အခန်း ၁၉၈
Vol. 20 Ch. 198
အခန်း (၁၉၈)
လေဟာနယ်ပိတ်လှောင်ခြင်းအဆောင်၊ စုယွီ၏ သွေးမျိုးဆက်မူလအဆီအနှစ်ကို ဝါးမြိုခြင်း!
“မင်းက သေချင်နေတာပဲ! မင်းက မဟာချင်အင်ပါယာရဲ့ မင်းသားအညတရလေးတစ်ပါးမျှသာ ဖြစ်ပြီးတော့ ငါက ထာဝရရှင်သန်သူမိသားစုရဲ့ သခင်လေးကွ!”
“အင်အားမရှိတဲ့သူတွေကပဲ ကိုယ့်ရဲ့ အမှတ်အသားနောက်ခံကို လျှောက်ပြီး ကြွားဝါတတ်ကြတာမျိုးပဲ။” ချင်လော့က လှောင်ပြုံးပြုံးကာ တိုးတိုးလေး ရေရွတ်လိုက်ပြီး တစ်ချက်တည်းဖြင့် ရှေ့သို့ အဟုန်ပြင်းစွာ ပြေးဝင်သွားခဲ့သည်။
“တိုက်ကွက်တစ်ကွက်တည်းနဲ့ မင်းကို အနိုင်ယူပြမယ်!”
အကယ်၍ အကြိမ်ကြိမ် ရှုံးနိမ့်ထားခဲ့ပြီးဖြစ်သော ထန်ဟောက်ကို တိုက်ကွက်တစ်ကွက်တည်းဖြင့် အနိုင်မယူနိုင်ခဲ့ပါက၊ သူသည် ယခင်ပြိုင်ဘက် နှစ်ယောက်ထက် ပိုမိုညံ့ဖျင်းကြောင်း သက်သေပြနေသည် မဟုတ်ပါလော။
ထို့အပြင် ထိုနှစ်ယောက်အနက် တစ်ယောက်မှာ သူ၏ ကိုယ်ပိုင်လူပင် ဖြစ်နေသေးသည်။
ဝှစ်...
မီးနိယာမ၏ ပံ့ပိုးမှုဖြင့် ဓားဆန္ဒများ ကောင်းကင်ယံသို့ ထိုးတက်သွားခဲ့သည်။
ချင်လော့ကိုယ်တိုင်ပင် ဤထာဝရရှင်သန်သူမိသားစု၏ အမည်ခံသခင်လေးကို အထင်ကြီးလွန်းခဲ့မိသည်ဟု မထင်ထားခဲ့မိပေ။
၎င်းမှာ ချက်ချင်းလက်ငင်း သတ်ဖြတ်ခြင်းမျိုးပင် ဖြစ်တော့သည်။
ဘုန်း...
ထိုးနှက်ချက်တစ်ချက်တည်းဖြင့် ထန်ဟောက်ကို လွင့်ထွက်သွားစေခဲ့ပြီး နေရာမှာတင် ဒဏ်ရာပြင်းထန်စွာ ရရှိသွားစေခဲ့သည်။
“ဝေါ့...” ထန်ဟောက် ဆက်လက်မတောင့်ခံနိုင်တော့ဘဲ... သူသည် ဆက်တိုက်ဆိုသလို သုံးကြိမ်တိုင်တိုင် ရှုံးနိမ့်သွားခဲ့ရပြီ ဖြစ်သည်။
သူသည် ထာဝရရှင်သန်သူမိသားစု၏ သခင်လေးဖြစ်ပြီး၊ အနာဂတ်တွင် တာအိုကို သက်သေပြကာ မဟာဧကရာဇ်တစ်ပါး ဖြစ်လာနိုင်သည့် ပါရမီကို ပိုင်ဆိုင်ထားသူဟု သတ်မှတ်ခြင်းခံထားရသော ပါရမီရှင်တစ်ဦး ဖြစ်ပါလျက်နှင့်... သူ၏ စွမ်းဆောင်ရည်က ဤမျှလောက်သာ ရှိသည်လား။
“ဝေါ့...” သူသည် မအောင့်နိုင်တော့ဘဲ သွေးအလုတ်လိုက်ကို ထပ်မံ၍ အော့အန်လိုက်ရပြန်သည်။
“တတိယနေရာကို မင်းအတွက် ချန်ထားပေးခဲ့မယ်။” ချင်လော့က စကားတစ်ခွန်းကို ပေါ့ပေါ့ပါးပါး ပစ်ချခဲ့ပြီး ပထမစိန်ခေါ်ကွင်းဆီသို့ ခြေလှမ်းကျဲကြီးများဖြင့် လှမ်းလျှောက်သွားခဲ့သည်။
“အား...” သူသည် ကောင်းကင်ယံသို့ မော့ကြည့်ကာ ဟိန်းဟောက်လိုက်မိသည်။ ချင်လော့၏ သနားကရုဏာဖြင့် ပေးကမ်းမှုကို သူ မည်သို့လျှင် လက်ခံနိုင်ပါအံ့နည်း။ သူသည် မိမိ၏ ကိုယ်ပိုင်စွမ်းအားဖြင့်သာ တိုက်ယူရပေမည်။
သူသည် စတုတ္ထမြောက် စိန်ခေါ်ကွင်းဆီသို့ လှမ်းသွားခဲ့သော်လည်း၊ ဆက်တိုက် ရှုံးနိမ့်ထားမှုများကြောင့် သူ၏ တိုက်ခိုက်ရေးစွမ်းရည်မှာ များစွာ လျော့နည်းနေခဲ့ပြီဖြစ်ရာ၊ မျှော်လင့်ထားသည့်အတိုင်းပင်...
သူ ထပ်မံ၍ ရှုံးနိမ့်သွားခဲ့ရပြန်သည်။
ဘုန်း...
သူသည် မြေပြင်ပေါ်သို့ ပြင်းထန်စွာ ပြုတ်ကျသွားခဲ့ရပြီး သူ၏ မျက်နှာမှာ ဒေါသကြောင့် တွန့်လိမ်ရှုံ့မဲ့လျက် ပဉ္စမမြောက် စိန်ခေါ်ကွင်းပေါ်သို့ တက်လှမ်းသွားခဲ့သည်။
“ထွက်သွားစမ်း!” သူက ဟွင်ဝူဟန်ကို ကြည့်ကာ ဟိန်းဟောက်လိုက်သည်။
ဟွင်ဝူဟန်သည် လက်သီးကို တင်းတင်းဆုပ်လိုက်သော်လည်း ဘာမှမပြောဘဲ တိတ်ဆိတ်စွာ နောက်ဆုတ်ပေးလိုက်လေသည်။
မူလက မိမိကိုယ်ကိုယ် ဤနေရာတွင် အတောက်ပဆုံးသော ဖြစ်တည်မှုတစ်ခု ဖြစ်လာလိမ့်မည်ဟု ယုံကြည်ထားခဲ့သော်လည်း၊ ထန်ဟောက်သည် ပုန်းကွယ်နဂါးအဆင့်သတ်မှတ်ချက်၏ ပဉ္စမနေရာသို့ ရောက်ရှိသွားလိမ့်မည်ဟု ဘယ်တုန်းကမှ ထင်မှတ်မထားခဲ့မိပေ။
သူသည် ထိပ်တန်းသုံးနေရာစာရင်းထဲသို့ပင် ဝင်ရောက်နိုင်ခဲ့ခြင်း မရှိချေ။
ထန်ဟောက်သည် မိမိအား အနိုင်ယူခဲ့သော သူများကို အေးစက်လှသော မျက်နှာထားဖြင့် စိုက်ကြည့်လိုက်ပြီး သူ၏ မျက်ဝန်းများထဲတွင် ဒေါသများနှင့် သတ်ဖြတ်ခြင်းဆန္ဒများဖြင့် ပြည့်နှက်နေခဲ့သည်။
သူက မိမိကိုယ်ကိုယ် တိုးတိုးလေး ရေရွတ်လိုက်သည်။ “သိပ်ပြီး ဝမ်းသာမနေကြနဲ့ဦး... မင်းတို့အားလုံးက ငါ့ရဲ့ ရှေ့မှောက်မှာ တစ်ယောက်ပြီးတစ်ယောက် သေရမယ့်သူတွေချည်းပဲ။”
“ကွန်ရွှီလျှို့ဝှက်နယ်မြေက မင်းတို့အားလုံးရဲ့ သင်္ချိုင်း ဖြစ်လာစေရမယ်။”
ယခုအချိန်တွင် သူ၌ အခြားနည်းလမ်းမရှိသဖြင့် မိမိကိုယ်ကိုယ် ဤသို့သာ စိတ်သက်သာရာရအောင် ပြောနေနိုင်တော့သည်။
အစွမ်းထက်သော လက်နက်တစ်ခုကို သုံးပြီး လူအချို့ကို သတ်ဖြတ်ပစ်ရန်လား... ၎င်းမှာ ဘာအဓိပ္ပာယ်မှ ရှိမည်မဟုတ်ချေ။ ထန်မိသားစု၏ သခင်လေးတစ်ဦးအနေဖြင့် သူသည် အကျိုးအမြတ်မရှိသော အလုပ်မျိုးကို ဘယ်တော့မှ လုပ်ဆောင်မည်မဟုတ်ပေ။
သူတို့ကို ထာဝရရှင်သန်သူမိသားစုဟု ခေါ်ဝေါ်ရခြင်း အကြောင်းရင်းမှာ သူတို့သည် အချိန်အတော်ကြာအောင် ရှင်သန်နိုင်ခဲ့ကြပြီး၊ မိသားစု၏ အမွေအနှစ်များကိုလည်း ရေရှည်ထိန်းသိမ်းထားနိုင်ခဲ့ကြသောကြောင့် ဖြစ်သည်။
သူတို့ လုပ်ဆောင်သမျှ အရာအားလုံးသည် ရှင်သန်နိုင်ရန်၊ ပိုမိုကောင်းမွန်စွာ ရှင်သန်နိုင်ရန်နှင့် ပိုမိုအသက်ရှည်ရှည် နေထိုင်နိုင်ရန်အတွက်သာ ဖြစ်ပြီး၊ ၎င်းသည်သာ အန္တိမအောင်ပွဲ ဖြစ်ပေသည်။
စုယွီ၏ အကြည့်သည် ချင်လော့အပေါ်သို့ စူးစိုက်ကျရောက်နေခဲ့သည်။ ချင်လော့သည် မိမိရှိရာဘက်သို့ တည့်တည့်မတ်မတ် လျှောက်လာလိမ့်မည်ဟု သူ မမျှော်လင့်ထားခဲ့မိပေ။
၎င်းမှာ သူ အလိုချင်ဆုံးအရာပင် ဖြစ်ပေသည်။
“ပထမနေရာကို ငါ့ကို ဒီအတိုင်း ပေးလိုက်ရင် ဘယ်လိုလဲ။”
“မဟုတ်ရင်တော့... မင်းကို သတ်ပစ်ဖို့ ငါ စိတ်မရှိဘူးနော်။”
မိမိ၏ လျှို့ဝှက်ဝှက်ဖဲများကို ပြန်လည်အမှတ်ရရင်း၊ ချင်လော့သည် စုယွီဟု အမည်ရသော ဤလူနှင့် တိုက်ခိုက်ရာတွင် သူ၏ အစွမ်းကုန် ထုတ်သုံးရမည်ဖြစ်ကြောင်း ခံစားလိုက်ရသည်။
သို့သော်လည်း သူသည် ဗီလိန်စနစ်ကို ပိုင်ဆိုင်ထားသော ဗီလိန်တစ်ဦး မဟုတ်ပါလော။
‘စနစ်... သူ့ကို အနိုင်ယူဖို့ ဒါမှမဟုတ် သတ်ပစ်ဖို့အတွက် အစီအစဉ်တစ်ခု ပေးစမ်း!’ ချင်လော့က စိတ်ထဲမှ စေခိုင်းလိုက်သည်။
[စနစ်၏ အကြံပြုချက် - ဗီလိန်မှတ် ၁၀၀,၀၀0 သုံးစွဲပြီး လေဟာနယ်ပိတ်လှောင်ခြင်းအဆောင်တစ်ခုကို လဲလှယ်ရန် အကြံပြုအပ်ပါသည်။]
[ပစ္စည်း - လေဟာနယ်ပိတ်လှောင်ခြင်းအဆောင်]
[ဖော်ပြချက် - သတ်မှတ်ထားသော ပတ်ဝန်းကျင်နယ်ပယ်တစ်ခုအတွင်းရှိ ဟင်းလင်းပြင်ကို ပိတ်လှောင်ထားနိုင်ပြီး၊ လေဟာနယ်နိယာမကိုပါ ချိပ်ပိတ်ထားနိုင်သဖြင့်၊ လေဟာနယ်နိယာမဆိုင်ရာ စွမ်းရည်များကို အသက်သွင်းခြင်း သို့မဟုတ် အသုံးပြုခြင်းမပြုနိုင်အောင် တားဆီးပေးနိုင်သည်။]
ချင်လော့၏ မျက်လုံးများ ချက်ချင်း တောက်ပသွားခဲ့ရသည်။ ဤပစ္စည်းသည် တကယ့်ကို အသုံးဝင်လှပေသည်။
‘လဲလှယ်မယ်... အခုချက်ချင်း လဲလှယ်စမ်း!’
ချင်လော့သည် ထန်ဟောက်နှင့် စုယွီတို့၏ တိုက်ပွဲကို ဘေးမှနေ၍ စောင့်ကြည့်ခဲ့ဖူးသည်။ စုယွီ၏ ခန့်မှန်းရခက်ခဲလှသော ရွေ့လျားမှုများကြောင့် ထန်ဟောက်မှာ ရုန်းကန်ခဲ့ရပြီး နောက်ဆုံးတွင် ရှုံးနိမ့်သွားခဲ့ရခြင်း ဖြစ်သည်။
အကယ်၍ ဟင်းလင်းပြင်ကိုသာ ပိတ်လှောင်ထားနိုင်ခဲ့လျှင် စုယွီ၏ တိုက်ခိုက်ရေးစွမ်းရည်မှာ အနည်းဆုံး ထက်ဝက်ကျော်ခန့် လျော့နည်းသွားမည် ဖြစ်သည်။
ကျန်ရှိနေသော သေမျိုးကင်းစင်သွေးမျိုးဆက်နှင့် ပတ်သက်၍မူ... ဟဲဟဲ... ချင်လော့သည် ဤကဲ့သို့သော အခြေအနေမျိုးကို အလွန်ပင် သဘောကျနှစ်ခြိုက်လှပေသည်။ မင်းက မသေနိုင်ဘူး ဟုတ်လား... ဒါဆိုရင်တော့ မင်း သေသွားတဲ့အထိ ငါက ဝါးမြိုပစ်ရုံပေါ့!
ချင်လော့သည် ပထမစိန်ခေါ်ကွင်းပေါ်သို့ လှမ်းတက်လိုက်ပြီး စုယွီနှင့် ထိပ်တိုက် ရင်ဆိုင်လိုက်သည်။
ဤသည်မှာ သူတို့နှစ်ဦး ပထမဆုံးအကြိမ် တွေ့ဆုံခြင်းဖြစ်ပြီး၊ နှစ်ဦးစလုံးသည် တစ်ဦး၏မျက်ဝန်းထဲတွင် တစ်ဦးက ရန်လိုမုန်းတီးမှုများကို မြင်တွေ့လိုက်ကြရသည်။
“မင်း ငါ့ရဲ့ ပုံစံကို အတုခိုးပြီးတော့ ရွှမ်ယင်ယင်မြင့်မြတ်နယ်မြေရဲ့ သူတော်စင်ကို သတ်ခဲ့တာ မဟုတ်လား။” ချင်လော့၏ စကားကြောင့် စုယွီ၏ မျက်လုံးများ ကျဉ်းမြောင်းသွားခဲ့ရသည်။
ချင်လော့က ဤကိစ္စကို ထုတ်ဖော်ပြောဆိုလာလိမ့်မည်ဟု သူ မမျှော်လင့်ထားခဲ့မိပေ။
သို့သော်လည်း ရွှမ်ယင်မြင့်မြတ်နယ်မြေ၏ ကိစ္စမှာ ပြီးဆုံးသွားခဲ့ပြီဖြစ်ရာ သူ ဝန်မခံရဲစရာ အကြောင်းမရှိချေ။
“မှန်တယ်... ငါကပဲ ရွှမ်ယင်မြင့်မြတ်နယ်မြေရဲ့ သူတော်စင်ကို သတ်ခဲ့ပြီး ရွှမ်ယင်မြင့်မြတ်နယ်မြေတစ်ခုလုံးကိုပါ မျိုးဖြုတ်ဖျက်ဆီးပစ်ခဲ့တာ။” စုယွီက ဗြောင်ကျကျပင် ဝန်ခံလိုက်သည်။
“ကျွတ်ကျွတ်... ဒီလောက်တောင် စိတ်သဘောထားပြည့်ဝတဲ့လူက သူတစ်ပါးကို မဟုတ်မတရား စွပ်စွဲလုပ်ကြံတဲ့ ကိစ္စမျိုးကို လုပ်ရဲတယ်ပေါ့။” ချင်လော့သည် သူ၏ အထင်သေးရွံရှာသော အကြည့်များကို ဖုံးကွယ်ထားခြင်းမရှိဘဲ စိုက်ကြည့်လိုက်ရာ ၎င်းက စုယွီ၏ စိတ်ကို ပြင်းထန်စွာ ဆွပေးလိုက်သကဲ့သို့ ဖြစ်သွားခဲ့သည်။
သူသည် သူ၏ လှံရှည်ကို ချင်လော့ထံသို့ ချိန်ရွယ်လိုက်ပြီး လေးနက်သော လေသံဖြင့် “အဓိပ္ပာယ်မရှိတာတွေ တော်လောက်ပြီ! ရွှမ်ယင်မြင့်မြတ်နယ်မြေနဲ့ မင်းတို့ ချင်မျိုးနွယ်စုဝင်တွေ အားလုံးက သေဖို့ပဲ ထိုက်တန်တယ်!” ဟု ဟိန်းဟောက်လိုက်သည်။
“မင်းက ငါ့ကို လာပြီး စိန်ခေါ်ရဲမှတော့... ‘သေခြင်းတရား’ ဆိုတဲ့ စကားလုံးကို ဘယ်လိုရေးရလဲဆိုတာ မင်းသိအောင် ငါ လုပ်ပြရမှာပေါ့!”
ဝုန်း...
သူ၏ ပုံရိပ်သည် မူလနေရာမှ ချက်ချင်းပင် ပျောက်ကွယ်သွားခဲ့တော့သည်။
သူ ရရှိထားသော လေဟာနယ်လမ်းကြောင်း ခြေလှမ်းကျင့်စဉ်သည် လေဟာနယ်နိယာမနှင့် အပြည့်အဝ ကိုက်ညီမှုရှိသော နည်းစနစ်တစ်ခု ဖြစ်ပေသည်။
သူသည် လေဟာနယ်နိယာမအပေါ် အစပျိုးရုံမျှသာ နားလည်သဘောပေါက်ထားသေးသော်လည်း၊ လေဟာနယ်နိယာမ၏ အဆင့်အတန်းမှာ အခြားသော သာမန်နိယာမများထက် များစွာ သာလွန်မြင့်မားလှပေသည်။
‘မျှော်လင့်ထားတဲ့အတိုင်းပဲ... လေဟာနယ်နိယာမကို နားလည်ထားတဲ့သူတွေကို သတ်ရတာက တကယ်ပဲ နည်းနည်း ခက်ခဲလိမ့်မယ်။’ ချင်လော့၏ နတ်ဘုရားသတ်ဓားမှာ ဓားအိမ်မှ လျှပ်ခနဲ ထွက်ပေါ်လာခဲ့သည်။
ချင်လော့သည် စုယွီ၏ ပုံရိပ် ထင်ရှားလာပြီး သူတို့၏ တိုက်ခိုက်မှုများ ထိပ်တိုက်ရင်ဆိုင်မိသွားသည့် အချိန်ကျမှသာ သူ၏ ဖြစ်တည်မှုကို အာရုံခံမိခဲ့ခြင်း ဖြစ်သည်။
စုယွီ၏ ပုံရိပ်မှာ ထပ်မံ၍ ပျောက်ကွယ်သွားခဲ့ပြန်ပြီး၊ နောက်တစ်စက္ကန့်တွင် ချင်လော့၏ နောက်ကျောဘက်၌ ပေါ်ထွက်လာကာ လှံဖြင့် ပြင်းထန်စွာ ထိုးနှက်လိုက်တော့သည်။
တိုက်ပွဲကို စောင့်ကြည့်နေသော ထန်ဟောက်က စိတ်ထဲမှ လှောင်ပြုံးပြုံးလျက် ‘ငါက ခုနတုန်းက သူ့ရဲ့ ခန့်မှန်းရခက်တဲ့ ရွေ့လျားမှုတွေကြောင့်ပဲ ရှုံးနိမ့်ခဲ့ရတာ’ ဟု တွေးလိုက်သည်။
‘မင်းလား... ဟဲဟဲ၊ မင်းလည်း အသုံးဝင်မှာ မဟုတ်ပါဘူး!’
‘လေဟာနယ်နိယာမကို နားလည်ထားတဲ့ ပါရမီရှင်တစ်ယောက်... အကယ်၍ ဒီလိုလူမျိုးက ငါ့တို့ ထန်မိသားစုရဲ့ ခွေးတစ်ကောင် ဖြစ်မလာနိုင်ဘူးဆိုရင်တော့၊ ငါတို့ ထန်မိသားစုက အစွမ်းကုန် သုံးပြီး သူ့ကို သတ်ပစ်ရလိမ့်မယ်!’
ဤသို့တွေးပြီးနောက် ထန်ဟောက်၏ အကြည့်သည် အောက်ခြေရှိ အဘိုးအိုတစ်ဦးထံသို့ ကျရောက်သွားခဲ့သည်။
ထိုအဘိုးအိုသည်လည်း သူ၏ အကြည့်ကို တုံ့ပြန်လိုက်ပြီး သူ၏ လေးနက်သော အကြည့်များသည် စုယွီအပေါ်သို့ ကျရောက်သွားခဲ့သည်။
သူတို့ ထန်မိသားစုအနေဖြင့် ဤမျှလောက် ကြာရှည်စွာ တည်တံ့နိုင်ခဲ့ခြင်း အကြောင်းရင်းမှာ ထန်မိသားစု၏ တည်နေရာကို ခြိမ်းခြောက်လာနိုင်ခြေရှိသော ဤကမ္ဘာလောကရှိ ပါရမီရှင်အများစုကို အညှောက်ပေါက်ဘဝကတည်းက ကြိုတင်၍ ညှစ်သတ်ပစ်ခဲ့ကြသောကြောင့်ပင် ဖြစ်သည်။
စုယွီနှင့် အခြားသူများသည် ထန်မိသားစု၏ စောင့်ကြည့်ခြင်းကို ခံနေရပြီး ဖြစ်ပေသည်။
သူတို့ ခွေး ဖြစ်မလာခဲ့လျှင်... သူတို့သည် လူသေများသာ ဖြစ်လာကြပေလိမ့်မည်။
ချင်လော့၏ နောက်ကွယ်ရှိ စုယွီ၏ နှုတ်ခမ်းထောင့်များမှာ အနည်းငယ် ကွေးညွတ်သွားခဲ့ပြီး သူ၏ မျက်ဝန်းများထဲတွင် အေးစက်ရက်စက်သော သတ်ဖြတ်ခြင်းအရိပ်အယောင်များဖြင့် ပြည့်နှက်နေခဲ့သည်။
သူသည် ချင်လော့ကို သေစေချင်နေခဲ့ပြီ ဖြစ်သည်။
သူ့ကို ကျောခိုင်းထားသော ချင်လော့၏ နှုတ်ခမ်းထောင့်များတွင်လည်း အဓိပ္ပာယ်ပါပါ ပြုံးလိုက်မိသည်ကို သူ လုံးဝ သတိမပြုမိခဲ့ချေ။
“မင်း ဘယ်လောက်အထိ မောက်မာနိုင်ဦးမလဲဆိုတာ ကြည့်ကြသေးတာပေါ့!” ချင်လော့သည် သူ၏ လက်ထဲရှိ လေဟာနယ်ပိတ်လှောင်ခြင်းအဆောင်ကို ချက်ချင်းပင် ညှစ်ခြေလိုက်တော့သည်။
ဟင်းလင်းပြင် ပိတ်လှောင်ခံလိုက်ရပြီ ဖြစ်သည်။
သူသည် လှည့်၍ သူ၏ စွမ်းအားအားလုံးကို အစွမ်းကုန် ထုတ်ဖော်လိုက်ရာ၊ အကြိမ်ကိုးဆယ်ရွှေခန္ဓာကျင့်စဉ်မှာ အမြင့်ဆုံးအရှိန်ဖြင့် လည်ပတ်လာခဲ့ပြီး သူ၏ ရုပ်ခန္ဓာစွမ်းအားမှာလည်း တစ်ခဏချင်းအတွင်း အထွတ်အထိပ်သို့ ရောက်ရှိသွားခဲ့သည်။
ဓားဆန္ဒပြည့်စုံခြင်း ခုတ်ချက်!
ဘုန်း... သူတို့နှစ်ဦး ထိပ်တိုက် တိုးမိသွားကြပြီး ကြီးမားကျယ်လောင်သော ဟိန်းဟောက်သံကြီးတစ်ခု ထွက်ပေါ်လာခဲ့သည်။ စုယွီ၏ မျက်နှာအမူအရာမှာ အနည်းငယ် လေးနက်တည်တင်းသွားခဲ့ရပြီး သွေးတစ်လုတ်ကို အန်ထုတ်လျက်၊ ခန္ဓာကိုယ်ကို လှည့်၍ သူ၏ လေဟာနယ်လမ်းကြောင်း ခြေလှမ်းကျင့်စဉ်ကို ထပ်မံအသုံးပြုရန် ကြိုးပမ်းလိုက်သည်။ သို့သော်လည်း နောက်တစ်စက္ကန့်တွင် ပြင်းထန်လှသော တွန်းကန်အားတစ်ခု ထွက်ပေါ်လာခဲ့သည်။
သူ၏ မျက်နှာပေါ်တွင် ပထမဆုံးအကြိမ်အဖြစ် ပျာယာခတ်မှု အရိပ်အယောင်တစ်ခု ပေါ်ထွက်လာခဲ့ရတော့သည်။
“ပြေးလေ... ဆက်ပြီး ပြေးစမ်းပါဦး!”
“မင်းရဲ့ နာမည်က စုယွီ မဟုတ်သင့်ဘူး... စုပြေးပြေး လို့ပဲ နာမည်ပြောင်းလိုက်တာက ပိုကောင်းမယ် ထင်တယ်!”
“ကောင်းကင်ကြယ်တာရာဓားသောင်းချီဖွဲ့စည်းပုံ... ထွက်ပေါ်လာစမ်း!”
ဓားသောင်းချီ ပေါက်ကွဲထွက်ပေါ်လာခဲ့ပြီ ဖြစ်သည်။
ဓားချီများ စုစည်းလာခဲ့ကြပြီး မျက်တောင်တစ်ခတ်အတွင်းမှာပင် ဓားချီများဖြင့် ဖွဲ့စည်းထားသော ရှည်လျားသော ဓားသောင်းချီ ပေါ်ထွက်လာခဲ့တော့သည်။
အခြားအရပ်မျက်နှာတစ်ခုတွင်မူ ကျန်ထိုက်ရွှီးသည် ဤမြင်ကွင်းကို စောင့်ကြည့်နေခဲ့ပြီး သူ၏ မျက်လုံးများမှာ ချက်ချင်း ပြူးကျယ်သွားခဲ့ရသည်။
“ဒါက... မာယာတစ်သောင်းဓားဂိုဏ်းရဲ့ ဓားသိုင်းပညာ မဟုတ်လား။ သူက မာယာတစ်သောင်းဓားဂိုဏ်းရဲ့ အမွေအနှစ်ကို ဆက်ခံထားတဲ့ တပည့်တစ်ယောက်လား။”
“ငါ့အတွက် ခုတ်ပိုင်းစမ်း!”
ထို ဓားချီသောင်းချီများသည် စုယွီထံသို့ တဟုန်ထိုး တိုးဝင်သွားခဲ့ရာ၊ သူ၏အဖို့ ပုန်းကွယ်စရာ နေရာမရှိဖြစ်သွားသဖြင့် သူ၏ လှံရှည်ကို တင်းတင်းဆုပ်ကိုင်လိုက်ရတော့သည်။
အာဏာရှင်လှံသိုင်း!
လွှမ်းမိုးနိုင်စွမ်း ပြည့်နှက်နေသော အရှိန်အဝါတစ်ခုသည် စုယွီ၏ ခန္ဓာကိုယ်ပေါ်မှ ပေါက်ကွဲထွက်ပေါ်လာခဲ့သည်။ ဓားချီသောင်းချီနှင့် ရင်ဆိုင်ရသော်လည်း သူသည် ကြောက်ရွံ့ခြင်းအလျဉ်းမရှိခဲ့ချေ။
သူသည် သူ၏ လှံရှည်ကို ဝှေ့ယမ်းကာ အာဏာရှင်ကြီးတစ်ဦးကဲ့သို့ စစ်မြေပြင်ကို ဖိနှိပ်ခြေမှုန်းလိုက်တော့သည်။
ဟိန်းဟောက်သံများမှာ အဆက်မပြတ် ထွက်ပေါ်နေခဲ့ပြီး လူတိုင်း ဤမြင်ကွင်းကို ထိတ်လန့်တုန်လှုပ်စွာဖြင့် စောင့်ကြည့်နေခဲ့ကြသည်။
ဤအခိုက်အတန့်တွင် စုယွီသည် စစ်နတ်ဘုရားတစ်ပါးကဲ့သို့ တစ်ကိုယ်တော် စစ်တပ်ကြီးတစ်ခုပမာ ဖြစ်နေခဲ့ရာ၊ မျိုးဆက်သစ် အမျိုးသမီးငယ်များစွာ၏ မျက်ဝန်းများထဲတွင် ရူးသွပ်စွဲလမ်းမှုများဖြင့် ပြည့်နှက်သွားစေခဲ့သည်။
ဓားချီများသည် သူ၏ အဝတ်အစားများကို ဆုတ်ဖြဲပစ်လိုက်ပြီး သူ၏ သံချပ်ကာကိုလည်း ကြေမွသွားစေကာ သူ၏ ခန္ဓာကိုယ်ပေါ်တွင် ဒဏ်ရာအမြောက်အမြား ဖြစ်ပေါ်စေခဲ့သော်လည်း၊ စုယွီ၏ မျက်ဝန်းများမှာ ပိုမို၍ပင် တောက်ပလာခဲ့သည်။
သူသည် သေမျိုးကင်းစင်သွေးမျိုးဆက်ကို ပိုင်ဆိုင်ထားသူ ဖြစ်သည်။ တစ်ချက်တည်းဖြင့် အပြတ်သတ်မခံရသရွဲ့၊ မည်မျှပင် တိုက်ခိုက်ခံရစေကာမူ သူ သေဆုံးမည်မဟုတ်ချေ!
သူသည် မွေးရာပါ မသေနိုင်သော ဖြစ်တည်မှုတစ်ခုပင် ဖြစ်ပေသည်။
မီးခိုးမြူများ ဆုတ်ခွာသွားချိန်တွင် လူတိုင်းသည် ခန္ဓာကိုယ်တစ်ခုလုံးတွင် ဒဏ်ရာများဖြင့် ပြည့်နှက်နေသော စုယွီကို ကြည့်ကာ ဤကဲ့သို့သော ကောင်းကင်ဘုံကို ဆန့်ကျင်နိုင်သည့် ကလေးငယ်အပေါ် မချီးကျူးဘဲ မနေနိုင်တော့ချေ။
“စုယွီရဲ့ ခန္ဓာကိုယ်က တကယ့်ကို ကောင်းကင်ဘုံကို ဆန့်ကျင်နေတာပဲ... သူက ဒီကမ္ဘာလောကရဲ့ ကောင်းကင်တာအိုရဲ့ သားတော် ဖြစ်လာဖို့ ကံပါလာတာ သေချာသလောက် ရှိနေပြီ။” ချန်ဟွိုက်ရွှီက မိမိကိုယ်ကိုယ် တိုးတိုးလေး ရေရွတ်လိုက်သည်။
ဟွင်မင်သည် စုယွီကို ကြည့်လိုက်ပြီး သူ၏ မျက်ဝန်းထဲတွင် မှေးမှိန်ဆန်းပြားသော အလင်းတန်းတစ်ခု ဖြတ်ပြေးသွားကာ “ဒီကလေးက ငါတို့အတွက် ကြီးမားတဲ့ အသုံးဝင်မှု ရှိလာနိုင်တယ်။” ဟု တွေးလိုက်မိသည်။
“ဟားဟားဟား! တကယ့်ကို အားရစရာကောင်းလိုက်တာ!” စုယွီသည် သူ၏ လှံရှည်ကို ချင်လော့ထံသို့ ချိန်ရွယ်လိုက်ပြီး သူ၏ မျက်နှာပေါ်တွင် ရူးသွပ်လှသော အမူအရာတစ်ခု ပေါ်ထွက်လာခဲ့သည်။
“ထပ်ပြီး တိုက်ကြဦးမလား! ဒီနေ့ မင်းမှာ ဘာလှည့်ကွက်တွေ ကျန်သေးလဲဆိုတာ ငါ ကြည့်ချင်သေးတယ်!”
ချင်လော့က လက်ခုပ်တီးလိုက်ပြီး ကျယ်လောင်စွာဖြင့် “သေမျိုးကင်းစင်သွေးမျိုးဆက်က တကယ့်ကို ကောင်းကင်ဘုံကို ဆန့်ကျင်နိုင်စွမ်း ရှိတာပဲ။ ဒီလို သေးငယ်တဲ့ ဒဏ်ရာတွေက မင်းအတွက် ဘာမှမဟုတ်တာပဲ။” ဟု ပြောလိုက်သည်။
ဤစကားကို ကြားလိုက်ရသောအခါ လူအများအပြား တစ်ကိုယ်လုံး ပြင်းထန်စွာ တုန်ရီသွားခဲ့ကြရသည်။
“သေမျိုးကင်းစင်သွေးမျိုးဆက် ဟုတ်လား...”
“ဒီကမ္ဘာပေါ်မှာ ဒီလို သွေးမျိုးဆက်မျိုး တကယ်ပဲ ရှိနေတာလား...”
“မှန်တယ်... ဒါကို ရှေးဟောင်းကျမ်းစာတွေထဲမှာ မှတ်တမ်းတင်ထားဖူးတယ်။ ဒီသွေးမျိုးဆက်ကို ပိုင်ဆိုင်ထားတဲ့သူတွေဟာ မည်မျှပင် ပြင်းထန်တဲ့ ဒဏ်ရာမျိုး ရပါစေ၊ သူတို့ရဲ့ မူလအဆီအနှစ် မပျက်စီးသရွဲ့ အချိန်တိုအတွင်းမှာ ပြန်လည်ကောင်းမွန်လာနိုင်စွမ်း ရှိကြတယ်။”
“ဒီသွေးမျိုးဆက်ကို ပိုင်ဆိုင်ထားတဲ့သူတွေက အနာဂတ်မှာ တာအိုကို နားလည်ပြီး မဟာဧကရာဇ် ဖြစ်လာဖို့ ကံပါလာကြသူတွေပဲ... အဲဒါကြောင့် သူတို့ကို သေမျိုးကင်းစင်ဧကရာဇ် လို့တောင် ခေါ်ဝေါ်နိုင်ခြေ ရှိတယ်။”
“ဘုရားရေ... အကယ်၍ ဒီသွေးမျိုးဆက်ကိုသာ တခြားလူဆီ ပြောင်းလဲထည့်သွင်းလို့ ရမယ်ဆိုရင်... မဟုတ်သေးပါဘူး၊ ၎င်းရဲ့ အရိပ်အယောင်လေးတစ်ခုကိုပဲ နားလည်သဘောပေါက်သွားခဲ့ရင်တောင်မှ၊ ၎င်းက အလွန်တရာ ကြီးမားတဲ့ အကျိုးကျေးဇူးတွေကို ပေးစွမ်းနိုင်မှာ မဟုတ်ဘူးလား။”
“ဒါမှမဟုတ်... ၎င်းရဲ့ မူလအဆီအနှစ်ကို ထုတ်ယူပြီး ဆေးလုံးတစ်လုံးအဖြစ် သန့်စင်ဖန်တီးပစ်လို့ ရနိုင်မလား။”
“သွေးချင်းအနီးစပ်ဆုံး ဆွေမျိုးတွေကသာ ဒီသွေးမျိုးဆက်ကို ပြောင်းလဲထည့်သွင်းလို့ ရတာပါ!”
“ဒါဆိုရင် ငါက သူနဲ့ ကလေးတစ်ယောက် အရင်မွေးလိုက်ပြီး၊ ပြီးမှ အဲဒီသွေးမျိုးဆက်ကို ကလေးဆီကနေတစ်ဆင့် ငါ့ရဲ့ ခန္ဓာကိုယ်ထဲကို ပြောင်းလဲထည့်သွင်းရင်ကော ရနိုင်မလား...”
“ငါ့ဆီမှာလည်း တိုက်တိုက်ဆိုင်ဆိုင် မြေးမလေးတစ်ယောက် ရှိနေတာပဲ... အဲဒါကော အလုပ်ဖြစ်နိုင်မလား...”
စုယွီသည် စိတ်ထဲမှ တိတ်တဆိတ် တွေးလိုက်မိသည်။ ‘မကောင်းတော့ဘူး... ငါ ဟန်ရေးပြတာ နည်းနည်း လွန်သွားခဲ့ပြီ ထင်တယ်။’
‘ဒါပေမဲ့... ချင်လော့က ငါ သေမျိုးကင်းစင်သွေးမျိုးဆက်ကို ပိုင်ဆိုင်ထားကြောင်း ဘယ်လိုလုပ်ပြီး သိရှိသွားရတာလဲ။ ‘
ချင်လော့က စုယွီကို ကြည့်ကာ ဆန်းပြားဆွဲဆောင်မှုရှိသော အပြုံးတစ်ခု ပြုံးပြလိုက်ရင်း “ကောင်လေး... ငါ ခုနက တမင်သက်သက် လုပ်ဆောင်ခဲ့တာ။ အခုအချိန်ကစပြီး လူအမြောက်အမြားက မင်းကို သေချာပေါက် မျက်စိကျလာကြတော့မှာ။” ဟု ဆိုလိုက်သည်။
ရေကို နောက်အောင်လုပ်မှသာ သူ၏ လာမည့် လုပ်ဆောင်ချက်များကို ဖုံးကွယ်ထားနိုင်မည် မဟုတ်ပါလော။
“မင်း နောက်ထပ်တစ်ကြိမ် ထပ်ပြီး တိုက်ချင်သေးတယ် ဟုတ်လား... ဒါဆိုရင်တော့ မင်းရဲ့ ဆန္ဒကို ငါ ဖြည့်ဆည်းပေးရမှာပေါ့!”
ချင်လော့သည် လျှပ်တစ်ပြက် လှုပ်ရှားသွားခဲ့ပြီး ရှေ့သို့ ပြေးဝင်သွားခဲ့သည်။
စုယွီက အံကြိတ်လျက် ချင်လော့ကို စိုက်ကြည့်ကာ “ဒီနေ့တော့... မင်းကို ငါ အပြတ်အသတ် ဒုက္ခိတဖြစ်အောင် လုပ်ပြမယ်!” ဟု ကြိမ်းဝါးလိုက်သည်။
ချင်လော့က ပြုံးလျက် “ဒါပေမဲ့ ငါကတော့ မင်းကို သတ်ပစ်ချင်နေတာ!” ဟု ပြန်လည်ပြောဆိုလိုက်သည်။
“လူသားဧကရာဇ်အလံတော်... ထွက်ပေါ်လာစမ်း!”
“ဖိနှိပ်စမ်း!”
ချင်လော့၏ အမိန့်ပေးသံနှင့်အတူ လူသားဧကရာဇ်အလံတော်သည် စုယွီ၏ ဦးခေါင်းထက်သို့ ကျရောက်လာခဲ့ပြီး အားကောင်းလှသော စွမ်းအားများက စုယွီ၏ စိတ်ဝိညာဉ်ကို ချက်ချင်းပင် ဖိနှိပ်ချုပ်ကိုင်လိုက်တော့သည်။
မျက်တောင်တစ်ခတ်အတွင်းမှာပင် ချင်လော့သည် စုယွီ၏ အနားသို့ အမြန်ဆုံး ချဉ်းကပ်သွားခဲ့ပြီး လက်ဝါးတစ်ချက်ကို သူ၏ ခန္ဓာကိုယ်ပေါ်သို့ တင်ကာ ကောင်းကင်ဝါးမြိုခြင်းနတ်ဆိုးပညာကို စတင်လည်ပတ်စေခဲ့သည်။
“ငါ့အတွက် ဝါးမြိုစမ်း!”
တိုက်ကွက်များမှာ အချိတ်အဆက်မိမိဖြင့် ပြီးပြည့်စုံလွန်းလှပေသည်။ သေမျိုးကင်းစင်သွေးမျိုးဆက်၏ မူလအဆီအနှစ် စွမ်းအားများသည် စုယွီ၏ ခန္ဓာကိုယ်အတွင်းမှ ချင်လော့၏ အတင်းအကျပ် ထုတ်ယူဝါးမြိုခြင်းကို ခံလိုက်ရတော့သည်!
[စုယွီ၏ သွေးမျိုးဆက်မူလအဆီအနှစ်ကို အောင်မြင်စွာ ဝါးမြိုနိုင်ခဲ့သဖြင့်၊ သူ၏ ကံကြမ္မာတန်ဖိုး ၁၀၀,၀၀၀ ဆုံးရှုံးသွားပြီး ပိုင်ရှင်သည် ဗီလိန်မှတ် ၁၀၀,၀၀၀ ရရှိပါသည်။]
ရင်းနှီးမြှုပ်နှံမှု တန်ဖိုးမှာ ချက်ချင်းပင် ပြန်လည်ရရှိသွားခဲ့ပြီ ဖြစ်ပေသည်။