အခန်း ၃၂

အပိုင်း(၃၂)

ဝင်တာသည် ပြန်လည်သက်သာလာရန် အချိန်အနည်းငယ် ယူလိုက်ရသည်။ သို့သော်လည်း... အဆုံး၌မူ သူသည် အူထွက်မတတ် အော့အန်နေခြင်းကို ရပ်တန့်နိုင်ခဲ့သည်။

ဝင်တာ အော့အန်နေစဉ်အတွင်း နစ်သည် ဒရီမာကို သူတို့ ယူဆောင်လာခဲ့သော အိတ်ထဲသို့ ထိုးထည့်လိုက်သည်။ ထိုအိတ်မှာ သာမန်အိတ် တစ်လုံးသာ ဖြစ်လေသည်။ ဝင်တာ မတ်တတ်ရပ်ပြီး ထိုအိတ်ကို မြင်လိုက်ရသောအခါ သူ၏ မပျော်ရွှင်မှုများနှင့် ရွံရှာမှုများ အားလုံး ပျောက်ကွယ်သွားသကဲ့သို့ပင် ဖြစ်သည်။

စပက်တာ တစ်ကောင်...

သူတို့ လက်ထဲမှာ စပက်တာ တစ်ကောင် ရရှိထားပြီ ဖြစ်သည်။ တကယ်ကြီး သူတို့ ရသွားခဲ့ပြီ...။

ထို့နောက် ဝင်တာသည် နစ်ကို ကြည့်ကာ အသက်ပြင်းပြင်း တစ်ချက် ရှူလိုက်ရသည်။ နစ်သည် တကယ်ကို ပင်ပန်းနွမ်းနယ်နေပုံ ပေါ်သည်။ သူ၏ ခန္ဓာကိုယ် အစိတ်အပိုင်း အတော်များများမှ သွေးများ စီးကျနေခဲ့ပြီး ထိုဒဏ်ရာများ အားလုံးမှာ မကြာမီအချိန်အတွင်း ဆိုးရွားစွာ ပိုးဝင်သွားလိမ့်မည် ဖြစ်ကြောင်း ဝင်တာ ကောင်းစွာ သိရှိထားပေသည်။

"မင်း အဆင်ပြေရဲ့လား..."

ဝင်တာက မေးလိုက်သည်။

"ငါ အဆင်ပြေနေတဲ့ ပုံပေါက်နေလို့လား..."

နစ်က ပြန်မေးလိုက်သည်။ ဝင်တာ မျက်နှာပျက်သွားခဲ့သော်လည်း နစ်ကမူ ရယ်မောလိုက်သည်။

"စိတ်အေးအေးထားပါ... ငါ အဆင်ပြေပါတယ်... နောက်နေတာပါ..."

နစ်က ပြောလိုက်သည်။

ဝင်တာ သက်ပြင်းချလိုက်သည်။

"မင်းပုံစံက တကယ်ကို ကြည့်မကောင်းအောင် ဖြစ်နေတာ သိလား..."

"သိပါတယ်..."

နစ်က ပြန်ဖြေလိုက်သည်။

"ဒါနဲ့ ဒီဒဏ်ရာတွေကို ကုသဖို့ သုံးလို့ရမယ့် တစ်ခုခု မင်းဆီမှာ ပါလား... ငါ မသေချင်သေးဘူး သိလား..."

ဝင်တာ ခေါင်းညိတ်ပြလိုက်သည်။

"ပြင်ပမြို့တော်က ဆေးရုံတစ်ခုကို ငါတို့ သွားလို့ရပါတယ်... အခု ငါတို့ဆီမှာ စပက်တာ တစ်ကောင် ရှိနေပြီဆိုတော့ မကြာခင် ပိုက်ဆံတွေ ဝင်လာတော့မှာပဲလေ... နောက်ပြီး မင်း အကောင်းဆုံး အခြေအနေမှာ ရှိနေဖို့ ငါ လိုအပ်တယ်..."

"ဘာပဲဖြစ်ဖြစ် မင်းက အဓိက ဇီဖစ်စွမ်းအင် ထုတ်ယူသူ ပဲလေ... ဆိုလိုတာက မင်းဟာ ဒရီမာ နဲ့ အလုပ်လုပ်ရုံတင်မကဘဲ သူနဲ့ ဘယ်လို အလုပ်လုပ်ရမလဲ ဆိုတာကိုပါ ရှာဖွေရဦးမှာ..."

"စပက်တာတိုင်းက ထူးခြားကြတယ်... ပြီးတော့ သူတို့ဆီကနေ ဇီဖစ်စွမ်းအင် အများဆုံး ရရှိဖို့အတွက် စပက်တာ တစ်ကောင်စီကို ကိုင်တွယ်ရတဲ့ နည်းလမ်းတွေကလည်း ကွာခြားတယ်..."

နစ်က ခေါင်းညိတ်လိုက်၏။ ထို့နောက် သူက ဒရီမာ ပါဝင်သော အိတ်ကို ဆွဲယူလိုက်သည်။ နောက်တစ်ခဏတွင် ထိုအိတ်မှာ မည်မျှ ပေါ့ပါးနေသနည်း ဆိုသည်ကို နစ် အံ့အားသင့်စွာ သတိပြုမိလိုက်သည်။

"ထင်ထားတာထက် ပိုပေါ့နေတာပဲ..."

နစ်က ပြောလိုက်သည်။

"စပက်တာတွေမှာ စွမ်းအားတွေ အများကြီး ရှိကြတယ်... ဒါပေမဲ့ သူတို့က ပရီဖစ် ကနေ ပြောင်းလဲထားတဲ့ ဇီဖစ် စွမ်းအင်ကို သူတို့ရဲ့ အဓိက စွမ်းအင် အရင်းအမြစ်အဖြစ် အသုံးပြုကြတာလေ..."

ဝင်တာက ရှင်းပြလိုက်သည်။

"စပက်တာ တွေက တကယ်တော့ တော်တော်လေး ပေါ့ပါးကြတယ်... သူတို့ကို ဇီဖစ်စွမ်းအင် အများကြီးနဲ့ ဖွဲ့စည်းထားတာ မဟုတ်ဘူး... ဒါပေမဲ့ ဇီဖစ်စွမ်းအင်က အရမ်း အစွမ်းထက်လွန်းတဲ့အတွက် သူတို့က မယုံနိုင်လောက်တဲ့ စွမ်းအားတွေကို ထုတ်လွှတ်နိုင်ကြတာပဲ..."

"အဲဒီ ငှက်အကြီးကြီးက ငါးကီလိုလောက်ပဲ အလေးချိန် ရှိလိမ့်မယ်..."

နစ် ခေါင်းညိတ်လိုက်သည်။ နောက်တစ်ခဏတွင် သူသည် အိတ်ကို ပခုံးပေါ်သို့ လွယ်တင်လိုက်သည်။

ဝင်တာ ဒရီမာ၏ လည်ပင်း၌ ရစ်ပတ်ထားသော ကြိုးမှာ နစ် အရင်ကတည်းက ကြားဖူးထားသော အရာတစ်ခု ဖြစ်လေသည်။

၎င်းမှာ ဇီဖစ်စွမ်းအင် ပိတ်ဆို့ကိရိယာ ဖြစ်ပြီး ဇီဖစ်စွမ်းအင် စီးဆင်းမှုကို ရပ်တန့်ရန် အသုံးပြုသော အရာဖြစ်သည်။

လက်ရှိအချိန်၌ ဇီဖစ်စွမ်းအင် ပိတ်ဆို့ကိရိယာသည် ဒရီမာ၏ ဇီဖစ်စွမ်းအင် စီးဆင်းမှုကို ရပ်တန့်ထားရန် ၎င်း၏ စွမ်းအင်များကို အသုံးပြုနေခြင်း ဖြစ်သည်။ ၎င်းမှာ အနိမ့်ဆုံးအဆင့် ဖြစ်သောကြောင့် အဆင့်တစ် စပက်တာ တစ်ကောင်အပေါ်၌ အသုံးပြုသောအခါ ငါးနာရီခန့်သာ အလုပ်လုပ်နိုင်မည် ဖြစ်သည်။

ဆိုလိုသည်မှာ... ဝင်တာ နှင့် နစ် တို့သည် ဒရီမာ ကို လာမည့် ငါးနာရီအတွင်း သူတို့၏ ဌာနချုပ်သို့ ပို့ဆောင်ရမည် ဖြစ်သည်။ သို့သော် ထိုအချိန်မှာ လုံလောက်သည်ထက်ပင် ပိုနေသေးသည်။

ဝင်တာ နှင့် နစ် တို့သည် ရေဆိုးမြောင်းများ၏ ဝင်ပေါက်မှနေ၍ ထွက်ခွာလာခဲ့ကြပြီး ဆင်ခြေဖုံးရပ်ကွက်၏ စွန့်ပစ်ခံ နယ်မြေတစ်ခုအတွင်းသို့ ထွက်ပေါ်လာခဲ့ကြသည်။ ဝင်တာသည် ဆင်ခြေဖုံးရပ်ကွက် ၏ လေကို အသက်ပြင်းပြင်း တစ်ချက် ရှူသွင်းလိုက်သည်။

ဆင်ခြေဖုံးရပ်ကွက်ရှိ လေထုမှာ ဤမျှ လန်းဆန်းပြီး သာယာဖွယ်ကောင်းကြောင်း တစ်နေ့နေ့တွင် သူ တွေ့ရှိလာရမည်ဟု မည်သည့်အခါကမျှ စိတ်ကူးမယဉ်ခဲ့ဖူးချေ။

သူတို့နှစ်ဦး ဆင်ခြေဖုံးရပ်ကွက် ကို ဖြတ်သန်းသွားစဉ် လူအားလုံးက သူတို့ကို ရွံရှာဖွယ် အကြည့်များဖြင့် ကြည့်ရှုကာ ရှောင်ဖယ်သွားကြသည်ကို မြင်တွေ့ခဲ့ရသည်။

သူတို့နှစ်ဦး၏ အနံ့အသက်မှာ ဆင်ခြေဖုံးရပ်ကွက် ၏ စံနှုန်းများနှင့်ပင် တိုင်းတာ၍မရလောက်အောင် အလွန်တရာ ဆိုးရွားရွံရှာဖွယ် ကောင်းနေခဲ့လေသည်။

သို့သော် သူတို့နှစ်ဦးစလုံးသည် ကြည့်ရှုနေသူများကို များများစားစား ဂရုမစိုက်ခဲ့ကြပေ။ သူတို့၏ ပထမဆုံး စပက်တာ ကို နောက်ဆုံး၌ ဖမ်းဆီးနိုင်ခဲ့ပြီ ဖြစ်သောကြောင့် သူတို့သည် အလွန်အမင်း စိတ်လှုပ်ရှားနေခဲ့ကြသည်။

နာရီဝက်ခန့် ကြာပြီးနောက် သူတို့သည် ဆင်ခြေဖုံးရပ်ကွက်၏ လူနေအထူထပ်ဆုံး အစိတ်အပိုင်းကို ကျောခိုင်းလာနိုင်ခဲ့ပြီး ပြင်ပမြို့တော် ရပ်ကွက်များအတွင်းသို့ ဝင်ရောက်လာခဲ့ကြသည်။

လမ်းမများသည် သံချေးတက်နေသော သတ္တုများဖြင့် ပြုလုပ်ထားရာမှ အရောင်တင်ထားသော သတ္တုများအဖြစ်သို့ ကူးပြောင်းသွားခဲ့ပြီး အိမ်များသည်လည်း ပိုမို တူညီကာ စည်းစနစ် ကျလာခဲ့သည်။

သဘာဝကျစွာပင် လမ်းပေါ်ရှိ လူများသည်လည်း ပိုမို ကောင်းမွန်စွာ ဝတ်စားဆင်ယင်ထားပုံ ရပြီး သူတို့နှစ်ဦးအပေါ် တုံ့ပြန်မှုများမှာမူ ပို၍ပင် ရွံရှာဖွယ် ကောင်းလာခဲ့သည်။

"ရပ်လိုက်စမ်း..."

ရုတ်တရက် အသံတစ်ခု ထွက်ပေါ်လာ၏။ သူတို့နှစ်ဦးသည် မျက်မှောင်ကြုတ်လျက် ခြေလှမ်းများကို ရပ်တန့်လိုက်ကြသည်။

နောက်တစ်ခဏတွင် အမည်းရောင် တိုက်ခိုက်ရေး ဝတ်စုံ ဝတ်ဆင်ထားသော လူနှစ်ဦးသည် သူတို့ထံသို့ လျှောက်လာကြသည်။ ထိုအမျိုးသား နှစ်ဦးသည် သူတို့၏ နှာခေါင်းများကို ကိုင်ထားရင်း သူတို့ကို ရွံရှာဖွယ် အကြည့်များဖြင့် ကြည့်လိုက်ကြသည်။

"မင်းတို့လို လူမျိုးတွေကို ဒီနေရာက ကြိုဆိုမှာ မဟုတ်ဘူး... ပြင်ပမြို့တော် ကနေ ထွက်သွား... မဟုတ်ရင် ငါတို့ကိုယ်တိုင် မင်းတို့ကို ထွက်သွားအောင် လုပ်ရလိမ့်မယ်..."

သူတို့ထဲမှ တစ်ယောက်က အော်ပြောလိုက်သည်။ သူတို့နှစ်ဦးမှာ မြို့စောင့်တပ်သားများ ဖြစ်ကြပြီး ပြင်ပမြို့တော်ကို မနှစ်မြို့ဖွယ်ရာ လူများထံမှ ကင်းစင်အောင် ထိန်းသိမ်းထားရန်မှာ သူတို့၏ တာဝန် တစ်စိတ်တစ်ပိုင်း ပင်ဖြစ်သည်။

ကျင်ကြီးနှင့် ကျင်ငယ်ရေ အနံ့အသက်များ နံစော်နေသော လူနှစ်ယောက်မှာ မနှစ်မြို့ဖွယ်ရာ လူများအဖြစ် အလွယ်တကူ သတ်မှတ်ခံရနိုင်ပေသည်။

ဝင်တာသည် သူ၏ လက်ကို အိတ်ကပ်ထဲသို့ နှိုက်လိုက်သည်။

မြို့စောင့်တပ်သား နှစ်ဦးအနက် တစ်ဦးသည် မျက်လုံးများကို ကျဉ်းမြောင်းလိုက်ပြီး ရှေ့သို့ ပြေးထွက်သွားကာ ဝင်တာ ၏ လက်ကို အိတ်ကပ်ထဲမှ ပြန်မထုတ်နိုင်မီမှာပင် ဖမ်းဆုပ်လိုက်လေသည်။

ဝင်တာသည် သူတို့ကို လက်နက်တစ်ခုခု ထုတ်ယူကာ တိုက်ခိုက်တော့မည်ဟု မြို့စောင့်တပ်သားက ထင်မှတ်သွားခဲ့ခြင်း ဖြစ်သည်။

"ခုခံနေတာကို ရပ်လိုက်စမ်း..."

မြို့စောင့်တပ်သားက အော်ပြောလိုက်ပြီး ဝင်တာ ၏ လက်ကို အိတ်ကပ်ထဲမှ အကြမ်းပတမ်း ဆွဲထုတ်လိုက်လေသည်။

ဂျွတ်...

နောက်တစ်ခဏတွင် ဝင်တာ ၏ လက်ကောက်ဝတ်မှာ ပြုတ်ထွက်သွားပုံရပြီး ၎င်း ဖြစ်သင့်သည်ထက် အနည်းငယ် ပို၍ ဆန့်ထွက်သွားခဲ့သည်။ မြို့စောင့်တပ်သားကြောင့် သူ၏ လက်ကောက်ဝတ်မှာ အဆစ်လွဲသွားခဲ့ခြင်း ဖြစ်သည်။

ဝင်တာထံ၌ စပက်တာ တစ်ကောင်မှ ရရှိထားသော စွမ်းရည် ရှိနေသော်လည်း သူသည် ကိုယ်ကာယ ကြံ့ခိုင်သူ တစ်ဦး မဟုတ်ချေ။ တစ်ချိန်တည်းမှာပင် မြို့စောင့်တပ်သားများမှာမူ အလွန် ကျန်းမာကြံ့ခိုင်ပြီး သန်မာကြလေသည်။

မြို့စောင့်တပ်သားက သူ၏ လက်ကို နောက်ကျောဘက်သို့ ပို့ကာ ချုပ်နှောင်ရန် ဘေးသို့ ဆွဲယူလိုက်သောအခါ ဝင်တာသည် အံကို ကြိတ်ထားလိုက်သည်။

နောက်တစ်ခဏတွင် မြို့စောင့်တပ်သားသည် ဝင်တာ ကို မြေပြင်ပေါ်သို့ ဖိချလိုက်လေသည်။

ဤအရာများ အားလုံး ဖြစ်ပျက်နေစဉ်အတွင်း နစ်သည် အခြား မြို့စောင့်တပ်သားနှင့် မျက်လုံးချင်း ဆုံနေခဲ့သည်။

ထို့နောက် နစ်သည် မြို့စောင့်တပ်သားကို ပြန်မကြည့်မီ အောက်ဘက်သို့ အခိုက်အတန့်မျှ ငုံ့ကြည့်လိုက်သည်။ သဘာဝကျစွာပင် အခြေခံအားဖြင့် နစ်သည် သူ့အား အောက်သို့ ကြည့်ရန် ပြောလိုက်ခြင်း ဖြစ်ကြောင်း မြို့စောင့်တပ်သား သဘောပေါက်သွားခဲ့သည်။

မြို့စောင့်တပ်သားသည် အောက်သို့ ငုံ့ကြည့်လိုက်ရာ ယခုလေးတင် ဝင်တာ ၏ လက်ထဲမှ ပြုတ်ကျသွားသော ကတ်ပြားငယ် တစ်ခုကို သူ မြင်တွေ့လိုက်ရလေသည်။

မြို့စောင့်တပ်သားသည် နစ်ကို ကြည့်ရင်း မျက်မှောင်ကြုတ်သွားသည်။ နစ်ကမူ မည်သည့်စကားမျှ မဆိုဘဲ သူ့ကို ပြန်လည် စိုက်ကြည့်နေခဲ့ရုံသာ ဖြစ်သည်။

အဆုံး၌ ဒုတိယ မြို့စောင့်တပ်သားသည် ကတ်ပြားကို ကောက်ယူရန် ဒူးထောက် ထိုင်ချလိုက်သည်။

ကတ်ပြားကို ကြည့်ပြီးနောက် မြို့စောင့်တပ်သား၏ မျက်နှာသည် ထိတ်လန့်မှုကြောင့် ဖြူရော်သွားခဲ့ပြီး အခြား မြို့စောင့်တပ်သားက မြေပြင်ပေါ်၌ ဖိချုပ်ထားသော ဝင်တာ့ ကို ကြည့်လိုက်လေသည်။

ဒုတိယ မြို့စောင့်တပ်သားသည် ပထမ မြို့စောင့်တပ်သားထံသို့ ချက်ချင်း ခုန်အုပ်သွားပြီး သူ့ကို ဆွဲဖယ်လိုက်သည်။

"ဂျိမ်း... ရပ်လိုက်စမ်း..."

ပထမ မြို့စောင့်တပ်သားသည် ရုတ်တရက် ဆွဲဖယ်ခံလိုက်ရသဖြင့် ဒုတိယ မြို့စောင့်တပ်သားကို စိတ်အနှောင့်အယှက် ဖြစ်စွာဖြင့် တွန်းဖယ်လိုက်သည်။

"မင်း ဘာဖြစ်နေတာလဲ..."

သူက အော်ပြောလိုက်သည်။

ဒုတိယ မြို့စောင့်တပ်သားသည် ပထမ မြို့စောင့်တပ်သား၏ လက်ထဲသို့ ကတ်ပြားကို အလျင်စလို ထိုးထည့်ပေးလိုက်သည်။ ထိုမြို့စောင့်တပ်သားသည် ကတ်ပြားကို စိတ်အနှောင့်အယှက်ဖြစ်စွာဖြင့် ကြည့်လိုက်သည်။

သို့သော် ထို့နောက်တွင် သူ၏ မျက်လုံးများ ပြူးကျယ်သွားခဲ့ပြီး သူ၏ အောက်ဘက်ရှိ လူကို ထိတ်လန့်တကြား လှည့်ကြည့်လိုက်လေသည်။

ဤအချိန်၌ ဝင်တာ သည် မြို့စောင့်တပ်သားကို အဆိပ်ပြင်းသော အကြည့်များဖြင့် စူးစူးရဲရဲ ကြည့်နေခဲ့သည်။

မြို့စောင့်တပ်သားမှာ အေးခဲ တောင့်တင်းသွားခဲ့သည်။

လက်ရှိအချိန်၌ မြို့စောင့်တပ်သား၏ လက်ထဲတွင် အတွင်းပိုင်း မြို့တော် ၏ အမြင့်ဆုံး အထပ်အတွက် နေထိုင်ခွင့် ကတ်ပြားတစ်ခုကို ကိုင်ဆောင်ထားပြီး ထိုကတ်ပြားပေါ်ရှိ နာမည်မှာ 'ဝင်တာ မဲဖီယွန်' ပင်ဖြစ်သည်။

မြို့စောင့်တပ်သားများသည် သူတို့ လက်ရှိ ကြည့်နေသောသူမှာ မည်သူမည်ဝါ ဖြစ်ကြောင်းကို အတိအကျ သိရှိသွားခဲ့ကြလေပြီ။

"ဒီမှာ စောင့်နေ..."

ဝင်တာ နှင့် နစ်တို့ သူတို့၏ ဂိုဒေါင်အတွင်းသို့ ဝင်ရောက်သွားစဉ် ဝင်တာက စိတ်အနှောင့်အယှက်ဖြစ်စွာဖြင့် တိုတိုတုတ်တုတ် အမိန့်ပေးလိုက်သည်။

မြို့စောင့်တပ်သား နှစ်ဦးသည် အဆူခံလိုက်ရသော ကလေးနှစ်ယောက်ကဲ့သို့ အဆောက်အအုံရှေ့၌ စောင့်ဆိုင်းနေခဲ့ကြသည်။ မြို့စောင့်တပ်သား နှစ်ဦးသည် ငြင်းဆန်ခြင်း မပြုရဲခဲ့ပေ။

သူတို့၏ ရှေ့မှောက်၌ ဂိုဒေါင်တံခါး ပိတ်သွားသည်နှင့် တစ်ပြိုင်နက် မြို့စောင့်တပ်သား နှစ်ဦး၏ စိုးရိမ်ပူပန်မှုများမှာ ပေါက်ကွဲထွက်လာခဲ့လေသည်။ အကယ်၍ ဝင်တာသာ သူ၏ မိသားစု ရှေ့နေများကို ပါဝင်ပတ်သက်စေရန် ဆုံးဖြတ်လိုက်ပါက သူတို့သည် အလုပ်ပြုတ်သွားနိုင်သည့်အပြင် ထို့ထက်ပို၍ပင် ဆိုးရွားသော အခြေအနေများနှင့် ရင်ဆိုင်ရနိုင်ချေ ရှိပေသည်။

***