အခန်း (၂၄၃-၂၄၄)

Chapter 243

အမျိုးသမီးရုပ်အလောင်း ပျံသန်းထွက်ခွာသွားသည်နှင့် အပြင်ဘက်ရှိ လူအများအပြားသည်လည်း သူမ၏နောက်သို့ အလျင်အမြန်လိုက်လံစုံစမ်းကြတော့သည်။

ဝမ်ရှန်း၏ မိသားစုနှင့် မုဝမ်ရွှမ်းတို့ကိုမူ အထူးစစ်ဆင်ရေးတပ်ဖွဲ့၏ အကာအကွယ်အောက်တွင် ထားရှိလိုက်သည်။ ၎င်းတို့ကို ညတွင်းချင်းရွှေ့ပြောင်းပေးရန် တောင်းဆိုသော်လည်း မုဝမ်ရွှမ်းမှာ ဉာဏ်အလင်းဆင်ခြင်သည့် အခြေအနေသို့ရောက်ရှိနေပြီး ဝမ်ရှန်း၏ မိခင်မှာလည်း အနားယူနေကာ ဖခင်ဖြစ်သူမှာလည်း ချက်ချင်းအဖြေမပေးနိုင်သေးပေ။

ဝမ်ရှန်း၏ မိဘများအတွက်မူ ယခုအချိန်၌ ထွက်ခွာသွားခြင်းသည် ၎င်းတို့၏ လက်ရှိလူနေမှုဘဝကို စွန့်လွှတ်ရခြင်း၊ ရင်းနှီးပြီးသားလူမှုပတ်ဝန်းကျင်နှင့် အလုပ်အကိုင်များကိုစွန့်ပယ်ကာ လုံးဝစိမ်းသက်သောနေရာသစ်တစ်ခုသို့ ပြောင်းရွှေ့ရခြင်းကို ဆိုလိုခြင်းဖြစ်သည်။ အာဏာပိုင်များအနေဖြင့် ဝမ်ရှန်းကြောင့် ၎င်းတို့ကို ကောင်းမွန်စွာဆက်ဆံမည်မှာ သေချာသော်လည်း ဤကဲ့သို့သော ဆုံးဖြတ်ချက်ကို ရုတ်တရက်ချမှတ်ရန်မှာမူ ၎င်းတို့အတွက် ခက်ခဲနေဆဲပင်။

ဘယ်လိုပဲဖြစ်ဖြစ် ၎င်းတို့အနေဖြင့် ဤတိုက်ခန်းအသစ်တွင် ဆက်နေ၍ မရတော့ပေ။ နှစ်သစ်ကူးပထမဆုံးနေ့၌ ဖြစ်ပွားခဲ့သော ဤရုန်းရင်းဆန်ခတ်မှုသည် ကျင့်ကြံခြင်းလောကမှ ထူးဆန်းသောဖြစ်တည်မှုအမျိုးမျိုးကို ဤနေရာသို့ လွယ်ကူစွာ ရောက်ရှိလာစေလိမ့်မည်။ လမ်းမှန်ကျင့်ကြံသူတစ်ဦးက ယဉ်ကျေးပျူငှာစွာ မေးမြန်းခြင်းမျိုးဆိုလျှင် လက်ခံနိုင်သော်လည်း အကယ်၍ ညှဉ်းပန်းနှိပ်စက်ပြီး အကျပ်ကိုင်တတ်သည့် ရက်စက်ကြမ်းကြုတ်သော မိစ္ဆာကျင့်ကြံသူတစ်ဦးနှင့် တွေ့ဆုံရပါက...

အမျိုးသမီးရုပ်အလောင်းသည် ၎င်းတို့ထံ ရုတ်တရက် ရောက်ရှိလာလိမ့်မည်ဟု မည်သူမျှ မမျှော်လင့်ထားခဲ့ကြချေ။ သာမန်ဇနီးမောင်နှံနှစ်ဦး၏ အေးချမ်းသော လူနေမှုဘဝသည် ဤကဲ့သို့သော ကြီးမားသည့်တုန်လှုပ်မှုကို မခံနိုင်တော့ပေ။

ဝမ်ရှန်းသည်လည်း ဤကိစ္စနှင့် ပတ်သက်၍ သူ၏သဘောထားကို ဖော်ပြခဲ့သည်၊၊ သူသည် မိဘများကို အခြားမြို့တစ်မြို့သို့ ပြောင်းရွှေ့စေကာ ပတ်ဝန်းကျင်ကို ပြောင်းလဲပြီး အေးချမ်းသောလူနေမှုဘဝကို ဆက်လက်ဖြတ်သန်းစေလိုသည်။

သူ၏ဖခင်က သက်ပြင်းချလိုက်သည်။ သိသာစွာတွန့်ဆုတ်နေသော်လည်း “ရှန်းလေး… မင်းက ကျင့်ကြံခြင်းမှာပဲ အာရုံစိုက်ပါ။ မင်းအမေနဲ့ ငါက မင်းကို ဝန်ထုပ်ဝန်ပိုးဖြစ်စေမှာမဟုတ်ဘူး။ ဒါပေမဲ့ ဒီကိစ္စကို မင်းအမေနဲ့ အရင်တိုင်ပင်ရဦးမယ်”

“ဟုတ်ကဲ့” ဝမ်ရှန်းက လေသံတိုးတိုးဖြင့် ပြန်ပြောလိုက်သည်။

“မနေ့ညက ပေါ်လာတဲ့ အဲဒီအမျိုးသမီးအင်မော်တယ်က...”

ဝမ်ရှန်း၏ ဖခင်က လက်ကာပြလိုက်သည်။

“အဲဒီအကြောင်းတွေကို ငါတို့ကို ပြောပြဖို့ မလိုပါဘူး။ ငါတို့က အဲဒီလောကနဲ့ မသက်ဆိုင်တဲ့သူတွေဆိုတော့ ဝင်မပတ်သက်ချင်ဘူး။ ငါတို့အတွက်တော့ သာမန်ဥပဒေလိုက်နာတဲ့ နိုင်ငံသားတွေအဖြစ်နေရတာပဲ ကောင်းပါတယ်”

ဝမ်ရှန်းလည်း လုံးဝပြောစရာမဲ့သွားခဲ့သည်။

အထူးစစ်ဆင်ရေးတပ်ဖွဲ့နှင့် အထူးစုံစမ်းစစ်ဆေးရေးအဖွဲ့တို့သည် မုဝမ်ရွှမ်း တရားထိုင်ခြင်းပြီးဆုံးသည်ကို စောင့်ဆိုင်းရန်အတွက် တိုက်ခန်းကို ယာယီသာလုံခြုံရေးယူထားနိုင်သည်။

မုရွှယ်က မိုးမလင်းမီမှာပင် ဝမ်ရှန်း၏ အိမ်သို့ ရောက်ရှိလာခဲ့သည်။ သူမသည် ယခုအခါ ဝမ်ရှန်း၏ မိဘများပြောင်းရွှေ့ခြင်းကိစ္စကို တာဝန်ယူရရုံသာမက အမျိုးသမီးရုပ်အလောင်းနှင့် ဝမ်ရှန်းတို့၏ ဆက်သွယ်မှုအကြောင်းကို အသေးစိတ်မေးမြန်းရန်လည်း ရောက်ရှိလာခြင်း ဖြစ်သည်။

သူမ ရောက်ရှိလာခြင်းကြောင့် ဝမ်ရှန်းလည်း နောက်ဆုံးရသတင်းများကို စိတ်ချရသော အရင်းအမြစ်တစ်ခုမှ ရရှိခဲ့သည်။ မုရွှယ်က သူမ၏ သစ္စာရှိမှုအတိုင်း သူမ၏ အဆင့်မြင့်လုပ်ပိုင်ခွင့်ကို အသုံးပြုကာ အချိန်နဲ့တစ်ပြေးညီသတင်းအချက်အလက်များကို ဆက်တိုက်ရယူပေးခဲ့သည်။

ဝမ်ရှန်း၏ အိမ်မှ ထွက်ခွာသွားပြီးနောက် အမျိုးသမီးရုပ်အလောင်းသည် အရှေ့ပင်လယ်ဆီသို့ ပျံသန်းသွားခဲ့သည်။ ထို့နောက် သူမသည် ထိုဧရိယာကို ခဏမျှ စူးစမ်းရှာဖွေခဲ့သည်။ မည်သည့်အရာမျှ ရှာမတွေ့သဖြင့် သူမသည် လှည့်ပြန်ကာ အနောက်ဘက်သို့ အလျင်အမြန်ပျံသန်းသွားခဲ့သည်။

မျက်မြင်သက်သေအရေအတွက်မှာ လျင်မြန်စွာ တိုးပွားလာခဲ့ပြီး လမ်းမှန်ကျင့်ကြံသူများနှင့် မိစ္ဆာကျင့်ကြံသူများက ပို၍ဆွဲဆောင်ခြင်းခံခဲ့ရသည်။ ၎င်းတို့အကြားတွင် ရှုပ်ထွေးသော တိုက်ပွဲအချို့ပင်ဖြစ်ပွားခဲ့သည်။

လတ်တလောတွင် ထိုအရာများက ဝမ်ရှန်းနှင့် မသက်ဆိုင်သေးပေ။

မုဝမ်ရွှမ်းက ဧည့်ခန်းထဲတွင် တရားထိုင်နေပြီး ဝမ်ရှန်းနှင့် မုရွှယ်တို့မှာမူ ဆိုဖာ၏ ထောင့်တစ်နေရာတွင် ထိုင်ကာ တီးတိုးစကားပြောနေကြသည်။

ဝမ်ရှန်း၏ ဖခင်က အတော်လေးအလိုက်သိလှသည်။ သူသည် စင်္ကြံလမ်းနှင့် ရှေ့တံခါးတွင် စောင့်ကြပ်နေသည့် အထူးစစ်ဆင်ရေးတပ်ဖွဲ့ဝင်များထံသို့ ရေသန့်ဘူးများ၊ ပေါင်မုန့်များနှင့် သူ၏စီနီယာအစ်မ အကြိုက်ဆုံးမုန့်အချို့ကို သွားရောက်ပေးအပ်ခဲ့သည်။ ထို့နောက် ဝမ်ရှန်းကို ဧည့်သည်ကို ကောင်းကောင်းဧည့်ခံရန် ပြောပြီး ဇနီးဖြစ်သူနိုးလာသည်ကို စောင့်ဆိုင်းရန် အခန်းထဲသို့ ပြန်ဝင်သွားခဲ့သည်။

ညလုံးပေါက်ခရီးသွားခဲ့ရသဖြင့် မုရွှယ်မှာ အနည်းငယ် ပင်ပန်းနေပုံရသည်။ သူမက လေသံကို လျှော့ကာ မေးလိုက်သည်၊၊

“တာအိုဆရာဝမ် အဲဒီအမျိုးသမီးအင်မော်တယ်က ဘယ်ကိုပျံသန်းသွားမယ်လို့ ထင်လဲ”

ယခုအချိန်တွင် ၎င်းတို့သည် အမျိုးသမီးရုပ်အလောင်း၏ ရည်ရွယ်ချက်ကို ရဲရဲဝံ့ဝံ့မခန့်မှန်းနိုင်ကြတော့ပေ။

ဝမ်ရှန်းသည် တက်ဘလက်ပေါ်တွင် ပြသထားသည့် အနီရောင်လမ်းကြောင်းကို စိုက်ကြည့်ရင်း ၎င်းဖြတ်သန်းသွားသော နေရာများကို ဆက်တိုက်ချဲ့ကြည့်နေခဲ့သည်။ သူသည် အနောက်ဘက်အကျဆုံး တိဗက်ကုန်းပြင်မြင့်မှ အရှေ့ဘက်သို့ ဖြည်းဖြည်းချင်းရှာဖွေခဲ့သည်။

မကြာမီမှာပင် သူသည် ရှုဓားဂိုဏ်းအနီးရှိ နေရာတစ်ခုကို ညွှန်ပြလိုက်သည်။

ရှေးဟောင်းယို့တူး၊၊ ဖုန့်တူးတောင်။

“တာအိုဆရာဝမ် အဲဒါကခရီးသွားနေရာတစ်ခုသက်သက်ပဲလေ၊၊ အဲဒီမှာဘာတာအိုအမွေအနှစ်မှ ကျန်ခဲ့တာမရှိဘူး၊၊ အဖွဲ့အစည်းမရှိတဲ့ ကျင့်ကြံသူအချို့ပဲ ရှိတာ...”

မုရွှယ်က တီးတိုးရှင်းပြခဲ့သည်။

“အဲဒီအင်မော်တယ်က သူမမှာ အချိန်အများကြီးမရှိတော့ဘူးလို့ ပြောခဲ့တယ်—သူမက ဝိညာဉ်အကြွင်းအကျန်ပဲတဲ့။ သူမက မျှော်လင့်ချက်အနည်းငယ်ကျန်သေးလားဆိုတာသိဖို့ သံသရာထဲဝင်မယ့်နေရာကို သွားရှာနေတာ”

ဝမ်ရှန်းက သူ၏ စီနီယာအစ်မကို မနှောင့်ယှက်မိစေရန် စိတ်ချင်းဆက်သွယ်၍ ပြောခဲ့သည်။

“သူမက အဲဒီဘက်ကို တန်းတန်းမတ်မတ်ပျံသန်းသွားတာဆိုရင်တော့ ဤနေရာက သူမသွားမယ့်နေရာဖြစ်ဖို့ချေများတယ်”

မုရွှယ်လည်း ဝမ်ရှန်းကို အံ့အားသင့်စွာ ကြည့်လိုက်သည်။ အတော်လေးဆန်းကြယ်လှသည်ဟု ထင်ရသော်လည်း သူမက ခေါင်းညိတ်လိုက်သည်။

“ဒါကို ကပ္ပတိန်ဆီ ချက်ချင်းအစီရင်ခံလိုက်မယ်”

ဝမ်ရှန်းသည် ဖုန့်တူးတောင်အကြောင်း သတင်းအချက်အလက်များကို အွန်လိုင်းတွင် ရှာဖွေလိုက်သည်။ စာမျက်နှာကို ဖွင့်၍ပင် မပြီးသေးမီ မုရွှယ်က ပြန်ဝင်လာပြီး သူ့ကို လက်မထောင်ပြခဲ့သည်။

“ပင်ပန်းရင် အိပ်ခန်းထဲမှာ သွားအိပ်လေ”

ဝမ်ရှန်းက သူနှင့် စီနီယာအစ်မ အတူသုံးသည့် အခန်းဘက်သို့ ညွှန်ပြရင်း ကမ်းလှမ်းလိုက်သည်။ ထို့နောက် စီနီယာအစ်မကို တစ်ချက်ကြည့်လိုက်သည်၊၊

“သူမရဲ့ ဉာဏ်အလင်းပွင့်မှုက အချိန်အတော်ကြာဦးမှာပဲ။ အဲဒီအင်မော်တယ်က သူမကို အချိန်ယူပြီးချေဖျက်ရမယ့်လမ်းညွှန်မှုအချို့ပေးခဲ့တယ်လေ”

ဝမ်ရှန်းက စိတ်ချင်းဆက်သွယ်၍ ပြောလိုက်သည်။

မုရွှယ်က မျက်တောင်ခတ်လိုက်ပြီး သူမ၏အိတ်ထဲမှ ပုလင်းအသေးလေးတစ်လုံးကို ထုတ်ကာ ဆေးလုံးလေးတစ်လုံးကို လက်ဖဝါးထဲလောင်းထည့်လိုက်သည်။ သူမ ခေါင်းကို နောက်သို့မော့ကာ ၎င်းကို မျိုချလိုက်ပြီးနောက် သူမ၏ ကြွက်သားများကို ပြသသည့်အလား လက်မောင်းကို ကွေးပြလိုက်သည်။ သူမ၏ ရုံးဝတ်စုံနှင့်ဆိုလျှင် အတော်ပင် ရယ်စရာကောင်းနေပြီး သူမ၏ သွယ်လျသော လက်မောင်းများသည် တစ်ချက်တို့ရုံနှင့် ကျိုးသွားမည့်အလား ထင်ရသည်။

မုရွှယ်က မုဝမ်ရွှမ်းကို တစ်ချက်ကြည့်ကာ သူမ၏ဖုန်းကို ညွှန်ပြပြီး ဝမ်ရှန်းထံသို့ မက်ဆေ့ခ်ျတစ်ခု ပေးပို့ခဲ့သည်။

မုရွှယ် - “ဆေးတစ်လုံးက စိတ်ကို ကြည်လင်စေတယ်၊ နှစ်လုံးက အောင်နိုင်သူလို့ ခံရစေတယ်၊၊ သုံးလုံးကတော့ ထာဝရအသက်ကို ပေးစွမ်းနိုင်တယ်၊၊ ဘေးထွက်ဆိုးကျိုးလုံးဝမရှိဘူး”

ဝမ်ရှန်းလည်း ဘေးထွက်ဆိုးကျိုးမရှိလျှင်ပင် ဆေးလုံးများကို ဤကဲ့သို့ ပေါ့ပေါ့ဆဆမသောက်သုံးသင့်ကြောင်း သူမကို သတိပေးချင်မိသည်။ သူ၏ ပြင်းထန်သောကျင့်ကြံခြင်းအတွင်း တာအိုခန္ဓာကိုယ်မှ အညစ်အကြေးများကို ရှင်းထုတ်ခဲ့ရသကဲ့သို့ ဆေးလုံးများသည် ခန္ဓာကိုယ်အတွင်း၌ အနည်အနှစ်အချို့ အမြဲချန်ထားခဲ့တတ်သည်။

မုရွှယ်က ကျင့်ကြံသူတစ်ဦးမဟုတ်သည်ကို သတိရသွားသဖြင့် သူလည်း မပြောတော့ပေ၊၊

မုရွှယ်က ဝမ်ရှန်း၏အနားတွင် စိတ်အေးလက်အေးရှိလှသည်။ ဘာပဲဖြစ်ဖြစ် ၎င်းတို့နှစ်ဦးသိကျွမ်းခဲ့ကြသည်မှာ ကြာပြီဖြစ်သည်၊၊ ဝမ်ရှန်း တောင်ပေါ်မှ ပထမဆုံးအကြိမ်ဆင်းလာကတည်းက ၎င်းတို့နှစ်ဦး အတူအလုပ်လုပ်ခဲ့ကြခြင်း ဖြစ်သည်။

မကြာမီမှာပင် သူမသည် ဒေါက်ဖိနပ်များကို ချွတ်လိုက်ပြီး ဆိုဖာပေါ်တွင် ခေါင်းအုံးတစ်လုံးကို ပွေ့ဖက်ကာ ကွေးကွေးလေးထိုင်ရင်း ဝမ်ရှန်းနှင့် မက်ဆေ့ခ်ျအပြန်အလှန်ရိုက်နေခဲ့သည်။

အမျိုးသမီးရုပ်အလောင်းနှင့် အချိန်အတော်ကြာ အတူရှိနေခဲ့ပြီးနောက် သူနှင့် မုဝမ်ရွှမ်းသည် အဓိကရှေးဟောင်းပစ္စည်းအဆင့် သုတေသနပြုစရာများ ဖြစ်လာခဲ့ကြသည်။

ဝမ်ရှန်းက အမျိုးသမီးရုပ်အလောင်းနှင့်ပြောခဲ့သော စကားဝိုင်းအကြောင်းအရာများကို စာရွက်စာတမ်းအဖြစ်ပြုစုပေးမည်ဟု အစပျိုးပြောကြားခဲ့သည်။ ထိုသို့ပြုလုပ်ခြင်းဖြင့် သူနှင့် သူ၏ စီနီယာအစ်မသည် စပ်စုလွန်းအားကြီးသော သုတေသီများ၏ ဝန်းရံမေးမြန်းခြင်းကို ရှောင်ရှားနိုင်မည်ဖြစ်သည်။

ထို့နောက် မုရွှယ်က ဝမ်ရှန်း၏ မိဘများအတွက် အစီအစဉ်များကို စတင်ဆွေးနွေးခဲ့သည်။ ၎င်းတို့အားလုံးမှာ အတွင်းလူများဖြစ်ကြသဖြင့် ဝမ်ရှန်း၏ မိဘများကို အနည်းငယ်ကူညီပေးခြင်းနှင့် အထူးဂရုစိုက်ပေးခြင်းတို့က မည်သည့်မေးခွန်းမျှ ထွက်ပေါ်လာစေမည် မဟုတ်ပေ။

ဝမ်ရှန်းက တွေးမိသော်လည်း မိဘများအတွက် သူကိုယ်တိုင်ဆုံးဖြတ်မပေးရန် ဆုံးဖြတ်ခဲ့သည်။ သူက မုရွှယ်ကို ၎င်းတို့နှင့် နောက်မှ ဆွေးနွေးရန်ပြောကြားခဲ့သည်။

၎င်းတို့နှစ်ဦးသည် အမျိုးသမီးရုပ်အလောင်းအကြောင်းကို ခဏမျှစကားပြောခဲ့ကြသော်လည်း ဝမ်ရှန်းသည် စီနီယာအစ်မနှင့်ပတ်သက်သည့် ဘာကိုမျှ မပြောမိအောင် သတိထားခဲ့သည်။ ထို့ပြင် သူသည် စကားဝိုင်းကို ပြန်လည်ဝင်စားခြင်းလမ်းကြောင်းသို့ပြောင်းခဲ့သည်။

မုရွှယ်က မမေးဘဲ မနေနိုင်ခဲ့ပေ၊၊

“လူတွေက သေပြီးရင် တကယ်ပဲ ပြန်လည်ဝင်စားကြတာလား”

ဝမ်ရှန်းက တိုက်ရိုက်အဖြေမပေးနိုင်ခဲ့ပေ။ သူသည် ငြိမ်သက်စွာထိုင်ရင်း နက်နက်နဲနဲတွေးတောနေခဲ့သည်။

လီအိမ်တော်၌ တစ္ဆေနှင်စဉ်က သူ၏ ဝိညာဉ်အသိစိတ်သည် လေလွင့်ဝိညာဉ်များကို အာရုံခံနိုင်ခဲ့ပြီ ဖြစ်သည်။ ထိုအရာများမှာ အသက်ရှင်နေသူများ သို့မဟုတ် သေဆုံးသွားသူများထံမှ သန့်စင်ထားသော ဝိညာဉ်များဖြစ်ကြသည်။ သို့မဟုတ်ပါက သာမန်လူတစ်ယောက်၏ ဝိညာဉ်သည် သေဆုံးပြီးနောက် မကြာမီမှာပင် ပျက်ပြယ်သွားတတ်သည်။

သို့သော်လည်း အမျိုးသမီးရုပ်အလောင်းက သံသရာလည်ခြင်းအကြောင်းကို အကြိမ်အတော်များများပြောခဲ့ပြီး မုဝမ်ရွှမ်းမှာလည်း အတိတ်ကာလက အစွမ်းထက်သော အင်မော်တယ်တစ်ပါး၏ ပြန်လည်ဝင်စားသူဖြစ်ပုံရသည်။ သူကိုယ်တိုင်မှာမူ လုံးဝရှင်းပြ၍မရသော အချိန်ပြန်ဆုတ်သွားခြင်းကို ကြုံတွေ့ခဲ့ရသည်။

ခဏမျှ တွေးပြီးနောက် ဝမ်ရှန်းက စိတ်ချင်းဆက်သွယ်၍ ပြောလိုက်သည်၊၊

“ငါ့ရဲ့ ပုဂ္ဂိုလ်ရေးယုံကြည်ချက်ကတော့ ပြန်လည်ဝင်စားခြင်းက တကယ်ရှိပါတယ်၊၊ ဒါပေမဲ့ လူတိုင်းကြုံတွေ့ရတာတော့ မဟုတ်ဘူး။ အဲဒါက အခြေအနေအချို့လိုအပ်လိမ့်မယ် ထင်တယ်၊၊ ဖြစ်နိုင်တာကတော့ မြေအောက်ကမ္ဘာကို ရောက်ပြီး သံသရာထဲကို ဖြတ်သန်းနိုင်တဲ့အထိ အချိန်အတော်ကြာအောင် ထိန်းထားနိုင်တဲ့ အစွမ်းထက်တဲ့ ဝိညာဉ်မျိုးလိုအပ်တာဖြစ်နိုင်တယ်”

မုရွှယ် မျက်တောင်ခတ်လိုက်သည်။ နားလည်သယောင်ဟန်ဆောင်ရင်း ရုတ်တရက်သဘောပေါက်သွားသည့် မျက်နှာထားမျိုးပြုလုပ်လိုက်သည်။

သူမသည် ဝမ်ရှန်းနှင့်စကားပြောရင်း စကားဝိုင်းကို မိစ္ဆာကျင့်ကြံသူများအကြောင်းဘက်သို့ ရွှေ့လိုက်ကြသည်။

Chapter 244

မကြာမီမှာပင် သူမက အထူးစုံစမ်းစစ်ဆေးရေးအဖွဲ့၏ သဘောထားကိုပြောခဲ့သည်၊၊ အမျိုးသမီးရုပ်အလောင်းက ဤမျှအထိ အလွန်အမင်းအစွမ်းထက်နေသည်ဖြစ်ရာ လက်ရှိမိစ္ဆာကျင့်ကြံသူများကို ချေမှုန်းပေးရန် သူမကို ဖျောင်းဖျနားချနိုင်မည့် အခွင့်အရေးရှိမလားသိချင်နေလေသည်၊၊

ဝမ်ရှန်းအတွက်မူ ဤမေးခွန်းကို ဖြေရန်တကယ်ပင်ခက်ခဲလှသည်။

အကယ်၍ အထူးစုံစမ်းစစ်ဆေးရေးအဖွဲ့က စီနီယာအစ်မကို ၎င်းတို့ကိုယ်စားဖျောင်းဖျနိုင်ခဲ့လျှင် အမျိုးသမီးရုပ်အလောင်းက လှုပ်ရှားပေးမည့် အခွင့်အရေးအလွန်များလေသည်။ ဘာပဲဖြစ်ဖြစ် ၎င်းတို့နှစ်ဦးအကြားရှိ သံယောဇဉ်မှာ စစ်မှန်ပြီး ဝမ်းနည်းဖွယ်ကောင်းလှသည်။

အခြားတစ်ဖက်တွင်မူ အင်မော်တယ်များက ကမ္ဘာပေါ်တွင် သွားလာလှုပ်ရှားနေခဲ့သည့် ရှေးဟောင်းကာလကတည်းက မိစ္ဆာကျင့်ကြံသူများသည် သောင်းကျန်းနေခဲ့ကြသည်၊၊ ထို့ပြင် တာအိုဂိုဏ်းများ၏ အမွေအနှစ်အားလုံးမှာ အင်မော်တယ်များထံမှ ဆင်းသက်လာခြင်းဖြစ်ရာ မိစ္ဆာကျင့်ကြံသူများ၏ အဆုံးအမများသည်လည်း အခြားမည်သည့်နေရာမှ လာနိုင်ဦးမည်နည်း။

ဝမ်ရှန်း၏ စိတ်ထဲ၌ အတွေးတစ်ခုလက်ခနဲပေါ်လာခဲ့သည်။ ထိုရှေးဟောင်းနတ်ဘုရားများသည် တာအိုတရားဟောကြားရန်အတွက်သာမက ၎င်းတို့၏ အင်အားစုများကို စုဆောင်းရန်နှင့် ချဲ့ထွင်ရန်အတွက် ကမ္ဘာမြေသို့ ရောက်ရှိလာခြင်းလား… ဖြစ်နိုင်တာကတော့ ၎င်းတို့အနက်မှ အချို့သည် တာအိုကို လေ့ကျင့်နေသူများကို စစ်မှန်သောတိုက်ပွဲများနှင့် သွေးထွက်သံယိုမှုများမှတစ်ဆင့် ၎င်းတို့၏ စွမ်းရည်များကို သွေးနိုင်ရန် အခွင့်အရေးပေးရန်အတွက် မိစ္ဆာကျင့်ကြံသူများကို ရန်သူများအဖြစ် ရည်ရွယ်ချက်ရှိရှိဖန်တီးခဲ့ကြခြင်းဖြစ်နိုင်မလား။

သူ ပိုတွေးလေလေ၊ ပို၍ဖြစ်နိုင်ချေရှိသည်ဟု ထင်ရလေလေပင်။

ဘယ်လိုပဲဖြစ်ဖြစ် အစွမ်းထက်တဲ့ မိစ္ဆာအင်မော်တယ်အကြောင်းကို ဘယ်သူမှ မကြားဖူးကြတာက ဘာလို့လဲ…၊၊

သူ အတွေးလွန်နေစဉ်အတွင်း မုဝမ်ရွှမ်း၏ ဘေးပတ်လည်၌ ယင်ယန်ချီမျှင်များ စတင်လည်ပတ်လာခဲ့သည်။ သို့သော်လည်း ၎င်းသည် ဝမ်ရှန်းအတွက် ထူးခြားဆန်းကြယ်စွာ ခံစားရသည်။ ၎င်းသည် ပိုမိုဆန်းကြယ်ပုံရပြီး ၎င်းတွင် ပါဝင်သော သဘောတရားများသည် နားလည်ရန် ပိုမိုခက်ခဲလှသည်။

ပို၍အရေးကြီးသည်မှာ မုဝမ်ရွှမ်းက နောက်ထပ်အဆင့်တက်လှမ်းမှုတစ်ခုကို ပြုလုပ်လိုက်ပုံရခြင်းပင်။

သူမ ထုတ်လွှတ်နေသောအရှိန်အဝါသည် တည်ငြိမ်စွာမြင့်တက်နေပြီး နိုးထလာမည့် လက္ခဏာလည်းမပြသေးပေ။

သူမက ရွှေအမြုတေအဆင့်ရောက်သွားပြီလား။

အသက်နှစ်ဆယ်ကျော်အရွယ်နှင့် ရွှေအမြုတေအဆင့်သို့ ရောက်ရှိခြင်း—သူမသည် တာအိုကျင့်ကြံသူတစ်အားလုံးကို စိတ်ပျက်အားငယ်စွာဖြင့် ချောက်ကမ်းပါးပေါ်မှ ခုန်ချချင်စိတ်ပေါက်အောင် ပြုလုပ်တော့မည်လား။

ဝမ်ရှန်းမှာ အနည်းငယ်ခါးသီးမှုကို မခံစားရဘဲ မနေနိုင်ခဲ့ပေ။ သူသည်လည်း ဤအခွင့်အရေးကို မျှဝေခံစားခဲ့သင့်သော်လည်း သူ၏ မောက်မာသော ဓားဆန္ဒက အင်မော်တယ်ပေးခဲ့သော ဉာဏ်အလင်းအားလုံးကို ဖျက်ဆီးပစ်ခဲ့သည်။ ယခုအခါ သူသည် စိတ်ပျက်စွာဖြင့်သာ စဉ်းစားနေရတော့သည်။

ကဲပါလေ… ဖြစ်နိုင်တာကတော့ ငါ့အချိန်မကျသေးလို့ပဲဖြစ်ပါလိမ့်မယ်။

သူသည် ကော်ဖီခါးတစ်ခွက်ဖျော်ရန် ထရပ်လိုက်ပြီး ၎င်း၏ နက်ရှိုင်းသော ရနံ့နှင့် အရသာကို ဖြည်းဖြည်းချင်းခံစားလိုက်သည်။ ၎င်းကို မသောက်ရသေးမီ မုရွှယ်သည် ဆိုဖာပေါ်မှ ရုတ်တရက် ထခုန်ကာ သူ့ထံသို့ ပြေးဝင်လာခဲ့သည်။ ဝမ်ရှန်းလည်း အလိုလျောက် သူ၏ အကျီကော်လံကို တင်းကျပ်စွာ ဆွဲစိလိုက်မိသည်။

“တာအိုဆရာဝမ်”

မုရွှယ်က သူမ၏ဖုန်းကို သူ့ရှေ့တွင် ဝှေ့ယမ်းရင်း ခပ်တိုးတိုးပြောလိုက်သည်။ ဖုန်းပေါ်တွင်မူ အထူးစုံစမ်းစစ်ဆေးရေးအဖွဲ့၏ အတွင်းပိုင်းမက်ဆေ့ခ်ျစာမျက်နှာရှိနေပြီး စာသားလိုင်းများမှာ လျင်မြန်စွာ လင်းလက်နေခဲ့သည်။

ပစ်မှတ်က ဖုန့်တူးတောင်ရဲ့ အနောက်ဘက်တောင်တန်းထဲသို့ ဝင်ရောက်သွားပြီ။

ဆက်သွယ်ရန် ပြင်ဆင်ပါ။

ဆက်သွယ်မှု စတင်ပြီ။

ဆက်သွယ်ရေးကိရိယာများ ပျက်စီးသွားပြီ။

ပစ်မှတ်က မြေအောက်ကို ဆင်းသွားပြီ။

ပစ်မှတ်က မီတာ ၅၀၀ ကျော်အထိ ဆင်းသွားပြီ။ ပြင်ဆင်ချက် - မီတာ ၈၀၀ ကျော်...

ငါတို့ ပစ်မှတ်ပျောက်ဆုံးသွားပြီ။ နောက်တစ်ကြိမ်ထပ်ပြောမယ်၊၊ ငါတို ပစ်မှတ်ပျောက်ဆုံးသွားပြီ။

ဝမ်ရှန်းနှင့် မုရွှယ်တို့ အကြည့်ချင်းဖလှယ်လိုက်ကြသည်။

သူမက မျက်တောင်ခတ်လိုက်ပြီး ၎င်းတို့နှစ်ဦးစလုံးသည် တစ်ပြိုင်နက်တည်း သက်ပြင်းချလိုက်ကြသည်။ ၎င်းသည် ပခုံးပေါ်မှ ကြီးမားသော ဝန်ထုပ်ဝန်ပိုးတစ်ခုကျသွားသည့်အလားပင်။ မုရွှယ်အတွက်မူ အမျိုးသမီးရုပ်အလောင်းသည် အထူးစုံစမ်းစစ်ဆေးရေးအဖွဲ့၏ လက်ရှိတည်ငြိမ်နေသော ပတ်ဝန်းကျင်ကို လုံးဝပျက်စီးသွားစေနိုင်သည်။ ဝမ်ရှန်းအတွက်မူ အမျိုးသမီးရုပ်အလောင်းအနေဖြင့် လောကထဲတွင် ရည်ရွယ်ချက်မရှိဘဲ လျှောက်သွားနေမည့်အစား ပြန်လည်ဝင်စားခြင်းနေရာကို သွားရောက်ရှာဖွေခြင်းက ပိုမိုကောင်းမွန်လှသည်။

သို့သော်လည်း ၎င်းတို့၏ ခဏတာတွေ့ဆုံမှုသည် သေချာမေးမြန်းရန်အတွက် အချိန်အများကြီးမရခဲ့ချေ။ အမျိုးသမီးရုပ်အလောင်းသည် ရေခဲတောင်၏ ထိပ်ဖျားမျှသာရှိသော အရာကိုသာ ဖော်ပြခဲ့သည်—ဝမ်ရှန်းအနေဖြင့် ၎င်းကို မကြာမီ အစီရင်ခံရတော့မည်ဖြစ်သည်။

လေသံတိုးတိုးဖြင့် မုရွှယ်က မေးလာသည်၊၊ “တာအိုဆရာဝမ်… သူမက ရှင်တို့နှစ်ယောက်ကို အတိအကျဘာပြောခဲ့တာလဲ”

“အများကြီးမပြောပါဘူး”

ဝမ်ရှန်းက စိတ်ချင်းဆက်သွယ်၍ ပြန်ပြောလိုက်သည်။

“သူမက ငါ့နဲ့ စီနီယာအစ်မမှာ ထူးခြားတဲ့ပါရမီရှိတယ်လို့ ပြောတယ်၊၊ သူမ ပြန်လည်မဝင်စားခင်မှာ ငါတို့ကို တပည့်အဖြစ်လက်ခံပြီး နှစ်ပေါင်းထောင်ချီတဲ့ ကျင့်ကြံခြင်းပညာရပ်တွေကို လက်ဆင့်ကမ်းပေးချင်တယ်တဲ့။ ငါတို့ရဲ့ ဆရာက ငါတို့အပေါ် အများကြီးကောင်းခဲ့တာမို့လို့ ငါတို့က သူမရဲ့ ကမ်းလှမ်းချက်ကို လက်မခံခဲ့ဘူးလေ။ ဒါနဲ့ နောက်ဆုံးတော့ သူမက ငါတို့ကို လက်ဆောင်အနည်းငယ်ပဲ ပေးခဲ့တယ်”

မုရွှယ် မျက်လုံးလှန်ကြည့်လိုက်ပြီး သူမ၏ဖုန်းကို သူ့ဘက်သို့ လှည့်ပြလိုက်သည်။ စခရင်ပေါ်တွင်မူ ဝမ်ရှန်း မနေ့ညက ပြောခဲ့သမျှ စကားလုံးအားလုံး၏ အသေးစိတ်မှတ်တမ်းအပြင် တိကျသော အချိန်မှတ်တမ်းများနှင့် သူ၏ လေသံအမူအရာများကိုပါ မှတ်သားထားခဲ့သည်။

သန်းခေါင်ယံအချိန်တွင် နံရံများကို ဖြတ်၍ ချောင်းနားထောင်ခြင်းမှာ မခက်ခဲလှပေ။ ကံကောင်းထောက်မစွာဖြင့် အမျိုးသမီးရုပ်အလောင်းသည် စိတ်ချင်းဆက်သွယ်နည်းဖြင့်သာ အဓိကပြောဆိုခဲ့သောကြောင့် ဝမ်ရှန်းအနေဖြင့် ဆီလျော်သောဇာတ်လမ်းတစ်ပုဒ်ကို ဖန်တီးရန် အခွင့်အရေးရရှိခဲ့ခြင်း ဖြစ်သည်။

အနည်းဆုံးတော့ ဝမ်ရှန်း၏ သဘောထားမှာ ခိုင်မာနေဆဲဖြစ်သည်၊၊ သုတေသနဌာနဖြစ်စေ၊ မိစ္ဆာကျင့်ကြံသူများဖြစ်စေ မည်သူ့ကိုမျှ သူ့၏ စီနီယာအစ်မကို ထိပါးခွင့်ပြုမည်မဟုတ်ပေ။

….

ပုံရိပ်ယောင်အမြုတေအဆင့်၏ အလယ်အလတ်အဆင့် ၊ နှောင်းပိုင်းအဆင့်နှင့် အထွတ်အထိပ်အဆင့်...

မုဝမ်ရွှမ်း၏ ကျင့်ကြံခြင်းအဆင့်သည် တည်ငြိမ်စွာဖြင့် ဆက်တိုက်မြင့်တက်နေခဲ့သည်။ သူမအနေဖြင့် အပြင်ဘက်ကမ္ဘာမှ ကမ္ဘာဦးချီများကို စုပ်ယူရန်ပင် မလိုဘဲ ထိုအင်မော်တယ်၏ နတ်ဘုရားအော်ရာအကြွင်းအကျန်ကိုသာ ဆက်လက်သန့်စင်နေရန် လိုအပ်ပေသည်၊၊

သူမသည် ရွှေအမြုတေအဆင့်သို့ တကယ်ပဲ ရောက်သွားမှာလား…၊၊

ဆယ်နာရီကျော်မျှ စောင့်ဆိုင်းပြီးနောက် ဝမ်ရှန်း စိတ်မရှည်ဖြစ်လာခဲ့သည်၊၊ ထို့ကြောင့် သူသည် ဖုန့်တူးတောင်သို့ ရောက်ရှိနေပြီဖြစ်သော သူ၏ဆရာထံသို့ ဆက်သွယ်လိုက်သည်၊၊

ချင်းယန်ဇီကမူ မုဝမ်ရွှမ်းကို မနှောင့်ယှက်ရန်နှင့် ထိုနေရာ၌ပင် ဆက်လက်ရှိနေပြီး သူမအေးချမ်းစွာ ကျင့်ကြံနိုင်စေရန် ကာကွယ်စောင့်ရှောက်ပေးရန်သာ အမိန့်ပေးခဲ့သည်။

အင်မော်တယ်များ၏ နည်းလမ်းများသည် ၎င်းတို့၏ နားလည်နိုင်စွမ်းထက် ကျော်လွန်လှသည်။

ဝမ်ရှန်းကမူ သူမသည် ဤအခွင့်အရေးကို အသုံးပြုကာ ပျက်စီးသွားသော မွေးရာပါဝိညာဉ်အရင်းအမြစ်ကို ပြန်လည်ပြုပြင်နိုင်မလားဟု တွေးတောမိနေသည်။ အကယ်၍ သူမ ဉာဏ်အလင်းပွင့်မှုမှ နိုးထလာပါက စကားကို ချက်ကျလက်ကျပြောဆိုနိုင်ကောင်း ပြောဆိုနိုင်လိမ့်မည်။

မုဝမ်ရွှမ်း၏ အရှိန်အဝါသည် တစ်ရက်နှင့်တစ်ညလုံးမြင့်တက်နေခဲ့ပြီးနောက် နောက်ဆုံးတွင် ပုံရိပ်ယောင်အမြုတေအဆင့်၏ အထွတ်အထိပ်၌ တည်ငြိမ်သွားခဲ့သည်၊၊

မုဝမ်ရွှမ်း ကျင့်ကြံနေစဉ်အတွင်း ဝမ်ရှန်း၏ မိခင်က နိုးလာခဲ့ပြီး မနေ့ညက မြင်တွေ့ခဲ့ရသမျှကို လုံးဝမှတ်မိခြင်းမရှိတော့ပေ။ သူမသည် ၎င်းတို့၏ အိမ်အသစ်မှာ အရည်အသွေးမပြည့်မီသော အဆောက်အအုံတစ်ခုဖြစ်ကြောင်းနှင့် ဆောက်လုပ်ပြီးသည်မှာ နှစ်နှစ်မျှသာ ရှိသေးသော တိုက်ခန်း၏ လသာဆောင်က ဘာလို့ပြိုကျသွားတာလဲဟုသာ ညည်းညူမြည်တမ်းနေခဲ့သည်၊၊

၎င်းက ဝမ်ရှန်း၏ ဖခင်အတွက် ရှင်းပြရမည့် အခက်အခဲကို များစွာသက်သာစေခဲ့သည်။ သူသည် ဝမ်ရှန်းနှင့်အတူပူးပေါင်းကာ ဇနီးဖြစ်သူအား ဤတိုက်ခန်းကို ရောင်းချ၍ လေကောင်းလေသန့်ရပြီး ကိုယ်ဝန်ဆောင်စဉ်အတွင်း ကောင်းစွာအနားယူနိုင်မည့် မြို့တစ်မြို့သို့ ပြောင်းရွှေ့ရန် ဖျောင်းဖျလိုက်ကြသည်။

ဝမ်ရှန်း၏ မိခင်ဖြစ်သူသည်လည်း တစ်ခုခုမှားယွင်းနေသည်ကို ရိပ်မိပုံရသည်။ မည်သို့ပင်ဖြစ်စေ နိုးလာသည့်အချိန်၌ ခင်ပွန်းဖြစ်သူက စိုးရိမ်ပူပန်နေပြီး သားဖြစ်သူမှာလည်း လေးနက်သောမျက်နှာထားရှိနေကာ မုဝမ်ရွှမ်းမှာလည်း အိမ်သို့ ပြန်ရောက်နေပြီး လှုပ်ရှားမှုမရှိဘဲ တရားထိုင်နေသည်၊၊ ထို့ပြင် အပြင်ဘက်တွင်လည်း စစ်သားအချို့က စောင့်ကြပ်နေကြသည်။

သို့သော် သူမသည် အတင်းအကြပ်မေးမြန်းခြင်းမပြုဘဲ ညင်သာစွာပင် သဘောတူခဲ့သည်။ ထိုနေ့မှာပင် သူမသည် ဝမ်ရှန်းနှင့် ခင်ပွန်းဖြစ်သူကို ပစ္စည်းများအားလုံးသိမ်းဆည်းရန် ပြောကြားခဲ့ပြီး ၎င်းတို့ကို သယ်ယူပို့ဆောင်ရန် အထူးစုံစမ်းစစ်ဆေးရေးအဖွဲ့ထံသို့ လွှဲပြောင်းပေးအပ်ခဲ့သည်၊၊

မုရွှယ်က အဖွဲ့အစည်းအတွင်းရှိ သူမ၏ လုပ်ပိုင်ခွင့်ကို အသုံးပြုကာ ဝမ်ရှန်း မိဘများ၏ မှတ်တမ်းများကို ပြောင်းလဲပေးခဲ့သည်၊၊ ၎င်းတို့၏ အမည်များနှင့် ကိုယ်ရေးရာဇဝင်များကို ပြောင်းလဲပေးခဲ့ရုံသာမက ဘဏ်များ၊ ဆေးရုံများ၊ ဟိုတယ်များ၊ ရထားဘူတာများနှင့် အခြားအများပြည်သူဆိုင်ရာနေရာများရှိ ၎င်းတို့၏ အချက်အလက်အားလုံးကိုပါ ဖျက်ဆီးပေးခဲ့သည်။ ကံကောင်းထောက်မစွာဖြင့် ၎င်းတို့သည် မှတ်ဉာဏ်များကို ပြောင်းလဲပစ်သည့် တားမြစ်ထားသော နည်းပညာမျိုးကိုမူ အသုံးမပြုခဲ့ကြပေ၊၊

အထူးစုံစမ်းစစ်ဆေးရေးအဖွဲ့သည် ဝမ်ရှန်းကိုလည်း အိမ်ထောင်စုစာရင်းမှ ပယ်ဖျက်ပေးခဲ့ပြီး သူနှင့် ပတ်သက်သည့် မှတ်တမ်းအားလုံးကို တိတ်ဆိတ်စွာ ဖျက်ဆီးပစ်ခဲ့သည်။ ထို့ပြင် ၎င်းတို့သည် အနာဂတ်တွင် မတော်တဆမှုတစ်ခုကို ဖန်တီးကာ ဝမ်ရှန်း၏ မိဘများကို သေဆုံးသွားသကဲ့သို့ ဟန်ဆောင်စေပြီး ၎င်းတို့၏ မူလလူမှုပတ်ဝန်းကျင်မှ လုံးဝထွက်ခွာစေကာ အေးချမ်းသော ဘဝသစ်ကို စတင်နိုင်ရန် စီစဉ်ပေးခဲ့သည်၊၊

ဝမ်ရှန်းသည် ၎င်းတို့ ပြုလုပ်ပေးခဲ့သမျှအတွက် များစွာကျေးဇူးတင်မိသည်။ သို့သော်ငြားလည်း သူသည် စီနီယာအစ်မကို သစ္စာဖောက်ရန် ရည်ရွယ်ချက်မရှိပေ။ သူသည် အမျိုးသမီးရုပ်အလောင်းထံမှ သိရှိခဲ့ရသော အဓိကအချက်အချို့ကိုသာ အစီရင်ခံစာတွင် အလေးပေးရေးသားခဲ့သည်၊၊

အမျိုးသမီးရုပ်အလောင်း၏ ပြောကြားချက်အရ နတ်ဘုရားများ ဖန်တီးခဲ့သော ကောင်းကင်ဘုံလှည့်စားခြင်းအစီအရင်သည် ကမ္ဘာမြေကို ကာကွယ်ပေးထားခြင်းဖြစ်သည်။ သူမသည် ပြင်းထန်သော ဒဏ်ရာများကြောင့် ကျဆုံးခဲ့ရခြင်းဖြစ်ပြီး ယခုအခါ ပြန်လည်ဝင်စားရန်အတွက် သံသရာကျောက်တုံးကို သွားရောက်ရှာဖွေခြင်းဖြစ်ကြောင်း ဖော်ပြခဲ့သည်။ ထို့ပြင် သူမသည် လုတုံပင်းနှင့် ဇီဝေဧကရာဇ်တို့အကြောင်းကိုလည်း ထုတ်ပြောခဲ့ရာ အင်မော်တယ်များသည် ကမ္ဘာမြေပေါ်တွင် တကယ်ပင် သွားလာလှုပ်ရှားခဲ့ကြပြီး တာအိုအမွေအနှစ်အားလုံးမှာ ၎င်းတို့ထံမှ ဆင်းသက်လာခြင်းဖြစ်ကြောင်း သက်သေပြနေသည်၊၊