အခန်း ၉၇၈
Vol. 70 Ch. 978
အခန်း (၉၇၈) လက်ဆောင်
လီလော့ ရုတ်တရက်ပေးအပ်လာသော လက်ဆောင်ကြောင့် လီလင်ကျင်းမှာ စကားမထွက်နိုင်အောင် ဖြစ်သွားသည်။ ၎င်းမှာ စိတ်ကူးယဉ်၍မရနိုင်လောက်အောင် တန်ဖိုးရှိသော မျက်လုံးအဆင့်သုံးလုံးခရမ်းရောင်ရတနာ တစ်ခု ဖြစ်သည်။ အနောက်ပိုင်းဒေသရှိ လီမျိုးနွယ်စုတွင် လူငယ်မျိုးဆက်ထဲမှ မည်သူမျှ ဤကဲ့သို့သော အရာမျိုးကို ရရှိခဲ့ဖူးခြင်း မရှိပေ။
"မယူနိုင်ပါဘူး.. ဒါက တန်ဖိုးကြီးလွန်းတယ်…နင်ပဲ သိမ်းထားလိုက်ပါတော့…နင် မလိုဘူးဆိုရင်တောင် လီဖုန်းရီကိုပဲ ပေးလိုက်ပါ" ဟု လီလင်ကျင်းက အလျင်အမြန် ငြင်းဆန်လိုက်သည်။
"အစ်မရဲ့ အရင်ရတနာကို ဝိဉာဉ်စားနတ်ဆိုးက ဖျက်ဆီးပစ်လိုက်တာလေ..အခု အစ်မမှာ ဘာရတနာမှ မရှိတော့ဘူး…အစ်မက ကျွန်တော့်ရဲ့ ဝိဉာဉ်အစောင့်ရှောက် ဖြစ်တဲ့အတွက် အစ်မရဲ့ စွမ်းအားက ကျွန်တော့်အတွက် အရေးကြီးတယ်..အစ်မသာ ပိုပြီး အစွမ်းထက်လာရင် ဘယ်သူကမှ ကျွန်တော်ကို လောဘဇောနဲ့ လိုက်ကြည့်ရဲတော့မှာ မဟုတ်ဘူး" ဟု လီလော့က ပြုံး၍ ပြောလိုက်သည်။
လီလင်ကျင်း ဘာမှမပြောနိုင်တော့ပေ။
သူမအတွက် ရတနာတစ်ခုကို ရရှိရန် သူ အန္တရာယ်ကြားထဲ တိုးဝင်ခဲ့ခြင်းလော..
"ဒါက အန္တရာယ်များလွန်းပါတယ်"
"အစ်မ တကယ် ငြင်းချင်သေးတယ်ဆိုရင်တော့ ဒါကို ခဏငှားထားတယ်လို့ပဲ သဘောထားလိုက်ပါတော့… ဒီနေရာကနေ ဘေးကင်းကင်းနဲ့ ထွက်သွားနိုင်ဖို့ အစ်မရဲ့ အကူအညီ လိုအပ်နေလို့ပါ"
ဤသို့သော စည်းရုံးစကားကြောင့် လီလင်ကျင်း ခေတ္တမျှ တိတ်ဆိတ်သွားပြီးနောက် မလွှဲသာမရှောင်သာ ခေါင်းညိတ်လိုက်သည်။ အေးစက်နေသော စိမ်းပြာရောင်ဝါးမြွေနဂါးတောင်ဝှေးကို သတိကြီးစွာဖြင့် ဆုပ်ကိုင်လိုက်ရင်း သူမ၏ ပဲ့တင်ထပ်သံစွမ်းအားများမှာ တောင်ဝှေးထဲသို့ စီးဝင်သွားပြီး အကြေးခွံများ တောက်ပလာသည်။ အလွန်မှိန်ဖျော့သော အငွေ့အသက်ဖြင့် တောင်ဝှေးကိုယ်ထည်တစ်လျှောက် ရစ်ပတ်ကူးခတ်နေသော စိမ်းပြာရောင် မြွေနဂါးပုံရိပ်တစ်ခုကို မြင်တွေ့ရသည်။
သူမ လက်ကို ပေါ့ပေါ့ပါးပါး ဝှေ့ယမ်းလိုက်သည်နှင့် စိမ်းပြာရောင် အလင်းတန်းတစ်ခု ပန်းထွက်သွားသည်။
ရည်ရွယ်ချက်ရှိသည်ဖြစ်စေ၊ မရှိသည်ဖြစ်စေ ထိုအလင်းတန်းက ချင်ယင်းထံသို့ တန်းတန်းမတ်မတ် ဦးတည်သွားသည်။ ချင်ယင်း ထိုအရာကို မြင်လိုက်ရသည့်အခါ ရွှေရောင် ပဲ့တင်ထပ်သံစွမ်းအားဖြင့် ဖုံးအုပ်ထားသော လက်သီးဖြင့် တုံ့ပြန်လိုက်သည်။ ထိုအခါ ပြင်းထန်သော စွမ်းအင်လှိုင်းများ ပေါက်ကွဲထွက်သွားပြီး လေဟာနယ်ပင် တုန်ခါသွားသည်။
ချင်ယင်းသည်လည်း တုန်ရီသွားပြီး မျက်နှာအမူအရာ မှိုင်းညို့သွားသည်။ စိမ်းပြာရောင်အဆိပ်က သူ့လက်သီးကို အရည်ပျော်ကျသွားစေသဖြင့် ထိုအဆိပ်ကို ဖယ်ရှားရန် ပဲ့တင်ထပ်သံစွမ်းအားကို အလျင်အမြန် လည်ပတ်စေလိုက်ရသည်။
ရိုးရှင်းသော ထိတွေ့မှုတစ်ခုကပင် လီလင်ကျင်း၏ လက်ထဲရှိ စိမ်းပြာရောင်ဝါးမြွေနဂါးတောင်ဝှေး၏ အစွမ်းကို သူ ခံစားလိုက်ရသည်။ သူ အလွန် ဒေါသထွက်မိသလို သူမကို ကြောက်ရွံ့သွားမိသည်။
သူမသည် နဂိုရှိရင်းစွဲကပင် ရင်ဆိုင်ရခက်ခဲသူဖြစ်ပြီး ယခုတွင် မျက်လုံးအဆင့်သုံးလုံးခရမ်းရောင်ရတနာပါ ပိုင်ဆိုင်ထားသဖြင့် တိုက်ခိုက်ကြမည်ဆိုပါပ သူ အနိုင်ရရှိနိုင်မည် မဟုတ်ပေ။
"လီလင်ကျင်း… နင် ဘာလုပ်ဖို့ ကြိုးစားနေတာလဲ"
"နည်းနည်း စမ်းကြည့်တာပါ" ဟု လီလင်ကျင်းက ပေါ့ပေါ့ပါးပါး တုံ့ပြန်လိုက်သည်။
လီလော့ကလည်း သစ်နက်သားငှက်မွှေးယပ်တောင်ကို ကိုင်ထားရင်း ပြုံးလိုက်သည်။ တစ်ချက် ယပ်ခတ်လိုက်သည်နှင့် အသက်စွမ်းအင်များ ပြည့်နှက်နေသော အဖြူရောင်အလင်းတန်း သူတို့နှစ်ဦး၏ ကိုယ်ပေါ်သို့ ကျရောက်လာသည်။
ထိုအခါ ဝိဉာဉ်စားနတ်ဆိုးနှင့် တိုက်ခိုက်စဉ်က ရရှိခဲ့သော ဒဏ်ရာများမှာ အလွန်လျင်မြန်စွာ ပျောက်ကင်းသွားသည်ကို လီလင်ကျင်း ခံစားလိုက်ရသည်။
ဤနည်းလမ်းက လီလော့ အရင်က အသုံးပြုခဲ့သော ပဲ့တင်ထပ်သံပညာရပ်များထက် အဆပေါင်းများစွာ သာလွန်နေသည်။
"အစ်မလင်ကျင်း…အစ်မ တိုက်ခိုက်နေချိန်မှာ ကျွန်တော် နောက်ကနေ အစွမ်းကုန် ကူညီပေးသွားမှာပါ.." ဟု လီလော့က ပြုံး၍ ပြောလိုက်သည်။
လီလင်ကျင်းပင် ဤအခြေအနေကို အနည်းငယ် ရယ်စရာကောင်းသည်ဟု ခံစားလိုက်ရသည်။ သူတို့၏ အခန်းကဏ္ဍများက ပြောင်းပြန် ဖြစ်နေသလိုပင်။ ပုံမှန်အားဖြင့်ဆိုလျှင် စိတ်အားထက်သန်သော အမျိုးသားဖြစ်သည့် လီလော့က ရှေ့တန်းတွင် တိုက်ခိုက်ပြီး သူမက နောက်ကနေ ပံ့ပိုးပေးရမည် မဟုတ်ပါလော။
သို့သော် ၎င်းတို့မှာ အသေးအဖွဲ ကိစ္စများသာ ဖြစ်သည်။ လီလင်ကျင်း၏ ဖြူဖျော့နေသော လက်ချောင်းသွယ်သွယ်လေးများက စိမ်းပြာရောင်ဝါးမြွေနဂါးတောင်ဝှေးကို တင်းကျပ်စွာ ဆုပ်ကိုင်ထားပြီး တောင်ဝှေးအတွင်းရှိ မကုန်ဆုံးနိုင်သော စွမ်းအင်များကို ခံစားနေရသည်။
မည်မျှပင် အန္တရာယ်များပါစေ၊ လီလော့ကို ဘေးကင်းစွာဖြင့် ဤနေရာမှ ထွက်ခွာသွားစေရန် သူမ အစွမ်းကုန် လုပ်ဆောင်သွားမည် ဖြစ်သည်။ တခြားသူများ သေဆုံးသွားရလျှင်ပင် သူမ ဂရုစိုက်မည် မဟုတ်ပေ။
ဤအချိန်တွင် ရွှေရောင်ခန်းမဆောင်အတွင်းရှိ ခရမ်းရောင်မျက်လုံးအဆင့် ရှေးဟောင်းရတနာများအားလုံးကို အောင်မြင်စွာ သိမ်းပိုက်ပြီးဖြစ်သဖြင့် ရှုပ်ထွေးမှုများမှာ ငြိမ်သက်သွားသည်။ ရတနာမရရှိသူများက စိတ်မကောင်းဖြစ်နေကြသော်လည်း အခြားသူများ၏ လက်ထဲမှ လုယူရန် နည်းလမ်းမရှိပေ။
သို့သော် သူတို့ ရတနာများအတွက် တိုက်ခိုက်နေစဉ်မှာပင် ပင်မခန်းမဆောင် အပြင်ဘက်တွင် အနက်ရောင်မြူခိုးများ မရပ်မနားဘဲ ဆက်လက် ပျံ့နှံ့လျက်ရှိသည်။
ရတနာတစ်ခုကို ရရှိသွားလျှင်ပင် အကြီးမားဆုံးသော မေးခွန်းမှာ သူတို့ မည်သို့ ထွက်ပြေးရမည်နည်း ဆိုသည့်အချက်ပင် ဖြစ်သည်။
ချင်ရီက ရှေ့သို့ ခြေလှမ်းအနည်းငယ် လှမ်းလိုက်ပြီး သူမ၏ လှပသော မျက်ဝန်းများဖြင့် ခန်းမဆောင်ကို ဖုံးလွှမ်းထားသော မြူခိုးများကို စိုက်ကြည့်လိုက်ပြီး လေးနက်သော အမူအရာ ပေါ်လာသည်။
"အားလုံးပဲ…ကျွန်မတို့ အင်အားစုဖို့ အမြန် လုပ်ကြရအောင်… ဒီနည်းလမ်းနဲ့ ကမ္ဘာခြားသက်ရှိကို တိုက်ခိုက်နိုင်မလားဆိုတာ ကြည့်ရမှာ"
လီလော့ ခန်းမဆောင်အတွင်းကို အမြန် ဝေ့ကြည့်လိုက်တော့ ပုလဲရှစ်လုံးအဆင့်ရှိသူ သုံးဦး၊ ပုလဲခြောက်လုံးအဆင့်ရှိသူ အများအပြားနှင့် ပုလဲငါးလုံးအဆင့်ရှိသူ ပိုမို များပြားသည်ကို တွေ့လိုက်ရသည်။ သို့သော် အများစုမှာ ပုလဲတစ်လုံးနှင့် နှစ်လုံးအဆင့်များသာ ဖြစ်သည်။
အချို့သော အခြေအနေများတွင် သူတို့၏ စုပေါင်းစွမ်းအားကို လျှော့တွက်၍ မရပေ။ သူတို့သာ ပူးပေါင်းလိုက်မည်ဆိုလျှင် ကောင်းကင်ပဲ့တင်ထပ်သံအဆင့် ရှိသူများပင် သူတို့၏ ပြိုင်ဘက် မဖြစ်နိုင်ပေ။
သို့သော် ဝိဉာဉ်စားနတ်ဆိုးကတော့ ရိုးရှင်းသော ပြိုင်ဘက် မဟုတ်ပေ။
ထိုနတ်ဆိုး၏စစ်မှန်သော စွမ်းအားက မြို့စားအဆင့် ဖြစ်နိုင်ပြီး ဝိဉာဉ်ပဲ့တင်ထပ်သံဂူ အတွင်းတွင် အကြီးအကျယ် ဖိနှိပ်ခံထားရသော်လည်း ကောင်းကင်ပဲ့တင်ထပ်သံအဆင့် ကျင့်ကြံသူများကိုပင် အပြီးသတ် ချေမှုန်းနိုင်စွမ်း ရှိသည်။ ပိုမို ဒုက္ခပေးသည်မှာ သူသည် ဝိဉာဉ်စားနတ်ဆိုး တစ်ကောင်တည်း မဟုတ်ပေ။ကူးစက်ခံထားရသူများကို ထိန်းချုပ်ထားနိုင်သဖြင့် အားလုံး၏ ဖိအားကို ပိုမို တိုးပွားစေလိမ့်မည်။
"ပုလဲငါးလုံးအဆင့်နဲ့ အထက်ရှိသူတွေ ပူးပေါင်းပြီး ကမ္ဘာခြားသက်ရှိကို တိုက်ခိုက်ကြမယ်…ကျန်တဲ့သူတွေက ကူးစက်ခံထားရသူတွေကို ကိုင်တွယ်ပါ… အကယ်၍ ကျွန်မတို့ ရှုံးနိမ့်ခဲ့ရင်တောင် ဒီခန်းမဆောင်ကို အတားအဆီးတစ်ခုအဖြစ် အသုံးပြုပြီး အချိန်ဆွဲထားကြရအောင်" ဟု ချင်ရီက အေးစက်စွာ အကြံပြုလိုက်သည်။
ကျန်သူများကလည်း သဘောတူသည့်အနေဖြင့် ခေါင်းညိတ်လိုက်ကြသည်။
လီလင်ကျင်းက လီလော့ကို ဆွဲခေါ်သွားပြီး သူမ၏ ပဲ့တင်ထပ်သံစွမ်းအားဖြင့် ကာကွယ်ထားသော လျှို့ဝှက်သတင်းစကားကို ပေးပို့လိုက်သည်။
"ဝိဉာဉ်စားနတ်ဆိုးကို ငါတို့ ခုခံနိုင်တဲ့ အခြေအနေ မဟုတ်တော့ဘူးဆိုရင် နင် အခွင့်အရေးရှာပြီး ထွက်ပြေးရမယ်… ငါ နင့်အတွက် လမ်းတစ်ခု ဖန်တီးပေးမယ်"
သူမသည် ဝိဉာဉ်စားနတ်ဆိုး၏ ကြောက်မက်ဖွယ်ကောင်းပုံကို ကောင်းစွာ သိရှိထားသဖြင့် ပူးပေါင်းဆောင်ရွက်မှုအပေါ် များစွာ အားမလိုအားမရ ဖြစ်နေသည်။ ဝိဉာဉ်ပဲ့တင်ထပ်သံဂူ၏ ဖိအားပေးမှု ရှိနေသော်လည်း ဤနေရာရှိ လူအားလုံး ပူးပေါင်းရင်ဆိုင်လျှင်ပင် အောင်မြင်နိုင်မည်ဟု သူမ မယုံကြည်ပေ။
လီလော့က သူမ၏ မျက်ဝန်းများကို တည့်တည့်ကြည့်ရင်း မျက်မှောင်ကြုတ်လိုက်သည်။
"ကျွန်တော်တို့ နှစ်ယောက်လုံး အခွင့်အရေးရှာပြီး အတူတူ ထွက်ပြေးကြမယ်"
လီလင်ကျင်းက မချိပြုံး ပြုံးပြလိုက်သော်လည်း ပြန်မဖြေပေ။
ဝိဉာဉ်စားနတ်ဆိုးက သူမကို ပစ်မှတ်ထားနေခြင်း ဖြစ်သည်။ ထို့ကြောင့် သူတို့ နှစ်ယောက်အတူတူ ရှိနေပါက ထွက်ပြေးရန် ပိုမို ခက်ခဲလိမ့်မည်။
ပင်မခန်းမဆောင်အတွင်းရှိ လူတိုင်းက လျင်မြန်စွာ ချဉ်းကပ်လာသော အနက်ရောင်မြူခိုးများကို ကြောက်ရွံ့စွာ ကြည့်ရှုရင်း အသင့်ပြင်ထားကြသည်။ ဤအချိန်တွင် ကောင်းကင်တစ်ခုလုံးမှိုင်းညို့နေသကဲ့သို့ ဖြစ်နေသည်။
ဆယ်မိနစ်ခန့် အကြာတွင်….
အနက်ရောင်မြူခိုးများက ဗဟိုဌာနတစ်ခုလုံးကို ဝန်းရံလိုက်ပြီး ပင်မခန်းမဆောင်ကို တဖြည်းဖြည်းနှင့် ပိတ်ဆို့လာသည်။
မြူခိုးများထဲမှ တိုးတိုးတိတ်တိတ် ပြောဆိုသံများလည်း ထွက်ပေါ်လာပြီး ထူးဆန်းပြီး ပုံပျက်နေသော အရိပ်များက မှင်ရည်ကဲ့သို့ အနက်ရောင် မျက်လုံးများဖြင့် ခုန်ထွက်လာပြီး ၎င်းတို့ ရှိနေရုံနှင့်ပင် အပျက်သဘောဆောင်သည့် ခံစားချက်များကို ထုတ်လွှတ်နေသည်။
အမှောင်စွမ်းအင် ကူးစက်ခံထားရသည့် တကိုယ်တော်ကျင့်ကြံသူများ၏ ခန္ဓာကိုယ်များက စိတ်ကူးမယဉ်နိုင်လောက်အောင် ပုံပျက်သွားပြီး ရုပ်ဆိုးသော သတ္တဝါများကဲ့သို့ ခြေလက်လေးဖက်ဖြင့် မြေပြင်ပေါ်တွင် တွားသွားနေကြသည်။
နောက်ဆုံးတွင် မြူခိုးများက ပင်မခန်းမဆောင်မှ အကွာအဝေးတစ်ခုတွင် ရပ်တန့်သွားပြီး လူတစ်ယောက်၏ ဧရာမမျက်နှာပြင်အဖြစ် ပြောင်းလဲသွားသည်။ ၎င်းသည် ခန်းမဆောင်အတွင်းရှိ လူများကို စိုက်ကြည့်ပြီးနောက် ဆာလောင်မွတ်သိပ်မှုနှင့် လောဘတို့ဖြင့် ပြည့်နှက်နေသော ကြမ်းတမ်းသည့် ရယ်မောသံကို ထုတ်လွှတ်လိုက်သည်။
ထိုရယ်မောသံ လူတိုင်း၏ နားထဲသို့ ရောက်ရှိသွားသည့်အခါ စိတ်အနှောင့်အယှက် ဖြစ်ခြင်း၊ ဒေါသထွက်ခြင်းနှင့် လူသတ်လိုစိတ်များကို နိုးဆွပေးလိုက်သည်။ စိတ်ဓာတ် ပိုမိုအားနည်းသူများကတော့ မျက်လုံးများ နီရဲလာကြသည်။
"အားလုံးပဲ… စိတ်ကို တည်ငြိမ်အောင် ထားပါ…သူ့ရဲ့ လှုံ့ဆော်မှုနောက်ကို မလိုက်ပါနဲ့" ဟု ချင်ရီက သတိပေးလိုက်သည်။
သတိပေးနေရင်းနှင့် သူမ၏ လက်ချောင်းထိပ်မှ အပြာရောင် ဝိညာဉ်အရည်တစ်စက် ထွက်ပေါ်လာသည်။ ၎င်းကို သူမ၏ အဆင့်(၉) ပဲ့တင်ထပ်သံစွမ်းအားဖြင့် ရောနှောလိုက်သည့်အခါ လူအုပ်စုကြားသို့ လျင်မြန်စွာ ပျံ့နှံ့သွားသည့် မြူခိုးအဖြစ် ပြောင်းလဲသွားသည်။
ထိုမြူခိုးများ ထိတွေ့သွားသောအခါ လူတိုင်း စိတ်ထဲတွင် အေးမြသော ခံစားချက်ကို ရရှိသွားပြီး ကမ္ဘာခြားသက်ရှိ၏ လှုံ့ဆော်မှုများ ပျောက်ကွယ်သွားသည်။
"ဒီကမ္ဘာခြားသက်ရှိက ဘာလဲဆိုတာ ကြည့်ရအောင်…" ဟု ကျူးကျူးက အေးစက်စွာ ပြောလိုက်သည်။ သူမ လက်ကို ဝှေ့ယမ်းလိုက်သည်နှင့် ဧရာမတူကြီးတစ်လက် ပေါ်လာပြီး မှော်စာလုံးများဖြင့် ကာကွယ်ထားသော ကြမ်းပြင်ပေါ်သို့ ပြင်းထန်စွာ ဆောင့်ချလိုက်သဖြင့် မြေပြင် အက်ကွဲသွားသည်။
ထို့နောက် သူမ၏ နောက်တွင် ပုလဲရှစ်လုံး ပေါ်လာပြီး လျင်မြန်စွာ လည်ပတ်နေသည်။
သူမ ဦးဆောင်လိုက်သည်နှင့် ချင်ယင်းကလည်း အော်ဟစ်လိုက်ပြီး ပုလဲငါးလုံးအဆင့် ကျင့်ကြံသူများကို ဦးဆောင်ကာ ရှေ့သို့ တိုးသွားလေသည်။
လီလင်ကျင်းက လီလော့ကို တစ်ချက်ကြည့်လိုက်ပြီးနောက် စိမ်းပြာရောင်ဝါးမြွေနဂါးတောင်ဝှေးကို တင်းကျပ်စွာ ဆုပ်ကိုင်ကာ လေထဲသို့ ပျံတက်သွားသည်။
ရှိနေသူအားလုံး၏ နောက်တွင် ကောင်းကင်ပုလဲများ ပေါ်လာသဖြင့် တကယ့်ကို အံ့ဩဖွယ် မြင်ကွင်းတစ်ခု ဖြစ်ပေါ်လာသည်။ အဝေးမှကြည့်လျှင် ကြယ်တာရာများ ပြည့်နှက်နေသော ပင်လယ်ပြင်ကဲ့သို့ ခမ်းနားလှသည်။
မြူခိုးထဲမှ ဧရာမမျက်နှာကြီးက ထိုမြင်ကွင်းကိုကြည့်ရင်း ထူးဆန်းစွာ ရယ်မောလိုက်သည်။ ထို့နောက် ၎င်း၏ ဧရာမပါးစပ်ကို ဟလိုက်ရာ စီးဆင်းနေသော မြစ်တစ်ခုကဲ့သို့ မည်းနက်သော အရည်များ ပန်းထွက်လာသည်။ ထိုအရည်က ငါးပုပ်နံ့ကဲ့သို့ နံစော်နေပြီး ပုံပျက်နေသော အလောင်းကောင်များ ထိုအရည်ထဲတွင် ပေါ်လောပေါ်လျက် ရှိနေသည်။
ထိုအနက်ရောင်မြစ်က လီလင်ကျင်း၊ ချင်ယင်းနှင့် ကျူးကျူးတို့ဆီသို့ တန်းတန်းမတ်မတ် ဦးတည်လာနေသည်။
ထိုမြင်ကွင်းကို မြင်လိုက်ရသည့်အခါ လူအုပ်ကြီးက မဆိုင်းမတွပင် မိမိတို့၏ အစွမ်းအကုန် ထုတ်သုံးလိုက်ကြသည်။
သူတို့၏ ပဲ့တင်ထပ်သံစွမ်းအားများ အပြည့်အဝ ပေါ်လွင်နေပြီး ရရှိနိုင်သမျှ သဘာဝစွမ်းအင်များကို စုစည်းကာ အနက်ရောင်မြစ်ကို ပြန်လည် တိုက်ခိုက်လိုက်ကြသည်။
လီလင်ကျင်းက စိမ်းပြာရောင်ဝါးမြွေနဂါးတောင်ဝှေးကို ကိုင်ထားပြီး သူမ၏ ခန္ဓာကိုယ်အတွင်းမှ ပဲ့တင်ထပ်သံစွမ်းအားများမှာ ပေါ်ထွက်လညကာ သူမ၏ နောက်တွင် ရှေးဟောင်းအငွေ့အသက်များ ပါဝင်သည့် အနက်ရောင်မြွေနဂါးကြီး ပေါ်လာသည်။
အဆင့်(၉)အဆင့်နိမ့်.. ငရဲမြွေနဂါး ပဲ့တင်ထပ်သံ….
သူမ၏ ပဲ့တင်ထပ်သံ ပေါ်လာပြီးနောက် လက်ထဲရှိ စိမ်းပြာရောင်ဝါးမြွေနဂါးတောင်ဝှေး တုန်ခါသွားပြီး စိမ်းပြာရောင်စွမ်းအင်များ ထွက်ပေါ်လာကာ ဧရာမမြွေနဂါးကြီးအဖြစ် ပြောင်းလဲသွားသည်။
မြွေနဂါးကြီးက ပေါ်လာပြီးနောက် လီလင်ကျင်းကို ပျော်ရွှင်စွာ နှုတ်ဆက်လိုက်သလို အသံပြုနေသည်။
လီလင်ကျင်း၏ ပဲ့တင်ထပ်သံက စိမ်းပြာရောင်ဝါးမြွေနဂါးတောင်ဝှေးနှင့် အလွန် ကိုက်ညီနေပုံရသည်။
သူမ တောင်ဝှေးကို ဝှေ့ယမ်းလိုက်သည်နှင်ဧ့ ရာမမြွေနဂါးကြီးက ပါးစပ်ဟလိုက်သည်။ ခဏအကြာတွင် အဆိပ်ပြင်းသော အလင်းတန်းတစ်ခု ပန်းထွက်လာသည်။ ထိုအဆိပ်အလင်းတန်းက ယခင်ကထက် ပိုမိုကြီးမားပြီး အကျယ်ပေတစ်ရာကျော် ရှိသည်။ ၎င်းက လေထုကို ခွင်းထွက်သွားပြီး တခြားသူများ၏ တိုက်ခိုက်မှုများနှင့်အတူ အနက်ရောင်မြစ်ကို ထိမှန်သွားလေသည်။
ဝုန်း!
ထိုအခါ စွမ်းအင်များ ပေါက်ကွဲထွက်ပြီး လေဟာနယ်ပင် အပိုင်းပိုင်း ကွဲထွက်သွားသော်လည်း အနက်ရောင်မြစ်က တိုက်ခိုက်မှုများကို ဆက်လက် တိုက်စားနေသည်။
ကံမကောင်းစွာပင် ထိုအနက်ရောင်မြစ်က ဘယ်တော့မှ မကုန်ဆုံးနိုင်သော ရင်းမြစ်တစ်ခုမှ လာသည်နှင့် တူနေသည်။
ရုတ်တရက် အရည်များ ကွဲထွက်သွားပြီး အနက်ရှိုင်းဆုံးနေရာမှ အသားရောင် ဧရာမလက်ကြီးတစ်ခု ဆန့်ထွက်လာသည်။ အနီးကပ်ကြည့်လျှင် ၎င်းမှာ ပုံစံအမျိုးမျိုးသော ခြေလက်အင်္ဂါများဖြင့် ဖွဲ့စည်းထားပြီး လက်ဝါးအလယ်တွင် ထက်မြက်သော သွားများဖြင့် ပြည့်နှက်နေသည့် ဧရာမပါးစပ်ကြီးတစ်ခု ရှိနေသည်မှာ ကြောက်မက်ဖွယ်ကောင်းလှသည်။
ဝုန်း!
ဧရာမလက်ကြီး ပေါ်လာသည်နှင့် လူသုံးဦးကို တိုက်ရိုက် ပုတ်ထုတ်လိုက်သည်။
အစွမ်းထက်သူများ ဝိဉာဉ်စားနတ်ဆိုး ကို တိုက်ခိုက်နေစဉ်မှာပင် ကူးစက်ခံထားရသူများ မြူခိုးထဲမှ ဒလဟော ပန်းထွက်လာပြန်သည်။
ထိုသူတို့က သရဲတစ္ဆေများကဲ့သို့ မြေပြင်ပေါ်တွင် တွားသွားကာ အဓိက တိုက်ခိုက်သူများကို အာရုံလွှဲရန် ကြိုးစားနေကြသည်။
ဝုန်း! ဝုန်း!
သို့သော် ပထမဆုံး လာရောက်သည့် ကူးစက်ခံထားရသူများကို ကောင်းကင်ကို လျှပ်စီးကဲ့သို့ ခွင်းထွက်သွားသည့် အလင်းမြားများဖြင့် အပြီးသတ် ချေမှုန်းလိုက်သည်။
လီလော့က နဂါးပုံစံ ကြီးမားသော လေးကို ကိုင်ဆောင်ကာ ပင်မခန်းမဆောင်ထဲမှ ထွက်လာပြီး ကူးစက်ခံထားရသူများဖြင့် ပြည့်နှက်နေသော ပတ်ဝန်းကျင်ကို တည်ငြိမ်စွာ ဝေ့ကြည့်လိုက်သည်။
ကူးစက်ခံထားရသူ အများအပြားက လီလော့ကို မြင်သည်နှင့် အရပ်မျက်နှာအသီးသီးမှ မြေပြင်နှင့် နံရံများပေါ်တွင် တွားသွားကာ ဝိုင်းဝန်းရန် ကြိုးစားကြသည်။
ဝုန်း!
ထိုအခါ လီလော့၏ နောက်တွင် ခမ်းနားသော ပဲ့တင်ထပ်သံပညာရပ်များ ပေါ်ထွက်လာပြီး ကူးစက်ခံထားရသူများကို ရေလှိုင်းကဲ့သို့ ဝါးမြိုလိုက်သည်။
သူသည် လေထဲတွင် ဖြစ်ပွားနေသော တိုက်ပွဲကြီးကို မော့ကြည့်ရင်း မျက်မှောင်ကြုတ်လိုက်မိသည်။
ကူးစက်ခံထားရသူများ၏ ဖိအားက သိပ်မများလှပေ။ အောင်မြင်မှုက လီလင်ကျင်း၊ ချင်ယင်းနှင့် ကျူးကျူးတို့အဖွဲ့၏ ဝိဉာဉ်စားနတ်ဆိုးကို ရင်ဆိုင်တိုက်ခိုက်မှုပေါ်တွင်သာ မူတည်နေသည်။
သူ မြင်တွေ့သလောက်အရ ဝိဉာဉ်ပဲ့တင်ထပ်သံဂူက ဝိဉာဉ်စားနတ်ဆိုးကို ပိုမိုပြင်းထန်သော တိုက်ခိုက်မှုများ မလုပ်နိုင်အောင် လုံလောက်စွာ ဖိအားပေးထားနိုင်ပါစေဟုသာ ဆုတောင်းရပေမည်။ အကယ်၍ ထိုသို့သာ မဟုတ်ပါက ထွက်ပြေးရန် အလွန် ခက်ခဲပေလိမ့်မည်။