အခန်း ၄၇၃

အခန်း ၄၇၃ ရောက်လာပြီ

အေးစက်သော လေပြင်းများက ဓားများအလား အရိုးထဲအထိ စူးဝင်နေသည်။ လေးလပိုင်း၏ ရာသီဥတုက မအေးလွန်း မပူလွန်းသော နွေဦးရာသီ ဖြစ်သော်လည်း ယန်ဖျင်ဂိတ် အတွင်းရှိ လေထုကတော့ အလွန်တရာ အေးစက်နေပြီး ပြင်းထန်သော သတ်ဖြတ်လိုစိတ်များက ကြီးမားလှသော မြို့ရိုးကြီးကို လွှမ်းခြုံထားသည်။

အထက်စီးမှ ငုံ့ကြည့်မည်ဆိုပါက မှုန်မွှားမွှား အမည်းစက်လေးများ စည်းကမ်းတကျ လှုပ်ရှားနေသည်ကို ရှင်းလင်းစွာ မြင်တွေ့နိုင်သည်။ ယန်ဖျင်ဂိတ် တစ်ခုလုံးမှာ ဤအခိုက်အတန့်တွင် စစ်ပွဲခံတပ်ကြီး တစ်ခုအဖြစ် ရုတ်တရက် ပြောင်းလဲသွားခဲ့ပြီ ဖြစ်သည်။

ကျန်းချဲ့က အနက်ရောင် ပိုးသားဝတ်ရုံကို ဝတ်ဆင်ထားပြီး မြို့ရိုးတံခါးပေါ်တွင် မတ်မတ်ရပ်ကာ အဝေးသို့ လှမ်းကြည့်နေပြီး မျက်ဝန်းများထဲတွင် လေးနက်သော အရိပ်အယောင်များ ပြည့်နှက်နေသည်။ သူက ယွမ်ရှန်းအဆင့်သို့ တက်လှမ်းနိုင်ခဲ့ပြီး စွမ်းအားများ အဆမတန် တိုးတက်လာကာ သိုင်းသူတော်စင် အောက်တွင် သူ့ကို ယှဉ်နိုင်သူ အနည်းငယ်သာ ရှိတော့သည်ဟု မိမိကိုယ်ကိုယ် ယုံကြည်မှု ရှိနေသော်လည်း ဤတစ်ကြိမ် ပိုင်ယွဲ့ မဟာမိတ်တပ်ဖွဲ့နှင့် လီချန်ကောတို့ ပူးပေါင်းလိုက်ခြင်းက သူ့ကို ကြီးမားသော ဖိအားများ ပေးစွမ်းနေဆဲပင်။

စုစုပေါင်း စစ်သည် အင်အား လေးသိန်းကျော် ရှိပြီး ထိုအထဲမှ အများစုမှာ ပိုင်ယွဲ့ နိုင်ငံ အသီးသီးမှ ရွေးချယ်ထားသော ထိပ်တန်း စစ်သည်များ ဖြစ်ကြသည်။ သူ၏ ဘက်တွင်တော့ စစ်သည် အင်အား နှစ်သိန်းသာ ရှိပြီး ထိုအထဲမှ အများစုမှာလည်း ပြည်နယ် အသီးသီးမှ ခေါ်ယူထားသော ပြည်နယ် စစ်သည်များသာ ဖြစ်သည်။ အရေးကြီး မြို့ကြီး သုံးမြို့မှ အတင်းအကျပ် စစ်တပ်ထဲ သွင်းထားသော သိုင်းလောကသားများလည်း ပါဝင်သေးသည်။

စွမ်းရည်ချင်း ယှဉ်ကြည့်မည်ဆိုပါက သူတို့က သေချာပေါက် အားနည်းနေသည်။ ဤသည်မှာ မကျက်တကျက် ချက်ထားသော ထမင်းတစ်အိုးနှင့် တူနေသည်ဟု ဆိုနိုင်သည်။ သို့သော် မကျက်တကျက် ဖြစ်နေလျှင်တောင်မှ သူက အတင်း မျိုချရမည်သာ ဖြစ်သည်။

အဘယ်ကြောင့်ဆိုသော် သူ့တွင် ရွေးချယ်စရာ လမ်းမရှိတော့သောကြောင့်ပင်။ ယခုအခါ သူ ခေါ်ယူနိုင်သော အင်အား အားလုံးကို ခေါ်ယူထားပြီး ဖြစ်ရာ အကယ်၍ တိုက်ပွဲကို ရှောင်ရှားမည်ဆိုပါက ယွဲ့ပြည်နယ် တောင်ပိုင်းရှိ မြို့နယ် အများအပြားမှာ ရန်သူ့လက်အောက်သို့ မလွဲမသွေ ကျရောက်သွားမည် ဖြစ်သည်။ အခွင့်အရေး စောင့်နေသော သိုင်းလောက အဖွဲ့အစည်းများနှင့် ချင်းထျန်းမိစ္ဆာဂိုဏ်းကလည်း ချက်ချင်း ပုန်ကန်ကြမည် ဖြစ်ပြီး သူတို့နှင့် အပေးအယူ လုပ်ကြမည် ဖြစ်ရာ တစ်ချက် ထိလိုက်သည်နှင့် လုံးဝ ပြိုကွဲသွားမည် ဆိုသည်မှာ အနည်းငယ်မျှ ချဲ့ကား ပြောဆိုနေခြင်း မဟုတ်ပေ။

ထို့ကြောင့် ဤတိုက်ပွဲကို မလွဲမသွေ တိုက်ရမည် ဖြစ်သည်။ နိုင်ခြေ နည်းပါးနေလျှင်တောင်မှ မလွဲမသွေ တိုက်ရမည်။

ထိုသို့မဟုတ်ပါက သူ ယခင်က ကြိုးစား စုဆောင်းလာခဲ့သမျှ အရာအားလုံး ရေစုန်မျောသွားမည် ဖြစ်ပြီး တစ်ချိန်က နယ်မြေတစ်ခုကို ကြီးစိုးမည့် အိပ်မက်များလည်း ပျက်စီးသွားမည် ဖြစ်သည်။ သေချာသည်မှာ တိုက်ရမည် ဆိုသော်လည်း ကျန်းချဲ့တွင် နောက်ဆုတ်ရန် လမ်းမရှိသည်တော့ မဟုတ်ပေ။ သိုင်းသူတော်စင် မဟာမိတ်စာချုပ် ရှိနေသဖြင့် ဤတိုက်ပွဲတွင် သိုင်းသူတော်စင်များ ဝင်ရောက် စွက်ဖက်မည် မဟုတ်သည်မှာ သေချာသလောက် ရှိသည်။ သူ၏ စွမ်းအားဖြင့် ဆိုပါက အခြေအနေ အရမ်း ဆိုးရွားလာချိန်တွင် ဤယန်ဖျင်ဂိတ်တွင် အသေခံမည် မဟုတ်ပေ။ သို့သော် အခြေအနေမဲ့သည့် အချိန်ထိ မရောက်မချင်း ထိုသို့ ရွေးချယ်မည် မဟုတ်ပေ။

လေးသိန်းကျော်သော မဟာမိတ်တပ်ဖွဲ့ အပြင် ကျန်းချဲ့ကို အကြောက်ဆုံး ဖြစ်စေသည်မှာ တစ်ဖက် ရန်သူတွင် ရှန်ရှန်းအဆင့် မဟာသိုင်းသခင်ကြီး နှစ်ဆယ်ကျော် ပါဝင်နေခြင်းပင် ဖြစ်သည်။ ၎င်းတို့ကသာ စစ်ပွဲ၏ အခြေအနေကို အမှန်တကယ် အဆုံးအဖြတ် ပေးနိုင်သော စွမ်းအားများ ဖြစ်သည်။ သူ၏ ဘက်တွင်တော့ သူ့အပြင် ကျောက်ရှန်းကျီ အောက်ခွန်း ချန်ဆန်းချီ ချီထျန်းကျုံ့ ဝေ့ချန်ဖျင် စသည့် ယွမ်ရှန်းအဆင့် စစ်မှန်သောသခင် ခြောက်ဦးသာ ရှိသည်။ အခြားသူများ ဖြစ်သော ချီရွှယ်မိစ္ဆာသခင် ချီထျန်းဟယ် ချီယွမ်မင် ကျိုးရွှမ် လျိုဆန်းချိုး ယွီဝေ့ရွှေ လီခွမ့် အပြင် ဓားပျံဂိုဏ်းမှ အခြား မဟာသိုင်းသခင်ကြီး နှစ်ဦးနှင့် ထျန်းနန် ကောင်းမိသားစုမှ စေလွှတ်လိုက်သော မဟာသိုင်းသခင်ကြီး တစ်ဦး တို့သာ ရှိသည်။ စုစုပေါင်း ရှန်ရှန်းအဆင့် မဟာသိုင်းသခင်ကြီး ဆယ့်ခြောက်ဦးသာ ရှိသည်။

ဤအင်အားက မနည်းလှပေ။ အလွန် အစွမ်းထက်သည်ဟုပင် ဆိုနိုင်သော်လည်း ပြဿနာမှာ ရန်သူနှင့် နှိုင်းယှဉ်ပါက ကွာဟချက် အလွန် ကြီးမားနေသေးသည်။ ထို့ကြောင့် ကျန်းချဲ့ အရင်ဆုံး လုပ်ရမည့် အလုပ်မှာ စွမ်းအားကို ဖုံးကွယ်ထားပြီး လျှပ်စီးလက်သကဲ့သို့ လျင်မြန်သော အရှိန်ဖြင့် မဟာသိုင်းသခင်ကြီး အချို့ကို အရင်ဆုံး သတ်ဖြတ်ပစ်ရန်ပင်။ ထိုသို့ လုပ်ဆောင်နိုင်စွမ်းလည်း သူ့တွင် ရှိနေသည်။

"နယ်စားမင်း နောက်တန်းက သတင်း အရေးတကြီး ရောက်လာပါတယ် အရင်က ယွဲ့ပြည်နယ် နေရာအနှံ့မှာ ပုန်းအောင်းနေတဲ့ တောင်ပိုင်းစောင့်တပ်တွေ အခု စတင် လှုပ်ရှားနေပါပြီ နောက်တန်းကို ရုတ်တရက် ဝင်တိုက်ပြီး နေ့ဝက်လေး အတွင်းမှာတင် မြို့တော် တစ်ခုနဲ့ မြို့ငယ် ဆယ့်နှစ်မြို့ ကျသွားပါပြီ အခြေအနေ အရ ကြည့်ရတာ ဒီအခွင့်အရေးကို အသုံးချပြီး ကျွန်တော်တို့ကို ရှေ့နောက် ညှပ်တိုက်မယ့် ပုံပဲ"

ကျန်းချဲ့ တွေးတောနေစဉ် ကျိုးရွှမ်က အလျင်အမြန် လျှောက်လာပြီး နောက်တန်းရှိ ရှုပ်ထွေးနေသော အခြေအနေကို ကျန်းချဲ့ထံ လေးနက်သော မျက်နှာထားဖြင့် သတင်းပို့လိုက်သည်။ သူ၏ မျက်နှာပေါ်တွင် အလွန် စိုးရိမ်နေသော အရိပ်အယောင်များ ပြည့်နှက်နေပြီး ကျန်းချဲ့ ပြန်မဖြေခင်မှာပင် အကြံပြုချက် တစ်ခု ပေးလိုက်သည်

"လက်အောက်ငယ်သားနဲ့ လီခွမ့်ကို စစ်တပ် ခေါ်သွားပြီး ပုန်ကန်မှုကို နှိမ်နင်းခိုင်းမလား"

"မလိုဘူး"

ကျန်းချဲ့က လက်ကာပြလိုက်သည်။ နောက်တန်းတွင် ပုန်းအောင်းနေသော တောင်ပိုင်းစောင့်တပ်များ ပြဿနာ ရှာမည်ကို သူ ကြိုတင် ခန့်မှန်းထားပြီး ဖြစ်သည်။ ထိုအချိန်က တစ်နေရာချင်းစီ လိုက်လံ ရှာဖွေပြီး အညံ့ခံခိုင်းရန် အချိန် မလောက်တော့၍သာ လွှတ်ထားခဲ့ရခြင်း ဖြစ်သည်။ ထို့အပြင် သူက ယွဲ့ပြည်နယ်ရှိ မြို့နယ် စစ်တပ် အများစုကို ခေါ်ယူထားသဖြင့် သူပုန်များက ပိုမို ရဲတင်းလာမည် ဖြစ်ကြောင်းနှင့် ယွဲ့ပြည်နယ် တစ်ခုလုံး စစ်မီးများ တောက်လောင်နေမည်ကိုလည်း သူ ကောင်းကောင်း သိထားသည်။

သို့သော် သူ၏ လက်ရှိ အခြေအနေက လူအင်အား လိုအပ်နေချိန် ဖြစ်ရာ မည်သို့များ စစ်တပ်ကို ခွဲထုတ်၍ ရနိုင်မည်နည်း။ အစစ်အမှန် အဆုံးအဖြတ် ပေးမည့် တိုက်ပွဲမှာ ဤယန်ဖျင်ဂိတ် တိုက်ပွဲသာ ဖြစ်သည်။ ဤတိုက်ပွဲသာ နိုင်ပါက နောက်တန်းရှိ ဆူပူမှုများကို လျင်မြန်စွာ နှိမ်နင်းနိုင်မည် ဖြစ်သည်။ ဤနေရာတွင်သာ မတောင့်ခံနိုင်ပါက ဆူပူမှုများကို နှိမ်နင်းနိုင်လျှင်တောင် အခြေအနေကို ပြောင်းလဲနိုင်မည် မဟုတ်ပေ။ ဤနေရာတွင် သူက သတ်ဖြတ်ရေး အစီအရင် များစွာကို ချမှတ်ထားခြင်းမှာ ဤတိုက်ပွဲ တစ်ပွဲတည်းဖြင့် အောင်မြင်မှု ရရှိရန် ရည်ရွယ်ထားခြင်းပင်။

"ဒါပေမဲ့ သူတို့သာ ရှေ့နောက် ညှပ်တိုက်မယ် ဆိုရင်"

ကျိုးရွှမ်၏ မျက်နှာပေါ်တွင် တွေဝေမှုများ ရှိနေသည်။ သူက စစ်တပ်ကို ဦးဆောင်သော စစ်သူကြီး တစ်ဦး မဟုတ်သော်လည်း ရှေ့နောက် ညှပ်တိုက်ခံရခြင်း၏ အန္တရာယ်ကို ကောင်းကောင်း သိထားသည်။ ဤသည်မှာ အကူအညီမဲ့နေသော မြို့တစ်မြို့ အတွက် လုံးဝ ရှောင်ရှားသင့်သော အရာဖြစ်သည်။ အကယ်၍ ကျန်းချဲ့၏ ဩဇာအာဏာသာ ကြီးမားမနေပါက သူ ယခုအချိန်တွင် ဤတိုက်ပွဲက သေချာပေါက် ရှုံးတော့မည်ဟုပင် ထင်မှတ်မိနေပြီ ဖြစ်သည်။

"အခု ပိုင်ယွဲ့ မဟာမိတ်တပ်ဖွဲ့က ဒီနေရာနဲ့ မိုင်သုံးဆယ် တောင် မဝေးတော့ဘူး ချက်ချင်း ရောက်လာတော့မှာမို့လို့ စစ်တပ် ခွဲထုတ်ပြီး ပုန်ကန်မှုကို နှိမ်နင်းဖို့က အချိန် မမီတော့ဘူး နောက်တစ်ခုက ဒီသတင်းကို မြို့ထဲက စစ်သည် အားလုံး သိအောင် ချက်ချင်း ဖြန့်လိုက် နောက်ဆုတ်စရာ လမ်းမရှိတော့ဘူး ငါတို့မှာ ထွက်ပေါက် မရှိတော့ဘူး ဒီတိုက်ပွဲမှာ အသက်ရှင်ချင်ရင် နိုင်အောင် တိုက်ရမယ် ရှုံးသွားရင် ထွက်ပြေးဖို့ အခွင့်အရေးတောင် ရမှာ မဟုတ်ဘူး"

ကျန်းချဲ့က တည်ကြည်သော အသံဖြင့် ပြောလိုက်သည်။ ကျိုးရွှမ်က ကျန်းချဲ့ကို အဓိပ္ပာယ်ပါပါ တစ်ချက် ကြည့်လိုက်ပြီး ခေါင်းကို လေးလေးနက်နက် ညိတ်ပြလိုက်သည်

"လက်အောက်ငယ်သား နာခံပါ့မယ်"

ကျန်းချဲ့က ယခုအခါ လမ်းမရှိသော အခြေအနေတွင် အသေအလဲ တိုက်ခိုက်ရန် ဆုံးဖြတ်လိုက်ပြီ ဖြစ်ကြောင်း သူ သိလိုက်သည်။

"နောက်တစ်ခုက မြို့ထဲမှာ ရှိတဲ့ မဟာသိုင်းသခင်ကြီးတွေ အားလုံးကို အခုချက်ချင်း ဒီနေရာကို ခေါ်လိုက် တိုက်ပွဲဝင်ဖို့ ပြင်ဆင်ရမယ်"

"ဟုတ်ကဲ့ပါ"

တာ့ကျိုး အင်ပါယာနန်းတော် ဥယျာဉ်တော် အတွင်း၌။

ယွမ်ခန် အင်ပါယာ ကျီဝမ်ဟောင်က သူ၏ အောက်ဘက်ရှိ စစ်တုရင်ခုံကို လေးနက်သော မျက်နှာထားဖြင့် ကြည့်နေသည်။ သူ၏ မျက်ခုံးများ ကြားတွင် အုံ့မှိုင်းမှုများ ပြည့်နှက်နေပြီး မျက်မှောင်ကို တင်းကျပ်စွာ ကြုတ်ထားကာ စိတ်ရှုပ်စရာ ကိစ္စ အားလုံးကို မျက်နှာပေါ်တွင် ပေါ်လွင်နေစေသည်။ ယခုအချိန်သည် တာ့ကျိုး အင်ပါယာနန်းတော်၏ အန္တရာယ် အများဆုံး အချိန်ဟု သူ ခံစားနေရသည်။

ထျန်းယွမ် နယ်စပ်က အန္တရာယ် ကြုံတွေ့နေရပြီး စစ်ကူ တောင်းခံထားသည်။ မိစ္ဆာမျိုးနွယ်များက အကြီးအကျယ် ဝင်ရောက် ကျူးကျော်နေသည်။ မြောက်ပိုင်း နယ်စပ်ကလည်း အန္တရာယ် ကြုံတွေ့နေရပြီး အရေးကြီးသော မြို့ကြီး အချို့ ကျဆုံးသွားကာ သိန်းနှင့်ချီသော မြောက်ပိုင်း လူရိုင်း စစ်တပ်များက မြို့ရိုး အောက်သို့ ရောက်ရှိနေပြီ ဖြစ်သည်။ တောင်ပိုင်း ယွဲ့ပြည်နယ်ကလည်း ထိုနည်းတူပင်။ ပိုင်ယွဲ့ မဟာမိတ်တပ်ဖွဲ့က ရောက်ရှိလာတော့မည် ဖြစ်ပြီး သူတို့၏ လက်နက်များက အလယ်ပိုင်းလွင်ပြင်သို့ တိုက်ရိုက် ညွှန်ပြနေသည်။

အရှေ့ မြောက် တောင် သုံးဖက်စလုံးတွင် စစ်ပွဲများ ဖြစ်ပွားနေသည်။

ထျန်းယွမ်နှင့် မြောက်ပိုင်း နယ်စပ် စစ်ပွဲများနှင့် နှိုင်းယှဉ်ပါက ယခုအချိန်တွင် ယွဲ့ပြည်နယ်၏ စစ်ပွဲက သိပ်အရေးမကြီးတော့သလို ဖြစ်နေသည်။ မည်သို့ပင်ဆိုစေ ယနေ့အထိ စုန်းနတ်ဘုရားကျောင်း ဘက်က သိုင်းသူတော်စင် မဟာမိတ်စာချုပ်ကို ဖျက်သိမ်းခြင်း မရှိသေးပေ။ အခြား နှစ်ဖက် စလုံးတွင်တော့ သိုင်းသူတော်စင် အဆင့်ရှိသော စွမ်းအားရှင်များ စုဝေးနေကြပြီ ဖြစ်သည်။

သေချာသည်မှာ သူက ကျန်းချဲ့ကို စစ်ကူ မပို့ပေးခြင်းမှာ ယွဲ့ပြည်နယ်ကို စွန့်လွှတ်လိုက်ချင်၍ မဟုတ်ဘဲ ကျီချန်တောက် ယခင်က သူ့ကို ချန်ထားခဲ့သော စကား တစ်ခွန်းကြောင့် ဖြစ်သည်။ ယွဲ့ပြည်နယ် စစ်ပွဲတွင် စုန်းနတ်ဘုရားကျောင်းမှ သိုင်းသူတော်စင်များ ဝင်ရောက် စွက်ဖက်မည် မဟုတ်ဟု ဆိုထားခဲ့သည်။ ဤအချက်ကြောင့်ပင် သူက အရေးတကြီး စစ်ကူ မပို့ပေးခဲ့ခြင်း ဖြစ်ပြီး မျှော်လင့်ချက် အားလုံးကို ကျီချန်တောက်၏ အပေါ်တွင်သာ ပုံအပ်ထားခြင်း ဖြစ်သည်။

ယခင်က ကျီချန်တောက် မြို့တော်တွင် ရှိနေစဉ်က သူ အလွန် အခက်တွေ့နေခဲ့ရသည်။ အဘယ်ကြောင့်ဆိုသော် ကျီချန်တောက်က သူ့ကို အလွန် ကြီးမားသော ဖိအားများ ပေးစွမ်းနေသောကြောင့်ပင်။ သို့သော် ကျီချန်တောက် ထွက်သွားချိန်တွင်လည်း သူက အဓိက အားထားစရာ မရှိတော့သည့်အလား ခံစားနေရသည်။ မတတ်သာသည့် အဆုံးတွင် ကျီချန်တောက်၏ စကား တစ်ခွန်းအပေါ်တွင်သာ မျှော်လင့်ချက် ထားလိုက်ရတော့သည်။

"အရှင်မင်းကြီး စိတ်အေးအေး ထားပါ ယွဲ့ပြည်နယ် ဘက်မှာ ဓားပျံဂိုဏ်းက သေချာပေါက် လက်ပိုက်ကြည့်နေမှာ မဟုတ်ပါဘူး အဲဒီ ဓားသူတော်စင်ကြီး ရှိနေသရွေ့ စုန်းနတ်ဘုရားကျောင်းက သိုင်းသူတော်စင်တွေကို ဝင်ပါခွင့် ပေးမှာ မဟုတ်ပါဘူး အင်ပါယာနန်းတော်က မြောက်ပိုင်း လူရိုင်းတွေနဲ့ မိစ္ဆာမျိုးနွယ်တွေကို မနှိမ်နင်းနိုင်ရင်တောင် ပိုင်ယွဲ့ကို ရှင်းလင်းဖို့တော့ သေချာပေါက် လုပ်နိုင်ပါတယ် အဆိုးဆုံးဆိုလျှင်တောင် ပိုင်ယွဲ့က နယ်မြေ နည်းနည်း လုယူသွားရုံပဲ ရှိမှာပါ"

အစိမ်းရောင် ဝတ်စုံကို ဝတ်ဆင်ထားသော ဝေ့ကုန်းကုန်းက တိုးတိတ်စွာ ဖွင့်ဟလိုက်သည်။

"သုံးဖက်စလုံးက ရန်သူတွေ ဝိုင်းနေတာကို ငါကိုယ်တော်က ဘယ်လိုလုပ် စိတ်အေးရမှာလဲ ယွဲ့ပြည်နယ်က ငါကိုယ်တော်ရဲ့ အဓိက စိုးရိမ်စရာတော့ မဟုတ်ပါဘူး နိုင်ငံတော်ဆရာ ယောင်ယွဲ့ ကိုယ်တိုင် သွားထားတယ် ပြီးတော့ အဲဒီ ဓားသူတော်စင်ကြီးလည်း ရှိနေသေးတယ် အခြေအနေတွေ ဘယ်လောက်ပဲ ဆိုးရွားပါစေ ပြန်ပြောင်းလဲဖို့ အခွင့်အရေး ရှိသေးတယ် တကယ်တမ်း ငါကိုယ်တော်ကို စိုးရိမ်စေတာက မြောက်ပိုင်းနဲ့ ထျန်းယွမ်ရဲ့ စစ်ပွဲတွေပဲ"

ကျီဝမ်ဟောင်၏ မျက်လုံးများ ကျဉ်းမြောင်းသွားသည်။ သူက ကျီချန်တောက်၏ စကားကို ယုံကြည်သော်လည်း ရင်ထဲတွင် လုံးဝ စိတ်မချနိုင်သေးပေ။ ဤအတွက်ကြောင့် ယွင်ပြည်နယ်နှင့် ချင်းပြည်နယ် စသည့် နေရာများမှ စစ်တပ်များကို စတင် စုဆောင်းရန် အမိန့်ပေးထားပြီး ယွဲ့ပြည်နယ်ကို အချိန်မရွေး သွားရောက် ကူညီရန် ပြင်ဆင်ထားသည်။ ထို့အပြင် နိုင်ငံတော်ဆရာ ယောင်ယွဲ့ကိုပါ ကိုယ်တိုင် သွားရောက်ရန် တောင်းဆိုထားသည်။ ယခု အချိန် တွက်ကြည့်မည်ဆိုပါက ရောက်ရှိလောက်ပြီ ဖြစ်သည်။ ကျန်းချဲ့သာ ပိုင်ယွဲ့ မဟာမိတ်တပ်ဖွဲ့ကို အမှန်တကယ် မတားဆီးနိုင်လျှင်တောင် နောက်ပိုင်းတွင် ဆုံးရှုံးသွားသော နယ်မြေများကို ပြန်လည် သိမ်းပိုက်ရန် အခွင့်အရေး ရှိနေသေးသည်။

သို့သော် မြောက်ပိုင်းနှင့် ထျန်းယွမ်၏ စစ်ပွဲများကတော့ မတူညီပေ။ မိစ္ဆာမျိုးနွယ်များက မူလကတည်းက အဓိက စိုးရိမ်စရာ ဖြစ်ပြီး အင်ပါယာနန်းတော်၏ အင်အား ထက်ဝက်ခန့်က ထျန်းယွမ်တွင် မိစ္ဆာမျိုးနွယ်များကို ကာကွယ်ရန် တပ်စွဲထားရသည်။ ယခုအခါ စစ်ပွဲ စတင်တော့မည် ဖြစ်ရာ တစ်နေ့နေ့ နိုးလာချိန်တွင် ထျန်းယွမ် ကျဆုံးသွားပြီ ဆိုသော သတင်းကို ရရှိမည်ကို သူ အလွန် ကြောက်ရွံ့နေသည်။ အကယ်၍ မိစ္ဆာမျိုးနွယ်များသာ ထျန်းယွမ်ကို ဖောက်ထွက်သွားနိုင်ပါက တာ့ကျိုး အင်ပါယာ တစ်ခုလုံး ပြိုကွဲသွားမည့် အန္တရာယ် ရှိနေသည်။

မြောက်ပိုင်း ဘက်တွင်လည်း ထိုနည်းတူပင်။ ချင်းထျန်းမိစ္ဆာဂိုဏ်းနှင့် မြောက်ပိုင်း လူရိုင်း စစ်တပ်များ ပူးပေါင်းသွားကြောင်း သူ သိရှိထားပြီး ဖြစ်သည်။ ယခင်က အရေးကြီး မြို့ကြီး အချို့ ကျဆုံးခဲ့ရခြင်းမှာလည်း ဤအကြောင်းကြောင့်ပင် ဖြစ်သည်။ မြောက်ပိုင်း နယ်စပ်သာ လုံးဝ ကျဆုံးသွားပါက ယိုလျန် ဒေသ တစ်ခုလုံး ကွင်းပြင်ကြီးအလား ဖြစ်သွားမည် ဖြစ်သည်။ ထိုအချိန်ရောက်ပါက လောက တစ်ခုလုံး ကစဉ့်ကလျား ဖြစ်သွားမည့် မြင်ကွင်းမျိုးကို ရင်ဆိုင်ရပေလိမ့်မည်။

ဤအတွက်ကြောင့် သူက မြို့တော် အတွင်းရှိ အင်အား အများစုကို ခွဲထုတ်လိုက်ပြီး အင်ပါယာ မိသားစုမှ စွမ်းအားရှင် တစ်ဦးနှင့် ဝေ့ကုန်းကုန်းတို့မှလွဲ၍ မြို့တော် အတွင်းတွင် အခြား သိုင်းသူတော်စင် မရှိတော့ချေ။

"ထျန်းယွမ်က ကွန်ဖြူးရှပ် သူတော်စင် ချန်ထားခဲ့တာပါ ပြီးတော့ ကမ္ဘာဖျက် အစီအရင်လည်း ရှိသေးတယ် မိစ္ဆာမျိုးနွယ်တွေ ဖောက်ထွက်နိုင်ဖို့ မျှော်လင့်ချက် အရမ်း နည်းပါးပါတယ် ရှန်းဟိုင် မြို့တော်ကလည်း လက်ပိုက်ကြည့်နေမှာ မဟုတ်ပါဘူး မြောက်ပိုင်း ဘက်မှာ ဆိုရင်လည်း နတ်မင်းကြီး ကိုယ်တိုင် ရှိနေတာမို့ အရှင်မင်းကြီး အနေနဲ့ နတ်မင်းကြီးကို ယုံကြည်ရပါမယ်"

ဝေ့ကုန်းကုန်းက ဆက်ပြောသည်။

"နတ်မင်းကြီး နတ်မင်းကြီး"

ကျီဝမ်ဟောင်က တိုးတိတ်စွာ ရေရွတ်လိုက်ပြီး မျက်ဝန်းများထဲတွင် ထူးဆန်းသော အလင်းတန်းများ တောက်ပနေသည်။ ဤအခိုက်အတန့်တွင် ထာဝရ အသက်နှင့် စွမ်းအား အပေါ် သူ ပို၍ပို၍ တပ်မက်လာမိသည်။ အကယ်၍ ယခုအချိန်က အခွင့်ကောင်း မဟုတ်၍သာ သူ၏ အစီအစဉ်ကို စတင်ခြင်း မရှိခဲ့ခြင်း ဖြစ်သည်။ ဝမ်းနည်းစရာ ကောင်းသည်မှာ ကျီချန်တောက် ထွက်ခွာသွားသော အခွင့်ကောင်း အချိန်လေးတွင်မှ ဤကဲ့သို့ ခက်ခဲသော အခြေအနေမျိုးနှင့် ကြုံတွေ့နေရခြင်းပင်။

"ယွဲ့ပြည်နယ် ဘက်ကကော အဲဒီ ကျန်းချဲ့ကို နတ်မင်းကြီးက ဒီလောက်တောင် အထင်ကြီးနေမှတော့ တကယ်ပဲ ပိုင်ယွဲ့ မဟာမိတ်တပ်ဖွဲ့ကို သူ တားဆီးနိုင်မလား မသိဘူး"

"တားဆီးနိုင်ဖို့ မျှော်လင့်ရတာပါပဲ"

ကျီဝမ်ဟောင်က ခေါင်းမော့လိုက်ပြီး မျက်ဝန်းများက လေးနက်နေသည်။

ယန်ဖျင်ဂိတ် အပြင်ဘက် မိုင်သုံးဆယ် ခန့် အကွာ။

မရေမတွက်နိုင်သော ပိုင်ယွဲ့ စစ်သည်များက ရှေ့သို့ ချီတက်နေကြသည်။ စစ်သည် အင်အားက အလွန် များပြားလွန်းလှပြီး အဆုံးအစကိုပင် မမြင်နိုင်အောင် ဖြစ်နေသည်။ အနက်ရောင် စစ်မှန်သော နဂါးကြီးများ အလား ဟိန်းဟောက်နေကြပြီး မိုးကြိုးပစ်သံအလား ကျယ်လောင်သော အသံကြီးများက တောင်ကုန်းများ ပြိုကျမတတ် ဖြစ်နေသည်။ စစ်တံခွန်များ လွင့်ထူနေပြီး စစ်ရထားများကလည်း အဆက်မပြတ် သွားလာနေကြသည်။

ဖြတ်သန်းသွားသော နေရာတိုင်းတွင် သစ်ပင် ပန်းမန်များ အားလုံး စားသောက် ဖျက်ဆီးခံရပြီး တောင်များကို ဖြိုခွင်းကာ မြစ်များကို တံတားထိုး၍ ဖြတ်သန်းသွားကြသည်။ ပြင်းထန်သော သတ်ဖြတ်လိုစိတ်များကြောင့် ကောင်းကင်မှ ရာသီဥတုပင် ပြောင်းလဲသွားပြီး အဝေးမှ ကြည့်မည်ဆိုပါက အဆုံးအစမရှိသော တိမ်မည်းများက စစ်တပ်ကြီး၏ အထက်တွင် ဖုံးလွှမ်းနေပြီး မုန်တိုင်းတစ်ခု ကျရောက်လာတော့မည့် အလား ကြောက်မက်ဖွယ်ကောင်းသော ဖိအားများကို ပေးစွမ်းနေသည်။ တစ်ချက် ကြည့်လိုက်ရုံဖြင့် ရင်ထဲတွင် ကြောက်ရွံ့မှုများ ပေါ်လာစေမည်သာ ဖြစ်သည်။

လေဟာနယ်ထက်တွင်တော့ ရထားလုံး အများအပြားက ပျံသန်းသွားလာနေကြသည်။ ရထားလုံး တစ်စီးစီတိုင်းတွင် ရှန်ရှန်းအဆင့် မဟာသိုင်းသခင်ကြီးများ ပါဝင်ပြီး အားလုံးပေါင်းလိုက်လျှင် အစီး နှစ်ဆယ် ကျော်နေပြီ ဖြစ်သည်။ ထိုရထားလုံးများထဲမှ တစ်စီး အပေါ်တွင်တော့ ပိုင်ယွဲ့၏ ယွမ်ရှန်းအဆင့် စစ်မှန်သောသခင် ငါးဦးစလုံး မတ်တတ်ရပ်နေကြသည်။ သူတို့က အမှန်တကယ် ဦးဆောင်သူများ ပင် ဖြစ်သည်။

လီချန်ကော ပြောခဲ့သလိုပင် ဤတစ်ကြိမ် ပိုင်ယွဲ့ မဟာမိတ်တပ်ဖွဲ့က တစ်ပွဲတည်းဖြင့် အဆုံးအဖြတ် ပေးရန် ရွေးချယ်ခဲ့ပြီး အင်အား ခွဲထုတ်ခြင်း မပြုခဲ့ပေ။ ထျန်းနန်ဂိတ်နှင့် ကျိုးဖျင်ဂိတ်သို့ စေလွှတ်လိုက်သော စစ်တပ်များမှာ သောင်းဂဏန်းမျှသာ ရှိသည်။ အဓိက အင်အား အားလုံးက ယန်ဖျင်ဂိတ်တွင် စုဝေးရန် ပြင်ဆင်နေကြသည်။

တပ်နှစ်ခု မျက်နှာချင်းဆိုင် ရင်ဆိုင်နေကြရပြီး ဤမျှလောက် နီးကပ်နေသဖြင့် သတင်းအချက်အလက် များမှာလည်း လုံးဝ ပွင့်လင်းနေပြီ ဖြစ်သည်။ ကျန်းချဲ့က စစ်သည် အင်အား နှစ်သိန်းကို ကိုယ်တိုင် ဦးဆောင်ကာ ယန်ဖျင်ဂိတ်တွင် နေရာယူထားကြောင်း သူတို့ ကြိုတင် သိရှိထားပြီး ဖြစ်သည်။ ဤတိုက်ပွဲသာ အနိုင်ရလိုက်ပါက ယွဲ့ပြည်နယ် တစ်ခုလုံးကို သိမ်းပိုက်ရန် အလွန် လွယ်ကူသွားမည် ဖြစ်ကြောင်း ဆိုနိုင်ပေသည်။

"ငါတို့ ပိုင်ယွဲ့ နိုင်ငံတွေ ကွဲကွာနေခဲ့တာ နှစ်ပေါင်း ရာနဲ့ချီပြီ အခု နိုင်ငံငါးခု ပေါင်းလိုက်ရုံနဲ့ ဒီလောက်တောင် အင်အားကြီးမားနေပြီ တကယ်လို့သာ နောက်ပိုင်း ပိုင်ယွဲ့ တစ်ခုလုံး ပေါင်းစည်းနိုင်ရင် အလယ်ပိုင်းလွင်ပြင်ကို သိမ်းပိုက်ဖို့ဆိုတာ ခက်ခဲတဲ့ ကိစ္စ မဟုတ်တော့ဘူး"

ယွမ်ရှန်းအဆင့် စစ်မှန်သောသခင် တစ်ဦးက အောက်ဘက်ရှိ ကြီးကျယ်ခမ်းနားလှသော စစ်တပ်ကြီးကို ကြည့်ရင်း မနေနိုင်ဘဲ ကျယ်လောင်စွာ ရယ်မောလိုက်သည်။

"အဲဒီစကားကတော့ မှားသွားပြီ အလယ်ပိုင်းလွင်ပြင်ရဲ့ အင်အားက အဲဒီလောက် မရိုးရှင်းဘူး ပြီးတော့ ငါတို့ နိုင်ငံငါးခုက ပိုင်ယွဲ့ တစ်ခွင်မှာ အင်အားအကြီးဆုံးတွေပဲ ကျန်တဲ့ နိုင်ငံတွေက ငါတို့နဲ့ ဘယ်လိုမှ မယှဉ်နိုင်ဘူး ယွဲ့ပြည်နယ်ကို သိမ်းပိုက်နိုင်ရင်တောင် ကံကောင်းလှပြီ"

လူတစ်ယောက်က မျက်ကန်း ယုံကြည်မှု မရှိဘဲ မိမိကိုယ်ကိုယ် သိမြင်မှု အများအပြား ရှိနေသည်။

"တာအိုမိတ်ဆွေက အလယ်ပိုင်းလွင်ပြင်ကို အရမ်း အထင်ကြီးနေပြီး ငါတို့ ယွဲ့လူမျိုးတွေကို အထင်သေးလွန်းနေပြီ တခြားဟာတွေ ထားလိုက်ပါတော့ ဒီတိုက်ပွဲမှာ ငါတို့ အနိုင်ရဖို့ အခွင့်အရေး အရမ်း များတယ် အဲဒီ ကျန်းချဲ့ကို လောကမှာ ပြိုင်ဘက်ကင်းတယ်လို့ ချီးကျူးနေကြပေမဲ့ အခု ကြည့်ရတာ ဒီလောက်ပဲ ရှိတာပဲ စစ်တပ် အားလုံးကို ခေါ်ပြီး ငါတို့နဲ့ မျက်နှာချင်းဆိုင် တိုက်ဖို့ ပြင်ဆင်နေတာ ဟွန့် သိုင်းသူတော်စင် ဝင်မပါဘူးဆိုရင် သူ ဘာနဲ့ လာတားမှာလဲ တကယ်လို့ စစ်တပ်ကို ခွဲထုတ်ပြီး ငါတို့ကို နှောင့်ယှက်မယ် ဆိုရင်တော့ တကယ် ခေါင်းကိုက်ရမှာ ဒါပေမဲ့ ရလဒ်ကကော အခုထိ ငါတို့ရဲ့ စစ်ကြောင်းက ဒီလောက် ရှည်နေတာတောင် အလယ်ပိုင်းလွင်ပြင်က လူတွေ လာတိုက်တာ တစ်ခါမှ မတွေ့သေးဘူး"

သရဲမျက်နှာနှင့် ခေါင်းတုံးက လှောင်ပြောင် ပြုံးရယ်လိုက်ပြီး ထိုသူကို အလိုအလျောက် ပြန်လည် ချေပလိုက်သည်။

မင်ယွဲ့ ဘိုးဘေးက ခေါင်းယမ်းလိုက်သည်

"ကျန်းချဲ့က အကြံအစည် မရှိဘူးဆိုရင် လက်ခံလို့ ရပေမဲ့ သူက အဲဒီလောက် မရိုးရှင်းဘူး အနည်းဆုံးတော့ အရည်အချင်းနဲ့ စွမ်းအားကို ကြည့်မယ်ဆိုရင် ပိုင်ယွဲ့ တစ်ခွင်လုံးမှာ သူ့ကို ယှဉ်နိုင်တဲ့သူ တစ်ယောက်မှ မရှိဘူး သူ့ရဲ့ စွမ်းအားကလည်း သာမန် မဟုတ်ဘူး တကယ်လို့ တိုက်ရမယ် ဆိုရင် အနည်းဆုံး စစ်မှန်သောသခင် နှစ်ယောက်လောက် ပူးပေါင်းပြီး တိုက်မှ ရမယ် ချီအိုကြီး သေသွားတာကို သင်ခန်းစာ ယူပြီး မိတ်ဆွေတို့ ပေါ့ဆလို့ မရဘူးနော်"

"ဒါဆိုရင် ဘာဖြစ်လို့ အဲဒီ လီချန်ကောကို ရှေ့ပြေး အဖြစ် ခိုင်းပြီး ယန်ဖျင်ဂိတ်ရဲ့ အင်အားကို အရင် မလျှော့ချခိုင်းတာလဲ"

အခြား အဘွားအို တစ်ဦးက အကြံပြုလိုက်သည်။

"လီချန်ကောက အဲဒီလောက် အတာ မဟုတ်ဘူး ဟွန့် အရင်တုန်းက သူ ဒီကိစ္စကို ပြောခဲ့ပြီးပြီ ရှေ့ပြေး အဖြစ် မလုပ်နိုင်ဘူးတဲ့ သူက အရန် အင်အား အဖြစ် နေပြီး ယန်ဖျင်ဂိတ်ရဲ့ အားနည်းတဲ့ နေရာကို ရုတ်တရက် ဝင်တိုက်မယ်တဲ့ ဒါက သူ သီးသန့် ပြင်ဆင်ထားတဲ့ အားနည်းချက်ပဲ"

"ဟုတ်တယ် ပူးပေါင်းမယ်လို့သာ ပြောနေတာ အဲဒီ လီချန်ကောက အရမ်း ကောက်ကျစ်တယ် အဲဒီ တောင်ပိုင်းစောင့်တပ်တွေတောင် ငါတို့ ပိုင်ယွဲ့နဲ့ မပူးပေါင်းရဲဘူး အခု အနောက်ကနေ လိုက်လာတာ ကြည့်ရတာ ငါတို့ကို အရင် အင်အား လျော့သွားအောင် လုပ်မယ့် ပုံပဲ"

"ဟီး သူ တွေးထားတာ ကောင်းပါတယ် ယန်ဖျင်ဂိတ်ကို သိမ်းပြီးရင် ငါတို့ ချက်ချင်း လှည့်တိုက်ပြီး သူ့ကိုပါ တစ်ခါတည်း ရှင်းပစ်လိုက်မယ်"

"ကဲပါ ဒီစကားတွေကို ရင်ထဲမှာပဲ မှတ်ထားလိုက် အပြင်ကို ထုတ်ပြောစရာ မလိုပါဘူး"

မင်ယွဲ့ ဘိုးဘေးက တည်ကြည်သော အသံဖြင့် ပြောလိုက်သည်။ သူ စကားပြောလိုက်သည်နှင့် အခြား စစ်မှန်သောသခင်များ ချက်ချင်း ပါးစပ် ပိတ်သွားကြပြီး ထိုအထဲမှ လူတစ်ယောက်က စကားလမ်းကြောင်း လွှဲလိုက်သည်

"ဒါနဲ့ ငါတို့ ဘယ်ရောက်နေပြီလဲ ယန်ဖျင်ဂိတ်ကို ရောက်ဖို့ ဘယ်လောက် လိုသေးလဲ"

"အလွန်ဆုံး နောက်ထပ် တစ်နာရီ လောက်ဆိုရင် ပိုင်ယွဲ့ မဟာမိတ်တပ်ဖွဲ့ ရောက်လာတော့မယ်"

ယန်ဖျင်ဂိတ် မြို့ရိုးပေါ်တွင် မဟာသိုင်းသခင်ကြီး ဆယ်ဦးကျော် မတ်မတ်ရပ်နေကြပြီး ကျိုးရွှမ်က လေးနက်သော မျက်နှာထားဖြင့် တည်ကြည်စွာ ပြောလိုက်သည်။ သေချာစွာ ကြည့်မည်ဆိုပါက ဤလူများထဲတွင် ပုံရိပ်အချို့ လျော့နည်းနေသည်ကို တွေ့နိုင်ပေသည်။ ချီရွှယ်မိစ္ဆာသခင် ဖြစ်စေ ကျောက်ရှန်းကျီ ဖြစ်စေ ချီထျန်းဟယ် ဖြစ်စေ ယခုအခါ ဤနေရာတွင် မရှိကြပေ။

ကျန်းချဲ့က ယခုအခါ အနက်ရောင် နဂါးကြေးခွံ သံချပ်ကာကို ဝတ်ဆင်ထားပြီး နောက်ကျောတွင် သွေးရောင် ဝတ်ရုံကို ခြုံထားကာ လက်ထဲတွင် ဟွမ်ကူးနတ်လှံတံကို ကိုင်ဆောင်ထားလျက် အရှေ့ဘက်ကို စိုက်ကြည့်နေပြီး မျက်ဝန်းများထဲတွင် ဝမ်းသာ ဝမ်းနည်းမှုများကို မမြင်တွေ့ရပေ။ ပတ်ဝန်းကျင်ရှိ လေထုကလည်း တိတ်ဆိတ် ငြိမ်သက်နေသည်။

နာရီဝက်ခန့် အကြာတွင်။

အဝေးမှနေ၍ ဟိန်းဟောက်သံများ ထွက်ပေါ်လာပြီး မြင်းခွာသံများက တောင်တန်းများကို ပဲ့တင်ထပ်သွားစေသည်။ မျက်လုံးများကို ဖွင့်လိုက်ရာ ကျန်းချဲ့၏ မျက်ဝန်းအောက်ခြေတွင် သတ်ဖြတ်လိုစိတ်များ ဖြတ်ပြေးသွားသည်

"စစ်တပ် အားလုံး အသင့်ပြင်ထား စစ်စည်တီးပြီး အားပေးကြ”