အခန်း ၄၇၁

အခန်း ၄၇၁ စစ်ပွဲစတင်ခြင်း

နန်ယွဲ့ပြည် မြို့တော်။

စစ်တံခွန်များ လေနှင့်အတူ လွင့်ထူနေပြီး သတ်ဖြတ်လိုစိတ်များက ကောင်းကင်ယံအထိ ထိုးတက်နေသည်။ အနက်ရောင် သံချပ်ကာ ဝတ်ဆင်ထားသော စစ်သည်များက အရပ်လေးမျက်နှာတွင် တန်းစီရပ်နေကြပြီး တစ်ချက် ကြည့်လိုက်ရုံဖြင့် အဆုံးအစကိုပင် မမြင်နိုင်အောင် များပြားလှသည်။ ပြင်းထန်သော သတ်ဖြတ်လိုစိတ်များကြောင့် ကောင်းကင်မှ ရာသီဥတုပင် ပြောင်းလဲသွားပြီး ကောင်းကင် တစ်ခွင်လုံးကို တိမ်မည်းများ ဖုံးလွှမ်းသွားတော့သည်။

လူတစ်သောင်း ကျော်လွန်သွားပါက အဆုံးအစ မရှိနိုင်တော့ဟု ဆိုရိုးစကား ရှိသည်။

ဤနေရာတွင် ရှိနေသော စစ်တပ်က တစ်သောင်းသာမကပေ။ စုန်းနတ်ဘုရားကျောင်းမှ နတ်သံတမန်များ ဆင်းသက်လာပြီးနောက် ယခင်က မဟာမိတ် ဖွဲ့ထားသော မင်ယွဲ့ ဟူယွဲ့ အစရှိသည့် နိုင်ငံများက နိုင်ငံတွင်းရှိ ထိပ်တန်းစစ်သည် အများစုကို စုဆောင်းခဲ့ကြရာ ယခုအခါ စစ်သည်အင်အား သုံးသိန်း အထိ စုဝေးနေပြီ ဖြစ်သည်။

ပြင်းထန်သော သွေးချီစွမ်းအင်နှင့် သတ်ဖြတ်လိုစိတ်များ ရောယှက်နေပြီး ကြောက်မက်ဖွယ်ကောင်းသော အငွေ့အသက်များက နေရာအနှံ့ ပြည့်နှက်နေသည်။ စစ်တပ်၏ အရှေ့ဘက်တွင် ရှန်ရှန်းအဆင့် မဟာသိုင်းသခင်ကြီး နှစ်ဆယ်ကျော် မတ်တတ်ရပ်နေကြပြီး ပတ်ဝန်းကျင်ရှိ ရွှမ်တန်အဆင့် သိုင်းသခင် တစ်ရာကျော် ကလည်း စစ်တပ်များကို အသီးသီး ဦးဆောင်ကာ စစ်ကြောင်းများ ဖွဲ့စည်းရန် ပြင်ဆင်နေကြသည်။

ဤမျှလောက် ကြီးမားသော အင်အားကို မည်သည့် ယွမ်ရှန်းအဆင့် စစ်မှန်သောသခင် ကပဲ မြင်တွေ့ပါစေ မျက်နှာပျက်သွားမည်မှာ သေချာလှသည်။ သိုင်းသူတော်စင် ထွက်မလာသရွေ့ ဤမျှ ကြီးမားသော အင်အားကို မည်သူကမျှ ယှဉ်ပြိုင်နိုင်စွမ်း ရှိမည်မဟုတ်ပေ။

အထူးသဖြင့် ဤနေရာတွင် ယွမ်ရှန်းအဆင့် စစ်မှန်သောသခင် ငါးပါး တိတိ စုဝေးနေခြင်းပင်။ နတ်ဘုရား ငါးပါးအလား ကောင်းကင်နှင့် မြေကြီးကြားတွင် မတ်တတ်ရပ်နေကြပြီး သူတို့၏ ထူးခြားလှသော ဓမ္မရုပ်တုများကို အသီးသီး ထုတ်ဖော်ပြသထားကြသည်။ လိပ်နက် ဧရာမမြွေနဂါး လင်းယုန်နက် အစရှိသည်တို့က ကောင်းကင် တစ်ခုလုံးကိုပင် ဖုံးကွယ်ထားတော့သည်။

လေဟာနယ်ထက်ရှိ တိမ်မည်းများ အတွင်းတွင် အဖြူအမည်း နတ်ဆိုးနှစ်ပါး ကတော့ သူတို့၏ ပုံရိပ်ကို ဖုံးကွယ်ထားကာ အောက်ဘက်သို့ အမူအရာ ကင်းမဲ့စွာဖြင့် ငုံ့ကြည့်နေကြသည်။ ဤတိုက်ပွဲကို စုန်းနတ်ဘုရားကျောင်းက စတင်ခဲ့ပြီး အလယ်ပိုင်းလွင်ပြင် အင်ပါယာနန်းတော် ရန်သူ ဝိုင်းရံခံနေရချိန်တွင် ယွဲ့ပြည်နယ်ကို ပြန်လည် သိမ်းပိုက်ရန် ရည်ရွယ်ထားသော်လည်း ယခင်က ချုပ်ဆိုခဲ့သော သိုင်းသူတော်စင် မဟာမိတ်စာချုပ် ရှိနေသေးသည်။

သူတို့က သိုင်းသူတော်စင်များ မဟုတ်ကြသော်လည်း စုန်းနတ်ဘုရားကျောင်းမှ လာသူများ ဖြစ်ရာ အကယ်၍ ပိုင်ယွဲ့ မဟာမိတ်တပ်ဖွဲ့က အသာစီး ရနေမည် ဆိုပါက သူတို့ ဝင်ရောက် တိုက်ခိုက်မည် မဟုတ်ပေ။ သူတို့၏ အမြင်တွင် အလယ်ပိုင်းလွင်ပြင်မှ သိုင်းသူတော်စင် အောက်ရှိ ယွမ်ရှန်းအဆင့် စစ်မှန်သောသခင် များထဲတွင် သူတို့ နှစ်ဦး ပူးပေါင်း တိုက်ခိုက်ရလောက်အောင် အရည်အချင်း ရှိသူ အနည်းငယ်သာ ရှိသည်။

ပိုင်ယွဲ့ မဟာမိတ်တပ်ဖွဲ့ ရှုံးနိမ့်တော့မည့် အခြေအနေ ရောက်မှသာ အခြေအနေကို ပြောင်းလဲရန် သူတို့ ဝင်ရောက် စွက်ဖက်မည် ဖြစ်သည်။

အောက်ဘက်ရှိ စည်းကမ်းကျနပြီး တစ်ဆုံးတစ်စ မမြင်ရသော စစ်တပ်ကြီးကို ကြည့်ရင်း နတ်မိမယ် ချင်းချင်း ၏ ရင်ထဲတွင် ကျန်းချဲ့ အတွက် အနည်းငယ် စိုးရိမ်မိသွားသည်။ သို့သော် နတ်သံတမန် နှစ်ပါး ဤနေရာတွင် ရှိနေသဖြင့် ကျန်းချဲ့ကို ထွက်ပြေးရန် သတင်းပို့ဖို့ပင် ချင်းချင်း မလုပ်နိုင်ခဲ့ပေ။ အခွင့်အရေး ရပါက အဖြူအမည်း နတ်ဆိုးနှစ်ပါး ကို လူမျိုးတုံး မသတ်ဖြတ်ရန် တောင်းဆိုမည် ဟုသာ စိတ်ထဲမှ တွေးထားလိုက်သည်။

အဖြူရောင် ဝတ်စုံကို ဝတ်ဆင်ထားသော အခြား နတ်သံတမန် လူငယ်လေး ကတော့ ပို၍ ရိုးရှင်းလှသည်။ သူက ဘေးရှိ ချင်းချင်း ကို ကြည့်ကာ ရိုးသားသော အပြုံးတစ်ခုဖြင့် ဖွင့်ဟလိုက်သည်

"ချင်းချင်း အလယ်ပိုင်းလွင်ပြင်ကို ရောက်ရင် မင်းကို လည်ပတ်ဖို့ ခေါ်သွားပေးမယ် ကြားရသလောက်ဆို သူတို့ဆီမှာ ငါတို့ ပိုင်ယွဲ့နဲ့ လုံးဝ မတူဘူးတဲ့"

ချင်းချင်း က ကူကျိန်း ကို တစ်ချက်ကြည့်လိုက်ပြီး ခေါင်းအနည်းငယ် ယမ်းပြလိုက်သည်

"အရမ်း အန္တရာယ်များတယ် ငါ မသွားချင်ဘူး"

ချင်းချင်း က ကူကျိန်း ကို အနည်းငယ် ရှောင်ဖယ်ချင်နေသည်။ စကားပြော၍ အဆင်မပြေခြင်း အပြင် အဘွားအိုက သူမနှင့် ကူကျိန်း တို့မှာ ကောင်းကင်က ဖန်တီးပေးထားသော ဖူးစာရှင်များ ဖြစ်ကြောင်းနှင့် နောက်ပိုင်းတွင် တာအိုလက်တွဲဖော်များ ဖြစ်လာမည်ဟု သွယ်ဝိုက်၍ ပြောထားဖူးသောကြောင့်ပင်။ ချင်းချင်း က မည်သူနှင့်မျှ အတူတူ နေထိုင်ရန် မတွေးခဲ့ဖူးရာ ကူကျိန်း က သူမအပေါ် ဂရုစိုက်လေလေ သူမက ပို၍ ရှောင်ဖယ်ချင်လေလေ ဖြစ်နေတော့သည်။

"အို" ဟု ညည်းတွားကာ ကူကျိန်း ၏ မျက်ဝန်းများထဲတွင် စိတ်ပျက်သွားသော အရိပ်အယောင်များ ပေါ်လာသည်။

အဖြူအမည်း နတ်ဆိုးနှစ်ပါး ကတော့ တစ်ယောက်ကို တစ်ယောက် မျက်နှာချင်းဆိုင် ကြည့်လိုက်ကြပြီး အနည်းငယ် ဖြူစင်လွန်းသော နတ်သံတမန် လူငယ် နှစ်ဦးကို လျစ်လျူရှုထားလိုက်ကြသည်။ ယခုတစ်ကြိမ် ချင်းချင်း နှင့် ကူကျိန်း တို့ကို ခေါ်ဆောင်လာရခြင်း၏ အဓိက အကြောင်းရင်းမှာ အတွေ့အကြုံ ရစေရန်သာ ဖြစ်သည်။

သို့သော် ထိုနှစ်ဦးက စုန်းနတ်ဘုရားကျောင်း အတွက် အလွန် အရေးကြီးသဖြင့် သူတို့ကို အန္တရာယ် ရှိစေမည် မဟုတ်ပေ။ ချင်းချင်း ၏ အဖြေကို သူတို့ ရင်ထဲတွင် အလွန် သဘောကျမိသွားသည်။

"စုန်းနတ်ဘုရားကျောင်း က သတင်း ပို့လာတယ် အခု အလယ်ပိုင်းလွင်ပြင် အင်ပါယာနန်းတော် က မြောက်ပိုင်း လူရိုင်းစစ်တပ်တွေနဲ့ စတင် တိုက်ခိုက်နေပြီတဲ့ ဒါက နှစ်ထောင်ချီ အတွင်းမှာ ရခဲတဲ့ အခွင့်အရေး ကောင်း တစ်ခုမို့လို့ ငါတို့ အစွမ်းကုန် ကူညီပေးဖို့နဲ့ ကိုယ့်ရဲ့ ဇာတိမြေကို ပြန်လည် သိမ်းပိုက်ဖို့ ညွှန်ကြားထားတယ်"

အနက်ရောင် ဝတ်ရုံရှင် အဘိုးအိုက လက်နောက်ပစ်ကာ တည်ငြိမ်စွာ ပြောလိုက်သည်။ မျက်ကန်း အဖြူရောင် ဝတ်ရုံရှင် အဘိုးအိုက ခေါင်းညိတ်လိုက်ပြီး စကားလုံး ရှားပါးစွာဖြင့် တုံ့ပြန်လိုက်သည်

"ကောင်းပြီ"

"ဒုန်း..."

"ဒုန်း..."

"ဒုန်း..."

စစ်စည်သံများက လေဟာနယ်ထက်တွင် ပဲ့တင်ထပ်သွားပြီး ကိုးကြိမ်တိတိ တီးခတ်ပြီးနောက်မှ ရပ်တန့်သွားသည်။

ကောင်းကင်နှင့် မြေကြီး ကလည်း လျင်မြန်စွာ အပ်ကျသံ ကြားရလောက်အောင် တိတ်ဆိတ်သွားသည်။ လူသိန်းချီ စုဝေးနေသော်လည်း ယခုအခါ ရှားပါး သားရဲမြင်းများ၏ အသက်ရှူသံ အချို့မှလွဲ၍ အခြား မည်သည့် အသံမျှ မကြားရတော့ဘဲ အားလုံးက ခေါင်းမော့ကာ လေဟာနယ်ထက်ရှိ ဓမ္မရုပ်တုကြီး ငါးပါးကိုသာ ကြည့်နေကြသည်။

မင်ယွဲ့ ဘိုးဘေးက စိတ်အားထက်သန်စွာဖြင့် ရှေ့သို့ တစ်လှမ်း တိုးထွက်လာသည်။ ပတ်ဝန်းကျင်ရှိ မူလစွမ်းအင်များ စုဝေးလာပြီး ကောင်းကင်နှင့် မြေကြီးကြားတွင် မတ်တတ်ရပ်နေသော ဧရာမ ပုံရိပ်ယောင်ကြီး တစ်ခုအဖြစ် ပြောင်းလဲသွားကာ အောက်ဘက်ရှိ စစ်တပ်များကို ငုံ့ကြည့်ရင်း တည်ကြည်သော အသံဖြင့် ဖွင့်ဟလိုက်သည်

"အလယ်ပိုင်းလွင်ပြင် အင်ပါယာနန်းတော်က ငါတို့ ပိုင်ယွဲ့ ပြည်သူတွေကို အနိုင်ကျင့်တယ် ငါတို့ရဲ့ ဇာတိမြေကို လုယူတယ် နှစ်ပေါင်းများစွာ အဆက်မပြတ် တိုက်ခိုက်ပြီး ငါတို့ကို လူရိုင်းတွေ အဖြစ် သတ်မှတ်ခဲ့တယ် အခု အင်ပါယာနန်းတော်က ခန့်အပ်ထားတဲ့ ကွမ်ကျွင်းနယ်စား ကျန်းချဲ့က ပိုပြီး အာဏာရှင် ဆန်လာတယ် ငါတို့ ပိုင်ယွဲ့ရဲ့ ရတနာတွေကို လိုချင်တဲ့ အကြောင်းပြချက် တစ်ခုတည်းနဲ့ နန်ယွဲ့ တော်ဝင်မိသားစုကို ဖျက်ဆီးပြီး နန်ယွဲ့ မြို့တော်ကြီး တစ်ခုလုံးကို မီးရှို့ဖျက်ဆီးပစ်ခဲ့တယ်"

"ပိုင်ယွဲ့ ပြည်သူ သိန်းနဲ့ချီပြီး မီးပင်လယ်ထဲမှာ သေဆုံးခဲ့ရတယ် ငါတို့က နိုင်ငံ မတူပေမဲ့ မျိုးနွယ်တူ သွေးချင်းတွေပဲ မင်းတို့က ပိုင်ယွဲ့ ပြည်သူတွေ ဖြစ်ပါလျက်နဲ့ အလယ်ပိုင်းလွင်ပြင် က လူတွေရဲ့ ထာဝရ အနိုင်ကျင့်တာကို ခံနေကြတော့မှာလား"

"သဘောမတူဘူး"

"သဘောမတူဘူး"

"သဘောမတူဘူး"

အော်ဟစ်သံ တစ်ခု ထွက်ပေါ်လာသည်နှင့် တစ်ပြိုင်နက် လူထောင်ချီ သောင်းချီ သိန်းချီသော အသံများက မီးတောက်ကို လောင်စာ ထည့်ပေးလိုက်သည့်အလား တစ်ပြိုင်နက်တည်း ဟိန်းဟောက်လိုက်ကြရာ သူတို့၏ အသံများက မိုင်ဆယ်နှင့်ချီ အကွာအဝေး အထိ ပဲ့တင်ထပ်သွားတော့သည်။ သတ်ဖြတ်လိုစိတ်များက လှုပ်ခတ်လာတော့သည်။

"သဘောမတူဘူး ဆိုရင် မင်းတို့ ဘာလုပ်ကြမလဲ" ဟု မေးမြန်းလိုက်သည်။

"အလယ်ပိုင်းလွင်ပြင် က ယောက်ျားတွေ အားလုံးကို သတ်ပစ်မယ် မိန်းမတွေကို လုယူမယ် ပြီးတော့ သူတို့ကို ငါတို့ ပိုင်ယွဲ့ ရဲ့ ကျွန်တွေ အဖြစ် ခိုင်းစားမယ်"

သံချပ်ကာ ဝတ်ဆင်ထားသော ပိုင်ယွဲ့ စစ်သူကြီး တစ်ဦးက သူ၏ ဓားရှည်ကို ထုတ်ယူကာ ရှေ့ဆုံးမှ အော်ဟစ်လိုက်သည်။

ထို့နောက် အသံများက ပင်လယ်ရေလှိုင်းများအလား အဆက်မပြတ် ထွက်ပေါ်လာတော့သည်။ ကောင်းကင်နှင့် မြေကြီး ကြားတွင် အလယ်ပိုင်းလွင်ပြင် မှ လူများကို သတ်ဖြတ်ပစ်မည် ဆိုသော အသံများသာ ပဲ့တင်ထပ်နေတော့သည်။

"မှန်တယ် အလယ်ပိုင်းလွင်ပြင် က လူတွေ ငါတို့ကို အနိုင်ကျင့်နေတာ ကြာပြီ ပိုင်ယွဲ့ ပြည်သူတွေ ဖြစ်တဲ့ ငါတို့က ဘယ်လိုလုပ်ပြီး လက်ပိုက်ကြည့်နေနိုင်မှာလဲ ဓားကို ကိုင်ပြီး ငါ့နောက်ကို လိုက်ခဲ့ ယွဲ့ပြည်နယ်ထဲကို ဝင်တိုက်ပြီး ငါတို့ရဲ့ ဇာတိမြေကို ပြန်လုယူကြမယ်"

မူလစွမ်းအင်များ၏ အထောက်အကူဖြင့် မင်ယွဲ့ ဘိုးဘေး ၏ အသံက ကျယ်လောင်စွာ ထွက်ပေါ်လာပြီး လူတစ်ယောက်ချင်းစီ၏ နားထဲသို့ တိကျစွာ ဝင်ရောက်သွားသည်။

"သတ်"

"သတ်"

"သတ်"

စစ်တပ်၏ ပြင်းထန်လှသော သတ်ဖြတ်လိုစိတ်များကို မြင်သောအခါ ကျန်ရှိနေသော ဘိုးဘေး လေးဦး သည်လည်း တစ်ပြိုင်နက်တည်း ရှေ့သို့ တက်လာကြပြီး အသံကျယ်ကြီးဖြင့် ဖွင့်ဟလိုက်ကြသည်

"ပိုင်ယွဲ့ ရဲ့ သူရဲကောင်းတို့ စစ်ချီကြစို့"

"ဘုန်း..."

လေဟာနယ်ထက်တွင် ပေါက်ကွဲသံကြီး ထွက်ပေါ်လာပြီးနောက် သိန်းနှင့်ချီသော ထိပ်တန်း စစ်တပ်ကြီးက စည်းကမ်းတကျ နေရာယူလိုက်ကြပြီး ဧရာမ မြွေကြီး အချို့အလား မြောက်ဘက်သို့ ဦးတည်ကာ သူတို့၏ အစွယ်များကို ထုတ်ဖော်ပြသလိုက်တော့သည်။

ယွဲ့ပြည်နယ် နယ်စပ် အပြင်ဘက်။

ဖူလုံ တောင်တန်း။

စစ်သည် အင်အား ခြောက်သောင်း ပါဝင်သော ထိပ်တန်း တောင်ပိုင်းစောင့်တပ် များက လက်နက် အပြည့်အစုံဖြင့် လေးနက်သော မျက်နှာထားများဖြင့် ရပ်နေကြသည်။ လူတိုင်းက အနက်ရောင် သံချပ်ကာ များကို ဝတ်ဆင်ထားကြပြီး အားလုံးမှာ သိုင်းပညာရှင်များ ဖြစ်ကြသည်။ အနိမ့်ဆုံး ကျင့်စဉ်အဆင့်ကပင် လမ်းစဉ်တည်ဆောက်ခြင်း နောက်ပိုင်းအဆင့် တွင် ရှိနေပြီး မွေးရာပါအဆင့် သိုင်းပညာရှင် အများအပြား ကလည်း အလယ်အလတ်နှင့် အောက်ခြေ အရာရှိများ အဖြစ် တာဝန်ယူထားကြသည်။

ဤအချက်ကြောင့်ပင် တောင်ပိုင်းစောင့်တပ် ကို လောက၏ အင်အားအကြီးဆုံး စစ်တပ်များထဲမှ တစ်ခု အဖြစ် ခေါ်ဆိုနိုင်ခြင်း ဖြစ်သည်။ ဤသည်မှာ လီချန်ကော ၏ နောက်ဆုံး လက်ကျန် အင်အားများ ဖြစ်ပြီး သူ နှစ်ရာချီ ကြိုးစား ပျိုးထောင်လာခဲ့သော စစ်တပ်လည်း ဖြစ်သည်။ ထိုအထဲမှ အများစုကို အောက်ခြေ စစ်သူကြီးများ အဖြစ် တာဝန်ပေးရန် ပြင်ဆင်ထားခဲ့ခြင်း ဖြစ်သည်။

ပြင်းထန်လှသော သတ်ဖြတ်လိုစိတ်များက တောင်ကြား တစ်ခုလုံးကို လွှမ်းခြုံထားသည်။

လူတိုင်းက မျက်နှာတွင် အနက်ရောင် သံချပ်ကာများ ဖုံးအုပ်ထားပြီး မျက်လုံး အစုံကိုသာ မြင်တွေ့ရသည်။ ကိုယ်ပေါ်ရှိ သံချပ်ကာ များတွင်လည်း အစီအရင် သင်္ကေတများ ပါဝင်ပြီး သွေးချီစွမ်းအင်များ ထည့်သွင်းကာ အချင်းချင်း ချိတ်ဆက်နိုင်ကြသည်။ လီချန်ကော ၏ မူလ အကြံအစည် အရဆိုလျှင် တောင်ပိုင်းစောင့်တပ် စစ်သည် တစ်သိန်းဖြင့် သိုင်းသူတော်စင် ကိုပင် တိုက်ခိုက်နိုင်ရန် ရည်ရွယ်ထားခြင်း ဖြစ်သည်။

သို့သော် ဝမ်းနည်းစရာကောင်းသည်မှာ ကျန်းချဲ့ က မျက်နှာချင်းဆိုင် ရန်သူဖြစ်ရန် လျင်မြန်စွာ ရွေးချယ်လိုက်သဖြင့် အချိန်တိုအတွင်း သူ ပြန်လည် မတုံ့ပြန်နိုင်ခဲ့ဘဲ တောင်ပိုင်းစောင့်တပ် ၏ တစ်ဝက်ကို ယွဲ့ပြည်နယ် အတွင်းရှိ ကြိုတင် ပြင်ဆင်ထားသော ခြေကုပ်စခန်းများသို့ ဖြန့်ကြက် ပုန်းအောင်းစေခဲ့ရသည်။

တောင်ပိုင်းစောင့်တပ် ၏ အရှေ့ဘက်တွင် ရှန်ရှန်းအဆင့် မဟာသိုင်းသခင်ကြီး လေးဦးက ပေအနည်းငယ် အရွယ်အစားရှိသော ရှားပါး သားရဲမြင်း များကို စီးနင်းထားကြပြီး သူတို့၏ အရှိန်အဝါများက အလွန် ကြောက်မက်ဖွယ် ကောင်းလှသည်။ သူတို့ အားလုံးက ဤရာစုနှစ် အတွင်း လီချန်ကော မွေးစားထားသော သားများ ဖြစ်ကြသည်။

လူတစ်ယောက်ချင်းစီက စစ်တပ် တစ်ခုစီကို အုပ်ချုပ်ထားပြီး အနိမ့်ဆုံး ကျင့်စဉ်အဆင့်ကပင် ရှန်ရှန်းအဆင့် သို့ ရောက်ရှိနေပြီ ဖြစ်သည်။ မူလက လီခွမ့် ပါဝင်သော်လည်း ယခုအခါ လီခွမ့် သေဆုံးသွားပြီဟု ထင်မှတ်ထားသဖြင့် ကျားရဲ စစ်သူကြီး ငါးဦး ထဲမှ တစ်ဦး လျော့နည်းသွားခဲ့သည်။

လီချန်ကော ကတော့ ကျားဖြူကြီး တစ်ကောင်ကို စီးနင်းထားပြီး ထိုကျားဖြူကြီးက အဆက်မပြတ် ဟိန်းဟောက်နေသည်။ သူက ရွှေရောင် ကျားခေါင်းပုံ သံချပ်ကာကို ဝတ်ဆင်ထားပြီး ခါးတွင် ရွှေခါးပတ်ကို ပတ်ထားကာ လက်ထဲတွင် ရွှေရောင် ကျားခေါင်း ဓားမကြီးကို ကိုင်ဆောင်ထားလျက် အောက်ဘက်ရှိ စစ်တပ်များကို ငုံ့ကြည့်နေသည်။

သူ၏ ဘေးတွင်တော့ ပုံရိပ်အချို့ က တည်ငြိမ်စွာ ရပ်နေကြသည်။

သွေးပင်လယ်ဂိုဏ်း ဂိုဏ်းချုပ် ဖေဟုန်ရိ ချင်းထျန်းမိစ္ဆာဂိုဏ်း မှ ခရမ်းရောင်မြေခွေး ဓမ္မမင်းကြီး ယင်စုရှင်း အကြံပေး လီယွမ်ရှိုး နှင့် ချင်းထျန်းမိစ္ဆာဂိုဏ်း မှ ကူညီရန် ရောက်ရှိလာသော အခြား မဟာသိုင်းသခင်ကြီး နှစ်ဦး တို့ ဖြစ်ကြသည်။ သူ့ဘေးတွင် ရှိနေသော စွမ်းအားရှင် စုစုပေါင်း ကိုးဦး တိတိ ရှိနေသည်။ သူနှင့်ပါ ပေါင်းလိုက်လျှင် ရှန်ရှန်းအဆင့် မဟာသိုင်းသခင်ကြီး ဆယ်ဦး ရှိနေပြီ ဖြစ်သည်။

ထို့ကြောင့်ပင် သူက နောက်ဆုံးတွင် အကျိုးအမြတ်ကို အရယူရန် ယုံကြည်မှု ရှိနေခြင်း ဖြစ်သည်။ ယခုအခါ ကောင်းကင်ကြီးကပင် သူ့ကို ကူညီနေသည့်အလား မြောက်ပိုင်းတွင် စစ်ပွဲများ ဖြစ်ပွားနေပြီး အင်ပါယာနန်းတော် က လူခွဲ၍ မကူညီနိုင်တော့ပေ။ ဤတစ်ကြိမ်တွင် သူသာ လုံလောက်သော သွေးချီစွမ်းအင်များကို ရရှိပြီး သိုင်းသူတော်စင် အဖြစ်သို့ တက်လှမ်းနိုင်ပါက ချင်းထျန်းမိစ္ဆာဂိုဏ်း ၏ အကူအညီဖြင့် ယွဲ့ပြည်နယ် ကို ခွဲထွက် အုပ်ချုပ်နိုင်မည့် အခွင့်အရေး အလွန် ကြီးမားလာပြီ ဖြစ်သည်။ ဘုရင် တစ်ပါး အဖြစ်သို့ ရောက်ရှိလာတော့မည် ဖြစ်သည်။

"ညီအစ်ကိုတွေ အားလုံးက ကျုပ်နဲ့အတူ စစ်မြေပြင်မှာ နှစ်ပေါင်းများစွာ တိုက်ပွဲဝင်ခဲ့ကြတယ် ကျုပ် လီချန်ကော က ဘယ်လို လူမျိုးလဲ ဆိုတာ မင်းတို့ အားလုံး သိကြပါတယ် ဒီတစ်ကြိမ်မှာ ကျုပ် ဘာမှ အများကြီး မပြောချင်တော့ဘူး ဒီလောက်ပဲ ပြောမယ်"

"ဒီတိုက်ပွဲသာ နိုင်ခဲ့ရင် ကျုပ်နဲ့ ညီအစ်ကိုတွေ အားလုံး စည်းစိမ်ချမ်းသာ အတူတူ ခံစားရမယ် တကယ်လို့ ရှုံးခဲ့ရင်လည်း ကျုပ်က မင်းတို့ ရှေ့ကနေ အရင်ဆုံး အသေခံမယ် အင်ပါယာနန်းတော် က ရက်စက်လွန်းတော့လည်း ပုန်ကန်ရတာပေါ့ ဘုရင်နဲ့ မှူးမတ်တွေက မွေးကတည်းက ပါလာတာမှ မဟုတ်တာ ညီအစ်ကိုတို့ ကျုပ်နဲ့အတူ လောင်းကြေးထပ်ဖို့ သတ္တိရှိကြလား"

"နယ်စားမင်း အတွက် အသေခံပါ့မယ်"

"နယ်စားမင်း အတွက် အသေခံပါ့မယ်"

အသံများက လေဟာနယ်ထက်တွင် ပဲ့တင်ထပ်သွားသည်။ ပိုင်ယွဲ့ မဟာမိတ်တပ်ဖွဲ့ နှင့် အဆက်အသွယ် လုပ်ထားပြီးသော လီချန်ကော က ယခုအခါ လုံးဝ သည်းမခံတော့ဘဲ ဓားကို ကောင်းကင်သို့ ညွှန်ပြကာ အောက်ဘက်သို့ ငုံ့ကြည့်လိုက်သည်

"စစ်ချီမယ် ယန်ဖျင် ဂိတ်ကို တိုက်"

"ဟူး"

"ဟူး"

"ဟူး"

ထိပ်တန်း တောင်ပိုင်းစောင့်တပ် စစ်သည် ခြောက်သောင်း က တစ်ပြိုင်နက်တည်း အော်ဟစ်လိုက်ကြပြီး အနောက်တန်းက အရှေ့တန်း အဖြစ် ပြောင်းလဲကာ တောင်ကြားထဲမှ လျင်မြန်စွာ စတင် ထွက်ခွာသွားကြသည်။ အနက်ရောင် နဂါးကြီး တစ်ကောင်က သူ၏ ခေါင်းကြီးကို မော့လိုက်သည့်အလား ပြင်းထန်သော သတ်ဖြတ်လိုစိတ်များက ထိတွေ့၍ပင် ရနိုင်လောက်အောင် ဖြစ်နေသည်။ လီချန်ကော ကတော့ ထိုအရာများ အားလုံးကို ငေးကြည့်နေသည်။

သူ ရွေးချယ်ထားသော စစ်မြေပြင်မှာ ထျန်းနန် ဂိတ် မဟုတ်ဘဲ အခြား နယ်စပ် အရေးကြီး မြို့တစ်မြို့ ဖြစ်သော ယန်ဖျင် ဂိတ် ပင် ဖြစ်သည်။ ပထမ အကြောင်းရင်းမှာ ထျန်းနန် ဂိတ် ကို ကျန်းချဲ့ က အချိန်အတော်ကြာ စီမံအုပ်ချုပ်ထားသဖြင့် သူ လျှို့ဝှက်စွာ ပြင်ဆင်ရန် အဆင်မပြေသောကြောင့် ဖြစ်သည်။ ယန်ဖျင် ဂိတ် ကတော့ မတူပေ။ ထိုနေရာတွင် သူ နှစ်ပေါင်းများစွာ စီမံခန့်ခွဲခဲ့ပြီး သူ၏ တောင်ပိုင်းစောင့်တပ် စစ်စခန်းများထဲမှ တစ်ခုလည်း ဖြစ်သည်။ ချင်းထျန်းမိစ္ဆာဂိုဏ်း နှင့် ပူးပေါင်းရန် ဆုံးဖြတ်လိုက်ကတည်းက သူက ကြိုတင် ပြင်ဆင်မှုများ စတင်ခဲ့ခြင်း ဖြစ်သည်။ ရုတ်တရက် ဆုံးဖြတ်လိုက်ခြင်း မဟုတ်ဘဲ အချိန်အတော်ကြာကတည်းက ကြံစည်ထားခဲ့ခြင်းပင်။

ယန်ဖျင် ဂိတ် ၏ မြေအောက်တွင် သွေးယဇ်ပူဇော်ရေး အစီအရင်ကြီး တစ်ခုကို ချမှတ်ထားပြီး ချင်းထျန်းမိစ္ဆာဂိုဏ်း ၏ အစီအမံများလည်း ပါဝင်သေးသည်။ သက်ရှိ သိန်းနှင့်ချီ သေဆုံးသွားပါက သွေးစစ်စစ် ပုတီးစေ့ တစ်လုံးကို ဖန်တီးနိုင်မည် ဖြစ်သည်။ ထိုပုတီးစေ့ က သူ၏ အခြေခံအုတ်မြစ်များကို ပြန်လည် ဖြည့်တင်းပေးမည့် အရေးအကြီးဆုံး ရတနာပင် ဖြစ်သည်။

အခြား အကြောင်းရင်း တစ်ခုလည်း ရှိသေးသည်။ ၎င်းမှာ သူက သွေးယဇ်ပူဇော်ရေး အစီအရင် ကို ချမှတ်ထားရုံသာမက ယန်ဖျင် ဂိတ် နှင့် ပတ်ဝန်းကျင် တစ်ခုလုံးတွင် သတ်ဖြတ်ရေး အစီအရင်များကိုပါ ပြင်ဆင်ထားခြင်း ဖြစ်သည်။ အကယ်၍ နောက်ဆုံးတွင် ကျန်းချဲ့ တောင့်မခံနိုင်တော့ဘဲ ပိုင်ယွဲ့ တပ်များ ဝင်ရောက်လာပါက သူက ချက်ချင်း ဝင်ရောက် တိုက်ခိုက်ပြီး ပိုင်ယွဲ့ ပြည်သူ သုံးသိန်း၏ သွေးများကို အသုံးပြုကာ သူ၏ သိုင်းသူတော်စင် အခြေခံကို တည်ဆောက်မည် ဖြစ်သည်။

တစ်ချိန်တည်းမှာပင် သူက အမိန့်များ ထုတ်ပြန်ထားပြီး ယွဲ့ပြည်နယ် နယ်စပ်အတွင်း ပုန်းအောင်းနေသော သောင်းနှင့်ချီသည့် တောင်ပိုင်းစောင့်တပ် များ ကလည်း ထိုအချိန်တွင် အခွင့်ကောင်းယူကာ အပြင်နှင့် အတွင်း ပူးပေါင်းပြီး ယန်ဖျင် ဂိတ် ကို ဝိုင်းရံကြမည် ဖြစ်သည်။ သေချာသည်မှာ မမျှော်လင့်ထားသော ကိစ္စများ မဖြစ်ပေါ်စေရန် သူက ကျန်းချဲ့ထံသို့ ပိုင်ယွဲ့ မဟာမိတ်တပ်ဖွဲ့ ယန်ဖျင် ဂိတ် သို့ စစ်ချီလာမည့် သတင်းကိုပင် ပေးပို့ထားပြီး ကြိုတင် ပြင်ဆင်ထားစေရန် ရည်ရွယ်ထားသည်။

ထိုသို့မဟုတ်ပါက ကျန်းချဲ့ အနေဖြင့် ပိုင်ယွဲ့ မဟာမိတ်တပ်ဖွဲ့ ၏ စစ်သည် မည်မျှကို ရှင်းလင်းပစ်နိုင်မည်ကို သူ မယုံကြည်ပေ။ မည်သို့ပင်ဆိုစေ ထိုတပ်ဖွဲ့က နန်ယွဲ့ပြည် တစ်နိုင်ငံတည်း မဟုတ်ဘဲ ဟူယွဲ့၊ မင်ယွဲ့၊ ယန်ယွဲ့ စသည့် အင်အားကြီး နိုင်ငံများ စုပေါင်းထားသော တပ်ဖွဲ့ ဖြစ်သည်။ စစ်သည်များ၏ စွမ်းရည်က တောင်ပိုင်းစောင့်တပ် ကို မမီသော်လည်း ရှန်ရှန်းအဆင့် မဟာသိုင်းသခင်ကြီး အများအပြား ပါဝင်နေသည်။ ထိုစွမ်းအားရှင် များကို သာမန် သိုင်းပညာရှင်များ ယှဉ်ပြိုင်နိုင်မည် မဟုတ်ပေ။

ဖေဟုန်ရိ က ကြီးမားလှသော တောင်ပိုင်းစောင့်တပ် စစ်တပ်ကြီးကို ကြည့်ရင်း မျက်ဝန်းအောက်ခြေတွင် ထူးဆန်းသော အရိပ်အယောင်များ ဖြတ်ပြေးသွားသော်လည်း ချက်ချင်း ပြန်လည် ဖုံးကွယ်လိုက်ပြီး မျက်နှာထားက တည်ငြိမ်နေကာ မည်သည့် ထူးခြားမှုကိုမျှ မမြင်တွေ့ရပေ။

ယွဲ့ပြည်နယ် မြို့တော်၊ ကွမ်ကျွင်းနယ်စား အိမ်တော်။

အဓိက ခန်းမကြီး အတွင်းတွင် ကျန်းချဲ့ က အပေါ်ဆုံး နေရာတွင် အမူအရာ ကင်းမဲ့စွာ ထိုင်နေပြီး လက်ထဲတွင် သွေးရောင် စာအိတ် တစ်ခုကို ကိုင်ထားသည်။ ဤစာက သွေးပင်လယ်ဂိုဏ်း ၏ အကြွင်းအကျန် တစ်ဦးထံမှ လာခြင်း ဖြစ်သည်။ အစိုးရက သွေးပင်လယ်ဂိုဏ်း တပည့်များကို အကြီးအကျယ် ဖမ်းဆီးနေချိန်တွင် လူတစ်ယောက်က သွေးရောင် စာတစ်စောင်ကို ယူဆောင်ကာ သူ့ကို လာရောက် တွေ့ဆုံခဲ့ခြင်း ဖြစ်သည်။ စာထဲရှိ အကြောင်းအရာများက သူ့ကို အနည်းငယ် အံ့အားသင့်သွားစေသည်။ အဘယ်ကြောင့်ဆိုသော် စာပို့သူမှာ အခြားသူ မဟုတ်ဘဲ သူ ကိုယ်တိုင် ဂိုဏ်းကို ဖျက်ဆီးပစ်ခဲ့သော ဖေဟုန်ရိ ပင် ဖြစ်နေသောကြောင့်တည်း။

စာထဲတွင် ဖေဟုန်ရိ ယခုလက်ရှိ ကြုံတွေ့နေရသော အခက်အခဲများကို ရေးသားထားသည်။ သိုင်းသူတော်စင် ၏ ဝိညာဉ် အကြွင်းအကျန် ပူးကပ်ခြင်း ခံနေရပြီး သွေးနတ်ဘုရား ကြေးမုံ နှင့် ကျိုယိုး သွေးစစ်စစ် သစ်ပင် တို့ကို ပြန်လည် ရယူလိုကြောင်း၊ ကျန်းချဲ့နှင့် ပူးပေါင်းလိုကြောင်း နှင့် အရေးကြီးသော အချိန်တွင် နောက်ကျောမှ ဓားဖြင့် ထိုးမည်ဖြစ်ကြောင်း ရေးသားထားသည်။ သို့သော် ထို သွေးပင်လယ်ဂိုဏ်း တပည့်၏ ရှေ့တွင် ကိစ္စများ ပြီးဆုံးသွားပါက သူမကို ပြန်လည် အပြစ်မပေးရန်နှင့် သွေးပင်လယ်ဂိုဏ်း ကို သူ၏ လက်အောက်ခံ အဖြစ် သိမ်းသွင်းရန် ကတိသစ္စာ ပြုပေးရမည် ဖြစ်သည်။

လက်ဆောင် အနေဖြင့် ဖေဟုန်ရိက လီချန်ကော ပုန်းအောင်းနေသော နေရာနှင့် သူမ သိထားသမျှ အရာအားလုံးကို ပြောပြမည် ဖြစ်သည်။

ကျန်းချဲ့ က ဤကိစ္စကို အနည်းငယ် သံသယ ဝင်မိသော်လည်း ချိန်ဆကြည့်ပြီးနောက် အရန် အစီအစဉ် တစ်ခု ထားရှိရန် ဆုံးဖြတ်လိုက်သည်။ ထို သွေးပင်လယ်ဂိုဏ်း တပည့်၏ ရှေ့တွင် ကတိသစ္စာ ပြုလိုက်ပြီး ဖေဟုန်ရိ သာ အမှောင်ကို စွန့်ခွာပြီး အလင်းကို ရွေးချယ်မည် ဆိုပါက သူ နောက်ပိုင်းတွင် သစ္စာဖောက်မည် မဟုတ်ကြောင်း ကတိပေးလိုက်သည်။

သေချာသည်မှာ ကတိပေးလိုက်သော်လည်း သူက တစ်ဖက်လူကို ခြွင်းချက်မရှိ ယုံကြည်မည် မဟုတ်ပေ။ တိုက်ခိုက်သည့် အချိန်ရောက်ပါက သတိထားသင့်သည်များကို သတိထားနေမည်သာ ဖြစ်သည်။

ထို သွေးပင်လယ်ဂိုဏ်း တပည့်က ဖေဟုန်ရိ နှင့် ထူးဆန်းသော ဆက်သွယ်မှု တစ်ခုခု ရှိနေပုံရသည်။ မကြာမီမှာပင် ထိုတပည့်၏ ပါးစပ်မှတစ်ဆင့် ဖေဟုန်ရိ က လီချန်ကော မှာ ဖူလုံ တောင်တန်း တွင် ပုန်းအောင်းနေကြောင်း ပြောပြလာသည်။ ယခုအခါ ရှန်ရှန်းအဆင့် မဟာသိုင်းသခင်ကြီး ဆယ်ဦး စုဝေးနေပြီး ပိုင်ယွဲ့ မဟာမိတ်တပ်ဖွဲ့ နှင့် ပူးပေါင်းကာ ယန်ဖျင် ဂိတ် ကို ကျူးကျော်ရန် ပြင်ဆင်နေကြောင်း နှင့် သူ့ကို ကြိုတင် ပြင်ဆင်ထားရန် ပြောပြလာသည်။

အလွန် တိုက်ဆိုင်စွာပင် ဖေဟုန်ရိ က ဤကိစ္စကို ပြောပြပြီး နာရီဝက် အကြာတွင် ထျန်းနန် ကောင်းမိသားစု မှ ကောင်းချီနန် က လာရောက် တွေ့ဆုံပြီး ထျန်းနန် ကောင်းမိသားစု က သေချာသော သတင်း ရရှိထားကြောင်း ပြောလာသည်။ ပိုင်ယွဲ့ မဟာမိတ်တပ်ဖွဲ့ က စစ်ချီလာပြီ ဖြစ်ပြီး ယန်ဖျင် ဂိတ် သို့ တိုက်ရိုက် ဦးတည်နေကြောင်း ပင်။ ကျန်းချဲ့ ကို ယွဲ့ပြည်နယ် မှ ပြည်သူများကို ကာကွယ်ပေးရန်နှင့် ပိုင်ယွဲ့ လူများကို အလယ်ပိုင်းလွင်ပြင် သို့ တစ်လှမ်းမျှ အဝင်မခံရန် တောင်းဆိုလာသည်။ ဤအတွက်ကြောင့် ထျန်းနန် ကောင်းမိသားစု က ရန်သူကို ခုခံရန် ဆုံးဖြတ်ချက်ကို ပြသသည့် အနေဖြင့် ရှန်ရှန်းအဆင့် မဟာသိုင်းသခင်ကြီး တစ်ဦးကိုပင် စေလွှတ်ပေးခဲ့သည်။

သတင်း နှစ်ခုက ရှေ့ဆင့်နောက်ဆင့် ရောက်လာသဖြင့် ကျန်းချဲ့ အတွက် အလွန် ထူးဆန်းနေသည်။

စစ်ပွဲ မစတင်သေးခင်မှာပင် ရန်သူ၏ တိကျသော သတင်းများက သူ၏ လက်ထဲသို့ အလိုအလျောက် ရောက်ရှိလာခြင်းပင်။ ယွဲ့ပြည်နယ် ဘက်တွင် အမှန်တကယ် ရပ်တည်နေသည့်အလားပင်။

သေချာသည်မှာ ထူးဆန်းသည်က ထူးဆန်းသော်လည်း ကျန်းချဲ့ က ဤကိစ္စကို အတော်လေး အခက်တွေ့နေဆဲပင်။ လင်ယွမ် ဝေ့မိသားစု ကို အမြန်ဆုံး ဆက်သွယ်လိုက်ပြီး ဤတစ်ကြိမ်တွင် သူက တစ်ဖက်လူကို ငြင်းဆန်ခွင့် မပေးတော့ပေ။ ဝေ့မိသားစု ကို လူအင်အားနှင့် ငွေကြေး ထောက်ပံ့ပေးရန် တိုက်ရိုက် အကြောင်းကြားလိုက်သည်။

ဤတိုက်ပွဲ နိုင်ပါက လင်ယွမ် ဝေ့မိသားစု က နောက်တစ်ဆင့် တက်လှမ်းနိုင်မည် ဖြစ်ပြီး အကယ်၍ ဝင်မပါပါက နောက်ဆက်တွဲ ဆိုးကျိုးများကို ကိုယ်တိုင် ခံယူရမည် ဖြစ်သည်။ တစ်ချိန်တည်းမှာပင် ဤသတင်းကို ရင်းချွမ် ကောမိသားစု ထံသို့လည်း တိုက်ရိုက် အကြောင်းကြားလိုက်သည်။ သို့သော် လင်ယွမ် ဝေ့မိသားစု က သူ့ကို ကူညီရန် သဘောတူခဲ့သော်လည်း ရင်းချွမ် ကောမိသားစု ကတော့ လုံးဝ လျစ်လျူရှုထားခဲ့သည်။

အကယ်၍ ယခုအချိန်တွင် လက်မအား၍သာ မဟုတ်ပါက ကျန်းချဲ့ အရင်ဆုံး ဖျက်ဆီးမည့် အရာမှာ ရင်းချွမ် ကောမိသားစု ပင် ဖြစ်သည် ဟု ဆိုနိုင်ပေသည်။ လီချန်ကော ပုန်ကန်ချိန်တွင် တစ်ဖက်လူက ဘက်မရွေးခဲ့သည်ကို ထားလိုက်တော့ ပိုင်ယွဲ့ ကျူးကျော်လာချိန်တွင်ပါ လက်ပိုက်ကြည့်နေခြင်းက ယွဲ့ပြည်နယ် ကို သစ္စာဖောက်ခြင်းပင် ဖြစ်သည်။ ထို့ကြောင့် ကျန်းချဲ့ က သူတို့ကို စိတ်ထဲတွင် မှတ်ထားလိုက်ခြင်းမှာ အလွန် သဘာဝကျလှပေသည်။