မီးခိုးရောင်နှင်းများ (၁)

အနန္တရထားသည် ပေါင်းစည်းယာဉ်တန်း၏ ဦးဆောင်ရထားနေရာကို တစ်ဖန်ပြန်လည်ရယူလိုက်ပြီဖြစ်သည်၊၊

အဆုံးမရှိသော သွေးနီရောင်မြူခိုးများထဲတွင် ဝေးလ် 03E အကြီးစားဂတ်စ်တာဘိုင်စက်ခေါင်းနှင့် နဂါးအဆင့်လျှပ်စစ်ရထားခေါင်းတို့၏ အင်ဂျင်သံများက ဟိန်းဟောက်နေပြီး ၎င်းတို့နောက်ကွယ်မှ ကီလိုမီတာရာကျော် ရှည်လျားသော ပေါင်းစည်းရထားကြီးကို ဆွဲခေါ်လာခဲ့ကြသည်၊၊

ဤရထားများသည် တစ်စီးနှင့်တစ်စီး အစအဆုံးချိတ်ဆက်ထားပြီး အချက်ပြထိန်းချုပ်မှုစနစ်မှတစ်ဆင့် စွမ်းအင်ထုတ်လွှတ်မှုကို မျှတစေလျက် လွင်ပြင်ကျယ်ကြီးကို ဖြတ်သန်း၍ အရှိန်အဟုန်ဖြင့် မောင်းနှင်နေကြသည်၊၊

အနန္တရထား၏ အဓိကတိုက်ခိုက်ရေးအဖွဲ့ဝင်များသည် ရထားပေါ်သို့ ပြန်လည်ရောက်ရှိလာကြပြီ ဖြစ်သည်၊၊ ရထားလမ်းကြောင်းပြဿနာများနှင့် လေကြောင်းပံ့ပိုးမှုတို့ကို ထည့်သွင်းစဉ်းစားသောကြောင့် ကောင်းကင်အမိုးခုံးရထား၊ တိတ်ဆိတ်မြို့တော်နှင့် အခြားလေတပ်အချို့သည် အမြင့် ၂ကီလိုမီတာခန့်ရှိ ဝေဟင်တွင် တည်ရှိနေပြီး ရထားနှင့်အတူ တောင်ဘက်ဆီသို့ လိုက်ပါပျံသန်းနေကြသည်၊၊

နာရီအနည်းငယ်ကြာပြီးနောက် ရထားအတွင်းပိုင်းရှိ ထူးဆန်းသောဖြစ်ရပ်များကို လုံးဝထိန်းချုပ်နိုင်ခဲ့ပြီး ပျက်စီးနေသောရထားတွဲများ၏ အဓိကဖွဲ့စည်းပုံများကိုလည်း အများစုပြုပြင်ပြီးစီးခဲ့ပြီဖြစ်သည်၊၊ ကျန်ရှိနေသောအလုပ်များကိုမူ လမ်းတစ်လျှောက်ရှိ သောင်းနှင့်ချီသောပြုပြင်ထိန်းသိမ်းရေးနှင့် အခြေခံပုံကြမ်းထုတ်လုပ်ရေးဒရုန်းများက လုပ်ဆောင်နေကြရာ ဤလုပ်ငန်းပမာဏက ကြီးမားလွန်းသဖြင့် လင်းရှန်တစ်ယောက်တည်းမတတ်နိုင်ပေ၊၊

ဤဒရုန်းများသည် ရထားတွဲများ၏ ချိတ်ဆက်မှုကို ပိုမိုခိုင်မာစေရန်၊ သံချပ်ကာအခွံများကို ပြုပြင်ရန်နှင့် အမှောင်စွမ်းအင်ထပ်တူပြုကိရိယာများကို တပ်ဆင်ရန် အဓိကကူညီပေးနေကြသည်၊၊

အချက်အလက်များကို ကွပ်ကဲလိုင်းအတွင်း ထပ်တူပြုပြီးဖြစ်သောကြောင့် ဤကိရိယာများ တပ်ဆင်ပြီးသည်နှင့် အဆင့် ၃ သို့မဟုတ် ထိုထက်မြင့်သော သွေးပဲစေ့ရှိသည့် မည်သည့်ရထားအဖွဲ့မဆို အမှောင်စွမ်းအင်ကို ခုခံရန် အကာကွယ်ကို အသက်သွင်းနိုင်မည် ဖြစ်သည်၊၊

မြေပြင်ပေါ်တွင်မူ ရထားသည် တိတ်ဆိတ်စွာ ရွှေ့ပြောင်းနေခဲ့သည်၊၊

သို့သော် ရထားအဖွဲ့တစ်ခုချင်းစီ၏ အတွင်းပိုင်းတွင်မူ အသည်းအသန်လှုပ်ရှားရုန်းကန်နေကြရသည်၊၊

အရေးပေါ် ကိရိယာများပြုပြင်ခြင်း၊ စနစ်များပြန်လည်ကောင်းမွန်အောင်လုပ်ခြင်း၊ ဒဏ်ရာရသူများကို ကူညီခြင်း၊ လူဦးရေစာရင်းစစ်ဆေးခြင်း၊ ရိက္ခာပံ့ပိုးမှုဖြည့်တင်းခြင်း… စသည်တို့ဖြင့် အလုပ်ရှုပ်နေကြသည်၊၊

အချို့အဖွဲ့များမှာမူ လုံးဝလူစုကွဲသွားသဖြင့် မိမိတို့၏ ရဲဘော်များနှင့် မိသားစုဝင်များကို ရှာမတွေ့နိုင်ဘဲဖြစ်နေကြသည်၊၊

ထို့ကြောင့် ကွပ်ကဲလိုင်း၏ ညွှန်ကြားချက်အရ ကီကီက ကောင်းကင်အမိုးခုံးရထားနှင့် တိတ်ဆိတ်မြို့တော်၏ကွန်ရက်နယ်ပယ်များကိုအသုံးပြုကာ အတွင်းပိုင်းလိုင်းဖြင့် ရထားတွဲအတွင်းပိုင်းသုံးကွန်ရက်တစ်ခုကို တည်ဆောက်ပေးခဲ့ပြီး အတွင်းပိုင်းဆက်သွယ်ရေးများကို ထိရောက်စွာ ကိုင်တွယ်ဖြေရှင်းပေးခဲ့သည်၊၊

ဤနေရာတွင် အသက်ရှင်ကျန်ရစ်သူ အနည်းဆုံးနှစ်သိန်းခန့် ရှိနေသည်ကို သတိပြုရမည်ဖြစ်သည်၊၊ ဤရထားကြီးတစ်စီးတည်းသည်ပင် အလတ်စားမြို့တစ်ခု၏ လူဦးရေနှင့် ညီမျှနေပြီး ဖြေရှင်းရမည့် ပြဿနာပေါင်းထောင်နှင့်ချီ၍ရှိနေခဲ့သည်၊၊ အတွင်းပိုင်းကွန်ရက်ကို အသက်သွင်းလိုက်သည့် ကဏ္ဍတိုင်းရှိ ပို့စ်များအောက်တွင် မှတ်ချက်များ ပေါက်ကွဲတက်လာခဲ့တော့သည်၊၊

လူကြိုက်အများဆုံးကဏ္ဍမှာ ရိက္ခာနှင့် ပစ္စည်းလဲလှယ်ရေးကဏ္ဍပင် ဖြစ်သည်၊၊

အစားအစာ၊ ရေ၊ ဆေးဝါးရင်းမြစ်များ၊ လက်နက်များ၊ ကိရိယာများနှင့် ကုန်ကြမ်းပစ္စည်းများစသည့် ကူညီကယ်ဆယ်ရေးတောင်းဆိုသံများ နေရာအနှံ့ပဲ့တင်ထပ်နေခဲ့သည်၊၊

“ရထားတွဲ ၁၃၀၃ မှာ ပဋိဇီဝဆေးတွေ အရေးပေါ်လိုအပ်နေပါတယ်၊၊ ကလေးတစ်ယောက် ဒဏ်ရာပိုးဝင်ပြီး အပူချိန် ၄၀ ဒီဂရီစင်တီဂရိတ်အထိတတ်ပြီး ဖျားနေလို့ပါ”

“သန့်စင်ပြီးရေ ၅ လီတာ လိုအပ်ပါတယ်၊၊ ကိုယ်ဝန်ဆောင်အမျိုးသမီးတစ်ဦး ပြင်းထန်စွာ ရေဓာတ်ခမ်းခြောက်နေလို့ပါ၊၊ ရထားတွဲ ၄၈၁၂ ပါ၊၊ အနီးနားက မိတ်ဆွေတို့ ကူညီပေးကြပါဦး”

“မီးနတ်ဘုရား လုရှင်းချန်- လူတစ်ယောက်တည်းနဲ့ မွန်းစတားလှိုင်းလုံးကြီး တစ်ကီလိုမီတာလောက်ကို မီးရှို့ဖျက်ဆီးပစ်ခြင်း (ဗီဒီယိုတိုက်ရိုက်ဖိုင်)”

“သမီးလေး ရှောင်ယာကို ရှာနေပါတယ်၊၊ အသက် ၇ နှစ်ပါ၊၊ အနီရောင်မုဆိုးစွမ်းအားဝတ်စုံ ဝတ်ထားပါတယ်၊၊ ရထားတွဲ T-7 မှာ ပျောက်သွားတာပါ”

“မြင်းမြီးဆံပင်ပုံစံနဲ့ မျက်မှန်ဝိုင်းတပ်ထားတဲ့ ဆရာဝန်ကို ရှာနေပါတယ်၊၊ သူက ဝမ်းဗိုက်တစ်ခုလုံးပွင့်ထွက်သွားတဲ့ စစ်သားတစ်ယောက်ကို အရေးပေါ်ဆေးကုသပေးခဲ့လို့ပါ”

“သံမဏိအစောင့်တပ်ရင်း ၁၃ က စွန့်လွှတ်အနစ်နာခံမှုတွေ များလွန်းခဲ့တယ်၊၊ ဗိုလ်ချုပ်လီရှန်းကို အမှတ်ရလေးစားလျက်”

“ဓားကိုင်ဆောင်သူ လင်းရှန်- တံတားတည်ဆောက်မှုစွမ်းအား၊၊ လူသားမျိုးနွယ်ရဲ့ ကျောရိုး”

“တောင်ဘက်ဆီသို့… နေမင်းဆီသို့၊၊ ငါတို့ ဝင်ရိုးစွန်းဒေသကို ရောက်အောင်သွားမယ်”

…

အနန္တရထား၏ ထိန်းချုပ်ခန်းအတွင်း၌ လင်းရှန်သည် သူ၏ထိုင်ခုံတွင် မှီလိုက်ရင်း ဆက်သွယ်ရေးလိုင်းများကို အဆက်မပြတ် ရွှေ့ပြောင်းကြည့်ရှုနေခဲ့သည်၊၊ လိုင်းတိုင်းတွင် ခြွင်းချက်မရှိ အရေးပေါ်ကသောင်းကနင်းဖြစ်ရပ်များနှင့် ပြည့်နှက်နေခဲ့သည်၊၊

ရှေ့တည့်တည့်တွင်မူ ဒရုန်းအုပ်စုများနှင့် လေတပ်တို့က ရှေ့ပြေးမြေမျက်နှာသွင်ပြင် သတိပေးချက်များကို ပံ့ပိုးပေးနေသည်၊၊ သူ မရောက်လာမီကပင် တစ်ကြိမ်ပြုပြင်ထားပြီးဖြစ်သော ရထားလမ်းများနှင့် ပေါင်းစပ်လိုက်သည့်အခါ ရထားသည် အလွန်ချောမွေ့စွာ ခရီးနှင်နိုင်ခဲ့သည်၊၊

မြောက်အမေရိကတိုက်ပေါ်တွင် သွေးနီရောင်မုန်တိုင်းများ စုပြုံနေခြင်းကြောင့်ဖြစ်နိုင်သည်၊၊ ဤသွေးနီရောင်မြေရိုင်းလွင်ပြင်တွင် ထူးဆန်းသောသတ္တဝါများ သိသိသာသာနည်းပါးသွားခဲ့သည်၊၊ ရထားနောက်သို့ ဇွဲကောင်းစွာအမဲလိုက်နေသော အဆုံးမရှိသည့် ဖုတ်ကောင်များအပြင် မြေအောက်၌ စွမ်းအင်ဝါးမြိုပိုးကောင်များနှင့် အချို့သော အမဲလိုက်သတ္တဝါများကို ပိုမိုမြင်တွေ့လာရသည်၊၊

[လက်ရှိ ယန္တရားနှလုံးသားအဆင့် ၇ (၈၄၈၀၄/၁၀၀၀၀၀)]

[ယန္တရားနိုးထမှု] - ယန္တရားအရှင်သခင်

ယန္တရားဝါးမျိုမှု - ၇ (၃၃၈၀/၁၀၀၀၀) ဝါးမျိုမှုစွမ်းရည် တိုးတက်လာသည်၊၊

အခြေခံပုံကြမ်းထုတ်လုပ်ရေး - ၇ (၈၅၆၀/၁၀၀၀၀) ထုတ်လုပ်မှုစွမ်းရည် တိုးတက်လာသည်၊၊

လင်းရှန် မျှော်လင့်မထားခဲ့သည်မှာ ကောင်းကင်အမိုးခုံးရထားပေါ်ရှိ သွေးကပ်ဘေးပန်းနှင့် ထူးဆန်းသောကုဗတုံးတို့ကြောင့် ယခုအတောအတွင်း စွမ်းအင်များပေါက်ကွဲထွက်မတတ် ပြောင်းလဲစုစည်းလာခြင်းပင် ဖြစ်သည်၊၊

သူ၏ မူလအစီအစဉ်မှာ လမ်းတစ်လျှောက်ရှိ ယန္တရားပစ္စည်းအချို့ကို ဝါးမျိုပြီး အဆင့်မြှင့်တင်ရန်ဖြစ်သော်လည်း ချန်ဆီရွှမ်နှင့် အနန္တရထားအဖွဲ့တို့သည် ဤမျှလောက် ရှည်လျားလှသော အချိန်အတွင်း တိုက်ခိုက်ခဲ့ကြသဖြင့် သူ့အတွက် တန်ဖိုးရှိသော ရင်းမြစ်များကို ချန်ထားပေးခဲ့ကြပြီ ဖြစ်သည်၊၊

သူသည် အဆင့် ၈ သို့ ရောက်ရှိရန် နီးကပ်နေပြီဖြစ်သဖြင့် ဤအချိန်သည် ဝမ်းသာရမည့်အချိန်ဖြစ်သင့်သော်လည်း လင်းရှန်သည် မည်သည့်ပျော်ရွှင်မှုကိုမျှ ရှာမတွေ့နိုင်ခဲ့ပေ၊၊

သူက သေဆုံးမှုပေါင်းများစွာကို မြင်တွေ့ခဲ့ပြီးပြီဟု ထင်ခဲ့သော်လည်း လွန်ခဲ့သော နာရီအနည်းငယ်က မိနစ်ပိုင်းအတွင်းဖြစ်ပွားခဲ့သည့် ကြေကွဲဖွယ်မြင်ကွင်းများက သူ၏နှလုံးသားကို လှိုင်းထန်စေခဲ့သည်၊၊

ဤလူများသည် ရေတွက်မရနိုင်သော အခက်အခဲများကို ကျော်ဖြတ်ခဲ့ကြပြီး ၎င်းတို့၏ စိတ်ဓာတ်ကြံ့ခိုင်မှုကလည်း ပြင်းထန်လှကာ ကြီးမားသော သန္ဓေပြောင်းလဲမှုများကိုလည်း ကြုံတွေ့ခဲ့ကြပြီးပြီ ဖြစ်သည်၊၊ ရထားတွဲပေါင်းထောင်နှင့်ချီ၍ ချိတ်ဆက်လျက် ဤမျှလောက် ရက်စက်ကြမ်းကြုတ်သော ပတ်ဝန်းကျင်တွင် သွေးနီရောင်မြူများထဲမှ လွတ်မြောက်ရန် အစွန်းကုန်ရုန်းကန်ခဲ့ကြသော်လည်း ကံကြမ္မာသည် ရက်စက်လှသော ဝဲဂယက်ကြီးတစ်ခုကဲ့သို့ သူတို့ကို တစ်ခဏအတွင်း ဝါးမြိုသွားခဲ့သည်၊၊

အမျိုးသားများ၊ အမျိုးသမီးများ၊ သက်ကြီးရွယ်အိုများ၊ ကလေးငယ်များ၊ ဖခင်များ၊ မိခင်များ၊ စစ်သားများနှင့် ရဲဘော်ရဲဘက်များသည် ဆူပွက်နေသော သွေးပင်လယ်ကြီးအဖြစ်သို့ ပြောင်းလဲသွားခဲ့ကြလေသည်၊၊

ဤမျှလောက် အစွမ်းထက်လှသော စွမ်းအားရှင်များ၏ အော်ဟစ်သံများက အားကိုးရာမဲ့နေခဲ့ပြီး အဆုံးမရှိသော မွန်းစတားလှိုင်းလုံးကြီးထဲတွင် ဂယက်အနည်းငယ်မျှပင် မဖန်တီးနိုင်ခဲ့ကြပေ၊၊

ထို့ပြင် သူတို့သည် ထိုကမ္ဘာ့အဆင့်သတ္တဝါကြီးများနှင့် ထိပ်တိုက်မရင်ဆိုင်ရသေးပေ၊၊

ကြယ်နက်ပန်းပဲဖိုထဲတွင် လျင်မြန်စွာ ထုတ်လုပ်ထားသော တိုက်တန်ဂြိုလ်သည် အရင်းမြစ်များကို တိတ်ဆိတ်စွာ ဝါးမြိုနေခဲ့သည်၊၊ လင်းရှန်သည် ဤမီကာကြီးက ထိုကမ္ဘာ့အဆင့်ရန်သူများကို နောက်ဆုံးတွင် ယှဉ်ပြိုင်နိုင်ခြင်းရှိမရှိကို မသိရပေ၊၊ အဘယ်ကြောင့်ဆိုသော် အခုထိ သူတို့သည် မျှော်စင်လူသားများ၏ တည်ရှိမှုကို အမှန်တကယ်မမြင်တွေ့ရသေးသောကြောင့်ဖြစ်သည်၊၊

ထို့ပြင် လင်းရှန် သေချာသိထားတာတစ်ခုမှာ ထိုကမ္ဘာ့အဆင့်ကပ်‌ဘေးငါးခုသည် အစစ်မှန်မျှော်စင်လူသားများမဟုတ်နိုင်ခြင်းပင်ဖြစ်သည်၊၊

ထို့ကြောင့် ကမ္ဘာတစ်ခုလုံးကို လွှမ်းခြုံထားသော ကောင်းကင်အကာကွယ်ကြီးသည် မျှော်စင်လူသားများက စွမ်းအင်ထုတ်ယူရန်အသုံးပြုသည့်ကိရိယာတစ်ခုဖြစ်ကြောင်းသိလိုက်ရသည့်အခါ လင်းရှန်သည် နှလုံးသားထဲတွင် နက်ရှိုင်းစွာ စိုးရိမ်ထိတ်လန့်သွားခဲ့သည်၊၊

ထို့ကြောင့် သူသည် ထိုမွန်းစတားများကို အနိုင်တိုက်နိုင်ခြင်းရှိမရှိထက် အခြားသောအစီအစဉ်တစ်ခုကို စဉ်းစားနေခဲ့သည်၊၊

ဤအနန္တရထားကြီးသည် သံလမ်းပေါ်ရှိ ရွေ့လျားမြို့တော်ကြီးတစ်ခုကဲ့သို့ ဖြစ်နေသည်၊၊ အကယ်၍ ၎င်းသည် ကြယ်နက်ပန်းပဲဖို၏ အာကာသတံခါးမှတစ်ဆင့် အဝေးရှိ ကြယ်စုတန်းဆီသို့ ခရီးနှင်နိုင်ခဲ့မည်ဆိုပါက...

ထိုသို့ဆိုလျှင်... နာကျင်မှုများစွာ လျော့နည်းသွားလောက်ပေမည်၊၊

နောက်ဘက်ရှိ ရထားတွဲများထဲတွင်မူ အရာအားလုံးသည် အာရုဏ်ဦးမြို့တော်မတိုင်မီ နေ့ရက်များဆီသို့ ပြန်လည်ရောက်ရှိသွားသည့်အလားရှိနေပြီး ရထားတွဲတစ်ခုချင်းစီရှိ အဖွဲ့သားများသည် တစ်ဦးကိုတစ်ဦးဝိုင်းဝန်းကူညီလျက် အလုပ်ရှုပ်နေကြသည်၊၊ ကောင်းကင်အမိုးခုံးရထားပေါ်တွင်လည်း သောင်းနှင့်ချီသောနေထိုင်သူများရှိနေကြပြီဖြစ်သည်၊၊

သူသည် သူ၏နားထင်များကို နှိပ်နယ်လိုက်သည်၊၊

လင်းရှန်က ဗိုလ်ချုပ်များ၊ ယာဉ်တန်းခေါင်းဆောင်များနှင့် ဆွေးနွေးပြီးနောက် မတ်တပ်ရပ်ရန် ပြင်ဆင်လိုက်သည်၊၊ သူသည် ယန္တရားများကို ဝါးမြိုရန်အတွက် ယာဉ်တန်း၏ အစိတ်အပိုင်းအချို့ကို သီးသန့်ခွဲထုတ်ပေးရန် လိုအပ်နေပြီး ဘေးကင်းလုံခြုံမှုရှိစေရန်အတွက် သူ၏ ယန္တရားနှလုံးသားအဆင့်ပိုမြင့်မားလာမှ ပို၍အဆင်ပြေလာပေမည်၊၊

သူ့တွင် ကျွမ်းကျင်မှုစွမ်းရည်များလေ ပိုမိုလှုပ်ရှားရုန်းကန်နိုင်လဖြစ်သည်၊၊

အမှန်တကယ်တော့ ကြီးကြီးမားမားစီစဉ်နေစရာပင် မလိုပေ၊၊ ပေါင်းစည်းယာဉ်တန်းအတွင်း၌ လင်းရှန်ကိုယ်တိုင် ပြုပြင်မွမ်းမံခြင်းနှင့် ထုတ်လုပ်ခြင်းများကို မလုပ်ဆောင်ပါက ခရီးသွားနေစဉ်အတွင်း အင်ဂျင်နီယာများ၏ ပြုပြင်နိုင်စွမ်းထက် ကျော်လွန်နေသော မော်တော်ယာဉ်များနှင့် ရထားတွဲများစွာ ရှိနေသည်၊၊ ထို့ကြောင့် ပေါင်းစည်းယာဉ်တန်း၏ ဆွဲအားကို မခံနိုင်တော့သော ရထားတွဲများစွာကို လင်းရှန်အတွက် သတ်မှတ်ပေးခဲ့ကြသည်၊၊

ထိုရထားတွဲများအတွင်းရှိ ရင်းမြစ်များနှင့် လူဦးရေကိုလည်း ကြိုတင်ရွှေ့ပြောင်းပေးထားပြီးဖြစ်သည်၊၊

လင်းရှန်သည် သူ၏ခန္ဓာကိုယ်ကို နာနိုတိုက်ပွဲဝတ်စုံဖြင့် ဖုံးလွှမ်းလိုက်ပြီး ရထားခန်းတံခါးကို ဖွင့်ကာ ရထားအမိုးပေါ်သို့ ပျံသန်းသွားခဲ့သည်၊၊ HUDတွင် နောက်ဘက်မှ မှတ်သားထားသော ရထားတွဲများကို ပြသစေပြီးနောက် သူသည် နောက်ပြန်ပျံသန်းခဲ့သည်၊၊ မှတ်သားထားသော နေရာတစ်ခုစီတွင် သူသည် ယန္တရားဝါးမျိုမှုစွမ်းရည်ကို အသုံးပြု၍ ၎င်းတို့ကို ချက်ချင်း ဖြိုခွဲဖျက်ဆီးပစ်လိုက်ပြီး ရှေ့တွဲနှင့် နောက်တွဲများကို ပြန်လည်ချိတ်ဆက်ပေးခဲ့သည်၊၊

ဤလုပ်ငန်းစဉ်ကို စိမ်းသက်နေသော အသက်ရှင်ကျန်ရစ်သူအများအပြားသည် ရထားတွဲအဆက်များတွင် ရပ်ကြည့်နေကြ၏၊၊ ယန္တရားစွမ်းအားရှင်တစ်ဦးက မီတာ ၃၀ ကျော် ရှည်လျားသော ရထားတွဲတစ်စီးကို တစ်ခဏအတွင်း ပြာမှုန့်အဖြစ် ပြောင်းလဲပစ်လိုက်သည်ကို တွေ့မြင်ကာ အားလုံးက တုန်လှုပ်ခြောက်ခြားသောအမူအရာများပြသခဲ့ကြသည်၊၊ အထူးသဖြင့် ကလေးငယ်များသည် ပါးစပ်အဟောင်းသားဖြင့် အံ့ဩမှင်သက်နေခဲ့ကြသည်၊၊

ရထားအုပ်စုကြီး၏ ဒေသန္တရကွန်ရက်ပေါ်တွင် လင်းရှန်နှင့်ပတ်သက်သော ပို့စ်များသည် “ယန္တရားစွမ်းအား”၊ “ယန္တရားဆင့်ကဲပြောင်းလဲမှု”၊ “ဖန်ဆင်းရှင်”၊ “ကယ်တင်ရှင်” စသည့် Keyword စကားလုံးများနှင့်အတူ ဆက်တိုက်တိုးပွားလာနေခဲ့သည်၊၊

လင်းရှန် ယခုအချိန်တွင် ထိုအရာများကို ဂရုမစိုက်နိုင်တော့ပေ၊၊ သူ၏ ယန္တရားစွမ်းအားသည် အသက်ရှင်ကျန်ရစ်သူများအတွက်ဖြစ်စေ၊ ဖောင်ဒေးရှင်းအတွက်ဖြစ်စေ လျှို့ဝှက်ချက်တစ်ခုမဟုတ်တော့ပေ၊၊

[ဝါးမျိုမှု အောင်မြင်သည်၊၊ ယန္တရားရင်းမြစ်အမှတ် +၅၀]

[ဝါးမျိုမှု အောင်မြင်သည်၊၊ ယန္တရားရင်းမြစ်အမှတ် +၆၀]