အခန်း ၇၄၆

အခန်း (၇၄၆) ရေပေါ်ဖြူမြို့တော် ၏ အဆင့်တက်ခြင်း၊ လောကအနှံ့ ကြေညာခြင်း၊ မျိုးနွယ်စု အသီးသီးမှ ဂုဏ်ပြုခြင်း

ရေပေါ်ဖြူမြို့တော် ၏ မြို့စားမင်း စံအိမ် တွင်..

“မြို့စားမင်းကုန်း... ကြယ် (၃) ပွင့် အဆင့် အကဲဖြတ်မှု အတွက် သတ်မှတ်ချက်တွေက တကယ်တော့ သိပ်မခက်ခဲပါဘူး... အဓိက အနေနဲ့ အပိုင်းကြီး အနည်းငယ် ခွဲထားပါတယ်”

လင်းလော့ထျန်း ကိုယ်တိုင် ရှင်းပြလိုက်၏။

ယနေ့အချိန်အထိ လင်းလော့ထျန်း သည် လျှို့ဝှက်ဆန်းကြယ် နိုင်ငံတော် ၏ တော်ဝင် မိသားစု ၏ အပြည့်အဝ ထောက်ပံ့မှုဖြင့် မူလနတ်ဘုရားအဆင့် သို့ တက်လှမ်းနိုင်ခဲ့ပြီး၊ လူငယ် စွမ်းအားရှင် တစ်ဦး ဖြစ်လာခဲ့၏။

သူ၏ ကျင့်ကြံခြင်းအဆင့်ဖြင့် သူသည် မင်းဆက် ၏ ဧကရာဇ် ဖြစ်လာရန်ပင် အရည်အချင်း ပြည့်မီနေပြီ ဖြစ်သည်။

သို့သော် လင်းလော့ထျန်း သည် ဤမျှ စောစီးစွာ ရာဇပလ္လင်သို့ မတက်လှမ်းလိုသေးဘဲ၊ ကြယ်အဆင့် အင်အားစု အကဲဖြတ်မှု များကို ဆက်လက် ကြီးကြပ်ရန် ရွေးချယ်ခဲ့၏။

တတိယ မင်းသား က ဆက်လက် ရှင်းပြသည်။

“ပထမအချက် အနေနဲ့... ရေပေါ်ဖြူမြို့တော် ရဲ့ လူဦးရေ ဟာ သန်း (၅၀) ကျော် ရှိရမယ်... ပြီးတော့ ကျင့်ကြံသူ အချိုးအစား ဟာ တစ်ရာခိုင်နှုန်း အထိ ရောက်ရှိရမယ်”

“ဒီအချက်ကတော့ ရေပေါ်ဖြူမြို့တော် အတွက် ပြည့်မီပြီးသားပါ”

ဤသို့ ပြောလိုက်စဉ် လင်းလော့ထျန်း ၏ ရင်တွင်း၌ အံ့ဩထိတ်လန့်မှုများ ဖြစ်ပေါ်နေ၏။

တစ်နှစ် သို့မဟုတ် နှစ်နှစ် အတွင်းမှာပင် ရေပေါ်ဖြူမြို့တော် ၏ လူဦးရေမှာ မူလ တစ်သန်း မှ သန်း (၅၀) ကျော်အထိ တဟုန်ထိုး မြင့်တက်လာခဲ့ပြီး၊ ကျင့်ကြံသူ အချိုးအစား မှာလည်း ဆယ်ပုံတစ်ပုံ အထိ ရောက်ရှိနေ၏။

ဆိုလိုသည်မှာ မြို့တော်၏ လမ်းမများပေါ်မှ လူဆယ်ယောက်ကို ကျပန်း ရွေးချယ်လိုက်ပါက၊ အနည်းဆုံး တစ်ယောက်မှာ ကျင့်ကြံသူ ဖြစ်နေပါမည်။

ဤအချိုးအစားမှာ တော်ဝင် မြို့တော် ထက်ပင် ပိုမို မြင့်မားနေ၏။

“ဒုတိယအချက် အနေနဲ့... မြို့စားမင်း ရဲ့ ကျင့်ကြံခြင်းအဆင့် က အနည်းဆုံး မူလနတ်ဘုရားအဆင့် ကို ရောက်ရှိရမယ်... မြို့စားမင်းကုန်း က မူလနတ်ဘုရားအဆင့် ကို ရောက်ရှိနေတာ ကြာပြီမို့လို့ သဘာဝကျကျပဲ ဒီသတ်မှတ်ချက်ကို ပြည့်မီပါတယ်”

တတိယ မင်းသား က အကဲဖြတ်မှုကို ဆက်လက် ပြုလုပ်၏။

“တတိယအချက် အနေနဲ့... သိုင်းကျမ်းတိုက် လိုမျိုး ရေပေါ်ဖြူမြို့တော် မြို့စားမင်း စံအိမ် ရဲ့ အဆောက်အအုံ အထောက်အကူပြု ပစ္စည်းတွေ... ချပ်ဝတ်နက် အစောင့်တပ်ဖွဲ့ ရဲ့ ခွန်အား နဲ့ ဆေးဖော်စပ်သူတွေ၊ လက်နက် သန့်စင်သူတွေ ရဲ့ အရေအတွက် စတဲ့ စံနှုန်းတွေကို အကဲဖြတ်ရပါမယ်”

ကုန်းချင်းချိုး သည် သူမ၏ ဒုတိယ မြို့စားမင်း ဘက်သို့ လှမ်းကြည့်လိုက်သည်။

“ဒီအချက်ကိုတော့ နေရာမှာတင် စစ်ဆေးလို့ ရပါတယ်” ဒုတိယ မြို့စားမင်း က ရှေ့သို့ ထွက်လာပြီး လက်ခုပ်တီးလိုက်၏။

“အသင့်ပါပဲ”

ကြောက်မက်ဖွယ်ကောင်းသော ဒုတိယ တပ်မှူး ကျိုးကျားချိုင် ရှေ့သို့ ထွက်လာရာ သူ၏ ကျင့်ကြံခြင်းအဆင့် မှာ ဝိညာဉ်ပင်လယ်အဆင့် (၇) သို့ပင် ရောက်ရှိနေကြောင်း အံ့ဩဖွယ် တွေ့ရှိရသည်။

သူ၏ မွေးရာပါ ပါရမီမှာ မမြင့်မားလှချေ။

သို့သော် ရေပေါ်ဖြူမြို့တော် ၏ အဓိက ပုဂ္ဂိုလ်များထဲမှ တစ်ဦး အနေဖြင့် ကျိုးကျားချိုင် နှင့် သူ၏ အစ်ကို ကျိုးကျားချန် တို့ နှစ်ဦးစလုံးသည် ဒုတိယ မြို့စားမင်း ထံမှ ကြီးမားသော ထောက်ပံ့မှုများကို ရရှိခဲ့ကြပြီး ဝိညာဉ်ပင်လယ်အဆင့် သို့ စောစီးစွာ ဝင်ရောက်နိုင်ခဲ့ကြ၏။

ယဲ့ဖုန်း က အလွန် ကြီးမားသော ဝိညာဉ်ကြော တစ်ခုကို ဖန်တီးပေးခဲ့သဖြင့်၊ မြို့စားမင်း စံအိမ် ၏ အဖွဲ့ဝင်များ အနေဖြင့် သူတို့သည် ကောင်းကင်ဘုံ နှင်းရည် အမြောက်အမြားကို စုပ်ယူနိုင်ခဲ့ကြရာ သူတို့၏ ကျင့်ကြံခြင်းအဆင့် များမှာ သဘာဝကျကျပင် ပေါက်ကွဲ တိုးတက်လာခဲ့သည်။

ချပ်ဝတ်နက် အစောင့်တပ်ဖွဲ့ ၏ အလုံးစုံ အဆင့်အတန်း မှာလည်း မြင့်တက်လာခဲ့၏။

ယနေ့ခေတ်တွင် ချပ်ဝတ်နက် အစောင့် တိုင်းသည် ချီစုစည်းခြင်းအဆင့် ကျင့်ကြံမှု ရှိကြပြီး ရေပေါ်ဖြူမြို့တော် ၏ တရားဥပဒေ စိုးမိုးရေးကို ထိန်းသိမ်းရန် လုံလောက်နေ၏။

“မဆိုးဘူး”

တတိယ မင်းသား နှင့် သူ့နောက်မှ လိုက်ပါလာသော အကဲဖြတ်သူများ အားလုံး က သဘောတူသည့် အနေဖြင့် ခေါင်းညိတ်လိုက်ကြပြီး၊ ချပ်ဝတ်နက် အစောင့်တပ်ဖွဲ့ မှာ အလွန် ထူးချွန်ပြောင်မြောက်ကြောင်း ခံစားလိုက်ရသည်။

အဖွဲ့သည် ရေပေါ်ဖြူမြို့တော် ၏ မြို့စားမင်း စံအိမ် တွင် ဆက်လက် လှည့်လည်ကြည့်ရှုကြပြီး၊ ဤနှစ်အတွင်း စံအိမ်မှ ခေါ်ယူထားသော ဆေးဖော်စပ်သူများ၊ လက်နက် သန့်စင်သူများ နှင့် ဝင်္ကပါ ပညာရှင် အမြောက်အမြား ကို မြင်တွေ့လိုက်ရရာ ယင်းမှာ ပါရမီရှင်များ၏ စုစည်းမှု တစ်ခုပင် ဖြစ်သည်။

“ဒီအချက်လည်း ပြည့်မီပါတယ်”

တတိယ မင်းသား တိတ်တဆိတ် ခေါင်းညိတ်လိုက်ပြီး အကဲဖြတ်မှုကို ဆက်လုပ်၏။

လူအုပ်ကြီးသည် မြို့စားမင်း စံအိမ် သို့ ဆက်လက် လည်ပတ်နေကြသည်။

သိုင်းကျမ်းတိုက် အတွင်းရှိ စာအုပ် အရေအတွက်မှာ ယခင်ကထက် အဆတစ်ရာကျော် တိုးလာခဲ့ပြီး အဆင့် (၁) မှ (၉) အထိ မန္တန် များ အားလုံး ပါဝင်နေသည်။

နတ်ဘုရား စွမ်းရည် (၉) ခု ပင် ရှိနေသေး၏။

ဤအချက်မှာလည်း သဘာဝကျကျပင် ကြယ် (၃) ပွင့် အဆင့် သတ်မှတ်ချက်များနှင့် ပြည့်မီ၏။

“ရေပေါ်ဖြူမြို့တော် မှာ နက်ရှိုင်းတဲ့ အခြေခံ အုတ်မြစ် ရှိနေတာပဲ” တတိယ မင်းသား က အံ့ဩတကြီး ပြောလိုက်ပြီး သူ၏ အကြည့်များက မြို့စားမင်း စံအိမ် ၏ အနောက်ဘက်ခြံဝင်းရှိ ကောင်းကင်ဓားတောင်တော် ဆီသို့ ရောက်ရှိသွားသည်။

“အထူးသဖြင့် ဒီ ဝိညာဉ်ကြော ပေါ့... အလွန် ကြီးမားတဲ့ အဆင့်ကို ရောက်နေပြီ... တကယ်ကို အစွမ်းထက်တာပဲ”

တတိယ မင်းသား ၏ ရင်တွင်း၌ မနာလိုမှုကလေးများ ဖြစ်ပေါ်လာတော့သည်။

ဤ ဝိညာဉ်ကြော ၏ အဆင့်မှာ တော်ဝင် မြို့တော် ထက်ပင် ပိုမို မြင့်မားနေ၏။ သူသာ လုပ်နိုင်မည် ဆိုပါက ရေပေါ်ဖြူမြို့တော် သို့ ပြောင်းရွှေ့နေထိုင်ချင်စိတ်ပင် ပေါက်လာတော့သည်။

“နောက်တစ်ဆင့် အနေနဲ့... မြို့တစ်မြို့လုံးကို အကဲဖြတ်ပါမယ်... အဓိကကတော့ မြို့အနှံ့ လမ်းလျှောက်ပြီး မြို့ကို လေ့လာ ကြည့်ရှုဖို့ပါပဲ”

တတိယ မင်းသား က ဦးဆောင် ထွက်ခွာသွား၏။

ကုန်းချင်းချိုး သည် လက်များကို အရှေ့တွင် ယှက်ထားလျက် အကဲဖြတ် အဖွဲ့၏ နောက်မှ အပြုံးလေးဖြင့် လိုက်ပါလာခဲ့သည်။

“ဟေး..ရုပ်ချောချော ကောင်လေး... လာဆော့ပါလား”

အဖွဲ့သည် လမ်းမတစ်ခု အတွင်းသို့ ဝင်ရောက်လာပြီး၊ လန်းဆန်းသော ပန်းရနံ့များကို ရှူရှိုက်လိုက်ရကာ၊ နားကို ယားယံစေသော ချွဲနွဲ့သည့် အသံများကို ကြားလိုက်ရသည်။

သူတို့ အသံလာရာသို့ ကြည့်လိုက်ကြ၏။

ထိုနေရာတွင် လမ်းဘေး၌ မြေ (၂၀) ဧကခန့် ယူထားသော (回) ပုံသဏ္ဌာန် ကိုးထပ်တိုက် အဆောက်အအုံကြီး တစ်ခု ရှိနေသည်။

လွန်စွာ လှပသော အမျိုးသမီး အချို့သည် ဒုတိယထပ် လသာဆောင်တွင် ရပ်နေကြပြီး၊ ပန်းရောင် ပဝါလေးများကို ဝှေ့ယမ်းကာ ပြုံးရွှင်စွာ ခေါ်ငင်နေကြ၏။

“အစိမ်းရောင်ကျောက်စိမ်း မျှော်စင် ဟုတ်လား”

တတိယ မင်းသား သည် တံခါး ဆိုင်းဘုတ်ပေါ်ရှိ စာသားများကို မြင်လိုက်ရသောအခါ မျက်လုံးများ ပြူးကျယ်သွားတော့သည်။

သူ ဤ ဖျော်ဖြေရေး အိမ်တော် ကို အရင်က လာဖူးသည် မဟုတ်ပါလား။

“အို... ဂုဏ်သရေရှိ ဧည့်သည်တော်တွေ ပါလား”

ထိုအခိုက်အတန့်တွင် အစိမ်းရောင်ကျောက်စိမ်း မျှော်စင် ထဲမှ ပုံရိပ်နှစ်ခု ယှဉ်တွဲ ထွက်လာပြီး ဖြတ်သန်းသွားသော တတိယ မင်းသား၊ ကုန်းချင်းချိုး၊ ဒုတိယ မြို့စားမင်း နှင့် အခြားသူများ၏ အဖွဲ့ကို ဦးညွှတ် နှုတ်ဆက်လိုက်ကြ၏။

ရောက်လာသူများမှာ အမျိုးသား တစ်ဦး နှင့် အမျိုးသမီး တစ်ဦး ဖြစ်သည်။

အမျိုးသားမှာ ချောမောပြီး လွတ်လပ်ပေါ့ပါးသော အသွင်ရှိကာ အမျိုးသမီးမှာ နွဲ့နှောင်းပြီး ဆွဲဆောင်မှု ရှိသည်။ သူတို့ နှစ်ဦး တွဲလိုက်သောအခါ အလွန် လိုက်ဖက်ညီသော စုံတွဲ တစ်တွဲ ဖြစ်နေတော့သည်။

“ဒါ ရှင်းကွမ်ရွှမ်း နဲ့ ပိုင်ဟွာရှောင် ပဲ”

ဒုတိယ မြို့စားမင်း က ထိုနှစ်ဦးကို မှတ်မိသွား၏။

ရေပေါ်ဖြူမြို့တော် တွင် အစိမ်းရောင်ကျောက်စိမ်း မျှော်စင် ကို မသိသူ မရှိသလောက်ပင် ရှားလှသည်။ နာမည်ကျော် ဖျော်ဖြေရေး အိမ်တော် တစ်ခု ဖြစ်ပြီး ဌာနခွဲ အများအပြား ရှိသည်။ ၎င်းသည် ခန္ဓာကိုယ် မရောင်းချဘဲ ဖျော်ဖြေမှုများကိုသာ ပေးစွမ်းသဖြင့်၊ သန့်စင်သော ဖောက်သည် အများအပြားကို ဆွဲဆောင်နိုင်ခဲ့ပြီး ကြီးမားသော ဂုဏ်သတင်း ကျော်ဇောမှုကို ရရှိခဲ့၏။

သေချာပေါက်ပင် ဒါက အစိမ်းရောင်ကျောက်စိမ်း မျှော်စင် ကျော်ကြားရခြင်း၏ အဓိက အကြောင်းရင်း မဟုတ်ချေ။

ဤ ဖျော်ဖြေရေး အိမ်တော် အတွက် အထင်ရှားဆုံး ကျော်ကြားမှုမှာ ၎င်း၏ နောက်ခံ ထောက်ပံ့သူ နှစ်ဦး ဖြစ်သည့် ရှင်းကွမ်ရွှမ်း နှင့် ပိုင်ဟွာရှောင် တို့ကြောင့်ပင် ဖြစ်သည်။

ရှင်းကွမ်ရွှမ်း သည် လျိုယွမ် ဂိုဏ်း ၏ အတွင်းတပည့် တစ်ဦး ဖြစ်ခဲ့ဖူးပြီး ယဲ့ဖုန်း ၏ ရင်းနှီးသော မိတ်ဆွေ တစ်ဦး ဖြစ်၏။ နောက်ပိုင်းတွင် သူသည် လျိုယွမ် ဂိုဏ်း မှ ထွက်ခွာခဲ့ပြီး အစိမ်းရောင်ကျောက်စိမ်း မျှော်စင် ၏ ပိုင်ရှင် ပိုင်ဟွာရှောင် နှင့် ချစ်ကြိုးသွယ်ကာ၊ အဖွဲ့အစည်းကို ပူးတွဲ စီမံအုပ်ချုပ်ခဲ့ကြသည်။

မျက်တောင်တစ်ခတ် အတွင်းမှာပင် တစ်ချိန်က အတွေ့အကြုံနုနယ်သော ရှင်းကွမ်ရွှမ်း မှာ ယခုအခါ သိသိသာသာ ရင့်ကျက်လာပြီ ဖြစ်ပြီး ယောက်ျားပီသသော ခွန်အားများကို ထုတ်လွှတ်နေသည်။

သူ၏ ကျင့်ကြံခြင်းအဆင့် မှာလည်း အများကြီး တိုးတက်လာခဲ့ပြီး ချီစုစည်းခြင်းအဆင့် (၇) သို့ ရောက်ရှိနေပြီ ဖြစ်ကာ၊ ပိုင်ဟွာရှောင် မှာလည်း သိပ်မကွာလှဘဲ တူညီသော အဆင့်၏ (၅) အဆင့်တွင် ရှိနေသည်။

“တိုက်ဆိုင်လိုက်တာကွာ... မင်းတို့ နှစ်ယောက်လုံးကို တွေ့ရတာ” တတိယ မင်းသား သည် ထိုစုံတွဲကို မြင်သောအခါ လက်နှစ်ဖက် ဆုပ်မိုးကာ အပြုံးဖြင့် နှုတ်ဆက်လိုက်၏။

“ဒါက ရေပေါ်ဖြူမြို့တော် ရဲ့ ကြယ် (၃) ပွင့် အဆင့် အကဲဖြတ်မှု လား” လူအုပ်ကြီး၏ အစီအစဉ်ကို ကြည့်ကာ ရှင်းကွမ်ရွှမ်း က အခြေအနေကို ခန့်မှန်းလိုက်သည်။

“အမှန်ပဲ” ကုန်းချင်းချိုး ပြန်ဖြေလိုက်၏။

“အရာအားလုံး ချောချောမွေ့မွေ့ ဖြစ်ပါစေလို့ ဆုတောင်းပါတယ်” ဟု ရှင်းကွမ်ရွှမ်း နှင့် ပိုင်ဟွာရှောင် တို့က ပြိုင်တူ ပြောလိုက်ကြသည်။

“မင်္ဂလာရှိတဲ့ စကားတွေအတွက် ကျေးဇူးတင်ပါတယ်”

ခေတ္တမျှ စကားပြောပြီးနောက် အဖွဲ့သည် လမ်းမမှ ထွက်ခွာကာ မြို့အနှံ့ ဆက်လက် ကြည့်ရှုကြတော့၏။

ရေပေါ်ဖြူမြို့တော် သည် လွန်ခဲ့သော လအနည်းငယ်ကမှ တိုးချဲ့ခဲ့ခြင်း ဖြစ်သည်။

အဆောက်အအုံများ အားလုံးမှာ အသစ်စက်စက်များ ဖြစ်ကြ၏။

ဗိသုကာ ပညာရှင် ရှီလေ့၏ အကူအညီ နှင့် မရေမတွက်နိုင်သော ကျင့်ကြံသူများ ၏ ကြိုးပမ်းအားထုတ်မှု များကြောင့် ဆောက်လုပ်ရေး လုပ်ငန်းများမှာ လျင်မြန်ခဲ့ပြီး အရည်အသွေး မှာလည်း ထိပ်တန်း အဆင့်တွင် ရှိပါသည်။

ကျယ်ဝန်းသော ကျောက်တုံး လမ်းမကြီး ပေါ်တွင် လျှောက်လှမ်းနေကြ၏။

လမ်းတစ်ဖက်တစ်ချက်စီတွင် မြင့်မားသော သစ်ပင်ကြီးများ ရှိပြီး စိမ်းလန်းစိုပြည် နေသည်။

မြို့ထဲတွင် လမ်းသွားလမ်းလာ များစွာ ရှိ၏။

သူတို့သည် ကျောက်တုံး နှင့် သစ်သား ကဲ့သို့သော ပစ္စည်း အမျိုးမျိုးဖြင့် ပြုလုပ်ထားသည့် သစ်လွင်သော ပုံစံ ဘက်စုံသုံး အဆောက်အအုံ များတွင် နေထိုင်ကြပြီး၊ သိပ်သည်းသော ဝိညာဉ်ချီ များကို ရှူရှိုက်ကြသည်။ သာမန် လူများပင်လျှင် ခွန်အားကြီးမားကာ ကျန်းမာရေး ကောင်းမွန်ပြီး၊ ရောဂါဘယများ ကင်းဝေးလျက် သက်တမ်း ပိုရှည်စွာ နေထိုင်နိုင်ကြ၏။

လူတိုင်း၏ မျက်နှာပေါ်တွင် အပြုံးများ ရှိနေကြသည်။

ဒါက မျှော်လင့်ချက်များဖြင့် ပြည့်နှက်နေသည့် မြို့တစ်မြို့ပင် ဖြစ်၏။

“လူနေမှု ပတ်ဝန်းကျင် က တော်ဝင် မြို့တော် ထက်တောင် ပိုကောင်းသေးတယ်”

တတိယ မင်းသား က ရင်ထဲမှ လှိုက်လှိုက်လှဲလှဲ ချီးကျူးလိုက်၏။

ယဲ့ဖုန်း ရှိနေသော နေရာတိုင်းသည် အမှန်တကယ်ပင် သာမန် မဟုတ်ချေ။

ငါးနာရီ ကြာ အကဲဖြတ်ပြီးနောက် တတိယ မင်းသား ကိုယ်တိုင် ဂရုတစိုက်ဖြင့် ရလဒ် ကဏ္ဍတွင် "အကဲဖြတ်မှု အောင်မြင်သည်" ဟု ရေးသားလိုက်သည်။

“အားလုံးကို ဂုဏ်ပြုပါတယ်... ရေပေါ်ဖြူမြို့တော် ဟာ ကြယ် (၃) ပွင့် အဆင့်ကို အောင်မြင်စွာ တက်လှမ်းနိုင်ခဲ့ပြီ ဖြစ်ပြီး၊ လျှို့ဝှက်ဆန်းကြယ် နိုင်ငံတော် ရဲ့ နယ်နိမိတ် အတွင်းမှာ ဒသမ မြောက် ကြယ် (၃) ပွင့် မြို့တော် လည်း ဖြစ်လာပါပြီ”

ရေးသားနေစဉ် တတိယ မင်းသား က ဂုဏ်ပြုစကား ဆိုလိုက်၏။

“ဟေး... အရမ်းမိုက်တယ်”

ကုန်းချင်းချိုး၊ ဒုတိယ မြို့စားမင်း၊ အကြီးအကဲ ကျိုးကျားချန်၊ ဒုတိယ တပ်မှူး ကျိုးကျားချိုင် နှင့် အခြားသူများ အားလုံး ပျော်ရွှင်စွာ လက်သီးဆုပ်လိုက်ကြပြီး၊ ထခုန်မိသွားကြတော့သည်။

“ချစ်မိတ်ဆွေတို့... ဒီနေ့ ဒီမင်းသား က ရေပေါ်ဖြူမြို့တော် ကြယ် (၃) ပွင့် အဆင့် အကဲဖြတ်မှု အောင်မြင်တဲ့ သတင်းကို လောကအနှံ့ ကြေညာပေးမယ်... ခုနစ်ရက် အကြာမှာ အဆင့်တက်ခြင်း အောင်ပွဲခံ အခမ်းအနားကို ကျင်းပလို့ ရပြီ” ဟု တတိယ မင်းသား က ကြေညာလိုက်သည်။

“တတိယ မင်းသား ကို ကျေးဇူးတင်ပါတယ် ခင်ဗျာ”

“ဒါ ငါ လုပ်သင့်လုပ်ထိုက်တာပါ... ငါတို့ လျှို့ဝှက်ဆန်းကြယ် နိုင်ငံတော် က မြူခိုးဂိုဏ်း နဲ့ ရေပေါ်ဖြူမြို့တော် အတွက် ဂုဏ်ယူဝင့်ကြွားနေတာပါပဲ”

တတိယ မင်းသား သည် အကဲဖြတ် အဖွဲ့နှင့်အတူ ထွက်ခွာသွားတော့သည်။

ယင်းနောက်တွင်..

သတင်းသည် လျှို့ဝှက်ဆန်းကြယ် နိုင်ငံတော် တစ်ခုလုံးသို့ လျင်မြန်စွာ ကျော်ကြားသွားပြီး တဖြည်းဖြည်းနှင့် ပိုမို ဝေးကွာသော နေရာများသို့ ရောက်ရှိသွားကာ၊ တောင်ပိုင်း မင် နိုင်ငံ၊ တာ့လျန် နတ်ဆိုး နိုင်ငံ၊ လေ့ဝူ မင်းဆက် နှင့် အခြားနေရာများသို့ ရောက်ရှိသွားပြီး အုတ်အော်သောင်းနင်း ဖြစ်သွားစေတော့သည်။

မကြာမီပင် အဓိက အင်အားစု အများအပြား က သူတို့၏ ဂုဏ်ပြု သဝဏ်လွှာ များကို ပေးပို့လာကြသည်။

မြူခိုးတောင်ထွတ် ထိပ်တွင်..

“တီ... ဂုဏ်ပြုပါတယ်... မြူခိုးဂိုဏ်း ရဲ့ လက်အောက်ခံ မြို့ ဖြစ်တဲ့ ရေပေါ်ဖြူမြို့တော် ဟာ ကြယ် (၃) ပွင့် အဆင့် သို့ တက်လှမ်းနိုင်ခဲ့ပါပြီ... ဂိုဏ်း ဟာ ကြယ် (၄) ပွင့် အဆင့် သို့ ရောက်ရှိဖို့ ခြေတစ်လှမ်း ပိုနီးကပ်လာပါပြီ... ဆုလာဘ် အနေနဲ့ ကျပန်း ကံကောင်းခြင်း အိတ် × (၁) ရရှိပါတယ်”

စနစ် အသိပေးသံ ထွက်ပေါ်လာ၏။

ယဲ့ဖုန်း အနည်းငယ် အံ့အားသင့်သွားသည်။

ရေပေါ်ဖြူမြို့တော် ၏ အဆင့်တက်ခြင်းတွင် ဆုလာဘ်များ မပါဝင်ကြောင်း သူ မှတ်မိနေသော်လည်း၊ ယခု သူ ကျပန်း ကံကောင်းခြင်း အိတ် တစ်ခု ရရှိခဲ့သည်တဲ့လား။

ယဲ့ဖုန်း လက်ဆန့်ထုတ်လိုက်၏။

သူ၏ လက်ဝါး အထက်တွင် အနီရောင် ကံကောင်းခြင်း အိတ် တစ်ခု လွင့်မျောလာပြီး၊ ထူးဆန်းသော စွမ်းအင် ဝဲဂယက် များဖြင့် ရစ်ပတ်နေသည်။

“ဒါ ဘာကြီးလဲ”

ယဲ့ဖုန်း သိချင်စိတ် ဖြစ်ပေါ်လာတော့၏။

--