အခန်း ၄၆၅
Vol. 47 Ch. 465
အခန်း (၄၆၅) အမှောင်လက်သည်း
သူတို့က အာမေဍိတ်သံများ မထွက်သွားစေရန် ပါးစပ်ကို တင်းတင်းအုပ်ထားကြသော်လည်း ပြူးကျယ်နေသော မျက်လုံးများက ကားပြတင်းပေါက်တွင် ကပ်နေကာ အသေးစိတ်အချက်အလက်လေး တစ်ခုမျှ လွတ်သွားမည်ကို စိုးရိမ်သည့်အလား ယခင်က တစ်ခါမှ မမြင်ဖူးသော မြင်ကွင်းတိုင်းကို လောဘတကြီး မှတ်တမ်းတင်နေခဲ့ကြသည်။
အနာဂတ်မြို့တော်တစ်ခု၏ ဤကဲ့သို့ ကိုယ်တိုင်ကိုယ်ကျ နစ်မြုပ်နေရသော အတွေ့အကြုံက မည်သည့် ပုံရိပ်ယောင်ဂိမ်းထက်မဆို များစွာ ပို၍လက်တွေ့ဆန်ပြီး အသက်ရှူမှားလောက်အောင် ကောင်းမွန်နေချေသည်။
ကျန်းယဲ့၏ အကြည့်က ဘူတာရုံအမည်များနှင့် နယ်မြေအချက်အလက်များကို မှတ်သားပြသထားပြီး အဆက်မပြတ် ရွေ့လျားနေသော ရထားတွဲနံရံ အပေါ်ပိုင်းရှိ အီလက်ထရောနစ် လမ်းကြောင်းမြေပုံပေါ်သို့ ဝေ့ကြည့်လိုက်၏။
လက်သည်းရာ တိုတမ်ပုံစံဖြင့် ရေးသားထားသော ထိုကွေ့ကောက်နေသည့် စာလုံးများကို သူ တစ်ခါမှ မသင်ဖူးခဲ့သော်လည်း စနစ်၏ အချိန်နှင့်တစ်ပြေးညီ ဘာသာပြန်ပေးသည့် လုပ်ဆောင်ချက်ကြောင့် ၎င်းတို့၏ အဓိပ္ပာယ်ကို အခက်အခဲမရှိ နားလည်နိုင်ခဲ့သည်။ နောက်ဆုံးမှတ်တိုင် : E-နယ်မြေ - သံမဏိလက်သည်း ရင်ပြင်။
သူ၏ မျက်ခုံးများက မသိမသာ တွန့်ချိုးသွားရသည်။
စနစ်မှ ပေးထားသော မြို့ပြ နောက်ခံအချက်အလက်များအရ မြင့်မြတ်လက်သည်းမြို့တော်ဟုခေါ်သော ဤမဟာမြို့တော်ကြီးကို ဗဟိုအာဏာပိုင်နယ်မြေအဖြစ် အလယ်ဗဟိုတွင်ထားရှိကာ A မှ F အထိ အဓိက လူနေရပ်ကွက် ခြောက်ခုဖြင့် ခွဲခြားထား၏။
သူတို့ အခုလေးတင် ထွက်ပြေးလွတ်မြောက်လာခဲ့သည့် F-နယ်မြေက မြို့၏ အစွန်ဆုံးအပိုင်းဖြစ်ပြီး အတော်လေး စည်းကမ်းမဲ့ကာ ကာကွယ်ရေးစနစ် အားနည်းသော နေရာတစ်ခုပင်။
E-နယ်မြေက F-နယ်မြေထက် ပိုကောင်းသော်လည်း ၎င်းမှာ အထောက်အကူပြု သားရဲလူသားများနှင့် သာမန်အရပ်သားများ အဓိကနေထိုင်ရာ နေရာတစ်ခုသာ ဖြစ်နေသေးပြီး ၎င်း၏ လုံခြုံရေးနှင့် အလုံးစုံ ပတ်ဝန်းကျင် အခြေအနေမှာ အရမ်းကောင်းမွန်ခြင်း မရှိသေးချေ။
ကျန်းယဲ့က သူ၏ စိတ်ထဲတွင် ရွေးချယ်စရာများကို အလျင်အမြန် ချိန်ဆလိုက်၏။
ဗဟိုနယ်မြေက အင်အားကြီးသူများနှင့် သူဌေးများ စုဝေးရာနေရာဖြစ်ပြီး လုံခြုံရေး အလွန်တင်းကျပ်မည်မှာ သေချာလှသည်။ ထို့ကြောင့် သာမန်သားရဲလူသားများနှင့် အရပ်သားများမှာ ဝင်ရောက်ခွင့်ပင် မရှိကြချေ။ မည်သူမည်ဝါမှန်း မသိရသော ဤပြင်ပလူများ ထိုနေရာသို့ ရမ်းတမ်းသွားရောက်ခြင်းက ပြဿနာရှာခြင်းနှင့် အတူတူပင်။
A-နယ်မြေက B-နယ်မြေနှင့် ဆင်တူပြီး ချမ်းသာကြွယ်ဝသူများနှင့် အဆင့်မြင့် အရာရှိများ၏ နယ်မြေဖြစ်ရာ သူတို့၏ အလည်အပတ် ခရီးစဉ်အတွက်လည်း မသင့်တော်ချေ။
"C-နယ်မြေ..." ကျန်းယဲ့က တီးတိုးရေရွတ်လိုက်၏။
အချက်အလက်များအရ C-နယ်မြေက ဤမြို့တော်ရှိ တိုက်ခိုက်ရေး အမျိုးအစား သို့မဟုတ် နည်းပညာ အမျိုးအစား သားရဲလူသားများ အဓိက နေထိုင် လှုပ်ရှားရာနေရာဖြစ်ပြီး သူတို့၏ ကိုယ်ပိုင်စွမ်းအားနှင့် အရည်အချင်းများမှတစ်ဆင့် လူမှုရေး အဆင့်အတန်း တစ်ခုကို ရရှိထားကြသူများ ဖြစ်ကြသည်။
ထိုနယ်မြေက အတော်လေး စည်းကမ်းတကျရှိပြီး အခြေခံအဆောက်အအုံများ ပြည့်စုံသော်လည်း ဗဟိုနယ်မြေလောက်တော့ လုံခြုံရေး တင်းကျပ်မနေချေ။ ထို့ပြင် လူကောင်းလူဆိုး ရောနှောနေမှု အတိုင်းအတာကလည်း E နှင့် F နယ်မြေများထက် များစွာ လျော့နည်းလေသည်။
ဤစိမ်းသက်သော အငွေ့အသက်များကို ခံစားရန်အတွက် အတော်လေး လုံခြုံသော ပတ်ဝန်းကျင်တစ်ခု လိုအပ်နေသည့် ခရီးသွားများအတွက် C-နယ်မြေသည် ကုန်ကျစရိတ် အသက်သာဆုံးနှင့် အလုံခြုံဆုံး ရွေးချယ်မှုဖြစ်ကြောင်း သေချာလှသည်။
ခုနစ်ရက်ဆိုသည့် အချိန်က C-နယ်မြေကို သေချာ စူးစမ်းလေ့လာရန်နှင့် ဤသားရဲကမ္ဘာ၏ အထက်တန်းစား ဘဝကို ခံစားကြည့်ရန် လုံလောက်သော အချိန်ဖြစ်၏။
"C-နယ်မြေကို သွားကြမယ်" ကျန်းယဲ့က အလျင်အမြန် ဆုံးဖြတ်လိုက်သည်။
သူက ပြဿနာတွေ ထပ်မရှာချင်တော့ချေ။ F-နယ်မြေမှ အတွေ့အကြုံက ဤကမ္ဘာတွင် လုံခြုံရေးသည် နံပါတ်တစ် ဦးစားပေးဖြစ်ကြောင်း သူ့ကို သတိပေးရန် လုံလောက်နေပြီ ဖြစ်သည်။
သူက သီးသန့် အသံလိုင်းမှတစ်ဆင့် ခရီးသွားအားလုံးကို နောက်ထပ် သွားမည့် ခရီးစဉ်အကြောင်း မသိမသာ အသိပေးလိုက်၏။
ခရီးစဉ်ကို သတ်မှတ်ပြီးနောက် ကျန်းယဲ့က ဤလူသစ်အဖွဲ့ကို ဦးဆောင်ကာ မြင့်မြတ်လက်သည်း မြို့တော်၏ ရှုပ်ထွေးလှသော သယ်ယူပို့ဆောင်ရေး ကွန်ရက်မှတစ်ဆင့် ခရီးဆက်ခဲ့သည်။
သူတို့က လေဟာပြင်ရထားလမ်းကြောင်းများ၏ မတူညီသော လိုင်းများကို ပြောင်းစီးခဲ့ကြပြီး တစ်ခါတစ်ရံတွင် ကြီးမားလှသော အထပ်ပေါင်းများစွာရှိသည့် သယ်ယူပို့ဆောင်ရေး အချက်အချာနေရာများကို ဖြတ်လျှောက်ခဲ့ကြရာ ဤသားရဲမြို့တော်၏ အံ့မခန်း ကျယ်ပြန့်မှုနှင့် နည်းပညာပိုင်းဆိုင်ရာ အငွေ့အသက်ကို ခံစားခဲ့ကြရသည်။
အကြိမ်ကြိမ် ကားပြောင်းစီးပြီးနောက် နောက်ဆုံးတွင် သူတို့ဟာ C-နယ်မြေသို့ သွားမည့် နောက်ဆုံးရထားပေါ်သို့ တက်ရောက်နိုင်ခဲ့ကြသည်။
ရထားက C-နယ်မြေ၏ ဝင်ပေါက်ဖြစ်သော နောက်ဆုံးဘူတာရုံသို့ ဖြည်းညှင်းစွာ ဝင်ရောက်သွားသောအခါ သူတို့ရှေ့ရှိ မြင်ကွင်းက ယခင် ဖြတ်သန်းခဲ့သော နယ်မြေများနှင့် လုံးဝ ကွဲပြားခြားနားနေချေသည်။
ကားပေါ်မှ ဆင်းလိုက်သည်နှင့် တစ်ပြိုင်နက် မြင်လိုက်ရသည်မှာ စည်ကားနေသော လမ်းမများဆီသို့ တိုက်ရိုက်သွားနိုင်သည့် လမ်းတစ်ခု မဟုတ်ဘဲ ကျယ်ဝန်းသော်လည်း လုံခြုံရေး အလွန်တင်းကျပ်သော စစ်ဆေးရေး ခန်းမကြီးတစ်ခု ဖြစ်နေခဲ့သည်။
အပြာရင့်ရောင် အလင်းများ တောက်ပနေသည့် စွမ်းအင်ဂိတ်ပေါက်များစွာကို တစ်တန်းတည်း စီထား၏။ ဝံပုလွေခေါင်း သို့မဟုတ် လင်းယုန်တံဆိပ် ပခုံးပတ်များ တပ်ဆင်ထားပြီး တူညီသော သံချပ်ကာဝတ်စုံများကို ဝတ်ဆင်ထားသည့် သားရဲလူသား အစောင့်များက ဂိတ်ပေါက်များ၏ တစ်ဖက်တစ်ချက်စီတွင် ခံ့ညားစွာ ရပ်နေကြပြီး သူတို့၏ စူးရှသော မျက်ဝန်းများက ဖြတ်သန်းသွားသူတိုင်းကို အကဲခတ်နေကြသည်။
အဆင့်မြင့် စကင်ဖတ်စစ်ဆေးရေး ကိရိယာများက C-နယ်မြေသို့ ဝင်ရောက်လာသူ အားလုံးနှင့် သူတို့၏ ပစ္စည်းများကို စစ်ဆေးနေစဉ် အသံတိုးတိုးလေးများ ရံဖန်ရံခါ ထွက်ပေါ်လာခဲ့သည်။
သူတို့နှင့်အတူ ကားပေါ်မှ ဆင်းလာကြသော သားရဲလူသားများမှာ ဤလုပ်ငန်းစဉ်နှင့် ရင်းနှီးနေပုံရပြီး စည်းကမ်းတကျ တန်းစီလိုက်ကြ၏။
ကျန်းယဲ့ကလည်း တည်ငြိမ်စွာပင် ခရီးသွားများကို လိုက်လာရန် လက်ဟန်ပြလိုက်ပြီး သူကိုယ်တိုင်လည်း သားရဲလူသားများ၏ တန်းစီနေမှုထဲသို့ ဝင်ရောက်သွားလိုက်သည်။
ခရီးသွားများမှာ အနည်းငယ် စိုးရိမ်နေကြသော်လည်း ကျန်းယဲ့၏ တည်ငြိမ်သော ဟန်ပန်ကို မြင်သောအခါ သူတို့က တည်ငြိမ်မှုကို ထိန်းသိမ်းရန် အတတ်နိုင်ဆုံး ကြိုးစားကြပြီး ပတ်ဝန်းကျင်ရှိ သားရဲလူသားများကဲ့သို့ပင် တိတ်ဆိတ်စွာ တန်းစီလိုက်ကြသည်။
တန်းစီနေစဉ် သားရဲလူသားများ၏ တီးတိုးပြောဆိုသံများက လွှဲဖယ်၍မရနိုင်အောင် သူတို့၏ နားထဲသို့ ရောက်ရှိလာလေသည်။
"မင်းတို့ ကြားပြီးပြီလား... ဒီတစ်ခါ F-နယ်မြေမှာ ပြဿနာအကြီးကြီး တက်သွားတယ်... ကြည့်ရတာ အဆင့်မြင့် ညစ်ညမ်းကိုယ်ထည် အကောင်ရေ တော်တော်များများ ဝင်သွားပြီး ကာကွယ်စောင့်ရှောက်သူ အတော်များများလည်း သေသွားတယ်တဲ့..."
"ခိုးဝင်သွားရုံတင် မကဘူးဟေ့... အမှောင်လက်သည်းက အရူးတွေက အဲဒီအကောင်တွေကို တမင်တကာ သွင်းလာခဲ့တာဆိုတဲ့ အထောက်အထားတွေ ရှိတယ်လို့ အတွင်းသတင်းတစ်ခုကို အခုလေးတင် ငါရထားတယ်"
"ဘာ... အမှောင်လက်သည်းဟုတ်လား... သူတို့ ရူးသွားကြပြီလား... ညစ်ညမ်းကိုယ်ထည်တွေကို လူနေရပ်ကွက်တွေထဲ သွင်းလာတယ်ပေါ့"
"ဟမ့်... သန့်စင်တဲ့ဆင့်ကဲပြောင်းလဲခြင်းကို ယုံကြည်တဲ့ အဲဒီသစ္စာဖောက်တွေရဲ့ ဦးနှောက်တွေကို ညစ်ညမ်းကိုယ်ထည်တွေက စားသုံးသွားတာ ကြာလှပြီ... ကမ္ဘာကြီး ဖရိုဖရဲဖြစ်သွားမှာကို သူတို့က သဘောကျနေမှာပေါ့"
"ဒါကြောင့်မလို့ C-နယ်မြေ ဝင်ပေါက်မှာ စစ်ဆေးရေးဂိတ်တွေ ရုတ်တရက်ချပြီး ဒီလောက် တင်းတင်းကျပ်ကျပ် စစ်ဆေးနေကြတာကိုး... ကြည့်ရတာ ရေမြောင်းထဲက ကြွက်တွေ ခိုးဝင်ပြီး ပြဿနာရှာမှာကို တားဆီးနေတာပဲ"
"စိတ်မပူပါနဲ့... C-နယ်မြေက F-နယ်မြေလို မဟုတ်ဘူး... ဒီက ငါတို့ရဲ့ ကာကွယ်စောင့်ရှောက်သူတွေက သွားစလို့ရတဲ့ သူတွေ မဟုတ်ဘူး... အမှောင်လက်သည်းက ကောင်တွေ မျက်နှာပြရဲရင် အသက်ရှင်လျက် ပြန်ထွက်သွားရမှာ မဟုတ်ဘူး"
"ဟုတ်တယ်.... C-နယ်မြေရဲ့ ကာကွယ်ရေးစနစ်နဲ့ အင်အားကြီးသူအရေအတွက်က အမှောင်ထဲကနေ ကျောချမ်းအောင် လုပ်တတ်တဲ့ အဲဒီသစ္စာဖောက်တွေ လှုပ်ခတ်နိုင်တဲ့အရာ မဟုတ်ဘူး..."
ကျန်းယဲ့နှင့် သူ၏အဖွဲ့မှာ တန်းစီသည့် နေရာတွင် တိတ်ဆိတ်စွာ ရပ်နေကြပြီး သူတို့၏ အဖွဲ့မှ သာမန်အဖွဲ့ဝင်များကဲ့သို့ပင် အလွန်အမင်း စူးစမ်းလိုစိတ် သို့မဟုတ် စိုးရိမ်ထိတ်လန့်မှုများကို မပြသကြချေ။
သို့သော်လည်း လူတိုင်းက အရပ်မျက်နှာ အားလုံးမှ ထွက်ပေါ်လာသော ဆွေးနွေးပြောဆိုသံများကို နားစွင့်နေကြပြီး အသုံးဝင်သော အချက်အလက်များကို ဆွဲထုတ်နေခဲ့ကြသည်။
၎င်းက သူတို့ကို လက်ရှိ အခြေအနေနှင့် ပတ်သက်၍ အကြမ်းဖျင်း သဘောပေါက်သွားစေ၏။
F-နယ်မြေရှိ ကပ်ဘေးမှာ အမှောင်လက်သည်းဟုခေါ်သော သစ္စာဖောက်အဖွဲ့အစည်းတစ်ခုကြောင့် ဖြစ်ပွားခဲ့ခြင်းဖြစ်ပြီး C-နယ်မြေရှိ လက်ရှိ စစ်အုပ်ချုပ်ရေးကဲ့သို့ တင်းကျပ်မှုမှာလည်း အမှောင်လက်သည်း အဖွဲ့ဝင်များကို ဖမ်းဆီးရန် ဖြစ်သည်။
ခေတ်ကာလ မည်သို့ပင်ရှိစေကာမူ သူရဲကောင်းများ အမြဲတမ်း ရှိနေတတ်သည်။
ထို့အတူ လူ့အဖွဲ့အစည်းကို မကျေနပ်သော သစ္စာဖောက်များဆိုသည်မှာလည်း ဘယ်တော့မှ ရှားပါးသွားမည် မဟုတ်ချေ။
ကျန်းယဲ့ အစစ်ဆေးခံရမည့် အလှည့်သို့ ရောက်သောအခါ ကျန်းယဲ့က သူ့ရှေ့ရှိ သားရဲလူသားများကို အတုခိုးကာ စစ်ဆေးရေးဂိတ်ဘေးရှိ တိုင်ပုံစံ စကင်ဖတ်စက်ဆီသို့ သူ၏ လက်ကောက်ဝတ်ကို တည်ငြိမ်စွာ ဆန့်ထုတ်လိုက်ပြီး သူ၏ မျိုးဗီဇလက်ကောက်ကို စက်ပေါ်ရှိ အာရုံခံဧရိယာနှင့် ချိတ်ဆက်ခွင့် ပြုလိုက်၏။
"တီ" ဟူသော အသံတိုးတိုးလေးတစ်ခုနှင့်အတူ သူ၏ ကိုယ်ရေးအချက်အလက်ကို စက်အထက်ရှိ ဟိုလိုဂရမ် မျက်နှာပြင်ပေါ်သို့ ချက်ချင်း ထုတ်လွှင့်ပြသလိုက်သည်။
【အမည်】 - ကျန်းယဲ့
【အဆင့်】 - A+
【သားရဲအသွင်】 - သိုး
【အသက်】 - ၂၄ နှစ်
【အရပ်】 - ၁၈၅ စင်တီမီတာ
【ကိုယ်အလေးချိန်】 - ၇၀ ကီလိုဂရမ်
ကျန်းယဲ့ : "..."
သူ၏ အကြည့်များက သားရဲအသွင် : သိုးဟူသော စကားလုံးများပေါ်တွင် ရပ်တန့်သွားပြီး သူ၏ နှုတ်ခမ်းများက မသိမသာ တွန့်ကွေးသွားရသည်။
စနစ်က ဘာကို ဆိုလိုချင်တာလဲဟ....
ရုပ်ဖျက်ချင်တယ် ဆိုရင်တောင်မှ အနည်းဆုံးတော့ ငါ့ကို ပိုပြီး ခန့်ညားပြီး ကြီးစိုးနိုင်တဲ့ ရွေးချယ်မှုတစ်ခု ပေးလို့မရဘူးလား။
နဂါး၊ ကျား၊ ခြင်္သေ့၊ ကျားသစ်... ဝက်ဝံဖြစ်ဖြစ်ပေါ့။
ခုက ဘာကို သိုးလဲ....
ခေါင်းဆောင်လို့ ဆိုလိုချင်တာလား... ငါက ဒီအဖွဲ့ရဲ့ ခေါင်းဆောင်ဖြစ်လို့ ဆိုလိုချင်တာလား။ အဲဒီလို သဘောမျိုးလား။
ကျန်းယဲ့က ကွေးညွတ်နေသော သိုးထီးချိုတစ်စုံဖြင့် အော်မြည်နေသော သူ၏ပုံစံကို ချက်ချင်း မြင်ယောင်သွားပြီး ကျောချမ်းသွားသည်ဟု ခံစားလိုက်ရ၏။
သူ ပိုတွေးလေလေ စနစ်က တမင်သက်သက် လုပ်နေခြင်းဖြစ်ကြောင်း ပို၍ သေချာလာလေလေပင်။
အခန်း ၄၆၅ပြီး၏။