အခန်း (၅၁၅-၅၁၆)

အခန်း ၅၁၅ လောကမူလအနှစ်သာရ

[ပူဇော်ရန် ရည်မှန်းချက် - ယန်ဝိညာဉ်အဆင့်သို့ ချိုးဖြတ်ဝင်ရောက်ခြင်း... ရုပ်ပိုင်းဆိုင်ရာ ခန္ဓာကိုယ် သိုင်းသူတော်စင်အဖြစ် တက်လှမ်းခြင်း]

ကျန်းချဲ့က သိုင်းသူတော်စင် ဖြစ်လာမည့် ကိုယ်ပိုင် ရည်မှန်းချက်ကို သတ်မှတ်ပြီးနောက် ကောင်းကင်ယဇ်ပလ္လင်ကျောက်တိုင်အပေါ်တွင် မျက်တောင်တစ်ခတ်အတွင်း အပြောင်းအလဲများ စတင်ဖြစ်ပေါ်လာသည်။ နတ်ဘုရား မှော်စာလုံးများ လျင်မြန်စွာ လင်းလက်လာပြီး အသက်ရှူကြိမ် ဆယ်ကြိမ်ခန့် ကြာမြင့်ပြီးနောက် စာကြောင်းငယ် တစ်ကြောင်း ပေါ်ထွက်လာသည်။

[ပူဇော်ရန် အဖိုးအခ - သွေးရင်းမြစ် နတ်ပုတီးစေ့ တစ်လုံး... ထိုက်ယင် လမင်းအနှစ်သာရ တစ်ခု... ထိုက်ယန် နေမင်းအနှစ်သာရ တစ်ခု... ကောင်းကင်ကိုးထပ် နတ်နှင်းရည်စက် တစ်စက်... ခုနစ်ပေ နဂါးသွေးကြော တစ်ခု... လောကနယ်မြေ မူလအနှစ်သာရ တစ်ခု... သက်တမ်း အနှစ်ခြောက်ဆယ် နှုတ်ယူမည်... ကျန်ရှိ သက်တမ်း တစ်ရာ့ဆယ်နှစ်... ပူဇော်မည်လား ဟု မေးလာသည်]

ကျန်းချဲ့က ဤတစ်ကြိမ် ပူဇော်ပစ္စည်းများ ရှာဖွေရခြင်းသည် အလွန် ခက်ခဲကြမ်းတမ်းမည် ဖြစ်ကြောင်း သိရှိထားသည်။ မည်သို့ပင်ဆိုစေ ကျန်းချဲ့က ချီစွမ်းအင်ကို ကျင့်ကြံ၍ သိုင်းသူတော်စင်အဖြစ် ယန်ဝိညာဉ် ပြောင်းလဲရုံ သက်သက်မဟုတ်ဘဲ တစ်ချိန်တည်းမှာပင် ရုပ်ပိုင်းဆိုင်ရာ ခန္ဓာကိုယ်ဖြင့်ပါ သိုင်းသူတော်စင်အဖြစ် တက်လှမ်းရန် ရွေးချယ်ခဲ့ခြင်း ပင်ဖြစ်သည်။ ဤအရာအတွက် ကြိုတင် ပြင်ဆင်မှုအချို့ ပြုလုပ်ထားပြီး ဖြစ်သည်။

သို့သော် အထက်ပါ ပူဇော်ပစ္စည်းများကို မြင်တွေ့လိုက်ရသောအခါ တောင်တန်းကြီးတစ်ခု ဖိကျလာသည့်အလား ကြီးမားသော ဖိအားကို ခံစားလိုက်ရဆဲ ပင်ဖြစ်သည်။

သွေးရင်းမြစ် နတ်ပုတီးစေ့... ထိုက်ယင် လမင်းအနှစ်သာရ... ထိုက်ယန် နေမင်းအနှစ်သာရ... ကောင်းကင်ကိုးထပ် နတ်နှင်းရည်စက်... ခုနစ်ပေ နဂါးသွေးကြော... လောကနယ်မြေ မူလအနှစ်သာရ... ဤအရာများထဲမှ မည်သည့် ပူဇော်ပစ္စည်းမဆို လောကတွင် တွေ့ရခဲသော အရာများဟု ခေါ်ဆိုနိုင်ပေသည်။

ဥပမာအားဖြင့် သွေးရင်းမြစ် နတ်ပုတီးစေ့ ဆိုလျှင် လီချန်ကောက သိုင်းပညာရှင် သိန်းပေါင်းများစွာ၏ အနှစ်သာရ သွေးများကို အသုံးပြုကာ မိုးကြိုးကပ်ဘေးကို ဖြတ်သန်း၍ သန့်စင်ဖန်တီးထားခြင်း ပင်ဖြစ်သည်။ မူလအနှစ်သာရကို ဖြည့်တင်းပေးနိုင်ပြီး နတ်ဆေးတစ်ပါး ဟုပင် ခေါ်ဆိုနိုင်ပေသည်။ အကယ်၍ နောက်ဆုံးအချိန်တွင် လီချန်ကော အောင်မြင်လုနီးပါးမှ ကျရှုံးသွားပြီး ဤပစ္စည်းကို ကျန်းချဲ့ထံ မပေးအပ်ခဲ့ပါက ကျန်းချဲ့အနေဖြင့် ယွမ်ရှန်းအဆင့် အထွတ်အထိပ် ရောက်နေသော စစ်မှန်သောသခင် တစ်ဦးကို ရှာဖွေကာ မိုးကြိုးကပ်ဘေး၏ အကူအညီဖြင့် သန့်စင်ယူရမည် ပင်ဖြစ်သည်။

ကံကောင်းထောက်မစွာ ဤပစ္စည်းက ကျန်းချဲ့၏ လက်ထဲတွင် ရှိနေပြီ ဖြစ်သည်။

သေချာသည်မှာ ကျန်းချဲ့၏ စိတ်ထဲတွင် အတွေးတစ်ချက် ဖြတ်ပြေးသွားခဲ့သည်။

'အကယ်၍ ငါ့ ရဲ့ လက်ထဲမှာ သွေးရင်းမြစ် နတ်ပုတီးစေ့ သာ မရှိခဲ့ရင် ကောင်းကင်ယဇ်ပလ္လင်ကျောက်တိုင် က ပေးလာမယ့် ပူဇော်ပစ္စည်း စည်းကမ်းချက်တွေကလည်း အပြောင်းအလဲ အချို့ ရှိလာနိုင်တယ်'

သွေးရင်းမြစ် နတ်ပုတီးစေ့ မှလွဲ၍ ကျန်ရှိသော ပစ္စည်းများထဲမှ တစ်ခုကိုမျှ ကျန်းချဲ့ မပိုင်ဆိုင်ထားချေ။

ကျန်းချဲ့၏ မျက်ဝန်းများ ချက်ချင်း နက်ရှိုင်းသွားသည်။ ပူဇော်ပစ္စည်း အမျိုးအစားများကို စိတ်ထဲတွင် အဆက်မပြတ် တွေးတောနေပြီး အသက်ရှူကြိမ် ဆယ်ဂဏန်းခန့် တိတ်ဆိတ်သွားပြီးနောက် ရုတ်တရက် ကျန်းချဲ့၏ မျက်လုံးများ လင်းလက်သွားသည်။

ထိုက်ယင် လမင်းအနှစ်သာရ... ထိုက်ယင် လမင်းအနှစ်သာရ...

ဤအရာနှင့် ပတ်သက်သော မှတ်တမ်းကို တစ်နေရာရာတွင် ဖတ်ဖူးခဲ့ကြောင်း မှတ်မိနေသည်။

ထိုအရာက ထိုက်ယင် မြင့်မြတ်သော ခန္ဓာကိုယ် မှ စုစည်းထားသော မူလအနှစ်သာရ စွမ်းအင်တစ်ခု ဖြစ်ပုံရသည်။ ယခုလက်ရှိ ကျန်းချဲ့ သိထားသလောက် ထိုက်ယင် မြင့်မြတ်သော ခန္ဓာကိုယ် ကို ပိုင်ဆိုင်ထားသူမှာ တိုင်းပြည်ဆရာ ယောင်ယွဲ့ တစ်ဦးတည်းသာ ရှိသည်။ ထျန်းယွမ်မြို့သို့ လာရောက်စဉ်က ယောင်ယွဲ့၏ အကြံအစည် အချို့ကို ကျီချန်တောက်က ကျန်းချဲ့အား ပြောပြခဲ့ဖူးသည်။

ယောင်ယွဲ့က ကျန်းချဲ့ကိုယ်ပေါ်ရှိ နဂါးစွမ်းအင်ကို လိုချင်နေသည်။ ကိုယ်ပေါ်ရှိ နဂါးစွမ်းအင်ကို စုပ်ယူနိုင်မှသာ မိမိကိုယ်ကို ထိုက်ယင် နတ်ခန္ဓာကိုယ် အဖြစ် ပြောင်းလဲနိုင်မည် ဖြစ်သည်။ အကယ်၍ ဤသို့သာ ဆိုပါက ဤ ပူဇော်ပစ္စည်း အတွက် သဲလွန်စ ရရှိသွားပြီ ပင်ဖြစ်သည်။

တစ်ခုတည်းသော အခက်အခဲမှာ ယောင်ယွဲ့ကို နားချရန် ပင်ဖြစ်သည်။

အထက်ပါ ပူဇော်ပစ္စည်းများထဲတွင် ခုနစ်ပေ နဂါးသွေးကြော ဆိုသည်မှာလည်း ကျန်းချဲ့ကို အနည်းငယ် ရင်းနှီးနေစေသည်။ မည်သို့ပင်ဆိုစေ အရင်က ချီရွှယ်မိစ္ဆာသခင် လုချန်ဖုန်း က ကျန်းချဲ့ကို နဂါးသွေးကြော တစ်ပိုင်း ပေးအပ်ခဲ့ပြီး ထိုအရာကြောင့် ကျန်းချဲ့၏ ရုပ်ပိုင်းဆိုင်ရာ ခန္ဓာကိုယ် နတ်စွမ်းရည်အဆင့် ပြီးပြည့်စုံသွားခဲ့ခြင်း မဟုတ်ပါလား။

ထို နဂါးသွေးကြောများက အစောကြီးကတည်းက ပူဇော်ပစ္စည်းများအဖြစ် ပြောင်းလဲသွားခဲ့ပြီ ဖြစ်သည်။

ယခုတစ်ကြိမ် ပူဇော်ပစ္စည်း တောင်းဆိုချက်ကတော့ ခုနစ်ပေ ပင်ဖြစ်သည်။ အရင်က ကျန်းချဲ့ ရရှိခဲ့သော နဂါးသွေးကြောမှာ တစ်ပေ ခန့်သာ ရှိသည်။ ဆိုလိုသည်မှာ ကျန်းချဲ့က ခုနစ်ဆ ပိုကြီးသော နဂါးသွေးကြောကို ရှာဖွေရန် လိုအပ်နေသေးသည်။ သို့သော် ပိုင်ယွဲ့နယ်မြေများတွင် ရှာတွေ့နိုင်ပါဦးမည်လားဟု တွေးတောနေမိသည်။

ဤ ပူဇော်ပစ္စည်း နှစ်ခုမှလွဲ၍ ကျန်ရှိသော ထိုက်ယန် နေမင်းအနှစ်သာရ... ကောင်းကင်ကိုးထပ် နတ်နှင်းရည်စက် နှင့် နောက်ဆုံး လောကနယ်မြေ မူလအနှစ်သာရ တို့ကိုမူ ယခုအချိန်အထိ မည်သို့ ရှာဖွေရမည်ကို ကျန်းချဲ့ လုံးဝ စဉ်းစား၍ မရသေးချေ။

ဤအရာများနှင့် နှိုင်းယှဉ်ပါက သက်တမ်း အနှစ်ခြောက်ဆယ် ပူဇော်ရမည် ဆိုခြင်းက လုံးဝ အရေးမပါတော့ချေ။

ပို၍ အရေးကြီးသည်မှာ ကျန်းချဲ့သာ သက်တမ်း အနှစ်ခြောက်ဆယ် လျော့ကျသွားပါက သက်တမ်း တစ်ရာ့ဆယ်နှစ် သာ ကျန်ရှိတော့မည် ဖြစ်သည်။ အတင်းအကျပ် ပူဇော်ရန်ပင် မဖြစ်နိုင်တော့ချေ။ တစ်ခဏမျှ ကျန်းချဲ့က နောက်ထပ်တစ်ကြိမ် စဉ်းစားခန်း ဝင်သွားပြန်သည်။

ယခုအခါ ပူဇော်ပစ္စည်း အမျိုးအစားများက ကျန်းချဲ့ သိုင်းသူတော်စင် ဖြစ်လာရန် အဟန့်အတားတစ်ခု ဖြစ်လာခဲ့ပြီမှာ သေချာလှသည်။ သို့သော် မည်မျှပင် ခက်ခဲကြမ်းတမ်းပါစေ ကျန်းချဲ့တွင် လက်လျှော့လိုသော အတွေးမျိုး မရှိချေ။ သေချာ စဉ်းစားပြီးနောက် ကျီချန်တောက်ကို သွားရောက် တွေ့ဆုံရန် ဆုံးဖြတ်လိုက်သည်။

ကျီချန်တောက်က အနက်ရောင်ရုံးတော် ကို နှစ်ရာပေါင်းများစွာ အုပ်ချုပ်ခဲ့ပြီး သတင်းအချက်အလက် ကွန်ရက်က လူ့လောက အနှံ့ ပျံ့နှံ့နေပေသည်။ အတွေ့အကြုံ ဖြစ်စေ ဗဟုသုတ ဖြစ်စေ ကျန်းချဲ့ထက် အများကြီး ပို၍ ကြွယ်ဝလှသည်။ နောက်ထပ် လိုအပ်မည့် ပူဇော်ပစ္စည်း မျိုးစုံအတွက် ကျီချန်တောက်ထံမှ အကူအညီ တောင်းခံရမည် ပင်ဖြစ်သည်။

ထို့ကြောင့် တံခါးပိတ်ကျင့်ကြံဟန်ဆောင်ကာ နှစ်ရက်ကြာပြီးနောက် ကျန်းချဲ့က မစောင့်ဆိုင်းနိုင်တော့ဘဲ တံခါးပိတ်ကျင့်ကြံရာမှ ထွက်လာခဲ့သည်။

ထျန်းယွမ် ၏ အထက်တွင် အေးစက်သော လေပြင်းများ တိုက်ခတ်နေသည်။ ကျီချန်တောက်က တိမ်တိုက် အတားအဆီး အထက်တွင် ရပ်လျက် အရှေ့ဘက်သို့ အဝေးမှ လှမ်းကြည့်နေသည်။ တွေးတောနေသည့်အလား သို့မဟုတ် တစ်ခုခုကို အကြံအစည် ရနေသည့်အလား ပင်ဖြစ်သည်။ တစ်ကိုယ်လုံးကို မြူခိုးတစ်လွှာ ဖုံးလွှမ်းထားသည့်အလား ပင်ဖြစ်သည်။

တာအိုအငွေ့အသက်များ ဖြာထွက်နေပြီး အဝေးမှ လှမ်းကြည့်လိုက်လျှင် လူ့လောကသို့ ဆင်းသက်လာသော နတ်ဘုရားတစ်ပါး အလား ပင်ဖြစ်သည်။

"နတ်မင်းကြီး"

ကျန်းချဲ့က အဝေးမှ လေဟာနယ်ကို နင်းဖြတ်လာပြီး ကျီချန်တောက်၏ ဘေးသို့ ဖြည်းညင်းစွာ ဆင်းသက်လာကာ လက်ယှက်၍ အရိုအသေ ပြုလိုက်သည်။

"ဘာကိစ္စလဲ" ဟု ကျီချန်တောက်က နောက်လှည့်မကြည့်ဘဲ အေးစက်စက် ပြန်ထူးလိုက်သည်။

"လက်အောက်ငယ်သား နတ်မင်းကြီး ကို တောင်းဆိုစရာ အချို့ ရှိနေလို့ပါ"

ကျန်းချဲ့က စကားဝှက်မနေဘဲ တိုက်ရိုက်ပင် ပွင့်ပွင့်လင်းလင်း ပြောလိုက်သည်။ မည်သို့ပင်ဆိုစေ ယခုလက်ရှိ ထျန်းယွမ်မြို့ အတွင်းတွင် သူနှင့် ဆက်ဆံရေး အနီးကပ်ဆုံးသူမှာ ကျီချန်တောက် ပင်ဖြစ်သည်။ အခြား သိုင်းသူတော်စင်များ ကတော့ ဆက်ဆံရေး အရမ်း နီးကပ်သလို ရှိပြီး ညီအစ်ကိုလို ဆက်ဆံနေကြသော်လည်း အသီးသီး၏ ရင်ထဲတွင် မည်သည့်အရာများ တွေးတောနေသနည်း ဆိုသည်ကို မည်သူကမျှ မသိရှိကြချေ။

"ပြောလေ" ဟု ကျန်းချဲ့ လာရောက် အကူအညီ တောင်းခံမည်ကို ကြိုတင် သိရှိထားသည့်အလား ကျီချန်တောက်က အနည်းငယ်မျှ အံ့အားသင့်သွားခြင်း မရှိဘဲ ဆိုလိုက်သည်။

"ကောင်းကင်ကိုးထပ် နတ်နှင်းရည်စက် ဆိုတာ ဘာလဲ နတ်မင်းကြီး သိပါသလား" ဟု ကျန်းချဲ့က ပွင့်ပွင့်လင်းလင်း မေးလိုက်သည်။

ထိုစကားကို ကြားသောအခါ ကျီချန်တောက်က ဘေးရှိ အဆုံးအစမရှိသော ထျန်းယွမ် ကို လက်ညိုးထိုးပြကာ ရှင်းပြလိုက်သည်။

"ထျန်းယွမ် ကို လွန်ခဲ့တဲ့ နှစ်ထောင်ပေါင်းများစွာ ကတည်းက အစပြုခဲ့တာ... အဲဒါက နတ်ဘုရား တစ်ပါး က ကောင်းကင်နဲ့ မြေကြီး စည်းကမ်းချက် တွေကို အသုံးပြုပြီး ဖန်တီးထားတာပဲ... မိစ္ဆာနယ်မြေ ရဲ့ ကျူးကျော် ဝင်ရောက်မှုကို တားဆီးပေးတာ အပြင် ရတနာ မြေ တစ်ခု လို့လည်း သတ်မှတ်လို့ ရတယ်... ထျန်းယွမ် ရဲ့ အနှစ်သာရ တွေ စုစည်းပြီး ဖြစ်တည်လာတဲ့ အရာ က ကောင်းကင်ကိုးထပ် နတ်နှင်းရည်စက် ပဲ... သိုင်းသူတော်စင် ရဲ့ ကျင့်ကြံခြင်း အတွက် အများကြီး အထောက်အကူ ဖြစ်စေတယ်... ကိုယ်ပိုင် နတ်စံအိမ် ရဲ့ အခြေခံ အုတ်မြစ် ကို မြှင့်တင်ပေးနိုင်ပြီး ထျန်းယွမ်မြို့ ကို စောင့်ကြပ်ရတဲ့ အကျိုးအမြတ် အချို့ လို့ မှတ်ယူလို့ ရတယ်... ဆယ်နှစ် နေမှ ကောင်းကင်ကိုးထပ် နတ်နှင်းရည်စက် တစ်စက် ကို သိုင်းသူတော်စင် ရဲ့ လစာ အဖြစ် စုဆောင်းလို့ ရတယ်... ဒီ ကိစ္စ က လောက ကြီး ထဲမှာ လျှို့ဝှက်ချက် လို့ မဆိုနိုင်ပေမဲ့ သိုင်းသူတော်စင် အောက်က လူတွေကတော့ အခြေခံအားဖြင့် သိပ်မသိကြဘူး..."

ထိုစကားကို ကြားသောအခါ ကျန်းချဲ့၏ ရင်ထဲတွင် သက်ပြင်းတစ်ချက် ချလိုက်မိသည်။

အကယ်၍ ဤသို့သာဆိုပါက ကောင်းကင်ကိုးထပ် နတ်နှင်းရည်စက် က အရမ်းကို တန်ဖိုးကြီးလွန်းလှသည်ဟု မဆိုနိုင်တော့ချေ။ သေချာသည်မှာ ဤသည်က အခြား ပူဇော်ပစ္စည်းများနှင့် နှိုင်းယှဉ်ပါက ပင်ဖြစ်သည်။ အကယ်၍ ဆယ်နှစ် နေမှ ကောင်းကင်ကိုးထပ် နတ်နှင်းရည်စက် တစ်စက် ကို စုစည်းနိုင်မည် ဆိုပါက ထျန်းယွမ်မြို့ အတွင်းတွင် သိုလှောင်ထားမှု အချို့ သေချာပေါက် ရှိနေမည် ဖြစ်သည်။

"မင်း ဒါကို လိုချင်လို့လား"

ကျန်းချဲ့ ဆက်ပြောရန်ပင် မစောင့်ဆိုင်းတော့ဘဲ ကျီချန်တောက်က တိုက်ရိုက် မေးလိုက်သည်။ ဤကိစ္စကို သေချာနေသည့်အလား ပင်ဖြစ်သည်။ မည်သို့ပင်ဆိုစေ ကောင်းကင်ကိုးထပ် နတ်နှင်းရည်စက် က ဤမျှ ကြီးမားသော အစွမ်းအာနိသင် ရှိရာ သိုင်းသူတော်စင် အဆင့်သို့ ဝင်ရောက်လိုသော ယွမ်ရှန်းအဆင့် စစ်မှန်သောသခင် တစ်ဦး အတွက် အလွန် အဖိုးတန်လှပေသည်။ တစ်စက်မျှ ရရှိနိုင်ပါက အခွင့်အရေးကောင်း တစ်ခုဟု ခေါ်ဆိုနိုင်ပေသည်။

"အဲဒါ အနည်းငယ် လောက် ရဖို့ လက်အောက်ငယ်သား ဘာ အဖိုးအခ တွေ ပေးဆပ် ဖို့ လိုအပ် မယ်လို့ နတ်မင်းကြီး ထင်ပါသလဲ... လက်အောက်ငယ်သား က နတ်မင်းကြီး ကို မဖုံးကွယ်တော့ပါဘူး... အခု လက်အောက်ငယ်သား က ယွမ်ရှန်းအဆင့် ပြီးပြည့်စုံ သွားပြီ... နောက် တစ်ဆင့် အနေနဲ့ သိုင်းသူတော်စင် အဆင့် ကို ဝင်ရောက် ဖို့ စဉ်းစား ရတော့မှာမို့ပါ..."

လောကတွင် အလကားရသော နေ့လယ်စာ ဆိုသည်မှာ မရှိချေ။ အရင်က ယင်ယန် တာအိုသစ်သီး ကလည်း ထိုအတိုင်းပင် ဖြစ်ပြီး ယခု ကောင်းကင်ကိုးထပ် နတ်နှင်းရည်စက် ကလည်း ထိုအတိုင်းပင် ဖြစ်သည်။ မည်သို့ပင်ဆိုစေ သိုင်းသူတော်စင်များ အတွက် သီးသန့် ထောက်ပံ့ပေးသော ရတနာ ဖြစ်ရာ စကားတစ်ခွန်း ပြောလိုက်ရုံဖြင့် ရရှိနိုင်မည်ဟု ကျန်းချဲ့ မထင်မှတ်ထားချေ။ ဤအရာအတွက် အဖိုးအခ အချို့ ပေးဆပ်ရန် သူ ဆန္ဒရှိနေပေသည်။

"အရင်က ဝမ်ယောင်းမြို့ ကို သွားကြည့်တော့ မိစ္ဆာနယ်မြေ တွေ က အလုံးစုံ တိုက်ခိုက် ဖို့ ပြင်ဆင်နေပြီ ဆိုတာကို မြင်တွေ့နိုင်တယ်... စစ်ပွဲ ပြီးသွားတဲ့ အချိန်ကျရင် မင်း အတွက် တစ်စက် တောင်းပေးပါ့မယ်"

ကျီချန်တောက်က ကျန်းချဲ့ အတွက် မည်သည့် အဟန့်အတားမျှ ထပ်မံ မသတ်မှတ်တော့ချေ။

ဤကိစ္စကို တိုက်ရိုက် သဘောတူလိုက်ရာ ကျန်းချဲ့၏ ရင်ထဲတွင် တွေးတောမှု အချို့ ဖြစ်ပေါ်သွားစေသည်။

"ကျေးဇူးတင်ပါတယ် နတ်မင်းကြီး"

ကျီချန်တောက်က ဘာကြောင့် ဤသို့ လုပ်ဆောင်နေသနည်း ဆိုသည်ကို အတိအကျ မသိရှိသော်လည်း ကျန်းချဲ့၏ ရင်ထဲတွင် ခန့်မှန်းချက် အချို့ ရှိနေပြီ ဖြစ်သည်။ သေချာသည်မှာ မည်သည့် အရာပင်ဖြစ်စေ ကျန်းချဲ့အတွက် အမှန်တကယ်တော့ ဆိုးရွားသော ကိစ္စတစ်ခု မဟုတ်ချေ။ မည်သည့် အဖိုးအခမျှ ပေးဆပ်ရန် မလိုဘဲ ပူဇော်ပစ္စည်း တစ်ခုကို ရရှိနိုင်ခြင်းက အလွန် အဆင်ပြေချောမွေ့နေပြီဟု ခေါ်ဆိုနိုင်ပေသည်။

"နောက်ထပ် ဘာမေးစရာ ရှိသေးလဲ" ဟု ကျီချန်တောက်က ကျန်းချဲ့ကို တစ်ချက် ကြည့်လိုက်ပြီး သူ ဆက်ပြောချင်နေသည်ကို မြင်သောအခါ မေးခွန်းထုတ်ရန် မစောင့်တော့ဘဲ တိုက်ရိုက် မေးလိုက်သည်။

ကျန်းချဲ့က အသက်ရှူကြိမ် အနည်းငယ်မျှ စဉ်းစားပြီးနောက် အလျင်အမြန် မေးလိုက်သည်။

"ထိုက်ယန် နေမင်းအနှစ်သာရ ရဲ့ သဲလွန်စ ကို နတ်မင်းကြီး သိပါသလား"

"အနောက်ဘက် ဒေသ က တာ့လေ့ယင် ဘုန်းကြီးကျောင်း ထဲမှာ ရွှေရေကန် တစ်ခု ရှိတယ်... အဲဒီမှာ ထိုက်ယန် နေမင်းအနှစ်သာရ ကို ဖန်တီးပေးနိုင်တယ်... ထိုက်ယန် မြင့်မြတ်သော ခန္ဓာကိုယ် ရှိတဲ့ သိုင်းပညာရှင် က ယွမ်ရှန်းအဆင့် ကို ရောက်တဲ့ အချိန်ကျရင် သူ့ရဲ့ ခန္ဓာကိုယ် ထဲမှာ ထိုက်ယန် နေမင်းအနှစ်သာရ စွမ်းအင် တစ်ခု ကို ပျိုးထောင် ဖန်တီး နိုင်တယ်... မိစ္ဆာနယ်မြေ ရဲ့ ဖူဆန်း တောင်ကြား လောက ကြီး ရဲ့ အရှေ့ဘက် အစွန်းဆုံး နေရာ မှာလည်း ဆယ်နှစ် နေမှ တစ်ခါ ထိုက်ယန် နေမင်းအနှစ်သာရ ကျဆင်း လာလေ့ ရှိတယ်..."

ကျီချန်တောက်၏ ရှင်းပြချက်ကို နားထောင်ပြီးနောက် ကျန်းချဲ့၏ ရင်ထဲတွင် လေးလံသွားသည်။ ထိုက်ယန် နေမင်းအနှစ်သာရ စွမ်းအင် ရရှိနိုင်သော နည်းလမ်းများစွာ ရှိသော်လည်း အထက်ပါ နည်းလမ်းများ အားလုံးကို ယခုအခါ ကျန်းချဲ့ တစ်ခုမျှ မလုပ်နိုင်သေးချေ။

ဗုဒ္ဓဘာသာနှင့် သူ၏ ကြားတွင် သေရေးရှင်ရေး ရန်ငြိုးများ အစောကြီးကတည်းက ရှိနေခဲ့ပြီ ဖြစ်သည်။ အကယ်၍ ကျီချန်တောက်ကသာ ကာကွယ်မပေးထားပါက ဗုဒ္ဓဘာသာမှ ဗောဓိသတ်များက အစောကြီးကတည်းက လှုပ်ရှားတိုက်ခိုက်ပြီး လောက်ပြီ ဖြစ်ရာ ထိုက်ယန် နေမင်းအနှစ်သာရ ကို သူ့ထံ ပေးအပ်ရန် လုံးဝ မဖြစ်နိုင်ချေ။

ထိုက်ယန် မြင့်မြတ်သော ခန္ဓာကိုယ် ပိုင်ဆိုင်ထားသော တည်ရှိမှု ကိုလည်း ယခုအချိန်အထိ သူ မသိရှိသေးချေ။

မိစ္ဆာနယ်မြေ ကို သွားရောက်ရန် ဆိုလျှင်တော့ ပို၍ပင် မျှော်လင့်ချက် နည်းပါးလှပေသည်။ ယခုလက်ရှိ စွမ်းအားဖြင့် မိစ္ဆာသူတော်စင် ကိုပင် ရင်ဆိုင်နိုင်ရန် ခက်ခဲလှရာ ဖူဆန်းတောင်ကြား ဆိုသော နေရာသို့ သွားရောက်၍ ဤပစ္စည်းကို ရှာဖွေရန် ဆိုသည်မှာ ပို၍ပင် မဆိုထားနှင့်တော့။ အကယ်၍ သတင်း ပေါက်ကြားသွားပါက ကျန်းချဲ့ကို ထားလိုက်ပါတော့... ကျီချန်တောက် ပင်လျှင် သတ်ဖြတ်ခြင်း အန္တရာယ်များ ပြည့်နှက်နေသော မိစ္ဆာနယ်မြေမှ ထွက်ခွာလာနိုင်မည် မဟုတ်ချေ။

ကျန်းချဲ့က စကားဆိုရန် ဟန်ပြင်လိုက်သော်လည်း တစ်ခဏမျှ တိတ်ဆိတ်သွားတော့သည်။

ကျန်းချဲ့၏ အခက်အခဲ အချို့ကို မြင်တွေ့သွားပြီး ကျီချန်တောက်က ဆက်ပြောလိုက်သည်။

"မြောက်ပိုင်း လူရိုင်း ဝမ်ထင် မှာ သိုင်းသူတော်စင် တစ်ပါး ရှိတယ်... သူ က ထိုက်ယန် မြင့်မြတ်သော ခန္ဓာကိုယ် ပဲ... ဒါပေမဲ့ သူ့ရဲ့ စွမ်းအား က အရမ်း အစွမ်းထက်တယ်... သိုင်းသူတော်စင် ဒုတိယ အဆင့် ကိုတောင် ရောက်ရှိ နေပြီ"

"ဒါ... ဒါဆိုရင် လက်အောက်ငယ်သား က နဂါးသွေးကြော လိုအပ် မယ် ဆိုရင် ပိုင်ယွဲ့ နယ်မြေ တွေ ကနေ ရှာတွေ့ နိုင်မလား" ဟု ကျန်းချဲ့က ထိုက်ယန် နေမင်းအနှစ်သာရ စွမ်းအင် သတင်းကို ယာယီ ဖိနှိပ်ထားလိုက်ပြီး ကျန်ရှိသော အခက်အခဲ အချို့ကို အရင်ဆုံး မေးမြန်းရန် ပြင်ဆင်လိုက်သည်။ မည်သို့ပင်ဖြစ်စေ သဲလွန်စ တစ်ခုခုတော့ ရရှိရမည် ပင်ဖြစ်သည်။

"လွန်ခဲ့တဲ့ နှစ်ရာပေါင်း များစွာ တုန်းက ရှေးဟောင်း ယွဲ့ တိုင်းပြည် ကို ငါတို့ တာ့ကျိုး တိုင်းပြည် က အနိုင်ယူ ဖျက်ဆီး ခဲ့ပြီး ယွဲ့ပြည်နယ် ရဲ့ မိုင်တစ်သောင်း အကျယ်အဝန်း ရှိတဲ့ နယ်မြေ တွေကို သိမ်းပိုက် ခဲ့တယ်... ရှေးဟောင်း ယွဲ့ တိုင်းပြည် ရဲ့ အကြွင်းအကျန် တွေကိုလည်း ပိုင်ယွဲ့ နယ်မြေ ထဲကို မောင်းထုတ် ခဲ့တယ်... အဲဒီတုန်းက ရှေးဟောင်း ယွဲ့ တိုင်းပြည် ရဲ့ နဂါးသွေးကြော တွေလည်း အရပ်လေးမျက်နှာ ကို ပြန့်ကျဲ သွားခဲ့တယ်... အရင် တစ်ခေါက် မင်း ငါ့ ကို ယူလာပြတဲ့ အရာ က ချီရွှယ်မိစ္ဆာသခင် လုချန်ဖုန်း က တောင်ပိုင်း ယွဲ့ တိုင်းပြည် ဆီကနေ ခိုးယူ ခဲ့တာပဲ... အဲဒီ အပြင် မင်ယွဲ့ တိုင်းပြည်... ဟူယွဲ့ တိုင်းပြည်... ယန်ယွဲ့ စတဲ့ နိုင်ငံ တွေ ပိုင်ယွဲ့ နယ်မြေ ထဲမှာ အင်အား ကြီးမားတဲ့ နိုင်ငံ တိုင်း က နဂါးသွေးကြော တစ်စိတ်တစ်ပိုင်း ကို ရရှိ ခဲ့ကြပြီး တိုင်းပြည် ရဲ့ ကံတရား ကို ဖိနှိပ် ထားဖို့ အသုံးပြု ခဲ့ကြတယ်..."

ဤကိစ္စရပ်များက လောကရှိ အများစုသော လူများအတွက် လျှို့ဝှက်ချက်များ ဖြစ်သော်လည်း ဧရာမ သတင်းအချက်အလက် ကွန်ရက် ဖြစ်သော အနက်ရောင်ရုံးတော် ကို အုပ်ချုပ်နေသည့် ခေါက်ရှန်းနတ်မင်းကြီး ကျီချန်တောက် အတွက်မူ အခြေခံအားဖြင့် လျှို့ဝှက်ချက်ဟု ပင် မခေါ်ဆိုနိုင်ချေ။

ကျန်းချဲ့က သေချာ စဉ်းစား နားထောင်နေပြီး သဲလွန်စ ရရှိသွားပါက အဆင်ပြေသွားပြီ ဖြစ်သည်။

ဝူစုန်းနတ်ဘုရားကျောင်း ကို ယခုအချိန်တွင် မနှောင့်ယှက်ရဲသေးသော်လည်း ယခုလက်ရှိ သိုင်းသူတော်စင် နှင့် နှိုင်းယှဉ်၍ ရနိုင်သော စွမ်းအားဖြင့် ဆိုလျှင် ပိုင်ယွဲ့ နယ်မြေများကို ရှင်းလင်းရန် အခြေခံအားဖြင့် လုံးဝ ပြဿနာ မရှိချေ။ အဆင့်အတန်း လျှော့ချ၍ တိုက်ခိုက်ခြင်း ဟုပင် ခေါ်ဆိုနိုင်ပေသည်။

ဝူစုန်းနတ်ဘုရားကျောင်း မှ သိုင်းသူတော်စင် များ သာ ဝင်ရောက် မစွက်ဖက်ပါက အချိန်တိုလေးအတွင်းမှာပင် အလွယ်တကူ စုဆောင်းနိုင်မည် ဖြစ်သည်။ ဤခရီးစဉ်မှ ပြန်ရောက်သွားသည်နှင့် တောင်ပိုင်းကို စစ်ချီကာ ပိုင်ယွဲ့ကို တိုက်ခိုက်မည့် အစီအစဉ်ကိုပင် စတင် ပြင်ဆင်နိုင်ပြီ ဖြစ်သည်။

ဤအရာများနှင့် နှိုင်းယှဉ်ပါက ဤ ပူဇော်ပစ္စည်း တစ်ခုကလည်း သိပ်ပြီး ခက်ခဲလှသည်ဟု မဆိုနိုင်တော့ချေ။ ပူဇော်ပစ္စည်း မျိုးစုံကို ယခုလက်ရှိ အချိန်အထိ အပြည့်အဝ မရရှိသေးသော်လည်း သူ၏ အိတ်ကပ်ထဲသို့ ရောက်ရှိလာတော့မည်မှာ သေချာနေပြီ ဖြစ်သည်။

စဉ်းစားခန်း ဝင်နေသော ကျန်းချဲ့ကို ကြည့်ရင်း ကျီချန်တောက်က ဆက်ပြောလိုက်သည်။

"ယင် သက်သက် က အသက် မရှင် နိုင်ဘူး ယန် သက်သက် ကလည်း မကြီးထွား နိုင်ဘူး... မင်း က ထိုက်ယန် အနှစ်သာရ စွမ်းအင် ရဲ့ အကူအညီ ကို ယူပြီး သိုင်းသူတော်စင် ဖြစ်ချင်တယ် ဆိုရင် ထိုက်ယင် လမင်းအနှစ်သာရ စွမ်းအင် တစ်ခု လည်း လိုအပ်လိမ့်မယ်... အဲဒီလို ယင်ယန် ပေါင်းစပ် ပြီး အဆုံးအစ မရှိ ရှင်သန် နေမှ သာ အစစ်အမှန် တာအိုလမ်းစဉ် ဖြစ်လာမှာ... အရင် တုန်းက ငါ က မင်း ကို တိုင်းပြည်ဆရာ ယောင်ယွဲ့ အကြောင်း ပြောပြ ဖူးတယ်... သူမ က ထိုက်ယင် မြင့်မြတ်သော ခန္ဓာကိုယ် ပဲ... သူမ ရဲ့ ခန္ဓာကိုယ် ထဲမှာ ထိုက်ယင် လမင်းအနှစ်သာရ စွမ်းအင် တစ်ခု ကို ပျိုးထောင် ထားတယ်... ဒါပေမဲ့ အဲဒီ ပစ္စည်း ကို ရနိုင်မလား ဆိုတာ ကတော့ မင်း ကိုယ်တိုင် သူမ ကို နားချ နိုင်မလား ဆိုတဲ့ အပေါ်မှာပဲ မူတည်တယ်... ဘာပဲဖြစ်ဖြစ် အခု သူမ အတွက် ရွေးချယ်စရာ က မင်း တစ်ယောက်တည်း မဟုတ်တော့ဘူးလေ... သူမ က သံယောဇဉ်ကင်းမဲ့တဲ့ လမ်းစဉ် ကို ကျင့်ကြံ တာမို့ မင်း နဲ့ ယင်ယန် တွဲဖက် ကျင့်ကြံ ဖို့ သဘောတူ မလား ဆိုတာ ကလည်း မသေချာ သေးဘူး..."

ကျန်းချဲ့က ခေါင်းကို အနည်းငယ် ညိတ်ပြလိုက်သည်။ ဤကိစ္စကို အမှန်တကယ် နားလည်ထားသည်။ သို့သော် ယခုအခါ တစ်ဖက်လူကို သွေးဆောင်နိုင်မည့် အရာ တစ်ခုခုကို ထုတ်မပြနိုင်သေးသဖြင့် တစ်ဖက်လူကို နားချရန်သာ ကြိုးစားကြည့်ရမည် ဖြစ်သည်။

သို့မဟုတ်ပါက ယခုလက်ရှိ မိမိ၏ အခြေအနေ က တစ်ဖက်လူ၏ နဂါးစွမ်းအင် စုပ်ယူမည့် လိုအပ်ချက်ကို ပြည့်မီနိုင်မလား ဆိုသည်ကို တစ်ဖက်လူအား ပြသရမည် ဖြစ်သည်။ သို့သော် ယခုအခါ ကျန်းချဲ့တွင် အတွေးတစ်ခု ပေါ်လာသည်။

"ယောင်ယွဲ့ က နဂါးစွမ်းအင် ကို လိုအပ်တယ် ဆိုရင် ဘာလို့ ပိုင်ယွဲ့ နယ်မြေ တွေ က နဂါးသွေးကြော တွေကို သွားမလုယူ တာလဲ... ဘာ ကန့်သတ်ချက် များ ရှိနေလို့လဲ"

ထိုစကားကို ကြားသောအခါ ကျီချန်တောက်၏ နှုတ်ခမ်းထောင့်တွင် အပြုံးတစ်ခု ပေါ်လာသည်။

"နဂါးသွေးကြော တွေက အဲဒီလောက် အလွယ်တကူ သန့်စင် လို့ ရတယ် လို့ မင်း ထင်နေတာလား... အရင်တုန်းက ငါ ပြောခဲ့သလိုပဲ နဂါးသွေးကြော ကို သန့်စင် နိုင်တဲ့ သူတွေ အားလုံး က လူသား ခေါင်းဆောင် ရဲ့ အရည်အချင်း တွေ ကောင်းကင် က ရွေးချယ်ခံရတဲ့ သူတွေချည်းပဲ... ပြီးတော့ နဂါးသွေးကြော က အရမ်းကို ယန် သဘာဝ ဆန်လွန်းတယ်... ယောင်ယွဲ့ က မိန်းမသား ဖြစ်နေတဲ့ အပြင် ထိုက်ယင် မြင့်မြတ်သော ခန္ဓာကိုယ် လည်း ဖြစ်နေတယ်... တကယ်လို့ အမှားအယွင်း တစ်ခုခု သာ ဖြစ်သွားခဲ့ရင် သူမ ရဲ့ ဘဝတစ်ဝက်စာ ကျင့်ကြံ မှု တွေ အားလုံး သဲထဲ ရေသွန် ဖြစ်သွားလိမ့်မယ်... သူမ က အရည်အချင်း ထူးချွန် သူ ဆိုပေမဲ့ ရွေးချယ်စရာ ရှိနေတဲ့ အခြေအနေ မှာတော့ စွန့်စားပြီး အဲဒီလို သွားလုပ်မှာ မဟုတ်ဘူး"

"လက်အောက်ငယ်သား နားလည်ပါပြီ"

ယောင်ယွဲ့ က နဂါးသွေးကြောများကို မသန့်စင်နိုင်သရွေ့ ကျန်းချဲ့ စိတ်အေးသွားပြီ ဖြစ်သည်။ အရင်က လက္ခဏာ မျိုးစုံ အရ ကြည့်မည်ဆိုလျှင် ယောင်ယွဲ့ က ကျန်းချဲ့အပေါ် စိတ်မဝင်စားဘူး ဟု မဆိုနိုင်သော်လည်း သူနှင့် ယွမ်ခန် ဧကရာဇ် ကျီဝမ်ဟောင် တို့ နှစ်ဦးကြားတွင် ယောင်ယွဲ့ က ကျန်းချဲ့ဘက်သို့ သိသိသာသာ ယိမ်းယိုင်နေကြောင်း ထင်ရှားလှသည်။ အကယ်၍ ထိုသို့သာမဟုတ်ပါက အဆောင်ကျောက်တုံး ကို ချန်ရစ်ထားခဲ့မည် မဟုတ်ချေ။

သေချာသည်မှာ ကျန်းချဲ့ မသိရှိသေးသော အချက်မှာ ယောင်ယွဲ့ က သူ့အပေါ် မကောင်းမြင်စိတ် မရှိဘဲ သူ့ဘက်သို့ ယိမ်းယိုင်နေသော်လည်း အခြေခံ အကြောင်းရင်း မှာ အရင်က ကျီချန်တောက်၏ ခြိမ်းခြောက်မှု ကြောင့် ပင်ဖြစ်သည်။ ယောင်ယွဲ့ အတွက် ကျန်းချဲ့ မှလွဲ၍ အခြား ရွေးချယ်စရာ လုံးဝ မရှိတော့ချေ။

"နောက်ထပ် ဘာ မေးစရာ ရှိသေးလဲ... တစ်ခါတည်း အကုန် မေးလိုက်" ဟု ကျီချန်တောက်က စကားလမ်းကြောင်း ပြောင်းလိုက်သည်။

ကျန်းချဲ့က တစ်ခဏမျှ ရပ်တန့်သွားပြီး တိုးညင်းသောအသံဖြင့် မေးလိုက်သည်။

"လောကနယ်မြေ မူလအနှစ်သာရ အကြောင်း နတ်မင်းကြီး သိပါသလား"

"ဟင်..."

အရင်က မည်သည့် အပြောင်းအလဲမျှ မရှိသော ကျီချန်တောက်၏ မျက်ဝန်းများက မျက်တောင်တစ်ခတ်အတွင်း ကျဉ်းမြောင်းသွားပြီး ဤပစ္စည်း က အလွန် ကြီးမားသော လျှို့ဝှက်ချက် တစ်ခု ဖြစ်နေသည့်အလား ပင်ဖြစ်သည်။ နောက်သို့ လှည့်ကာ ကျန်းချဲ့ကို အသက်ရှူကြိမ် အနည်းငယ်မျှ စူးစိုက်ကြည့်နေတော့သည်။

"မင်း ဘယ်လို လုပ်ပြီး ဒါကို မေးရတာလဲ"

ကျန်းချဲ့၏ ရင်ထဲတွင် အတွေးများ လျင်မြန်စွာ လည်ပတ်သွားပြီး အလျင်အမြန် ပြန်ပြောလိုက်သည်။

"အရင်က လျှို့ဝှက်နယ်မြေ တစ်ခု ကို ဝင်ရောက် ခဲ့တုန်းက မှတ်တမ်း အချို့ မှာ ဖတ်ဖူး ခဲ့တာပါ... လောကနယ်မြေ မူလအနှစ်သာရ က သိုင်းသူတော်စင် အဆင့် ဝင်ရောက် ဖို့ အတွက် အလွန် ကြီးမားတဲ့ အကျိုးသက်ရောက်မှု ရှိတယ် လို့ ဆိုတယ်... တကယ်လို့ စွမ်းရည် ရှိရင် အဲဒီ ပစ္စည်း ကို အသုံးပြုပြီး သိုင်းသူတော်စင် အဖြစ် ဝင်ရောက် သင့်တယ် လို့ ရေးထားတယ်..."

ကျီချန်တောက်က ကျန်းချဲ့ကို နက်နက်ရှိုင်းရှိုင်း ကြည့်လိုက်သည်။ မျက်ဝန်းများထဲတွင် သဲလွန်စ အချို့ကို ရှာဖွေတွေ့ရှိသွားသည့်အလား ပင်ဖြစ်သည်။ တစ်ခဏမျှ စဉ်းစားပြီးနောက် ပြန်ပြောလိုက်သည်။

"လောကနယ်မြေ မူလအနှစ်သာရ ဆိုတာ ကမ္ဘာ တစ်ခု ရဲ့ ဗဟိုချက် ပဲ... တကယ်လို့ မူလအနှစ်သာရ သာ ထိခိုက် သွားမယ် ဆိုရင် အပေါ့စား အနေနဲ့ ဆိုရင် မြေငလျင် လှုပ်ပြီး ကောင်းကင် ပြိုကျ မယ်... သဘာဝ ဘေးအန္တရာယ် တွေ ဖြစ်ပေါ် လာမယ်... အဆိုးရွားဆုံး အနေနဲ့ ဆိုရင်တော့... ယွမ်ချီ စွမ်းအင် တွေ ဆုတ်ယုတ် သွားပြီး ကောင်းကင်နဲ့ မြေကြီး ရဲ့ မှော်စွမ်းအင် တွေ ပျက်သုဉ်း သွားလိမ့်မယ်... ဒါပေမဲ့ ဒီ ပစ္စည်း က တန်ဖိုး ကြီးမား တာ သက်သက် မဟုတ်ဘူး"

"အလားတူပဲ လုံးဝ ရှာမတွေ့ နိုင်ဘူး... ကိုယ်ပိုင် ကျင့်ကြံခြင်းအဆင့် က ကောင်းကင်နဲ့ မြေကြီး ရဲ့ ကန့်သတ်ချက် ကို ရောက်ရှိ ပြီးမှ သာ လောကနယ်မြေ မူလအနှစ်သာရ ရှိတဲ့ နေရာ ကို မပီဝေဝါ အာရုံခံ မိနိုင်တယ်... မင်း တွေ့ခဲ့တဲ့ အဲဒီ မှတ်တမ်း ဆိုတာ က သေချာပေါက် ရမ်းသမ်း ရေးထားတာပဲ နောက်လူ တွေကို တွင်းတူး ပြီး မြှုပ်ချင် နေတာ... လောကနယ်မြေ မူလအနှစ်သာရ ကိုသာ သန့်စင် နိုင်မယ် ဆိုရင် နတ်စံအိမ် ရဲ့ ဗဟိုချက် ဖြစ်လာမှာပဲ... ဒါပေမဲ့ လောက ကြီး ထဲမှာ ဘယ် သိုင်းသူတော်စင် ကများ လောကနယ်မြေ မူလအနှစ်သာရ ကို ကိုယ်ပိုင် အဖြစ် သန့်စင် နိုင်မှာလဲ... အဲဒီ အဆင့် ကို ရောက်တဲ့ သူတွေ က လောကနယ်မြေ မူလအနှစ်သာရ ကို အခြေခံအားဖြင့် မလိုအပ် တော့ဘူး... ကျင့်ကြံခြင်းအဆင့် က တိကျတဲ့ အဆင့်အတန်း တစ်ခု ကို မရောက်သေးဘဲ နဲ့ ရမ်းသမ်း ပြီး စမ်းသပ် ရဲမယ် ဆိုရင် မျက်တောင်တစ်ခတ်အတွင်း မှာပဲ အသက် သေဆုံး ပြီး တာအိုလမ်းစဉ် ပျက်သုဉ်း သွားလိမ့်မယ်... မူလအနှစ်သာရ စွမ်းအင် ရဲ့ ဝါးမြို ခြင်း ကို ခံရလိမ့်မယ်"

ကျန်းချဲ့က ထိုစကားကို ကြားသောအခါ ရင်ထဲတွင် အနည်းငယ် တုန်လှုပ်သွားသည်။ အကယ်၍ ဤမျှ အန္တရာယ် များလှသည် ဆိုပါက ကောင်းကင်ယဇ်ပလ္လင်ကျောက်တိုင် က ဘာကြောင့် ဤပစ္စည်းကို ပူဇော်ပစ္စည်း အဖြစ် သတ်မှတ်ပေးရသနည်း။

"ဒါပေမဲ့ ခြွင်းချက် မရှိဘူး လို့တော့ မဆိုနိုင်ပါဘူး..."

"ဗျာ..."

ကျန်းချဲ့၏ ရင်ထဲတွင် စိတ်ပျက်နေချိန်၌ ကျီချန်တောက်က ရုတ်တရက် သက်ပြင်းတစ်ချက် ချလိုက်သံကို ကြားလိုက်ရသဖြင့် ချက်ချင်း ခေါင်းမော့ကာ အကြည့်များကို ကျီချန်တောက်ထံသို့ ရွှေ့လိုက်သည်။

ကျီချန်တောက်က မသန့်စင်သော လေများကို မှုတ်ထုတ်လိုက်ပြီး လေးနက်သော အသံဖြင့် ပြောလိုက်သည်။

"ဒီ လောက ရဲ့ မူလအနှစ်သာရ က အမြင့်မြတ်ဆုံး ပစ္စည်း ပဲ လုံးဝ အလွယ်တကူ မထိခိုက် စေရဘူး... ဒါပေမဲ့ ကမ္ဘာငယ်လေး တစ်ခု သာ ဆိုရင်တော့... ကိုယ်ပိုင် အဖြစ် သန့်စင် လို့ မရနိုင်ဘူး လို့ လုံးဝ ပြောလို့ မရဘူး... အရင် တုန်းက ငါ ကိုယ်တိုင် လည်း ဒီလို အတွေး မျိုး ရှိခဲ့ဖူးတယ်... နှမြောစရာ က နောက်ဆုံး မှာတော့ အဲဒီ ခြေတစ်လှမ်း ကို မလှမ်း နိုင်ခဲ့ဘူး…”

အခန်း ၅၁၆ သိုင်းသူတော်စင်အောက်တွင် ပြိုင်ဘက်ကင်း

'ကမ္ဘာငယ်လေး...'

ကျန်းချဲ့က နားထောင်ရင်း ရင်ထဲတွင် အတွေးများစွာ လည်ပတ်သွားတော့သည်။

ကျီချန်တောက်က ဆက်လက် ပြောဆိုလိုက်သည်။

"နတ်စံအိမ် ကို ဖွင့်လှစ် လိုတဲ့ ယန်ဝိညာဉ် သိုင်းသူတော်စင် တွေ အားလုံး က နတ်စံအိမ် ရဲ့ ဗဟိုချက် အဖြစ် ထားရှိ ဖို့ ကောင်းကင်နဲ့ မြေကြီး ရဲ့ ရှားပါး ရတနာ တစ်ခု ကို ရှာဖွေ ရတယ်... ဒီလို မှသာ နတ်စံအိမ် က ပြိုကွဲ မသွားမှာ... အဲဒီ ရတနာ ရဲ့ ကန့်သတ်ချက် က နတ်စံအိမ် ရဲ့ ကန့်သတ်ချက် ပဲ... အရင်တုန်းက ငါ ကိုယ်တိုင်လည်း ပါရမီ ထူးချွန် တာကို အားကိုး ပြီး လောကနယ်မြေ မူလအနှစ်သာရ တစ်ခု ကို နတ်စံအိမ် ရဲ့ ဗဟိုချက် အဖြစ် ထားဖို့ စဉ်းစား ခဲ့ဖူးတယ်... နှမြောစရာ က နောက်ဆုံး မှာ သေချာ စဉ်းစား ပြီးတော့ အဲဒီလို မလုပ်ခဲ့ဘူး... ဘာလို့လဲ ဆိုတော့ ယန်ဝိညာဉ် နတ်စံအိမ် က လောကနယ်မြေ မူလအနှစ်သာရ ကို ဗဟိုချက် အဖြစ် လက်ခံ နိုင်စွမ်း လုံးဝ မရှိလို့ပဲ... ရမ်းသမ်း ပြီး စမ်းသပ် မယ် ဆိုရင် နတ်စံအိမ် ပြိုကွဲ ပြီး အသက် သေဆုံး တာအိုလမ်းစဉ် ပျက်သုဉ်း သွားရုံပဲ ရှိမှာ..."

ထိုသို့ပြောပြီးနောက် ကျီချန်တောက်၏ အကြည့်များက ကျန်းချဲ့ထံသို့ ရောက်ရှိသွားပြီး မျက်ဝန်းများထဲတွင် စူးစမ်းလေ့လာမှု အရိပ်အယောင်အချို့ ပါဝင်နေပေသည်။

ကျန်းချဲ့က ခေါင်းကို ဖြည်းညင်းစွာ ညိတ်ပြလိုက်သော်လည်း ရင်ထဲတွင်မူ အတွေးအချို့ ရှိနေခဲ့ပြီ ဖြစ်သည်။ မည်သို့ပင်ဆိုစေ သူက ယွမ်ရှန်းကို အသုံးပြု၍ ယန်ဝိညာဉ် အဆင့်သို့ ဝင်ရောက်ရုံ သက်သက်မဟုတ်ဘဲ ရုပ်ပိုင်းဆိုင်ရာ ခန္ဓာကိုယ်နှင့် ယွမ်ရှန်းကို အတူတကွ သိုင်းသူတော်စင်အဖြစ် တက်လှမ်းစေမည် မဟုတ်ပါလား။ အကယ်၍ ဤသို့သာဆိုပါက နတ်စံအိမ်၏ ဗဟိုချက်အဖြစ် လောကနယ်မြေ မူလအနှစ်သာရကို တောင့်ခံနိုင်ကောင်း တောင့်ခံနိုင်မည် ဖြစ်သည်။ ဤအကြောင်းရင်းကြောင့်ပင် ကောင်းကင်ယဇ်ပလ္လင်ကျောက်တိုင်က ဤကဲ့သို့သော အဖိုးအခကို ပေးလာခြင်း ဖြစ်နိုင်ပေသည်။ ဤအရာကို တွေးမိသောအခါ ကျန်းချဲ့က ချက်ချင်း သဘောပေါက်သွားတော့သည်။

'ကောင်းကင်ယဇ်ပလ္လင်ကျောက်တိုင် နဲ့ တကယ်ကို ထိုက်တန် ပါပေတယ်... ငါ့ ရဲ့ ပူဇော်မှု တိုင်း က ပြီးပြည့်စုံ တဲ့ အခြေအနေ ကို ရောက်ရှိ စေတာပဲ...'

"ကောင်းကင်နဲ့ မြေကြီး ရဲ့ လျှို့ဝှက်နယ်မြေ တွေ ထဲမှာ လောကနယ်မြေ မူလအနှစ်သာရ ရှိနိုင်ပါသလား လို့ နတ်မင်းကြီး ကို မေးချင်ပါတယ်" ဟု ကျန်းချဲ့က ကျီချန်တောက်ကို စူးရှသော မျက်ဝန်းများဖြင့် ကြည့်ကာ မေးလိုက်သည်။ လျှို့ဝှက်နယ်မြေ တစ်ခုက သီးခြား ကမ္ဘာတစ်ခု အဖြစ် တည်ရှိနေရာ ကမ္ဘာငယ်လေး တစ်ခုဟုလည်း ခေါ်ဆိုနိုင်ကြောင်း သူ ထင်မြင်မိသည်။ သို့သော် ကျီချန်တောက်က ခေါင်းကို ဖြည်းညင်းစွာ ခါရမ်းလိုက်သည်။

"လျှို့ဝှက်နယ်မြေ ဆိုတာ ဒီ လောက ကြီး အပေါ် မှီခို နေရတာပဲ... ကောင်းကင်နဲ့ မြေကြီး ကနေ ဖြစ်တည် လာတာ ဒါမှမဟုတ် သိုင်းသူတော်စင် တွေ သေဆုံး သွားပြီးနောက် ခန္ဓာကိုယ် ထဲက နတ်စံအိမ် ပြောင်းလဲ သွားတာပဲ ဖြစ်နိုင်တယ်... အဲဒီ ထဲမှာ လောကနယ်မြေ မူလအနှစ်သာရ လုံးဝ မရှိဘူး... မူလအနှစ်သာရ ဆိုတာ တကယ့် ကမ္ဘာ တစ်ခု ဖြစ်မှ ရမှာ... ငါတို့ နေထိုင်တဲ့ ဒီ ကမ္ဘာ ကြီး က ဧရာမ ကမ္ဘာကြီး တစ်ခု လို့ ခေါ်ဆို နိုင်တယ် ဆိုတာကို မင်း မသိလောက်ဘူး... ဧရာမ ကမ္ဘာကြီး ရဲ့ ပတ်ဝန်းကျင် မှာ လျှို့ဝှက် နေတဲ့ ကမ္ဘာငယ်လေး တွေ အများကြီး ရှိသေးတယ်... လောကနယ်မြေ ဆိုတာ သဘာဝ ဓာတ်ကြီး ငါးပါး စုံလင် ပြီး ကောင်းကင်နဲ့ မြေကြီး စည်းကမ်းချက် တွေ ပြီးပြည့်စုံ တဲ့ နေရာပဲ... ကောင်းကင်နဲ့ မြေကြီး ရဲ့ ကန့်သတ်ချက် က ဧရာမ ကမ္ဘာကြီး ကို မမီတာ ကလွဲရင် ကျန်တာ တွေ အားလုံး က အခြေခံ အားဖြင့် တူညီ ကြတယ်..."

ကျီချန်တောက်၏ ရှင်းပြချက်ကို နားထောင်ပြီးနောက် ကျန်းချဲ့၏ မျက်ဝန်းများ လင်းလက်သွားပြီး မျက်တောင်တစ်ခတ်အတွင်း နေရာတစ်ခုကို သတိရသွားတော့သည်။ လျှို့ဝှက်နယ်မြေများတွင် လောကနယ်မြေ မူလအနှစ်သာရ မရှိပါက နေရာတစ်ခုတွင်တော့ သေချာပေါက် ရှိနေမည် ဖြစ်သည်။ ထိုနေရာမှာ အနက်ရောင်နဂါး ဘိုးဘေး နေထိုင်ခဲ့သော ထိုကမ္ဘာ ပင်ဖြစ်သည်။

အရင်က ကျန်းချဲ့သည် ပုံရိပ်ယောင် နတ်မီးတောက် ကို ရှာဖွေရန် တောင်တန်းကြီး တစ်သိန်း အတွင်းရှိ ပရမ်းပတာမိစ္ဆာချိုင့်ဝှမ်း ဟုခေါ်သော အန္တရာယ်များသည့် နေရာတစ်ခုသို့ ခြေချခဲ့ဖူးသည်။ ထိုချိုင့်ဝှမ်းအတွင်း လေဟာနယ်က မတည်မငြိမ်ဖြစ်နေပြီး လေဟာနယ် အက်ကွဲကြောင်းများ မကြာခဏ ပေါ်ထွက်လေ့ရှိကာ ဖိနှိပ်ထားသော မိစ္ဆာသစ်ပင် တစ်ပင်လည်း ရှိနေပေသည်။ ထိုနေရာတွင်ပင် အထက်ဘုံသို့ တက်လှမ်းလာသော အနက်ရောင်နဂါး ဘိုးဘေး ကို ကျန်းချဲ့ အမှတ်မထင် တွေ့ဆုံခဲ့ရခြင်း ပင်ဖြစ်သည်။ ထိုအချိန်က အခြေအနေများအရ ကြည့်မည်ဆိုလျှင် အနက်ရောင်နဂါး ဘိုးဘေး မှလွဲ၍ ပရမ်းပတာမိစ္ဆာချိုင့်ဝှမ်း အတွင်းတွင် အလောင်းများစွာ ရှိနေသေးသည်။ ထိုသူများ အားလုံးမှာ အနက်ရောင်နဂါး ဘိုးဘေး၏ ကမ္ဘာမှ အထက်ဘုံသို့ တက်လှမ်းလာသူများ ပင်ဖြစ်သည်။

ကျန်းချဲ့က အနက်ရောင်နဂါး ဘိုးဘေး၏ ဝိညာဉ်ကို ရှာဖွေစစ်ဆေးခဲ့ဖူးသဖြင့် ထိုကမ္ဘာနှင့် ပတ်သက်၍ အတော်အသင့် နားလည်ထားသည်။ ဓလေ့ထုံးစံများမှလွဲ၍ ထိုကမ္ဘာက သူ နေထိုင်နေသော ဤကမ္ဘာနှင့် အမှန်တကယ်ပင် ကြီးမားသော ကွာခြားချက် မရှိချေ။ ကန့်သတ်ချက် အချို့ ရှိနေခြင်း သက်သက်သာ ဖြစ်သည်။ အစွမ်းထက်ဆုံးသူ ဆိုလျှင်ပင် ရွှမ်တန်ကို ခွဲဖျက်၍ ယွမ်ယင်းအဆင့်သို့ ပြောင်းလဲရန် သာ တတ်နိုင်ပြီး ထို့နောက် ဓမ္မရုပ်တုအဆင့်သို့ ဝင်ရောက်ရန် လုံးဝ မဖြစ်နိုင်တော့ချေ။ ထို့ထက်ပို၍ မည်သည့် ယွမ်ယင်းအဆင့် မဟာသိုင်းသခင်ကြီး မဆို ကောင်းကင်နှင့် မြေကြီး၏ ဖိနှိပ်မှုကို ခံရမည် ဖြစ်သည်။ အကယ်၍ သူသာ ထိုနေရာသို့ သွားရောက်မည် ဆိုပါက အလားတူ ကြီးမားသော ဖိနှိပ်မှုကို ခံရမည် ဖြစ်သည်။ သို့သော် ထိုနေရာက သေချာပေါက် ကမ္ဘာငယ်လေး တစ်ခု လုံးဝ ဖြစ်နေပေသည်။

အမှားအယွင်း မရှိပါက ဤပူဇော်ပစ္စည်းကို ထိုနေရာမှ ရှာဖွေရနိုင်ချေ ရှိပေသည်။ ကံကောင်းထောက်မစွာ အရင်က အနက်ရောင်နဂါး ဘိုးဘေး၏ အသက်ကို ချန်ရစ်ထားခဲ့သဖြင့် တစ်ဖက်လူကို အမှတ်အသား အဖြစ် အသုံးပြုကာ လေဟာနယ် ရေစီးကြောင်းများ အတွင်းမှ ထိုလောကနယ်မြေ တည်ရှိရာ နေရာကို ရှာဖွေနိုင်မည် ဖြစ်သည်။

"ရှုပ်ထွေး မှု တွေကို ဖြေရှင်း ပေးတဲ့ အတွက် နတ်မင်းကြီး ကို ကျေးဇူးတင်ပါတယ်" ဟု ကျန်းချဲ့က ရင်တွင်းမှ လှိုက်လှဲစွာဖြင့် လက်ယှက်ကာ အရိုအသေ ပြုလိုက်သည်။

ဤတစ်ကြိမ် ကျီချန်တောက်ထံမှ အကြံဉာဏ် တောင်းခံမှုက သူ့အတွက် လမ်းစတစ်ခုကို ညွှန်ပြပေးလိုက်သည်ဟု ခေါ်ဆိုနိုင်ပေသည်။ လောလောဆယ်တွင် တစ်ဖက်လူက ကောင်းကင်ကိုးထပ် နတ်နှင်းရည်စက်ကို သူ့ထံ ပေးအပ်ရန် သဘောတူထားရုံသာ ရှိသေးသော်လည်း သူ့ကို နောက်ပိုင်း လျှောက်လှမ်းရမည့် လမ်းစဉ်အတွက် အစီအစဉ်တစ်ခု ရှိလာစေခဲ့သည်။ ထိုက်ယန် နေမင်းအနှစ်သာရ စွမ်းအင်မှလွဲ၍ ကျန်ရှိသော ပူဇော်ပစ္စည်းများ အားလုံးအတွက် ယခုအခါ သူ့တွင် သဲလွန်စများ ရှိနေပြီ ဖြစ်သည်။ နောက်တစ်ဆင့် အနေဖြင့် အစီအစဉ်အတိုင်း လုပ်ဆောင်သွားရုံဖြင့် သိုင်းသူတော်စင်အဆင့်သို့ တက်လှမ်းနိုင်မည် ဖြစ်သည်။

ကျီချန်တောက်က လက်ကို ဝှေ့ယမ်းလိုက်သည်။

"ဒီ အကြောင်းအရာ တွေက လျှို့ဝှက်ချက် တွေ ဆိုပေမဲ့ အဖိုးတန် တဲ့ အရာ တွေတော့ မဟုတ်ပါဘူး... နောင်တစ်ချိန် မင်း က အနက်ရောင်ရုံးတော် ဌာနချုပ် ကို သွားမယ် ဆိုရင် ကောင်းကင်စောင့်ကြည့် လသာဆောင် ထဲမှာလည်း ဒီ အကြောင်းအရာ တွေကို သိနိုင်ပါတယ်... ဒါပေမဲ့ ငါ ကတော့ မင်း ကို အကြံဉာဏ် တစ်ခု ပေးချင်သေးတယ်... မင်း ရဲ့ အရည်အချင်း နဲ့ သိုင်းသူတော်စင် ဖြစ်ဖို့ ဆိုတာ ခက်ခဲ တဲ့ ကိစ္စ မဟုတ်ဘူး... ဒါပေမဲ့ လောကနယ်မြေ မူလအနှစ်သာရ ကို နတ်စံအိမ် ရဲ့ ဗဟိုချက် အဖြစ် စွန့်စား အသုံးပြု မယ် ဆိုရင် ပြဿနာ မရှိနိုင်ဘူး လို့ တပ်အပ် မပြောနိုင်ဘူး... သိုင်းသူတော်စင် ဖြစ်ပြီး နောက်ပိုင်း မှာ လျှောက်ရမယ့် လမ်း ကို ကိုယ်တိုင် ဆုံးဖြတ် ရတာပါပဲ... အကျိုးဆက် တွေကို သေချာ တွေးထားဖို့ ပဲ လိုတယ်... ငါ ကတော့ မင်း ကို တားဆီး မှာ မဟုတ်ဘူး"

ကျန်းချဲ့၏ ရည်ရွယ်ချက်ကို သူ သဘာဝကျစွာ မြင်တွေ့နေရသည်။ သို့သော် ဤသည်က အလွန် ပုံမှန် ဖြစ်ပေသည်။ မည်သည့် ပြိုင်ဘက်ကင်း ပါရမီရှင်မဆို ကိုယ်ပိုင် မာန ရှိကြစမြဲ ပင်ဖြစ်သည်။ အကယ်၍ မာန အနည်းငယ်မျှ မရှိပါက လောကရှိ သူရဲကောင်းများနှင့် ယှဉ်ပြိုင်နိုင်စွမ်း ရှိမည် မဟုတ်ချေ။

"နတ်မင်းကြီး ရဲ့ စေတနာ ကို လက်အောက်ငယ်သား နားလည်ပါတယ်... တကယ်တော့ လက်အောက်ငယ်သား က မေးကြည့် တာ သက်သက် ပါပဲ... စွန့်စား ဖို့ ရည်ရွယ်ချက် မရှိပါဘူး" ဟု ကျန်းချဲ့က ပြုံး၍ အလျင်အမြန် ဆင်ခြေပေးလိုက်သည်။

ကျီချန်တောက်အပေါ် သူ အလွန် ကျေးဇူးတင်သော်လည်း ၎င်းတို့ နှစ်ဦးကြားတွင် အမြဲတမ်း အဟန့်အတား အနည်းငယ် ရှိနေပြီး တစ်ဖက်လူကို ခြွင်းချက်မရှိ ယုံကြည်မည် မဟုတ်ချေ။ ဤကဲ့သို့သော ကျင့်ကြံခြင်းဆိုင်ရာ အရေးကြီးသည့် ကိစ္စရပ်များကို အလုံးစုံ ဖွင့်ဟပြောဆိုရန် လုံးဝ မဖြစ်နိုင်ချေ။ ကောင်းကင်ယဇ်ပလ္လင်ကျောက်တိုင်ကို ရရှိသည့် ပထမဆုံးနေ့ ကတည်းက မည်သူနှင့် ရင်ဆိုင်ရပါစေ ရင်ထဲတွင် သတိထားပြီး ကာကွယ်မှုများ ပြုလုပ်ထားရမည် ဖြစ်ကြောင်း သူ ကောင်းစွာ သိရှိထားသည်။

"မေးစရာ ဘာ ရှိသေးလဲ"

ကျီချန်တောက်က အသေးစိတ် စုံစမ်းမေးမြန်းတတ်သည့် စရိုက်မျိုး မဟုတ်ချေ။ ကျန်းချဲ့ကို လမ်းညွှန်မှု ပေးခြင်းက အမြင့်ဆုံး ကန့်သတ်ချက် ပင်ဖြစ်သည်။ အတိအကျ မည်သို့ လုပ်ဆောင်မည်နည်း ဆိုသည်ကိုမူ သူက ထိုင်ကြည့်နေရုံသာ ရှိမည်ဖြစ်ပြီး တားဆီးရန် သို့မဟုတ် ဖျောင်းဖျရန် လုပ်ဆောင်မည် မဟုတ်ချေ။ အကယ်၍ ကျန်းချဲ့က အမှန်တကယ်ပင် လောကနယ်မြေ မူလအနှစ်သာရကို စွန့်စား ပေါင်းစပ်မည် ဆိုပါက အောင်မြင်လျှင် ကောင်းမွန်သော ကိစ္စ ဖြစ်သော်လည်း အကယ်၍ ကျရှုံးသွားပါက ထို အကျိုးဆက်ကို ကျန်းချဲ့ ကိုယ်တိုင်သာ ခံစားရမည် ပင်ဖြစ်သည်။

"လက်အောက်ငယ်သား မှာ ကျင့်ကြံခြင်း နဲ့ ပတ်သက်တဲ့ မေးခွန်း အချို့ ရှိပါသေးတယ်" ဟု ကျန်းချဲ့က အခွင့်အရေး ယူကာ ပြောလိုက်သည်။

မျက်တောင်တစ်ခတ်အတွင်း ရက်အနည်းငယ် အချိန် ကုန်ဆုံးသွားခဲ့သည်။ အချိန်များ ကုန်ဆုံးသွားသည်နှင့်အမျှ ကျီချန်တောက်က ဝမ်ယောင်းမြို့ အတွင်းသို့ ဝင်ရောက် သတ်ဖြတ်ခဲ့သည့် ကိစ္စက ထျန်းယွမ်မြို့ အတွင်း ပျံ့နှံ့လာခဲ့ပြီ ဖြစ်သည်။ ချက်ချင်းပင် အရင်က ကျန်းချဲ့ အဆင့်ချိုးဖြတ်ခဲ့သည့် ကိစ္စကို ဖုံးလွှမ်းသွားတော့သည်။ မည်သို့ပင်ဆိုစေ ရှေးယခင် ကတည်းက လူသားမျိုးနွယ်များက တန်ပြန် ထိုးစစ်ဆင်ဖူးခြင်း မရှိခဲ့ချေ။ ဤကဲ့သို့ မိစ္ဆာနယ်မြေ အတွင်းသို့ ကိုယ်တိုင် ဝင်ရောက် တိုက်ခိုက်ရဲခြင်းက စစ်တပ်၏ စိတ်ဓာတ်ကို မြှင့်တင်ပေးသည့် ကြီးမားသော ကိစ္စတစ်ခု ဖြစ်လာခဲ့ရာ ထျန်းယွမ်မြို့ ကလည်း ဝမ်းသာအားရဖြင့် ဖြန့်ဝေပေးခဲ့သည်။ သေချာသည်မှာ ဤကဲ့သို့သော ကိစ္စရပ်မျိုး လုပ်ဆောင်ပြီးပါက မိစ္ဆာမျိုးနွယ်များက အလွယ်တကူ ကျေအေးသွားမည် မဟုတ်ကြောင်းကို မည်သူမဆို ရှင်းလင်းစွာ သိရှိထားကြသည်။ တိုက်ပွဲကြီး တစ်ခု သေချာပေါက် ပေါက်ကွဲထွက်လာမည် ပင်ဖြစ်သည်။

ထို့ကြောင့် ထျန်းယွမ်မြို့ တစ်ခုလုံးက လှုပ်ရှား ပြင်ဆင်လာကြသည်။ ထျန်းယွမ်၏ လက်ရွေးစင် စစ်သည် သိန်းပေါင်းများစွာ၊ ရှန်ရှန်းအဆင့် မဟာသိုင်းသခင်ကြီး တစ်ရာနီးပါး နှင့် သိုင်းသူတော်စင် ဆယ်ပါးနီးပါး တို့က လက်နက်များကို ဆုပ်ကိုင်ကာ အချိန်မရွေး စစ်ပွဲ စတင်ရန် အသင့်ပြင်ဆင်ထားကြသည်။

ကျန်းချဲ့ အတွက်မူ ဤရက်ပိုင်းအတွင်း အများကြီး ပို၍ ပေါ့ပါး လွတ်လပ်နေသည်။ နေ့စဉ်နေ့တိုင်း နောက်ထပ် ပူဇော်ပစ္စည်းများကို မည်သို့ လုယူရမည်နည်း ဆိုသည်ကို အစီအစဉ် ဆွဲနေခြင်း သို့မဟုတ် ကျီချန်တောက်၏ ဘေးတွင် နေထိုင်ကာ တာအိုလမ်းစဉ်များကို မေးမြန်းနေခြင်း ပင်ဖြစ်သည်။ ကောင်းကင်နှင့် မြေကြီး၏ အထွတ်အထိပ်တွင် ရပ်တည်နေသော လောကနတ်ဘုရား တစ်ပါး၏ လမ်းညွှန်မှုများက ယခုအချိန်တွင် နားလည်ရန် ခက်ခဲနေသေးသော်လည်း ရှင်းလင်းစွာ သိရှိထားခြင်းက မသိရှိခြင်းထက် အများကြီး ပိုကောင်းလှပေသည်။ ကျန်းချဲ့၏ မေးမြန်းမှု အချို့အပေါ် ကျီချန်တောက်ကလည်း သိသမျှ အကုန်လုံးကို ချန်လှပ်ထားခြင်းမရှိဘဲ ပြောပြပေးနေပြီး တပည့်တစ်ယောက် အလား သဘောထားကာ ဆက်ဆံနေပေသည်။

၎င်းနှင့် နှိုင်းယှဉ်ပါက ဝမ်ယောင်းမြို့ ကတော့ အများကြီး ပို၍ ဖိနှိပ်မှုများ ပြည့်နှက်နေသည်။ ကျီချန်တောက်က မိစ္ဆာနယ်မြေ အတွင်းသို့ ဝင်ရောက်ကာ မိစ္ဆာသူတော်စင် တစ်ပါးကို အရှင်ဖမ်းဆီးပြီး ပေါ့ပေါ့ပါးပါး ထွက်ခွာသွားခဲ့ပြီး ကတည်းက ဝမ်ယောင်းမြို့က ၎င်းကို ကြီးမားသော အရှက်ရမှု တစ်ခု အဖြစ် သတ်မှတ်ထားခဲ့သည်။ ထို့ကြောင့် မိစ္ဆာသူတော်စင် များစွာက လေဟာနယ် အတွင်း၌ နေ့ရောညပါ အဆက်မပြတ် ပုန်းအောင်းနေကြသည်။ ကျီချန်တောက် နောက်ထပ်တစ်ကြိမ် လှည့်ပြန်လာပြီး တိုက်ခိုက်မည်ကို အချိန်မရွေး ကာကွယ်နေကြခြင်း ပင်ဖြစ်သည်။ သို့သော် သူတို့ကို စိတ်ပျက်သွားစေသည်မှာ ယခင်တစ်ကြိမ် ပြီးကတည်းက ကျီချန်တောက်က နောက်ထပ်တစ်ကြိမ် ပေါ်ထွက်မလာတော့ချေ။

ဝမ်ယောင်းမြို့ ကတော့ အရင်က ရွှေရောင်ပန်ငှက် မိစ္ဆာဧကရာဇ် နှင့် နွား မိစ္ဆာဧကရာဇ် တို့၏ အမိန့်အောက်တွင် မီးတောက်များ တောက်လောင်နေသည့်အလား ပြင်းထန်သော စစ်ရေး ပြင်ဆင်မှုများကို စတင်နေပြီ ဖြစ်သည်။ လက်ရွေးစင် မိစ္ဆာစစ်သည် သန်းပေါင်းများစွာက နေ့ရောညပါ စစ်ရေး လေ့ကျင့်နေကြသည်။ အစေခံ မိစ္ဆာစစ်သည် သန်းပေါင်းများစွာ ကလည်း အချိန်မရွေး အသင့် စောင့်ဆိုင်းနေကြသည်။

ဤနေ့တွင် မိစ္ဆာစစ်သည်များ စစ်အစီအရင်များကို လေ့ကျင့်နေစဉ် ရုတ်တရက် လေဟာနယ်အတွင်း စူးရှသော ဟိန်းဟောက်သံ တစ်ခု ထွက်ပေါ်လာသည်။ ထို့နောက် ကောင်းကင်ယံ အပြည့် ဖုံးလွှမ်းနေသော တိမ်တိုက် မြူခိုးများ အတွင်းမှ လမ်းကြောင်းတစ်ခု ကွဲထွက်သွားသည်။ ပေတစ်ရာ အရွယ်အစားရှိသော ရွှေရောင်အတောင်ပံ ပန်ငှက်ကြီး တစ်ကောင်က အတောင်ပံများကို ဖြန့်ကျက်ကာ ကောင်းကင်ယံ အထက်တွင် အားမာန်အပြည့်ဖြင့် မတ်မတ်ရပ်နေပြီး အောက်ဘက်ရှိ အဆုံးအစမရှိသော မိစ္ဆာစစ်သည်များကို ငုံ့ကြည့်နေသည်။ ပန်သူတော်စင်လေး က လူသားပုံစံသို့ ပြောင်းလဲသွားပြီး ကောင်းကင်ယံတွင် မာနကြီးစွာ ရပ်တည်နေသည်။ တစ်ကိုယ်လုံးရှိ အမွေးအတောင်များက ရွှေရောင် ဖြစ်နေပြီး ခေါင်းတွင် သိမ်းငှက် မျက်လုံးများ ရှိကာ သတ်ဖြတ်လိုစိတ်များ ပါဝင်နေသည်။ လူသားပုံစံ ဖြစ်သော်လည်း လူ့အသွင်အပြင်တော့ မရှိချေ။

ဤသည်မှာလည်း မိစ္ဆာမျိုးနွယ်၏ ရိုးရာဓလေ့ ပင်ဖြစ်သည်။ ၎င်းတို့အတွက် လူသားပုံစံက မွေးရာပါ ခန္ဓာကိုယ် ဖြစ်သော်လည်း လူ့အသွင်အပြင်ကတော့ မဟုတ်ချေ။ မိစ္ဆာမျိုးနွယ်များ အားလုံးက ကိုယ်ပိုင် သားရဲ အသွင်အပြင်ကိုသာ အလှအပ အဖြစ် သတ်မှတ်ကြသည်။

"ရွှေရောင်အတောင်ပံ ပန်ငှက် မျိုးနွယ် က တောက်ယွင်ထျန်း အမိန့် အရ ဒီ နေရာ ကို ရောက်လာ ပါတယ်... မိစ္ဆာသူတော်စင် တွေကို တွေ့ခွင့်ပြုပါ"

ပန်သူတော်စင်လေး တောက်ယွင်ထျန်း က လေဟာနယ်တွင် ရပ်လျက် လက်ယှက်ကာ အရိုအသေ ပြုလိုက်သည်။ မျက်နှာထား ပြောင်းလဲခြင်း မရှိဘဲ သာမန် မိစ္ဆာဘုရင်များ မိစ္ဆာသူတော်စင်များကို ရင်ဆိုင်ရချိန်တွင် ဖြစ်ပေါ်လေ့ရှိသော ကြောက်ရွံ့ ရိုသေမှုမျိုး မရှိချေ။ နှုတ်မှ တွေ့ခွင့်တောင်းခံသည်ဟု ပြောဆိုသော်လည်း လက်တွေ့တွင်တော့ အနည်းငယ် မာနကြီးနေသည့် ဟန်ပန် ပါဝင်နေပေသည်။

အကြောင်းရင်းမှာ သဘာဝကျကျ သူ၏ မွေးဖွားလာမှုက သာမန်မဟုတ်သောကြောင့် ပင်ဖြစ်သည်။ မိစ္ဆာသူတော်စင် သွေးကြော ဖြစ်ရုံသာမက ရွှေရောင်အတောင်ပံ ပန်ငှက် မျိုးနွယ် တစ်ခုလုံး၏ သားတော် လည်း ဖြစ်ပြီး လူအများက ပန်သူတော်စင်လေး ဟု ခေါ်ဆိုကြကာ မိစ္ဆာနယ်မြေ အတွင်း အထွတ်အထိပ် ပြိုင်ဘက်ကင်း ပါရမီရှင် တစ်ဦး ပင်ဖြစ်သည်။ မိစ္ဆာသူတော်စင် အောက်တွင် သူနှင့် ရင်ပေါင်တန်းနိုင်သူမှာ လက်ချိုးရေတွက်၍ ရနိုင်ပေသည်။ အကယ်၍ အခြေခံ အုတ်မြစ်ကို ပိုမို ခိုင်မာစေရန် မကြိုးစားခဲ့ပါက သူ၏ အရည်အချင်းဖြင့် ဆိုလျှင် မိစ္ဆာသူတော်စင် အဆင့်သို့ ဝင်ရောက်ရန် အစောကြီးကတည်းက လုံလောက်နေပြီ ဖြစ်သည်။ ထို့ကြောင့် မိစ္ဆာသူတော်စင် အချို့ကပင် ပန်သူတော်စင်လေး တောက်ယွင်ထျန်း အပေါ် အလွန် ယဉ်ကျေးစွာ ဆက်ဆံကြသည်။ ကျန်းချဲ့ နှင့် ဓားမိစ္ဆာ ကျန်းဆန်း တို့ ထျန်းယွမ်မြို့ တွင် ရရှိထားသော အဆင့်အတန်း နှင့် သိပ်မကွာခြားလှချေ။

ထို့အပြင် ဤတစ်ကြိမ် သူက လာရောက် ကူညီပေးခြင်း ဖြစ်ပြီး လူသားမျိုးနွယ်၏ ထိပ်တန်း ပါရမီရှင်များကို တွေ့ဆုံရန် ဖြစ်သည်။ သူက အမိန့်တစ်ခုကြောင့် လာရောက်ရခြင်း မဟုတ်ဘဲ လူသားမျိုးနွယ်၏ ထိပ်တန်း ပါရမီရှင်များကို လာရောက် ရင်ဆိုင်ရန် ဖြစ်ရာ မိမိကိုယ်ကို အောက်ကျို့သော အနေအထားမျိုးတွင် ထားရှိရန် လုံးဝ မဖြစ်နိုင်ချေ။

"ဟားဟားဟား... ငါတို့ မျိုးနွယ် ရဲ့ သားတော် ရောက်လာပြီပဲ... ထျန်းယွမ်မြို့ ထဲမှာ သိုင်းသူတော်စင် အောက် ဘယ်သူ ကများ တားဆီး နိုင်မှာလဲ"

ပွင့်လင်းပြီး ကြမ်းတမ်းသော ရယ်မောသံ တစ်ခုက ကောင်းကင်နှင့် မြေကြီးကို ပျံ့နှံ့သွားသည်။ ဝမ်ယောင်းမြို့ အတွင်းမှ ရွှေရောင်အတောင်ပံ ပန်ငှက် တစ်ကောင်က အတောင်ပံများကို ခတ်ကာ ရောက်ရှိလာပြီး လေဟာနယ် အတွင်း လူသားပုံစံသို့ ပြောင်းလဲသွားသည်။

"တတိယ အကြီးအကဲ ကို ဂါရဝပြု ပါတယ်" ဟု ပန်သူတော်စင်လေး က လက်ယှက်ကာ အရိုအသေ ပြုလိုက်သည်။

"သားတော် အားနာစရာ မလိုပါဘူး"

ထို ပန်ငှက် မျိုးနွယ်၏ မိစ္ဆာသူတော်စင်က လက်ကို ဝှေ့ယမ်းလိုက်ပြီး မျက်နှာပေါ်တွင် နွေးထွေးသော အပြုံးများ ပေါ်လွင်နေသည်။ ပန်ငှက် မျိုးနွယ် တစ်ခုလုံးက ပန်သူတော်စင်လေး တောက်ယွင်ထျန်း အပေါ် အလွန် အလေးထားကြသည်။ အဘယ်ကြောင့်ဆိုသော် တစ်ဖက်လူ၏ အရည်အချင်းက အလွန် ရှားပါးလှပြီး နှစ်တစ်ရာ ပင် မပြည့်သော အချိန်အတွင်း မိစ္ဆာနယ်မြေ ကိုးခုလုံး တွင် ပြိုင်ဘက်ကင်း အဖြစ် တိုက်ခိုက်နိုင်ခဲ့သောကြောင့် ပင်ဖြစ်သည်။ မိစ္ဆာဧကရာဇ် ဖြစ်လာမည့် အလားအလာကို ပိုင်ဆိုင်ထားပေသည်။

၎င်း၏ အနောက်တွင် မြို့အတွင်းမှ မိစ္ဆာသူတော်စင် အချို့ ထပ်မံ ထွက်ပေါ်လာကြပြီး ပန်သူတော်စင်လေး အပေါ် အလွန် ကြီးမားသော ယဉ်ကျေးမှုများ ပြသကြကာ ၎င်းကို အဆင့်အတန်း တူညီသော တည်ရှိမှု တစ်ခု အဖြစ် သဘောထား ဆက်ဆံနေကြသည်။

"ဒီတစ်ကြိမ် တကယ်လို့ ပန်သူတော်စင်လေး သာ လှုပ်ရှား မယ် ဆိုရင် အဲဒီ ထျန်းယွမ်မြို့ က ဓားမိစ္ဆာ ကို ခေါင်းမဖော် နိုင်အောင် အသေအချာ ရိုက်နှက် နိုင်ပြီး ငါတို့ မိစ္ဆာ မျိုးနွယ် ရဲ့ အစွမ်းအစ ကို မြှင့်တင် ပေးနိုင်မှာပဲ"

"ပြောတာ မှန်တယ်... အရင်က ငါတို့ မျိုးနွယ် ရဲ့ မိစ္ဆာဘုရင် အချို့ ကို သတ်ဖြတ် သွားတဲ့ အဲဒီ လူသား မျိုးနွယ် ပါရမီရှင် ဆိုရင်တောင် ပန်သူတော်စင်လေး ရဲ့ ပြိုင်ဘက် ဖြစ်လာမှာ မဟုတ်ဘူး"

မိစ္ဆာသူတော်စင် အချို့က ပေါ့ပေါ့ပါးပါး ပြောဆို ရယ်မောနေကြသည်။ လူသား မျိုးနွယ်တွင် ပါရမီရှင်များ ရှိသကဲ့သို့ မိစ္ဆာ မျိုးနွယ်တွင်လည်း ချွင်းချက် မဟုတ်ချေ။

မိစ္ဆာသူတော်စင် အချို့၏ မြှောက်ပင့် စကားများကို နားထောင်ရင်း ပန်သူတော်စင်လေး ၏ မျက်နှာပေါ်တွင် မာနကြီးသော အရိပ်အယောင်များ ပို၍ပင် ပေါ်လွင်လာသည်။ သူက နဂါးနန်းတော် အိမ်ရှေ့မင်းသားကြီး၊ ကျူးချွဲ သားတော်၊ လိပ်နက် သားတော် စသည့် မိစ္ဆာနယ်မြေ၏ ပါရမီရှင် အချို့နှင့် ယှဉ်တွဲ ရပ်တည်နိုင်သော တည်ရှိမှု တစ်ခု ပင်ဖြစ်သည်။ လူသား မျိုးနွယ်ကို ဖိနှိပ်ရန် ဆိုသည်မှာ ပြဿနာ မဟုတ်ကြောင်း ကိုယ်ပိုင် ယုံကြည်မှု အပြည့် ရှိနေပေသည်။ မည်သို့ပင်ဆိုစေ သိုင်းသူတော်စင် အောက်တွင် လူသား မျိုးနွယ်၏ ယွမ်ရှန်းအဆင့် စစ်မှန်သောသခင်များက လက်တွေ့တွင် မိစ္ဆာ မျိုးနွယ်ဘက်ထက် အနည်းငယ် အားနည်းနေပေသည်။ ပုံမှန် အားဖြင့် မသိသာသော်လည်း အကယ်၍ ထိပ်တန်း ပါရမီရှင်များ အချင်းချင်း ယှဉ်ပြိုင်ကြမည် ဆိုပါက ထို အားသာချက် အနည်းငယ်ကပင် အနိုင်ရရန် လုံလောက်နေပေသည်။

ပြင်ပလောက စစ်မြေပြင်၏ စည်းကမ်းများ အစောကြီးကတည်းက ပျက်စီးသွားခဲ့သဖြင့် လူသား မျိုးနွယ်၏ သိုင်းသူတော်စင်များ အမှောင်ထဲမှ ဝင်ရောက် ခိုးကြောင်ခိုးဝှက် တိုက်ခိုက်မည်ကို ကာကွယ်ရန် သူက ဤနေရာသို့ လာရောက်၍ လေ့ကျင့်ကြံဆခြင်း မပြုလုပ်ခဲ့ခြင်း သက်သက်သာ ဖြစ်သည်။

သို့သော် သူ ရရှိထားသော သတင်းများအရ ကြည့်မည်ဆိုလျှင် အသေးအမွှား လူသား မျိုးနွယ် က တစ်ချက်တည်း ကိုပင် မခုခံနိုင်ချေ။

"ကူ... ကူ..."

မိစ္ဆာသူတော်စင် အချို့နှင့် ပန်သူတော်စင်လေး တို့ အချင်းချင်း စကားပြော ရယ်မောနေစဉ် ရုတ်တရက် ထူးဆန်းသော ဟိန်းဟောက်သံ တစ်ခု ထွက်ပေါ်လာသည်။

မျက်တောင်တစ်ခတ်အတွင်း နေရာတွင် ရှိနေသော မိစ္ဆာသူတော်စင်များ အားလုံးက ခေါင်းကို တစ်ပြိုင်နက်တည်း လှည့်ကာ အဝေး ကောင်းကင်ယံသို့ လှမ်းကြည့်လိုက်ကြသည်။ ပန်သူတော်စင်လေး တောက်ယွင်ထျန်း ၏ မျက်နှာထားကတော့ အနည်းငယ် ပြောင်းလဲသွားတော့သည်။

လူအများ၏ မျက်စိအောက်တွင်ပင်။ နေမင်းကြီး တစ်စင်းက အဝေးမှ နီးကပ်လာသည်။ ပူလောင်ပြင်းပြသော အပူချိန်က မိစ္ဆာစစ်သည် များစွာကို နေရထိုင်ရ ခက်ခဲသွားစေပြီး မျက်တောင်တစ်ခတ်အတွင်း မီးဖို ကြီး တစ်ခု အတွင်းသို့ ကျဆင်းသွားသည့်အလား ခံစားလိုက်ကြရသည်။

တိမ်တိုက် ပင်လယ် အတွင်းတွင် သေချာ ကြည့်ရှုမည် ဆိုပါက ထိုအရာက နေမင်း လုံးဝ မဟုတ်ဘဲ ခြေသုံးချောင်း ရွှေရောင်ကျီးကန်း တစ်ကောင် ဖြစ်ကြောင်း တွေ့ရှိရမည် ဖြစ်သည်။

ကျီးကန်း နှင့် ပုံစံတူ သော်လည်း နတ်ငှက် တစ်ကောင် အလား ပင်ဖြစ်သည်။ ဖြတ်သန်းသွားသော နေရာတိုင်းတွင် ပူလောင်ပြင်းပြသော အပူချိန်က အရာအားလုံးကို လွှမ်းခြုံသွားတော့သည်။

"ကူ... ယား..."

ရွှေရောင်ကျီးကန်း က အော်မြည်လိုက်ပြီး လူသားပုံစံသို့ ပြောင်းလဲသွားသည်။ နေမင်းကြီး အတွင်းမှ ခန့်ညားထည်ဝါသော ပုံရိပ်တစ်ခု ထွက်ပေါ်လာသည်။

ရွှေရောင် ဝတ်ရုံရှည်ကို ဝတ်ဆင်ထားပြီး လူသားခန္ဓာကိုယ် လူ့အသွင်အပြင် ရှိကာ မျက်ခုံးနှစ်ခု ကြားတွင် အလင်းတန်းလေး တစ်ခု အလှဆင်ထားပြီး နတ်မျက်လုံး တစ်လုံး အလား ပင်ဖြစ်သည်။ မီးတောက် အလား အနီရောင် ဆံပင်ရှည်များက ဖရိုဖရဲ ပြန့်ကျဲနေသည်။

ခြေဗလာဖြင့် လေဟာနယ်ကို နင်းဖြတ်ကာ မျက်တောင်တစ်ခတ်အတွင်း မိစ္ဆာသူတော်စင် များစွာ၏ ရှေ့သို့ ရောက်ရှိလာတော့သည်။ ဖူဆန်းတောင်ကြား မှ ရွှေရောင်ကျီးကန်း သားတော် လုဝူယာ ပင်ဖြစ်သည်။

သူက မိစ္ဆာနယ်မြေ တစ်ခုလုံး အတွင်းတွင် အငြင်းပွားဖွယ် မရှိသော နံပါတ်တစ် ပါရမီရှင် လည်း ဖြစ်သည်။ ပန်သူတော်စင်လေး၊ ကျူးချွဲ သားတော် စသည့် ပါရမီရှင်များ အားလုံးက သူ၏ အောက်တွင်သာ နေထိုင်ရပြီး ထိပ်တန်း ပါရမီရှင်များထဲမှ တစ်ဦး ဟုသာ အမည်တပ် ခံရပေသည်။

ပန်သူတော်စင်လေး ၏ မျက်ခုံးများ အနည်းငယ် ပင့်တက်သွားပြီး နတ်မျက်လုံး တစ်စုံက လုဝူယာ ကို စူးစိုက်ကြည့်နေကာ မျက်ဝန်းများထဲတွင် မကျေနပ်မှုများ နှင့် ကြောက်ရွံ့မှု အချို့ ပါဝင်နေသည်။

အရင်က သူက မိစ္ဆာနယ်မြေ အတွင်း မိစ္ဆာသူတော်စင် အောက်တွင် ပြိုင်ဘက်ကင်း ဖြစ်သည်ဟု အလွန် မာနကြီးခဲ့သည်။

လမ်းတစ်လျှောက် မျိုးနွယ်စု မျိုးစုံမှ သားတော်များကို စိန်ခေါ်ခဲ့ပြီး သရေကျသည့် အချိန်များ ရှိသော်လည်း တစ်ကြိမ်တစ်ခါမျှ ရှုံးနိမ့်ဖူးခြင်း မရှိခဲ့ချေ။

မာနကြီးနေသော သူက သဘာဝကျကျ နတ်ငှက် နတ်မျိုးစေ့ ဟု ခေါ်ဆိုကြသော လုဝူယာ ကို ပစ်မှတ်ထားကာ ဖူဆန်းတောင်ကြား သို့ သွားရောက် စိန်ခေါ်ခဲ့သည်။

ထိုတိုက်ပွဲတွင် ဘာတွေ ဖြစ်ပျက်ခဲ့သနည်း ဆိုသည်ကို ပြင်ပလူများ မသိရှိကြချေ။

သို့သော် သူကိုယ်တိုင် သာလျှင် ထိုတိုက်ပွဲတွင် တစ်ဖက်လူကို အပြတ်အသတ် ရှုံးနိမ့်ခဲ့ပြီး ပြင်းထန်သော ဒဏ်ရာများပင် ရရှိခဲ့ကြောင်း ရှင်းလင်းစွာ သိရှိထားသည်။

ထိုအချိန်မှ စ၍ သူ၏ မာနများ အတော်လေး လျော့ပါးသွားခဲ့ခြင်း ပင်ဖြစ်သည်။

"မိစ္ဆာသူတော်စင် တွေကို ဂါရဝပြု ပါတယ်" ဟု လုဝူယာ က အကြည့်များကို တစ်ပတ် ဝေ့ကြည့်လိုက်ပြီး မျက်နှာပေါ်တွင် မည်သည့် ခံစားချက်မျှ မရှိဘဲ ခေါင်းကို အနည်းငယ် ညိတ်ပြလိုက်သည်။

ပန်သူတော်စင်လေး ၏ တည်ရှိမှုကို ပင် တိုက်ရိုက် လျစ်လျူရှု ထားလိုက်သည်။ မည်သည့် မာနကြီးသော စကားများကိုမျှ ဖွင့်ဟပြောဆိုခြင်း မရှိသော်လည်း သူ၏ မာနများက ရင်ထဲတွင် သာ ရှိနေပေသည်။

"ရွှေရောင်ကျီးကန်း သားတော် က အားနာ နေပါပြီ... ဒီတစ်ကြိမ် မင်း နဲ့ ပန်သူတော်စင်လေး တို့ လှုပ်ရှား မယ် ဆိုရင် ထျန်းယွမ်မြို့ အတွက် ရှုံးနိမ့် ဖို့ လမ်း တစ်လမ်း တည်း ပဲ ရှိတော့မှာပါ"

"မှန်တယ်..."

"မတွေ့ရတာ ကြာပြီ... ရွှေရောင်ကျီးကန်း သားတော် ရဲ့ ဟန်ပန် က အရင် ကထက် တောင် ပိုပြီး ကောင်းမွန် လာသေးတယ်... ကြည့်ရတာ မိစ္ဆာသူတော်စင် အဆင့် နဲ့ ဆိုရင် ခြေတစ်ဝက် လောက်ပဲ ကွာတော့မယ် ထင်တယ်"

မိစ္ဆာသူတော်စင် အချို့က လုဝူယာ ကို ရင်ဆိုင်ရချိန်တွင် ပန်သူတော်စင်လေး ကို ရင်ဆိုင်ရချိန် ကထက် အများကြီး ပို၍ ယဉ်ကျေးကြသည်။ အကြောင်းရင်းမှာ သဘာဝကျကျ လုဝူယာ ၏ နတ်မျိုးစေ့ ဟူသော ကောလာဟလ ကြောင့် ပင်ဖြစ်သည်။

မိစ္ဆာနယ်မြေ အထက်အောက် အားလုံးက လုဝူယာ ကို နတ်မျိုးစေ့ ဖြစ်ကြောင်း မိစ္ဆာဧကရာဇ် တစ်ပါးက သုံးသပ်ခဲ့ဖူးသည်ကို သိရှိထားကြသည်။ ဤ အချက် တစ်ချက်တည်း ဖြင့်ပင် မိစ္ဆာသူတော်စင် များစွာက သူ့အပေါ် ယဉ်ကျေးစွာ ဆက်ဆံရန် ထိုက်တန်နေပေသည်။

မည်သို့ပင်ဆိုစေ ၎င်းတို့၏ ကန့်သတ်ချက် က မျက်စိရှေ့တွင် ရှိနေပြီး မိစ္ဆာဧကရာဇ် အဆင့်သို့ ဝင်ရောက်ရန် အခြေခံအားဖြင့် မဖြစ်နိုင်သလောက် ပင်ဖြစ်သည်။ သို့သော် လုဝူယာ ကတော့ မတူချေ။ နောင်တစ်ချိန်တွင် မသေဆုံးသေးသရွေ့ နတ်ဘုရား ဖြစ်လာရန် မသေချာသော်လည်း မိစ္ဆာဧကရာဇ် ကတော့ သေချာပေါက် ဖြစ်လာမည် ပင်ဖြစ်သည်။

"အားလုံးပဲ အားနာစရာ မလိုပါဘူး" ဟု လုဝူယာ က ပေါ့ပေါ့ပါးပါး ရယ်မောလိုက်ပြီး အကြည့်များကို ဘေးတွင် တိတ်ဆိတ်နေသော ပန်သူတော်စင်လေး ထံသို့ ရွှေ့လိုက်သည်။

ဤကဲ့သို့ ဖိအား အောက်တွင် ပန်သူတော်စင်လေး က တစ်ခဏမျှ တိတ်ဆိတ်သွားပြီးနောက် လက်ယှက်ကာ အရိုအသေ ပြုလိုက်သည်။

"အစ်ကို လု ကို ဂါရဝပြု ပါတယ်"

"အားနာစရာ မလိုပါဘူး" ဟု လုဝူယာ က အလွယ်တကူ ပြန်ထူးလိုက်ပြီး ထပ်မံ မေးမြန်းလိုက်သည်။

"ငါ က ရွှေရောင်ပန်ငှက် နဲ့ နွား မိစ္ဆာဧကရာဇ် နှစ်ပါး ရဲ့ အမိန့် အရ ဒီ နေရာ ကို ရောက်လာ ပါတယ်... မိစ္ဆာဧကရာဇ် နှစ်ပါး ရှိနေသလား ဆိုတာ မသိဘူး... ထျန်းယွမ်မြို့ ကို ဘယ် အချိန် လောက် လှုပ်ရှား တိုက်ခိုက် မယ် လို့ ရည်ရွယ် ထားသလဲ"

သူက ဤနေရာတွင် စကားစမြည် ပြောဆိုနေရန် မည်သည့် စိတ်ဝင်စားမှုမျှ မရှိချေ။

ကိစ္စများ အမြန်ဆုံး ပြီးစီးသွားပြီးနောက် ပြန်သွားကာ ကျင့်ကြံရန်သာ စဉ်းစားနေသည်။ လူသား မျိုးနွယ်၏ ပါရမီရှင် ဆိုသည်များ အပေါ် အခြေခံအားဖြင့် မည်သည့် စိတ်ဝင်စားမှုမျှ မရှိချေ။

အဘယ်ကြောင့်ဆိုသော် သူ လောကသို့ ထွက်ပေါ်လာပြီး ကတည်းက မိစ္ဆာ မျိုးနွယ်၏ ပါရမီရှင် များစွာကို တွေ့မြင်ခဲ့ဖူးသော်လည်း တစ်ယောက်ချင်းစီ တိုင်းက တစ်ချက်တည်းကိုပင် မခုခံနိုင်သောကြောင့် ပင်ဖြစ်သည်။