အခန်း ၁၆၈

အခန်း - ၁၆၈

ရှီလဲ့သည် နိုင်ငံခြားရေးဝန်ကြီးဌာန နိုင်ငံတကာ ထောက်လှမ်းရေးဗျူရိုနှင့် ၎င်းတို့၏ တရားဝင် လုံခြုံရေးပညာရှင် အဖွဲ့ဆယ့်နှစ်ဖွဲ့၏ IP Address မှတစ်ဆင့် ခြေရာခံခြင်းကို ခံနေရပြီး ထွက်ပေါက်မရှိသည့် မျှော်လင့်ချက်မဲ့ အခြေအနေသို့ တဖြည်းဖြည်း မောင်းပိတ်ခြင်း ခံနေရပြီ ဖြစ်သည်။

ဟက်ကာမဟာမိတ်အဖွဲ့က ဂျပန်နိုင်ငံအပေါ် ဒုတိယအကြိမ်မြောက် ဆိုက်ဘာစစ်ပွဲ ဆင်နွှဲရန် စီစဉ်စဉ်ကတည်းက ရှီလဲ့သည် ယာယီ ဘော့တ်ဆာဗာများကို စတင်ဖမ်းဆီးခဲ့ခြင်း ဖြစ်သည်။

အချိန်တိုအတွင်း၌ သူသည် ဘော့တ်ဆာဗာ တစ်ရာနီးပါးခန့်သာ ဖမ်းဆီးနိုင်ခဲ့ပြီး ၎င်းတို့အားလုံးမှာ ယာယီဘော့တ်များ တစ်နည်းအားဖြင့် စွမ်းဆောင်ရည် သာမန်မျှသာရှိသည့် အမှိုက်ဘော့တ်များသာ ဖြစ်ကြသည်။

အကယ်၍ အရာအားလုံးသာ ရှီလဲ့၏ အစီအစဉ်အတိုင်း ဖြစ်ခဲ့မည်ဆိုပါက သူသည် ဘော့တ်ဆာဗာ တစ်ရာမဆိုထားနှင့် ဆယ်လုံးပင် လိုအပ်လိမ့်မည် မဟုတ်ချေ။

နံပါတ် (၁) ဆာဗာရှေ့တွင် ထိုင်နေသော ရှီလဲ့၏ မျက်နှာမှာ တည်တင်းနေပြီး သူသည် ပန်ရှီဖိုင်းယားဝေါလ်ကို အိုက်စင်ကုမ္ပဏီ၏ အဆင့်တစ် ဘော့တ်ဆီသို့ လျင်မြန်စွာ ကူးယူလိုက်တော့သည်။

တစ်ခုခုကို ရရှိရန်အတွက် တစ်ခုခုကို ပြန်လည်ပေးဆပ်ရမည် ဖြစ်သည်။

နောက်ဆုံးတွင် ရှီလဲ့သည် စူပါကွန်ပျူတာ ယန် ကို ကာကွယ်ရန်အတွက် အိုက်စင်ကုမ္ပဏီ၏ အဆင့်တစ် ဘော့တ်နှင့်အတူ ပန်ရှီဖိုင်းယားဝေါလ်ကိုပါ စွန့်လွှတ်ရန် ရွေးချယ်လိုက်တော့သည်။

ပန်ရှီဖိုင်းယားဝေါလ်၏ ကာကွယ်ရေးစွမ်းရည်မှာ အလွန်တရာ အစွမ်းထက်လှသဖြင့် ထိုအဆင့်တစ် ဘော့တ်အတွင်း၌ နိုင်ငံခြားရေးဝန်ကြီးဌာန နိုင်ငံတကာ ထောက်လှမ်းရေးဗျူရို၏ တရားဝင်အဖွဲ့ ဆယ့်နှစ်ဖွဲ့ကို ကြံ့ကြံ့ခံ တားဆီးထားနိုင်လိမ့်မည်ဟု ရှီလဲ့က ယုံကြည်ချက်အပြည့် ရှိနေသည်။

သို့သော်လည်း ပန်ရှီဖိုင်းယားဝေါလ်က တိုက်ခိုက်မှုကို ကြံ့ကြံ့ခံပြီးနောက် ၎င်း၏ ထူးခြားသော အချက်အလက်မျိုးစုံမှာလည်း ဖော်ပြခြင်း ခံရပေလိမ့်မည်။

တစ်နည်းအားဖြင့် ပန်ရှီဖိုင်းယားဝေါလ်သည် ရှီလဲ့၏ လက်ထဲတွင် ရှိနေသော ‘လူသတ်လက်နက်’ ကဲ့သို့ ထိရောက်လွန်းလှသဖြင့် ယခုအချိန်မှစ၍ ၎င်းကို လူအများရှေ့တွင် မည်သည့်အခါမျှ ထုတ်ပြ၍ ရတော့မည်မဟုတ်ချေ။

ရှီလဲ့သည် အစပိုင်းက နည်းပညာကုမ္ပဏီကို တရုတ်နိုင်ငံတွင် ရာနှုန်းပြည့် ပိုင်ဆိုင်သည့် လက်အောက်ခံကုမ္ပဏီတစ်ခုအဖြစ် တည်ထောင်ရန် စီစဉ်ထားခဲ့ပြီး ပန်ရှီဖိုင်းယားဝေါလ်နှင့် အမူအရာထောက်လှမ်းရေးဆော့ဖ်ဝဲလ်တို့ကို ကုမ္ပဏီ၏ အဓိက ထုတ်ကုန်များအဖြစ် ထုတ်လုပ်ရန် ရည်ရွယ်ထားခဲ့ခြင်း ဖြစ်သည်။

ယခုအခါတွင်မူ ပန်ရှီဖိုင်းယားဝေါလ်အနေဖြင့် ကန့်လန့်ကာနောက်ကွယ်တွင်သာ ရှိနေရတော့မည့်ပုံပင်။

‘လာစမ်းပါ... မင်းတို့ ဘယ်လောက်အထိ အစွမ်းထက်လဲ ငါ ကြည့်ရသေးတာပေါ့’ ရှီလဲ့က စိတ်ထဲကနေ နှာခေါင်းရှုံ့လိုက်သည်။ အိုက်စင်ကုမ္ပဏီ၏ အဆင့်တစ် ဘော့တ်သည် အပြည့်အဝ ပြင်ဆင်ပြီးစီးသွားခဲ့ပြီ။

နိုင်ငံခြားရေးဝန်ကြီးဌာန နိုင်ငံတကာ ထောက်လှမ်းရေးဗျူရို၏ ဆိုက်ဘာလုံခြုံရေးအဖွဲ့ ဆယ့်နှစ်ဖွဲ့သည် ရှီလဲ့ ချန်ထားခဲ့သော အတားအဆီး အလွှာလွှာကို ဖောက်ထွင်းကာ ထိုယာယီဘော့တ်များကို အပြတ်ရှင်းပစ်လိုက်ပြီး အိုက်စင်ကုမ္ပဏီ၏ အဆင့်တစ် ဘော့တ်ဆီသို့ ရောက်ရှိလာကြတော့သည်။

ကမ္ဘာ့အဆင့်မီ လုံခြုံရေးပညာရှင် တစ်ရာကျော်သည် အဆင့်တစ် ဘော့တ်ကို စမ်းသပ်သည့်အနေဖြင့် စတင် တိုက်ခိုက်လိုက်ကြသည်။

သို့သော်လည်း ပထမအကြိမ် စမ်းသပ်တိုက်ခိုက်မှုမှာ ပန်ရှီဖိုင်းယားဝေါလ်ကြောင့် မည်သည့်လှိုင်းဂယက်မျှ မထွက်ပေါ်လာဘဲ တိုက်ရိုက် ချေမှုန်းခြင်း ခံလိုက်ရသည်။

ရှီလဲ့သည် အိုက်စင် အဆင့်တစ် ဘော့တ်ကို ကူညီရန်အတွက် စူပါကွန်ပျူတာ ယန် ကို ထိန်းချုပ်ပြီး တိုက်ခိုက်မှုအားလုံးကို အပြည့်အဝ ပိတ်ဆို့လိုက်သည်။

နိုင်ငံခြားရေးဝန်ကြီးဌာန နိုင်ငံတကာ ထောက်လှမ်းရေးဗျူရို ဆိုက်ဘာလုံခြုံရေးဌာနအတွင်း၌ အိုဒါ ရှိီးရှန်သည် သူ၏ ကွန်ပျူတာစခရင်ကို စိုက်ကြည့်ရင်း စားပွဲပေါ်ရှိ မိုက်ခရိုဖုန်းမှတစ်ဆင့် အဖွဲ့ဆယ့်နှစ်ဖွဲ့စလုံး၏ အဖွဲ့ဝင်တိုင်းထံသို့ သူ၏ အသံကို ပေးပို့လိုက်သည်။

“လုပ်ဖော်ကိုင်ဖက်တို့... ဒါက ရန်သူ့ရဲ့ နောက်ဆုံး ဆာဗာ ဖြစ်မယ်... ငါတို့ ဒီဆာဗာကို ဖောက်ထွင်းနိုင်သရွေ့ ငလျင်ထိတ်လန့်မှုကို ဖန်တီးခဲ့တဲ့ ရန်သူက ငါတို့ရှေ့မှာပေါ်လာတော့မယ်”

လုံခြုံရေးပညာရှင်များသည် အလွန်အမင်း စိတ်လှုပ်ရှားသွားခဲ့ကြသည်။ ငလျင်ကြိုတင်ခန့်မှန်းရေးအဖွဲ့၏ ငလျင်ကြိုတင်ခန့်မှန်းရေး ဆော့ဖ်ဝဲလ်မှာ ဟက်ကာများ၏ မသမာသောနည်းဖြင့် ပြုပြင်မွမ်းမံခြင်းကို ခံခဲ့ရသဖြင့် တိုကျိုမြို့ပြဧရိယာတစ်ခုလုံးတွင် ပြင်းထန်သော စုပေါင်းထိတ်လန့်မှုများ ဖြစ်ပေါ်ခဲ့ပြီး ကြီးမားသော ဆုံးရှုံးမှုများကို ဖြစ်ပေါ်စေခဲ့သည်။

ထိုလုံခြုံရေးပညာရှင်များသည် ဤအရာအားလုံးကို ဖြစ်ပေါ်စေခဲ့သည့် ရှီလဲ့ကို အရိုးထဲအထိ နာကျည်းနေကြပြီး ရှီလဲ့ကို ဖမ်းဆီးကာ တရားစီရင်ရန် ဂျပန်နိုင်ငံသို့ လွှဲပြောင်းယူရန် ကျိန်ဆိုထားကြသည်။

ကမ္ဘာ့အဆင့်မီ လုံခြုံရေးပညာရှင် အဖွဲ့ဆယ့်နှစ်ဖွဲ့သည် ရှီလဲ့၏ အဆင့်တစ် ဘော့တ်ကို ဝိုင်းရံထားကြသည်။ သို့သော်လည်း အချိန်ကြာလာသည်နှင့်အမျှ ၎င်းတို့သည် ပြဿနာတစ်ခုကို သတိပြုမိလာကြသည်။ ၎င်းတို့မှာ ဆာဗာ၏ ကာကွယ်ရေးစနစ်ကို လုံးဝ မဖောက်ထွင်းနိုင်ခြင်းပင် ဖြစ်သည်။

၎င်းတို့သည် ဆာဗာ၏ အပြင်ဘက်အနားသတ်တွင်သာ ရှိနေကြဆဲဖြစ်ပြီး ဖိုင်းယားဝေါလ်ကိုပင် မကျော်ဖြတ်နိုင်ကြသေးချေ။

အိုက်စင်ကုမ္ပဏီ၏ အဆင့်တစ် ဘော့တ်သည် တိုက်ခိုက်မှုကို သုံးမိနစ်ကျော်အထိ ကြံ့ကြံ့ခံထားနိုင်သည်။ ဤအခြေအနေက ရာဖေးလ်ကို အလွန်အမင်း စူးစမ်းချင်စိတ် ဖြစ်ပေါ်စေခဲ့သည်။ အဘယ်ကြောင့်ဆိုသော် ယခင်က ကြားခံဆာဗာများ အားလုံးမှာ ထိလိုက်သည်နှင့် ချက်ချင်း ပြိုလဲသွားခဲ့ကြသောကြောင့် ဖြစ်သည်။

‘ဒီလျှို့ဝှက်ဆန်းကြယ်တဲ့ကောင်က စူပါကွန်ပျူတာတစ်လုံးကို သုံးနေတာများလား’ ရာဖေးလ်က ခေတ္တမျှ တွေးတောလိုက်ပြီးနောက် ချက်ချင်းပင် စောင့်ကြည့်ရုံသက်သက် အခြေအနေမှနေ၍ တိုက်ပွဲအတွင်းသို့ ဝင်ရောက်ရန် ပြင်ဆင်လိုက်တော့သည်။

ရာဖေးလ်၏ နည်းပညာမှာလည်း ကမ္ဘာ့အဆင့်မီ ထိပ်တန်းအဆင့်တွင် ရှိသဖြင့် ရှီလဲ့ကို အနိုင်မယူနိုင်လျှင်ပင် ကွာဟချက်က သိပ်မကြီးမားလှပေ။ ရာဖေးလ်သည် လုံခြုံရေးပညာရှင်များကို ပိတ်ဆို့ထားသည့် ဖိုင်းယားဝေါလ်ဆော့ဖ်ဝဲလ်ကို စစ်ဆေးရန် အိုက်စင် အဆင့်တစ် ဘော့တ်ထဲသို့ တိတ်တဆိတ် ဝင်ရောက်သွားခဲ့သည်။

“ဟင်” ရာဖေးလ်က ၎င်းကို စကင်ဖတ်ကြည့်ပြီး ပန်ရှီဖိုင်းယားဝေါလ်ကို ထိုးဖောက်သည့် နည်းလမ်းဖြင့် ဖောက်ထွင်းရန် ကြိုးပမ်းလိုက်သည်။ သို့သော်လည်း ပန်ရှီဖိုင်းယားဝေါလ်၏ စွမ်းဆောင်ရည်မှာ အလွန်ထိရောက်လှသဖြင့် ရာဖေးလ်၏ အစွမ်းကုန် ထိုးဖောက်ရန် ကြိုးပမ်းမှုများမှာ မအောင်မြင်ခဲ့ချေ။ ဟုတ်ပေသည် ဤအရာမှာ ရာဖေးလ်အနေဖြင့် စူပါကွန်ပျူတာကို အသုံးမပြုထားသောကြောင့်လည်း ဖြစ်သည်။

လုံခြုံရေးပညာရှင် အဖွဲ့ဆယ့်နှစ်ဖွဲ့လုံး ပန်ရှီဖိုင်းယားဝေါလ်၏ ပိတ်ဆို့ခြင်းကို ခံထားရသည်ကို မြင်သောအခါ ရှီလဲ့သည် နိုင်ငံခြားရေးဝန်ကြီးဌာန နိုင်ငံတကာ ထောက်လှမ်းရေးဗျူရိုကို အခြားလမ်းကြောင်းတစ်ခုမှနေ၍ တိုက်ခိုက်ရန် စူပါကွန်ပျူတာ ယန် ကို ချက်ချင်း ထိန်းချုပ်လိုက်တော့သည်။

ပန်ရှီဖိုင်းယားဝေါလ်၏ လိုက်လျောညီထွေရှိသော ကာကွယ်ရေးစနစ်နှင့် တန်ပြန်တိုက်ခိုက်ရေး မဟာဗျူဟာအချို့ ပါဝင်မှုကြောင့် လုံခြုံရေးပညာရှင် အဖွဲ့ဆယ့်နှစ်ဖွဲ့လုံးမှာ ၎င်းတို့အနေဖြင့် လက်ရှိတွင် ရှီလဲ့နှင့် ထိပ်တိုက်ရင်ဆိုင်နေရသည်ဟု ထင်ယောင်ထင်မှား ဖြစ်သွားခဲ့ကြသည်။

ရာဖေးလ်လည်း ဤကဲ့သို့ပင် ထင်ယောင်ထင်မှား ဖြစ်သွားခဲ့သည်။

သူသည်လည်း ပန်ရှီဖိုင်းယားဝေါလ်ကို ဖျက်ဆီးရန် ကြိုးပမ်းနေသူများ၏ အုပ်စုထဲသို့ ဝင်ရောက်သွားခဲ့သည်။ သို့သော် ပန်ရှီဖိုင်းယားဝေါလ်မှာ နောင်အနာဂတ် ခြောက်နှစ်စာ အချိန်ကာလမှ လာခြင်းဖြစ်သဖြင့် ၎င်း၏ ဆော့ဖ်ဝဲလ်နည်းပညာမှာ ခြောက်နှစ်ခန့် ရှေ့ပြေးနေခြင်း ဖြစ်သည်။ စူပါကွန်ပျူတာ ယန် ၏ ပံ့ပိုးမှုနှင့်ပါ ပေါင်းစပ်လိုက်သောအခါ အိုက်စင်အဆင့်တစ် ဘော့တ်၏ ကာကွယ်ရေးစနစ်မှာ ရေတိုအတွင်း မည်သည့်ပြဿနာမျှ ရှိလိမ့်မည် မဟုတ်ပေ။

နိုင်ငံခြားရေးဝန်ကြီးဌာန နိုင်ငံတကာ ထောက်လှမ်းရေးဗျူရိုသည် ၎င်းတို့၏ အင်အားအားလုံးနီးပါးကို ထုတ်သုံးထားသည်။ ရှီလဲ့သည် ၎င်းတို့၏ အတွင်းပိုင်းဆာဗာ အပြင်ဘက်အနားသတ်သို့ တစ်ကျော့ပြန် ရောက်ရှိလာခဲ့သည်။ ပြီးခဲ့သည့်အကြိမ်က ခြေရာခံမခံရမီလေးတွင် ရှီလဲ့သည် အားနည်းချက်အသေးစားလေးတစ်ခုကို ရှာဖွေတွေ့ရှိထားခဲ့ပြီး ဖြစ်သည်။

ယခုအခါတွင် ရှီလဲ့သည် ထိုအားနည်းချက်အသေးစားလေးကို ထပ်မံ ပစ်မှတ်ထားပြီး သူ၏ တိုက်စစ်ကို ဆက်လက် ဆင်နွှဲလိုက်တော့သည်။

‘နိုင်ငံခြားရေးဝန်ကြီးဌာန နိုင်ငံတကာ ထောက်လှမ်းရေးဗျူရို... မင်းတို့ ငါ့ကို ချောင်းမြောင်းတိုက်ခိုက်နေချိန်မှာ ငါကလည်း မင်းတို့ကို ပြန်ပြီး ချောင်းမြောင်းတိုက်ခိုက်နေမယ်ဆိုတာ မင်းတို့ မျှော်လင့်မထားလောက်ဘူးမလား’ ရှီလဲ့က စိတ်ထဲကနေ အေးစက်စွာ နှာခေါင်းရှုံ့လိုက်သည်။

စူပါကွန်ပျူတာ ယန် ၏ စွမ်းဆောင်ရည်မှာ ဧကန်မုချ အလွန်အမင်း အစွမ်းထက်လှသည်။ ကမ္ဘာ့အဆင့်မီ ထိပ်တန်းဟက်ကာတစ်ဦးအနေဖြင့် ရှီလဲ့သည် စူပါကွန်ပျူတာတစ်လုံး၏ ပူးပေါင်းမှုဖြင့် အလွန်တရာ အစွမ်းထက်လှသည်။

ရှီလဲ့ သိရှိထားသော အားနည်းချက်အသေးစားလေးမှတစ်ဆင့် စူပါကွန်ပျူတာ ယန် သည် ၎င်း၏ စွမ်းဆောင်ရည်ကို ထုတ်သုံးလိုက်ပြီး နိုင်ငံခြားရေးဝန်ကြီးဌာန နိုင်ငံတကာ ထောက်လှမ်းရေးဗျူရို၏ စူပါကွန်ပျူတာ ပိတ်ဆို့မှုများကို အောင်မြင်စွာ ဖောက်ထွင်းနိုင်ခဲ့သည်။

ရှီလဲ့၏ အိုက်စင်ကုမ္ပဏီ အဆင့်တစ် ဘော့တ်ဘက်တွင်မူ လုံခြုံရေးပညာရှင် အဖွဲ့တစ်ဆယ့်နှစ်ဖွဲ့သည် ပန်ရှီဖိုင်းယားဝေါလ်နှင့် လုံးပန်းနေကြဆဲ ဖြစ်သည်။

ရာဖေးလ်သည် သူ၏ စူပါကွန်ပျူတာကို မသုံးရသေးဘဲ သာမန်ဘော့တ်များကိုသာ အသုံးပြု၍ ပန်ရှီဖိုင်းယားဝေါလ်ကို တဖြည်းဖြည်း စူးစမ်းနေခြင်း ဖြစ်သည်။

‘ထူးဆန်းတယ်... ဒီဖိုင်းယားဝေါလ်ရဲ့ ကာကွယ်ရေးစွမ်းရည်က တကယ့်ကို အစွမ်းထက်တာပဲ ဒီလူက ဘယ်သူလဲ ဒီလို ဖိုင်းယားဝေါလ်မျိုးကို ပိုင်ဆိုင်နိုင်တဲ့လူက သာမန်လူတော့ လုံးဝ မဖြစ်နိုင်ဘူး’ ရာဖေးလ်က ရှီလဲ့၏ မည်သူမည်ဝါဖြစ်ကြောင်းကို စိတ်ထဲကနေ တွေးတောနေမိသည်။

နိုင်ငံခြားရေးဝန်ကြီးဌာန နိုင်ငံတကာ ထောက်လှမ်းရေးဗျူရိုအတွင်းသို့ ရှီလဲ့ နောက်ဆုံးတွင် အောင်မြင်စွာ ဝင်ရောက်နိုင်ခဲ့ခြေပြီ။ ၎င်းတို့၏ အတွင်းပိုင်းဆာဗာထဲ၌ ရှီလဲ့သည် ပရောဂျက် R နှင့် ပတ်သက်သည့် အချက်အလက်များကို လျင်မြန်စွာ ရှာဖွေလိုက်သည်။ သို့သော် ရှီလဲ့ကို အလွန်အမင်း စိတ်ပျက်သွားစေသည်မှာ နိုင်ငံခြားရေးဝန်ကြီးဌာန နိုင်ငံတကာ ထောက်လှမ်းရေးဗျူရိုသည် Plan R နှင့် ပတ်သက်သည့် အချက်အလက်အားလုံးကို ၎င်းတို့၏ အတွင်းပိုင်းစနစ်ထဲမှ အပြီးတိုင် ဖယ်ရှားပစ်ခဲ့ကြခြင်း ပင် ဖြစ်သည်။

နိုင်ငံခြားရေးဝန်ကြီးဌာန နိုင်ငံတကာ ထောက်လှမ်းရေးဗျူရို၏ အတွင်းပိုင်းစနစ်တစ်ခုလုံးတွင် ပရောဂျက် R နှင့် ပတ်သက်သည့် မည်သည့်အချက်အလက်မှ မရှိတော့ချေ။

နံပါတ် (၁) ဆာဗာရှေ့တွင် ရှီလဲ့သည် သူ၏ စိတ်ပျက်မကျေနပ်မှုများကို ကွန်ပျူတာစားပွဲခုံကို ရိုက်နှက်၍ ဖော်ထုတ်လိုက်သည်။ “တောက်... ဒီကောင်တွေရဲ့ သတိထားမှုက အရမ်းလွန်လွန်းမနေဘူးလား”

ပရောဂျက် R နှင့် ပတ်သက်သည့် အချက်အလက်များကို ရှာမတွေ့သဖြင့် ရှီလဲ့သည် နိုင်ငံခြားရေးဝန်ကြီးဌာန နိုင်ငံတကာ ထောက်လှမ်းရေးဗျူရို၏ အတွင်းပိုင်းစနစ်ထဲရှိ အခြားသော လျှို့ဝှက်ချက်များကို ရှာဖွေရန် ကြိုးပမ်းလိုက်သည်။ ဥပမာအားဖြင့် ပရောဂျက် R နှင့်အတူ သိမ်းဆည်းထားခဲ့သော စွမ်းအင်စီမံကိန်းများကဲ့သို့သော အရာများ ဖြစ်သည်။

ဤရှာဖွေမှု၏ ရလဒ်မှာလည်း ရှီလဲ့၏ မျှော်လင့်ချက်ကို ထပ်မံ ကျော်လွန်သွားခဲ့သည်။ ဒေတာများ မရှိခြင်းကြောင့် မဟုတ်ဘဲ ဒေတာများ အလွန်အမင်း များပြားလွန်းနေသောကြောင့် ဖြစ်သည်။ စွမ်းအင်စီမံကိန်းများနှင့် ပတ်သက်၍ နိုင်ငံခြားရေးဝန်ကြီးဌာန နိုင်ငံတကာ ထောက်လှမ်းရေးဗျူရိုတစ်ခုလုံးတွင် စုစုပေါင်း ဆယ့်ငါးခုအထိ ရှိနေသည်။

စုစုပေါင်း ဒေတာပမာဏမှာ 10GB ခန့် ရှိသည်။ နိုင်ငံခြားရေးဝန်ကြီးဌာန နိုင်ငံတကာ ထောက်လှမ်းရေးဗျူရို၏ အတွင်းပိုင်းစနစ်မှာ ကန်နွန်ကုမ္ပဏီ၏ အတွင်းပိုင်းစနစ်နှင့် မတူချေ။ အကယ်၍ ရှီလဲ့သာ ဤမျှကြီးမားသော ဖိုင်ကို ယူဆောင်ရန် ကြိုးပမ်းပါက သူ ချက်ချင်း သိရှိသွားပေလိမ့်မည်။

ရှီလဲ့သည် စွမ်းအင်စီမံကိန်းများနှင့် ပတ်သက်သည့် အချက်အလက်များကို လှန်လှောကြည့်ရှုလိုက်ရာ ထိုအထဲတွင် ဒီရေလှိုင်းစွမ်းအင်၊ လေစွမ်းအင်၊ ကမ္ဘာမြေအပူစွမ်းအင် စသည်တို့ ပါဝင်သည်။ ထိုအထဲတွင် အရှူးသွပ်ဆုံး စီမံကိန်းမှာမူ သက်ဝင်လှုပ်ရှားနေသော မီးတောင်ရှင် တစ်ခု၏ အပေါ်တွင် ကမ္ဘာမြေအပူစွမ်းအင်သုံး လျှပ်စစ်ဓာတ်အားပေးစက်ရုံတစ်ခု တည်ဆောက်ရန် ကြံစည်ထားခြင်း ဖြစ်သည်။

ပြောရမည်ဆိုပါက ဂျပန်နိုင်ငံသားများသည် တကယ့်ကို အရူးများပင် ဖြစ်ကြသည်။

ရှီလဲ့အနေဖြင့် နိုင်ငံခြားရေးဝန်ကြီးဌာန နိုင်ငံတကာ ထောက်လှမ်းရေးဗျူရို၏ အတွင်းပိုင်းဒေတာများကို ဆက်လက် စစ်ဆေးလိုသော်လည်း ပန်ရှီဖိုင်းယားဝေါလ်က သတိပေးချက် ထုတ်ပြန်လာခဲ့သည်။ ဤအရာက ကာကွယ်ရေးစနစ်၏ ပထမအလွှာ ဖောက်ထွင်းခံလိုက်ရကြောင်း သတိပေးချက် ဖြစ်သည်။

ရှီလဲ့သည် နိုင်ငံခြားရေးဝန်ကြီးဌာန နိုင်ငံတကာ ထောက်လှမ်းရေးဗျူရို၏ အတွင်းပိုင်းစနစ်ထဲတွင် မထင်မရှားရှိလှသော နောက်ဖေးတံခါးပရိုဂရမ်တစ်ခုကို လျင်မြန်စွာ ချန်ထားခဲ့လိုက်သည်။ ဤမုန်တိုင်း ငြိမ်သက်သွားပြီးနောက် ရှီလဲ့အနေဖြင့် နိုင်ငံခြားရေးဝန်ကြီးဌာန နိုင်ငံတကာ ထောက်လှမ်းရေးဗျူရိုထဲသို့ ထပ်မံ ဝင်ရောက်ရန် အဆင်ပြေစေရန် ဖြစ်သည်။

အိုက်စင်ကုမ္ပဏီ၏ ဆာဗာအုပ်စုမှာ စူပါကွန်ပျူတာအသေးစားလေးတစ်ခုနှင့် ညီမျှပြီး တွက်ချက်မှု စွမ်းဆောင်ရည်မှာ 1TFLOPS အထိ ရှိသဖြင့် ပန်ရှီဖိုင်းယားဝေါလ်၏ စွမ်းဆောင်ရည်ကို ထုတ်သုံးရန် လုံလောက်လှသည်။ ထို့အပြင် ရှီလဲ့သည် စူပါကွန်ပျူတာ ယန် ကိုလည်း ချိတ်ဆက်ထားသဖြင့် ရန်သူ၏ တိုက်ခိုက်မှု ပြင်းအားက အလွန်ကြီးမားလာပါက စူပါကွန်ပျူတာ ယန် ကလည်း ဝင်ရောက် စွက်ဖက်ပေးမည် ဖြစ်သည်။

သတိပေးချက်ကို ကြည့်ရင်း ရှီလဲ့၏ မျက်ခုံးများ အနည်းငယ် တွန့်ချိုးသွားခဲ့ရသည်။ သူ၏ ခန့်မှန်းချက်အရ နိုင်ငံခြားရေးဝန်ကြီးဌာန နိုင်ငံတကာ ထောက်လှမ်းရေးဗျူရိုမှ ပညာရှင်များသည် အစွမ်းထက်ပြီး လူအင်အား အသာစီးရနေသော်လည်း ထိပ်တန်းအဆင့် အင်အားစုများ မရှိကြချေ။ အလွန်ဆုံးရှိလှ ပန်ရှီဖိုင်းယားဝေါလ်၏ အခြေအနေကိုသာ ရိပ်မိနိုင်ကြမည်ဖြစ်ပြီး ပန်ရှီဖိုင်းယားဝေါလ်ကို လုံးဝ ဖောက်ထွင်းနိုင်လိမ့်မည် မဟုတ်ချေ။

ဤအကြောင်းပြချက်ကြောင့်ပင် ရှီလဲ့သည် နိုင်ငံခြားရေးဝန်ကြီးဌာန နိုင်ငံတကာ ထောက်လှမ်းရေးဗျူရိုမှ လုံခြုံရေးပညာရှင်များကို အချိန်ဆွဲထားရန်အတွက် ပန်ရှီဖိုင်းယားဝေါလ်ကို စွန့်လွှတ်ရန် အသင့်ရှိနေခဲ့ခြင်းဖြစ်ပြီး ၎င်းတို့၏ ဗျူရိုကို အလစ်အငိုက် တန်ပြန်တိုက်ခိုက်ခဲ့ခြင်း ဖြစ်သည်။ လက်ရှိတွင် ရှီလဲ့အနေဖြင့် ဗျူရိုအတွင်း၌ မည်သည့် အသုံးဝင်သော သတင်းအချက်အလက်မျှ ရှာမတွေ့ခဲ့သော်လည်း ပန်ရှီဖိုင်းယားဝေါလ်မှာ ဤမျှလောက်အထိ အသုံးမကျသည်တော့ မဟုတ်ရပါချေ။

နိုင်ငံခြားရေးဝန်ကြီးဌာန နိုင်ငံတကာ ထောက်လှမ်းရေးဗျူရိုထဲတွင် နောက်ဖေးတံခါး ချန်ထားခဲ့ပြီးနောက် ရှီလဲ့သည် အိုက်စင်အဆင့်တစ် ဘော့တ်ဆီသို့ အပြေးအလွှား ပြန်လာခဲ့သည်။ ပန်ရှီဖိုင်းယားဝေါလ်၏ အတွင်းပိုင်းမှတ်တမ်းများ မှတစ်ဆင့် ရှီလဲ့သည် နောက်ဆုံးတွင် အဖြေကို ရှာဖွေတွေ့ရှိသွားခဲ့တော့သည်။

ဝင်ရောက်လာသော ဒေတာစီးကြောင်းများ အားလုံးထဲတွင် လုံခြုံရေးပညာရှင် တစ်ရာ့နှစ်ဆယ်အပြင် ပန်ရှီဖိုင်းယားဝေါလ်အပေါ် ကြီးမားသော ရိုက်ခတ်မှုများကို ဖြစ်ပေါ်စေခဲ့သည့် တစ်ရာနှစ်ဆယ့်တစ်ကြိမ်မြောက် ဒေတာစီးကြောင်းတစ်ခု ရှိနေခြင်း ဖြစ်သည်။

ရှီလဲ့၏ မျက်ဝန်းများ အနည်းငယ် ကျဉ်းမြောင်းသွားခဲ့ရပြီး သူက မိမိကိုယ်ကိုယ် တိုးတိုးလေး ရေရွတ်လိုက်သည်။ “ဒါက တကယ်ပဲ ဘယ်သူလဲ”

သူ၏ လက်ချောင်းများက ကီးဘုတ်ပေါ်တွင် လျင်မြန်စွာ လည်ပတ်လှုပ်ရှားလိုက်ပြီး ဖောက်ထွင်းခြင်း ခံလိုက်ရသော ပန်ရှီဖိုင်းယားဝေါလ်၏ ပထမ ကာကွယ်ရေးအလွှာကို ပြန်လည် ပြုပြင်ရန်နှင့် သက်ဆိုင်ရာ အားနည်းချက်ကို ပိတ်ဆို့ရန်အတွက် အချိန်အချို့ ပေးလိုက်ရသည်။

အဆင့်တစ် ဘော့တ်ဆာဗာ၏ အပြင်ဘက်အနားသတ်တွင်မူ ရာဖေးလ်သည် ပန်ရှီဖိုင်းယားဝေါလ်၏ ငြင်းပယ်ခြင်းကို ထပ်မံ ခံလိုက်ရပြီး သူ ဖောက်ထွင်းထားခဲ့သော ပထမ ကာကွယ်ရေးအလွှာမှာလည်း ပြန်လည် ပိတ်ဆို့ခြင်း ခံလိုက်ရသည်။

ရာဖေးလ်က တိုးညင်းစွာ နှာခေါင်းရှုံ့လိုက်သည်။ “ကမ္ဘာ့အဆင့်မီ ထိပ်တန်းဟက်ကာပညာရှင်တစ်ဦးပီသပါပေတယ်၊ တုံ့ပြန်မှု နှုန်းက တကယ် မြန်ဆန်တာပဲ”

ရှီလဲ့သည် ပန်ရှီဖိုင်းယားဝေါလ်ကို ပြုပြင်ပြီးနောက် ထိုတစ်ရာနှစ်ဆယ့်တစ်ကြိမ်မြောက် ဒေတာစီးကြောင်းကို တိတ်တဆိတ် နောက်ယောင်ခံ လိုက်တော့သည်။ ရှီလဲ့အနေဖြင့် ဤဒေတာစီးကြောင်း၏ အဝင်အထွက် အကြောင်းအရင်းကို သိရှိလိုသဖြင့် အလွန်အမင်း သတိထားကာ ဤဒေတာစီးကြောင်းကို ပြောင်းပြန်လမ်းကြောင်းအတိုင်း ခြေရာခံလိုက်ခြင်း ဖြစ်သည်။

ထိုဒေတာစီးကြောင်း တစ်ရာ့နှစ်ဆယ်၏ ရင်းမြစ်များ အားလုံးမှာ နိုင်ငံခြားရေးဝန်ကြီးဌာန နိုင်ငံတကာ ထောက်လှမ်းရေးဗျူရိုဆီသို့ ညွှန်ပြနေသဖြင့် ရှီလဲ့က ၎င်းတို့ကို လုံးဝ လျစ်လျူရှုလိုက်သည်။ သူသည် ဤနောက်ဆုံး ဒေတာစီးကြောင်းကိုသာ အာရုံစိုက်၍ ခြေရာခံနေမိသည်။

စူပါကွန်ပျူတာ ယန် ၏ တွက်ချက်မှု စွမ်းဆောင်ရည်မှာ အလွန်ပင် ပြောင်မြောက်လှသည်။ ပြောင်းပြန်ခြေရာခံနေစဉ်အတွင်း ၎င်းသည် တစ်ဖက်လူ၏ စူးစမ်းမှုများကို ပိတ်ဆို့ထားရုံသာမက လမ်းလွဲစေမည့် သတင်းအချက်အလက်များကိုလည်း ပြန်လည် ပေးပို့နေခြင်း ဖြစ်သည်။

မိနစ်အနည်းငယ် ကြာပြီးနောက် ရှီလဲ့သည် နောက်ဆုံးတွင် ဤနောက်ဆုံး ဒေတာစီးကြောင်း၏ ရင်းမြစ်ကို ခြေရာခံမိသွားခဲ့ပြီ ဖြစ်သည်။ ၎င်းက ကမ္ဘာကြီး၏ အခြားတစ်ဖက်ဆီသို့ ညွှန်ပြနေသည်။

ရှီလဲ့၏ မျက်နှာထက်တွင် အေးစက်သော အပြုံးတစ်ခု ပေါ်ထွက်လာခဲ့တော့သည်။

“ဒါက မင်းကိုး... ရာဖေးလ်”