အခန်း ၇၅၉

အခန်း(၇၅၉)

ဝံပုလွေလူသားတွေရဲ့ အူသံတွေက သူ့ရဲ့ နတ်ဘုရားပန်းပဲဖို အစိတ်အပိုင်းတွေကို တန်ခိုးစွမ်းရည် ပိုထုတ်လုပ်နိုင်အောင် တွန်းအားပေးနေခဲ့တယ်။ အဲဒါက သူ့ကို ပိုပြီး သန်မာလာစေခဲ့တာပဲ။

"သူတို့ရဲ့ အူသံတွေမှာ တစ်ခုခု ထူးခြားတာများ ရှိနေလို့လား" လို့ သူက ပါမောက္ခကို မေးလိုက်တယ်။

"ထူးထူးခြားခြားတော့ မရှိပါဘူး၊ ကြားဖူးသလောက်တော့ ဒါက သူတို့အတွက် စိတ်အားတက်ကြွစေတဲ့ အရာတစ်ခုပဲလေ၊ လာသွားရအောင်" လို့ ပါမောက္ခက ပြောလိုက်တယ်။ "မျိုးနွယ်စု အကြီးအကဲနဲ့ သွားစကားပြောပြီး ရှေးဟောင်းအမွေအနှစ်ကို ပြန်ရှာကြတာပေါ့"။

ပါမောက္ခက မိုက်ကယ်ကို ဂိုးလ်ဘလက်ဒ် မျိုးနွယ်စုထဲ ခေါ်သွားခဲ့ပြီး အရည်တစ်မျိုးကို သောက်ကာ မူးယစ်နေကြတဲ့ ဝံပုလွေလူသားတွေကြားထဲကနေ တိုးထွက်သွားခဲ့ကြတယ်။

"ဧည့်သည်တွေပဲ၊ လာကြ၊ လမင်းကို ပူဇော်ရင်း အတူတူ သောက်ကြတာပေါ့" လို့ ဝံပုလွေလူသားတစ်ယောက်က ပြောရင်း မိုက်ကယ်နဲ့ ပါမောက္ခကို သစ်သားခွက်တစ်ခွက်စီ ကမ်းပေးလာတယ်။

"မယူနဲ့" လို့ ပါမောက္ခက သတိပေးလိုက်တယ်။ "အဲဒီအထဲမှာ ဝံပုလွေအဆိပ်ပင် ရောထားတာ၊ အဲဒါက ဝံပုလွေလူသားတွေအတွက်တော့ နည်းနည်းပဲ အဆိပ်သင့်စေပြီး မူးယစ်စေရုံလောက်ပဲ၊ သာမန်လူသားတွေအတွက်တော့ ရလဒ်က အများကြီး ပိုဆိုးသွားနိုင်တယ်"

ဒါက ဝံပုလွေလူသားတွေ ဘာလို့ ဒီလောက်တောင် ပျော်နေကြသလဲဆိုတာကို ရှင်းပြနေသလိုပဲ။ ဒီမှာ လိုအပ်နေတာက တလက်လက်တောက်ပနေတဲ့ ရောင်စုံမီးရောင်တွေလောက်ပဲဖြစ်ပြီး ဒါသာရှိရင် မိုက်ကယ်တစ်ယောက် သူကိုယ်တိုင် ပွဲဆူနေတဲ့ ပါတီတစ်ခုရဲ့ အလယ်မှာ ရောက်နေတယ်လို့တောင် ထင်သွားမိမှာပဲ။

သူတို့ပတ်ဝန်းကျင်က အမျိုးသားတွေနဲ့ အမျိုးသမီးတွေဟာ လောကကြီးကို ဂရုမစိုက်တော့တဲ့အလား ကခုန်အောင်ပွဲခံနေကြတယ်။ သူတို့က လူသားတွေဆိုတာကိုတောင် သတိထားမိကြပုံ မရဘူး။

"ငြိမ်ငြိမ်နေကြစမ်း ဝံပုလွေတို့၊ ငါတို့ရဲ့ ဧည့်သည်တွေကို နေရာလေး နည်းနည်းလောက် ပေးလိုက်ကြပါ၊ သူတို့က အဝေးကြီးကနေ လာခဲ့ကြတာ"

နားရွက်တွေမှာ ရွှေကွင်းတွေ အများကြီး ဝတ်ဆင်ထားတဲ့ အဘိုးအိုတစ်ယောက် သူတို့ဆီကို ခြေတရွတ်ဆွဲပြီး လျှောက်လာချိန်မှာပဲ လူအုပ်ကြီးက လမ်းဖယ်ပေးလိုက်ကြတယ်။ သူ့ရဲ့ ဘယ်ဘက်ခြေထောက်က ညာဘက်ထက် သိသိသာသာ သေးသွယ်နေပြီး ကြွက်သား ဒါမှမဟုတ် အဆီဆိုတာ လုံးဝ မရှိသလောက်ပဲ။

မသန်မစွမ်း ဖြစ်နေပေမဲ့လည်း အဲဒီအဘိုးအိုက သူ့ဘေးနားက တခြားဝံပုလွေလူသားတွေထက် အကောင်းစား ရွှေနားကွင်းတွေကို ဆင်မြန်းထားခဲ့တယ်။ သူက ဂိုးလ်ဘလက်ဒ် မျိုးနွယ်စုရဲ့ အကြီးအကဲဆိုတာကို ခန့်မှန်းရ လွယ်ကူလှတယ်။

"ကြိုဆိုပါတယ်၊ ကျွန်တော့်သားက ခင်ဗျားတို့ကို ကျွန်တော်တို့ရဲ့ ရိုးရိုးရှင်းရှင်း စံအိမ်လေးဆီ လမ်းကြုံဝင်လာဖို့ အောင်အောင်မြင်မြင် ဆွဲဆောင်နိုင်ခဲ့ပုံရတယ်"

ပါမောက္ခက ဟန်ဆောင်နေတာတွေကို ဂရုမစိုက်ဘဲ လိုရင်းကိုသာ တိုက်ရိုက် ပြောချလိုက်တယ်။ "အကြီးအကဲ ကလော့ဇ်၊ ကျွန်တော် သိချင်တဲ့ အချက်အလက်တချို့ ခင်ဗျားဆီမှာ ရှိတယ်လို့ သူက ကျွန်တော့်ကို ကတိပေးထားတယ်၊ ဒါ အမှန်ပဲလား၊ ဒါမှမဟုတ် သူက လပြည့်ဝန်းရှေ့မှာ လိမ်ညာသွားတာလား"

ကလော့ဇ် က တဟားဟား ရယ်မောလိုက်တယ်။ "ဒါ အမှန်ပါပဲ ပါမောက္ခရယ်၊ အထဲကို ဝင်ခဲ့ပါ၊ ကျွန်တော်တို့ ဆွေးနွေးကြတာပေါ့"

တဟုန်းဟုန်း တောက်လောင်နေတဲ့ မီးပုံဘေးနားက သာမန် သစ်လုံးအိမ်လေးတစ်ခုဆီကို သူတို့ ခေါ်ဆောင်ခံလိုက်ရတယ်။ အကြီးအကဲရဲ့ အိမ်ဖြစ်နေပေမဲ့လည်း အနီးအနားက တခြားအိမ်တွေနဲ့ ကြည့်ရတာ ကွာခြားမှု မရှိဘူးလေ။ သိပ်ပြီးတော့လည်း ခမ်းနားကြီးကျယ်မနေဘူး။

အထဲရောက်တာနဲ့ သူတို့ပတ်ဝန်းကျင်က ပရိဘောဂတွေအပေါ်မှာ အရေခွံဆုတ်ထားတဲ့ သားမွေးတွေ ခင်းကျင်းထားတာကို မိုက်ကယ် သတိပြုမိလိုက်တယ်။

ဒါက တိရစ္ဆာန်တွေဆီကလား ဒါမှမဟုတ် သူတို့ရဲ့ မျိုးနွယ်တူ ဝံပုလွေလူသားတွေဆီကလားဆိုတာကို သူ့ကို တွေးတောမိသွားစေတယ်။ တကယ်လို့ ဒုတိယတစ်ခုသာ မှန်နေခဲ့ရင်တော့ ဒီမျိုးနွယ်စုတွေနဲ့ပတ်သက်ပြီး သူ တွေးထင်ထားတာတွေကို ပြန်စဉ်းစားရတော့မှာပဲ။

"ရှေးဦးဟိန်းသံ... ရှင်းပြပါ" လို့ ထိုင်ခုံမှာ ထိုင်လိုက်တာနဲ့ တစ်ပြိုင်နက် ပါမောက္ခက တောင်းဆိုလိုက်တယ်။

အကြီးအကဲ ကလော့ဇ် က သူ့ရဲ့ အစေခံတွေဆီကနေ အကူအညီ လုံးဝမတောင်းဘဲ ပါမောက္ခနဲ့ မျက်နှာချင်းဆိုင်က ထိုင်ခုံဆီကို ခြေဆွဲပြီး ဖြည်းဖြည်းချင်း လျှောက်သွားခဲ့တယ်။

"အမှန်အတိုင်း ပြောရရင်တော့ ပါမောက္ခ... ကျွန်တော်တို့ ရှေးဟောင်းအမွေအနှစ်အကြောင်း ကြားနေရတာ အတန်ကြာနေပြီ၊ ပြီးတော့ အဲဒါကို ရယူဖို့ ကိုယ်ပိုင် အစီအစဉ်တွေလည်း ရှိခဲ့တာပေါ့"။

ပါမောက္ခက ရှေးဟောင်းအမွေအနှစ်ကို ချက်ချင်းပဲ ကာကွယ်ချင်စိတ် ဝင်သွားခဲ့ပြီး အကြီးအကဲ ကလော့ဇ် ကို သံသယမျက်လုံးတွေနဲ့ စိုက်ကြည့်လိုက်တယ်။

"ဟို ဟိုး... မစိုးရိမ်ပါနဲ့ ပါမောက္ခ။ နဂါးမျိုးနွယ်ဝင်တွေက ဒါကို ပိုင်ဆိုင်ထားမှန်း သိလိုက်ရကတည်းက အဲဒီဆန္ဒတွေကို ကျွန်တော် စွန့်လွှတ်လိုက်တာ ကြာပါပြီ။ တခြားမျိုးနွယ်စုတွေနဲ့ ပြဿနာတွေ ရှုပ်နေရတဲ့အချိန်မှာ သူတို့ထဲက ဘယ်သူနဲ့မှ အချိန်ကြာမြင့်မယ့် စစ်ပွဲမျိုး ဆင်နွှဲဖို့ ကျွန်တော့်မှာ ရည်ရွယ်ချက် မရှိပါဘူး"

"ဒါပေမဲ့ ခင်ဗျားက ဘာလို့ ဒါကို လိုချင်ရတာလဲ" လို့ ပါမောက္ခက မေးလိုက်တယ်။

"နဂါးမျိုးနွယ်ဝင်တွေ လိုချင်ရတဲ့ အကြောင်းရင်းနဲ့ အတူတူပါပဲ ပါမောက္ခ။ ဘာလို့လဲဆိုတော့ ကျွန်တော်တို့က ဒဏ္ဍာရီလာ မှော်သားရဲတွေရဲ့ ဆင်းသက်လာသူတွေလို့ ကျွန်တော် ယုံကြည်နေလို့ပဲ"။

ဒီလောက်သန်မာတဲ့ မျိုးစိတ်တွေအားလုံးက ဒဏ္ဍာရီလာ မှော်သားရဲတွေရဲ့ ဆင်းသက်လာသူတွေ ဖြစ်ချင်နေကြတာကို မိုက်ကယ် တစ်ယောက် ထူးဆန်းတယ်လို့ ခံစားလိုက်ရတယ်။ သူ သိထားသလောက်တော့ ဒါက ဘာမှ ပြောင်းလဲသွားစေမှာ မဟုတ်ဘူးလေ။

ကံကောင်းစွာနဲ့ပဲ ပါမောက္ခကလည်း အဲဒီမေးခွန်းကိုပဲ ထပ်မေးလိုက်တယ်။ "ဘာကြောင့်လဲ"

အကြီးအကဲ ကလော့ဇ် က သူ့ရဲ့ မကောင်းတဲ့ခြေထောက်ကို ကုတ်လိုက်တယ်။ "ကောလာဟလတွေအရတော့ ရှေးဟောင်းအမွေအနှစ်ဆိုတာ အတိတ်က အကြွင်းအကျန်တစ်ခုတည်း မဟုတ်ဘူး။ ဒါက အနာဂတ်မှာ ဘယ်လို ဆင့်ကဲပြောင်းလဲရမလဲဆိုတာအတွက် သဲလွန်စတစ်ခုလည်း ဖြစ်တယ်၊ တချို့ကတော့ ရှေးဟောင်းအမွေအနှစ်ကို ဖော်ထုတ်နိုင်တာက အဲဒါကို ရှာဖွေတွေ့ရှိသူတွေကို ရှေးဦးဟိန်းသံ နိုးထလာစေဖို့ လမ်းပြပေးလိမ့်မယ်လို့ ဆိုကြတယ်"

ပါမောက္ခက အသံထွက်အောင် ရယ်မောလိုက်တယ်။ "ဖူး... အဓိပ္ပာယ်မရှိတာ၊ ဒဏ္ဍာရီလာ မှော်သားရဲတွေပဲ ရှေးဦးဟိန်းသံကို သုံးနိုင်တာလေ။ တန်ခိုးစွမ်းရည်ကိုတောင် လွှမ်းမိုးနိုင်တဲ့ အဲဒီ ရက်စက်ကြမ်းကြုတ်တဲ့အသံကို ထုတ်လုပ်ပေးတာက သူတို့ရဲ့ ထူးခြားတဲ့ ခန္ဓာကိုယ်တွေပဲ။ ဘယ်ခေတ်သစ် လူတစ်ပိုင်းသတ္တဝါ ဒါမှမဟုတ် မှော်သားရဲ တစ်ပိုင်းသတ္တဝါကမှ ဒါကို ပြန်လည်ထုတ်ဖော်နိုင်မှာ မဟုတ်ဘူး။ ဒါက ရုပ်ပိုင်းဆိုင်ရာအရကို မဖြစ်နိုင်တာ၊ အဲဒါက လူသားတွေမှာရှိတဲ့ သဟဇာတ စွမ်းအားကို နိုးထစေနိုင်တယ်လို့ တစ်ယောက်ယောက်က ပြောနေတာနဲ့ အတူတူပဲ။ ကျွန်တော်တို့တွေ လက်ရှိအခြေအနေကို ဆုတ်ယုတ်သွားကတည်းက အဲဒီစွမ်းအားကို ဆုံးရှုံးခဲ့တာ ကြာပြီ"

ဒါပေမဲ့ အကြီးအကဲ ကလော့ဇ် ကတော့ ခေါင်းမာနေဆဲပဲ။ "နဂါးမျိုးနွယ်ဝင်တွေက ဒါကို ဘာလို့ ဒီလောက်တောင် လိုချင်နေကြတယ်လို့ ခင်ဗျား ထင်လဲ ပါမောက္ခ။ သူတို့ကလည်း အဲဒါကို ယုံကြည်နေလို့ပေါ့၊ သူတို့က ရှေးဦးဟိန်းသံကို နိုးထစေမယ့်သူတွေ ဖြစ်ချင်နေကြတာ"

'ရှေးဦးဟိန်းသံ' လို့ မိုက်ကယ်က တွေးတောလိုက်တယ်။ 'အဲဒါက တန်ခိုးစွမ်းရည်ကို လွှမ်းမိုးနိုင်တယ်။ နဂါးမျိုးနွယ်ဝင်တွေနဲ့ ဝံပုလွေလူသားတွေ လိုချင်နေတာလည်း အံ့ဩစရာ မရှိတော့ပါဘူးလေ'

သူကိုယ်တိုင်တောင် ဒါကို သူ့အတွက် ရယူချင်စိတ်တွေ ပေါ်လာခဲ့တယ်။

"ကျွန်တော် ရှေးဟောင်းအမွေအနှစ်ကို ခဏလောက် မြင်လိုက်ရတယ် ပါမောက္ခ။ အဲဒီမှာ ကျန်ရစ်နေတဲ့ တန်ခိုးစွမ်းရည်တွေ ရှိနေပြီး အဲဒါကို ကိုင်တွယ်တဲ့သူတိုင်းရဲ့ သွေးကို ဖောက်ထွက်နိုင်တယ်"

"ဘာ" လို့ ပါမောက္ခက အော်ဟစ်လိုက်တယ်။

"အဲဒါက ကိုင်တွယ်တဲ့သူတိုင်းရဲ့ မျိုးရိုးကို စမ်းသပ်နေတာ ဖြစ်ရမယ်" လို့ အကြီးအကဲ ကလော့ဇ် က ပြောလိုက်တယ်။ "ဒဏ္ဍာရီလာ မှော်သားရဲဆီကနေ ရှင်းလင်းတဲ့ သွေးမျိုးဆက်ရှိသူတွေသာ အရိုးထဲက ရတနာကို ရယူဖို့ ထိုက်တန်တာလေ။ အဲဒါ သေချာတယ်"

ပါမောက္ခက ဒီအချက်အလက်တွေအားလုံးကို ခေါင်းထဲမှာ တွေးတောဆင်ခြင်နေရင်း ခေါက်တုံ့ခေါက်ပြန် လမ်းလျှောက်နေခဲ့တယ်။

ရှေးဟောင်းအမွေအနှစ်မှာ အဲဒီလိုမျိုး လုံခြုံရေးအစီအမံ ရှိနေတယ်ဆိုတဲ့ အချက်က အထဲမှာ တန်ဖိုးရှိတဲ့ တစ်စုံတစ်ခုကို တကယ်ပဲ ဖုံးကွယ်ထားရမယ်ဆိုတဲ့ အဓိပ္ပာယ်ပဲ။

ဝံပုလွေလူသားတွေနဲ့ နဂါးမျိုးနွယ်ဝင်တွေကတော့ အဲဒီထဲမှာ ရှေးဦးဟိန်းသံရဲ့ လျှို့ဝှက်ချက် ပါဝင်နေလောက်တယ်လို့ ကောက်ချက်ချထားကြတယ်။

"ခင်ဗျားက ကျွန်တော့်ကို ဘာလို့ ဒါတွေ လာပြောနေတာလဲ" လို့ ပါမောက္ခက မေးလိုက်တယ်။ "ကျွန်တော့်ကို ဒီအချက်အလက်တွေ ပေးလို့ ခင်ဗျား ဘာအကျိုးအမြတ်များ ရမှာမို့လို့လဲ"

အကြီးအကဲ ကလော့ဇ် က ပခုံးတွန့်လိုက်တယ်။ "တကယ်လို့များ ရှေးဟောင်းအမွေအနှစ်က ကျွန်တော်တို့ ထင်ထားတဲ့အရာ ဖြစ်လာခဲ့ရင် လူအတော်များများက အဲဒီကနေ အကျိုးအမြတ် အများကြီး ရသွားကြမှာပဲ။ နဂါးမျိုးနွယ်ဝင် ဇိုဗီရု နဲ့ မဟာမိတ်ဖွဲ့ထားတဲ့သူတွေဆိုရင် အလွန် အဆင်ပြေတဲ့ အနေအထားတစ်ခုကို ရောက်သွားကြလိမ့်မယ်"

ပါမောက္ခက စကားလုံးတွေရဲ့ နောက်ကွယ်က အဓိပ္ပာယ်ကို နားလည်သွားခဲ့တယ်။ "ခင်ဗျားရဲ့ အစ်ကိုလို လူမျိုးကို ပြောတာလား"

ဂိုးလ်ဘလက်ဒ် အကြီးအကဲရဲ့ မျက်ခုံးက တွန့်သွားခဲ့တယ်။ "အဟမ်း... ဟုတ်တယ်လေ၊ ကျွန်တော့်အစ်ကိုက ဇိုဗီရု နဲ့ မဟာမိတ်ဖွဲ့ထားတာ။ ပြီးတော့ သူ့ရဲ့ ဓားသမားပြိုင်ပွဲကသာ ကျွန်တော်တို့ မျှော်လင့်ထားသလို ဖြစ်သွားခဲ့ရင် သူက အော်ဘတ်ကုမ္ပဏီ နဲ့ပါ မဟာမိတ် ဖွဲ့ဖြစ်သွားလိမ့်မယ်။ အဲဒါက သူ့ကို အလွန် အားကိုးရတဲ့ မဟာမိတ်နှစ်ခု ရရှိသွားစေမှာဖြစ်ပြီး ပြိုင်ပွဲစုံ မှာလည်း အခွင့်အရေးကောင်းတွေ ရလာစေလိမ့်မယ်"

'ဒါဆို ဘရောင်းဘလဒ် မျိုးနွယ်စု ဝံပုလွေလူသား အကြီးအကဲက သူ့ရဲ့ အစ်ကိုဖြစ်နေတာပဲ'

နောက်ဆုံးတော့ ပါမောက္ခ ပြောတာ မှန်နေခဲ့တယ်။ သူတို့နှစ်ယောက်ကြားမှာ တကယ့်ကို မကျေလည်မှုတွေ ရှိနေခဲ့တာပဲ။

"ခင်ဗျားရဲ့ ပြဿနာကို ကျွန်တော် သဘောပေါက်ပါပြီ" လို့ ပါမောက္ခက ပြောလိုက်တယ်။ "ဒါပေမဲ့ ကျွန်တော်တို့ကို ဘာလုပ်စေချင်တာလဲ၊ ခင်ဗျားအတွက်တော့ ရှေးဟောင်းအမွေအနှစ်ကို ကျွန်တော် ခိုးပေးမှာ မဟုတ်ဘူးနော်"

အကြီးအကဲ ကလော့ဇ် က ခေါင်းယမ်းလိုက်တယ်။ "ခင်ဗျား အမြဲတမ်း လုပ်ချင်နေခဲ့တဲ့ အရာကိုပဲ လုပ်ဖို့ ကျွန်တော်က အလိုရှိတာပါ ပါမောက္ခ၊ ရှေးဟောင်းခေတ်နဲ့ပတ်သက်တဲ့ ဗဟုသုတတွေကို ခင်ဗျားကို ဖြန့်ဝေစေချင်တာ"

ပါမောက္ခက နားမလည်နိုင် ဖြစ်သွားခဲ့ပေမဲ့ မိုက်ကယ်ကတော့ ဂိုးလ်ဘလက်ဒ် အကြီးအကဲ ဆိုလိုချင်တဲ့ အဓိပ္ပာယ်ကို ရှင်းရှင်းလင်းလင်း သဘောပေါက်လိုက်တယ်။

"ခင်ဗျားက သူတို့အပေါ် ဖိအားပေးချင်နေတာပဲ" လို့ သူက ပြောလိုက်တယ်။

အကြီးအကဲ ကလော့ဇ် က မိုက်ကယ်ကို သဘောကျသွားတဲ့ အကြည့်နဲ့ ကြည့်လိုက်တယ်။ "ဟုတ်တယ်၊ ရှေးဟောင်းအမွေအနှစ်ကို ဘယ်လို ဖော်ထုတ်ရမလဲဆိုတာ စဉ်းစားဖို့ အချိန်ကို သူတို့ကို ကျွန်တော် မပေးချင်ဘူး။ ဒီအချက်အလက်ကို ဖြန့်ဝေလိုက်ခြင်းအားဖြင့် နယူးစပါတာ ထဲက တခြားအုပ်စုတွေကပါ ဒါကို စိတ်ဝင်စားလာကြမှာဖြစ်ပြီး အဲဒီအဓိပ္ပာယ်က သူတို့ကို တားဆီးဖို့ ကျွန်တော် ဘာတစ်ခုမှ လုပ်နေစရာ မလိုတော့ဘူးဆိုတဲ့ သဘောပဲ"

ပါမောက္ခက ခဏလောက် တိတ်ဆိတ်သွားခဲ့တယ်။ "သူတို့ ဒါကို မဖော်ထုတ်နိုင်သေးဘူးလို့ ခင်ဗျားကို ဘာက ထင်သွားစေတာလဲ"

"ဘာလို့လဲဆိုတော့ လက္ခဏာတွေကို ကျွန်တော်တို့ မမြင်ရသေးလို့ပဲ ပါမောက္ခ။

ရှေးဦးဟိန်းသံက ကျွန်တော်တို့ ခြေအောက်က မြေကြီးကိုတောင် တုန်ခါသွားစေလိမ့်မယ်လို့ ဆိုကြတယ်။

လူတွေရဲ့ တန်ခိုးစွမ်းရည်တွေ ထိန်းမနိုင်သိမ်းမရ ဖြစ်သွားတဲ့အခါ သူတို့ရဲ့ ရင်ဘတ်ကို ဖိကိုင်ထားရလောက်တဲ့အထိ ဖြစ်စေလိမ့်မယ်။

ပြီးတော့ စွမ်းအား အပြောင်းအလဲကြီးတစ်ခုကို ရောင်ပြန်ဟပ်ဖို့အတွက် ကျွန်တော်တို့ ရှူရှိုက်နေတဲ့ လေထုကိုတောင် ခဏလောက် လေးလံသွားစေလိမ့်မယ်"

* * * * * * * *

စာစဉ်(၆၄)