အခန်း ၅၃၈

အခန်း (၅၃၈) - စစ်မြေပြင်တစ်နေရာက သွေးစွန်းသောည

ကောင်းကင်ယံထက်တွင် ပေါက်ကွဲသံများက မိုးခြိမ်းသံများကဲ့သို့ တဝုန်းဝုန်း ဟိန်းဟောက်နေပြီး ထိုဆူညံသံကြီးက လေထုတစ်ခုလုံးကို တုန်ခါသွားစေခဲ့သည်။ တောင်တန်းများကြားတွင်မူ နာကျင်စွာ အော်ဟစ်ညည်းတွားသံများနှင့် ထိတ်လန့်တုန်လှုပ်စွာ အော်ဟစ်သံများသည် အဆုံးအစမရှိ ပဲ့တင်ထပ်နေခဲ့ပြီး သေခြင်းတရားနှင့် ဖရိုဖရဲဖြစ်မှုတို့ ပေါင်းစပ်ထားသော ခြောက်ခြားဖွယ်ရာ သံစုံတီးဝိုင်းကြီးတစ်ခုကို ဖန်တီးနေခဲ့တော့သည်။

လော့ချန်သည် တိမ်ပြိုဂိုဏ်းထံမှ သူ၏ အကြည့်များကို ပြန်လည်ရုပ်သိမ်းလိုက်သည်။ သူ၏ ဘေးနားတွင် ရှိနေသော ချူခွေး၏ အသံက တည်ငြိမ်နေသော်လည်း ထိန်ချန်ထား၍မရသော စိတ်လှုပ်ရှားမှုများဖြင့် ပြည့်နှက်နေခဲ့သည်။

"စစ်ပွဲစတင်တဲ့ အချိန်ကတော့ အမြဲတမ်း သွေးအစွန်းဆုံးပဲ.... ငါတို့ အလျင်စလို ဝင်တိုက်ဖို့ မလိုသေးဘူး.... လေးဂိုဏ်းမဟာမိတ်အဖွဲ့ရဲ့ လက်အောက်ခံတွေကို အရင်ဆုံး အသေခံခိုင်းထားလိုက်.... ငါတို့က စစ်မြေပြင်ရဲ့ ဘေးဘက်တွေကိုပဲ ဦးတည်သွားကြမယ်.... စစ်မြေပြင်တစ်ခုလုံး ဖရိုဖရဲ ဖြစ်သွားတဲ့ အချိန်ကျမှ.... အဲဒီအချိန်ကျမှ ငါတို့ လှုပ်ရှားကြတာပေါ့.... အဲဒါက ဂုဏ်ထူးဆောင်မှတ်တွေ စပါးရိတ်သလို ရိတ်သိမ်းရမယ့် အချိန်ပဲ"

လော့ချန်က သဘောတူကြောင်း ပြသသည့်အနေဖြင့် ခေါင်းညိတ်လိုက်သည်။ ထို့နောက် သူတို့နှစ်ဦးသည် တိမ်တိုက်များကို စီးနင်းကာ စစ်မြေပြင်၏ အစွန်းပိုင်းဆီသို့ ဦးတည်ပျံသန်းသွားခဲ့ကြတော့သည်။ ရှေ့တန်းစစ်မျက်နှာတွင် အော်ဟစ်သံများနှင့် ချီစွမ်းအင်များ ပေါက်ကွဲသံများဖြင့် ပြင်းထန်စွာ တောက်လောင်နေသော်လည်း၊ သူတို့နှစ်ဦးစလုံးသည် အဆုံးစွန်သော တည်ငြိမ်မှုကို ထိန်းသိမ်းထားနိုင်ခဲ့ကြသည်။ သူတို့၏ မျက်နှာထက်တွင် မည်သည့် ခံစားချက်အရိပ်အယောင်မျှ ဖြတ်ပြေးသွားခြင်း မရှိပေ။ လော့ချန် လှုပ်ရှားသွားသည့်အခါတွင်မူ ညဉ့်ကောင်းကင်ယံထက်မှ မျက်ဝန်းတစ်စုံက သူ၏ ကျောပြင်ဆီသို့ အသေအချာ စိုက်ကြည့်နေခဲ့သည်။

"ဂိုဏ်းတူအစ်မ.... အစ်မရဲ့ အဲဒီကောင်လေးက တော်တော်လေးကို ကျေးဇူးကန်းတဲ့ ပုံပဲနော်...."

ကျီစယ်နောက်ပြောင်သော အသံတိုးတိုးလေးတစ်ခု ထွက်ပေါ်လာခဲ့ပြီး ၎င်းသည် ကျောက်စိမ်းချင်း ထိခတ်သကဲ့သို့ သာယာကြည်လင်နေခဲ့သည်။

ကရုဏာမဲ့နတ်သမီးက နောက်သို့ လှည့်မကြည့်ခဲ့ပေ။ သူမ ထိုအမျိုးသမီး၏ လေသံထဲမှ လှောင်ပြောင်မှုများကို လျစ်လျူရှုလိုက်ရင်း အေးစက်စွာ ပြောလိုက်သည်။

“သူက တစ်ခုခု လုပ်ပြချင်နေတာ၊ ငါတို့က သူ့ကို ဘာကိစ္စ တားဆီးရမှာလဲ...."

သခင်မယင်ယွဲ့သည် ခဏမျှ ဆွံ့အသွားခဲ့ရပြီး သူမ၏ နှုတ်ခမ်းအစုံက အသာအယာ စူပုပ်သွားခဲ့သည်။ မည်သို့ပင်ဖြစ်စေ လော့ချန်သည် ရေခဲခံတပ်၏ ဧည့်သည်တော် အကြီးအကဲဖြစ်သည်။ အဆင့်အတန်းအရ ဆိုလျှင် လော့ချန်သည် ယခုအခါ သူတို့နှင့် တန်းတူရည်တူ ရှိနေခဲ့ပြီး စစ်မှုထမ်းရမည့် တာဝန်များမှလည်း ကင်းလွတ်ခွင့် ရရှိထားသူ ဖြစ်သည်။ အကယ်၍ သူသာ ရှေ့တန်းစစ်မျက်နှာတွင် ကိုယ်တိုင်တိုက်ခိုက်လိုလျှင် သူမ သို့မဟုတ် ကရုဏာမဲ့နတ်သမီးတွင် သူ့အား တားဆီးရန် ခိုင်လုံသော အကြောင်းပြချက် မရှိပေ။

သို့သော်လည်း သခင်မယင်ယွဲ့က တိုးညင်းစွာ ရေရွတ်လိုက်သည်။

"ငါတို့ သူ့ကို မျက်ခြေမပြတ် စောင့်ကြည့်ထားသင့်တယ်.... တကယ်လို့ အဲဒီကောင်လေးတစ်ခုခု ဖြစ်သွားရင် ငါတို့နှစ်ယောက်စလုံး ဂိုဏ်းချုပ်ကို ရှင်းပြရ တော်တော်ခက်လိမ့်မယ်"

ကရုဏာမဲ့နတ်သမီးက သူမအား အေးစက်စွာ ကြည့်လိုက်သည်။

"နင် အပိုတွေ စိုးရိမ်မနေစမ်းပါနဲ့.... ငါ ဘာလုပ်ရမလဲဆိုတာ ငါသိတယ်၊ နင်က တိုက်ပွဲကို စနစ်တကျ ထိန်းဖို့ပဲ အာရုံစိုက်ထားလိုက်၊ တကယ်လို့ တပည့်တွေ အထိအခိုက်များရင် နင့်ရဲ့ ဂိုဏ်းချုပ်အစ်မဆီကနေ နင် အဆူခံရလိမ့်မယ်"

သခင်မယင်ယွဲ့က မကျေမနပ်ဖြင့် နှာခေါင်းတစ်ချက် ရှုံ့လိုက်ပြီးနောက် နောက်ဆုံးတွင် သူမ၏ ဝိညာဉ်အာရုံကို လော့ချန်ထံမှ ပြန်လည်ရုပ်သိမ်းလိုက်သည်။ မည်သို့ပင်ဖြစ်စေ ဤတိုက်ပွဲသည် ဓူဝံတောင်တန်းတစ်ခုတည်းအတွက်သာ မဟုတ်ပေ။ သူတို့၏ အစစ်အမှန် ပန်းတိုင်ထဲတွင် အဋ္ဌမမြောက် တောင်တန်းလည်း ပါဝင်နေခဲ့သည်။ သူတို့အနေဖြင့် စစ်ပွဲတစ်ခုလုံးကို တစ်ကြိမ်တည်းနှင့် အပြတ်အသတ် အနိုင်ယူရန် မလိုအပ်သော်လည်း၊ အင်အားမျှခြေကို ပြန်လည်ထိန်းညှိနိုင်ရန်အတွက် အနည်းဆုံး တောင်တန်းလေးခုကို သိမ်းပိုက်ရမည် ဖြစ်သည်။ ထိုသို့မဟုတ်လျှင် တိမ်ပြိုဂိုဏ်းသည် သူတို့၏ အင်အားအားလုံးကို အကုန်အစင် ထုတ်သုံးပြီး စွန့်စားလိမ့်မည် မဟုတ်ပေ။

....

ဓူဝံတောင်တန်း၏ ဘေးဘက်စစ်မျက်နှာ အခြေစိုက်စခန်းတွင် မြေပြင်သည် ရွှေရောင် သဲပြင်ကြီးများအလား တောက်ပနေခဲ့သည်။ ထိုမြေရိုင်းပြင်ကြီးသည် ဒုတိယအဆင့်ရှိသော ရွှေသဲစင်များ အလျှံပယ် ထွက်ရှိရာ နေရာအဖြစ် ကျော်ကြားလှပေသည်။ ထိုနေရာသည် စစ်မြေပြင်၏ ဘေးဘက်တွင် ရှိနေသဖြင့် အတော်အတန် ဘေးကင်းသည်ဟု ဆိုနိုင်သော်လည်း ဤအကြောင်းပြချက်ကြောင့်ပင် ထိုနေရာကို တင်းကြပ်စွာ စောင့်ကြပ်ထားကြခြင်း ဖြစ်သည်။

ထိုနေရာကို စောင့်ကြပ်ရန် တာဝန်ပေးအပ်ခြင်း ခံထားရသော ဂိုဏ်းမှာ ဓားစောင့်ဂိုဏ်းဖြစ်သည်။ တိကျစွာ ပြောရလျှင် နှောင်းပိုင်း ကျင့်ကြံသူ တစ်ဦးနှင့် အစောပိုင်းအဆင့် ကျင့်ကြံသူ သုံးဦးသာ ရှိသော ဓားစောင့်ဂိုဏ်းသည် ဓားဂိုဏ်းမဟာမိတ်အဖွဲ့၏ တိုက်ရိုက်ကွပ်ကဲမှုအောက်တွင် ရှိနေရန် အရည်အချင်း မပြည့်မီပေ။ သူတို့၏ အစစ်အမှန် ကျောထောက်နောက်ခံမှာ ဓားဂိုဏ်းမဟာမိတ်အဖွဲ့၏ လက်အောက်ခံဖြစ်သော ကောင်းကင်ဓားဂိုဏ်း ဖြစ်ပေသည်။

စစ်ပွဲ ပြင်းထန်စွာ ဖြစ်ပွားခဲ့သည့်အခါ ကောင်းကင်ဓားဂိုဏ်းတွင် ရွှေအမြုတေအဆင့် ကျင့်ကြံသူတစ်ဦး ရှိနေခဲ့သဖြင့် သူတို့သည် ချက်ချင်းပင် ရှေ့တန်းစစ်မျက်နှာသို့ ဆင့်ခေါ်ခြင်း ခံခဲ့ရသည်။ ထို့ကြောင့် သူတို့သည် ဤဒေသကို ကွပ်ကဲရန် တာဝန်ကို ဓားစောင့်ဂိုဏ်းထံသို့ လွှဲပြောင်းပေးခဲ့ကြခြင်း ဖြစ်သည်။ ဤသည်မှာ ရေခဲခံတပ်က လော့ထျန်းအဖွဲ့ကို ဆင့်ခေါ်ပြီး၊ လော့ထျန်းအဖွဲ့မှတဆင့် လီမျိုးနွယ်စု၏ ခေါင်းဆောင် လီယင်ကျန်းကို စစ်မြေပြင်သို့ စေလွှတ်ခဲ့သည့် အစီအစဉ်နှင့် အလားတူပင် ဖြစ်သည်။ လက်အောက်ခံ၏ လက်အောက်ခံဟူသည်မှာ ဂုဏ်ပုဒ်ကို ပေါ်ပေါ်ထင်ထင် မခံစားရသော်လည်း၊ အမှန်စင်စစ် အခြားသူများ၏ ကြိုးဆွဲရာ ကရသော ရုပ်သေးရုပ်များသာ ဖြစ်ကြပေသည်။

သို့သော် သူတို့အတွက် ကံကောင်းသည်မှာ စစ်ပွဲစတင်ကတည်းက ဓားစောင့်ဂိုဏ်းသည် ထိခိုက်ကျဆုံးမှုအချို့ ရှိခဲ့သော်လည်း၊ သူတို့၏ တန်ဖိုးအရှိဆုံး ကျင့်ကြံသူများ၏ အင်အားကိုမူ အပျက်စီးမခံဘဲ နဂိုအတိုင်း ထိန်းသိမ်းထားနိုင်ခဲ့ခြင်း ဖြစ်သည်။ ထိုအခိုက်အတန့်တွင် ဂိုဏ်းချုပ် ရှီးမန်ဝူဟိုင်သည် သူ၏ တပည့်သုံးဦးကို ဘေးတွင် ခြံရံလျက် ရွှေရောင်သဲပြင်ထက်တွင် မတ်မတ်ရပ်နေခဲ့သည်။ သူ၏ အကြည့်များသည် ဝေးကွာလှသော စစ်မြေပြင်ဆီသို့ စိုက်ကြည့်နေခဲ့ပြီး၊ ထိုနေရာတွင် ပေါက်ကွဲသံကြီးများနှင့် တောက်ပလှသော အလင်းတန်းများသည် ညဉ့်မှောင်မိုက်ကြီးကို ဖရိုဖရဲဖြစ်အောင် ဖန်တီးနေခဲ့ကြသည်။ သူ၏ မျက်နှာထက်တွင် စိုးရိမ်ပူပန်မှု အရိပ်အယောင်အချို့ စိမ့်ထွက်နေခဲ့သည်။

"ဂိုဏ်းချုပ်.... ကျွန်တော်တို့...."

သူ၏ တပည့်တစ်ဦးက တုံ့ဆိုင်းစွာဖြင့် စကားစတင်လိုက်သည်။

ရှီးမန်ဝူဟိုင်က လေးနက်သော လေသံဖြင့် ဖြတ်ပြောလိုက်သည်။

"ဘာမှ မပြောနဲ့၊ အခြေအနေ မကောင်းရင် ချက်ချင်း စခန်းသိမ်းပြီး ဆုတ်ကြမယ်၊ ယွီလန် မင်း လူတွေကို အရင်ခေါ်သွား၊ တိကျူးနဲ့ တပ်မကြီးက ငါ့နောက်ကနေ လိုက်လာခဲ့၊ တိုက်ရင်းနဲ့ ဆုတ်မယ်"

"ဒါပေမဲ့.... အဲဒါက ကောင်းကင်ဓားဂိုဏ်းကို စော်ကားရာ မရောက်ဘူးလားခင်ဗျာ...."

ကျန်းယွီလန်က မမေးဘဲ မနေနိုင်ဖြစ်သွားခဲ့သည်။

ရှီးမန်ဝူဟိုင်က ခါးသီးစွာ ရယ်မောလိုက်သည်။

"ကောင်းကင်ဓားဂိုဏ်း ဟုတ်လား.... သူတို့ကိုယ်တိုင်တောင် မနည်းရုန်းကန်နေရတာ၊ တိမ်ပြိုဂိုဏ်းရဲ့ ရုပ်သေးရုပ်တွေ တရဟော တိုက်ခိုက်မှုက သူတို့ရဲ့ အစီအရင်ကို အရင်ဆုံး ထိမှန်သွားခဲ့တာ၊ ငါတို့က ဘာလို့ သူတို့အတွက် အသက်နဲ့ရင်းပြီး စွန့်စားရမှာလဲ.... တကယ်လို့ ငါတို့သာ ဒီတိုက်ပွဲမှာ အသက်ရှင်ကျန်ရစ်ခဲ့ပြီး အခြေအနေက ငါတို့ဘက်ကို လှည့်လာခဲ့ရင်.... ဓားစောင့်ဂိုဏ်းက ကောင်းကင်ဓားဂိုဏ်းရဲ့ နေရာကို အစားထိုးဝင်ရောက်ပြီး တကယ့် ထိပ်သီးအင်အားစုတစ်ခုအနေနဲ့ ဘာလို့ ပေါ်ထွက်မလာနိုင်ရမှာလဲ...."

ထိုစကားလုံးများနှင့်အတူ သူသည် လတ်တလော အမိန့်များကိုသာမက နောင်လာမည့် ရည်မှန်းချက်များကိုပါ ချပြလိုက်ခြင်း ဖြစ်သည်။ ရှီးမန်ဝူဟိုင်သည် ရေတိုအကျိုးအမြတ်တစ်ခုတည်းနောက်သို့ လိုက်ပါတတ်သော လူမိုက်တစ်ဦး မဟုတ်ပေ၊ သူ၏ စိတ်က ထက်မြက်ပြီး ရည်မှန်းချက်က အခြားသူများထက် ပိုမို၍ ရဲရင့်လှပေသည်။ သူ၏ လက်အောက်မှ တပည့်များသည်လည်း ကြည်ညိုလေးစားမှုများနှင့်အတူ သဘောတူကြောင်း အော်ဟစ်လိုက်ကြသည်။

"ဂိုဏ်းချုပ်ရဲ့ အမြော်အမြင်ကတော့ တကယ်ကို အနှိုင်းမဲ့ပါပဲ...."

"ကျွန်တော်တို့ ဂိုဏ်းချုပ်ရဲ့ အမိန့်တွေကို တသွေမသိမ်း လိုက်နာဆောင်ရွက်ပါ့မယ်...."

"တကယ်လို့ ဂိုဏ်းချုပ်သာ ဓားဂိုဏ်းရဲ့ ရွှေအမြုတေအဆင့် ရောက်ရှိစေမယ့် လျှို့ဝှက်နည်းကို ရရှိသွားခဲ့ရင်.... ကျွန်တော်တို့ ဓားစောင့်ဂိုဏ်းကလည်း တစ်နေ့မှာ ရွှေအမြုတေအဆင့် ကျင့်ကြံသူတစ်ယောက် မွေးထုတ်ပေးနိုင်မှာ သေချာတယ်...."

သူတို့၏ အသံများ မဆုံးခင်မှာပင် ရှီးမန်ဝူဟိုင်၏ မျက်နှာက ရုတ်တရက် ပျက်ယွင်းသွားခဲ့သည်။ သူ၏ ခေါင်းက အပေါ်သို့ ချက်ချင်းပင် မော့တက်သွားခဲ့သည်။

"ကြွက်သူခိုးတွေ.... အပြင်ကို ထွက်ခဲ့ကြစမ်း...."

သူ အော်ဟစ်လိုက်ရာ ထိုအသံက ဓားသွားတစ်စင်းကဲ့သို့ ထက်မြက်နေခဲ့သည်။

ထိုအချိန်၌ပင် သူ၏ လက်က ကျောပြင်နောက်၌ သိမ်မွေ့စွာ လှုပ်ရှားသွားခဲ့သည်။ အခြေတည်အစောပိုင်းအဆင့်ရှိသော တပည့်သုံးဦးသည် ချက်ချင်းပင် နားလည်သွားခဲ့ကြပြီး၊ ဒုတိယအဆင့်ရှိသော တိုက်ခိုက်ရေး အစီအရင်ကို အသက်သွင်းရန်အတွက် နောက်သို့ လျင်မြန်စွာ ဆုတ်ခွာသွားခဲ့ကြသည်။

ရှီးမန်ဝူဟိုင်၏ စူးရှလှသော အကြည့်အောက်တွင် အမှောင်ထဲမှ လူရိပ်နှစ်ခု ထွက်ပေါ်လာခဲ့သည်။ တစ်ဦးက ပြင်းထန်ပြီး အထိန်းအကွပ်မဲ့လှသော တိုက်ခိုက်ရေး စိတ်ဆန္ဒများကို ထုတ်ဖော်နေသည့် ချီထျန်းတုတ်ကို ကိုင်ဆောင်ထားပြီး၊ အခြားတစ်ဦးကမူ ရှည်လျားသော ဓားတစ်လက်ကို ထမ်းပိုးထားကာ သူ၏ အေးစက်လှသော အကြည့်က သံမဏိကဲ့သို့ ထက်ရှနေခဲ့သည်။

ထိုမြင်ကွင်းကြောင့် ရှီးမန်ဝူဟိုင်၏ အမူအရာက တောင့်တင်းသွားခဲ့ရသည်။ ကျင့်ကြံသူတစ်ဦးက အဆင့် (၉) ဖြစ်နေပြီး၊ အခြားတစ်ဦးကမူ အဆင့် (၆) မျှသာ ရှိသေးသည် မဟုတ်လော။

"မိတ်ဆွေ...."

သူ သတိကြီးစွာဖြင့် စကားရန် ကြိုးပမ်းလိုက်သည်။

သို့သော် ကျူးကျော်သူနှစ်ဦးကမူ မည်သည့် ပြန်လည်တုံ့ပြန်မှုကိုမျှ ပေးရန် စိတ်မဝင်စားခဲ့ကြပေ။

"မင်းက အစီအရင်ကို ရှင်းလိုက်.... အခြေတည်နှောင်းပိုင်းကျင့်ကြံသူကို ငါပဲ ကိုင်တွယ်မယ်"

ချူခွေးက ပေါ့ပေါ့ပါးပါးပင် ပြောလိုက်သည်။

လော့ချန်က သဘောတူကြောင်း ပြသလိုက်သည်။ ထို့ထက်ပို၍ မည်သည့် စကားတစ်ခွန်းမျှ ထွက်ပေါ်မလာခဲ့ပေ။ နောက်တစ်ခဏအတွင်းမှာပင် ချူခွေးသည် သူ၏ ချီထျန်းတုတ်ကို မြှောက်ကာ အပြင်းအထန် ရိုက်ချလိုက်တော့သည်။

သူ၏ မျက်နှာချင်းဆိုင်ရှိ ရှီးမန်ဝူဟိုင်သည် ရင်ထဲမှ ထိတ်လန့်တုန်လှုပ်မှုကို ခံစားလိုက်ရသော်လည်း အံကိုတင်းတင်းကြိတ်ကာ နေရာတွင် မတ်မတ်ရပ်တည်နေခဲ့သည်။ သူ ဝတ်ရုံစကို ခါယမ်းလိုက်သည်နှင့် တစ်ပြိုင်နက် ဧရာမ ဓားမကြီးတစ်လက်က သူ၏ လက်ထဲသို့ ပျံသန်းရောက်ရှိလာခဲ့သည်။ သူ ဒေါသတကြီး အော်ဟစ်လိုက်ရင်း ပြင်းထန်လှသော ဓားအလင်းတန်းများကို ထုတ်ဖော်ကာ အပေါ်မှ ကျရောက်လာသော တုတ်ချက်ကို ဆီး၍ ခုခံလိုက်တော့သည်။

ဘုန်းးး....

ဓားအလင်းတန်းသည် စစ်မြေပြင်တစ်ခုလုံးတွင် မိုးကြိုးပစ်ချလိုက်သည့်အလား ပြင်းထန်စွာ ပေါက်ကွဲသွားခဲ့ပြီး၊ ၎င်း၏ ရိုက်ခတ်မှုလှိုင်းလုံးကြီးသည် မိုင်ပေါင်းများစွာအထိ ဖြန့်ကျက်သွားခဲ့သည်။ အခြေစိုက်စခန်းအတွင်း၌မူ ထိုပြင်းထန်လှသော ရိုက်ခတ်မှုကြောင့် များစွာသော ချီသန့်စင်နှောင်းပိုင်းကျင့်ကြံသူများသည် ခြေလှမ်းများ ယိမ်းယိုင်ကာ လဲကျသွားခဲ့ကြရပြီး၊ အချို့မှာမူ နေရာ၌ပင် သတိလစ်မေ့မြောသွားခဲ့ကြရတော့သည်။

ရှီးမန်ဝူဟိုင်၏ မျက်ဝန်းထဲတွင် ဒေါသမီးလျှံများ တောက်လောင်သွားခဲ့ပြီး ဟိန်းဟောက်လိုက်သည်။

"ငါ မင်းကို သတ်ပစ်မယ်...."

"အဲ့လိုဆို သိပ်ကောင်းတာပေါ့...."

ချူခွေးက ဝမ်းမြောက်ဝမ်းသာစွာဖြင့် အော်ဟစ်လိုက်ပြီး၊ သူ၏ ချီထျန်းတုတ်ကို ဝှေ့ယမ်းလျက် ကောင်းကင်ယံထက်သို့ ပျံတက်သွားသော ရှီးမန်ဝူဟိုင်၏ နောက်သို့ တရဟော လိုက်ပါ တိုက်ခိုက်လေတော့သည်။

လော့ချန်သည် သူ၏ အကြည့်များကို ကောင်းကင်ယံထက်သို့ ပို့လွှတ်လိုက်ရာ၊ သူ၏ မျက်ဝန်းများသည် မြင့်မားလှသော ကောင်းကင်ယံ၌ ပြင်းထန်စွာ တိုက်ခိုက်နေကြသော လူရိပ်နှစ်ခုထံတွင် ခဏမျှ ကျရောက်သွားခဲ့သည်။ ထိုတိုက်ပွဲ၏ ပြင်းထန်မှုများသည် သူ၏ တည်ငြိမ်မှုကို မည်သို့မျှ မဖျက်ဆီးနိုင်ခဲ့ပေ။ သူသည် မလောဘဲ ခြေလှမ်းများကို လှမ်းရင်း ရွှေသဲစင်အခြေစိုက်စခန်း၏ အတွင်းပိုင်းဆီသို့ တရွေ့ရွေ့ လမ်းလျှောက်ဝင်ရောက်သွားခဲ့သည်။ သူ၏ မျက်ဝန်းများသည် စစ်မြေပြင်၏ ဗဟိုချက်ဆီသို့ ကျရောက်သွားခဲ့ရာ၊ ထိုနေရာတွင် စူးရှတောက်ပလှသော ရွှေရောင်အလင်းတန်းများသည် ကောင်းကင်ယံဆီသို့ တစ်ဟုန်ထိုး တက်လှမ်းနေခဲ့ကြသည်။ ဧရာမ အစီအရင်ကြီးတစ်ခုသည် အသက်ဝင်လှုပ်ရှားနေဆဲ ဖြစ်ပြီး၊ ၎င်း၏ စွမ်းအားများသည် ဧရာမ ဓားကြီးတစ်စင်းအဖြစ်သို့ လျင်မြန်စွာ ပေါင်းစပ်ပုံဖော်နေခဲ့သည်။

စစ်ပွဲ ပိုမို၍ ပြင်းထန်လာသည်နှင့်အမျှ နှစ်ဖက်စလုံးသည် မိမိတို့၏ အင်အားများကို မြှင့်တင်နိုင်မည့် မည်သည့်နည်းလမ်း၊ မည်သည့်အရင်းအမြစ်များကိုမဆို အားသွန်ခွန်စိုက် အသုံးပြုနေကြခြင်း ဖြစ်သည်။ စနစ်တကျရှိသော ခံစစ်အစီအရင်များ၊ အထူးသဖြင့် ဂိုဏ်းတစ်ခု၏ အခြေစိုက်စခန်းကို ကာကွယ်ရန်အတွက် အသုံးပြုသော အစီအရင်များကို အချိန်တိုအတွင်း တည်ဆောက်ရန်မှာ လွန်စွာ ခက်ခဲလှပေသည်။ သို့သော် တိုက်ခိုက်ရေး အစီအရင်များကမူ နေရာအနှံ့တွင် ရှိနေခဲ့ကြသည်။

ယခုအခါ ထိုအစီအရင်၏ ဗဟိုချက်ဆီမှ ပေပေါင်း နှစ်ရာခန့် ရှည်လျားသော ရွှေရောင်ဓားမကြီးသည် ကောင်းကင်ယံထက်သို့ မြင့်မားစွာ ပေါ်ထွက်လာခဲ့သည်။ ၎င်း၏ အလင်းရောင်က ညဉ့်မှောင်မိုက်ကြီးကို အလင်းပေးနေခဲ့တော့သည်။

'ကောင်းကင်ဓားအစီအရင်'

၎င်းသည် ဒုတိယအဆင့်ရှိသော သတ္တုဓာတ်တိုက်ခိုက်ရေး အစီအရင် ဖြစ်သည်။ အကယ်၍ ၎င်းကို အခြေတည်အဆင့် ကျင့်ကြံသူ သုံးဦးက တညီတညွတ်တည်း ပူးပေါင်းထိန်းချုပ်မည်ဆိုပါက ၎င်း၏ စွမ်းအားသည် နှောင်းပိုင်း ကျင့်ကြံသူတစ်ဦး၏ အပြည့်အဝ တိုက်ခိုက်မှုနှင့် တန်းတူရည်တူ ရှိပေသည်။

"သူက အဆင့် (၆) ပဲ ရှိသေးတာလေ...."

ကျင့်ကြံသူတစ်ဦးက သူ၏ အကြည့်များကို ဝတ်ရုံနီဝတ်ဆင်ထားသော လူသားထံတွင် စိုက်ကြည့်ရင်း တိုးညင်းစွာ ရေရွတ်လိုက်သည်။

"အစီအရင်ကို အသက်သွင်းပြီး သူ့ကို အမြန်ဆုံး ရှင်းပစ်ကြစို့...."

အခြားတစ်ဦးက ပြန်ဖြေလိုက်သည်။

"ဒီနေရာက ကိစ္စပြီးရင်.... ငါတို့ ဂိုဏ်းချုပ်ကို သွားပြီး ကူညီရမယ်...."

"ဂိုဏ်းတူညီလေး.... မင်းက ဒီအစီအရင်ကို အကျွမ်းကျင်ဆုံးပဲ၊ နောက်ဆုံး တိုက်ကွက်ကို မင်းပဲ တာဝန်ယူလိုက်...."

"ဟုတ်ကဲ့ပါ.... ဂိုဏ်းတူအစ်ကိုကြီး...."

သူတို့၏ ဆက်သွယ်မှုများသည် လွန်စွာ လျင်မြန်ပြီး ထိရောက်လှပေသည်။ သူတို့သည် ဂိုဏ်းတူညီအစ်ကိုများ ဖြစ်ကြသဖြင့် ငယ်စဉ်ကတည်းက တညီတညွတ်တည်း ပူးပေါင်းဆောင်ရွက်ခဲ့ကြခြင်း ဖြစ်သည်။ အရာအားလုံးကို ကြိုတင်ပြင်ဆင်ထားခဲ့ကြပြီးဖြစ်ရာ၊ အစီအရင်၏ တိုက်ခိုက်ရေးစွမ်းအားသည် အချိန်တိုလေးအတွင်းမှာပင် အထွတ်အထိပ်သို့ ရောက်ရှိသွားခဲ့တော့သည်။

သူတို့သည် ကျွမ်းကျင်လှသော လက်ဟန်များဖြင့် ချီစွမ်းအင်များကို အစီအရင်အတွင်းသို့ စီးဆင်းစေလိုက်ကြသည်။ ရွှေရောင်ဓားမကြီးသည် ပိုမို၍ လင်းထိန်လာခဲ့ပြီး၊ ၎င်း၏ ဓားသွားထက်တွင် သတ်ဖြတ်ခြင်း အငွေ့အသက်များ ပြည့်နှက်သွားခဲ့သည်။ ထို့နောက်တွင်မူ ထို ဧရာမ အလင်းတန်းကြီးသည် အောက်သို့ တရဟော ဖြတ်တောက်ပစ်လိုက်တော့သည်။

၎င်း၏ ပစ်မှတ်မှာမူ အခြားသူ မဟုတ်ဘဲ ဝတ်ရုံနီကို ဝတ်ဆင်ထားသော လူသားသာ ဖြစ်ပေသည်။

ကျန်းယွီလန်၏ မျက်ဝန်းထဲတွင် စိတ်လှုပ်ရှားမှုများ တောက်ပနေခဲ့ပြီး သူ၏ ပါးပြင်များကလည်း ရူးသွပ်မှုများကြောင့် နီမြန်းနေခဲ့သည်။ သူသည် ထိုတိုက်ကွက်ကို ကိုယ်တိုင်ထိန်းချုပ်ထားခြင်းဖြစ်ရာ၊ ၎င်းသည် မည်သည့် အနည်းငယ်မျှ လွဲချော်သွားခြင်း မရှိစေရန် သေချာစွာ ပုံဖော်ထားခဲ့သည်။ ရန်သူက ထွက်ပြေးသည်ဖြစ်စေ သို့မဟုတ် ပြန်လည်ခုခံသည်ဖြစ်စေ ရလဒ်ကမူ တစ်ခုတည်းသာ ရှိရပေမည်။ ၎င်းမှာ သေခြင်းတရားသာ ဖြစ်၏။

သို့သော်လည်း ဝတ်ရုံနီဝတ်ဆင်ထားသော လူသားကမူ ထိုနှစ်ခုစလုံးကို မပြုလုပ်ခဲ့ပေ။

သူသည် နေရာတွင် လုံးဝ မလှုပ်မယှက်ဘဲ မတ်မတ်ရပ်နေခဲ့ပြီး၊ သူ၏ မျက်ဝန်းများသည် ငြိမ်သက်နေသော ရေပြင်အလား တည်ငြိမ်လျက်၊ အပေါ်မှ တရဟော ကျရောက်လာသော ဧရာမ ရွှေရောင်ဓားမကြီးကို အေးဆေးစွာ စိုက်ကြည့်နေခဲ့သည်။ သူ ဝတ်ဆင်ထားသော ဝတ်ရုံနီသည် လေထုထဲတွင် အနည်းငယ် လွင့်မျောနေခဲ့သော်လည်း၊ သူ၏ အမူအရာကမူ လုံးဝ ပြောင်းလဲသွားခြင်း မရှိပေ။ သူ၏ မျက်နှာထက်တွင် ထိတ်လန့်ခြင်း သို့မဟုတ် အံ့ဩခြင်း အရိပ်အယောင်ဟူ၍ လုံးဝ မရှိခဲ့ပေ။ သူသည် ရှောင်တိမ်းရန် မကြိုးပမ်းခဲ့သကဲ့သို့၊ မည်သည့် ကာကွယ်ရေး ရတနာကိုမျှလည်း ဆင့်ခေါ်ခြင်း မပြုခဲ့ပေ။ သူ၏ လက်ကိုသာ ဖြည်းညင်းစွာ မြှောက်လိုက်သည်။

"သူ.... သူ ဘာလုပ်နေတာလဲ...."

ကျန်းယွီလန်က မယုံကြည်နိုင်သည့်အလား တိုးညင်းစွာ ရေရွတ်လိုက်မိသည်။

"သူက.... လက်တစ်ဖက်တည်းနဲ့ ကောင်းကင်ဓားကို ပိတ်ဆို့ဖို့ ကြိုးစားနေတာလား...."

သူ၏ စကားလုံးများ နှုတ်မှ မထွက်ခွာမီမှာပင်၊ ဝတ်ရုံနီဝတ်ဆင်ထားသော လူသား၏ လက်ဝါးပြင်ထက်မှ ချီစွမ်းအင်များက တရဟော ပေါက်ကွဲထွက်ပေါ်လာခဲ့သည်။ နီလာရောင် အလင်းတန်းကြီးတစ်ခု တစ်ဟုန်ထိုး ထွက်ပေါ်လာခဲ့သည်။ တစ်ခဏအတွင်းမှာပင် တောက်ပလှသော နီလာရောင် အလင်းမျက်နှာပြင်ကြီးတစ်ခုက သူ့ရှေ့တွင် ထွက်ပေါ်လာခဲ့ရာ ၎င်းသည် မှန်ချပ်ကြီးတစ်ခုအလား လင်းလက်နေခဲ့သည်။ ရွှေရောင်ဓားမကြီးသည် ထိုနီလာရောင် အတားအဆီးပေါ်သို့ တိုက်ရိုက် ကျရောက် ထိမှန်သွားခဲ့တော့သည်။

ချလွင်....

ဓားသွားနှင့် မှန်ချပ်တို့ ထိခတ်မိသွားခဲ့ကြသော်လည်း၊ မှန်ချပ်က ပိုမို၍ ခိုင်မာကြောင်း သက်သေပြသလိုက်သည်။ ဓားမကြီးသည် လက်မဝက်မျှပင် ဝင်ရောက်နိုင်စွမ်း မရှိခဲ့ပေ။ ၎င်းကို ထောက်ပံ့ပေးမည့် နောက်ထပ်စွမ်းအားများ မရှိတော့သဖြင့် ၎င်းသည် လေထုထဲတွင် ယိမ်းယိုင်သွားခဲ့ပြီးနောက် တဖြည်းဖြည်းနှင့် ပျောက်ကွယ် ပျက်စီးသွားခဲ့ရတော့သည်။

ကျန်းယွီလန် လုံးဝ ဆွံ့အသွားခဲ့ရသည်။ ဤမျှအထိ လွယ်ကူစွာဖြင့် ကောင်းကင်ဓားကို ပိတ်ဆို့နိုင်စွမ်း ရှိသော အတတ်ဟူသည်မှာ မည်သည့်အရာ ဖြစ်ပါသနည်း။

သူ ထပ်မံ၍ တွေးတောခြင်း မပြုနိုင်မီမှာပင် သူ၏ ဘေးနားရှိ ဂိုဏ်းတူအစ်ကိုကြီး၏ ဒေါသတကြီး အော်ဟစ်သံက ထွက်ပေါ်လာခဲ့သည်။

"သတိထား...."

နီရဲလှသော ဓားအလင်းတန်းတစ်ခုသည် ကောင်းကင်ယံမှ သက်ဆင်းလာသော မိုးကြိုးတစ်ခုကဲ့သို့ တစ်ဟုန်ထိုး ပြေးဝင်လာခဲ့ပြီး၊ အစီအရင်၏ ဗဟိုချက်ဆီသို့ တိုက်ရိုက် ဦးတည်နေခဲ့သည်။ ကျန်းယွီလန်၏ မျက်နှာက ချက်ချင်းပင် ဖြူလျော်သွားခဲ့ရပြီး ဘေးဘက်သို့ လျင်မြန်စွာ ခုန်ပျံ ရှောင်တိမ်းလိုက်ရတော့သည်။ နောက်တစ်ခဏအတွင်းမှာပင် စုတ်ပြဲသွားသော အစီအရင် တံဆိပ်များ၏ အသံများနှင့်အတူ ကောင်းကင်ဓားအစီအရင်သည် အပိုင်းပိုင်းအစစ ကွဲအက်ကာ ပြိုလဲပျက်စီးသွားခဲ့ရတော့သည်။

လော့ချန်နှင့် သူ၏စွန့်စားခန်းများ