အခန်း ၄၄၉

အခန်း (၄၄၉) ဝန်ထမ်းများ ခန့်အပ်ခြင်း

​ကျန်းယဲ့က စိတ်ထဲမှ တွေးလိုက်သပြီး စနစ် မျက်နှာပြင်ကို ခေါ်ထုတ်လိုက်သည်။

​ဒီတာဝန်ကနေ ရလာတဲ့ အမှတ် ၂၀,၀၀၀ က သူ့အကောင့်ထဲ ဝင်လာခဲ့ပြီ ဖြစ်သည်။ ကျန်နေသေးတဲ့ အမှတ် ၅,၀၀၀ နဲ့ ပေါင်းလိုက်ရင် သူ၏ စုစုပေါင်း အမှတ်တွေက အခုဆိုလျှင် ၂၅,၀၀၀ အထိ ရောက်ရှိသွားပြီ ဖြစ်၏။

​ထို့နောက် သူ၏ အကြည့်က အမှတ်များ လဲလှယ်သည့် နေရာသို့ တိုက်ရိုက် ကျရောက်သွားပြီး ပထမ ရွေးချယ်စရာ နှစ်ခုကို ကျော်ကာ တတိယနှင့် စတုတ္ထအချက်များကို အာရုံစိုက်လိုက်သည်။

​၃။ စိတ်ကြိုက် ခရီးစဉ်များ ဖန်တီးခြင်း - တစ်ခုလျှင် အမှတ် ၂၀,၀၀၀

​၄။ လျှို့ဝှက်ခရီးသွားနေရာများကို ဖွင့်လှစ်ခြင်း - တစ်နေရာလျှင် အမှတ် ၃၀,၀၀၀

​လက်ရှိတွင် သူ၏လက်ထဲ၌ စိတ်ကြိုက် ခရီးစဉ်တစ်ခုကို လဲလှယ်ရန်အတွက် အမှတ် အလုံအလောက် ရှိနေချေပြီ။

​သို့သော် အနည်းငယ် စိတ်ရှည်ရှည်ထားပြီး နောက်ထပ် အမှတ် ၅,၀၀၀ ထပ်စုလိုက်လျှင် ထိုလျှို့ဝှက်ဆန်းကြယ်လှသော လျှို့ဝှက်ခရီးသွားနေရာကို ဖွင့်လှစ်နိုင်မည် ဖြစ်၏။

​"လျှို့ဝှက်ခရီးသွားနေရာတွေတဲ့လား..." ကျန်းယဲ့က တီးတိုးရေရွတ်လိုက်ရာ သူ၏ သိချင်စိတ်များက လုံးဝ နိုးကြားလာရသည်။

​ဒီနေရာက ဘယ်လိုနေရာမျိုး ဖြစ်နိုင်မလဲ...

​ရှာဖွေမတွေ့ရှိသေးတဲ့ ဟင်းလင်းပြင် အက်ကြောင်းတစ်ခုလား ဒါမှမဟုတ် အထူးအရင်းအမြစ်တွေ၊ အခွင့်အရေးတွေ ပါဝင်နေတဲ့ လျှို့ဝှက်နယ်မြေ တစ်ခုများလား...

​မထင်မှတ်ထားတဲ့ အံ့သြစရာတွေများ ရှိနေနိုင်မလား...

​လောလောဆယ်တွင် စတုတ္ထမြောက် ရွေးချယ်စရာသို့ မလှမ်းနိုင်သေးသဖြင့် ကျန်းယဲ့က တတိယ ရွေးချယ်စရာအပေါ်သို့ အာရုံပြောင်းလိုက်ပြီး စိတ်ထဲမှနေ၍ စနစ်အား မေးလိုက်၏။ "စနစ်... ဒီစိတ်ကြိုက် ခရီးစဉ်များ ဖန်တီးခြင်းက အတိအကျ ဘယ်လို အလုပ်လုပ်တာလဲ..."

​"၁၉၃၇ လိုမျိုး သတ်မှတ်ထားတဲ့ ကမ္ဘာတစ်ခုကနေ ခရီးသွားတွေကို ဘလူးစတားကို လာလည်ဖို့ ဆွဲဆောင်မယ့် အစီအစဉ်မျိုး ဖန်တီးလို့ရလား... ဒါမှမဟုတ် ဘလူးစတားက ခရီးသွားတွေကိုပဲ တခြား ကမ္ဘာတွေကို ခေါ်သွားပေးမယ့် ခရီးစဉ်မျိုးကိုပဲ ဖန်တီးလို့ရတာလား..."

​【လက်ခံသူအား အကြောင်းပြန်ပါသည်။ စိတ်ကြိုက် ခရီးစဉ်ဖန်တီးခြင်း လုပ်ဆောင်ချက်သည် အဓိကအားဖြင့် ရုံးခွဲများ ဖွင့်လှစ်ပြီးဖြစ်သော ကမ္ဘာများနှင့် ကမ္ဘာမြေကြား နှစ်လမ်းသွား ခရီးစဉ်များကို စီစဉ်ရန် အသုံးပြုခြင်း ဖြစ်ပါသည်။ လက်ခံသူသည် လက်ရှိတွင် ၁၉၃၇ အတိုင်းအတာ၌ ရုံးခွဲ ဖွင့်လှစ်ထားခြင်း မရှိသေးသဖြင့် ထိုအတိုင်းအတာမှ ခရီးသွားများကို ဤလုပ်ဆောင်ချက် အသုံးပြု၍ တိုက်ရိုက် ခေါ်ယူ၍ မရနိုင်ပါ။】

​【မှတ်ချက် - ဤလုပ်ဆောင်ချက်ကို ရုံးခွဲများ ဖွင့်လှစ်ပြီးဖြစ်သော အခြားကမ္ဘာများတွင်သာ လက်ခံသူက အသုံးပြုနိုင်ပါသည်။ ၎င်းက တခြားကမ္ဘာများမှ လာရောက်လည်ပတ်သူများ ကမ္ဘာမြေသို့ လာရောက်လည်ပတ်ရန် သီးသန့် ခရီးစဉ်များကို စိတ်ကြိုက် ဖန်တီးခွင့် ပေးထားပါသည်။】

​ထိုအဖြေကို ကြားပြီးနောက် ကျန်းယဲ့မှာ နှမြောတသစွာဖြင့် သက်ပြင်းချလိုက်မိသည်။

​မျှော်လင့်ထားသည့်အတိုင်း စနစ်၏ စည်းမျဉ်းများက အလွန် တင်းကျပ်နေဆဲပင်။

​၁၉၃၇ မှ ဘိုးဘေးများအတွက် သီးသန့် လာရောက်၍ အနာဂတ်ကို ရှုစားပါဟူသော ခရီးစဉ် ဖန်တီးရန်မှာ လောလောဆယ်တွင် မဖြစ်နိုင်သေးကြောင်း ထင်ရှားနေခဲ့သည်။ သူတို့ဆီမှာ ရုံးခွဲ အရင်ဖွင့်ဖို့ လိုအပ်ပေမည်။

​ဒီအမှတ်တွေကို လောလောဆယ် သိမ်းထားလိုက်တာပဲ ကောင်းပါတယ်။

​အမှတ် ၃၀,၀၀၀ စုမိတာနဲ့ လျှို့ဝှက်ခရီးသွားနေရာတစ်ခုကို ဖွင့်ပြီး သွားကြည့်မယ်...

​ဘယ်သူသိမလဲ.. မထင်မှတ်ထားတဲ့ အံ့သြစရာတွေ ရှိလာနိုင်တာပဲလေ...

​သူက စိတ်ကြိုက် ခရီးစဉ်များမှ အကြည့်လွှဲလိုက်ပြီး စနစ် မျက်နှာပြင်ကို ပိတ်လိုက်သည်။

​နောက်ထပ် ရည်မှန်းချက်က ရှင်းလင်းသွားပြီ ဖြစ်သည်။

​အမှတ်တွေရဖို့ အစွမ်းကုန် ကြိုးစားရမည်။

​ကျန်းယဲ့က သူ၏ အတွေးများကို ဝန်ထမ်းများ ခန့်အပ်ရေး ကိစ္စဆီသို့ ပြန်လည် ဆွဲခေါ်လာလိုက်သည်။

​ချက်ချင်း ဆုံးဖြတ်ချက် မချသေးဘဲ သူက စိတ်ထဲမှနေ၍ စနစ်အား သတိထားကာ မေးလိုက်ပြန်သည်။ "စနစ်... ငါ ငှားထားတဲ့ ဝန်ထမ်းတစ်ယောက်က ငါ့ကို သစ္စာဖောက်ရင် ဒါမှမဟုတ် တာဝန်ထမ်းဆောင်နေရင်း တခြားကမ္ဘာမှာ သေသွားခဲ့ရင် ဘယ်လိုလုပ်ရမလဲ..."

​စနစ်က ပြတ်သား၍ အေးစက်သော တုံ့ပြန်မှုတစ်ခုကို အလျင်အမြန် ပေးလာခဲ့သည်။

​【စကြဝဠာပေါင်းစုံ ခရီးသွားအေဂျင်စီ၏ အကြီးအကဲတစ်ဦးအနေဖြင့် လက်ခံသူသည် ဝန်ထမ်းများကို အလုပ်မှ ထုတ်ပယ်ခွင့်နှင့် အပြစ်ပေးခွင့် အပါအဝင် ၎င်းတို့အပေါ် လုံးဝ စီမံခန့်ခွဲခွင့် အာဏာ ရှိပါသည်။ မှတ်ချက် - အသေးစိတ် သိရှိလိုပါက အချိန်နှင့် ဟင်းလင်းပြင် စီမံခန့်ခွဲမှု လုပ်ပိုင်ခွင့်များတွင် ကြည့်ရှုပါ။】

​【အချိန်ပြည့် ဝန်ထမ်းများသည် မတူညီသော ကမ္ဘာများကြား ဖြတ်သန်းသွားလာချိန်တွင် အခြေခံ အတိုင်းအတာ ကာကွယ်ရေးယန္တရားများကို ခံစားခွင့်ရရှိမည် ဖြစ်ပါသည်။ သူတို့အနေဖြင့် အချိန်နှင့် ဟင်းလင်းပြင် ခရီးသွားအေဂျင်စီ ဝန်ထမ်း ကျင့်ဝတ်စည်းကမ်းကို တင်းကျပ်စွာ လိုက်နာသရွေ့ သူတို့၏ အသက်အန္တရာယ်မှာ ဘေးကင်းလုံခြုံမည် ဖြစ်ပါသည်။】

​【သတိပေးချက် - စည်းကမ်းများကို တမင်တကာ ချိုးဖောက်သော သို့မဟုတ် မိမိတို့၏ လုပ်ငန်းတာဝန်များထက် ကျော်လွန်၍ အန္တရာယ်များသော လှုပ်ရှားမှုများတွင် ပါဝင်ပတ်သက်သော ဝန်ထမ်းများသည် အကျိုးဆက်အားလုံးအတွက် ၎င်းတို့ဘာသာ တာဝန်ယူရမည်ဖြစ်ပြီး စနစ်မှ မည်သည့် ကာကွယ်မှုမျှ ပေးမည် မဟုတ်ပါ။】

​【မှတ်ချက် - ခရီးသွားလုပ်ငန်းကို တိုးချဲ့ရန်အတွက် ခုနစ်ရက်အတွင်း ဝန်ထမ်းနှစ်ဦးကို ခန့်အပ်ပါ။】

​"ခုနစ်ရက် အချိန်ကန့်သတ်ချက်တဲ့လား..."

​ကျန်းယဲ့က မျက်ခုံးအနည်းငယ် ပင့်လိုက်၏။ သို့သော် အချိန် အများကြီး ကျန်နေသေးသဖြင့် သူ အလျင်စလို မဖြစ်ခဲ့ချေ။

​သူက အတွေးများကို စုစည်းကာ အသိစိတ် ပြန်ဝင်လာချိန်၌ ဖန်ဖန်၏ ဖြူဖွေးသေးသွယ်သော လက်လေးက သူ၏ မျက်လုံးရှေ့တွင် ဝှေ့ယမ်းနေသည်ကို မြင်လိုက်ရသည်။

​သူ အတွေးလွန်နေချိန်တွင် ဖန်ဖန်က သူ ငေးမောနေသည်ကို မြင်ပြီး သတိပြန်ဝင်လာစေရန် လက်လှမ်း၍ ခေါ်လိုက်ခြင်းပင်။

​ကျန်းယဲ့က ဝှေ့ယမ်းနေသော သူမ၏ လက်ကို ခပ်ဖွဖွ ပုတ်ထုတ်လိုက်ပြီး သူမကို ကြည့်လိုက်၏။

​'ဒီကောင်မလေးက ဝန်ထမ်းခန့်အပ်ရေး ယန္တရားကို အစပျိုးပေးတဲ့ အဓိက သော့ချက်ပဲ။ တကယ်ပဲ ဝန်ထမ်းခန့်တဲ့ နေရာမှာ ငါတို့တွေ ရေစက်တစ်ခုခု ရှိနေတာများလား...'

​ထို့အပြင် သူမသာ သူ့လူဖြစ်လာခဲ့လျှင် ကျင့်စဉ်နှင့် ပတ်သက်၍ သူမကို စမ်းသပ်ခိုင်းရန် ပိုမို စိတ်ချရမည် ဖြစ်သည်။ အဘယ်ကြောင့်ဆိုသော် စနစ် စာချုပ်က အနည်းဆုံးတော့ အကာအကွယ်တစ်ခု ပေးနိုင်မည် မဟုတ်ပါလော။

​ထိုသို့ တွေးမိလိုက်သောအခါ ကျန်းယဲ့က ဖန်ဖန်ကို ကြည့်လိုက်ပြီး ဉာဏ်များသော အပြုံးတစ်ခုက သူ၏ နှုတ်ခမ်းထက်တွင် အလိုအလျောက် ပေါ်လာခဲ့သည်... မဟုတ်သေးဘူး.... သဘောကျ နှစ်ခြိုက်တဲ့ အပြုံးမျိုးပဲ...

​ဖန်ဖန်က သူ၏ ရုတ်တရက် နှာဘူးကျကျ အပြုံးလေးကြောင့် ကျောရိုးတစ်လျှောက် စိမ့်တက်သွားသည်ကို ခံစားလိုက်ရပြီး အလိုအလျောက် နောက်သို့ ဆုတ်လိုက်မိသည်။

​သူမက သတိထားကာ မေးလိုက်၏။ "ကျန်း... ဒါရိုက်တာကျန်း... ရှင်... ရှင် သရဲပူးသွားတာလား... ဒါမှမဟုတ် ပြုစားခံလိုက်ရတာလား..."

​သူမ၏ တုံ့ပြန်မှုကို မြင်သောအခါ ကျန်းယဲ့က ချက်ချင်း အပြုံးကို ရပ်တန့်လိုက်ပြီး လေးနက်သော မျက်နှာအမူအရာကို ဖမ်းလိုက်လေသည်။ "ဖန်ဖန်... မင်း တကယ်ပဲ ငါ့နောက်ကို လိုက်ချင်တာလား..."

​ထိုသို့ ပြောလိုက်သည်နှင့် သူ၏ စကားက အနည်းငယ် တွေးစရာဖြစ်နေမှန်း သတိထားမိသွားသဖြင့် အမြန် ချောင်းဟန့်လိုက်ပြီး ထပ်ဖြည့်ပြောလိုက်ပြန်သည်။ "ငါ ဆိုလိုတာက... ငါတို့ ရီယဲ့ ခရီးသွားအေဂျင်စီရဲ့ တရားဝင်ဝန်ထမ်းတစ်ယောက် ဖြစ်ချင်လားလို့ မေးတာပါ..."

​ဖန်ဖန်၏ မျက်ဝန်းများက အံ့အားသင့်မှုများဖြင့် လင်းလက်သွားသော်လည်း ထိုအံ့သြမှုထဲတွင် သူမ နစ်မြုပ်မသွားခဲ့ချေ။ ထို့အစား သူမက အလျင်အမြန် တည်ငြိမ်သွားပြီး လေးနက်စွာ စတင် တွေးတောလေသည်။

​ချက်ချင်း သဘောတူမည့်အစား သူမက ရှင်းလင်းပြတ်သားစွာ မေးလိုက်၏။ "ဒါရိုက်တာကျန်း... ကျွန်မကို အရင် ပြောပြလို့ရမလား... ရှင့်ရဲ့ ခရီးသွားအေဂျင်စီမှာ အလုပ်လုပ်ရတဲ့ အကျိုးခံစားခွင့်နဲ့ လစာတွေက အတိအကျ ဘာတွေလဲ... ပြီးတော့ အဓိက လုပ်ရမယ့် တာဝန်တွေကရော ဘာတွေလဲ..."

​ဤမေးခွန်းနှစ်ခုက အလွန် အရေးကြီးချေသည်။

​အထက်ပါ အကျိုးခံစားခွင့်များဆိုသည်မှာ နောင်တွင် လုပ်ဆောင်ရမည့် အလုပ်အကြောင်းအရာများအပေါ် အခြေခံထားခြင်းပင်။

​အကယ်၍ အလုပ်က ကမ္ဘာမြေပေါ်က ခရီးသွားအေဂျင်စီလေးမှာ တံခါးစောင့်ရုံသက်သက်ဆိုလျှင်တော့ ထိုအကျိုးခံစားခွင့်ဆိုသည်တွေက သူမအတွက် မည်သည့် ဆွဲဆောင်မှုမှ ရှိမည်မဟုတ်ချေ။

​သို့သော် အကယ်၍ ထိုအလုပ်က ဘလူးစတားနှင့် မတူညီသော အခြားကမ္ဘာများကြား ဖြတ်သန်းသွားလာရမည်ဆိုလျှင်တော့...

​အကျိုးခံစားခွင့်တွေက ရိုးရိုးလေးနဲ့ အံ့မခန်း ဖြစ်နေမှာပဲ...

​သူမက အဲဒီလောက်ထိတောင် မတွေးရဲခဲ့ချေ။

​အချိန်နှင့် ဟင်းလင်းပြင် ခရီးသွားလမ်းညွှန် တစ်ယောက် ဖြစ်လာနိုင်တယ်ဆိုတာက သူ့အလိုလိုကို မယုံနိုင်စရာကောင်းတဲ့ အခွင့်ထူးတစ်ခုပင်။

​ထို့ကြောင့် အဲဒီအဆင့်သာဆိုရင် လစာမရရင်တောင် သူမဘက်က စိုက်ထုတ်ပေးဖို့ ပျော်ရွှင်နေမည်ပင်။

​သူမက လေးလေးနက်နက် မေးနေသည်ကို မြင်သောအခါ ကျန်းယဲ့က ဝေ့လည်ကြောင်ပတ် မလုပ်တော့ဘဲ ပွင့်ပွင့်လင်းလင်းပင် ပြောပြလိုက်သည်။

​"အလုပ်က ရိုးရှင်းတယ်ဆိုပေမယ့်လည်း... သိပ်တော့ မရိုးရှင်းဘူး..."

​"အဓိက ရည်ရွယ်ချက်က မတူညီတဲ့ အခြားကမ္ဘာတွေကို ဖြတ်သန်းပြီး ခရီးသွားတွေကို လမ်းညွှန်ပေးဖို့နဲ့ တခြားကမ္ဘာတွေက ထူးခြားတဲ့ ခရီးသွားနေရာတွေကို သွားရောက်လည်ပတ်ဖို့ပဲ..."

​"တစ်ခါတလေကျရင် တခြားကမ္ဘာတွေကို သွားပြီး ခရီးသွားတွေကို ဆွဲဆောင်ရမယ်... ပြီးရင် သူတို့ကို ကမ္ဘာမြေကို လည်ပတ်ဖို့ ခေါ်လာပေးရမယ်..."

​"တစ်ခါတလေမှာကျတော့လည်း ကမ္ဘာမြေက ခရီးသွားတွေကို တခြားကမ္ဘာတွေဆီ ခေါ်သွားပြီး သူတို့ရဲ့ ရိုးရာဓလေ့တွေ၊ ယဉ်ကျေးမှုတွေကို လေ့လာခံစားစေရမယ်..."

​စကားပြောပြီးနောက် ကျန်းယဲ့က အကျိုးခံစားခွင့်နှင့် လစာများကို စတင် တွေးတောလိုက်သည်။

​ပိုက်ဆံမရှားသည့် ဖန်ဖန်လို ဒုတိယမျိုးဆက် သူဌေးသမီးတစ်ယောက်အတွက် ငွေကြေးက သိပ်ပြီး ဆွဲဆောင်မှု မရှိလှချေ။ သူမ အလိုအပ်ဆုံးအရာမှာ သေချာပေါက် ကျင့်ကြံခြင်း အရင်းအမြစ်များပင်။

​"အကျိုးခံစားခွင့်တွေနဲ့ ပတ်သက်ပြီးတော့..." ကျန်းယဲ့က ခေတ္တမျှ တုံ့ဆိုင်းသွားပြီးနောက် အလွန်ရိုးသားသည်ဟု သူယူဆသော ကမ်းလှမ်းချက်တစ်ခုကို ပေးလိုက်သည်။ "တစ်လကို အခြေခံလစာအနေနဲ့ အဆင့်နိမ့် ဝိညာဉ်ကျောက်တုံး ငါးဆယ် ပေးမယ်..."

​ဤအခြေအနေက ကျန်းယဲ့အတွက် အရှုံးမရှိသော ကမ်းလှမ်းမှုတစ်ခု ဖြစ်သည်။ အကြောင်းမှာ ဝန်ထမ်းတစ်ဦးက ခရီးသွားတာဝန်တစ်ခုကို အောင်မြင်စွာ ပြီးမြောက်သွားသရွေ့ စနစ်၏ ဆုလာဘ် အများစုကို သူကသာ ရရှိမည်ဖြစ်ပြီး ဝန်ထမ်းကို ပေးချေရမည့် ဝိညာဉ်ကျောက်တုံးများ၏ ကုန်ကျစရိတ်ကို အပြည့်အဝ ကာမိနိုင်သောကြောင့် ဖြစ်သည်။

​"ကဲ... အခု မင်း ဝင်လုပ်ဖို့ ဆန္ဒရှိပြီလား..." ကျန်းယဲ့က ပြုံးကာ မေးလိုက်၏။

​"ရှိတယ်... ရှိတယ်... ဟီးဟီးး... သိပ်ကို ဆန္ဒရှိတာပေါ့..." ဖန်ဖန်က ချက်ချင်းဆိုသလို ပြန်ဖြေလိုက်ပြီး ကြက်ကလေး ဆန်စားသကဲ့သို့ ခေါင်းကို ဆက်တိုက်ညိတ်ပြနေကာ သူမ၏ မျက်နှာပေါ်တွင် ဝမ်းသာပျော်ရွှင်မှုများ အထင်းသား ပေါ်လွင်နေတော့သည်။

အခန်း ၄၄၉ပြီး၏။