အခန်း ၁၆၃၃

အခန်း ( ၁၆၃၃ ) ယွမ်ကျူးနတ်ဘုရားမင်းဆက် ဆက်လက်နယ်မြေချဲ့ထွင်ခြင်း။

ရွှမ်ထျန်းနတ်ဘုရားမင်းဆက်မှ ဧကရာဇ်ငယ်၏ မွေးနေ့အခမ်းအနား သတင်းသည် အချိန်တိုအတွင်းမှာပင် တောင်ပိုင်းကြယ်စင်စုလောက တစ်ခုလုံးသို့ ပျံ့နှံ့သွားခဲ့သည်။

ယွမ်ကျူးနတ်ဘုရားမင်းဆက်နှင့် လောက၏ကလေးငယ် ဖြစ်သော စူးယု တို့၏ ဂုဏ်သိက္ခာသည်လည်း ကြီးမားသော ထိုးနှက်ချက်တစ်ခုကို ခံစားလိုက်ရ၏။

မူလက ယွမ်ကျူးနတ်ဘုရားမင်းဆက်နှင့် မဟာမိတ်ဖွဲ့ရန် သို့မဟုတ် လက်အောက်ခံရန်ပင် ဆုံးဖြတ်ထားခဲ့ကြသော အချို့သော အင်အားစုများသည်ပင်...

ဤအကြောင်းကို သိရှိသွားကြပြီးနောက်၊ သူတို့အားလုံးက ထိုအကြံအစည်ကို ယာယီအားဖြင့် လက်လျှော့လိုက်ကြတော့သည်။

ဤအရာက ယွမ်ကျူးနတ်ဘုရားမင်းဆက်၏ နယ်မြေချဲ့ထွင်မှုကိုလည်း အဟန့်အတား ဖြစ်သွားစေခဲ့သည်။

ယွမ်ကျူးနတ်ဘုရားမင်းဆက်၏ နောက်ထပ်ခြေလှမ်းက ဘာဖြစ်လာမလဲဟု လူတိုင်းက သိချင်နေကြစဉ်မှာပင်...

ယွမ်ကျူးနတ်ဘုရားမင်းဆက်ထံမှ သတင်းစကားတစ်ခု ထွက်ပေါ်လာခဲ့သည်။

လောက၏အရွေးချယ်ခံ စူးယုက ကျင့်ကြံခြင်းအဆင့်မြှင့်ရန်အတွက် တံခါးပိတ်ကျင့်ကြံတော့မည်။

ဒါက ကြီးမားသော အသွင်ပြောင်းလဲမှုတစ်ခု စတင်တော့မည့်ပုံရသည်။

ထိုသတင်းကို ကြားလိုက်ရသောအခါ လူတိုင်း အံ့ဩသွားခဲ့ကြရသည်။

ထို့နောက် သက်ပြင်းမချဘဲ မနေနိုင်ကြတော့ချေ။

တောင်ပိုင်းကြယ်စင်စုလောက၏ အရွေးချယ်ခံ ဖြစ်သည့်အတိုင်း၊ သူက တိုက်ခိုက်လိုစိတ်နှင့် ပြည့်နှက်နေပြီး ဆုတ်ယုတ်မှုတစ်ခုတည်းနှင့်တင် လုံးဝဥဿုံ ရှုံးနိမ့်သွားမည့်သူ မဟုတ်ပါ။

ဤသတင်းကို သိရှိလိုက်ရသောအခါ၊ ကျွင်းရှောင်ယောက်၏ မျက်ဝန်းများထဲတွင် လှောင်ပြောင်လိုခြင်းနှင့် နက်ရှိုင်းသော အဓိပ္ပာယ်များ ပေါ်ထွက်လာခဲ့သည်။

စူးယု၏ နောက်ကွယ်တွင်လည်း လိုက်ပါကူညီပေးနေသော အဖိုးအိုတစ်ယောက် ရှိနေပါသလော။

ကျွင်းရှောင်ယောက်က ကိစ္စရပ်များမှာ ထိုမျှလောက် မရိုးရှင်းနိုင်ကြောင်း ခံစားမိလိုက်သည်။

"ဒါက ဘာဖြစ်နိုင်မလဲ...၊ မဟုတ်မှလွဲ..."

ကျွင်းရှောင်ယောက်က ရုတ်တရက် တစ်ခုခုကို တွေးမိသွားသည်။

သူ၏ ဝင်ရောက်စွက်ဖက်မှုကြောင့် စူးယု၏ ကံကြမ္မာတွင် ပြောင်းလဲမှုတစ်ခု ဖြစ်ပေါ်ခဲ့၏။

သူသည် စူးယု၏ မျက်ဝန်းထဲမှ အမှောင်ထုနှင့် မှိုင်းညှို့နေသော အမူအရာကိုလည်း မြင်တွေ့ခဲ့ရသည်။

"တကယ်လို့ အဲဒီလိုသာဆိုရင် စူးယုက တကယ်မိုက်မဲတဲ့သူပဲ။ သူက လောကရဲ့အရွေးချယ်ခံဆိုတဲ့ ဘွဲ့အမည်ကို တခြားတစ်ယောက်ဆီ လွှဲပြောင်းပေးဖို့ ရည်ရွယ်နေတာ ဖြစ်ရမယ်"

ကျွင်းရှောင်ယောက် ပြုံးလိုက်သည်။

စူးယု၏ လက်ထဲတွင် မည်သည့် လှည့်ကွက်အသစ်များ ရှိနေပါစေ...

ကျွင်းရှောင်ယောက်ကတော့ အနည်းငယ်မျှပင် အရေးမစိုက်ပေ။

သူ၏ အမျှော်အမြင်နှင့် ရှုထောင့်မှာ စူးယုထက် များစွာ ကျော်လွန်နေခဲ့ပြီ ဖြစ်သည်။

ထို့ပြင် စူးယုနှင့် ပတ်သက်သည့် သတင်းများ ထွက်ပေါ်လာပြီး မကြာမီမှာပင်...

ယွမ်ကျူးနတ်ဘုရားမင်းဆက်က နောက်ဆုံးတွင် နောက်ထပ် ကြီးမားသော လှုပ်ရှားမှုတစ်ခုကို ပြုလုပ်ခဲ့ပြန်သည်။

သို့သော်လည်း ဤကြီးမားသော လှုပ်ရှားမှုက လူတိုင်းကို လုံးဝ အံ့အားသင့်သွားစေခဲ့ပေသည်။

ယွမ်ကျူးနတ်ဘုရားမင်းဆက်က ၎င်း၏ နယ်မြေချဲ့ထွင်မှုကို ရပ်တန့်မသွားခဲ့ပါချေ။

ထိုအစား နယ်မြေချဲ့ထွင်မှုနှုန်းကိုပင် ပိုမိုမြှင့်တင်လိုက်သည်။

ယွမ်ကျူးနတ်ဘုရားမင်းဆက်က တောင်ပိုင်းယွမ်နယ်မြေကို လွှမ်းမိုးထားပြီးပြီ။

သူ၏ နောက်ထပ် နယ်မြေချဲ့ထွင်မှု ကြိုးပမ်းအားထုတ်မှုများမှာ မြောက်ပိုင်းနယ်မြေနှင့် အနောက်ပိုင်းနယ်မြေတို့ဆီသို့ ဖြစ်သည်။

အရှေ့တုန်ရွှမ်းနယ်မြေ အတွက်မူ...

ထိုနေရာတွင် ရွှမ်ထျန်းနတ်ဘုရားမင်းဆက် ရှိနေသောကြောင့်၊ ယွမ်ကျူးနတ်ဘုရားမင်းဆက်သည် လောလောဆယ်တွင် ဤနေရာသို့ နယ်မြေချဲ့ထွင်ရန် အစီအစဉ်မရှိသေးချေ။

သို့သော်လည်း ဤသတင်းကို ကြားသိရပြီးနောက်၊ လူတိုင်းက ယွမ်ကျူးနတ်ဘုရားမင်းဆက်တစ်ခုလုံး ရူးသွပ်သွားပြီဟု ခံစားလိုက်ရသည်။

ယွမ်ကျူးနတ်ဘုရားမင်းဆက်က တောင်ပိုင်းယွမ်နယ်မြေကို လွှမ်းမိုးထားပြီး ဖြစ်သလို၊ တိုင်းပြည်အင်အား အထွတ်အထိပ်သို့ ရောက်ရှိနေသော ဘီလူးကြီးတစ်ကောင် ဖြစ်နေသည့်တိုင်အောင်...

အခြားနယ်မြေနှစ်ခုရှိ အင်မော်တယ်အင်အားစုများကိုလည်း လျှော့တွက်၍ မရပါချေ။

အနောက်ပိုင်းနယ်မြေတွင် လီဟော်နတ်ဂိုဏ်းကဲ့သို့သော အင်အားစုများ ရှိသည်။

မြောက်ပိုင်းနယ်မြေတွင်မူ ရေခဲနှင့်ဆီးနှင်း နတ်ဘုရားမနန်းတော် ကဲ့သို့သော အင်အားစုများ ရှိကြ၏။

သူတို့က အနိုင်ကျင့်ရလွယ်သူများမဟုတ်ကြချေ။

ယွမ်ကျူးနတ်ဘုရားမင်းဆက်က အားကောင်းသော်လည်း၊ ဤမျှလောက်များပြားသော အင်အားစုများကို တစ်ပြိုင်နက်တည်း ဝါးမြိုပစ်ရန် ကြိုးစားခြင်းမှာ စိတ်ကူးယဉ် အိပ်မက်တစ်ခုသာ ဖြစ်ပေလိမ့်မည်။

ယခင်က လောက၏ကလေးငယ် စူးယု တည်ရှိနေမှုကြောင့် အင်အားစုများစွာသည် ယွမ်ကျူးနတ်ဘုရားမင်းဆက်သို့ မိမိအလိုအလျောက် လာရောက်ပူးပေါင်းခဲ့ကြသည်။

ယခုမူ စူးယုက ကျွင်းရှောင်ယောက်၏ လက်ချက်ဖြင့် ပြင်းထန်စွာ ရှုံးနိမ့်သွားခဲ့ရပြီ ဖြစ်ရာ...

မည်သည့်အင်အားစုကမျှ သူ၏ထံသို့ တက်ကြွစွာ လာရောက်ခိုလှုံလိုခြင်း မရှိကြတော့ပေ။

ထို့ကြောင့် ယွမ်ကျူးနတ်ဘုရားမင်းဆက်က အကြမ်းဖက်လာပြီး နယ်မြေများကို အဓမ္မသိမ်းပိုက်ရန် ကြိုးပမ်းလာခဲ့သည်။

လူအများစုက ယွမ်ကျူးနတ်ဘုရားမင်းဆက် ရူးသွပ်သွားပြီး ကြောက်မက်ဖွယ်ကောင်းသော ခြေလှမ်းတစ်ခုကို လှမ်းလိုက်ပြီဟု ထင်လိုက်ကြပေသည်။

သို့သော်လည်း အံ့အားသင့်စရာ ကောင်းသောအရာတစ်ခု ဖြစ်ပျက်ခဲ့သည်။

ယွမ်ကျူးနတ်ဘုရားမင်းဆက်က တပ်မဟာနှစ်စုကို အသီးသီး စေလွှတ်ကာ မြောက်ပိုင်းနယ်မြေနှင့် အနောက်ပိုင်းနယ်မြေတို့အတွင်းသို့ တစ်ချိန်တည်း ချီတက်စေခဲ့သည်။

ထို့ထက် အံ့အားသင့်စရာ ကောင်းသောအချက်မှာ...

ဤတပ်မဟာနှစ်စုက တားဆီး၍မရသော အရှိန်အဟုန်ဖြင့် ချီတက်နေခြင်းပင်။

မည်သည့်အင်အားစုကမျှ သူတို့၏ ချီတက်မှုကို မတားဆီးနိုင်ကြပါ။

သူတို့ထဲတွင် အားကောင်းသော ကျွမ်းကျင်သူ အများအပြား ပါဝင်နေခဲ့သည်။

သာမန်စစ်သည်များပင်လျှင် အလွန်အမင်း အားကောင်းပြီး၊ အခြားသော အင်မော်တယ်အင်အားစုများ၏ စစ်သည်များကို များစွာ ကျော်လွန်နေခဲ့ပေသည်။

ဤအရာက ထူးခြားလွန်းသည်။

ယွမ်ကျူးနတ်ဘုရားမင်းဆက်က ၎င်း၏ အထွတ်အထိပ်သို့ ရောက်ရှိနေလျှင်ပင်...

နေ့ချင်းညချင်း ဤမျှအထိ အားကောင်းလာရန်မှာ မဖြစ်နိုင်ပေ။

လူအများစုက တစ်ခုခု မှားယွင်းနေကြောင်း ခံစားမိလိုက်ကြသည်။

ဤကဲ့သို့သော အခြေအနေများအောက်တွင်...

ရွှမ်ထျန်းနတ်ဘုရားမင်းဆက်က ရေခဲနှင့်ဆီးနှင်း နတ်ဘုရားမနန်းတော်ထံမှ အရေးပေါ် အကူအညီတောင်းခံသည့် အချက်ပြမှုကို ရုတ်တရက် ရရှိခဲ့သည်။

ယွမ်ကျူးနတ်ဘုရားမင်းဆက်၏ တပ်မဟာက ရေခဲနှင့်ဆီးနှင်း နတ်ဘုရားမနန်းတော်သို့ ရောက်ရှိလာတော့မည်။

ရေခဲနှင့်ဆီးနှင်း နတ်ဘုရားမနန်းတော်က မြောက်ပိုင်းနယ်မြေတွင် လွှမ်းမိုးထားသော အင်အားစုတစ်ခု ဖြစ်သော်လည်း...

သူတို့က ယွမ်ကျူးနတ်ဘုရားမင်းဆက်၏ တားဆီး၍မရသော အရှိန်အဟုန်ဖြင့် ချီတက်လာမှုကြောင့် အနည်းငယ် ထိတ်လန့်နေခဲ့ကြရသည်။

ထို့ပြင် သူတို့က အကူအညီတောင်းခံရန် အခြားမည်သည့် အင်အားစုကိုမျှ ရှာမတွေ့နိုင်ခဲ့ကြချေ။

ရွှမ်ထျန်းနတ်ဘုရားမင်းဆက် တစ်ခုတည်းသာ သူတို့ကို ကူညီနိုင်သည်။

သို့သော်လည်း၊ ရေခဲနှင့်ဆီးနှင်း နတ်ဘုရားမနန်းတော်သဘ် ရွှမ်ထျန်းနတ်ဘုရားမင်းဆက်က သူတို့ကို အမှန်တကယ် ကူညီပေးမလားဆိုသည်ကိုတော့ သေချာမသိခဲ့ကြချေ။

နောက်ဆုံးတွင်၊ ကျွင်းရှောင်ယောက်နှင့် ပိုင်ရွယ်ဝေတို့၏ စေ့စပ်ပွဲ ပျက်ပြယ်သွားပြီးနောက်တွင် အင်အားစုနှစ်ခုကြားရှိ ဆက်ဆံရေးမှာ အေးစက်သွားခဲ့ပုံရသည်။

အကူအညီတောင်းခံသည့် အချက်ပြမှုကို ရရှိပြီးနောက်...

ရွှမ်ထျန်းနတ်ဘုရားမင်းဆက်တစ်ခုလုံးလည်း ဆွေးနွေးမှုများကို စတင်ခဲ့ပေသည်။

တစ်ချိန်တည်းမှာပင်၊ ရွှမ်ထျန်းနန်းတော်၌...

ကျွင်းရှောင်ယောက်က လေထဲတွင် တင်ပျဉ်ခွေထိုင်နေခဲ့သည်။

"ဒါက ငါ ခန့်မှန်းထားခဲ့တဲ့အတိုင်း တကယ်ပဲ ဖြစ်လာတာပဲ"

ကျွင်းရှောင်ယောက် ရေရွတ်လိုက်သည်။

ယွမ်ကျူးနတ်ဘုရားမင်းဆက်၏ တပ်မဟာက လျင်မြန်စွာ ချီတက်နေကြသည့်အပြင် ထူးခြားသော ခွန်အားများကို ပိုင်ဆိုင်ထားကြောင်း သိရှိလိုက်ရပြီးနောက်...

ကျွင်းရှောင်ယောက်က သူ၏ ခန့်မှန်းချက်များကို အတည်ပြုလိုက်နိုင်သည်။

ယွမ်ကျူးနတ်ဘုရားမင်းဆက်က ပါ့မျိုးနွယ် နှင့် လျှို့ဝှက် ဆက်သွယ်ထားခြင်း သို့မဟုတ် နီးကပ်သော ပူးပေါင်းဆောင်ရွက်မှုကို တည်ဆောက်ထားခြင်း ဖြစ်လိမ့်မည်။

ယွမ်ကျူးနတ်ဘုရားမင်းဆက်၏ စစ်အင်အား တိုးမြင့်လာခြင်းက ပါ့မျိုးနွယ်နှင့် ခွဲခြား၍မရအောင် ဆက်စပ်နေနိုင်သည်။

"ကံကောင်းချင်တော့ အရင်က ငါ အားလပ်ချိန် အနည်းငယ် ရခဲ့တုန်းက ပြင်ဆင်မှုအချို့ လုပ်ထားခဲ့တယ်"

"အခု... အဲဒီရလဒ်တွေကို စမ်းသပ်ရမယ့် အချိန်ရောက်ပြီ"

ကျွင်းရှောင်ယောက်က အပြုံးတစ်ခုဖြင့် ပြောလိုက်သည်။

"ရှောင်အာ..."

ထိုစဉ်၊ ဧကရီ ယွဲ့ကျစ်လန်၏ အသံမှာ တံခါးအပြင်ဘက်မှ ထွက်ပေါ်လာခဲ့သည်။

"အမေ... ဝင်လာလို့ရပါတယ်"

ကျွင်းရှောင်ယောက်က ပြောလိုက်၏။

ဧကရီ ယွဲ့ကျစ်လန်က တံခါးကို တွန်းဖွင့်ကာ ဝင်ရောက်လာပြီး မေးလိုက်သည်။

"ရှောင်အာ... သား ဒီကိစ္စကို ဘယ်လိုထင်လဲ"

ယခင်က ဖြစ်ပျက်ခဲ့သော အရာများပြီးနောက်...

ယွဲ့ကျစ်လန်သည် ကျွင်းရှောင်ယောက်၏ အမြင်များကို ပိုမို တန်ဖိုးထားလာခဲ့သည်။

ကျွင်းရှောင်ယောက်က အသက်ငယ်သော်လည်း သူ၏ အမျှော်အမြင်၊ ဉာဏ်ပညာနှင့် နည်းလမ်းများမှာ နှစ်ပေါင်းများစွာ နေထိုင်လာခဲ့သည့် မိစ္ဆာအိုကြီးတစ်ကောင်ကဲ့သို့ပင်။

ဤအရာက ယွဲ့ကျစ်လန်ကို သက်ပြင်းချမိစေခဲ့သည်။

ထို့ကြောင့် ယခုအခါတွင်၊ ယွဲ့ကျစ်လန်က ရွှမ်ထျန်းနတ်ဘုရားမင်းဆက်အတွက် မည်သည့်ဆုံးဖြတ်ချက်မဆို မချမှတ်မီ ကျွင်းရှောင်ယောက်နှင့် အရင် ဆွေးနွေးတိုင်ပင်လေ့ ရှိသည်။

"အကူအညီ စေလွှတ်ရမှာပေါ့၊ မဖြစ်မနေ စေလွှတ်ရမယ်။ နောက်ပြီး ဒီတစ်ကြိမ်တော့... ကျွန်တော်ကိုယ်တိုင် သွားမယ်"

ကျွင်းရှောင်ယောက်က တည်ငြိမ်စွာ ပြောလိုက်၏။

"ရှောင်အာ... ဒါက နည်းနည်း အန္တရာယ်များမနေဘူးလား..."

ယွဲ့ကျစ်လန်က အနည်းငယ် မျက်မှောင်ကြုတ်လိုက်မိသည်။

ယခုအချိန်တွင်၊ ကျွင်းရှောင်ယောက်ကို အသေချင်ဆုံး ဖြစ်နေသောသူမှာ ယွမ်ကျူးနတ်ဘုရားမင်းဆက်ပင် မဟုတ်ပါလား။

"မစိုးရိမ်ပါနဲ့ အမေ... ဒါက ဘာမှမဟုတ်ပါဘူး။ ကျွန်တော်က အရာတစ်ခုကို သက်သေပြချင်ရုံတင်ပါ"

"ဒါ့အပြင်... အဲဒီတပ်ဖွဲ့ကလည်း အခုအချိန်လောက်ဆိုရင် သူတို့ရဲ့ လေ့ကျင့်မှုတွေကို ပြီးမြောက်လောက်ပါပြီ" ကျွင်းရှောင်ယောက်က တည်ငြိမ်သော အပြုံးတစ်ခုဖြင့် ပြောလိုက်သည်။

ထိုစကားကိုကြားတော့ ယွဲ့ကျစ်လန်က အနည်းငယ် ခေါင်းညိတ်လိုက်၏။

"ရှောင်အာ... မင်းကိုယ်တိုင် လေ့ကျင့်ပေးထားတဲ့ တပ်ဖွဲ့ရဲ့ တိုက်ခိုက်ရေးစွမ်းရည်ကတော့ တကယ်ကို ကြောက်စရာကောင်းလွန်းတယ်"

ထိုတပ်ဖွဲ့၏ အရည်အသွေးမှာ ယွဲ့ကျစ်လန်ကိုပင် အတော်လေး အံ့အားသင့်သွားစေခဲ့သည်။

အရေးကြီးဆုံးအချက်မှာ၊ ဤအရာက ကျွင်းရှောင်ယောက် ကလေးဘဝ ကတည်းက စတင်၍ လေ့ကျင့်ပျိုးထောင်ပေးခဲ့သော အဖွဲ့တစ်ဖွဲ့ ဖြစ်နေခြင်းပင်။

ထိုအချိန်တွင်၊ ကျွင်းရှောင်ယောက်က ရွှမ်ထျန်းနတ်ဘုရားမင်းဆက်၏ စစ်သည်အချို့ ကျင့်ကြံရန်အတွက် အာနိသင်လျှော့ချထားသော သွေးများကို အသုံးပြုရန် အကြံပြုခဲ့သည်။

၎င်းက စင်စစ်တွင် ကျွင်းရှောင်ယောက်၏ မြင့်မြတ်ခန္ဓာ တာအိုသန္ဓေ သွေးများကို သန့်စင်ပြီး အာနိသင်လျှော့ချထားခြင်း ဖြစ်သည်။

ကျွင်းရှောင်ယောက်သည် မူလက အနာဂတ်တွင် ရွှမ်ထျန်းနတ်ဘုရားမင်းဆက်ကို ကာကွယ်နိုင်မည့် တပ်ဖွဲ့ကြီးတစ်ခုကို ပျိုးထောင်ရန် ရည်ရွယ်ခဲ့ခြင်း ဖြစ်၏။

ယခုတော့ ၎င်းက အသုံးဝင်လာခဲ့ပြီ။

"ဒါဆိုရင်... မင်းနဲ့အတူ လိုက်ပါပေးဖို့ ဧကရာဇ်တစ်ပိုင်းအဆင့် ရှိတဲ့ ဘိုးဘေးကြီးတစ်ယောက်ကို အမေ စီစဉ်ပေးမယ်"

ယွဲ့ကျစ်လန်က ပြောလိုက်သည်။

"ဟုတ်ကဲ့"

ကျွင်းရှောင်ယောက်လည်း ခေါင်းညိတ်လိုက်လေသည်။

မကြာမီမှာပင်၊ ရွှမ်ထျန်းနတ်ဘုရားမင်းဆက်က စတင်လှုပ်ရှားလာခဲ့သည်။

ထို့ပြင်၊ ကျွင်းရှောင်ယောက် ကိုယ်တိုင် လေ့ကျင့်ပေးထားသည့် လျှို့ဝှက်တပ်စုကြီးက နောက်ဆုံးတွင် ကမ္ဘာလောကကြီးဆီသို့ ပေါ်ထွက်လာတော့မည်။

ရွှမ်ထျန်းနတ်ဘုရားမင်းဆက်၏ တပ်မဟာက စတင်ချီတက်လာစဉ်မှာပင်...

အခြားတစ်ဖက်၊ မြောက်ပိုင်းနယ်မြေ၌...

ဤနေရာတွင်၊ မြေပြင်မှာ အေးခဲနေပြီး ဆီးနှင်းများမှာလည်း မိုင်ပေါင်းသောင်းချီ၍ လွင့်မျောနေခဲ့သည်။

ကြီးကျယ်ခမ်းနားပြီး ကြည်လင်တောက်ပသော၊ ဖန်စီကျောက်မျက်ရတနာများကဲ့သို့ အဆောက်အအုံများက ရေခဲမြစ် အထက်တွင် တည်ရှိနေကြ၏။

ဤနေရာက အခြားမဟုတ်ဘဲ၊ မြောက်ပိုင်းနယ်မြေရှိ အင်မော်တယ်အင်အားစုတစ်ခု ဖြစ်သော ရေခဲနှင့်ဆီးနှင်း နတ်ဘုရားမနန်းတော်၏ ဌာနချုပ်ပင်။

ဤအခိုက်တွင်၊ လှပသော ပုံရိပ်နှစ်ခုမှာ မြင့်မားသော အဆောက်အအုံတစ်ခုပေါ်တွင် ရပ်နေခဲ့ကြသည်။

သဘာဝကျစွာပင်၊ သူတို့က ရေခဲနှင့်ဆီးနှင်း နတ်ဘုရားမနန်းတော်၏ နန်းတော်သခင်မနှင့် ပိုင်ရွယ်ဝေတို့ ဖြစ်ကြပေသည်။

ထိုအချိန်တွင်၊ ဝေးကွာသောအရပ်မှ ဟင်းလင်းပြင်က အက်ကွဲသွားခဲ့သည်။

ထို့နောက် ခမ်းနားသော စစ်သင်္ဘောကြီးများ၊ မိုးပျံ သားရဲကြီးများက ပျံသန်းလာကြ၏။

စစ်ရထားလုံးကြီးများမှာလည်း အရှိန်အဝါအပြည့်ဖြင့် ရှိနေကြသည်။

များပြားသော်လည်း စနစ်ကျလှသော တပ်မဟာကြီးတစ်ခုက အတွင်းဘက်မှ ချီတက်ထွက်ပေါ်လာခဲ့ခြင်း ဖြစ်၏။

၎င်းတို့၏ လှံစွပ်များက တောက်ပနေပြီး အေးစက်သော အလင်းများ ဖြာထွက်နေသည်။

ယွမ်ကျူးနတ်ဘုရားမင်းဆက်၏ တပ်မဟာကြီး ရောက်ရှိလာခဲ့ပြီ။