အခန်း ၄၅၃
Vol. 46 Ch. 453
အခန်း (၄၅၃) အချိန်နှင့် ဟင်းလင်းပြင် ခရီးသွားလမ်းညွှန်
သူတို့နှစ်ဦးက နောက်သို့လှည့်ကာ ပြန်လျှောက်သွားကြပြီး ဖန်ဖန်က သူတို့၏နောက်မှ လိမ္မာပါးနပ်စွာဖြင့် လိုက်ပါလာကာ ခရီးသွားအေဂျင်စီ၏ ဒုတိယထပ်သို့ ပြန်လာခဲ့ကြသည်။
အပေါ်ထပ် ဧည့်ခန်းသို့ ရောက်သောအခါ ဖန်ဖန်က အတွေ့အကြုံရှိ ဝန်ထမ်းကောင်းပီသစွာဖြင့် ကျန်းယဲ့နှင့် ချန်ချင်းတို့အတွက် ရေနွေးကြမ်း တစ်ခွက်စီ အလျင်အမြန် ဖျော်ပေးလိုက်ပြီး ဘေးသို့ တိတ်တဆိတ် ဖယ်ပေးလိုက်သည်။
ချန်ချင်းက ဆိုဖာပေါ်တွင် ထိုင်လိုက်ပြီး ရှေ့သို့ အနည်းငယ် ကိုင်းညွှတ်ကာ မျက်နှာချင်းဆိုင်ရှိ ကျန်းယဲ့ကို စူးစိုက်ကြည့်နေပြီး သူ၏အမူအရာက ယခင်ကထက် များစွာ ပို၍ လေးနက်တည်ကြည်နေချေသည်။
"ကျန်းယဲ့... စောစောက မင်းပြောတာ တကယ်လား..."
ကျန်းယဲ့ကလည်း သူ့ကို လေးနက်စွာ ပြန်ကြည့်လိုက်ပြီး သူ၏ လေသံက ပြတ်သားနေ၏။ "ဒါပေါ့ တကယ်ပြောတာ... ကျွန်တော်က ဒီလိုကိစ္စမျိုးကို နောက်ပြောင်မယ့်သူနဲ့ တူနေလို့လား..."
အတည်ပြုချက်ကို ရရှိလိုက်သည်နှင့် ချန်ချင်း၏ ရင်ခုန်သံများက အလိုအလျောက် မြန်ဆန်လာရသည်။
သူက မထိန်းနိုင်တော့ဘဲ အိတ်ကပ်ထဲသို့ လက်နှိုက်ကာ ဆေးလိပ်ဘူးကို ဆွဲထုတ်လိုက်ပြီး ဆေးလိပ်တစ်လိပ်ကို လက်ချောင်းများကြားတွင် ညှပ်ထားလိုက်သော်လည်း မီးမညှိခဲ့ချေ။ သူ၏ အလွန်အမင်း စိတ်လှုပ်ရှားနေသော အတွေးများကို ဤအကျင့်ပါနေသော လုပ်ရပ်ဖြင့် တည်ငြိမ်စေရန် ကြိုးစားနေသည့်အလား လက်ချောင်းများကြားတွင် သတိလွတ်စွာဖြင့် လှည့်ကစားနေမိသည်။
"မင်းရဲ့ ခရီးသွားအေဂျင်စီမှာ ငါလုပ်ရမယ့် အလုပ်က ဘယ်လိုမျိုးလဲ..." ချန်ချင်းက စကားလုံးများကို သေချာ ရွေးချယ်ကာ မေးလိုက်၏။ "မင်းလိုမျိုး... ငါကော အဲဒီ... နေရာတွေကို သွားခွင့်ရမှာလား... ဒါမှမဟုတ် ဘလူးစတားပေါ်က ဧည့်ကြိုနဲ့ ထောက်ပံ့ရေး အပိုင်းလောက်ပဲ တာဝန်ယူပေးရမှာလား..."
ကျန်းယဲ့က မည်သူ့ကိုမျှ အချိန်ဆွဲမနေတော့ဘဲ အဓိက အဖြေကို တိုက်ရိုက်ပင် ပေးလိုက်၏။
"ခရီးသွားအေဂျင်စီရဲ့ အချိန်ပြည့်ဝန်ထမ်းတစ်ယောက် ဖြစ်လာပြီးရင် အဓိကအလုပ်က ခရီးသွားတွေကို လမ်းညွှန်ပေးရမှာပဲ... ခရီးသွားတွေကို မတူညီတဲ့ တခြားကမ္ဘာတွေကို သွားလည်ဖို့ လမ်းပြပေးရမယ်... ဒါမှမဟုတ် တခြားကမ္ဘာက ခရီးသွားတွေကို ဘလူးစတားကို လည်ပတ်ဖို့ ခေါ်လာပေးရမယ်..."
"ရိုးရိုးလေး ပြောရရင် အချိန်နှင့် ဟင်းလင်းပြင် ခရီးသွားလမ်းညွှန်တစ်ယောက် ဖြစ်လာဖို့ပါပဲ..."
"အချိန်နှင့် ဟင်းလင်းပြင်... ခရီးသွားလမ်းညွှန်..." ချန်ချင်းက ထိုစကားလုံးများကို ထပ်ခါတလဲလဲ တီးတိုးရေရွတ်ရင်း သူ၏ လက်ချောင်းများကြားရှိ ဆေးလိပ်ကို အနည်းငယ် ပုံပျက်သွားသည်အထိ သတိလွတ်စွာဖြင့် ဖိညှစ်လိုက်မိသည်။
ဒီအလုပ်က မယုံနိုင်လောက်အောင် စိတ်လှုပ်ရှားဖို့ကောင်းပြီး ဆွဲဆောင်မှုရှိတာပဲ....
ဒါက အချိန်နှင့် ဟင်းလင်းပြင်ကို ဖြတ်သန်း ခရီးသွားရတာလေ....
လက်ရှိအချိန်တွင် ကမ္ဘာမြေ တစ်ခုလုံး၌ ကျန်းယဲ့ တစ်ဦးတည်းသာ ဤအခွင့်ထူးကို ပိုင်ဆိုင်ထားခြင်း ဖြစ်သည်။
ယခုအခါ သူလည်း ထိုအခွင့်ထူးကို ပိုင်ဆိုင်နိုင်မည့် အခွင့်အရေးကို ရရှိနေပြီ ဖြစ်၏။
ကျန်းယဲ့က ချန်ချင်းကို အဖြေပေးရန် အလျင်စလို ဖိအားမပေးခဲ့ချေ။ ထို့အစား သူက လက်ဖက်ရည်ခွက်ကို ကောက်ကိုင်ကာ ဖြည်းညင်းစွာ သောက်လိုက်သည်။
ချန်ချင်းနှင့် ဖန်ဖန်တို့က မတူညီကြောင်း သူ သိထားလေသည်။
ဖန်ဖန်က အခြေခံအားဖြင့် မည်သည့် ချည်နှောင်မှု၊ စိုးရိမ်ပူပန်မှုမျှမရှိသော လွတ်လပ်သူ တစ်ဦးဖြစ်၏။
ချန်ချင်းကမူ အချိန်နှင့် ဟင်းလင်းပြင်ရေးရာ အထူးညှိနှိုင်းရေးဗျူရို၏ အပြစ်ဆိုဖွယ်မရှိသော နောက်ခံနှင့် တည်ငြိမ်သော အလုပ်တစ်ခု၊ မွန်မြတ်သော ရည်မှန်းချက်တစ်ခုနှင့် ရှုပ်ထွေးသော လူမှုဆက်ဆံရေးများ ရှိနေသည့် နိုင်ငံတော် ဝန်ထမ်းတစ်ဦး ဖြစ်သည်။
လူတိုင်း၏ လိုလားချက်များ၊ စိုးရိမ်ပူပန်မှုများနှင့် ကန့်သတ်ချက်များက မတူညီကြချေ။
သူသာ အချိန်နှင့် ဟင်းလင်းပြင် ခရီးသွားလမ်းညွှန်ခေါ်ယူမည်ဟု ကြေညာလိုက်ပါက ကမ္ဘာတစ်ဝန်းမှ ရေတွက်မရနိုင်သော ထိပ်တန်း အရည်အချင်းရှိသူများ လျှောက်ထားရန် စိတ်အားထက်သန်လာကြမည်ကို ကျန်းယဲ့ ကောင်းစွာ သိရှိထားလေသည်။
သို့သော် ၎င်းက လူတိုင်းဟာ မိမိတို့ ပိုင်ဆိုင်ထားသမျှကို စွန့်လွှတ်ကာ ဤအမည်မသိနှင့် အန္တရာယ်များလှသော ကြိုးပမ်းမှုထဲသို့ ဝင်ရောက်လာရန် ဆန္ဒရှိမည်ဟု ဆိုလိုခြင်း မဟုတ်ချေ။
ထို့ကြောင့် သူ ကမ်းလှမ်းလိုက်သည်နှင့် တစ်ဖက်လူက ကျေးဇူးတင်စွာဖြင့် အလျင်အမြန် ပြေးလာလိမ့်မည်ဟု သူက လွယ်လွယ်ကူကူ မမှတ်ယူထားခဲ့ချေ။
သူက ချန်ချင်းကို တွေးတောချိန်ဆရန်အတွက် လုံလောက်သော အချိန်ပေးထားလိုက်သည်။
ချန်ချင်းက ချက်ချင်း သဘောမတူသည်ကို မြင်သောအခါ ဖန်ဖန်က အနည်းငယ် အံ့သြသွားသော်လည်း ချန်ချင်း၏ နောက်ခံက သူမထက် များစွာ ပိုမိုရှုပ်ထွေးကြောင်း တွေးမိလိုက်သောအခါ သူမက သက်သာရာရသွားပြီး ဘေးတွင် တိတ်ဆိတ်စွာဖြင့်သာ စောင့်နေလိုက်သည်။
ချန်ချင်းက ခေါင်းငုံ့ထားပြီး သူ၏ လက်ချောင်းများက မီးမညှိရသေးသော ဆေးလိပ်ကို သတိလွတ်စွာဖြင့် ဆော့ကစားနေဆဲဖြစ်ကာ မိနစ်ဝက်ခန့် တိတ်ဆိတ်နေချေသည်။
ထို့နောက် သူက ရုတ်တရက် ခေါင်းမော့လာပြီး သူ၏ အကြည့်များက ကျန်းယဲ့ကို စူးရှစွာ ကြည့်လိုက်၏။ "မင်း ငါ့ကို ဘာလို့ ရွေးတာလဲ..."
သူက သူ့ကိုယ်သူ အတော်လေး အရည်အချင်းရှိသည်ဟု ယုံကြည်သော်လည်း အစားထိုး၍ မရနိုင်သော သူတစ်ယောက် မဟုတ်ကြောင်း သိထားပေသည်။
အချိန်နှင့် ဟင်းလင်းပြင်ရေးရာ အထူးညှိနှိုင်းရေးဗျူရိုအတွင်းနှင့် တစ်ကမ္ဘာလုံး အတိုင်းအတာဖြင့်ပင် သူ့ထက် ပိုမိုထူးချွန်ပြီး နောက်ခံပိုသန့်ရှင်းကာ ဤအခွင့်အရေးအတွက် ပိုမို စိတ်အားထက်သန်နေမည့်သူ အများအပြား ရှိနေချေသည်။
စနစ်အတွင်းမှ လူတစ်ယောက်ဖြစ်သော သူ့ကို ကျန်းယဲ့က အဘယ်ကြောင့် အထူးတလည် ကမ်းလှမ်းရသနည်း။
ကျန်းယဲ့က သူ၏ မျက်ဝန်းထဲမှ လေးနက်မှုနှင့် စူးစမ်းလိုစိတ်ကို ကြည့်ကာ အနည်းငယ် ပြုံးလိုက်ပြီး တည်ငြိမ်သော်လည်း ပြတ်သားစွာဖြင့် စကားလုံးတစ်ခွန်းတည်းကိုသာ ပြောလိုက်သည်။
"ယုံကြည်လို့..."
ချန်ချင်း၏ ရင်ထဲတွင် တစ်ချက်ခုန်သွားရသည်။
ကျန်းယဲ့က တည်ငြိမ်သော်လည်း ငြင်းပယ်၍မရနိုင်သော လေးနက်သည့် လေသံဖြင့် ဆက်ပြောလိုက်ပြန်သည်။ "ခရီးသွားအေဂျင်စီရဲ့ အဖွဲ့ဝင်တစ်ယောက် ဖြစ်လာပြီဆိုရင် မင်းက သာမန်လူတွေ စိတ်ကူးယဉ်နိုင်တာထက် အများကြီး ပိုလွန်ကဲတဲ့ လျှို့ဝှက်ချက်တွေ၊ စွမ်းအားတွေနဲ့ ထိတွေ့ရတော့မယ်ဆိုတဲ့ သဘောပဲ..."
"အရေးကြီးဆုံးက ကိုယ့်ရဲ့ အရည်အချင်းတွေ ဘယ်လောက် အင်အားကြီးလဲဆိုတာ မဟုတ်ဘူး... ပါးစပ်လုံဖို့၊ တာဝန်ယူမှု၊ တာဝန်ခံမှု အပြည့်ရှိဖို့.... ဘာလုပ်သင့်တယ် ဘာမလုပ်သင့်ဘူးဆိုတာကို သိဖို့.... မတူညီတဲ့ ကမ္ဘာတွေက လူတွေနဲ့ ဘယ်လို ဆက်ဆံရမလဲဆိုတာကို သိဖို့နဲ့ ကိုယ့်ပခုံးပေါ်က တာဝန်တွေကို နားလည်ဖို့က အရေးကြီးဆုံးပဲ..."
"အစ်ကိုချန်... ကျွန်တော်တို့ သိလာတာ အရမ်းကြီး မကြာသေးဘူးဆိုပေမယ့် အတူတူ ဖြေရှင်းခဲ့ရတဲ့ ပြဿနာတွေ အများကြီးရှိခဲ့တယ်... ကျွန်တော် ခင်ဗျားရဲ့ စရိုက်ကို ယုံကြည်သလို ခင်ဗျားရဲ့ အရည်အချင်းနဲ့ ဆင်ခြင်တုံတရား ရှိမှုကိုလည်း အသိအမှတ်ပြုတယ်..."
ထိုစကားများကို ကြားလိုက်ရချိန်တွင် ချန်ချင်း၏ ပုံမှန် ပြုံးစိစိမျက်နှာပေးက တဖြည်းဖြည်း ပျောက်ကွယ်သွားပြီး အမှန်တကယ် ယုံကြည်ခံရသည့် ခံစားချက်နှင့်အတူ အနည်းငယ် ရှက်ရွံ့မှုများက အစားထိုး ဝင်ရောက်လာရသည်။
သူက ရှားရှားပါးပါး အနည်းငယ် ရှက်သွားသည့်ဟန်ဖြင့် သူ၏ နှာခေါင်းကို ပွတ်သပ်ကာ ရယ်မောလိုက်လေသည်။ "ဒါရိုက်တာကျန်းက ငါ့အပေါ် ဒီလောက်ထိ အထင်ကြီးနေမယ်လို့ မထင်ထားဘူး..."
"အစ်ကိုချန်... ဒီကိစ္စက အလျင်စလို မလိုပါဘူး... ခင်ဗျား အိမ်ပြန်ပြီး သေချာပြန်စဉ်းစားလို့ရတယ်... မိသားစုနဲ့ တိုင်ပင်တာပဲဖြစ်ဖြစ်... အထက်လူကြီးတွေနဲ့ ဆွေးနွေးတာပဲဖြစ်ဖြစ် လုပ်လို့ရတယ်... မနက်ဖြန်ကျမှ အဖြေပြန်ပေးပါ..."
ဒါက ချန်ချင်းအတွက် ဘဝရဲ့ အရေးကြီးတဲ့ ဆုံးဖြတ်ချက်တစ်ခုဆိုတာကို သူ နားလည်ထားလေသည်။
သို့သော် ချန်ချင်းက ပြုံးကာ ခေါင်းယမ်းလိုက်ပြီး သူ၏ မျက်ဝန်းများက ထူးထူးခြားခြား ပြတ်သားသွားခဲ့သည်။
စောစောက တုံ့ဆိုင်းနေမှုများက ယုံကြည်လို့ဟူသော စကားလုံးရှေ့တွင် လုံးဝ ပျောက်ကွယ်သွားပုံရသည်။
"ဒါရိုက်တာကျန်း... မင်းက ငါ့ကို ဒီလောက်တောင် ယုံကြည်ပြီး ဒီလိုတွေ ပြောလာမှတော့ ငါ ချန်ချင်းကများ တွေဝေတုံ့ဆိုင်းနေမယ်.... ရှက်ပြုံးလေး ပြုံးနေမယ်ဆိုရင် ငါက ယောက်ျားတစ်ယောက် ဟုတ်ပါတော့မလား..."
"ထပ်စဉ်းစားနေစရာ မလိုတော့ဘူး.. ငါ လုပ်မယ်... ရီယဲ့ ခရီးသွားအေဂျင်စီကို ဝင်ပြီး အချိန်နှင့် ဟင်းလင်းပြင် ခရီးသွားလမ်းညွှန်တစ်ယောက် ဖြစ်ဖို့ ငါ ဆန္ဒရှိတယ်..."
ချန်ချင်း နောက်ဆုံးတွင် ခေါင်းညိတ်လိုက်သည်ကို မြင်သောအခါ ဖန်ဖန်၏ မျက်နှာပေါ်တွင် တောက်ပသော အပြုံးတစ်ခု ချက်ချင်း ပေါ်လာရသည်။
'ဒီလောက် ကြီးမားတဲ့ သွေးဆောင်မှုကို ဘယ်သူမှ ငြင်းဆန်နိုင်မှာ မဟုတ်ဘူးလေ...'
အချိန်နှင့် ဟင်းလင်းပြင်ခရီးသွားလမ်းညွှန် တစ်ယောက် ဖြစ်လာခြင်းဆိုသည်မှာ အဆုံးအစမဲ့သော ကမ္ဘာကြီးကို ကိုယ်တိုင်ကိုယ်ကျ စူးစမ်းလေ့လာနိုင်ပြီး စိတ်ကူးမယဉ်နိုင်လောက်သော အခွင့်အရေးများကို ရရှိနိုင်မည်ဖြစ်သည်။ ဓနဥစ္စာ၊ အဆင့်အတန်းနှင့် သာမန်ထက်လွန်ကဲသော စွမ်းအားများနှင့် ဗဟုသုတများအားလုံးကို အလွယ်တကူ ရရှိနိုင်မည် ဖြစ်၏။
ဒါက အလုပ်ပြောင်းရုံသက်သက် မဟုတ်ချေ... ဒါက လုံးဝ ဘဝသစ်တစ်ခုကို စတင်လိုက်ခြင်းပင်။
ဤကဲ့သို့သော အခွင့်အရေးမျိုးနှင့် ရင်ဆိုင်ရချိန်တွင် ၎င်းကို ငြင်းပယ်မည့် လူမိုက်မျိုး ကမ္ဘာပေါ်တွင် အလွန် နည်းပါးလိမ့်မည်ဟု သူမ ယုံကြည်ထားသည်။
ချန်ချင်းက ထိုသို့သော လူမိုက်မျိုး မဟုတ်ကြောင်း ထင်ရှားနေခဲ့သည်။
ချန်ချင်းက အလွယ်တကူ သဘောတူလိုက်သည်ကို မြင်သောအခါ ကျန်းယဲ့ကလည်း မတုံ့ဆိုင်းတော့ချေ။ သူက စိတ်ထဲမှ တွေးလိုက်ပြီး ဖန်ဖန်အား ပေးခဲ့သကဲ့သို့ပင် မှိန်ဖျော့ဖျော့အလင်းရောင်များ ထွက်ပေါ်နေသော ဝန်ထမ်း လက်စွဲစာအုပ် နှင့် ခရီးသွားလမ်းညွှန် ကျင့်ဝတ်စည်းကမ်းတို့ကို ချန်ချင်းထံသို့ ကမ်းပေးလိုက်သည်။
"အစ်ကိုချန်... ထုံးစံအတိုင်းပဲ... ဒါကို အရင် သေချာဖတ်ကြည့်လိုက်ဦး... ဖတ်ပြီးသွားလို့ အထဲမှာ ပါတဲ့အချက်တိုင်းကို လိုက်နာနိုင်တယ်လို့ ခံစားရရင် ကျွန်တော်တို့ စာချုပ် လက်မှတ်ထိုးကြတာပေါ့..." ဟု ကျန်းယဲ့က လေးနက်စွာ ပြောလိုက်သည်။
ချန်ချင်းက စာအုပ်ကို ယူလိုက်ပြီး သူ၏ နောက်ပြောင်နေသည့် အမူအရာများ ပျောက်ကွယ်သွားကာ စကားလုံးတစ်လုံးချင်းစီကို ဖြည်းညင်းစွာနှင့် သေချာစွာ ဖတ်ရှုလိုက်သည်။
ဤပါးလွှာသော စာရွက်အနည်းငယ်က အနာဂတ်တွင် သူ ရင်ဆိုင်ရမည့် ထူးခြားဆန်းကြယ်သော အခွင့်အရေးများနှင့် ကြီးမားလှသော အန္တရာယ်များကို ကန့်သတ်ထားမည်ဖြစ်ကြောင်း သူ ကောင်းစွာ သိရှိထား၏။
ခေတ္တကြာပြီးနောက် သူက ခေါင်းမော့လာပြီး ကျန်းယဲ့ကို ပြတ်သားသော အကြည့်ဖြင့် ကြည့်လိုက်သည်။ "ဒါရိုက်တာကျန်း... ဖတ်လို့ ပြီးသွားပြီ... အပေါ်က စည်းကမ်းချက်တွေကို ငါ အပြည့်အဝ နားလည်တယ်... ပြီးတော့ အဲဒါတွေကို လိုက်နာနိုင်တယ်လို့လည်း အာမခံတယ်..."
"ကောင်းပြီ..."
ကျန်းယဲ့က ခေါင်းညိတ်လိုက်ပြီး ထပ်မပြောတော့ဘဲ အချိန်နှင့် ဟင်းလင်းပြင်ဥပဒေသ၏ စွမ်းအားများ ပါဝင်နေသော အလုပ်ခန့်ထားမှု စာချုပ်ကို တိုက်ရိုက် ထုတ်ယူလိုက်သည်။
သူတို့နှစ်ဦးက အလင်းရောင် ကလောင်တံများကို ကိုယ်စီ ယူလိုက်ကြပြီး ပါတီ-က နှင့် ပါတီ-ခ အတွက် သတ်မှတ်ထားသော နေရာများတွင် လေးနက်စွာ လက်မှတ်ရေးထိုးကာ လက်ဗွေ နှိပ်လိုက်ကြ၏။
ထို့နောက် အလင်းရောင်များ လည်ပတ်သွားပြီး စာချုပ်ဖြစ်ပေါ်လာသည်နှင့်တပြိုင်နက် အလင်းတန်း နှစ်ခုက သူတို့နှစ်ဦး၏ ခန္ဓာကိုယ်ထဲသို့ အသီးသီး ဝင်ရောက်သွားလေတော့သည်။
အခန်း ၄၅၃ပြီး၏။