အခန်း ၉၂၆

အခန်း (၉၂၆) - မြေကမ္ဘာအင်မော်တယ်စံအိမ်သို့ အပြန်၊ လွှမ်းမိုးနေသော သတ်ဖြတ်လိုစိတ်များ (အပိုင်း-၂)

စုယွီက ခေါင်းညိတ်ပြကာ အတည်ပြုလိုက်သည်။

"ဟင်းလင်းပြင် တာအို စွမ်းအားကို နားလည်ထားတဲ့ တခြားသူ မရှိဘူးဆိုရင်တော့... ခင်ဗျား ပြောတဲ့သူက ကျွန်တော်ပဲ ဖြစ်လိမ့်မယ်"

ထိုစကားကြောင့် မျက်နှာချင်းဆိုင်ရှိ ယွီလုံနန်းတော်မှ ဝိညာဉ်ခွဲထွက်အဆင့် နှောင်းပိုင်း အရှင်သခင်၏ မျက်နှာအမူအရာ အနည်းငယ် ပျက်ယွင်းသွားတော့၏။

ပြီးခဲ့သော နှစ်ကာလများအတွင်း မြေကမ္ဘာအင်မော်တယ်စံအိမ်မှာ မဟာ အပြောင်းအလဲကြီးများနှင့် ရင်ဆိုင်ခဲ့ရသည်။ မိုးကြိုးနဂါး အင်မော်တယ်မင်းဆက်နှင့် တာ့ယန် အင်မော်တယ်မင်းဆက် တို့၏ ပူးပေါင်းတိုက်ခိုက်မှုအောက်တွင် အသေအပျောက် အထိအခိုက် များစွာဖြင့် တစ်ဆင့်ပြီးတစ်ဆင့် ဆုတ်ခွာနေခဲ့ရရှာသည်။

သို့ဖြစ်သော်ငြားလည်း ဟင်းလင်းပြင် တာအို စွမ်းအားကို နားလည်ထားသည် ဆိုသော ထိုကောလာဟလထဲက ပါရမီရှင်ကိုမူ မည်သူမျှ အရိပ်အယောင်ပင် မမြင်ခဲ့ရချေ။

မြေကမ္ဘာအင်မော်တယ်စံအိမ်တွင် ဤသို့သော လူ တစ်ယောက် ရှိနေကြောင်းကိုပင် သူ မေ့လျော့နေခဲ့လေပြီ။

ထိုအကြောင်းကို တွေးတောမိပြီးနောက် သူက မျက်မှောင်ကြုတ်လျက် စုယွီအား စူးစိုက်ကြည့်ကာ စုံစမ်းလိုက်၏။ "တာအိုမိတ်ဆွေ... ဒီတစ်ကြိမ် ငါတို့ ယွီလုံနန်းတော်ရဲ့ အင်မော်တယ်မြို့တော်ကို အတင်းအကျပ် ဝင်လာရတဲ့ အကြောင်းရင်းက ဘာများလဲ"

စုယွီက တည်ငြိမ်စွာပင် တုံ့ပြန်လိုက်၏။ "ကျွန်တော့်ဘက်က တာအိုမိတ်ဆွေဆီ အကူအညီတောင်းချင်တဲ့ ကိစ္စနှစ်ခု ရှိနေလို့ပါ"

"ပထမအချက်... ကျွန်တော် တံခါးပိတ်ကျင့်ကြံနေတဲ့ အချိန်အတွင်းမှာ မြေကမ္ဘာအင်မော်တယ်စံအိမ်ကို ဘာတွေဖြစ်သွားခဲ့သလဲ ဆိုတာ သိချင်တယ်"

"ဒုတိယအချက်ကတော့... တာ့ချန်ကို ပြန်ဖို့ ယွီလုံနန်းတော်ရဲ့ နေရာရွှေ့ပြောင်း အခင်းအကျင်း လမ်းကြောင်းကို အသုံးပြုခွင့် တောင်းချင်ပါတယ်"

အကြောင်းမူကား ပြီးခဲ့သော နှစ်ကာလများအတွင်း ဤပါရမီရှင်တစ်ယောက် ထွက်မလာခဲ့ခြင်းမှာ တံခါးပိတ်ကျင့်ကြံနေခဲ့သောကြောင့်ပင် ဖြစ်ချေသည်။

ယွီလုံနန်းတော်မှ အရှင်သခင်မှာ ခေတ္တမျှ စဉ်းစားခန်းဝင်သွားပြီး သူ၏ အင်မော်တယ်အရှိန်အဝါ အရှိန်အဝါများကို တဖြည်းဖြည်း ရုပ်သိမ်းလိုက်၏။

ထို့နောက် အင်မော်တယ်မြို့တော်အတွင်း စုရုံးရောက်ရှိနေကြသော အခြားသူများကို လူစုခွဲကာ မိမိတို့၏ ကင်းတာဝန်များကို ဆက်လက် ထမ်းဆောင်ရန် အမိန့်ပေးလိုက်တော့သည်။

စုယွီ၏ လက်ရှိ အရှိန်အဝါကို တစ်ဖန် ပြန်လည် အကဲခတ်ကြည့်သောအခါ သူ၏ ဝိညာဉ်ခွဲထွက်အဆင့် နှောင်းပိုင်း ကျင့်ကြံမှုဖြင့်ပင် စုယွီ၏ အဆင့်အတန်းကို ထိုးထွင်း မမြင်နိုင်သေးချေ။

ထိုအချက်က သူ၏ ရင်ထဲတွင် ပို၍ပင် သတိထား စိုးရိမ်လာစေသည်။

ဒီပါရမီရှင်က နာမည်နဲ့ လိုက်အောင် တကယ်ကို အစွမ်းထက်လှပါလား...

'အရင်က ကြားဖူးတာတော့ သူ့ရဲ့ ကျင့်ကြံမှုက မူလဝိညာဉ်အဆင့်မှာပဲ ရှိသေးတယ် ဆိုတာပဲ... ဒီလောက် အချိန်အကြာကြီး တံခါးပိတ်ကျင့်ကြံပြီးတော့ အခုလေးတင် ငါ့ရဲ့ မဟာတာအို စွမ်းအား ဖိအားကိုတောင် လွယ်လွယ်ကူကူ ခုခံသွားနိုင်တယ်...'

'သူ ဝိညာဉ်ခွဲထွက်အဆင့်ကို တက်လှမ်းသွားပြီး ဟင်းလင်းပြင် တာအို အမှတ်အသားကိုပါ သေချာပေါက် ဆုပ်ကိုင်နိုင်သွားပြီလား...'

ယွီလုံနန်းတော် အရှင်သခင် စိတ်ဓာတ် ကျဆင်းသွားတော့၏။

အကယ်၍သာ ထိုအရာက အမှန်တကယ် ဖြစ်နေခဲ့မည်ဆိုလျှင် ဤလူကို လုံးဝ (လုံးဝ) ရန်မစသင့်တော့ချေ။

ယခုလေးတင် မိမိတို့၏ အင်မော်တယ်မြို့တော် အတွင်းသို့ မိမိအိမ်လို သဘောထားကာ အေးအေးဆေးဆေး ဝင်ရောက်လာနိုင်ခဲ့သည်။

မိမိ၏ ကိုယ်ပိုင် မဟာတာအို အမှတ်အသား စွမ်းအားကပင် တစ်ဖက်လူကို တစ်စက်ကလေးမျှ မတုန်လှုပ်စေနိုင်ခဲ့ပေ။

ဤ ဟင်းလင်းပြင် တာအို စွမ်းအားက ဤလူ မူလဝိညာဉ်အဆင့်တွင် ရှိနေစဉ်ကတည်းက သူတို့၏ ယွီလုံနန်းတော်၊ အင်မော်တယ်သောင်းချီ နန်းတော်နှင့် အခြားသော အင်မော်တယ်ဂိုဏ်း အင်အားစုများကို ကြီးမားသော ဆုံးရှုံးမှုများ ဖြစ်ပေါ်စေခဲ့ပြီးဖြစ်၏။

သေဆုံးဒဏ်ရာရသူ အရေအတွက်မှာ ရေတွက်၍ပင် မရနိုင်တော့ချေ။

‘အခု သူ ဝိညာဉ်ခွဲထွက်အဆင့်ကို ရောက်နေပြီ ဆိုတော့ ဘယ်လောက်တောင် ကြောက်စရာ ကောင်းနေမလဲ…’’

အကြီးအကဲ၏ မျက်နှာထက်တွင် ဖော်ရွေသော အပြုံးတစ်ခု ချက်ချင်း ပေါ်ပေါက်လာတော့သည်။ စုယွီက သူတို့ ယွီလုံနန်းတော်၏ အင်မော်တယ်မြို့တော်အတွင်းသို့ အတင်းအကျပ် ကျူးကျော်ဝင်ရောက်လာခဲ့သည် မှန်သော်လည်း သူက လှိုက်လှဲစွာ ကြိုဆိုသည့်ဟန် ပြသလိုက်လေ၏။

သူက ချိုသာစွာ ကတိပေးလိုက်သည်။ "ပြဿနာ မရှိပါဘူး တာအိုမိတ်ဆွေ... ခင်ဗျား သိချင်တာတွေ အကုန်လုံးကို ကျုပ် ပြောပြပေးပါ့မယ်... နေရာရွှေ့ပြောင်း အခင်းအကျင်း လမ်းကြောင်းကိုလည်း ခဏနေရင် အသုံးပြုလို့ ရပါပြီ"

ယွီလုံနန်းတော် အရှင်သခင်က မြေကမ္ဘာအင်မော်တယ်စံအိမ်တွင် နှစ်ကာလများစွာအတွင်း ဖြစ်ပျက်ခဲ့သမျှ အရာအားလုံးကို စုယွီအား အသေးစိတ် ရှင်းပြလေတော့သည်။

စုယွီက အချိန်ကြာမြင့်စွာ နားထောင်နေခဲ့ပြီး ကြားဖြတ်ပြောဆိုခြင်း ၊ ဒေါသတကြီး စိတ်လွတ်ကိုယ်လွတ် ဖြစ်သွားခြင်းမျိုး အလျဉ်းမရှိပေ။

သို့သော်ငြားလည်း ယခုအခါ မြေကမ္ဘာအင်မော်တယ်စံအိမ်၏ တိလင် (မြေကမ္ဘာ တောင်တန်း) အင်မော်တယ်မြို့တော် တစ်ခုတည်းသာ တောင့်ခံထားနိုင်တော့ကြောင်းနှင့် ကျန်ရှိသော အင်မော်တယ်မြို့တော်များ အားလုံးကို မိုးကြိုးနဂါး အင်မော်တယ်မင်းဆက်နှင့် တာ့ယန် အင်မော်တယ်မင်းဆက်တို့က သိမ်းပိုက်သွားပြီ ဖြစ်ကြောင်း ကြားလိုက်ရသောအခါ...

ထိုမျှမက သူ၏ စီနီယာ အစ်ကိုကြီး ဟုန်ယွဲ့ ပျောက်ဆုံးနေပြီး သူ၏ ဆရာဖြစ်သူမှာလည်း အပြင်းအထန် ဒဏ်ရာရရှိထားကြောင်း ကြားလိုက်ရချိန်တွင်မူ စုယွီ ဖိနှိပ်ထားသော အေးစက်စက် သတ်ဖြတ်လိုစိတ်များက နောက်ဆုံးတွင် ပေါက်ကွဲထွက်ပေါ်လာတော့၏။

"ကျေးဇူးတင်ပါတယ် တာအိုမိတ်ဆွေ..."

"ဒီ ဟင်းလင်းပြင် အဆောင်လက်ဖွဲ့လေးတွေက ကျွန်တော့်ရဲ့ ရိုင်းစိုင်းစွာ ဝင်ရောက်လာမှုအတွက် တောင်းပန်တဲ့အနေနဲ့ပါ... ခွင့်လွှတ်ပေးပါ"

စုယွီက အဆင့် (၅) အဆင့်နိမ့် ဟင်းလင်းပြင် မဟာရွှေ့ပြောင်းခြင်း အဆောင်လက်ဖွဲ့ ငါးခုကို ထုတ်ယူကာ ယွီလုံနန်းတော် အရှင်သခင်ထံသို့ ကမ်းပေးလိုက်သည်။

ထို့နောက် အပျက်အစီးနယ်မြေ၏ ပထမ အင်မော်တယ်မြို့တော်ရှိ ယွီလုံနန်းတော် နေရာရွှေ့ပြောင်း အခင်းအကျင်း စင်မြင့်ကို အသုံးပြုကာ တာ့ချန် ကျင့်ကြံခြင်းကမ္ဘာရှိ ယွီလုံနန်းတော် အင်မော်တယ်မြို့တော်ဆီသို့ ပြန်လည် ကူးပြောင်းသွားတော့၏။

ထိုမှတစ်ဆင့် ယွီလုံနန်းတော် အင်မော်တယ်မြို့တော်ရှိ နေရာရွှေ့ပြောင်း အခင်းအကျင်းကို ထပ်မံအသုံးပြုကာ အရှင်သခင်ဆယ်ပါး အင်မော်တယ်မြို့တော်ဆီသို့ ရောက်ရှိသွားလေသည်။

အရှင်သခင်ဆယ်ပါး အင်မော်တယ်မြို့တော်မှာ ပုံမှန်အတိုင်းပင် မည်သည့်အရာမျှ ထူးခြားနေပုံ မရချေ။

သို့သော် အင်မော်တယ်မြို့တော်၏ မဟာအခင်းအကျင်း အကာအကွယ်များကို အသက်သွင်းထားပြီး မြို့စောင့်တပ်ဖွဲ့များကလည်း တစ်နေ့တာလုံး ကင်းလှည့်ကာ သတိဝီရိယ အပြည့်ဖြင့် စောင့်ကြပ်နေကြ၏။

နေရာရွှေ့ပြောင်း အခင်းအကျင်း စင်မြင့်ပေါ်မှ စုယွီ ထွက်ပေါ်လာသည်နှင့် အရှင်သခင်ဆယ်ပါး အင်မော်တယ်မြို့တော် တစ်ခွင် လွှမ်းမိုးနေသော မသက်မသာ လေထုကို ခံစားလိုက်ရသည်။

မိမိကိုယ်ကို တာအိုဆရာအရိပ်နီ၏ ရုပ်သွင်သို့ ပြောင်းလဲလိုက်ပြီးနောက် အရှင်သခင်ဆယ်ပါး အင်မော်တယ်မြို့တော် အတွင်းရှိ မြေကမ္ဘာအင်မော်တယ်စံအိမ်၏ ယခင် ဌာနချုပ်ဆီသို့ တစ်လှမ်းချင်း လျှောက်လှမ်းသွားလိုက်သည်။

သို့သော် ယခုအခါ ဌာနချုပ်မှာ ချိတ်ပိတ်ခံထားရပြီး လူသူကင်းမဲ့ကာ ဟာလာဟင်းလင်း ဖြစ်နေချေပြီ။

ကိုးမြီး အရှင်သခင် ၏ အခြေအနေမှာလည်း မည်သို့ဖြစ်နေကြောင်း မသိရပေ။

ခေတ္တမျှ တွေးတောပြီးနောက် စုယွီက မြေကမ္ဘာအင်မော်တယ်စံအိမ်ဆီသို့ အလျင်စလို ပြန်မသွားသေးချေ။ အဘယ်ကြောင့်ဆိုသော် ယခုအခါ မြေကမ္ဘာအင်မော်တယ်စံအိမ်တွင် တိလင် (မြေကမ္ဘာ တောင်တန်း) အင်မော်တယ်မြို့တော် တစ်ခုတည်းသာ တောင့်ခံနေနိုင်တော့ပြီး နေရာရွှေ့ပြောင်း အခင်းအကျင်းများ အားလုံးမှာလည်း ချိတ်ပိတ်ဖျက်ဆီး ခံထားရပြီ ဖြစ်သောကြောင့်ပါ။

ထိုနေရာသို့ ပြန်သွားရန်အတွက် မြေကမ္ဘာအင်မော်တယ်စံအိမ်၏ လက်ရှိအခြေအနေကို သူ အသေအချာ နားလည်ထားရန် လိုအပ်သည်။

စုယွီ သတင်းပို့ တံဆိပ်ပြားတစ်ခုကို ထုတ်ယူကာ သတင်းစကား တစ်ခွန်း ပေးပို့လိုက်၏။

"ခင်ဗျားတို့ ဘယ်မှာပါလဲ"

ရုတ်ချည်းပင် တာအိုဆရာ ရှုယွီ၏ အသံက စိတ်လှုပ်ရှားမှုနှင့် စိုးရိမ်ပူပန်မှုများ ရောယှက်နေသော လေသံဖြင့် ထွက်ပေါ်လာတော့သည်။

"စံအိမ်သခင်... နောက်ဆုံးတော့ ပြန်ရောက်လာပြီပဲ"

တာအိုဆရာ ရှုယွီမှာ အရှင်သခင်ဆယ်ပါး အင်မော်တယ်မြို့တော်တွင် ရှိနေသည်။ ယခင်က ကောင်းကင် အပျက်အစီး ခန်းမကို ဦးဆောင်ကာ ယွဲ့အင်မော်တယ်မျှော်စင်သို့ ပူးပေါင်းခဲ့သော ကောင်းကင် အပျက်အစီး ခန်းမသခင်သည်ပင်လျှင် အရှင်သခင်ဆယ်ပါး အင်မော်တယ်မြို့တော် အတွင်း တည်ထောင်ထားသော ယွဲ့အင်မော်တယ်စံအိမ်၏ ဌာနချုပ်သစ်၌ ရောက်နေလေသည်။

စုယွီ၏ တာအိုရုပ်သေးက ဌာနချုပ်ရှိ ဂူစံအိမ်ဆီသို့ ရောက်ရှိသွားသောအခါ တာအိုဆရာ ရှုယွီနှင့် ကောင်းကင် အပျက်အစီး ခန်းမသခင် တို့က အလျင်အမြန် ရှေ့ထွက်လာကာ အရိုအသေပေး နှုတ်ဆက်ကြသည်။

"စံအိမ်သခင်..."

၎င်းမှာ ရိုးရှင်းသော တတိယအဆင့် ဂူစံအိမ်တစ်ခုမျှသာ ဖြစ်၏။ အခန်းအနည်းငယ်၊ ကျင့်ကြံရေး အခန်းများနှင့် ရှေ့ဘက် ခြံဝင်းငယ်လေး တစ်ခုသာ ပါဝင်ကာ သိပ်မခမ်းနားပေ။

စုယွီက ရှေ့ခြံဝင်းအတွင်းရှိ ကျောက်စားပွဲဘေးတွင် ဝင်ထိုင်လိုက်ပြီး မျက်မှောင်ကြုတ်လျက် မေးမြန်းလိုက်၏။ "မြေကမ္ဘာအင်မော်တယ်စံအိမ်ကို ဘာတွေ ဖြစ်သွားတာလဲ... ကျွန်တော့်ရဲ့ ဆရာရော ဘယ်လို အခြေအနေ ရှိနေပါသလဲ... ပြီးတော့ စီနီယာ အစ်ကိုကြီး ဟုန်ယွဲ့ ပျောက်နေတယ် ဆိုတာကရော ဘယ်လို ကိစ္စပါလဲ"

ကောင်းကင် အပျက်အစီး ခန်းမသခင်က တာအိုဆရာ ရှုယွီအား တစ်ချက် ကြည့်လိုက်ပြီးနောက် ကျောက်စိမ်းပြား တစ်ချပ်ကို ထုတ်ယူကာ စုယွီထံသို့ လေးစားစွာ ကမ်းပေးလိုက်သည်။

"စံအိမ်သခင်... ဒါက မြေကမ္ဘာအင်မော်တယ်စံအိမ်၊ မိုးကြိုးနဂါး အင်မော်တယ်မင်းဆက်နဲ့ တာ့ယန် အင်မော်တယ်မင်းဆက် တို့နဲ့ ပတ်သက်ပြီး ယွဲ့အင်မော်တယ်

မျှော်စင်ကနေ ဒီကာလတွေ တစ်လျှောက်လုံး စုဆောင်းထားတဲ့ သတင်းအချက်အလက်တွေပါ..."

မြေကမ္ဘာအင်မော်တယ်စံအိမ် ပြဿနာတက်နေကြောင်း သတင်းများ အပျက်အစီးတစ်ရာ ကျင့်ကြံခြင်းကမ္ဘာသို့ ပေါက်ကြားလာသည်နှင့် တပြိုင်နက် တာအိုဆရာ ရှုယွီက ကောင်းကင် အပျက်အစီး ခန်းမသခင်ကို မြေကမ္ဘာ

အင်မော်တယ်စံအိမ်၏ သတင်းအချက်အလက်များ စုဆောင်းရန် လူများကို ပြန်လည် ခေါ်ယူဖို့ ချက်ချင်း ညွှန်ကြားလိုက်သည်။

ထိုအရာအားလုံးက စုယွီ ပေါ်ထွက်လာမည့် အချိန်ကို စောင့်ဆိုင်းကာ စုယွီထံသို့ သတင်းအချက်အလက်များကို အချိန်မီ ပေးအပ်နိုင်ရန်အတွက်သာ ဖြစ်ချေသည်။

သို့သော် ဤသို့ စောင့်ဆိုင်းရမှုက နှစ်တစ်ရာတိုင်အောင် ကြာမြင့်သွားလိမ့်မည်ဟု သူတို့ အိပ်မက်ပင် မမက်ခဲ့ဖူးချေ။

စုယွီက ကျောက်စိမ်းပြားကို လှမ်းယူလိုက်ပြီး သူ၏ အသိစိတ်ကို အတွင်းသို့ တက်လှမ်းစေလိုက်သည်နှင့် သတင်းအချက်အလက် စီးကြောင်းများက သူ၏ ခေါင်းထဲသို့ အဆက်မပြတ် စီးဝင်လာတော့၏။

မြေကမ္ဘာအင်မော်တယ်စံအိမ်၊ မိုးကြိုးနဂါး အင်မော်တယ်မင်းဆက် နှင့် တာ့ယန် အင်မော်တယ်မင်းဆက်... ။

အဓိကအားဖြင့် ဤအင်အားစုကြီး သုံးခုကို ဗဟိုပြုကာ စုဆောင်းထားသော သတင်းအချက်အလက်များပင် ဖြစ်တော့သည်။