အခန်း ၃၁၂

အပိုင်း (၃၁၂) သွေးရောင်လမင်း၏ သားတော်

"အိုအေစစ်ကို လွန်ခဲ့တဲ့ ခြောက်လက တည်ဆောက်ခဲ့တာပါ... ဒီက အဆောက်အအုံ အများစုကို ဆရာကျိုးကျွယ်ရှန်းက တည်ဆောက်ခဲ့တာပါ"

"ဆရာကျိုးကျွယ်ရှန်းက အိုအေစစ်ရဲ့ ဒုတိယမြို့တော်ဝန်ပါ... ကျွန်တော်တို့ အိုအေစစ်မြို့ရဲ့ ထိပ်တန်း ဗိသုကာပညာရှင်လည်း ဖြစ်ပါတယ်"

"ဒါနဲ့... ဆရာကျိုးကလည်း ဧည့်သည်တော်လိုပဲ လမ်းစဉ် အဆင့် (၃) အစွမ်းပိုင်ရှင် တစ်ယောက်ပါ... ဒါပေမဲ့ သူကတော့ ဗိသုကာ လမ်းစဉ်ပေါ့"

"အချိန်တိုတောင်းလွန်းပြီး ဆရာကျိုးရဲ့ ခွန်အားကလည်း ကန့်သတ်ချက် ရှိနေတော့... အိုအေစစ်မြို့ရဲ့ တည်ဆောက်မှုက နည်းနည်း ကြမ်းတမ်းနေနိုင်ပါတယ်... ဧည့်သည်တော်အနေနဲ့ နားလည်ခွင့်လွှတ်ပေးဖို့ မျှော်လင့်ပါတယ်"

ဝဝဖိုင့်ဖိုင့် လမ်းပြသူက ဂုဏ်ယူဝင့်ကြွားမှုနှင့် နှိမ့်ချမှုတို့ ရောယှက်နေသော မျက်နှာထားဖြင့် ပြောလိုက်၏။

ဂုဏ်ယူရခြင်း၏ အကြောင်းရင်းမှာ ဤကဲ့သို့သော ကမ္ဘာပျက်ကပ်ကာလကြီးထဲတွင် ဤသို့သော မြို့တစ်မြို့ မားမားမတ်မတ် ရပ်တည်နေနိုင်ခြင်းကြောင့် ဖြစ်သည်။

မာနမကြီးဘဲ ပြောရလျှင် ဤမြို့သည် ကမ္ဘာပျက်ကပ်အပြီး လူသားတို့ တည်ဆောက်ခဲ့သည့် ပထမဆုံးသော မြို့တော်ပင် ဖြစ်ပေလိမ့်မည်။

ကမ္ဘာပျက်ကပ်မတိုင်မီက အသာမန်ဆုံး မြို့ငယ်လေးတစ်မြို့နှင့်ပင် နှိုင်းယှဉ်၍ မရနိုင်သော်ငြားလည်း။

သို့သော် လူသားတို့၏ လှည့်လည်သွားလာ နေထိုင်ရသော ဘဝကို အဆုံးသတ်ပေးနိုင်သည့် အချိုးအကွေ့တစ်ခုဟု ဆို၍ရပေသည်။

ချန်းရီက ချူချယ်တို့ ထွက်ခွာသွားပြီး နှစ်နာရီအကြာတွင် အိုအေစစ်မြို့သို့ ရောက်ရှိလာခဲ့သည်။

ချန်းရီသည် စက်ဘီးတစ်စီးဖြင့် တစ်ကိုယ်တည်း လာရောက်ခြင်း ဖြစ်သောကြောင့်။

ချက်ချင်းပင် ကြီးမားသော ဂယက်ရိုက်ခတ်မှုကို ဖြစ်စေခဲ့၏။

ယခုလက်ရှိ တောတောင်များထဲတွင် ထူးဆန်းသောအရာများ မြောက်မြားစွာ ရှိနေကြောင်း သိထားရမည်။

တစ်ယောက်တည်း စက်ဘီးတစ်စီးဖြင့် ယခုအချိန်အထိ အသက်ရှင်ကျန်ရစ်သူ အများစုမှာ ရက်စက်ကြမ်းကြုတ်သူများသာ ဖြစ်ကြသည်။

ပတ်ဝန်းကျင်ရှိ လက်နက်ကိုင်ဆောင်ထားသူများက ချန်းရီအား လေးစားအားကျသော အကြည့်များဖြင့် ကြည့်လိုက်ကြ၏။

သို့သော် ချန်းရီက ထိုအကြည့်များကို လုံးဝ ဂရုမစိုက်ဘဲ အေးစက်သော မျက်နှာထားဖြင့် စကားစတင် မေးမြန်းရန် ပြင်လိုက်စဉ်မှာပင်။

ဝဝဖိုင့်ဖိုင့် ဝန်ထမ်းတစ်ယောက် လျှောက်လာသည်ကို မြင်လိုက်ရသည်။

ထိုဝဝဖိုင့်ဖိုင့် ဝန်ထမ်းက သူ့ကိုယ်သူ အိုအေစစ်မြို့၏ လမ်းပြသူအဖြစ် မိတ်ဆက်လေသည်။

ချန်းရီသည်လည်း လမ်းပြသူဆိုသည်မှာ မည်သို့သော အလုပ်အကိုင်မျိုး ဖြစ်ကြောင်း နားလည်သွားခဲ့သည်။

ဤလူများသည် အိုအေစစ်မြို့သို့ အသစ်ရောက်ရှိလာသူများအတွက် လမ်းညွှန်ပေးရသူများ ဖြစ်သည်။

သို့သော် ဤလမ်းပြသူအားလုံးမှာ ရုပ်ရည်ခပ်ဆင်ဆင် တူကြပြီး ဖြူဖြူဝဝ ပုံစံမျိုးစုံ ရှိနေသဖြင့် အနည်းငယ် ထူးဆန်းကျောချမ်းဖွယ် ကောင်းနေသည်။

ကမ္ဘာပျက်ကပ်သည် အကောင်းဆုံးသော ဝိတ်ကျဆေးပင် ဖြစ်သည်။

ယခုအချိန်အထိ ဤမျှ ဝဖိုင့်နေသူများ ရှိနေလိမ့်မည်ဟု မထင်မှတ်ထားခဲ့ပေ။

ချန်းရီ၏ မျက်မှောင်များ အနည်းငယ် တွန့်ကွေးသွားသည်။

ဒဏ္ဍာရီလာ အိုအေစစ်ကို လွန်ခဲ့သည့် ခြောက်လက တည်ဆောက်ခဲ့သည် ဟုတ်လား။

ဒါဆိုရင်... ဒီနေရာက ဒဏ္ဍာရီလာ အိုအေစစ် မဟုတ်ဘူးလား။

မိုဟိုင်ရမ်နှင့် နတ်ဆင်ရွာမှ အဘိုးအို ချန်ယုံကုတို့၏ အပြောအရ ဒဏ္ဍာရီလာ အိုအေစစ်သည် ကမ္ဘာပျက်ကပ် မတိုင်မီကတည်းက စတင် တည်ဆောက်နေခဲ့ခြင်း ဖြစ်ရမည်။

ဒီအိုအေစစ်က အတုလား။

ဝဝဖိုင့်ဖိုင့် လမ်းပြသူကမူ ဂုဏ်ယူဝင့်ကြွားစွာဖြင့် ဆက်လက် မိတ်ဆက်နေဆဲပင်။

"ကမ္ဘာမြေအနှံ့မှာ ထူးဆန်းတဲ့အရာတွေ ပြည့်နှက်နေပေမဲ့ ကျွန်တော်တို့ အိုအေစစ်မှာ နေရင်တော့ အဲဒါတွေကို ပူစရာမလိုပါဘူး"

"ကျွန်တော်တို့ အိုအေစစ်မှာ အကာအကွယ် ငါးထပ်ရှိပြီး ထူးဆန်းတဲ့အရာ ၉၉ ရာခိုင်နှုန်းကို တားဆီးနိုင်စွမ်း ရှိပါတယ်"

"ဧည့်သည်တော်လည်း ခုနက အိုအေစစ်မြို့ အပြင်ဘက်က ပန်းခင်းတွေကို တွေ့ခဲ့မှာပါ... အဲဒီပန်းခင်းတွေရဲ့ နာမည်က 'အိမ်စောင့် အရောင်ခုနစ်မျိုးပန်း' လို့ ခေါ်ပြီး အိုအေစစ်ပတ်လည်မှာ စိုက်ပျိုးထားရင် သက်ရှိလူသားတွေရဲ့ အငွေ့အသက်ကို ဖြတ်တောက်ပေးနိုင်တဲ့ အာနိသင် ရှိပါတယ်"

"ဒါက အိုအေစစ်မြို့ရဲ့ ပထမဆုံး အကာအကွယ်ပါပဲ"

ချန်းရီသည်လည်း ခုနက ထိုပန်းများကို မြင်တွေ့ခဲ့ရသည်။

ထိုပန်းများတွင် ဤကဲ့သို့သော အာနိသင် ရှိနေလိမ့်မည်ဟု မထင်မှတ်ထားခဲ့ပေ။

"နောက်ပြီး... ဧည့်သည်တော်လည်း ခုနက မြင်ခဲ့မှာပါ... ကျွန်တော်တို့ အိုအေစစ်မြို့မှာ လမ်းပြသူ လမ်းစဉ်က လူကြီးမင်းတွေလည်း ရှိပါတယ်"

"အိုအေစစ် မြို့တော်ဝန် ချဝူ က လမ်းပြသူ လမ်းစဉ် အဆင့် (၄) အစွမ်းပိုင်ရှင် တစ်ယောက်ပါ... သူ့ရဲ့ ဦးဆောင်မှုအောက်မှာ တခြား လမ်းပြသူ လမ်းစဉ် အဆင့် (၃) လူကြီးမင်း သုံးယောက်နဲ့ ပူးပေါင်းပြီး လျှို့ဝှက်အကာအကွယ် အတားအဆီးတစ်ခု ဖန်တီးထားတာပါ"

"ဒါက ကျွန်တော်တို့ အိုအေစစ်ရဲ့ ဒုတိယ အကာအကွယ်ပါ"

လမ်းပြသူ လမ်းစဉ် အဆင့် (၄) ဟုတ်လား။

ချန်းရီ၏ မျက်မှောင်များ အနည်းငယ် တွန့်ကွေးသွားပြန်သည်။

ဒီနေရာမှာ လမ်းပြသူ လမ်းစဉ် အဆင့် (၄) တောင် ရှိနေပါလား။

ချူချယ်ပင်လျှင် အဆင့် (၃) သာ ရှိသေးသည်ကို ဤနေရာတွင် အဆင့် (၄) ရှိနေလိမ့်မည်ဟု မထင်မှတ်ထားခဲ့ပေ။

တခြား လမ်းပြသူတွေနဲ့ပါ ပေါင်းပြီး ကြီးမားတဲ့ အကာအကွယ် အတားအဆီး ဖန်တီးနိုင်သေးတယ်ပေါ့။

တကယ်ကို...။

ချန်းရီက ထိုဝဝဖိုင့်ဖိုင့် လမ်းပြသူ၏ စကားကို ဖြတ်မပြောခဲ့ပေ။

"နောက်ပြီး မြို့ရိုးကိုလည်း ဧည့်သည်တော် မြင်ခဲ့မှာပါ... အဲဒါကို ကျွန်တော်တို့ရဲ့ ဒုတိယမြို့တော်ဝန် ဗိသုကာ လမ်းစဉ် အဆင့် (၃) ဆရာကျိုးကျွယ်ရှန်းက သဘာဝလွန်အစွမ်းကို သုံးပြီး တည်ဆောက်ထားတာပါ"

"အမြောက်နဲ့ ပစ်ရင်တောင် အဲဒီမြို့ရိုးကို မပေါက်နိုင်ပါဘူး"

"ဒါက တတိယ အကာအကွယ်ပါပဲ"

"နောက်ပြီး ဧည့်သည်တော်ရဲ့ လက်ထဲက အငွေ့အသက် ဖုံးကွယ်တဲ့ အင်းကလည်း ကျွန်တော်တို့ အိုအေစစ်မြို့က မှော်စာလုံး လမ်းစဉ် အမတ်တစ်ယောက်က ထုတ်ပေးထားတာပါ... အဲဒါကလည်း သက်ရှိလူသားတွေရဲ့ အငွေ့အသက်ကို ဖုံးကွယ်ပေးနိုင်တဲ့ အာနိသင် ရှိပါတယ်"

"ဒါက ကျွန်တော်တို့ အိုအေစစ်မြို့ရဲ့ စတုတ္ထ အကာအကွယ်ပါ"

"ဒါနဲ့... ဧည့်သည်တော်ကို သတိပေးချင်တာက အငွေ့အသက် ဖုံးကွယ်တဲ့ အင်းက အိုအေစစ်မြို့ထဲ ဝင်ရင် မဖြစ်မနေ တပ်ဆင်ရမယ့်အရာပါ... ပထမဆုံး တစ်ရွက်ကိုတော့ အခမဲ့ ပေးပေမဲ့ သုံးရက်ပဲ ခံပါတယ်... သုံးရက်ကြာရင် အဲဒီအင်းက အာနိသင် ပျက်သွားမှာမို့လို့ နောက်ထပ် အင်းတွေ လိုချင်ရင်တော့ ဧည့်သည်တော်ဘက်က တန်ဖိုးညီမျှတဲ့ ပစ္စည်းတစ်ခုခုနဲ့ လဲလှယ်ရပါလိမ့်မယ်"

ချန်းရီ ဘာမှမပြောသော်လည်း စိတ်ထဲတွင်မူ ဝေဖန်နေမိ၏။

အရင်းရှင်စနစ်ဆိုတာ တကယ်ကို နေရာတိုင်းမှာ ရှိနေတာပဲ။

ထိုအချိန်မှာပင် အနက်ရောင် ယူနီဖောင်းဝတ် လူငယ်တစ်ယောက်က လမ်းဘေးရှိ လမ်းမီးတိုင်တစ်ခုရှေ့သို့ လျှောက်သွားသည်ကို ချန်းရီ မြင်လိုက်ရသည်။

ထိုလူငယ်က လမ်းမီးတိုင်၏ တိုင်လုံးပေါ်သို့ လက်တင်ကာ မျက်လုံးများကို မှိတ်လိုက်၏။

သဘာဝလွန်အစွမ်း၏ လှုပ်ရှားမှုကို ချန်းရီ သဲ့သဲ့လေး ခံစားလိုက်ရသည်။

ဒါက... အစွမ်းပိုင်ရှင်လား။

ချန်းရီ အံ့အားသင့်သွားသည်။

သို့သော် ချက်ချင်းပင် နားလည်သွား၏။

မဟုတ်ဘူး... ဒီလူက အစွမ်းပိုင်ရှင် မဟုတ်ဘူး။

စက္ကန့်ဆယ်ဂဏန်းခန့် အကြာတွင် ထိုအနက်ရောင်ဝတ် လူငယ်သည် ချွေးသံတရွဲရွဲဖြင့် လက်ကို ဖယ်ရှားလိုက်ရာ တစ်ကိုယ်လုံး ရေထဲမှ ဆယ်တင်လိုက်ရသကဲ့သို့ ဖြစ်နေသည်။

ချန်းရီ၏ အံ့သြနေမှုကို သတိပြုမိသွားပုံရသည်။

လမ်းပြသူက ပြုံးလျက် ရှင်းပြလေသည်။

"သူတို့က အနက်ရောင်ဝတ်ရုံတွေပါ... လမ်းစဉ်ဆေးထိုးအပ် သုံးပြီး မအောင်မြင်ခဲ့တဲ့ သူတွေပေါ့... သူတို့ ကိုယ်ထဲက သဘာဝလွန်အစွမ်းက သူတို့ကို အစွမ်းပိုင်ရှင် ဖြစ်လာစေဖို့ မလုံလောက်ပေမဲ့ သာမန်လူတွေနဲ့တော့ ကွဲပြားသွားပါပြီ"

"သူတို့ ကိုယ်ထဲက သဘာဝလွန်အစွမ်းက အဲဒီ စွမ်းအင်သုံး လမ်းမီးတိုင်ကို အားဖြည့်ပေးနိုင်တယ်... တစ်ခါ အားသွင်းထားရင် စွမ်းအင်သုံး လမ်းမီးတိုင်ကို ညဘက်မှာ အနည်းဆုံး တစ်လလောက် လင်းစေပါတယ်"

"စွမ်းအင်သုံး လမ်းမီးတိုင်"

"ဟုတ်ပါတယ်... စွမ်းအင်သုံး လမ်းမီးတိုင်... ဒါကို မက္ကန်းနစ် လမ်းစဉ် အစွမ်းပိုင်ရှင် ရွှီလိန် က တီထွင်ဖန်တီးထားတာပါ... ခင်ဗျားတို့ရဲ့... အာ... အရင်က လမ်းမီးတိုင်တွေထက် အများကြီး ပိုကောင်းပါတယ်... သဘာဝလွန်အစွမ်းကို စွမ်းအင်အဖြစ် အသုံးပြုထားပြီး အရမ်းလည်း အကြမ်းခံပါတယ်... ပုံမှန်အသုံးပြုမယ်ဆိုရင် စွမ်းအင်သုံး လမ်းမီးတိုင် တစ်တိုင်က ဆယ်နှစ်ခံပါတယ်"

ဤလမ်းပြသူ၏ စကားပြောဟန်မှာ အနည်းငယ် ထူးဆန်းနေသည်ဟု ချန်းရီ ခံစားရပြီး အိုအေစစ်သို့ လာရောက်ကတည်းက သတိကြီးစွာ ထားနေခဲ့ခြင်း ဖြစ်သည်။

ယခုမူ ပို၍ပင် သတိထားလာမိ၏။

ယုတ္တိဗေဒအရ လမ်းစဉ်ဆေးထိုးအပ် အသုံးပြုပြီး မအောင်မြင်လျှင်ပင် ထူးဆန်းသောအရာများ၊ ထူးခြားသော ပစ္စည်းများနှင့် ပူးတွဲရှင်သန်ကာ ပူးတွဲရှင်သန်ခြင်း လမ်းစဉ် အစွမ်းပိုင်ရှင် အဖြစ် ပြောင်းလဲနိုင်သည်။

သေချာသည်မှာ သင့်တော်သော ထူးဆန်းသည့်အရာများနှင့် ထူးခြားသော ပစ္စည်းများကို ရှာဖွေရန်မှာ မလွယ်ကူလှပေ။

ထူးဆန်းသည့်အရာများသည် များသောအားဖြင့် ကောက်ကျစ်ခြင်း၊ ရူးသွပ်ခြင်းနှင့် ခန့်မှန်း၍မရခြင်းတို့ကို ကိုယ်စားပြုလေ့ရှိပြီး ၎င်းတို့နှင့် ပူးပေါင်းမိပါက ထိန်းချုပ်မှု မကောင်းလျှင် မိမိကိုယ်တိုင် နောက်ထပ် ထူးဆန်းသည့်အရာ တစ်ခု ဖြစ်သွားနိုင်သည်။

ထို့ကြောင့် ချန်းရီသည် ဘာကြောင့် ထူးဆန်းသည့်အရာများနှင့် ပူးတွဲရှင်သန်သူ မဖြစ်လာသလဲဟူသော မိုက်မဲသည့် မေးခွန်းမျိုးကို မမေးခဲ့ပေ။

သို့သော် ဤအိုအေစစ် အတုအယောင်တွင် ထိုလူများအတွက် အသုံးဝင်သည့် နေရာအသစ် ရှိနေလိမ့်မည်ဟု မထင်မှတ်ထားခဲ့ပေ။

ဤနေရာသည် မိုဟိုင်ရမ်နှင့် ချန်ယုံကုတို့ ပြောခဲ့သော ဒဏ္ဍာရီလာ အိုအေစစ် လုံးဝ မဟုတ်ကြောင်း ချန်းရီ ယခုအခါ အတည်ပြုနိုင်ပြီ ဖြစ်သည်။

တုပထားသော နေရာတစ်ခုသာ ဖြစ်ပေလိမ့်မည်။

"ခုနက ဘယ်ရောက်သွားပြီလဲ"

"အော်... ဟုတ်ပြီ... ပဉ္စမမြောက် အကာအကွယ်ကတော့ ကျွန်တော်တို့ရဲ့ ဒုတိယမြို့တော်ဝန် တင်းရှန် ပါပဲ... သူက အိုအေစစ်မြို့ ပတ်ဝန်းကျင်မှာ ပေါ်လာတဲ့ ထူးဆန်းတဲ့အရာတွေကို အချိန်မှန် ရှင်းလင်းပေးပါတယ်"

"ဒါကြောင့် အိုအေစစ်မြို့ ပတ်ဝန်းကျင်မှာ နေထိုင်ရင် ထူးဆန်းတဲ့အရာတွေ ပေါ်လာမှာကို လုံးဝ ပူစရာ မလိုပါဘူး"

"ဒါကြောင့် ဧည့်သည်တော်အနေနဲ့ အဆင်ပြေမယ်ဆိုရင် ထူးဆန်းတဲ့အရာတွေကို ရှင်းလင်းတဲ့ တာဝန်ကို စာရင်းပေးသွင်းလို့ ရပါတယ်... တာဝန်ပြီးမြောက်ရင် ရိက္ခာတွေ အများကြီးနဲ့ လဲလှယ်နိုင်ပါတယ်"

"ကျွန်တော်တို့ရဲ့ မြို့တော်ဝန်တင်းက သွေးရောင်လမင်း၏ သားတော် လမ်းစဉ် အဆင့် (၄) ရဲ့ ထိပ်တန်း အစွမ်းပိုင်ရှင် တစ်ယောက်ဖြစ်ပြီး အိုအေစစ်မြို့ရဲ့ အပြင်းထန်ဆုံး တိုက်ခိုက်ရေး လမ်းစဉ်မှာ နံပါတ်တစ် ပါပဲ"

"အဟွတ်... အဟွတ်... အဟွတ်..."

ချန်းရီသည် "သွေးရောင်လမင်း၏ သားတော်" ဟူသော စကားလုံးလေးလုံးကို ကြားလိုက်ရချိန်တွင် သီးလုမတတ် ဖြစ်သွားပြီး အချိန်အတော်ကြာ ချောင်းဆိုးနေပြီးနောက်မှ သွေးရောင်လွှမ်းနေသော မျက်လုံးများကို ဖွင့်ကာ မေးလိုက်၏။

"ခုနက ဘာလမ်းစဉ်လို့ ပြောလိုက်တာလဲ"

ဝဝဖိုင့်ဖိုင့် လမ်းပြသူမှာ အနည်းငယ် ကြောင်အမ်းသွားသော်လည်း ပြန်ဖြေလေသည်။

"မြို့တော်ဝန်တင်းက သွေးရောင်လမင်း၏ သားတော် လမ်းစဉ် အဆင့် (၄) က ထိပ်တန်း အစွမ်းပိုင်ရှင်ပါ"

"ဒါက"

ဆက်ရန်...