အခန်း ၄၆၅

အခန်း ၄၆၅ ကောင်းကင်ယံထက်က ရှေးဟောင်းသစ်ပင်ကြီး၊ စုန်းနတ်ဘုရားကျောင်းမှ နတ်သံတမန်

"လောလောဆယ် သူ့ကို အသက်ရှင်ခွင့် ပေးထားလိုက်ပါဦး ဒါပေမဲ့ သူ့ရဲ့ သဲလွန်စတွေကိုတော့ အပြင်ကို မပေါက်ကြားစေနဲ့ သွေးပင်လယ် ပုတီးစေ့ထဲမှာ ဖုံးကွယ်ထားတာ အကောင်းဆုံးပဲ"

ဘိုးဘေး ဟေးလုံ ၏ ကျင့်စဉ်စွမ်းအားက သာမန်မျှသာ ဖြစ်သော်လည်း သူ၏ နောက်ကွယ်တွင် ကမ္ဘာမြေ တစ်ခုလုံး ရှိနေပေသည်။ ထိုကမ္ဘာမြေ ဆိုသည်မှာ အချို့သော လျှို့ဝှက်နယ်မြေများလောက်ပင် အရေးမပါလှသော်လည်း နောင်တစ်ချိန်တွင် အသုံးဝင်လာနိုင်ပေသည်။

စောစောက လေဟာနယ်များ ရှုပ်ထွေးသွားချိန်တွင် ကျန်းချဲ့တို့ အားလုံးက ကမ္ဘာမြေ၏ အရှိန်အဝါ အချို့ကို ဖမ်းယူနိုင်ခဲ့ကြသည်။ သို့သော် ဘိုးဘေး ဟေးလုံ လောက်တော့ ထိုကမ္ဘာမြေနှင့် ရင်းနှီးကျွမ်းဝင်မှု မရှိနိုင်ပေ။

နောင်တစ်ချိန် ထိုကမ္ဘာမြေကို အသုံးပြုရန် လိုအပ်လာပါက ဤလူကို လူသား အချက်ပြစက် အဖြစ် အသုံးပြုရဦးမည် ဖြစ်သည်။ သို့သော် ကျန်းချဲ့က သူ့ကို ဘေးတွင် ခေါ်ထားရန် မရည်ရွယ်ထားပေ။

သူ၏ နောက်ခံက အနည်းငယ် ပြဿနာ ရှိနေသည်။ အောက်ကမ္ဘာများ အကြောင်းကို လောကကြီးက လုံးဝ မသိရှိဘဲ နေမည်ကို သူ မယုံကြည်ပေ။ တစ်စုံတစ်ယောက်က သတင်းများကို တမင်တကာ ပိတ်ဆို့ထားခြင်းသာ ဖြစ်ရမည်။ ဘိုးဘေး ဟေးလုံ ၏ ကမ္ဘာမြေနှင့် နှိုင်းယှဉ်ပါက ကျန်းချဲ့ ရှိနေသော ဤနေရာက အထက်ကမ္ဘာ ဟု ဆိုလျှင်ပင် ရနိုင်ပေသည်။

ထိုအထဲတွင် ကျန်းချဲ့ အသံသယအဖြစ်ဆုံးမှာ စုန်းနတ်ဘုရားကျောင်း ပင် ဖြစ်သည်။ အဘယ်ကြောင့်ဆိုသော် ဤနေရာက တောင်တန်းကြီး တစ်သိန်း ၏ နယ်နိမိတ် အတွင်းတွင် ရှိနေသောကြောင့်ပင်။

"မင်း သဘောအတိုင်း လုပ်ပါ"

ချီရွှယ်မိစ္ဆာသခင်က ဤကိစ္စနှင့် ပတ်သက်၍ ဘာမှ ကန့်ကွက်စရာ မရှိပေ။ သူက ဘိုးဘေး ဟေးလုံ ၏ ကမ္ဘာမြေကို စိတ်ဝင်စားသော်လည်း ဘိုးဘေး ဟေးလုံ ကိုယ်တိုင်ကိုတော့ သိပ်စိတ်မဝင်စားပေ။ အောက်ခွန်း ကလည်း စီးတော်ယာဉ် တစ်ကောင် ဖြစ်ရာ မည်သည့်စကားမှ ဝင်ပြောမည် မဟုတ်ပေ။

သို့သော် သူတို့ စကားပြောဆိုပြီးသည်နှင့် တစ်ပြိုင်နက် ပတ်ဝန်းကျင်ရှိ ကောင်းကင်နှင့် မြေကြီးက ရုတ်တရက် ထပ်မံ တုန်ခါလာတော့သည်။

အလွန် ကြောက်မက်ဖွယ်ကောင်းပြီး ပြင်းထန်သော အရှိန်အဝါကြီး တစ်ခုက လျင်မြန်စွာ မြင့်တက်လာသည်။ ရုန်းရင်းဆန်ခတ် မိစ္ဆာတောင်ကြား၏ အနက်ရှိုင်းဆုံး နေရာမှ တစ်ခုခု လန့်နိုးသွားသည့်အလားပင်။

ကျန်းချဲ့တို့၏ မျက်နှာများ ချက်ချင်း ပြောင်းလဲသွားကြသည်။ မည်သည့် တုံ့ဆိုင်းမှုမျှ မရှိဘဲ ဘိုးဘေး ဟေးလုံ ကို သွေးပင်လယ် ပုတီးစေ့ အတွင်းသို့ သိမ်းဆည်းလိုက်ပြီး မျက်တောင်တစ်ခတ်အတွင်း လေဟာနယ်ထက်မှ အသက်လု ထွက်ပြေးကြတော့သည်။

သူတို့၏ အာရုံခံစားမှုအရ ယခုတစ်ကြိမ် ပေါ်ထွက်လာသော အရှိန်အဝါက ယခင် ဘိုးဘေး ဟေးလုံ ထက် အဆပေါင်းများစွာ သာလွန်နေသည်။ သိုင်းသူတော်စင် ဟု သူတို့ ခန့်မှန်းမိသည်။ သေချာပေါက် သိုင်းသူတော်စင် နှင့် ယှဉ်ပြိုင်နိုင်စွမ်းရှိသော အရှိန်အဝါမျိုးပင်။

ပတ်ဝန်းကျင်ရှိ အဆိပ်ငွေ့များကလည်း တစ်စုံတစ်ခု၏ ဆွဲငင်မှုကို ခံလိုက်ရသည့်အလား လျင်မြန်စွာ ပြောင်းလဲလာပြီး ကျန်းချဲ့တို့ထံသို့ အရှိန်အဟုန်ဖြင့် ပြေးဝင်လာကြသည်။ ဤတစ်ကြိမ်တွင်တော့ ပုံမှန် အချိန်များထက် အများကြီး ပိုမို ကြောက်မက်ဖွယ် ကောင်းလှသည်။ ကျန်းချဲ့ကိုပင် အနည်းငယ် အခက်တွေ့သွားစေသည်။

သို့သော် သူနှင့် အောက်ခွန်းတို့ ပူးပေါင်း တိုက်ခိုက်လိုက်မှု အောက်တွင် အတားအဆီး ကြီးကြီးမားမား မဖြစ်ခဲ့ပေ။ မျက်တောင်တစ်ခတ်အတွင်း မိုင်အနည်းငယ် အကွာသို့ လွတ်မြောက်သွားကြသည်။

သူတို့၏ နောက်ကျောဘက်တွင်တော့ အလွန် ကြီးမားလှသော အနက်ရောင် ရှေးဟောင်း သစ်ပင်ကြီး တစ်ပင်၏ ပုံရိပ်က ဝိုးတဝါး ပေါ်ထွက်လာသည်။ ထိုအရာထံမှ အလွန် ထူးဆန်းသော မိစ္ဆာအငွေ့အသက်များ ထွက်ပေါ်နေသည်။

မှုန်ဝါးဝါး အလင်းတန်းများ ထွက်ပေါ်နေသော သစ်နွယ်ပင် အမြစ်များက ကောင်းကင်နှင့် မြေကြီးကို ဖုံးလွှမ်းသွားသော ပိုက်ကွန်ကြီး တစ်ခုအလား မျက်တောင်တစ်ခတ်အတွင်း ရုန်းရင်းဆန်ခတ် မိစ္ဆာတောင်ကြား တစ်ခုလုံးကို လွှမ်းခြုံသွားတော့သည်။ ၎င်းတို့က အရပ်မျက်နှာ အသီးသီးသို့လည်း အဆက်မပြတ် ပျံ့နှံ့နေသေးသည်။ ထိုအရာထံမှ ထွက်ပေါ်လာသော အန္တရာယ် အငွေ့အသက်များကြောင့် ကျန်းချဲ့တို့ အားလုံး ကြီးမားသော ရန်သူနှင့် ရင်ဆိုင်ရသည့်အလား တင်းမာသွားကြသည်။

ယခုအချိန်တွင် သူတို့က တစ်ခဏမျှပင် ရပ်တန့်မနေရဲတော့ဘဲ သွေးလွတ်မြောက်ခြင်း ပညာရပ်ကိုပင် ထုတ်သုံးလိုက်ကြသည်။ လေဟာနယ်ထက်တွင် သွေးရောင် အလင်းတန်း နှစ်ခုက ဖြတ်ပြေးသွားပြီး နေရာရွှေ့ပြောင်းသွားသည့်အလား မျက်တောင်တစ်ခတ်အတွင်း နေရာမှာပင် ပျောက်ကွယ်သွားကြသည်။ နောက်တစ်ကြိမ် ပြန်ပေါ်လာချိန်တွင် ပေထောင်ချီ အကွာသို့ ရောက်ရှိနေပြီ ဖြစ်သည်။

ကျန်းချဲ့က လက်ထဲတွင် သိုင်းသူတော်စင် ကျောက်စိမ်းရုပ်တုကို တင်းကျပ်စွာ ဆုပ်ကိုင်ထားပြီး မျက်နှာထားက အလွန် လေးနက်နေသည်။ ယခု ရုတ်တရက် ကြုံတွေ့လိုက်ရသော အန္တရာယ်က ယခင်က ကျာလော့ ဗောဓိသတ် နှင့် ရင်ဆိုင်ခဲ့ရစဉ်ကထက်ပင် ပိုမို အန္တရာယ်ကြီးမားသည်ဟု သူ ခံစားလိုက်ရသည်။

ဤနေရာမှ လွတ်မြောက်နိုင်ရန်အတွက် ဤအသက်ကယ် ဖဲချပ်ကို အပြီးတိုင် အသုံးပြုရန်ပင် သူ ပြင်ဆင်ထားပြီး ဖြစ်သည်။

အသက်ရှူကြိမ် ဆယ်ဂဏန်းခန့် အကြာတွင် ကျန်းချဲ့တို့၏ အမြန်နှုန်းက အမြင့်ဆုံးသို့ ရောက်ရှိသွားပြီး ရုန်းရင်းဆန်ခတ် မိစ္ဆာတောင်ကြားမှ ထွက်ခွာရန် နီးကပ်လာသည်။ သို့သော် သူတို့၏ နောက်ကျောဘက်တွင်တော့ အဆုံးအစမရှိသော အနက်ရောင် သစ်နွယ်ပင်များကလည်း ကပ်ပါလာပြီ ဖြစ်သည်။

"ဝှစ်..."

ကျန်းချဲ့က ရုန်းရင်းဆန်ခတ် မိစ္ဆာတောင်ကြားမှ ခြေလှမ်း ထုတ်လိုက်ချိန်မှာပင် နောက်ကျောမှ သစ်နွယ်ပင်များကလည်း နောက်ဆုံးတွင် ရောက်ရှိလာခဲ့သည်။ ကျန်းချဲ့၏ ရုပ်ခန္ဓာကိုယ် အတွင်းသို့ ထိုးဖောက် ဝင်ရောက်တော့မည့် ဆဲဆဲ အချိန်လေးတွင် ကျန်းချဲ့က ကျောက်စိမ်းရုပ်တု အတွင်းသို့ ဓမ္မစွမ်းအင်များ စတင် ထည့်သွင်းလိုက်ပြီ ဖြစ်သည်။

သို့သော် နောက်တစ်စက္ကန့်တွင် သူက ချက်ချင်း ရပ်တန့်လိုက်သည်။

အကြောင်းရင်းမှာ နောက်ကျောရှိ ကောင်းကင် တစ်ခွင်လုံး ပြည့်နှက်နေသော သစ်နွယ်ပင်များက တစ်စုံတစ်ခု၏ တားမြစ်ချက်ကို ခံလိုက်ရသည့်အလား ရုန်းရင်းဆန်ခတ် မိစ္ဆာတောင်ကြား နယ်နိမိတ် အတွင်းတွင်သာ ရပ်တန့်သွားသောကြောင့်ပင်။ ရှေ့သို့ တစ်လှမ်းမျှ ထပ်မံ ထွက်ပေါ်မလာတော့ချေ။

"ဒါ ဒါက ဘယ်လိုဖြစ်တာလဲ"

အောက်ခွန်း၏ မျက်နှာပေါ်တွင် အလွန်အမင်း ထိတ်လန့်သွားသော အရိပ်အယောင်များ ပြည့်နှက်နေသည်။ စောစောက အခိုက်အတန့်လေးတွင် အလွန် အန္တရာယ်များသော အငွေ့အသက်ကို သူ ခံစားလိုက်ရသည်။ ယခုတစ်ကြိမ် သေချာပေါက် ဒုက္ခရောက်ပြီဟု ထင်ထားခဲ့သော်လည်း နောက်တစ်စက္ကန့်တွင် အနောက်ဘက်ရှိ သစ်နွယ်ပင်များက ရပ်တန့်သွားခဲ့သည်။

"မင်းက ငါ့ကို လာမေးနေတယ် ငါကတောင် မင်းကို ပြန်မေးချင်သေးတယ် အဲဒီ သစ်နွယ်ပင်တွေက တကယ်တော့ ဘာအကောင်တွေလဲ"

ချီရွှယ်မိစ္ဆာသခင်၏ အသံက ကပ်ဆိုးတစ်သောင်း မိစ္ဆာဓား အတွင်းမှ ထွက်ပေါ်လာသည်။ သူ၏ လေသံထဲတွင် အလွန်အမင်း ထိတ်လန့်နေမှုများ ကျန်ရှိနေသေးကြောင်း သေချာပေါက် ကြားနိုင်ပေသည်။

ကျန်းချဲ့က စကားမပြောဘဲ တိတ်ဆိတ်နေကာ ရုန်းရင်းဆန်ခတ် မိစ္ဆာတောင်ကြား အတွင်းရှိ အရာအားလုံးကို တိတ်ဆိတ်စွာ ကြည့်ရင်း မျက်မှောင်ကို တင်းကျပ်စွာ ကြုတ်ထားလိုက်သည်။

စောစောက ရုတ်တရက် ဖြစ်ပေါ်လာသော မြင်ကွင်းက သူ့ကို သေမင်းနှင့် နှုတ်ဆက်ခါနီး အခြေအနေကို နောက်တစ်ကြိမ် ခံစားလိုက်ရစေသည်။ အကယ်၍ သူသာ စွမ်းအား မမြင့်မားဘဲ သွေးသားစွမ်းအင်များကို လောင်ကျွမ်း၍ မပြေးခဲ့ပါက ရုန်းရင်းဆန်ခတ် မိစ္ဆာတောင်ကြားထဲမှ အမှန်တကယ်ပင် ထွက်လာနိုင်မည် မဟုတ်ပေ။

'ဒါက တကယ်တော့ ဘာ မိစ္ဆာသစ်ပင်ကြီးလဲ ငါ တစ်ခါမှကို မကြားဖူးဘူး အရမ်းကို ကြောက်စရာ ကောင်းလွန်းတယ် သိုင်းသူတော်စင် အဆင့်နဲ့တောင် ယှဉ်နိုင်လောက်တယ် ဒါပေမဲ့ သူ့မှာ ဉာဏ်ရည်ဉာဏ်သွေးတော့ ရှိပုံမရဘူး' ဟု ချီရွှယ်မိစ္ဆာသခင်က သူဘာသာသူ တွေးတောလိုက်သည်။

ကျန်းချဲ့၏ ရင်ထဲတွင် လှုပ်ရှားသွားပြီး တိုးတိတ်သော အသံဖြင့် ပြောလိုက်သည်။

"ဒီ မိစ္ဆာသစ်ပင်က ရုန်းရင်းဆန်ခတ် မိစ္ဆာတောင်ကြားကို စောင့်ကြပ်နေတာ ဖြစ်ဖို့ များတယ် ကြည့်ရတာ ဒီနေရာကနေ အောက်ကမ္ဘာက သိုင်းပညာရှင်တွေ တစ်ယောက်မှ ထွက်မလာနိုင်ခဲ့တာက ဒီ မိစ္ဆာသစ်ပင် အောက်မှာပဲ အသက်ဆုံးရှုံးခဲ့ကြလို့ ဖြစ်မယ်"

ဤသည်မှာ သူ ရမ်းသန်း ခန့်မှန်းနေခြင်း မဟုတ်ပေ။ ယခင်က တွေ့ခဲ့ရသော အရိုးဖြူများကို ပြန်စဉ်းစားကြည့်ပြီး ဤမိစ္ဆာသစ်ပင်၏ စွမ်းအားကို ကြည့်လိုက်ပါက ဤကောက်ချက်ကို အလွယ်တကူ ရရှိနိုင်ပေသည်။

မည်သို့ပင်ဆိုစေ အောက်ကမ္ဘာမှ တက်လှမ်းလာသူများက အများဆုံး ရှန်ရှန်းအဆင့် သို့မဟုတ် ယွမ်ယင်းအဆင့်သာ ရှိပြီး နည်းလမ်းများနှင့် နတ်စွမ်းရည်များကလည်း အလွန် ရှားပါးလှသည်။ ထူးခြားသော နတ်လက်နက်များလည်း မရှိကြသဖြင့် ပုံမှန် ဝိညာဉ်လောက သိုင်းပညာရှင်များနှင့် နှိုင်းယှဉ်ပါက စွမ်းအား အများကြီး နိမ့်ကျလှသည်။

သူကိုယ်တိုင်ပင် သွေးလွတ်မြောက်ခြင်း ပညာရပ်ကို အသုံးပြု၍ ထွက်ပြေးခဲ့ရရာ ထို အောက်ကမ္ဘာ သိုင်းပညာရှင်များ၏ အခြေအနေကို တွေးကြည့်ရုံဖြင့် သိနိုင်ပေသည်။

"ဒီလိုဆိုတော့လည်း အဲဒီ ဘိုးဘေး ဟေးလုံ ဆိုတဲ့ကောင်က ငါတို့ကျေးဇူးကြောင့် အသက်ရှင်သွားတာပဲ မဟုတ်ရင် သူ ဒီနေရာကနေ ထွက်လာနိုင်ဖို့ အခွင့်အရေးတောင် ရှိမှာ မဟုတ်ဘူး စုန်းနတ်ဘုရားကျောင်းက စီစဉ်ထားတာများလား မသိဘူး" ဟု ချီရွှယ်မိစ္ဆာသခင်က ထပ်ပြောလိုက်သည်။

"စုန်းနတ်ဘုရားကျောင်းက စီစဉ်ထားတာ မဟုတ်ရင်တောင် သူတို့နဲ့ သေချာပေါက် ပတ်သက်နေမှာပဲ" ဟု အောက်ခွန်းက မနေနိုင်ဘဲ ဝင်ပြောလိုက်သည်။

"ပတ်သက်တာ ဖြစ်ဖြစ် မပတ်သက်တာ ဖြစ်ဖြစ် ပေါ့ဆလို့တော့ မရဘူး ဒီနေရာမှာ ဆက်နေလို့ မဖြစ်တော့ဘူး အခုချက်ချင်း ထွက်ကြမယ် လာရာလမ်း အတိုင်း ပြန်လှည့်မယ်"

ကျန်းချဲ့၏ မျက်နှာထားက အလွန် လေးနက်နေသည်။

စုန်းနတ်ဘုရားကျောင်း၏ စွမ်းအားက အလွန် ကြီးမားကြောင်း သံသယဝင်စရာ မလိုပေ။ အစိုးရနှင့် အပေးအယူ လုပ်နိုင်စွမ်း ရှိခြင်းက သူတို့ ကျောင်းတော် အတွင်း၌ သိုင်းသူတော်စင် စွမ်းအားရှင် တစ်ပါးထက်မက ရှိနေကြောင်း သက်သေပြနေသည်။

အကယ်၍ ထိုကဲ့သို့သော အစွမ်းထက်သူများကို သွားရန်စမိပါက သိုင်းသူတော်စင် ကျောက်စိမ်းရုပ်တု ရှိနေလျှင်တောင်မှ ကျန်းချဲ့ အနေဖြင့် လုံခြုံစွာ ထွက်ပြေးနိုင်မည်ဟု ကြီးကြီးမားမား ယုံကြည်မှု မရှိပေ။

"ကောင်းပြီ"

ကျန်းချဲ့၏ အမိန့်ကို ချီရွှယ်မိစ္ဆာသခင် ဖြစ်စေ၊ အောက်ခွန်း ဖြစ်စေ မည်သူကမျှ ကန့်ကွက်ခြင်း မရှိကြပေ။ ချက်ချင်းပင် အပြန်လမ်းခရီးသို့ လျင်မြန်စွာ စတင် ထွက်ခွာသွားကြတော့သည်။

မင်ယွဲ့ပြည် မြို့တော် အတွင်း၌။

ယခုအခါ ပုံရိပ်အချို့က မြို့တော်၏ လေဟာနယ်ထက်တွင် လေးနက်သော မျက်နှာထားများဖြင့် မတ်တတ်ရပ်နေကြသည်။ သူတို့၏ အရှိန်အဝါများက အချင်းချင်း ရောယှက်နေပြီး ပတ်ဝန်းကျင်ရှိ ကောင်းကင်နှင့် မြေကြီးကိုပင် လွှမ်းမိုးထားသည်။

အကယ်၍ ပိုင်ယွဲ့ တစ်ခွင်မှ ဗဟုသုတ ကြွယ်ဝသူ တစ်ဦးဦးသာ ဤနေရာတွင် ရှိနေပါက အလွန်အမင်း အံ့အားသင့်သွားမည်မှာ သေချာသည်။ အဘယ်ကြောင့်ဆိုသော် ထိုပုံရိပ်များက ပိုင်ယွဲ့ နိုင်ငံ အသီးသီးမှ တော်ဝင်မိသားစု ဘိုးဘေးများ ဖြစ်ကြသောကြောင့်ပင်။

တစ်ဦးချင်းစီ၏ ကျင့်စဉ်အဆင့်က မနိမ့်ကျဘဲ အနည်းဆုံး ယွမ်ရှန်းအဆင့်များ ဖြစ်ကြသည်။ အစွမ်းအထက်ဆုံးသူများမှာ မင်ယွဲ့ ဘိုးဘေး နှင့် ခါးကိုင်းကိုင်း အဘွားအို တစ်ဦးတို့ ဖြစ်ကြသည်။ သူတို့၏ ကျင့်စဉ်အဆင့်မှာ ယွမ်ရှန်းအဆင့် အထွတ်အထိပ်သို့ ရောက်ရှိနေကြပြီ ဖြစ်သည်။

သို့သော် ယခုအချိန်တွင် သူတို့၏ အရှိန်အဝါများက သာမန် မဟုတ်သော်လည်း သေချာစွာ အကဲခတ်ကြည့်မည် ဆိုပါက သူတို့၏ အကြည့်များက မြို့တော် အပြင်ဘက်သို့ အချိန်မရွေး လှမ်းကြည့်နေကြသည်ကို မြင်တွေ့နိုင်ပေသည်။

အကြောင်းရင်းမှာ သူတို့က စုန်းနတ်ဘုရားကျောင်းမှ အစွမ်းထက်သူများ ရောက်ရှိလာမည်ကို စောင့်ဆိုင်းနေကြသောကြောင့်ပင်။

ကျန်းချဲ့က နန်ယွဲ့ပြည်ကို ဖျက်ဆီးခဲ့ပြီးနောက် ပိုင်ယွဲ့ တစ်ခွင်လုံးမှာ မျက်တောင်တစ်ခတ်အတွင်း တုန်လှုပ်ချောက်ချား သွားခဲ့ကြသည်။ မင်ယွဲ့ ဘိုးဘေးတို့ လူစုက အချင်းချင်း တိုင်ပင်ဆွေးနွေးခဲ့ကြသော်လည်း မည်သူကမျှ တစ်ယောက်ကို တစ်ယောက် မလွှမ်းမိုးနိုင်ခဲ့ကြပေ။

နောက်ဆုံးတွင်တော့ ရည်မှန်းချက် တစ်ခုတည်းကိုသာ သဘောတူညီမှု ရရှိခဲ့ကြသည်။ ၎င်းမှာ စုန်းနတ်ဘုရားကျောင်းကို အကူအညီ တောင်းရန် ပင် ဖြစ်သည်။

ထိုကိစ္စနှင့် ပတ်သက်၍ စုန်းနတ်ဘုရားကျောင်း ကလည်း နည်းလမ်း အချို့ဖြင့် သူတို့ကို အကြောင်းပြန်ခဲ့ပြီး ဤနေရာသို့ နတ်သံတမန် အချို့ စေလွှတ်ကာ မြောက်ပိုင်း စစ်ချီမည့် ကိစ္စကို အတူတကွ တိုင်ပင်မည်ဟု ဆိုလာခဲ့သည်။

"ဟား စုန်းနတ်ဘုရားကျောင်းက စေလွှတ်လိုက်တဲ့ နတ်သံတမန်တွေ ဆိုတဲ့အတိုင်း မာနကတော့ အတော်လေး ကြီးတာပဲ ငါတို့ စောင့်နေရတာ နှစ်နာရီတောင် ရှိတော့မယ် အခုထိ ရောက်မလာသေးဘူး"

သရဲမျက်နှာနှင့် ခေါင်းတုံး တစ်ဦးက မနေနိုင်ဘဲ ဖွင့်ဟပြောဆိုလိုက်သည်။ သို့သော် သူ၏ စကားသံထဲတွင် မကျေနပ်မှုများ ပါဝင်နေခြင်း မဟုတ်ဘဲ ကူကယ်ရာမဲ့နေမှုများသာ ပါဝင်နေသည်။

မည်သို့ပင်ဆိုစေ စုန်းနတ်ဘုရားကျောင်း ဆိုသည်မှာ ပိုင်ယွဲ့ နိုင်ငံများ အားလုံး၏ ကောင်းကင်ကြီး ပင် ဖြစ်သည်။ မည်သည့် အချိန်တွင်မဆို စုန်းနတ်ဘုရားကျောင်း၏ အမိန့် တစ်ခု ကျလာပါက မည်သူကမျှ မနာခံဘဲ မနေရဲကြပေ။

ယခင်က ပိုင်ယွဲ့ နိုင်ငံကြီး တစ်ခုက စုန်းနတ်ဘုရားကျောင်းကို ဆန့်ကျင်ဖူးသည်။ ရလဒ်အနေဖြင့် လူမျိုးစု တစ်ခုလုံး အမြစ်ပြတ် သုတ်သင်ခံလိုက်ရပြီး အလယ်ပိုင်းလွင်ပြင်သို့ ထွက်ပြေးသွားသူများကိုပင် အတင်းအကျပ် ဖမ်းဆီး ခေါ်ဆောင်လာခဲ့သည်။ ထိုကဲ့သို့ အကြိမ်အနည်းငယ် ဖြစ်ပွားပြီးနောက် ပိုင်ယွဲ့ တစ်ခွင်တွင် မည်သူကမျှ မဆန့်ကျင်ရဲတော့ချေ။

"ဘာလဲ သရဲခေါင်းတုံး မင်းက မကျေမနပ် ဖြစ်နေတာလား"

လူတစ်ယောက်က ထိုစကားကို ထောက်ခံလိုက်ပြီး မျက်ဝန်းများထဲတွင် သရော်လှောင်ပြောင်မှုများ ပါဝင်နေသည်။ တစ်ဖက်လူကို ဒေါသထွက်အောင် ဆွပေးပြီး လွန်ကျူးသော စကားများ ပြောထွက်လာစေရန် ရည်ရွယ်ထားခြင်း ဖြစ်သည်။ ထိုမှသာ နောက်ပိုင်းတွင် တိုင်တန်း၍ ရမည် မဟုတ်ပါလား။

သို့သော် သရဲမျက်နှာနှင့် ခေါင်းတုံး ကလည်း မအပေ။ ထိုစကားကို ကြားသောအခါ နှာခေါင်းတစ်ချက် ရှုံ့လိုက်ပြီး ပြန်ပြောလိုက်သည်။

"ငါက ဘယ်မှာများ မကျေမနပ် ဖြစ်ရမှာလဲ နတ်သံတမန်တွေ လမ်းမှာ အခက်အခဲ တစ်ခုခုများ ကြုံနေရမလားလို့ စိုးရိမ်နေတာပါ"

"ဟုတ်လို့လား မင်းက စုန်းနတ်ဘုရားကျောင်းကို မကျေမနပ် ဖြစ်နေတယ်လို့ ငါက ထင်နေတာ"

"နတ်သံတမန်တွေ ရောက်လာတော့မယ့် အချိန်မှာ မင်းတို့ နှစ်ယောက်က ဒီလောက်တောင် ဆူညံနေကြတာ သင့်တော်ရဲ့လား" ဟု မင်ယွဲ့ ဘိုးဘေးက မနေနိုင်ဘဲ ဝင်ပြောလိုက်သည်။

သရဲမျက်နှာနှင့် ခေါင်းတုံး က အခြား တစ်ယောက်ကို မျက်လုံးချင်း ဆုံကြည့်လိုက်ရာ နှစ်ယောက်စလုံး၏ မျက်ဝန်းအောက်ခြေတွင် အေးစက်သော အရိပ်အယောင်များ အသီးသီး ပေါ်ထွက်လာကြသည်။ သို့တိုင်အောင် ထိုနှစ်ဦးက မည်သည့် မကျေနပ်ချက်ကိုမျှ ဖွင့်ဟပြောဆိုခြင်း မပြုခဲ့ကြပေ။

"ဟားဟား မင်းတို့ နှစ်ယောက်လုံး ဒီအဘွားကြီး မျက်နှာကို ထောက်ပြီး ခဏလောက် အနားယူကြပါဦး ပြဿနာ တစ်ခုခု ဖြစ်သွားမှာ စိုးလို့ပါ" ဟု ယခုအချိန်အထိ စကားမပြောသေးသော အဘွားအိုကလည်း အခွင့်အရေး ယူကာ ဝင်ပြောလိုက်သည်။

မျက်နှာပေါ်တွင် အပြုံးတစ်ခု ချိတ်ဆွဲထားသော်လည်း တွန့်ခေါက်နေသော မျက်နှာကြီးက အနည်းငယ် ကြောက်မက်ဖွယ် ကောင်းနေသည်။

"သရဲအိုကြီး မင်းကလည်း မီးတောက်တွေကို ကစားတဲ့သူဆိုတော့ အရင်တုန်းက နန်ယွဲ့ မြို့တော်ကို သွားခဲ့ဖူးတယ် မဟုတ်လား အဲဒီ ကျန်းချဲ့ ဆိုတဲ့ ကောင်ကို ရင်ဆိုင်ဖို့ မင်းမှာ ဘယ်လောက် ယုံကြည်မှု ရှိလဲ"

နောက်ဆုံး ကျန်ရှိနေသော လူက ရုတ်တရက် စကားလမ်းကြောင်း လွှဲလိုက်ပြီး မကြာသေးမီက ယွဲ့ပြည်နယ်တွင် နာမည်ကြီးနေသော ကျန်းချဲ့ အကြောင်းကို စတင် ပြောဆိုလာသည်။

သရဲမျက်နှာနှင့် ဘုန်းကြီးက မျက်နှာထား တောင့်တင်းသွားပြီး အနည်းငယ် မသက်မသာ ဖြစ်သွားကာ နှာခေါင်းတစ်ချက် ရှုံ့လိုက်ပြီး ပြန်ပြောလိုက်သည်။

"မိစ္ဆာအိုကြီးချီ ကိုတောင် သတ်နိုင်ခဲ့တာ ဆိုတော့ ငါက သေချာပေါက် ကျန်းချဲ့ရဲ့ ပြိုင်ဘက် မဟုတ်ပါဘူး ဒါပေမဲ့ မီးတောက်ကို ကစားတဲ့ နေရာမှာတော့ သူက နည်းနည်း လိုပါသေးတယ်"

ပိုင်ယွဲ့ သိုင်းပညာရှင်များက လမ်းစဉ်ခွဲများကို ကျင့်ကြံရာတွင် ကျွမ်းကျင်ကြပြီး သူကတော့ ပို၍ပင် ထူးချွန်သူ ဖြစ်သည်။ ဘိုးဘေးများ ချန်ရစ်ခဲ့သော ကျင့်စဉ်ကို အခြေခံကာ လောကရှိ ထူးခြားသော မီးတောက်များကို သန့်စင်ပြီး စွမ်းအား မြှင့်တင်နိုင်သည်။ ထိုနည်းလမ်းကို အသုံးပြု၍ပင် မီးကပ်ဘေးကို လုံခြုံစွာ ကျော်ဖြတ်နိုင်ခဲ့ခြင်း ဖြစ်သည်။

သူ၏ ကျင့်စဉ်အဆင့်က ယွမ်ရှန်းအဆင့်သို့ ယခုလေးတင် ရောက်ရှိထားသော်လည်း သူ၏ နတ်စွမ်းရည်များက ပိုင်ယွဲ့ တစ်ခွင်တွင် အလွန် ကျော်ကြားလှသည်။

သို့သော် ဤသည်မှာ သူ မောက်မာနေခြင်း မဟုတ်ပေ။ နန်ယွဲ့ နန်းတော်ရှိ ဧရာမ တွင်းကြီးကို မြင်လိုက်ရပြီးကတည်းက သူ၏ အဆင့်အတန်းကို သူ ကောင်းကောင်း သိသွားခဲ့ပြီး ကျန်းချဲ့နှင့် နှိုင်းယှဉ်ပါက ကွာဟချက် အလွန် ကြီးမားလှကြောင်း နားလည်သွားခဲ့သည်။

အခြား လူအချို့ သည်လည်း ထိုကဲ့သို့သော အတွေးမျိုး ရှိနေကြသည်။ မည်သို့ပင်ဆိုစေ ချီဖျင်တောက်က ပိုင်ယွဲ့၏ ထိပ်တန်း စစ်မှန်သောသခင် တစ်ဦး ဖြစ်ပြီး သူ၏ စွမ်းအားက အလွန် ကြောက်မက်ဖွယ် ကောင်းလှကာ သူ့ကို ယှဉ်ပြိုင်နိုင်သူ အလွန် ရှားပါးလှသည်။

ကျန်းချဲ့က သူ့ကို အနိုင်ယူခဲ့ရုံသာမက သတ်ဖြတ်နိုင်ခဲ့သည်။ ဤစွမ်းရည် တစ်ခုတည်းကပင် သူတို့ထဲမှ မည်သူမျှ မလုပ်နိုင်သော အရာဖြစ်သည်။

ထို့ကြောင့် ပိုင်ယွဲ့ နိုင်ငံများ အားလုံးက ကျန်းချဲ့ကို လိုက်လံ ဖမ်းဆီးရန် အမိန့်များ ထုတ်ပြန်ထားသော်လည်း ယနေ့အထိ အသံသာ ကျယ်ပြီး အလုပ်မဖြစ်ခဲ့ပေ။ သူတို့ လူစုကတော့ ပို၍ပင် လိပ်ခွံထဲ ပုန်းနေသကဲ့သို့ စုဝေးနေကြပြီး ကျန်းချဲ့က တစ်ယောက်ချင်းစီ လိုက်လံ တိုက်ခိုက်မည်ကိုပင် ကြောက်ရွံ့နေကြသည်။

"ဟားဟား မင်းက..."

မင်ယွဲ့ ဘိုးဘေး စကားပြောရန် ပြင်လိုက်ချိန်မှာပင်။

ရုတ်တရက် ဓားမြည်သံ တစ်ခု လေဟာနယ်ထက်တွင် ပဲ့တင်ထပ်သွားသည်။ လူတိုင်းက ခေါင်းမော့ကြည့်လိုက်ရာ လေဟာနယ်ထဲရှိ တိမ်တိုက်များက ဓားတစ်ချက်ဖြင့် ခုတ်ပိုင်းခံလိုက်ရပြီး လမ်းကြောင်း တစ်ခု ပွင့်သွားသည်ကို မြင်လိုက်ရသည်။ ပုံရိပ်အချို့က လေဟာနယ်ထဲမှ ဖြည်းညင်းစွာ လျှောက်လာကြသည်။ လာရောက်သူ စုစုပေါင်း လေးဦး ရှိသည်။

ရှေ့ဆုံးမှ လာသူမှာ အနက်ရောင် ဝတ်ရုံရှည်ကို ဝတ်ဆင်ထားပြီး မီးခိုးရောင် ဆံပင်များက ဖရိုဖရဲ ဖြစ်နေသည်။ ရှုပ်ပွနေသော မုတ်ဆိတ်မွေးများက လေတိုက်ခတ်မှုကြောင့် လွင့်ခါနေပြီး နောက်ကျောတွင် အနက်ရောင် သံဓား တစ်လက်ကို လွယ်ထားသည်။ တစ်ကိုယ်လုံးမှာ ထက်မြက်လှသော နတ်ဓား တစ်လက်အဖြစ် ပြောင်းလဲသွားသည့်အလားပင်။

သူ့နောက်ရှိ လူသုံးဦး ကလည်း တစ်ယောက်နှင့် တစ်ယောက် မတူညီကြပေ။

တစ်ဦးက အဖြူရောင် ဝတ်စုံကို ဝတ်ဆင်ထားပြီး အေးစက်စူးရှသော မျက်နှာထား ရှိသည်။ သူ၏ အရှိန်အဝါက အနက်ရောင်ဝတ် အမျိုးသားထက် အနည်းငယ် အားနည်းသော်လည်း ယေဘုယျအားဖြင့်တော့ တန်းတူညီမျှ ရှိသည်ဟု ဆိုနိုင်ပေသည်။ မျက်လုံးနှစ်လုံးစလုံး ကန်းနေခြင်းကသာ အနည်းငယ် ထူးဆန်းနေသည်။

အနက်နှင့် အဖြူဝတ် အမျိုးသား နှစ်ဦး၏ နောက်တွင် လူငယ် ပုံရိပ် နှစ်ခု လိုက်ပါလာသည်။

တစ်ဦးက အစိမ်းရောင် ဝတ်စုံကို ဝတ်ဆင်ထားပြီး သွယ်လျသော ခန္ဓာကိုယ် ရှိကာ အနက်ရောင် ဆံကေသာရှည်များကို ချည်နှောင်ထားသည်။ မျက်ခုံးကြားတွင် အနီရောင် အစက်လေး တစ်စက် ရှိပြီး နတ်မိမယ် တစ်ပါး လူ့ပြည်သို့ ဆင်းသက်လာသည့်အလား လှပလွန်းလှသည်။ သို့သော် မျက်ဝန်းများကတော့ အနည်းငယ် ရိုးသားဖြူစင်နေသည်။

အကယ်၍ ကျန်းချဲ့သာ ဤနေရာတွင် ရှိနေပါက ထိုသူမှာ ယခင်က တစ်ကြိမ် တွေ့ဆုံဖူးသော နတ်မိမယ် ချင်းချင်း ဖြစ်ကြောင်း ချက်ချင်း မှတ်မိနိုင်ပေလိမ့်မည်။

ချင်းချင်း၏ ဘေးတွင် သာမန်မဟုတ်သော အရှိန်အဝါ ရှိသည့် လူငယ် တစ်ယောက် ရပ်နေသည်။ ရွှေရောင် ဝတ်ရုံရှည်ကို ဝတ်ဆင်ထားပြီး ကျောက်စိမ်းကဲ့သို့ ဖြူဖွေးသော အသားအရေ ရှိသည်။ ချင်းချင်းနှင့် ယှဉ်တွဲရပ်နေပုံက ရွှေမင်းသားနှင့် နတ်မိမယ်လေး အလားပင်။

သို့သော် သူ၏ မျက်ဝန်းများထဲတွင်လည်း ဖြူစင်မှုများ ပြည့်နှက်နေပြီး နှုတ်ခမ်းထောင့်တွင် အပြုံးတစ်ခု ချိတ်ဆွဲထားကာ တောရွာမှ ရိုးသားသော လူငယ်လေး တစ်ယောက်နှင့် တူနေသည်။ မတူညီသော အသွင်အပြင် နှစ်ခု ရောနှောနေသဖြင့် သူ့ကို အနည်းငယ် ထူးဆန်းနေစေသည်။

လေဟာနယ်ထက်ရှိ မင်ယွဲ့ ဘိုးဘေးနှင့် အခြားသူများ၏ မျက်နှာထားများ တင်းမာသွားကြပြီး ရင်ထဲတွင်လည်း လှိုင်းလုံးကြီးများ ရိုက်ခတ်သွားတော့သည်။

အနက်နှင့် အဖြူဝတ် အမျိုးသား နှစ်ဦးကို သူတို့ အလွန် ရင်းနှီးကျွမ်းဝင်နေသည်။ မည်သို့ပင်ဆိုစေ ယခင်က ထိုနှစ်ဦးက စုန်းနတ်ဘုရားကျောင်း၏ နတ်သံတမန်များ အဖြစ် ပိုင်ယွဲ့ တစ်ခွင်တွင် လှည့်လည်သွားလာခဲ့ဖူးသည်။

သို့သော် ပြဿနာမှာ ထိုနှစ်ဦးကို အဖြူအမည်း သရဲဆိုး နှစ်ကောင် ဟု ခေါ်ဆိုကြပြီး သူတို့၏ လက်ထဲတွင် သွေးထွက်သံယို ဖြစ်ခဲ့ရသူ မည်မျှရှိမှန်းပင် မသိနိုင်တော့ပေ။ သူတို့က အမှန်တကယ် ထိပ်တန်း ယွမ်ရှန်းအဆင့် စစ်မှန်သောသခင် များ ဖြစ်ကြသည်။

အဖြူအမည်း ဓားနှစ်လက် ပူးပေါင်းလိုက်ပါက သိုင်းသူတော်စင် အောက်တွင် ပြိုင်ဘက်ကင်း သည်ဟုပင် ကောလာဟလများ ထွက်ပေါ်နေသည်။

မျက်တောင်တစ်ခတ်အတွင်း ချင်းချင်းတို့ လေးဦးက မြို့တော် အတွင်းသို့ ရောက်ရှိလာကြသည်။ မင်ယွဲ့ ဘိုးဘေးနှင့် အခြား နိုင်ငံငါးခုမှ ဘိုးဘေးများက ချက်ချင်း လက်ယှက်ကာ အရိုအသေပေးလိုက်ကြသည်။

"မင်ယွဲ့ မင်ရှန်းတောက် နတ်သံတမန်တွေ ရောက်လာတာကို ကြိုဆိုပါတယ်"

"ဟူယွဲ့ ကွေ့ဟိုင်ချောင် နတ်သံတမန်တွေ ရောက်လာတာကို ကြိုဆိုပါတယ်"

"ယန်ယွဲ့ ကုန်းစွန်းချီ နတ်သံတမန်တွေ ရောက်လာတာကို ကြိုဆိုပါတယ်"

"တာအိုမိတ်ဆွေတို့ အားနာနေစရာ မလိုပါဘူး"

အနက်ရောင် ဆံပင်နှင့် အဘိုးအိုက တည်ငြိမ်စွာ ခေါင်းညိတ်ပြလိုက်သည်။

"ကျေးဇူးတင်ပါတယ် နတ်သံတမန်" ဟု လူတိုင်းက တစ်ပြိုင်နက်တည်း ပြောလိုက်ကြသည်။

"နန်ယွဲ့က ချီဖျင်တောက်ကို သတ်သွားတဲ့ ကျန်းချဲ့ အခု ဘယ်မှာလဲ" ဟု အနက်ရောင်ဝတ် အဘိုးအိုက ဆက်မေးလိုက်သည်။

မင်ယွဲ့ ဘိုးဘေးတို့ အချင်းချင်း မျက်နှာချင်းဆိုင် ကြည့်လိုက်ကြပြီး ပြန်ဖြေလိုက်သည်။

"နတ်သံတမန်ကို လျှောက်တင်ပါတယ် ကျန်းချဲ့က ပိုင်ယွဲ့ နယ်မြေထဲကနေ ထွက်ပြေးသွားပုံရတယ် အခုအချိန်အထိ သူ့ရဲ့ သဲလွန်စကို ရှာမတွေ့သေးပါဘူး"

"အသုံးမကျတဲ့ အကောင်တွေ" ဟု အဖြူရောင်ဝတ် မျက်ကန်း အဘိုးအိုက အေးစက်စက် အသံဖြင့် စကားနှစ်ခွန်း ဖွင့်ဟလိုက်သည်။

မင်ယွဲ့ ဘိုးဘေးတို့၏ ရင်ထဲတွင် မကျေနပ်မှုများ ရှိနေသော်လည်း ယခုအချိန်တွင် ချက်ချင်း ပြန်လည် ချေပရဲခြင်း မရှိဘဲ အားလုံးက ခေါင်းငုံ့ကာ တိတ်ဆိတ်နေကြသည်။

နောက်ဘက်ရှိ ချင်းချင်းကတော့ မျက်တောင်လေး ပုတ်ခတ်ပုတ်ခတ် လုပ်ကာ ရင်ထဲတွင် သက်ပြင်းတစ်ချက် ချလိုက်နိုင်သည်။ ယခင်က စုန်းနတ်ဘုရားကျောင်းက ကျန်းချဲ့ကို ဖမ်းဆီးရန် အမိန့်ပေးထားကြောင်း သိလိုက်ရသောအခါ သူမ အတော်လေး စိုးရိမ်ပူပန်နေခဲ့ရသည်။ နောက်ဆုံးတွင် အဒေါ်ဖြစ်သူက နှစ်သိမ့်ပေးပြီးနောက်မှသာ စိတ်အေးသွားခဲ့ပြီး ဤနေရာသို့ လာရောက် အတွေ့အကြုံ ယူရန် တောင်းဆိုခဲ့ခြင်း ဖြစ်သည်။

"ဒီလိုဆိုမှတော့ ဒီကိစ္စကို ဒီမှာပဲ ရပ်လိုက်တော့ စုန်းနတ်ဘုရားကျောင်းရဲ့ အမိန့်အရ ဒီကနေ့က စပြီး မင်ယွဲ့၊ ဟူယွဲ့၊ နန်ယွဲ့ စတဲ့ နိုင်ငံတွေရဲ့ စစ်တပ် အားလုံးကို ငါ့ရဲ့ အပြည့်အဝ အုပ်ချုပ်မှု အောက်မှာ ထားရှိရမယ် နောက်ထပ် ခုနစ်ရက် အကြာမှာ မြောက်ပိုင်း အလယ်ပိုင်းလွင်ပြင် ကို စစ်ချီမယ်"

အနက်ရောင်ဝတ် အဘိုးအိုက အဖြူရောင်ဝတ် အဘိုးအို၏ ကြိမ်းမောင်းမှုကို ဂရုမစိုက်သည့်အလား သူ၏ အင်္ကျီလက်ထဲမှ စုန်းနတ်ဘုရားကျောင်း၏ တံဆိပ်ပြားကို ထုတ်ပြလိုက်သည်။ စကားပြောဆိုရာတွင် ငြင်းပယ်၍ မရနိုင်သော ဩဇာတိက္ကမများ ပါဝင်နေသည်။

မင်ယွဲ့ ဘိုးဘေးတို့က ဤသို့ ဖြစ်လာမည်ကို ကြိုတင် သိရှိထားပြီး ဖြစ်သည်။ နန်ယွဲ့ မြို့တော် ကျဆုံးသွားသော်လည်း သူတို့ အနေဖြင့် သတင်းမပို့ဘဲ မနေရဲပေ။ မည်သို့ပင်ဆိုစေ ချီဖျင်တောက် လှုပ်ရှားခဲ့ခြင်းမှာ စုန်းနတ်ဘုရားကျောင်း၏ ခွင့်ပြုချက် ရရှိထားသောကြောင့် ဖြစ်သည်။

မည်သည့် တွေးတောမှုမျှ မရှိဘဲ လူတိုင်းက တစ်ပြိုင်နက်တည်း ကိုယ်ကိုကိုင်းညွှတ်ကာ အရိုအသေပေးလိုက်ကြသည်။

"စုန်းနတ်ဘုရားကျောင်းရဲ့ အမိန့်ကို နာခံပါ့မယ်"

"စုန်းနတ်ဘုရားကျောင်းရဲ့ အမိန့်ကို နာခံပါ့မယ်”