အခန်း ၆၁၇
Vol. 45 Ch. 617
အခန်း (၆၁၇) - တစ်ပြိုင်နက်တည်း၊ နှစ်တစ်ရာ ကုန်လွန်သွားခြင်းနှင့် ကုမိသားစု တိုးတက်လာခြင်း
" ကောင်းပါပြီ "
ကုချန်မှ ခေါင်းကို ဖြည်းညင်းစွာ ညိတ်ပြလိုက်၏။
နတ်ဆိုးဧကရာဇ်ကြီး၏ စိုးရိမ်ကြောက်ရွံ့မှု အရိပ်အယောင်မှာ နက်ရှိုင်းလွန်းစွာ ဖုံးကွယ်ထားသော်လည်း ကုချန်မှ အောင်မြင်စွာ ရိပ်မိသွားခဲ့သည်။
သို့သော် သူသည် ၎င်းနှင့်ပတ်သက်၍ မည်သည့်အရာကိုမျှ ထုတ်ဖော်မပြခဲ့ချေ။ နတ်ဆိုးဧကရာဇ်ကြီးမှ သူ့အပေါ် သတိထားစောင့်ကြည့်နေခြင်းမှာ ကောင်းသောအရာတစ်ခုပင် ဖြစ်သည်။ အနည်းဆုံးတော့ ဤအရာက အနာဂတ်တွင် နတ်ဆိုးဧကရာဇ်ကြီး သူ့ကို အလွယ်တကူ သစ္စာမဖောက်နိုင်စေရန် သေချာစေပေလိမ့်မည်။
အခြားကိစ္စများနှင့် ပတ်သက်၍မူ ယခုအခါ ကုချန်၏ စွမ်းအားမှာ အခိုင်အမာ တည်ဆောက်ပြီးသား ဖြစ်နေပြီဖြစ်သည်။ သူသည် အင်မော်တယ်ဘုရင်အဆင့်သို့ စတင်ရောက်ရှိကာစ အချိန်က လူမျိုး မဟုတ်တော့ချေ။
ယခု နတ်ဆိုးဧကရာဇ် သုံးပါးမှာ သူ၏ အစေခံနေပြီဖြစ်ရာ သူသည် နတ်ဆိုးဧကရာဇ်ကြီးကို ကျိန်းသေပေါက် ကြောက်ရွံ့နေစရာ မလိုတော့ပေ။
နတ်ဆိုးဧကရာဇ်ကြီးအား လိုက်လံ နှုတ်ဆက်ပြီးနောက် ကုချန်သည် အဆုံးမဲ့ကောင်းကင်ဘုံရှိ အခြေစိုက်စခန်းသို့ ပြန်လာခဲ့၏။ ချီလျိုနှင့် ချီမုန်တို့ကို အနည်းငယ် မှာကြားပြီးနောက် သူသည် တံခါးပိတ် ကျင့်ကြံခြင်းကို စတင်လိုက်လေသည်။
သူ၏အဆင့်တွင် ကျင့်ကြံခြင်း၌ သိသိသာသာ တိုးတက်မှုများ ရရှိရန်အတွက် သာမန် စွန့်စားခန်းများ သို့မဟုတ် ကံကောင်းထောက်မစွာ တွေ့ကြုံရမှုများက မလုံလောက်တော့ချေ။ ၎င်းအတွက် ရှောင်လွှဲ၍ မရနိုင်သော ကာလရှည်ကြာ စုဆောင်းမှုများနှင့် လေ့ကျင့်မှုများ လိုအပ်ပေသည်။
တစ်ချိန်တည်းမှာပင် အင်မော်တယ်နယ်မြေရှိ ကုချန်၏ ခန္ဓာကိုယ်အစစ်အမှန်နှင့် တတိယကိုယ်ပွားတို့သည်လည်း တံခါးပိတ် ကျင့်ကြံသည့် အခြေအနေသို့ တစ်ပြိုင်နက်တည်း ဝင်ရောက်သွားကြသည်။
ချီတစ်ခုမှ သန့်စင်သူသုံးပါး ခွဲထွက်ခြင်း ကျင့်စဉ်သည် အမှန်တကယ်ပင် ကောင်းကင်ဘုံကို အာခံနိုင်စွမ်းရှိသော အံ့မခန်း ပညာရပ်တစ်ခုဖြစ်သည်ဟုသာ ဆိုရပေမည်။ ခန္ဓာကိုယ်အစစ်အမှန်နှင့် ကိုယ်ပွားနှစ်ခုတို့က တစ်ပြိုင်နက်တည်း ကျင့်ကြံနေကြသဖြင့် သူတို့၏ သိမြင်နားလည်မှုများကို မျှဝေနိုင်ပြီး ၎င်းမှာ တူညီသော အဆင့်ရှိ အခြားသူများထက် ကျင့်ကြံချိန် သုံးဆ ပိုမို ရရှိခြင်းနှင့် ညီမျှပေသည်။
အချိန်များ ကုန်လွန်လာသည်နှင့်အမျှ ပြိုင်ဘက်အားလုံးသည် ကုချန်၏နောက်တွင် ကျန်ရစ်ခဲ့ကြမည်သာပင်။ သူ့ကို မည်သူက မှီနိုင်မည်နည်း။
နှစ်ကာလများမှာ လက်ဖျစ်တစ်တွက်အတွင်း ကုန်လွန်သွားခဲ့၏။
မျက်တောင်တစ်ခတ်အတွင်းမှာပင် နှစ်ပေါင်း ရာနှင့်ချီ၍ ကုန်လွန်သွားခဲ့လေပြီ။
ဤရာနှင့်ချီသော နှစ်ကာလများအတွင်း နတ်ဆိုးနယ်မြေ၌ မည်သည့် အပြောင်းအလဲမျှ မရှိခဲ့ချေ။ ရှာနာနတ်ဆိုးဧကရာဇ်၊ ချူးဧကရာဇ်၊ ချီဖျန့်ဧကရာဇ်နှင့် အခြားသူများသည် ကုချန်၏ အမိန့်အရ မိမိတို့၏ သက်ဆိုင်ရာ နယ်မြေများသို့ အသီးသီး ပြန်သွားခဲ့ကြပြီး သူတို့၏လုပ်ရပ်အားလုံးမှာ ပုံမှန်အတိုင်းပင် ရှိနေကာ ယခင်ကနှင့် မည်သည့် ကွာခြားမှုမျှ မရှိခဲ့ကြပေ။
တိုက်ပွဲကြီးတစ်ခု ပြီးဆုံးပြီးနောက် ရှာနာပန်းကို ရရှိခဲ့သော ရှာနာနတ်ဆိုးဧကရာဇ်သာမက ချူးဧကရာဇ်နှင့် ချီဖျန့်ဧကရာဇ်တို့ နှစ်ဦးစလုံးမှာလည်း ကာလရှည်ကြာ အနားယူ ပြန်လည် နာလန်ထူရန် လိုအပ်နေခဲ့၏။ ကုချန်၏ တံခါးပိတ် ကျင့်ကြံခြင်းနှင့်ပါ ပေါင်းစပ်လိုက်သောအခါ အရာအားလုံးမှာ တည်ငြိမ်အေးချမ်းပြီး မည်သည့် အဖြစ်အပျက်မျှ မရှိသကဲ့သို့ပင် ထင်ရလေသည်။
၎င်းနှင့် ဆန့်ကျင်ဘက်အနေဖြင့် အင်မော်တယ်နယ်မြေရှိ အပြောင်းအလဲများမှာမူ များစွာ ပို၍ များပြားလှ၏။
လွန်ခဲ့သော နှစ်ရာပေါင်းများစွာက ကုချန်၏ အလိုဆန္ဒအရ အိုမင်းမစွမ်းသူများနှင့် မသန်စွမ်းသူများမှလွဲ၍ ကုမိသားစုဝင် အားလုံးနီးပါးသည် အင်မော်တယ်နယ်မြေ၏ နေရာအနှံ့အပြားသို့ စွန့်စားသွားလာကာ အခြေချ နေထိုင်ရန် ကောင်းကင်တားမြစ်နယ်မြေထဲမှ 'မောင်းထုတ်' ခံခဲ့ရသည်။
နှစ်ရာပေါင်းများစွာ ကြာပြီးနောက် ဤကုမိသားစုဝင်များသည် အင်မော်တယ်နယ်မြေ၏ နေရာအနှံ့အပြားသို့ ရောက်ရှိသွားခဲ့ကြကာ သူတို့၏မျိုးဆက်များကို စတင် ဖြန့်ကြက်လာခဲ့ကြသည်။
ကုမိသားစုဝင်များ အင်မော်တယ်နယ်မြေ၏ နေရာအနှံ့အပြားသို့ သွားရောက်သည့် ခရီးစဉ်အတွင်း ကုယို ဦးဆောင်သော ကုမိသားစုရွာသည် အပြောင်မြောက်ဆုံး စွမ်းဆောင်နိုင်ခဲ့ပြီး ခရီးစဉ်အတွင်း မည်သည့် သေဆုံးထိခိုက်မှုမျှ မရှိခဲ့သည့်အပြင် သူတို့၏ ခရီးပန်းတိုင်သို့လည်း အမြန်ဆုံးနှင့် အချောမွေ့ဆုံး ရောက်ရှိခဲ့ကြသည်။
ယခု နှစ်ရာပေါင်းများစွာ ကြာပြီးနောက် ယခင်က လူငယ်လေး ကုယိုသည် ကုမိသားစုရွာ၏ အစစ်အမှန် မိသားစုခေါင်းဆောင် ဖြစ်လာခဲ့သည်မှာ ကြာမြင့်ပြီဖြစ်သော်လည်း သူ၏ နက်ရှိုင်းသော ကျင့်ကြံခြင်းကြောင့် လူငယ်အသွင်အပြင်ကို ဆက်လက် ထိန်းသိမ်းထားဆဲပင်။
အင်မော်တယ်နယ်မြေ၏ ကျိုးကွမ်းကောင်းကင်ဘုံ၊ မိုယွန်အင်မော်တယ်နယ်မြေရှိ ကုမြို့တော်တွင်.....
ဤမြို့မှာ မိုင်ရာဂဏန်းခန့် ကျယ်ဝန်းသော မြို့ငယ်လေးတစ်မြို့ ဖြစ်၏။ အပြင်ပန်းတွင် သေးငယ်သည်ဟု ထင်ရသော်လည်း အလွန် အဖိုးတန်လှသော မိုယွန်အင်မော်တယ်နယ်မြေအတွင်း၌မူ ၎င်းကို အလွန်ကောင်းမွန်သော နေရာတစ်ခုဟု သတ်မှတ်နိုင်ပေသည်။
ထို့အပြင် ဤကုမြို့တော်သည် နှစ်ရာပေါင်းများစွာအတွင်း ကုမိသားစုရွာမှနေ၍ တိုးတက် ပြောင်းလဲလာခဲ့ခြင်း ဖြစ်သည်။
ကုမြို့တော်၏ အနက်ရှိုင်းဆုံး နေရာတွင်.....
ကြီးမားခြင်း မရှိသော်လည်း အရာအားလုံး ပြည့်စုံစွာ ပါဝင်သော စံအိမ်ကြီးတစ်ခုအတွင်း၌ လူငယ်တစ်ဦး၏ မျက်နှာသွင်ပြင်မျိုး ရှိနေဆဲဖြစ်သော ကုယိုသည် ပင်မထိုင်ခုံတွင် ထိုင်နေလေသည်။
သူ၏အောက်ဘက်တွင် ကုမိသားစုရွာ၏ အသက်အရွယ်စုံလင်သော အကြီးအကဲ ဆယ်ဦးကျော် ထိုင်နေကြ၏။ အသက်အငယ်ဆုံးသူမှာပင် လူလတ်ပိုင်းအရွယ်သို့ ရောက်ရှိနေပြီဖြစ်ပြီး ကုယိုထက် များစွာ ပိုမို အိုမင်းနေပုံရသည်။
သို့တိုင်အောင် အပြင်ပန်းတွင် ငယ်ရွယ်ပုံရသော ဤကုမိသားစုရွာ၏ မိသားစုခေါင်းဆောင်ကို ရင်ဆိုင်ရာတွင် ကုမိသားစု အကြီးအကဲ အားလုံးက အလွန်အမင်း ရိုသေလေးစားမှုများကို ပြသနေကြလေသည်။