အခန်း ၄၅၁

🍋 Chapter 451

"တကယ်ကို ရင်နာစရာကောင်းလိုက်တာ..."

ဟယ်ဝေရွှမ်း သက်ပြင်းချလိုက်မိသည်။

ကျိုးထျန်း၏ လက်လွှတ်စပယ် စီမံခန့်ခွဲမှုပုံစံကို မြင်ပြီးနောက် သူသာ ကံကောင်းမှုကြီးမရှိခဲ့လျှင် ဤမျှငွေအမြောက်အမြား ရှိလာလိမ့်မည်မဟုတ်ကြောင်း သူမ သဘောပေါက်သွားခဲ့သည်။

"ကျိုးထျန်း... ငါနင့်ကို ပြောချင်တာက နင့်ရဲ့ရည်မှန်းချက်တွေက တခြားနေရာမှာ ရှိနေမှတော့ ကုမ္ပဏီရဲ့ စီမံခန့်ခွဲမှုအာဏာကို ငါ့လက်ထဲ ဘာလို့ လွှဲမပေးတာလဲ"

"အာ..."

ကျိုးထျန်း ခဏမျှ ကြောင်အသွားသည်။

သူက သူမနှင့် အတူအိပ်ပြီးရုံသာ ရှိသေးသည်၊ သူမက အာဏာသိမ်းရန် ကြံစည်နေပြီလား။

တစ်ဖက်လူက သူ၏ သံသယများကို သိရှိနေသည့်အလား ဆက်လက်ပြောဆိုခဲ့သည်။

"မပူပါနဲ့၊ ငါက အမြင့်ဆုံး စီမံခန့်ခွဲခွင့်အာဏာကိုပဲ လိုချင်တာ... ရှယ်ယာတွေကို မလိုချင်ဘူး၊ ပြီးတော့ ကုမ္ပဏီရဲ့ နေ့စဉ်စီမံခန့်ခွဲမှုတွေမှာလည်း ဝင်ရောက်စွက်ဖက်မှာ မဟုတ်ဘူး"

"ငါက နင့်အတွက် အခြေအနေအရပ်ရပ်ကို ထိန်းချုပ်ပေးရုံတင်ပါ၊ နင့်မှာ ကိုယ်ပိုင်စီမံခန့်ခွဲမှုအဖွဲ့တစ်ခု လိုအပ်တယ်၊ ငါက အဲဒီအဖွဲ့ကို ဖွဲ့စည်းပေးပြီး အဖွဲ့မန်နေဂျာအဖြစ် တာဝန်ယူပေးမယ်"

"နင် သဘောမတူရင်လည်း ငါဘာမှမပြောခဲ့ဘူးလို့ပဲ သဘောထားလိုက်ပါ"

ကျိုးထျန်း ပြုံးလိုက်ပြီး ဟယ်ဝေရွှမ်း၏ ပါးပြင်ကို အသာအယာ တို့ထိလိုက်သည်။

သူ့တွင် ယခုအခါ တျန်းချိုင်နည်းပညာ၊ တျန်းရှီဟွေ၊ ရွှေကုမ္ပဏီနှင့် ကုတ်မီးသွေးကုမ္ပဏီတို့မှ ရှယ်ယာများ၊ အိမ်အနည်းငယ်နှင့် ကျန်ရှိသောအရာများမှာ ဘဏ္ဍာရေးဈေးကွက်ထဲရှိ ငွေသားများသာ ဖြစ်ကြသည်။

သူသည် ဤစီးပွားရေးလုပ်ငန်းများကို စီမံခန့်ခွဲရန် အစီအစဉ်မရှိခဲ့သလို၊ စီမံခန့်ခွဲနိုင်စွမ်းနှင့် အရည်အချင်းလည်း မရှိချေ။

ယခုအခါ ဟယ်ဝေရွှမ်းက သူ့အတွက် စီမံခန့်ခွဲပေးရန် ဆန္ဒရှိနေပြီဖြစ်ရာ သူက သဘာဝကျစွာပင် သဘောတူညီပေလိမ့်မည်။

သူသည် ဟယ်ဝေရွှမ်းကို ကောင်းကောင်း သိထားသည်။

သူမမှာ လောဘကြီးသူ သို့မဟုတ် လှည့်ကွက်သုံးတတ်သူ မဟုတ်ချေ။

သူ၏ ပိုင်ဆိုင်မှုများမှာ ငွေသားများမှလွဲ၍ သူမ၏ ပိုင်ဆိုင်မှုများနှင့် ယှဉ်လျှင် ဘာမှမဟုတ်သေးချေ။

ပေါင်ကော အုပ်စုမှာ သူ့ထက် များစွာ ဩဇာတိက္ကမ ကြီးမားလှသော ဘီလူးကြီးတစ်ကောင် ဖြစ်သည်။

ဟယ်ဝေရွှမ်းသည် သူ့ကို မိသားစုဝင်တစ်ဦးကဲ့သို့ ဆက်ဆံခဲ့ပြီး သူမမှာ ဤအရာများတွင် မွေးရာပါ တော်သူဖြစ်သဖြင့် တာဝန်ကို ကိုယ်တိုင် ရယူလိုခြင်းသာ ဖြစ်သည်။

"သေချာတာပေါ့... ငါနင့်ကို ယုံကြည်တာပေါ့၊ ဒါပေမဲ့ နင့်မှာ အလုပ်တွေ အများကြီး ရှိနေပြီလေ၊ နင် ပိုပြီး ပင်ပန်းသွားမှာကို ငါမလိုလားဘူး"

သူက သူမ၏ ဆံနွယ်များကို အသာအယာ သပ်တင်ပေးလိုက်ရာ သူမ၏ ချိုသာသော အပြုံးကို မြင်တွေ့လိုက်ရသဖြင့် သူမက ဤကဲ့သို့ ပြုံးတတ်သည်ကို သူ သဘောပေါက်သွားခဲ့သည်။

"ရပါတယ်... ဒီအလုပ်တွေက မခက်ခဲပါဘူး၊ ပြီးတော့ ငါက အဖွဲ့တစ်ဖွဲ့ ဖွဲ့စည်းမှာဆိုတော့ ငါတစ်ယောက်တည်း အကုန်လုပ်မှာ မဟုတ်ဘူး”

“ပေါင်ကောရဲ့ အလုပ်တွေကိုလည်း ငါက တဖြည်းဖြည်းချင်း လွှဲပြောင်းပေးမှာပါ၊ တစ်ယောက်တည်း အကုန်လုံးကို ဆုပ်ကိုင်မထားတော့ဘူး"

"ဒီတစ်ခေါက် ဟေးလုံကျန်း ခရီးစဉ်က ငါ့ကို အများကြီး သဘောပေါက်စေခဲ့တယ်၊ အရင်က ငါက အာဏာရှင်ဆန်လွန်းပြီး တခြားသူတွေ ကောင်းကောင်းမလုပ်နိုင်မှာ စိုးရိမ်ခဲ့တယ်”

“အဲ့တာကပဲ သူတို့ရဲ့ ကြီးထွားမှုကို ဟန့်တားစေပြီး ငါ့ကိုပဲ ပိုပြီး ပင်ပန်းစေခဲ့တာ"

"ငါက ကမ္ဘာကြီးကို သိမ်းပိုက်ဖို့အတွက် ငါ့ကို ကူညီပေးမယ့် ကိုယ်ပိုင်အဖွဲ့တစ်ဖွဲ့ တည်ဆောက်ဖို့ အစီအစဉ်ရှိပြီးသားပဲ"

သူမ၏ အလုပ်အစီအစဉ်များကို ပြောနေစဉ်အတွင်း ဟယ်ဝေရွှမ်း၏ မျက်ဝန်းများက တောက်ပနေပြီး အလွန်ပင် တက်ကြွလှုပ်ရှားလာခဲ့သည်။

သေချာပေသည်... သူမမှာ ယခင်အတိုင်း အလုပ်ကြိုးစားလွန်းသူ ဖြစ်နေဆဲပင်။

“ဒါ့အပြင်... အခြားသူတွေက ငါ့အတွက် အလုပ်တွေ ပိုလုပ်ပေးရင် ငါ့မှာ... နင့်အနားမှာ ရှိနေဖို့ အချိန်တွေ ပိုရလာမှာပေါ့”

ဟယ်ဝေရွှမ်းက သူ၏ မျက်ဝန်းများကို စိုက်ကြည့်လိုက်ရာ သူမ၏ အကြည့်ထဲတွင် နူးညံ့မှုများ ပြည့်နှက်နေသည်။

“နင် ဗိုက်ပြည့်ပြီလား”

“ဟင်...”

“ဗိုက်ပြည့်ရင် အထဲကို လာခဲ့ဦးလေ... ခဏလောက် လှဲနေရအောင်”

“ငါ... ငါ ဗိုက်ပြည့်ပါပြီ”

…

ဟေးလုံကျန်း၊ ဆန်းတို့စ်၏ အခြေစိုက်စခန်း။

ဆန်းတို့စ်သည် လက်ရှိတွင် ယခင်မြို့တော်ဝန် ချန်ထားခဲ့သော ဇိမ်ခံအိမ်ကြီးတစ်ခုတွင် နေထိုင်လျက်ရှိသည်။

ထိုအိမ်ကြီးမှာ အလွန်ကြီးမားပြီး ခမ်းနားထည်ဝါလှရာ ပတ်ဝန်းကျင်ရှိ နောက်ကျကျန်နေသော လမ်းပန်းဆက်သွယ်ရေးနှင့် အိမ်ခြေများနှင့် လုံးဝဥဿုံ ဆန့်ကျင်ဘက်ဖြစ်နေသည်။

ဒေသတစ်ခုက ပိုမိုဆင်းရဲလေလေ၊ ချမ်းသာသူနှင့် ဆင်းရဲသူကြား ကွာဟချက်က ပိုမိုကြီးမားလေလေပင်။

ဤအိမ်ကြီး၏ ကောင်းမွန်သော အချက်တစ်ခုမှာ ၂ မီတာ မြင့်သော တံတိုင်းပါရှိပြီး လျှပ်စစ်ဓာတ်အား အပြည့် တပ်ဆင်ထားသဖြင့် လုံခြုံရေးအတွက် အလွန် အကျိုးရှိလှပေသည်။

တစ်ချိန်တည်းမှာပင် အဆောက်အအုံ၏ မြေအောက်ခန်းထဲတွင် ပြည့်စုံသော ဆေးဘက်ဆိုင်ရာ စနစ်တစ်ခု ပါရှိသဖြင့် မူရင်းပိုင်ရှင်မှာ ဖျားနာခြင်း သို့မဟုတ် တိုက်ခိုက်ခံရခြင်းမျိုး ကြုံတွေ့ရပါက ဆေးအဖွဲ့ထံမှ ဆေးကုသမှုကို အမြန်ဆုံး ခံယူနိုင်ရန် ဖြစ်သည်။

ဤဒေသ၏ ကီလိုမီတာ ဒါဇင်ပေါင်းများစွာအတွင်း အရည်အသွေးပြည့်မီသော ဆေးရုံတစ်ရုံမျှ မရှိဘဲ၊ အများဆုံးအားဖြင့် အအေးမိပျောက်ဆေးနှင့် အကြောဆေးသွင်းပေးနိုင်သော ဆေးခန်းအသေးစားလေးအချို့သာ ရှိသောကြောင့်ပင်။

ယနေ့ မြေအောက် ခွဲစိတ်ခန်းအတွင်းရှိ တစ်ခုတည်းသော ခွဲစိတ်ကုတင်ပေါ်တွင်မူ ထူးခြားသော ဧည့်သည်တော်တစ်ဦး လဲလျောင်းနေခဲ့သည်။

ထိုသူမှာ မစ္စတာ ကာတာ ပင်ဖြစ်၏။

ထွားကျိုင်းသော လူမည်းကြီး ဆန်းတို့စ် ဦးဆောင်သည့် အစိုးရသက်တော်စောင့် အရာရှိတစ်စုသည် သူ့အား လာရောက်ခေါ်ဆောင်ရန် မြေအောက်ခန်းသို့ ရောက်ရှိလာခဲ့ကြသည်။

ဂျန်ဝေကုန်းနှင့် ကျိုးထျန်းတို့၏ သဘောတူညီချက်အရ ကာတာကို နောက်ဆုံးတွင် ၎င်းတို့ကသာ ကိုင်တွယ်ဖြေရှင်းမည်ဖြစ်သည်။

ကာတာ၏ လူများနှင့်ပတ်သက်၍မူ ၎င်းတို့မှာ လက်ရှိတွင် ကျောက်တွင်း၌ သံခြေချင်းများ ခတ်ခံထားရကာ တစ်နေ့လျှင် ထမင်းတစ်နပ်သာ ကျွေးမွေးပြီး အလုပ်လုပ်ကိုင်နေကြရပြီဖြစ်သည်။

ဆန်းတို့စ်မှ အားလုံးကို ယဉ်ကျေးပျူငှာစွာ နှုတ်ဆက်လိုက်သည်။

လွန်ခဲ့သည့် ရက်အနည်းငယ်အတွင်း နှစ်ဖက်စလုံးမှာ စကားအမြောက်အမြား ဖလှယ်ခဲ့ကြပြီး နှစ်ဦးစလုံးမှာ တစ်ယောက်၏ အမူအရာအပေါ် တစ်ယောက်က တော်တော်လေး ကျေနပ်နေကြသည်။

အစိုးရသက်တော်စောင့်များမှာ ဆန်းတို့စ်၏ ရက်ရောမှုနှင့် ယုံကြည်မှုတို့အပေါ် အလွန်အံ့ဩမိကြသည်။

ဤအပေါ်ယံတွင် ရိုးအပုံရသော လူမည်းကြီးမှာ အမှန်တကယ်၌ အလွန် စေ့စပ်သေချာလှပြီး သူ၏ ဝဲပျက်ပျက်နှင့် တရုတ်စကားပြောဆိုမှု၊ တရုတ်နိုင်ငံအပေါ် သာမန်လူမည်းများထက် ပိုမိုနက်ရှိုင်းစွာ နားလည်ထားမှုတို့ကြောင့် ဆက်သွယ်ပြောဆိုရသည်မှာ အလွန် ချောမွေ့လှပေသည်။

၎င်းတို့ အလေးစားဆုံးသူမှာ ကျိုးထျန်းပင် ဖြစ်သည်။

ကျိုးထျန်းသည် မိုင်ပေါင်းထောင်ချီ ဝေးကွာသော အရပ်ရှိ ဤကဲ့သို့ စစ်ဘုရင်တစ်ဦးကို သူ့စကား နားထောင်လာအောင် မည်သို့ လုပ်ဆောင်ခဲ့သည်ကို ၎င်းတို့ ယခုထိ နားမလည်နိုင်သေးချေ။

ခွဲစိတ်ခန်းသို့ ချဉ်းကပ်လာသည်နှင့်အမျှ ပြင်းထန်သော ပိုးသတ်ဆေးနံ့က ၎င်းတို့၏ နှာခေါင်းထဲသို့ အလုံးအရင်း ဝင်ရောက်လာသဖြင့် အစိုးရသက်တော်စောင့်အဖွဲ့ခေါင်းဆောင်မှာ မိမိပါးစပ်ကို မတတ်သာဘဲ အုပ်လိုက်ရတော့သည်။

ခွဲစိတ်ကုတင်ပေါ်တွင်မူ မေ့ဆေးရှိန် မပြယ်သေးသဖြင့် ကာတာမှာ သတိမေ့မြောနေဆဲဖြစ်ကာ အဖြူရောင် စာရွက်တစ်ရွက်ဖြင့် ဖုံးအုပ်ထားပြီး ဘေးတွင် အကြောဆေးသွင်းသည့် တိုင်တစ်ခု ရှိနေသည်။

အစိုးရသက်တော်စောင့်က အကြောဆေးပုလင်းကို လှမ်းကြည့်လိုက်ရာ ၎င်းမှာ ပဋိဇီဝဆေး ဖြစ်နိုင်သည်ဟု တွေးလိုက်မိသည်။

၎င်းတို့ ဇဝေဇဝါ ဖြစ်သွားကြသည်။

၎င်းတို့ သိထားသမျှအရ ကာတာသည် ကယ်ဆယ်ရေးလုပ်ငန်းစဉ်အတွင်း မည်သည့် ဒဏ်ရာမျှ မရရှိခဲ့ချေ။

ခွဲစိတ်ကုသမှု ခံယူရခြင်း၏ အဓိကအကြောင်းရင်းမှာ သူအဖမ်းခံရပြီးနောက် ပြင်းထန်စွာ အရိုက်အနှက် ခံခဲ့ရခြင်းကြောင့် ဖြစ်တန်ရာသည်။

မည်မျှပင် အေးအေးဆေးဆေး ရှိလှသော စစ်ဘုရင်ဖြစ်ပါစေ စစ်ဘုရင်သည် စစ်ဘုရင်သာ ဖြစ်သဖြင့် သူ၏ နည်းလမ်းများမှာ တကယ်ကို ရက်စက်လှပေသည်။

သို့သော် သူသည် မိမိ၏ ခေါင်းဆောင် ဂျန်ဝေကုန်း၏ ညွှန်ကြားချက်ကို သတိရလိုက်သည်။

လူတစ်ယောက် အသက်ရှင်နေသရွေ့ မည်သည့် ကုသမှုမျိုး ခံယူရပါစေ မည်သူမျှ ကန့်ကွက်ရန် မလိုဟူသော အချက်ပင်။

ဤလူက ယင်းနှင့် ထိုက်တန်လှပေသည်။

သူက မြို့တော်တွင် နိုင်ငံတကာအဆင့် အဖြစ်အပျက်တစ်ခုကို ဖန်တီးခဲ့သဖြင့် ၎င်းတို့ကဲ့သို့သော အခြေခံစစ်သည်များမှာ ရက်သတ္တပတ် တစ်ဝက်ခန့် ဆက်တိုက် အချိန်ပို အလုပ်လုပ်ခဲ့ရသည် မဟုတ်ပါလား။

"မစ္စတာဆန်းတို့စ်... သဘောတူညီချက်အရ ငါတို့ ဒီလူကို ခေါ်သွားရပါမယ်"

"ပြဿနာမရှိပါဘူး... အခုပဲ ခေါ်သွားလို့ရပါပြီ"

ဆန်းတို့စ်က ပျော်ရွှင်စွာ ဖြဲပြုံးပြုံးလိုက်ပြီး ကာတာကို ဖုံးအုပ်ထားသည့် အဖြူရောင်စာရွက်ကို အသာအယာ မလိုက်သည်။

လာရောက်ခေါ်ဆောင်သော အစိုးရသက်တော်စောင့်များမှာ ဆေးရုံကုတင်ပေါ်ရှိ ကာတာကို မြင်လိုက်ရသောအခါ မျက်သူငယ်အိမ်များ ကျုံ့သွားကြပြီး အချို့မှာ အသက်ရှူပင် မှားသွားကြရှာသည်။

ကာတာသည် ခွဲစိတ်ကုတင်ထက်တွင် လဲလျောင်းနေပြီး သူ၏ ခန္ဓာကိုယ် နေရာအတော်များများတွင် ပတ်တီးများ စည်းထားခဲ့သည်။

ဝမ်းဗိုက်၊ ပေါင်ခြံ၊ ဒူး၊ လက်ကောက်ဝတ်၊ လည်ချောင်း...

အစိုးရသက်တော်စောင့်များ၏ တုံ့ပြန်မှုကို မြင်သောအခါ ဆန်းတို့စ်က ၎င်းတို့၏ ပုခုံးကို ပုတ်ကာ ရက်စက်သော အပြုံးဖြင့် ပြောလိုက်သည်။

"ဒီကောင် ဘယ်တော့မှ စကားပြန်ပြောနိုင်မှာ မဟုတ်တော့ဘူး၊ သူ့ရဲ့ အသံကြိုးတွေကို ဖြတ်ပစ်လိုက်ပြီ... ဒါကြောင့် သူ မဆီမဆိုင် စကားတွေ ပြောမှာကို မစိုးရိမ်ပါနဲ့တော့"

"ပြီးတော့... သူ ဘယ်တော့မှ ပြန်မတ်တပ်ရပ်နိုင်မှာ မဟုတ်သလို၊ စာလည်း မရေးနိုင်တော့ဘူး"

"ဒါပေမဲ့ သူ့ရဲ့ စွန့်ပစ်ပစ္စည်း ကိစ္စကတော့ နောက်ပိုင်း မင်းတို့အတွက် ဒုက္ခဖြစ်လိမ့်မယ်။ ငါတို့က သူ့ရဲ့ အစာခြေစနစ်ကို ဖယ်ရှားပစ်လိုက်လို့ သူ့ရဲ့ ခါးမှာ အိမ်သာအိတ်တစ်ခု တပ်ထားရလိမ့်မယ်"

"အော်... ပြီးတော့ အရေးကြီးဆုံးကတော့ ငါတို့ သူ့ကို မျိုးပွားအင်္ဂါ ဖြတ်တောက်လိုက်ပြီ... ဒါကြောင့် သူ ဘယ်တော့မှ အမျိုးသမီးတွေကို ထပ်ပြီး ဒုက္ခပေးနိုင်မှာ မဟုတ်တော့ဘူး"

ဤအရာမှာ ကာတာက သူ၏ ဘော့စ်၏ အမျိုးသမီးကို ထိပါးရန် ကြိုးစားခဲ့သည့်အတွက် အသေးစား အပြစ်ပေးမှုတစ်ခုသာ ဖြစ်သည်။

ကျန်ရှိသော အပိုင်းများမှာမူ ဆန်းတို့စ်အား ဖမ်းဆီးခြင်း၊ ပြန်ပေးဆွဲခြင်းနှင့် သတ်ဖြတ်ရန် ကြိုးစားခြင်းတို့အတွက် ပြန်လည်တုံ့ပြန်မှု ဖြစ်သည်။

သွေးကြွေးကို သွေးဖြင့်ဆပ်ရမည်။

ဤမြေပြင်ပေါ်ရှိ လူတိုင်းက ယင်းကို ယုံကြည်ကြသဖြင့် ၎င်းက တရားမျှတလှပေသည်။

ဆန်းတို့စ်၏ မာနထောင်လွှားသော အမူအရာကို မြင်လိုက်ရသောအခါ အစိုးရသက်တော်စောင့်များ တံတွေးကို အနိုင်နိုင် မျိုချလိုက်ရတော့သည်။

၎င်းတို့သည် ကာတာ၏ မျက်နှာပေါ်တွင် "အလွန်သနားစရာကောင်းသည်" ဟူသော စာသားကိုသာ ရေးလိုက်ချင်တော့သည်။