသေးတယ် အခု ချီဖျင်တောက်က အစီအရင်နဲ့ တစ်သားတည်း ဖြစ်နေတော့ မင်းကို တားဆီးဖို့ နည်းလမ်း သိပ်များများစားစား မရှိဘူး"

ချီရွှယ်မိစ္ဆာသခင်၏ စကားကို ကြားသောအခါ ချီဖျင်တောက်၏ အကြံအစည်ကို ကျန်းချဲ့ လျင်မြန်စွာ နားလည်သွားတော့သည်။ ဤနည်းလမ်းကို အသုံးပြု၍ သူ၏ လေလုံသော ပိတ်လှောင်မှုကို ဖျက်ဆီးကာ သူ့ကို နန်ယွဲ့ မြို့တော်မှ ထွက်ပြေးသွားစေရန် ဖိအားပေးပြီး ထို့နောက် အဝေးသို့ လွတ်မြောက်သွားရန် ကြံစည်နေခြင်းပင် ဖြစ်သည်။

အကယ်၍ အစီအရင်ကိုသာ အသုံးပြုလိုက်ရပါက တစ်ဖက်လူသည်လည်း ပြင်းထန်စွာ ဒဏ်ရာရမည်မှာ သေချာသည်။ သို့သော် ဤသည်က ရှင်းလင်းသော အကြံအစည် တစ်ခုပင်။ တစ်ဖက်လူက သူ အသက်ကို နှမြောမည်ဟု လောင်းကြေးထပ်ထားခြင်း ဖြစ်သည်။

အမှန်တကယ်တော့ ချီဖျင်တောက်၏ လောင်းကြေးက မှန်ကန်ပေသည်။ ကျန်းချဲ့က အသေအလဲ တိုက်ခိုက်ရန် မကြောက်သော်လည်း ချီဖျင်တောက် ကဲ့သို့သော သင်္ချိုင်းထဲမှ အရိုးစု တစ်ခုနှင့် အသေအလဲ တိုက်ခိုက်ရသည်မှာ သိပ်တော့ တန်မည်မဟုတ်ပေ။ သို့သော် ယခုချက်ချင်း ထွက်သွားရန်မှာလည်း ကျန်းချဲ့ လုံးဝ မကျေနပ်နိုင်ပေ။

ဦးနှောက်ကို အမြန်ဆုံး အလုပ်ပေး စဉ်းစားပြီးနောက် သူက ထပ်မံ၍ အသံလှိုင်းဖြင့် မေးလိုက်သည်။

"ခင်ဗျား ပြောတာ ချီဖျင်တောက်က အစီအရင်နဲ့ တစ်သားတည်း ဖြစ်နေတယ်ဆိုတော့ အခု အချိန်မှာ သူ ထွက်ပြေးဖို့ လုံးဝ မဖြစ်နိုင်ဘူး ဆိုတဲ့ သဘောလား"

"ဟုတ်တယ် သူ အစီအရင်ကို ရုပ်သိမ်းချင်ရင်တောင် အရမ်း လွယ်ကူတဲ့ ကိစ္စ မဟုတ်ဘူး"

"ကျုပ် နားလည်ပြီ"

ကျန်းချဲ့၏ မျက်လုံးများ ကျဉ်းမြောင်းသွားပြီး အေးစက်သော အပြုံးတစ်ခု ဖြတ်ပြေးသွားသည်။ အသေအလဲ တိုက်မယ် ဟုတ်လား။ တစ်ဖက်လူက အရည်အချင်း မီလို့လား။

ကျန်းချဲ့နှင့် ချီရွှယ်မိစ္ဆာသခင်တို့ အသံလှိုင်းဖြင့် စကားပြောနေခြင်းက အချိန်ကြာမြင့်ပုံပေါ်သော်လည်း အမှန်တကယ်တော့ မျက်တောင်တစ်ခတ် အတွင်းမှာသာ ဖြစ်သည်။ ထို့ကြောင့် ဤအစီအရင်၏ အားသာချက်နှင့် အားနည်းချက်များကို သူ နားလည်သွားချိန်တွင် ချီဖျင်တောက်က လှုပ်ရှားရန် စတင်လိုက်ရုံသာ ရှိသေးသည်။

"သေစမ်း" ဟူသော စကားလုံး တစ်လုံးက လေဟာနယ်ထက်တွင် ပဲ့တင်ထပ်သွားသည်။

မျက်တောင်တစ်ခတ်အတွင်း လေဟာနယ်ထက်မှ မိုးကြိုး အချို့ ကျဆင်းလာပြီး ကျန်းချဲ့ထံသို့ ပစ်ချလာတော့သည်။ သို့သော် ဤကိစ္စနှင့် ပတ်သက်၍ ကျန်းချဲ့က တောင်နှိမ် နတ်ဒယ်အိုးကို ထုတ်ယူကာ ထိုမိုးကြိုး အချို့ကို ကာကွယ်လိုက်သည်။

သို့သော် ထိုမိုးကြိုး အချို့၏ စွမ်းအားက အလွန်တရာ ကြောက်မက်ဖွယ် ကောင်းလှပြီး တောင်နှိမ် နတ်ဒယ်အိုးကိုပင် အက်ကွဲကြောင်းများ ဖြစ်ပေါ်သွားစေသည်။ ထပ်ပြီး မိုးကြိုး အချို့သာ ကျလာပါက တောင်နှိမ် နတ်ဒယ်အိုးက သေချာပေါက် တောင့်ခံနိုင်မည် မဟုတ်ကြောင်း ကြိုတင် ခန့်မှန်း၍ ရပေသည်။ ထို့အပြင် ဤသည်မှာ အစပြုမှုသာ ဖြစ်ပုံရသည်။ ပေါက်ကွဲသံများ ထွက်ပေါ်နေသော မိုးကြိုးများက အဆက်မပြတ် စုဝေးနေပြီး လူကို ထိတ်လန့်စေသော အငွေ့အသက်များကို ထုတ်လွှတ်နေသည်။

ကျန်းချဲ့ ထွက်မသွားသေးသည်ကို မြင်သောအခါ ချီဖျင်တောက်၏ မျက်လုံးများ အေးစက်သွားပြီး လက်နှစ်ဖက်ကို ဆန့်တန်းလိုက်ရာ ပတ်ဝန်းကျင်ရှိ ရွှေရောင် အလင်းတိုင် ကိုးတိုင်က ထပ်မံ၍ နတ်ဘုရား အလင်းတန်းများကို တောက်ပလာစေပြီး ထိုအလင်းတိုင် ကိုးတိုင်ကို တစ်ခုတည်းအဖြစ် ပေါင်းစပ်ရန် ပြင်ဆင်လိုက်တော့သည်။

"ကျန်းချဲ့ မင်း ထွက်မသွားချင်ဘူး ဆိုတော့လည်း ဒီနေရာမှာပဲ တစ်သက်လုံး နေခဲ့လိုက်တော့"

ကျန်းချဲ့က သူ့ကို အမှန်တကယ် အသေအလဲ တိုက်ခိုက်ရဲမည်ဟု သူ လုံးဝ မယုံကြည်ပေ။ ထို့ကြောင့် အလွန်အမင်း ရူးသွပ်နေသည့် အမူအရာကို ပြသလိုက်ခြင်း ဖြစ်သည်။ ထို့အပြင် သူ၏ ရင်ထဲတွင် အတွေးတစ်ခု ပေါ်လာသည်။ ၎င်းမှာ ကျန်းချဲ့နှင့် အတူတကွ သေဆုံးရန် ဖြစ်ပြီး ယင်းကလည်း လက်မခံနိုင်စရာ မဟုတ်ဟု သူ တွေးနေမိသည်။

သို့သော် နောက်တစ်ခဏတွင် ကျန်းချဲ့က နတ်လှံတံဖြင့် လေဟာနယ်ထဲရှိ မဖွဲ့စည်းရသေးသော အတားအဆီး တစ်ခုကို ရိုက်ခွဲကာ အစီအရင် အပြင်ဘက်သို့ ထွက်ပြေးသွားသည်ကို မြင်လိုက်ရသည်။ ဤမြင်ကွင်းကို မြင်လိုက်ရသောအခါ ချီဖျင်တောက်၏ ရင်ထဲတွင် စိတ်ပျက်သွားသလို စိတ်အေးသွားသလိုလည်း ခံစားလိုက်ရသည်။ ကျန်းချဲ့သာ လမ်းမှားပြေးကာ ထွက်ပြေးသွားပါက သူ လုံခြုံစွာ လွတ်မြောက်ရန် သေချာသွားပြီ ဖြစ်သည်။

သို့သော် နောက်တစ်စက္ကန့်တွင် သူ၏ မျက်နှာက ရုတ်တရက် တောင့်တင်းသွားသည်။ အဘယ်ကြောင့်ဆိုသော် မြေကြော ရွှေရောင် အစီအရင်ကြီးမှ ထွက်ပြေးသွားသော ကျန်းချဲ့က ဤနေရာသို့ သွေးရောင် အလင်းတန်း တစ်ခုကို ရုတ်တရက် ပစ်လွှတ်လိုက်သည်ကို မြင်လိုက်ရသောကြောင့်ပင်။ ထို့အပြင် အေးစက်စက် အသံတစ်သံကိုပါ ကြားလိုက်ရသည်။

"ခင်ဗျားကို သေရမယ်လို့ ပြောပြီးပြီဆိုတော့ ဒီနေ့ ခင်ဗျား သေချာပေါက် သေရမယ်"

"ဒါ ဘာပစ္စည်းလဲ"

ချီဖျင်တောက်၏ ရင်ထဲတွင် ရုတ်တရက် လေးလံသွားပြီး အကြောင်းပြချက် မရှိဘဲ အနည်းငယ် ထိတ်လန့်သွားကာ ထိုအရာကို ပေရာချီ အကွာတွင် တားဆီးရန် အလျင်အမြန် လက်ကို မြှောက်လိုက်သည်။ ဝိုးတဝါး အနေအထားဖြင့် သွေးရောင် အလင်းတန်း အတွင်း၌ ပါဝင်သော အရာကို မြင်လိုက်ရသည်။

ကြေးမုံတစ်ခုနှင့် တူနေ၏။

သူ၏ ရင်ထဲတွင် အကြောင်းပြချက် မရှိဘဲ ထိတ်လန့်သွားသော်လည်း ကျန်းချဲ့ ချန်ထားရစ်ခဲ့သော စကားက ပါးစပ်နဲ့တင် လေထွားနေခြင်း မဖြစ်နိုင်ကြောင်း သူ သိထားရာ ရင်ထဲတွင် ကြီးမားသော ခြိမ်းခြောက်မှု တစ်ခု ချက်ချင်း ပေါ်ထွက်လာသည်။ လေဟာနယ်ထဲမှ မိုးကြိုး တစ်ချက်ကို ခေါ်ယူကာ ထိုအရာကို ဖျက်ဆီးပစ်ရန် ပြင်ဆင်လိုက်သည်။

သို့သော် မိုးကြိုး မကျလာခင်မှာပင် ရုတ်တရက် သွေးရောင် အလင်းတန်း ဖုံးလွှမ်းထားသော ကြေးမုံက အဆုံးမဲ့သော ဖိအားများကို ရုတ်တရက် ထုတ်လွှတ်လိုက်သည်။

နောက်တစ်ခဏတွင်...

မျက်တောင်တစ်ခတ်အတွင်း တောက်ပသော အလင်းတိုင် တစ်ခုက ကောင်းကင်ယံသို့ တိုက်ရိုက် ထိုးတက်သွားသည်။ ရွှေရောင် အစီအရင်ကြီး တစ်ခုလုံးကို ဖုံးလွှမ်းသွားတော့သည်။ တစ်ချိန်တည်းမှာပင် လေဟာနယ် တစ်ခုလုံး ဤအခိုက်အတန့်တွင် ရပ်တန့်သွားတော့သည်။

"သေစမ်း သိုင်းသူတော်စင် လက်နက်ပဲ"

ဤအခိုက်အတန့်တွင် ထိုအရှိန်အဝါကို ခံစားမိပြီးနောက် ချီဖျင်တောက် အလွန်အမင်း အံ့အားသင့်သွားပြီး ရင်ထဲတွင် အတိုင်းမသိ ထိတ်လန့်သွားကာ ချက်ချင်းပင် မူလဝိညာဉ်ကို ခန္ဓာကိုယ်မှ ခွဲထုတ်၍ ဤနေရာမှ ဝေးရာသို့ ထွက်ပြေးရန် ပြင်ဆင်လိုက်တော့သည်။ နိုင်ငံတစ်နိုင်ငံ၏ ဘိုးဘေး တစ်ဦးအနေဖြင့် သူ၏ လက်ထဲတွင် သိုင်းသူတော်စင် လက်နက် မရှိသော်လည်း သိုင်းသူတော်စင် လက်နက် ပေါက်ကွဲသည့် မြင်ကွင်းကိုတော့ သေချာပေါက် ကြားဖူး မြင်ဖူးခဲ့ရာ ချက်ချင်းပင် ထိတ်လန့်တကြား ဖြစ်သွားတော့သည်။

သို့သော် ထင်ရှားစွာပင် ယခုအချိန်တွင် သူက အစီအရင်၏ ပိတ်လှောင်မှုကို ခံထားရသည်။ ထွက်ပြေးရန် အချိန် လုံးဝ မရလိုက်တော့ပေ။

မျက်တောင်တစ်ခတ်အတွင်း အဆုံးမဲ့သော ကြောက်မက်ဖွယ် စွမ်းအားများ လုံးဝ ပေါက်ကွဲထွက်လာတော့သည်။ ကျန်းချဲ့က ချီရွှယ်မိစ္ဆာသခင်၏ နည်းလမ်းကို အသုံးပြု၍ သိုင်းသူတော်စင် လက်နက် ဖြစ်သော သွေးနတ်ဘုရား ကြေးမုံ၏ အခြေခံအုတ်မြစ်များကို လှုံ့ဆော်ကာ အလွန်တရာ ကြောက်မက်ဖွယ်ကောင်းသော ဂယက်ရိုက်ခတ်မှု တစ်ခုအဖြစ် မျက်တောင်တစ်ခတ်အတွင်း ပြောင်းလဲပစ်လိုက်သည်။

ပေါက်ကွဲမှု ဗဟိုချက်မှ စတင်၍ အရပ်လေးမျက်နှာ ရှစ်မျက်နှာသို့ မျက်တောင်တစ်ခတ်အတွင်း ဖုံးလွှမ်းသွားတော့သည်။ ရွှေရောင် အလင်းတန်းများ၏ အောက်တွင် သနားစရာကောင်းပြီး မကျေနပ်သော အော်ဟစ်သံ တစ်ခုသာ ကျန်ရစ်ခဲ့သော်လည်း နောက်ပိုင်းတွင် ထိုကြောက်မက်ဖွယ် ဖိအားကြီး၏ ဖုံးလွှမ်းခြင်းကို လျင်မြန်စွာ ခံလိုက်ရပြီး မျက်တောင်တစ်ခတ်အတွင်း အပ်ကျသံ ကြားရလောက်အောင် တိတ်ဆိတ်သွားတော့သည်။

"ဘုန်း"

ကောင်းကင်နှင့် မြေကြီး ပြိုကွဲလုမတတ် ကြောက်မက်ဖွယ် ပေါက်ကွဲသံကြီး ထွက်ပေါ်လာပြီး နန်ယွဲ့ မြို့တော်၏ ဗဟိုချက်တွင် မျက်တောင်တစ်ခတ်အတွင်း မှိုပွင့်ပုံသဏ္ဌာန် ဂယက်ရိုက်ခတ်မှုကြီး တစ်ခု ပေါ်ထွက်လာကာ လေဆင်နှာမောင်း တစ်ခုအလား အရပ်လေးမျက်နှာ ရှစ်မျက်နှာသို့ လွှမ်းခြုံသွားတော့သည်။

၎င်း ဖြတ်သန်းသွားသော နေရာတိုင်းတွင် မြေကြီးများ အက်ကွဲကာ တောင်တန်းများ ပြိုကျသွားသည့်အလား အရာအားလုံးကို လုံးဝ ဖျက်ဆီးပစ်လိုက်သည်။ ထို ရွှေရောင် မြေကြော အလင်းတိုင် ကိုးတိုင်မှာလည်း မျက်တောင်တစ်ခတ်အတွင်း အဖျက်ဆီး ခံလိုက်ရတော့သည်။

ဤအခိုက်အတန့်တွင် ကောင်းကင်နှင့် မြေကြီး ပြိုကွဲသွားတော့သည်။