အခန်း ၄၄၆

Vol. 45 Ch. 446

အခန်း (၄၄၆) မင်မင်းဆက်ဆီသို့ ပြန်လည်ထွက်ခွာခြင်း

လေကြောင်းပြပွဲမှ ပြန်လာပြီးနောက် ကျန်းယဲ့က အဘိုးကြီးကျူးနှင့် သူ၏အဖွဲ့အတွက် ညစာကို ခမ်းနားစွာ စီစဉ်ပေးခဲ့ပြီးနောက် အားလုံးကို အနားယူရန် အခန်းများဆီသို့ ပြန်လွှတ်လိုက်သည်။

သီးသန့်အခန်းထဲတွင်တော့ ကျန်းယဲ့က တရားထိုင်ကာ ကျင့်ကြံခြင်းထဲတွင် နစ်မြုပ်နေခဲ့သည်။

သို့သော်ငြားလည်း ဟုန်ဝူဧကရာဇ်နှင့် သူ၏အခြွေအရံများမှာ အိပ်ချင်စိတ် လုံးဝ မရှိကြချေ။

ချန်ချင်းက သူတို့လိုအပ်သည့် ပစ္စည်းစာရင်းကို ကြိုတင်ပြုစုထားနိုင်ပြီး အချိန်နှင့် ဟင်းလင်းပြင်ရေးရာ အထူးညှိနှိုင်းရေးဗျူရိုအနေဖြင့် တတ်နိုင်သမျှ ကူညီပြင်ဆင်ပေးမည်ဖြစ်ကြောင်း ယခင်ကတည်းက ပြောထားလေသည်။

ယခုအချိန်၌ သမ္မတအဆင့် အခန်း၏ ဧည့်ခန်းထဲတွင် ဟုန်ဝူဧကရာဇ်၊ ချီမင်းသား၊ ရှတာ၊ လီရှန်ချန်းနှင့် အခြားသူများက အတူတကွ ထိုင်နေကြပြီး လူတိုင်း၏ လက်ထဲတွင် မိုဘိုင်းဖုန်းတစ်လုံးစီ ကိုင်ဆောင်ထားကာ တိုင်းပြည်နှင့် လူမျိုးအတွက် အကျိုးရှိစေမည့် အမျိုးမျိုးသော ပစ္စည်းများ၊ နည်းပညာများနှင့် အကြံဉာဏ်များကိုပင် အာရုံစိုက် ရှာဖွေကာ ဆွေးနွေးနေကြသည်။

"အထွက်နှုန်းကောင်းတဲ့ ဒီကောက်ပဲသီးနှံ မျိုးစေ့တွေကို ငါတို့ သေချာပေါက် ယူသွားရမယ်..." ဝူလင်းက သူ၏ဖုန်းထဲရှိ ရွှေရောင် စပ်မျိုးစပါးပုံကို လက်ညှိုးထိုးပြကာ စိတ်လှုပ်ရှားစွာဖြင့် ပြောလိုက်၏။

"ပြီးတော့ ရုပ်ပုံတွေရော၊ စာတွေရော ပါဝင်တဲ့ ဒီရိုးရှင်းတဲ့ ကူးစက်ရောဂါကာကွယ်ရေး လက်စွဲစာအုပ်ကလည်း တကယ်ကို အကောင်းစားပဲ..." လီရှန်ချန်းက သူ၏ မုတ်ဆိတ်မွေးများကို သပ်ရင်း တွေးတောစွာဖြင့် ဆိုလေသည်။

"ဘိလပ်မြေတဲ့... ခမည်းတော်... ဒီဘိလပ်မြေကို ကြည့်ပါဦး... မြို့တွေနဲ့ လမ်းတွေ တည်ဆောက်တဲ့နေရာမှာ အံ့မခန်း ခိုင်မာတယ်တဲ့.. သားတော်တို့ဆီက အင်္ဂတေတွေ၊ ထုံးတွေထက် အများကြီး သာလွန်တယ်..." ချီမင်းသားမှာ ဝမ်းသာလွန်းသဖြင့် ခုန်ပေါက်မတတ် ဖြစ်နေရသည်။

ရှတာ၏ မျက်ဝန်းများက သံမဏိချက်လုပ်သည့် မီးဖိုကြီး၏ ရိုးရှင်းသော ပုံစံကြမ်းတစ်ခုကို ကြည့်ကာ လင်းလက်သွားလေသည်။ "အကယ်၍ စစ်သည်တွေအားလုံးသာ ဒီလို အကောင်းစား သံမဏိချပ်ဝတ်တွေကို ဝတ်ဆင်နိုင်ပြီး ဒီလောက် ထက်မြက်တဲ့ ဓားတွေကို ကိုင်ဆောင်နိုင်မယ်ဆိုရင် မြောက်ပိုင်းက လူရိုင်းတွေကို ဘာလို့ မချေမှုန်းနိုင်ဘဲ နေပါ့မလဲ..."

အဖွဲ့သားများက သူတို့၏ ဉာဏ်ပညာနှင့် ခွန်အားများကို ပေါင်းစပ်ကာ လွန်ခဲ့သော နှစ်ရက်အတွင်း သူတို့၏ လေ့လာတွေ့ရှိချက်များကို အခြေခံ၍ မင်မင်းဆက်အတွက် အရေးတကြီး လိုအပ်နေသည့်အရာများ၊ လက်ရှိ ပြဿနာများကို ဖြေရှင်းပေးနိုင်မည့်အရာများ သို့မဟုတ် ရေရှည်ဖွံ့ဖြိုးတိုးတက်မှုအတွက် အခြေခံအုတ်မြစ် ချပေးနိုင်မည့်အရာများအကြောင်းကို ပြင်းပြင်းထန်ထန် ဆွေးနွေးခဲ့ကြသည်။

စိုက်ပျိုးရေးမှသည် ကျန်းမာရေးစောင့်ရှောက်မှုအထိ၊ စစ်လက်နက်စက်မှုလုပ်ငန်းမှသည် အခြေခံအဆောက်အအုံများအထိ စီမံကိန်းစာရင်းများက ဆက်လက်၍ တိုးပွားလာကာ ပိုမို အသေးစိတ်ကျလာလေသည်။

ထိုညက အခန်းထဲတွင် မီးရောင်များ လင်းထိန်နေပြီး လူတိုင်းက မောပန်းမှုမရှိဘဲ ခွန်အားများ ပြည့်ဝနေကာ သူတို့ တွေ့မြင်ကြားသိခဲ့ရသည်များကို မင်မင်းဆက်၏ ကြီးပွားချမ်းသာမှုအတွက် လက်ဆုပ်လက်ကိုင်ပြနိုင်သော အကူအညီများအဖြစ် မည်သို့ပြောင်းလဲရမည်ကိုသာ တွေးတောနေခဲ့ကြသည်။

နောက်တစ်နေ့ နံနက်တွင် ကျန်းယဲ့ ဟိုတယ်စားသောက်ဆိုင်သို့ ရောက်ရှိလာသောအခါ အဘိုးကြီးကျူးနှင့် သူ၏အဖွဲ့က နေရာယူထားပြီးဖြစ်သည်ကို တွေ့လိုက်ရသည်။

သူတို့က နံနက်စာ စားနေစဉ်မှာပင် ချန်ချင်း၊ လင်ရှောင်နှင့် အခြားသူများနှင့် တစ်စုံတစ်ခုကို တိုးတိုးတိတ်တိတ် ဆွေးနွေးနေကြပြီး သူတို့ရှေ့တွင် စာများ အပြည့်ရေးထားသော စာရွက်များကို ဖြန့်ခင်းထားချေသည်။

ကျန်းယဲ့ အနီးသို့ ချဉ်းကပ်သွားချိန်တွင် အထွက်နှုန်းကောင်းပြီး မိုးခေါင်ဒဏ်ခံနိုင်သော မျိုးစေ့များ၊ အခြေခံ ဆေးပညာလက်စွဲ၊ ရိုးရှင်းသော သံမဏိချက်နည်းပညာ နှင့် အခြေခံ ဘိလပ်မြေ ဖော်စပ်နည်း စသည့် စကားလုံးများကို ကြားလိုက်ရသည်။ သူတို့က ၎င်းတို့ကို ပြန်လည်ယူဆောင်သွားရမည့် ဒေသထွက် အထူးကုန်ပစ္စည်းများအဖြစ် ရည်ညွှန်းနေကြပြီး ချန်ချင်းထံမှ ဖြစ်နိုင်ခြေနှင့် ကြိုတင်ကာကွယ်ရမည့် အချက်များကို အတည်ပြုနေကြခြင်း ဖြစ်၏။

ကျန်းယဲ့က ပြုံးလိုက်ရုံသာ ပြုံးလိုက်ပြီး ထပ်မံ ဝင်ရောက်မစွက်ဖက်တော့ချေ။

နိုင်ငံစီးပွားရေးနှင့် ပြည်သူ့ဘဝ နေထိုင်မှုတို့နှင့် သက်ဆိုင်နေသော ဤဝယ်ယူရေးစာရင်းကို ညှိနှိုင်းရန်နှင့် စိစစ်ရန်အတွက် ချန်ချင်းကဲ့သို့သော ကျွမ်းကျင်သူများထံ အပ်နှံထားခြင်းက အသင့်လျော်ဆုံးဖြစ်ကြောင်း သူ ကောင်းစွာ သိရှိထားပေသည်။

ဟုန်ဝူဧကရာဇ်နှင့် အခြား အုပ်ချုပ်သူများ၊ ဆုံးဖြတ်ချက်ချမှတ်သူများသည် မင်မင်းဆက်၏ အရေးတကြီးဆုံး လိုအပ်ချက်များကို သူ့ထက် များစွာ ပို၍ နားလည်သဘောပေါက်ကြချေသည်။

သူက အားလပ်ချိန် ရသွားသည့်အတွက် ဝမ်းသာသွားပြီး နံနက်စာ သွားယူလိုက်၏။

နံနက်ခင်းတွင် စာရင်း အပြီးသတ်သွားပြီးနောက် ချန်ချင်းက ဤလေးလံလှသော စျေးဝယ်စာရင်းကို ယူဆောင်ကာ ပြင်ဆင်မှုများ စတင်ရန် အလျင်အမြန် ထွက်ခွာသွားလိာက်သည်။

ထို့နောက် ကျန်းယဲ့က သူတို့ကို ခေတ်မီ သင်္ဘောကျင်းတစ်ခုနှင့် စတော့အိတ်ချိန်းတစ်ခုသို့ ဦးဆောင်ခေါ်သွားလိုက်သည်။

ဧရာမ သင်္ဘောကျင်းကြီးထဲတွင် တိမ်တိုက်များဆီသို့ ထိုးတက်နေသော နဂါးကရိန်းကြီးများနှင့် သင်္ဘောလွန်းကျင်းထဲတွင် ပုံပေါ်လာနေသော တန်ချိန်သောင်းချီရှိသည့် ဧရာမသင်္ဘောကြီးများကို မြင်တွေ့ရသည့်အခါ ဟုန်ဝူဧကရာဇ်နှင့် သူ၏အခြွေအရံများမှာ နက်ရှိုင်းစွာ အံ့အားသင့်သွားကြရပြန်သည်။

ထိုခေတ်အခါက မင်မင်းဆက်၏ သင်္ဘောတည်ဆောက်ရေး နည်းပညာက ကမ္ဘာပေါ်တွင် အကောင်းဆုံးဖြစ်ခဲ့သော်လည်း သူတို့ရှေ့မှ မြင်ကွင်းက သူတို့၏ စိတ်ကူးယဉ်နိုင်စွမ်းကို ကျော်လွန်နေဆဲပင်။

သူတို့က သေချာစွာ လေ့လာစောင့်ကြည့်ပြီး ရှင်းလင်းချက်များကို နားထောင်ခဲ့ကြရာ သင်္ဘောတည်ဆောက်ခြင်း၏ အခြေခံမူများစွာကို ရှေးခေတ်မှ ဆင်းသက်လာခဲ့ခြင်း ဖြစ်သော်လည်း ပစ္စည်းများ၏ သိပ္ပံပညာ၊ စွမ်းအင်စနစ်များ၊ ဂဟေဆက်နည်းပညာနှင့် အခြားရှုထောင့်များတွင် နှောင်းခေတ်ကာလများ၌ ကြီးမားလှသော အပြောင်းအလဲများ ဖြစ်ပေါ်ခဲ့ကြောင်း သိရှိလိုက်ရသဖြင့် သူတို့အတွက် အလွန် အကျိုးရှိခဲ့သည်။

သူတို့ စတော့ရှယ်ယာ အရောင်းအဝယ် စျေးကွက်ထဲသို့ ခြေချလိုက်သည့်အခါ ကြီးမားလှသော အီလက်ထရောနစ် မျက်နှာပြင်ပေါ်တွင် အဆက်မပြတ် ခုန်ပေါက်နေသော ဂဏန်းများကို မြင်တွေ့ခဲ့ရပြီး ဖယောင်းတိုင်ဇယားများ၊ စျေးနှုန်းကန့်သတ်ချက်များနှင့် မာဂျင်အရောင်းအဝယ် စသည့် မရင်းနှီးသော ဝေါဟာရများ၏ ရှင်းလင်းချက်များကို ကြားခဲ့ရသည်။

မမြင်ရသော ဤစစ်မြေပြင်ကြီးထဲသို့ နေ့စဉ် ဝင်ထွက်စီးဆင်းနေသည့် နက္ခတ္တဗေဒကိန်းဂဏန်းလောက်ရှိသည့် ငွေကြေးပမာဏကို သိရှိလိုက်ရချိန်တွင် သူတို့ အမှန်တကယ်ပင် အံ့သြမှင်သက်သွားကြရသည်။

ဘောဂဗေဒကို ကျွမ်းကျင်စွာ တတ်မြောက်ထားကြသော လီရှန်ချန်း၊ ဝူလင်းနှင့် အခြား နန်းတွင်းအမတ်များ၏ မျက်ဝန်းများတွင် မယုံနိုင်လောက်အောင် နက်ရှိုင်းသော အမူအရာများ ရှိနေချေသည်။

ငွေကြေးသည် ဤနည်းလမ်းဖြင့် စီးဆင်းကာ လည်ပတ်နိုင်ကြောင်းကို သူတို့ နားလည်သဘောပေါက်သွားကြရသည်။

အခြေခံစီးပွားရေး ယုတ္တိဗေဒနှင့် အင်အားစုများသည် နိုင်ငံတစ်နိုင်ငံ၏ တက်ကြွမှုနှင့် ကျဆင်းမှုတို့နှင့်လည်း ဆက်စပ်နေချေသည်။

ကြိုတင်စီစဉ်ထားသော လူသူကင်းမဲ့သည့် လမ်းမတစ်ခုပေါ်တွင် ကျန်းယဲ့က လက်ကိုဝှေ့ယမ်းကာ ရင်းနှီးကျွမ်းဝင်နေသည့် အချိန်ခရီးသွား ဘတ်စ်ကားကို ဆင့်ခေါ်လိုက်၏။

ချန်ချင်း၊ လင်ရှောင်နှင့် အချိန်နှင့် ဟင်းလင်းပြင်ရေးရာ အထူးညှိနှိုင်းရေးဗျူရိုမှ အခြားဝန်ထမ်းများက ဟုန်ဝူဧကရာဇ်တို့၏ စာရင်းတွင် ပါဝင်သော ဂရုတစိုက် ပြင်ဆင်ထားသည့် အမျိုးမျိုးသော ထောက်ပံ့ရေးပစ္စည်းများနှင့်အတူ ထိုနေရာတွင် ကြိုတင်စောင့်ဆိုင်းနေကြပြီ ဖြစ်သည်။

ချိပ်ပိတ်ထားသော စာရွက်စာတမ်းများနှင့် ကောက်ပဲသီးနှံ မျိုးစေ့များမှအစ နမူနာပစ္စည်းအချို့နှင့် စက်ကိရိယာများအထိ အရာအားလုံးကို ကားပေါ်သို့ ရွှေ့ပြောင်းကာ သပ်ရပ်စွာ စီစဉ်ထားလိုက်သည်။

အရာအားလုံး အဆင်သင့်ဖြစ်သွားသောအခါ ဟုန်ဝူဧကရာဇ်က ချန်ချင်းဆီသို့ လျှောက်သွားလိုက်၏။ ပုံမှန်အားဖြင့် ဂုဏ်သိက္ခာကြီးမားလှသော ဤဧကရာဇ်၏ မျက်ဝန်းများတွင် ယခုအခါ စစ်မှန်သော စိတ်လှုပ်ရှားမှုများ အထင်းသား ပေါ်လွင်နေချေသည်။

သူက လက်ကိုမြှောက်ကာ ချန်ချင်းနှင့် သူ၏အနောက်ရှိ အချိန်နှင့် ဟင်းလင်းပြင်ရေးရာ အထူးညှိနှိုင်းရေးဗျူရိုမှ အဖွဲ့ဝင်အားလုံးကို လေးနက်စွာ အရိုအသေပေးလိုက်ပြီး သူ၏အသံက တည်ငြိမ်ကာ ခွန်အားများ ပြည့်ဝနေ၏။

"မိတ်ဆွေလေးချန်.... မိတ်ဆွေလေးလင် ပြီးတော့ အားလုံးပဲ... လွန်ခဲ့တဲ့ရက်ပိုင်းတွေအတွင်း မင်းတို့ရဲ့ အပင်ပန်းခံ ကြိုးစားပေးမှုနဲ့ ပေးဆပ်မှုတွေအတွက် ကျေးဇူးတင်ပါတယ်... ဒီကျေးဇူးကို ဟုန်ဝူဧကရာဇ်က မှတ်ထားပါ့မယ်... မင်မင်းဆက်ကလည်း မှတ်ထားမှာပါ..."

ချန်ချင်းက အမြန်ပြုံးကာ လက်ကိုဝှေ့ယမ်းလိုက်ပြီး သူ၏စကားများက ရိုးသားကာ ရိုသေလေးစားမှုများဖြင့် ပြည့်နှက်နေခဲ့သည်။ "အရှင်မင်းကြီး မြှောက်စားလွန်းပါပြီ... ဒါက ကျွန်တော်တို့ လုပ်သင့်လုပ်ထိုက်တာတွေပါ..."

"အကယ်၍သာ အဲ့ဒီအချိန်က အရှင်မင်းကြီးက သုံးပေရှည်တဲ့ ဓားကိုကိုင်စွဲပြီး တာတာတွေကို နှင်ထုတ်ကာ တရုတ်ပြည်ကို ပြန်လည်မတည်ဆောက်နိုင်ခဲ့ရင်... ဟန်လူမျိုးတွေအတွက် ဒီကျယ်ပြောလှတဲ့ မြေကြီးကို ပြန်မယူနိုင်ခဲ့ရင်... ဟန်လူမျိုးတွေရဲ့ ရိုးရာဝတ်စုံနဲ့ ကျောရိုးကို မဆက်ခံနိုင်ခဲ့ရင်... နောင်လာနောက်သားတွေ ဘယ်လောက်တောင် ပိုပြီး ဆင်းရဲဒုက္ခ ရောက်ကြရဦးမလဲဆိုတာ မသိနိုင်ပါဘူး..."

"အရှင်မင်းကြီးက ပရမ်းပတာဖြစ်မှုတွေကို အဆုံးသတ်ပြီး တိုင်းပြည်ကို စည်းစနစ်ကျအောင် ပြန်လည်လုပ်ဆောင်ခဲ့တယ်.... ပြည်သူတွေရဲ့ ခွန်အားကို တန်ဖိုးထားပြီး မင်မင်းဆက်ရဲ့ နှစ်သုံးရာ အုပ်ချုပ်ရေးအတွက် အခြေခံအုတ်မြစ် ချပေးခဲ့တယ်... အရှင်မင်းကြီးရဲ့ အောင်မြင်မှုတွေက မျိုးဆက်ပေါင်းများစွာအထိ တည်တံ့နေမှာပါ..."

"အရှင်မင်းကြီးနဲ့ မင်မင်းဆက်အတွက် ကျွန်တော်တို့ဘက်က တတ်နိုင်သလောက် လုပ်ပေးနိုင်ခဲ့တာက ကျွန်တော်တို့အတွက် ဂုဏ်ယူစရာပါပဲ..."

၎င်းကိုကြားသောအခါ ဟုန်ဝူဧကရာဇ်က ချန်ချင်းအား နက်ရှိုင်းစွာ ကြည့်လိုက်ပြီး မည်သည့်စကားမျှ ထပ်မပြောတော့သော်လည်း သူ၏မျက်ဝန်းများရှိ ကျေးဇူးတင်မှုနှင့် နားလည်မှုတို့က ပိုမိုနက်ရှိုင်းသွားရသည်။

ထို့နောက် ဟုန်ဝူဧကရာဇ်၊ ချီမင်းသား၊ ရှတာ၊ လီရှန်ချန်း၊ ဝူလင်း...

မဟာမင်မင်းဆက်မှ အဖွဲ့သားများက တစ်ယောက်ပြီးတစ်ယောက် ရှေ့ထွက်လာကာ လွန်ခဲ့သော ရက်အနည်းငယ်အတွင်း ရင်းနှီးကျွမ်းဝင်ခဲ့သော ချန်ချင်း၊ လင်ရှောင်နှင့် အခြားဝန်ထမ်းများကို လေးနက်စွာ နှုတ်ဆက်လိုက်ကြပြီးနောက် ဘတ်စ်ကားပေါ်သို့ အလှည့်ကျ တက်သွားလိုက်ကြသည်။

နောက်ဆုံးလူ ဘတ်စ်ကားပေါ်သို့ တက်သွားပြီး တံခါးများ ဖြည်းညင်းစွာ ပိတ်သွားချိန်တွင် ၎င်းက သုံးရက်ဟူသော အချိန်တိုလေးသာ နေထိုင်ခဲ့ရသော်လည်း သူတို့ကို အဆုံးမဲ့ ထိတ်လန့်အံ့သြမှုများနှင့် တွေးတောစရာများ ပေးစွမ်းနိုင်ခဲ့သည့် ဤအနာဂတ်ကမ္ဘာမှ ထွက်ခွာသွားတော့မည် ဖြစ်ကြောင်း ဆိုလိုနေလေသည်။

လူတိုင်းက ပြတင်းပေါက်အပြင်ဘက်သို့ အလိုအလျောက် လှမ်းကြည့်လိုက်ကြပြီး သူတို့၏ အကြည့်များက အဝေးရှိ မြင့်မားလှသော အဆောက်အအုံများ၏ မိုးကုပ်စက်ဝိုင်းနှင့် လမ်းမပေါ်ရှိ အဆုံးမဲ့ ကားမီးရောင်တန်းကြီးများကို လောဘတကြီး ကြည့်ရှုနေကြ၏။

ဤကြီးပွားချမ်းသာ၍ ငြိမ်းချမ်းကာ တက်ကြွနေသော မြင်ကွင်းကို သူတို့၏ မှတ်ဉာဏ်ထဲတွင် စွဲထင်သွားစေရန်နှင့် လွန်ခဲ့သော နှစ်ပေါင်းခြောက်ရာမှ ထိုအချိန်နှင့် ဟင်းလင်းပြင်ဆီသို့ ပြန်လည်သယ်ဆောင်သွားရန် သူတို့ အလိုရှိနေခဲ့ကြသည်။

ဘတ်စ်ကား ပြတင်းပေါက်အပြင်ဘက်တွင်မူ အထူးတာဝန်တစ်ခုကို သယ်ဆောင်ထားသည့် အချိန်ခရီးသွားဘတ်စ်ကားလေး တဖြည်းဖြည်း စက်နှိုးကာ လမ်းအဆုံးဆီသို့ ဦးတည်သွားချိန်တွင် ချန်ချင်းက အချိန်နှင့် ဟင်းလင်းပြင်ရေးရာ အထူးညှိနှိုင်းရေးဗျူရိုမှ ဝန်ထမ်းများအားလုံးကို ဦးဆောင်ကာ သပ်ရပ်စွာ တန်းစီရပ်နေပြီး တိတ်ဆိတ်စွာ အရိုအသေပေးနေကြလေသည်။

ထို့နောက် လူတိုင်း၏ အကြည့်အောက်တွင် ဘတ်စ်ကားက တဖြည်းဖြည်း ဝေဝါးကာ ဖောက်ထွင်းမြင်လာရပြီး နောက်ဆုံးတွင် ဟင်းလင်းပြင်ထဲသို့ ပေါင်းစည်းသွားသည့်အလား သူတို့၏ မြင်ကွင်းမှ လုံးဝ ပျောက်ကွယ်သွားတော့သည်။ လူသူကင်းမဲ့နေသော လမ်းမကြီးတစ်ခုနှင့် အချိန်နှင့် ဟင်းလင်းပြင်ကို ကျော်လွန်သွားသည့် မေ့မရနိုင်သော မှတ်ဉာဏ်တစ်ခုကိုသာ ချန်ရစ်ထားခဲ့တော့သည်။