အခန်း ၂၉၁

အပိုင်း(၂၉၁) မိစ္ဆာနယ်မြေ

ရှေ့က အစွမ်းနှစ်ခုတည်းမှာတင် အပြောင်းအလဲ အမျိုးမျိုး ကိန်းအောင်းနေသည်။

အစွမ်းနှစ်ခုဟု ဆိုသော်လည်း သေချာခွဲခြမ်းစိတ်ဖြာကြည့်လျှင် အစွမ်းအမျိုးအစား အတော်များများ ပါဝင်နေပြီ ဖြစ်သည်။

ဒါက နံပါတ်စဉ် တစ်ထောင်အတွင်းမှာရှိတဲ့ သဘာဝလွန်ပစ္စည်းဆိုတာများလား။

အကယ်၍ နံပါတ်စဉ် တစ်ရာအတွင်းသာဆိုလျှင် မည်မျှတောင် ကြောက်မက်ဖွယ်ကောင်းသည့် အစွမ်းမျိုး ရှိနေမည်နည်း။

ချန်းရီက စစ်မြေပြင်တွင် မိစ္ဆာပစ်ကပ်ကား၏ စွမ်းဆောင်ရည်ကို စတင် စိတ်ကူးယဉ်ကြည့်လိုက်သည်။

အထူးသဖြင့် ထိုရေဘဝဲလက်တံများပေါ်ရှိ ရေစုပ်ခွက်များစွာနှင့် ထိုစုပ်ခွက်များအတွင်း ပြည့်နှက်နေသော သေးငယ်ချွန်ထက်သည့် သွားစွယ်များပင် ဖြစ်သည်။

ဤကဲ့သို့သော လက်တံများ၏ ရစ်ပတ်ခြင်းကို ခံရပါက လွတ်မြောက်ရန် အလွန်ခဲယဉ်းပေလိမ့်မည်။

ချန်းရီက ရင်ထဲမှ တုန်လှုပ်မှုကို အတင်းဖိနှိပ်ထားကာ တတိယမြောက် အစွမ်းကို စတင် ကြည့်ရှုလိုက်သည်။

[အစွမ်း (၃) - အရိပ်ဆွဲယူခြင်း (အဆင့်မြင့်ပုံစံ)]

[မထင်မှတ်မထားဆုံးသော ထောင့်မှနေ၍ လက်တံတစ်ချောင်း သို့မဟုတ် လက်တံများစွာကို ဆန့်ထုတ်ကာ ပစ်မှတ်ကို ကားအောက် သို့မဟုတ် ကားအတွင်းသို့ ဆွဲယူဝါးမျိုမည် ဖြစ်သည်။ ထို့နောက် ၎င်းကို ချေမွကာ ကား၏ လောင်စာအဖြစ်သို့ ပြောင်းလဲပစ်မည် ဖြစ်သည်]

ယခင်က အရိပ်ဆွဲယူခြင်းသည် သံကြိုးတစ်ချောင်း ဖြစ်ခဲ့ပြီး နောက်ပိုင်းတွင် ထိုသံကြိုး ပြတ်တောက်သွားခဲ့သဖြင့် ဤအစွမ်းမှာ အတော်လေး လျော့ကျသွားခဲ့သည်။

နောက်ပိုင်း တိုက်ပွဲများတွင်လည်း ထူးခြားပြောင်မြောက်သော စွမ်းဆောင်ရည်မျိုး မပြသနိုင်ခဲ့ချေ။

ယခုမူကား အရိပ်ဆွဲယူခြင်းသည် ရေဘဝဲလက်တံများအဖြစ် ပြောင်းလဲသွားခဲ့သော်လည်း လုပ်ဆောင်ချက်မှာ မပြောင်းလဲသေးပေ။

သို့သော် ယခင်အစွမ်းထက် အဆပေါင်းများစွာ ပိုမို အစွမ်းထက်လာမည်ဟု တွေးထင်ရသည်။

အဘယ်ကြောင့်ဆိုသော် ထိုလက်တံများသည် ပြန်လည်မွေးဖွားနိုင်သော အစွမ်း ရှိနေသောကြောင့် ဖြစ်သည်။

စဉ်းစားကြည့်ပါ... အကယ်၍ ရန်သူသည် စုပ်ခွက်များဖြင့် ပြည့်နှက်နေပြီး ထိုစုပ်ခွက်များထဲတွင် ချွန်ထက်သော သွားများ ပြည့်နေသည့် လက်တံများစွာ၏ ရစ်ပတ်မှုကို ခံရပါက လွတ်မြောက်နိုင်ခြေမှာ အဆုံးမဲ့ ကျဆင်းသွားမည် ဖြစ်သည်။

ယခင်က ပစ်မှတ်ကို ကားအောက်သို့သာ ဆွဲသွင်းနိုင်ခဲ့သည်။

ယခုမူကား ကားအတွင်းသို့ ဆွဲသွင်းလိုက်နိုင်ရုံဖြင့် လုံလောက်နေပြီ ဖြစ်သည်။

အခြေအနေ သတ်မှတ်ချက်များက ပိုမို ကျယ်ပြန့်လာပြီး စွမ်းဆောင်ရည်မှာလည်း များစွာ တိုးတက်လာခဲ့သည်။

စိတ်ကူးကြည့်ရုံဖြင့်ပင် ဤအစွမ်း၏ ကြောက်မက်ဖွယ်ကောင်းမှုကို ချန်းရီ ခံစားလိုက်ရသည်။

ဤအစွမ်းသည် မိစ္ဆာပစ်ကပ်ကား၏ အစွမ်းအားလုံးထဲတွင် အပြင်းထန်ဆုံး မဟုတ်နိုင်သော်လည်း သေချာပေါက် လူကို အကြောက်ဆုံး ဖြစ်စေမည့် အစွမ်းတစ်ခု ဖြစ်ပေသည်။

ဤကားသည် လူ သို့မဟုတ် ထူးဆန်းသောအရာများကို စားသောက်နိုင်သော ကားတစ်စီး ဖြစ်နေပြီမဟုတ်ပါလော။

ယခင်က ကန့်သတ်ချက်တချို့ ရှိခဲ့ကောင်း ရှိနိုင်သော်လည်း ယခုအခါတွင်မူ အခြေခံအားဖြင့် မည်သည့် ကန့်သတ်ချက်မျှ မရှိတော့ပေ။

ချန်းရီက နောက်ဆုံး အစွမ်းတစ်ခုကို ဆက်လက် ကြည့်ရှုလိုက်သည်။

[အစွမ်း (၄) - မိစ္ဆာနယ်မြေ]

[၎င်းသည် ခန့်မှန်း၍မရနိုင်သော အစွမ်းတစ်ခု ဖြစ်သည်။ ဤအစွမ်းကို အသုံးပြုလိုက်သည်နှင့် ပေ ၃၃၀ ပတ်လည်အတွင်း မြေပြင်မှနေ၍ စုပ်ခွက်များ ပြည့်နှက်နေသော လက်တံများ ထွက်ပေါ်လာကာ ရန်သူကို တိုက်ခိုက်မည် ဖြစ်သည်]

[ဤအစွမ်းသည် တိုက်ခိုက်ရန်အတွက်သာမက အခြားသော လုပ်ဆောင်ချက်များစွာလည်း ရှိသေးသည်]

[ဒေါသထွက်နေသည့် အခြေအနေနှင့် ရူးသွပ်နေသည့် အခြေအနေများတွင် ဤအစွမ်းမှာ နှစ်ဆ တိုးလာမည် ဖြစ်သည်]

[ထို့အပြင် ဝါးမျိုသည့် ပစ်မှတ်များ များပြားလေလေ၊ မိစ္ဆာနယ်မြေ၏ ပြင်းထန်မှုနှင့် အကျယ်အဝန်းမှာလည်း ပိုမို အားကောင်းလာပြီး ကျယ်ပြန့်လာလေလေ ဖြစ်သည်]

မိစ္ဆာပစ်ကပ်ကားကို ဗဟိုပြု၍ ပေ ၃၃၀ ပတ်လည်အတွင်း ရေဘဝဲလက်တံများစွာ ထွက်ပေါ်လာကာ ရန်သူများကို တိုက်ခိုက်နေသည့် မြင်ကွင်းတစ်ခု ချန်းရီ၏ ခေါင်းထဲတွင် ပေါ်လာသည်။

ဤအာနိသင်လေး တစ်ခုတည်းကပင် ချန်းရီကို ကြက်သီးမွေးညင်း ထသွားစေသည်။

ဤအစွမ်းက ပို၍ပင် အစွမ်းထက်လာနိုင်သေးသည်။ ဝါးမျိုခြင်းကိုသာ မရပ်တန့်လိုက်ပါက မိစ္ဆာနယ်မြေအတွင်းရှိ ပြင်းထန်မှုက ပိုမို အားကောင်းလာမည်ဖြစ်ပြီး နယ်မြေ၏ အကျယ်အဝန်းမှာလည်း ပိုမို ကျယ်ပြန့်လာမည် ဖြစ်သည်။

အရေးအကြီးဆုံးမှာ ဤလက်တံများက ပြန်လည်မွေးဖွားနိုင်စွမ်း ရှိနေခြင်းပင်တည်း။

တိုက်ခိုက်ရင်းနှင့်ပင် သွေးပြန်ဖြည့်နိုင်မည် ဖြစ်သည်။

အကယ်၍ ရန်သူသာ ဤကဲ့သို့သော နယ်မြေထဲသို့ ကျရောက်သွားပါက မည်ကဲ့သို့သော တိုက်ခိုက်မှုမျိုးကို ရင်ဆိုင်ရမည်နည်း။

လတ်တလောတွင် ဤအစွမ်း၌ ကြီးမားသော အားနည်းချက်ဟူ၍ သိပ်မရှိလှပေ။ တစ်ခုတည်းသော အားနည်းချက်မှာ နယ်မြေလွှမ်းခြုံနိုင်သည့် အကျယ်အဝန်း သေးငယ်လွန်းခြင်းပင် ဖြစ်သည်။

အနာဂတ်တွင် နယ်မြေအကျယ်အဝန်း ကျယ်ပြန့်လာသည်နှင့်အမျှ မိုင်ဆယ်ဂဏန်း ပတ်လည်အတွင်းသည် မိစ္ဆာနယ်မြေ အဖြစ်သို့ ပြောင်းလဲသွားပေလိမ့်မည်။

တွေးကြည့်လိုက်ရုံဖြင့်ပင် အနိုင်ယူရန် မဖြစ်နိုင်ဟု ချန်းရီ ခံစားလိုက်ရသည်။

ချန်းရီက လှုပ်ရှားနေသော စိတ်ခံစားချက်များကို အတင်း ဖိနှိပ်ထားလိုက်သည်။

ထို့နောက် နောက်ဆုံးအချက်များ ဖြစ်သည့် ဘေးထွက်ဆိုးကျိုးများနှင့် တားမြစ်ချက်များကို ကြည့်လိုက်သည်။

ဘေးထွက်ဆိုးကျိုးများမှာမူ ကြီးကြီးမားမား ပြောင်းလဲသွားခြင်း မရှိပေ။ လစဉ် အသက်ရှင်နေသော သတ္တဝါကို ပူဇော်သက္ကာ ပြုလုပ်ရန် လိုအပ်သည်။

သို့သော် ဤဆိုးကျိုးကို သူကိုယ်တိုင်ကတော့ ကာကွယ်ထားနိုင်သည်။

တားမြစ်ချက်များတွင်မူ အပြောင်းအလဲ အချို့ ရှိလာခဲ့သည်။

[တားမြစ်ချက် (၁) - ပိုင်ရှင်၏ ခွင့်ပြုချက် မရရှိဘဲ မိစ္ဆာပစ်ကပ်ကား အနီးသို့ ချဉ်းကပ်ခြင်း သို့မဟုတ် ကားအတွင်းသို့ ဝင်ရောက်ခြင်းများ မပြုလုပ်ရ။ သို့မဟုတ်ပါက ကြောက်မက်ဖွယ်ကောင်းသော ကိစ္စရပ်များ ဖြစ်ပေါ်လာမည်]

[တားမြစ်ချက် (၂) - အလွန် ရက်စက်ကြမ်းကြုတ်သော တိုက်ပွဲများ ဖြစ်ပွားလာပါက မိစ္ဆာပစ်ကပ်ကားသည် သစ္စာဖောက်ကာ ထွက်ပြေးနိုင်သည့် အခြေအနေ ရှိသည်]

ယခင်ကမူ ကားအတွင်း၌ ဒဏ်ရာမရစေရ၊ ကားအတွင်း၌ အစားအစာ မစားရ ဟူ၍ ဖြစ်သည်။

ယခုအခါတွင်မူ ပိုင်ရှင်၏ ခွင့်ပြုချက် မရှိဘဲ ဟူသော အချက်အဖြစ်သို့ ပြောင်းလဲသွားခဲ့ပြီ ဖြစ်သည်။

အခြားသော သတ်မှတ်ချက်များမှာမူ များစွာ ပြောင်းလဲသွားခြင်း မရှိပေ။

ချန်းရီ၏ သီးသန့် နိုးကြားမှု လက္ခဏာရပ်မှာလည်း ယခင်အတိုင်းပင် ဖြစ်သည်။

ချန်းရီက ကမ္ဘာပျက်ကပ် ပစ်ကပ်ကား... မဟုတ်ဘူး... မိစ္ဆာပစ်ကပ်ကား၏ စတီယာရင်ကို ပွတ်သပ်လိုက်သည်။

သူ၏ နှုတ်ခမ်းထောင့်များက မနေနိုင်ဘဲ ကွေးတက်သွားသည်။

ယခုအချိန်တွင် ထိုလူဝကြီးက ကမ္ဘာပျက်ကပ် ခံတပ်ကားကြီးနှင့် လာရောက် လဲလှယ်မည် ဆိုလျှင်ပင် သူ သဘောတူမည် မဟုတ်တော့ပေ။

ကမ္ဘာပျက်ကပ် ခံတပ်ကားကြီးသည် မည်မျှပင် မိုက်နေပါစေ၊ အလွန်ဆုံး လိပ်အခွံကြီး တစ်ခုမျှသာ ဖြစ်ပေမည်။

သို့သော် သူ့ရှေ့မှ မိစ္ဆာပစ်ကပ်ကားသည်ကား လုံးဝကို ကွဲပြားခြားနားနေခဲ့ပြီ ဖြစ်သည်။

ဒါက ထူးဆန်းတဲ့ သဘာဝလွန်ပစ္စည်းပဲ။

၎င်းသည် နံပါတ်စဉ် တစ်ထောင်အတွင်း ပါဝင်သော သဘာဝလွန်ပစ္စည်း တစ်ခုပင် ဖြစ်သည်။

တကယ့် လက်တွေ့ တိုက်ပွဲမျိုး မရှိသေးလျှင်တောင်မှ ဤအရာက သာမန်မဟုတ်ကြောင်း ချန်းရီ သိထားပြီး ဖြစ်သည်။

ကား၏ အတွင်းပိုင်း အလှဆင်မှုများနှင့် အပြင်ဘက် ပုံပန်းသွင်ပြင်တို့မှာ မည်သည့် ပြောင်းလဲမှုမျှ မရှိပေ။

သို့သော် ဤကားသည် လုံးဝကို ကွဲပြားခြားနားသွားပြီဆိုတာကို ချန်းရီ သိထားသည်။

အစပိုင်းတုန်းက စက်ဘီးအိုကြီး တစ်စီးသည် ဤကဲ့သို့သော အခြေအနေမျိုးသို့ ရောက်လာမည်ဟု မည်သူက ထင်မှတ်ထားခဲ့မည်နည်း။

အကယ်၍ မိမိကိုယ်တိုင်သာ ချန်းရီ မဟုတ်ခဲ့ပါက ဤမိစ္ဆာပစ်ကပ်ကားကို အသုံးပြုလိုလျှင် သေချာပေါက် ကြီးမားလှသော ပေးဆပ်မှုမျိုးကို လုပ်ဆောင်ရပေလိမ့်မည်။

လစဉ် အသက်ရှင်သော သတ္တဝါကို ပူဇော်သက္ကာ ပြုလုပ်ရမည်ဟူသော အချက် တစ်ခုတည်းကပင် လူကို အလွန် ကြောက်ရွံ့သွားစေရန် လုံလောက်နေပြီ ဖြစ်သည်။

စောစောက မျက်လုံး ဖွင့်ကြည့်လိုက်ချိန်တွင် မြင်တွေ့ခဲ့ရသော မြောက်မြားလှသည့် လက်တံကြီးများလည်း ပါသေးသည်။

အချိန်ရနေသေးခိုက်တွင် ချန်းရီက အစွမ်း (၁) ၏ လမ်းညွှန်ချက်အတိုင်း ကားကိုယ်ထည်၏ အစိတ်အပိုင်း တစ်ခုကို အဆင့်မြှင့်တင်ရန် ရည်ရွယ်လိုက်သည်။

မူလက ဤကား၏ မှန်များကို အဆင့်မြှင့်တင်ရန် စဉ်းစားထားခဲ့ခြင်း ဖြစ်သည်။

ကားမှန်များက မကြာခဏ ကွဲအက်ပျက်စီးတတ်ပြီး တောတောင်ထဲတွင် အစားထိုးစရာ အပိုပစ္စည်း ရှာတွေ့ရန်မှာ လွယ်ကူသော ကိစ္စတစ်ခု မဟုတ်သောကြောင့် ဖြစ်သည်။

ယခုအချိန်တွင်ပင် ရှေ့လေကာမှန်နှင့် ဘေးဘက် မှန်များ၌ ပင့်ကူအိမ်ကဲ့သို့ အက်ကွဲကြောင်းများ ဖြစ်ပေါ်နေပြီး အချိန်မရွေး ကြေမွသွားနိုင်မည့် ပုံပေါ်နေသည်။

သို့သော် ချန်းရီ ဆယ်မိနစ်ခန့် စဉ်းစားပြီးနောက်...

ပိုလျှံနေသော သဘာဝလွန်အစွမ်းများကို ဤကား၏ အင်ဂျင်ကို အဆင့်မြှင့်တင်ရာတွင် အသုံးပြုရန် ချန်းရီ ဆုံးဖြတ်လိုက်သည်။

၎င်းမှာ မူလကတည်းက တပ်ဆင်ထားသော ၂.၀ အင်ဂျင် ဖြစ်သည်။

ပုံမှန် အခြေအနေများတွင်တော့ လုံလောက်မှု ရှိပေသည်။

သို့သော် အရေးပေါ် အထူးအခြေအနေမျိုးနှင့် ရင်ဆိုင်ရပါက ဤမျှလောက် စွမ်းအင်လေးဖြင့် အနည်းငယ် လိုအပ်ချက် ရှိနေမည် ဖြစ်သည်။

ချန်းရီက အတည်ပြုလိုက်ပြီးနောက်...

ကားလေးသည် သိမ်မွေ့စွာ တုန်ခါသွားသည်ကို ချန်းရီ အထင်အရှား ခံစားလိုက်ရသည်။

သူ ကားပေါ်မှ ဆင်းကာ ရှေ့အင်ဂျင်ခန်း အဖုံးကို ဖွင့်ကြည့်လိုက်သည်။

မူလက စနစ်မှ တပ်ဆင်ပေးထားသော အင်ဂျင်နေရာတွင် ထိုအင်ဂျင်သည် သွေးသားများစွာ ထွက်ပေါ်လာနေသည်ကို ချန်းရီ တွေ့လိုက်ရသည်။

သူ့ရှေ့မှ ဤအင်ဂျင်သည် စက်ယန္တရားနှင့် သွေးသားများ ပေါင်းစပ်ထားသော ရလဒ်တစ်ခု အဖြစ်သို့ အံ့သြဖွယ် ပြောင်းလဲသွားခဲ့ပြီ ဖြစ်သည်။

အင်ဂျင်၏ အစိတ်အပိုင်း အတော်များများသည် သွေးကြောများနှင့် အနီရောင် အသားစိုင်များအဖြစ် ပြောင်းလဲသွားခဲ့ပြီး ထိုသွေးကြောများနှင့် အနီရောင် အသားစိုင်များက နှလုံးသားတစ်ခုကဲ့သို့ ခုန်လှုပ်နေသည်ကို ချန်းရီ မြင်တွေ့လိုက်ရသည်။

ချန်းရီမှာ ကြက်သေသေသွားပြီး "ဒီလိုတောင် လုပ်လို့ရတာလား" ဟု တွေးလိုက်မိသည်။

အကယ်၍ ကမ္ဘာပျက်ကပ် မတိုင်မီကသာ ဆိုလျှင် ဤကဲ့သို့သော ကိစ္စမျိုးသည် တစ်ကမ္ဘာလုံး အတိုင်းအတာဖြင့် သတင်းကြီး တစ်ပုဒ် သေချာပေါက် ဖြစ်လာပေလိမ့်မည်။

သို့သော် ယခုအချိန်တွင်မူ...

ချန်းရီက အင်ဂျင်ခန်း အဖုံးကို တိတ်တဆိတ် ပြန်ပိတ်လိုက်ကာ ဆေးလိပ်တစ်လိပ်ကို မီးညှိလိုက်ပြီး ရင်ထဲမှ စိတ်လှုပ်ရှားမှုများကို ပြေလျော့သွားစေရန် လေကို ဝဝရှူသွင်းလိုက်သည်။

ချန်းရီ၏ ကောင်းမွန်နေသော စိတ်ခံစားချက်နှင့် နှိုင်းယှဉ်လျှင်...

ခေါင်းဆောင်ချူမှာမူ အနည်းနှင့်အများ ဆိုသလို စိုးရိမ်ပူပန်နေရပြီ ဖြစ်သည်။

ယခုအချိန်တွင် ခေါင်းဆောင်ချူသည် ကားဘယ်တော့ ရနိုင်မည်နည်းဟု ချန်ဟောင်အား တစ်နေ့လျှင် အခါရှစ်ရာခန့် မေးချင်စိတ် ပေါက်နေသည်။

ချန်ဟောင်လည်း ခေါင်းဆောင်ချူ၏ မေးမြန်းမှုများကြောင့် စိတ်ပိုင်းဆိုင်ရာ ဖိအားများ အလွန် ကြီးမားနေကာ အကောင်းဆုံး ကြိုးစားပေးမည်ဟုသာ ပြန်လည် ဖြေကြားနိုင်တော့သည်။

မူလက ယနေ့တွင် ထွက်ခွာရန် ရည်ရွယ်ထားခဲ့ခြင်း ဖြစ်သည်။

ခေါင်းဆောင်ချူက ထိုအသက်ရှင်ကျန်ရစ်သူများ၊ ကမ္ဘာပျက်ကပ် ခံတပ်ကားကြီးမှ လူများနှင့် ယာဉ်တန်းတွင် မူလကတည်းက ရှိနေသူများကို ကြည့်လိုက်သည်။

ယာဉ်တန်းတစ်ခုလုံးတွင် လူဦးရေ နှစ်ရာနီးပါးခန့် ရှိနေသည်။

လူဒီလောက် အများကြီးကို သွားလာရေး ယာဉ် မရှိဘဲ ရွှေ့ပြောင်းရန်မှာ...

လုံးဝကို ခဲယဉ်းလွန်းလှသည်။

အစောပိုင်း ကာလများကဆိုလျှင် ယာဉ်တန်းထဲတွင် သုံးဘီးဆိုင်ကယ်များ၊ ဆိုင်ကယ်များနှင့် စက်ဘီးကြီးများပင် မနည်းမနော ရှိခဲ့သေးသည်။

သွားလာရေးအတွက် အသုံးပြုသော ယာဉ်အမျိုးအစားများမှာလည်း စုံလင်လှသည်။

ယခုအခါတွင်မူ...

ကားပေါ် မတက်နိုင်သူများ အားလုံးကို ယာဉ်တန်းနောက်မှ ခြေလျင် လိုက်ပါစေရမည်လား။

လူအနည်းငယ် ဆိုလျှင်တော့ တော်သေးသည်။

အဆိုးဆုံး အနေဖြင့် "အိမ်မြောင်အမြီး" အနည်းငယ် ပိုများလာရုံသာ ရှိမည်။

သို့သော် ယခုအခါ လူဦးရေက အရမ်းများလွန်းနေသည်။

ထိုသို့ လုပ်ဆောင်ရန်မှာ လက်တွေ့ မကျပေ။

ခေါင်းဆောင်ချူသည် အချိန်အတော်ကြာ တုံ့ဆိုင်းနေပြီးနောက် နောက်ဆုံးတွင် ခက်ခဲသော ဆုံးဖြတ်ချက် တစ်ခုကို ချမှတ်လိုက်သည်။

ယာဉ်တန်းကို ဤနေရာ၌ နောက်ထပ် တစ်ည အနားယူစေပြီး မနက်ဖြန်မှသာ ဆက်လက် ထွက်ခွာတော့မည် ဖြစ်သည်။

ဆက်ရန်...