အခန်း ၇၅၁

အခန်း (၇၅၁) ရေပေါ် ဖြူ မြို့တော် ၏ အခမ်းအနား၊ ကြယ် (၄) ပွင့် အဆင့် အင်အားစု အဖြစ် တက်လှမ်းရန် ကြိုးပမ်းခြင်း

ယဲ့ဖုန်း ၏ စကားများကြောင့် အော့ထျန်းဖုန်း မှာ ပြောစရာစကား မရှိတော့ချေ။

ယဲ့ဖုန်း ဤမျှ လိမ္မာပါးနပ်လိမ့်မည်ဟု သူ မမျှော်လင့်ထားခဲ့ပေ။ မိုးကြိုးရေကန် နန်းတော် ကို အသုံးချကာ အစစ်အမှန်နဂါး နယ်မြေ နှင့် ရှန်ကျိုးတိုက်ကြီး ကို ချိတ်ဆက်ပြီး၊ ကာလရှည်ကြာ ခမ်းခြောက်နေခဲ့သော ကောင်းကင်တာအို၏ အကြွင်းအကျန်များ ကို သယ်ဆောင်လာခဲ့သည် မဟုတ်ပါလော။

သူသည် တစ်ချိန်က ကောင်းကင်တာအို အတု တစ်ခု ဖြစ်ခဲ့သော်ငြား၊ ရှန်ကျိုးတိုက်ကြီး ၏ ကောင်းကင်တာအို အဆင့်နှင့် ယှဉ်လျှင် အဝေးကြီး လိုသေး၏။

ယနေ့မှစ၍ သူသည် ရှန်ကျိုးတိုက်ကြီး မှ ထွက်ခွာ၍ မရနိုင်တော့ချေ။

“ဟူး... ကံဆိုးလိုက်တာ”

ရှေးဟောင်း မြင့်မြတ်သော အစစ်အမှန်နဂါး သည် ဤအကြောင်းကို တွေးလေလေ ပို၍ စိတ်ဓာတ်ကျလေလေ ဖြစ်လာပြီး ငိုချင်စိတ်ပင် ပေါက်လာတော့သည်။

“မင်းက အစစ်အမှန်နဂါး နယ်မြေ ကို ထိန်းချုပ်ထားတုန်းပဲလေ... ပြီးတော့ ကောင်းကင်တာအို၏ အကြွင်းအကျန်များ က မင်းရဲ့ မြင့်မြတ်သော ရုပ်ခန္ဓာ ကို ပြန်လည် ပုံဖော်ပေးခဲ့လို့ နယ်မြေတစ်ခုရဲ့ သခင် ဖြစ်လာပြီး တိုက်ခိုက်ရေး စွမ်းအားကလည်း အစစ်အမှန် သူတော်စင်အဝင် အဆင့် ကို တက်လှမ်းသွားပြီပဲ... မင်း တော်တော် အမြတ်ထွက်သွားတာ မဟုတ်ဘူးလား”

ယဲ့ဖုန်း က မပြုံးတပြုံး မျက်နှာထားဖြင့် ပြောလိုက်၏။

ထိုစကားကို ကြားသောအခါ ရှေးဟောင်း မြင့်မြတ်သော အစစ်အမှန်နဂါး အော့ထျန်းဖုန်း မှာ စိတ်အနှောင့်အယှက် ဖြစ်သွားတော့သည်။

“ခင်ဗျား ပြောတာ မှန်ပေမယ့်... ကျွန်တော့်ရဲ့ အဖိုးတန် လွတ်လပ်ခွင့် ကိုတော့ ဆုံးရှုံးသွားရပြီလေ” အော့ထျန်းဖုန်း က နတ်ဘုရား တစ်ပါး၏ ဝမ်းနည်းပူဆွေးမှု အပြည့်ရှိသော မျက်နှာထားဖြင့် ပြောလိုက်သည်။

“မင်းရဲ့ နေထိုင်စရိတ်တွေ အားလုံးကို အပြည့်အဝ ထောက်ပံ့ပေးထားတာထက် လွတ်လပ်ခွင့်က ပိုအရေးကြီးလို့လား” ယဲ့ဖုန်း က ပြန်လည် ချေပလိုက်၏။

အော့ထျန်းဖုန်း မှာ ပြောစရာ စကား မရှိတော့ချေ။

ပြန်လည် စဉ်းစားကြည့်သောအခါ မှန်သည့်နှယ် ရှိ၏။ ရှန်ကျိုးတိုက်ကြီး သို့မဟုတ် ယဲ့ဖုန်း သည် လောလောဆယ် သူ့ထံမှ မည်သည့် အကျိုးအမြတ်မျှ မရရှိနိုင်သေးသော်လည်း၊ သူကမူ ပြန်လည် ပုံဖော်ထားသော မြင့်မြတ်သော ရုပ်ခန္ဓာ ကို ရရှိခဲ့ပြီး သူ၏ ခွန်အားမှာလည်း တဟုန်ထိုး မြင့်တက်သွားခဲ့သည် မဟုတ်ပါလော။ အမှန်တကယ်ပင် သူ အကြီးအကျယ် အမြတ်ထွက်သွားခဲ့တော့၏။

အော့ထျန်းဖုန်း သည် ဤအရာများကို တွေးတောရင်း သူ၏ စိတ်အခြေအနေမှာ များစွာ တိုးတက်လာတော့သည်။

နာရီဝက် ကြာပြီးနောက်..

အော့ထျန်းဖုန်း သည် ကြယ်တာရာ ကောင်းကင်ယံ အနက်ရှိုင်းဆုံးရှိ အစစ်အမှန်နဂါး နယ်မြေ သို့ ပြန်လည် ရောက်ရှိလာ၏။

အောက်ဘက်ရှိ ဧရာမ သက်ရှိကြယ် ကြီးကို ငုံ့ကြည့်ကာ လက်နှစ်ဖက်ကို ခါးထောက်ပြီး အားပါးတရ ရယ်မောလိုက်သည်။

“ဒါက ငါ့ရဲ့ နယ်မြေ ပဲကွ”

စကားဆုံးသည်နှင့် တစ်ပြိုင်နက် သူသည် ဧရာမ အစစ်အမှန်နဂါး ကြီး အဖြစ်သို့ ပြောင်းလဲသွားပြီး၊ နယ်မြေကို ဖုံးကွယ်ရန် မျှော်လင့်ချက်ဖြင့် ကောင်းကင်နှင့် မြေကြီး၏ စွမ်းအား ကို အသုံးပြုကာ အစစ်အမှန်နဂါး နယ်မြေ ကို ကြယ်တာရာ ကောင်းကင်ယံ အနက်ရှိုင်းဆုံးရှိ မြူခိုးများ ဖုံးလွှမ်းနေသော ဧရိယာဆီသို့ တွန်းပို့လိုက်၏။

သူ ဦးတည်သွားနေသော လမ်းကြောင်းမှာ မြို့ကိုးမြို့ ကြယ်တိမ်တိုက် တည်ရှိရာ နေရာ အတိအကျ ဖြစ်ကြောင်း သူ မသိခဲ့ချေ။

မြူခိုးဂိုဏ်း ၏ အထက်တွင်..

ယဲ့ဖုန်း သည် တောက်ပစွာ အလှဆင်ထားသော ရေပေါ် ဖြူ မြို့တော် ကို ကြည့်ကာ ကုန်းချင်းချိုး သည် ကြယ် (၃) ပွင့် မြို့တော် တက်လှမ်းခြင်း အခမ်းအနား အတွက် ပြင်ဆင်နေကြောင်း သိလိုက်၏။

“ဒီတစ်ခေါက်တော့ ငါ မပါဝင်တော့ဘူး”

ယဲ့ဖုန်း သည် ဝါးကုတင်ပေါ်တွင် လက်နှစ်ဖက်ကို ခေါင်းနောက်တွင် ပိုက်ကာ ထိုင်လျက် အချက်အလက် မျက်နှာပြင်ကို ဖွင့်ကြည့်လိုက်သည်။

[ဟူဖေးဖေး ၏ တက်လှမ်း စွမ်းအင် - ၆၀.၇၆၂%]

ပြီးခဲ့သည့် အကြိမ်နှင့် နှိုင်းယှဉ်ပါက ဟူဖေးဖေး ၏ စွမ်းအင်မှာ (၁၀%) ခန့် တိုးလာပြီး ကြယ် (၄) ပွင့် အဆင့်လွန် ဝိညာဉ်ရတနာ အဖြစ်သို့ တက်လှမ်းရန် ပိုမို နီးကပ်လာပြီ ဖြစ်သည်။

မြူခိုးသူတော်စင် ကိုယ်ပွား က အော့ထျန်းဖုန်း အား ပြောခဲ့သည့် စကားများကို ပြန်လည် သတိရမိသောအခါ ယဲ့ဖုန်း ၏ မျက်နှာအမူအရာမှာ တဖြည်းဖြည်း လေးနက်လာတော့သည်။

“နတ်ဘုရားမျိုးနွယ်စု ဆိုပါလား”

“သူတို့က ဝိညာဉ်ဝါးမြို မျိုးနွယ်စု၊ ရှေ့ဖြစ်ဟော မျိုးနွယ်စု နဲ့ အခြား ကြယ်တာရာ ကောင်းကင်ယံ က အစွမ်းထက် မျိုးနွယ်စု တွေကို စည်းရုံးပြီး... ရှန်ကျိုးတိုက်ကြီး ကို တိုက်ခိုက်ဖို့ နတ်ဘုရားမျိုးနွယ်စု ဝင်စားသူတွေ နဲ့ ပူးပေါင်းပြီးတော့.. ရှန်ကျိုး ရဲ့ ဖွံ့ဖြိုးတိုးတက်မှုကို ဟန့်တားဖို့ ပြင်ဆင်နေတာပဲ... သူတို့ရဲ့ ရည်ရွယ်ချက်က အလွန် ရက်စက် ယုတ်မာလွန်းတယ်”

“ဒါပေမဲ့ မင်းတို့ကို အောင်မြင်ခွင့် မပေးဘူး”

ယဲ့ဖုန်း ၏ မျက်လုံးများ ကျဉ်းမြောင်းသွားပြီး သူ၏ မျက်ဝန်းများထဲတွင် အေးစက်သော အလင်းတန်း တစ်ခု ဖြတ်ပြေးသွား၏။

ရက်အနည်းငယ် ကြာပြီးနောက်..

ရေပေါ် ဖြူ မြို့တော် တက်လှမ်းခြင်း အခမ်းအနားကို သတ်မှတ်ထားသည့် အချိန်တွင် ကျင်းပခဲ့ပါသည်။

ရှန်ကျိုးတိုက်ကြီး ၏ အဓိက အင်အားစုများမှ ကိုယ်စားလှယ်များသည် ရေပေါ် ဖြူ မြို့တော် ကြယ် (၃) ပွင့် မြို့တော် အဆင့်သို့ တက်လှမ်းခြင်းကို ဂုဏ်ပြုရန် လက်ဆောင်များ သယ်ဆောင်လာကြ၏။

ယခင်ကဆိုလျှင် သာမန် ကြယ် (၃) ပွင့် မြို့တော် တစ်ခုသည် ဤမျှ ကြီးကျယ်သော ဂုဏ်ပြုမှုမျိုးကို ဘယ်သောအခါမှ ရရှိမည် မဟုတ်ချေ။

သို့သော် ရေပေါ် ဖြူ မြို့တော် သည် မြူခိုးဂိုဏ်း ၏ လက်အောက်ခံ ဖြစ်၏။

ကြယ် (၃) ပွင့် သို့ တက်လှမ်းခြင်းက မြူခိုးဂိုဏ်း သည်လည်း ကြယ် (၄) ပွင့် အဆင့် အင်အားစု အဖြစ်သို့ တက်လှမ်းရန် နီးကပ်နေပြီ ဖြစ်ကြောင်း ညွှန်ပြနေသည်။ ရေပေါ် ဖြူ မြို့တော် ကို ဂုဏ်ပြုခြင်းမှာ မြူခိုးဂိုဏ်း ကို မျက်နှာသာပေးခြင်း ဖြစ်ပြီး နှစ်ဖက် ဆက်ဆံရေးကို ပိုမို ခိုင်မာစေရန် ဖြစ်၏။

အခမ်းအနား အတွင်းတွင်..

ကုန်းချင်းချိုး သည် မြို့စားမင်း အနေဖြင့် ပွဲကို ကြီးမှူး ကျင်းပခဲ့၏။

ကုန်းချင်းချိုး သည် တက်လှမ်း ပုလဲ ကို ရရှိကတည်းက၊ သူမ၏ မအားလပ်သော အချိန်ဇယားထဲမှ အချိန်လုကာ တက်လှမ်း ပုလဲ ၏ အကူအညီဖြင့် အဟန့်အတား ကို ချိုးဖျက်ပြီး မူလနတ်ဘုရားအဆင့် (၃) သို့ ဝင်ရောက်နိုင်ခဲ့ရာ သိသိသာသာ

ခွန်အား တိုးတက်လာခဲ့တော့၏။

ဟင်းလင်းပြင်ဖြိုခွဲအဆင့် ရှိ အဓိက အင်အားစုများ မှ အကြီးအကဲ များနှင့် သူမကို မနှိုင်းယှဉ်နိုင်သော်လည်း မည်သူကမျှ သူမကို အထင်မသေးရဲကြချေ။

ကုန်းချင်းချိုး သည် ယဲ့ဖုန်း အလွန် တန်ဖိုးထားခံရသူ ဖြစ်ကြောင်း လူတိုင်း သိကြ၏။

သာမန် ဟင်းလင်းပြင်ဖြိုခွဲအဆင့် အကြီးအကဲ တစ်ဦးပင်လျှင် သူမ ရှေ့တွင် မမောက်မာရဲချေ။ သူမသည် ချီသန့်စင်ခြင်း အဆင့်တွင် သာ ရှိနေလျှင်ပင် ထိုသို့ မလုပ်ရဲပါ။

အခမ်းအနားမှာ ချောမွေ့စွာ ပြီးဆုံးသွား၏။

နေ့တစ်ဝက် ကြာပြီးနောက်..

လူတိုင်း တစ်ဦးပြီးတစ်ဦး ထွက်ခွာသွားကြပြီး ယဲ့ဖုန်း မှာမူ အစမှ အဆုံးတိုင်အောင် ပေါ်မလာခဲ့ချေ။

သူသည် မြူခိုးဂိုဏ်း ကြယ် (၄) ပွင့် အဆင့် အင်အားစု အဖြစ် တက်လှမ်းရန် လိုအပ်သော အချက်အလက်များကို စုစည်းနေပြီး ကိုယ်တိုင်ကိုယ်ကျ ဂရုတစိုက် စစ်ဆေး အတည်ပြုနေ၏။

“ဂိုဏ်းချုပ် ရဲ့ ခွန်အားက သတ်မှတ်ချက်တွေနဲ့ ကိုက်ညီတယ်”

“အကြီးအကဲ တွေရဲ့ ခွန်အားက ပြဿနာ မရှိဘူး”

“တပည့် တွေရဲ့ ခွန်အားက... မူလနတ်ဘုရားအဆင့် က ဒါဇင်ပေါင်းများစွာ... ဝိညာဉ်ပင်လယ်အဆင့် က တစ်ထောင်ကျော် နဲ့ ချီစုစည်းခြင်းအဆင့် က တစ်သောင်းကျော် ဆိုတော့... သတ်မှတ်ချက်တွေနဲ့ သေချာပေါက် ကိုက်ညီပါတယ်”

“ဝိညာဉ်ဆေးပင် ဥယျာဉ် ကလည်း... သတ်မှတ်ချက်တွေနဲ့ ကိုက်ညီလောက်ပါတယ်”

ယန်ရူယွီ သည် အားလပ်ချိန် ရှိတိုင်း ဝိညာဉ်ဆေးပင် များကို ပြုစုပျိုးထောင်လေ့ ရှိ၏။ ယခုအခါ ဝိညာဉ်ဆေးပင် ဥယျာဉ် ထဲတွင် အသက် တစ်ထောင်ကျော် ရှိသော အပင် တစ်ရာကျော် ရှိပြီး၊ အသက် တစ်သောင်းကျော် ရှိသော ဆေးဘုရင် အပင် ဆယ်ပင် ပင် ရှိနေတော့၏။

အသက် တစ်ရာကျော် ရှိသော အပင်များ ဆိုလျှင်ကား ရေတွက်၍ပင် မရနိုင်အောင် များပြားလှသည်။

“ဝိညာဉ်သားရဲဆောင် ကလည်း သေချာပေါက် သတ်မှတ်ချက်တွေနဲ့ ကိုက်ညီပါတယ်”

“လက်နက် သန့်စင်ရေး ဆောင် က... ငါ မှတ်မိသလောက်ဆိုရင် လက်နက် သန့်စင်ရေး ဖိုတွေ ကနေ ဝိညာဉ်ရတနာ အခု တစ်ရာကျော် ထုတ်လုပ်ထားတယ် မဟုတ်လား... ဒီအချက်ကလည်း သေချာပေါက် သတ်မှတ်ချက်တွေနဲ့ ပြည့်မီပါတယ်”

“ဝိညာဉ်ကြော အတွက်ဆိုရင်... အလွန် ကြီးမားတဲ့ ဝိညာဉ်ကြော တစ်ခု ရှိရင် လုံလောက်ပါပြီ”

“ဘာတွေ လိုသေးလဲ...”

ယဲ့ဖုန်း ဆက်လက် စုစည်းနေ၏။

တစ်နာရီ ကြာပြီးနောက်..

ကုန်းချင်းချိုး သည် မြူခိုးတောင်ထွတ် ၏ ထိပ်သို့ ရောက်လာပြီး စားပွဲတွင် စာအုပ် အမျိုးမျိုးကို စုစည်းနေသော ယဲ့ဖုန်း ကို မြင်တွေ့လိုက်ရသည်။

“ဂိုဏ်းချုပ်”

“အခမ်းအနား ပြီးပြီလား”

“စောစောကတည်းက ပြီးသွားပါပြီ... မြို့ထဲက ကိစ္စတွေကို ရှင်းလင်းပြီး ဂိုဏ်းချုပ် ဆီကို အစီရင်ခံဖို့ ပြင်နေတာပါ”

“အစီရင်ခံစရာ မလိုပါဘူး... ကျွန်တော် အကုန် သိပြီးပါပြီ”

“ဒါဆို... ဂိုဏ်းချုပ်... ကျွန်မကို ခွင့်ပြုပါဦးရှင်”

“ခဏလေး နေပါဦး”

ယဲ့ဖုန်း က ကုန်းချင်းချိုး ကို လှမ်းခေါ်လိုက်၏။

“ဂိုဏ်းချုပ်... ဘာကိစ္စ ရှိလို့လဲရှင်” ကုန်းချင်းချိုး သည် နောက်သို့ လှည့်ကာ လက်နှစ်ဖက် ဆုပ်မိုးလျက် မေးလိုက်သည်။

“ကျွန်တော် အခုလေးတင် ဂိုဏ်း ရဲ့ အချက်အလက် တွေကို စစ်ဆေးကြည့်ပြီးပြီ... ကြယ် (၄) ပွင့် ဘက်စုံ ဂိုဏ်း အဖြစ် တက်လှမ်းဖို့ လိုအပ်ချက် တွေ အားလုံးနဲ့ ကိုက်ညီနေတာ တွေ့ရတယ်... ဒီနေ့ပဲ ကြယ်အဆင့် အကဲဖြတ်မှု အတွက် ကျောင်းယန် မြင့်မြတ်သော မြို့တော် ရဲ့ မြို့စားမင်း ဆီ သတင်းပို့လိုက်ပါတော့”

“ဟုတ်ကဲ့ပါရှင်”

ကုန်းချင်းချိုး အလွန် စိတ်လှုပ်ရှားသွားတော့သည်။

သူမသည် ရေပေါ် ဖြူ မြို့တော် ၏ အခြေအနေကို အစီရင်ခံပြီးနောက် မြူခိုးဂိုဏ်း ၏ ကြယ် (၄) ပွင့် အဆင့်သို့ တက်လှမ်းနိုင်ခြေ ကို ပြောပြရန် ရည်ရွယ်ထားခဲ့သော်လည်း၊ ယဲ့ဖုန်း က လိုအပ်သော အချက်အလက်များ အားလုံးကို ကြိုတင် ပြင်ဆင်ထားပြီး ဖြစ်လိမ့်မည်ဟု မမျှော်လင့်ထားခဲ့ချေ။

ထိုနေ့ မွန်းလွဲပိုင်းတွင်..

ကုန်းချင်းချိုး သည် သူမ၏ စိတ်လှုပ်ရှားမှုများကို သယ်ဆောင်ကာ အတွင်းတပည့် အကြီးအကဲ ဝမ်လင်း နှင့်အတူ ကျောင်းယန် မြင့်မြတ်သော မြို့တော် ၏ မြို့စားမင်း ကို သွားရောက် တွေ့ဆုံခဲ့၏။

မြူခိုးဂိုဏ်း သည် ကြယ် (၄) ပွင့် အဆင့် အင်အားစု အကဲဖြတ်မှုကို ခံယူမည်ဟု ကြားသိရသောအခါ၊ ကျောင်းယန် မြင့်မြတ်သော မြို့တော် ၏ မြို့စားမင်း ကိုယ်တိုင် အဖွဲ့ကို ဦးဆောင်၍ လာရောက်ခဲ့၏။

*

မြူခိုးတောင်ထွတ်၊ ဂိုဏ်းချုပ် ၏ ခန်းမဆောင်ကြီးဝယ်..

“ယဲ့ ဧကရာဇ် ကို ဂါရဝပြုပါတယ်”

ကျောင်းယန် မြင့်မြတ်သော မြို့တော် ၏ မြို့စားမင်း သည် တံခါးအပြင်ဘက်တွင် စောင့်ဆိုင်းနေပြီး အတွင်းသို့ မဝင်ရဲချေ။

သူ၏ နောက်တွင် ကျောင်းယန် မြင့်မြတ်သော မြို့တော် ၏ တရားစီရင်ပိုင်ခွင့် အတွင်းရှိ ကြယ် (၄) ပွင့် အဆင့် အကဲဖြတ်မှု များ အားလုံးကို အမြဲတမ်း တာဝန်ယူခဲ့ကြသော ဟင်းလင်းပြင်ဖြိုခွဲအဆင့် အကဲဖြတ်သူ ငါးဦး ရပ်နေကြ၏။

သူတို့သည် မြူခိုးဂိုဏ်း ကို အကဲဖြတ်ရမည်ဟု ကြားသိရသောအခါ စိတ်လှုပ်ရှားမှု နှင့် စိုးရိမ်မှု နှစ်မျိုးစလုံးကို ခံစားနေကြရ၏။

“အချိန်မဆွဲကြရအောင်... ဒီနေ့ပဲ အကဲဖြတ်မှုကို စလိုက်ကြပါစို့”

ယဲ့ဖုန်း အချိန် မဖြုန်းချင်တော့ချေ။

တပည့်များ နှင့် အကြီးအကဲ များ၏ ဂုဏ်သတင်း မှတ်တိုင်များ မှာ လိုအပ်သော အဆင့်များထက် များစွာ ကျော်လွန်နေပြီ ဖြစ်၏။

တတိယ မျိုးဆက် တပည့် များကိုလည်း အပြည့်အဝ စုဆောင်းထားပြီး ဖြစ်ကာ နေရာ တစ်သောင်းလုံး ပြည့်သွားပြီ ဖြစ်ပြီး ဤနှစ်အတွင်း တပည့်အသစ် ထပ်မံ ခေါ်ယူတော့မည် မဟုတ်ချေ။

ရေပေါ် ဖြူ မြို့တော် သည်လည်း ကြယ် (၃) ပွင့် အဆင့်သို့ မကြာသေးမီကမှ တက်လှမ်းခဲ့ပြီးလေပြီ။

ယခုအချိန်တွင် မြူခိုးဂိုဏ်း သည် ကြယ် (၄) ပွင့် အဆင့် အင်အားစု သို့ တက်လှမ်းသွားပါက၊ ဂိုဏ်းချုပ် ၏ ဆဋ္ဌမ အဆင့် တာဝန် ပြီးဆုံးသွားတော့မည် ဖြစ်၏။

“ကောင်းပါပြီ... ကျုပ်တို့ စတင်လိုက်ပါမယ်”

ကျောင်းယန် မြင့်မြတ်သော မြို့တော် ၏ မြို့စားမင်း သည် နောက်သို့ လှည့်ကာ အကဲဖြတ်သူ ငါးဦး ကို လက်ဝှေ့ယမ်း ပြလိုက်၏။ သူတို့သည် ကုန်းချင်းချိုး ၏ လမ်းညွှန်မှုဖြင့် မြူခိုးဂိုဏ်း တစ်ခုလုံး၏ ဘက်စုံ အကဲဖြတ်မှုကို ကပျာကယာ စတင်လိုက်ကြတော့သည်။

ဤတစ်ကြိမ်တွင် ယဲ့ဖုန်း မပါဝင်ခဲ့ချေ။

သူသည် အချက်အလက် များကို ကြိုတင် စစ်ဆေးပြီးပြီပင်။ မြူခိုးဂိုဏ်း ၏ လက်ရှိ စံနှုန်း များဖြင့် ဆိုပါက ရေပေါ် ဖြူ မြို့တော် သာ အဟန့်အတား မဖြစ်ခဲ့လျှင်၊ သူတို့သည် ကြယ် (၅) ပွင့် အဆင့် အင်အားစု အသိအမှတ်ပြု လက်မှတ် အတွက် လုံလောက်နေပြီ ဖြစ်သည်။ ကြယ် (၄) ပွင့် အဆင့် ဆိုသည်မှာ သာမန် လုပ်ထုံးလုပ်နည်း တစ်ခုမျှသာ ဖြစ်၏။

ဂိုဏ်း၏ ပင်မ ကွင်းပြင်ကျယ်ကြီး။

အကဲဖြတ်သူ ငါးဦး သည် ပြန်လည် ရောက်ရှိလာသော မြူခိုးဂိုဏ်း တပည့် တစ်သောင်းကျော် ကို ကြည့်လိုက်ရာ၊ မိုယင် နှင့် ဟိုယွင်ကျဲ ကဲ့သို့သော တပည့်များ အပြင်၊ မူလနတ်ဘုရားအဆင့် တပည့် စုစုပေါင်း အရေအတွက်မှာ တစ်ရာ နီးပါး ရှိနေကြောင်း တွေ့ရှိလိုက်ကြ၏။

မူလနတ်ဘုရားအဆင့် ရှိ အတွင်းတပည့် မည်သူမဆို သာမန် ကြယ် (၃) ပွင့် အဆင့် အင်အားစု တစ်ခုကို အလွယ်တကူ ဖိနှိပ်နိုင်စွမ်း ရှိ၏။

“အရမ်း အစွမ်းထက်တာပဲ”

“မြူခိုးဂိုဏ်း ဟာ အဆင့်တွေကို ကျော်ပြီး ကြယ် (၅) ပွင့် အဆင့် အင်အားစု အသိအမှတ်ပြု လက်မှတ် ကို တိုက်ရိုက် လျှောက်ထားလို့ ရတယ်လို့ ကျွန်တော် ယုံကြည်တယ်”

“ငါတို့က ကျောင်းယန် မြင့်မြတ်သော မြို့တော် က လာတာ... မြင့်မြတ်သော မြို့တော် က ကြယ် (၅) ပွင့် အဆင့် အင်အားစု တစ်ခုပဲ ဖြစ်လို့ တခြား ကြယ် (၅) ပွင့် အဆင့် ကို အကဲဖြတ်ဖို့ အရည်အချင်း မရှိဘူး... မြင့်မြတ်သော နယ်မြေ တွေ က လူတွေပဲ အဲဒီလို အကဲဖြတ်ဖို့ အရည်အချင်း ရှိတာ”

“ဒါ့အပြင် ရေပေါ် ဖြူ မြို့တော် က ကြယ် (၄) ပွင့် မြို့တော် အဆင့် ကို မရောက်သေးဘူးလေ... အဲဒါက သတ်မှတ်ချက်တွေနဲ့ မကိုက်ညီသေးဘူး”

အကဲဖြတ်သူ ငါးဦး မှာ မြူခိုးဂိုဏ်း ၏ နက်ရှိုင်းလှသော အခြေခံ အုတ်မြစ်များ ကြောင့် လွှမ်းမိုးခံလိုက်ရပြီး သူတို့အချင်းချင်း မနေနိုင်ဘဲ ဆွေးနွေးနေကြတော့သည်။

ခဏတာမျှ သူတို့ အကဲဖြတ်မှု ပြုလုပ်ရန်ပင် မေ့သွားခဲ့ကြတော့၏။

--