အခန်း (၂၈၆၅-၂၈၆၆)
Vol. 287 Ch. 2865-2866
အခန်း (၂၈၆၅) - အတွင်းကမ္ဘာ တားမြနယ်မြေ အခုရေ ငါးရာ
ပုယွဲ့ရုံ၏ မျက်နှာမှာ အလွန်တရာမှပင် ကြည့်မကောင်း ဖြစ်နေသည်။
ယခုအခါ လူမိုက်တစ်ယောက်ပင် သိနိုင်သည်မှာ ဖန့်ချန်သည် ချင်ဖိုကျားကို တမင်သက်သက် ပစ်မှတ်ထား၍ အပြစ်ပုံချလိုက်ခြင်း ဖြစ်သည်ကိုပင်။
သို့သော်လည်း……
တစ်ဖက်လူ ရှာလာသည့် သက်သေမှာ ချင်းမင် ယင်လောက၏ ပြန်လည်ဝင်စားရေးဌာန တာဝန်ခံ ဖြစ်နေသည်။
ဤအရှုံးကိုတော့ သူတို့ ခါးခါးသီးသီး ခံစားလိုက်ရတော့မည် ဖြစ်သည်။
အသီးသီးမှ သူတော်စင်များမှာလည်း ထိုကိစ္စသည် ဤမျှအထိ ကြီးထွားလာလိမ့်မည်ဟု မမျှော်လင့်ထားကြပေ။
သူတို့၏ အမူအရာများမှာလည်း ရှုပ်ထွေးနေကြသည်။
ဆွေ့ ကျောင်းတော်အုပ်ချုပ်သူသည် ပုယွဲ့ရုံဘက်သို့ ကြည့်ကာ အသံကို နိမ့်ချ၍ ပြောသည်။
"မင်းတို့ လူသားကျောင်းဆောင်မှာ တခြား ကန့်ကွက်စရာများ ရှိသေးသလား။"
ပုယွဲ့ရုံက ခေါင်းခါလိုက်သည်။
"မရှိတော့ပါဘူး။"
"မရှိရင်လည်း ပြီးတာပါပဲ။"
ဆွေ့ ကျောင်းတော်အုပ်ချုပ်သူသည် တစ်ဖက်လူကို မျက်စောင်းထိုးလိုက်ပြီးနောက် ပိုင်ဇီဝမ်ချင်းဘက်သို့ လှည့်ကာ ပြုံးလျက် လက်ယှက် ဂါရဝပြုသည်။
"တကယ့်ကိုပဲ ဒီလို ကိစ္စသေးသေးလေးအတွက်နဲ့ ပိုင်ဇီဝမ်တာဝန်ခံကို အပင်ပန်းခံပြီး လာခိုင်းမိသလို ဖြစ်သွားတယ်၊ တာဝန်ခံကို အားနာလိုက်တာ။"
"ကိစ္စမရှိပါဘူး၊ ကိစ္စရပ်တွေကို ရှင်းရှင်းလင်းလင်း ဖြစ်သွားတာက ပိုကောင်းပါတယ်။"
ပိုင်ဇီဝမ်ချင်း ပြောပြီးသည်နှင့် ဖန့်ချန်ကို ခေါင်းညိတ်ပြလိုက်ပြီး ခန္ဓာကိုယ်ပတ်လည်တွင် အဖြူရောင် မြူခိုးများ လှုပ်ရှားလာကာ လက်အောက်ငယ်သားများကို ခေါ်ဆောင်၍ ယင်လောကသို့ ပြန်သွားတော့သည်။
ဒီအတိုင်းပဲ ပြန်သွားတာလား
ဆွေ့ ကျောင်းတော်အုပ်ချုပ်သူသည် တစ်ဖက်လူက ဒီနေရာမှာ ရက်အနည်းငယ်လောက် နေလိမ့်မည်ဟု ထင်ထားခဲ့သည်။
ရောက်လာပြီးချင်း ပြန်သွားလိမ့်မည်ဟု မထင်ထားခဲ့ပေ၊ ဤဖန့် သူတော်စင်ဘိုးဘေးအတွက် သက်သေခံပေးရန် သက်သက်သာ ရောက်လာသည့်အလား……
"ကောင်းကင်ငါးပါး အတွင်းမှာ အကျော်ကြားဆုံးနဲ့ အတော်ဆုံး လူငယ်မျိုးဆက်သစ်ပါပဲလား……"
ဆွေ့ ကျောင်းတော်အုပ်ချုပ်သူသည် ဖန့်ချန်ကို ရှုပ်ထွေးသော အကြည့်ဖြင့် ကြည့်လိုက်ပြီး စိတ်ထဲတွင် တိတ်တဆိတ် သက်ပြင်းချလိုက်သည်။
……
……
"ရူးချင်ယောင်ဆောင်နေတာပဲ"
"ချင်းမင်ဘက်က ဘာလုပ်မလို့လဲ။ ဖန့်ချန်ရဲ့လက်ကို ငှားပြီး ဒီအတိုင်းပဲ ခေါင်းဆောင်နေရာကို ရယူချင်နေတာလား။"
"ဒါက ကောင်းကင်ငါးပါးစလုံးကို ဝါးမြိုဖို့ ကြံစည်နေတာပဲ "
"ကောင်းကင်ငါးပါးအတွင်းက အတွင်းကမ္ဘာ တားမြစ်နယ်မြေတွေကို ပေါင်းစည်းမယ် အရင်က ဒီလို အကြံမျိုး ရှိခဲ့ဖူးတဲ့သူတွေ အကုန်လုံး သေကုန်ကြပြီ၊ ဒီကောင်လေးရဲ့ ရဲစွမ်းသတ္တိကတော့ တကယ်ပဲ ကြီးမားလွန်းတယ်။"
"သာမန် အတွင်းကမ္ဘာ တားမြစ်နယ်မြေဆိုရင်လည်း တစ်မျိုးပေါ့၊ သူတို့ဘက်က အခု ဟိုအရင် ရှေးခေတ်တားမြစ်နယ်မြေတွေကိုပါ လက်လှမ်းဖို့ ကြံနေတာ၊ ဒါက လွန်လွန်းမနေဘူးလား။"
"ဒါပေမဲ့ အခု ကောင်းကင်ငါးပါးအတွင်းက နိဗ္ဗာန်တားမြစ်နယ်မြေ စုစုပေါင်း (၁၀၈) ခု ရှိတဲ့အထဲက (၁၀၇) ခုကို သူပဲ ပြန်သိမ်းလာတာလေ၊ ပြီးတော့… အမြင့်မြတ်ဆုံး နတ်ဘုရားအင်ပါယာ ဘက်က ကိစ္စတွေကိုလည်း ဒီကောင်လေးပဲ ဖြေရှင်းပေးခဲ့တာလေ……"
"မင်း ဘာပြောချင်တာလဲ။"
"ငါပြောချင်တာက တခြား ကောင်းကင်ငါးပါး ရဲ့ သဘောထားကို ကြည့်ကြည့်ရင် ကောင်းမလားလို့၊ တစ်ခါတစ်ရံ ဒီကိစ္စမှာ အလျှော့အတင်းလုပ်လို့ ရမယ့် နည်းလမ်းမျိုး ရှိနိုင်ပါတယ်။"
"ဒါလည်း ဟုတ်တာပဲ၊ အလျှော့အတင်းလုပ်လို့ ရရင်လည်း ရပါတယ်။ အဲ့ကောင်လေး ပြောသလို ကောင်းကင်ငါးပါးလုံးကို မဖြစ်မနေ ပေါင်းစည်းရမယ်ဆိုရင်တော့ လုံးဝမဖြစ်နိုင်ဘူး"
……
……
လဝက်ခန့် ကြာပြီးနောက် အသီးသီးမှ ကျောင်းတော်အုပ်ချုပ်သူများမှာ တန်လင် ကျောင်းတော်သို့ တစ်ယောက်ပြီးတစ်ယောက် ပြန်လည် ရောက်ရှိလာကြသည်။
ထို ကျောင်းတော်အုပ်ချုပ်သူ နန်းဆောင်ထဲတွင်ပင် ဖြစ်သည်။
နောက်ဆုံးအကြိမ် ပြန်သွားစဉ်က လေထုမှာ အနည်းငယ် တင်းမာနေခဲ့သဖြင့် ထိုကျောင်းတော်အုပ်ချုပ်သူများ ပြန်ရောက်လာသည့်အခါ ကုလားထိုင်များတွင် ထိုင်ရင်း စကားတစ်ခွန်းမျှ မဆိုကြဘဲ ငြိမ်သက်နေကြသည်။
ဖန့်ချန်လည်း အသံမထွက်ဘဲ ငြိမ်နေလိုက်သည်။ အချိန်များမှာလည်း စက္ကန့်အလိုက် ကုန်ဆုံးသွားသည်။
အချိန်မည်မျှ ကြာသွားသည်မသိ၊ ရှန် ကျောင်းတော်အုပ်ချုပ်သူက အသံအနည်းငယ် ခပ်အုပ်အုပ်ဖြင့် -
"ဖန့် သူတော်စင်ဘိုးဘေး၊ ငါတို့ ဒီတစ်ခါ ပြန်သွားပြီးတဲ့နောက်မှာ အထက်ကနေ အဖြေတစ်ခု ပေးလိုက်ပါတယ်။ မင်း နားထောင်ကြည့်ပြီး ဖြစ်မဖြစ် ပြောပြပေးနိုင်မလား။"
"ရှန် ကျောင်းတော်အုပ်ချုပ်သူ ပြောပါ။"
ဖန့်ချန်က ယဉ်ကျေးစွာ ခေါင်းညိတ်လိုက်သည်။
"ငါတို့ အချင်းချင်း တိုင်ပင်ပြီးပြီ၊ အထက်ရဲ့ သဘောထားကတော့ ကောင်းကင်ငါးပါးစလုံးကနေ အတွင်းကမ္ဘာ တားမြစ်နယ်မြေ အခု (၁၀၀) စီ ထုတ်ပေးပြီး ပေါင်းစည်းကြမယ်။
ရှေးခေတ်တားမြစ်နယ်မြေတွေကတော့ အရင်ကတည်းက ချိတ်ပိတ်ထားတာ ဖြစ်တဲ့အတွက် လဒါကို လှုပ်ရှားဖို့ဆိုတာ အလွန်ခက်ခဲတယ်။
ပြီးတော့ ဒီတစ်ခါ ပေါင်းစည်းမှုရဲ့ အကျိုးရလဒ်တွေ ပေါ်လာမှပဲ ရှေးခေတ်တားမြစ်နယ်မြေတွေအကြောင်း ထပ်ပြောကြတာ ပိုကောင်းပါလိမ့်မယ်။"
ရှန် ကျောင်းတော်အုပ်ချုပ်သူ ပြောပြီးသည်နှင့် ဖန့်ချန်ကို ကြည့်ကာ သူ၏ သဘောထားကို စောင့်မျှော်နေသည်။
အခြားသော ကျောင်းတော်အုပ်ချုပ်သူများမှာလည်း ဖန့်ချန်ဘက်သို့ ကြည့်လိုက်ကြသည်။
ဟေးဆန်း နှင့် ဆွေ့ ကျောင်းတော်အုပ်ချုပ်သူတို့က တစ်ပြိုင်နက်တည်း အသံလွှင့်ကာ -
"ချင်းမင်ဘက်ကလည်း အဲ့ဒီသဘောပါပဲ။"
ထင်ရှားသည်မှာ ဤသူနှစ်ဦးလည်း အထက်မှ အမိန့်ပေးထားသည်ကို ရရှိထားခြင်းပင် ဖြစ်သည်။
ဖန့်ချန်က မျက်မှောင်အနည်းငယ် ကြုတ်လိုက်ပြီး စကားတစ်ခွန်းမျှ မဆိုဘဲ တိတ်ဆိတ်နေသည်။
သူ တိတ်ဆိတ်နေသည့် အချိန်ကာလအတွင်းတွင် ထိုင်နေကြသော ကျောင်းတော်အုပ်ချုပ်သူများမှာလည်း အချင်းချင်း မျက်စိဖြင့် အချက်ပြကာ ကြည့်လိုက်ကြသည်။
အဘယ်ကြောင့်မှန်းမသိ၊ စိတ်ထဲတွင် တင်းမာမှု အနည်းငယ် ဖြစ်ပေါ်လာသည်။
သူတို့သည် ယခုအချိန်တွင် ဖန့်ချန်သည် တည်ရှိမှုအဆင့် အလယ်အလတ်သာ ရှိသေးသည်ကို အမှတ်တမဲ့ မေ့လျော့နေကြပြီ ဖြစ်သည်။
အချိန်များမှာ စက္ကန့်အလိုက် ကုန်ဆုံးသွားသည်။
နောက်ဆုံးတွင် ဖန့်ချန်က ခေါင်းညိတ်လိုက်သည်။
"ဒါလည်း ရတာပါပဲ၊ ဒါဆိုရင်လည်း နေရာ အသီးသီးက အတွင်းကမ္ဘာ တားမြစ်နယ်မြေ အခု (၁၀၀) စီ ထုတ်ပေးပြီး အရင်းအမြစ်တွေကို ပေါင်းစည်းကြတာပေါ့။
ဒါပေမဲ့ ဒီ အတွင်းကမ္ဘာ တားမြစ်နယ်မြေ (၅၀၀) ကိုတော့ သူတော်စင်ဘိုးဘေး စီမံကိန်း နဲ့ ကျန်းထန်းဝမ်ခန်းမ တို့ကနေပဲ အတူတူ ကြီးကြပ်သွားမှာပါ။
ကောင်းကင်ငါးပါးအတွင်းက တခြားအင်အားစုတွေ ဘာမှ ဝင်ပါခွင့် မရှိရဘူး။
ဒီလိုမှ မလိုလားအပ်တဲ့ အခြေအနေမျိုးတွေကို ကြိုတင် ကာကွယ်နိုင်မှာ။"
"..."
ဟေးဆန်း က လွဲ၍ ကျန်ရှိသော ကျောင်းတော်အုပ်ချုပ်သူ ခြောက်ဦးမှာ အံ့အားသင့်သွားကြသည်။
ချင်းမင် အဆင့်မြင့်ဆုံး မဟာမိတ်အဖွဲ့တွင် ပါဝင်သော ဆွေ့ ကျောင်းတော်အုပ်ချုပ်သူပင်လျှင် မျက်နှာမှာ အံ့အားသင့်မှုများဖြင့် ပြည့်နှက်နေသည်။
ဒါက ဘာကို ဆိုလိုတာလဲ
အတွင်းကမ္ဘာ တားမြစ်နယ်မြေ (၅၀၀) အားလုံးကို သူတော်စင်ဘိုးဘေး စီမံကိန်း နှင့် ကျန်းထန်းဝမ်ခန်းမ ထံသို့ အကုန်လွှဲပေးပြီး အုပ်ချုပ်ခိုင်းလိုက်တာလား။
တခြားအင်အားစုတွေ ဝင်ပါခွင့် မရှိရဘူး
ဒါဆိုရင် ဒီ အတွင်းကမ္ဘာ တားမြစ်နယ်မြေ (၅၀၀) က ကောင်းကင်ငါးပါးအတွင်းကနေ လုံးဝ သီးခြားခွဲထွက်သွားတာနဲ့ မတူဘူးလား။
အကယ်၍ တစ်ဖက်လူက သူတော်စင်ဘိုးဘေး စီမံကိန်း တစ်ခုတည်းကိုသာ တောင်းဆိုပါက သူတို့က တိုက်ရိုက် ငြင်းဆန်ကြလိမ့်မည်။
သို့သော် ကျန်းထန်းဝမ်ခန်းမ ကိုပါ ထည့်ပြောလိုက်သည့်အတွက် သူတို့မှာ ဆုံးဖြတ်ရခက်သွားသည်။
မည်သို့ဆိုစေ ကျန်းထန်းဝမ်ခန်းမ ၏ ရှေ့ပြေးဖြစ်သော သူတော်စင်ဧကရာဇ် စီမံကိန်းထဲမှ သူတော်စင်များမှာ ကောင်းကင်ငါးပါးပေါင်းစပ်မှုဖြင့် ပျိုးထောင်ထားကြသူများ ဖြစ်သည်။
၎င်းသည်လည်း ကြီးမားသော မျိုးနွယ်စုကြီးများကို ကိုယ်စားပြုနိုင်သည်။
"မိတ်ဆွေတို့၊ ဘာဖြစ်လို့ ဒီလို အမူအရာတွေ ဖြစ်နေကြတာလဲ။"
ဖန့်ချန်က မနေနိုင်ဘဲ ပြုံးလျက် ပြောသည်။
"ခင်ဗျားတို့ အထက်ကို တစ်ခါ ပြန်မေးပြီးပြီလေ၊ ကောင်းကင်ငါးပါးစလုံးကနေ အတွင်းကမ္ဘာ တားမြစ်နယ်မြေ (၁၀၀) စီ ထုတ်ပေးပြီး ဒီတစ်ခါ ပြိုင်ပွဲအတွက် ပံ့ပိုးပေးဖို့ အထက်ကလည်း သဘောတူထားတာပဲ မဟုတ်လား။
အခုမှ ဘာပြဿနာ ထပ်ရှိသေးလို့လဲ။"
"ဖန့် သူတော်စင်ဘိုးဘေး။"
စီကု ကျောင်းတော်အုပ်ချုပ်သူက မျက်မှောင်ကြုတ်ကာ -
"ကောင်းကင်ငါးပါးစလုံးကနေ အတွင်းကမ္ဘာ တားမြစ်နယ်မြေ (၁၀၀) စီ ထုတ်ပေးပြီး ပေါင်းစည်းတာက အထက်ရဲ့ သဘောထားပဲ၊ ဖန့် သူတော်စင်ဘိုးဘေး သဘောတူရင်တော့ ပြဿနာကြီးကြီးမားမား မရှိပါဘူး။"
"ဒါပေမဲ့..."
စီကု ကျောင်းတော်အုပ်ချုပ်သူက လေသံကို ပြောင်းကာ တင်းမာစွာ ပြောသည်။
"အတွင်းကမ္ဘာ တားမြစ်နယ်မြေတွေက အမြဲတမ်း သမာဓိခုံရုံး ရဲ့ တိုက်ရိုက်အုပ်ချုပ်မှု အောက်မှာ ရှိခဲ့တာ၊ တချို့ အတွင်းကမ္ဘာ တားမြစ်နယ်မြေတွေက အလွန်ကို အန္တရာယ်များတယ်၊ အထွတ်ထိပ်တာအို အဆင့် သူတော်စင်တောင်မှ အသက်ရှင်လျက် ထွက်လာဖို့ မလွယ်ဘူး။"
"အခု မင်းက ဒီ အတွင်းကမ္ဘာ တားမြစ်နယ်မြေတွေကို သူတော်စင်ဘိုးဘေး စီမံကိန်း နဲ့ ကျန်းထန်းဝမ်ခန်းမ ကနေ အုပ်ချုပ်ဖို့ အဆိုပြုတာ၊ ဒါပေမဲ့ မင်းတို့ထဲမှာ အကြီးကဲသူတော်စင် တစ်ယောက်တောင်မှ မရှိဘူးလေ။"
"အကယ်၍ တစ်ခုခု ဖြစ်လာရင် သူတော်စင်ဘိုးဘေး စီမံကိန်း နဲ့ ကျန်းထန်းဝမ်ခန်းမ က ဘယ်လို တုံ့ပြန်ကြမလဲ။"
ကျန်ရှိသော ကျောင်းတော်အုပ်ချုပ်သူ အနည်းငယ်မှာလည်း စီကု ကျောင်းတော်အုပ်ချုပ်သူ၏ စကားကို သဘောတူဟန်ဖြင့် ခေါင်းညိတ်လိုက်ကြသည်။
ဆွေ့ ကျောင်းတော်အုပ်ချုပ်သူလည်း မနေနိုင်တော့ဘဲ -
"ဖန့် သူတော်စင်ဘိုးဘေး၊ စီကု ကျောင်းတော်အုပ်ချုပ်သူရဲ့ စိုးရိမ်မှုကလည်း အကြောင်းမဲ့တော့ မဟုတ်ဘူး၊ တကယ်တော့ ကောင်းကင်ငါးပါးစလုံးက အတွင်းကမ္ဘာ တားမြစ်နယ်မြေ (၁၀၀) စီ ထုတ်ပေးပြီး လာမယ့် ကောင်းကင်ငါးပါးပြိုင်ပွဲ အတွက် ပံ့ပိုးပေးတာက အလွန်ကောင်းတဲ့ ရလဒ်ပဲ၊ ဒီ အတွင်းကမ္ဘာ တားမြစ်နယ်မြေတွေကို ဘယ်သူက အုပ်ချုပ်ရမလဲဆိုတာကတော့……"
"သူတော်စင်ဘိုးဘေး စီမံကိန်း ပဲ ဖြစ်ဖြစ်၊ ကျန်းထန်းဝမ်ခန်းမ ပဲ ဖြစ်ဖြစ်၊ အခုလက်ရှိအချိန်မှာ ဆန်းနယဲ့ စစ်မြေပြင်မှာ လူတွေကို သတ်ဖြတ်နိုင်တာ ကျွန်တော်တို့ပဲ ရှိတယ်။"
"ကောင်းကင်ငါးပါးပြိုင်ပွဲ ရှိလာတာကလည်း ဆန်းနယဲ့ စစ်မြေပြင် အတွက်ပဲ။"
"ဒီတစ်ခါ အမြင့်မြတ်ဆုံး နတ်ဘုရားအင်ပါယာ က ကျွန်တော့်ကို ကြယ်တာရာမျက်ရည်စက် (၁၀၀) ပေးတယ်၊ ကျွန်တော် အကုန်ထုတ်ပေးပြီး ကောင်းကင် ငါးပါး ပြိုင်ပွဲ ရဲ့ ဆုလာဘ်အဖြစ် ပေးနိုင်ပါတယ်၊ ဒါပေမဲ့ ဒီ အတွင်းကမ္ဘာ တားမြစ်နယ်မြေ (၅၀၀) ကိုတော့ ကျွန်တော်တို့ပဲ အုပ်ချုပ်ရမယ်၊ နောက်ကျမှ ပြဿနာတွေ ထပ်မဖြစ်ရအောင်။"
ဖန့်ချန်က အေးဆေးစွာ ပြောသည်။
"ခင်ဗျားတို့ ဒီကိစ္စကို ကန့်ကွက်ချင်ရင် အထက်က လူကြီးတွေကို ထပ်သွားမေးလို့ ရပါတယ်။ ကျွန်တော့်မှာ အချိန်နဲ့ စိတ်ရှည်မှု အများကြီး ရှိပါတယ်၊ ဒီမှာပဲ ခင်ဗျားတို့ကို စောင့်နေပါ့မယ်။"
"..."
အဲ့ဒီ သမာဓိခုံရုံး က လူကြီးတွေကို ထပ်သွားမေးရဦးမလား။
ကျောင်းတော်အုပ်ချုပ်သူ အနည်းငယ်၏ မျက်နှာမှာ အလွန် ကြည့်မကောင်း ဖြစ်သွားသည်။
ဒီလို လာလိုက်သွားလိုက်နဲ့ သူတို့မှာ အခွက်ပြောင်လို ဖြစ်မနေဘူးလား။
"ထားပါတော့၊ ငါတို့ သဘောတူရင်တောင်မှ နောက်ပိုင်း အတွင်းကမ္ဘာ တားမြစ်နယ်မြေကို ဘယ်သူ အုပ်ချုပ်ရမလဲဆိုတာ ငါတို့ ဆုံးဖြတ်ချက် မဟုတ်ဘူး။"
စီကု ကျောင်းတော်အုပ်ချုပ်သူက ရုတ်တရက် အသံလွှင့်ပြောသည်။
သူ့စကားကြောင့် နေရာတွင်ရှိသော ကျောင်းတော်အုပ်ချုပ်သူများမှာ သတိပြန်ဝင်လာပြီး ခေါင်းညိတ်လိုက်ကြသည်။
ရှန် ကျောင်းတော်အုပ်ချုပ်သူက ဖန့်ချန်ကို ပြုံးလျက် -
"ဖန့် သူတော်စင်ဘိုးဘေး၊ ဒီကိစ္စကို ငါတို့ သဘောတူလိုက်ပါပြီ၊ ဒါဆိုရင် နောက်ထပ်……"
"နောက်ထပ် ကိစ္စတွေ ရှိပါသေးတယ်၊ မလောပါနဲ့၊ တစ်ခုချင်းစီ ဆွေးနွေးကြတာပေါ့။"
ဖန့်ချန်က ပြုံးလျက် ခေါင်းညိတ်လိုက်သည်။
တော်တော်လေး မဆိုးဘူး၊ သူက အတွင်းကမ္ဘာ တားမြစ်နယ်မြေ (၂၅၀) ကိုပဲ အနိမ့်ဆုံး လိုချင်ခဲ့တာ။
ရလဒ်ကတော့ ကောင်းကင်ငါးပါးပေါင်း (၅၀၀) တောင် ရလာတာ၊ တကယ်ကို ကောင်းမွန်တဲ့ အစပျိုးမှုပဲ။
အခန်း (၂၈၆၆) - မတားဆီးနိုင်တော့ပါ
ယခင်က သင်ခန်းစာယူစရာများ ရှိခဲ့ပြီးဖြစ်၍၊ နောက်ပိုင်းတွင် ဖန့်ချန် တင်ပြလိုက်သော တောင်းဆိုချက် တစ်ခုပြီးတစ်ခုမှာ ကျောင်းတော်အုပ်ချုပ်သူ အသီးသီးတို့၏ မျှော်လင့်ထားသည့် နယ်ပယ်ထဲတွင်သာ ရှိနေသည်။
သူတို့သည် ယခုအခါတွင် သဘောပေါက်သွားကြပြီ ဖြစ်သည်။ ဤ ဖန့် သူတော်စင်ဘိုးဘေးသည် အစကတည်းက ကောင်းကင်ငါးပါး၏ အတွင်းကမ္ဘာ တားမြစ်နယ်မြေ အားလုံးကို ပေါင်းစည်းရန် ရည်ရွယ်ချက် မရှိခဲ့ပေ။
သူသည် နောက်ပိုင်းတွင် တောင်းဆိုမည့်အရာများကို အောင်မြင်စေရန်အတွက် ထိုနည်းလမ်းကို အသုံးပြုနေခြင်းသာ ဖြစ်သည်။
သို့သော် သိရှိသွားသော်လည်း ဘာမှတတ်နိုင်သည် မဟုတ်ပေ။
တစ်ဖက်လူသည် ကြယ်တာရာမျက်ရည်စက် (၁၀၀) ကို ထုတ်ပေးထားပြီး ဖြစ်၍၊ ၎င်းမှာပင် အလွန်ကြီးမားသော ပံ့ပိုးမှု ဖြစ်သည်။
ကြယ်တာရာမျက်ရည်စက်၏ အာနိသင်နှင့် ပတ်သက်၍ ကောင်းကင်အရှင် များထံသို့ ကြိုတင် အကြောင်းကြားထားပြီး ဖြစ်သည်။
သူတို့ကဲ့သို့သော ကျောင်းတော်အုပ်ချုပ်သူများမှာလည်း ထိုသတင်းစကားကို အချိန်နှင့်တစ်ပြေးညီ ရရှိထားကြသည်။
ထို့ကြောင့် နောက်ပိုင်းတွင် ကောင်းကင်မီးတောက်အသီး၊ မရဏသားရဲသွေး၊ ယွမ်ရွှီရေ တို့ကို စုဆောင်းခြင်းမှာလည်း အရေးတကြီး လိုအပ်လာသည်။
"အောက်ပါအချက်ကတော့ ကောင်းကင်ငါးပါးပြိုင်ပွဲရဲ့ အဓိက အကျဆုံး ပြဿနာတစ်ခုပါ။"
"ပြိုင်ပွဲကို ဘယ်လိုမျိုး တရားမျှတအောင် အာမခံမလဲ"
ဖန့်ချန်က စားပွဲကို ခပ်ဖွဖွ ပုတ်လိုက်သည်။
စီကု ကျောင်းတော်အုပ်ချုပ်သူက အေးစက်စက် လေသံဖြင့် -
"ငါတို့မှာ ကောင်းကင်ငါးပါး စစ်မြေပြင်ရဲ့ အတွေ့အကြုံတွေ ရှိပြီးသားပဲ၊ ဒီပြဿနာက ပြဿနာဟုတ်သေးလား ကောင်းကင်ငါးပါး စစ်မြေပြင်ရဲ့ နည်းလမ်းအတိုင်းပဲ လုပ်လိုက်ကြတာပေါ့။"
"ဒါက မရဘူး။"
ဖန့်ချန်က ခေါင်းခါလိုက်သည်။
"ကောင်းကင်ငါးပါး စစ်မြေပြင်ရဲ့ နည်းလမ်းက ဒီအထူးချွန်ဆုံး လူငယ်တွေအတွက်ပဲ သင့်တော်တာ၊ ကျွန်တော်တို့ရဲ့ ကောင်းကင်ငါးပါးပြိုင်ပွဲက ကျယ်ပြန့်တဲ့ ကောင်းကင်ငါးပါးအတွင်းကနေ အရည်အချင်းရှိတဲ့ လူတွေကို ရွေးချယ်ဖို့ ဖြစ်တယ်။
သာမန်အချိန်တွေမှာ ကျောင်းတော်ကြီး ခုနှစ်ခု ဆီ အပ်နှံလိုက်တဲ့ ကျောင်းသားတွေက တကယ်ပဲ အကြိမ်ကြိမ် အချ ခံရပြီး အရည်အချင်း ပြည့်ဝနေလို့လား "
ရှန် ကျောင်းတော်အုပ်ချုပ်သူက ပြုံးလျက် -
"ဒါဆို ဖန့် သူတော်စင်ဘိုးဘေးရဲ့ သဘောထားက"
"ကျွန်တော် အကြံပေးချင်တာက ကောင်းကင်ငါးပါးရဲ့ စစ်ဆေးရေးဌာန ကနေ လူအင်အား အချို့ကို ခွဲဝေပေးပြီး ဒီပြိုင်ပွဲရဲ့ တရားမျှတမှုကို တာဝန်ယူစေချင်တယ်။ အလွန် ဝေးလံပြီး နောက်ခံမရှိတဲ့ နတ်ဘုရားနယ်မြေအထိ စစ်ဆေးရေးဌာနက သူတော်စင်တွေ ရောက်ရှိနေမှသာ ပြိုင်ပွဲတိုင်းရဲ့ တရားမျှတမှုကို အာမခံနိုင်မှာပါ။"
"နောက်ဆုံးမှာ အဆင့်ဆင့် ရွေးချယ်မှုတွေကို ဖြတ်ကျော်ပြီးမှသာ ကျွန်တော်တို့အနေနဲ့ နိဗ္ဗာန်တားမြစ်နယ်မြေ အတွက် ပိုမိုတိကျတဲ့ ထူးချွန်သူတွေကို ပို့ဆောင်ပေးနိုင်မှာပါ။"
ဖန့်ချန်က ပြောသည်။
"ဒါကတော့ အပိုအလုပ်တွေ များနေပြီ မဟုတ်လား"
ယဲ့ထျန်းဂူ က ရုတ်တရက် ပြောသည်။
"ငါတို့ရဲ့ စနစ်က ရင့်ကျက်ပြီးသားပါ၊ ဒီလောက်ထိ ရှုပ်ထွေးအောင် လုပ်စရာ မလိုပါဘူး။"
"အရမ်း ရင့်ကျက်နေပြီလား ဒါဆို လူသားမျိုးနွယ်ထဲမှာ ဘာလို့ ချင်ဖိုကျား တစ်ယောက်တည်းပဲ ကောင်းကင်အရှင် ဆက်ခံသူ ဖြစ်နေရတာလဲ "
ဖန့်ချန်က မေးသည်။
ယဲ့ထျန်းဂူ တခဏချင်း တိတ်ဆိတ်သွားသည်။
ကျန်ရှိသော ကျောင်းတော်အုပ်ချုပ်သူများမှာလည်း တစ်ယောက်မျက်နှာ တစ်ယောက် ကြည့်လိုက်ကြပြီးနောက် ထပ်မံ၍ မငြင်းဆန်တော့ပေ။
မျက်စိရှေ့မှာတင် ထင်ရှားနေသည့် သက်သေရှိနေသောကြောင့် သူတို့လည်း ပြန်လည် ချေပရန် ခက်ခဲနေသည်။
သို့သော် စစ်ဆေးရေးဌာနကသာ ပါဝင်လာပါက အချို့ကိစ္စရပ်များကို အလွယ်တကူ စီမံခန့်ခွဲရန် မဖြစ်နိုင်တော့ပေ။
မည်သည့် မဟာမိတ်အဖွဲ့၏ စစ်ဆေးရေးဌာနပင် ဖြစ်ပါစေ၊ ထိုထဲရှိ ရေပြင်သည် အနည်းဆုံး ရှစ်ပုံ၊ ကိုးပုံလောက်က ကြည်လင်နေသည်။
နောက်ကျန်သည့် ရေနောက်များမှာ သူတို့ပင် ရှင်းရှင်းလင်းလင်း မမြင်နိုင်ပေ။
"ကျွန်တော်တို့က အခု စည်းမျဉ်းတစ်ခုကိုပဲ ဆွေးနွေးနေတာပါ၊ အတည်ပြု ၊ မပြု ဆိုတာကတော့ အထက်ကလူကြီးတွေရဲ့ ဆုံးဖြတ်ချက်အတိုင်းပဲ ဖြစ်မှာပါ။"
ယဲ့ထျန်းဂူ တခဏမျှ တိတ်ဆိတ်ပြီးနောက် ပြောသည်။
"ဒါဆိုရင်လည်း အတူတူ စည်းမျဉ်းကို အပြီးသတ် ဆွေးနွေးထားလိုက်ကြတာပေါ့၊ အထက်က အတည်ပြုတာကိုပဲ စောင့်နေကြတာပေါ့။"
ဖန့်ချန်က ပြောသည်။
ယဲ့ထျန်းဂူ ဆက်မပြောတော့ပေ။
နောက်ဆုံးတွင်၊ ထိုစည်းမျဉ်းကို အလွန်လျင်မြန်စွာ အပြီးသတ်လိုက်သည်။
၎င်းတွင် ကျောင်းတော်အုပ်ချုပ်သူ အသီးသီးတို့က အကြံပြုချက် အနည်းငယ် ပေးခဲ့ကြပြီး အားလုံးကိုလည်း လက်ခံခဲ့သည်။
သို့သော် အကြောင်းအရာ ရှစ်ပုံမှာ ဖန့်ချန် တင်ပြခဲ့သော နည်းလမ်းအတိုင်းသာ ဖြစ်သည်။
ထိုကျောင်းတော်အုပ်ချုပ်သူများမှာ စိတ်ထဲတွင် ကောင်းစွာ သိရှိနေသော်လည်း အောင့်သက်သက်သာ နေလိုက်ရသည်။
"ကောင်းပါပြီ၊ စည်းမျဉ်းတွေ ရပြီးပြီဆိုတော့ နောက်တစ်ဆင့်ကတော့ အတည်ပြုချက်ကို စောင့်ရုံပါပဲ။"
ဖန့်ချန်က မတ်တပ်ရပ်လိုက်သည်။
နေရာတွင်ရှိသော ကျောင်းတော်အုပ်ချုပ်သူများမှာလည်း တစ်ယောက်ပြီးတစ်ယောက် မတ်တပ်ရပ်လိုက်ကြသည်။
"မိတ်ဆွေတို့၊ အရင်ဆုံး ခွင့်ပြုပါဦး။"
ဖန့်ချန်က လက်ယှက် ဂါရဝပြုသည်။
ရှန် ကျောင်းတော်အုပ်ချုပ်သူက ပြုံးလျက် -
"ဖန့် သူတော်စင်ဘိုးဘေး၊ တစ်ခါလောက်ပဲ တွေ့ဖူးတာ၊ ခဏလောက် ထိုင်ပြီး စကားပြောကြမလား "
အို
ဖန့်ချန်က သူ့ကို တစ်ချက်ကြည့်လိုက်ပြီး ငြိမ်သက်စွာဖြင့် ပြန်ထိုင်လိုက်သည်။
ကျန်ရှိသော ကျောင်းတော်အုပ်ချုပ်သူများမှာလည်း အချင်းချင်း ကြည့်လိုက်ကြပြီး နောက်ထပ် ထိုင်လိုက်ကြသည်။
"ဖန့် သူတော်စင်ဘိုးဘေး၊ ငါ့လက်အောက်မှာ သူတော်စင်ဘိုးဘေး စီမံကိန်း နဲ့ ကျန်းထန်းဝမ်ခန်းမ ထဲ ရောက်နေတဲ့ တပည့်တွေ အများကြီး ရှိပါတယ်၊ ဥပမာ - ရှန်တုရှင်း ဆိုရင် ငါ နဲ့ ဆွေမျိုးတော်စပ်ပါတယ်။"
ရှန် ကျောင်းတော်အုပ်ချုပ်သူက -
"ဒီတစ်ခါ ဆန်းနယဲ့ စစ်မြေပြင်က သူတော်စင်တော်တော်များများ မင်းနောက်ကို လိုက်ပြီး အမြင့်မြတ်ဆုံး နတ်ဘုရားအင်ပါယာ ဆီ သွားခဲ့ကြတယ်လို့ ကြားမိပါတယ်။"
ယဲ့ထျန်းဂူ နှင့် အခြားသော ကျောင်းတော်အုပ်ချုပ်သူများက ဖန့်ချန်ဘက်သို့ စူးစိုက်ကြည့်နေကြသည်။
သူတို့သည် သတင်းအချို့ ရရှိထားသော်လည်း အမြင့်မြတ်ဆုံး နတ်ဘုရားအင်ပါယာနှင့် ပတ်သက်သည့် အသေးစိတ် အချက်အလက်များကို အမှန်တကယ် မသိရှိကြပေ။
"ဟုတ်ပါတယ်၊ အတွေ့အကြုံ ရစေချင်တဲ့သူ အားလုံးကို ကျွန်တော် ခေါ်သွားခဲ့ပါတယ်။"
ဖန့်ချန်က ခေါင်းညိတ်သည်။
"ဒါဆို…… ငါတို့ ကောင်းကင်ငါးပါး နဲ့ အမြင့်မြတ်ဆုံး နတ်ဘုရားအင်ပါယာ ကြားက ကွာဟချက်က တကယ်ပဲ ဘယ်လောက်ကြီးမားနေတာလဲ "
ရှန် ကျောင်းတော်အုပ်ချုပ်သူ၏ မျက်နှာမှာ လေးနက်နေသည်။
ထိုမေးခွန်းမှာ လက်ရှိအချိန်တွင် ကျောင်းတော်အုပ်ချုပ်သူတိုင်း သိချင်နေသော မေးခွန်း ဖြစ်သည်။
ဟေးဆန်းပင်လျှင် သိချင်စိတ်ဖြင့် အနည်းငယ် ရှေ့သို့ ကိုယ်ကို ယိမ်းလိုက်သည်။
"အနည်းဆုံး အဆတစ်ရာလောက်တော့ ကွာခြားမှာပါ။ အမြင့်မြတ်ဆုံး နတ်ဘုရားအင်ပါယာ မှာ ရှိတဲ့ ကောင်းကင်အရှင် အများစုက ကိုယ်တိုင်ကိုက ဆန်းနယဲ့ သူတော်စင်တွေ ဖြစ်နေကြတာပါ။"
"ကောင်းကင်အရှင်အောက်က အထွတ်ထိပ်တာအို၊ ကောင်းကင်နိမိတ် ၊ ကမ္ဘာကြီး သူတော်စင်တွေထဲမှာလည်း ဆန်းနယဲ့ သူတော်စင်တွေ နေရာတိုင်းမှာ ရှိနေပါတယ်။"
"ဒီအချက်တစ်ခုတည်းတင်ကိုပဲ ငါတို့ ကောင်းကင်ငါးပါးက ကလေးလေးတွေလိုပဲ ရှိပါသေးတယ်။"
ဖန့်ချန်က ပြောသည်။
နေရာတွင်ရှိသော သူတော်စင်များမှာ အချင်းချင်း ကြည့်လိုက်ကြပြီး သူတို့၏ အမူအရာများမှာ တဖြည်းဖြည်း လေးနက်လာသည်။
"ဒီလိုလား၊ ဒါဆိုရင်တော့ ငါတို့ ကောင်းကင်ငါးပါး အနေနဲ့ တကယ်ပဲ ပြောင်းလဲဖို့ လိုအပ်နေပြီ။"
ရှန် ကျောင်းတော်အုပ်ချုပ်သူက တိုးတိုးလေး ရေရွတ်သည်။
"နောက်ပိုင်းမှာ ကောင်းကင်ငါးပါးကို ထမ်းတင်ရမယ့်သူတွေက မင်းတို့လို လူငယ်မျိုးဆက် ဆန်းနယဲ့ သူတော်စင်တွေပဲ ဖြစ်တော့မှာပါ……"
"အကြီးအကဲတို့၊ ဒီစကားက မှားပါတယ်။ ကျွန်တော်တို့ လူငယ်တွေက ကောင်းကင်ငါးပါးကို ထမ်းတင်နိုင်တဲ့အချိန်မှာ၊ အကြီးအကဲတို့ရဲ့ အရည်အချင်းနဲ့ ဆိုရင် နောက်တစ်ဘဝ ပြန်လည်ဝင်စားပြီး ကျင့်ကြံလိုက်ရုံပါပဲ။ အကြီးအကဲတို့လည်း ကောင်းကင်ငါးပါးကို ထမ်းတင်နိုင်တဲ့ တိုင်ကွန်တွေ ဖြစ်လာမှာပါ။"
ဖန့်ချန်က ပြုံးလျက် ပြောသည်။
နောက်တစ်ဘဝ ပြန်လည်ဝင်စားရမလား
ကျောင်းတော်အုပ်ချုပ်သူများ၏ မျက်လုံးများမှာ တဖျတ်ဖျတ် လက်သွားသည်။
သူတို့သည် မိမိတို့၏ အရည်အချင်းကို အလွန်အမင်း ယုံကြည်ကြသူများ ဖြစ်ကြသည်။
သို့သော် တကယ်တမ်း ပြန်လည်ဝင်စားရမည်ဆိုလျှင် နောက်တစ်ဘဝတွင်လည်း ယခုကဲ့သို့ အဆင့်မျိုးကို ရောက်နိုင်မည်ဟု မည်သူက အာမခံနိုင်မည်နည်း။
ဒီကြားထဲမှာများ အမှားအယွင်း တစ်ခုခု ဖြစ်သွားမလား။
ရန်သူတွေက တမင်တကာ ပစ်မှတ်ထားပြီး ခြေလှမ်းမှားအောင် လုပ်ရင်ကော။
ဒါဆိုရင် သူတို့မှာ နောက်ဘဝတွေအထိ ထိပ်ဆုံးကို ရောက်လာနိုင်တော့မှာ မဟုတ်ဘဲ လူအုပ်ထဲ ပျောက်ကွယ်သွားလိမ့်မည်။
ဖန့်ချန်က သူတို့၏ အမူအရာကို မြင်သဖြင့် သူတို့အား အမြင့်မြတ်ဆုံး နတ်ဘုရားအင်ပါယာ တွင် မြင်ခဲ့သမျှ၊ ကြားခဲ့သမျှကို တစ်ခုချင်း ရှင်းပြလိုက်သည်။
နေရာတွင်ရှိသော ကျောင်းတော်အုပ်ချုပ်သူများမှာ အလွန် အလေးအနက် နားထောင်နေကြသည်။
ကြားပြီးနောက်တွင် ဆွေ့ ကျောင်းတော်အုပ်ချုပ်သူက သက်ပြင်းချကာ -
"ကောင်းကင်ငါးပါးရဲ့ ပြောင်းလဲမှုက မဖြစ်မနေ လုပ်ရမယ့်အရာပါ၊ မဟုတ်ရင် ငါတို့ ဘယ်လိုလုပ်ပြီး အမြင့်မြတ်ဆုံး နတ်ဘုရားအင်ပါယာ ကို ကျော်တက်နိုင်မှာလဲ။
ဆန်းနယဲ့ စစ်မြေပြင်ရဲ့ စည်းမျဉ်းမရှိရင်၊ ဖန့် သူတော်စင်ဘိုးဘေးသာ ဒီမှာ မရှိရင် ဒီနေ့ ဒီအချိန်မှာ အမြင့်မြတ်ဆုံး နတ်ဘုရားအင်ပါယာ က ကောင်းကင်အရှင်တွေ ဒီမှာ ထိုင်ပြီး ဆွေးနွေးနေကြလောက်ပြီ……"
"ဟုတ်တယ်၊ မိတ်ဆွေတို့ အားလုံးကလည်း မျိုးနွယ်စုကြီးက ဆင်းသက်လာကြတာပဲ၊ လက်အောက်မှာ အရည်အချင်းရှိတဲ့ တပည့်တွေ ရှိရင်လည်း ကျွန်တော့်ဆီ အမည်စာရင်း ပေးပို့လို့ ရပါတယ်။"
"သူတို့မှာ တကယ် အရည်အချင်း ရှိရင်၊ ဝူရှန်းပေမြိန့် ရဲ့ ဆုံမှတ်မှာ ကျွန်တော် ပိုပြီး အာရုံစိုက်ပေးပါ့မယ်။"
ဖန့်ချန်က ပြောသည်။
ကျောင်းတော်အုပ်ချုပ်သူများမှာ အချင်းချင်း ကြည့်လိုက်ကြပြီး မျက်နှာပေါ်တွင် ဝမ်းမြောက်ဝမ်းသာ ဖြစ်သည့် အပြုံးများ ပေါ်လာသည်။
"ဖန့် သူတော်စင်ဘိုးဘေးက တကယ်ကို ရည်မွန်တာပဲ၊ ဒါပေမဲ့ ကျွန်တော့်မှာလည်း သူတော်စင်ဘိုးဘေး နောက်ပိုင်းမှာ ဆန်းနယဲ့ စစ်မြေပြင် အတွက် ဂရုစိုက်ပေးရမယ့် တပည့်တွေ ရှိနေသေးလို့ပါ။"
"ဟုတ်ပါတယ်၊ ဟုတ်ပါတယ်။……"
……
……
မကြာမီပင် ဖန့်ချန်နှင့် ကျောင်းတော်အုပ်ချုပ်သူ အစုအဖွဲ့မှာ ကျောင်းတော်အုပ်ချုပ်သူ နန်းဆောင်မှ ထွက်ခွာလာပြီး အချင်းချင်း လက်ယှက်နှုတ်ဆက်ကာ ခွဲခွာသွားကြသည်။
ထို ကျောင်းတော်အုပ်ချုပ်သူများ ထွက်ခွာသွားသည်ကို ကြည့်ပြီးမှ ဖန့်ချန်က ဆွေ့ ကျောင်းတော်အုပ်ချုပ်သူဘက်သို့ လှည့်ကြည့်လိုက်သည်။
"ဆွေ့ ကျောင်းတော်အုပ်ချုပ်သူ၊ ဒီတစ်ခါ ကျွန်တော့်ကို ကူညီပေးလို့ ကျေးဇူးတင်ပါတယ်။"
ချင်ဟော့ချန်နှင့် တခြားသူများမှာ နန်းဆောင်ပြင်ပတွင် စောင့်ဆိုင်းနေကြပြီး ထိုစကား၏ အဓိပ္ပာယ်ကို နားလည်လိုက်ကြသည်။
"ဘာမှမဟုတ်ပါဘူး၊ လုပ်သင့်လုပ်ထိုက်တာပါ၊ သူတို့က ရှန်းဟုန် တပည့်တွေပဲ၊ ရွှေဟွေး ကျောင်းတော် ကို သွားရင်လည်း ပိုကောင်းတဲ့ အနာဂတ် ရှိမှာပါ။"
ဆွေ့ ကျောင်းတော်အုပ်ချုပ်သူက ပြုံးလျက် လက်ကို ခါယမ်းလိုက်သည်။
နှုတ်ဆက်ပြီးနောက် ဖန့်ချန်သည် ချင်ဟော့ချန်တို့ကို ခေါ်ဆောင်ကာ ဟေးဆန်း၏ အတွင်းကမ္ဘာထဲသို့ ဝင်ရောက်ပြီး တန်လင် ကျောင်းတော်မှ ထွက်ခွာလာခဲ့သည်။
သူတို့ ထွက်ခွာသွားပြီး မကြာမီမှာပင်။
ဆွေ့တင်းရှန်း က ရုတ်တရက် ဆွေ့ ကျောင်းတော်အုပ်ချုပ်သူ၏ နောက်ကွယ်တွင် ပေါ်လာသည်။
"မင်း ဘာဖြစ်နေတာလဲ သူ တန်လင် ကျောင်းတော်ကနေ လူတွေကို ခေါ်သွားတာကို အလွတ်ပေးလိုက်တာလား"
ဆွေ့ ကျောင်းတော်အုပ်ချုပ်သူက ခေါင်းကို လှည့်ကြည့်ကာ ဆွေ့တင်းရှန်းကို ကြည့်ပြီး ခေါင်းခါလိုက်သည်။
"တားဆီးလို့ မရတော့ဘူး၊ အခုအချိန်မှာ အရှိန်အဟုန်က ဒီလို ဖြစ်နေပြီ၊ ဒီလို ကိစ္စသေးသေးလေးတွေမှာ သူ့ကို ဒုက္ခမပေးပါနဲ့တော့။"
"ဒီ အစည်းအဝေးပြီးရင် ကျောင်းတော်ကြီးခုနှစ်ခုရဲ့ ကျောင်းတော်အုပ်ချုပ်သူတွေထဲမှာ သူ့ဘက်ကို ဘယ်နှစ်ယောက် ကူညီရပ်တည်မလဲဆိုတာ မင်း သိလား"
ဆွေ့တင်းရှန်း တခဏမျှ ကြောင်အသွားသည်။
ဆွေ့ ကျောင်းတော်အုပ်ချုပ်သူက ခေါင်းခါလိုက်ပြီးနောက် နောက်သို့ လှည့်ကာ ထွက်ခွာသွားတော့သည်။