အခန်း ၄၆၆

အခန်း ၄၆၆ နဂါးမင်း ပြန်လည်ရောက်ရှိလာခြင်း၊ မိုးကြိုးပုတီးစေ့၏ သဲလွန်စ

ယွဲ့ပြည်နယ် နယ်စပ်ရှိ တောင်တန်းတစ်ခုအတွင်း၌။

ပိုးသားဝတ်ရုံကို ဝတ်ဆင်ထားသော လီချန်ကောက ယဇ်ပလ္လင်တစ်ခုပေါ်တွင် တင်ပျဉ်ခွေထိုင်ရင်း မိမိ၏ အခြေအနေကို ညှိယူနေသည်။ တစ်ချက် ရှူသွင်း ရှူထုတ်လိုက်တိုင်း မူလစွမ်းအင်များ စုဝေးလာပြီး တာအိုအငွေ့အသက်များက အလိုအလျောက် ပေါ်ထွက်လာ၏။

ယန်ဝိညာဉ် မိုးကြိုးကပ်ဘေးကို ဖြတ်ကျော်မည့် ကိစ္စနှင့်ပတ်သက်၍ သူက အကြိမ်ပေါင်းမရေမတွက်နိုင်အောင် တွက်ချက်ထားခဲ့ပြီး အဆင့်တက်ရန်ပင် ကြိုးစားဖူးသည်။ သို့သော် ဝမ်းနည်းစရာကောင်းသည်မှာ နောက်ဆုံး ခြေလှမ်းကို လှမ်းရန်အတွက် လုံလောက်သော ယုံကြည်မှု မစုဆောင်းနိုင်ခဲ့ခြင်းပင်။

ထိုထူးခြားသော ရတနာက သူ၏ ကိုယ်ပေါ်တွင် ရှိနေသောကြောင့် စိတ်ထဲတွင် အားနည်းချက်တစ်ခု ဖြစ်ပေါ်နေပြီး အသေခံရှေ့ဆက်တိုးမည့် ယုံကြည်ချက် ကင်းမဲ့နေခဲ့သည်။ ထို့ကြောင့်ပင် ဆယ်စုနှစ်ပေါင်းများစွာ ကြာမြင့်သည်အထိ အချိန်ဆွဲနေခဲ့ရခြင်း ဖြစ်သည်။

သို့သော် ယခုတော့ သူ ဆက်ပြီး အချိန်ဆွဲနေရန် အခွင့်အရေး မရှိတော့ပေ။ အင်ပါယာနန်းတော်နှင့် မျက်နှာချင်းဆိုင် ရန်သူဖြစ်သွားပြီဖြစ်ရာ နှစ်တစ်ရာနီးပါး တည်ဆောက်ခဲ့သော အခြေခံအုတ်မြစ်များက တစ်မနက်တည်းနှင့် ပျက်စီးသွားခဲ့ရပြီ ဖြစ်သည်။ အကယ်၍ သိုင်းသူတော်စင် အဆင့်သို့သာ မတက်လှမ်းနိုင်ပါက မိမိနှင့်ထိုက်တန်သော အရာများကို ပြန်လည်ရယူရန် ယုံကြည်မှု ရှိမည်မဟုတ်သည့်အပြင် ချင်းထျန်းမိစ္ဆာဂိုဏ်း၏ စွန့်ပစ်ခြင်းကိုပါ ခံရပေလိမ့်မည်။

မည်သို့ပင်ဆိုစေ ယွမ်ရှန်းအဆင့် စစ်မှန်သောသခင်က အစွမ်းထက်လှသော်လည်း ချင်းထျန်းမိစ္ဆာဂိုဏ်းတွင် မရှားပါးပေ။ သိုင်းသူတော်စင် ဖြစ်လာမှသာ ဤလောက၏ အစစ်အမှန် ထိပ်တန်းပုဂ္ဂိုလ် တစ်ဦး ဖြစ်လာနိုင်မည် ဖြစ်သည်။

သေချာသည်မှာ ချင်းထျန်းမိစ္ဆာဂိုဏ်းက ထိုမျှလောက် စေတနာကောင်းမည် မဟုတ်ကြောင်းကိုလည်း သူ သိထားသည်။ တစ်ခုခုကို သေချာပေါက် ကြံစည်နေမည်သာ ဖြစ်၏။

သို့သော် ဤကိစ္စများနှင့် ပတ်သက်၍ သူ ဂရုမစိုက်ပေ။ ထိုထူးခြားသော ရတနာ ရှိနေသရွေ့ မိုးကြိုးကပ်ဘေးကို ဖြတ်ကျော်နိုင်ရန် ယုံကြည်မှု အပြည့်အဝ ရှိနေသည်။ ယခုလက်ရှိ လိုအပ်နေသည်မှာ မိမိ၏ အခြေခံအင်အားကို ဖြည့်တင်းပေးမည့် သွေးယဇ်ပူဇော်မှု တစ်ကြိမ်သာ ဖြစ်သည်။ ထိုသို့မဟုတ်ပါက မူလဝိညာဉ်ကို သန့်စင်ပေးမည့် ကိုးထပ် မိုးကြိုးကပ်ဘေးကို သေချာပေါက် တောင့်ခံနိုင်မည် မဟုတ်ပေ။

ထိုသွေးယဇ်ပူဇော်မှု ကိစ္စကိုလည်း ယခုအခါ စီစဉ်နေပြီ ဖြစ်သည်။ ကျန်းချဲ့က နန်ယွဲ့ပြည်တွင် ပြဿနာ ဖန်တီးခဲ့မှုကြောင့် ပိုင်ယွဲ့ မဟာမိတ်တပ်ဖွဲ့က အချိန်ကြာမြင့်သည်အထိ စစ်မချီနိုင်သေးသော်လည်း ပိုင်ယွဲ့ဘက်မှ အချိန်အကြာကြီး သည်းခံနိုင်မည် မဟုတ်ဘဲ သူနှင့် သေချာပေါက် အပြင်အတွင်း ပူးပေါင်းကြမည်ကို သူ ကောင်းကောင်း သိထားသည်။

ထိုအချိန်ရောက်၍ စစ်ပွဲစတင်ပါက လူသိန်းချီ၏ သွေးစက်များ စုဝေးလာမည်ဖြစ်ပြီး သူ့အတွက် လုံလောက်သော သွေးလေစွမ်းအင်များကို ထောက်ပံ့ပေးနိုင်မည် ဖြစ်သည်။ အကယ်၍ ကိစ္စများ အောင်မြင်သွားပါက သူက အမည်ခံနှင့် လက်တွေ့ ကိုက်ညီသော ယွဲ့ပြည်နယ်၏ ဘုရင်တစ်ပါး ဖြစ်လာမည်သာမက နယ်မြေတစ်ပိုင်းကို ကြီးစိုးနိုင်မည် ဖြစ်ပြီး နောင်တစ်ချိန် အစီအစဉ်များ တိကျပါက နဂါးပလ္လင်ပေါ်သို့ ထိုင်ရမည့် နေ့ရက်မျိုးပင် ရောက်လာနိုင်ချေ ရှိပေသည်။

တွေးတောနေစဉ်မှာပင် သဲ့သဲ့မျှသာ ကြားရသော ခြေသံတစ်ခုက တဖြည်းဖြည်း နီးကပ်လာသည်။ လာရောက်သူမှာ လီယွမ်ရှိုး ပင် ဖြစ်သည်။

"အဖေ့ကို ဂါရဝပြုပါတယ်"

"ရောက်လာပြီလား..."

လီချန်ကောက မျက်လုံးများကို ဖွင့်လိုက်သည်။

"အဖေ ဘာများ အမိန့်ရှိလို့ပါလဲ"

လီယွမ်ရှိုး အနေဖြင့် လီချန်ကော ယခုအချိန်တွင် အလွန် အရေးကြီးသော ကာလသို့ ရောက်ရှိနေကြောင်း သိထားရာ အကြောင်းပြချက် မရှိဘဲ သူ့ကို အလုပ်များနေသည့် ကြားမှ ခေါ်ယူမည် မဟုတ်ကြောင်း သိထားသည်။

"ယွဲ့ပြည်နယ် ဘက်က အခြေအနေက ဘယ်လိုရှိလဲ"

ရင်ထဲတွင် သံသယများနှင့် ခန့်မှန်းမှု အချို့ ရှိနေသော်လည်း လီယွမ်ရှိုးက ပုံမှန် အမူအရာဖြင့်ပင် ပြန်လည် လျှောက်တင်လိုက်သည်

"အဖေ့ကို လျှောက်တင်ပါတယ် သွေးပင်လယ်ဂိုဏ်း ဖျက်ဆီးခံလိုက်ရပြီးတဲ့နောက် ထျန်းနန် ကောင်းမိသားစု နဲ့ ရင်းချွမ် ကောမိသားစု တို့က ကျွန်တော်တို့အပေါ် အတော်လေး ယဉ်ကျေးလာကြပါပြီ ဒါပေမဲ့ အခုအချိန်အထိ အပြည့်အဝ ဆုံးဖြတ်ချက် မချရသေးပါဘူး သားတော် အထင်တော့ အဖေ သိုင်းသူတော်စင် ဖြစ်လာပြီးမှပဲ ဒီမိသားစု နှစ်ခုက အပြည့်အဝ ဆုံးဖြတ်ချက် ချနိုင်ပါလိမ့်မယ် ချင်းထျန်းမိစ္ဆာဂိုဏ်း ဘက်ကလည်း မကြာသေးခင်က အတော်လေး ပူးပေါင်းဆောင်ရွက်မှု ရှိပါတယ် ယွဲ့ပြည်နယ်က မြို့နယ် ဆယ့်ခြောက်ခုထဲမှာ အများစုက စစ်မီးတွေ တောက်လောင်နေပြီး ဆူပူအုံကြွမှုတွေ ဆက်တိုက် ဖြစ်ပေါ်နေပါတယ် ဝမ်းနည်းစရာက အဖေက တောင်ပိုင်းစောင့်တပ်ကို ဝင်မပါဖို့ အမိန့်ပေးထားတာပါပဲ လောလောဆယ် အခြေအနေ အရဆိုရင်တော့ အင်ပါယာနန်းတော်ကို အလွန်ဆုံး ပြဿနာ အနည်းအကျဉ်းလောက်ပဲ ဖန်တီးပေးနိုင်မှာပါ တောင်ပိုင်းစောင့်တပ် ဘက်မှာတော့ စစ်သည် တစ်သိန်းနှစ်သောင်းထဲက အခုအချိန်အထိ လက်ရွေးစင်စစ်သည် ခြောက်သောင်းကျော် နယ်စပ်ကနေ ထွက်ခွာပြီး နေရာအနှံ့က ခြေကုပ်စခန်းတွေမှာ ပုန်းအောင်းနေပါတယ် ယွဲ့ပြည်နယ် နယ်စပ်အတွင်းမှာတော့ ငါးသောင်းနီးပါး ပုန်းအောင်းနေဆဲပါ အင်ပါယာနန်းတော်က အတော်လေး တင်းတင်းကျပ်ကျပ် ရှာဖွေနေလို့ လက်ရွေးစင်စစ်သည် တော်တော်များများ ထိခိုက်ဆုံးရှုံးခဲ့ရပါတယ်"

လီယွမ်ရှိုးက လက်ရှိ အခြေအနေ အားလုံးကို အသေးစိတ် ပြန်လည် ပြောပြလိုက်ပြီးနောက် အနည်းငယ် ရပ်တန့်ကာ ဆက်ပြောလိုက်သည်

"ကျန်းချဲ့ ဘက်ကတော့ အခုအချိန်အထိ အပြည့်အဝ မစုံစမ်းနိုင်သေးပါဘူး ယွဲ့ပြည်နယ် မြို့တော်ထဲမှာ သူ့အကြောင်း သတင်းတွေ အများကြီး ရှိနေပေမဲ့ နန်ယွဲ့ပြည်ဘက်ကလည်း ကျန်းချဲ့က ယွဲ့ပြည်နယ်မှာ မရှိဘူးလို့ ဖော်ပြနေပါတယ် အတုလား အစစ်လား ဆိုတာ လောလောဆယ် ခွဲခြားလို့ မရသေးပါဘူး တကယ် တိုက်ခိုက်ကြည့်မှပဲ သိနိုင်မှာပါ..."

"အမိန့်ပေးလိုက် နယ်စပ်အပြင်ဘက်က လက်ရွေးစင်စစ်သည် ခြောက်သောင်းကို စတင် စုဝေးစေပြီး ဖူလုံတောင်မှာ ပုန်းအောင်းကာ အခွင့်အရေးကို စောင့်ကြည့်ခိုင်းထား"

"အမိန့်တိုင်းပါ"

"ဖေဟုန်ရိကို သွားပြောလိုက် မနက်ဖြန် ငါ သူ့ကို တစ်ခေါက် တွေ့မယ်လို့"

"အမိန့်တိုင်းပါ"

"နန်ယွဲ့ပြည် အကြီးအကျယ် ထိခိုက်သွားတော့ အခု အဓိက တာဝန်ယူရမယ့်သူက မင်ယွဲ့ ဘိုးဘေးပဲ ဖြစ်လိမ့်မယ် အတိုတောင်းဆုံး အချိန်အတွင်း သူ့ဆီကို သတင်း ဆက်သွယ်ရေး လမ်းကြောင်း ဖန်တီးထားရမယ်"

"အမိန့်တိုင်းပါ"

"ငါ့ လက်အောက်က မွေးစားသားတွေနဲ့ တူတွေရဲ့ မိသားစုတွေကို သေချာပေါက် နေရာချထားပေးရမယ် ပြီးတော့ တောင်ပိုင်းစောင့်တပ်က မိသားစုဝင် အချို့ကိုလည်း အင်ပါယာနန်းတော်ဘက်က သတင်း လုံးဝ မရစေဖို့ အသေအချာ ဂရုစိုက်ပါ"

"ဟုတ်... ဟုတ်ကဲ့ပါ..."

လီယွမ်ရှိုး၏ မျက်နှာထားက အနည်းငယ် သဘာဝမကျစွာဖြင့် ခေါင်းညိတ်လိုက်သည်။

လီချန်ကောက အမူအရာ ကင်းမဲ့စွာဖြင့် လီယွမ်ရှိုးကို ကြည့်ရင်း ပေါ့ပေါ့ပါးပါးပင် မေးလိုက်သည်

"ဘာလဲ တစ်ခုခု မှားယွင်းနေလို့လား"

"အဖေ ခွင့်လွှတ်ပါ ပြီးခဲ့တဲ့ ရက်အနည်းငယ်က နယ်စပ်အတွင်းက သတင်းတစ်ခု ရောက်လာပါတယ် ဒုတိယ အစ်ကို့ရဲ့ မိသားစုတွေ အားလုံး... အားလုံး ဘေးဆိုးနဲ့ ကြုံသွားရပါပြီ..."

လီယွမ်ရှိုးက အလျင်အမြန် ဒူးထောက်ချလိုက်ပြီး မျက်နှာပေါ်တွင် ထိတ်လန့်သွားသော အရိပ်အယောင်များ ပေါ်လာသည်။ လီချန်ကောက ဤကိစ္စကို ကြိုတင် သိရှိနေကြောင်း သူ ကောင်းကောင်း သိထားသည်။ ထိုသို့မဟုတ်ပါက ဤကဲ့သို့ လုံးဝ မေးမည်မဟုတ်ပေ။

"ဘာဖြစ်တာလဲ"

"စစ်တပ်ထဲမှာ ပုန်ကန်မှု ဖြစ်သွားလို့ပါ အဲဒီ ရှုပ်ထွေးမှုတွေ ကြားထဲမှာ ပါသွားတာပါ ဒါပေမဲ့ သားတော် အထင်တော့ အဲဒီလောက် မရိုးရှင်းလောက်ဘူး ကျူးချွဲဌာနခွဲက လျှို့ဝှက်စုံထောက်တွေ လုပ်တာ ဖြစ်နိုင်တယ်"

"ဟွန့် အကုန်လုံးက အဲဒီလို မဟုတ်လောက်ပါဘူး ငါ မှတ်မိသလောက်ဆိုရင် အဲဒီ လျှို့ဝှက်စုံထောက်တွေကို ရှင်းပစ်ဖို့ မင်းကို အရင်ကတည်းက အမိန့်ပေးထားပြီးသားလေ"

"အဖေ ခွင့်လွှတ်ပါ သားတော် အလုပ်လုပ်တာ မသေချာခဲ့လို့ပါ"

"လီခွမ့်က ထျန်းလုံ ဘုန်းကြီးကျောင်းမှာ စစ်ပွဲအတွင်း ကျဆုံးသွားခဲ့လို့ ငါ့ ရင်ထဲမှာ အပြစ်ရှိသလို ခံစားနေရတာကို မင်းက လီခွမ့်ကို မျိုးဆက် ပြတ်သွားအောင် လုပ်လိုက်သေးတယ် အကယ်၍ ဒီသတင်းသာ အပြင်ကို ပျံ့သွားရင် တခြား စစ်သူကြီးတွေက ဘယ်လိုများ တွေးကြမလဲ"

လီချန်ကော၏ မျက်ဝန်းများထဲတွင် အေးစက်သော အရိပ်အယောင်များ ပေါ်ထွက်လာသည်။

လီခွမ့်၏ မိသားစုများ သေဆုံးသွားခြင်းက လူအများကို သံသယ ဝင်စေနိုင်ပေသည်။ မည်သို့ပင်ဆိုစေ လီခွမ့်က ယခုအခါ အသုံးချစရာ တန်ဖိုး မရှိတော့ရာ သူ၏ မိသားစုများပါ တိုက်ဆိုင်စွာ အသတ်ခံလိုက်ရသဖြင့် အကယ်၍ မိမိကိုယ်တိုင် စစ်မြေပြင်တွင် ကျဆုံးသွားပါက ဤကဲ့သို့သော အဆုံးသတ်မျိုးကို ကြုံတွေ့ရမည်လား ဟု အခြားသူများက တွေးတောသွားနိုင်ပေသည်။

"အဖေ ခွင့်လွှတ်ပါ"

လီယွမ်ရှိုးက ခေါင်းငုံ့ကာ အသနားခံလိုက်သော်လည်း မည်သည့် ပြန်လည် ချေပချက်မှ မပြောဆိုခဲ့ပေ။

"ဒါက ပထမဆုံး အကြိမ်ပဲ နောက်ဆုံး အကြိမ် ဖြစ်ဖို့လည်း မျှော်လင့်တယ် စစ်တပ်ထဲက ညီအစ်ကိုတွေက ငါ လီချန်ကော အတွက် သွေးထွက်သံယို အသက်ပေးပြီး တိုက်ပွဲဝင်နေကြတာ ဒါပေမဲ့ သူတို့ရဲ့ မိသားစုကိုတောင် ငါက မကာကွယ်ပေးနိုင်ဘူးဆိုရင်... နောင်ကျရင် ဘယ်လိုလုပ်ပြီး သူတို့ကို နောက်ဆံမတင်းဘဲ ဆက်ပြီး အလုပ်လုပ်ခိုင်းနိုင်တော့မလဲ"

"ဟုတ်ကဲ့ပါ အဖေကို ယွမ်ရှိုး ကတိပေးပါတယ် ဒါက ပထမဆုံး အကြိမ်ဖြစ်သလို နောက်ဆုံး အကြိမ်လည်း ဖြစ်ပါစေမယ်"

လီယွမ်ရှိုးက အလျင်အမြန် ပြောလိုက်သည်။

အခြားတစ်ဖက်တွင်။ ယွဲ့ပြည်နယ် မြို့တော်အတွင်း၌။

ကျန်းချဲ့က လေဟာနယ်ထဲမှ ဆင်းသက်လာသည်။ ဤတစ်ကြိမ်တွင် သူ၏ မည်သူမည်ဝါ ဖြစ်ကြောင်းကို အနည်းငယ်မျှ ဖုံးကွယ်ထားခြင်း မရှိဘဲ ပွင့်ပွင့်လင်းလင်းပင် ဖော်ပြလိုက်သည်။ ယခင်က ရုန်းရင်းဆန်ခတ် မိစ္ဆာတောင်ကြားမှ ထွက်ခွာလာပြီးနောက် သူနှင့် အောက်ခွန်းတို့က မြောက်ဘက်သို့ တောက်လျှောက် ခရီးနှင်ခဲ့ကြသည်။ လမ်းခရီး တစ်လျှောက်တွင် မည်သည့် ရပ်နားမှုမျှ မရှိဘဲ နောက်ဆုံးတွင် ဆယ်ရက်နီးပါး အကြာ၌ ယွဲ့ပြည်နယ် မြို့တော်သို့ ရောက်ရှိလာခဲ့ခြင်း ဖြစ်သည်။

ယခုအချိန်သို့ ရောက်မှသာ သူ၏ ရင်ထဲတွင် အနည်းငယ် စိတ်အေးသွားတော့သည်။

ကွမ်ကျွင်းနယ်စား အိမ်တော်သို့ ရောက်ရှိချိန်တွင် ကျောက်ရှန်းကျီနှင့် အခြားသူများက တစ်ယောက်ပြီး တစ်ယောက် လာရောက် နှုတ်ဆက်ကြပြီး အားလုံးက စိတ်အေးသွားကြသည်။ မည်သို့ပင်ဆိုစေ ပိုင်ယွဲ့သို့ တစ်ယောက်တည်း သွားရောက်ရခြင်းက အလွန် အန္တရာယ်များလွန်းလှပြီး အနည်းငယ် ပေါ့ဆသွားပါက မမျှော်လင့်ထားသော အန္တရာယ်များနှင့် ကြုံတွေ့ရနိုင်ပေသည်။ ကံကောင်းထောက်မစွာဖြင့် အရာအားလုံး အဆင်ပြေသွားခဲ့သည်။

"ကိုယ် ထွက်သွားပြီးတဲ့နောက် ဘာပြဿနာကြီးမှ မဖြစ်ခဲ့ဘူး မဟုတ်လား"

ကျန်းချဲ့ ပြန်ရောက်လာချိန်တွင် နယ်စပ်ကို တစ်ခေါက် လှည့်လည် ကြည့်ရှုခဲ့ပြီး ကြီးမားသော ဆူပူအုံကြွမှုများကို မတွေ့ခဲ့ရသော်လည်း သေချာစေရန် မေးမြန်းရန် လိုအပ်ပေသည်။

"အရှင့်ရဲ့ ကျေးဇူးကြောင့် နန်ယွဲ့ပြည်မှာ ပြဿနာ ကြီးကြီးမားမား ဖြစ်သွားလို့ အခုအချိန်အထိ ပိုင်ယွဲ့ မဟာမိတ်တပ်ဖွဲ့က အခွင့်ကောင်းယူပြီး စစ်မချီနိုင်သေးပါဘူး ဒါပေမဲ့ မကြာသေးခင်က သတင်းတွေ အများကြီး ရောက်လာပါတယ် ပိုင်ယွဲ့က စစ်တပ်တွေကို စတင် စုဆောင်းနေပြီတဲ့ ရက်အနည်းငယ် အတွင်းမှာပဲ နယ်စပ်ကို စစ်ချီလာနိုင်ချေ ရှိပါတယ် အဲဒါကြောင့် လက်အောက်ငယ်သားတို့က ယွဲ့ပြည်နယ် မြို့တော်ကနေ ထွက်ခွာပြီး နယ်စပ်မှာ သွားရောက် ကြီးကြပ်ဖို့ ပြင်ဆင်နေပါတယ် ယွဲ့ပြည်နယ် အတွင်းမှာတော့ အရှင် မထွက်သွားခင်ကထက် ပိုပြီး ရှုပ်ထွေးနေပါတယ် ဒါပေမဲ့ တခြား မြို့နယ်တွေကနေ စစ်တပ်အချို့ ခေါ်ယူထားလို့ လောလောဆယ်တော့ အခြေအနေကို ခဲယဉ်းစွာ ထိန်းသိမ်းထားနိုင်ပါသေးတယ်"

ပိုင်ယွဲ့ စစ်ချီမည့် သတင်းကြောင့် ကျန်းချဲ့က ယခင်ကတည်းက ယွဲ့ပြည်နယ်ရှိ စစ်တပ် ထက်ဝက်ကျော်ကို နယ်စပ်သို့ ပို့ဆောင်ထားခဲ့ပြီ ဖြစ်ရာ အခြား မြို့နယ်များတွင် စစ်တပ် အများအပြား ချန်ထားခဲ့မည် မဟုတ်ပေ။ သို့သော် ဤကိစ္စနှင့် ပတ်သက်၍ ကျန်းချဲ့က ကြိုတင် ပြင်ဆင်ထားပြီး ဖြစ်သည်။

"ကိစ္စမရှိပါဘူး ပိုင်ယွဲ့ မဟာမိတ်တပ်ဖွဲ့ကို တားဆီးနိုင်ပြီး လီချန်ကောကို သတ်နိုင်ရင် ယွဲ့ပြည်နယ်ရဲ့ ဆူပူအုံကြွမှုတွေက အမြန်ဆုံး ငြိမ်သက်သွားမှာပါ"

အခြေအနေများ ပိုမို ရှုပ်ထွေးလာလေလေ အဓိက အချက်ကို ဖမ်းဆုပ်နိုင်ရန် ပို၍ အရေးကြီးလေလေ ဖြစ်သည်။ လီချန်ကောက အဓိက အကျဆုံး အချက်ပင် ဖြစ်သည်။ သူ သေဆုံးသွားပါက အရာအားလုံး ငြိမ်သက်သွားမည် ဖြစ်သည်။ သူ မသေပါက ဆူပူအုံကြွမှုများကို အောင်မြင်စွာ နှိမ်နင်းနိုင်လျှင်တောင်မှ အခြေအနေ အလုံးစုံကို လွှမ်းမိုးနိုင်မည် မဟုတ်ပေ။

ထို့ကြောင့် အစမှ အဆုံးတိုင် ကျန်းချဲ့က ဆူပူအုံကြွမှုများကို အရမ်းကြီး အာရုံစိုက်မနေခဲ့ဘဲ သူ၏ အာရုံစိုက်မှု အားလုံးကို ယဇ်ပူဇော်စရာ ပစ္စည်းများကို ရှာဖွေခြင်းနှင့် သူ၏ ကျင့်စဉ်အဆင့်ကို မြှင့်တင်ခြင်း အပေါ်တွင်သာ ထားရှိခဲ့သည်။

"အရှင် ပြောတာ မှန်ပါတယ်"

"လီခွမ့် ဘက်ကကော သတင်းတစ်ခုခု ရပြီလား"

ကျန်းချဲ့က တည်ကြည်သော အသံဖြင့် မေးလိုက်သည်။

သူ မထွက်ခွာမီကတည်းက ဤကိစ္စကို အမိန့်ပေးထားခဲ့ပြီး လျှို့ဝှက်သော အကြံအစည် အချို့မှတစ်ဆင့် လီခွမ့်ကို လီချန်ကောအပေါ် သစ္စာဖောက်စေရန် ဖိအားပေးဖို့ ပြင်ဆင်ထားခဲ့သည်။ ဤအကြံအစည်က ရက်စက်ကြမ်းကြုတ်သော်လည်း ကျန်းချဲ့က လက်ခံခဲ့သည်။

"ကိစ္စကြီး အောင်မြင်သွားပါပြီ သုံးရက် အလိုက တောင်ပိုင်းစောင့်တပ် ထဲမှာ ပုန်းအောင်းနေတဲ့ လျှို့ဝှက်စုံထောက်က အသက်လုပြီး ပုံရိပ်ဖမ်း ကျောက်တုံး တစ်ခုကို ယူဆောင်လာခဲ့ပါတယ် အဲဒီအပေါ်မှာ လီခွမ့်ရဲ့ မိသားစုဝင်တွေ သေဆုံးနေတဲ့ ပုံရိပ်တွေ ပါဝင်ပါတယ် လီခွမ့်က တစ်ရက်လောက် စဉ်းစားပြီး ဒေါသထွက်ပြီးတဲ့နောက်မှာတော့ အရှင့်ကို အညံ့ခံဖို့ ဆုံးဖြတ်လိုက်ပြီး အရှင့်ဆီမှာ သစ္စာခံဖို့ ဆန္ဒရှိနေပါတယ်"

"အလောင်းတွေရဲ့ ပုံရိပ် ဟုတ်လား"

ကျန်းချဲ့၏ မျက်ခုံးများ ပင့်တက်သွားသည်။ ဤသည်မှာ သူ ယခင်က အမိန့်ပေးထားသည်နှင့် အနည်းငယ် ကွဲလွဲနေပုံရသည်။ သူက ကျိုးရွှမ်ကို လီခွမ့်၏ မိသားစုဝင်များ သတ်ဖြတ်ခံရသည့် မြင်ကွင်းကို ပြင်ဆင်ခိုင်းခဲ့ခြင်း ဖြစ်သည်။ သေချာသည်မှာ မည်သည့် နည်းလမ်းပင် ဖြစ်ပါစေ ရလဒ် အောင်မြင်သွားသရွေ့ သူက အရမ်းကြီး လိုက်လံ မေးမြန်းနေမည် မဟုတ်ပေ။

သို့သော် ကျိုးရွှမ်က ကျန်းချဲ့၏ သံသယကို ရိပ်မိသွားပြီး ချက်ချင်း ရှင်းပြလိုက်သည်

"အရှင် အရင်က အမိန့်ပေးထားတာကို လက်အောက်ငယ်သား နားလည်ပါတယ် ဒါပေမဲ့ အမိန့်ချပြီးတဲ့နောက် အောက်ကလူတွေက အကြံဉာဏ် တစ်ခု ပေးလာတယ် အဲဒီလို လုပ်ရင် ပြောင်းပြန် အကျိုးသက်ရောက်မှု ဖြစ်သွားနိုင်တယ်လို့ ထင်ကြတယ် မည်သို့ပင်ဆိုစေ ကျွန်တော်တို့က ပုံရိပ်တွေကို ထုတ်ပြလိုက်ရင် အင်ပါယာနန်းတော်က လုပ်တာလို့လည်း သူတို့ ထင်သွားနိုင်တယ်လေ အဲဒါကြောင့် လက်အောက်ငယ်သားက ကိုယ်ပိုင် ဆုံးဖြတ်ချက်နဲ့ အောက်ကလူတွေရဲ့ အကြံဉာဏ်ကို လက်ခံပြီး အစီအစဉ်ကို ပြောင်းလိုက်တာပါ နောက်ဆုံးမှာတော့ လီခွမ့်ရဲ့ မိသားစုဝင်တွေ သေဆုံးနေတဲ့ ပုံရိပ်ကိုပဲ ဖမ်းယူခဲ့တာပါ"

"အိုး မင်းရဲ့ လက်အောက်မှာ ဒီလိုမျိုး အရည်အချင်းရှိတဲ့သူ ရှိနေတာပဲ မဆိုးဘူး ကောင်းကောင်း လုပ်နိုင်တယ် သူ့ကို အကျိုးဆောင်မှု တစ်ခု အသိအမှတ်ပြုပေးလိုက် ပြီးတော့ ဆုကြီးကြီး ချပေးလိုက်"

ကျန်းချဲ့က လက်ကာပြလိုက်ပြီး ကျူးချွဲဌာနခွဲမှ အရာရှိ တစ်ဦး၏ အနာဂတ်ကို မျက်တောင်တစ်ခတ်အတွင်း ဆုံးဖြတ်ပေးလိုက်သည်။

"သူ့ကိုယ်စား အရှင့်ရဲ့ ဆုချီးမြှင့်မှုအတွက် ကျေးဇူးတင်ပါတယ်"

ကျိုးရွှမ်က ကိုယ်ကိုကိုင်းညွှတ်ကာ အရိုအသေပေးလိုက်သည်။

"လီခွမ့်က အညံ့ခံတယ် ဆိုတော့ တောင်ပိုင်းစောင့်တပ်ရဲ့ သဲလွန်စတွေကိုကော ပြောပြသေးလား"

"လျှို့ဝှက် ခြေကုပ်စခန်း တစ်ခုကို ပြောပြခဲ့ပါတယ် လက်အောက်ငယ်သား ကိုယ်တိုင် လူခေါ်သွားပြီး အဲဒီ တောင်ပိုင်းစောင့်တပ် စစ်သည် သုံးထောင်ကို ဝိုင်းရံဖမ်းဆီးခဲ့ပါတယ် ဝမ်းနည်းစရာက နောက်ဆုံးမှာ အင်ပါယာနန်းတော်ကို ပြန်လည် အညံ့ခံဖို့ ဆန္ဒရှိတဲ့သူက လေးပုံတစ်ပုံတောင် မပြည့်ပါဘူး ကျန်တဲ့သူ အားလုံးက စစ်ပွဲမှာ သေဖို့ပဲ ရွေးချယ်သွားကြတယ်"

"နယ်စပ်စောင့်တပ်ရဲ့ လက်ရွေးစင်စစ်သည်တွေ ဆိုတဲ့အတိုင်းပဲ"

တောင်ပိုင်းစောင့်တပ်က သူ၏ တပ်မဟုတ်သော်လည်း သူတို့၏ လုပ်ရပ်ကို ကျန်းချဲ့က အလွန် သဘောကျမိသည်။ မည်သို့ပင်ဆိုစေ စစ်သည် အများစုက အထက်အရာရှိ ပုန်ကန်နေကြောင်း သိပါလျက်နှင့် ဆက်လက် နောက်လိုက်ရန်နှင့် သေပွဲဝင်ရန် ဆန္ဒရှိနေကြခြင်းက သာမန် စစ်သည်များ လုပ်နိုင်မည့် အရာမဟုတ်ကြောင်း ထင်ရှားနေသည်။

ယွဲ့ပြည်နယ် အတွင်းရှိ ဒေသခံ စစ်သည် အချို့နှင့် ယှဉ်လျှင် အဓိက အရာရှိ ကျဆုံးသွားပါက ကိုယ်ရံတော် အချို့မှလွဲ၍ ကျန်ရှိသော စစ်သည် အများစုက လက်နက်ချရန်သာ ရွေးချယ်ကြမည် ဖြစ်ပြီး အသေခံမည့်သူမှာ အလွန် ရှားပါးလှသည်။

"ယွဲ့ပြည်နယ် အတွင်းမှာ တောင်ပိုင်းစောင့်တပ် စစ်သည် သုံးထောင်တည်း ရှိတာတော့ မဟုတ်လောက်ဘူးနော်"

ကျန်းချဲ့က လီချန်ကောနှင့် မျက်နှာချင်းဆိုင် ရန်သူဖြစ်ရန် ရွေးချယ်ခဲ့သော အချိန်က အလွန် ကောင်းမွန်ခဲ့သည်။ အနည်းဆုံး တောင်ပိုင်းစောင့်တပ်၏ တစ်ဝက်ခန့်မှာ နယ်စပ်မှ ထွက်ပြေးရန် အခွင့်အရေး မရလိုက်ဘဲ တောင်တန်းများပေါ်ရှိ ခြေကုပ်စခန်း အသီးသီးတွင် ပုန်းအောင်းနေရမည်မှာ သေချာသည်။

"လီခွမ့် ပြောပြချက် အရဆိုရင် နယ်စပ်အတွင်းက တောင်ပိုင်းစောင့်တပ် အင်အားက အနည်းဆုံး ငါးသောင်း ရှိပါသေးတယ် ဒါပေမဲ့ သူက အားလုံးကို မပြောပြချင်ဘဲ အရှင်နဲ့ ကိုယ်တိုင် တွေ့ဆုံချင်နေပါတယ် ဒါ့အပြင် လက်အောက်ငယ်သားက သူနဲ့ စကားပြောဆိုနေတုန်း အရှင် အရမ်း စိတ်ဝင်စားမယ့် ပစ္စည်းတစ်ခုကိုလည်း တွေ့ရှိခဲ့ပါတယ်"

ကျိုးရွှမ်က ပြုံးရွှင်စွာဖြင့် ပြောလိုက်သည်။

"ဘာပစ္စည်းလဲ"

"မိစ္ဆာပယ်ဖျက် မိုးကြိုးနှလုံးသား ပုတီးစေ့"

"လီခွမ့်က ဘယ်မှာရှိလဲဆိုတာ သိနေတာလား"

ကျန်းချဲ့၏ ရင်ထဲတွင် လှုပ်ရှားသွားပြီး ချက်ချင်း တည်ကြည်သော အသံဖြင့် မေးလိုက်သည်။

ကျိုးရွှမ်က ခေါင်းညိတ်လိုက်ပြီး

"သူ အဲဒီလို ပြောခဲ့တာတော့ သေချာပါတယ် ဝမ်းနည်းစရာက လက်အောက်ငယ်သားက အကြိမ်ကြိမ် မေးကြည့်ပေမဲ့ သူက ဘာမှ မပြောပြချင်ဘူး သူက ဒီအရာတွေကို အပေးအယူ လုပ်ဖို့ ဖဲချပ်အဖြစ် အသုံးပြုချင်နေတာ ထင်ရှားတယ်"

ကျန်းချဲ့က ကုလားထိုင် လက်ရန်းကို လက်ချောင်းများဖြင့် ခေါက်ရင်း ခေါင်းအနည်းငယ် ညိတ်လိုက်သည်

"သူ တောင်းဆိုမှု လုပ်တာကို မကြောက်ဘူး သူ အသေခံပြီး အညံ့မခံမှာကိုပဲ ကြောက်တာ ဒီလိုဆိုမှတော့ သူ့ကို ပင်မခန်းမဆီ ခေါ်လာခဲ့ ငါ ကိုယ်တိုင် သူနဲ့ တစ်ခေါက် တွေ့မယ်"

မိစ္ဆာပယ်ဖျက် မိုးကြိုးနှလုံးသား ပုတီးစေ့ နှင့် ပတ်သက်နေသဖြင့် ကျန်းချဲ့က အနည်းငယ်မျှ ပေါ့ဆရဲခြင်း မရှိပေ။ မည်သို့ပင်ဆိုစေ ယခုအချိန်တွင် သူက ယဇ်ပူဇော်စရာ ပစ္စည်း အများစုကို စုဆောင်းရရှိနေပြီ ဖြစ်ပြီး မိစ္ဆာပယ်ဖျက် မိုးကြိုးနှလုံးသား ပုတီးစေ့ တစ်ခုသာ ရပါက ယဇ်ပူဇော်၍ အဆင့်တက်နိုင်ပြီ ဖြစ်ရာ သဘာဝကျစွာပင် အချိန်အကြာကြီး ဆွဲမနေချင်တော့ပေ။

"အမိန့်တိုင်းပါ လက်အောက်ငယ်သား အခုချက်ချင်း သူ့ကို ခေါ်လာခဲ့ပါ့မယ်"

ကျိုးရွှမ်က အလျင်အမြန် ထွက်ခွာသွားသည်။

"ဒီအတောအတွင်း ကိုယ် မရှိလို့ အများကြီး ပင်ပန်းသွားပြီ"

ကျိုးရွှမ် ထွက်သွားပြီးနောက် ကျန်းချဲ့က အကြည့်ကို ကျောက်ရှန်းကျီထံသို့ ရွှေ့လိုက်ပြီး မျက်ဝန်းများထဲတွင် အပြုံးများ ရောယှက်နေသည်။

ကျောက်ရှန်းကျီက ခေါင်းယမ်းလိုက်သည်

"ကျွန်မက အိမ်တော်မှာပဲ စောင့်နေရတာ ဘာအန္တရာယ်မှ မရှိပါဘူး ပင်ပန်းတာက အကြီးအကဲချုပ်တို့ပါ အခုဆိုရင် သူတို့က နယ်စပ်ကို ထွက်သွားကြပြီ အခု ရှင် ပြန်ရောက်လာပြီဆိုတော့ ကျွန်မတို့လည်း ထွက်ခွာသင့်ပြီ မဟုတ်လား"

"သေချာတာပေါ့"

ကျန်းချဲ့က ခေါင်းညိတ်လိုက်သည်။ ပိုင်ယွဲ့ မဟာမိတ်တပ်ဖွဲ့ကို ခုခံကာကွယ်ရန်မှာ ယခုလက်ရှိ အရေးအကြီးဆုံး ကိစ္စပင် ဖြစ်သည်။

"ကျွန်မနဲ့ ရှင့်ရဲ့ ကိစ္စကို ပြီးခဲ့တဲ့ နှစ်ရက်က လင်းကျန့်တောင် ဘက်ကနေ လူလွှတ်ပြီး သတင်းပို့လာတယ် ကျွန်မ... ကျွန်မ ဘာမှ ဖုံးကွယ်မထားပါဘူး..."

ကျောက်ရှန်းကျီက နှုတ်ခမ်းကို ဖိကိုက်လိုက်ပြီး အကြည့်ကို ကျန်းချဲ့ထံမှ လွှဲဖယ်သွားသည်။

ယခင်က ဖုံးကွယ်ထားရန် လိုအပ်ခဲ့ခြင်းမှာ သူမ၏ စိတ်ထဲတွင် ထိုအရာကို လက်ခံနိုင်ရန် အနည်းငယ် ခက်ခဲနေခဲ့သောကြောင့် ဖြစ်သည်။ သို့သော် ယခုအခါ သူမက ချီ ညီအစ်မ နှစ်ယောက်ကို ရင်ဆိုင်ရန်အတွက် ဆရာနှင့် တပည့် ပူးပေါင်းရန်ပင် ပြင်ဆင်နေပြီဖြစ်ရာ သဘာဝကျစွာပင် မည်သည့် စိတ်ဖိအားမှ မရှိတော့ပေ။ ထို့ကြောင့် လင်းကျန့်တောင် ဘက်က ဤကိစ္စကို သိရှိသွားပြီးနောက် သူမက ဖုံးကွယ်မထားခဲ့ပေ။ တစ်ခုတည်းသော စိုးရိမ်မှုမှာ ကျန်းချဲ့က သူမ၏ ကိုယ်ပိုင် ဆုံးဖြတ်ချက်ကို မကျေမနပ် ဖြစ်မည်ကိုပင်။

"ဒါက မူလကတည်းက ဖုံးကွယ်ထားစရာ ဘာအကြောင်းမှ မရှိပါဘူး သိသွားပြီဆိုမှတော့ နောက်ထပ် အချိန်အတန်ကြာရင် ကိုယ် တောင်းရမ်းဖို့ သွားရင် ဘယ်လိုထင်လဲ"

လင်းကျန့်တောင် ဘက်က ဤကိစ္စကို သိရှိသွားခြင်းနှင့် ပတ်သက်၍ ကျန်းချဲ့က အနည်းငယ်မျှ အံ့အားသင့်ခြင်း မရှိပေ။ မည်သို့ပင်ဆိုစေ ယခင် ထျန်းလုံ ဘုန်းကြီးကျောင်း တိုက်ပွဲတွင် ကျောက်ရှန်းကျီက ဗုဒ္ဓဘာသာကို စော်ကားရမည်ကိုပင် ဂရုမစိုက်ဘဲ ကျန်းချဲ့ကို ကူညီတိုက်ခိုက်ပေးခဲ့ခြင်းက အရာအားလုံးကို သက်သေပြပြီး ဖြစ်သည်။ ချီမိသားစုကပင် အနည်းငယ် ခန့်မှန်းနိုင်သေးရာ လင်းကျန့်တောင်က မည်သို့များ မခန့်မှန်းနိုင်ဘဲ နေမည်နည်း။

ဤကိစ္စနှင့် ပတ်သက်၍ ကျန်းချဲ့တွင်လည်း မည်သည့် စိတ်ဖိအားမှ မရှိပေ။ ယခုအခါ သူက ကျူးချွဲဌာနခွဲ၏ နတ်သံတမန်၊ ယွဲ့ပြည်နယ် မြို့တော်ဝန်၊ ယာယီ တောင်ပိုင်းစောင့်တပ် စစ်သူကြီး ဖြစ်ရာ တောင်ပိုင်းသုံးပြည်နယ် အတွင်း အာဏာအရှိဆုံး လူမှာ သူပင်ဖြစ်ပြီး ထိပ်တန်း ပုဂ္ဂိုလ်တစ်ဦးဟုပင် ခေါ်ဆိုနိုင်ပြီ ဖြစ်သည်။ ဤကဲ့သို့သော သူက လင်းကျန့်တောင်နှင့် လက်ထပ်ခြင်းမှာ အားလုံးအတွက် ဝမ်းသာစရာသာ ဖြစ်လာပေလိမ့်မည်။ သေချာသည်မှာ အခြေခံအချက်မှာ ကျန်းချဲ့က လီချန်ကောကို အနိုင်ယူပြီး သူ၏ နေရာကို အခိုင်အမာ ရယူပြီးနောက်မှသာ ဖြစ်သည်။

"ကောင်းပါပြီ"

ကျောက်ရှန်းကျီက မျက်နှာပေါ်တွင် အပြုံးတစ်ခု ချိတ်ဆွဲထားကာ လက်ချောင်းလေးများဖြင့် နားထင်မှ ဆံနွယ်လေးများကို ဖွဖွလေး ရစ်ခွေလိုက်သည်။ အနည်းငယ် ရှက်ရွံ့နေသည့် တစ်ချိန်တည်းမှာပင် ကျန်းချဲ့၏ အဖြေကို အလွန် ကျေနပ်နေသည်။

မည်သို့ပင်ပြောစေ သူမက လင်းကျန့်တောင်၏ စစ်မှန်သောသခင် တစ်ပါး ဖြစ်ပြီး အဆင့်အတန်း မြင့်မားလှသည်။ ကျန်းချဲ့၏ နောက်ကွယ်တွင် အမြဲတမ်း တိတ်တဆိတ် မယားငယ် လုပ်နေရန် မဖြစ်နိုင်ပေ။ အထူးသဖြင့် ချီ ညီအစ်မ နှစ်ယောက်က ရန်လိုမှုကို ပြသနေချိန်တွင် ပို၍ပင် ဖြစ်သည်။ ထို ကောင်မလေး နှစ်ယောက်ကို အားနည်းကြောင်း ပြသ၍ လုံးဝ မဖြစ်ပေ။

"အရှင် လီခွမ့်ကို ခေါ်လာပါပြီ"

အပြင်ဘက်မှ ကျိုးရွှမ်က ပင်မခန်းမအတွင်းသို့ အရင်ဆုံး ဝင်ရောက်လာပြီး လီခွမ့်ကတော့ ခေါင်းငုံ့ကာ လိုက်ပါလာသည်။ ပိုးသားဝတ်ရုံများကို ဝတ်ဆင်ထားသော်လည်း သူ၏ ကိုယ်ပေါ်တွင်တော့ မှိုင်းညို့နေသော အရှိန်အဝါ တစ်ခု လွှမ်းခြုံနေသည်။

ကျန်းချဲ့က မျက်လုံးများကို မှေးလိုက်ပြီးနောက် အပြုံးတစ်ခု ပေါ်လာသည်

"စစ်သူကြီးလီက အမှောင်ကို စွန့်ခွာပြီး အလင်းကို ရွေးချယ်လိုက်တယ် ဆိုတာ သိရလို့ ငါ့ အနေနဲ့ နောက်ဆုံးတော့ စိတ်အေးရပြီ စစ်သူကြီးလီ လို လူမျိုးသာ ရှိနေရင် တောင်ပိုင်းစောင့်တပ်ကို မသိမ်းသွင်းနိုင်မှာကို ငါ ဘာပူစရာ လိုတော့မလဲ"

လီခွမ့်က ခေါင်းမော့လိုက်ပြီး အပြုံးများ ပြည့်နှက်နေသော ကျန်းချဲ့ကို ကြည့်ကာ လေးလံနေသော ရင်ထဲမှ အနည်းငယ် သက်သာသွားသည်။ ချက်ချင်း ရှေ့သို့ တစ်လှမ်း တိုးကာ ကိုယ်ကိုကိုင်းညွှတ်၍ အရိုအသေပေးလိုက်သည်

"ကျွန်တော် လီခွမ့် ဘဝတစ်ဝက်လောက် လှည့်လည်သွားလာခဲ့ရပြီး အမြင်ကျယ်တဲ့ အရှင် တစ်ယောက်နဲ့ မတွေ့ရတာကိုပဲ နောင်တရနေမိတာပါ…”