အခန်း ၉၃၆

အခန်း (၉၃၆) - ထွက်ပြေးချင်နေတာလား၊ သေခါနီး ရုန်းကန်မှု

(အပိုင်း -၂)

"ရှာတွေ့သွားပြီ"

စုယွီသည် ခေါင်းကို ဖွဖွယမ်းလိုက်ပြီးနောက် စံအိမ်သခင် ဖန်ရှောင်ဘက်သို့ လှည့်ကာ မေးမြန်းလိုက်လေသည်။

"စံအိမ်သခင်... ဒီပစ္စည်းတွေနဲ့ဆိုရင် တာ့ချန် အင်မော်တယ် မဟာမိတ်အဖွဲ့ရဲ့ အင်အားတွေကို စုစည်းပြီး မိုးကြိုး နဂါး အင်မော်တယ်မင်းဆက်နဲ့ တာ့ယန် အင်မော်တယ်မင်းဆက်ကို တန်ပြန်တိုက်ခိုက်ဖို့ ဖြစ်နိုင်ပါ့မလား"

ဖန်ရှောင်၏ မျက်ဝန်းများအတွင်း အလင်းရောင်တစ်ချက် လက်ခနဲ တောက်ပသွားပြီးနောက် နက်ရှိုင်းစွာ တွေးတောဟန်ဖြင့် မျက်မှောင်ကြုတ်သွား၏။

အစောပိုင်း ကာလများက မြေကမ္ဘာအင်မော်တယ်စံအိမ် အနေဖြင့် တာ့ချန် အင်မော်တယ် မဟာမိတ်အဖွဲ့၏ အင်အားစုများကို လှုံ့ဆော်၍ မိုးကြိုး နဂါး အင်မော်တယ်မင်းဆက်နှင့် တာ့ယန် အင်မော်တယ်မင်းဆက်တို့၏ တိုက်ခိုက်မှုများကို ခုခံရန် စစ်တပ်များ စုစည်းနိုင်စွမ်း ရှိခဲ့ပေသည်။

သို့သော်ငြား စစ်ပွဲအခြေအနေမှာ တစ်စထက်တစ်စ ပိုမို ဆိုးရွားလာခဲ့ပြီး ကြီးမားလှသော အထိအခိုက် အကျအဆုံးများကို ရင်ဆိုင်ခဲ့ရပြီးနောက်တွင်မူကား မြေကမ္ဘာအင်မော်တယ်စံအိမ်သည် ထိုမင်းဆက်နှစ်ခု၏ အပြည့်အဝ ဖိနှိပ်ချုပ်ချယ်ခြင်းကို ခံလိုက်ရတော့သည်။

တာ့ချန် အင်မော်တယ် မဟာမိတ်အဖွဲ့မှ အခြားသော အင်အားစုများမှာလည်း နောက်ဆုတ်လိုသည့် အရိပ်အယောင်များကို ပြသနေခဲ့ကြပြီ ဖြစ်လေသည်။

ယခုအချိန်တွင် သူတို့ အကောင်းဆုံး စွမ်းဆောင်နိုင်သည်ဆိုလျှင်ပင် ထိုမင်းဆက်ကြီး နှစ်ခုကို အနည်းငယ် ဟန့်တားထားနိုင်ရုံမျှသာ တတ်စွမ်းနိုင်တော့၏။

တာ့ချန် အင်မော်တယ် မဟာမိတ်အဖွဲ့၏ အစည်းအဝေးကို ပြန်လည်ခေါ်ယူကာ မြေကမ္ဘာအင်မော်တယ်စံအိမ်အား ကူညီရန်အတွက် သူတို့၏ အသက်သွေးချွေးများကို စတေးခိုင်းရန်ဆိုသည်မှာ အချည်းနှီးသော စိတ်ကူးယဉ်မှု သက်သက်မျှသာ။

ယခု စုယွီက မြေကမ္ဘာအင်မော်တယ်စံအိမ် အတွက် ထပ်မံထုတ်ပေးလိုက်သော အဖိုးတန် ရတနာများ ရှိနေသော်ငြားလည်း ထိုအချက်က ပြောင်းလဲသွားမည် မဟုတ်ပါ။

ဖန်ရှောင်က လေးနက်တည်ကြည်သော လေသံဖြင့် ပြန်လည်ပြောဆိုလိုက်သည်။

"ခက်ခဲလိမ့်မယ်... ဆရာ ပျောက်ဆုံးသွားပြီးကတည်းက တာ့ချန် အင်မော်တယ် မဟာမိတ်အဖွဲ့ အပေါ်မှာရှိတဲ့ မြေကမ္ဘာအင်မော်တယ်စံအိမ်ရဲ့ သြဇာလွှမ်းမိုးမှုက တဖြည်းဖြည်း အားနည်းလာခဲ့တယ်... ပြီးတော့ အဲဒီ အင်မော်တယ်ဂိုဏ်းတွေက ဂိုဏ်းချုပ်တွေနဲ့ တာအိုသခင်ကြီးတွေက ကျွန်မရဲ့ အာဏာကို အသိအမှတ် မပြုကြတော့ဘူး"

"အင်မော်တယ်ဂိုဏ်း ဘယ်လောက်တောင် ကျဆင်းသွားပြီလဲ ဆိုတာကိုပါ ထည့်စဉ်းစားကြည့်မယ် ဆိုရင်..."

ဟူ၍ ပြောရင်း သူမက စုယွီဘက်သို့ လှမ်းကြည့်ကာ တိုးညင်းစွာ ဆက်ပြောလိုက်သည်။

"ဦးလေးငယ်... ကျွန်မတို့ မြေကမ္ဘာအင်မော်တယ်စံအိမ်မှာ တိုက်ခိုက်နိုင်စွမ်း ရှိသေးတယ်ဆိုတာကို သူတို့ မြင်တွေ့သွားအောင် ဦးလေးငယ် ပြသနိုင်မှသာ ဖြစ်လိမ့်မယ်"

"မိုးကြိုး နဂါး အင်မော်တယ်မင်းဆက်နဲ့ တာ့ယန် အင်မော်တယ်မင်းဆက်ကို အနိုင်ယူနိုင်မယ့် မျှော်လင့်ချက် ရှိနေသေးတယ်ဆိုတာကို သူတို့ မြင်တွေ့သွားခဲ့မယ် ဆိုရင်တော့..."

"အဲဒီအခါကျရင် ပြင်ပရန်သူတွေကို ချေမှုန်းဖို့ ကျွန်မတို့ မြေကမ္ဘာအင်မော်တယ်စံအိမ်နဲ့ လက်တွဲပြီး သူတို့လည်း ပါဝင်လှုပ်ရှားလာနိုင်ကောင်း ပါရဲ့"

စုယွီ ခေတ္တမျှ တွေသွားလေသည်။

'ဒီလိုဆိုရင် တာ့ချန် အင်မော်တယ် မဟာမိတ်အဖွဲ့ကို နောက်တစ်ကြိမ် ပြန်လည် ကွပ်ကဲ အုပ်ချုပ်နိုင်ဖို့ အတွက် မြေကမ္ဘာအင်မော်တယ်စံအိမ်ရဲ့ ထိတ်လန့် တုန်လှုပ်ဖွယ်ရာ ဂုဏ်သတင်းကို ပြန်လည် တည်ဆောက်ဖို့ လိုအပ်နေတာပေါ့လေ'

ထို့နောက် သူက တိလင် အင်မော်တယ်မြို့တော် နှင့် အင်မော်တယ်ဂိုဏ်း ပတ်ဝန်းကျင် နယ်မြေများ၏ မြေပုံကို ထုတ်ယူရန် ဖန်ရှောင်အား ပြောလိုက်သည်။ ထို့နောက် မြေကမ္ဘာ

အင်မော်တယ်စံအိမ်နှင့် တိလင် အင်မော်တယ်မြို့တော် တို့ကို ဝိုင်းရံ ပိတ်ဆို့ထားသည့် မိုးကြိုး နဂါး အင်မော်တယ်မင်းဆက် နှင့် တာ့ယန် အင်မော်တယ်မင်းဆက် တို့၏ စစ်ရေးအင်အားများကို မြေပုံပေါ်တွင် အမှတ်အသား ပြုလုပ်ရန် ညွှန်ကြားလိုက်လေသည်။

လက်ရှိအချိန်တွင် မိုးကြိုး နဂါး အင်မော်တယ်မင်းဆက်နှင့် တာ့ယန် အင်မော်တယ်မင်းဆက်တို့၏ ကြီးမားလှသော စစ်သည်အင်အားများမှာ တိလင် အင်မော်တယ်မြို့တော် ၏ ပတ်ဝန်းကျင်တွင် စုစည်းနေကြသည်။

၎င်းတို့သည် မြေကမ္ဘာအင်မော်တယ်စံအိမ်ဂိုဏ်းအား အပြည့်အဝ ဝိုင်းရံ၍ အမြစ်ပြတ် မချေမှုန်းမီ တိလင် အင်မော်တယ်မြို့တော် ကို အရင်ဆုံး ရှင်းလင်းရန် စီစဉ်ထားကြခြင်း ဖြစ်၏။

ထို အင်အားကြီး မင်းဆက်နှစ်ခုသည် မြေကမ္ဘာအင်မော်တယ်စံအိမ်ကို ချေမှုန်းရန် လက်တွဲထားခဲ့ကြသော်ငြားလည်း တစ်သားတည်း ပေါင်းစည်းထားခြင်း မရှိဘဲ တပ်စခန်း နှစ်ခုအဖြစ် ကွဲပြားနေကြလေသည်။ မိုးကြိုး နဂါး အင်မော်တယ်မင်းဆက်က တိလင် အင်မော်တယ်မြို့တော်၏ အရှေ့ဘက်နှင့် တောင်ဘက်ခြမ်းတို့ကို ဝိုင်းရံထားပြီး၊ တာ့ယန် အင်မော်တယ်မင်းဆက်ကမူ မြောက်ဘက်ခြမ်းကို လွှမ်းခြုံ ပိတ်ဆို့ထားသည်။

ကျန်ရှိနေသော အနောက်ဘက်ခြမ်းမှာကား မြေကမ္ဘာအင်မော်တယ်စံအိမ်ဂိုဏ်းသို့ ဦးတည်သွားသော လမ်းကြောင်းပင်။

တိလင် အင်မော်တယ်မြို့တော်၏ အခြေအနေကို ရှင်းပြရင်း ဖန်ရှောင်က ပြောလာခဲ့သည်။

"တာ့ယန် အင်မော်တယ်မင်းဆက် က တိလင် အင်မော်တယ်မြို့တော် ရဲ့ ဒီဘက်ခြမ်းမှာ တပ်မကြီး တစ်ခု ချထားတယ်... အဲဒီတပ်မကြီးကို တပ်ဖွဲ့ နှစ်ခု ခွဲထားပြီး နေ့စဉ်ရက်ဆက် တိလင် အင်မော်တယ်မြို့တော် ကို အလှည့်ကျ ဝင်တိုက်နေကြတာပဲ... မြို့တော်ရဲ့ သက်ရှိ အင်အားတွေသာမက ရိက္ခာတွေနဲ့ အရင်းအမြစ်တွေကိုပါ ဖြုန်းတီးပစ်ဖို့ ရည်ရွယ်ထားပြီး ကျွန်မတို့ရဲ့ အာရုံကို လွှဲဖို့ အဓိက လုပ်ဆောင်နေကြတာ"

ဖန်ရှောင်က ဆက်လက် ရှင်းပြလာသည်။

"တိလင် အင်မော်တယ်မြို့တော် အတွက် အကြီးမားဆုံး အန္တရာယ်ကတော့ မိုးကြိုး နဂါး အင်မော်တယ်မင်းဆက် ရဲ့ စစ်တပ်ဆီကနေ လာတာပဲ... စစ်သည်အင်အား ငါးသောင်းလောက်က မြို့တော်ကို အလှည့်ကျ ထိုးစစ်ဆင် တိုက်ခိုက်နေကြတယ်"

"အင်မော်တယ်ဂိုဏ်းက ဘိုးဘေးတွေဟာ တိလင် အင်မော်တယ်မြို့တော် ထဲမှာ ခိုင်မာတဲ့ အခြေခံအုတ်မြစ်တွေကို တစ်ခုပြီးတစ်ခု ချန်ရစ်ပေးခဲ့လို့သာပေါ့... မဟုတ်ရင် မြို့တော်က အခုလောက်ဆို ကျဆုံးသွားလောက်ပြီ"

ကြီးမားလှသော စစ်သည်အင်အားများအပြင် တာ့ယန် အင်မော်တယ်မင်းဆက် ဘက်တွင် ဤနေရာ၌ တာအိုသခင်ကြီး လေးပါး ရှိနေပေသည်။

အခြားတစ်ဖက်ရှိ မိုးကြိုး နဂါး အင်မော်တယ်မင်းဆက် တွင်မူ တာအိုသခင်ကြီး ရှစ်ပါး ရှိနေ၏။ ထိုအထဲတွင် ပကတိဟင်းလင်းပြင်အဆင့် (၈) သို့ ရောက်ရှိနေသော အထွတ်အထိပ် တာအိုသခင်ကြီး တစ်ပါးပင် ပါဝင်နေသေး၏။

ဤမျှလောက် ကြောက်မက်ဖွယ် ကောင်းသော အင်အားစုကြီးကို မြေကမ္ဘာအင်မော်တယ်စံအိမ် အနေဖြင့် မည်ကဲ့သို့ တန်ပြန် တိုက်ခိုက်နိုင်ပါမည်နည်း။

အကယ်၍ မြေကမ္ဘာအင်မော်တယ်စံအိမ်တွင် စုယွီ ချန်ရစ်ခဲ့သော ကောင်းကင်ပင့် ရွှေချို ဆုတောင်း ဆင်သားရဲကြီး မရှိခဲ့ပါလျှင်၊ ထို တာအိုသခင်ကြီးများကို သတိထား တွန့်ဆုတ်သွားစေနိုင်မည် မဟုတ်ဘဲ မြေကမ္ဘာအင်မော်တယ်စံအိမ်ဂိုဏ်းမှာလည်း ယခုအချိန်ဆိုလျှင် အပျက်အစီး အဆောက်အအုံများအဖြစ်သို့ ပြောင်းလဲသွားလောက်ပြီ။

စုယွီ၏ မျက်လုံးများက မိုးကြိုး နဂါး အင်မော်တယ်မင်းဆက်၏ တပ်စွဲထားရာ နေရာမှသည် တာ့ယန် အင်မော်တယ်မင်းဆက်၏ နေရာဆီသို့ စူးစူးရဲရဲ ကြည့်လိုက်သည်။

တာ့ယန် အင်မော်တယ်မင်းဆက်ကို ရင်ဆိုင် ဖြေရှင်းရသည်က ပို၍ လွယ်ကူလိမ့်မည်ဟု သူ ခံစားလိုက်ရ၏။

'ပျော့တဲ့ သစ်သီးကို ရွေးပြီး ညှစ်ရမှာပေါ့'

အကယ်၍ ဤတစ်ကြိမ်တွင် သူတို့အနေဖြင့် တာ့ယန် အင်မော်တယ်မင်းဆက် အပေါ်သို့ ကြီးမားလှသော ထိခိုက်ဆုံးရှုံးမှုများ ဖြစ်ပေါ်စေနိုင်မည်။ သူတို့၏ တာအိုသခင်ကြီး တစ်ပါး၊ နှစ်ပါးခန့်ကို ဖမ်းဆီးနိုင်မည် ဆိုပါက... တာ့ချန် ကျင့်ကြံခြင်းကမ္ဘာ အပေါ် ပို၍ တိတိကျကျ ဆိုရလျှင် မြေကမ္ဘာအင်မော်တယ်စံအိမ် အပေါ် ကျရောက်နေသော တာ့ယန် အင်မော်တယ်မင်းဆက်၏ ခြိမ်းခြောက်မှုများကို အကြီးအကျယ် လျှော့ချပစ်နိုင်မည်ပင်။

သေချာစွာ တွေးတော စဉ်းစားပြီးနောက် စုယွီက ဆုံးဖြတ်ချက်ချကာ ပြောလိုက်သည်။

"ငါ အရင်ဆုံး ကောင်းကင်ပင့် ရွှေချို ဆုတောင်း ဆင်သားရဲကြီး ကို အပြင်ထုတ်သွားမယ်... ပြီးရင် အပြင်ဘက်က စိတ်ဝိညာဉ်ကြော ရဲ့ စွမ်းအားကို သုံးပြီး သူ့ရဲ့ တိုက်ခိုက်ရေးစွမ်းရည်ကို ပြန်လည်ဖြည့်တင်းပေးမယ်"

"ကောင်းကင်ပင့် ရွှေချို ဆုတောင်း ဆင်သားရဲကြီး ရဲ့ စွမ်းအားတွေ အပြည့်အဝ ပြန်လည် ပြည့်ဝလာပြီ ဆိုတာနဲ့ ငါတို့ မြေကမ္ဘာအင်မော်တယ်စံအိမ် တစ်ခုလုံး အင်အားအပြည့်နဲ့ ထွက်တိုက်မယ်... မိုးကြိုး နဂါး အင်မော်တယ်မင်းဆက် က လူတွေကို ကြားဖြတ် ဟန့်တားထားပြီး၊ တာ့ယန် အင်မော်တယ်မင်းဆက် က လူတွေဆီကို အကြီးစား ထိခိုက်ဆုံးရှုံးသွားအောင် လုပ်ပြီး သူတို့ကို လုံးဝ ချေမှုန်းပစ်မယ်"

စုယွီက သူ ဖန်တီးထားခဲ့သော အဆင့်နိမ့် အဆင့်(၅) အဆောင်လက်ဖွဲ့များကို ထုတ်ယူလိုက်လေသည်။ အဆင့်နိမ့် အဆင့်(၅) ကြေးမုံလမင်း အဆောင်လက်ဖွဲ့ တစ်ခုသည် ဝိညာဉ်ခွဲထွက်အဆင့် ကျင့်ကြံသူများ အပေါ်တွင်ပင် ထိရောက်မှု ရှိနိုင်စွမ်း ရှိပြီး၊ အဆင့်နိမ့် အဆင့်(၅) ကြေးမုံလမင်း အဆောင်လက်ဖွဲ့ အများအပြားကိုသာ တစ်ပြိုင်နက်တည်း အသုံးပြုလိုက်မည် ဆိုပါက... ဝိညာဉ်ခွဲထွက်အဆင့် နှောင်းပိုင်း ကျင့်ကြံသူများကိုပင်လျှင် တစ်ခဏမျှ ချုပ်နှောင်ထားနိုင်စွမ်း ရှိသည်။

ထို့နောက်တွင်မူ လခြမ်းကွေး အဆောင်လက်ဖွဲ့များနှင့် အခြားသော တိုက်ခိုက်ရေး အဆောင်လက်ဖွဲ့များကို ထုတ်ယူလိုက်ပြန်သည်။

သို့သော်ငြား စုယွီအတွက်တော့ ဤတိုက်ပွဲ၏ အဓိက သော့ချက်မှာ အဆင့်နိမ့် အဆင့်(၅) ဝမ်ယင်း အဆောင်လက်ဖွဲ့များပင် ဖြစ်ချေလိမ့်မည်။

အဘယ်ကြောင့်ဆိုသော် အဆင့်နိမ့် အဆင့်(၅) ဝမ်ယင်း အဆောင်လက်ဖွဲ့ တစ်ခုသည် ဝိညာဉ်ခွဲထွက်အဆင့် ကနဦးအဆင့်ရှိ စက္ကူကိုယ်ပွား တစ်ခုနှင့် တူညီနေသောကြောင့်ပင်။ ထိုကိုယ်ပွားက အချိန်ကြာမြင့်စွာ မခံနိုင်သော်ငြားလည်း၊ မှော်စွမ်းအား အနည်းငယ်ကို ထုတ်လွှတ်နိုင်စွမ်း ရှိသည်အထိတော့ တောင့်ခံထားနိုင်စွမ်း ရှိပါသည်။

ဝမ်ယင်း အဆောင်လက်ဖွဲ့ တစ်ခုက ကိုယ်ပွားတစ်ခုနှင့် ညီမျှနေပါက မျက်စိတစ်မှိတ်အတွင်း အဆောင်လက်ဖွဲ့ ဆယ်ခု သို့မဟုတ် တစ်ရာခန့်ကို တစ်ပြိုင်နက်တည်း အသုံးပြုလိုက်မည် ဆိုလျှင် မည်သို့ ဖြစ်သွားမည်နည်း။

စုယွီက အဆင့်နိမ့် အဆင့်(၅) ဝမ်ယင်း အဆောင်လက်ဖွဲ့များကို တာအိုဆရာ ထျန်းယွီ၊ ဆရာသခင်ကြီး ထိုက်ရှီး နှင့် အခြားသူများထံသို့ ခွဲဝေပေးလိုက်လေသည်။ ရွှေဝိညာဉ် မိစ္ဆာအရှင်သခင် အတွက်ကတော့ မလိုအပ်ခဲ့ပါချေ။

"အဆောင်လက်ဖွဲ့တွေကို သုံးဖို့ နှမြောမနေကြနဲ့... အကုန်လုံး ကုန်သွားရင်တောင် ကိစ္စမရှိဘူး... မိုးကြိုး နဂါး အင်မော်တယ်မင်းဆက် နဲ့ တာ့ယန် အင်မော်တယ်မင်းဆက် ကို တွန်းလှန် ချေမှုန်းနိုင်သရွေ့ ဒါက ကျွန်တော်တို့အတွက် ကြီးမားတဲ့ အောင်ပွဲကြီးပဲ"

"အချိန် သိပ်မကြာခင်မှာပဲ ကျွန်တော်တို့ လက်ထဲမှာ ဒီထက်ပိုပြီး များပြားတဲ့ အဆောင်လက်ဖွဲ့တွေ ထပ်ရလာဦးမှာပါပဲ"

ထို့နောက်တွင်တော့ ကျန်ရှိနေသေးသော အဆင့်(၃) နှင့် အဆင့်(၄) အဆောင်လက်ဖွဲ့များ အားလုံးကို အင်မော်တယ်ဂိုဏ်း၏ ကျင့်ကြံသူများနှင့် မြေကမ္ဘာအင်မော်တယ် စစ်တပ်များကြား ခွဲဝေပေးနိုင်ရန် ဖန်ရှောင်ထံသို့ အပ်နှင်းလိုက်လေတော့သည်။

ဤတိုက်ပွဲသည် မြေကမ္ဘာအင်မော်တယ်စံအိမ် အတွက် အသက်ရှင်ခြင်းနှင့် သေဆုံးခြင်းကို အဆုံးအဖြတ်ပေးမည့် ပွဲစဉ်တစ်ပွဲပင် ဖြစ်ချေတော့သည်။

“ဝှစ်…”

ဖန်ရှောင်နှင့် အခြားသူများထံ အရင်းအမြစ်ပစ္စည်းများ ခွဲဝေပေးပြီးနောက်၊ စုယွီ၏ ပင်မကိုယ်ပွားသည် ကောင်းကင်ပင့် ရွှေချို ဆုတောင်း ဆင်သားရဲကြီး နှင့်အတူ မြေကမ္ဘာအင်မော်တယ်စံအိမ်ဂိုဏ်းမှ တိတ်တဆိတ် ထွက်ခွာလာ၏။ မိုးကြိုး နဂါး အင်မော်တယ်မင်းဆက် နှင့် တာ့ယန် အင်မော်တယ်မင်းဆက် တို့၏ ဝိုင်းရံပိတ်ဆို့ထားမှုများ ကြားမှ ဖောက်ထွက်သွားခဲ့လေသည်။

သူသည် တိလင် အင်မော်တယ်မြို့တော် နှင့် ဝေးရာသို့ ထွက်ခွာသွားခဲ့ပြီး လူသူကင်းမဲ့သော အဆင့်(၄) ဝိညာဉ် ကြော အရင်းအမြစ် နယ်မြေတစ်ခု အတွင်းသို့ ဝင်ရောက်သွားခဲ့၏။ ထိုနယ်မြေကို တိတ်တဆိတ် သိမ်းပိုက်လိုက်ပြီးနောက် ကောင်းကင်ပင့် ရွှေချို ဆုတောင်း ဆင်သားရဲကြီး ကို သွေးကြော၏ အချက်အချာ နေရာတွင် ချထားလိုက်သည်။ စွမ်းအင်များ ပြန်လည်ဖြည့်တင်းနိုင်ရန် စိတ်ဝိညာဉ်ကြော ၏ စွမ်းအားများကို စတင် စုပ်ယူစေလိုက်တော့သည်။

ထိုအချိန်တွင် ဖန်ရှောင်က မြေကမ္ဘာအင်မော်တယ်စံအိမ်ဂိုဏ်း အတွင်းရှိ တောင်ထွတ်သခင်များနှင့် အကြီးအကဲများကို စုစည်းလိုက်၏။