အခန်း ၆၀၆

အခန်း (၆၀၆) ယွမ်ရှား အဆောက်အဦး (အပိုင်း ၃)

ဤတိုက်ပွဲ အပြီးတွင် တာဝန်ခံချီ မှာ အလွန်အမင်း ဒေါသထွက်သွားခဲ့ပြီး မိသားစု နှစ်ခုကြားရှိ ရန်ငြိုးများမှာလည်း ပိုမို နက်ရှိုင်းသွားတော့၏။

တာဝန်ခံချီ သည် လော့ဖုန်း မဟာမိတ်အဖွဲ့ အတွင်း၌ အဆက်အသွယ် အင်အား သိပ်မရှိသော်လည်း ချိုင်မိသားစုမှာမူ ကျင်းယန်မြို့၌ အခိုင်အမာ ရပ်တည်နေနိုင်ခြင်းမှာ အချည်းနှီးတော့ မဟုတ်ပေ။ ထို့နောက်တွင် ထိုမိသားစု နှစ်ခုမှာ အကြိမ်ကြိမ် အခါခါ ထိပ်တိုက် တွေ့ခဲ့ကြသော်လည်း အနိုင်အရှုံးကိုမူ ပြတ်ပြတ်သားသား မခွဲခြားနိုင်ခဲ့ကြချေ။

ဆန့်ကျင်ဘက် အနေဖြင့် သူတို့၏ ပဋိပက္ခများမှာ လော့ဖုန်း မဟာမိတ်အဖွဲ့၏ အာရုံစိုက်မှုကို ရရှိသွားခဲ့ပြီး အဖွဲ့ကြီးမှ ကြားဝင်ကာ ငြိမ်းချမ်းရေး စကား ပြောဆိုပေးခဲ့ရလေသည်။

လော့ဖုန်း မဟာမိတ်အဖွဲ့က နှုတ်ထွက် စကား ဆိုလာသည်နှင့် တစ်ပြိုင်နက် မည်သည့် မိသားစုမှ ဆက်လက် တိုက်ခိုက်ရန် မဝံ့ရဲကြတော့သော်လည်း သူတို့ကြားရှိ အမုန်းတရားများမှာမူ ပြေပျောက်သွားခြင်း အလျဉ်း မရှိခဲ့ချေ။ တာဝန်ခံချိုင်မှာမူ ချီမိသားစုဘက်မှ လက်လျှော့သွားပြီး သူ၏ သမီးကို ဒုက္ခမပေးတော့လျှင် အရာရာ အဆင်ပြေမည်ဟုသာ ကောင်းမွန်စွာ တွေးတောနေခဲ့ခြင်းပင်။

သို့သော် မမျှော်လင့်ဘဲ ညသန်းခေါင်ယံ အချိန်တွင် တစ်စုံတစ်ယောက်သည် သူ၏ အခန်းအတွင်းသို့ အတင်းအကြပ် ဝင်ရောက်ကာ လုပ်ကြံ သတ်ဖြတ်ရန် ကြိုးပမ်းခဲ့တော့၏။

ဤအကြောင်းများကို စုံစမ်းပြီးနောက် ရွှီလု အနေဖြင့် သေချာစွာ စဉ်းစားကြည့်လိုက်ရာ ချီမိသားစုမှလွဲ၍ တာဝန်ခံချိုင် အပေါ် ဤမျှလောက် နက်ရှိုင်းသော အမုန်းတရား ထားရှိမည့်သူ တစ်ဦးတစ်ယောက်မျှ မရှိနိုင်ကြောင်း ကောက်ချက် ချလိုက်လေသည်။ ထိုသတင်း အချက်အလက်ကို ရရှိသည်နှင့် ရွှီလုသည် တစ်စက္ကန့်မျှပင် တွန့်ဆုတ်မနေတော့ချေ။

သူသည် ညအမှောင်ထုကို အခွင့်ကောင်းယူကာ ချီမိသားစု၏ အိမ်တော်ဆီသို့ ဦးတည်ပြီး အမှန်တရားကို စုံစမ်းရန် ထွက်ခွာခဲ့တော့၏။ ချီအိမ်တော်၏ လုံခြုံရေးမှာ ချိုင်အိမ်တော်နှင့် အလားတူပင် ဖြစ်ရာ သာမန် သိုင်းလောကသားများ သို့မဟုတ် သိုင်းပညာရှင် အချို့ကို တားဆီးရန် လုံလောက်သော်ငြားလည်း ကိုယ်ဖော့ပညာ ကျွမ်းကျင်သော ရွှီလု ကဲ့သို့သော သူတစ်ဦးကိုမူ မည်သို့ တားဆီးနိုင်ပါမည်နည်း။

ရွှီလုသည် သူတို့၏ အိပ်ခန်းအတွင်းသို့ တိတ်တဆိတ် ဝင်ရောက်သွားပြီး တာဝန်ခံချီကို ကုတင်ပေါ်မှ အသာအယာ ဆွဲထုတ်လိုက်ကာ အေးစက်စက် ပြုံးလျက် စကားဆိုလိုက်လေသည်။

"အဘိုးကြီး သူခိုး... ခင်ဗျား လုပ်ထားတဲ့ အကုသိုလ်တွေကတော့ အခု ကိုယ်ထင်ပြနေပြီနော်"

ရိုးရှင်းလှသော ဤစကား အနည်းငယ်ကြောင့် အိပ်မောကျနေသော တာဝန်ခံချီမှာ လန့်နိုးသွားပြီး အကြီးအကျယ် ထိတ်လန့် တုန်လှုပ်သွားရတော့၏။ သူသည် အလောတကြီးဖြင့်ပင် မည်သည့် ကိစ္စကို ဆိုလိုခြင်းလဲ ဟု မေးခွန်းထုတ်လာတော့သည်။

၎င်းကို ကြားလိုက်ရသောအခါ ရွှီလုမှာ မအောင့်နိုင်ဘဲ ရယ်မောမိသွားရ၏။

ကြည့်ရသည်မှာ ဤအဘိုးကြီး လုပ်ထားသော မကောင်းမှုများမှာ တစ်ခုတည်း မဟုတ်ပုံရပေ။ ထို့ကြောင့် ရွှီလုက မိမိဘာသာ ပြန်စဉ်းစားရန်သာ ပြတ်သားစွာ ပြောဆိုလိုက်လေသည်။

တာဝန်ခံချီ မှာ ရိုးသားသော လူတစ်ဦး ဖြစ်သွားသည့်အလား မကြာသေးမီက သူ ကျူးလွန်ခဲ့သော မကောင်းမှု အဝဝကို တစ်ခုချင်းစီ ဝန်ခံပါတော့သည်။ ထိုအထဲမှ အများစုမှာ သေးငယ်သော အသေးအဖွဲ ကိစ္စများသာ ဖြစ်၏။ ဘာပဲဖြစ်ဖြစ် လော့ဖုန်း မဟာမိတ်အဖွဲ့က အထက်မှ စောင့်ကြည့်နေသည် ဖြစ်ရာ သူတို့ အနေဖြင့် မည်မျှပင် ရမ်းကားနေပါစေ လူသတ်ရန်အထိတော့ မရဲဝံ့ကြသည်မှာ အမှန်တရားပင်။ အချိန်အတော်ကြာ ပြောဆိုနေသော်လည်း လိုရင်းသို့ မရောက်ရှိသေးသဖြင့် ရွှီလုက သေချာစွာ ပြန်စဉ်းစားရန် ထပ်မံ ခြိမ်းခြောက်လိုက်တော့၏။

တစ်ခဏမျှ တွေဝေသွားပြီးနောက် တာဝန်ခံချီ က နောက်ဆုံးတွင် ဖွင့်ဟလာတော့သည်။

"သူရဲ‌ကောင်းကြီးရယ်... ဒါက တာဝန်ခံချိုင် ရဲ့ ကိစ္စကို ပြောတာလား... ကျေးဇူးပြုပြီး ကျွန်တော့် အသက်ကို ချမ်းသာပေးပါဗျာ... တကယ်တော့ ဒါက ကျွန်တော့် အပြစ် မဟုတ်ပါဘူး... ကျွန်တော့်ရဲ့ အသုံးမကျတဲ့ သားက သောက်ဖော်သောက်ဖက် မကောင်းတွေနဲ့ ပေါင်းမိလို့ပါ... အဲဒီကောင်တွေက အဘိုးကြီးချိုင်ကို ရှင်းပေးမယ်၊ သူ့သမီးကိုလည်း ကျွန်တော့်သားနဲ့ လက်ထပ်ပေးမယ့် အပြင် သူ့ရဲ့ စီးပွားရေးတွေကိုပါ သိမ်းပေးမယ်လို့ ဇွတ်ပြောနေကြလို့ပါ... ကျွန်တော်လည်း တစ်ခဏတာ စိတ်လွတ်သွားပြီး..."

ဆက်လက် နားထောင်နေရန် မလိုအပ်တော့ချေ။ အကြောင်းမူကား ဤပြဿနာ၏ မြစ်ဖျားခံရာမှာ တာဝန်ခံချီ ထံမှ စတင်ခဲ့ခြင်း ဖြစ်သည်မှာ ထင်ရှားလှပေသည်။

ထပ်မံ မေးမြန်း စစ်ဆေးကြည့်လိုက်သောအခါ အခြေအနေမှန်များမှာ ပေါ်ထွက်လာတော့၏။ တာဝန်ခံချီ၏ သားမှာ အမှန်တကယ်ပင် အချောင်သမား တစ်ဦးဖြစ်ပြီး မိန်းမလိုက်စားခြင်းမှလွဲ၍ မည်သည့်အရာမျှ မလုပ်တတ်သော သူဌေးသား ငါးဆားနူ တစ်ဦးသာ ဖြစ်လေသည်။

သူ ပေါင်းသင်းနေသော မိတ်ဆွေ ဆိုသူများမှာလည်း မကောင်းသော အငွေ့အသက်များသာ ရှိကြကုန်၏။

ဤကိစ္စတွင် သူသည် သိုင်းလောကရှိ ဩဇာရှိသူများနှင့် သိကျွမ်းပါသည် ဟု ဆိုသော လူတစ်ယောက်နှင့် ရင်းနှီးခဲ့သည်။ ထိုလူက ငွေအနည်းငယ် ပေးရုံဖြင့် တာဝန်ခံချိုင်ကို အလွယ်တကူ ဖယ်ရှားပေးနိုင်ကြောင်း ပြောဆိုခဲ့လေ၏။

တာဝန်ခံချိုင် သေဆုံးသွားပါက တာဝန်ခံချီ၏ နည်းလမ်းများဖြင့် သူ၏ စီးပွားရေး လုပ်ငန်းများကို သိမ်းပိုက်ရန်မှာ အလွန်ပင် လွယ်ကူသွားပေလိမ့်မည်။ ထိုအချိန်ကျလျှင် သခင်မလေးချိုင်မှာလည်း သူတို့၏ လက်ဖဝါးပေါ်ရှိ ပစ္စည်းတစ်ခုသဖွယ် ဖြစ်သွားမည်သာ။

ယခုအခါတွင် အမှန်တရားမှာ ရှင်းလင်း သွားခဲ့လေပြီ။ အစပိုင်းတွင် တာဝန်ခံချီသည် သူ၏သားမှာ သူဌေးကြီး ဖြစ်သူ မိမိထံမှ ငွေညှစ်ရန် နည်းလမ်းသစ်တစ်ခု ရှာဖွေနေသည်ဟုသာ ထင်မှတ်ခဲ့ပြီး ဤကိစ္စကို အလေးအနက် မထားခဲ့ချေ။ သို့သော် ထိုနေ့က သူသည် တာဝန်ခံချိုင်နှင့် မတော်တဆ ဆုံတွေ့ခဲ့ပြီးနောက် လူပုံအလယ်တွင် အခြေအတင် စကားများခဲ့ကြလေသည်။ တာဝန်ခံချိုင်၏ လျှာစွမ်းကို တာဝန်ခံချီ မယှဉ်နိုင်ခဲ့ဘဲ လမ်းဘေးက ကြွက်တစ်ကောင် ကဲ့သို့ အနှိမ်ခံကာ အရှက်တကွဲ မောင်းထုတ်ခံခဲ့ရ၏။

ထိုအဖြစ်အပျက် အပြီးတွင် သူ ပိုပြီး တွေးမိလေ ပိုပြီး ဒေါသထွက်လာလေ ဖြစ်သဖြင့် ထိုလူ ပြောသည့်စကားမှာ မှန်ကန်နိုင်သည် ဟု ယူဆကာ သူ၏သားကို ထိုလူအား သွားရှာရန် ခိုင်းစေခဲ့တော့သည်။ ကိစ္စရပ်များ ဆွေးနွေးပြီးနောက် ထိုလူက များပြားသော ငွေကြေးကို တောင်းဆိုခြင်း မပြုဘဲ စရန်ငွေ အနည်းငယ်သာ တောင်းဆိုခဲ့လေ၏။ ငွေပေးချေပြီးနောက် သူတို့သည် တံဆိပ်ပြား တစ်ခုကို ယူဆောင်လာခဲ့ကြပြီး ၎င်းမှာ အလွန်ပင် အသုံးဝင်လိမ့်မည် ဖြစ်သဖြင့် သေချာစွာ သိမ်းဆည်းထားရန် မှာကြားသွားခဲ့သည်။

သို့သော် ထိုအချိန်မှစ၍ မည်သည့် သတင်းမျှ ထပ်မံ ထွက်ပေါ်မလာခဲ့ချေ။ ပထမရက် အနည်းငယ်တွင် ဒေါသများ လွှမ်းမိုးနေခဲ့သော်လည်း တာဝန်ခံချီသည် တဖြည်းဖြည်းချင်း စိတ်အေးသွားခဲ့လေ၏။ တာဝန်ခံချိုင်မှာ သေဆုံးသွားခြင်း မရှိရုံတင်မကဘဲ နေ့စဉ်နှင့်အမျှ ပိုမို၍ပင် ကျန်းမာ လန်းဆန်းနေသည်ကို မြင်ရသောအခါ သူနှင့် သူ၏သားမှာ လိမ်လည် ခံလိုက်ရပြီ ဖြစ်ကြောင်း ကောက်ချက် ချလိုက်တော့သည်။ ထိုလူများကို ပြန်လည် ရှာဖွေရန် စေလွှတ်ခဲ့သော်လည်း သူတို့မှာ ခြေရာပင် မကျန်တော့ဘဲ ပျောက်ကွယ်သွားခဲ့လေပြီ။

ကံကောင်းသည်မှာ ငွေကြေး များစွာ ကုန်ကျခြင်း မရှိခဲ့ခြင်းပင်။ တံဆိပ်ပြား တစ်ခုအတွက် ငွေတုံး ရာဂဏန်း အနည်းငယ်ခန့်သာ ပေးခဲ့ရခြင်းမှာ သူ့အတွက် များစွာ နာကျင်စရာ မဟုတ်ခဲ့ချေ။ ထိုနောက်ပိုင်းတွင် ရက်အနည်းငယ်ခန့် အေးအေးဆေးဆေး ရှိနေခဲ့သော်လည်း ယနေ့ညတွင်မူ ရွှီလုက သူ့ကို လာရောက် ရှာဖွေခဲ့ခြင်း ဖြစ်၏။ အဖြစ်အပျက်များ အားလုံးကို ပြောပြပြီးနောက်တွင် ဇာတ်လမ်းမှာ အဆုံးသတ်သွားတော့သည်။

ဆုမိုသည် သူ၏ မျက်မှောင်ကို အနည်းငယ် ကြုတ်လိုက်ပြီး မေးလိုက်၏။

"အဲဒီ တံဆိပ်ပြား က အခု ဘယ်မှာလဲ"

"ဒီမှာပါ"

ရွှီလုမှာ ကြိုတင် ပြင်ဆင်ထားပြီး ဖြစ်ရာ ထိုတံဆိပ်ပြားကို ထုတ်ယူကာ ဆုမိုထံသို့ ကမ်းပေးလိုက်လေသည်။

ဤပစ္စည်းမှာ အလွန် အရေးကြီးလှသဖြင့် တာဝန်ခံချီ၏ လက်ထဲတွင် ဆက်လက် ထားရှိရန် မဖြစ်နိုင်သည်မှာ အမှန်တရားပင်။

ဆုမိုသည် တံဆိပ်ပြားကို ယူကာ အသေအချာ အကဲခတ် ကြည့်ရှုလိုက်၏။ ၎င်းမှာ သာမန် သံဖြင့် ပြုလုပ်ထားသော တံဆိပ်ပြား တစ်ခုသာ ဖြစ်ပြီး ထူးခြားသော အသွင်အပြင် ရှိမနေခဲ့ချေ။ သို့သော် ၎င်းပေါ်တွင် ထွင်းထုထားသော ပုံစံမှာမူ သတိပြုစရာ ကောင်းလှပေသည်။

၎င်းမှာ ဓားတစ်လက်၏ ပုံသဏ္ဌာန်ပင် ဖြစ်၏။ ဓားကိုယ်ထည်ကို သဲ့သဲ့မျှသာ မြင်တွေ့ရသော်လည်း ဓားဖျားမှာမူ သွေးနီရောင် အဆင်းဖြင့် တဖိတ်ဖိတ် တောက်ပနေလေသည်။ သို့သော် ဤကဲ့သို့သော တံဆိပ်ပြားမျိုးကို ဆုမို တစ်ခါမျှ မမြင်ဖူးခဲ့သဖြင့် သူသည် ယန်ရှောင်ယွင် ဘက်သို့ လှည့်ကာ မေးလိုက်မိတော့၏။

"အစ်မယွင်... ဒီပစ္စည်းကို သိလား"

ယန်ရှောင်ယွင် ကလည်း ခေါင်းခါယမ်းကာ ပြန်လည် ဖြေကြားလိုက်လေသည်။

"တစ်ခါမှ မမြင်ဖူးဘူး"

သူတို့ နှစ်ဦးစလုံး တစ်ခဏမျှ ဇဝေဇဝါ ဖြစ်နေစဉ်မှာပင် ရွှီလုမှာ စကားပြောရန် တွန့်ဆုတ်နေသည်ကို သတိပြုမိလိုက်ကြ၏။

ဆုမိုက ပြုံးလျက် မေးလိုက်လေသည်။

"သူရဲကောင်းရွှီ... ဒီတံဆိပ်ပြားကို သိလို့လား"

"ဒါက ယွမ်ရှား အမိန့်တော် ပဲဗျ"

ရွှီလုက မဆိုင်းမတွပင် ချက်ချင်း ပြန်လည် ဖြေကြားလိုက်တော့၏။

"ယွမ်ရှား အမိန့်တော် ဟုတ်လား"

ဆုမို၏ မျက်ခုံးများ အနည်းငယ် ပင့်တက်သွားပြီး ဆက်လက် ရှင်းပြရန် အချက်ပြလိုက်လေသည်။

"အင်း... ပြောပါဦး"

"ကျွန်တော်လည်း ဒီတံဆိပ်ပြားကို အခုမှ ပထမဆုံး မြင်ဖူးတာပါ... ဒါပေမဲ့ ခေါင်းဆောင်တို့ သိတဲ့အတိုင်း ကျွန်တော်က လူ့အလွှာပေါင်းစုံနဲ့ နှစ်ပေါင်းများစွာ ရောနှော နေထိုင်ခဲ့တာလေ... လူသိနည်းတဲ့ သတင်း အချက်အလက် အသေးအမွှားလေးတွေကိုတော့ အတော်များများ ကြားဖူးထားပါတယ်"

ရွှီလုက ဆက်လက်၍ ရှင်းပြလာလေသည်။

"ဒီ ယွမ်ရှား အမိန့်တော် ဆိုတာက ယွမ်ရှား အဆောက်အဦး လို့ ခေါ်တဲ့ အဖွဲ့အစည်း တစ်ခုက လာတာပါ... ဒီလျှို့ဝှက်ဆန်းကြယ်ပြီး ခန့်မှန်းရခက်တဲ့ အဖွဲ့အစည်းဟာ အမှောင်ထုထဲမှာပဲ အခြေစိုက် ရှင်သန်နေပြီး ထိပ်တန်း သိုင်းပညာရှင် အများအပြား ရှိကြတယ်လို့ ဆိုပါတယ်... သူတို့က လူတွေဆီက ငွေယူပြီး လူတွေရဲ့ ဘေးဒုက္ခတွေကို ဖယ်ရှားပေးတဲ့ အနေနဲ့ လုပ်ကြံ သတ်ဖြတ်မှုတွေကို တာဝန်ယူ လုပ်ဆောင်ပေးကြတာပါ"

"လုပ်ကြံ သတ်ဖြတ်သူတွေလား..."

သိုင်းလောက အတွင်း ဤကဲ့သို့သော အဖွဲ့အစည်းများ ရှိနေသည်ကို ဆုမို အံ့ဩခြင်း မရှိသော်လည်း ယန်ရှောင်ယွင် မှာမူ အနည်းငယ် အံ့အားသင့်သွားပုံ ရလေသည်။

"ငါ ဘာလို့ ဒီလို အဖွဲ့အစည်းမျိုး အကြောင်းကို တစ်ခါမှ မကြားဖူးရတာလဲ"

"အလုပ်အကိုင်ခြင်း ကွာခြားတာက တောင်တစ်လုံး ခြားနေသလိုပဲလေ... အစ်မယွင်တို့က အာမခံဌာန ကို ဦးစီးနေတာ၊ သူတို့ကတော့ လုပ်ကြံ သတ်ဖြတ်တဲ့ အလုပ်ကို လုပ်ကိုင်နေကြတာ မဟုတ်လား... သူတို့နဲ့ တိုက်ရိုက် မပတ်သက်ဘူး ဆိုရင် ဘယ်နှစ်ယောက်ကများ သိနိုင်မှာလဲ"

ရွှီလုက အကူအညီမဲ့စွာဖြင့် ပြုံးလိုက်ပြီး ဆုမို၏ လက်ထဲရှိ တံဆိပ်ပြားကို တစ်ချက် လှမ်းကြည့်ကာ ဆက်လက် ပြောဆိုလိုက်၏။

"အကယ်၍ သူတို့ကသာ လူသိရှင်ကြား အော်ကြေညာ နေမယ် ဆိုရင် ကိုယ့်သေတွင်း ကိုယ်တူးနေတာနဲ့ မတူဘူးလားဗျာ... တကယ်တမ်းကျတော့ ဒီတံဆိပ်ပြားဟာ ယွမ်ရှား အဆောက်အဦး ရဲ့ ခွင့်ပြုချက် သက်သေခံ တစ်ခုပါပဲ... လူသတ်သမားတွေကို ငှားရမ်းပြီးတဲ့အခါ ဒီတံဆိပ်ပြားကို ချန်ထားရစ်ခဲ့ပြီး လုပ်ငန်း ပြီးဆုံးသွားတဲ့ အခါကျမှ တံဆိပ်ပြားကို ပြန်လည် သိမ်းဆည်းတာပါ"

"ဒါပေမဲ့ ကျွန်တော် ကြားဖူးတာကတော့... အကယ်၍ လုပ်ကြံ သတ်ဖြတ်မှု အတွင်းမှာ မျှော်လင့်မထားတဲ့ အခြေအနေတွေ ကြောင့် ကျရှုံးသွားခဲ့မယ် ဆိုရင်... ဒီတံဆိပ်ပြားကို အသုံးပြုပြီး နောက်ထပ် ကတိကဝတ် အသစ်တစ်ခုကို အခမဲ့ ထပ်မံ တောင်းဆိုနိုင်ပါတယ်... ဒါပေမဲ့ တစ်ခုတော့ ရှိတယ်ဗျ... အကယ်၍ ဒီတံဆိပ်ပြားက ပေါ့ဆမှုကြောင့် ပျောက်ဆုံးသွားခဲ့မယ် ဆိုရင်တော့ ပျောက်ဆုံးသွားအောင် လုပ်တဲ့သူဟာ ယွမ်ရှား အဆောက်အဦး ရဲ့ နောက်ထပ် ပစ်မှတ် ဖြစ်လာတော့တာပါပဲ... ပြီးတော့ ဒီတံဆိပ်ပြားကို ရရှိထားတဲ့သူကလည်း ယွမ်ရှား အဆောက်အဦး နဲ့အတူ ကတိကဝတ် အသစ်တစ်ခုကို ထပ်မံ ချုပ်ဆိုနိုင်မှာ ဖြစ်ပါတယ်"

--