အခန်း ၄၇၇

အခန်း ၄၇၇ တန်ပြန်တိုက်ခိုက်ခြင်း

"ဘုန်း..."

သွေးအိုင်ကြီး အထက်တွင် ဧရာမ ပုံရိပ်ယောင်ကြီး တစ်ခုက ဖြည်းညင်းစွာ ထွက်ပေါ်လာပြီး လက်တစ်ချက် ဝှေ့ယမ်းလိုက်ရာ သွေးမိုးများက ကမ္ဘာမြေ အနှံ့ ရွာကျလာသည်။ ဤသည်မှာ ချီရွှယ်မိစ္ဆာသခင် ဝင်ရောက် တိုက်ခိုက်လိုက်ခြင်းပင် ဖြစ်သည်။ ထို့နောက် သွေးရောင် အလင်းတန်းများ လွှမ်းခြုံထားသော ပုံရိပ်များက ချက်ချင်းပင် အသေခံ ရှေ့သို့ ပြေးဝင်သွားကြတော့သည်။

ဤသည်မှာ ကျန်းချဲ့ ချန်ထားခဲ့သော နောက်ဆုံး အသက်ကယ် ဖဲချပ်ပင် ဖြစ်သည်။

တိုက်ပွဲ မစတင်ခင် ကတည်းက ဤတိုက်ပွဲ အနိုင်ရရန် အလွန် ခက်ခဲမည်ကို ကျန်းချဲ့ သိထားပြီး ဖြစ်သည်။ သိုင်းသူတော်စင် အောက်တွင် သူ့ကို ယှဉ်နိုင်သူ အလွန် ရှားပါးသော်လည်း အများ၏ ဝိုင်းရံ တိုက်ခိုက်ခြင်းကို ခံရပါက လုံးဝ တောင့်ခံနိုင်မည် မဟုတ်ပေ။

ထို့ကြောင့် အခြား နည်းလမ်း တစ်ခုကို မလွဲမသွေ ရှာဖွေရမည် ဖြစ်သည်။ မည်သို့ပင်ဆိုစေ ပိုင်ယွဲ့ မဟာမိတ်တပ်ဖွဲ့၏ လူအင်အားက အရမ်း များပြားလွန်းလှသည်။ စစ်သည် လေးသိန်းကျော် အားလုံးက နိုင်ငံ အသီးသီးမှ ရွေးချယ်ထားသော ထိပ်တန်း စစ်သည်များ ဖြစ်ကြသည်။ လူတစ်ယောက် တံတွေး တစ်ထွေး ထွေးလိုက်လျှင်ပင် ရေကန် တစ်ခု ဖြစ်သွားနိုင်လောက်ပေသည်။

အကယ်၍ စစ်ကြောင်းများ ဖွဲ့စည်းလိုက်မည်ဆိုပါက မဟာသိုင်းသခင်ကြီး အများအပြားနှင့်ပင် ယှဉ်ပြိုင်နိုင်စွမ်း ရှိသည်။

ယခုအချိန်ကဲ့သို့ပင် ကျန်းချဲ့ ဘက်က နေရာတိုင်းတွင် အဖိနှိပ်ခံ နေရသည်။ ယန်ဖျင်ဂိတ်၏ မြို့ရိုး တစ်ခုလုံး ပျက်စီးလုမတတ် ဖြစ်နေပြီး ပိုင်ယွဲ့ သိုင်းပညာရှင် အချို့က မြို့ရိုးပေါ်သို့ပင် တက်ရောက်လာကြပြီ ဖြစ်သည်။ ကြိုတင် ပြင်ဆင်ထားသော အစီအရင် များစွာကလည်း တစ်ခုပြီး တစ်ခု ဖျက်ဆီးခံလိုက်ရသည်။

ထို့ကြောင့် ထူးခြားသော နည်းလမ်းများကို အသုံးမပြုပါက သေချာပေါက် တောင့်ခံနိုင်မည် မဟုတ်ပေ။

ဤနည်းလမ်းကို ချီရွှယ်မိစ္ဆာသခင်က အကြံပြုခဲ့ခြင်း ဖြစ်သည်။ မိစ္ဆာလမ်းစဉ်၏ လျှို့ဝှက် ပညာရပ်ကို အသုံးပြု၍ သေမင်းကို မကြောက်သော သွေးသံချပ်ကာ စစ်တပ် တစ်ခု ဖန်တီးကာ အခြေအနေကို ပြောင်းလဲပစ်ရန် ပင် ဖြစ်သည်။

သို့သော် သွေးသံချပ်ကာ စစ်တပ်ကို ဖန်တီးရန် ပေးဆပ်ရမည့် တန်ကြေးက အလွန် ကြီးမားလှသည်။ အနည်းဆုံး လူသောင်းနှင့်ချီ အသက်စတေး ရမည် ဖြစ်သည်။ တနည်းအားဖြင့် ဆိုရလျှင် ယခုအခါ သွေးရောင် အလင်းတန်းများ လွှမ်းခြုံထားသော ထိုစစ်သည်များ အားလုံးက သေပွဲဝင် စစ်သည်များ ပင် ဖြစ်ကြသည်။

အားလုံးက အသေခံ တိုက်ခိုက်မည့် ယုံကြည်ချက်ဖြင့် မိစ္ဆာလမ်းစဉ်၏ လျှို့ဝှက် ပညာရပ်ကို အသုံးပြုကာ မိမိတို့၏ စွမ်းအားများကို အဆမတန် မြှင့်တင်ထားကြသည်။ နောက်ဆုံးတွင် ကျန်းချဲ့က ချီရွှယ်မိစ္ဆာသခင်၏ အကြံပြုချက်ကို လက်ခံလိုက်သည်။ ယန်ဖျင်ဂိတ် တစ်ခုလုံးမှ သေပွဲဝင် စစ်သည် သုံးသောင်းကို ရွေးချယ်ခဲ့သည်။ ထိုအထဲမှ အများစုမှာ ထိုက်အန်း မြို့နယ် မှ ကတည်းက သူ့နောက်သို့ လိုက်ပါလာခဲ့သော စစ်သည်များ ဖြစ်ကြသည်။

သေချာသည်မှာ ကျန်းချဲ့ကလည်း ကတိများ ပေးခဲ့သည်။ ဤတိုက်ပွဲတွင် အသက် သေဆုံးသည် ဖြစ်စေ ရှင်သန်သည် ဖြစ်စေ နောက်ဆက်တွဲ ကိစ္စ အားလုံးကို သူ တာဝန်ယူမည် ဖြစ်ကြောင်း။ မိဘ ရှိသူများကို သူက စောင့်ရှောက်ပေးမည် ဖြစ်ပြီး သားမယား ရှိသူများကို သူက ပြုစုပျိုးထောင် ပေးမည် ဖြစ်သည်။ ဆန္ဒ ရှိသူများကို သူက ဖြည့်ဆည်း ပေးမည် ဖြစ်သည်။ ဤသည်မှာ သူတို့ အပေါ် ကျန်းချဲ့၏ ကတိစကား ပင် ဖြစ်ပြီး သူတို့ ကလည်း ကျန်းချဲ့၏ စကားကို ယုံကြည်ခဲ့ကြသည်။

သို့သော် သွေးသံချပ်ကာ စစ်တပ်ကို ဖွဲ့စည်းရန် ကြိုတင် လိုအပ်ချက် အချို့ ရှိနေသေးသည်။ ပထမဆုံး အနေဖြင့် ဖြည့်တင်းရန် သွေးချီစွမ်းအင် အများအပြား လိုအပ်ပြီး ဒုတိယ အနေဖြင့် အရင်းအမြစ် အမြောက်အမြား လိုအပ်သည်။

ထို့ကြောင့်ပင် ကျန်းချဲ့က တိုက်ပွဲ စတင်ချိန်တွင် သူတို့ကို ချက်ချင်း ထွက်ပေါ်မလာစေဘဲ ပိုင်ယွဲ့ စစ်သည် များကို အရင်ဆုံး အကြီးအကျယ် သတ်ဖြတ်ကာ သူတို့အတွက် သွေးများ စုဆောင်းပေးခဲ့ခြင်း ဖြစ်သည်။ ထို့နောက် ကျန်းချဲ့က ချီရွှယ်မိစ္ဆာသခင်ကို လီချန်ကောနှင့် အခြားသူများ အာရုံလွှဲသွားသည့် အချိန်အထိ စောင့်ဆိုင်းပြီးမှသာ ဝင်ရောက် တိုက်ခိုက်ရန် အမိန့်ပေးခဲ့ခြင်း ဖြစ်သည်။ ဤအကြောင်းကြောင့်ပင် ကျန်းချဲ့က ယခုအချိန်အထိ တောင့်ခံနေခဲ့ရခြင်း ဖြစ်သည်။

ပိုင်ယွဲ့ မဟာမိတ်တပ်ဖွဲ့၏ စစ်ကြောင်းကို တစ်ကြိမ်တည်းဖြင့် ဖျက်ဆီးပစ်ရန် ကျန်းချဲ့က ကျောက်ရှန်းကျီနှင့် ဓားပျံ ဂိုဏ်း တပည့် ခြောက်ရာကျော် ကိုပါ ကြိုတင် စီစဉ်ထားခဲ့ပြီး ဘယ်ညာ ညှပ်တိုက်ကာ မိုင်ဆယ်နှင့်ချီ ရှည်လျားသော ပိုင်ယွဲ့ မဟာမိတ်တပ်ဖွဲ့ကို အလယ်မှနေ၍ ခုတ်ပိုင်းပစ်ရန် ရည်ရွယ်ထားခြင်း ဖြစ်သည်။

ဤရုတ်တရက် အပြောင်းအလဲက အလွန် ကြီးမားသော အကျိုးသက်ရောက်မှုကို ဖြစ်ပေါ်စေကြောင်း အမှန်တရားက သက်သေပြနေသည်။

ကျောက်ရှန်းကျီက ဓားဖြင့် လမ်းပြပြီး နောက်ကျောရှိ ဓားပျံ ဂိုဏ်း တပည့် ရာနှင့်ချီက ဓားအစီအရင်ကို ဖွဲ့စည်းကာ မြှားတစ်စင်းအလား ပိုင်ယွဲ့ မဟာမိတ်တပ်ဖွဲ့၏ စစ်ကြောင်းကို အလယ်မှနေ၍ ထိုးဖောက် ဝင်ရောက်သွားသည်။ ထို့နောက် သွေးသံချပ်ကာ စစ်တပ်က စတင် အသေခံ တိုက်ခိုက်တော့သည်။ သူတို့၏ အရှိန်အဝါများကလည်း ပို၍ပို၍ ကြီးမားလာသည်။

ပေးဆပ်ရသည့် တန်ကြေးက ကြီးမားသဖြင့် ချီရွှယ်မိစ္ဆာသခင် လည်း ကျန်းချဲ့ကို သေချာပေါက် စိတ်ပျက်စေမည် မဟုတ်ပေ။ သွေးသံချပ်ကာ စစ်တပ်မှ သေပွဲဝင် စစ်သည် သုံးသောင်းက အသက် သေဆုံးသွားလျှင်တောင်မှ သူတို့၏ စွမ်းအားများက ပျောက်ကွယ်သွားမည် မဟုတ်ဘဲ အခြား သွေးသံချပ်ကာ စစ်သည်များ၏ ကိုယ်ပေါ်သို့ ကူးပြောင်းသွားမည် ဖြစ်သည်။

ထို့အပြင် ပိုင်ယွဲ့ မဟာမိတ်တပ်ဖွဲ့၏ သွေးချီစွမ်းအင်များကိုပါ အဆက်မပြတ် စုပ်ယူကာ စွမ်းအားများကို မြှင့်တင်နေသေးသည်။ တနည်းအားဖြင့် ဆိုရလျှင် သွေးသံချပ်ကာ စစ်သည်များ အားလုံးကို မသတ်ဖြတ်နိုင်သရွေ့ ဤ သွေးသံချပ်ကာ အစီအရင်က ပို၍ပို၍ ကြောက်မက်ဖွယ် ကောင်းလာမည်သာ ဖြစ်သည်။ ဘယ်ညာ ညှပ်တိုက်မှု အောက်တွင် ပိုင်ယွဲ့ မဟာမိတ်တပ်ဖွဲ့၏ စစ်ကြောင်းများ လျင်မြန်စွာ ပြိုကွဲသွားတော့သည်။

တစ်ချိန်တည်းမှာပင် ယန်ဖျင်ဂိတ် အတွင်းရှိ လီခွမ့်က ဤအခြေအနေကို မြင်တွေ့လိုက်ရသောအခါ ယခင်က ကျန်းချဲ့၏ အမိန့်ကို သတိရသွားသည်။ ယခုအခါ ယန်ဖျင်ဂိတ် ပြိုကွဲလုမတတ် ဖြစ်နေသည်ကိုပင် ဂရုမစိုက်နိုင်တော့ဘဲ မြို့တံခါးကို ချက်ချင်း ဖွင့်ကာ စစ်တပ် ထက်ဝက်ကျော်ကို ဦးဆောင်ပြီး တန်ပြန် တိုက်ခိုက်တော့သည်။

တံပိုးမှုတ်သံများ ထွက်ပေါ်လာပြီး စစ်စည်သံများ ပဲ့တင်ထပ်သွားသည်။ လောင်စာ ထည့်ပေးလိုက်သည့်အလား တန်ပြန် တိုက်ခိုက်မှုကြီး ရုတ်တရက် စတင်သွားတော့သည်။ ရုတ်တရက် ပြောင်းလဲသွားသော အခြေအနေများကြောင့် လူတိုင်း အံ့အားသင့်သွားကြပြီး ချက်ချင်းပင် မဟာသိုင်းသခင်ကြီးများက ကျောက်ရှန်းကျီတို့ကို သွားရောက် တားဆီးရန် ပြင်ဆင်လိုက်ကြရာ အခြေအနေက လျင်မြန်စွာ ပိုမို ရှုပ်ထွေးလာတော့သည်။

မိုင်ဆယ်နှင့်ချီသော ပတ်ဝန်းကျင် တစ်ခုလုံး ဤအခိုက်အတန့်တွင် ငရဲပြည် တစ်ခုအဖြစ် ပြောင်းလဲသွားတော့သည်။ အလောင်း အစိတ်အပိုင်းများ လွင့်စင်နေပြီး သွေးများက မြေကြီးကို ဖုံးလွှမ်းထားသည်။ သတ်ဖြတ်လိုစိတ်များ မိစ္ဆာ အငွေ့အသက်များနှင့် သွေးချီစွမ်းအင်များ အားလုံး ရောယှက်နေကြသည်။

ဤမြင်ကွင်းကို မြင်လိုက်ရသောအခါ လီချန်ကော၏ မျက်နှာထား လည်း မည်းမှောင်သွားသည်။ ကျန်းချဲ့ကို တိုက်ခိုက်မှု တစ်ခုဖြင့် နောက်ဆုတ်သွားစေပြီးနောက် သူ၏ မျက်နှာက အလွန် ကြည့်ရဆိုးနေပြီ ဖြစ်သည်။ ကျန်းချဲ့တွင် လျှို့ဝှက် ဖဲချပ်များ ရှိနေရုံသာမက ကျန်းချဲ့၏ စွမ်းအား ကလည်း သူ ထင်ထားသည်ထက် အများကြီး ပိုမို ကြောက်မက်ဖွယ် ကောင်းနေသောကြောင့် ဖြစ်သည်။

မူလက သူက ကျန်းချဲ့ ယွမ်ရှန်းအဆင့်သို့ တက်လှမ်းသွားလျှင်တောင် စွမ်းအားက တူညီမည် မဟုတ်ဟု ထင်ထားခဲ့သည်။ မည်သို့ပင်ဆိုစေ ကျန်းချဲ့က ကျင့်ကြံလာသည်မှာ နှစ်အနည်းငယ်သာ ရှိသေးပြီး သူကတော့ နှစ်ပေါင်း ရာနှင့်ချီ ကျင့်ကြံလာခဲ့သူ ဖြစ်သည်။

စစ်တပ်ထဲတွင် ကြီးပြင်းလာပြီး အသေအလဲ တိုက်ခိုက်ကာ ဖုန်းယွင် အဆင့်သတ်မှတ်ချက် စာရင်း၏ ထိပ်ဆုံး ဆယ်ဦးစာရင်း အထိ ရောက်ရှိလာခဲ့ခြင်း ဖြစ်ပြီး လောက တစ်ခုလုံးတွင် နာမည်ကြီးနေသော သူတစ်ဦး ဖြစ်သည်။ သိုင်းသူတော်စင် အောက်တွင် သူ့ကို ယှဉ်ပြိုင်နိုင်သူ အလွန် ရှားပါးလှသည်။ ဘေးတွင်လည်း ထိပ်တန်း စစ်မှန်သောသခင် နှစ်ဦးက ကူညီနေသေးရာ ကျန်းချဲ့ကို အနိုင်ယူရန်မှာ အလွန် လွယ်ကူလှသည်ဟု ထင်ထားခဲ့သည်။

သို့သော် အမှန်တကယ် တိုက်ခိုက်ကြည့်ပြီးမှသာ ပြိုင်ဘက်ကင်း ပါရမီရှင် ဆိုသည်မှာ အဘယ်နည်း၊ အလယ်ပိုင်းလွင်ပြင်၏ နံပါတ်တစ် ပါရမီရှင် ဆိုသည်မှာ အဘယ်နည်း ဆိုသည်ကို သူ အမှန်တကယ် နားလည်သွားခဲ့သည်။ ကျန်းချဲ့က ထိပ်တန်း စစ်မှန်သောသခင် သုံးဦးကို တစ်ယောက်တည်း ရင်ဆိုင်နေရပြီး ထိုအထဲမှ တစ်ဦးက ဖုန်းယွင် အဆင့်သတ်မှတ်ချက် စာရင်း၏ ထိပ်ဆုံး ဆယ်ဦးစာရင်းတွင် ပါဝင်သော စွမ်းအားရှင် တစ်ဦး ဖြစ်သော်လည်း လုံးဝ အရေးနိမ့်မသွားပေ။ အနည်းငယ် အဖိနှိပ်ခံ နေရသော်လည်း အချိန်အကြာကြီး တောင့်ခံနိုင်စွမ်း ရှိကြောင်း ရှင်းလင်းစွာ မြင်တွေ့နေရသည်။

ထို့အပြင် သူ၏ မိစ္ဆာနတ်ဘုရား ဓမ္မရုပ်တုကလည်း ဓမ္မရုပ်တု နှစ်ခုကို တစ်ယောက်တည်း ရင်ဆိုင်နေရသော်လည်း အနည်းငယ်မျှ အရေးမနိမ့်သည့်အပြင် အနည်းငယ် အသာစီးပင် ရနေသေးသည်။

'ဒါက ယွမ်ရှန်းအဆင့်ကို ယခုလေးတင် ရောက်ရှိထားသူ တစ်ယောက် ဟုတ်ရဲ့လား' ဟု တွေးမိသည်။

ဒါက ဖုန်းယွင် အဆင့်သတ်မှတ်ချက် စာရင်း၏ ထိပ်ဆုံး သုံးဦးစာရင်းတွင် ရှိသော ကြောက်မက်ဖွယ် စွမ်းအားရှင် တစ်ဦးနှင့် ပိုတူနေသည်။ အကယ်၍ ယခု အခြေအနေက သူ၏ မျက်စိရှေ့တွင် ဖြစ်ပျက်နေခြင်း မဟုတ်ပါက သူ လုံးဝ ယုံကြည်မည် မဟုတ်ပေ။

ဤအခိုက်အတန့်တွင် လီချန်ကော ပင်လျှင် သူ ကျန်းချဲ့ကို လုံးဝ မမီကြောင်း ဝန်ခံလိုက်ရတော့သည်။ ရင်ထဲတွင်လည်း အတွေးတစ်ခု ပေါ်လာသည်။ 'သိုင်းသူတော်စင် မထွက်လာသရွေ့ ယွမ်ရှန်းအဆင့် တွေထဲမှာ ဘယ်သူကများ ကျန်းချဲ့ကို တစ်ယောက်ချင်း ယှဉ်တိုက်နိုင်မှာလဲ'

"အစွမ်းကုန် တိုက် သူ့ကို သတ်"

ယခုအချိန်တွင် ယင်စုရှင်းနှင့် လီချန်ကောတို့၏ အတွေးက တူညီနေကြသည်။ ကျန်းချဲ့က ချင်းထျန်းမိစ္ဆာဂိုဏ်း၏ အဓိက ရန်သူ ဖြစ်ပြီး မသတ်လျှင် မဖြစ်ပေ။ အကယ်၍ ကျန်းချဲ့သာ သိုင်းသူတော်စင် ဖြစ်သွားပါက ဂိုဏ်းချုပ်ကြီး မှလွဲ၍ ချင်းထျန်းမိစ္ဆာဂိုဏ်းတွင် မည်သူက သူ့ကို ယှဉ်နိုင်တော့မည်နည်း။

ထို့ကြောင့် မည်သည့် ဖုံးကွယ်မှုမျှ မရှိတော့ဘဲ နတ်စွမ်းရည် မျိုးစုံကို အသုံးပြု၍ ရူးသွပ်စွာဖြင့် ကျန်းချဲ့ကို ဖိနှိပ် တိုက်ခိုက်တော့သည်။ လီချန်ကောက ဘာမှ မပြောသော်လည်း သူ၏ မျက်လုံးများထဲရှိ အကြည့်က ဤအချက်ကို သဘောတူကြောင်း ရှင်းလင်းစွာ ပြသနေသည်။ မျက်လုံးများထဲတွင် အေးစက်သော အလင်းတန်းများ ဖြတ်ပြေးသွားပြီးနောက် မျက်တောင်တစ်ခတ်အတွင်း အလင်းတန်း တစ်ခုက လေဟာနယ်ကို ဖောက်ထွက်လာပြီး ကျန်းချဲ့ထံသို့ တိုက်ရိုက် ပြေးဝင်သွားသည်။

လီချန်ကော၏ ရုတ်တရက် တိုက်ခိုက်မှုကို ကျန်းချဲ့က အနည်းငယ်မျှ မလောဘဲ အတွေးတစ်ချက်ဖြင့် မျက်ခုံးကြားရှိ နတ်သင်္ကေတ လင်းလက်လာကာ အဖြူနှင့် အမည်း ရောယှက်နေသော မိစ္ဆာမီးတောက် တစ်လွှာ ပေါက်ကွဲထွက်လာပြီး ထိုတိုက်ခိုက်မှုကို လေဟာနယ်ထက်တွင် ချက်ချင်း ဖျက်ဆီးပစ်လိုက်သည်။

ထို့နောက်။

နေရာရွှေ့ပြောင်းသွားသည့်အလား မျက်တောင်တစ်ခတ်အတွင်း ဖေဟုန်ရိ၏ အရှေ့သို့ ရောက်ရှိသွားပြီး ကောင်းကင်ကြီး ပြိုကျလာမည့် အရှိန်အဝါဖြင့် တိုက်ရိုက် ထိုးချလိုက်သည်။ ကြောက်မက်ဖွယ်ကောင်းသော ဖိအားများ ပေါက်ကွဲထွက်လာသည်နှင့် ဖေဟုန်ရိ၏ မျက်လုံးများ ပြူးကျယ်သွားတော့သည်။

ကျန်းချဲ့က အသေအလဲ မတိုက်ခိုက်ကြောင်း ထိုအမျိုးသမီး သိထားသော်လည်း ဤတိုက်ခိုက်မှုကို ကိုယ်တိုင် ခံစားလိုက်ရချိန်တွင် ရင်ထဲတွင် ထိတ်လန့်တုန်လှုပ်သွားရသည်။ အလျင်အမြန်ပင် ကျန်းချဲ့နှင့် ပူးပေါင်းကာ နတ်လက်နက်ကို အသုံးပြု၍ အရှေ့ဘက်တွင် ကာကွယ်လိုက်သည်။

"ဘုန်း..."

ပြင်းထန်သော ပေါက်ကွဲသံကြီး ထွက်ပေါ်လာသည်။ လေဟာနယ် ပင် ပေါက်ကွဲသွားသည့်အလား ကြောက်မက်ဖွယ်ကောင်းသော ဂယက်ရိုက်ခတ်မှုများက အရပ်လေးမျက်နှာ ရှစ်မျက်နှာသို့ ပျံ့နှံ့သွားပြီး ဖေဟုန်ရိ၏ လက်ထဲရှိ နတ်လက်နက် မှာလည်း အက်ကွဲကြောင်းများ ပေါ်လာကာ ကျန်းချဲ့၏ ရိုက်ချမှုကြောင့် ပေရာနှင့်ချီ နောက်ဆုတ်သွားရပြီး သွေးများ အဆက်မပြတ် အန်ချလိုက်ရသည်။ သေချာပေါက် နောက်ထပ် တိုက်ခိုက်နိုင်စွမ်း မရှိတော့ချေ။

ထိုအမျိုးသမီးက ကျန်းချဲ့၏ တိုက်ခိုက်မှုကို တမင်တကာ ပူးပေါင်း အကောင်အထည် ဖော်ပေးနေခြင်း ဖြစ်သည်။ ထို မိစ္ဆာဝိညာဉ် ဝင်မပါမချင်း ထိုအမျိုးသမီးအနေဖြင့် ကျန်းချဲ့ကို ပြန်လည် တိုက်ခိုက်ရန် လုံးဝ ဆန္ဒမရှိပေ။ ထိုအမျိုးသမီး၏ ဤတိုက်ခိုက်ရေး စွမ်းအားက ကျန်းချဲ့ကို အခက်တွေ့စေသဖြင့် အမြန်ဆုံး ဖယ်ထုတ်ပစ်ရန် လိုအပ်သည်။ ထို့နောက်မှသာ လီချန်ကောနှင့် ယင်စုရှင်းတို့ကို ရင်ဆိုင်ရန် အခွင့်အရေး ရနိုင်မည် ဖြစ်သည်။

"သေစမ်း"

ကျန်းချဲ့က ဖေဟုန်ရိကို တိုက်ခိုက်၍ နောက်ဆုတ်သွားစေချိန်တွင် တစ်ဖက်ရှိ လီချန်ကောကလည်း လက်ပိုက်ကြည့်နေမည် မဟုတ်ပေ။ ဓားမကြီးကို ကိုင်ဆောင်ကာ ကောင်းကင်ကို ခွဲထုတ်မတတ် အရှိန်အဝါဖြင့် ပြေးဝင်လာပြီး ဥက္ကာပျံ တစ်ခုအလား မျက်တောင်တစ်ခတ်အတွင်း ကျန်းချဲ့ကို ခုတ်ပိုင်းလိုက်သည်။ ရုတ်တရက် ရာသီဥတုများ ပြောင်းလဲသွားသည်။

ဤဓားချက် အောက်တွင် ပတ်ဝန်းကျင်ရှိ လေဟာနယ် တစ်ခုလုံး အနည်းငယ် မှေးမှိန်သွားသည့်အလား ဖြစ်သွားသည်။ ကျန်းချဲ့၏ တစ်ကိုယ်လုံးရှိ သွေးကြောများ ထောင်ထလာပြီး ကိုယ်တွင်းရှိ ဓမ္မစွမ်းအင်များကို ရူးသွပ်စွာ ထုတ်သုံးလိုက်ကာ သွေးချီစွမ်းအင်များကလည်း ရုပ်ခန္ဓာကိုယ် အတွင်းမှ ထွက်ပေါ်လာပြီး ရွှေရောင် အလင်းတန်း မျက်နှာပြင် တစ်ခုအဖြစ် အရှေ့ဘက်တွင် ဖန်တီးလိုက်သည်။

"ဘုန်း..."

ဓားတစ်ချက် အောက်တွင် ရွှေရောင် မျက်နှာပြင် ချက်ချင်း ပြိုကွဲသွားသည်။ သို့သော် လီချန်ကော၏ ဤဓားချက်ကို ကျန်းချဲ့က ဟွမ်ကူးနတ်လှံတံဖြင့် တိုက်ရိုက် ခုခံတားဆီးလိုက်သည်။ ယခုအချိန်တွင် သူ၏ မျက်ဝန်းများထဲရှိ နတ်ဘုရား အလင်းတန်းများက ကောင်းကင်ကို ဖောက်ထွက်မတတ် တောက်ပနေပြီး ရုပ်ခန္ဓာကိုယ် ကလည်း ပေအနည်းငယ်မျှ ကြီးမားလာသည့်အလား ဖြစ်နေသည်။

"ဟား..."

ကျန်းချဲ့၏ ကိုယ်တွင်း အင်္ဂါများမှ နဂါးဟိန်းသံ တစ်ခု ထွက်ပေါ်လာပြီး ဤအခိုက်အတန့်တွင် သူ၏ တစ်ကိုယ်လုံးမှ အလင်းတန်းများ တောက်ပနေကာ အထွတ်အထိပ်သို့ ရောက်ရှိနေသည့်အလား လက်သီး တစ်ချက် ထိုးချလိုက်ရာ နဂါးဟိန်းသံက ကောင်းကင်ယံသို့ ပဲ့တင်ထပ်သွားသည်။ ရွှေရောင် စစ်မှန်သော နဂါးကြီးက ဟိန်းဟောက်ကာ ထွက်ပေါ်လာပြီး လီချန်ကောကို တစ်ကိုက်တည်းဖြင့် မျိုချရန် ကြိုးစားလိုက်သည်။

"ဟွန့်"

လီချန်ကောက အေးစက်စွာ နှာခေါင်းရှုံ့လိုက်ပြီး သွားကြိတ်ကာ သူ၏ တစ်ကိုယ်လုံးမှ နတ်ဘုရား အလင်းတန်းများ တောက်ပလာပြီး ကြောက်မက်ဖွယ်ကောင်းသော နတ်စွမ်းရည်ဖြင့် ကျန်းချဲ့၏ ဤတိုက်ခိုက်မှုကို တားဆီးလိုက်သည်။ အခြားတစ်ဖက်တွင် မြေခွေး အမြီး တစ်ခု ရုတ်တရက် ပေါ်ထွက်လာပြီး ကျန်းချဲ့၏ ရင်ဘတ်ကို ရိုက်ချလိုက်သည်။ ကြောက်မက်ဖွယ်ကောင်းသော စွမ်းအားက အလွန် ကြီးမားလှသည်။

"လှည့်ကွက်လေး တွေနဲ့များ ဆရာကြီး လာလုပ်နေတယ်"

ကျန်းချဲ့က လီချန်ကောကို တစ်ချက်တည်းဖြင့် နောက်ဆုတ်သွားစေပြီးနောက် နောက်သို့ လှည့်ကာ လက်သီးဖြင့် ဝင်လာသော မြေခွေး အမြီးကို ထိုးချလိုက်သည်။ ထိုတိုက်ခိုက်မှု အောက်တွင် လေဟာနယ် ပင် မျက်တောင်တစ်ခတ်အတွင်း ရပ်တန့်သွားသည့်အလား ဖြစ်သွားပြီး ထို့နောက် ခရမ်းရောင် မြေခွေး အမြီးက အပိုင်းပိုင်း အစစ ပြတ်ထွက်သွားတော့သည်။

တစ်ချိန်တည်းမှာပင် အမျိုးသမီး တစ်ဦး၏ အော်ဟစ်သံ လည်း ထွက်ပေါ်လာသည်။ ယင်စုရှင်း၏ နာကျင်စွာ အော်ဟစ်သံ ဖြစ်ကြောင်း ကျန်းချဲ့ သိလိုက်သော်လည်း သူက အနည်းငယ်မျှ သနားညှာတာမည့် အတွေး မရှိပေ။ ချက်ချင်းပင် အခွင့်ကောင်းကို ယူ၍ တန်ပြန် တိုက်ခိုက်လိုက်ပြီး သွေးချီစွမ်းအင်များ ပေါက်ကွဲထွက်လာကာ ရွှေရောင် စစ်မှန်သော နဂါး ကိုးကောင်က ခန္ဓာကိုယ် အတွင်းမှ ထွက်ပေါ်လာပြီး ကောင်းကင်ယံသို့ ဟိန်းဟောက်လိုက်ကြသည်။ ဖေဟုန်ရိ၏ တားဆီးမှု မရှိတော့သဖြင့် ယခုအခါ ကျန်းချဲ့က အခြေအနေကို အပြည့်အဝ ထိန်းချုပ်ထားနိုင်ပြီ ဖြစ်သည်။

ထိပ်တန်း စစ်မှန်သောသခင် နှစ်ဦး ဆိုရင်တောင် ဘာဖြစ်လဲ။ ယနေ့ သူ သတ်ဖြတ်ပစ်မည်။

မျက်တောင်တစ်ခတ်အတွင်း နဂါးဟိန်းသံများ ကောင်းကင်သို့ ပဲ့တင်ထပ်သွားပြီး ကမ္ဘာဖျက်မတတ် နဂါးကြီးများ ပေါက်ကွဲထွက်လာကာ ရွှေရောင် စစ်မှန်သော နဂါး ကိုးကောင်က တစ်ပြိုင်နက်တည်း ဝင်ရောက် တိုက်ခိုက်ပြီး လီချန်ကောကို ဝိုင်းရံထားလိုက်ကြသည်။ ကျန်းချဲ့ကတော့ ဟွမ်ကူးနတ်လှံတံကို ကိုင်ဆောင်ကာ မျက်တောင်တစ်ခတ်အတွင်း ယင်စုရှင်း၏ အရှေ့သို့ ရောက်ရှိသွားသည်။

နတ်လှံတံဖြင့် တစ်ချက် ရိုက်ချလိုက်ရာ နတ်လက်နက် ပင် အက်ကွဲသွားတော့သည်။ ယင်စုရှင်းမှာလည်း လွင့်စင်သွားပြီး ထိုအမျိုးသမီး၏ မျက်ဝန်းများထဲတွင် ထိတ်လန့်ကြောက်ရွံ့မှုများ ပြည့်နှက်နေသည်။ ထို့နောက် ယင်ယန် မီးတောက်ပင်လယ်ကြီးက နေရာတစ်ခုလုံးကို ဖုံးလွှမ်းသွားပြီး ကျန်းချဲ့က သွေးချီစွမ်းအင်များကို အဆက်မပြတ် ထုတ်သုံးကာ ယင်စုရှင်းကို အရင်ဆုံး သတ်ဖြတ်ရန် ဆုံးဖြတ်လိုက်သည်။

ဤမျှလောက် ကြောက်မက်ဖွယ်ကောင်းသော ဖိအားများ အောက်တွင် ယင်စုရှင်းမှာ ခုခံရန် အတွေးပင် မရှိတော့ဘဲ ကျန်းချဲ့၏ အဆက်မပြတ် တိုက်ခိုက်မှုများကို ခံနေရရင်း လီချန်ကော ထံမှ အကူအညီ တောင်းနေရတော့သည်။

ကမ္ဘာပျက်မတတ် ဖြစ်နေသော ဤမြင်ကွင်းကို လူတိုင်းက အံ့အားသင့်စွာ ကြည့်နေကြသည်။ လေဟာနယ်ထက်ရှိ မိစ္ဆာနတ်ဘုရား ဓမ္မရုပ်တုကလည်း အခွင့်ကောင်းကို ယူကာ ခရမ်းရောင် မြေခွေး ဓမ္မရုပ်တု၏ အမြီးကို ဖမ်းဆုပ်လိုက်ပြီး သဲအိတ် တစ်အိတ်အလား ဘယ်ညာ အဆက်မပြတ် လွှဲရိုက်နေတော့သည်။

လုံးဝ ပြန်လည် ခုခံနိုင်စွမ်း မရှိတော့ပေ။ မျက်တောင်တစ်ခတ်အတွင်း ထိုအမျိုးသမီး၏ ပတ်ဝန်းကျင်ရှိ ပိုင်ယွဲ့ စစ်ကြောင်းများ အားလုံး အဖျက်ဆီး ခံလိုက်ရပြီး ခရမ်းရောင် မြေခွေး ဓမ္မရုပ်တုမှာလည်း လျင်မြန်စွာ ပြိုကွဲသွားတော့သည်။

"သေစမ်း"

လီချန်ကောက ယခုအချိန်တွင် တစ်ခုခုကို လှုံ့ဆော်လိုက်သည့်အလား တစ်ကိုယ်လုံးတွင် သွေးကြောများ ပေါ်ထွက်လာပြီး မိမိကိုယ်ကိုယ် သွေးပိုက်ကွန် တစ်ခုဖြင့် လွှမ်းခြုံထားသကဲ့သို့ ဖြစ်သွားကာ အမြန်နှုန်း ကလည်း အဆမတန် မြင့်တက်သွားသည်။

ဓားဖြင့် ကျန်းချဲ့၏ ခေါင်းကို ခုတ်ပိုင်းလိုက်ရာ နောက်တစ်ခဏတွင် ဤဓားချက်ကို ကျန်းချဲ့က နတ်လှံတံဖြင့် တားဆီးလိုက်သည်။ သို့သော် လီချန်ကော၏ ဓားက ကျန်းချဲ့၏ ပခုံးပေါ်သို့ ကျရောက်သွားပြီး ကာကွယ်ရေး အလွှာများ အားလုံး အဆက်မပြတ် ပြိုကွဲသွားတော့သည်။ ကျန်းချဲ့၏ နှုတ်ခမ်းထောင့်မှ သွေးများ စီးကျလာသော်လည်း အနည်းငယ်မျှ နောက်လှည့်မကြည့်ပေ။ အစောပိုင်း ဓားချက်ကို သူ မတားဆီးနိုင်၍ မဟုတ်ဘဲ အကယ်၍ နောက်လှည့်၍ တားဆီးလိုက်ပါက ယင်စုရှင်းက အခွင့်ကောင်း ယူကာ လွတ်မြောက်သွားမည် ဖြစ်သောကြောင့်ပင်။

သူက ဒဏ်ရာ အလဲအလှယ် လုပ်နေခြင်း ဖြစ်သည်။ သူ ကိုယ်တိုင် လီချန်ကော၏ ဓားချက်ကို ခံယူပြီး ယင်စုရှင်းကို အရင်ဆုံး သတ်ဖြတ်ပစ်ရန် ရည်ရွယ်ထားခြင်း ဖြစ်သည်။

လီချန်ကော၏ ဓားချက် ကျရောက်လာချိန်တွင် ကျန်းချဲ့ကလည်း လက်သီးဖြင့် ပြင်းထန်စွာ ထိုးချလိုက်သည်။ သူ၏ လက်မောင်း တစ်ခုလုံးတွင် အနက်ရောင် သံချပ်ကာများ ဖုံးလွှမ်းနေပြီး သူ၏ လက်တစ်ဖက်က အနက်ရောင် လှောင်ချိုင့်ကြီး တစ်ခုအလား ဖြစ်သွားကာ ယင်စုရှင်း၏ ရင်ဘတ်ကို လက်သီးဖြင့် ထိုးချလိုက်သည်။

"ဘုန်း..."

နဂါးဟိန်းသံက ပေါက်ကွဲထွက်လာပြီး ယင်စုရှင်း၏ ရုပ်ခန္ဓာကိုယ်က ကျန်းချဲ့၏ လက်သီး တစ်ချက် အောက်တွင် ပြိုကွဲသွားကာ လေဟာနယ်ထက်တွင် သွေးမှုန်များ အဖြစ်သို့ ပြောင်းလဲသွားတော့သည်။ ထို့နောက် ကျန်းချဲ့က ဂရုမစိုက်တော့ဘဲ ယင်ယန် မိစ္ဆာမီးတောက် တစ်လွှာကို ပစ်လွှတ်လိုက်သည်။

ထို့နောက် သူက ဆက်လက် ဂရုမစိုက်တော့ဘဲ အာရုံ အားလုံးကို လီချန်ကော အပေါ်သို့သာ ပြောင်းလဲလိုက်သည်။ အကယ်၍ ဆက်လက် အာရုံမစိုက်ပါက လီချန်ကောက သူ၏ အသက်ကို ယူသွားမည်မှာ သေချာသည်။

"ဘုန်း..."

ကျန်းချဲ့၏ ရုပ်ခန္ဓာကိုယ် ပေါက်ကွဲထွက်လာပြီး ကိုယ်တွင်း အင်္ဂါများ လှုပ်ခတ်ကာ အဆုံးအစမရှိသော ရွှေရောင် အလင်းတန်းများက ကောင်းကင်နှင့် မြေကြီးကို လင်းထိန်သွားစေသည်။ ရွှေရောင် စစ်မှန်သော နဂါးများက လီချန်ကောကို နောက်ဆုတ်သွားစေပြီး ကျန်းချဲ့က ပခုံးပေါ်မှ ဖျက်ဆီးခံလိုက်ရသော အနက်ရောင် သံချပ်ကာများနှင့် အရိုးပေါ်သည် အထိ နက်ရှိုင်းသော ဒဏ်ရာကို တစ်ချက် ကြည့်လိုက်သည်။ လီချန်ကောကို ကြည့်ကာ နှုတ်ခမ်းထောင့်တွင် ရက်စက်သော အပြုံးတစ်ခု ပေါ်လာသည်။

"အခု မင်း အလှည့် ရောက်ပြီ အနှောင့်အယှက် ပေးမယ့်သူ နှစ်ယောက် မရှိတော့ဘူး ဆိုတော့ မင်း ဘယ်လောက်ကြာကြာ တောင့်ခံနိုင်မလဲ ကြည့်ကြသေးတာပေါ့"

"ဘုန်း..."

နောက်ထပ် မိုးကြိုးပစ်သံ တစ်ခု ထွက်ပေါ်လာပြီး မဟာသိုင်းသခင်ကြီးများစွာ၏ တိုက်ပွဲ အောက်တွင် နောက်ဆုံး၌ မိုးသည်းထန်စွာ ရွာသွန်းလာတော့သည်။ ကောင်းကင် ပေါက်ပြဲသွားသည့်အလား မိုင်တစ်ရာ ပတ်လည် တစ်ခုလုံး ဤအခိုက်အတန့်တွင် မိုးရေများဖြင့် လွှမ်းခြုံသွားတော့သည်။

ရွှေရောင် အလင်းတန်းများ တောက်ပလာပြီး ကျန်းချဲ့ စကားပြောပြီးသည်နှင့် တစ်ပြိုင်နက် မိုးရေများကို ဖောက်ထွက်ကာ ကမ္ဘာဖျက်မည့် မိစ္ဆာနတ်ဘုရား အလား လီချန်ကောထံသို့ ပြေးဝင်သွားသည်။ ယခုအခါ ဖေဟုန်ရိက နောက်ဆုတ်သွားပြီး ယင်စုရှင်းကလည်း ကျန်းချဲ့၏ ဒဏ်ရာ အလဲအလှယ် လုပ်မှု အောက်တွင် သေဆုံးသွားကာ အလွန် သနားစရာ ကောင်းသော ယွမ်ယင်း သာ ကျန်ရစ်တော့သည်။

ယခုအခါ ကျန်းချဲ့၏ ပြိုင်ဘက်က လီချန်ကော တစ်ဦးတည်းသာ ကျန်ရှိတော့သည်။ ရွှေရောင် သွေးချီစွမ်းအင် မျက်နှာပြင်က ကောင်းကင် တစ်ခွင်လုံး ပြည့်နှက်နေသော မိုးရေများကို ဖောက်ထွက်သွားပြီး ပတ်ဝန်းကျင်ရှိ အရာအားလုံးကို အငွေ့ပျံသွားစေသည့်အလား ဖြစ်သွားသည်။ သူ ကိုယ်တိုင်က လေဟာနယ်ထက်သို့ တက်လှမ်းသွားပြီးနောက် အားယူကာ ပြန်လည် ကျဆင်းလာရာ ရွှေရောင် ဥက္ကာပျံ တစ်ခုအလား ဖြစ်သွားသည်။

အရာအားလုံးကို ဖျက်ဆီးပစ်မည့် အရှိန်အဝါဖြင့် တိုက်ရိုက် ကျဆင်းလာတော့သည်။

"ဘုန်း..."

ဤတိုက်ခိုက်မှုကို ကျန်းချဲ့က အစွမ်းကုန် အသုံးပြုလိုက်ပြီး လီချန်ကောက လျှို့ဝှက် ပညာရပ်ကို အသုံးပြုထားသော်လည်း ဤအခိုက်အတန့်တွင် ကျန်းချဲ့၏ ရိုက်ချမှုကြောင့် ပေရာနှင့်ချီ နောက်ဆုတ်သွားရပြီး လေဟာနယ်ထက်မှ ပြုတ်ကျကာ အောက်ဘက်ရှိ မြေကြီးပေါ်တွင် ဧရာမ တွင်းကြီး တစ်ခု ဖြစ်သွားသည် အထိ ရိုက်ချခံလိုက်ရသည်။

"ဘုန်း..."

"ဘုန်း..."

"ဘုန်း..."

ကျန်းချဲ့က အခွင့်ကောင်း ယူကာ ဆက်တိုက် တိုက်ခိုက်လိုက်ပြီး ယခင်က အောင့်အည်းထားသမျှ ဒေါသများ အားလုံးကို ထုတ်ဖော်လိုက်သည်။ နတ်စွမ်းရည် မျိုးစုံကို အဆက်မပြတ် ထုတ်သုံးလိုက်ရာ လီချန်ကောမှာ သွေးများ အဆက်မပြတ် အန်ချနေရပြီး ကျန်းချဲ့၏ ရိုက်ချမှုကြောင့် တစ်ကြိမ်ပြီး တစ်ကြိမ် လွင့်စင်သွားရသည်။

သူတို့ နှစ်ဦးက ပိုင်ယွဲ့ စစ်တပ်ကြီး အတွင်းသို့ပင် ရောက်ရှိသွားကြပြီး ဖြတ်သန်းသွားသော နေရာတိုင်းတွင် ဖရိုဖရဲ ဖြစ်နေကာ ဂယက်ရိုက်ခတ်မှုများကြောင့်ပင် ပိုင်ယွဲ့၏ စစ်ကြောင်းများ ပျက်စီးသွားပြီး ပိုင်ယွဲ့ စစ်သည် အများအပြား မှာလည်း ဂယက်ရိုက်ခတ်မှု အောက်တွင် အမှုန့် အဖြစ်သို့ ပြောင်းလဲသွားတော့သည်။ သို့သော် ကျန်းချဲ့ ဖြစ်စေ လီချန်ကော ဖြစ်စေ မည်သူကမျှ အနည်းငယ်မျှ ဂရုမစိုက်ကြပေ။ ယခုအချိန်တွင် သူတို့၏ မျက်လုံးများထဲ၌ တစ်ယောက်ကို တစ်ယောက်သာ မြင်တွေ့နေရသည်။

သို့သော် လီချန်ကောက မည်မျှပင် ကြိုးစားစေကာမူ ယခုအချိန်တွင် ကျန်းချဲ့က အပြည့်အဝ အသာစီး ရနေပြီး လီချန်ကောကို ခေါင်းမဖော်နိုင်အောင် ဖိနှိပ်ထားသည်။ သို့တိုင်အောင် လီချန်ကော၏ ကိုယ်ပေါ်တွင် ကျန်းချဲ့က ဒဏ်ရာ အများအပြားကို ဖန်တီးနိုင်ခဲ့သည်။

သွေးများ အဆက်မပြတ် စီးကျနေပြီး လူတစ်ကိုယ်လုံး သွေးများဖြင့် ရွှဲရွှဲစိုနေသည့်အလား ဖြစ်နေတော့သည်။