အခန်း ၇၄၄

အခန်း (၇၄၄) တာအိုမီးတောက် ဖြင့် သုတ်သင်ခြင်း၊ ယဲ့ဖုန်း ၏ ပြိုင်ဘက်ကင်း အာဏာစက်

“သူတော်စင်အဆင့် က တကယ်ကို အစွမ်းထက်တာပဲ”

ယဲ့ဖုန်းသည် သူ၏ စုတ်ပြတ်သတ်နေသော ဝတ်ရုံကို ငုံ့ကြည့်လိုက်ရာ ၎င်းတွင် တွယ်ကပ်နေသော ဟင်းလင်းပြင် စွမ်းအားများ ပြန့်ကျဲသွားပြီ ဖြစ်ကြောင်း တွေ့ရှိလိုက်ရ၏။

အတွေးတစ်ချက်ဖြင့် သူ၏ ခန္ဓာကိုယ်မှာ ငွေဖြူရောင် ဟင်းလင်းပြင် စွမ်းအားများဖြင့် နောက်တစ်ဖန် လွှမ်းခြုံခံလိုက်ရပြီး၊ ဟင်းလင်းပြင် လွှဲပြောင်းခြင်း ဝင်္ကပါ တစ်ခုကို ဖန်တီးလိုက်သည်။

သူတော်စင်အဆင့် အောက်ရှိ တိုက်ခိုက်မှု အားလုံးနီးပါးကို အခြားနေရာသို့ လွှဲပြောင်းပေးနိုင်စွမ်း ရှိ၏။

ဆိုလိုသည်မှာ သူတော်စင်အဆင့် စွမ်းအား မရှိသူ မည်သူမျှ သူ့ကို အန္တရာယ် မပြုနိုင်တော့ချေ။

ဒါက ယဲ့ဖုန်းက "ဟင်းလင်းပြင် ကျင့်စဉ်" ဒုတိယတွဲ ကို ကျင့်ကြံပြီးနောက် နားလည်သဘောပေါက်လာခဲ့သော အလွန်အစွမ်းထက်သည့် ကာကွယ်ရေး စွမ်းရည် ပါရှိသည့် သူတော်စင်အဆင့် နတ်ဘုရား စွမ်းရည် "ဟင်းလင်းပြင် အကာအကွယ်" ပင် ဖြစ်သည်။

သို့သော် ယနေ့တွင် ဤနတ်ဘုရား စွမ်းရည် ကို ပြီးပြည့်စုံသော ကိုယ်ပွား က ဖောက်ထွင်းသွားခဲ့၏။

ဤသူမှာ အလွန် အစွမ်းထက်လွန်းကြောင်း ယဲ့ဖုန်း သဘောပေါက်သွားတော့သည်။

“ဒုက္ခပဲ... ဂိုဏ်းချုပ်ယဲ့ အရေးနိမ့်နေပြီဟေ့”

“ငါတို့ ဝင်ကူသင့်လား”

ရေခဲနှင့်နှင်း မြင့်မြတ်သော မြို့တော် အတွင်းရှိ တပိုင်းသူတော်စင် အသီးသီးသည် တစ်ဦးကိုတစ်ဦး စိုးရိမ်တကြီး ကြည့်လိုက်ကြ၏။

ဒါက သူတော်စင်အဆင့် တိုက်ပွဲတစ်ခု ဖြစ်ပြီး အလွန် အန္တရာယ်များလှသည်။ မည်သူကမျှ ဝင်မပါချင်ကြချေ။ အနည်းငယ် အမှားအယွင်း ဖြစ်သွားသည်နှင့် အသက်သေဆုံးသွားနိုင်၏။

ဤနေရာတွင် တိုက်ပွဲဝင်နိုင်စွမ်း ရှိသူမှာ မြင့်မြတ်သော လက်နက်ကို ပိုင်ဆိုင်ထားသော ယင်ရူရုံ တစ်ဦးတည်းသာ ရှိသည်။ သို့သော် သူမ၏ အေးစက်စက် လျစ်လျူရှုမှုနှင့် ကူညီရန် ငြင်းဆန်မှုမှာ အလွန် စက်ဆုပ်ရွံရှာဖွယ် ကောင်းလှ၏။

“ဟွန်း... ကူညီရမယ်... မဖြစ်နိုင်တာ... ယဲ့ဖုန်း တစ်ယောက် ပြီးပြည့်စုံသော ကိုယ်ပွား ရဲ့ အသတ်ခံရတာပဲ ကြည့်နေလိုက်မယ်”

ယင်ရူရုံ စိတ်ထဲမှ လှောင်ပြောင်လိုက်၏။

နှစ်ဦးစလုံး ရှန်ကျိုးတိုက်ကြီးမှ ဖြစ်သော်ငြား၊ ယဲ့ဖုန်း ကို သူမကိုယ်တိုင် ဒုက္ခပေးလောက်အောင်တော့ သေချာပေါက် ရူးသွပ်နေမည် မဟုတ်ချေ။

သို့သော် ယဲ့ဖုန်း တစ်ယောက် ပြီးပြည့်စုံသော ကိုယ်ပွား ၏ လက်ချက်ဖြင့် သေဆုံးသွားသည်ကို အေးအေးဆေးဆေး ကြည့်နေရခြင်းကတော့ အလွန် ကျေနပ်စရာကောင်းသော ကိစ္စတစ်ခု ဖြစ်ပါ၏။

လူအုပ်ကြီးထဲတွင်..

မြင့်မြတ်သော နယ်မြေ တစ်ခုမှ လူငယ်လေး တစ်ဦးက လှောင်ပြောင်လိုက်သည်။

“ကောင်းတယ်”

“ဒီ ကံကြမ္မာရဲ့ သားတော် ယဲ့ဖုန်း တစ်ယောက် ပြီးပြည့်စုံသော ကိုယ်ပွား ရဲ့ လက်ချက်နဲ့ သေသွားပြီ ဆိုရင်... ကံကြမ္မာရဲ့ သားတော် နေရာ လွတ်သွားပြီပေါ့... သုံးနှစ်အတွင်းမှာ ငါ သေချာပေါက် ကံကြမ္မာရဲ့ သားတော် အသစ် ဖြစ်လာရမယ်”

“ဟားဟားဟား...”

လူငယ်လေး စိတ်ထဲမှ လှောင်ပြောင်လိုက်ပြီး အလွန် သက်သာရာရသွားသကဲ့သို့ ခံစားလိုက်ရသည်။

အထက် ကောင်းကင်ယံတွင်..

ယဲ့ဖုန်း သည် အကြိတ်အနယ် တိုက်ပွဲတစ်ခုတွင် ရစ်ပတ်နေ၏။

သူသည် ပြီးပြည့်စုံသော ကိုယ်ပွား ၏ ပြင်းထန်သော တိုက်ခိုက်မှုများကို လမ်းကြောင်းလွှဲရန် "ဟင်းလင်းပြင် အကာအကွယ်" နတ်ဘုရား စွမ်းရည် ကို အားကိုးနေရသော်လည်း၊ ကာကွယ်ရန်သာ တတ်နိုင်စွမ်း ရှိသည်။

“ယဲ့ဖုန်း... မင်းက သေလူ တစ်ယောက်ပဲကွ”

ပြီးပြည့်စုံသော ကိုယ်ပွား သည် လှောင်ပြောင်ကာ တိုက်ခိုက်မှုများကို ဆက်လက် ပြုလုပ်နေပြီး၊ ယဲ့ဖုန်း ကို အဆက်မပြတ် ဖိနှိပ်ကာ နောက်ဆုတ်သွားအောင် အတင်းအကျပ် ပြုလုပ်နေတော့သည်။

လွင့်မျော တောင်တန်း။

လင်းဝေ သူတော်စင် ဧကရာဇ် နှင့် မြူခိုးသူတော်စင် တို့ နှစ်ဦးစလုံး တိုက်ပွဲကို စောင့်ကြည့်နေကြ၏။

“ဒီ ယဲ့ဖုန်း က တကယ်ကို အစွမ်းထက်တာပဲ... ဒီလူကိုသာ မဖယ်ရှားဘူး ဆိုရင် အနာဂတ်မှာ အကြီးစား ဘေးဒုက္ခကြီး ဖြစ်လာမှာ သေချာတယ်”

“ဟုတ်တယ်... ဒါကြောင့် ကြိုတင် ရှင်းလင်းပစ်ရမယ်”

“ဒါပေမဲ့ ဒီလုပ်ရပ်အတွက် ပေးဆပ်ရတဲ့ တန်ဖိုးက တော်တော်လေး ကြီးမားတယ်... ငါတို့ရဲ့ အရေးပါတဲ့ စွမ်းအင် အမြောက်အမြား ကို ကုန်ခမ်းခဲ့တာ... အနည်းဆုံးတော့ ဆုံးရှုံးသွားတဲ့ စွမ်းအင်တွေကို ပြန်လည် ဖြည့်တင်းဖို့ အချိန်တစ်ခုအထိ အိပ်စက် အနားယူရလိမ့်မယ်”

“ယဲ့ဖုန်း ကို သတ်နိုင်သရွေ့ ငါတို့ အသက်တစ်ဝက် လောက် ဆုံးရှုံးရရင်တောင် တန်ပါတယ်ကွာ”

“ဟမ့်…ဒါတော့ ဟုတ်တယ်”

သူတို့ နှစ်ဦးစလုံး လှောင်ပြောင်လိုက်ကြ၏။

သူတို့၏ အမြင်တွင် ယဲ့ဖုန်း သည် သေချာပေါက် သေရမည် ဖြစ်၏။

*

ရေခဲနှင့်နှင်း မြင့်မြတ်သော မြို့တော် ၏ ကောင်းကင်ယံတွင်..

ကျင့်ကြံသူ အများစုမှာ စိုးရိမ်ပူပန်နေကြ၏။

သူတို့သည်လည်း ယဲ့ဖုန်း ကို ကူညီထောက်ပံ့ပေးလိုကြသော်လည်း၊ ဤတိုက်ပွဲမှာ သူတော်စင်အဆင့် တိုက်ပွဲဖြစ်ပြီး တိုက်ခိုက်သူ နှစ်ဦးအနက် တစ်ဦးဦး၏ ပေါ့ပေါ့ပါးပါး ရိုက်ချက် တစ်ချက်ကပင် အဆင့် (၄) တပိုင်းသူတော်စင် ကို သတ်ဖြတ်နိုင်စွမ်း ရှိသည်။ မြင့်မြတ်သော လက်နက်မရှိဘဲနှင့် မည်သူက ဝင်ရောက် တိုက်ခိုက်ရဲမည်နည်း။

မြင့်မြတ်သော လက်နက်ပိုင်ဆိုင်ထားသော တစ်ဦးတည်းသော သူဖြစ်သည့် ယင်ရူရုံ ကလည်း လက်ပိုက်ကြည့်နေရန် ရွေးချယ်လိုက်သဖြင့် အားလုံး ဒေါသထွက်နေကြရတော့သည်။

“ယဲ့ဖုန်း... မင်း ဒီနေ့ သေချာပေါက် သေရမယ်ကွ”

ပြီးပြည့်စုံသော ကိုယ်ပွား ပေါ်တွင် လောင်ကျွမ်းနေသော မီးတောက်များမှာ ပိုမို ပူပြင်းလာပြီး သူ၏ အရှိန်အဝါမှာ သူတော်စင်အဝင် ၏ အထွတ်အထိပ်သို့ နီးကပ်လာနေပြီ ဖြစ်သည်။

“ခွပ်...”

လက်သီးတစ်ချက်တည်းဖြင့် သူသည် ယဲ့ဖုန်း ကို မီတာ ရာပေါင်းများစွာ အနောက်သို့ လွင့်ထွက်သွားစေခဲ့၏။ ယဲ့ဖုန်း သာ အရှိန်ကို လျှော့ချရန် "ဟင်းလင်းပြင် အကာအကွယ်" နတ်ဘုရား စွမ်းရည် ကို အသုံးမပြုခဲ့ပါက သေချာပေါက် ပြင်းထန်စွာ ဒဏ်ရာရသွားလိမ့်မည်။

“ဂိုဏ်းချုပ်... ကျုပ်ရဲ့ အကူအညီ လိုအပ်ပါသလား”

ရုတ်တရက် လေဟာနယ်ထဲမှ ပုံရိပ်တစ်ခု ပေါ်လာ၏။

ဤသူမှာ ရှုပ်ပွနေသော ဆံပင်များနှင့် ထက်မြက်လှသော သံဓား ကို ကျောတွင်လွယ်ထားသည့် အရပ်မြင့်မြင့် သက်ကြီးရွယ်အို တစ်ဦး ဖြစ်သည်။

“ဒါ လျိုဖုန်း ပဲ”

“ဒီအဘိုးကြီးက အခုထိ အသက်ရှင်နေသေးတာလား”

လူအုပ်ကြီးက အရပ်ရှည်ရှည် သက်ကြီးရွယ်အိုကို မြင်သောအခါ အချို့က မှတ်မိသွားကြပြီး အံ့ဩထိတ်လန့်စွာ အော်ဟစ်လိုက်ကြ၏။

“အဆင့် (၄) တပိုင်းသူတော်စင် ပါလား”

“သူတောင်မှ ဒီအဆင့်အထိ ရောက်နေပြီလား”

တပိုင်းသူတော်စင် အများအပြားသည် လျိုဖုန်း ၏ ပုံရိပ်ကို စိုက်ကြည့်ရင်း သူတို့၏ မျက်လုံးများထဲတွင် မယုံကြည်နိုင်မှုများ ပြည့်နှက်နေတော့သည်။

“မင်းပဲ...”

ပြီးပြည့်စုံသော ကိုယ်ပွား က လျိုဖုန်း ကို မှတ်မိသွား၏။ သူတို့၏ နောက်ဆုံး တိုက်ပွဲတွင် ယဲ့ဖုန်း ၏ အစောင့်အရှောက် ဖြစ်သော လျိုဖုန်း သည် မြူခိုးသူတော်စင် ၏ ကိုယ်ပွား ကို အစပိုင်းတွင် ဟန့်တားနိုင်ခဲ့၏။

ပြီးပြည့်စုံသော ကိုယ်ပွား သည် သဘာဝကျကျပင် လျိုဖုန်း ကို အရိုးထဲထိ မုန်းတီးနေတော့သည်။

“မင်း အရင်ဆုံး သေရမယ်ကွ”

ပြီးပြည့်စုံသော ကိုယ်ပွား က ဟိန်းဟောက်လိုက်ပြီး ခွန်အား အစွမ်းကုန်ဖြင့် လက်သီးတစ်လုံး ပစ်သွင်းလိုက်၏။

“မလျော့သော ဓားဆန္ဒ... ဓားတစ်သောင်း ပြန်လည်ရောက်ရှိခြင်း”

လျိုဖုန်း သည် ယဲ့ဖုန်း သေဆုံးသွားသည်ကို မမြင်တွေ့လိုသဖြင့် သူ၏ အရှိန်အဝါကို အကန့်အသတ်အထိ လျင်မြန်စွာ ဆွဲတင်လိုက်ရာ၊ မျက်တောင်တစ်ခတ် အတွင်းမှာပင် ကောင်းကင်ယံ၌ မရေမတွက်နိုင်သော ဓားအရိပ်များ ပြည့်နှက်သွားပြီး ပြီးပြည့်စုံသော ကိုယ်ပွား ၏ လက်သီးဆီသို့ ပြိုင်တူ ခုတ်ပိုင်းလိုက်ကြသည်။

“ဘုန်း...”

ပြီးပြည့်စုံသော ကိုယ်ပွား က အစွမ်းထက်လွန်းလှသည်။

လက်သီးတစ်ချက်တည်းဖြင့် လျိုဖုန်း ၏ ဓားတစ်သောင်း ပြန်လည်ရောက်ရှိခြင်း ကို သစ်ကိုင်းခြောက်များပမာ ရိုက်ချိုးပစ်လိုက်ပြီး၊ လျိုဖုန်း၏ ရင်ဘတ်ကို ကြိတ်ခြေကာ အသက်ကိုပါ နှုတ်ယူတော့မည့် ဆဲဆဲတွင်..

သို့သော် အတိမ်းအစောင်းမခံသော အခိုက်အတန့်လေးတွင်..

ယဲ့ဖုန်း မတ်တတ်ရပ်လိုက်၏။

သူသည် လျိုဖုန်း ၏ ဘေးတွင် ရှေးဟောင်း မြင့်မြတ်သော နတ်ဘုရား တစ်ပါးပမာ လေဟာနယ်ထဲတွင် မားမားမတ်မတ် ရပ်နေပြီး၊ ပြီးပြည့်စုံသော ကိုယ်ပွား ၏ အစွမ်းကုန် တိုက်ခိုက်သော လက်သီးချက်ကို လွယ်ကူစွာပင် ချေဖျက်ပစ်လိုက်သည်။

ဤမြင်ကွင်းက လောကတစ်ခုလုံးကို တုန်လှုပ်သွားစေတော့၏။

“မင်းရဲ့ ပြိုင်ဘက်ကင်း အကာအကွယ် က အဆင့်တူတွေ ကြားမှာပဲ အနိုင်မခံ အရှုံးမပေး ဖြစ်ရမှာ မဟုတ်ဘူးလား... အခု သူတော်စင်အဝင် ရဲ့ အထွတ်အထိပ် နီးပါး ရှိတဲ့သူ တစ်ယောက်ရဲ့ အစွမ်းကုန် တိုက်ခိုက်မှုကိုတောင် သူ ဘယ်လိုလုပ်ပြီး ကာကွယ်နိုင်တာလဲ”

ပြီးပြည့်စုံသော ကိုယ်ပွား ၏ ရင်တွင်း၌ အကြီးအကျယ် လှုပ်ခတ်သွားရသည်။

“ငါ ရှင်းရှင်းလင်းလင်း ပြောခဲ့သားပဲ... လောကမှာ ပြိုင်ဘက်ကင်းတယ် လို့... အဆင့်တူတွေ ကြားမှာတင် အနိုင်မခံ အရှုံးမပေး ဖြစ်တာ မဟုတ်ဘူးလို့” ယဲ့ဖုန်း ရှေ့သို့ တစ်လှမ်း တိုးလိုက်ရာ၊ သူ၏ အရှိန်အဝါများ နောက်တစ်ဖန် ပြန်လည် ထွက်ပေါ်လာပြီး ပြိုင်ဘက်ကင်း ဘုရင် တစ်ပါးပမာ လောကကြီးကို ငုံ့ကြည့်နေတော့၏။

“ဟင့်အင်း... ငါ မယုံဘူး”

ပြီးပြည့်စုံသော ကိုယ်ပွား က ရူးသွပ်စွာ တိုက်ခိုက်လိုက်သော်လည်း၊ တိုက်ခိုက်မှု တိုင်းမှာ ယဲ့ဖုန်း ၏ (၁၀) ပေ အကွာသို့ ရောက်သည်နှင့် ပျောက်ကွယ်သွားတော့သည်။

ယဲ့ဖုန်း လေဟာနယ်ထဲတွင် မတ်တတ်ရပ်နေပြီး လုံးဝ အနာအဆာကင်းစင်နေ၏။

“ကံကောင်းလို့ သန့်စင်သော နတ်ဘုရား ပုံစံ ရှိနေတာ... လေးမိနစ်စာ ပြိုင်ဘက်ကင်း ကာကွယ်ရေးပဲ”

ယဲ့ဖုန်း တိတ်တဆိတ် တွေးလိုက်သည်။

အရေးကြီးသော အခိုက်အတန့်တွင် ဤ လျှို့ဝှက်လက်နက် ကို အသုံးမပြုဘဲ နေ၍မရတော့ချေ။ သန့်စင်သော နတ်ဘုရား ပုံစံ ဖြင့်ဆိုလျှင် အထွတ်အထိပ် သူတော်စင် ပင်လျှင် သူ့ကို မည်သို့မျှ အန္တရာယ်ပြုနိုင်မည် မဟုတ်ချေ။

*

ရေခဲနှင့်နှင်း မြင့်မြတ်သော မြို့တော််ဝယ်…

မရေမတွက်နိုင်သော လူများက ပြီးပြည့်စုံသော ကိုယ်ပွားသည် ..ရူးသွပ်စွာ တိုက်ခိုက်နေသော်လည်း ယဲ့ဖုန်း ၏ အကာအကွယ်ကို မဖောက်ထွင်းနိုင်သည်ကို ကြည့်ရင်း အားလုံး ဆွံ့အ ထုံထိုင်းနေကြတော့သည်။

လွင့်မျော တောင်တန်း။

လင်းဝေ သူတော်စင် ဧကရာဇ် နှင့် မြူခိုးသူတော်စင် တို့သည်လည်း အံ့အားသင့်နေကြ၏။

ယဲ့ဖုန်း တစ်ဦးတည်းသာ အစမှ အဆုံးတိုင်အောင် တည်ငြိမ်နေသည်။

သူသည် ရူးသွပ်သွားသော ပြီးပြည့်စုံသော ကိုယ်ပွား ကို အေးစက်စွာ စိုက်ကြည့်နေပြီး၊ အဆက်မပြတ် ခွဲခြမ်းစိတ်ဖြာ တွက်ချက်မှုများ ပြုလုပ်ပြီးနောက် သူ၏ ရန်သူကို သုတ်သင်ရန် နည်းလမ်းတစ်ခုကို နောက်ဆုံးတွင် ရှာတွေ့သွားသည်။

တာအို မီးတောက်။

ကံကြမ္မာရဲ့ သားတော် တစ်ဦး အနေဖြင့် သူသည် ကောင်းကင်တာအို၏ အကြွင်းအကျန်များ နှင့် ဆက်သွယ်နိုင်ပြီး၊ ပြင်ပလောကမှ မိစ္ဆာဆိုးများကို မီးရှို့ဖျက်ဆီးရန် တာအို မီးတောက် ကို ဆင့်ခေါ်နိုင်စွမ်း ရှိ၏။

အကယ်၍ မကြာသေးမီက ကောင်းကင်တာအို၏ အကြွင်းအကျန်များ နှင့် မဆက်သွယ်ခဲ့ရပါက၊ ကြောက်မက်ဖွယ်ကောင်းသော တာအို မီးတောက် ကို သူ အသုံးပြုနိုင်ကြောင်း သိမည် မဟုတ်ချေ။

“ရွှီး...”

ယဲ့ဖုန်း လက်ကို ဆန့်ထုတ်လိုက်သည်နှင့်၊ အရောင် (၉) မျိုး ရှိသော မီးတောက် တစ်ခု သူ၏ လက်ဝါးတွင် ရုတ်တရက် ထွက်ပေါ်လာ၏။

၎င်းမှာ အပူချိန် မရှိသကဲ့သို့ ပင်။

သို့သော် ၎င်းပေါ်လာသည်နှင့် တစ်ပြိုင်နက် ပြီးပြည့်စုံသော ကိုယ်ပွား ကို ကြက်သီးထဖွယ် ခံစားမှုတစ်ခု ပေးစွမ်းလိုက်ပြီး အံ့ဩထိတ်လန့်စွာ အော်ဟစ်လိုက်မိတော့သည်။

“တာအို မီးတောက်... ဒါ တကယ်ပဲ တာအို မီးတောက် ပဲ”

လွင့်မျော တောင်တန်း ပေါ်ရှိ သူတော်စင်အဆင့် စွမ်းအားရှင်များ.. အောက်လောက သို့ သူတို့၏ အစစ်အမှန် ခန္ဓာကိုယ်များဖြင့် မဆင်းသက်ရဲသည့် အကြောင်းရင်းမှာ ကောင်းကင်တာအို၏ အကြွင်းအကျန်များ က ဆင့်ခေါ်မည့် တာအို မီးတောက် ဖြင့် မီးရှို့ဖျက်ဆီးခံရမည်ကို ကြောက်ရွံ့သောကြောင့်တည်း။

ပြီးပြည့်စုံသော ကိုယ်ပွား သည် ကောင်းကင်တာအို၏ အကြွင်းအကျန်များ ၏ ပစ်မှတ်ထားခြင်း နှင့် တာအို မီးတောက် ၏ မီးရှို့ခံရခြင်းမှ ရှောင်ရှားရန် မိမိကိုယ်ကို ဓားဖြင့် ဖြတ်တောက်ခဲ့ရခြင်း ဖြစ်သည်။

သို့သော် ယခု ယဲ့ဖုန်း သည် တာအို မီးတောက် ကို အမှန်တကယ်ပင် ဆင့်ခေါ်လိုက်၏။

“အုန်း...”

ယဲ့ဖုန်း လုံးဝ တုံ့ဆိုင်းမနေဘဲ ပြီးပြည့်စုံသော ကိုယ်ပွား ၏ ရင်ဘတ်ကို လက်ဝါးဖြင့် အားကုန် ရိုက်ချလိုက်ရာ၊ ၎င်းမှာ အရောင် (၉) မျိုး ရှိသော တာအို မီးတောက် ဖြင့် လွှမ်းခြုံခံလိုက်ရပြီး လျင်မြန်စွာ လောင်ကျွမ်းသွားကာ နာကျင်စွာ အော်ဟစ်သံများ ဆက်တိုက် ထွက်ပေါ်လာတော့သည်။

“ငါ သေရရင်တောင်... မင်းကို အမှုန့်ဖြစ်အောင် ခွဲပစ်ခဲ့မယ်ကွ”

ပြီးပြည့်စုံသော ကိုယ်ပွား သည် အလွန်အမင်း စိတ်ဓာတ်ကျနေပြီ ဖြစ်၏။

၎င်းမှာ တာအို မီးတောက် ဖြင့် မီးရှို့ခံနေရပြီး မကြာမီ ပြာအဖြစ် ပြောင်းလဲသွားတော့မည် ဖြစ်ရာ၊ ယဲ့ဖုန်း ဆီသို့ ပြေးဝင်လာပြီး ကိုယ်တိုင် ဖောက်ခွဲရန် ကြိုးပမ်းတော့သည်။

“မင်း အိပ်မက် မက်နေတာ ဖြစ်ရမယ်”

ယဲ့ဖုန်း သည် သူတော်စင် ဧကရာဇ် ဓား ကို ကိုင်ဆောင်ကာ အစွမ်းကုန် ခုတ်ပိုင်းလိုက်ရာ၊ တာအို မီးတောက် ကြောင့် ကာကွယ်ရေးများ အကြီးအကျယ် ကျဆင်းနေသော ပြီးပြည့်စုံသော ကိုယ်ပွား ကို နှစ်ပိုင်း ခွဲပစ်လိုက်ပြီး လုံးဝ ပေါက်ကွဲထွက်သွားစေကာ ယဲ့ဖုန်း ၏ ပြိုင်ဘက်ကင်း အကာအကွယ် ဖြင့် ဖိနှိပ် ချေမှုန်းပစ်လိုက်၏။

အချိန်အတန်ကြာပြီးနောက် အထက် ကောင်းကင်ယံရှိ ပေါက်ကွဲမှု၏ နောက်ဆက်တွဲ ဂယက်များကို ယဲ့ဖုန်း က လုံးဝ ချေဖျက်ပစ်လိုက်တော့သည်။

လွင့်မျော တောင်တန်းဝယ်..

“ဟား... ဒါ တကယ်ကို လွန်လွန်းနေပြီကွ”

မြူခိုးသူတော်စင် မှာ ဒေါသထွက်လွန်းသဖြင့် ခြေဆောင့်ကာ ယဲ့ဖုန်း ကို သတ်ရန် သူ၏ အစစ်အမှန် ခန္ဓာကိုယ် ဖြင့် ဆင်းသက်သွားချင်သော်လည်း၊ တာအို မီးတောက် ဖြင့် မီးရှို့ခံရမည်ကိုလည်း စိုးရိမ်နေရ၏။

“ဒီလူက တကယ့်ကို အရေးပါတဲ့ အင်အားရှင် ဖြစ်လာပြီ... အခု သူ့ကို သတ်ဖို့ ခက်ခဲနေပြီ”

လင်းဝေ သူတော်စင် ဧကရာဇ် သည် နာကြည်းမှုများဖြင့် အံကြိတ်လိုက်သည်။

သူ ကိုယ်တိုင် မျက်မြင် မတွေ့ခဲ့ရပါက၊ ရှန်ကျိုးတိုက်ကြီး တွင် ယဲ့ဖုန်း ကဲ့သို့သော ကြောက်မက်ဖွယ်ကောင်းသည့် ပါရမီရှင် တစ်ဦး အမှန်တကယ် မွေးဖွားလာလိမ့်မည်ဟု သူ သိရှိခဲ့မည် မဟုတ်ချေ။

“အရာအားလုံး ပြီးဆုံးသွားပြီ”

ယဲ့ဖုန်း သည် ဓားကို အိမ်သို့ ပြန်သွင်းလိုက်ပြီး လက်နှစ်ဖက်ကို နောက်ပစ်ကာ အစောင့်အရှောက် လျိုဖုန်း နှင့်အတူ မြေပြင်ဆီသို့ ဖြည်းညင်းစွာ လျှောက်လှမ်းလာခဲ့သည်။

သူ ခြေတစ်လှမ်း လှမ်းလိုက်တိုင်း လေဟာနယ်များ တုန်ခါသွားသကဲ့သို့ ဖြစ်သွားပြီး၊ ကောင်းကင်နှင့် မြေကြီးက ပြိုင်တူ သီကျူးနေကာ ပန်းပွင့်များ ဖူးပွင့်လာကြ၏။

လူအုပ်ကြီးမှာ ယဲ့ဖုန်း ကို ကြည့်ရင်း သူ၏ အစွမ်းထက်သော အရှိန်အဝါများကြောင့် လွှမ်းမိုးခံလိုက်ရပြီး၊ မနေနိုင်ဘဲ နောက်သို့ ခြေသုံးလှမ်းခန့် အလိုအလျောက် ဆုတ်သွားမိကြတော့သည်။

ထိုအခိုက်အတန့်တွင်..

ယဲ့ဖုန်း သည် လောကကြီးကို အုပ်စိုးသော နတ်ဘုရား ဘုရင် တစ်ပါးနှင့် တူနေပြီး၊ မည်သူမျှ ထိတွေ့၍ မရနိုင်သော၊ မည်သူမျှ မတားဆီးနိုင်သော ခံစားမှုမျိုးကို ပေးစွမ်းနေတော့၏။

--