အခန်း ၂၀၁၀

အခန်း(၂၀၁၀) လီမျိုးနွယ်စုဝင်တွေကို သတ်တော့ရော ဘာဖြစ်လဲ

ချူးယွင်ဖန်း၏ ရှေ့မှောက်တွင် ယုချူးယွင်နှင့် ချူးဟုန်ချိုင်တို့က လေဟာနယ်ထဲ၌ တင်ပျဥ်ခွေထိုင်ကာ သူတို့၏ ခန္ဓာကိုယ်များမှ နတ်ဘုရားစွမ်းအင် လှိုင်းတံပိုးများ ဖျော့တော့စွာ ထွက်ပေါ်နေခဲ့သည်။ ၎င်းတို့၏ ခန္ဓာကိုယ်ပေါ်တွင် မျက်မြင်ထင်ရှား ရှိနေခဲ့သော ဒဏ်ရာများသည်လည်း အံ့ဩဖွယ်ကောင်းလှသော အရှိန်အဟုန်ဖြင့် ပြန်လည်သက်သာလာနေခဲ့ပြီ ဖြစ်သည်။

ချူးယွင်ဖန်း၏ ခန္ဓာကိုယ်မှ အဆုံးအစမရှိသော သက်စောင့်စွမ်းအင်များ အဆက်မပြတ် ထွက်ပေါ်လာခဲ့ပြီး၊ ခဏမျှအတွင်းမှာတင် ထိုလူနှစ်ဦး၏ ဒဏ်ရာများ လုံးဝ ပျောက်ကင်းသွားခဲ့ရသည်။

“ကျေးဇူးတင်ပါတယ် စီနီယာချူး။”

ယုချူးယွင်ဖန်း၏ ကျင့်ကြံခြင်းစွမ်းရည်မှာ ပိုမိုနိုးကြားတက်ကြွလာခဲ့သည့်အပြင် သူသည် အဆင့်တက်လှမ်းခြင်းကို ပထမဆုံး အောင်မြင်ခဲ့သူ ဖြစ်သည်။ သူ၏ မျက်နှာထက်တွင် အနည်းငယ် အံ့ဩဝမ်းသာသွားသော အရိပ်အယောင်များ ထင်ဟပ်သွားခဲ့ရသည်။ ချူးယွင်ဖန်းက သူ့ကို သက်စောင့်စွမ်းအင် အနည်းငယ်မျှသာ မျှဝေပေးခဲ့ခြင်း ဖြစ်သော်လည်း၊ ၎င်းက သူ၏ ဒဏ်ရာများကို ပျောက်ကင်းစေခဲ့ရုံသာမက ကျင့်စဉ်အခြေခံကိုပါ တိုးတက်စေခဲ့ပြီး စကြဝဠာအဆင့်သို့ တိုက်ရိုက် ရောက်ရှိသွားစေခဲ့သည်။

ယခုအချိန်တွင် စကြဝဠာအဆင့်ဟူသည်မှာ ချူးယွင်ဖန်းအတွက် ဘာမှမဟုတ်တော့သော်လည်း၊ သာမန်လူတစ်ဦးအတွက်မူ ကြယ်ကြွေကောင်းကင်ဂိုဏ်း၏ စစ်မှန်သော တပည့်တစ်ဦး ဖြစ်လာပြီး စကြဝဠာအဆင့်သို့ တက်လှမ်းနိုင်ခြင်းက အကြီးမားဆုံးသော အိပ်မက်တစ်ခုပင် ဖြစ်နေဆဲ ဖြစ်သည်။ အဘယ်ကြောင့်ဆိုသော် လူဦးရေ၏ ၉၉ ရာခိုင်နှုန်းခန့်သည် ၎င်းတို့၏ တစ်သက်တာတွင် စကြဝဠာအဆင့်သို့ ဘယ်သောအခါမှ တက်လှမ်းနိုင်ခြင်း မရှိကြသောကြောင့်ပင်ဖြစ်၏။

ယုချူးယွင်၏ မူလခန့်မှန်းချက်အရဆိုလျှင် သူသည် ဆယ်စုနှစ်ပေါင်းများစွာ ကြာပြီးနောက်မှသာ စကြဝဠာအဆင့်သို့ တက်လှမ်းနိုင်မည့် အခွင့်အရေး ရှိလိမ့်မည် ဖြစ်သည်။ ထိုအချိန်ကျလျှင် သူသည် ငယ်ရွယ်တော့မည်မဟုတ်ဘဲ သက်လတ်ပိုင်းအရွယ်သို့ ရောက်ရှိနေပြီ ဖြစ်ရာ၊ ရှေ့ဆက်တက်လှမ်းနိုင်မည့် ဖြစ်နိုင်ခြေမှာ အခြေခံအားဖြင့် မရှိသလောက်ပင်ဖြစ်၏။ ယခုမူ ချူးယွင်ဖန်းက သူ့ကို အောင်မြင်မှု အိပ်မက်ဆီသို့ ရောက်ရန် ကူညီပေးခဲ့ပြီ ဖြစ်သည်။ ပိုမိုရရှိလာခဲ့သော အချိန်များစွာနှင့်အတူ သူသည် ပိုမိုမြင့်မားသော အဆင့်တစ်ခုသို့ တက်လှမ်းနိုင်မည့် အခွင့်အရေးကို ရရှိသွားခဲ့ပြီ ဖြစ်ရာ၊ ဖြစ်နိုင်လျှင် ဤတစ်သက်တွင် ဖန်ဆင်းရှင်အဆင့်သို့ပင် တက်လှမ်းနိုင်ကောင်း တက်လှမ်းနိုင်ပေလိမ့်မည်။

“ကိစ္စမရှိပါဘူး၊” ချူးယွင်ဖန်းက ခေါင်းညိတ်လိုက်သည်။

ယုချူးယွင်အနေဖြင့် သူ၏ ကူညီမှုကြောင့် အဆင့်တက်လှမ်းနိုင်ခဲ့ခြင်း ဖြစ်သော်လည်း၊ ယုချူးယွင်ကိုယ်တိုင်၏ စုဆောင်းမှုများနှင့် အခြေခံအုတ်မြစ်ကလည်း အတော်အတန် နက်ရှိုင်းလှသောကြောင့်သာ ဤမျှလျင်မြန်စွာ အဆင့်တက်လှမ်းနိုင်ခဲ့ခြင်း ဖြစ်သည်။ ထို့နောက် သူ၏ အကြည့်က ချူးဟုန်ချိုင်ထံသို့ ရောက်ရှိသွားခဲ့သည်။

ယုချူးယွင်နှင့် နှိုင်းယှဉ်လိုက်လျှင် ချူးဟုန်ချိုင်၏ ဒဏ်ရာများက ပိုမိုပြင်းထန်လှသော်လည်း၊ ပြန်လည်သက်သာလာရန် အချိန်အတော်ကြာအောင် မစောင့်လိုက်ရပေ။

သူတို့၏ ဒဏ်ရာများမှာ လူသား-နတ်ဆိုး စစ်တလင်းပြင်မှ ရရှိလာခဲ့ခြင်း ဖြစ်သည်။ လီမျိုးနွယ်စုသည် ယုချူးယွင်နှင့် ချူးဟုန်ချိုင်တို့ကို ပြောင်ပြောင်တင်းတင်း အန္တရာယ်ပြုရန် မဝံ့ရဲကြသော်လည်း၊ စစ်မိန့်များထုတ်ပြန်ကာ လူသား-နတ်ဆိုးစစ်ပွဲ၌ ပါဝင်ဆင်နွှဲရန် အလွယ်တကူ စေလွှတ်နိုင်ခဲ့ကြသည်။

ဗိုလ်ချုပ်ဖြစ်သူ ချူးယွင်ဖန်း မရှိခဲ့ခြင်းကြောင့်၊ ပြင်ပစစ်တပ်သည် အခြေအနေကို ထိန်းချုပ်ပေးနိုင်မည့် မည်သည့်ပညာရှင်မျှ မရှိခဲ့သဖြင့် ကြီးမားလှသော ဆုံးရှုံးမှုများကို ရင်ဆိုင်ခဲ့ရသည်။ စစ်တလင်းပြင်တစ်ခုတွင် ပညာရှင်တစ်ဦး၏ အခန်းကဏ္ဍမှာ မေးခွန်းထုတ်စရာမလိုအောင် အရေးပါလှပေသည်။ ၎င်းတို့က စစ်ဗျူဟာခင်းကျင်းမှုများကို အလွယ်တကူ ဖျက်ဆီးပစ်နိုင်ကာ စစ်ပွဲ၏ ရလဒ်ကို ပြောင်းလဲပစ်နိုင်စွမ်း ရှိကြသည်။

ချူးယွင်ဖန်း မရှိသည့်နောက်တွင် စစ်တပ်သည် စစ်ပွဲအနည်းငယ် ဆင်နွှဲပြီးနောက်မှာတင် အထိနာခဲ့ရသည်။ သူတို့တွင် စစ်ကူပင် မရှိခဲ့ကြပေ။ ဤအတိုင်းသာ ဆက်သွားနေမည်ဆိုပါက မကြာမီမှာတင် ဤစစ်တပ်၏ အမည်နာမသည် တရှမင်းဆက်၏ စာရင်းမှ ပယ်ဖျက်ခြင်း ခံရတော့မည် ဖြစ်သည်။

ယုချူးယွင်နှင့် ချူးဟုန်ချိုင်တို့သည် စစ်ပွဲအတွင်း ပြင်းထန်စွာ ဒဏ်ရာရရှိခဲ့ကြပြီး အသက်ပင် ဆုံးရှုံးလုနီးပါး ဖြစ်ခဲ့ကြရသည်။ ချူးယွင်ဖန်းဟူသော နောက်ခံအင်အား မရှိသည့်အခါ ပြင်ပစစ်တပ်အတွင်း ထိုနှစ်ဦး၏ အခြေအနေမှာ မည်မျှအထိ ဆိုးရွားနေမည်ကို ခန့်မှန်းကြည့်နိုင်လှပေသည်။

ချူးဟုန်ချိုင် မျက်လုံးများကို ဖွင့်လိုက်သည့်အခါ သူ၏ ဒဏ်ရာများ ပျောက်ကင်းသွားရုံသာမက၊ သူ၏ ကျင့်စဉ်အခြေခံပါ အတိုင်းအဆမရှိ မြင့်တက်သွားခဲ့ကြောင်း သိရှိလိုက်ရသည်။ သူသည် ဒြပ်မဲ့ပြီးပြည့်စုံအဆင့်သို့ လှမ်းဝင်နိုင်ခဲ့ပြီ ဖြစ်ရာ၊ ၎င်းက သူ့အတွက် အနည်းဆုံး ဆယ်နှစ်တာခန့် ခါးသီးစွာ ကျင့်ကြံရမည့် အချိန်ကို သက်သာသွားစေခဲ့သည်။ သို့သော်လည်း သူက အလွန်အမင်း တည်ငြိမ်နေခဲ့သည်။ သူ၏ နှလုံးသားထဲတွင် ချူးယွင်ဖန်းသည် အရာခပ်သိမ်းကို တတ်စွမ်းနိုင်သူ ဖြစ်သည်ဟူသော ယုံကြည်ချက်ကို လွန်ခဲ့သော အချိန်ကတည်းကပင် စိုက်ထူထားခဲ့ပြီး ဖြစ်၍၊ ဤအရာက သဘာဝကျသော ကိစ္စတစ်ခုမျှသာ ဖြစ်သည်။

“လောလောဆယ် အပြင်မထွက်ကြနဲ့ဦး။ သီးသန့်အောင်းပြီး အခုရရှိထားတဲ့ စွမ်းအားတွေကို အခြေကျအောင် အရင်လုပ်ကြဦး။ မဟုတ်ရင် ပျိုးပင်တွေကို အတင်းဆွဲတင်ပြီး ကြီးထွားအောင် လုပ်သလို ဖြစ်သွားလိမ့်မယ်။ ဒါက ကောင်းတဲ့အရာ မဟုတ်ဘူး၊” ချူးယွင်ဖန်းက ညွှန်ကြားလိုက်သည်။

ချူးယွင်ဖန်းသည် သူ၏ ခန္ဓာကိုယ်အတွင်းရှိ သစ်သားဝိဉာဥ်အဆီအနှစ်၏ အစိတ်အပိုင်း အနည်းငယ်ကို ထိုနှစ်ဦးအား မျှဝေပေးခဲ့ခြင်း ဖြစ်သည်။ သူတို့၏ ကျင့်စဉ်မှာ ချူးယွင်ဖန်းနှင့် နှိုင်းယှဉ်လျှင် များစွာ နိမ့်ပါးလွန်းလှသဖြင့် သဘာဝအတိုင်းပင် လွယ်ကူစွာ အဆင့်တက်လှမ်းနိုင်ခဲ့ကြခြင်း ဖြစ်သည်။ အထူးသဖြင့် ချူးဟုန်ချိုင် ဖြစ်သည်။ ပုံမှန်အတိုင်း ကျင့်ကြံမည်ဆိုပါက သူသည် ဆယ်နှစ်တာအတွင်းမှာပင် ဒြပ်မဲ့အဆင့်၏ အလှည့်အပြောင်းကို ထိတွေ့နိုင်ရန် မလွယ်ကူပေ။ သို့သော်လည်း သစ်သားဝိဉာဥ်အနှစ်သာရကြောင့် လျင်မြန်စွာ အဆင့်တက်လှမ်းနိုင်ခဲ့ပြီ ဖြစ်ရာ၊ နောင်နှစ်အနည်းငယ်အတွင်း စကြဝဠာအဆင့်သို့ ဝင်ရောက်ရန်မှာ သူ့အတွက် လွယ်ကူသွားခဲ့ပြီ ဖြစ်သည်။

“နောက်ပိုင်းကာလတွေမှာ ငါ ပြင်ပစစ်တပ်ကို လေ့ကျင့်ပေးမယ်။ စစ်တပ်ရဲ့ တိုက်ခိုက်ရေးစွမ်းရည်ကို ပြန်လည် ထူထောင်ချင်တာ။ အခု အခြေအနေတွေက ဘယ်လိုရှိလဲ။” ချူးယွင်ဖန်းက မေးမြန်းလိုက်သည်။

“လီမျိုးနွယ်စုက ဒီအတိုင်း လွှတ်ထားမှာ မဟုတ်ဘူးလို့ ကျွန်တော် စိုးရိမ်မိတယ် စီနီယာချူး။” ယုချူးယွင်က ချူးယွင်ဖန်းကို အနည်းငယ် စိုးရိမ်ပူပန်သော အကြည့်ဖြင့် ကြည့်ရင်း ပြောလိုက်သည်။

အပြင်လူတစ်ယောက်ဖြစ်သော ချူးဟုန်ချိုင်နှင့် မတူဘဲ၊ သူသည် တရှ၏ ဒေသခံတစ်ဦး ဖြစ်သဖြင့် လီမျိုးနွယ်စု မည်မျှအထိ ကြောက်မက်ဖွယ်ကောင်းကြောင်း နားလည်လှပေသည်။

“စစ်ရေးအရှိန်အဝါကြီးမားတဲ့ မျိုးနွယ်စု” ဟူသော စကားလုံးကတင် အရာခပ်သိမ်းကို ရှင်းပြနေခဲ့ပြီးသား ဖြစ်သည်။ ၎င်းသည် သာမန်အင်အားစုများ သုံးစွဲနိုင်သော အသုံးအနှုန်းမျိုး မဟုတ်ပေ။

လီမျိုးနွယ်စုသည် ကြယ်ကြွေကောင်းကင်ဂိုဏ်းနှင့် နှိုင်းယှဉ်လျှင် ဘာမှမဟုတ်သော်လည်း၊ ၎င်းတို့အတွက်ူမ ၎င်းက ဧရာမ သတ္တဝါကြီးတစ်ကောင် ဖြစ်နေဆဲ ဖြစ်သည်။ ယခုမူ ချူးယွင်ဖန်းက လျှပ်စီးကြိမ်ဒဏ်ကို သုံးကာ ထိုလီမျိုးနွယ်စုဝင်များကို သေဆုံးသည်အထိ ချိတ်ဆွဲထားခဲ့ရုံသာမက လီမျိုးနွယ်စု၏ ဖန်ဆင်းရှင်အဆင့် အကြီးအကဲတစ်ဦးကိုပါ သတ်ဖြတ်ခဲ့သည်။ ဤရန်ငြိုးရန်စက အလွန် ကြီးမားလှပေသည်။

“လီမျိုးနွယ်စုက ဘာမှမဟုတ်ပါဘူး။ ငါ လီချန်းယွမ်ကိုတောင် သတ်ခဲ့တာပဲ၊ လီမျိုးနွယ်စုရဲ့ ဖန်ဆင်းရှင်အဆင့် အကြီးအကဲတစ်ယောက်လောက်ကတော့ ဘာပြောစရာ ရှိလို့လဲ၊” ချူးယွင်ဖန်းက ပေါ့ပေါ့ပါးပါး ပြောလိုက်သည်။

ယုချူးယွင်နှင့် ချူးဟုန်ချိုင်တို့ ဆွံ့အသွားခဲ့ကြရသည်။ သူတို့သည် မိမိတို့ကို အလွန်အမင်း ထိတ်လန့်တုန်လှုပ်သွားစေသည့် စကားတစ်ခွန်းကို ကြားလိုက်ရခြင်း ဖြစ်သည်။ လီချန်းယွမ်သည် သူ၏ သက်တူရွယ်တူများကြားတွင် အလွန် ထင်ရှားကျော်ကြားလှသဖြင့် အပြင်လူဖြစ်သော ချူးဟုန်ချိုင်ပင်လျှင် သူ့အကြောင်းကို ကြားဖူးခဲ့သည်။ ထိုလူ မည်သည့်အဆင့်သို့ ရောက်ရှိနေမည်ကို ခန့်မှန်းကြည့်နိုင်လှပေသည်။

ချူးယွင်ဖန်း၏ နောက်လိုက်များ၏ နှလုံးသားထဲတွင် အကြီးမားဆုံးသော အရိပ်မည်းကြီးမှာ တစ်လောကလုံး သိရှိကြသည့် ချူးယွင်ဖန်းနှင့် လီချန်းယွမ်တို့ကြားမှ ရန်ငြိုးရန်စများ ဖြစ်သည်ဟု ဆိုနိုင်သည်။

နှစ်ဖက်စလုံးသည် သေကျေပျက်စီးရမည့် ဆက်ဆံရေးမျိုး ဖြစ်နေခဲ့ကြရာ၊ ထိုကဲ့သို့သော အခြေအနေမျိုးတွင် လီချန်းယွမ်သည် ချူးယွင်ဖန်း၏ လက်ချက်ဖြင့် သေဆုံးသွားခဲ့ပြီဟု ရုတ်တရက် အပြောခံလိုက်ရသဖြင့် ၎င်းက မည်မျှအထိ လှုပ်ခတ်သွားစေမည်ကို တွေးတောကြည့်နိုင်လှပေသည်။

သို့သော်လည်း ယုချူးယွင်က ချက်ချင်းပင် တုံ့ပြန်နိုင်ခဲ့သည်။ ချူးယွင်ဖန်းသည် အရာခပ်သိမ်းကို တတ်စွမ်းနိုင်သည်ဟု အခိုင်အမာ ယုံကြည်ထားသော ချူးဟုန်ချိုင်နှင့် မတူဘဲ၊ ယုချူးယွင်က ချူးယွင်ဖန်း အဘယ်ကြောင့် လီမျိုးနွယ်စုကို မျက်စိထဲမထည့်ရသလဲ၊ ထိုမျှအထိ အထင်သေးရဲသလဲဆိုသည့် အချက်ကို ချက်ချင်း သဘောပေါက်သွားခဲ့သည်။

ချူးယွင်ဖန်းသည် လီချန်းယွမ်ကို သတ်ဖြတ်ခဲ့သည်။ ဤကိစ္စက လှုပ်ခတ်သွားစေခဲ့ကာ တစ်လောကလုံး သိရှိသွားခဲ့ကြသော်လည်း၊ စစ်စခန်းအတွင်း ပိတ်မိနေခဲ့သော သူကမူ မသိရှိခဲ့ရပေ။ သို့သော်လည်း ပါရမီရှင်များအပေါ် ထားရှိသော သဘောထားကို သူ သိရှိလှပေသည်။

ချူးယွင်ဖန်း လီချန်ယွမ်ကို သတ်နိုင်ခဲ့သည်ဟူသည်မှာ သူက လီချန်းယွမ်၏ နေရာကို အစားထိုး၍ ကမ္ဘာပေါ်တွင် နံပါတ်တစ် ပါရမီရှင် ဖြစ်လာခဲ့ပြီဟု အဓိပ္ပာယ်ရသည်။ ကြယ်ကြွေကောင်းကင်ဂိုဏ်းက ချူးယွင်ဖန်းကို ကျိန်းသေ ကာကွယ်ပေးပေလိမ့်မည်။ လီမျိုးနွယ်စု နေနေသာသာ၊ အခြားသော ထိပ်တန်းဂိုဏ်းကြီး ဆယ်ဂိုဏ်းပင်လျှင် ချူးယွင်ဖန်းနှင့် ပတ်သက်လာလျှင် က ကြယ်ကြွေကောင်းကင်ဂိုဏ်းကို နောက်ဆုတ်အောင် ပြုလုပ်နိုင်မည် မဟုတ်ပေ။

ချူးယွင်ဖန်း ပြောခဲ့သကဲ့သို့ပင်… လီချန်းယွမ်ပင်လျှင် အသတ်ခံခဲ့ရပြီ ဖြစ်ရာ၊ သာမန် လီမျိုးနွယ်စု အကြီးအကဲတစ်ယောက်က မည်သို့ပြောစရာစကားလုံးရှိတော့မည်နည်း။

ဤအချက်ကို တွေးမိလိုက်သောအခါ ယုချူးယွင်၏ နှလုံးခုန်သံများမှာ ရင်ဘတ်ထဲမှ ထွက်လာလုမတတ် မြန်ဆန်သွားခဲ့ရသည်။ ယနေ့မှစ၍ ချူးယွင်ဖန်းသည် ကောင်းကင်ယံထက်သို့ ကျိန်းသေ ပျံသန်းသွားတော့မည်ဖြစ်ကာ ရှိရှိမရှိရှိ အရေးမပါသော တည်ရှိမှုမျိုး မဟုတ်တော့ကြောင်း သူ သိရှိလိုက်ပြီ ဖြစ်သည်။ ကြယ်ကြွေကောင်းကင်ဂိုဏ်းသည် ဂိုဏ်း၏ အနာဂတ်အတွက် သူ့ကို အစွမ်းကုန် ကူညီပျိုးထောင်ပေးပေလိမ့်မည်။ ချူးယွင်ဖန်း မသေဆုံးသရွေ့ သူသည် ကမ္ဘာပေါ်ရှိ ထိပ်တန်းပညာရှင်များထဲမှ တစ်ဦး ကျိန်းသေ ဖြစ်လာပေလိမ့်မည်။ ၎င်းတို့သည်လည်း ကောင်းကင်ဘုံသို့ အတူတူ တက်လှမ်းနိုင်ကြပေလိမ့်မည်။ ယင်းက သူတို့ ကြံစည်နိုင်မည့် အကောင်းဆုံးသော ရလဒ်ပင် ဖြစ်သည်။

“မင်းတို့ စိတ်အေးအေးထားပြီး စစ်တပ်ကို ပြန်လည်ဖွဲ့စည်းတာကိုပဲ အာရုံစိုက်ပါ။ လီမျိုးနွယ်စုဘက်က လာမယ့် ဖိအားတွေကိုတော့ ငါပဲ ကိုင်တွယ်ဖြေရှင်းပါ့မယ်၊” ချူးယွင်ဖန်းက တည်ငြိမ်စွာ ပြောကြားလိုက်တော့သည်။

--