အခန်း ၂၀၀၇

အခန်း(၂၀၀၇) ဖန်ဆင်းရှင်အဆင့်ကို တစ်ချက်တည်းဖြင့် သုတ်သင်ခြင်း

လီဟွမ်၏ မျက်လုံးသူငယ်အိမ်များက မသိလိုက်ဘဲ ကျုံ့ဝင်သွားခဲ့ရသည်။ သူသည် ပြင်ပစစ်တပ်ကို လာရောက်ချိုးနှိမ်ဖျက်ဆီးရန် လီမျိုးနွယ်စုထံမှ အမိန့်ရရှိထားခဲ့သောကြောင့် သဘာဝအတိုင်းပင် ပြင်ပစစ်တပ်သည် တရှ၏ စစ်တပ်တစ်ခုဖြစ်သဖြင့် ၎င်းတို့၏ ရန်သူများကို ပြုလုပ်သကဲ့သို့ ရက်စက်ကြမ်းကြုတ်သော နည်းလမ်းများသုံးကာ အစုလိုက်အပြုံလိုက် သတ်ဖြတ်၍မရပေ။ ထို့ကြောင့် ၎င်းတို့က စစ်သားများကို နှိပ်စက်ညှဉ်းပန်းရန် နည်းလမ်းမျိုးစုံကိုသာ အသုံးပြုခဲ့ကြရသည်။

အချိန်တိုတိုလေးအတွင်း၌ပင် ပြင်ပစစ်တပ်မှ စစ်သားသုံးပုံတစ်ပုံခန့်သည် နှိပ်စက်ညှဉ်းပန်းမှုကြောင့် သေဆုံးသွားခဲ့ကြရပြီ ဖြစ်သည်။ အကယ်၍ ဤအတိုင်းသာ ဆက်သွားနေပါက ကျန်ရှိနေသော သုံးပုံနှစ်ပုံသည်လည်း နောက်ထပ် ခြောက်လအတွင်းမှာတင် ညှဉ်းပန်းနှိပ်စက်ခံရပြီး သေဆုံးသွားကြပေလိမ့်မည်။ ထိုအချိန်ကျမှ စစ်ဝန်ကြီးဌာနက ၎င်းတို့နေရာတွင် အစားထိုးရန် စစ်သားအသစ်များကို စေလွှတ်လိမ့်မည် ဖြစ်သည်။ အရာရာတိုင်းကို အကွက်စေ့စေ့ ပြုလုပ်ထားခဲ့ခြင်း ဖြစ်သည်။ ခေါင်းဆောင်မရှိတော့သော စစ်တပ်တစ်ခုကို မည်သူမျှ ဂရုစိုက်နေမည်မဟုတ်ပေ။ လီမျိုးနွယ်စုသည် ဤအခွင့်အရေးကို အသုံးချကာ အခြားစစ်တပ်တစ်ခုကိုပါ ထိန်းချုပ်ရန် လုပ်ဆောင်ခဲ့ခြင်း ဖြစ်သဖြင့် လူတိုင်းအတွက် အဆင်ပြေလှသည်ဟု ဆိုရပေလိမ့်မည်။

တစ်ချိန်တည်းမှာပင် ၎င်းသည် လူတိုင်းအတွက် သတိပေးချက်တစ်ခုလည်း ဖြစ်သည်။ အကယ်၍ ၎င်းတိုသာ လီမျိုးနွယ်စုကို ပြစ်မှားမိပါက၊ ချူးယွင်ဖန်းကဲ့သို့ သေဆုံးသွားခဲ့လျှင်ပင် သူတို့၏ မိသားစုများဆီသို့ ဘေးအန္တရာယ်များ သယ်ဆောင်လာပေးလိမ့်မည် ဖြစ်သည်။ ချူးယွင်ဖန်းနှင့် ပတ်သက်သမျှသူတိုင်း အပြစ်ပေးခြင်း ခံရပေလိမ့်မည်။

သို့သော်လည်း လီဟွမ်သည် ချူးယွင်ဖန်းနှင့် ဤနေရာတွင် ဆုံတွေ့ရလိမ့်မည်ဟု မထင်မှတ်ထားခဲ့ပေ။ လီမျိုးနွယ်စုအတွင်းရှိ ချူးယွင်ဖန်း၏ ကျော်စောမှုကို သူ ပြန်လည်တွေးတောမိလိုက်သည်နှင့် တစ်ပြိုင်နက် ချက်ချင်းပင် ထွက်ပြေးချင်စိတ်များ ပေါက်ဖွားလာခဲ့သည်။ ချူးယွင်ဖန်းသည် နတ်ဆိုးမျိုးနွယ်စုနှင့် နတ်ဆိုးနတ်ဘုရားဂိုဏ်းတို့ ပူးပေါင်းကာ လီမျိုးနွယ်စု၏ လျှို့ဝှက်ပံ့ပိုးမှုပါ ထပ်မံဖြည့်စွက်ထားသော ဝိုင်းရံပိတ်ဆို့မှုကြားမှပင် လွတ်မြောက်အောင် တွန်းလှန်နိုင်ခဲ့သူ ဖြစ်သည်။ သူသည် နတ်ဆိုးမျိုးနွယ်စုနှင့် နတ်ဆိုးနတ်ဘုရားဂိုဏ်းမှ ကျွမ်းကျင်ပညာရှင်အမြောက်အမြားကို သတ်ဖြတ်ခဲ့သည်။ အကယ်၍ နတ်ဆိုးမျိုးနွယ်စု၏ အမြင့်မြတ်ဆုံး တည်ရှိမှုကြီးသာ ပါဝင်မလာခဲ့ပါက ချူးယွင်ဖန်း တကယ်ပင်

လွတ်မြောက်သွားနိုင်ခဲ့လိမ့်မည် ဖြစ်သည်။

လီမျိုးနွယ်စု၏ ဂိုဏ်းချုပ်အကြီးအကဲတစ်ဦးအနေဖြင့် လီစွမ်က အတွင်းသတင်းအချို့ကို သိရှိထားခဲ့သည်။ ထို့ကြောင့်ပင် သူ ချူးယွင်ဖန်းကို မြင်လိုက်ရသည့် ပထမဆုံး အခိုက်အတန့်တွင် သူ၏ တုံ့ပြန်မှုမှာ ထွက်ပြေးရန် ဖြစ်နေခဲ့ခြင်း ဖြစ်သည်။ သူသည် သာမန်အကြီးအကဲတစ်ဦးမျှသာဖြစ်ကာ သူ၏ ကျင့်စဉ်အဆင့်မှာလည်း ဖန်ဆင်းရှင်အဆင့်ထဲသို့ လတ်တလောမှတင် ဝင်ရောက်ထားခဲ့ခြင်း ဖြစ်သည်။ နတ်ဆိုးမျိုးနွယ်စုနှင့် နတ်ဆိုးနတ်ဘုရားဂိုဏ်းမှ ကျွမ်းကျင်ပညာရှင်များကို အလွယ်တကူ ခြေမှုန်းသတ်ဖြတ်နိုင်သော ချူးယွင်ဖန်းကို သူ မည်သို့ ရင်ဆိုင်နိုင်မည်နည်း။

“ချူးယွင်ဖန်း… မင်း ပြန်လာရင်လည်း အပိုပဲ။ စစ်ဝန်ကြီးဌာနရဲ့ လွှဲပြောင်းမိန့်အရ ပြင်ပစစ်တပ်ကို ဟွမ်ထျန်းမြို့စားရဲ့ ကွပ်ကဲမှုအောက်မှာ ထားရှိပြီးသား။ မင်းမှာ ဒီနေရာကို အမိန့်ပေးပိုင်ခွင့် မရှိတော့ဘူး။ မင်းက ရိုင်းရိုင်းစိုင်းစိုင်း ပြုမူနေလို့ ငါ မင်းအကြောင်းကို စစ်ဝန်ကြီးဌာနဆီ တိုင်ကြားပြီး မင်းရဲ့ ရာထူးအားလုံးကို ရုပ်သိမ်းပစ်အောင် လုပ်မယ်၊” လီမျိုးနွယ်စု၏ ဂိုဏ်းချုပ်အကြီးအကဲက သတ္တိမွေးကာ အော်ဟစ်လိုက်သည်။

“ပြင်ပစစ်တပ်က လီချန်းယွမ်ရဲ့ ကွပ်ကဲမှုအောက်မှာ ဟုတ်လား၊” ချူးယွင်ဖန်းက နှာခေါင်းရှုံ့လိုက်သော်လည်း သူ၏ မျက်ဝန်းများထဲမှ သတ်ဖြတ်လိုစိတ်များမှာ ပိုမိုအေးစက်လာခဲ့သည်။

“မင်းက ကိုယ့်ကိုယ်ကိုယ် ဘာကောင်မို့လို့ တော်ဝင်နန်းတော်ရဲ့ အကျိုးဆောင်ဝန်ထမ်းတွေကို ဒုက္ခပေးရဲတာလဲ။ ပြင်ပစစ်တပ်တစ်ခုလုံးရဲ့ သုံးပုံတစ်ပုံက အသတ်ခံရရင်ရ မရရင် ဒဏ်ရာရထားကြတယ်လေ။”

ချူးယွင်ဖန်းသည် သူ၏ နတ်ဘုရားစိတ်အာရုံဖြင့် မြေပြင်ကို စစ်ဆေးကြည့်လိုက်သည်။ မြေပြင်ပေါ်ရှိ အလောင်းများက သူ့ကို ထိတ်လန့်တုန်လှုပ်သွားစေခဲ့သည်။

“သူတို့အားလုံးဟာ တော်ဝင်နန်းတော်အတွက် ကြီးမားတဲ့ အကျိုးဆောင်မှုတွေ ပြုလုပ်ခဲ့ကြတဲ့ စစ်သားတွေပဲ။ သူတို့က တိုင်းတစ်ပါးမျိုးနွယ်စုတွေရဲ့ လက်ချက်နဲ့ သေဆုံးခဲ့ကြတာမဟုတ်ဘဲ မင်းတို့လို ယုတ်ညံ့တဲ့ကောင်တွေရဲ့ လက်ထဲမှာ သေဆုံးခဲ့ကြရတာ။ မင်းက ဘယ်လိုမျက်နှာမျိုးနဲ့ လီချန်းယွမ်အကြောင်း ငါ့ရှေ့မှာ လာပြောရဲတာလဲ။ မင်း သတင်းကို မကြားရသေးဘူး ထင်တယ်။ လီချန်းယွမ် သေပြီ… သူ ငါ့လက်နဲ့ သေသွားတာ၊” ချူးယွင်ဖန်းက အေးစက်စွာ ရယ်မောလိုက်သည်။

“ဒီနေ့ ငါ ကောင်းကင်ဘုံကိုယ်စား တရားမျှတမှုကို ဖော်ဆောင်မယ်။ မင်းတို့ထဲက တစ်ယောက်မှ လွတ်မြောက်မှာ မဟုတ်ဘူး။”

လီဟွမ်၏ ပထမဆုံးတုံ့ပြန်မှုမှာ ၎င်းက မဖြစ်နိုင်ဘူးဟူ၍ ဖြစ်သည်။ လီချန်းယွမ်သည် ပြိုင်ဘက်ကင်းသူတစ်ဦး မဟုတ်သော်လည်း သူ၏ သက်တူရွယ်တူချင်းများ၏ လက်ချက်ဖြင့် ရှုံးနိမ့်သွားနိုင်စရာ မရှိပေ။ ဤကဲ့သို့သောအရာမျိုး ယခင်က တစ်ခါမျှ မဖြစ်ပွားခဲ့ဖူးပေ။ လီချန်းယွမ်သည် သူ၏ပြိုင်ဘက်ကင်းလှသော ဂုဏ်သတင်းကို တည်ဆောက်ရန် ဆယ်စုနှစ်ပေါင်းများစွာ အချိန်ယူခဲ့ရခြင်း ဖြစ်သည်။

သို့သော်လည်း ယခုအခိုက်အတန့်တွင် လီဟွမ်သည် ချူးယွင်ဖန်းထံမှ လွန်ကဲလှသော အန္တရာယ်ရှိသည့် အာရုံခံစားမှုတစ်ခုကို ရရှိလိုက်သည်။ ဤခံစားချက်က သူ့ကို ချက်ချင်းပင် လှည့်ပြန်ပြီး ထွက်ပြေးသွားစေရန် တွန်းအားပေးလိုက်သည်။ လီချန်းယွမ် ချူးယွင်ဖန်း၏ လက်ချက်ဖြင့် သေဆုံးသွားခြင်း ရှိမရှိကို ဂရုမစိုက်နိုင်တော့ဘဲ၊ ချူးယွင်ဖန်းသည် မကောင်းသော ရည်ရွယ်ချက်များဖြင့် ပြန်လည်ရောက်ရှိလာခြင်း ဖြစ်သောကြောင့် ချူးယွင်ဖန်းနှင့် ထိပ်တိုက်ရင်ဆိုင်ရန် မဝံ့ရဲဘဲ မနေရဲတော့ပေ။

“ချူးယွင်ဖန်း… ငါ ဒီအကြောင်းကို စစ်ဝန်ကြီးဌာနဆီ သတင်းပို့မယ်။ မင်း ထွက်ပြေးဖို့ မစဉ်းစားနဲ့တော့၊” လီဟွမ်က အော်ဟစ်လိုက်ပြီးနောက် မြို့အပြင်ဘက်သို့ ပြေးထွက်သွားခဲ့သည်။ ခဏချင်းအတွင်းမှာတင် သူသည် ကီလိုမီတာ ရာပေါင်းများစွာအကွာသို့ ထွက်ပြေးသွားခဲ့ပြီ ဖြစ်သည်။

“မင်း လွတ်မှာ မဟုတ်ပါဘူး၊” ချူးယွင်ဖန်းက အေးစက်စွာ ရယ်မောလိုက်ပြီးနောက် လီဟွမ် လွတ်မြောက်သွားမည်ကို စိုးရိမ်ပုံမရပေ။

ချူးယွင်ဖန်းက လက်ကို ဝှေ့ယမ်းလိုက်သောအခါ လေဟာနယ်ထဲမှ လျှပ်စီးနှင်တံတစ်ခု ရုတ်တရက် ထွက်ပေါ်လာခဲ့သည်။ ထို့နောက် ၎င်းက လီဟွမ်၏ နောက်သို့ ပျံသန်းနေသော နဂါးတစ်ကောင်ကဲ့သို့ လိုက်လံဖမ်းဆီးတော့သည်။

လီဟွမ်အနေဖြင့် ထွက်ပြေးရန်ပင် အချိန်မရလိုက်ပေ။ သူ၏ ဦးနှောက်သည် လျှပ်စီးနှင်တံဖြင့် အထိုးခံလိုက်ရကာ ၎င်းက သူ၏ တစ်ကိုယ်လုံးကို တောင်မြစ်ပန်းချီကားထဲသို့ ဆွဲသွင်းသွားခဲ့သည်။ ဤအရာအားလုံးက မြန်ဆန်လွန်းလှပေသည်။ မျက်စိတစ်မှိတ်အတွင်းမှာတင် ပေါင်းထိုင်မြို့ကို ခြောက်လကျော်ကြာအောင် လွှမ်းမိုးထားခဲ့သော လီမျိုးနွယ်စု၏ ဂိုဏ်းချုပ်အကြီးအကဲသည် ချူးယွင်ဖန်း၏ လက်ချက်ဖြင့် သေဆုံးသွားခဲ့ရပြီ ဖြစ်သည်။

ဤအပြောင်းအလဲများအားလုံးက ပေါင်းထိုင်မြို့အတွင်းရှိ မတူညီသော အင်အားစုများမှ ကျွမ်းကျင်ပညာရှင်များကို အသက်ရှူရကျပ်သွားစေခဲ့သည်။ ချူးယွင်ဖန်း ပြန်ရောက်လာသည်နှင့်တစ်ပြိုင်နက် သူ၏ စွမ်းအားကို ပြသလိုက်သည်ကို မြင်တွေ့ရသဖြင့် ထိုအင်အားစုများလည်း အလွန်အမင်း သတိထားမိသွားကြရသည်။

မူလက ပေါင်းထိုင်မြို့သည် ချူးယွင်ဖန်း၏ ကိုယ်ပိုင်နယ်မြေတစ်ခု ဖြစ်လာခဲ့ကာ ချူးယွင်ဖန်းနှင့် ပတ်သက်သော အင်အားစုများလည်း ပံ့ပိုးခြင်း ခံခဲ့ရသည်။ သို့သော်လည်း ခြောက်လကျော်ကြာ လှုပ်ရှားမှုများ ပြုလုပ်ပြီးနောက်တွင်မူ စစ်တပ်အတွင်းရှိ စစ်သားများသာ လီမျိုးနွယ်စု၏ နှိပ်စက်ခြင်းကို ခံခဲ့ရသည်မဟုတ်ဘဲ၊ ချူးယွင်ဖန်း ပံ့ပိုးပေးထားခဲ့သော အင်အားစုများပင်လျှင် ဖယ်ကြဉ်ခြင်း ခံခဲ့ရ၍ ရှင်သန်ရန် ခက်ခဲနေခဲ့ကြသည်။ ယခုအခါ မြို့အတွင်း၌ လွှမ်းမိုးထားသော အင်အားစုများမှာ လီမျိုးနွယ်စု၏ အင်အားစုများ သို့မဟုတ် လီမျိုးနွယ်စုနှင့် ပတ်သက်ဆက်နွှယ်နေသူများသာ ဖြစ်သည်။ သို့မဟုတ်ပါက ပေါင်းထိုင်မြို့၌ ခြေကုပ်ယူရန် မဖြစ်နိုင်ပေ။

သို့သော်လည်း ယခုအခါ ချူးယွင်ဖန်းက လီဟွမ်ကို လျှပ်စီးကဲ့သို့သော အရှိန်အဟုန်ဖြင့် သတ်ဖြတ်လိုက်သည်ကို မြင်တွေ့ပြီးနောက်တွင်မူ လူတိုင်း ဆွံ့အသွားခဲ့ကြရသည်။ ထိုသူက ဖန်ဆင်းရှင် ဂိုဏ်းချုပ်အကြီးအကဲ တစ်ယောက်ဖြစ်သည်။

ထိုကဲ့သို့သော ပုဂ္ဂိုလ်မျိုးသည် မည်သည့်အရပ်မျက်နှာတွင်မဆို လူကုံထံကြီးတစ်ဦး ဖြစ်ပေလိမ့်မည်။ အကယ်၍ သူသာ လူသား-နတ်ဆိုး စစ်တလင်းပြင်တွင် ပေါ်ထွက်လာခဲ့ပါက အခြေအနေကို ပြောင်းလဲပစ်နိုင်သော ထိတ်လန့်ဖွယ် တည်ရှိမှုမျိုး ဖြစ်သည်။

ပေါင်းထိုင်မြို့ကို လီဟွမ် လွှဲပြောင်းရယူခဲ့ကတည်းက မည်သူမျှ သူ၏ရာထူးနေရာကို မလှုပ်ခါနိုင်ခဲ့ပေ။ သို့သော်လည်း ထိုကဲ့သို့သော ထိတ်လန့်ဖွယ် တည်ရှိမှုကြီးက တစ်ချက်တည်းဖြင့် သတ်ဖြတ်ခြင်း ခံလိုက်ရသည်။ လူအမြောက်အမြားမှာ ချူးယွင်ဖန်း၏ အမည်ကို ကြားဖူးကြသော်လည်း သူတို့ လူကိုယ်တိုင် မြင်တွေ့ရခြင်းမှာ ဤအကြိမ်က ပထမဆုံး ဖြစ်သည်။ ယခုအခိုက်အတန့်တွင် သူတို့၏ မျက်နှာအမူအရာများ ချက်ချင်း ပြောင်းလဲသွားခဲ့ကြရသည်။

“ဒါက ချူးယွင်ဖန်းလား။ သူက ဘာလို့ ကောလာဟလတွေထဲကထက် ဆယ်ဆလောက် ပိုပြီး ထိတ်လန့်ဖို့ကောင်းနေရတာလဲ။”

“သူ ခုနတင် ဟွမ်ထျန်းမြို့စား လီချန်းယွမ် သေပြီလို့ ပြောလိုက်တာ။ ဒီသတင်းက တကယ်ပဲ အမှန်လား။”

“ဒီသတင်းက အမှန်ဖြစ်လိမ့်မယ်လို့ ငါ ထင်တယ်။ အဆုံးသတ်မှာတော့ ဤသတင်းက အတည်ပြုဖို့ မခက်ခဲလှဘူးလေ။ ဟွမ်ထျန်းမြို့စားက လီမျိုးနွယ်စုရဲ့ အချစ်တော်ပဲ။ အနည်းငယ်မျှ လှုပ်ခတ်မှု ရှိရုံနဲ့တင် အခြားသူတွေ အလွယ်တကူ သတိပြုမိနိုင်ကြတာပဲ။ အကယ်၍ သူ ပြောတာ မှားနေရင် သူက လှောင်ပြောင်စရာပဲ ဖြစ်လာမှာ။”

“မှန်တယ်… ငါလည်း အဲဒီလိုပဲ ထင်တယ်။ ဟွမ်ထျန်းမြို့စားတော့ တကယ်ပဲ သွားပြီ ထင်တယ် စိုးရိမ်မိတယ်။”

“ဒါဆို ငါတို့ ဘာဆက်လုပ်ကြမလဲ။ ချူးယွင်ဖန်းက အရမ်း ရက်စက်တာပဲ။ သူ ငါတို့ကို ဒီအတိုင်း လွှတ်ထားမှာ မဟုတ်တာ သေချာတယ်။ ငါတို့ ဘာလုပ်သင့်လဲ။”

“ငါတို့ ဒီနေရာကနေ ထွက်သွားရမယ်… မြန်မြန် ထွက်သွားရမယ်။”

--