အခန်း ၂၁၆၃

အပိုင်း ( 2163 ) ရှန်းဟွမ်တိုက်ကြီးသို့ ပြန်လည်ရောက်ရှိပြီ။

နဂါးကိုးကောင်မြို့တော်၏ ထိုလမ်းကြောင်းသည် မူလစွမ်းအင် အလွန်အမင်း သိပ်သည်းသော နေရာတစ်ခုသို့ သေချာပေါက် ဦးတည်နေရမည်ဟု လုမင် ခန့်မှန်းလိုက်သည်။

ထိုကဲ့သို့သော နေရာမျိုးသို့ လမ်းကြောင်း ပွင့်သွားမှသာ မူလစွမ်းအင်များ စုစည်းလာပြီး ကောင်းကင်နှင့် မြေပြင်၏ နိယာမများမှာလည်း ဤကဲ့သို့သော မြင်ကွင်းမျိုးကို ဖန်တီးနိုင်လိမ့်မည်။

၎င်းက ယွမ်လုလား သို့မဟုတ် ကောင်းကင်လောကပဲလား။

လုမင်၏ စိတ်ထဲတွင် အတွေးများစွာ ဖြတ်သန်းသွားခဲ့သည်။

သို့သော်လည်း ထိုအဖိုးကြီးနှင့် သက်လတ်ပိုင်း အမျိုးသားတို့ နောက်ထပ် ပြောလိုက်သော စကားကြောင့် လုမင်၏ မျက်နှာအမူအရာ ပြောင်းလဲသွားခဲ့ရသည်။

အကြောင်းမူ၊ လွန်ခဲ့သော နှစ်အနည်းငယ်ခန့်က ယွမ်လုမှ အထွတ်အထိပ် ကျွမ်းကျင်သူအချို့ ရောက်ရှိလာခဲ့ကြသည်ဟု သူတို့ ပြောလာသောကြောင့်ပင်။ သူတို့ကို ဧကရာဇ်များဟု ခေါ်ဆိုကြပြီး ရှန်းဟွမ်တိုက်ကြီးကို သိမ်းပိုက်ထားခဲ့သည်။

ယခုအခါ ရှန်းဟွမ်တိုက်ကြီးက ယွမ်လုမှ ထိုကျွမ်းကျင်သူများ၏ ထိန်းချုပ်မှုအောက်တွင် ရှိနေခဲ့ပြီ။

ရှန်းရွှီတိုက်ကြီး အနေဖြင့်မူ၊ ရှန်းဟွမ်တိုက်ကြီးနှင့် ဝေးကွာလွန်းသဖြင့် မူလစွမ်းအင်မှာ ထိုမျှအထိ မသိပ်သည်းသေးပေ။ ပြန်လည်နိုးထလာသော သူတော်စင်ဆေးပင်များနှင့် ဝိညာဉ်သစ်သီးများလည်း သိပ်မများပြားသေးပါ။ ထို့ကြောင့် ယွမ်လုမှ ကျွမ်းကျင်သူများသည် ဤနေရာသို့ ခြေဆန့်ခြင်း မရှိကြသေးပါချေ။

'ယွမ်လုက ကျွမ်းကျင်သူ သိုင်းဧကရာဇ်တွေ ဟုတ်လား။ ဒါက တိရှစ်ထျန်းများ ဖြစ်နေမလား'

လုမင်၏ မျက်နှာအမူအရာ ပြောင်းလဲသွားခဲ့သည်။ သူသည် တိရှစ်ထျန်းကို ချက်ချင်း တွေးမိလိုက်၏။

တိရှစ်ထျန်းသည် ယွမ်လုတွင် မရှိတော့ချေ။ သူသည် သတင်းအချို့ကို ကြားသိရပြီးနောက် ရှန်းဟွမ်တိုက်ကြီးသို့ ရောက်ရှိလာခြင်း ဖြစ်နိုင်ချေများသည်။

အကယ်၍ ထိုသို့သာ ဖြစ်နေပါက၊ နဂါးမဟာမိတ်သည် တိရှစ်ထျန်း၏ ထိန်းချုပ်ခြင်းကို ခံနေရလောက်ပြီ။

ထိုသို့ဆိုလျှင် သူ၏ မိဘများ၊ ရှဲ့လွမ်နှင့် အခြားသူများသည် တိရှစ်ထျန်း၏ လက်ထဲသို့ ကျရောက်နေပြီလား။

ထိုအခိုက်အတန့်တွင် လုမင်က တည်ငြိမ်စွာ မနေနိုင်တော့ချေ။

သူက ရှန်းဟွမ်တိုက်ကြီးသို့ ချက်ချင်း ပြန်သွားချင်နေခဲ့ပြီ ဖြစ်သည်။

ထို့နောက်တွင် လုမင်က နောက်ထပ် မေးခွန်းအနည်းငယ်ကို ထပ်မံမေးမြန်းပြီးနောက် ချင်ယွဲ့နှင့်အတူ ထွက်ခွာခဲ့ပြီး ရှန်းဟွမ်တိုက်ကြီး ရှိရာအရပ်သို့ ပျံသန်းခဲ့ကြသည်။

သူတို့နှစ်ဦး၏ အရှိန်မှာ အလွန်အမင်း မြန်ဆန်သည်။ မကြာမီမှာပင်၊ သူတို့က ရှန်းရွှီတိုက်ကြီးမှ ထွက်ခွာ၍ အတိုင်းအဆမဲ့သော ပင်လယ်ပြင်ကြီးထဲသို့ ပျံသန်းဝင်ရောက်ခဲ့ကြ၏။

လမ်းခရီးတစ်လျှောက်တွင် ကမ္ဘာကြီးက ယခင်နှင့် မတူဘဲ ကွာခြားနေပြီ ဖြစ်ကြောင်း လုမင် ရှာဖွေတွေ့ရှိခဲ့သည်။ မူလစွမ်းအင်မှာ နှိုင်းယှဉ်၍ မရနိုင်လောက်အောင် သိပ်သည်းနေခဲ့ပြီး နေရာတိုင်းတွင် ဝိညာဉ်တောင်တန်းများနှင့် ဝိညာဉ်ဆေးပင်များ ရှိနေခဲ့ပေသည်။

အကယ်၍ ရှန်းရွှီတိုက်ကြီးပင်၊ ဤကဲ့သို့ ဖြစ်နေလျှင် ရှန်းဟွမ်တိုက်ကြီးက မည်ကဲ့သို့ ဖြစ်နေပါမည်နည်း။

၎င်းက သေချာပေါက် ပို၍ပင် ထိတ်လန့်စရာ ကောင်းနေပေလိမ့်မည်။

"ဝုန်း..."

ပင်လယ်ပြင်ထဲတွင် ကြောက်မက်ဖွယ်ကောင်းသော အရှိန်အဝါဖြင့် ပင်လယ်သားရဲများကို မြင်ခဲ့ရသည်။

"သိုင်းအုပ်ချုပ်သူနယ်ပယ် နဝမအဆင့်ပါလား"

လုမင် အံ့ဩသွား၏။ သူသည် သိုင်းအုပ်ချုပ်သူနယ်ပယ် နဝမအဆင့် ကျင့်ကြံမှုရှိသော ငါးမန်းတစ်ကောင်ကို တွေ့ခဲ့ရသည်။

ပင်လယ်ထဲရှိ မူလစွမ်းအင်သည်လည်း နှိုင်းယှဉ်၍ မရနိုင်လောက်အောင် သိပ်သည်းလာသဖြင့်၊ ပင်လယ်သားရဲများ၏ ကျင့်ကြံမှုမှာ မိုးထိအောင် မြင့်တက်သွားစေခဲ့ခြင်း ဖြစ်ပေသည်။

သူတို့နှစ်ဦးက အလွန်အမင်း မြန်ဆန်သော အရှိန်ဖြင့် ရှန်းဟွမ်တိုက်ကြီးသို့ အဆက်မပြတ် နီးကပ်လာခဲ့ကြသည်။

ရှန်းဟွမ်တိုက်ကြီးနှင့် နီးကပ်လာလေလေ၊ မူလစွမ်းအင်က ပိုမိုသိပ်သည်းလာလေလေ ဖြစ်ပြီး ဟင်းလင်းပြင်ကလည်း ပိုမိုတည်ငြိမ်လာလေလေပင်။

၎င်းက လုမင်ကို ယွမ်လုသို့ ပြန်လည်ရောက်ရှိသွားသည့်အလား ထင်ယောင်ထင်မှား ဖြစ်စေခဲ့သည်။

မကြာမီအချိန်အတွင်းမှာပင်၊ သူတို့နှစ်ဦးက ရှန်းဟွမ်တိုက်ကြီးသို့ ပြန်လည်ရောက်ရှိလာခဲ့ကြပြီး မြောက်ဘက်လွင်ပြင်မှတစ်ဆင့် ကုန်းမြေပေါ်သို့ တက်ရောက်ခဲ့ကြလေသည်။

"ဘယ်လောက်တောင် ကြွယ်ဝတဲ့ မူလစွမ်းအင်ပါလိမ့်"

လုမင်နှင့် ချင်ယွဲ့တို့ အံ့ဩတုန်လှုပ်သွားခဲ့သည်။

မြောက်ဘက်လွင်ပြင်ရှိ မူလစွမ်းအင်က အလွန်သိပ်သည်း၏။ ဤက ရှေးဟောင်းလမင်း မြင့်မြတ်နယ်မြေနှင့်ပင် အလွန်နီးစပ်သကဲ့သို့ ခံစားလိုက်ကြရသည်။

ရှေးဟောင်းလမင်း မြင့်မြတ်နယ်မြေသည် ယွမ်တောင်၏ မြင့်မြတ်နယ်မြေ ကိုးခုထဲမှ တစ်ခု ဖြစ်ကြောင်း သိထားရမည်။ ၎င်းကို မြင့်မြတ်နယ်မြေဟု ခေါ်ဆိုကြသဖြင့် ကျင့်ကြံခြင်း ပတ်ဝန်းကျင်ကို စိတ်ကူးကြည့်နိုင်ပေသည်။

သို့သော်လည်း ယခုအခါ ရှန်းဟွမ်တိုက်ကြီးက ရှေးဟောင်းလမင်း မြင့်မြတ်နယ်မြေနှင့် အလွန် နီးစပ်နေခဲ့ပြီ ဖြစ်သည်။

သူတို့နှစ်ဦးလည်း သူတို့၏ ရုပ်သွင်များနှင့် အရှိန်အဝါများကို ပြောင်းလဲရန်အတွက် နတ်အရှိန်အဝါကျင့်စဉ် ကို အသုံးပြုလိုက်ကြလေသည်။

တိရှစ်ထျန်းက ရှန်းဟွမ်တိုက်ကြီးတွင် ရှိနေနိုင်သည်။ တိမိသားစု၏ အခြားသော အဖွဲ့ဝင်များလည်း ရှိနေနိုင်ခြေများ၏။ လုမင်က သူတို့ကို သတိမပြုမိစေလိုချေ။ တိတ်တဆိတ် လှုပ်ရှားခြင်းကသာ အကောင်းဆုံး အစီအစဉ် ဖြစ်သည်။

လုမင်က အသားညိုသော လူငယ်တစ်ဦးအဖြစ် ပြောင်းလဲလိုက်ပြီး ချင်ယွဲ့သည်လည်း သာမန်ရုပ်ရည်ရှိသော အမျိုးသမီးတစ်ဦးအဖြစ် ပြောင်းလဲလိုက်လေသည်။

သူတို့နှစ်ဦးက အရှိန်ကို လျှော့ချလိုက်ပြီး နေရာအနှံ့အပြားရှိ ပြောင်းလဲမှုများကို စောင့်ကြည့်ရင်း လေထဲတွင် လှမ်းလျှောက်ခဲ့ကြသည်။

မြေပြင်ပေါ်တွင် ရှေးဟောင်းသစ်ပင်ကြီးများက ကောင်းကင်ယံသို့ ထိုးထွက်နေကြ၏။ တောင်ထိပ်များစွာပေါ်တွင်လည်း ဝိညာဉ်ဆေးပင်များက နေရာအနှံ့ ရှိနေခဲ့သည်။ သူတော်စင် ဆေးဝါးများပင်လျှင် ပေါက်ရောက်နေခဲ့ကြပေသည်။

အဆင့်မြင့် မိစ္ဆာသားရဲ အမြောက်အမြားကလည်း တောင်များနှင့် တောအုပ်များထဲတွင် လှည့်လည်သွားလာနေကြသည်။

သာမန်ကာလျှံကာ ကြည့်လိုက်ရုံဖြင့်၊ ဝိညာဉ်ပင်လယ်နယ်ပယ်၊ ဝိညာဉ်သန္ဓေသားနယ်ပယ်နှင့် ဝိညာဉ်နတ်ဘုရားနယ်ပယ် ကျင့်ကြံမှုရှိသော မိစ္ဆာသားရဲများကို အုပ်စုလိုက် တွေ့ရှိနိုင်ပေသည်။

သိုင်းအုပ်ချုပ်သူနယ်ပယ် ကျင့်ကြံမှုရှိသော မိစ္ဆာသားရဲများသည်ပင် အမြောက်အမြား ရှိနေခဲ့သည်။

ထိုမိစ္ဆာသားရဲများက ဝိညာဉ်ဆေးဝါးများကို စားသုံးကြရသောကြောင့် သူတို့၏ ကျင့်ကြံမှုများ မိုးထိအောင် မြင့်တက်သွားခဲ့ကြခြင်းပင်။

"ဒါက..."

လုမင်ပင်လျှင် ဆွံ့အသွားခဲ့ရသည်။

ထို့နောက်တွင် သူတို့နှစ်ဦးက သတင်းအချက်အလက်များကို စုဆောင်းရန်အတွက် မြို့ကြီးများကို ရှာဖွေရန် ပျံသန်းခဲ့ကြလေသည်။

မကြာမီမှာပင်၊ သူတို့က မြို့ကြီးတစ်မြို့သို့ ရောက်ရှိလာခဲ့ကြပြီး ပိုအသေးစိတ်ကျသော သတင်းအချက်အလက်များကို စုံစမ်းသိရှိခဲ့ရသည်။

ဤမြေပြင်သည် လွန်ခဲ့သော ရှစ်နှစ်၊ ကိုးနှစ်ခန့်က စတင်ပြောင်းလဲခဲ့ခြင်း ဖြစ်သည်။ ရှန်းဟွမ်တိုက်ကြီး၏ အုပ်ချုပ်သူအနေဖြင့် နဂါးမဟာမိတ်သည် အခွင့်အရေးကို ဆုပ်ကိုင်ကာ အရင်းအမြစ် အမြောက်အမြား ရရှိခဲ့၏။ နဂါးမဟာမိတ်အတွင်းရှိ ကျွမ်းကျင်သူ အရေအတွက်မှာလည်း မိုးထိအောင် မြင့်တက်သွားခဲ့ပြီး ကျင့်ကြံသူများမှာ ပိုမိုသန်မာလာခဲ့ကြတော့သည်။

သို့သော်လည်း လွန်ခဲ့သော နှစ်အနည်းငယ်ခန့်က ယွမ်လုမှ ကျွမ်းကျင်သူများ ရောက်ရှိလာခဲ့ကြသည်။

ယွမ်လုမှ ကျွမ်းကျင်သူများကို ရင်ဆိုင်ရသောအခါ နဂါးမဟာမိတ်က လုံးဝ ခုခံနိုင်စွမ်း မရှိခဲ့ချေ။ သူတို့က နှိမ်နင်းခြင်း ခံခဲ့ရပြီး နဂါးကိုးကောင်မြို့ကိုလည်း သိမ်းပိုက်ခြင်း ခံခဲ့ရသည်။

ယွမ်လုမှ ရောက်ရှိလာသော ကျွမ်းကျင်သူ အုပ်စုမှာ တစ်စုတည်း မဟုတ်ချေ။ ရှန်းဟွမ်တိုက်ကြီး၏ နယ်မြေအသီးသီးကို သိမ်းပိုက်ထားကြသော အုပ်စုပေါင်းများစွာ ရှိနေခဲ့သည်။

လက်ရှိတွင် ရှန်းဟွမ်တိုက်ကြီးက ယွမ်လုမှ ကျွမ်းကျင်သူများ၏ အုပ်ချုပ်မှုအောက်တွင် ရှိနေခဲ့ပေပြီ။

နဂါးမဟာမိတ်မှ ကျွမ်းကျင်သူများက ယွမ်လုမှ ကျွမ်းကျင်သူများ၏ လုံးဝ ထိန်းချုပ်ခြင်းကို ခံထားရသည်။

လုမင်၏ နှလုံးသားမှာ လေးလံသွားခဲ့တော့သည်။

တစ်ချိန်တည်းမှာပင် သူသည် အခြားသော သတင်းအချို့ကိုလည်း ကြားသိခဲ့ရသည်။

နှစ်များတစ်လျှောက်တွင် ရှန်းဟွမ်တိုက်ကြီးရှိ လူအများအပြားက ဤမြေပြင်၏ ပြောင်းလဲမှုများနှင့် ပတ်သက်၍ ခန့်မှန်းတွေးဆခဲ့ကြသည်။

အချို့လူများက ရှန်းဟွမ်တိုက်ကြီးသည် ဝေးကွာသော အတိတ်ကာလတုန်းက စည်ပင်ဝပြောသော နယ်မြေတစ်ခု ဖြစ်ခဲ့ရမည်ဟု ပြောကြသည်။ ၎င်းကို မြေပြင် အနက်ရှိုင်းဆုံးနေရာများမှ ထွက်ပေါ်လာသော မရေမတွက်နိုင်သော ဝိညာဉ်ဆေးဝါးများနှင့် သူတော်စင်ဆေးဝါးများကို ကြည့်ခြင်းအားဖြင့် ကောက်ချက်ချနိုင်ပေသည်။

ဝေးကွာသော အတိတ်ကာလတုန်းက ရှန်းဟွမ်တိုက်ကြီးသည် ဝိညာဉ်ဆေးဝါးများနှင့် မြင့်မြတ်သောဆေးဝါးများဖြင့် ပြည့်နှက်နေခဲ့ရပေမည်။

သို့သော်လည်း နောက်ပိုင်းတွင် မသိရသော အကြောင်းအရင်းတစ်ခုကြောင့်၊ ဤနယ်မြေက နဝမနဂါးဒယ်စောက်အိုးနှင့် နဂါးသွေးကြောကိုးခုဖြင့် တံဆိပ်ခတ်ခြင်း ခံခဲ့ရသည်။ ထို့ကြောင့် ရှန်းဟွမ်တိုက်ကြီးမှာ သွေ့ခြောက်သွားခဲ့ရခြင်း ဖြစ်ပေသည်။

ယခုအခါ လမ်းကြောင်း ပြန်ပွင့်သွားသောအခါ တိုက်ကြီးတစ်ခုလုံး ပြန်လည် နိုးထလာခဲ့ခြင်း ဖြစ်သည်။

လုမင်သည် ချင်ယွဲ့နှင့်အတူ ဗဟိုတိုက်ကြီးသို့ အပြေးအလွှား သွားရောက်ခဲ့သည်။ သူ့နှလုံးသားမှာလည်း လေးလံနေခဲ့၏။

လမ်းခရီးတစ်လျှောက်တွင် သူတို့က အမျိုးမျိုးသော ဝိညာဉ်ဆေးပင်များနှင့် သူတော်စင်ဆေးပင်များကို ရှာဖွေရန် ကျယ်ပြောသော တောင်တန်းများထဲတွင် လှည့်လည်သွားလာနေကြသော လူအမြောက်အမြားကို မြင်တွေ့ခဲ့ရသည်။

"သခင်လေး... လူအများကြီးပဲ ဟိုးရှေ့က တောင်တန်းဆီကို ဦးတည်သွားနေကြတယ်"

ချင်ယွဲ့က ပြောလိုက်သည်။

လုမင် ခေါင်းညိတ်လိုက်၏။ လမ်းခရီးတွင် လူအများက လားရာတစ်ခုတည်းသို့ ပျံသန်းသွားနေကြသည်ကို သူတို့ သတိပြုမိခဲ့ကြသည်။ သူတို့၏ မျက်ဝန်းများမှာ စိတ်အားထက်သန်မှုများဖြင့် တောက်လောင်နေခဲ့ကြပေသည်။

"အဲဒီနေရာမှာ မယုံနိုင်လောက်အောင် အဖိုးတန်တဲ့ ရတနာတစ်ခု ပေါ်လာတာ ဖြစ်ရမယ်။ ကိုယ်တို့ သွားကြည့်ကြရအောင်"

လုမင် စိတ်ဝင်စားသွားခဲ့သည်။ ထို့နောက် သူသည် ချင်ယွဲ့နှင့်အတူ ထိုလားရာသို့ ပျံသန်းသွားခဲ့၏။

မကြာမီမှာပင်၊ သူတို့က ကျယ်ပြောသော တောင်တန်းကြီးတစ်ခု၏ ရှေ့မှောက်သို့ ရောက်ရှိလာခဲ့ကြတော့သည်။

"ဝှစ်... ဝှစ်..."

တောင်တန်းများထဲမှ မိစ္ဆာသားရဲများ၏ ဟိန်းဟောက်သံများကို ရံဖန်ရံခါ ကြားရသည်။ တောင်လုံးတမျှ ကြီးမားသော မိစ္ဆာသားရဲများသည်လည်း လွတ်လပ်စွာ လှည့်လည်သွားလာနေကြပြီး လူသားသိုင်းပညာရှင်များနှင့် တိုက်ခိုက်နေကြ၏။

"ဒီတောင်တန်းက တကယ်ကို အထင်ကြီးစရာကောင်းတာပဲ။ နေရာတိုင်းမှာ သူတော်စင်ဆေးဝါးတွေ ရှိနေတယ်"

လုမင်၏ မျက်ဝန်းများက လင်းလက်သွားခဲ့သည်။ သူသည် ကျယ်ပြောလှသော နယ်မြေနှင့် တောင်တန်းကြီးတစ်ခုလုံးကို မြင်တွေ့နိုင်၏။ ကောင်းကင်ယံ အမြင့်တွင် ရပ်တန့်နေချိန်တွင် ထိုကျယ်ပြောလှသော တောင်တန်းကြီးက သူ၏ မျက်ဝန်းများထဲတွင် အရိပ်ထင်ဟပ်နေတော့သည်။

ထိုတောင်တန်းက မူလစွမ်းအင်များ ကြွယ်ဝနေကြောင်း သူ ရှာဖွေတွေ့ရှိခဲ့သည်။ ဝိညာဉ်ဆေးဝါးများနှင့် သူတော်စင်ဆေးဝါးများမှာလည်း နေရာတိုင်းတွင် ရှိခဲ့ကြ၏။ ထိုနေရာတွင် ရှေးဟောင်းလမင်း မြင့်မြတ်နယ်မြေထက်ပင် ပိုမိုများပြားသော သူတော်စင်ဆေးပင်များနှင့် ဝိညာဉ်ဆေးပင်များ ရှိနေခဲ့သည်။

ရှန်းဟွမ်တိုက်ကြီးသည် ဝေးကွာသော အတိတ်ကာလတုန်းက အလွန်စည်ပင်ဝပြောခဲ့ရမည်ဟု လုမင် တွေးလိုက်မိလေသည်။

ထို့ကြောင့် မြေအောက်အနက်ပိုင်းတွင် နှစ်ပေါင်းထောင်ချီ၍ ဆွေးမြည့်မသွားခဲ့သော ဆေးပင်များ၏ မျိုးစေ့များ ရှိနေခဲ့ခြင်း ဖြစ်ရမည်။ ယခု၊ မူလစွမ်းအင်များ ကြွယ်ဝလာသောအခါ သူတို့က အမြစ်တွယ်ပြီး အညှောက်ပေါက်လာခဲ့ကြခြင်းပင်။

သို့မဟုတ်ပါက မူလစွမ်းအင် မည်မျှပင် ကြွယ်ဝစေကာမူ၊ ဆယ်နှစ်မပြည့်သော အချိန်တိုအတွင်း ထိုမျှအထိ များပြားသော ဝိညာဉ်ဆေးပင်များနှင့် သူတော်စင်ဆေးပင်များ ပေါက်ရောက်လာရန် မဖြစ်နိုင်ချေ။

တစ်ချိန်တည်းမှာပင်၊ ဤကျယ်ပြောလှသော တောင်တန်းကြီးထဲတွင် အစွမ်းထက် မိစ္ဆာသားရဲ အမြောက်အမြား ရှင်သန်နေထိုင်ခဲ့ကြသည်။

"သခင်လေး... ကျွန်မတို့လည်း သူတော်စင်ဆေးဝါးအချို့ကို စုဆောင်းကြမလား"

ချင်ယွဲ့က မေးမြန်းလိုက်သည်။

"သေချာတာပေါ့"

လုမင် ခေါင်းညိတ်လိုက်၏။ လုမင်၏ လက်ထဲတွင် အရင်းအမြစ် အမြောက်အမြား ရှိနေသော်လည်း အဆင့်မြင့် ဆေးပင်၊ဆေးမြစ်များ ပိုမိုရှိနေခြင်းကို မည်သူကမျှ ငြင်းပယ်မည် မဟုတ်ချေ။ သူတို့က ဤဆေးပင်များကို အသုံးမပြုနိုင်သော်လည်း သူ၏ မိဘများနှင့် အခြားသူများကတော့ အနာဂတ်တွင် သေချာပေါက် အသုံးပြုနိုင်ပေလိမ့်မည်။

သူတို့နှစ်ဦးက တောအုပ်ထဲသို့ ပြေးဝင်သွားခဲ့ကြပြီး မကြာမီပင် လက်မောင်းလုံးခန့် တုတ်ခိုင်သော ဂျင်ဆင်း တစ်ပင်ကို မြင်တွေ့လိုက်ရသည်။ ၎င်းက ရွှေရောင်တောက်နေပြီး မွှေးပျံ့သော ရနံ့များ ရှိနေခဲ့၏။

၎င်းမှာ သူတော်စင်ဆေးတစ်ခု ဖြစ်သည်။ ၎င်းက သိုင်းသူတော်စင်များ အတွက်ပင် အသုံးဝင်ပေသည်။

သို့သော်လည်း ဤဂျင်ဆင်းကို မိစ္ဆာသားရဲတစ်ကောင်က စောင့်ကြပ်နေခဲ့သည်။

"ဝေါင်း..."

သိုင်းအုပ်ချုပ်သူနယ်ပယ် ဒုတိယအဆင့် ကျင့်ကြံမှုရှိသော ဝံပုလွေကြီးတစ်ကောင်သည် လုမင်ထံသို့ ပြေးဝင် တိုက်ခိုက်လိုက်၏။

သို့သော်လည်း လုမင်က သူ့လက်ကို ဝှေ့ယမ်းလိုက်ရုံဖြင့် ပြင်းထန်သော စွမ်းအားတစ်ခု ပေါက်ကွဲထွက်လာခဲ့ပြီး ထိုဝံပုလွေကြီးကို သတ်ဖြတ်ပစ်ခဲ့သည်။ ထို့နောက်တွင် သူက ထိုရွှေရောင်ဂျင်ဆင်းကို သိမ်းဆည်းလိုက်လေသည်။

ထို့နောက်တွင် ချင်ယွဲ့နှင့် လုမင်တို့က သူတော်စင်ဆေးဝါးများကို စုဆောင်းရန်အတွက် တောအုပ်ကို ဖြတ်သန်းသွားလာခဲ့ကြသည်။

သူတို့က သာမန် ဆေးဝါးများကိုတော့ စုဆောင်းရန်ပင် စိတ်မဝင်စားပေ။

တောင်ကြားတစ်ခုထဲတွင် လုမင်က သိုင်းအုပ်ချုပ်သူနယ်ပယ် ပထမအဆင့် ကျင့်ကြံမှုရှိသော မြွေကြီးတစ်ကောင်ကို သာမန်ကာလျှံကာ သတ်ဖြတ်လိုက်ပြီး သူတော်စင်ဆေးတစ်ခုကို စုဆောင်းလိုက်သည်။

လုမင်လည်း စိတ်ထဲမှ သက်ပြင်းချလိုက်မိသည်။ ဤကာလအတွင်း ရှန်းဟွမ်တိုက်ကြီးရှိ လူများ၏ ကျင့်ကြံမှုက မိုးထိအောင် မြင့်တက်မသွားမှသာ ထူးဆန်းနေပေလိမ့်မည်။ ဤနေရာတွင် သူတော်စင်ဆေးဝါးများက များပြားလွန်းလှသည်။

သူတော်စင်ဆေးကို စားသုံးနိုင်သော သိုင်းအုပ်ချုပ်သူတစ်ဦး၏ ကျင့်ကြံမှုက အလျင်အမြန် တိုးတက်လာမည်မှာ မြေကြီးလက်ခတ်မလွဲပင်။

​