အခန်း (၅၁၃-၅၁၄)

အခန်း ၅၁၃ အစစ်အမှန် နတ်ဘုရား၏ အသွင်အပြင်၊ နယ်ပယ်၏ အစပျိုးမှု

ကောင်းကင်နှင့် မြေကြီး ယွမ်ချီစွမ်းအင်များ လူစုကွဲသွားသည်နှင့်အမျှ လေဟာနယ်အထက်တွင် နောက်တစ်ကြိမ် ပြန်လည် တိတ်ဆိတ်သွားတော့သည်။ လူတိုင်း၏ အကြည့်များက ထို ခန့်ညားထည်ဝါသော ပုံရိပ်အပေါ်တွင်သာ ရစ်ဝဲနေကြပြီး တည့်တည့်ပင် မကြည့်ရဲကြတော့ချေ။

ပုံသဏ္ဌာန်မဲ့စွာဖြင့် ကြီးမားလှသော ဖိနှိပ်မှုကြီးတစ်ခုက မိမိတို့ထံသို့ ဖုံးလွှမ်းလာသည်ကို အာရုံခံမိနေကြသည်။

သေမတတ် တိတ်ဆိတ်နေသော လေထုက အသက်ရှူကြိမ် အနည်းငယ်မျှ ကြာမြင့်သွားပြီးနောက်မှသာ တစ်စုံတစ်ယောက်က စကားစတင် ပြောဆိုကာ တိတ်ဆိတ်မှုကို ချိုးဖျက်လိုက်တော့သည်။

"ဝူအန်းမြို့စားကြီး ကျင့်ကြံခြင်းအဆင့် ပြီးပြည့်စုံသွားတဲ့အတွက် ဂုဏ်ပြုပါတယ် သိုင်းသူတော်စင် အဆင့်ကို တက်လှမ်းဖို့ နေ့ရက်တွေ သိပ်မလိုတော့ပါဘူး"

"ဝူအန်းမြို့စားကြီး ကျင့်ကြံခြင်းအဆင့် ပြီးပြည့်စုံသွားတဲ့အတွက် ဂုဏ်ပြုပါတယ် သိုင်းသူတော်စင် အဆင့်ကို တက်လှမ်းဖို့ နေ့ရက်တွေ သိပ်မလိုတော့ပါဘူး"

"ဝူအန်းမြို့စားကြီး ကျင့်ကြံခြင်းအဆင့် ပြီးပြည့်စုံသွားတဲ့အတွက် ဂုဏ်ပြုပါတယ် သိုင်းသူတော်စင် အဆင့်ကို တက်လှမ်းဖို့ နေ့ရက်တွေ သိပ်မလိုတော့ပါဘူး"

ပတ်ဝန်းကျင်တွင် စောင့်ကြည့်နေကြသော လူရာပေါင်းများစွာက တစ်ပြိုင်နက်တည်း အသံကျယ်ကျယ်ဖြင့် ဂုဏ်ပြုစကား ဆိုလိုက်ကြသည်။ ကျန်းချဲ့က ယနေ့တွင် အစစ်အမှန် တာအိုလမ်းစဉ်ကို ရရှိသွားသည့်ပမာ ပင်ဖြစ်သည်။ ဤအခိုက်အတန့်တွင် ကျန်းချဲ့က ကောင်းကင်နှင့် မြေကြီးကြားရှိ ဗဟိုချက် ဖြစ်လာခဲ့ပြီး လူအများ၏ အာရုံစိုက် ကြည့်ရှုမှုကို ခံစားနေရပေသည်။

ဓားမိစ္ဆာ ကျန်းဆန်းက ပေါ့ပေါ့ပါးပါး ပြုံးလိုက်ပြီး ကျန်းချဲ့ကို လက်ယှက်ကာ ဂါရဝပြု ဂုဏ်ပြုလိုက်သည်။ သူက သဘောထား သေးသိမ်သူ တစ်ယောက် မဟုတ်ချေ။ ယခင်က ကျန်းချဲ့၏ ကျင့်ကြံခြင်းအဆင့်က သူ့ထက် အများကြီး နိမ့်ကျနေချိန်တွင်ပင် သူ့ကို အနိုင်ယူနိုင်ခဲ့သည်။ ယခုအခါတွင်မူ အခြေအနေကို ပို၍ပင် ရှင်းလင်းစွာ မြင်တွေ့နေရပြီ ဖြစ်သည်။

သူကိုယ်တိုင် သိုင်းသူတော်စင် အဆင့်သို့ မတက်လှမ်းနိုင်ပါက ကျန်းချဲ့၏ ပြိုင်ဘက် လုံးဝ ဖြစ်လာနိုင်တော့မည် မဟုတ်ချေ။

ကျန်းချဲ့က အကြည့်များကို အရပ်လေးမျက်နှာသို့ ဝေ့ကြည့်လိုက်ပြီး လက်ယှက်ကာ အရိုအသေပြုလိုက်သည်။

"အားလုံးပဲ အားနာစရာ မလိုပါဘူး"

အဝေး တစ်နေရာရှိ လေဟာနယ်တွင်တော့ ကျီချန်တောက်နှင့် ဝမ်ထိုက်ရှီးတို့က မတ်မတ်ရပ်ကာ ဤမြင်ကွင်းကို စောင့်ကြည့်နေကြဆဲ ဖြစ်သည်။ ဝမ်ထိုက်ရှီး၏ မျက်ဝန်းများထဲရှိ အံ့အားသင့် ဝမ်းသာမှုများက ယခုအချိန်အထိ ပျောက်ကွယ်မသွားသေးချေ။ မည်သို့ပင်ဆိုစေ ကျန်းချဲ့တွင် အစစ်အမှန် နတ်ဘုရားတစ်ပါး၏ အသွင်အပြင်မျိုး ရှိနေပေသည်။

ကောင်းကင်နှင့် မြေကြီး၏ အပြောင်းအလဲများကြောင့် နောင်တစ်ချိန်တွင် အစစ်အမှန် နတ်ဘုရား ဖြစ်လာရန် ခက်ခဲကောင်း ခက်ခဲနိုင်သော်လည်း မသေဆုံးသေးသရွေ့ နောက်ထပ် ခေါက်ရှန်းနတ်မင်းကြီး ကျီချန်တောက် တစ်ပါး သေချာပေါက် ဖြစ်လာဦးမည် ဖြစ်သည်။ ဤသည်က ဧကရာဇ်အတွက် ကောင်းမွန်သော ကိစ္စတစ်ခု မဟုတ်နိုင်သော်လည်း လောကတစ်ခုလုံး အတွက်မူ အလွန် ကောင်းမွန်သော ကိစ္စတစ်ခု ဖြစ်ပေသည်။

"ဒီကောင်လေး ယွမ်ရှန်း ဆယ်လက်မ အထိ ရောက်ရှိသွားတဲ့ ကိစ္စကို အပြင်ကို ပေါက်ကြားမခံပါနဲ့ တတ်နိုင်သလောက် ဖုံးကွယ်ထားပေးပါ" ဟု ကျီချန်တောက်က ရုတ်တရက် စကားဆိုလိုက်သည်။

ဝမ်ထိုက်ရှီးက တစ်ခဏမျှ ကြက်သေသေသွားပြီးနောက် ကျီချန်တောက်၏ ဆိုလိုရင်းကို နားလည်သွားတော့သည်။ သစ်ပင်က တောအုပ်ထက် မြင့်နေပါက လေတိုက်ခတ်မှုကို သေချာပေါက် ခံရမည် ဖြစ်သည်။ နောင်တစ်ချိန်တွင် ကျီချန်တောက် သာ ကွယ်လွန်သွားခဲ့ပါက ကျန်းချဲ့ အနေဖြင့် အခြားသော အင်အားစုများ၏ ပစ်မှတ်ထားမှုကို သေချာပေါက် ခံရမည် ဖြစ်သည်။ မည်သူကမျှ လောက၏ အခြေအနေကို ပြောင်းလဲပစ်နိုင်မည့် နောက်ထပ် ကျီချန်တောက် တစ်ပါး ထပ်မံ ပေါ်ထွက်လာမည်ကို မျှော်လင့်မည် မဟုတ်ချေ။

သို့သော် ယနေ့ ကျန်းချဲ့ အဆင့်တက်လှမ်းမှုကို စောင့်ကြည့်သူ အများအပြား ရှိနေရာ ဆယ်လက်မ ယွမ်ရှန်း သတင်းကို မည်သို့ ဖုံးကွယ်ထားနိုင်မည်နည်း။ ထျန်းယွမ်မြို့က အလယ်ပိုင်းလွင်ပြင်နှင့် အဆက်အသွယ် ပြတ်တောက်နေသော်လည်း သတင်းများ လုံးဝ မပေါက်ကြားနိုင်ဘူးဟု မဆိုနိုင်ချေ။

"ဒါက နည်းနည်းတော့ ခက်ခဲလိမ့်မယ်" ဟု ဝမ်ထိုက်ရှီးက အနည်းငယ် တွေဝေစွာဖြင့် ပြန်ပြောလိုက်သည်။

"ကျန်းချဲ့ က ဒီနေရာမှာ အဆင့်တက်လှမ်းသွားပြီး ကျင့်ကြံခြင်းအဆင့် အကြီးအကျယ် တိုးတက်သွားတာကို လူအများက မျက်စိဒေါက်ထောက် ကြည့်နေကြတာ အမှန်ပါပဲ ဒါပေမဲ့ အခြားသူတွေက ဝိညာဉ်အာရုံနဲ့ မစူးစမ်းရဲကြဘူး သာမန် မျက်စိနဲ့ပဲ ကြည့်ရှုနိုင်တာမို့ ကိုးလက်မ ကန့်သတ်ချက်ကို ချိုးဖျက်သွားတယ် ဆိုတာကိုပဲ သိကြတယ် တကယ်တမ်း ဆယ်လက်မ အထိ ရောက်သွားလား ဆိုတာကိုတော့ သိတဲ့သူ အရမ်းနည်းပါတယ် တိုင်းပြည် ဆရာ အနေနဲ့ ကျန်းချဲ့ က ယွမ်ရှန်း ကန့်သတ်ချက်ကို ချိုးဖျက်သွားတယ် ဆိုတဲ့ သတင်းကိုပဲ တမင် သက်သက် လွှင့်ထုတ်ပေးလိုက်ရုံပါပဲ ဆယ်လက်မ ယွမ်ရှန်း ဆိုတာကိုတော့ ဖုံးကွယ်ထားဖို့ လိုအပ်တယ်"

ကျီချန်တောက်၏ မျက်နှာထားက အနည်းငယ်မျှ ပြောင်းလဲသွားခြင်း မရှိချေ။

"ဒီ ဆယ်လက်မ ယွမ်ရှန်း မှာ တခြား ထူးခြားချက် တွေ ရှိနေလို့လား" ဟု ဝမ်ထိုက်ရှီးက မျက်တောင် အနည်းငယ် လှုပ်ခတ်သွားပြီး နားမလည်နိုင်စွာဖြင့် ကျီချန်တောက်ကို ကြည့်ကာ မေးလိုက်သည်။

ကိုးလက်မ ကန့်သတ်ချက်ကို ချိုးဖျက်နိုင်သူတိုင်းတွင် အစစ်အမှန် နတ်ဘုရား၏ အသွင်အပြင်မျိုး ရှိကြောင်းကိုသာ သူ သိရှိထားသည်။ သို့သော် ဤ ဆယ်လက်မ ယွမ်ရှန်း တွင် မည်သည့် ထူးခြားချက် ရှိသနည်း ဆိုသည်ကိုမူ သူ ရှင်းလင်းစွာ မသိရှိချေ။ သို့သော် ကျီချန်တောက်၏ လေးနက်သော မျက်နှာထားကို ကြည့်ခြင်းအားဖြင့် အပေါ်ယံ မြင်တွေ့နေရသလောက် မရိုးရှင်းကြောင်း ဝမ်ထိုက်ရှီး ရင်ထဲတွင် သဘောပေါက်လိုက်သည်။

ကျီချန်တောက်က ခေါင်းခါရမ်းလိုက်သည်။

"ရှေးခေတ်ကာလ ကတည်းက ဆယ်လက်မ ယွမ်ရှန်း ကို ရောက်ရှိခဲ့တဲ့သူ ရှိတယ်လို့ မှတ်တမ်း မရှိခဲ့ဖူးဘူး ငါ ကိုယ်တိုင်တောင် အဲဒီတုန်းက ကိုးလက်မခွဲကျော် ယွမ်ရှန်း အထိပဲ ရောက်ခဲ့တာ ကျန်းချဲ့ က ငါ နဲ့ ရင်ပေါင်တန်းနိုင်တဲ့ အရည်အချင်း ကို ပိုင်ဆိုင်ထားတာက လူတွေရဲ့ မနာလို မုန်းတီးမှုကို ခံနေရပြီ တကယ်လို့ သူ့ရဲ့ ပါရမီက ငါ့ ထက်တောင် သာလွန်သွားမယ် ဆိုရင် ဘာတွေ ဖြစ်လာမလဲ ဆိုတာကို တိုင်းပြည် ဆရာ တွေးကြည့်လို့ ရပါတယ်"

ကိုးလက်မ ကို ချိုးဖျက်ခြင်းမှာ ကန့်သတ်ချက်ကို ချိုးဖျက်ခြင်း ပင်ဖြစ်သည်။ ထို့နောက်တွင် တစ်စိတ်တစ်ပိုင်း ကြီးထွားလာတိုင်းမှာ ကန့်သတ်ချက်ထဲမှ ကန့်သတ်ချက်ကို ထပ်မံ ချိုးဖျက်နေခြင်း ပင်ဖြစ်သည်။ ယခုအခါ ကျန်းချဲ့က အတိအကျ မည်သည့် အခြေအနေသို့ ရောက်ရှိနေသနည်း ဆိုသည်ကို ကျီချန်တောက် ကိုယ်တိုင် ပင် ရှင်းလင်းစွာ မသိရှိချေ။ သို့သော် တတ်နိုင်သလောက် ဖုံးကွယ်ထားခြင်းက မည်သို့မျှ ဆိုးရွားသော ကိစ္စ မဟုတ်ချေ။

"ငါ နားလည်ပါပြီ" ဟု ဝမ်ထိုက်ရှီးက တစ်ခဏမျှ စဉ်းစားပြီးနောက် ခေါင်းကို ဖြည်းညင်းစွာ ညိတ်ပြလိုက်သည်။

ကျီချန်တောက်က အများကြီး ဆက်မပြောတော့ဘဲ နောက်လှည့် ထွက်ခွာသွားတော့သည်။ သို့သော် ထွက်မသွားမီ ကျန်းချဲ့ထံသို့ အသံလှိုင်းဖြင့် သတင်းစကား တစ်ခု ချန်ရစ်ခဲ့သည်။

"ငါ့ နောက်ကို လိုက်ခဲ့"

အခြားသော စစ်မှန်သောသခင်များနှင့် စကားစမြည် ပြောဆိုနေသော ကျန်းချဲ့က ကျီချန်တောက်၏ အသံကို ရုတ်တရက် ကြားလိုက်ရချိန်တွင် ရင်ထဲ၌ တစ်ခဏမျှ ကြက်သေသေသွားခဲ့သည်။ သို့သော် ချက်ချင်းပင် သတိပြန်ဝင်လာပြီး အခြားသူများနှင့် ရိုးရိုးရှင်းရှင်း နှုတ်ဆက် စကားပြောပြီးနောက် နေရာမှ ထွက်ခွာသွားတော့သည်။

ကျန်းချဲ့ ထွက်ခွာသွားခြင်းက ဆွေးနွေးပြောဆိုမှုများကို ရပ်တန့်မသွားစေဘဲ ဆန့်ကျင်ဘက်အနေဖြင့် ကျန်းချဲ့၏ ကျင့်ကြံခြင်းအဆင့်က ယွမ်ရှန်းအဆင့် ပြီးပြည့်စုံခြင်းသို့ ရောက်ရှိသွားပြီး ကိုးလက်မ ယွမ်ရှန်း ကန့်သတ်ချက်ကို ချိုးဖျက်သွားခဲ့ပြီဟူသော သတင်းက လျင်မြန်စွာ ပျံ့နှံ့သွားတော့သည်။

ကြားရသူတိုင်းမှာ အလွန်အမင်း ထိတ်လန့် အံ့အားသင့်သွားကြတော့သည်။

ထျန်းယွမ်၏ တိမ်တိုက်အတားအဆီး အထက်တွင် ကျန်းချဲ့က လေဟာနယ်ကို နင်းဖြတ်ကာ ရောက်ရှိလာခဲ့သည်။ အရှေ့ဘက် ခပ်လှမ်းလှမ်းတွင် မတ်မတ်ရပ်နေသော ပုံရိပ်တစ်ခုကို သူ တွေ့မြင်လိုက်ရသည်။ ထိုသူ၏ ခန္ဓာကိုယ်က အရမ်းကြီးမားလွန်းသည်ဟု မထင်ရသော်လည်း ကိုယ်ပေါ်ရှိ အရှိန်အဝါကတော့ တောင်တန်းကြီးတစ်ခု သဖွယ် ပင်ဖြစ်သည်။

တစ်ချက် ကြည့်လိုက်ရုံဖြင့် ကြီးမားလှသော ခန့်ညားထည်ဝါမှုကို ခံစားလိုက်ရပြီး လုံးဝ စော်ကား၍ မရနိုင်သည့်ပမာ ပင်ဖြစ်သည်။

"နတ်မင်းကြီး ကို ဂါရဝပြုပါတယ်"

ကျန်းချဲ့က အနီးသို့ ရောက်ရှိသွားသောအခါ ခန္ဓာကိုယ်ကို အနည်းငယ် ကိုင်းညွတ်ကာ လက်ယှက်၍ အရိုအသေ ပြုလိုက်သည်။

"ဒီတစ်ကြိမ် အဆင့်တက်လှမ်း မှုမှာ ယွမ်ရှန်း ရော ရုပ်ပိုင်းဆိုင်ရာ ခန္ဓာကိုယ် ပါ အပြောင်းအလဲ ဖြစ်သွားခဲ့တယ် တကယ်ကို အစွမ်းအစရှိတာပဲ အခု မင်း ရဲ့ စွမ်းအား နဲ့ ဆိုရင် ယန်ဝိညာဉ် အဆင့်ကို စတင် ဝင်ရောက် ကာစ သိုင်းသူတော်စင် တွေတောင် မင်း ကို ဖိနှိပ် ဖို့ ခက်ခဲ နေလောက်ပြီ"

ကျီချန်တောက်၏ ဤကဲ့သို့သော သုံးသပ်ချက်ကို ကြားလိုက်ရသောအခါ ကျန်းချဲ့၏ ရင်ထဲတွင် အနည်းငယ် ဝမ်းသာသွားသည်။ မည်သို့ပင်ဆိုစေ ယခုအခါ သူ၏ အကြီးမားဆုံးသော အားနည်းချက်မှာ စွမ်းအားပင်ဖြစ်သည်။ သို့သော် သူ၏ ပြိုင်ဘက်များက အလွန် အစွမ်းထက်လွန်းနေကြရာ အကယ်၍ ယန်ဝိညာဉ်အဆင့်ကို စတင် ဝင်ရောက်ကာစ သိုင်းသူတော်စင်များကို ယှဉ်ပြိုင်နိုင်စွမ်း ရှိလာမည် ဆိုပါက ၎င်းမှာ ယခုအခါ သူက အတုအယောင် သူတော်စင် သို့မဟုတ် သိုင်းသူတော်စင် တစ်ဝက် ဟုပင် ခေါ်ဆိုနိုင်ပြီ ဖြစ်ကြောင်းကို ဆိုလိုပေသည်။

ဤကဲ့သို့ တိုးတက်လာမှုက သူ အပင်ပန်းခံ၍ ရှာဖွေခဲ့ရသော ပူဇော်ပစ္စည်းများအတွက် လုံးဝ အချည်းနှီး မဖြစ်စေခဲ့ချေ။ သို့သော် အပေါ်ယံတွင်တော့ သူက နှိမ့်ချသော အမူအရာဖြင့် ပြန်ပြောလိုက်သည်။

"နတ်မင်းကြီး က မြှောက်ပင့်လွန်းပါပြီ"

ကျီချန်တောက်က ကျန်းချဲ့၏ နှိမ့်ချမှုကို လျစ်လျူရှုကာ ပွင့်ပွင့်လင်းလင်း ပြောလိုက်သည်။

"မင်း က ကိုးလက်မ ယွမ်ရှန်း ရဲ့ ကန့်သတ်ချက် ကို ချိုးဖျက် ခဲ့ပြီး သိုင်းသူတော်စင် နယ်ပယ် ရဲ့ အစပျိုးမှု ကို ထိတွေ့ နိုင်ခဲ့တယ် ဒါပေမဲ့ ဒီအချက် ကြောင့်တော့ မာန မကြီးလိုက်နဲ့ လောက ကြီး ထဲမှာ သူရဲကောင်း တွေ ဆိုတာ မြစ် ထဲက ငါး တွေလိုပဲ ပေါများလွန်းတယ် ကန့်သတ်ချက် ကို ချိုးဖျက် နိုင်တဲ့ သူ ဆိုတာ မရှိဘူး မဟုတ်ဘူး မင်း ရဲ့ နယ်ပယ် က သိုင်းသူတော်စင် အောက်က မဟာသိုင်းသခင်ကြီး တွေ ဒါမှမဟုတ် စစ်မှန်သောသခင် တွေ အတွက် ဆိုရင် အကြီးအကျယ် ဖိနှိပ် နိုင်စွမ်း ရှိပေမဲ့ နောက်ဆုံး မှာတော့ အစပျိုး မှု အဆင့် လေး သက်သက်ပဲ ရှိသေးတယ် နယ်ပယ် ရဲ့ အစစ်အမှန် စွမ်းအား ကို မပိုင်ဆိုင် သေးဘူး တကယ့် သိုင်းသူတော်စင် အစစ်အမှန် တစ်ပါး နဲ့ ရင်ဆိုင် ရတဲ့ အခါကျရင် အခြေခံ အားဖြင့် ဘာ အသုံး မှ ဝင်မှာ မဟုတ်ဘူး"

ကျန်းချဲ့က တစ်ခဏမျှ တိတ်ဆိတ်သွားပြီးနောက် တိုးညင်းသော အသံဖြင့် မေးမြန်းလိုက်သည်။

"သိုင်းသူတော်စင် နယ်ပယ် ရဲ့ အစပျိုးမှု ဟုတ်လား"

"နယ်ပယ် ဆိုတာ ဘယ်ကနေ ဖြစ်တည် လာသလဲ ဆိုတာကို မင်း သိလား"

"နယ်ပယ် ဆိုတာ ကောင်းကင်နဲ့ မြေကြီး ရဲ့ စွမ်းအား တွေကို ထုတ်ယူ သုံးစွဲ ပြီး ကိုယ်ပိုင် နတ်စံအိမ် ကို ဗဟိုချက် အဖြစ် ထားရှိတာပဲ နတ်စံအိမ် က ဘယ်လောက် အစွမ်းထက် လဲ ဆိုတာ အပေါ် မူတည်ပြီး နယ်ပယ် ရဲ့ ဖိနှိပ်မှု ကလည်း အဲဒီလောက် အစွမ်းထက် မှာပဲ..."

သိုင်းသူတော်စင် အဆင့်နှင့် ပတ်သက်သော ကျင့်ကြံခြင်း အကြောင်းအရာ အချို့ကို ယခင်က ထျန်းယွမ်မြို့ သို့ လာရောက်စဉ် လမ်းခရီးတွင် ကျီချန်တောက်က ကျန်းချဲ့အား ပြောပြခဲ့ဖူးသည်။

သိုင်းသူတော်စင် ဟု ခေါ်ဆိုနိုင်ခြင်းမှာ မိုးကြိုးကပ်ဘေးကို ဖြတ်ကျော်ပြီးနောက် ယန်ဝိညာဉ်ကို အထွတ်အထိပ်သို့ ရောက်ရှိအောင် လေ့ကျင့်ကြံဆနိုင်ခဲ့ပြီး နတ်စံအိမ်၏ တည်ရှိမှုကို တောင့်ခံနိုင်လာသောကြောင့် ပင်ဖြစ်သည်။ နတ်စံအိမ် ဆိုသည်မှာ ဝိညာဉ် နေရာလွတ် အတွင်း၌ ဖန်တီး ဖွင့်လှစ်ရခြင်း ပင်ဖြစ်သည်။

နတ်စံအိမ် ဆိုသည်မှာ သိုင်းသူတော်စင် တစ်ပါး၏ ဗဟိုချက် ပင်ဖြစ်သည်။ နတ်စံအိမ် ၏ အခြေခံ အုတ်မြစ် က မည်မျှ အစွမ်းထက်သနည်း ဆိုသည်မှာ သိုင်းသူတော်စင် ၏ အခြေခံ အုတ်မြစ် မည်မျှ အစွမ်းထက်သနည်း ဆိုသည်ကို ဆိုလိုပေသည်။ ခန္ဓာကိုယ် အတွင်း၌ လျှို့ဝှက်နယ်မြေ သေးသေးလေး တစ်ခု ဖန်တီးလိုက်သည်နှင့် မကွာခြားချေ။

ထိုအချိန်မှစ၍ သိုင်းသူတော်စင် အနေဖြင့် ကောင်းကင်နှင့် မြေကြီးထံမှ စွမ်းအား ငှားရမ်းရန် မလိုတော့ဘဲ နတ်စံအိမ် အတွင်းမှ ယွမ်ချီ စွမ်းအင်များကို တိုက်ရိုက် ထုတ်ယူ သုံးစွဲနိုင်မည် ဖြစ်သည်။ ယွမ်ရှန်း၏ စွမ်းအားနှင့် ပေါင်းစပ်လိုက်သောအခါ ကိုယ်ပိုင် နယ်ပယ်တစ်ခုကို စုစည်းနိုင်လာမည် ဖြစ်သည်။ ၎င်းကို သိုင်းသူတော်စင် နယ်ပယ် ဟု ခေါ်ဆိုပေသည်။

"နတ်စံအိမ် ဆိုတာ တစ်ကိုယ်လုံး ရဲ့ ကျင့်ကြံခြင်း ဗဟိုချက်ပဲ သိုင်းသူတော်စင် အထွတ်အထိပ် အဆင့် ကို ရောက်တဲ့ အချိန်ကျရင် ခန္ဓာကိုယ် ထဲက နတ်စံအိမ် က လျှို့ဝှက်နယ်မြေ တစ်ခု နဲ့ နှိုင်းယှဉ်လို့ ရနေပြီ အနာဂတ် မှာ ဆိုရင် ကမ္ဘာငယ်လေး တစ်ခု နဲ့တောင် နှိုင်းယှဉ်လို့ ရနိုင်တယ် ဒါပေမဲ့ မင်း က ကိုယ်ပိုင် နတ်စံအိမ် ကို မဖန်တီး ရသေးဘူး သိုင်းသူတော်စင် နယ်ပယ် ကို ဖန်တီး နိုင်ခဲ့တဲ့ အကြောင်းရင်း က မင်း ရဲ့ ယွမ်ရှန်း က ကန့်သတ်ချက် အထိ အစွမ်းထက် နေပြီး ကောင်းကင်နဲ့ မြေကြီး ရဲ့ စွမ်းအား တွေကို တောင့်ခံ နိုင်လို့ပဲ..."

ကျီချန်တောက်၏ ပြောပြချက်ကို နားထောင်ပြီးနောက် ကျန်းချဲ့က ခေါင်းကို လေးလေးနက်နက် ညိတ်ပြလိုက်သည်။

နတ်စံအိမ်၏ အရေးပါမှုကို သူ သဘာဝကျစွာ အလွန် ရှင်းလင်းစွာ သိရှိထားသည်။ နတ်စံအိမ် ကို ဖန်တီးချင်ပါက ယွမ်ရှန်းအဆင့် သို့ ရောက်ရှိရန်မှာ အခြေခံအချက် သက်သက်သာ ဖြစ်ပြီး ကောင်းကင်နှင့် မြေကြီး၏ ဝိညာဉ်ပစ္စည်း များကို ဗဟိုချက် အဖြစ် အသုံးပြုကာ နတ်စံအိမ်ကို ဖိနှိပ် ထိန်းချုပ်ထားရန် လိုအပ်ပေသည်။

ဤကဲ့သို့သော ပစ္စည်းမျိုး ထျန်းယွမ်မြို့ အတွင်းတွင် ရှိနေပေသည်။ သို့သော် ထျန်းယွမ်မြို့ အတွင်းရှိ ထို ဝိညာဉ်ပစ္စည်း များ က နောင်တစ်ချိန်တွင် သူ၏ ပူဇော်ပစ္စည်း များ အဖြစ် ဖြစ်လာရန် မလုံလောက်နိုင်ကြောင်း ကျန်းချဲ့ ထင်မြင်မိသည်။ သေချာသည်မှာ ဟုတ်သည်ဖြစ်စေ၊ မဟုတ်သည်ဖြစ်စေ သူ စမ်းသပ်ကြည့်ရန် လိုအပ်သေးသည်။ သို့သော် ယခုအချိန်က မသင့်တော်သေးချေ။

"ယန်ဝိညာဉ် က ချီစွမ်းအင် ကျင့်ကြံ ခြင်း ရဲ့ ဗဟိုချက် ဖြစ်ပြီး ရုပ်ပိုင်းဆိုင်ရာ ခန္ဓာကိုယ် က ရုပ်ပိုင်းဆိုင်ရာ ကျင့်ကြံ ခြင်း ရဲ့ ဗဟိုချက်ပဲ အခု မင်း က နတ်စွမ်းရည် ပြီးပြည့်စုံ သွားပြီ ခန္ဓာကိုယ် ထဲက သွေးကြော အမှတ် သုံးရာ့ ခြောက်ဆယ့် ငါးခု စလုံး လည်း ပွင့်သွားပြီ ကိုယ်တွင်း အင်္ဂါ တွေ အရိုး အကြော နဲ့ သွေးသား တွေ ကလည်း သာမန် သေမျိုး တွေ စိတ်ကူး လို့ မရနိုင်တဲ့ အပြောင်းအလဲ တွေ ဖြစ်ပေါ် ခဲ့ပြီးပြီ နောက် တစ်ဆင့် ခန္ဓာကိုယ် ကို သိုင်းသူတော်စင် အဆင့် ကို မြှင့်တင် တဲ့ အခါကျရင် မင်း အနေနဲ့ သေချာပေါက် သတိထား ရမယ် မျက်ကန်း အရမ်းကာရော အဆင့်တက်လှမ်း ဖို့ မကြိုးစား နဲ့..."

ကျီချန်တောက်က ကျန်းချဲ့ကို သတိပေးရင်း သိုင်းသူတော်စင် အဆင့်နှင့် ပတ်သက်သော ဉာဏ်အလင်းပွင့်မှု အချို့ကို ပြောပြနေသည်။

သို့သော် ကျန်းချဲ့ ကတော့ တစ်ဝက်နားလည် တစ်ဝက်နားမလည် ဖြင့် နားထောင်နေရသည်။ မည်သို့ပင်ဆိုစေ တိကျသော အဆင့်အတန်း တစ်ခုသို့ မရောက်ရှိပါက ထိုအရာများ အတွင်းရှိ ထူးဆန်းနက်နဲမှုများကို အခြေခံအားဖြင့် နားလည်နိုင်မည် မဟုတ်ချေ။ သို့သော် ကျီချန်တောက်၏ လမ်းညွှန်မှုကိုတော့ သူ အလွန် ကျေးဇူးတင်မိသည်။

သူနှင့် ကျီချန်တောက် တို့ကြားတွင် ဆရာတပည့် ဟူသော အမည်နာမ မရှိသော်လည်း ဆရာတပည့် အစစ်အမှန် သံယောဇဉ်မျိုး ရှိနေပေသည်။

"ထျန်းယွမ် ရဲ့ တစ်ဖက်ခြမ်း က ဘယ်လို အခြေအနေ မျိုး ရှိနေမယ် လို့ မင်း ထင်လဲ" ဟု ကျီချန်တောက်က ရုတ်တရက် စကားလမ်းကြောင်း ပြောင်းလိုက်ပြီး အဝေးဆီသို့ လှမ်းကြည့်လိုက်သည်။

"မသိပါဘူး"

ကျန်းချဲ့က ခေါင်းခါရမ်းလိုက်သည်။ ထျန်းယွမ်မြို့ အတွင်းတွင် မျက်နှာချင်းဆိုင်ရှိ ဝမ်ယောင်းမြို့ နှင့် ပတ်သက်သော မှတ်တမ်းများ ရှိသော်လည်း သူ က ပြင်ပလောက စစ်မြေပြင်တွင် မိစ္ဆာမျိုးနွယ်နှင့် တစ်ပွဲသာ တိုက်ခိုက်ခဲ့ဖူးပြီး တိကျသော အရာများကို မသိရှိသေးချေ။

"ငါ နဲ့ အတူ ဝမ်ယောင်းမြို့ ကို တစ်ခေါက် လောက် သွားရဲလား" ဟု ကျီချန်တောက်က ထပ်မံ မေးလိုက်သည်။

ယခုအခါ ကျန်းချဲ့က အဆင့်တက်လှမ်း ပြီးခါစ ဖြစ်ပြီး သိုင်းသူတော်စင် နှင့် နှိုင်းယှဉ်၍ ရနိုင်သော စွမ်းအားကို ပိုင်ဆိုင်ထားရာ မူလကတည်းက စိတ်ဓာတ် တက်ကြွနေသည်။ ကျီချန်တောက်၏ စကားကို ကြားသောအခါ သူ၏ မျက်ဝန်းများ ချက်ချင်း ကျဉ်းမြောင်းသွားသည်။

"ဘာလို့ မသွားရဲ ရမှာလဲ"

"သွားကြစို့"

ကျီချန်တောက်က အပိုစကားများ ဆက်မပြောတော့ဘဲ ခြေတစ်လှမ်း လှမ်းလိုက်ရာ နယ်မြေတစ်ခုလုံးကို တိုက်ရိုက် သယ်ဆောင်သွားသည့်အလား ကျန်းချဲ့ကိုပါ ရစ်ပတ်ခေါ်ဆောင်သွားပြီး မျက်တောင်တစ်ခတ်အတွင်း မိုင်ရာပေါင်းများစွာကို ဖြတ်ကျော်သွားတော့သည်။

ထျန်းယွမ်၏ တိမ်တိုက် အတားအဆီးကို ဖြတ်ကျော်ကာ အသက်ရှူကြိမ် အနည်းငယ်အတွင်းမှာပင် အဝေး ကောင်းကင်ယံတွင် မတ်မတ်ရပ်နေသော ခမ်းနားထည်ဝါသည့် မြို့ကြီးတစ်မြို့ကို လှမ်းမြင်လိုက်ရသည်။ မြို့၏ အထက်တွင် မိစ္ဆာ အငွေ့အသက်များက ရစ်ဝဲနေပြီး တိမ်တိုက်များ အဖြစ် ဖုံးလွှမ်းနေပေသည်။

ကြောက်မက်ဖွယ်ကောင်းသော အရှိန်အဝါများက တစ်ခုပြီးတစ်ခု ထွက်ပေါ်နေပြီး မြို့၏ အရပ်လေးမျက်နှာ တွင် သန်းနှင့်ချီသော မိစ္ဆာစစ်သည်များ ရှိနေကာ တစ်ချက် ကြည့်လိုက်ရုံဖြင့် ဖိနှိပ်မှု အပြည့်အဝ ရှိနေပေသည်။

ကျန်းချဲ့က ကျီချန်တောက်၏ အနောက်မှ လိုက်ပါလာပြီး ကောင်းကင်ယံမှ ပင်လယ်ပြင်ကို ကြည့်ရှုရသည့် အရသာမျိုးကို ကိုယ်တိုင် ခံစားလိုက်ရသည်။ ယခုအခါ အောက်ဘက်ရှိ အဆုံးအစကို မမြင်ရသော ဧရာမ မြို့ကြီးကို ငုံ့ကြည့်ရင်း ပုံရိပ်ယောင် နတ်မီးတောက် ကို လှုံ့ဆော်ကာ မိစ္ဆာ သောင်းပေါင်းများစွာကို တစ်ကြိမ်လောက် လောင်ကျွမ်းပစ်ချင်စိတ်များ ဖြစ်ပေါ်နေတော့သည်။

"မိစ္ဆာနယ်မြေ က အရမ်း ကျယ်ပြော ပြီး စွမ်းအားရှင် တွေကလည်း အဆုံးအစ မရှိဘူး လူသား မျိုးနွယ် ရဲ့ လောက နတ်ဘုရား တွေ နဲ့ နှိုင်းယှဉ် လို့ ရနိုင်တဲ့ မိစ္ဆာဧကရာဇ် တွေ တောင် တစ်ပါးတည်း မဟုတ်ဘူး ဒီ နေရာ မှာ ရှိတဲ့ မိစ္ဆာသူတော်စင် တွေ ဆိုရင် ဆယ်ဂဏန်း လောက် ရှိတယ် တစ်ပါးချင်း စီ တိုင်း က ကောင်းကင်နဲ့ မြေကြီး ကို တုန်လှုပ် စေနိုင်တဲ့ စွမ်းအား တွေ ရှိကြတယ် နောင်တစ်ချိန် ထျန်းယွမ် သာ ကျိုးပေါက် သွားပြီး မိစ္ဆာသူတော်စင် ဆယ်ပါး ကျော် လောက် ဝိညာဉ်နယ်မြေ ထဲကို ကျူးကျော် ဝင်ရောက် လာရင် အခုလို လူသား မျိုးနွယ် တွေ ကွဲပြား နေပြီး တာ့ကျိုးမင်းဆက် ရဲ့ စွမ်းအား အားနည်း နေတဲ့ အခြေအနေ အောက်မှာ လူသား မျိုးနွယ် ရဲ့ ကပ်ဘေး ကြီး တစ်ခု သေချာပေါက် ပေါက်ကွဲ ထွက်လာလိမ့်မယ် ငါ သိပါတယ်... မင်း က အခြား သူရဲ့ အောက်မှာ နေရတာကို မကျေနပ် ဘဲ ရင်ထဲမှာ ရည်မှန်းချက် ကြီးမား တယ် ဆိုတာ တကယ်လို့ တစ်နေ့နေ့ ကျရင် မင်း က ပုန်ကန် ပြီး တာ့ကျိုးမင်းဆက် နဲ့ လမ်းခွဲ မယ် ဆိုရင် ငါ က မင်း ကို အပြစ် မတင် ပါဘူး ဒါပေမဲ့ မင်း က နောင်တစ်ချိန် မှာ လောက ရဲ့ အရှင်သခင် ဖြစ်လာခဲ့ရင် ထျန်းယွမ် ကို စောင့်ကြပ် ဖို့ က မင်း ရဲ့ တာဝန် ပဲ ဆိုတာကို သေချာပေါက် မှတ်ထားပါ လူသား မျိုးနွယ် တစ်ယောက် အနေနဲ့ ကိုယ့် ရဲ့ မျိုးနွယ် တွေ မိစ္ဆာ မျိုးနွယ် ရဲ့ သွေးသား အစားအစာ တွေ အဖြစ် ကျဆင်း သွားတာကို လုံးဝ အဖြစ်မခံ နဲ့"

ကျီချန်တောက်၏ အသံက တည်ငြိမ်နေသော်လည်း ပုံသဏ္ဌာန်မဲ့စွာဖြင့် လေးနက်သော အရှိန်အဝါ တစ်ခု ဖြာထွက်နေသည်။ ဘေးရှိ ကျန်းချဲ့၏ ရင်ထဲတွင်တော့ အကြီးအကျယ် တုန်လှုပ်သွားပြီး မျက်ဝန်းများ အနည်းငယ် ပြောင်းလဲသွားသည်။

"လက်အောက်ငယ်သား က ပုန်ကန် ဖို့ ရည်ရွယ်ချက် လုံးဝ မရှိပါဘူး နတ်မင်းကြီး နားလည် ပေးစေချင်ပါတယ်"

"လောက ကြီး ရဲ့ အခြေအနေ ဆိုတာ ကွဲကွာ တာ ကြာရင် ပြန်ပေါင်းစည်း ရစမြဲ ပဲ ပေါင်းစည်း တာ ကြာရင်လည်း ပြန်ကွဲကွာ ရစမြဲ ပဲ မင်း ပုန်ကန် မယ် ဆိုရင်တောင် ငါ က အပြစ် မတင် ဘူး လို့ ပြောပြီးသားပါ မင်း က တိကျတဲ့ အဆင့်အတန်း တစ်ခု ကို ရောက်တဲ့ အချိန်ကျရင် မင်း ရဲ့ ရင်ထဲမှာ ပုန်ကန် ချင်စိတ် မရှိရင်တောင် မင်း ကို ပုန်ကန် လာအောင် တွန်းအား ပေးမယ့် သူတွေ ရှိလာလိမ့်မယ် မင်း က အောင်မြင် သွားနိုင်သလို ရည်မှန်းချက် တွေ ကြောင့် ပျက်သုဉ်း သွားနိုင်တယ် ငါ က ဒီ စကား တွေ ပြောရတာ က မင်း ကို ကိစ္စ တစ်ခု ကို သေချာ မှတ်ထား စေချင်လို့ပါ ဒီ မြင်ကွင်း ကို အမြဲတမ်း မှတ်ထားပါ မိစ္ဆာ မျိုးနွယ် တွေ က ကြီးမားတဲ့ ရန်သူ တွေပဲ လုံးဝ ပေါ့ဆ နေလို့ မရဘူး တကယ်လို့ မင်း သာ တစ်နေ့နေ့ မှာ လူသား မျိုးနွယ် ရဲ့ အန္တရာယ် တွေကို ဖြေရှင်း ပေးနိုင်ပြီး မိစ္ဆာနယ်မြေ ကို တန်ပြန် ထိုးစစ်ဆင် နိုင်မယ် ဆိုရင် မင်း ပုန်ကန် ခဲ့ရင်တောင် လောက ကြီး ထဲက ပညာရှိ တွေ က မင်း အတွက် သေချာပေါက် ကာကွယ် ပြောဆို ပေးကြလိမ့်မယ် သေချာတာ က ဧကရာဇ် ပလ္လင် က အဲဒီလောက် ထိုင်ရ လွယ်ကူ တာ မဟုတ်ဘူး လောကအရှင်သခင် ရဲ့ အရိပ်အယောင် မရှိရင် တိုင်းပြည် ကံတရား က ကိုယ်ပိုင် ကျင့်ကြံခြင်းအဆင့် ကို ဖိနှိပ် လိမ့်မယ် ကောင်းကျိုး ရော ဆိုးကျိုး ပါ ရှိတယ် လို့ ပြောလို့ ရတာပေါ့ အော် ဒါနဲ့ နောက်ထပ် ကိစ္စ တစ်ခု ရှိသေးတယ် ငါ့ ရဲ့ တောင်းဆိုချက် လို့ပဲ သတ်မှတ် လိုက်ပါ"

ကျီချန်တောက်က တစ်ခုခုကို ကြိုတင် ခံစားသိရှိနေသည့်အလား ယခုအခါ ပြင်ပလူများ ကြားလျှင် ရင်တထိတ်ထိတ် ဖြစ်သွားစေမည့် စကားများကို ပြောဆိုနေသည်။ ကျန်းချဲ့က အခြားသူ၏ အောက်တွင် နေရသည်ကို မကျေနပ်သော်လည်း ယခုအခါ ကျီချန်တောက်က ဤနေရာတွင် တိုက်ရိုက် ပွင့်ပွင့်လင်းလင်း ပြောဆိုလိုက်သဖြင့် သူ၏ ရင်ထဲတွင်လည်း ရှုပ်ထွေးသွားပြီး ပြောရခက်အောင် ဖြစ်သွားတော့သည်။

ကျီချန်တောက်၏ စကားများကို နားထောင်ပြီးနောက် ကျန်းချဲ့က မူလက ဖြေရှင်းချက်ပေးချင်သော စကားများကို ရင်ထဲတွင် ပြန်လည် မြိုသိပ်လိုက်ပြီး တစ်ခဏမျှ တိတ်ဆိတ်သွားပြီးနောက် ပြောလိုက်သည်။

"နတ်မင်းကြီး ညွှန်ကြား ပါ"

"တာ့ကျိုးမင်းဆက် ရဲ့ ထိုက်ကျူ ဧကရာဇ် က လောက တစ်ခုလုံး ကို ပေါင်းစည်း အပြီးမှာ ဒီ နေရာ မှာ ပူဇော်မှု တွေ လုပ်ပြီး ထျန်းယွမ် ရဲ့ အခြေခံ အုတ်မြစ် ကို ပြန်လည် ဖြည့်ဆည်း ပေးခဲ့တယ် လူသား မျိုးနွယ် အတွက် ကပ်ဘေး ကြီး ကို နှစ်ရာပေါင်း များစွာ တားဆီး ပေးခဲ့တယ် ကြီးမားတဲ့ ကျေးဇူးတရား တွေ ရှိခဲ့ဖူးတယ် တကယ်လို့ မင်း က လုံးဝ ကို ရွေးချယ်စရာ မရှိတော့တဲ့ တစ်နေ့နေ့ ကို ရောက်လာခဲ့ရင် ကျီ မိသားစု အတွက် သွေးကြော မျိုးဆက် တစ်ခု လောက်တော့ ချန်ထား ပေးနိုင်ဖို့ ငါ မျှော်လင့်တယ်"

ကျီချန်တောက်က စကားတစ်ခွန်းချင်းစီကို လေးနက်သော အသံဖြင့် ပြောလိုက်သည်။

ကျန်းချဲ့က ခေါင်းကို လေးလေးနက်နက် ညိတ်ပြလိုက်သည်။

"တကယ်လို့ မလွှဲမရှောင်သာ ပုန်ကန် ရမယ့် နေ့ ရောက်လာ ခဲ့ရင် နတ်မင်းကြီး ရဲ့ ဒီနေ့ စကား ကို ကျန်းချဲ့ သေချာပေါက် ရင်ထဲမှာ မှတ်ထား ပါ့မယ် ဒါပေမဲ့ လက်အောက်ငယ်သား အနေနဲ့ ရင်ထဲက စကား အချို့ ကို မေးချင်ပါသေးတယ်"

"ပြောလေ"

"နတ်မင်းကြီး ရဲ့ စွမ်းအား က ကောင်းကင်နဲ့ မြေကြီး ကို ဖြတ်ကျော် နိုင်ပြီး လောက တစ်ခုလုံး ကို ဖိနှိပ် ထားနိုင်တာကို ဒီနေ့ ဘာကြောင့်များ လက်အောက်ငယ်သား ကို ဒီလို စကား တွေ မှာကြား နေရတာလဲ ဘာ အကြောင်းရင်း များ ရှိနေလို့လဲ"

ကျီချန်တောက်၏ စကားများက မိဘမဲ့ ကလေးငယ်ကို အပ်နှံနေသည့် အဓိပ္ပာယ်မျိုး သက်ရောက်နေကြောင်း ကျန်းချဲ့ ခံစားမိသွားရာ ရင်ထဲတွင် ဝမ်းနည်း ကြေကွဲသွားတော့သည်။

ကျီချန်တောက် ရှိနေသရွေ့ တာ့ကျိုးမင်းဆက် က သူ့ကို ကြောက်ရွံ့နေမည် မဟုတ်သလို သူ ကိုယ်တိုင်ကလည်း ပုန်ကန်မည် မဟုတ်ချေ။ မည်သို့ပင်ဆိုစေ ကျန်းချဲ့၏ အမြဲတမ်း ရည်မှန်းချက်မှာ နယ်မြေတစ်ခုကို သိမ်းပိုက်ကာ ဘုရင်တစ်ပါး အဖြစ် စိုးစံပြီးနောက် တာအိုလမ်းစဉ်ကို လေ့ကျင့်ကာ ထာဝရအသက်ကို ရှာဖွေရန် ပင်ဖြစ်သည်။ အမှန်တကယ်တော့ ဧကရာဇ် ပလ္လင် အပေါ်တွင် သူ အများကြီး စွဲလမ်းမှု မရှိချေ။

ထာဝရ အသက်ရှည်ခြင်း နှင့် နှိုင်းယှဉ်ပါက လူ့လောက၏ အာဏာစက် ဆိုသည်မှာ အမှန်တကယ်တော့ နှိုင်းယှဉ်စရာ ပင် မလိုလောက်အောင် သေးငယ်လှပေသည်။

"မင်း တွေးတာ များသွားပြီ လောက ကြီး ထဲမှာ ငါ့ ကို သတ်နိုင်တဲ့ သူ ဆိုတာ မမွေးဖွား လာသေးပါဘူး ငါ က မင်း ရဲ့ ယွမ်ရှန်း ကန့်သတ်ချက် ကို ချိုးဖျက် ပြီး ဆယ်လက်မ အထိ ရောက်သွားတာကို တွေ့လိုက်ရလို့ ဒီလို စကား တွေ မှာကြား နေရတာပါ" ဟု ကျီချန်တောက်က ထိုစကားကို ကြားသောအခါ ဖွဖွ ရယ်မောလိုက်သည်။

ဤစကားကို ကျန်းချဲ့က တစ်ဝက် ယုံကြည်ပြီး တစ်ဝက် သံသယ ဝင်နေသော်လည်း ခေါင်းညိတ်ကာ ပြန်ပြောလိုက်သည်။

"လက်အောက်ငယ်သား နားလည်ပါပြီ"

ကျန်းချဲ့၏ စကားသံ အဆုံးတွင် ပတ်ဝန်းကျင်က နောက်တစ်ကြိမ် တိတ်ဆိတ်သွားပြန်သည်။ ကျီချန်တောက် နှင့် သူ၏ ကြားတွင် ပုံသဏ္ဌာန်မဲ့သော တံတိုင်းကြီး တစ်ခု ခြားသွားသည့်သဖွယ် ပင်ဖြစ်သည်။ ကျီချန်တောက်က သူ့ကို တစ်ချက် ကြည့်လိုက်ပြီး ရုတ်တရက် စကားဆိုလိုက်သည်။

"မင်း ဒီနေ့ ကန့်သတ်ချက် ကို ချိုးဖျက် နိုင်ခဲ့ပြီး ယွမ်ရှန်း ပြီးပြည့်စုံ သွားတဲ့ အတွက် ငါ က မင်း ကို ရတနာ ပစ္စည်း တစ်ခု လက်ဆောင် ပေးမယ်"

"ဗျာ..."

ကျန်းချဲ့က တစ်ခဏမျှ ကြက်သေသေသွားပြီး နားမလည်နိုင်အောင် ဖြစ်သွားသည်။

'နတ်မင်းကြီး ရဲ့ လက်ဆောင် ဟုတ်လား... ဘာ ပစ္စည်း များ ဖြစ်နေမလဲ' ဟု တွေးလိုက်မိသည်။

ကျန်းချဲ့ မေးမြန်းရန် အချိန်ပင် မရလိုက်မီ ကျီချန်တောက်က ခြေတစ်လှမ်း လှမ်းလိုက်ပြီး မိစ္ဆာ အငွေ့အသက်များ ဖုံးလွှမ်းနေသော တိမ်တိုက်ပင်လယ် အတွင်းမှ ထွက်ပေါ်လာကာ သူ၏ တစ်ကိုယ်လုံးမှ အရှိန်အဝါ တစ်ခု ဖြာထွက်လာပြီး ရန်စနေသည့်ပမာ ပင်ဖြစ်သည်။

အောက်ဘက်တွင်တော့ ချက်ချင်းပင် တုံ့ပြန်မှုများ ထွက်ပေါ်လာတော့သည်။

"ဘယ်က နတ်ဘုရား က ဝမ်ယောင်းမြို့ ကို လာပြီး ချောင်းကြည့် ရဲတာလဲ"

ဟိန်းဟောက်သံ တစ်ခုနှင့်အတူ အလွန် အစွမ်းထက်သော အရှိန်အဝါ တစ်ခု က ကောင်းကင်ယံသို့ တိုက်ရိုက် ထိုးတက်လာသည်ကို တွေ့မြင်လိုက်ရသည်။ ချက်ချင်းပင် ပေတစ်ထောင် အရွယ်အစားရှိသော ဧရာမ မိစ္ဆာ ကျားကြီး တစ်ကောင်က မိစ္ဆာ ခန္ဓာကိုယ် အစစ်အမှန်ကို ထုတ်ဖော်လိုက်တော့သည်။ ကောင်းကင်နှင့် မြေကြီးကို ဖြတ်သန်းသွားသော ပြိုင်ဘက်ကင်း သားရဲကြီး တစ်ကောင် သဖွယ် ပင်ဖြစ်သည်။

ထိုအရာက အခြားမဟုတ်ဘဲ ယခင်က ကျန်းချဲ့ကို တိုက်ခိုက်ခဲ့သော ထို မိစ္ဆာ မဟာသူတော်စင် ပင်ဖြစ်သည်။ ယခုအခါ သူ၏ ကျား မျက်လုံး တစ်စုံက ကောင်းကင်နှင့် မြေကြီးကို ဝေ့ကြည့်နေပြီး တစ်စုံတစ်ယောက်ကို ရှာဖွေနေသည့်အလား ရိုင်းစိုင်းကြမ်းတမ်းသော သတ်ဖြတ်လိုစိတ်များ အရပ်လေးမျက်နှာသို့ ဖြာထွက်နေသည်။ အမြင့်ဆုံးသော နတ်ဘုရား အစွမ်းများကို သယ်ဆောင်လာပေသည်။

ကျီချန်တောက်က စပါးကြီးမြွေ ဝတ်ရုံကို ဝတ်ဆင်ထားပြီး ကိုယ်ပတ်လည်ရှိ တိမ်တိုက် မြူခိုးများက ဖြည်းညင်းစွာ ပျောက်ကွယ်သွားကာ အစစ်အမှန် ခန္ဓာကိုယ်ကို ထုတ်ဖော်လိုက်ပြီး ထို မိစ္ဆာ မဟာသူတော်စင် နှင့် အချင်းချင်း မျက်နှာချင်းဆိုင် ကြည့်လိုက်ကြသည်။

လေထုက မျက်တောင်တစ်ခတ်စာမျှ တိတ်ဆိတ်သွားပြီး နောက်တစ်ခဏတွင် အတောင်ပံ နှစ်ဖက် ပါရှိသော အနက်ရောင် မိစ္ဆာ ကျားကြီးက အကြီးအကျယ် ထိတ်လန့်သွားသည့်အလား ချက်ချင်း နောက်လှည့်ကာ ထွက်ပြေးသွားတော့သည်။ ပါးစပ်မှလည်း အော်ဟစ် ဟိန်းဟောက်သံကြီး တစ်ခု ထွက်ပေါ်လာတော့သည်။

"ကျီချန်တောက် ရောက်လာပြီ ငါ့ ကို အမြန်ဆုံး လာကူညီကြပါဦး”

အခန်း ၅၁၄ ပူဇော်ခြင်း... သိုင်းသူတော်စင်အဆင့်

ကျီချန်တောက်၏ အစွမ်းထက်မှုက မည်သို့မျှ သံသယဝင်စရာ မလိုချေ။ မိစ္ဆာသူတော်စင်လို အစွမ်းထက်သည့် တည်ရှိမှုကပင် သူ့ကို မျက်နှာချင်းဆိုင် ရင်ဆိုင်ရန် မဝံ့ရဲချေ။ မည်သို့ပင်ဆိုစေ သူက မိစ္ဆာဧကရာဇ်နှင့် ယှဉ်ပြိုင်နိုင်စွမ်းရှိသော ဤခေတ်၏ အစစ်အမှန် အထွတ်အထိပ် တည်ရှိမှု ပင်ဖြစ်သည်။

ထို့ကြောင့် ကျားမိစ္ဆာ မဟာသူတော်စင်က ကျီချန်တောက် ရှိနေကြောင်း သတိပြုမိသွားသည်နှင့် တစ်ပြိုင်နက် အနည်းငယ်မျှ တွေဝေနေခြင်းမရှိဘဲ အနောက်ဘက်သို့ ချက်ချင်း လှည့်ပြေးတော့သည်။ ခြေတစ်လှမ်း နောက်ကျသွားပါက ဤနေရာတွင် အသက်စွန့်သွားရမည်ကို အလွန်အမင်း ကြောက်ရွံ့နေခဲ့သည်။

သို့သော် ကျီချန်တောက်က လှုပ်ရှားလိုက်ပြီဖြစ်ရာ တစ်ဖက်လူကို လွယ်လွယ်ကူကူ ထွက်သွားခွင့် ပြုမည်မဟုတ်ချေ။ ကျန်းချဲ့ အပါအဝင် လူအများ စောင့်ကြည့်နေစဉ်မှာပင် ကျီချန်တောက်က လက်ဖဝါးတစ်ဖက်ကို ဖြည်းညင်းစွာ မြှောက်လိုက်သည်။

နောက်တစ်ခဏတွင် ပြိုင်ဘက်ကင်းသော ဖိနှိပ်မှုကြီးတစ်ခု ချက်ချင်း ကျဆင်းလာသည်။ ပတ်ဝန်းကျင် ပေတစ်သိန်းအကျယ်အဝန်းရှိ လေဟာနယ်က ရုတ်တရက် ရပ်တန့်သွားတော့သည်။ ကြောက်မက်ဖွယ်ကောင်းသော သိုင်းသူတော်စင်နယ်ပယ် ပေါက်ကွဲထွက်လာမှုအောက်တွင် ဤလောကတစ်ခုလုံးကို တိုက်ရိုက် ထိန်းချုပ်လိုက်သည့်အလား ပင်ဖြစ်သည်။

"ဝေါင်း..."

သေရေးရှင်ရေး အန္တရာယ်ကို အာရုံခံမိသွားပြီးနောက် ကျားမိစ္ဆာ မဟာသူတော်စင်၏ ရင်ထဲတွင် ပို၍ပင် စိုးရိမ်ပူပန်သွားသည်။ အတောင်ပံနှစ်ဖက်ကို ခတ်ကာ ဤနေရာမှ ထွက်ပြေးရန် ကြိုးစားလိုက်တော့သည်။ ထိုအရာက သူ၏ မွေးရာပါ နတ်စွမ်းရည်ဖြစ်ပြီး အတောင်ပံ တစ်ချက်ခတ်လိုက်ရုံဖြင့် မိုင်ထောင်ပေါင်းများစွာကို ဖြတ်ကျော်နိုင်ပေသည်။ ကောင်းကင်ပန်ငှက်မျိုးနွယ်၏ မိစ္ဆာသူတော်စင် အောက်တွင်သာ ရှိပေသည်။

"နေခဲ့လိုက်စမ်းပါ" ဟု ကျီချန်တောက်၏ နှုတ်မှ စကားလုံးအနည်းငယ် ထွက်ကျလာသည်။ သာမန် မိစ္ဆာဘုရင်တစ်ကောင်ကို ဖိနှိပ်နေသည့်အလား ပြောလိုက်သည့်စကားက တရားသေ အမိန့်တစ်ခုအဖြစ် ပြောင်းလဲသွားသည်။ ထို ကျားမိစ္ဆာ မဟာသူတော်စင်မှာ တစ်ကိုယ်လုံးတွင် သံကြိုးများ ရစ်ပတ်ခံလိုက်ရသည့်အလား ခံစားလိုက်ရသည်။

ပေတစ်ထောင် အရွယ်အစားရှိသော ဧရာမ အစစ်အမှန် ခန္ဓာကိုယ်ကြီးက ကောင်းကင်နှင့် မြေကြီး၏ ဖိနှိပ်မှုအောက်တွင် ပေအနည်းငယ် အရွယ်အစားအထိ သေးငယ်သွားပြီး ကျီချန်တောက်၏ လက်ထဲသို့ အလွယ်တကူ ရောက်ရှိသွားတော့သည်။ သူ၏ လက်ထဲတွင် ဧရာမ နယ်မြေကြီးတစ်ခု ရှိနေသည့်အလား ပင်ဖြစ်သည်။ အဆက်မပြတ် ရုန်းကန်နေသော အနက်ရောင် ကျားတစ်ကောင်ကို လက်ထဲတွင် ကိုင်ဆောင်ထားပြီးနောက် လက်စွပ်အတွင်းသို့ ပေါ့ပေါ့ပါးပါး သိမ်းဆည်းလိုက်တော့သည်။

တုန်လှုပ်ဖွယ်ရာ ပင်ဖြစ်သည်။ ဤအခိုက်အတန့်တွင် ကျီချန်တောက်က ကျန်းချဲ့အပေါ် ပေးစွမ်းလိုက်သော အမြင်ကို ဤစကားလုံးများဖြင့်သာ ဖော်ပြ၍ ရနိုင်တော့သည်။

ကျီချန်တောက်က အလွန် အစွမ်းထက်ကြောင်းကို ကျန်းချဲ့ သိရှိထားသည်။ အကယ်၍ ထိုသို့သာမဟုတ်ပါက အမြင့်ဆုံး သိုင်းသူတော်စင်စာရင်း၏ ဒုတိယနေရာတွင် တိုက်ရိုက် သတ်မှတ်ခံရမည် မဟုတ်ဘဲ လက်တွေ့တွင် လောက၏ နံပါတ်တစ် ပင်ဖြစ်သည်။ သို့သော် ကျန်းချဲ့က ကျီချန်တောက် လှုပ်ရှားတိုက်ခိုက်သည်ကို ကိုယ်တိုင်ကိုယ်ကျ တစ်ကြိမ်တစ်ခါမျှ မမြင်တွေ့ခဲ့ဖူးချေ။ ကျီချန်တောက်၏ စွမ်းအားနှင့် ပတ်သက်၍ တိကျသော ခန့်မှန်းချက်မျိုး သူ့တွင် မရှိခဲ့ချေ။ သို့သော် ယခုအခါ သူ့တွင် ခန့်မှန်းချက် ရှိသွားပြီ ဖြစ်သည်။

အစစ်အမှန် မိစ္ဆာ မဟာသူတော်စင်တစ်ပါး၊ ကောင်းကင်နှင့် မြေကြီး၏ ထိပ်ဆုံးတွင် ရပ်တည်နေသော အစွမ်းထက်ဆုံး တည်ရှိမှုတစ်ခုက ယခုအခါ ပုရွက်ဆိတ်တစ်ကောင်အလား ကျီချန်တောက်၏ လက်တစ်ချက် ဝှေ့ယမ်းမှုအောက်တွင် ဖိနှိပ်ခံလိုက်ရလေသည်။ ဤသည်က မည်မျှ ကြီးမားသော စွမ်းအားမျိုး ဖြစ်မည်ကို စဉ်းစားကြည့်၍ပင် ရနိုင်ပေသည်။ ကွာဟချက်က မည်မျှအထိ ကြီးမားနေမည်ကိုလည်း မှန်းဆနိုင်ပေသည်။

"သွားကြစို့" ဟု ပြောပြီးနောက် မိစ္ဆာသူတော်စင် တစ်ပါးကို ဖမ်းဆီးပြီးနောက် ကျီချန်တောက်က တိုက်ပွဲကို ဆက်လက် မက်မောနေခြင်းမရှိဘဲ နောက်လှည့်ကာ ကျန်းချဲ့ကို ခေါ်ဆောင်၍ ထွက်ခွာသွားတော့သည်။ ဤအခိုက်အတန့်တွင် အောက်ဘက်ရှိ မိစ္ဆာသူတော်စင် များစွာကလည်း အခြေအနေကို သဘောပေါက်သွားကြပြီ ဖြစ်သည်။ ကောင်းကင်နှင့် မြေကြီးကို တုန်လှုပ်စေသော ဟိန်းဟောက်သံများ ဆက်တိုက် ထွက်ပေါ်လာတော့သည်။

"ရဲတင်းလှတဲ့ ကျီချန်တောက်... ဝမ်ယောင်းမြို့ ထဲမှာတောင် လာပြီး ရမ်းကား ရဲတယ်ပေါ့လေ"

"သေချင်နေတာပဲ"

"အားလုံး အတူတူ တိုက်ခိုက်ကြ... ဒီလူကို အရင်ဆုံး ဝိုင်းဝန်း သတ်ဖြတ်ကြစို့"

"ကောင်းကင်ဘုံ ကို သွားတဲ့ လမ်းရှိလျက်နဲ့ မသွားဘဲ ငရဲပြည် တံခါးကို အတင်း ဝင်လာတယ်ပေါ့လေ... ကျီချန်တောက် နေခဲ့လိုက်စမ်းပါ"

ပေထောင်ပေါင်းများစွာ အရွယ်အစားရှိသော ခြေသည်းငါးချောင်း အစစ်အမှန် နဂါး၊ တစ်ကိုယ်လုံးတွင် နတ်မီးတောက်များ တောက်လောင်နေသော ကျူးချွဲ၊ လိပ်ခွံ ဖုံးလွှမ်းနေသော လိပ်နက်၊ ခေါင်းတွင် ဦးချိုတစ်ချောင်း ပေါက်နေသော ခွေနျိုနတ်နွား စသည့် ဧရာမ အစစ်အမှန် ခန္ဓာကိုယ်ကြီးများက ကောင်းကင်နှင့် မြေကြီးကြားတွင် တစ်ခုပြီးတစ်ခု ထွက်ပေါ်လာကြသည်။ အားလုံးက တစ်ပြိုင်နက်တည်း လှုပ်ရှားလိုက်ကြပြီး ကျီချန်တောက်ထံသို့ အပြင်းအထန် တိုက်ခိုက်လာကြတော့သည်။

လေဟာနယ်အတွင်း မျက်တောင်တစ်ခတ်အတွင်း အမြင့်ဆုံးသော ပေါက်ကွဲမှုကြီးတစ်ခု ဖြစ်ပေါ်သွားသည်။ လေဟာနယ်က အစိတ်စိတ်အမွှာမွှာ ရိုက်ချိုးခံလိုက်ရကာ အဆုံးအစမရှိသော လေဟာနယ် ရေစီးကြောင်းများ ပေါက်ကွဲထွက်လာတော့သည်။ သို့သော် ကျီချန်တောက်၏ ကိုယ်ပေါ်တွင် မြူခိုးတစ်လွှာ ဖုံးလွှမ်းနေသည့်အလား ဤလောက နယ်မြေအတွင်း လုံးဝ ရှိမနေသည့်ပမာ ပင်ဖြစ်သည်။ မိစ္ဆာ မဟာသူတော်စင် အချို့၏ တိုက်ခိုက်လာမှုကို ကျီချန်တောက်က မျက်လုံးတစ်ချက်ပင် ငဲ့မကြည့်ခဲ့ချေ။

ခြေတစ်လှမ်း လှမ်းလိုက်သည်နှင့် ပတ်ဝန်းကျင်ရှိ ကောင်းကင်နှင့် မြေကြီးက လည်ပတ်သွားပြီး ကျန်းချဲ့ကို ခေါ်ဆောင်ကာ မိုင်ရာပေါင်းများစွာကို မျက်တောင်တစ်ခတ်အတွင်း ဖြတ်ကျော်သွားတော့သည်။ ခြေတစ်လှမ်းတည်းဖြင့် ဝမ်ယောင်းမြို့၏ ပိုင်နက်မှ ကျော်လွန်သွားခဲ့ပြီ ဖြစ်သည်။ အနောက်ဘက်တွင် မိစ္ဆာသူတော်စင် ဆယ်ပါးနီးပါးက အနီးကပ် လိုက်လံ ဖမ်းဆီးလာကြသည်။ အဆက်မပြတ် ဟိန်းဟောက်နေကြပြီး ကျီချန်တောက်ကို သတ်ဖြတ်ရန် အော်ဟစ်နေကြတော့သည်။

ကျီချန်တောက်ကတော့ ကျန်းချဲ့ကို ခေါ်ဆောင်ကာ ပန်းခြံအတွင်း လမ်းလျှောက်နေသည့်အလား ပေါ့ပေါ့ပါးပါး ရှိနေပြီး ကျန်းချဲ့ကို အလွန် ကြီးမားသော တုန်လှုပ်မှုကြီးတစ်ခု ပေးစွမ်းလိုက်သည်။ အသက်ရှူကြိမ် အနည်းငယ် အကြာတွင် ကျီချန်တောက်က ထျန်းယွမ်၏ တိမ်တိုက် အတားအဆီး အထက်တွင် ရပ်တန့်သွားတော့သည်။ ခြေလှမ်းများကို ရပ်တန့်ကာ လက်ကို နောက်ပစ်၍ မတ်မတ်ရပ်လိုက်ပြီးနောက် အနောက်မှ လိုက်လံ ဖမ်းဆီးလာသော မိစ္ဆာသူတော်စင် များစွာကို လှည့်ကြည့်လိုက်ရာ မျက်နှာပေါ်တွင် အနည်းငယ်မျှပင် ကြောက်ရွံ့သည့် အရိပ်အယောင် မရှိချေ။

သို့သော် ကျီချန်တောက် ခြေလှမ်း ရပ်တန့်သွားသည့် အချိန်တွင် အနောက်ဘက်ရှိ မိစ္ဆာသူတော်စင် များစွာက ဤအခိုက်အတန့်တွင် တစ်ပြိုင်နက်တည်း လက်တန့်သွားကြသည်။ သူတို့၏ မျက်ဝန်းများထဲတွင် ပြင်းထန်သော သတ်ဖြတ်လိုစိတ်များနှင့် ကြောက်ရွံ့မှုများ ပါဝင်နေသည်။ အဘယ်ကြောင့်ဆိုသော် ဤနေရာက ထျန်းယွမ်၏ နယ်မြေအတွင်းသို့ ရောက်ရှိနေပြီ ဖြစ်သောကြောင့် ပင်ဖြစ်သည်။ သူတို့က အလွယ်တကူ လှုပ်ရှားတိုက်ခိုက်ရန် လုံးဝ မဝံ့ရဲကြချေ။ အကယ်၍ လှုပ်ရှားလိုက်ပါက မိစ္ဆာသူတော်စင် မည်မျှ အသတ်ခံရမည်ကို ပင် မသိနိုင်တော့ချေ။ ထျန်းယွမ်၏ အပြင်ဘက်တွင် ရပ်တန့်ကာ အချည်းနှီး ဒေါသထွက်နေရုံသာ ရှိတော့သည်။

"ကျီချန်တောက်... တကယ်လို့ မင်း သတ္တိရှိရင် ထျန်းယွမ် ကနေ ထွက်လာပြီး ငါတို့ နဲ့ ယှဉ်ပြိုင် တိုက်ခိုက်စမ်း... ထျန်းယွမ် ရဲ့ အနောက်မှာ ပုန်းအောင်း နေတာက ဘာ သတ္တိ လဲ"

"အမှန်ပဲ... ခေါင်းဝှက်ပြီး အမြီးဖျောက်နေတာ... ဝမ်ယောင်းမြို့ အပြင်ဘက်မှာ ပုန်းအောင်း ပြီး ငါတို့ ကို ချောင်းမြောင်း တိုက်ခိုက်တယ်... မင်း ကျီချန်တောက် မှာ ဒီလောက်လေးပဲ သတ္တိ ရှိတာလား"

"ရှောင်ထျန်း မဟာသူတော်စင် ကို အမြန် လွှတ်ပေးစမ်း... အဲဒီလိုမှ မဟုတ်ရင် ထျန်းယွမ် ကျိုးပေါက် သွားတာနဲ့ ငါ က ထျန်းယွမ်မြို့ ကို သွေးချောင်းစီးအောင် လုပ်ပစ်မယ်"

"ကျီချန်တောက်..."

မိစ္ဆာသူတော်စင် ဆယ်ပါးနီးပါးက ထျန်းယွမ်၏ အပြင်ဘက်တွင် အဆက်မပြတ် ဟိန်းဟောက် ရန်စနေကြသည်။ ကြမ်းတမ်းသော အရှိန်အဝါများက မိုးကြိုးများ ဆက်တိုက် ကျဆင်းလာသည့်အလား ပင်ဖြစ်သည်။ ၎င်းတို့၏ ဟိန်းဟောက်သံ သက်သက်ကပင် အသံလှိုင်းများ အဖြစ် ပြောင်းလဲသွားပြီး အရပ်လေးမျက်နှာသို့ လွှမ်းခြုံသွားတော့သည်။

ကျီချန်တောက်၏ အကြည့်က မိစ္ဆာသူတော်စင် များစွာကို ဝေ့ကြည့်လိုက်ရာ မျက်ဝန်းများထဲတွင် အထင်သေး နှာခေါင်းရှုံ့မှု အရိပ်အယောင် အချို့ ပါဝင်နေသည့်အလား ပင်ဖြစ်သည်။ ရှေ့သို့ ခြေတစ်လှမ်း လှမ်းလိုက်ရာ ထျန်းယွမ်၏ တိမ်တိုက် အတားအဆီးမှ တိုက်ရိုက် ထွက်ခွာသွားပြီး တစ်ကိုယ်လုံးရှိ အမြင့်ဆုံးသော ဖိနှိပ်မှုက လုံးဝ ပေါက်ကွဲထွက်လာတော့သည်။ သူ၏ အနောက်ဘက်တွင် ပေတစ်သောင်း အရွယ်အစားရှိသော ပုံရိပ်ယောင်ကြီး တစ်ခုက ဖြည်းညင်းစွာ ပေါ်ထွက်လာသည်။

"ဘယ်သူ အရင် လာပြီး သေမလဲ" ဟု ကြောက်မက်ဖွယ်ကောင်းသော အသံကြီးက ကောင်းကင်နှင့် မြေကြီးကို လွှမ်းခြုံသွားပြီး မိစ္ဆာသူတော်စင် များ အားလုံး၏ နားထဲသို့ ရောက်ရှိသွားတော့သည်။ ထို့နောက် ကြိုတင် တိုင်ပင်ထားသည့်အလား မိစ္ဆာသူတော်စင် ဆယ်ပါးနီးပါးက တစ်ပြိုင်နက်တည်း ပေရာပေါင်းများစွာ အနောက်သို့ ဆုတ်ခွာသွားကြတော့သည်။

"ကျီချန်တောက်... မင်း ရှေ့ကို ထပ်တိုး ရဲသေးလား"

"အားလုံး အတူတူ တိုက်ခိုက်ကြ... ကျီချန်တောက် က ငါတို့ အားလုံးကို သတ်ပစ်နိုင်မယ် လို့ ငါ ကတော့ မယုံဘူး"

"အားလုံးပဲ တည်ငြိမ်ကြပါဦး... ပန်ဧကရာဇ် နဲ့ နွားဧကရာဇ် တို့ က ဝမ်ယောင်းမြို့ ကို မရောက်သေးဘူး... တကယ်လို့ စစ်ပွဲ စတင်လိုက်ရင် အနိုင်ရနိုင်ခြေ သိပ်မများဘူး"

"ကျီချန်တောက် ဒီနေရာမှာ ရမ်းကားနေတာကို ဒီတိုင်း သည်းခံနေရတော့မှာလား... ငါတို့ ကို အသုံးမကျတဲ့ကောင်တွေ လို သဘောထားနေတာ... တကယ်ကို သေချင်နေတာပဲ"

"အမှန်ပဲ အားလုံး ပူးပေါင်း တိုက်ခိုက်ကြစို့... ကျီချန်တောက် က ငါတို့ မိစ္ဆာသူတော်စင် ကိုးပါး ကို တစ်ပြိုင်နက်တည်း ရင်ဆိုင်နိုင်မယ် လို့ ငါ ကတော့ မယုံဘူး... တကယ်လို့ အဲဒီလိုသာ ဆိုရင် သူ က ဘာလို့ ပုန်းအောင်း နေစရာ လိုတော့မှာလဲ"

ဆွေးနွေးပြောဆိုသံများက အရပ်လေးမျက်နှာမှ ထွက်ပေါ်လာပြီး ကျီချန်တောက်ကို တိုက်ခိုက်ရန် အော်ဟစ်နေကြသည်။ သို့သော် မည်သည့် မိစ္ဆာသူတော်စင် ကမျှ အရင်ဆုံး ဝင်ရောက် မတိုက်ခိုက်ရဲကြချေ။ ကျီချန်တောက်၏ ပစ်မှတ်ထားမှုကို ခံရမည်ကို ကြောက်ရွံ့နေကြသောကြောင့် ပင်ဖြစ်သည်။

"ထွက်သွားစမ်း" ဟု ပေတစ်သောင်း အရွယ်အစားရှိသော ပုံရိပ်ယောင်ကြီးက ကောင်းကင်နှင့် မြေကြီးကို ငုံ့ကြည့်ကာ စကားတစ်ခွန်း ထွက်ကျလာသည်။ လေဟာနယ်အတွင်းတွင် ထိုစကားလုံးက အချုပ်အနှောင် အတားအဆီး တစ်ခုအဖြစ် ပြောင်းလဲသွားပြီး အရှေ့ဘက်ရှိ မိစ္ဆာသူတော်စင် ကိုးပါးထံသို့ ပြင်းထန်စွာ ပြေးဝင်သွားတော့သည်။

မျက်တောင်တစ်ခတ်အတွင်း မိစ္ဆာသူတော်စင် ကိုးပါးက ကောင်းကင်သို့ မော့ကာ ဟိန်းဟောက်လိုက်ကြပြီး ပူးပေါင်း တိုက်ခိုက်မှုအောက်တွင် ထို ရွှေရောင် စာလုံးကို ဖျက်ဆီးပစ်လိုက်ကြသည်။ ကျီချန်တောက်ထက် အားနည်းခြင်းမရှိဟု ထင်ရသော်လည်း မိစ္ဆာသူတော်စင်များက အချင်းချင်း မျက်နှာချင်းဆိုင် ကြည့်လိုက်ကြသည်။ ဤအခိုက်အတန့်တွင် တွေးတောမှု အတွင်းသို့ ကျဆင်းသွားကြတော့သည်။

ကျီချန်တောက်က လက်ကို နောက်ပစ်ကာ မတ်မတ်ရပ်နေပြီး အရှေ့ဘက်ကို စူးစိုက်ကြည့်လိုက်သည်။ မည်သူကမျှ ရှေ့မတိုးရဲသည်ကို မြင်သောအခါ နောက်လှည့်ကာ ကျန်းချဲ့ကို ခေါ်ဆောင်၍ တိုက်ရိုက် ထွက်ခွာသွားတော့သည်။ အနောက်ဘက်တွင် အချည်းနှီး ဒေါသထွက်နေသော ဟိန်းဟောက်သံများကိုသာ ချန်ရစ်ထားခဲ့တော့သည်။

ဤတစ်ကြိမ် ကျန်းချဲ့အပေါ် ပေးစွမ်းလိုက်သော တုန်လှုပ်မှုက လုံးဝ ပြိုင်ဘက်ကင်းလှပေသည်။ ကျီချန်တောက်က ဤမျှအထိ အစွမ်းထက်လိမ့်မည်ဟု သူ တကယ်ကို မထင်မှတ်ထားခဲ့ချေ။ ဝမ်ယောင်းမြို့ကို အလေးမထားရုံသာမက တစ်ယောက်တည်းဖြင့် မိစ္ဆာသူတော်စင် ကိုးပါးကို မျက်နှာချင်းဆိုင် ရင်ဆိုင်ရာတွင် အားနည်းသွားခြင်း မရှိဘဲ မိစ္ဆာသူတော်စင် ကိုးပါးစလုံးကို လုံးဝ မလှုပ်ရှားရဲအောင်ပင် ဖိနှိပ်ထားနိုင်ခဲ့သည်။ ဤသည်က မည်မျှ ကြီးမားသော စွမ်းအားမျိုး ဖြစ်မည်နည်းဟု တွေးတောနေမိသည်။ ဤသည်မှာ သိုင်းသူတော်စင် အထွတ်အထိပ် လောကနတ်ဘုရား ၏ အရှိန်အဝါ ပင်ဖြစ်မည်ဟု ခန့်မှန်းရသည်။ ကျန်းချဲ့၏ ရင်ထဲတွင် အတွေးအမျိုးမျိုး ဆက်တိုက် ထွက်ပေါ်နေသည်။ ထျန်းယွမ်မြို့သို့ ပြန်ရောက်လာသည့်တိုင်အောင် ယခုအခါ ထို တုန်လှုပ်မှုများက ပျောက်ကွယ်သွားခြင်း မရှိသေးချေ။

"မင်း ရဲ့ အဲဒီ နတ်လှံတံ ဘယ်မှာလဲ" ဟု လေဟာနယ်အတွင်း လျှောက်လှမ်းလာပြီး ထျန်းယွမ်မြို့သို့ ပြန်ရောက်သောအခါ ပထမဆုံး စကားအနေဖြင့် ကျန်းချဲ့ထံမှ ဟွမ်ကူးနတ်လှံတံ ကို တောင်းဆိုလိုက်သည်။ ကျန်းချဲ့၏ စိတ်နှလုံး လှုပ်ရှားသွားပြီး ကျီချန်တောက်က မိမိကို မည်သည့် လက်ဆောင်ပေးမည်နည်း ဆိုသည်ကို တိတ်တဆိတ် ခန့်မှန်းမိသွားသည်။

ချက်ချင်းပင် ဟွမ်ကူးနတ်လှံတံ ကို သွေးပင်လယ် ပုတီးစေ့ အတွင်းမှ ခေါ်ထုတ်လိုက်သည်။ အနက်ရောင် နတ်လှံတံက အလင်းတန်းများ ဖြာထွက်နေပြီး ယခုအခါ ကျန်းချဲ့ အားအထားရဆုံး ရတနာပစ္စည်း ပင်ဖြစ်သည်။ ဖျက်ဆီး၍ မရနိုင်လောက်အောင် ခိုင်မာပြီး သိုင်းသူတော်စင်အဆင့် လက်နက် ဆိုလျှင်တောင် ထိခိုက်စေရန် ခက်ခဲလှသည်။

သို့သော် ထိုမျှသာ ရှိပေသည်။ ဟွမ်ကူးနတ်လှံတံ တွင် ဝိညာဉ်အသိ မရှိဘဲ နတ်လက်နက် ဟုပင် မခေါ်ဆိုနိုင်ချေ။ ဖျက်ဆီး၍ မရနိုင်သော ထူးဆန်းသည့် ရတနာတစ်ခု အဖြစ်သာ သတ်မှတ်၍ ရနိုင်ပေသည်။

ဟွမ်ကူးနတ်လှံတံကို ဆုပ်ကိုင်လိုက်ပြီး ကျီချန်တောက်က ပေါ့ပေါ့ပါးပါး ပြောလိုက်သည်။ "မင်း ရဲ့ ဒီ နတ်လှံတံ က ထူးဆန်းတဲ့ ရတနာ တစ်ခု လို့ သတ်မှတ်လို့ ရတယ်... ငါ ခန့်မှန်း တာ မမှားဘူး ဆိုရင် အရင်က အထွတ်အထိပ် သိုင်းသူတော်စင်လက်နက် တစ်ခု ဖြစ်ခဲ့ဖူးတယ်... နှမြောစရာ က ဝိညာဉ်အသိ တွေ ဖျက်ဆီး ခံလိုက်ရလို့ ခိုင်မာမှု သက်သက် ပဲ ကျန်တော့တာ... အခုတော့ ခက်ခဲစွာ နဲ့ အသုံးပြု လို့ ရသေးပေမဲ့ နောင်တစ်ချိန် မင်း သိုင်းသူတော်စင် ဖြစ်လာတဲ့ အချိန်ကျရင် ဒီ နတ်လှံတံ က အခြေခံ အားဖြင့် ဘာ အသုံး မှ ဝင်မှာ မဟုတ်တော့ဘူး... ငါ က ဒီ မိစ္ဆာသူတော်စင် ရဲ့ ဝိညာဉ်အနှစ်သာရ ကို သုံးပြီး မင်း အတွက် ဝိညာဉ်အသိ တစ်ခု ကို ပြုစု ပျိုးထောင် ပေးမယ်... ပြီးတော့ သိုင်းသူတော်စင်အဆင့် လက်နက် အဖြစ် ပြန်လည် ရောက်ရှိ စေမယ်... ဒီလို ဆိုရင် မင်း က ဓမ္မရုပ်တု ကို အသုံးပြု ရင်တောင် နတ်လှံတံ ရဲ့ စွမ်းအား ကို ထုတ်ယူ သုံးစွဲ နိုင်လိမ့်မယ်"

"ကျေးဇူးတင်ပါတယ် နတ်မင်းကြီး" ဟု ကျန်းချဲ့က မျက်နှာပေါ်တွင် ဝမ်းသာပျော်ရွှင်သော အရိပ်အယောင်များ ပေါ်လွင်စွာဖြင့် ပြောလိုက်သည်။

အကယ်၍ ဟွမ်ကူးနတ်လှံတံ တွင် ဝိညာဉ်အသိများ ဖြစ်ပေါ်လာနိုင်ပါက အစစ်အမှန် သိုင်းသူတော်စင်အဆင့် လက်နက် တစ်ခု လုံးဝ ဖြစ်လာမည် ဖြစ်ပြီး သူ၏ အတွက် အထောက်အကူ ကလည်း အလွန် ကြီးမားလှပေမည်။ နောင်တစ်ချိန်တွင် အခြားသော သိုင်းသူတော်စင်အဆင့် လက်နက်များကို သီးခြား ရှာဖွေရန်လည်း မလိုတော့ချေ။ မည်သို့ပင်ဆိုစေ သိုင်းသူတော်စင်အဆင့် လက်နက် အဆင့်တက်ရန် ဆိုသည်မှာ သိုင်းပညာရှင် သိုင်းသူတော်စင် ဖြစ်ရန် အခက်အခဲ ပြီးလျှင် ဒုတိယ နေရာတွင် ရှိပေသည်။ အလွန် အဆင့်မြင့်မားသော ဝိညာဉ် ပစ္စည်းများနှင့် သတ္တုများ လိုအပ်ရုံသာမက သိုင်းပညာရှင်ကလည်း နှစ်ရာပေါင်းများစွာ ကြာအောင် နေ့စဉ်ရက်ဆက် ပြုစုပျိုးထောင်ရန် လိုအပ်ပေသည်။ ထိုသို့ပြုလုပ်မှသာ မိမိ၏ ကိုယ်အင်္ဂါ အစိတ်အပိုင်းများ အလား အသုံးပြုနိုင်မည် ဖြစ်သည်။ ကျီချန်တောက် ကသာ ဤအချိန်များကို ချွေတာပေးနိုင်မည် ဆိုပါက သူ့ကို ကြီးမားသော အကူအညီ တစ်ခု ပေးလိုက်ခြင်းနှင့် မကွာခြားချေ။

"ခုနစ်ရက် အကြာ ကျရင် မင်း ကို သိုင်းသူတော်စင်အဆင့် လက်နက် တစ်ခု ပြန်ပေးမယ်... ကောင်းပြီ ဒီနေ့ ကိစ္စ ကတော့ ဒီနေရာ မှာတင် ပြီးဆုံး သွားပြီ လို့ သတ်မှတ် လိုက်တော့... မင်း ပြန်ပြီး တံခါးပိတ်ကျင့်ကြံ လိုက်ဦး... အရင်ဆုံး ကိုယ့် ရဲ့ ကျင့်ကြံခြင်းအဆင့် ကို တည်ငြိမ် အောင် လုပ်လိုက်" ဟု ကျီချန်တောက်က မှာကြားပြီးနောက် ချက်ချင်း နောက်လှည့် ထွက်ခွာသွားပြီး ကျန်းချဲ့ကို ကျောပြင် တစ်ခုတည်းသာ ချန်ရစ်ထားခဲ့တော့သည်။

ဤအခိုက်အတန့်တွင် ထျန်းယွမ်၏ အပြင်ဘက်၌။ ကျီချန်တောက် ထွက်ခွာသွားပြီ ဖြစ်သော်လည်း မိစ္ဆာသူတော်စင် ကိုးပါး က ရှိနေဆဲ ပင်ဖြစ်သည်။ ယခုအခါ ၎င်းတို့၏ ရင်ထဲတွင် အလွန်အမင်း မွန်းကျပ်နေပြီး ရင်ထဲရှိ ဒေါသ မီးတောက်များက အထွတ်အထိပ်သို့ ရောက်ရှိနေကာ အသီးသီး၏ မျက်ဝန်းများထဲတွင် ပြင်းထန်သော သတ်ဖြတ်လိုစိတ်များ ပေါ်လွင်နေပေသည်။

ယနေ့ ကျီချန်တောက်၏ လုပ်ရပ်က ၎င်းတို့အတွက် လုံးဝ ဆေးကြော၍ မရနိုင်သော အရှက်ရမှု ပင်ဖြစ်သည်။ ဝမ်ယောင်းမြို့ကို အလေးမထားဘဲ ၎င်းတို့ မိစ္ဆာသူတော်စင် များစွာကိုလည်း လျစ်လျူရှုကာ စိတ်ကြိုက် ဝင်ထွက်သွားလာရုံသာမက မိစ္ဆာသူတော်စင် တစ်ပါးကိုပါ အရှင်ဖမ်းဆီးသွားခဲ့သည်။ အကယ်၍ ဤသတင်းသာ ပြန့်နှံ့သွားပါက မိစ္ဆာနယ်မြေ အတွက် ကြီးမားသော ထိုးနှက်ချက် တစ်ခုနှင့် မကွာခြားချေ။ ပို၍ အရေးကြီးသည်မှာ ၎င်းတို့က ဤကိစ္စနှင့် ပတ်သက်၍ ဘာမှ မတတ်နိုင်ခြင်း ပင်ဖြစ်သည်။ ကျီချန်တောက်က ထျန်းယွမ်မှ ထွက်ခွာသွားလျှင်တောင် ၎င်းတို့အနက်မှ မည်သူကမျှ အရင်ဆုံး ပြေးမဝင်ရဲကြချေ။ အကယ်၍ ထိုသို့သာမဟုတ်ဘဲ မိစ္ဆာသူတော်စင် ကိုးပါး ပူးပေါင်း တိုက်ခိုက်မည် ဆိုပါက ကျီချန်တောက်က လောကနတ်ဘုရား ဖြစ်နေလျှင်တောင် တောင့်ခံနိုင်မည် မဟုတ်ချေ။

"လိပ်အိုကြီး... စောစော က မင်း အရင် ပြေးဝင် သွားသင့်တာ... မင်း ရဲ့ လိပ်ခွံ က အမာဆုံးပဲ ကျီချန်တောက် က လုံးဝ ခွဲဖျက် နိုင်မှာ မဟုတ်ဘူး... အဲဒီလိုမှ မဟုတ်ရင် ဒီနေ့ အရှက်ကွဲ တာမျိုး ဘယ်လိုလုပ် ရှိလာမှာလဲ" ဟု မိစ္ဆာသူတော်စင် တစ်ပါးက အေးစက်သောအသံဖြင့် ပြောလိုက်သည်။

"မင်းတို့ ကရော ဘာလို့ မဝင်သွားကြတာလဲ... ငါ လိပ်အိုကြီး ရဲ့ နှစ်ရာပေါင်း များစွာ ကျင့်ကြံ ထားတဲ့ လိပ်ခွံ သာ အချိုးခံ လိုက်ရရင် မင်းတို့ ထဲက ဘယ်သူ က လာပြီး အစားထိုး ပေးမှာလဲ... အခု ပြောတော့သာ နားထောင်လို့ ကောင်းနေတာ ဟွန့်" ဟု ခေါင်းနှစ်လုံး လိပ်နက် က အေးစက်စွာ နှာခေါင်းရှုံ့လိုက်သည်။ အပြစ်များကို သူ၏ ခေါင်းပေါ်သို့ အကုန် ပုံချချင်နေခြင်းကို လုံးဝ သည်းခံနိုင်မည် မဟုတ်ချေ။

"မင်း..."

"ကောင်းပြီ အားလုံး ပါးစပ် ပိတ်ထားကြတော့... ကျီချန်တောက် က ထွက်သွားပြီပဲ အခု ဒီ စကား တွေ ပြောနေလို့ ဘာ အသုံး ဝင်တော့မှာလဲ... အခု အရင် ပြန်ကြစို့ ဒီ ကိစ္စ ကို မိစ္ဆာဧကရာဇ် နှစ်ပါး ဆီ သတင်းပို့ ရမယ်... ဒီနေ့ ရန်ငြိုး ကိုတော့ နောက်ဆုံး မှာ ပြန်ပေးဆပ် ရမှာပဲ" ဟု ခွေနျိုနတ်နွား တစ်ကောင်က လေးနက်သော အသံဖြင့် ပြောလိုက်သည်။

ပတ်ဝန်းကျင်ရှိ မိစ္ဆာသူတော်စင် အချို့က အချင်းချင်း မျက်နှာချင်းဆိုင် ကြည့်လိုက်ကြပြီး ချက်ချင်းပင် အများကြီး ထပ်မံ မပြောကြတော့ချေ။ ဤအခိုက်အတန့်တွင် ထျန်းယွမ်မြို့ အတွင်း၌။ ကျီချန်တောက်နှင့် ကျန်းချဲ့တို့ ဝမ်ယောင်းမြို့သို့ သွားရောက်ကာ တစ်ခေါက် ဝင်ထွက် သတ်ဖြတ်ခဲ့သည့် ကိစ္စကို မည်သူကမျှ မသိရှိကြသေးချေ။ ယခုအခါ လူတိုင်း ဆွေးနွေးပြောဆိုနေသော ဗဟိုချက်မှာ ယနေ့ ကျန်းချဲ့ အဆင့်ချိုးဖြတ်ခဲ့သော ကြီးကျယ်ခမ်းနားသည့် မြင်ကွင်း သက်သက်သာ ဖြစ်သည်။

ရုပ်ပိုင်းဆိုင်ရာ ခန္ဓာကိုယ်နှင့် ယွမ်ရှန်း နှစ်ခုစလုံး ပြီးပြည့်စုံသွားခြင်း ပင်ဖြစ်သည်။ ကန့်သတ်ချက်ကို ချိုးဖျက်ပြီး ယွမ်ရှန်း ကိုးလက်မ ထက် ကျော်လွန်သွားခြင်း ပင်ဖြစ်သည်။ မည်သည့်ကိစ္စ ဖြစ်ပါစေ ထျန်းယွမ်မြို့ အတွင်းတွင် အချိန်တစ်ခု ကြာအောင် ချီးမွမ်းပြောဆိုခံရရန် ထိုက်တန်လှပေသည်။ မည်သို့ပင်ဆိုစေ ထျန်းယွမ်မြို့ အတွင်းတွင် အလယ်ပိုင်းလွင်ပြင်နှင့် မတူဘဲ သိုင်းပညာ လေထုက အလွန် ပြင်းထန်လှရာ ကန့်သတ်ချက်ကို ချိုးဖျက်ခြင်း ဆိုသည်မှာ မည်သည့် အဓိပ္ပာယ်ကို ဆိုလိုကြောင်း လူများစွာက ရှင်းလင်းစွာ သိရှိကြသည်။ ၎င်းမှာ နတ်ဘုရား ဖြစ်လာမည့် အရည်အချင်းကို ပိုင်ဆိုင်ထားကြောင်း သက်သေပြနေပြီး ကောင်းကင်နှင့် မြေကြီး အကြီးအကျယ် အပြောင်းအလဲ မဖြစ်ပေါ်မီက ထိုကဲ့သို့သော သူများကို နတ်မျိုးစေ့ ဟု ခေါ်ဆိုကြသည်။

လောကတွင် သိုင်းပညာရှင် သောင်းသိန်းချီ ရှိသော်လည်း ကိုးလက်မ ယွမ်ရှန်း ကန့်သတ်ချက်ကို ချိုးဖျက်နိုင်သူမှာ လုံးဝ ရှားပါးလှပေသည်။ ဤကဲ့သို့သော တည်ရှိမှုမျိုးက သိုင်းသူတော်စင် အဆင့်သို့ ဝင်ရောက်သွားလျှင်တောင် နာမည်မရှိသော သူတစ်ယောက် ဖြစ်လာမည် မဟုတ်ချေ။ ဥပမာ အားဖြင့် ခေါက်ရှန်းနတ်မင်းကြီး ကျီချန်တောက် ဆိုလျှင် ယခင်က ကိုးလက်မ ကန့်သတ်ချက်ကို ချိုးဖျက်ခဲ့သူ ပင်ဖြစ်သည်။

ဓားမိစ္ဆာ ကျန်းဆန်း ကဲ့သို့သော သူဆိုလျှင် အမှန်တကယ်တော့ သူ၏ အခြေခံ အုတ်မြစ်ဖြင့် အဆင့်ချိုးဖြတ်ရန် အစောကြီးကတည်းက စမ်းသပ်နိုင်နေပြီ ဖြစ်သည်။ ယခုအချိန်အထိ ကျင့်ကြံခြင်းအဆင့်ကို ဖိနှိပ်ထားရခြင်း၏ အကြောင်းရင်းမှာ အခြေခံ အုတ်မြစ်ကို နောက်ထပ် အနည်းငယ် မြှင့်တင်ချင်နေသောကြောင့် ပင်ဖြစ်သည်။ ကိုးလက်မ ယွမ်ရှန်း၏ ကန့်သတ်ချက်ကို ချိုးဖျက်ပြီး လောကနတ်ဘုရား၏ အသွင်အပြင်ကို ပိုင်ဆိုင်ချင်သောကြောင့် ပင်ဖြစ်သည်။ ယခုအခါ ကျန်းချဲ့က သူ၏ ရှေ့မှောက်တွင်ပင် ကန့်သတ်ချက်ကို ချိုးဖျက်သွားခဲ့ရာ သူ့ကိုလည်း ဉာဏ်အလင်းပွင့်မှု များစွာ ပေးစွမ်းလိုက်သည်။ အပြန်ရောက်ပြီးနောက် ချက်ချင်းပင် တံခါးပိတ်ကျင့်ကြံခြင်းကို ကြေညာလိုက်ပြီး နောက်ထပ် လျှောက်လှမ်းရမည့် ကျင့်ကြံခြင်း လမ်းစဉ်ကို စဉ်းစားခန်း ဝင်နေတော့သည်။

တိုင်းပြည်ဆရာ ဝမ်ထိုက်ရှီး ကတော့ ထျန်းယွမ် နန်းဆောင် သို့ သွားရောက်၍ ဂုဏ်ပြု ညစာစားပွဲ ကျင်းပရန် ကျန်းချဲ့ကို ရိုးသားစွာ ဖိတ်ကြားလိုက်သည်။ ကျန်းချဲ့ကလည်း သဘာဝကျကျ ငြင်းဆန်မည် မဟုတ်ဘဲ နေရာတွင် ရှိနေသော သိုင်းသူတော်စင် များစွာနှင့် ဆက်ဆံရေးက ပို၍ ရင်းနှီးလာခဲ့သည်။ သိုင်းသူတော်စင် အချို့ကလည်း ကျန်းချဲ့၏ အစွမ်းထက်မှုကို နက်နက်ရှိုင်းရှိုင်း သိရှိသွားကြပြီး ကိုယ်ပိုင် အဆင့်အတန်းကို အခြေခံအားဖြင့် ဂရုမစိုက်တော့ဘဲ ကျန်းချဲ့နှင့် ရွယ်တူများအဖြစ် ပေါင်းသင်း ဆက်ဆံကြရာ အားလုံး ဝမ်းသာ ပျော်ရွှင်ခဲ့ကြသည်။

ညစာစားပွဲ ပြီးဆုံးသွားပြီးနောက် ကျန်းချဲ့ကတော့ ဝမ်းသာပျော်ရွှင်နေသော အမူအရာကို ရုပ်သိမ်းလိုက်ပြီး ထျန်းယွမ်မြို့ရှိ အခြားသော စစ်မှန်သောသခင် များ၏ ဖိတ်ကြားမှုများကိုပါ ယဉ်ကျေးစွာ ငြင်းပယ်လိုက်သည်။ သေချာသည်မှာ ဤကိစ္စနှင့် ပတ်သက်၍ လူအများအပြားက အနည်းငယ် မကျေမနပ် ဖြစ်သွားကြပြီး ကျန်းချဲ့က အနည်းငယ် အရမ်း မာနကြီးလွန်းသည်ဟု ထင်မြင်မိကြသည်။ သို့သော် ကျန်းချဲ့အတွက်မူ ဤကဲ့သို့သော ဂုဏ်ပြုပွဲများက မူလကတည်းက ပြင်ပကိစ္စများ သက်သက်သာ ဖြစ်သည်။ ဝမ်ထိုက်ရှီး၏ ဖိတ်ကြားမှုမှာ သိုင်းသူတော်စင်များ ဖြစ်သဖြင့် သူ ငြင်းဆန်ရန် ခက်ခဲသော်လည်း ကျန်ရှိသော သူများမှာ သူ့အတွက် ထိုမျှလောက် အရေးမကြီးတော့ချေ။

ဝမ်ယောင်းမြို့သို့ တစ်ခေါက် ရောက်ရှိသွားပြီးနောက် ကျန်းချဲ့က ကိုယ်ပိုင် စွမ်းအားနှင့် ပတ်သက်၍ ပျော်ရွှင်နေမှုများကို အစောကြီးကတည်းက ဖိနှိပ်ထားလိုက်ပြီ ဖြစ်သည်။ ဆယ်လက်မ ယွမ်ရှန်း၊ နယ်ပယ်၏ အစပျိုးမှု ဆိုရင်ရော ဘာဖြစ်သေးလဲ။ အခြေခံအားဖြင့် သူက ယခုလက်ရှိ အချိန်အထိ သိုင်းသူတော်စင် မဖြစ်သေးချေ။ အစစ်အမှန် သိုင်းသူတော်စင် စွမ်းအားရှင် တစ်ဦးနှင့် ရင်ဆိုင်ရချိန်တွင် အနည်းငယ်မျှပင် ယုံကြည်မှု မရှိသေးချေ။ အနည်းငယ်တော့ ခုခံနိုင်ကောင်း ခုခံနိုင်မည် ဖြစ်သော်လည်း သိုင်းသူတော်စင် ကို ပြန်လည် သတ်ဖြတ်ချင်သည် ဆိုလျှင်တော့ လုံးဝ အလွန်တရာ ခက်ခဲလှပေမည်။ သိုင်းသူတော်စင် ဖြစ်လာခြင်း။ သိုင်းသူတော်စင် ဖြစ်လာမှသာ သူ့ကို အကျပ်အတည်းမှ လွတ်မြောက်စေနိုင်မည် ဖြစ်ပြီး အစစ်အမှန် ကိုယ့်ကိုယ်ကိုယ် ကာကွယ်နိုင်မည့် စွမ်းအားကို ပိုင်ဆိုင်နိုင်မည် ဖြစ်သည်။

သေချာသည်မှာ ယခုလက်ရှိ သူ၏ အခြေခံ အုတ်မြစ်ဖြင့် သိုင်းသူတော်စင် ဖြစ်လာရန် ခရီးရှည်ကြီး တစ်ခု လျှောက်လှမ်းရန် လိုအပ်နေသေးကြောင်းကို သူ ရှင်းလင်းစွာ သိရှိထားသည်။ သို့သော် သူက ယခုချက်ချင်း သိုင်းသူတော်စင် ဖြစ်ချင်နေခြင်း မဟုတ်ဘဲ ပူဇော်ရန် ရည်မှန်းချက် တစ်ခုကို သတ်မှတ်ချင်နေခြင်း သက်သက်သာ ဖြစ်သည်။ နောက်ပိုင်း အစီအစဉ်များ စတင် ပြုလုပ်ရန် အတွက် ပင်ဖြစ်သည်။ ထျန်းယွမ်မြို့၏ ဧရာမ အရင်းအမြစ်များဖြင့် မည်သို့ပင်ဖြစ်စေ သူ့ကို ပူဇော်ပစ္စည်း တစ်ခု နှစ်ခုလောက်တော့ ဖြည့်ဆည်းပေးနိုင်မည်ဟု သူ ထင်မြင်မိသည်။

သူ တစ်ခုတည်း စဉ်းစားနေသည်မှာ ယွမ်ရှန်းနှင့် ရုပ်ပိုင်းဆိုင်ရာ ခန္ဓာကိုယ်ကို အတူတကွ သိုင်းသူတော်စင် ဖြစ်လာစေမလား ဆိုသည်ကို ပင်ဖြစ်သည်။ အကယ်၍ ကျင့်ကြံခြင်းအဆင့် တစ်ခုတည်း ဆိုလျှင် သူ၏ အခက်အခဲက အများကြီး နည်းပါးသွားမည် ဖြစ်ပြီး ထိုအထဲတွင် ကျီချန်တောက်၏ သတိပေးချက် လည်း ပါဝင်နေပေသည်။ သို့သော် ဤသို့ ဆိုလျှင် သူက သိုင်းသူတော်စင်အဆင့်သို့ ဝင်ရောက်သွားလျှင်တောင် အရာအားလုံးကို ဖိနှိပ်နိုင်မည့် စွမ်းအားကို ချက်ချင်း ပိုင်ဆိုင်နိုင်ရန် ခက်ခဲလှပေမည်။ မည်သို့ပင်ဆိုစေ သိုင်းသူတော်စင်အဆင့်၏ ကျင့်ကြံခြင်းက မူလကတည်းက ခက်ခဲလှရာ အခြေခံအားဖြင့် အဆင့်ကျော်လွန်၍ တိုက်ခိုက်ရန် ခက်ခဲလှသည်။

ရုပ်ပိုင်းဆိုင်ရာ ခန္ဓာကိုယ်နှင့် ယွမ်ရှန်း နှစ်ခုစလုံး သိုင်းသူတော်စင် ဖြစ်လာမှသာ သိုင်းသူတော်စင်အဆင့်သို့ ဝင်ရောက်ပြီးနောက်တွင် အဆင့်ကျော်လွန်၍ တိုက်ခိုက်နိုင်စွမ်းကို ဆက်လက် ပိုင်ဆိုင်နိုင်မည် ဖြစ်သည်။ အကယ်၍ အရင်က ဆိုလျှင် သူက ဤကဲ့သို့သော အတွေးမျိုး ရှိလာမည် မဟုတ်ချေ။ သို့သော် ယခုအခါ သူ ရင်ဆိုင်နေရသော ဖိအားက အရမ်း ကြီးမားလွန်းနေသည်။ အင်ပါယာနန်းတော်၊ ဗုဒ္ဓဘာသာ၊ ချင်းထျန်းမိစ္ဆာဂိုဏ်း၊ ထို့အပြင် ဝူစုန်းနတ်ဘုရားကျောင်း နှင့် မိစ္ဆာနယ်မြေ စသည့် အင်အားစုများ ရှိနေပေသည်။ ထိုအထဲတွင် ကျီချန်တောက်ကလည်း မိဘမဲ့ ကလေးငယ်ကို အပ်နှံနေသည့် အရိပ်အယောင် အချို့ ရှိနေပြန်ရာ သူ အများကြီး မတွေးဘဲ မနေနိုင်အောင် ဖြစ်နေရသည်။

ရှေ့နောက် စဉ်းစားပြီးနောက် ကျန်းချဲ့က စွန့်စားကြည့်ရန် ဆုံးဖြတ်လိုက်သည်။ မည်သို့ပင်ဆိုစေ သူ့တွင် ကောင်းကင်ယဇ်ပလ္လင်ကျောက်တိုင် ရှိနေရာ ရုပ်ပိုင်းဆိုင်ရာ ခန္ဓာကိုယ်နှင့် ယွမ်ရှန်းကို အတူတကွ သိုင်းသူတော်စင် ဖြစ်လာစေရန် ဆိုသည်မှာ မလုပ်နိုင်သည့်အရာ မဟုတ်ချေ။ ပူဇော်ပစ္စည်းများ ပြည့်စုံရန်သာ လိုအပ်ပေသည်။ ကျီချန်တောက် ကိုလည်း သူ ခန့်မှန်းရသလောက် ရုပ်ပိုင်းဆိုင်ရာ ခန္ဓာကိုယ် သိုင်းသူတော်စင် ဖြစ်နေလောက်ပြီ ဖြစ်သည်။ အကယ်၍ ကောင်းကင်ယဇ်ပလ္လင်ကျောက်တိုင် က အလွန် ခက်ခဲသော ပူဇော်ပစ္စည်း တစ်ခုခုကို ပေးလာပါက သူက ကျီချန်တောက်ထံမှ လမ်းညွှန်မှု တောင်းခံရန် ပို၍ လွယ်ကူသွားမည် ဖြစ်သည်။ နောက်ပိုင်း လမ်းမှားများ ထပ်မလျှောက်မိစေရန် ပင်ဖြစ်သည်။ သေချာသည်မှာ အကယ်၍ တကယ်ကို မဖြစ်နိုင်ဘူး ဆိုပါက ကောင်းကင်ယဇ်ပလ္လင်ကျောက်တိုင် ကလည်း ပူဇော်ပစ္စည်းများကို ပေးလာမည် မဟုတ်ချေ။ စမ်းသပ်ကြည့်ရုံ သက်သက်သာ ဖြစ်ရာ ကျန်းချဲ့က လုံးဝ ဖြစ်နိုင်သည်ဟု ထင်မြင်မိသည်။

လျှို့ဝှက်ခန်း အတွင်း၌။ ကျန်းချဲ့၏ ဝိညာဥ်အာရုံက ကောင်းကင်ယဇ်ပလ္လင်ကျောက်တိုင် နေရာလွတ် အတွင်းသို့ ဝင်ရောက်သွားပြီး ရည်မှန်းချက် အသစ်တစ်ခုကို သတ်မှတ်လိုက်သည်။

[ပူဇော်ရန် ရည်မှန်းချက် - ယန်ဝိညာဉ် အဆင့်သို့ ချိုးဖြတ်ဝင်ရောက်ခြင်း၊ ရုပ်ပိုင်းဆိုင်ရာ ခန္ဓာကိုယ် သိုင်းသူတော်စင် အဖြစ် တက်လှမ်းခြင်း]