အခန်း ၉၁၈

အခန်း (၉၁၈) - မြေကမ္ဘာ အင်မော်တယ် စံအိမ်၏ ဆယ်စုနှစ်များစွာ ကြာပြီးနောက် အသွင်ပြောင်းလဲမှု

ခွန်းလင် ဝိညာဉ် အသိုက်ကြီး ပေါ်ထွက်လာခဲ့သည်မှာ နှစ်ဆယ့်သုံးနှစ် တိတိ ကြာမြင့်ခဲ့ပြီ။

တာအိုသခင်ကြီး ဟုန်ယွဲ့သည် အဆင့်ခြောက် အဆင့်နိမ့် မိစ္ဆာသခင်တစ်ပါးနှင့် မှော်စွမ်းအင်များ ဖလှယ်ကာ အပြင်းအထန် တိုက်ခိုက်နေ၏။ သူက ဟင်းလင်းပြင်၏ အပေါ်ယံအလွှာများဆီသို့ ဆုတ်ခွာသွားချိန် နောက်ကျောဘက်မှ ပုန်းကွယ်နေသော အဆင့်မြင့် မှော်လက်နက်တစ်ခု ရုတ်တရက် ဝှက်တိုက်လာသည်။ ဤမှော်လက်နက်၏ ခြိမ်းခြောက်မှုကို တာအိုသခင်ကြီး ဟုန်ယွဲ့က စောစောကတည်းက ကြိုတင် အာရုံခံမိခဲ့သော်လည်း ဤအချိန်တွင်မူ သူ လုံးဝ ရှောင်တိမ်းနိုင်စွမ်း မရှိတော့ချေ။

အဆင့်ခြောက် အဆင့်နိမ့် မိစ္ဆာသခင်၏ အခွင့်ကောင်းယူ တိုက်ခိုက်လိုက်သော တိုက်ကွက်တစ်ကွက်ကို အလူးအလဲ ခံလိုက်ရပြီးနောက် တာအိုသခင်ကြီး ဟုန်ယွဲ့က ကိုယ်ကို ဖျတ်ခနဲ လှည့်ကာ သူ၏ ပုဆိန်ကြီးဖြင့် ခုတ်ချလိုက်သည်။

"ဒုန်း..."

အရှိန်ပြင်းပြင်း ဝင်ရောက်လာသော လက်နက်မှာ အပ်သဏ္ဌာန် အဆင့်မြင့် မှော်လက်နက်တစ်ခုပင်။ တာအိုသခင်ကြီး ဟုန်ယွဲ့၏ ပုဆိန်ချက်နှင့် ထိမိသောအခါ ဆံချည်မျှင် ပမာဏ အပ်ကလေးများကဲ့သို့ ပေါက်ကွဲထွက်သွားတော့သည်။

တာအိုသခင်ကြီး ဟုန်ယွဲ့၏ မျက်နှာအမူအရာက ရုတ်တရက် ပျက်ယွင်းသွား၏။ အလျင်အမြန်ပင် ဟင်းလင်းပြင်ကို တုန်ခါသွားစေရန် သူ၏ ချီစွမ်းအင်များကို လှုံ့ဆော်လိုက်ပြီး ဝင်ရောက်လာသော တိုက်ခိုက်မှုအများစုကို ကာကွယ်ပိတ်ဆို့လိုက်သည်။

သို့သော်လည်း သေးငယ်သော အပ်အချို့က သူ၏ ခန္ဓာကို ရစ်ပတ်ထားသော ချီစွမ်းအင် အကာအကွယ်သို့ ထိခတ်လာသည်။ ထိုမျှမက သူ၏ အလယ်အလတ်အဆင့် မှော်လက်နက် ဝတ်ရုံကိုပါ ဖောက်ထွင်းပြီး သူ၏ ကိုယ်တွင်းသို့ စိုက်ဝင်သွားကြသည်။

"ဝှီး..."

အလွန်အမင်း ပြင်းထန်သော အအေးဓာတ်တစ်ခုက ကိုယ်တွင်းမှ ပေါက်ကွဲထွက်လာ၏။ ရုတ်ချည်းပင် အပြာရောင် နှင်းခဲလွှာတစ်ခုက တာအိုသခင်ကြီး ဟုန်ယွဲ့ကို လွှမ်းခြုံသွားပြီး သူ၏ လှုပ်ရှားမှုများနှင့် အတွေးများ နှစ်ခုစလုံး သိသိသာသာ နှေးကွေးသွားရသည်။

တာအိုသခင်ကြီး ဟုန်ယွဲ့က ဒေါသတကြီး ဟိန်းဟောက်လိုက်သည်။

"ဘယ်က လူယုတ်မာကများ ဒီလိုအချိန်ကြီး ငါ့ကို ဝှက်တိုက်ဖို့ သတ္တိရဲနေရတာလဲ..."

ဒါက လူသားမျိုးနွယ် တာအိုသခင်ကြီး တစ်ပါး၏ တိုက်ခိုက်မှုပင်။

သို့သော် ထိုသူက ကိုယ်ထင်ပြခြင်း ၊ တုံ့ပြန်ခြင်း လုံးဝ မရှိခဲ့ချေ။

မဆိုင်းမတွပင် တာအိုသခင်ကြီး ဟုန်ယွဲ့နှင့် ယခုလေးတင် တိုက်ခိုက်နေခဲ့သော မိစ္ဆာသခင်က အခွင့်အရေးကို အရယူကာ ဝမ်းသာအားရဖြင့် ထပ်မံ တိုက်ခိုက်လိုက်ပြန်သည်။ ထိုတိုက်ကွက်ကြောင့် တာအိုသခင်ကြီး ဟုန်ယွဲ့မှာ သွေးတစ်ပွက် အန်ချကာ အဟုန်ပြင်းစွာ ပစ်လွင့်သွားတော့သည်။

တစ်ချိန်တည်းမှာပင် တာအိုသခင်ကြီး ဟုန်ယွဲ့၏ နောက်ကျောဘက်မှ သေစေနိုင်သော အခြား ခြိမ်းခြောက်မှုတစ်ခု ရောက်ရှိလာပြန်၏။

"ဝုန်း..."

‘မကောင်းတော့ဘူး’

တာအိုသခင်ကြီး ဟုန်ယွဲ့ မဆိုင်းမတွပင် ဟင်းလင်းပြင်၏ အဟန့်အတားများကို ချိုးဖောက်ပြီး ဟင်းလင်းပြင်၏ ပိုမို နက်ရှိုင်းသော အလွှာများဆီသို့ ထွက်ပြေးရန် ရွေးချယ်လိုက်သည်။

တာအိုသခင်ကြီး ဟုန်ယွဲ့ကို ဟင်းလင်းပြင် စတုတ္ထအလွှာဆီသို့ တွန်းပို့လိုက်ပြီးမှသာ အနက်ရောင်ဝတ်ရုံအောက်တွင် ပုန်းကွယ်နေသော ပုံရိပ်တစ်ခုက လှည့်ကာ တိတ်ဆိတ်စွာ ထွက်ခွာသွားတော့သည်။

"ဟင်းလင်းပြင် စတုတ္ထအလွှာထဲ ရောက်သွားပြီဆိုတော့ အဲဒီလူ သေချာပေါက် သေသွားလောက်ပြီ..."

"ဒီမျိုးဆက်သစ်လေး မရှိတော့ရင် မြေကမ္ဘာ အင်မော်တယ် စံအိမ်နဲ့ တာ့ချန်အင်မော်တယ်မဟာမိတ်အဖွဲ့က စိုးရိမ်စရာ ဘာမှမရှိတော့ဘူး..."

အပြင်ဘက်တွင်မူ လော့ချန်ယွီ၊ တာအိုဆရာမ ချင်းချွမ်၊ မာထျန်းလင်၊ လုံယီရန်နှင့် အခြားသူများက ချန်ကု အင်မော်တယ်မြို့တော်မှ ကျင့်ကြံသူအုပ်စုကြားတွင် စုဝေးနေကြသည်။

သူမတို့က ချန်ကု အင်မော်တယ်မြို့တော်မှ ပါရမီရှင်များနှင့်အတူ ခွန်းလင် ဝိညာဉ် အသိုက်ထဲသို့ ဝင်ရောက်ရန် အခွင့်အရေးကို ရှာဖွေနေကြခြင်းပင်။

သို့တိုင် ပင်လယ်နယ်မြေ တစ်ခုလုံး အနှံ့အပြားတွင် လူသားမျိုးနွယ်၊ မိစ္ဆာမျိုးနွယ်နှင့် ပင်လယ်မျိုးနွယ်တို့ အားလုံးက ဖရိုဖရဲ စစ်ပွဲကြီး တစ်ခုထဲတွင် ရောထွေးရှုပ်ယှက်ခတ်နေကြသည်။

မိစ္ဆာ ကျင့်ကြံသူများနှင့် ဗုဒ္ဓကျင့်စဉ် လိုက်စားသူများက လူသားမျိုးနွယ်၏ အဖြူရောင် လမ်းစဉ် အင်မော်တယ်ဂိုဏ်းများနှင့် ထိပ်တိုက်ရင်ဆိုင်နေကြပြီး စစ်မြေပြင် တစ်ခုလုံးက လုံးဝကို ရှုပ်ပွနေတော့သည်။

အစွမ်းထက်သော ပင်လယ်မျိုးနွယ် သက်ရှိတစ်ဦး၏ တိုက်ခိုက်မှုနှင့် ရင်ဆိုင်ရချိန်တွင် လော့ချန်ယွီ၊ တာအိုဆရာမ ချင်းချွမ်၊ မာထျန်းလင်၊ လုံယီရန်နှင့် အခြားသူများက ထိုနေရာမှ ပြန့်ကျဲကာ ထွက်ပြေးခဲ့ကြရ၏။

သူတို့ သတိပြန်လည်လာချိန်တွင် အခြားသူများ ဘယ်ရောက်သွားမှန်း လိုက်ရှာ၍ မတွေ့နိုင်တော့ချေ။

ကံကောင်းစွာဖြင့်ပင် မြေကမ္ဘာ အင်မော်တယ် စံအိမ်မှ အဖွဲ့တွင် စုယွီ ချန်ထားရစ်ခဲ့သော ဟင်းလင်းပြင် အဆောင်လက်ဖွဲ့ မြောက်မြားစွာ ရှိနေသည်။ ကြေးမုံလမင်း အဆောင်လက်ဖွဲ့ဖြစ်စေ လခြမ်း အဆောင်လက်ဖွဲ့ဖြစ်စေ အဆင့်လေးနှင့် အဆင့်ငါး ဟင်းလင်းပြင် နေရာရွှေ့ပြောင်း အဆောင်လက်ဖွဲ့များဖြစ်စေ သူတို့၏ လက်ထဲတွင် အများအပြား ရှိနေကြ၏။

ဤအဆောင်လက်ဖွဲ့များဖြင့် လော့ချန်ယွီနှင့် အခြားသူများက အန္တရာယ်များကို ဘေးကင်းလုံခြုံမှု အဖြစ်သို့ အကြိမ်ကြိမ် ပြောင်းလဲနိုင်ခဲ့ကြသည်။

ခွန်းလင် ဝိညာဉ် အသိုက် ပေါ်ထွက်လာပြီး နှစ်ပေါင်း သုံးဆယ်ကျော် အကြာတွင် လော့ချန်ယွီက အခွင့်အရေး တစ်ခုကို ကိုယ်တိုင် ရှာတွေ့ခဲ့သည်။ ပင်လယ်သားရဲ တစ်ကောင်၏ ဗိုက်ထဲသို့ ခိုးဝင်ကာ ခွန်းလင် ဝိညာဉ် အသိုက် နယ်မြေထဲသို့ ဝင်ရောက်သွားခဲ့ခြင်းပင်။

ခွန်းလင် ဝိညာဉ် အသိုက်၏ နယ်ပယ်ထဲသို့ သူမ အောင်မြင်စွာ ခိုးဝင်သွားနိုင်ခဲ့သည်။

ထိုအချိန်တွင် မာထျန်းလင်နှင့် တာအိုဆရာမ ချင်းချွမ်တို့ လူသားမျိုးနွယ် ကျင့်ကြံသူများ၏ တိုက်ခိုက်မှုများကို နှစ်ကြိမ်တိုင်တိုင် ကြုံတွေ့ခဲ့ရသည်။ တာအိုဆရာမ ချင်းချွမ်က ထွက်ပြေးရန် ဟင်းလင်းပြင် အဆောင်လက်ဖွဲ့ကို အသုံးပြုခဲ့ပြီး ရွှမ်ထျန်း အင်မော်တယ်မြို့တော်ဆီသို့ လမ်းကြောင်းရှာကာ ပြန်သွားခဲ့၏။

မာထျန်းလင်ကမူ ချုံခိုတိုက်ခိုက်ခံရချိန်တွင် ပြင်းထန်သော ခွန်အားများ ပေါက်ကွဲထွက်လာစေခဲ့သည်။

ကြေးမုံလမင်း အဆောင်လက်ဖွဲ့ကို အသုံးပြုကာ သူမကို တိုက်ခိုက်လာသော ဝိညာဉ်ခွဲထွက်အဆင့် အစောပိုင်း အရှင်သခင်ကို ခေတ္တမျှ ချုပ်နှောင်ထားလိုက်သည်။ သူမ၏ ကိုယ်ပေါ်တွင် ညှို့ယူဖမ်းစားနိုင်သော အရှိန်အဝါများ လွှမ်းခြုံသွားပြီး သူမ၏ ဝိညာဉ်ခန္ဓာ စွမ်းအားများကို အသက်သွင်းလိုက်၏။

သူမ၏ လက်ထဲတွင် အေးစက်သော အလင်းတန်းတစ်ခု တောက်ပသွားသည်။

အလယ်အလတ်အဆင့် မှော်လက်နက် ဓားပျံ တစ်လက် အလျင်အမြန် ခုတ်ပိုင်းထွက်သွားတော့သည်။

ကြေးမုံလမင်း အဆောင်လက်ဖွဲ့က ဝိညာဉ်ခွဲထွက်အဆင့် အစောပိုင်း အရှင်သခင်ကို ချုပ်နှောင်ထားသည့် အခိုက်အတန့်တွင် သူမ၏ ဝိညာဉ်ခန္ဓာ စွမ်းအားကြောင့် တိုက်ခိုက်သူ၏ မူလဝိညာဉ်မှာ အာရုံလွင့်ပါးသွားရသည်။ ထိုသူ၏ စိတ်အာရုံက မာထျန်းလင်၏ ဝိညာဉ်ခန္ဓာ အရှိန်အဝါဆီသို့ အမှန်တကယ် ဆွဲဆောင်ခံလိုက်ရပြီး ထိုစက္ကန့်ပိုင်းလေး အတွင်းမှာပင် သတိလက်လွတ်ဖြင့် မာထျန်းလင်ကို ငေးမောကြည့်နေမိတော့၏။

"ရွှစ်..."

မာထျန်းလင်၏ အလယ်အလတ်အဆင့် မှော်လက်နက် ဓားပျံက လေထုကို ခွဲထုတ်သွားပြီး သူမ၏ ပြိုင်ဘက်ကို ခေါင်းဖြတ်လိုက်သည်။ သူမက ပြိုင်ဘက်၏ မူလဝိညာဉ်ကိုလည်း အပြင်းအထန် ဒဏ်ရာရသွားစေခဲ့၏။

ဝိညာဉ်ခွဲထွက်အဆင့် အစောပိုင်း အရှင်သခင်၏ မူလဝိညာဉ် ဒဏ်ရာရသွားသည်နှင့် တစ်ပြိုင်နက် သူ၏ အသိစိတ်က ပြင်းထန်သော တုန်လှုပ်မှုအောက်တွင် ချာချာလည်သွား၏။

ထိုစဉ် ညှို့ယူဖမ်းစားနိုင်သော အရှိန်အဝါတစ်ခုက အလျင်အမြန် ကျူးကျော်ဝင်ရောက်လာကာ သူ၏ စိတ်အာရုံကို လုံးလုံးလျားလျား ဖမ်းယူထိန်းချုပ်လိုက်တော့သည်။

သူမ ပြိုင်ဘက်၏ မူလဝိညာဉ်ကို သူမ၏ ဝိညာဉ်ခန္ဓာက ထိန်းချုပ်ထားသည်ကို မြင်သောအခါ မာထျန်းလင်က ချက်ချင်း လက်ယမ်းကာ ဖမ်းဆုပ်လိုက်သည်။ ထို့နောက် သူမက အဆင့်ငါး အဆင့်နိမ့် ဟင်းလင်းပြင် နေရာရွှေ့ပြောင်း အဆောင်လက်ဖွဲ့ကို ထုတ်ယူလိုက်၏။

အဆောင်လက်ဖွဲ့ကို အသက်သွင်းလိုက်သည်နှင့် မာထျန်းလင်က အမြင်အာရုံထဲမှ ပျောက်ကွယ်သွားတော့သည်။

အဝေး တစ်နေရာတွင် မူလဝိညာဉ်အဆင့် နဝမအလွှာတွင် ရှိနေသော မာထျန်းလင်က ဝိညာဉ်ခွဲထွက်အဆင့် ဒုတိယအဆင့် အရှင်သခင် တစ်ဦးကို သတ်ဖြတ်လိုက်သည်ကို မြင်လိုက်ရသော ပါရမီရှင် လူငယ်လေး တစ်ဦးမှာ တုန်လှုပ်သွားခဲ့သည်။ ထိုလုပ်ငန်းစဉ်တွင် အဆောင်လက်ဖွဲ့များ၏ စွမ်းအားကို အသုံးပြုခဲ့သော်လည်း ၎င်းက မာထျန်းလင်၏ မိစ္ဆာဆန်သော ပါရမီနှင့် ခွန်အားကို မီးမောင်းထိုးပြနေဆဲပင်။

မူလဝိညာဉ်အဆင့် အရှင်သခင် တစ်ပါးက ဝိညာဉ်ခွဲထွက်အဆင့် အရှင်သခင် တစ်ဦးနှင့် ရင်ဆိုင်ရချိန်တွင် သူတို့ကို သတ်ဖြတ်ရန် ဝေးစွ။ သူတို့လက်ထဲမှ လွတ်မြောက်ရုံမျှဖြင့်ပင် အလွန် ထူးခြားနေပြီ ဖြစ်သည်။

ဝိညာဉ်ခွဲထွက်အဆင့် ပထမအဆင့် အရှင်သခင်နှင့် ထိပ်တိုက်ရင်ဆိုင်နိုင်ခြင်းကပင် မိစ္ဆာဆန်နေပြီ မဟုတ်ပါလား။

ဝိညာဉ်ခွဲထွက်အဆင့် အရှင်သခင်ကို ပြောင်းပြန် လှန်၍ သတ်ဖြတ်နိုင်ခြင်းကတော့...

ကျင့်ကြံခြင်း ကမ္ဘာ တစ်ခုလုံးတွင် ထိုသို့ လုပ်နိုင်သူ အလွန် ရှားပါးလှသည်။

လူငယ်လေးက မာထျန်းလင် နေရာရွှေ့ပြောင်းသွားသည်ကို ကြည့်ရင်း သူ၏ ခြေလှမ်းများကို ရပ်တန့်လိုက်သည်။ သူ၏ စိတ်ဝင်စားမှုက အထွတ်အထိပ်သို့ ရောက်သွားပြီး တီးတိုးရေရွတ်လိုက်၏။

'ဒီနတ်မိမယ်လေးက ဘယ်သူများလဲ...'

'အောက်ဘက် ကျင့်ကြံခြင်း ကမ္ဘာ ကနေ ဒီလောက် အံ့မခန်း ပါရမီရှင် ထွက်ပေါ်လာတယ်ဆိုတာ ငါ ဘယ်လိုလုပ် မကြားမိရတာလဲ...'

'ခုနက အရှိန်အဝါ... အဲဒါ သေချာပေါက် ဝိညာဉ်ခန္ဓာပဲ...'

ခဏတာ တွေးတောလိုက်ပြီးနောက် လူငယ်လေး၏ မျက်နှာပေါ်တွင် အပြုံးရ်ိပ် တစ်ခု ပေါ်လာသည်။ ထိုနတ်မိမယ်လေးကို ရှာဖွေရန် သူ၏ အဆင့်အတန်းဖြင့်ဆိုလျှင် ခက်ခဲမည်မဟုတ်ကြောင်း ပါရမီရှင် လူငယ်လေး သိထား၏။ သူက အောက်ဘက် ဒေသများရှိ အင်မော်တယ်ဂိုဏ်းငယ်လေးများမှတစ်ဆင့် ရှာဖွေရန် အမိန့်ပေးလိုက်ရုံသာ။

နတ်မိမယ်လေး၏ ပါရမီဖြင့်ဆိုလျှင် ရှေးဟောင်း နယ်မြေများတွင် လေ့ကျင့်သင်ကြားပေးရန် ထိုက်တန်ပေသည်။

...

ရွှမ်ထျန်း အင်မော်တယ်မြို့တော် အတွင်း၌

တာအိုသခင်ကြီး ကျိုလင်က တာအိုဆရာမ ချင်းချွမ်နှင့် လုံယီရန်တို့ အပါအဝင် မြေကမ္ဘာ အင်မော်တယ် စံအိမ်မှ ကျန်ရစ်သူ အဖွဲ့ဝင်များကို စုစည်းလိုက်သည်။ သို့သော် လော့ချန်ယွီနှင့် မာထျန်းလင် နှစ်ဦးစလုံး မရှိသည်ကို မြင်သောအခါ တာအိုဆရာမ ချင်းချွမ်၏ မျက်နှာအမူအရာက အနည်းငယ် ပြောင်းလဲသွား၏။

လော့ချန်ယွီနှင့် မာထျန်းလင်တို့ကို မြင်မိသလားဟု သူမက အခြားသူများကို အလျင်စလို မေးမြန်းလိုက်၏။ သို့သော်လည်း ရလဒ်အနေဖြင့် မည်သူမျှ သူတို့ကို မမြင်တွေ့ခဲ့ကြပါ။