အခန်း ၁၀

အပိုင်း(၁၀)

ဝင်တာသည် စိတ်အနှောင့်အယှက် ဖြစ်စွာဖြင့် သူ၏ နှာတံကို ပွတ်သပ်လိုက်ပြီး သက်ပြင်းချလိုက်လေသည်။

"ဘယ်လိုပဲဖြစ်ဖြစ် ဒါက အရေးမကြီးပါဘူး..."

သူက ပြောလိုက်လေသည်။

"အရေးကြီးတာက ငါ့အဖေက သူ့ရဲ့ အမွေဆက်ခံသူတွေကို အသုံးမကျတဲ့ လူတွေအဖြစ် ကြီးပြင်းလာမှာကို မလိုလားတာပဲ... သူက အခု နေရာကို ရောက်လာဖို့အတွက် အလုပ်တွေ အများကြီး လုပ်ခဲ့ရတာ... ဒါကြောင့် သူက ငါတို့ကိုလည်း အဲဒီလိုမျိုးပဲ လုပ်စေချင်တယ်..."

"ဒါကြောင့်ပဲ သူက သူ့ရဲ့ သားသမီးတွေ အားလုံးကို ဇီဖစ်စွမ်းအင် ထုတ်လုပ်ရေး ကုမ္ပဏီတစ်ခု တည်ထောင်ဖို့နဲ့ ကူဂယ်ဘလစ် ကုမ္ပဏီရဲ့ ၀.၀၅% ကို ဝယ်ယူနိုင်လောက်တဲ့အထိ ငွေရှာဖို့ ညွှန်ကြားထားတာ... အဲဒီလိုမှ မလုပ်နိုင်ရင် ငါတို့က မိသားစုရဲ့ အရင်းအမြစ်တွေကို အသုံးပြုခွင့် ရမှာ မဟုတ်ဘူး..."

ဝင်တာက ရှင်းပြလိုက်လေသည်။

"၀.၀၅% ဟုတ်လား..."

နစ်က မေးလိုက်လေသည်။

"အဲဒါက ဘယ်လောက်လဲ... ငွေကြေး တစ်ထောင်လောက် ရှိလား..."

ဝင်တာက နှာခေါင်းရှုံ့လိုက်လေသည်။

"သန်း ၅၀ လောက် ရှိမယ်..."

နစ်၏ မျက်လုံးများမှာ တုန်လှုပ်မှုကြောင့် ပြူးကျယ်သွားလေသည်။

ငွေကြေး သန်း ၅၀ တဲ့လား။

နေပါဦး... ပြီးတော့ ဝင်တာရဲ့ အဖေက အဲဒီကုမ္ပဏီရဲ့ ၂၀% ကို ပိုင်ဆိုင်ထားတယ် ဟုတ်လား။

အဲဒါက ဘယ်လောက်တောင် များပြားတဲ့ ငွေကြေးပမာဏလဲ။

နောက်ဆုံး၌ နစ် တစ်ယောက် မိမိ၏ နောက်ခံသမိုင်းကြောင်းကို ကြားပြီး အံ့ဩသွားသည်ကို မြင်သောအခါ ဝင်တာက ပြုံးစစ လုပ်လိုက်လေသည်။

"ဘယ်လိုပဲဖြစ်ဖြစ်လေ..."

သူက ပြောလိုက်သည်။

"ငါ့ရဲ့ မောင်နှမတွေနဲ့ ယှဉ်လိုက်ရင် ငါက မြို့တွင်းပိုင်းမှာ ရှိတဲ့ ဇီဖစ်စွမ်းအင် ထုတ်လုပ်ရေး ကုမ္ပဏီတွေရဲ့ အမြတ်ထုတ်တာကို မခံနိုင်ဘူး... ဒါကြောင့် ပြိုင်ဆိုင်မှု လုံးဝ မရှိသလောက်ဖြစ်နေတဲ့ ဒီနေရာကို ငါ ထွက်လာခဲ့တာပဲ..."

"ငါ့ရဲ့ စီးပွားရေးလုပ်ငန်းကို အစပြုဖို့အတွက် ဇီဖစ်စွမ်းအင် ထုတ်ယူသူ တစ်ယောက် လိုအပ်တယ်... ငါ့ဆီမှာ စပက်တာ မရှိတဲ့အတွက် သာမန်လူတွေကို အလုပ်ခန့်လို့ မရဘူး… ဒါကြောင့် ငါက ချိတ်ဆက်ပြီးသား ဇီဖစ်စွမ်းအင် ချိတ်ဆက် ရှိနေတဲ့သူ တစ်ယောက်ကို လိုအပ်တာ..."

"အဲဘတ် က ဆင်ခြေဖုံးရပ်ကွက်ကြီး ရဲ့ ဗဟိုဈေးထဲမှာ ငါ့ရဲ့ သတ်မှတ်ချက်တွေနဲ့ ကိုက်ညီတဲ့သူ တစ်ယောက်ကို ရှာတွေ့လိမ့်မယ်လို့ ပြောခဲ့တယ်... ဒါကြောင့်ပဲ ငါတို့ အခု ဒီနေရာမှာ ရောက်နေကြတာ..."

ယခုအခါတွင် ဝင်တာ၏ အမူအရာ၌ ရှိနေသော စိုးရိမ်ပူပန်မှုများနှင့် မသေချာမရေရာမှုများ အားလုံး လုံးဝ ပျောက်ကွယ်သွားခဲ့ပြီ ဖြစ်သည်။ ၎င်းတို့ နေရာတွင် အရည်အချင်းရှိပြီး ပွင့်လင်းပြတ်သားကာ ဆွဲဆောင်မှုရှိသော စီးပွားရေးသမား တစ်ဦးအဖြစ် အစားထိုး ဝင်ရောက်လာခဲ့လေပြီ။

"ငါ မင်းကို ငါ့ရဲ့ ဇီဖစ်စွမ်းအင် ထုတ်ယူသူ အချုပ် အဖြစ် အလုပ်ခန့်ချင်တယ်..."

"ပြီးတော့ ငါတို့ ပထမဆုံး လုပ်ရမယ့်အရာက စပက်တာ တစ်ကောင်ကို ဖမ်းဆီးဖို့ပဲ…”

"ကျွန်တော် လုပ်မယ်..."

နစ်က ချက်ချင်းပင် အဖြေပေးလိုက်လေသည်။

ဝင်တာမှာ အနည်းငယ် အံ့အားသင့်သွားရ၏။

"မြန်လှချည်လား..."

သူက မျက်တောင်နှစ်ချက်ခန့် ခတ်လိုက်ရင်း ဆိုလေသည်။

"အလုပ်အကြောင်း ဘာမှမသိချင်ဘူးလား... လစာတို့၊ တာဝန်တို့လေ..."

"အခု ကျွန်တော့်အခြေအနေထက် ပိုဆိုးနိုင်ဦးမှာမို့လို့လား..."

နစ်က ပြန်မေးလိုက်သည်။

ဝင်တာသည် ပျက်စီးဟောင်းနွမ်းကာ ညစ်ပတ်ပေရေနေသည့် အိမ်လေးကို ဝေ့ကြည့်လိုက်လေသည်။ ဤအိမ်သည် ဆင်ခြေဖုံးရပ်ကွက်ကြီး အတွင်း၌ အကြီးဆုံးအိမ်များထဲတွင် ပါဝင်နေသော်ငြားလည်း အခြေအနေကား ဆိုးရွားနေဆဲပင် ဖြစ်၏။

"သေနိုင်တဲ့ ရာခိုင်နှုန်းက တော်တော်လေး မြင့်တယ်..."

ဝင်တာက မှတ်ချက်ချလိုက်သည်။

"ဘာပဲဖြစ်ဖြစ် မင်းက စပက်တာ တွေနဲ့ ထိတွေ့ဆက်ဆံရမှာကိုး..."

နစ်သည် ခေါင်းညိတ်ပြလိုက်လေသည်။

"ဆိုတော့ ကျွန်တော်က စပက်တာ တချို့ကို ရိုက်နှက်နှိမ်နင်းရမယ်ပေါ့... သိပ်လည်း အရေးမကြီးပါဘူးလေ..."

ဝင်တာသည် သံသယဖြင့် မျက်မှောင်ကြုတ်သွား၏။

"စပက်တာ ဆိုတာ ဘာလဲ မင်း တကယ်ရော သိရဲ့လား..."

"စွမ်းအားရှိတဲ့ တိရစ္ဆာန်တွေ ဒါမှမဟုတ် စွမ်းရည်တစ်ခုခုရှိတဲ့ လူတွေ မဟုတ်ဘူးလား..."

နစ်က ပေါ့ပေါ့ပါးပါးပင် ပြန်မေးလိုက်သည်။

"ကျွန်တော် လက်သီးနဲ့ ထိုးလို့ရနေသရွေ့တော့ သူတို့လည်း သေနိုင်တာပဲ မဟုတ်ဘူးလား..."

ဝင်တာသည် အသက်ပြင်းပြင်းရှူသွင်းလိုက်ပြီး သက်ပြင်းတစ်ချက် ချလိုက်လေသည်။

"တချို့ကောင်တွေအတွက်တော့ ဟုတ်တယ်... ဒါပေမဲ့ အများစုက အဲဒီလိုမဟုတ်ဘူး..."

သူက ပြန်ဖြေလိုက်၏။

"ဇီဖစ်စွမ်းအင် ဆိုတာ ဘာလဲ မင်း သိလား..."

"စပက်တာ တွေဆီကနေ ရတဲ့အရာလေ..."

နစ်က ယုံကြည်မှုအပြည့်ဖြင့် ခေါင်းညိတ်ကာ ဖြေလိုက်သည်။

"ဟုတ်တော့ ဟုတ်တယ်... ဒါပေမဲ့ အဲဒါက ဘာကြီးလဲ..."

ဝင်တာက နောက်ထပ် သက်ပြင်းတစ်ချက်ချရင်း မေးလိုက်ပြန်သည်။

တိတ်ဆိတ်မှုက လွှမ်းမိုးသွား၏။

"စွမ်းအင်လား..."

နစ်က မသေချာမရေရာစွာဖြင့် မေးလိုက်လေသည်။

ဝင်တာက နှာခေါင်းရှုံ့လိုက်သည်။

"အဲဒါက ရှောင်ထွက်သွားတဲ့ အဖြေပဲ... အရာအားလုံးက စွမ်းအင်ပဲလို့ မင်းပြောလို့ရတယ်လေ... အဲဒါဆိုရင်လည်း မင်းပြောတာ မှားမှာမဟုတ်ဘူး..."

"ပရီဖစ် ဆိုတာကိုရော မင်း ကြားဖူးလား..."

"ပရီဖစ်... အင်္ဂလိပ် စကားလုံးတွေရဲ့ အရှေ့မှာ ထည့်ရတဲ့ ရှေ့ဆက်စကားလုံးကို ပြောတာလား..."

နစ်က မေးလိုက်၏။

"မဟုတ်ဘူး... ပရီဖစ် ဆိုတာ ရှေ့ဆက်စကားလုံးကို ပြောတာမဟုတ်ဘူး... အဲဒါက ဇီဖစ်စွမ်းအင် နဲ့ ဆင်တူတယ်... 'ဇီ' ဆိုတဲ့နေရာမှာ 'ပရီ' လို့ ပြောင်းသုံးထားတာမျိုးပေါ့..."

နစ်က ခေါင်းခါပြလိုက်လေသည်။

"ကောင်းပြီလေ..."

ဝင်တာသည် အနည်းငယ် စိတ်အနှောင့်အယှက်ဖြစ်သွားဟန်ဖြင့် ဆိုလိုက်၏။

"ဒီကမ္ဘာကြီးက တကယ်တမ်း ဘယ်လိုလည်ပတ်နေသလဲဆိုတာကို ငါ အမြန်ရှင်းပြမယ်..."

နစ်က ခေါင်းညိတ်လိုက်ပြီး ဝင်တာ ပြောသည်ကို နားထောင်နေလေသည်။

"ပရီဖစ် ဆိုတာ ကမ္ဘာတစ်ဝန်းလုံးမှာ တည်ရှိနေတဲ့ မမြင်ရတဲ့ စွမ်းအင်တစ်ခုပဲ... အဲဒါကို အရမ်း အဆင့်မြင့်တဲ့ ကိရိယာတွေနဲ့ အရမ်းစွမ်းအားကြီးတဲ့ ဇီဖစ်စွမ်းအင် ထုတ်ယူသူ တွေကလွဲရင် ကျန်တဲ့သူတွေ မသိနိုင်ဘူး... ပရီဖစ် ထဲမှာ မယုံနိုင်လောက်အောင် များပြားလှတဲ့ စွမ်းအင်တွေ သိုလှောင်ထားတယ်..."

"ဝမ်းနည်းစရာကောင်းတာက လေထုထဲမှာရှိနေတဲ့ ပရီဖစ် ကို ငါတို့ ရယူသုံးစွဲလို့ မရဘူး... ပရီဖစ် ထဲမှာ သိုလှောင်ထားတဲ့ စွမ်းအင်ကို အမှန်တကယ် အသုံးပြုနိုင်မယ့် နည်းလမ်း ငါတို့ဆီမှာ မရှိသေးတာပဲ..."

"လေထုထဲမှာရှိတဲ့ ပရီဖစ်က သတ်မှတ်ထားတဲ့ သိပ်သည်းဆ တစ်ခုကို ရောက်သွားတဲ့အခါ စပက်တာ တစ်ကောင်ကို ဖန်တီးပေးနိုင်တယ်... စပက်တာ ဆိုတာက ပရီဖစ် ကို ဇီဖစ်စွမ်းအင် အဖြစ် ပြောင်းလဲပေးနိုင်တဲ့ အရာတစ်ခုပဲ... ဇီဖစ်စွမ်းအင် ဆိုတာ ပရီဖစ်ကို အသုံးပြုလို့ရအောင် ပြောင်းလဲထားတဲ့ ပုံစံပေါ့..."

"စပက်တာ တစ်ကောင်က အသက်ရှင်နေရမယ်လို့ မဆိုလိုသလို အသိဉာဏ်ရှိနေရမယ်လို့လည်း မသတ်မှတ်ထားဘူး... နောက်ပြီး စပက်တာ တွေက တမူထူးခြားကြတယ်... ဆိုလိုတာက ဒီကမ္ဘာပေါ်မှာ ဘယ်လို စပက်တာ မျိုးမဆို တစ်ကောင်တည်းပဲ ရှိတယ်... ပုံစံတူတဲ့ စပက်တာ နှစ်ကောင် ဒါမှမဟုတ် အဲဒီထက်ပိုပြီး ဘယ်တော့မှ မရှိနိုင်ဘူး... ဒါပေမဲ့ ယေဘုယျအားဖြင့် စပက်တာ တွေဟာ မတူညီတဲ့ ပုံစံသုံးမျိုးထဲက တစ်မျိုးမျိုးနဲ့ ပေါ်လာတတ်တယ်... ဒါပေမဲ့ ချွင်းချက်တွေတော့ ရှိနိုင်တာပေါ့..."

"ပထမတစ်မျိုးက ဒြပ်မဲ့ စပက်တာ ပဲ... ဒြပ်မဲ့ စပက်တာ ဆိုတာက အသိဉာဏ်ရှိတဲ့ ဒါမှမဟုတ် အသိဉာဏ်မရှိတဲ့ သက်ရှိတစ်ကောင် ဖြစ်နိုင်ပြီး စွမ်းအင်ပုံစံတွေနဲ့ ဖွဲ့စည်းထားတယ်... ဥပမာအနေနဲ့ပြောရရင် မြူခိုး လို့ ငါတို့ခေါ်တဲ့ စပက်တာဟာ မြူတွေကို အတုခိုးထားတဲ့ ပုံသဏ္ဌာန်မဲ့ တိမ်တိုက်တစ်ခုပဲ..."

"သူက အသိဉာဏ်မရှိဘူး... သူ့ရဲ့ မူလဗီဇအတိုင်းပဲ လိုက်နာလုပ်ဆောင်တယ်... တစ်ခါတလေကျရင် မြို့ရဲ့ တချို့နေရာတွေကို လှည့်လည်သွားလာပြီး လူတစ်ယောက်ယောက်ကို ဝါးမြိုပစ်တတ်တယ်... အဲဒီလူဟာ မြူတွေထဲမှာ ရည်ရွယ်ချက်မဲ့ လျှောက်သွားနေရင်းကနေ နောက်ဆုံး အစာရေစာငတ်မွတ်ပြီး သေဆုံးသွားရတာပဲ..."

"အဲဒီ မြူခိုး ကို မင်း ခံစားသိရှိလို့ မရဘူး... မင်း လက်သီးနဲ့ထိုးလို့လည်း မရဘူး... သူ့ဆီကနေ ထွက်ပြေးလို့လည်း မရဘူး... တကယ်လို့ သူကသာ မင်းကို ဖမ်းမိသွားရင် မင်း သေရလိမ့်မယ်... မင်းသာ ဇီဖစ်စွမ်းအင် ကို အခြေခံထားတဲ့ ကိရိယာတွေနဲ့ စွမ်းရည်တွေရှိတဲ့ အားကောင်းတဲ့ ဇီဖစ်စွမ်းအင် ထုတ်ယူသူ တစ်ယောက် မဟုတ်ဘူးဆိုရင်ပေါ့..."

"မြူခိုးပုံစံနဲ့ ရှိနေသေးတာလား..."

နစ်က မေးလိုက်၏။

ဝင်တာသည် ခါးသီးစွာ ရယ်မောလိုက်လေသည်။

"ငါစောစောက ပြောခဲ့တာတွေကို မင်း မေ့သွားပြီလား... ပရီဖစ် က သတ်မှတ်ထားတဲ့ သိပ်သည်းဆတစ်ခုကို ရောက်သွားတဲ့အခါ စပက်တာ တစ်ကောင် ပေါ်လာနိုင်တယ်လို့လေ..."

"မြူခိုး လိုမျိုးအရာကို ထိန်းချုပ်ဖို့ဆိုတာ အရမ်းကို ခက်ခဲတယ်... နောက်ပြီး သူက တစ်လကို လူတစ်ယောက်လောက်ပဲ စားသုံးတာလေ... မြူခိုးဟာ အဆင့်နှစ် စပက်တာ တစ်ကောင်ဖြစ်တာကြောင့် အတွေ့ရအများဆုံး စပက်တာ တွေထက်တော့ ပိုစွမ်းအားကြီးတယ်... ဒါပေမဲ့ သူက တစ်လကို လူတစ်ယောက်ပဲ စားသုံးတာ..."

"အခု ငါတို့ကသာ သူ့ကို သတ်လိုက်မယ်ဆိုရင် သူ့ရဲ့စွမ်းအင်တွေက လေထုထဲကို ပြန်လွင့်စင်သွားလိမ့်မယ်... အဲဒီအခါ ကမ္ဘာပေါ်မှာ နောက်ထပ် အဆင့်တစ် စပက်တာ တချို့ကို အမြန်ဆုံး တွေ့လာရလိမ့်မယ်... အဲဒီကောင်တွေက မြူခိုး ထက်ပိုပြီး လူ့အသက်တွေကို နှုတ်ယူသွားဖို့ အခွင့်အလမ်း ပိုများတယ်..."

***