အခန်း ၉၇၉

အခန်း (၉၇၉) နတ်ဆိုးကို တိုက်ခိုက်သော သူရဲကောင်းများ

​လီလော့၊ ချင်ရီနှင့် ကျူးတယွီတို့အဖွဲ့က အဆုံးမရှိသော ကူးစက်ခံထားရသူများကို တိုက်ခိုက်ရန် စတင်လိုက်ကြသည်။ သို့သော် လေထဲရှိ တိုက်ပွဲမှာမူ ယခုအချိန်တွင် ပိုမိုပြင်းထန်ပြီး အန္တရာယ်များလာသည်။

​လီလင်ကျင်း၊ ချင်ယင်းနှင့် ကျူးကျူးတို့ ခေါင်းဆောင်သည့် ထိုအဖွဲ့က ကောင်းကင်က ကြယ်တာရာများသဖွယ် တောက်ပနေသည့် သူတို့၏ ကောင်းကင်ပုလဲများဖြင့် သဘာဝစွမ်းအင်များကို အဆက်မပြတ် စုပ်ယူကာ ခန္ဓာကိုယ်ကို ထိန်းသိမ်းရင်း အစွမ်းကုန် တိုက်ခိုက်နေကြသည်။

​တစ်ဖက်တွင်လည်း ငါးပုပ်နံ့နံစော်သော အနက်ရောင်မြစ်ကြီးက တုံ့ပြန်ရန်အတွက် ဧရာမ လက်ကြီးကို ဖန်တီးလိုက်သည်။ ထိုလက်ဝါးအလယ်တွင် အနက်ရောင်အရည်များ စီးကျနေပြီး သွားများဖြင့် ပြည့်နှက်နေသော ပါးစပ်ကြီးတစ်ခု ဟလိုက်ကာ အဖွဲ့ဆီသို့ အနက်ရောင် အလင်းတန်းတစ်ခု ပန်းထုတ်လိုက်သည်။

​ထိုအနက်ရောင် အလင်းတန်းက ကြောက်မက်ဖွယ်ကောင်းလောက်အောင် စွမ်းအားကြီးမားပြီး သက်ရှိသတ္တဝါတစ်ကောင်သဖွယ် လှုပ်ရှားနေသဖြင့် ပစ်မှတ်ထားရန် ခက်ခဲကာ အားလုံးကို အခက်တွေ့စေသည်။

ကောင်းကင်​ပုလဲငါးလုံးအဆင့် ကျင့်ကြံသူတစ်ဦးကို ထိုအနက်ရောင် အလင်းတန်းနှင့် ထိမိသွားသဖြင့် ခုခံမှု ပျက်စီးသွားသည်။ အလင်းတန်း ထိမှန်သွားသည်နှင့် ခန္ဓာကိုယ်အတွင်းသို့ လျင်မြန်စွာ စိမ့်ဝင်သွားပြီး အသက်ရှူချိန် အနည်းငယ်အတွင်းမှာပင် အော်ဟစ်သံ ထွက်ပေါ်လာသည်။ ထိုသူ၏ ခန္ဓာကိုယ်တစ်ခုလုံးတွင် အသားနှင့် အရိုးများကို လုံးဝ ဝါးမြိုသွားသည့် အနက်ရောင် ပိုးကောင်ငယ်များဖြင့် ပြည့်နှက်သွားပြီး ဘာမျှ ကျန်ရစ်ခြင်း မရှိတော့ပေ။

​အရိပ်အယောင်ပင် မကျန်တော့ပေ။

​ဤမြင်ကွင်းက လူတိုင်းကို ထိတ်လန့်သွားစေပြီး ချွေးပြန်သွားစေသည်။ ထို့ကြောင့် မိမိတို့၏ အရေပြားကို အနက်ရောင် အလင်းတန်းတစ်စက်မျှပင် မထိမိစေရန် ဂရုစိုက်ကာ ရတနာပစ္စည်းများကို အလျင်အမြန် ထုတ်ယူပြီး ပဲ့တင်ထပ်သံပညာရပ်များဖြင့် မိမိကိုယ်ကို ကာကွယ်လိုက်ကြသည်။

​လီလင်ကျင်း၏ နောက်ရှိ ကောင်းကင်ပုလဲ ရှစ်လုံး တောက်ပလာပြီး လက်ထဲတွင် စိမ်းပြာရောင်ဝါးမြွေနဂါးတောင်ဝှေးကို တင်းကျပ်စွာ ဆုပ်ကိုင်ထားသည်။ ထို့နောက် တောင်ဝှေးကိုယ်ထည်တွင် စိမ်းပြာရောင် အလင်းတန်းများ ပေါ်လာပြီး ဝန်းရံသွားသည်။

​ထိုအလင်းတန်းများမှ မွှေးကြိုင်သော ရနံ့များ ထွက်ပေါ်လာသော်လည်း အမှန်တကယ်တွင် ကြောက်စရာကောင်းလှသည်။ ၎င်းမှာ အဆိပ်ငွေ့များ ပါဝင်သော အလင်းတန်းဖြစ်သည်။ လီလင်ကျင်း၏ အနီးသို့ ချဉ်းကပ်လာသမျှ မည်သည့်အရာမဆို အရည်ပျော်ကျသွားပေလိမ့်မည်။

​၎င်းမှာ စိမ်းပြာရောင်ဝါးမြွေနဂါးတောင်ဝှေး၏ ကာကွယ်ရေးစွမ်းရည် ဖြစ်ပြီး ၎င်း၏ ထူးခြားမှုကို ဖော်ပြနေသည်။

ပဲ့တင်ထပ်သံစွမ်းအားကို နှိုးဆွလိုက်တိုင်း စိမ်းပြာရောင် အလင်းတန်းဖြင့် ဖုံးလွှမ်းနေသော တောင်ဝှေးက အနက်ရောင် အလင်းတန်းကို တိုက်ရိုက် ရင်ဆိုင်သွားပြီး စိမ်းပြာရောင် မြွေနဂါးကလည်း တဖက်တလမ်းကနေ တိုက်ခိုက်ပေးနေသည်။

​တောင်ဝှေးကို ဝှေ့ယမ်းလိုက်သောအခါ လေဟာနယ်ပင် ကွဲအက်တော့မည့် အရိပ်အယောင်များ ပေါ်လာသည်။ ထိုစွမ်းအားများက တောင်ကိုပင် အပိုင်းပိုင်း ဖြစ်သွားစေနိုင်သည်။

​ဝုန်း!

​လီလင်ကျင်း တောင်ဝှေးကို ပြင်းထန်စွာ ဆောင့်ချလိုက်ရာ အရှိန်ကြောင့် အရိပ်များ ကျန်ရစ်ခဲ့ပြီး အနက်ရောင် အလင်းတန်းနှင့် ပြင်းထန်စွာ ထိတွေ့သွားသည်။ထိုအခါ အနက်ရောင် အလင်းတန်းမှာ အပိုင်းပိုင်း ကွဲထွက်သွားပြီး မျက်စိဖြင့် မမြင်နိုင်လောက်အောင် သေးငယ်သော ပိုးကောင်ငယ်များ သူမဆီသို့ တိုးဝင်လာသည်။ သို့သော် တောင်ဝှေးမှ ထွက်ပေါ်လာသော အဆိပ်ငွေ့များက ထိုပိုးကောင်ငယ်များကို အရည်ပျော်ကျသွားစေသည်။

​"ဒီရတနာက တကယ့်ကို အံ့ဩဖို့ကောင်းတာပဲ" ဟု လီလင်ကျင်း တွေးလိုက်မိသည်။ ဤရတနာသာ မရှိပါက ပိုးကောင်ငယ်များကို တားဆီးရန်အတွက် ပဲ့တင်ထပ်သံစွမ်းအားကို ခွဲထုတ်အသုံးပြုနေရမည်ဖြစ်ပြီး သူမ၏ အာရုံစူးစိုက်မှုကို ပျံ့လွင့်စေလိမ့်မည် ဖြစ်သည်။

​ပတ်ဝန်းကျင်ရှိ တခြားသူများကို ကြည့်လိုက်တော့ အားလုံး အတော်ပင် ဒုက္ခရောက်နေကြသည်။ သူမတစ်ယောက်တည်းသာ ဝိဉာဉ်စားနတ်ဆိုး၏ တိုက်ခိုက်မှုများမှ လောလောဆယ် ဘေးကင်းနေသည်။

သို့သော် သူမ၏ အခြေအနေက ယာယီသာ ဖြစ်ကြောင်း သိရှိထားသည်။

​အခြားသူများ မခံစားမိနိုင်သော်လည်း သူမ ခံစားမိသည်။ မြူခိုးများထဲတွင် ပုန်းကွယ်နေသော အကြည့်များက သူမတစ်ဦးတည်းကိုသာ အဓိကထား စိုက်ကြည့်နေခြင်း ဖြစ်သည်။

​၎င်းမှာ သူမအပေါ်တွင် အလင်းတန်းတစ်ခု ကျရောက်နေသကဲ့သို့ပင်။

"အားမလျှော့နဲ့… ငါတို့ အနက်ရောင်မြစ်ကို ဖျက်ဆီးပစ်ရမယ်…” ဟု ချင်ယင်းက တိုက်တွန်းလိုက်သည်။

အချိန်ကုန်လွန်လာသည်နှင့်အမျှ မြစ်ထဲမှ ထွက်ပေါ်လာသော လက်များ ပိုမို များပြားလာပြီး ဤအတိုင်းသာ ဆက်သွားပါက အလွန် အန္တရာယ်ရှိသော အခြေအနေသို့ ရောက်သွားလိမ့်မည်။

​သူ့စကားသံများ အဖွဲ့ကြားတွင် ပဲ့တင်ထပ်သွားသည်နှင့် ချင်ယင်းက ရှေ့ဆုံးမှ စတင် တိုက်ခိုက်လိုက်သည်။ ထိုအခါ ရွှေရောင် ပဲ့တင်ထပ်သံစွမ်းအားများ ကောင်းကင်သို့ ပေါက်ကွဲထွက်သွားပြီး ရွှေရောင်အမွေးအတောင် ဒါဇင်ပေါင်းများစွာအဖြစ် ပြောင်းလဲသွားသည်။ ထိုအမွေးအတောင်များက ဓားများသဖွယ် ထက်မြက်ပြီး မျက်စိကိုပင် စူးရှစေသည်။

​မြို့စားအဆင့်ပညာရပ်: ရွှေငှက်မွှေးဓားသွား…..

​ချင်ယင်း အော်ဟစ်လိုက်သည်နှင့် ကောင်းကင်ကို ခွင်းထွက်သွားနိုင်သည့် ဧရာမဓားကြီးများသဖွယ် ရွှေရောင်အမွေးအတောင်များ အောက်သို့ တိုက်ရိုက် စိုက်ဝင်သွားပြီး လက်များစွာကို အပိုင်းပိုင်း ဖြစ်သွားစေကာ အနက်ရောင်မြစ်ကို တိုက်ရိုက် ထိမှန်သွားသည်။

​ကျူးကျူး၏ တိုက်ခိုက်မှုလည်း လျင်မြန်စွာ လိုက်ပါလာသည်။ သူမ ဧရာမတူကြီးကို ဆုပ်ကိုင်ကာ တစ်ချက် ဝှေ့ယမ်းလိုက်ရာ သူမ၏ ရှေ့တွင် ဧရာမ နီရဲရဲ တောင်တန်းကြီးတစ်ခု ပေါ်လာသည်။ ၎င်း၏ အလေးချိန်က အလွန်ပြင်းထန်သဖြင့် လေထုပင် တုန်ခါသွားသည်။

​နီရဲရဲ တောင်တန်းကြီးက တူကြီး၏ အလေးချိန်နှင့် ပေါင်းစပ်သွားပြီး သူမ အသံအနည်းငယ် ပြုလိုက်ပြီး လက်မောင်းရှိ သွေးကြောများ ထောင်တက်လာကာ တူကြီးကို အောက်သို့ ပြင်းထန်စွာ ဆောင့်ချလိုက်သည်။

​ဝုန်း!

​ဧရိယာတစ်ခုလုံး နားကွဲမတတ် အသံမြည်ဟီးသွားပြီး လူတိုင်းကို လွင့်စင်သွားစေမည့် ကြောက်မက်ဖွယ်ကောင်းသော လေပြင်းများ တိုက်ခတ်လာသည်။

​မြို့စားအဆင့်ပညာရပ်:တောင်ရွှေ့စွမ်းအား…

​လီလင်ကျင်းလည်း ဤအချိန်တွင် တိုက်ပွဲတွင် ပါဝင်လာသည်။ သူမ၏ နောက်တွင် ဧရာမ ငရဲမြွေနဂါးကြီးတကောင် ပေါ်လာပြီး စိမ်းပြာရောင်ဝါးမြွေနဂါးတောင်ဝှေးကို ဖုံးလွှမ်းသွားသည့် နက်မှောင်သော အလင်းတန်းအဖြစ် ပြောင်းလဲသွားသည်။

တောင်ဝှေးအတွင်းမှစိမ်းပြာရောင်မြွေနဂါးကြီးလဲ အပြင်သို့ ထွက်လာပြီး ပြောင်းလဲမှုတစ်ခု ဖြစ်ပေါ်သွားသည်။ ၎င်း၏ အကြေးခွံများပေါ်တွင် နက်မှောင်သော အရောင်အသွေးများ ပေါ်လာကာ ကိုယ်ခန္ဓာမှာလည်း ထူးခြားသော စိမ်းပြာရောင် မြွေနဂါးကြီးအဖြစ် ကြီးထွားလာသည်။

​စိမ်းပြာရောင် မြွေနဂါးက သက်တံ့ရောင် အလင်းတန်းအဖြစ် ပြောင်းလဲသွားပြီး သူတို့ဆီသို့ ဦးတည်လာသော အနက်ရောင် အလင်းတန်းများကို အပိုင်းပိုင်း ဖြစ်သွားစေကာ အနက်ရောင်မြစ်ကို ပြင်းထန်စွာ ထိမှန်သွားသည်။

​သူမ မြို့စားအဆင့်ပညာရပ်ကို အသုံးပြုခဲ့ခြင်း မဟုတ်သော်လည်း ထိုတိုက်ခိုက်မှုက ချင်ယင်းနှင့် ကျူးကျူးတို့၏ တိုက်ခိုက်မှုထက် လုံးဝ မညံ့ပေ။ အမှန်မှာ သူတို့ထက်ပင် ပိုမို ပြင်းထန်နေသည်။

​စိမ်းပြာရောင်ဝါးမြွေနဂါးတောင်ဝှေးက သူမ၏ တိုက်ခိုက်ရေးစွမ်းအားကို မြှင့်တင်ပေးလိုက်သဖြင့် သူမသည် မျက်လုံးသုံးလုံးအဆင့်ခရမ်းရောင်ရတနာကို ပိုင်ဆိုင်ထားသူတစ်ဦးအဖြစ် ပုလဲကိုးလုံးအဆင့် ကျင့်ကြံသူကိုပင် ရင်ဆိုင်နိုင်နေပြီ ဖြစ်သည်။

​အခြားသော ကျင့်ကြံသူများကလည်း သူတို့၏ အစွမ်းအထက်ဆုံး ပဲ့တင်ထပ်သံပညာရပ်များကို အသက်သွင်း၍ တိုက်ခိုက်နေကြသဖြင့် ကောင်းကင်တစ်ခုလုံး စွမ်းအင်လှိုင်းများဖြင့် ပြည့်နှက်သွားသည်။ အမျိုးမျိုးသော မြို့စားပညာရပ်များ လေထဲတွင် ယှက်နွယ်ကာ အနက်ရောင်မြစ်ကို ပြင်းထန်စွာ ထိမှန်နေကြသည်။

​အားလုံး၏ စုပေါင်းအားကို ရင်ဆိုင်ရသောအခါ အနက်ရောင်မြစ်ထဲမှ ထွက်ပေါ်နေသော ဧရာမလက်များ ပျက်စီးသွားပြီး မျက်နှာပြင်ပေါ်တွင် ကြီးမားသော လှိုင်းလုံးများ ထွက်ပေါ်လာသည်။ အနက်ရောင်မြစ်သည်လည်း တဖြည်းဖြည်းနှင့် ကျုံ့ဝင်သွားသကဲ့သို့ ရှိသည်။

​ခဏအကြာတွင် အနက်ရောင်မြစ်ကြီး အပိုင်းပိုင်း ကွဲထွက်သွားပြီး အပိုင်းအစအနည်းငယ် ခုတ်ဖြတ်ခံလိုက်ရသည့် လူးလွန့်နေသော မြွေတစ်ကောင်ကဲ့သို့ ဖြစ်သွားသည်။

ထိုအခါ ​ပင်မခန်းမဆောင် အပြင်ဘက်တွင် ကူးစက်ခံထားရသူများကို တိုက်ခိုက်နေသော အဖွဲ့များ စိတ်ဓာတ်များ တက်ကြွလာကြသည်။

​လီလော့ ထိုမြင်ကွင်းကို လှည့်ကြည့်လိုက်သော်လည်း သူ့ မျက်ဝန်းများတွင် စိတ်သက်သာရာရသည့် အရိပ်အယောင် လုံးဝ မရှိပေ။ ယင်းအစား နဖူးပေါ်တွင် မျက်မှောင်ကြုတ်ထားသော လိုင်းများ ပိုမို နက်ရှိုင်းလာသည်။ သူသည် အတိတ်က ဝိဉာဉ်စားနတ်ဆိုးကို တိုက်ခိုက်ခဲ့ဖူးသဖြင့် ဤထူးခြားသော ကမ္ဘာခြားသက်ရှိကို ကိုင်တွယ်ရန် မည်မျှ ခက်ခဲကြောင်း သိရှိထားသည်။ ဝိဉာဉ်ပဲ့တင်ထပ်သံဂူ ၏ ဖိအားပေးမှုကြောင့် ၎င်း၏ စွမ်းအားများ များစွာ အားနည်းသွားသော်လည်း သူတို့ အဖွဲ့တစ်ခုတည်းဖြင့် ရင်ဆိုင်ရန် မလုံလောက်နိုင်ပေ။

​လီလော့ တွေးတောနေစဉ်မှာပင် အနက်ရောင်မြူခိုးထဲမှ မျက်နှာကြီးက ရယ်မောလိုက်သည်။ ထိုအသံက ကြမ်းတမ်းပြီး နာကျင်စွာ အော်ဟစ်သံများစွာကို တစ်ခုတည်းအဖြစ် ပေါင်းစပ်ထားသကဲ့သို့ ရှိသည်။ ၎င်းက လူတိုင်း၏ စိတ်ထဲတွင် အပျက်သဘောဆောင်သည့် ခံစားချက်များကို ချက်ချင်း နိုးဆွပေးလိုက်သည်။

​အနက်ရောင်မြူခိုးများ ကောင်းကင်မှ ဆင်းသက်လာပြီး လေထဲတွင် စုစည်းသွားပြီး ခဏအကြာတွင် လူပုံသဏ္ဌာန် တစ်ခု ပေါ်လာသည်။

​ထိုပုံသဏ္ဌာန်က အသားစိုင် တောင်တန်းကြီးတစ်ခုကဲ့သို့ ဖြစ်ပြီး ကျူးတယွီနှင့် ကျူးကျူးတို့ထက်ပင် ပိုမို ခိုင်ခံ့သည်။ထိုသူ၏ခန္ဓာကိုယ်ပေါ်၌ စိတ်အနှောင့်အယှက် အဖြစ်ဆုံးမှာ ဉီးခေါင်းဖြစ်သည်။ ထိုဉီးခေါင်းက အဆက်မပြတ် လည်ပတ်နေပြီး တစ်ပတ်လည်တိုင်းတွင် မျက်နှာအသစ် တစ်ခု ပေါ်လာသည်။

​ချင်ယင်း၊ ကျူးကျူးနှင့် အခြားသူများ ထိုသူကိုကြည့်ရင်း ကြောက်ရွံ့တုန်လှုပ်သွားကြသည်။ အဆက်မပြတ် ပြောင်းလဲနေသော မျက်နှာများထဲတွင် မိမိတို့၏ မျက်နှာများကို မြင်တွေ့နေရသောကြောင့်ပင်။

​ဤအချိန်တွင် ထိုသူ၏ လည်ပင်းဘေးတွင် သွေးထွက်နေသော အပေါက်ကြီးတစ်ခု ပွင့်ထွက်လာပြီး အနက်ရောင် ပိုးကောင်တစ်ကောင် တွားထွက်လာသည်။

ထိုပိုးကောင်ကြီးက ပါးစပ်ကို ဟကာ မျက်နှာတစ်ခုလုံးကို ဝါးမြိုပစ်လိုက်သည်။ ဝါးမြိုသံက အလွန် စက်ဆုပ်ဖွယ်ကောင်းပြီး လူတိုင်း၏ အမွေးအမှင်များကို ထောင်သွားစေသည်။

​မျက်နှာတစ်ခုကို စားလိုက်တိုင်း ထိုထူးဆန်းသော ပုံသဏ္ဌာန်၏ ခန္ဓာကိုယ် ပိုမို ကြီးထွားလာပြီး ၎င်းမှ ထွက်ပေါ်လာသော ကြောက်မက်ဖွယ် အငွေ့အသက်များလည်း ပိုမို ပြင်းထန်လာသည်။

​ဤမြင်ကွင်းက လူတိုင်းအတွက် အရိုးစိမ့်သွားစေပြီး ထူးဆန်းလှသည်။

ထိုစဉ် ​လီလင်ကျင်း၏ စိတ်ဓာတ်ကျနေသော အသံမှာ ထွက်ပေါ်လာသည်။

"ကျွန်မတို့ အနက်ရောင်မြစ်ကို တိုက်ခိုက်တဲ့အခါ သူက ကျွန်မတို့ တစ်ယောက်ချင်းစီဆီက ပဲ့တင်ထပ်သံစွမ်းအားတွေကို စုပ်ယူသွားတယ်… အဲဒါကြောင့်ပဲ သူက ကျွန်မတို့ရဲ့ မျက်နှာတွေကို ပုံတူကူးနိုင်တာ… သူ ကျွန်မတို့ရဲ့ စွမ်းအင်တွေကို စားသုံးလိုက်တိုင်း ပိုပြီး အစွမ်းထက်လာမှာပဲ"

​လူတိုင်း ဦးရေပြားများ ထုံကျဉ်သွားသကဲ့သို့ ခံစားလိုက်ရသည်။ ဤကမ္ဘာခြားသက်ရှိက တကယ့်ကို ထူးဆန်းသော စွမ်းရည်ကို ပိုင်ဆိုင်ထားသည်။

​"သူ ပိုပြီး မကြီးထွားလာအောင် တားဆီးရမယ်!" ဟု ချင်ယင်း အော်လိုက်သည်။

​သူ သတိပေးစရာ မလိုဘဲ ကျန်သူများကလည်း တောင်တန်းကဲ့သို့သော ထိုပုံသဏ္ဌာန်ကို ပစ်မှတ်ထားကာ တိုက်ခိုက်မှုကို ပြန်လည် စတင်လိုက်ကြသည်။

​ဝုန်း!

​ဝိဉာဉ်စားနတ်ဆိုး၏ ခန္ဓာကိုယ်မှာ သွေးထွက်နေသော အပေါက်များဖြင့် ပြည့်နှက်သွားသော်လည်း တစ်ခဏအတွင်းမှာပင် အနက်ရောင် ပိုးကောင်များစွာ ထွက်ပေါ်လာပြီး ပျက်စီးသွားသော နေရာများကို ပြန်လည် ဖြည့်ဆည်းပေးလိုက်သည်။

​ဝိဉာဉ်စားနတ်ဆိုးက ရှိနေသူအားလုံး၏ မျက်နှာများကို ဝါးမြိုပြီးနောက် မည်သူမှန်း မသိနိုင်သော ပုံစံသို့ ပြောင်းလဲသွားသည်။ သို့သော် ဧရာမ ခန္ဓာကိုယ်ကြီးက ကောင်းကင်တွင် စိုးမိုးထားပြီး လူတိုင်းကို ဖိအားပေးနေသည့် ကြောက်မက်ဖွယ် အငွေ့အသက်ကို ထုတ်လွှတ်နေသည်။

​သို့သော် ရုတ်တရက်ပင် သဘာဝစွမ်းအင်များ ထိုနေရာသို့ စီးဝင်လာပြီး လျှို့ဝှက်သော စွမ်းအားတစ်ခုက အစွမ်းထက်လာနေသော ဝိဉာဉ်စားနတ်ဆိုးကို ဖိနှိပ်လိုက်သည်။

​ဝိဉာဉ်ပဲ့တင်ထပ်သံဂူ၏ စည်းမျဉ်းများ ၎င်းအပေါ်တွင် ပိုမို ပြင်းထန်စွာ သက်ရောက်နေပြီ ဖြစ်သည်။

​သို့သော် ဝိဉာဉ်စားနတ်ဆိုးက ရှိနေသူအားလုံး၏ နှလုံးသားထဲတွင် ကြောက်ရွံ့မှုကို ဖြစ်ပေါ်စေဆဲပင်။

​၎င်းသည် ဝိဉာဉ်ပဲ့တင်ထပ်သံဂူ၏ ဖိနှိပ်မှုကို ခုခံကာ ဧရာမလက်ဝါးကြီးဖြင့် တိုက်ခိုက်လိုက်သည်။ ဤတိုက်ခိုက်မှုမှာ ၎င်းနှင့် လူတိုင်းကြားရှိ အကွာအဝေးကို လျစ်လျူရှုလိုက်သကဲ့သို့ သူတို့၏ ရှေ့တည့်တည့်တွင် တန်းပေါ်လာသည်။

​လက်ဝါးကြီး ကျဆင်းလာသောအခါ လေဟာနယ်ပင် ကွဲအက်သွားသည်။

​လီလင်ကျင်း၊ ချင်ယင်းနှင့် ကျူးကျူးတို့က အစွမ်းအထက်ဆုံးဖြစ်သဖြင့် ဝိဉာဉ်စားနတ်ဆိုး၏ လွှမ်းမိုးမှုမှ လျင်မြန်စွာ ရုန်းထွက်ကာ နောက်သို့ ဆုတ်လိုက်နိုင်သည်။

​သူတို့တွေ ပထမဆုံး တိုက်ခိုက်မှုကို ရှောင်တိမ်းနိုင်ခဲ့သော်လည်း နှစ်ဦးကမူ မရှောင်တိမ်းနိုင်ခဲ့ပေ။ ထိုသူနှစ်ဉ လက်ဝါးထဲတွင် ဖမ်းမိသွားပြီး လက်ဝါးအလယ်တွင် ပါးစပ်တစ်ခု ပွင့်ထွက်လာကာ ထက်မြက်သော သွားများဖြင့် ဝါးမြိုပစ်လိုက်သည်။ ဝါးမြိုသံအနည်းငယ်နှင့်အတူ သွေးများမှာ ကောင်းကင်သို့ ပန်းထွက်လာသည်။

​ကြည့်ရသည်မှာ အလွန် ကြောက်မက်ဖွယ်ကောင်းလှသည်။

​ဝိဉာဉ်စားနတ်ဆိုးက ထူးဆန်းသော အသံဖြင့် ရယ်မောလိုက်ပြီး ပါးစပ်ထဲမှ သွေးရောင် အလင်းတန်းတစ်ခုကို ပန်းထုတ်လိုက်ရာ ၎င်းထဲတွင် ယခုလေးတင် စားခံလိုက်ရသော သူနှစ်ဦး၏ နာကျင်နေသော မျက်နှာများမှာ ပါဝင်နေသည်။

​ထိုအလင်းတန်းက ချင်ယင်းတို့ အဖွဲ့သုံးဦးဆီသို့ ဦးတည်သွားသဖြင့် သူတို့တွေ အချိန်မီ မရှောင်တိမ်းနိုင်တော့ဘဲ ကိုယ်ပိုင် နည်းလမ်းများဖြင့် ကာကွယ်လိုက်ရသည်။

​ဝုန်း!

​ပေါက်ကွဲသံက ကောင်းကင်တစ်ခုလုံးတွင် ပဲ့တင်ထပ်သွားသည်။

​သုံးဦးစလုံး လွင့်စင်သွားပြီး မြေပြင်ပေါ်သို့ ပြင်းထန်စွာ ပြုတ်ကျသွားသည်။

​ချင်ယင်းနှင့် ကျူးကျူးတို့ လဲလျောင်းနေသည့် နံရံမှာ အပိုင်းပိုင်း ကွဲထွက်သွားပြီး နှစ်ဉီးစလုံး သွေးများကို အန်ထုတ်လိုက်ကြသည်။ ထိုတိုက်ခိုက်မှု တစ်ချက်တည်းဖြင့်ပင် သူတို့ ပြင်းထန်စွာ ဒဏ်ရာရသွားကြောင်း သိသာနေသည်။

ထိုအဖြစ်ကြောင့် ​လူတိုင်း စိတ်ဓါတ် ကျဆင်းသွားသည်။ အစွမ်းအထက်ဆုံး သုံးဦး ပူးပေါင်းတိုက်ခိုက်လျှင်ပင် ပြင်းထန်စွာ ဒဏ်ရာရသွားပါက သူတို့ မည်သို့ အသက်ရှင်နိုင်မည်နည်း။

​လီလင်ကျင်းကတော့ ချင်ယင်းတို့လောက် အခြေအနေမဆိုးသေးပေ။

သူမသည် လီလော့၏ ဘေးသို့ ရောက်တော့ ​လီလော့က အလျင်အမြန် ထူမပေးရင်း “ အစ်လင်ကျင်း.. ဘာမှမဖြစ်ဘူးမလား" ဟု မေးလိုက်သည်။

​လီလင်ကျင်းက လီလော့၏ လက်ကို ဆွဲယူလိုက်ပြီး အရာတစ်ခုခုကို ထည့်ပေးလိုက်ကာ အမြန် တွန်းလွှတ်လိုက်ပြီး…

"လီလော့…အကယ်၍ တစ်ခုခု မှားယွင်းသွားရင် ဒီမှော်စာလုံးကို အသက်သွင်းလိုက်ပါ…ဒါက နင့်ကို အနက်ရောင်မြူခိုးတွေကနေ ကာကွယ်ပေးနိုင်လိမ့်မယ… အဲဒီလိုဆိုရင် နင် အမြန် ထွက်ပြေးနိုင်မှာပါ" ဟု တိုးတိုးလေး ပြောလိုက်သည်။

လက်ဝါးထဲတွင် လှုပ်ရှားနေသော အနက်ရောင် မှော်စာလုံးကို ကြည့်ကာ လီလော့ တုန်လှုပ်သွားသည်။

​"တခြားသူတွေ မသိအောင် လုပ်ထားပါ… ဝိဉာဉ်စားနတ်ဆိုးက အရမ်း အစွမ်းထက်တယ်..နင်တယောက်ပဲ ထွက်ပြေးနိုင်လိမ့်မယ်… ကျန်တဲ့သူတွေကတော့..."

​သူမ၏ စကားထဲတွင် သနားစရာညှာတာသည့်အရိပ်ယောင်မရှိဘဲ ပစ်ပယ်မှုများသာရှိနေသည်။

​"သူတို့ကို ဒီနေရာမှာပဲ ထားခဲ့ပြီး နတ်ဆိုးရဲ့ အာရုံကို ဆွဲဆောင်ထားတဲ့ ငါးစာတွေအဖြစ် ထားခဲ့လိုက်ပါတော့…"

​သူမ စကားပြောပြီးသည်နှင့် လေထဲသို့ ထပ်မံ ပျံတက်သွားကာ ဝိဉာဉ်စားနတ်ဆိုးနှင့် ထပ်မံ တိုက်ခိုက်နေသဖြင့် လီလော့မှာ တုံ့ပြန်ရန်ပင် အချိန်မရလိုက်ပေ။