အခန်း ၇၄၉

အခန်း (၇၄၉) ဒေါသထွက်နေသော ရှေးဟောင်း မြင့်မြတ်သော အစစ်အမှန် နဂါး၊ သူတော်စင်အဆင့် ကိုယ်ပွား ကို သတ်ဖြတ်ခြင်း

မြူခိုးသူတော်စင် ကိုယ်ပွား သည် ထိုကြယ်ကို သေချာစွာ စူးစမ်းကြည့်ရှုပြီး အတန်ကြာ စဉ်းစားပြီးနောက် နောက်ဆုံးတွင် မှတ်မိသွား၏။

“ဒါ အစစ်အမှန်နဂါး နယ်မြေ မဟုတ်ဘူးလား”

“အဲဒီ ဧရာမ နဂါး ပုံရိပ်ကြီးက ရှေးဟောင်း မြင့်မြတ်သော အစစ်အမှန် နဂါး ဖြစ်ရမယ်... ဘယ်သူက ထင်မှာလဲ... နှစ်တွေ အများကြီး ကြာပြီးနောက်မှာ တစ်ချိန်က အဆင့် (၄) တပိုင်းသူတော်စင် ဟာ အခု ပေါင်းစပ်ခြင်း လမ်းစဉ်ကို လျှောက်လှမ်းပြီး ကောင်းကင်တာအို အတု အဖြစ် တက်လှမ်းသွားလိမ့်မယ်လို့”

“ဒီလူက ငါတို့ရဲ့ မူလရင်းမြစ်တွေထက် အများကြီး အားမနည်းဘူးပဲ”

မြူခိုးသူတော်စင် ကိုယ်ပွား ခေတ္တမျှ ထုံထိုင်းသွားပြီးနောက် သူ၏ မျက်နှာတွင် အံ့ဩမှုများ ပေါ်လာ၏။

“အံ့သြစရာပဲ”

လင်းဝေ သူတော်စင် ဧကရာဇ် သည်လည်း အံ့ဩထိတ်လန့် နေသည်။

“ပေါင်းစပ်ခြင်း လမ်းစဉ်ကို လျှောက်လှမ်းပြီးနောက် ရှေးဟောင်း မြင့်မြတ်သော အစစ်အမှန် နဂါး ရဲ့ သက်တမ်း ဟာ အကန့်အသတ်မရှိ ဖြစ်သွားပြီ... အစစ်အမှန်နဂါး နယ်မြေ တည်ရှိနေသရွေ့ သူ သေမှာ မဟုတ်ဘူး... ငါ တကယ်ကို မနာလို ဖြစ်မိတယ်”

သူတော်စင်အဆင့် သည် ထာဝရ အသက်ရှင်ခြင်းနှင့် မညီမျှချေ။

သူတော်စင်အဆင့် ကို ကျော်လွန်သော ကောင်းကင် အရှင် များပင်လျှင် ထာဝရ အသက်ရှင်ခြင်းကို မရရှိနိုင်ကြပေ။

ကောင်းကင် အရှင် များအထက်တွင် ရှိသော တာအို ဘိုးဘေး များသာလျှင် လျှို့ဝှက်ဆန်းကြယ်ပြီး အမြင့်မြတ်ဆုံး ဖြစ်သော "တစ်ဦးတည်း ထာဝရ အသက်ရှင်ခြင်း" နယ်ပယ်ကို ထိတွေ့ရန် အရည်အချင်း ပြည့်မီကြောင်း ဆိုကြသည်။

တစ်ဦးတည်း ထာဝရ အသက်ရှင်ခြင်း ဆိုသည်မှာ ပုဂ္ဂိုလ်ရေး အောင်မြင်မှု လမ်းစဉ်ကို ရည်ညွှန်းပြီး၊ တစ်ဦးတည်း ကျင့်ကြံကာ အထွတ်အထိပ်သို့ ရောက်ရှိရန် အဆက်မပြတ် ကြိုးစားခြင်း ဖြစ်၏။

ထိုသို့သော ပုဂ္ဂိုလ်များမှာ အစွမ်းအထက်ဆုံး ဖြစ်ကြသည်။

ချီ (၅) ပါး ပေါင်းစည်းခြင်း သူတော်စင် နှင့် ရုပ်ခန္ဓာ သူတော်စင် တို့၏ လမ်းစဉ်များမှာ အမှန်တကယ်တော့ တစ်ဦးတည်း ထာဝရ အသက်ရှင်ခြင်း ဆီသို့ ဦးတည်သော လမ်းစဉ်များပင် ဖြစ်သည်။

ရှေးဟောင်း မြင့်မြတ်သော အစစ်အမှန် နဂါး ကဲ့သို့ ကောင်းကင်တာအို အတု ဖြစ်လာသော နည်းလမ်းများကိုမူ ပေါင်းစပ်ခြင်း လမ်းစဉ် ဟု ခေါ်ဆိုပြီး၊ ၎င်းကို "အခြားရွေးချယ်စရာ ထာဝရ အသက်ရှင်ခြင်း" ဟုလည်း ခေါ်ဆိုကြ၏။

ဤလမ်းစဉ်မှာ လိုက်ပါရန် အလွယ်ကူဆုံး ဖြစ်သည်။

သို့သော် အလားအလာ နှင့် စွမ်းအား များမှာမူ အားနည်းလှ၏။

လက်ရှိ ကောင်းကင်တာအို အတု ဖြစ်လာသော ရှေးဟောင်း မြင့်မြတ်သော အစစ်အမှန် နဂါး ကဲ့သို့ပင်၊ ဤလောက မပျက်စီးသရွေ့ သူ ထာဝရ အသက်ရှင်နေနိုင်၏။

သူ၏ စွမ်းအားကို မြှင့်တင်ရန်အတွက် အစစ်အမှန်နဂါး နယ်မြေ ၏ အဆင့်ကို ကမ္ဘာလတ် အထွတ်အထိပ် မှ ကမ္ဘာကြီး သို့ မြှင့်တင်ရန် လိုအပ်သည်။

အောင်မြင်သွားပါက သူ၏ ခွန်အားမှာ သူတော်စင်ထင်ရှား၊ ကောင်းကင်သူတော်စင် သို့မဟုတ် ပိုမိုမြင့်မားသော အထွတ်အထိပ် သူတော်စင် များနှင့် နှိုင်းယှဉ်နိုင်ပါမည်။

“ဒီလူ မဆိုးဘူး... ငါတို့ သူ့ကို စည်းရုံး သိမ်းသွင်းသင့်တယ်... ပြီးရင် အစစ်အမှန်နဂါး နယ်မြေ ရဲ့ တပိုင်းသူတော်စင် ကို ခိုင်းပြီး နယ်မြေက ကျင့်ကြံသူတွေကို ရှန်ကျိုးတိုက်ကြီး ကို ကျူးကျော်စေပြီး၊ ဝင်စားသူတွေ နဲ့ ပူးပေါင်းပြီးတော့ ရှန်ကျိုး ရဲ့ ဖွံ့ဖြိုးတိုးတက်မှုကို ဟန့်တားရမယ်”

လင်းဝေ သူတော်စင် ဧကရာဇ် အလွန် ဝမ်းသာသွား၏။

“ကောင်းတယ်” မြူခိုးသူတော်စင် က သဘောတူသည့် အနေဖြင့် ခေါင်းညိတ်လိုက်သည်။

ကိုယ်ပွား နှစ်ခုသည် အမီလိုက်ရန် အရှိန်မြှင့်လိုက်ကြ၏။

“ရပ်လိုက်စမ်း”

သူတို့သည် ဧရာမ အစစ်အမှန်နဂါး ပုံရိပ်ကြီး ၏ အရှေ့တွင် နေရာယူကာ၊ အစစ်အမှန်နဂါး နယ်မြေ တစ်ခုလုံး နှင့်အတူ ထွက်ပြေးရန် ကြိုးစားနေသော ရှေးဟောင်း မြင့်မြတ်သော အစစ်အမှန် နဂါး ကို ပိတ်ဆို့လိုက်ကြသည်။

“သူတော်စင်အဆင့် ကိုယ်ပွား နှစ်ခုပါလား”

ရှေးဟောင်း မြင့်မြတ်သော အစစ်အမှန် နဂါး မှာ ထိတ်လန့်သွားပြီး မျက်နှာ ဖြူရော်သွားတော့၏။

ရင်တွင်း၌ ဇဝေဇဝါ ဖြစ်နေသော်လည်း သူသည် အစစ်အမှန်နဂါး နယ်မြေ ကို အရှိန်လျှော့လိုက်ပြီး ထို လျှို့ဝှက်ဆန်းကြယ်သော ပုံရိပ် နှစ်ခုကို သတိထားကာ ကြည့်နေလိုက်သည်။

ခေတ္တအကြာတွင်..

“မြူခိုးသူတော်စင်... မင်းပါလား”

ရှေးဟောင်း မြင့်မြတ်သော အစစ်အမှန် နဂါး သည် မြူခိုးသူတော်စင် ကိုယ်ပွား ထံမှ ရင်းနှီးသော အရှိန်အဝါ တစ်ခုကို အာရုံခံမိသွား၏။ သေချာ စဉ်းစားကြည့်ပြီးနောက်၊ သူ အဆင့် (၄) တပိုင်းသူတော်စင် ဘဝက သူတို့ တွေ့ဆုံခဲ့ဖူးသည်ကို သတိရသွားသည်။

“နောက်ဆုံးတော့ ဒီ သူတော်စင် ကို မင်း မှတ်မိသွားပြီပေါ့လေ”

မြူခိုးသူတော်စင် ကိုယ်ပွား သည် လက်နှစ်ဖက်ကို နောက်ပစ်လျက် မောက်မာသော မျက်နှာထားဖြင့် မတ်တတ်ရပ်နေ၏။ နှစ်ပေါင်းများစွာ ကြာပြီးနောက် မှတ်မိနေခြင်းမှာလည်း ကိုယ်ပိုင် စွမ်းရည် တစ်ခုပင် ဖြစ်သည်။

“မင်းတို့ ဘာလိုချင်တာလဲ”

ရှေးဟောင်း မြင့်မြတ်သော အစစ်အမှန် နဂါး က မေးလိုက်သည်။

နတ်ဘုရားမျိုးနွယ်စု မှ သူတော်စင်အဆင့် ကိုယ်ပွား နှစ်ခု အပေါ် သူ မည်သည့် ရင်းနှီးသော သဘောထားမျှ မရှိချေ။

“ငါတို့ နတ်ဘုရားမျိုးနွယ်စု ထွက်ပေါ်လာပြီ... အခုလောလောဆယ် ကြယ်တာရာ ကောင်းကင်ယံ က အစွမ်းထက် မျိုးနွယ်စု တွေ ရှန်ကျိုးတိုက်ကြီး ကို တိုက်ခိုက်ဖို့ ပူးပေါင်းဖို့ လိုအပ်တယ်... ငါတို့ရဲ့ ဝင်စားသူတွေ ကို ကူညီပြီး ရှန်ကျိုး ကို ရှင်းလင်းကာ သူတို့ရဲ့ ဖွံ့ဖြိုးတိုးတက်မှုကို ဟန့်တားရမယ်” မြူခိုးသူတော်စင် ကိုယ်ပွား က လက်များကို နောက်ပစ်ထားဆဲဖြင့် ပြောလိုက်၏။

ရှေးဟောင်း မြင့်မြတ်သော အစစ်အမှန် နဂါး သည်လည်း ကောင်းကင်တာအို အတု တစ်ခု ဖြစ်ပြီး တိတိကျကျ ပြောရလျှင် သူတို့ကဲ့သို့ပင် သူတော်စင်အဆင့် သတ္တဝါ တစ်ဦး အဖြစ် သတ်မှတ်နိုင်သည်။

သူ့အပေါ် ထားရှိသည့် သဘောထားမှာ သဘာဝကျကျပင် ပိုကောင်းရမည် ဖြစ်၏။

“စိတ်မဝင်စားဘူး”

ရှေးဟောင်း မြင့်မြတ်သော အစစ်အမှန် နဂါး က ချက်ချင်းပင် ပြတ်ပြတ်သားသား ငြင်းဆိုလိုက်သည်။

ယဲ့ဖုန်း သည်လည်း ရှန်ကျိုးတိုက်ကြီး မှ လူတစ်ယောက် ဖြစ်ကြောင်း သူ မှတ်မိနေ၏။ သေလမ်းရှာမည့် အစား ယဲ့ဖုန်း ကို ရှောင်ရှားရန် သူ.. ပို၍ ရွေးချယ်ပါမည်။

“မင်း ဘယ်လို ရဲရတာလဲ”

“ငါတို့ နတ်ဘုရားမျိုးနွယ်စု ကို ငြင်းရဲတယ်ပေါ့... မင်း သေချင်နေတာလား”

မြူခိုးသူတော်စင် နှင့် လင်းဝေ သူတော်စင် ဧကရာဇ် တို့ ဒေါသတကြီး အော်ဟစ်လိုက်ကြသည်။

ရှေးဟောင်း မြင့်မြတ်သော အစစ်အမှန် နဂါး သည် ကောင်းကင်တာအို အတု တစ်ခု ဖြစ်သော်လည်း၊ အကယ်၍ တိုက်ပွဲသာ ဖြစ်လာပါက သူတို့ နှစ်ဦးစလုံးသည် သူတော်စင်အဆင့် များ အနေဖြင့် သူ့ကို ဖိနှိပ်နိုင်စွမ်း ရှိကြသည်။

လေဟာနယ်ထဲတွင်..

သူတို့ အချင်းချင်း အကြိတ်အနယ် ထိပ်တိုက်တွေ့ဆုံမှု တစ်ခု ဖြစ်ပွားနေ၏။

ခေတ္တအကြာတွင်..

“နတ်ဘုရားမျိုးနွယ်စု က ဘာမှ အရေးမပါဘူး”

သို့သော် ရှေးဟောင်း မြင့်မြတ်သော အစစ်အမှန် နဂါး ၏ လှောင်ပြောင်သံ ကို သူတို့ ကြားလိုက်ရသည်။

“ငါ ပုန်းဖို့ လျှို့ဝှက်တဲ့ နေရာတစ်ခုကို ရှာတွေ့သွားရင်... မင်းတို့ နတ်ဘုရားမျိုးနွယ်စု.. ငါ့ကို မရှာနိုင်ဘူး... မင်းတို့က ငါ့ကို ခြိမ်းခြောက်ရဲသေးတယ်ပေါ့လေ... ငါ အရင်ဆုံး မင်းတို့ကို သတ်ပြမယ်”

ပြောပြီးသည်နှင့် သူ လျင်မြန်စွာ တိုက်ခိုက်လိုက်၏။

ကြောက်မက်ဖွယ်ကောင်းသော ကောင်းကင်နှင့် မြေကြီး၏ စွမ်းအား က ပေါက်ကွဲထွက်လာပြီး ဤ သူတော်စင်အဆင့် ကိုယ်ပွား နှစ်ခုကို တစ်ခဏချင်းမှာပင် ဝါးမြိုသွားတော့သည်။

“ဟိုက်...”

“ငါတို့ မေ့သွားတယ်... ငါတို့က သာမန် ကိုယ်ပွား တွေပဲ... အဆင့် (၄) တပိုင်းသူတော်စင် တွေနဲ့သာ ညီမျှတယ်... ကောင်းကင်တာအို အတု ရဲ့ ပြိုင်ဘက် ဖြစ်ဖို့ အဝေးကြီး လိုသေးတယ်”

မြူခိုးသူတော်စင် နှင့် လင်းဝေ သူတော်စင် ဧကရာဇ် တို့ လှုပ်ရှားရန် ကြိုးစားသော်လည်း သူတို့ လုံးဝ လှုပ်မရဖြစ်နေကြောင်း တွေ့လိုက်ရ၏။

နောက်တစ်စက္ကန့်တွင်..

ကြောက်မက်ဖွယ်ကောင်းသော ကောင်းကင်နှင့် မြေကြီး၏ စွမ်းအား များ ရူးသွပ်စွာ တဟုန်ထိုး တက်လာပြီး ဧရာမ လက်ဝါးကြီး နှစ်ခု အဖြစ် ပြောင်းလဲကာ၊ ခြင်များကို ရိုက်သတ်သကဲ့သို့ မြူခိုးသူတော်စင် နှင့် လင်းဝေ သူတော်စင် ဧကရာဇ် တို့၏ ကိုယ်ပွား များကို ကြိတ်ခြေပစ်လိုက်တော့သည်။

*

လွင့်မျော တောင်တန်း။

မြူခိုးသူတော်စင် နှင့် လင်းဝေ သူတော်စင် ဧကရာဇ် တို့ အလွန် ဒေါသထွက်သွားကြ၏။

“ဒီ သေချင်စော်နံနေတဲ့ ရှေးဟောင်း မြင့်မြတ်သော အစစ်အမှန် နဂါး...”

နှစ်ဦးစလုံး ဒေါသတကြီးဖြင့် မြေကြီးကို ဆောင့်နင်းလိုက်ကြသည်။

လောလောဆယ် သူတို့၏ အစစ်အမှန် ခန္ဓာကိုယ် များဖြင့် ဆင်းသက်ရန် စိုးရိမ်နေခြင်းသာ မရှိပါက၊ လွင့်မျော တောင်တန်း မှ ထွက်ခွာ၍ ရှေးဟောင်း မြင့်မြတ်သော အစစ်အမှန် နဂါး ကို အသေ ကြိတ်ခြေပစ်မည်မှာ သေချာ၏။

“ငါတို့ရဲ့ အစစ်အမှန် ခန္ဓာကိုယ် တွေ ထွက်လာလို့ မရဘူး ဆိုတာကို သူ ခန့်မှန်းမိလို့ နေမှာပေါ့... ဒါကြောင့် သူ ငြင်းရဲတာ ဖြစ်မယ်”

“သေချာပေါက် ဒါပဲ ဖြစ်ရမယ်”

“ဒါပေမဲ့ ဒီအကောင်ရဲ့ ရဲတင်းမှုကတော့ လွန်လွန်းတယ်... နောက်တစ်ခါ တွေ့ရင် သူ ပြန်ပေးဆပ်ရအောင် ငါတို့ သေချာပေါက် လုပ်ရမယ်”

မြူခိုးသူတော်စင် နှင့် လင်းဝေ သူတော်စင် ဧကရာဇ် တို့ ဒေါသထွက်လွန်းသဖြင့် မျက်နှာများ နီရဲနေကြ၏။

“တော်တော့”

“ငါတို့ ကြယ်တာရာ ကောင်းကင်ယံ က အစွမ်းထက် မျိုးနွယ်စု တွေ အတော်များများကို စည်းရုံးနိုင်ခဲ့ပြီ... အရင်ဆုံး သူတို့ရဲ့ မျိုးနွယ်စု ခေါင်းဆောင် တွေကို အဆင့် (၃) ဒါမှမဟုတ် အဆင့် (၄) တပိုင်းသူတော်စင် အဆင့်ကို ရောက်အောင် ကူညီပေးမယ်... ပြီးရင် ရှန်ကျိုးတိုက်ကြီး ကို ကျူးကျော်ပြီး ရှန်ကျိုး ရဲ့ ဖွံ့ဖြိုးတိုးတက်မှုကို ဟန့်တားရမယ်”

“မှန်တယ်”

“ငါတို့ရဲ့ အစစ်အမှန် ခန္ဓာကိုယ် တွေနဲ့ ဆင်းသက်လို့ ရတာနဲ့... အစစ်အမှန်နဂါး နယ်မြေ ကို သွားပြီး ဖောက်ခွဲပစ်မယ်... ရှေးဟောင်း မြင့်မြတ်သော အစစ်အမှန် နဂါး ကို သေခြင်းတရားရဲ့ စိတ်ပျက်အားငယ်မှု ကို တကယ် ခံစားရအောင် လုပ်ပေးမယ်”

သူတို့ ပြိုင်တူ လှောင်ပြောင်လိုက်ကြ၏။

ကြယ်တာရာ ကောင်းကင်ယံ တွင် သူတို့၏ အစီအစဉ်များမှာ ပြီးစီးလုနီးပါး ဖြစ်နေပြီ ဖြစ်သည်။

ဝိညာဉ်ဝါးမြို မျိုးနွယ်စု ၏ ဘိုးဘေး၊ ရှေ့ဖြစ်ဟော မျိုးနွယ်စု ၏ မျိုးနွယ်စု ခေါင်းဆောင် နှင့် အခြားသူများ အဆင့် (၃) သို့မဟုတ် အဆင့် (၄) တပိုင်းသူတော်စင် သို့ တက်လှမ်းသွားသရွေ့ မျိုးနွယ်စု တစ်ခုစီသည် သူတော်စင်အဆင့် မရှိသော မြင့်မြတ်သော နယ်မြေ တစ်ခုနှင့် ညီမျှ၏။

ထိုအချိန်ရောက်လျှင် ရှန်ကျိုးတိုက်ကြီး အပေါ် ဖိအားများ တဟုန်ထိုး မြင့်တက်လာပါမည်။

နတ်ဘုရားမျိုးနွယ်စု သည် နောက်သို့ဆုတ်ကာ ပဋိပက္ခများကို သေချာပေါက် စောင့်ကြည့်နေပါမည်။

အစစ်အမှန်နဂါး နယ်မြေ။

ယဲ့ဖုန်း က ရှေးဟောင်း မြင့်မြတ်သော အစစ်အမှန် နဂါး ကို ပြုံးလျက် ကြည့်လိုက်၏။

“ကောင်းတယ်... ခုနက မင်း တော်တော် ကောင်းကောင်း လုပ်ခဲ့တယ်”

ထိုစကားကို ကြားသောအခါ ရှေးဟောင်း မြင့်မြတ်သော အစစ်အမှန် နဂါး ၏ နှုတ်ခမ်းများ တွန့်ကွေးသွားတော့သည်။

ရှန်ကျိုး နှင့် နတ်ဘုရားမျိုးနွယ်စု တို့၏ ထိပ်တိုက်တွေ့ဆုံမှုတွင် သူ မပါဝင်ချင်ပေ။ သူသည် သာမန် အမြောက်စာ တစ်ခု ဖြစ်သွားမည်ကို စိုးရိမ်သော်လည်း၊ အစွမ်းထက်သော သူတော်စင်အဆင့် ကိုယ်ပွား နှစ်ခုကို သတ်ဖြတ်ရလောက်အောင်တော့ သူ မရဲရင့်ချေ။

အလွန်ဆုံး သူသည် ညင်သာစွာ တောင်းပန်ကာ ပဋိပက္ခမှ ကင်းလွတ်လိုကြောင်း ပြောဆိုပါမည်။

သို့မဟုတ် သူ သဘောတူဟန်ဆောင်ပြီး လျင်မြန်စွာ ထွက်ပြေးမည် ဖြစ်၏။

သူတော်စင်အဆင့် ကိုယ်ပွား နှစ်ခုကို ချက်ချင်း ဖျက်ဆီးပစ်ရသည့် အကြောင်းရင်းမှာ ထိုနှစ်ဦး ပေါ်လာပြီး မကြာမီမှာပင် ယဲ့ဖုန်း လည်း ရောက်ရှိလာပြီး၊ ဤကိုယ်ပွားများကို ဖျက်ဆီးပစ်ရန် သူ့ကို အမိန့်ပေးခဲ့သောကြောင့် ဖြစ်သည်။

“ရှေးဟောင်း မြင့်မြတ်သော အစစ်အမှန် နဂါး... မင်းက ဒီလောက် လိမ္မာမယ်လို့ ငါ မမျှော်လင့်ထားဘူး”

ယဲ့ဖုန်း က အပြုံးဖြင့် ပြောလိုက်၏။

“ခင်ဗျား... ဒါကို ဘယ်တုန်းက လုပ်လိုက်တာလဲ”

ရှေးဟောင်း မြင့်မြတ်သော အစစ်အမှန် နဂါး သည် ကြယ်အနှစ်သာရ အတွင်းတွင် ဖုံးကွယ်ထားသော အရင်းအမြစ် အမှတ်အသား ကို ကြီးမားလှသော အလိုဆန္ဒ တစ်ခုက ထိန်းချုပ်ထားကြောင်း ခံစားမိသည်။

ထို့အပြင် ၎င်းမှာ လုံးဝ သန့်စင်ခံလိုက်ရ၏။

ဆိုလိုသည်မှာ ကြီးမားလှသော အလိုဆန္ဒ သည် သူ၏ အသက်ရှင်ခြင်း နှင့် သေဆုံးခြင်းကို စိတ်ကြိုက် လွှမ်းမိုးနိုင်ပြီ ဖြစ်သည်။

ထို အလိုဆန္ဒ မှာ ရှန်ကျိုးတိုက်ကြီး ၏ ကောင်းကင်တာအို အကြွင်းအကျန်များ ပင် ဖြစ်၏။

ထို့ကြောင့် ရှန်ကျိုး ၏ ကံကြမ္မာရဲ့ သားတော် အနေဖြင့် ယဲ့ဖုန်း သည်လည်း ရှေးဟောင်း မြင့်မြတ်သော အစစ်အမှန် နဂါး ၏ အသက်ရှင်ခြင်း နှင့် သေဆုံးခြင်းကို ထိန်းချုပ်နိုင်သည်။

ယခုလေးတင် မြူခိုးသူတော်စင် နှင့် လင်းဝေ သူတော်စင် ဧကရာဇ် တို့၏ ကိုယ်ပွားများကို သုတ်သင်ရန် ရှေးဟောင်း မြင့်မြတ်သော အစစ်အမှန် နဂါး ကို အမိန့်ပေးခဲ့သူမှာ ယဲ့ဖုန်း ပင် ဖြစ်၏။

“မင်းကို ပြောဖို့ ငါ မေ့သွားတဲ့ ကိစ္စတစ်ခု ရှိတယ်...”

“အစစ်အမှန်နဂါး နယ်မြေ က ကျင့်ကြံသူတွေကို မိုးကြိုးရေကန် နန်းတော် ကနေတစ်ဆင့် ကပ်ဘေး ဖြတ်ကျော်ဖို့ မိုးကြိုး အဆောင် တွေကို ငါ ပထမဆုံး ဖြန့်ဝေပေးခဲ့တုန်းက... အစစ်အမှန်နဂါး နယ်မြေ ကို အမှတ်အသား လုပ်ဖို့ပဲ...”

“အဲ့ဒီနောက် ရှန်ကျိုးတိုက်ကြီး ရဲ့ ကောင်းကင်တာအို အကြွင်းအကျန်များ က ဖြည်းဖြည်းချင်း ပျံ့နှံ့လာပြီး... အစစ်အမှန်နဂါး နယ်မြေ ကို တိတ်တဆိတ် သန့်စင်လိုက်တယ်...”

“အခုဆို အစစ်အမှန်နဂါး နယ်မြေ က ရှန်ကျိုး ရဲ့ အောက်လောက တစ်ခု ဖြစ်သွားပြီ...”

“ပြီးတော့ မင်းက ရှန်ကျိုးတိုက်ကြီးကို ရောက်နေပြီလေ... မင်းက တကယ်တော့ ငါ့ရဲ့ လက်အောက်ငယ်သား ပဲ... ဒီကစပြီး နတ်ဘုရားမျိုးနွယ်စု ကို ဆန့်ကျင်ရာမှာ မင်း ငါနဲ့ ရိုးရိုးသားသား ပူးပေါင်းရမယ်...”

ယဲ့ဖုန်း ၏ မျက်နှာတွင် အပြုံးများ ပြည့်နှက်နေ၏။

'အွန့်..ဒေါသထွက်စရာ ကောင်းလိုက်တာ’

ရှေးဟောင်း မြင့်မြတ်သော အစစ်အမှန် နဂါး သည် အလွန်အမင်း စိတ်ပျက်နေတော့သည်။

--