အခန်း ၂၈၅၂
Vol. 286 Ch. 2852
အခန်း (၂၈၅၂) - သူ့ပြိုင်ဘက်ကလည်း ယဲ့ထျန်းဂူ ဆိုပဲ
"ယဲ့ထျန်းဂူ က အရင်က ပြိုင်ပွဲမှာ ဟေးကျား စခန်းက ဘေးအန္တရာယ်ကြယ် ၁၂ယောက်ကို မြက်ပင်တွေလို ခုတ်ဖြတ်သွားခဲ့တာလေ..."
"ဘာလို့ အခုတော့ ငါတို့ အမြင့်မြတ်ဆုံး နတ်ဘုရားအင်ပါယာ ကို လာပြီးတော့တောင် ငါတို့နဲ့ လေ့ကျင့်ချင်နေရတာလဲ..."
ကျဲနယဲ့ အဆင့်မြင့် သူတော်စင်တစ်ဦးသည် နတ်ဘုရားတိုက်ခိုက်ရေး ကျောင်းတော်အတွင်းသို့ ခိုးကြည့်ရင်း မျက်နှာတွင် မလိုလားသည့် အရိပ်အယောင်များ အပြည့်ဖြင့် ရေရွတ်လိုက်သည်။
အခြားသော ကျဲနယဲ့ အဆင့်မြင့် သူတော်စင်များလည်း ထိုနည်းအတိုင်းပင်။
သူတို့အားလုံးမှာ ဆန်းနယဲ့ စစ်မြေပြင်ထဲသို့ တစ်သုတ်ပြီးတစ်သုတ် ဝင်ရောက်ခဲ့ကြသူများ ဖြစ်သည်။
ရာစုနှစ်တစ်ခုခြားသော်လည်း သူတို့သည် ဝူရှန်းပေမြိန့် စခန်းတာဝန်ခံ ခန်းမအတွင်း ဖြစ်ပျက်ခဲ့သည့် မြင်ကွင်းကို မျက်ဝါးထင်ထင် မြင်ခဲ့ကြသူများဖြစ်သည်။
အချို့ဆိုလျှင် ပြိုင်ပွဲကို မမြင်လိုက်ရသော်လည်း၊ ယခင်က ဟန်လော့ ကဲ့သို့ ရက်စက်သူများ၊ အစိမ်းရောင်မျက်လုံးကျား ကဲ့သို့သော အန္တရာယ်ရှိသူများ အနိုင်ကျင့်ခံခဲ့ရသည်ကို ကိုယ်တိုင်မြင်တွေ့ခဲ့ကြသည်။
"မင်းတို့ ကြောက်မနေကြပါနဲ့။ ဒါက လေ့ကျင့်တာပဲဆိုတော့ သေစရာမှ မဟုတ်တာ။ ငါတို့က ယဲ့ထျန်းဂူ ကို နတ်ဘုရားတိုက်ခိုက်ရေး ကျောင်းတော်မှာ ခဏလိုက်ဖျော်ဖြေပေးနေရုံပါပဲ။
သူ့မိသားစုက လူကြီးပိုင်းက နန်းတော်ထဲမှာ ငါတို့ဧကရာဇ်နဲ့ စကားပြောနေတာ၊ သူတို့စကားပြောပြီး ပြန်သွားရင် အကုန်အဆင်ပြေသွားမှာပါ။"
"ဒါဆိုရင် အချိန်အတော်ကြာ တရားကျင့်နေတဲ့ အဲဒီလူကိုပဲ ပင့်သင့်တယ်မဟုတ်လား ငါတို့ အမြင့်မြတ်ဆုံး နတ်ဘုရားအင်ပါယာက ကျဲနယဲ့ အဆင့်မြင့် သူတော်စင်တွေထဲမှာ သူတစ်ယောက်တည်းပဲ ဘေးအန္တရာယ်ကြယ်တွေနဲ့ အနီးစပ်ဆုံးအဆင့် ရှိတာ၊ သူက ယဲ့ထျန်းဂူ နဲ့ ယှဉ်ပြိုင်ဖို့ ပိုသင့်တော်တယ်။"
"..."
ထိုအချိန်တွင် နတ်ဘုရားတိုက်ခိုက်ရေး ကျောင်းတော်အတွင်းမှ ကျန်းဟူ သည် သူတို့ကို မြင်သွားပြီး ချက်ချင်းပင် လက်ယက်ခေါ်လိုက်သည်။
သူတို့သည် အခြေအနေမပေးတော့သဖြင့် မလိုလားစွာဖြင့်ပင် ကျောင်းတော်အတွင်းသို့ ဝင်သွားကြသည်။
ဖန့်ချန် ကို မြင်လိုက်သည်နှင့် ချက်ချင်းပင် မျက်နှာအမူအရာ ပြောင်းလဲကာ အလွန်အမင်း ရိုသေဟန်ဆောင်သည့် အပြုံးများဖြင့် ရှေ့သို့တက်ကာ နှုတ်ဆက်လိုက်ကြသည်။
နတ်ဘုရားတိုက်ခိုက်ရေး ကျောင်းတော်အတွင်းမှာ ရုတ်ချည်း တိတ်ဆိတ်သွားသည်။
အံ့အားသင့်နေသော မျက်ဝန်းများမှာ အဆိုပါ ကျဲနယဲ့ အဆင့်မြင့် သူတော်စင်များထံသို့ အကြိမ်ကြိမ် လှည့်ပတ်ကြည့်ရှုနေကြသည်။
ကျန်းဟူ သည် ဖန့်ချန်အတွက် အဆိုပါ ကျဲနယဲ့ အဆင့်မြင့် သူတော်စင်များ၏ နောက်ခံအကြောင်းကို မိတ်ဆက်ပေးလိုက်သည်။
သူတို့ထဲမှ အများစုမှာ နယ်မြေရှာဖွေရေး အရာရှိ မိသားစုမှ ဆင်းသက်လာသူများ ဖြစ်သည်။
မျိုးဆက်အဆက်ဆက်မှာ နယ်မြေရှာဖွေရေး အရာရှိများအဖြစ်သာ လုပ်ကိုင်ခဲ့သူများ ဖြစ်သည်။
"သုံးဆယ့်ခုနစ်..."
အကြီးကဲငါးပါး မှာ လူဦးရေကို တိတ်တိတ်ကလေး ရေတွက်လိုက်ကြသည်။
ကျဲနယဲ့ အဆင့်မြင့် သူတော်စင် (၃၇) ယောက်။
ထိုအရေအတွက်မှာ ကောင်းကင်ငါးပါး ထက် များစွာ ပိုများနေသည်။
"ကျန်းဟူ၊ မင်းတို့ရဲ့ အမြင့်မြတ်ဆုံး နတ်ဘုရားအင်ပါယာမှာ ကျဲနယဲ့ အဆင့်မြင့် သူတော်စင် (၃၇) ယောက်ပဲ ရှိတာလား "
ဖန့်ချန် က ပေါ့ပေါ့ပါးပါး မေးလိုက်သည်။
ကျန်းဟူ က အလျင်အမြန်ပင် ပြန်ဖြေသည်။
"အစ်ကိုကြီး၊ ကျွန်တော်တို့ အမြင့်မြတ်ဆုံး နတ်ဘုရားအင်ပါယာမှာ ကျဲနယဲ့ အဆင့်မြင့် သူတော်စင် စုစုပေါင်း (၆၀) ရှိပါတယ်။ အခုတချို့က အဝေးကြီးမှာမို့ ပြန်မရောက်နိုင်သေးသလို၊ တချို့ကလည်း တရားကျင့်နေကြပါတယ်။ နောက်ပြီး တချို့က ဆန်းနယဲ့ စစ်မြေပြင်ထဲ ရောက်နေကြပါပြီ။"
(၆၀) ယောက်လား
အကြီးကဲငါးပါး မှာ အမူအရာ မပျက်အောင် ထိန်းထားသော်လည်း ရင်ထဲတွင်မူ တိတ်တိတ်ကလေး သက်ပြင်းချလိုက်မိသည်။
ထိုကိစ္စရပ်တွင် ကောင်းကင်ငါးပါး အနေဖြင့် အမြင့်မြတ်ဆုံး နတ်ဘုရားအင်ပါယာကို မည်သည့်အချိန်တွင်မှီအောင် လိုက်နိုင်မည်နည်း။
သို့သော် လက်ရှိတွင် ကောင်းကင်ငါးပါး ၌ နိဗ္ဗာန်တားမြစ်နယ်မြေ (၁၀၀) ကျော် ရှိနေပြီဖြစ်သည်။
အကယ်၍ ကြယ်တာရာမျက်ရည်စက် ထုတ်လုပ်နည်းကိုပါ ထပ်မံတီထွင်နိုင်ပါက။
ထိုအတိုင်းသာ ဆက်သွားမည်ဆိုပါက အမြင့်မြတ်ဆုံး နတ်ဘုရားအင်ပါယာကို ကျော်တက်နိုင်ရန်မှာ မဖြစ်နိုင်သည် မဟုတ်ပေ။
"မိတ်ဆွေတို့၊ အားနေတာနဲ့ စင်မြင့်ပေါ်တက်ပြီး နည်းနည်းလေ့ကျင့်ကြည့်ရအောင်။"
ဖန့်ချန် က ပြုံးလျက် ပြောသည်။
လာပြီဟ
နေရာတွင်ရှိသော ကျဲနယဲ့ အဆင့်မြင့် သူတော်စင်များ၏ ရင်ထဲတွင် ဝုန်းခနဲ ဖြစ်သွားသည်။
ကံကောင်းသည်မှာ အချို့သော ကျဲနယဲ့ အဆင့်မြင့် သူတော်စင်များမှာ စွမ်းအင်စုစည်းခြင်း အဆင့်၊ အသက်စွမ်းအင် အဆင့်၊ သို့မဟုတ် ကမ္ဘာတည်ဆောက်ခြင်း အစောပိုင်းအဆင့်များသာ ဖြစ်ကြသည်။
သူတို့မှာ စင်ပေါ်တက်စရာ မလိုသဖြင့် ရင်ထဲတွင် သက်ပြင်းချနိုင်ကြသည်။
"မိတ်ဆွေတို့၊ အစ်ကိုကြီးနဲ့ စင်ပေါ်တက်ပြီး ယှဉ်ပြိုင်ရတာဟာ ဆန်းနယဲ့ စစ်မြေပြင်မှာတောင် မရနိုင်တဲ့ အခွင့်အရေးပါ။ ငါတို့ရဲ့ နတ်ဘုရားတိုက်ခိုက်ရေး ကျောင်းတော်မှာပဲ ဒီလို အခွင့်အရေးမျိုး ရှိတာပါ။ လွတ်မသွားပါစေနဲ့၊ ဘယ်သူအရင် တက်မလဲ"
ကျန်းဟူ က လေးနက်စွာ ပြောသည်။
သူပြောသည့်အတိုင်းပင် မှန်ပေသည်။
ဆန်းနယဲ့ စစ်မြေပြင်တွင် ကျဲနယဲ့ အဆင့်မြင့် သူတော်စင်များ ယှဉ်ပြိုင်လျှင် နိဗ္ဗာန်တားမြစ်နယ်မြေ တစ်ခုကို အနည်းဆုံး ပေါင်နှံရသည်။
သူတို့၏ စွမ်းအားဖြင့်ဆိုလျှင် အရူးမဟုတ်ပါက ဖန့်ချန်ကို အနိုင်မကျင့်ဘဲ ယှဉ်ပြိုင်ဖို့ဆိုသည်မှာ မဖြစ်နိုင်ပေ။
ယခု အခွင့်အရေးမှာ တကယ်ပင် ရှားပါးလှသည်။
သို့သော် ဘာကြောင့် သူတို့က အရင်တက်ရမှာလဲ
သူတို့မှာ ကျန်းဟူကို ကြည့်ကာ စကားမဆိုဘဲ ငြိမ်နေကြသည်။
ကျန်းဟူ မှာ စိတ်ထဲမှ ကြိတ်ဆဲလိုက်ပြီး ဖန့်ချန်ကို ဦးညွတ်ကာ -
"အစ်ကိုကြီး၊ ကျွန်တော်အရင်တက်ပြီး အစ်ကိုကြီးနဲ့ ယှဉ်ပြိုင်ပေးပါ့မယ်၊ တခြားသူတွေအတွက်လည်း စံနမူနာ ဖြစ်သွားတာပေါ့။"
"ကောင်းပြီလေ၊ ဆန်းနယဲ့ စစ်မြေပြင်မှာလည်း မင်းနဲ့ ယှဉ်ပြိုင်ခွင့် မရခဲ့ဘူး။ မင်းတို့ အမြင့်မြတ်ဆုံး နတ်ဘုရားအင်ပါယာရဲ့ နည်းဗျူဟာတွေနဲ့ နတ်ဘုရားစွမ်းအားတွေကို ကြည့်ပါဦးမယ်။"
ဖန့်ချန် က ရယ်မောလျက် ပြောသည်။
ဖန့်ချန် နှင့် ကျန်းဟူ တို့ စင်မြင့်ပေါ်သို့ တက်သွားသောအခါ။
နတ်ဘုရားတိုက်ခိုက်ရေး ကျောင်းတော် အတွင်းမှ သူတော်စင်များအားလုံးမှာ ထိုစင်မြင့်ဆီသို့ အလိုလို ကြည့်လိုက်မိကြသည်။
ကျဲနယဲ့ အဆင့်မြင့် သူတော်စင်များ ရှိသော စင်မြင့်မှာ ထူးခြားသည့် အမှတ်အသား ရှိသောကြောင့် ဖြစ်သည်။
"မင်းတို့ ဘာဖြစ်လို့ ဒီလို အမူအရာ ဖြစ်နေကြတာလဲ၊ သူတို့က လေ့ကျင့်နေကြတာပဲ၊ ကျန်းဟူ သေမှာမှ မဟုတ်တာ။"
ဖန်ရွှေ မှာ သူတို့၏ အမူအရာ ပြောင်းလဲသွားသည်ကို သတိပြုမိသဖြင့် သိချင်စိတ်ဖြင့် မေးလိုက်သည်။
သူတို့ထဲမှ တစ်ဦးက သက်ပြင်းချရင်း -
"နတ်ဘုရားတိုက်ခိုက်ရေး ကျောင်းတော်မှာ ယှဉ်ပြိုင်တာကို တခြားနေရာတွေကလည်း အကုန် မြင်နေရမှာမို့ပါ..."
မှန်ပေသည်။
ထိုတိုက်ပွဲတွင် သေဆုံးစရာ မရှိပေ။
သို့သော် ဂုဏ်သိက္ခာ ကျဆင်းရန်မှာ သေချာနေသည်။
အကြီးကဲငါးပါး မှာ ထိုအခါမှ သဘောပေါက်သွားပြီး ဤသူများ ဘာကြောင့် စင်ပေါ်မတက်ချင်ကြသည်ကို နားလည်သွားသည်။
အမြင့်မြတ်ဆုံး နတ်ဘုရားအင်ပါယာထဲမှာ ဂုဏ်သိက္ခာ ကျမှာကို ကြောက်နေကြခြင်းပင်။
တစ်ချိန်တည်းမှာပင်။
နေရာအသီးသီးရှိ နတ်ဘုရားတိုက်ခိုက်ရေး ကျောင်းတော်များတွင်လည်း ဖန့်ချန်နှင့် ကျန်းဟူတို့ ရှိနေသော စင်မြင့်ကို သတိပြုမိသွားကြသည်။
"နယ်မြေရှာဖွေရေး မိသားစုက ကျန်းဟူ မဟုတ်လား သူ ဘာလို့ တိုက်ခိုက်ရေး ကျောင်းတော် စင်မြင့်ပေါ် ရောက်နေတာလဲ ရန်ငြိုးဖြေရှင်းတာလား"
"သူ့ပြိုင်ဘက်က ဘယ်သူလဲ မျက်နှာစိမ်းပါလား၊ ကျဲနယဲ့ အဆင့်မြင့် သူတော်စင်သစ် များလား"
"မဖြစ်နိုင်တာ၊ ဒီနှစ်တွေအတွင်း ကျဲနယဲ့ အဆင့်မြင့် သူတော်စင် ဘယ်သူမှ မပေါ်လာသေးဘူး။"
"ကျဲနယဲ့ အဆင့်မြင့် သူတော်စင်ချင်း ယှဉ်ပြိုင်တာက ရှားပါးတယ်၊ ဒီတစ်ခေါက်တော့ မျက်စိပသာဒ ဖြစ်တော့မှာပဲ။"
သာမန် သူတော်စင်များတင် မဟုတ်ဘဲ၊ လင်နယဲ့ အဆင့်မှသည် ကျဲနယဲ့ အဆင့်အထိ ရှိကြသော သူတော်စင် အားလုံးသည် ယခု စင်မြင့်ပေါ်သို့ အာရုံစိုက်လာကြသည်။
မကြာမီပင် သူတော်စင်အချို့မှာ ထူးခြားချက်တစ်ခုကို သတိပြုမိသွားသည်။
"အဲဒီကောင်က ကမ္ဘာတည်ဆောက်ခြင်း အလယ်အလတ်အဆင့် မဟုတ်လား"
"ကျန်းဟူ က ကမ္ဘာတည်ဆောက်ခြင်း နောက်ပိုင်းအဆင့်၊ အဆင့်မတူဘဲ ဘာလို့ စင်မြင့်ပေါ် တက်ရတာလဲ "
"ကျန်းဟူက မာန်တက်တတ်တော့ ရန်သူတွေ အများကြီး ရှိတယ်၊ ရန်ငြိုးဖြေရှင်းတာ ဖြစ်မယ်။"
"အခြေနေ မသိတတ်တဲ့ကောင်၊ ကိုယ့်အဆင့် ကိုယ်မသိဘဲ ကျန်းဟူကို ရန်စရဲတယ်ပေါ့ "
ဤသတင်းမှာ လျင်မြန်စွာ ပျံ့နှံ့သွားပြီး၊ တိုက်ခိုက်ရေး ကျောင်းတော်တွင် မရှိသူများပင် ယှဉ်ပြိုင်နေကြောင်း ကြားသိရသဖြင့် အလုအယက် ရောက်လာကြသည်။
နတ်ဘုရားတိုက်ခိုက်ရေး ကျောင်းတော် အားလုံးမှာ တိုက်ပွဲကို ကြည့်ရှုသူများဖြင့် ပြည့်နှက်သွားသည်။
မြို့တော်ရှိ တိုက်ခိုက်ရေး ကျောင်းတော်မှာလည်း လူများ ဆက်တိုက် ရောက်ရှိလာသည်။
ကြည့်ရှုသူများ များလေလေ၊ ထိုနေရာရှိ ကျဲနယဲ့ အဆင့်မြင့် သူတော်စင်များမှာ ပိုမို စိတ်ဖိစီးလေလေ ဖြစ်သည်။
သာမန် သူတော်စင်များမှာ ဖန့်ချန်၏ နောက်ကြောင်းကို မသိဘဲ သူမည်သူမည်ဝါဖြစ်ကြောင်းကိုသာ ခန့်မှန်းနေကြသည်။
ဖန့်ချန် မှာ အမြင့်မြတ်ဆုံး နတ်ဘုရားအင်ပါယာမှ သူတော်စင် မဟုတ်ကြောင်းကို သူတို့ လုံးဝ မတွေးမိကြပေ။
မြို့တော်ရှိ အင်အားကြီး ပုဂ္ဂိုလ်များမှာလည်း သူတို့၏ လျှို့ဝှက်နည်းလမ်းများဖြင့် ထိုစင်မြင့်ကို အကဲခတ်နေကြသည်။
နန်းတော်အတွင်း၌။
လုကျိုယွမ် နှင့် စကားပြောနေသော အမြင့်မြတ်ဆုံး နတ်ဘုရားဧကရာဇ် သည် ရုတ်တရက် လက်ကို ဝှေ့ယမ်းလိုက်သည်။
လေဟာနယ်တွင် မြူခိုးများ ဖြစ်ပေါ်လာပြီး စင်မြင့်ပေါ်ရှိ မြင်ကွင်းမှာ ပေါ်လာသည်။
ကျန်းစီလုံ၊ တရားစီရင်ရေး တာဝန်ရှိသူကြီး နှင့် ဝန်ကြီးများအားလုံးမှာ စင်မြင့်ပေါ်သို့ အာရုံစိုက်လိုက်ကြသည်။ ဖန့်ချန်နှင့် ကျန်းဟူကို ကြည့်ရင်း သူတို့၏ မျက်ဝန်းများမှာ လေးနက်နေပြီး အနည်းငယ် တုန်လှုပ်နေကြသည်။
သူတို့သည် ယဲ့ထျန်းဂူ ၏ လက်စွမ်းကို ကျန်းဟူတို့၏ စကားထဲမှသာ ကြားဖူးခြင်းဖြစ်သည်။
မျက်မြင်ကိုယ်တွေ့ မဟုတ်ဘဲနှင့်တော့ မယုံနိုင်ပေ။
အကယ်၍ တစ်ဖက်လူ၏ စွမ်းအားမှာ ပြောစလောက် မရှိပါက...
လုကျိုယွမ် သည် တစ်ဖက်လူတို့၏ မျက်ဝန်းထဲမှ ထူးခြားသော အရိပ်အယောင်ကို မြင်လိုက်ရသဖြင့် အနည်းငယ် လှောင်ပြုံးလိုက်သည်။
သူ၏ စိတ်အစဉ်ထဲတွင် ထိုစင်မြင့် မြင်ကွင်းက ရှေးဟောင်း မှတ်ဉာဏ်အချို့ကို နိုးကြားစေလိုက်သည်။
ထိုတစ်ခေါက်ကလည်း စင်မြင့်ပေါ်တွင်ပင်...
သူ့ပြိုင်ဘက်ကလည်း ယဲ့ထျန်းဂူ ပင် ဖြစ်သည်။