အခန်း ၉၂၉

အခန်း (၉၂၉) - ကုစားခြင်း..စတင် သုတ်သင်လေပြီ (အပိုင်း-၂)

စိမ်းပြာငရဲ အင်မော်တယ်နန်းတော်မှာ ကြီးစိုးသော စွမ်းအားရှင်များ ရှိကောင်း ရှိနေနိုင်ပေသည်။

သို့သော် ထိုမျှ အစွမ်းထက်သော တည်ရှိမှုကြီးများက သူတို့အောက်ရှိ မဖြစ်စလောက် အရေးမပါသော လက်အောက်ငယ်သားများကို ဘာကြောင့်များ အာရုံစိုက်နေမည်နည်း။

ဥပမာအားဖြင့် အင်မော်တယ် ဧကရာဇ်တစ်ပါးက စိတ်ကူးပေါက်ကာ အနာဂတ်တွင် ချီသန့်စင်ခြင်းအဆင့် ပုရွက်ဆိတ်လေး တစ်ကောင်က သူ့အတွက် အနည်းငယ် အနှောင့်အယှက် သို့မဟုတ် စော်ကားမှု ဖြစ်လာနိုင်ကြောင်း ကြိုတင်မြင်တွေ့သွားပြီး ထိုပုရွက်ဆိတ်လေးကို သုတ်သင်ရှင်းလင်းရန် ဆုံးဖြတ်လိုက်သလိုပင်။ သို့သော် ထိုမျှ သေးမွှားသော ချီသန့်စင်ခြင်းအဆင့် ပုရွက်ဆိတ်လေး တစ်ကောင်အတွက် ဧကရာဇ် ကိုယ်တိုင်က ဘာကြောင့်များ ကိုယ်ဖိရင်ဖိ ဆင်းပြီး အလုပ်ရှုပ်ခံနေမည်နည်း။

ထို့ကြောင့် သူ၏ လက်အောက်ငယ်သားများကို ထိုတာဝန်ကို ထမ်းဆောင်ရန် အမိန့်ပေးလိုက်မည်သာ။

သို့ရာတွင် ထိုလက်အောက်ငယ်သားများ ဆိုသည်မှာလည်း... အမှန်တကယ်တော့ သူတို့ကိုယ်ပိုင် လက်အောက်ငယ်သားများ ရှိနေကြပြန်၏။

ထို့ကြောင့် ထိုချီသန့်စင်ခြင်းအဆင့် ပုရွက်ဆိတ်လေး၏ ရှေ့မှောက်တွင် နောက်ဆုံး ပေါ်လာမည့်သူမှာ အဆင့်တူ ချီသန့်စင်ခြင်းအဆင့် ကျင့်ကြံသူ တစ်ဦးသာ ဖြစ်နေကောင်း ဖြစ်နေနိုင်၏။

သို့တည်းမဟုတ် အနည်းငယ် ပို၍ အစွမ်းထက်သော အုတ်မြစ်တည်ဆောက်ခြင်းအဆင့် ကျင့်ကြံသူ တစ်ဦးပင်။

ထိုအခါ တာအိုဆရာ ရှုယွီက တိုးညှင်းစွာ ရေရွတ်လိုက်သည်။

"စံအိမ်သခင်... မြေကမ္ဘာအင်မော်တယ်စံအိမ်ရဲ့ မကြာသေးမီက ကိစ္စရပ်တွေမှာ စိမ်းပြာငရဲ အင်မော်တယ်နန်းတော်က နောက်ကွယ်မှာ ပုန်းအောင်းနေပုံ ရပါတယ်..."

"စံအိမ်သခင်ရဲ့ လေးစားရတဲ့ ဆရာဖြစ်သူ ပြင်းပြင်းထန်ထန် ဒဏ်ရာရသွားရတဲ့ အကြောင်းရင်းကလည်း စိမ်းပြာငရဲ အင်မော်တယ်နန်းတော်ရဲ့ လက်ချက်ကြောင့် ဖြစ်ရပါမယ်..."

အချိန်အတော်ကြာ တိတ်ဆိတ်သွားပြီးနောက် စုယွီ၏ စိတ်ထဲတွင် အတွေးပေါင်းများစွာ ချာချာလည် တွေးတောနေမိတော့၏။

‘ဒီလိုဆိုရင်တော့...

ယွဲ့အင်မော်တယ်မျှော်စင် အနေနဲ့ စိမ်းပြာငရဲ အင်မော်တယ်နန်းတော်ကို ထိပ်တိုက် ရင်ဆိုင်ဖို့ဆိုတာ အချိန်အတော်ကြာ ယူရဦးမယ်... အချိန်တစ်ခုလောက် အထိတော့ ခေါင်းလျှိုပြီး အင်အားစုဆောင်း ကြီးထွားလာအောင် စောင့်ရဦးမှာပဲ...

ဒါ့အပြင် ဒီတစ်ကြိမ် မြေကမ္ဘာအင်မော်တယ်စံအိမ်ရဲ့ အကျပ်အတည်းကို ဖြေရှင်းဖို့ ဆိုရင်လည်း ကိုယ့်ရဲ့ အစစ်အမှန် သရုပ်မှန်ကို ထုတ်သုံးလို့ မဖြစ်သေးဘူး...

"သတင်းအချက်အလက်တွေကို ဆက်ပြီး စုဆောင်းထားကြပါ... ကျွန်တော် သွားရတော့မယ်..."

စုယွီ၏ တာအိုရုပ်သေး ထွက်ခွာသွားလေသည်။

နေရာရွှေ့ပြောင်း အခင်းအကျင်း လမ်းကြောင်းများ ဖျက်ဆီးခံလိုက်ရပြီ ဖြစ်သဖြင့် မြေကမ္ဘာ

အင်မော်တယ်စံအိမ်သို့ ပြန်ရန် တစ်ခုတည်းသော နည်းလမ်းမှာ မြေကမ္ဘာအင်မော်တယ်စံအိမ်၏ မူလပိုင်နက်နယ်မြေများကို ဖြတ်သန်းသွားရန်သာ ရှိတော့၏။

ကံကောင်းထောက်မစွာဖြင့် ဟင်းလင်းပြင် တာအို စွမ်းအားကို အသုံးပြု၍ ရွေ့လျားခဲ့သောကြောင့် မိုးကြိုးနဂါး အင်မော်တယ်မင်းဆက်နှင့် တာ့ယန် အင်မော်တယ်မင်းဆက်တို့ ထိန်းချုပ်ထားသော နယ်မြေများကို ဖြတ်ကျော်ကာ မြေကမ္ဘာအင်မော်တယ်စံအိမ်သို့ ပြန်လည်ရောက်ရှိရန် စုယွီအတွက် လဝက်ပင် မကြာလိုက်ပါ။

တစ်ချိန်တည်းမှာပင်

၊အပျက်အစီးနယ်မြေ အတွင်း၌

ယွဲ့အင်မော်တယ်စံအိမ် အင်မော်တယ်မြို့တော် အတွင်း၌ သိုင်းကျမ်းတစ်သောင်း မျှော်စင်ထဲမှ စုယွီ ထွက်လာခဲ့ပြီး မျက်ခုံးများ အနည်းငယ် တွန့်ချိုးထားလေသည်။

ဝိညာဉ်ခွဲထွက်အဆင့်သို့ တက်လှမ်းရန် တံခါးပိတ်ကျင့်ကြံနေချိန် အတွင်း မြေကမ္ဘာအင်မော်တယ်စံအိမ် ဤမျှလောက် ဘေးအန္တရာယ်ကြီးနှင့် ကြုံတွေ့ရလိမ့်မည်ဟု လုံးဝ မျှော်လင့်မထားခဲ့ချေ။

ဟုတ်သည်။ ကောင်းကင် သိုင်းကျမ်း မျှော်စင်မှ စီနီယာ အရှင်သခင် အန်းယွဲ့နှင့် နောက်ဆုံး တွေ့ဆုံခဲ့စဉ်က သူ့အား ကောင်းကင် သိုင်းကျမ်း မျှော်စင် အမှတ်အသားတံဆိပ်ပြား ပေးအပ်ခဲ့သည် ပဲ။

စုယွီ သတိရသွား၏။

ထိုစဉ်က အရှင်သခင်ကြီး အန်းယွဲ့က အကယ်၍ သူသာ ကျော်လွှားမရနိုင်သော ဘေးဒုက္ခကြီးတစ်ခုနှင့် ရင်ဆိုင်ရပါက ကောင်းကင် သိုင်းကျမ်း မျှော်စင်ထံမှ အကူအညီတောင်းခံရန် ထိုတံဆိပ်ပြားကို အသုံးပြုနိုင်ကြောင်း ပြောကြားခဲ့ဖူးသည်။

ထိုသို့ ဖြစ်လာခဲ့ပါက ချန်ကျိုး နယ်မြေရှိ ကောင်းကင် သိုင်းကျမ်း မျှော်စင်မှ တာအို သခင်ကြီးနှင့် စံအိမ်သခင်တို့ ကိုယ်တိုင် လာရောက်ကာ သူ၏ အသက်ကို ကာကွယ်ပေးမည်ဟူ၍ပင်။

ထိုအချိန်က ဤစကားများကို စုယွီက အလေးအနက် မထားခဲ့ချေ။

‘ဘာပဲဖြစ်ဖြစ် ကိုယ့်ကိုယ်ကို ဒီလောက် ဆိုးရွားလွန်းတဲ့ အခြေအနေမျိုးဆီ ရောက်သွားအောင် ဘယ်လိုလုပ် အဖြစ်ခံနိုင်ပါ့မလဲ’

သို့သော် ယခုအခါ စုယွီ၏ မျက်နှာက အနည်းငယ် လေးနက်သွားပြီး သူ၏ စိတ်ထဲတွင် တွေးတောလိုက်မိ၏။

'စီနီယာ အန်းယွဲ့ရဲ့ စကားတွေက ကြိုတင် နိမိတ်ပြ ဟောကိန်း

ထုတ်ထားတာများလား...'

‘စီနီယာ အန်းယွဲ့ရဲ့ ဘာတွေကိုများ တွက်ချက် ဟောကိန်းထုတ်ထားခဲ့တာလဲ’

ခေတ္တမျှ စဉ်းစားခန်းဝင်ပြီးနောက်

စုယွီက ခေါင်းကို ဖွဖွယမ်းလိုက်ပြီး ထိုအတွေးကို ဘေးဖယ်ထားလိုက်သည်။

မြေကမ္ဘာအင်မော်တယ်စံအိမ်ကို အကျပ်အတည်းထဲမှ ကယ်တင်နိုင်ရန် မိုးကြိုးနဂါး အင်မော်တယ်မင်းဆက်နှင့် တာ့ယန် အင်မော်တယ်မင်းဆက်တို့၏ ပူးပေါင်းထိုးစစ်များကို မည်သို့ တန်ပြန်တိုက်ခိုက်ရမည်နည်း။

သူ စတင် စဉ်းစားလိုက်တော့သည်။

ပထမ အချက်အနေဖြင့် ရှင်းလင်းနေသည်မှာ ကောင်းကင်ပင့် ရွှေချို ဆုတောင်းဆင်ကြီး၏ အထောက်အပံ့နှင့်အတူ တာ့ချန် ကျင့်ကြံခြင်းကမ္ဘာမှ တာအို သခင်ကြီးများ၏ စုပေါင်းအင်အားတို့ကြောင့် မြေကမ္ဘာအင်မော်တယ်စံအိမ်၏ ထိပ်တန်း အင်အားစု အဆင့်အတန်းမှာ အားနည်းချက် မရှိပေ။

ဒုတိယ အချက်ကတော့ မြေကမ္ဘာအင်မော်တယ်စံအိမ် ဆက်တိုက် ရှုံးနိမ့်နေရခြင်းမှာ ကျင့်ကြံသူများ အကြီးအကျယ် ဆုံးရှုံးသွားသောကြောင့် ဤမျှ ကျယ်ပြောလှသော နယ်မြေများကို မကာကွယ်နိုင်တော့ခြင်းပင်။

အခြေအနေကို ပြောင်းပြန်လှန်ပစ်ရန် အတွက်။

ပထမဦးစွာ မိုးကြိုးနဂါး အင်မော်တယ်မင်းဆက်နှင့် တာ့ယန် အင်မော်တယ်မင်းဆက်တို့မှ တာအို သခင်ကြီးများကို ထိတ်လန့်ကြောက်ရွံ့သွားစေရန် လိုအပ်သည်။ ပတ်ဝန်းကျင်ရှိ အင်အားစု အားလုံးကို ဟန့်တားကာ မြေကမ္ဘာအင်မော်တယ်စံအိမ်၏ ကြောက်မက်ဖွယ် ဂုဏ်သတင်းကို ပြန်လည် တည်ဆောက်ရန်အတွက် အချို့ကို သတ်ဖြတ်ပစ်ရမည်။

ဒုတိယအနေဖြင့် မြေကမ္ဘာအင်မော်တယ်စံအိမ်၏ နယ်မြေများကို ဆက်လက် မခြိမ်းခြောက်နိုင်စေရန် မိုးကြိုးနဂါး အင်မော်တယ်မင်းဆက်နှင့် တာ့ယန် အင်မော်တယ်မင်းဆက်တို့၏ တပ်မတော်များကို လုံးဝ အမြစ်ဖြတ် သုတ်သင်ပစ်ရမည်။

စုယွီ၏ အမြင်တွင် ဒုတိယအချက်ကို ပြီးမြောက်အောင်မြင်ရန်မှာ မခက်ခဲလှချေ။

ပေါများကြွယ်ဝလှသော အရင်းအမြစ်နှင့် ကုန်ကြမ်းပစ္စည်းများဖြင့် အဆောင်လက်ဖွဲ့များကို အမြောက်အမြား ထုတ်လုပ်နိုင်စွမ်း ရှိ၏။

ပဉ္စမအဆင့် အဆောင်လက်ဖွဲ့များကို ဖန်တီးရန် ခက်ခဲနိုင်သော်လည်း စတုတ္ထအဆင့်နှင့် တတိယအဆင့် အဆောင်လက်ဖွဲ့များအတွက်မူ သူ့တွင် အောင်မြင်နိုင်စွမ်း ရာနှုန်းပြည့်နီးပါး ရှိနေလေပြီ။

ထို့အပြင် အချိန် တာအို စွမ်းအားဖြင့်ဆိုလျှင် တစ်နှစ်အတွင်း စတုတ္ထအဆင့် အဆောင်လက်ဖွဲ့ သောင်းနှင့်ချီ၍ သူ ရေးဆွဲနိုင်ပေသည်။

မိုးကြိုးနဂါး အင်မော်တယ်မင်းဆက်နှင့် တာ့ယန် အင်မော်တယ်မင်းဆက်တို့၏ ကျင့်ကြံသူ တပ်မတော်များက မည်မျှပင် အစွမ်းထက်နေပါစေ သောင်းနှင့်ချီ... သို့မဟုတ် သိန်းနှင့်ချီသော စတုတ္ထအဆင့် အဆောင်လက်ဖွဲ့များ၏ တိုက်ခိုက်မှုကို သူတို့ တောင့်ခံနိုင်ပါမည်လော။

'ဒီကိစ္စတွေကိုတော့ တာအိုရုပ်သေးကိုပဲ တာဝန်ယူ ဖြေရှင်းခိုင်းရမယ်...'

'ငါ့အတွက်ကတော့...'

စုယွီက ပထမ ရွှေရောင်ချပ်ဝတ် ခေါင်းဆောင်နှင့် ဒုတိယ ရွှေရောင်ချပ်ဝတ် ခေါင်းဆောင်တို့အား နှုတ်ဆက်လိုက်၏။

ထို့နောက် မီးဖီးနစ် ကောင်းကင်လေးကို ထုတ်ယူကာ သူ၏ ရုပ်သွင်ကို ပြောင်းလဲလိုက်ပြီး တာအိုဆရာ အရိပ်နီ အဖြစ် နောက်တစ်ကြိမ် ဟန်ဆောင်လျက် ယွဲ့အင်မော်တယ်စံအိမ် အင်မော်တယ်မြို့တော်ထဲမှ ထွက်ခွာလာခဲ့တော့သည်။

လားရာကို အတိအကျ သတ်မှတ်ပြီးနောက် ဟင်းလင်းပြင် တာအို၏ နေရာရွှေ့ပြောင်း နတ်ဘုရားစွမ်းရည်များကို အသက်သွင်းလိုက်၏။ အပျက်အစီးနယ်မြေရှိ တာ့ယန် အင်မော်တယ်မင်းဆက်၏ နယ်မြေဆီသို့ ဦးတည်သွားပါသည်။

အပျက်အစီးနယ်မြေရှိ မြေကမ္ဘာအင်မော်တယ်စံအိမ်၏ အင်မော်တယ်မြို့တော်နှင့် ဩဇာလွှမ်းမိုးမှု အားလုံးမှာ အမြစ်ဖြတ် ချေမှုန်းခံလိုက်ရပြီပင်။

ဒါက မိုးကြိုးနဂါး အင်မော်တယ်မင်းဆက်၏ လုပ်ရပ် မဟုတ်ခဲ့လျှင် တာ့ယန် အင်မော်တယ်မင်းဆက်၏ လက်ချက်သာ ဖြစ်ရမည်။

သည်စာရင်းကို အပျက်အစီးနယ်မြေကနေ စတင် ရှင်းလင်းရမည်။

အပျက်အစီးနယ်မြေမှတစ်ဆင့် တာ့ယန် အင်မော်တယ်မင်းဆက်ဆီသို့ သူ လမ်းခင်းသွားမည်။

စုယွီ သိချင်သည်မှာ တာ့ယန် အင်မော်တယ်မင်းဆက် အတွင်းရှိ ဝိညာဉ်ခွဲထွက်အဆင့်နှင့် မူလဝိညာဉ်အဆင့် အရှင်သခင် ဘယ်လောက်များများ.. သူ သတ်ဖြတ်နိုင်မလဲ ဆိုတာကိုပင်။

...

မြေကမ္ဘာအင်မော်တယ်စံအိမ်၏ ဝင်ပေါက်ဝယ်။

"ဝုန်း..."

အင်မော်တယ်ဂိုဏ်း၏ တံခါးမှာ ချိတ်ပိတ်ထားသဖြင့် စုယွီအနေဖြင့် ဟင်းလင်းပြင် တာအို စွမ်းအားဖြင့် အတားအဆီးကို ချိုးဖောက်၍ ခိုးဝင်ရန်သာ တတ်နိုင်တော့သည်။

အင်မော်တယ်ဂိုဏ်း၏ တံခါးအတွင်း သူ ပေါ်လာသည်နှင့် တပြိုင်နက် အခင်းအကျင်းများနှင့် ဝိညာဉ်ခွဲထွက်အဆင့်၊ မူလဝိညာဉ်အဆင့် အရှင်သခင်များ၏ အရှိန်အဝါများက စုယွီထံသို့ ဖိနှိပ်လာတော့၏။

"ဘယ်သူလဲ..."

လွှမ်းမိုးနေသော သတ်ဖြတ်လိုစိတ်များဖြင့် ပြည့်နှက်နေသည့် အေးစက်စက် အသံတစ်ခု ထွက်ပေါ်လာသော်လည်း စကားမဆုံးမီမှာပင် ထိုအသံက ရုတ်တရက် ရပ်တန့်သွားတော့သည်။

“ဝှစ်... ဝှစ်…”

မကြာမီမှာပင် ဟွမ်ကျူး၏ ပုံရိပ်က စုယွီ၏ရှေ့တွင် ပထမဆုံး ပေါ်လာလေသည်။

သို့ရာတွင် တစ်ချိန်က သူ့ကို အကာအကွယ် ပေးခဲ့ဖူးသော သူမမှာ ယခုအခါ အလွန် အိုမင်းရင့်ရော်နေပုံပေါ်ပြီး သူမ၏ အရှိန်အဝါမှာလည်း လွန်ခဲ့သော နှစ်တစ်ရာကျော်ကကဲ့သို့ မသန်စွမ်းတော့ချေ။

လူသားရုပ်သွင် ဖန်တီးလိုက်သောအခါ သူမ၏ ပခုံးအထိ ရှည်လျားသော ဆံပင်များတွင် အဖြူရောင် အစင်းကြောင်းများ ရောယှက်နေသည်ကို တွေ့ရ၏။

ဤကာလအတွင်း ဟွမ်ကျူး ပြင်းထန်သော တိုက်ခိုက်မှုတစ်ခုကို ခံလိုက်ရပြီး သူမ၏ အသက်စွမ်းအင်များ သိသိသာသာ ထိခိုက်ပျက်စီးသွားခဲ့သည်မှာ ထင်ရှားလှသည်။

စုယွီ ပြန်ရောက်လာသည်ကို မြင်လိုက်ရသောအခါ ဟွမ်ကျူး၏ မျက်လုံးများ ဝမ်းသာအားရ ပြူးကျယ်သွားပြီး အသံများ တုန်ယင်လျက် ရေရွတ်လိုက်သည်။

"ကောင်စုတ်လေး... နောက်ဆုံးတော့ ပြန်လာပြီပဲ"

"လာ... မင်းကို စံအိမ်သခင်ဆီ အရင် ခေါ်သွားပေးမယ်..."

စုယွီက သူမကို အလျင်အမြန် တားဆီးလိုက်၏။

"မလောပါနဲ့ဦး... ဆရာ ဒဏ်ရာရထားတယ်လို့ ကြားပါတယ်... ကျွန်တော် ဆရာ့ကို အရင် တွေ့ချင်တယ်"

ဟွမ်ကျူး၏ ပုံရိပ်က ခေတ္တမျှ ရပ်တန့်သွားပြီးနောက် လမ်းကြောင်းပြောင်းကာ စုယွီအား မြေအောက်နန်းတော်၏ လျှို့ဝှက်နယ်မြေဆီသို့ ခေါ်ဆောင်သွားရင်း ပြောလိုက်သည်။

"ဒါဆိုရင် မြေအောက်နန်းတော်ရဲ့ လျှို့ဝှက်နယ်မြေကို အရင်သွားကြတာပေါ့... မင်းရဲ့ဆရာက အဲဒီမှာ တံခါးပိတ်ပြီး ဒဏ်ရာတွေကို ကုသနေတယ်"

မြေအောက်နန်းတော် လျှို့ဝှက်နယ်မြေသို့ သွားရာလမ်းတွင် စုယွီက ပြီးပြည့်စုံသော အရည်အသွေးရှိ ပဉ္စမအဆင့် အဆင့်နိမ့် ကုသရေးဆေးလုံး ဆယ်လုံးပါ ပုလင်းတစ်လုံးနှင့် ချီသန့်စင်အိုးမှ စုစည်းထားသော ပဉ္စမအဆင့် အဆင့်နိမ့် ဝိညာဉ်အရည် ပုလင်းတစ်လုံးတို့ကို ထုတ်ယူကာ ဟွမ်ကျူးထံသို့ ကမ်းပေးလိုက်သည်။

"စီနီယာဒေါ်လေး... ဒီဆေးလုံးတွေရော ဝိညာဉ်အရည်တွေပါ ကုသရေးမှာ အစွမ်းထက်ပြီး အသက်စွမ်းအင်တွေကို ပြန်လည်ဖြည့်တင်းပေးနိုင်ပါတယ်... အခုလောလောဆယ် ဒါတွေကို ယူထားလိုက်ပါ... ပြီးရင် မြေအောက်နန်းတော် လျှို့ဝှက်နယ်မြေထဲမှာ ဒဏ်ရာတွေကို စပြီး ကုသလိုက်ပါ"

"ကျွန်တော် ပြန်ရောက်လာပြီဆိုတော့ အင်မော်တယ်ဂိုဏ်းရဲ့ ကိစ္စတွေကို ကျွန်တော်ပဲ ဖြေရှင်းလိုက်ပါ့မယ်"

"စီနီယာဒေါ်လေးက ဒဏ်ရာတွေ မြန်မြန် သက်သာဖို့ကိုပဲ အရင် အာရုံစိုက်ထားလိုက်ပါ"

စုယွီက ဟွမ်ကျူးကို ငြင်းဆန်ခွင့်ပင် မပေးခဲ့ချေ။

မြေအောက်နန်းတော် လျှို့ဝှက်နယ်မြေထဲသို့ ရောက်ရှိသွားသည်နှင့် သူက ဟွမ်ကျူးအား ဒဏ်ရာများ ကုသရန် စေလွှတ်လိုက်၏။

ဟွမ်ကျူးက စုယွီ ပေးလိုက်သော ပဉ္စမအဆင့် အဆင့်နိမ့် ကုသရေးဆေးလုံး ပုလင်းကို စစ်ဆေးကြည့်လိုက်ရာ ဆေးလုံးတိုင်းတွင် ဖုံးလွှမ်းနေသော ဆေးလုံးပုံစံခွက်များနှင့် လွှမ်းမိုးနေသော မွှေးကြိုင်လှသည့် ရနံ့တို့ကို သတိပြုမိလိုက်သည်။ ထိုရနံ့ကို ရှူရှိုက်လိုက်ရုံဖြင့်ပင် သူမ၏ သွေးများ ဆူပွက်လာကာ ကိုယ် ပူနွေးလာတော့၏။

ဟွမ်ကျူး အလွန်အမင်း အံ့အားသင့်သွားပြီး မျက်လုံးများ ပြူးကျယ်သွားကာ ရေရွတ်လိုက်သည်။

"ဆယ်လုံး... အားလုံးက ပြီးပြည့်စုံတဲ့ အရည်အသွေးရှိတဲ့ ပဉ္စမအဆင့် အဆင့်နိမ့် ဆေးလုံးတွေချည်းပဲလား"

သူမ အချိန်အတော်ကြာအောင် ကြက်သေသေသွားတော့သည်။

အဆင့်မြင့် အရည်အသွေး ဆိုလျှင်ပင် ဆေးဖော်စပ်ရာတွင် ထူးချွန်ပြောင်မြောက်သူ တစ်ဦး ဖော်စပ်မည်ဆိုပါက ဆေးဖိုတစ်ဖိုလျှင် တစ်လုံး သို့မဟုတ် နှစ်လုံးခန့်သာ ရရှိနိုင်မည် ဖြစ်၏။

၎င်းတို့ကို စုဆောင်းသိမ်းဆည်းထားမည် ဆိုပါက ဂန္ထဝင် အရည်အသွေးရှိ ဆေးလုံးဆယ်လုံးပါသော ပုလင်းတစ်ပုလင်း ရရှိရန်မှာ သိပ်တော့ မခက်ခဲလှချေ။

သို့သော် ပြီးပြည့်စုံသော အရည်အသွေး... အထူးသဖြင့် ပဉ္စမအဆင့် အဆင့်နိမ့် ဆေးလုံးမျိုး ဆိုလျှင် တာ့ချန် ကျင့်ကြံခြင်းကမ္ဘာထဲမှာ ဘယ်သူကများ ဒီလိုအရာမျိုးကို ဖော်စပ်နိုင်မှာတဲ့လဲ။

သို့တိုင်အောင်။ စုယွီက လက်တစ်ချက် လှုပ်ရှားလိုက်ရုံဖြင့် ပြီးပြည့်စုံသော အရည်အသွေးရှိ ပဉ္စမအဆင့် အဆင့်နိမ့် ကုသရေးဆေးလုံး တစ်ပုလင်းကို ထုတ်ပေးနိုင်ခဲ့သည်လေ။

အချိန်အနည်းငယ် ကြာပြီးနောက် ဟွမ်ကျူးမှာ သတိပြန်ဝင်လာပြီး သူမ၏ မျက်လုံးများ တောက်ပသွားကာ တိုးညှင်းစွာ ရေရွတ်လိုက်၏။

"ဒါဆိုရင်... ဒီနှစ်တွေထဲမှာ ယွီလေးရဲ့ ကျင့်ကြံမှုက အများကြီး ပိုပြီး နက်ရှိုင်းလာခဲ့ပြီပေါ့..."

"သူ့ရဲ့ ကျင့်ကြံမှုက ဝိညာဉ်ခွဲထွက်အဆင့်ကိုတောင် တက်လှမ်း သွားခဲ့ပြီလား..."

သူမက ပြီးပြည့်စုံသော ပဉ္စမအဆင့် အဆင့်နိမ့် ကုသရေးဆေးလုံး တစ်လုံးနှင့် စုယွီ ပေးထားသော ဝိညာဉ်အရည် အစက်အနည်းငယ်ကို သောာက်သုံးလိုက်သည်။

ထို့နောက် ကုသရေးအတွက် ၎င်းတို့ကို ပေါင်းစပ်ကာ သန့်စင်လိုက်တော့၏။

သူမက ယခင်ကလည်း ဝိညာဉ်အရည်များကို သန့်စင်ခဲ့ဖူးရာ အလွန်ထူးကဲသော သက်စောင့်အနှစ်သာရနှင့် အံ့ဖွယ်စွမ်းအားများ ပါဝင်နေပြီး အံ့မခန်း ကုသရေး အာနိသင်များ ရှိကြောင်းကို ကောင်းစွာ သိရှိထားလေသည်။

အမှန်တကယ်ပင် ပြီးပြည့်စုံသော ပဉ္စမအဆင့် အဆင့်နိမ့် ကုသရေးဆေးလုံးနှင့် ပေါင်းစပ်လိုက်သောအခါ ဝိညာဉ်ခွဲထွက်အဆင့် နှောင်းပိုင်း အရှင်သခင် တစ်ပါး၏ လက်ချက်ဖြင့် ရရှိထားသော သူမ၏ ဒဏ်ရာမှာ အမြန် ပျောက်ကင်းလာတော့သည်။

အတွင်းတွင် ကျန်ရစ်နေခဲ့သော မဟာတာအို အမှတ်အသား၏ စွမ်းအားများမှာ ကုသရေးဆေးလုံးနှင့် ဝိညာဉ်အရည်တို့တွင် ပါဝင်သော အံ့ဖွယ်စွမ်းအားများ၏ ခြေဖျက် ဖယ်ရှားခံလိုက်ရ၏။

သာမန်မျက်စိဖြင့်ပင် မြင်တွေ့နိုင်လောက်အောင် လျင်မြန်သော အရှိန်အဟုန်ဖြင့် ဒဏ်ရာမှာ သိသိသာသာ သက်သာလာလေသည်။

'ဒီနှုန်းအတိုင်း ဆိုရင် ငါ့ရဲ့ ဒဏ်ရာတွေ အပြည့်အဝ ပျောက်ကင်းဖို့ နှစ်ဝက်တောင် ကြာမှာ မဟုတ်ဘူး...'

ဟွမ်ကျူး၏ ရင်ထဲတွင် အလွန်အမင်း စိတ်လှုပ်ရှားကာ ဝမ်းသာပီတိ ဖြစ်သွားတော့၏။

အခြားတစ်နေရာတွင်မူ ယခင်က သူ တံခါးပိတ်ကျင့်ကြံခဲ့ဖူးသော ခန်းမကြီးဆီသို့ စုယွီ ရောက်ရှိသွားသည်။ ထိုနေရာရှိ ဂူစံအိမ်တစ်ခု အတွင်းတွင် သူ၏ဆရာ တာအိုဆရာ ထျန်းယွီ တံခါးပိတ်ကျင့်ကြံနေသည့် အရှိန်အဝါကို အာရုံခံမိလိုက်၏။

ထိုဂူစံအိမ်၏ အခင်းအကျင်း အတားအဆီးကို သူ လက်လှမ်းထိလိုက်ရာ တာအိုဆရာ ထျန်းယွီမှာ ကျင့်ကြံနေစဉ် အတွင်းမှ လန့်နိုးသွားတော့၏။

ဂူစံအိမ်ထဲသို့ စုယွီ ဝင်ရောက်သွားသောအခါ သက်ပြင်းဖွဖွ တစ်ချက် ချလိုက်မိသည်။

‘ကံကောင်းထောက်မလို့ ဆရာ့ရဲ့ အရှိန်အဝါဟာ သိပ် ဆိုးရွားနေပုံ မရဘူး..’

‘ဒါပေမဲ့ ဆရာက နတ်ဘုရားဝိညာဉ် ဒဏ်ရာတစ်ခု ထပ်ရထားပြန်တာလား…’’