အခန်း ၂၇၆

အခန်း ၂၇၆: သူ့ရဲ့ ရွေးချယ်မှုက အစဉ်အလာကို ကိုယ်စားပြုတယ်

အင်မော်တယ်နန်းတော်အတွင်း၌ စိတ်ဝိညာဉ်မြူခိုးများသည် ပင်လယ်တစ်ခုအလား တလိမ့်လိမ့်ထနေသည်။အစစ်အမှန်နဂါးအိုကြီး၏ ပယင်းရောင် နဂါး မျက်လုံးများသည် ဟင်းလင်းပြင်အလွှာများကို ထိုးဖောက်ကာ ကပ်ဘေးဒုက္ခ ခံယူသည့်နေရာသို့ အချိန်ကြာမြင့်စွာ စိုက်ကြည့်နေသည်။ သူ၏မျက်လုံးများတွင် ငြင်းဆို၍မရနိုင်သော ထိတ်လန့်တုန်လှုပ်မှုနှင့် တည်ကြည်လေးနက်မှုတို့ဖြင့် ပြည့်နှက်နေပေ၏။သူသည် အဆုံးမရှိသော ခေတ်အဆက်ဆက် နေထိုင်ခဲ့ပြီး ထိပ်သီးပါရမီရှင်များဖြစ်သည့် အင်မော်တယ် ဘုရင်များ၏ မျိုးဆက်များ၊ ဧကရာဇ်များ၏ ဆက်ခံသူများကို အမြောက်အများ မြင်တွေ့ခဲ့ဖူးသည်။ မည်သည့်ခေတ်တွင်မဆို သူတို့အနက်မှတစ်ယောက်သည် ခေတ်ကာလတစ်ခုလုံးကို ဖိနှိပ်ရန် လုံလောက်သည်။သို့သော် ဤကဲ့သို့လူမျိုးကို သူ မည်သည့်အချိန်ကမျှ မမြင်ဖူးချေ။မွေးရာပါ ဖရိုဖရဲ ရုပ်ခန္ဓာကိုယ်ကို ပိုင်ဆိုင်ထားကာ မူလအစ မဟာတာအို အများအပြားကို နားလည်သဘောပေါက်ထားပြီး အလွန်ငယ်ရွယ်သည်။ ဤအချက်များအနက်မှ မည်သည့်အချက်မဆို အင်မော်တယ်နယ်မြေတစ်ခုလုံးကို ထိတ်လန့်တုန်လှုပ်သွားစေရန် လုံလောက်သည်။သို့သော် ဤအခိုက်အတန့်တွင် ထိုအရာများအားလုံးသည် လူတစ်ယောက်တည်းပေါ်တွင် ထွက်ပေါ်လာပေ၏။"ဘိုးဘေး..."အစစ်အမှန် နဂါးအိုကြီးသည် အချိန်ကြာမြင့်စွာ တိတ်ဆိတ်နေသည်ကို မြင်သောအခါ အောင်းချင်က ရှားရှားပါးပါး စကားပြောရန် အစပျိုးလိုက်သည်။ သူ၏မိုးပြာရောင် နဂါးမျက်လုံးသူငယ်အိမ်များတွင် အံ့အားသင့်မှု အရိပ်အယောင်တစ်ခု လင်းလက်သွားသည်။သူသည် ဘိုးဘေး၏နောက်သို့ နှစ်ပေါင်းများစွာ လိုက်ပါခဲ့သည့်တိုင် ဤကဲ့သို့ အမူအရာမျိုးကို ပြသသည်အား မည်သည့်အချိန်ကမျှ မမြင်ခဲ့ဖူးချေ။အစစ်အမှန် နဂါးအိုကြီးသည် ချက်ချင်းတုံ့ပြန်အဖြေမပေးခဲ့ချေ။သူသည် သူ၏ကိုယ်ပိုင်တွက်ချက်မှုများတွင် နစ်မြုပ်နေကာ သူ တွေးတောလေလေ ပို၍အံ့အားသင့်လာလေလေဖြစ်ပြီး တစ်စုံတစ်ခု မှားယွင်းနေသည်ဟု ပို၍ခံစားရလေလေပင်။'တစ်ခုခုတော့ မှားနေတယ်...''အင်မော်တယ် ရှေးဟောင်းခေတ်ရဲ့ အစောပိုင်းကာလမှာတောင် မွေးရာပါ ဖရိုဖရဲ ခန္ဓာကိုယ်က ရှားရှားပါးပါး တွေ့မြင့်ရတဲ့ အမြင့်ဆုံး ရုပ်ပိုင်းဆိုင်ရာ ဖွဲ့စည်းတည်ဆောက်ပုံတစ်ခုပဲ... ဒီရုပ်ခန္ဓာကိုယ်က ဖရိုဖရဲ မဟာတာအိုနဲ့ သဘာဝအတိုင်း ပဲ့တင်ထပ်တယ်... အထွတ်အထိပ်ရောက်အောင် ကျင့်ကြံနိုင်တဲ့ လူတစ်ယောက်က ကမ္ဘာတွေကို ဖန်တီးနိုင်ပြီး နယ်မြေတွေအများကြီးကို ပြောင်းလဲဖန်တီးနိုင်တယ်... သူ့ရဲ့ တိုက်ပွဲဝင်စွမ်းအားက အဆင့်တွေကို ဖြတ်ကျော် တိုက်ခိုက်ဖို့နဲ့ တူညီတဲ့မျိုးဆက်ရဲ့ သက်တူရွယ်တူလူငယ်တွေကို ချေမှုန်းဖို့ လုံလောက်အောင် အစွမ်းထက်တယ်...''ဒါပေမဲ့ ပြဿနာက မွေးရာပါ ဖရိုဖရဲ ခန္ဓာကိုယ်က အင်မော်တယ် ရှေးဟောင်းခေတ်ရဲ့ အလယ်ပိုင်းကာလလောက်ကတည်းက မျိုးသုဉ်းပျောက်ကွယ်သွားခဲ့ပြီ...'အကြောင်းအရင်းမှာ ဤရုပ်ခန္ဓာကိုယ်သည် ကောင်းကင်ကို အလွန်ဆန့်ကျင်လွန်းသဖြင့် ကောင်းကင်တာအို၏ မနာလိုမှုကို ခံရပြီး လူကြီးဘဝသို့ မရောက်မီ ငယ်ရွယ်စဉ်မှာပင် သေဆုံးလေ့ရှိသောကြောင့်ပင်။လူတစ်ယောက်သည် ကံကောင်းထောက်မစွာဖြင့် ကြီးပြင်းလာလျှင်ပင် သူတို့သည် အရေးကြီးသော နယ်ပယ်များကို အဆင့်တက်ချိန်၌ ကြောက်မက်ဖွယ်ကောင်းသော ကောင်းကင်ဘုံ ကပ်ဘေးဒုက္ခတစ်ခုကို ဆွဲဆောင်လေ့ရှိပြီး အသက်ရှင်သန်ရန် အခွင့်အလမ်း အနည်းငယ်သာ ရှိပေ၏။'ဒါပေမဲ့ ဒီကောင်လေးက... အသက်ရှင်နေရုံတင်မကဘူး... တော်တော်လေး ကောင်းကောင်းမွန်မွန် နေထိုင်နေတာပဲ...''သူက ကောင်းကောင်းနေထိုင်နေရုံတင်မကဘူး အသက် နှစ်ဆယ်ကျော်အရွယ်မှာပဲ ဟင်းလင်းပြင် တာအိုနယ်ပယ်ကို ခြေချပြီးပြီ...''သူက ဟင်းလင်းပြင်တာအိုနယ်ပယ်ကို ချိုးဖျက်ဝင်ရောက်ချိန်မှာ ဟင်းလင်းပြင်တာအို ရှေးဟောင်း ကပ်ဘေးဒုက္ခကိုလည်း လှုံ့ဆော်နိုင်ခဲ့တယ်...''ဟင်းလင်းပြင်တာအို ရှေးဟောင်းကပ်ဘေးဒုက္ခကို သူက လှုံ့ဆော်နိုင်ခဲ့ပြီးတော့ ရှေးဟောင်းအင်မော်တယ်ရဲ့ ကိုယ်ပွားခန္ဓာကိုယ်ကိုလည်း သတ်ဖြတ်နိုင်ခဲ့တယ်...''သူက သတ်ဖြတ်ခဲ့တယ်...'အစစ်အမှန် နဂါးအိုကြီး၏နှုတ်ခမ်းမွေးများ တုန်ယင်နေသည်။ အဆုံးမရှိသော ခေတ်အဆက်ဆက် သူ စုဆောင်းထားခဲ့သော အသိပညာများမှာ ဤအချိန်အခိုက်အတန့်တွင် ယခင်က မရှိခဲ့ဖူးသော ရိုက်ခတ်မှုတစ်ခုကို ခံနေရသည့်အလား သူ ခံစားလိုက်ရပေ၏။ထိုကောင်လေးပေါ်ရှိ တာအိုအရှိန်အဝါသည် တစ်မျိုးတည်း မဟုတ်ကြောင်းကိုလည်း သူ ခံစားသိရှိခဲ့သည်။ဖရိုဖရဲကို အခြေခံအုတ်မြစ်အဖြစ် ဓားတာအိုကို အနားသတ်အဖြစ် ဟင်းလင်းပြင်ကို နယ်ပယ်အဖြစ်... ထို့ပြင် သူပင်လျှင် ခွဲခြားရန် ခက်ခဲသော ဖြော့တော့ပြီး မှိတ်တုတ်မှိတ်တုတ် ဖြစ်နေသည့် မူလအစ အရှိန်အဝါ အနည်းငယ်လည်း ရှိနေသည်။'လူတစ်ယောက်တည်းက ဘယ်လိုလုပ်ပြီးတော့ မူလအစ မဟာတာအိုတွေ အများကြီးကို တပြိုင်နက်တည်း နားလည်သဘောပေါက်နိုင်မှာလဲ...''ဒါ ဘယ်လို သောက်ရမ်းမွန်းစတားဆန်တဲ့ ပါရမီရှင်မျိုးလဲ...''ဒီကောင်လေးရဲ့ နားလည်သဘောပေါက်မှု စွမ်းရည်က အရမ်းလွန်ကဲနေပြီ... သူ့ရဲ့အသက်အရွယ်ရှိတဲ့ လူတစ်ယောက် ပိုင်ဆိုင်သင့်တဲ့ အရာမျိုး ဟုတ်ရဲ့လား...'အစစ်အမှန် နဂါးအိုကြီးသည် အစောပိုင်းက သူ ခံစားသိရှိခဲ့ရသော တခြားအရှိန်အဝါတစ်ခုကို ရုတ်တရက် သတိရသွားသည်။ ဤှသည်မှာ မွေးရာပါ မြင့်မြတ်ရုပ်ခန္ဓာကိုယ် တာအိုသန္ဓေသားပင်။ထိုအရှိန်အဝါသည်လည်း ဤကမ္ဘာတွင် လွင့်မျောနေခဲ့ကာ ယခုအချိန်၌ မှေးမှိန်သွားပြီ ဖြစ်သော်လည်း နဂါးအိုကြီးသည် ထိုအရာကို မှားယွင်းစွာ အာရုံခံမိမည် မဟုတ်ချေ။'မွေးရာပါ ဖရိုဖရဲ ခန္ဓာကိုယ်က မွေးဖွားလာပြီးတော့ မွေးရာပါ မြင့်မြတ်ရုပ်ခန္ဓာကိုယ် တာအို သန္ဓေသားကလည်း ဒီခေတ်ကာလမှာ ထွက်ပေါ်လာတယ်... ထာဝရ ကာလမှာတောင် ရှားရှားပါးပါး မြင်တွေ့ရတဲ့ အမြင့်မြတ်ဆုံး ရုပ်ခန္ဓာကိုယ်နှစ်ခုက တကယ့်ကို တူညီတဲ့ ခေတ်ကာလမှာ တပြိုင်နက်တည်း ထွက်ပေါ်လာတာပဲ...''ဒါက ဘာကို ဆိုလိုတာလဲ...''ဒီခေတ်က တကယ့်ကို ရွှေခေတ်တစ်ခု ဖြစ်လာလိမ့်မယ်လို့ ဆိုလိုတာပဲ...''ဒီကမ္ဘာမှာ ကမ္ဘာအသင်္ချေရဲ့ ပါရမီရှင်တွေနဲ့ အတိတ်က ရှေးဟောင်း အင်မော်တယ် ပါရမီရှင်တွေရဲ့ ပုံရိပ်ယောင်တွေက အရင်က မရှိခဲ့ဖူးတဲ့ အထွတ်အထိပ် အားပြိုင်မှုတစ်ခုအတွက် ဒီကောင်းကင်တက်လှမ်းခြင်း လျှို့ဝှက်နယ်မြေမှာ အတူတကွ စုဝေးကြလိမ့်မယ်ဆိုတာကို ဆိုလိုတာပဲ...'သူသည် ရုတ်တရက် သတိပြန်ဝင်လာပြီး ကြာပန်း စင်မြင့်ဆီသို့ မသိစိတ်အရ ကြည့်လိုက်ရာ ထိုနေရာသည် ဗလာဟင်းလင်း ဖြစ်နေလေ၏။ထုယိုယို ဆောင့်ကြောင့်ထိုင်နေခဲ့သော နေရာသည် ဗလာဟင်းလင်းဖြစ်နေပြီး စိတ်ဝိညာဉ်မြူခိုးများထဲတွင် ဖြည်းညှင်းစွာ ပျောက်ကွယ်သွားသော ဖြော့တော့သည့် ကိုးရောင်ခြယ် အလင်းစက်ဝန်းတစ်ခုသာ ရှိတော့သည်။အစစ်အမှန် နဂါးအိုကြီးသည် အမှန်အားဖြင့် အံ့အားသင့်မသွားခဲ့ချေ။သူမသည် တိတ်တဆိတ် ထွက်သွားသည်ကို သူသည် အစောကြီးကတည်းက အာရုံခံမိပြီး သူ၏အချိန်ကို အလဟဿ မဖြုန်းတီးချင်တော့ခြင်းသာဖြစ်သည်။သူသည် တခဏကြာမျှ တိတ်ဆိတ်နေပြီးနောက် ဖြည်းညှင်းစွာ ပြောဆိုသည်။"အောင်းချင်..."အောင်းချင်က အနည်းငယ် ဦးညွှတ်လိုက်၏။"ဘိုးဘေး...""သူ့နောက်ကို လိုက်သွား..."အစစ်အမှန် နဂါးအိုကြီး၏ အသံသည် သူ၏ပုံမှန် ဂရုမစိုက်မှုသို့ ပြန်လည်ရောက်ရှိသွားသော်လည်း မေးခွန်းထုတ်စရာ မလိုသော အာဏာအရိပ်အယောင်တစ်ရပ် ပါဝင်နေသည်။"သူ့နောက်ကို တိတ်တဆိတ် လိုက်သွား... သူအန္တရာယ်နဲ့ ကြုံတွေ့ရရင်သာ လှုပ်ရှားပါ..."သူသည် တခဏကြာခန့် ရပ်တန့်လိုက်ပြီး သူ၏နဂါး မျက်လုံးသူငယ်အိမ်များတွင် အောင်းချင်၏မိုးပြာရောင်ပုံရိပ် ထင်ဟပ်လာကာ သူ၏လေသံ ပို၍ပို၍ တည်ကြည်လေးနက်လာသည်။"ဒါနဲ့ အဲ့ဒီ မွေးရာပါ ဖရိုဖရဲ ရုပ်ခန္ဓာကိုယ်ရဲ့ မူလအစကို သွားပြီးစုံစမ်းအုံး...""တကယ်လို့ မင်းက အဆက်အသွယ် လုပ်နိုင်ရင် သူနဲ့ မိတ်ဆွေဖွဲ့ဖို့ အတတ်နိုင်ဆုံး ကြိုးစားပါ...""ကောင်းမွန်တဲ့ ဆက်ဆံရေး တစ်ခုကို တည်ဆောက်တာက အကောင်းဆုံး ဖြစ်လိမ့်မယ်..."အောင်းချင် အနည်းငယ် မှင်တက်သွားပြီး သူ၏မိုးပြာရောင် နဂါးမျက်ရုံးသူငယ်အိမ်များတွင် အံ့အားသင့်မှု အရိပ်အယောင်တစ်ခု လင်းလက်သွားပေ၏။ဘိုးဘေးသည် အမြဲတစေ မာနကြီးပြီး သူ၏ ခေါင်းကို ဘယ်တော့မှ လွယ်လင့်တကူ မငုံ့တတ်ချေ။အတိတ်တွင် အင်မော်တယ် ဘုရင်တစ်ပါး၏ တိုက်ရိုက်မျိုးဆက်နှင့် ရင်ဆိုင်ရလျှင်ပင် သူသည် ဂရုမစိုက်သကဲ့သို့ ခေါင်းညိတ်ပြရုံသာဖြစ်ပြီး မိတ်ဆွေဖွဲ့ရန် ရည်ရွယ်ချက်မျိုး ဘယ်သောအခါမှ မရှိခဲ့ချေ။သို့ရာတွင် ယခုမူ ဘိုးဘေးသည် နှောင်းပိုင်းမျိုးဆက်များ၏ လူငယ်ကျင့်ကြံသူတစ်ယောက် မိတ်ဆွေဖွဲ့ရန် သူ့ကို အမှန်တကယ်ပင် အစပျိုး လုပ်ဆောင်စေချင်သလော...အဓိကအချက်မှာ ဤသည်က မည်သည့်အသုံးဝင်မှုမျိုး ရှိနိုင်မည်နည်း....အစစ်အမှန် နဂါးအိုကြီးသည် သူ၏ စိတ်ရှုပ်ထွေးမှုကို ထွင်းဖောက်တွေ့မြင်သွားပုံရပြီး တိုးညှင်းစွာ သက်ပြင်းချကာ ပြောဆိုသည်။"အောင်းချင်.... အင်မော်တယ်နယ်မြေမှာ ငါတို့ဘိုးဘေးနဂါး ချောက်နက်ရဲ့ လက်ရှိအခြေအနေကို မင်း သိလား..."အောင်းချင်သည် တိတ်ဆိတ်နေပေ၏။သူ ထိုကိစ္စကို ကောင်းစွာသိရှိထားသည်။ဘိုးဘေးနဂါးချောက်နက်သည် တစ်ချိန်က အင်မော်တယ် နယ်မြေရှိ ထိပ်တန်းအင်အားစုများထဲမှ တစ်ခု ဖြစ်ပြီး နဂါးမျိုးနွယ်စု၏ မဟာမြင့်မြတ်နယ်မြေသုံးခုအနက်မှ တစ်ခုပင်။အစစ်အမှန် နဂါးမျိုးနွယ်စုသည် တစ်ချိန်က နတ်ဆိုးသားရဲများအားလုံး၏အရှင်သခင် ဖြစ်ပြီး ကောင်းကင်ဘုံကိုးထပ်နှင့် မြေပြင်ဆယ်လွှာကို အုပ်ချုပ်ကာ စကြဝဠာတစ်ခုလုံးကို ထိတ်လန့်တုန်လှုပ်စေခဲ့သည်။သို့သော် အင်မော်တယ် ရှေးဟောင်း ခေတ် အဆုံးသတ်စဥ်ကတည်းက အစစ်အမှန် နဂါးမျိုးနွယ်စုသည် တစ်နေ့ထက်တစ်နေ့ နိမ့်ပါးလာပေ၏။ ဘိုးဘေးနဂါးချောက်နက်သည် အများဆုံး ထိခိုက်ခဲ့ပြီး မြင့်မြတ်နယ်မြေ၏ အဆင့်အတန်းကို တဖြည်းဖြည်း ဆုံးရှုံးခဲ့သည်။ထို့ပြင် သူ အောင်းချင်သည် မိုးပြာနဂါးမျိုးနွယ်စု၏ ဘိုးဘေးသွေးမျိုးဆက်ရှိသည့် နဂါးမင်းသားတစ်ပါး အနေဖြင့် ဘိုးဘေးနဂါးချောက်နက်တစ်ခုလုံး၏ မျှော်လင့်ချက်ကို သယ်ဆောင်ထားသည်။သို့သော် မည်သည့်မျှော်လင့်ချက်မဆို အခွင့်အရေးများ ရှိနေရန် လိုအပ်သည်။ဘိုးဘေးနဂါးချောက်နက်ကို အထွတ်အထိပ်သို့ ပြန်လည်ရောက်ရှိစေနိုင်သည့် အချိုးအကွေ့တစ်ခု လိုအပ်ပေ၏။အစစ်အမှန် နဂါးအိုကြီးက ဆက်လက်၍ ပြောဆိုသည်။"အဲ့ဒီ ကောင်မလေးက နတ်ဆိုးသားရဲဘိုးဘေးရဲ့ ရွေးချယ်မှုပဲ..."အောင်းချင်၏ သူငယ်အိမ်များ အနည်းငယ် ကျဥ်းမြောင်းသွားသည်။နတ်ဆိုးသားရဲဘိုးဘေး...ထိုနာမည်သည် အင်မော်တယ် ရှေးဟောင်းခေတ်တွင်ပင် တားမြစ်ချက်ကဲ့သို့သော တည်ရှိမှုတစ်ခု ဖြစ်နေသည်။ယခင် နတ်ဆိုးသားရဲနန်းတော် အရှင်သခင်၏ မျိုးဆက်ဖြစ်ကာ ရှေးဟောင်း အင်မော်တယ်နတ်ဆိုးမျိုးနွယ်စု၏ တွဲဖက်အရှင်သခင်ဖြစ်သော သူ၏ ကျင့်ကြံခြင်းသည် ကောင်းကင်ယံကို တုန်လှုပ်စေခဲ့သည်။ သူသည် အင်မော်တယ် ဧကရာဇ်တစ်ပါးကို ပြိုလဲပျက်စီးသွားသည်အထိ တိုက်ခိုက်ခဲ့ဖူးပြီး သူကမူ မသေနိုင် မပျက်စီးနိုင်ဘဲ ကျန်ရှိနေခဲ့လေ၏။သူ၏ရွေးချယ်မှုမှာ အစဉ်အလာကို ကိုယ်စားပြုသည်။ထိုအရာသည် နတ်ဆိုးသားရဲမျိုးနွယ်စု၏ ရှေးအကျဆုံး အမွေအနှစ် စိတ်ဆန္ဒကို ကိုယ်စားပြုခြင်းပင်။"နတ်ဆိုးသားရဲဘိုးဘေးက သူ့ကို ရွေးချယ်ခဲ့မှတော့..."အစစ်အမှန် နဂါးအိုကြီး၏အသံ ပို၍တိုးညှင်းသွားသည်။"တကယ်လို့ ငါတို့က သူနဲ့ ကောင်းမွန်တဲ့ ဆက်ဆံရေး တစ်ခုကို တည်ဆောက်နိုင်မယ်ဆိုရင် ငါတို့ရဲ့ ဘိုးဘေးနဂါးချောက်နက်ကလည်း ကံကောင်းခြင်း အရိပ်အယောင်လေး တစ်ခုကို ရရှိနိုင်ပြီးတော့ ကံကြမ္မာရဲ့ တစ်စိတ်တစ်ပိုင်းကို မျှဝေခံစားနိုင်လောက်တယ်..."အောင်းချင်သည် တိတ်ဆိတ်သွားပေ၏။သူ တုံ့ပြန်နိုင်ခြင်း မရှိခဲ့ချေ။အစစ်အမှန် နဂါးအိုကြီးသည် အောင်းချင်ကို ကြည့်လိုက်ပြီး သူ၏နဂါးမျက်လုံးများတွင် ကူကယ်ရာမဲ့မှု အရိပ်အယောင်တစ်ခု ဖြတ်ပြေးသွားသည်။"ကောင်းပြီ မင်းက အရည်အချင်း မရှိဘူးလို့ ငါ ပြောတာ မဟုတ်ဘူး...""မင်း ဒီကိစ္စတွေကိုသိဖို့ အချိန်မကျသေးတာပါ... သွားပြီး ငါ ပြောတဲ့အတိုင်း လုပ်ပါ..."အောင်းချင်သည် အစစ်အမှန် နဂါးအိုကြီးကို နက်နက်ရှိုင်းရှိုင်း တစ်ချက်ကြည့်လိုက်ပြီးနောက် ဒူးတစ်ဖက်ထောက်ကာ ရှေးဟောင်း နဂါးမျိုးနွယ်စု ဓလေ့ထုံးစံတစ်ခုကို ပြုလုပ်လိုက်သည်။"စိတ်ချပါ ဘိုးဘေး... အောင်းချင်က တာဝန်ကို ကျရှုံးမှာ မဟုတ်ပါဘူး..."အစစ်အမှန် နဂါးအိုကြီးသည် ခေါင်းညိတ်လိုက်၏။အောင်းချင်၏ပုံရိပ်သည် မိုးပြာရောင် အလင်းတန်း တစ်တန်းအဖြစ် ပြောင်းလဲသွားပြီး အင်မော်တယ် နန်းတော် အပြင်ဘက်ရှိ အဆုံးမရှိသော တိမ်ပင်လယ်ထဲသို့ တိုးဝင်ပျောက်ကွယ်သွားတော့သည်။အင်မော်တယ်နန်းတော်သို့ တိတ်ဆိတ်မှုက တဖန်ပြန်၍ ရောက်ရှိလာသည်။အစစ်အမှန် နဂါးအိုကြီးသည် ကိုးရောင်ခြယ် အင်မော်တယ် ကျောက်စိမ်းကြာပန်း စင်မြင့်ပေါ်တွင် ရစ်ခွေနေပြီး သူ၏နဂါးမျက်လုံးများသည် အောင်းချင် ပျောက်ကွယ်သွားသော ဦးတည်ချက်ကို ကြည့်ကာ အချိန်ကြာမြင့်စွာ တိတ်ဆိတ်နေသည်။ဤသည်မှာ အလွန့်အလွန်ကြာမြင့်သော အချိန်အထိပင်။အောင်းချင်သည် အဝေးသို့ ရောက်သွားပြီဖြစ်ကာ အင်မော်တယ်နန်းတော်အတွင်း၌ ဒုတိယ အရှိန်အဝါ မရှိတော့ကြောင်း သူ အတည်ပြုလိုက်သည့် အချိန်အထိ စောင့်ကြည့်နေခဲ့သည်။ထိုအချိန်မှသာ သူသည် ရုတ်တရက် သူ၏ ခန္ဓာကိုယ်ကို ဖြောင့်မတ်လိုက်ပြီး သူ၏ နှုတ်ခမ်းမွေးများ ပြင်းထန်စွာ တုန်ယင်နေသည်။ သူ၏နဂါးမျက်လုံးများမှ မယုံကြည်နိုင်သော အရိပ်အယောင်တစ်ရပ် ပွင့်အံ့ထွက်လာပြီး အံ့အားတသင့်ရေရွတ်သံတစ်သံသည် သူ၏ပါးစပ်မှ လွှတ်ခနဲ ထွက်ပေါ်လာပေ၏။"အိုး ဘုရားရေ...""မွေးရာပါ ဖရိုဖရဲ ခန္ဓာကိုယ်က ဒီလောက်တောင် ကြမ်းတမ်းတာလား...""ဟင်းလင်းပြင် တာအို နယ်ပယ်မှာပဲ ရှိသေးတာကို ရှေးဟောင်းအင်မော်တယ်ရဲ့ ကိုယ်ပွားခန္ဓာကိုယ်ကို သတ်လိုက်တာလား...""သောက်ချေးပဲ... ဒါက လူတစ်ယောက် လုပ်နိုင်တဲ့ အရာ ဟုတ်ရဲ့လား...""ပြီးတော့ အဲ့ဒီ နားလည်သဘောပေါက်မှု စွမ်းရည်က ဘယ်လို တရားလွန်မှုမျိုးလဲ... ကပ်ဘေးဒုက္ခ ခံယူနေတုန်းမှာ သင်ယူနေတာလား... ပြီးတော့ သင်ယူပြီးတဲ့နောက်မှာ အဲ့ဒါကို ပြန်အသုံးပြုလိုက်တာလား...""အသက်နှစ်ဆယ်ကျော်... သူက အသက်နှစ်ဆယ် ကျော်လေးပဲ ရှိသေးတာ... ဟင်းလင်းပြင် မူလအစကို ဒီလောက် အတိုင်းအတာအထိ နားလည်သဘောပေါက်ထားတာလား...""ငါက အဆုံးမရှိတဲ့ ခေတ်အဆက်ဆက် အသက်ရှင်ခဲ့တာတောင် ဟင်းလင်းပြင် မဟာတာအိုကို အပြည့်အဝ ဆုပ်ကိုင်နိုင်ခြင်း မရှိသေးဘူး..."သူသည် စကားပြောလေလေ ပို၍စိတ်လှုပ်ရှားလာလေလေဖြစ်ပြီး သူ၏အမြှီးသည် ကြာပန်းစင်မြင့်ပေါ်တွင် ဟိုဟိုဒီဒီ ရိုက်ခတ်နေကာ အရောင်ကိုးမျိုး အင်မော်တယ်ကျောက်စိမ်းမှ အက်ကွဲသံများ ထွက်ပေါ်လာစေခဲ့သည်။"နှမြောစရာကောင်းလိုက်တာ... တကယ့်ကို နှမြောစရာကောင်းလိုက်တာ...""ကောင်းကင်တက်လှမ်းခြင်း လှေကားရဲ့ ဥပဒေသတွေကြောင့် ကန့်သတ်ထားလို့ ငါက ဘိုးဘေးနဂါး ချောက်နက် ပုံရိပ်ယောင်ကနေ ထွက်သွားလို့ မရဘူး...""မဟုတ်ရင် ဒီကောင်လေးကို ဘာပဲဖြစ်ဖြစ် ငါ့ဂိုဏ်းထဲကို ငါ ဆွဲသွင်းမှာ..."