အခန်း ၂၈၂

အပိုင်း(၂၈၂) အငြိုးနဂါး

ထို အနက်ရောင် နတ်နဂါးကြီးက နှိုင်းယှဉ်၍မရနိုင်လောက်အောင် ကြီးမားလှသော ဖိအားကြီးကို သယ်ဆောင်လာပြီး မည်သူမျှ တုံ့ပြန်ရန် အချိန်မရလိုက်ခင်မှာပင် သူတို့ရှေ့သို့ ရောက်ရှိလာခဲ့ပြီ ဖြစ်သည်။

ချန်းရီ၏ မျက်ဝန်းအိမ်ထဲသို့ ထူးဆန်းနက်နဲပြီး အလွန်တရာ ကြောက်မက်ဖွယ်ကောင်းသော ထိုနဂါးနက်ကြီး၏ ပုံရိပ်က တိုးဝင်လာ၏။

မည်သူကမျှ မလှုပ်ရဲကြပေ။

ဤအရာက ဒဏ္ဍာရီလာ သတ္တဝါကြီးတစ်ကောင် ဖြစ်သည်။

လွန်ခဲ့သောအချိန်က ဝူကျန်းတံတားပေါ်တွင် ကြုံတွေ့ခဲ့ရသည့် မြွေကြီးထက်ပင် ပို၍ ပြင်းထန်သော ဖိအားကို ပေးစွမ်းနိုင်လေသည်။

အစွမ်းပိုင်ရှင်များသည် ဤကဲ့သို့သော ဒဏ္ဍာရီလာ သတ္တဝါကြီးရှေ့တွင် ခပ်ကြီးကြီး ပုရွက်ဆိတ်များမျှသာ ဖြစ်ကြ၏။

ထွက်ပြေးမလား။

ရယ်စရာတွေ လာမပြောစမ်းပါနဲ့။

နဂါးနက်ကြီး၏ အမြန်နှုန်းမျိုးဖြင့်ဆိုလျှင် မည်သူမျှ ထွက်ပြေးလွတ်မြောက်နိုင်မည် မဟုတ်ပေ။

"မလှုပ်ကြနဲ့... သူ့ကို ဒေါသထွက်စေမယ့် ဘာလှုပ်ရှားမှုမှ မလုပ်ကြနဲ့... ငါတို့ သူ့ကို ရန်မစသရွေ့ အသက်ရှင်နိုင်တယ်"

စကားပြောစက်ထဲမှ ချူချယ်၏ နောက်ဆုံးစကားတစ်ခွန်း ထွက်ပေါ်လာသည်။

ပန်းရောင်ဆံပင်နှင့် ကောင်မလေးက တံတွေးမျိုချလိုက်ပြီး မီးနဂါးဓား၏ လက်ကိုင်ကို တင်းကျပ်စွာ ဆုပ်ကိုင်ထားလိုက်၏။

တင်းတုံကမူ ထိုင်ခုံကို နောက်သို့ ကျောမှီချထားပြီး သူမ၏ အသက်ရှူသံများပင် အလွန် သတိထားနေရလေသည်။

ကျိုးရှောင်ရှောင်က လက်သီးကို တင်းကျပ်စွာ ဆုပ်ထားပြီး သူမ၏ ခန္ဓာကိုယ်တစ်ခုလုံး တသိမ့်သိမ့် တုန်ယင်နေသည်။

တစ်ယောက်တည်းသာလျှင်။

ကမ္ဘာပျက်ကပ် ခံတပ်ကားကြီးပေါ်ရှိ တတိယထပ် မှန်ပြတင်းပေါက်ရှေ့တွင် မည်သည့်အချိန်ကတည်းက ရောက်နေမှန်းမသိသော အဖြူရောင် ဝတ်စုံနှင့် အမျိုးသား တစ်ယောက်တည်းသာ အလွန်အမင်း စိတ်လှုပ်ရှားနေခဲ့သည်။

ရှေးခေတ်က ဧကရာဇ်မင်းများကို "နဂါးဧကရာဇ်" ဟူ၍ တင်စားခေါ်ဝေါ်လေ့ ရှိကြသည်။

ထိုအမျိုးသားက မှန်ပြတင်းပေါက်ရှေ့တွင် ရပ်နေရင်း အသက်ရှူမြန်နေကာ ပါးစပ်မှလည်း တတွတ်တွတ် ရေရွတ်နေ၏။

"ဒါ ငါ့ဆီကို လာတာ သေချာတယ်... ငါ့ဆီကို လာတာ သေချာတယ်... ငါက အစစ်အမှန် နဂါးဧကရာဇ်ပဲ... ငါက အစစ်အမှန် နဂါးဧကရာဇ်ပဲ..."

စိတ်ကူးယဉ်သမား လမ်းစဉ်၏ ဘေးထွက်ဆိုးကျိုးက ဤအချိန်တွင် သူကိုယ်သူ "ဧကရာဇ်" ဟု ခေါ်ဆိုထားသော ထိုအမျိုးသားထံ၌ အထင်းသား ပေါ်လွင်နေခဲ့သည်။

စိတ်ကူးယဉ်သမား လမ်းစဉ်၏ အစွမ်းသည် အစွမ်းပိုင်ရှင်၏ စိတ်ကူးယဉ် တွေးတောမှုများမှ ဆင်းသက်လာပြီး ၎င်း၏ ဘေးထွက်ဆိုးကျိုးမှာလည်း အစွမ်းပိုင်ရှင်၏ စိတ်ကူးယဉ်မှုများမှပင် ဖြစ်ပေါ်လာခြင်း ဖြစ်သည်။

စိတ်ကူးယဉ်သမား လမ်းစဉ်ရှိ အစွမ်းပိုင်ရှင် အများစုတွင် စိတ်ပိုင်းဆိုင်ရာ ရောဂါဝေဒနာ အချို့ ရှိတတ်ကြသည်။

ဥပမာအားဖြင့် ကမ္ဘာပျက်ကပ် ခံတပ်ကားကြီး၏ တတိယထပ်မှ ဤလူကဲ့သို့ပင် ဖြစ်သည်။

အကယ်၍ ဘေးထွက်ဆိုးကျိုးကြောင့် ဖြစ်ပေါ်လာသော စိတ်ကူးယဉ်မှုများကိုသာ ထိန်းချုပ်နိုင်မည် ဆိုပါက။

၎င်းသည် အလွန် အစွမ်းထက်သော လမ်းစဉ်တစ်ခု ဖြစ်လာပေလိမ့်မည်။

အကယ်၍ မထိန်းချုပ်နိုင်ခဲ့ပါက။

ဤသူ၏ စိတ်ကူးယဉ်မှုများသည် ရူးသွပ်ခြင်း အဆင့်သို့ပင် ရောက်ရှိနေခဲ့ပြီ ဖြစ်သည်။

ဘေးနားရှိ လူများကိုပင် သက်ရောက်မှု ရှိနေလေသည်။

ဥပမာအားဖြင့် သူကိုယ်သူ နန်းတွင်းအမတ်ချုပ်ကြီးအဖြစ် ခန့်အပ်ထားသော ရှောင်တယ်ဇီ ကဲ့သို့ပင် ဖြစ်သည်။

စောစောက ထယ်ရှီး ဖျက်ဆီးလိုက်သော အမြောက်ပြောင်းသည် အမည်းရောင် တွင်းပေါက်ထဲမှ ဖြည်းညင်းစွာ ထွက်ပေါ်လာသည်။

အမြောက်ပြောင်းမှာ မူလအတိုင်း ပြန်လည် ကောင်းမွန်သွားခဲ့ပြီ ဖြစ်သည်။

သို့သော် သူ၏ လှုပ်ရှားမှုများကို မည်သူကမျှ သတိမထားမိခဲ့ကြပေ။

ဤအချိန်တွင် လူတိုင်းမှာ အလွန်အမင်း ထိတ်လန့်စိုးရိမ်နေကြပြီး မည်သူကမျှ သူ့ကို အာရုံမစိုက်နိုင်ကြချေ။

ယခုအချိန်တွင် နဂါးနက်ကြီးက လူတိုင်း၏ အမြင်အာရုံကို ဖုံးလွှမ်းထားခဲ့ပြီ ဖြစ်သည်။

နဂါးနက်ကြီးသည် ယာဉ်တန်း၏ ရှေ့သို့ အလေးချိန်မဲ့နေသကဲ့သို့ ပေါ့ပါးစွာ ဆင်းသက်လာပြီး ထိုမှောင်မည်းနေသော ခန္ဓာကိုယ်ကြီးက ကြမ်းကြုတ်ရက်စက်သော အငွေ့အသက်များကို သယ်ဆောင်လာ၏။

၎င်းသည် ဖော်ပြရန် ခက်ခဲသော၊ ရင်တထိတ်ထိတ် ခုန်စေသော ခံစားချက်မျိုး ဖြစ်သည်။

ထိုအချိန်ကျမှသာ ချန်းရီက ဤနဂါးနက်ကြီး၏ အသွင်သဏ္ဌာန် အမှန်ကို သတိထားမိသွားတော့သည်။

နဂါးနက်ကြီး၏ ခန္ဓာကိုယ် တစ်ခုလုံးသည် မည်းနက်နေပြီး ရွှေရောင် နေရောင်ခြည်အောက်တွင် အနက်ရောင် အကြေးခွံများက မှောင်မည်းသော အလင်းရောင်ကို ဖြာထွက်နေသည်။

သို့သော်။

နဂါးနက်ကြီး၏ ခန္ဓာကိုယ်ပေါ်ရှိ အကြေးခွံများအပေါ်တွင် အကြေးခွံတစ်ခုချင်းစီတိုင်း၌ နာကျင်နေသော လူမျက်နှာ တစ်ခုစီ ပေါ်ထွက်နေသည်မှာ အံ့သြဖွယ်ပင်။

အချို့သော လူမျက်နှာများသည် အသံတိတ် အော်ဟစ်နေကြသည်။

အချို့သော လူမျက်နှာများမှာ မျက်လုံးမှိတ်၍ ငိုကြွေးနေကြ၏။

အချို့သော လူမျက်နှာများကမူ ရူးသွပ်စွာ ရယ်မောနေကြသည်။

အကြေးခွံတိုင်းပေါ်ရှိ လူမျက်နှာများ၏ မျက်နှာအမူအရာမှာ တစ်ခုနှင့်တစ်ခု မတူညီကြပေ။

ထို့အပြင် နွားမျက်လုံးကဲ့သို့ ကြီးမားသော နဂါးကြီး၏ မျက်လုံးတစ်ဖက်ထဲတွင် သေးသွယ်ရှည်လျားသော လောက်ကောင်များက အဆက်မပြတ် ဝင်ထွက်သွားလာနေကြသည်။

အခြား မျက်လုံးတစ်ဖက်မှာမူ လုံးဝ အဖြူရောင် ပြောင်းနေခဲ့ပြီ ဖြစ်သည်။

ဤသည်မှာ မျက်ကန်း နဂါးနက်ကြီး တစ်ကောင်ပင်တည်း။

ဤမျှသာ မကသေးပေ။

ထိုဧရာမ နဂါးနက်ကြီး၏ ကျောဘက်တွင် တစ်စုံတစ်ရာသော ထက်မြက်သည့် လက်နက်ဖြင့် ခုတ်ပိုင်းခံထားရသကဲ့သို့ ဖြစ်နေပြီး ကြီးမားလှသော ဒဏ်ရာကြီးဆီမှ ထူးဆန်းသော အမည်းရောင် အငွေ့အသက်များ ထွက်ပေါ်နေသည်ကိုလည်း ချန်းရီ မြင်တွေ့လိုက်ရသည်။

ချန်းရီ၏ စိတ်ထဲတွင် အလွန်အမင်း ထိတ်လန့်သွား၏။

ဤဒဏ္ဍာရီလာ သတ္တဝါကြီးကို ဤမျှကြီးမားသော ဒဏ်ရာရအောင် လုပ်နိုင်သည့်အရာက တကယ်တမ်း ဘာများ ဖြစ်နေမလဲ။

ချန်းရီ၏ မြင်ကွင်းမှနေ၍ နဂါးကြီး၏ ကျောဘက် ဒဏ်ရာရှိ အဖြူရောင် နဂါးအရိုးကိုပင် လှမ်းမြင်နေရသည်။

ဒဏ်ရာအနီးရှိ အကြေးခွံ အတော်များများမှာ ယိမ်းယိုင်နေပြီး အချိန်မရွေး ပြုတ်ကျတော့မည့်အလား ဖြစ်နေသည်။

ချန်းရီ၏ သွေးမျက်လုံးမှာ အနည်းငယ် ကျဉ်းမြောင်းသွားသည်။

အကယ်၍ နဂါးအကြေးခွံသာ ရနိုင်မည်ဆိုပါက။

ထိုအတွေးသည် နတ်ဆိုးတစ်ကောင်ကဲ့သို့ ဖြစ်သည်။

သို့သော် ချန်းရီက ထိုအတွေးကို ချက်ချင်းပင် ဖယ်ရှားပစ်လိုက်သည်။

သူသည် ဤမျှကြီးမားသော နဂါးကြီးကို သွားရောက် ရန်စရလောက်အောင် မိုက်မဲသူ တစ်ယောက် မဟုတ်ပေ။

ဤသည်မှာ ဒဏ်ရာရနေသော ဧရာမ နဂါးနက်ကြီး တစ်ကောင် ဖြစ်သည်။

နဂါးကြီး အနီးသို့ ရောက်လာချိန်တွင် ချန်းရီက ရူးသွပ်စွာ ရေရွတ်နေသော တိုးညင်းသည့် အသံအချို့ကိုပင် ကြားလိုက်ရသည်။

ထိုအသံများသည် ဤနဂါးကြီး၏ ဝါးမျိုခြင်းကို ခံခဲ့ရပြီး ကျေနပ်မှုမရှိသော ဝိညာဉ်များ၏ အသံနှင့် တူနေသည်။

သေချာ နားထောင်ကြည့်မည် ဆိုပါက တိုးညင်းသော ဟိန်းဟောက်သံများနှင့် ငိုကြွေးသံများကိုလည်း ကြားနိုင်ပေသည်။

ထိုအသံများကို ကြားလိုက်ရရုံမျှဖြင့် ချန်းရီသည် ခေါင်းမူးပြီး အသိစိတ်များ ဝေဝါးလာသလို ခံစားလိုက်ရသည်။

သူသည် အလျင်အမြန်ပင် မိမိ၏ အကြားအာရုံကို ပိတ်ပစ်လိုက်မှသာ အနည်းငယ် သက်သာသွားတော့သည်။

ချန်းရီ၏ စိတ်ထဲတွင် စကားလုံး တစ်လုံး ပေါ်လာ၏။

"အငြိုးနဂါး"

ဤနဂါးကြီး၏ ခန္ဓာကိုယ်ပေါ်တွင် အလွန် ပြင်းထန်သော အမုန်းတရား အငြိုးအာဃာတများ စုဝေးနေသည်။

ဤနဂါးကို မည်သို့ပင် ကြည့်စေကာမူ ပုံမှန် သတ္တဝါတစ်ကောင်နှင့် လုံးဝ မတူညီပေ။

ချန်းရီသည် ရွံရှာဖွယ် သွေးရောင် ဓားအိမ်မှ သွေးကြောမျှင်များ ထွက်ပေါ်လာပြီး လေထုထဲမှ တစ်စုံတစ်ရာကို အနံ့ခံနေသကဲ့သို့ ထပ်မံ ခံစားလိုက်ရသည်။

ချန်းရီက ဖုန်းကို တင်းကျပ်စွာ ဆုပ်ကိုင်ထားပြီး သူ၏ ဘယ်ဘက်လက်မှာ အဆက်မပြတ် တသိမ့်သိမ့် တုန်ယင်နေသည်။

ဧရာမ နဂါးနက်ကြီးသည် ခန္ဓာကိုယ်ကို အနည်းငယ် ကိုင်းညွတ်လိုက်ပြီးနောက် တစ်ကိုယ်လုံး လေထဲသို့ ထပ်မံ မြောလွင့်သွားပြန်သည်။

ကမ္ဘာမြေဆွဲအားသည် ဤသတ္တဝါမျိုးအတွက် လုံးဝ အကျိုးသက်ရောက်မှု မရှိသကဲ့သို့ပင် ဖြစ်သည်။

ဧရာမ နဂါးနက်ကြီး၏ ကြီးမားလှသော ခေါင်းကြီးက ခေါင်းဆောင်ချူ၏ အဆင့်မြှင့်တင်ထားသော လမ်းကြမ်းမောင်းကားရှေ့တွင် ပေါ်လာ၏။

အဖြူရောင် မျက်လုံးကြီးက ကားပြတင်းပေါက်ရှေ့တွင် ပေါ်လာသည်။

နဂါးကြီးသည် ထိုအဖြူရောင် မျက်လုံးဖြင့် တစ်စုံတစ်ခုကို ကြည့်ရန် ကြိုးစားနေပုံရသည်။

သို့သော် အဆုံးတွင်တော့ မအောင်မြင်ခဲ့ပေ။

ထိုအဖြူရောင် မျက်လုံးကြီးသည် ကားပြတင်းပေါက်ထက် များစွာ ကြီးမားနေသော်လည်း။

နဂါးကြီးက နှာခေါင်းကို ရှုံ့လိုက်ပြီး တစ်စုံတစ်ခုကို အနံ့ခံနေပုံရသည်။

ချူချယ်သည် ကားထဲတွင် ထိုင်နေရင်း တစ်ချက်လေးမျှပင် မလှုပ်ဝံ့ဘဲ နဖူးမှ ချွေးစေးများက ပါးပြင်မှတစ်ဆင့် အင်္ကျီကော်လာပေါ်သို့ စီးကျလာသည်။

ထိုမျှသာမက ခေါင်းဆောင်ချူ၏ ကိုယ်ပေါ်ရှိ အင်္ကျီမှာလည်း နေရာအတော်များများ စိုရွှဲနေခဲ့ပြီ ဖြစ်သည်။

ကျောဘက် တစ်နေရာလုံးမှာ လုံးဝ စိုရွှဲနေပြီး အင်္ကျီသားက ကျောပြင်တွင် တင်းကျပ်စွာ ကပ်နေ၏။

အချိန် ဆယ်စက္ကန့်ကျော်လေး အတွင်းမှာပင်။

ခေါင်းဆောင်ချူ တစ်ယောက်လုံးသည် ရေထဲမှ ဆယ်ယူလာသည့်အလား ဖြစ်နေသည်။

နဂါးကြီး၏ နှာခေါင်းမှ နှာမှုတ်သံကျယ်ကြီး ထွက်ပေါ်လာပြီး ဧရာမ နဂါးခေါင်းကြီးကို ခါယမ်းကာ အခြားဘက်သို့ လှည့်သွားလေသည်။

နဂါးကြီး နောက်ထပ် ချဉ်းကပ်သွားသည့် သူမှာ ပန်းရောင်ဆံပင်နှင့် ကောင်မလေးပင် ဖြစ်သည်။

ပန်းရောင်ဆံပင်နှင့် ကောင်မလေးက မီးနဂါးဓား၏ လက်ကိုင်သည် အလွန် ပူလောင်နေကြောင်း ခံစားလိုက်ရပြီး အကြောင်းရင်းကို မသိသော်လည်း ကောင်မလေးက တုန်ယင်နေသော လက်ဖြင့် မီးနဂါးဓားကို ရှေ့သို့ မြှောက်ကိုင်ထားလိုက်သည်။

ကောင်မလေး ကိုယ်တိုင်လည်း သူမ ဘာကြောင့် ဤကဲ့သို့ လုပ်မိမှန်း မသိချေ။

ဧရာမ နဂါးနက်ကြီး၏ ကြီးမားသော နှာခေါင်းပေါက်ကြီးက မီးနဂါးဓားပေါ်တွင် ဟိုဟိုဒီဒီ အနံ့ခံလိုက်ပြီးနောက် အနံ့ဆိုး တစ်ခုခုကို ရှူမိသွားသကဲ့သို့ မျက်နှာအမူအရာမှာ အလွန် ရွံရှာဟန် ပေါ်သွား၏။

စွန်းချန်းချန်း "..."

ဧရာမ နဂါးနက်ကြီး၏ ရှည်လျားသော ခန္ဓာကိုယ်ကြီးက ရေစီးကြောင်း တစ်ခုအလား ဖြတ်သန်းသွားသည်။

နောက်ဆုံးတွင်တော့ ကမ္ဘာပျက်ကပ် ပစ်ကပ်ကားရှေ့သို့ ရောက်ရှိလာ၏။

ဧရာမ နဂါးနက်ကြီး၏ ခေါင်းသည် မမြင်ရသော်လည်း ၎င်း၏ ရှေ့တွင်ရှိနေသော အရာက အတော်လေး စိတ်ဝင်စားစရာ ကောင်းသည်ဟု အသိအမှတ်ပြုမိသွားပုံရသည်။

ဧရာမ နဂါးနက်ကြီး၏ နှာခေါင်းက ကမ္ဘာပျက်ကပ် ပစ်ကပ်ကား၏ တစ်ကိုယ်လုံး နေရာအနှံ့တွင် အားပါးတရ အနံ့ခံလေသည်။

မျက်နှာပေါ်ရှိ အမူအရာက အလွန် ဇဝေဇဝါ ဖြစ်နေ၏။

ကားကိုယ်ထည်ကို လက်လှမ်း၍ပင် ပုတ်ကြည့်သေးသည်။

ကမ္ဘာပျက်ကပ် ပစ်ကပ်ကားလေးမှာ နဂါးလက်သည်း၏ ပုတ်ခတ်မှုအောက်တွင် ဘယ်ညာ ယိမ်းထိုးနေလေသည်။

ဤကားလေးသည် နဂါးနက်ကြီး၏ ကစားစရာ တစ်ခု ဖြစ်သွားသကဲ့သို့ပင်။

ချန်းရီ၏ နဖူးပေါ်တွင်လည်း ချွေးစေးများ ပေါ်လာ၏။

"ဒီခွေးနဂါးက... တကယ်ကိုပဲ..." ဟု သူ စိတ်ထဲမှ ကြိတ်တွေးလိုက်မိသည်။

သို့သော် ဤအချိန်မှာပင် မည်သူကမျှ သတိမထားမိလိုက်သော အရာတစ်ခု ရှိနေခဲ့ပြီး ၎င်းမှာ ကမ္ဘာပျက်ကပ် ခံတပ်ကားကြီးပေါ်ရှိ အမြောက်ပြောင်း နှစ်ခုသည် ဧရာမ နဂါးနက်ကြီးဆီသို့ တိတ်တဆိတ် ချိန်ရွယ်ထားပြီး ဖြစ်နေခြင်းပင်။

အမြောက်ပြောင်းဝသည် နဂါးကြီး၏ ကျောပေါ်ရှိ ကြီးမားသော ဒဏ်ရာဆီသို့ ချိန်ရွယ်ထားလေသည်။

"ဝုန်း... ဝုန်း..."

ဆက်ရန်...