အခန်း ၅၀၉

Vol. 51 Ch. 509

အခန်း (၅၀၉) အများပြည်သူသို့ အလုပ်ခေါ်ယူခြင်း

သူ၏ အကြည့်က အုပ်စုလိုက် စကားပြောဆိုမှုထဲမှ ရင်းနှီးနေသော နာမည်များပေါ်တွင် ဖြတ်သန်းသွားပြီးနောက် နောက်ဆုံးတွင် မကြာခဏ စကားပြောလေ့မရှိဘဲ ထိုက်ချိသင်္ကေတ ပရိုဖိုင်ပုံထားသည့် အကောင့်လေးတစ်ခုတွင် ရပ်တန့်သွားခဲ့သည်။

'ထိုက်ရွှီကျောင်းထိုင်ဆရာတော်'

လေထဲလွင့်နေသည့်အလား သူ၏ အသွင်အပြင်နှင့် နက်နဲဆန်းကြယ်သော စကားလုံးများကြောင့် ဤဆရာတော်က ကျန်းယဲ့အပေါ် နက်ရှိုင်းသော ပုံရိပ်တစ်ခုကို ချန်ထားရစ်ခဲ့လေသည်။

ဤကျောင်းထိုင်ဆရာတော်က လျှို့ဝှက်ဆန်းကြယ်ဟန်ဆောင်နေသည့် လိမ်လည်လှည့်ဖြားသူမျိုး မဟုတ်ဘဲ အမှန်တကယ်ပင် အတိုင်းအတာတစ်ခုအထိ ကျင့်ကြံခြင်းအဆင့်ရှိသူဖြစ်ကြောင်း သူ အာရုံခံမိသည်။

အကယ်၍ အနာဂတ်တွင် မိစ္ဆာများ၊ တစ္ဆေများနှင့် ထူးဆန်းသော စည်းမျဉ်းများ ပါဝင်သည့် အခြားကမ္ဘာခရီးစဉ်တစ်ခုကို ဖန်တီးလိုက်မည်ဆိုပါက ဘာဖြစ်လာမည်နည်းဟု ကျန်းယဲ့ မနေနိုင်ဘဲ တွေးကြည့်မိလိုက်သည်။

ဤဆရာတော်က သက်ဆိုင်ရာ ကျွမ်းကျင်မှုရှိပြီး အဖွဲ့၏ ဘေးကင်းမှုကို ကြီးမားစွာ အာမခံပေးနိုင်သဖြင့် အလွန်ကောင်းမွန်သော ကိုယ်စားလှယ်လောင်းတစ်ဦး ဖြစ်သည်မှာ သံသယဖြစ်ဖွယ်မရှိချေ။

ထိုက်ရွှီဆရာတော်ပြီးနောက် ဆရာတော်၏ ဘေးတွင် အမြဲရှိနေတတ်ပြီး တောက်ပသော မျက်လုံးများ၊ တက်ကြွကာ လွတ်လပ်ပေါ့ပါးသော ကိုယ်ရည်ကိုယ်သွေးရှိသည့် ကိုရင်လေး ရွှမ်ချင်းကို ကျန်းယဲ့ သတိရသွားပြန်သည်။

ဤကောင်လေးက ကောင်းမွန်သော ပါရမီရှိပြီး ဉာဏ်ကောင်းပုံရသော်လည်း သူက အလွန်တက်ကြွလွန်းကာ ရင့်ကျက်မှု မရှိသေးချေ။ လတ်တလောတွင် အရေးကြီးသော တာဝန်များကို ထမ်းဆောင်နိုင်စွမ်း မရှိသေးသဖြင့် သူ့ကို ယာယီ ဖယ်ထုတ်ထားရန်သာ တတ်နိုင်တော့သည်။

"အသက်အရွယ်က ငယ်ပေမဲ့ သူ့ရဲ့ လုပ်ဟန်တွေက ရင့်ကျက်တယ်..." ကျန်းယဲ့က တိုးတိုးလေး ရေရွတ်လိုက်ပြီး အခြား ပုံရိပ်တစ်ခုက သူ၏ စိတ်ထဲသို့ ခုန်ဝင်လာခဲ့ပြန်သည်။

'အရှေ့အလယ်ပိုင်းက သူဌေးပေါက်စလေး... ဟမ်ဒန်'

ထိုမင်းသားလေးက အသက်ငယ်ရွယ်သော်လည်း အကြိမ်အနည်းငယ် ဆက်ဆံခဲ့စဉ်က သူ၏ အမူအရာနှင့် စကားပြောဆိုမှုများမှာ လူကြီးများစွာထက်ပင် များစွာသာလွန်သော ရင့်ကျက်မှုနှင့် အတွေ့အကြုံရင့်ကျက်မှုကို ပြသနေခဲ့သည်။

၎င်းမှာ ငယ်စဉ်ကတည်းက အထက်တန်းလွှာ မိသားစုများ၏ ဂရုတစိုက် ပြုစုပျိုးထောင်မှုကို ခံခဲ့ရခြင်း၏ ရလဒ် ဖြစ်နိုင်ပေသည်။

ထိုကဲ့သို့သော ပတ်ဝန်းကျင်တွင် ကြီးပြင်းလာသည့် ကလေးများက သာမန်ကလေးများ၏ စံနှုန်းများဖြင့် တိုင်းတာ၍မရနိုင်သော အမြင်၊ တွေးခေါ်ပုံနှင့် ပြဿနာဖြေရှင်းနိုင်စွမ်းများ ရှိကြသည်။

ဟမ်ဒန်သည် တည်ငြိမ်ပြီး ဉာဏ်ရည်ထက်မြက်ကာ သူ၏ အသက်အရွယ်ထက် ကျော်လွန်သော ရင့်ကျက်မှုရှိသဖြင့် အလွန်အလားအလာရှိသော လူငယ်ပါရမီရှင်တစ်ဦး ဖြစ်သည်မှာ သံသယဖြစ်ဖွယ်မရှိချေ။

သင့်လျော်သော လမ်းညွှန်မှုပေးနိုင်ပါက သူက အလွန်ကောင်းမွန်သော အချိန်နှင့် ဟင်းလင်းပြင် ခရီးသွားလမ်းညွှန်တစ်ဦး သေချာပေါက် ဖြစ်လာနိုင်ကြောင်း ကျန်းယဲ့ ယုံကြည်၏။

"ကျစ်... နှမြောစရာပဲ။ သူက အရမ်းငယ်လွန်းသေးတယ်...." ကျန်းယဲ့က တိုးညှင်းစွာ သက်ပြင်းချလိုက်မိသည်။

ဟင်းလင်းပြင် ခရီးသွားခြင်းက ခန့်မှန်း၍မရနိုင်သော အန္တရာယ်များနှင့် အမြဲတစေ ဒွန်တွဲနေပြီး အရွယ်မရောက်သေးသူတစ်ဦးအား ဧည့်သည်အဖွဲ့တစ်ဖွဲ့လုံး၏ ဘေးကင်းလုံခြုံရေးအတွက် တာဝန်ယူခိုင်းခြင်းမှာ ကိုယ်ကျင့်တရားအရရော ယုတ္တိဗေဒအရပါ မသင့်လျော်ချေ။

သူက ဟမ်ဒန်၏ နာမည်ကို ကိုယ်စားလှယ်လောင်း စာရင်းမှ နောင်တအနည်းငယ်ဖြင့် ဖျက်ပစ်လိုက်ပြီး သူ၏ အကြည့်ကို လူရှစ်ယောက် စာရင်းသို့ ပြန်လှည့်ကာ နောက်ဆုံးနေရာအတွက် မည်သူ့ကို ရှာရမည်နည်းဟု စဉ်းစားလိုက်လေသည်။

'အခြား နယ်ပယ်တွေကနေ စဉ်းစားသင့်လား ဒါမှမဟုတ် အများပြည်သူဆီကနေ အသေးစား ခေါ်ယူမှုလေး လုပ်သင့်လား...'

စာရင်းတွင် နေရာတစ်ခုသာ လိုအပ်တော့သည်ကို ကြည့်ကာ ကျန်းယဲ့သည် ဆုံးဖြတ်ချက်တစ်ခု ချလိုက်သည်။

'ဒီနောက်ဆုံးနေရာအတွက်တော့ အများပြည်သူဆီကနေ အလုပ်ခေါ်ယူတဲ့နည်းကို သုံးလိုက်မယ်...'

အချိန်များ ကုန်ဆုံးလာသည်နှင့်အမျှ သူ၏ ကိုယ်ပိုင် အချိန်နှင့် ဟင်းလင်းပြင် ခရီးသွားအေဂျင်စီက ဆက်လက်၍ တိုးချဲ့လာမည်မှာ မလွဲဧကန်ပင်။

ထို့ကြောင့် သူက ရင်းနှီးကျွမ်းဝင်နေသော လူဟောင်းများ စက်ဝိုင်းထဲတွင်သာ အမြဲတမ်း နေ၍မရနိုင်ချေ။

ရင်းနှီးသော အသိမိတ်ဆွေများမှာ လူသိများနိုင်သော်လည်း သူတို့အားလုံးက ဤစိန်ခေါ်မှုများသော အလုပ်နှင့် သင့်လျော်မည်မဟုတ်သလို သူတို့၏ ချန်နယ်များမှာလည်း အလွန်ကန့်သတ်ချက် ရှိနေသည်။

ဤအများပြည်သူသို့ အလုပ်ခေါ်ယူခြင်းကို အချိန်နှင့် ဟင်းလင်းပြင် ခရီးသွားလမ်းညွှန် ရာထူးအပေါ် အများပြည်သူ၏ တုန့်ပြန်မှုကို တိုင်းတာရန်အတွက် စမ်းသပ်မှုတစ်ခုအဖြစ် အသုံးပြုနိုင်ပြီး ပါရမီရှင်များ၏ နယ်ပယ်ကိုလည်း ပိုမိုကျယ်ပြန့်လာစေနိုင်သည်။

ယခုအခါ အကြံဉာဏ်တစ်ခု ရရှိသွားပြီဖြစ်ရာ ကျန်းယဲ့သည် ဆက်လက် တွေဝေမနေတော့ချေ။

သူက A4 စာရွက်ဖြူတစ်ရွက်ကို ဆွဲထုတ်လိုက်ပြီး ဘောပင်ကို ယူကာ ခေတ္တမျှ တွေးတောလိုက်ပြီးနောက် နဂါးနှင့် မြွေများ ရွေ့လျားနေသည့်အလား လျင်မြန်သွက်လက်စွာ စတင်ရေးသားလိုက်သည်။

【အလုပ်ခေါ်ယူခြင်း】

ရာထူး - အချိန်နှင့် ဟင်းလင်းပြင် ခရီးသွားလမ်းညွှန်

ဦးရေ - ၁ ဦး

လိုအပ်ချက်များ -

၁။ ကျား/မ မရွေး၊ အသက် ၂၀ မှ ၆၀ နှစ်အတွင်း ဖြစ်ရမည်ဖြစ်ပြီး ကိုယ်လက်ကြံ့ခိုင်ကာ ကျန်းမာရေး ကောင်းမွန်ရမည်။

၂။ အလွန်ကောင်းမွန်သော ပူးပေါင်းဆောင်ရွက်မှုနှင့် ဆက်သွယ်ရေးစွမ်းရည်များ ရှိရမည်။ ဖော်ရွေသော အမူအရာရှိပြီး မတူညီသော နောက်ခံရှိ လူများနှင့် ဆက်ဆံရာတွင် ကျွမ်းကျင်ရမည်။

၃။ လိုက်လျောညီထွေဖြစ်မှု အားကောင်းပြီး ရုတ်တရက် ပေါ်ပေါက်လာသော အရေးပေါ် အခြေအနေများကို တည်ငြိမ်စွာ ဖြေရှင်းနိုင်ကာ အလွန်ကောင်းမွန်သော စိတ်ပိုင်းဆိုင်ရာ အရည်အသွေးများ ရှိရမည်။

၄။ သင်ယူနိုင်စွမ်းမြင့်မားပြီး အမည်မသိ အရာများအပေါ် သိချင်စိတ်နှင့် စူးစမ်းလေ့လာလိုသည့် စိတ်ဓာတ် ရှိရမည်။

၅။ အဖွဲ့အစည်းနှင့် ပူးပေါင်းဆောင်ရွက်လိုစိတ်၊ ခိုင်မာသော တာဝန်ယူမှုစိတ်ဓာတ် ရှိပြီး အတိုင်းအတာတစ်ခုအထိ လုပ်ငန်းခွင် ဖိအားများကို ခံနိုင်ရည်ရှိရမည်။

၆။ (အထူးမှတ်ချက်) အထူးကျွမ်းကျင်မှုများ သို့မဟုတ် ကျယ်ပြန့်သော အတွေ့အကြုံရှိသူများကို ဦးစားပေး စဉ်းစားပါမည်။

လျှောက်ထားရန် နည်းလမ်း -

သင်၏ ကိုယ်ရေးရာဇဝင်ကို အီးမေးလ်လိပ်စာ - yiyelvxingshe@xxx.com သို့ ပေးပို့ပါ။

နောက်ဆုံးရက် - ဤကြေညာချက် ထုတ်ပြန်သည့် နေ့မှစ၍ ခုနစ်ရက်အတွင်း။

မှတ်ချက် - ကနဦး ရွေးချယ်မှု အောင်မြင်သူများသည် တိကျသော လူတွေ့စစ်ဆေးမည့် အချိန်နှင့် နေရာကို အီးမေးလ်ဖြင့် အကြောင်းကြားခြင်း ခံရပါမည်။ ကျေးဇူးပြု၍ သင်၏ အီးမေးလ်ကို သေချာစွာ စစ်ဆေးပါ။

(NT- ကဲ လာလျောက်လို့ရပြီနော် စိတ်ဝင်စားရင် :)

တစ်ထိုင်တည်းဖြင့် ရေးသားပြီးစီးသွားပြီးနောက် ကျန်းယဲ့က သူ၏ ဖုန်းကို ယူကာ လက်ရေးဖြင့် ရေးထားသော အလုပ်ခေါ်စာကို ကြည်လင်ပြတ်သားစွာ ဓာတ်ပုံရိုက်လိုက်သည်။

ထို့နောက် သူသည် ရီယဲ့ခရီးသွားအေဂျင်စီ၏ တရားဝင် တိုရင်အကောင့်သို့ ကျွမ်းကျင်စွာ ဝင်ရောက်လိုက်ပြီး ဓာတ်ပုံကို တင်ကာ တိကျရှင်းလင်းသော စာကြောင်းတစ်ကြောင်းကို လျင်မြန်စွာ ရိုက်ထည့်လိုက်၏။

【ရီယဲ့ ခရီးသွားအေဂျင်စီမှ အလုပ်ခေါ်ယူနေပါသည် - အချိန်နှင့် ဟင်းလင်းပြင် ခရီးသွားလမ်းညွှန်။ သင်၏ လျှောက်ထားမှုကို ကျွန်တော်တို့ မျှော်လင့်နေပါတယ်】

ထို့နောက် ပို့ရန်ကို နှိပ်လိုက်သည်။

ဤအရာအားလုံးကို ပြုလုပ်ပြီးနောက် ကျန်းယဲ့က အကောင့်မှ ချက်ချင်း ထွက်လိုက်ပြီး သူ၏ ဖုန်းကို ဘေးသို့ ချထားလိုက်လေသည်။

နှင်းပွင့်တွေလို ဝင်လာမယ့် မြောက်မြားစွာသော ကိုယ်ရေးရာဇဝင်တွေကို ဘယ်လို စစ်ထုတ်မည်နည်း။

ကျန်းယဲ့တွင် ပြင်ဆင်မှု ရှိပြီးသား ဖြစ်၏။

သူက အလွန်နည်းပါးသော ငွေကြေးပမာဏကို အသုံးပြုကာ စနစ်ကို အလိုအလျောက် စစ်ထုတ်သည့် ပရိုဂရမ်တစ်ခု တပ်ဆင်ခိုင်းလိုက်သည်။

စနစ်က လျှောက်ထားသူ သတ်မှတ်ထားသော တင်းကျပ်သည့် စံနှုန်းများ နှင့် ပျော့ပြောင်းသော အလားအလာ အကဲဖြတ်မှုများအပေါ် အခြေခံ၍ အီးမေးလ် ထောင်ပေါင်းများစွာထဲမှ အသင့်လျော်ဆုံး ကိုယ်စားလှယ်လောင်းများကို ကနဦး စစ်ထုတ်ပေးမည် ဖြစ်သည်။

ဤနည်းအားဖြင့် သူက ငြီးငွေ့ဖွယ်ကောင်းသော ကနဦး စစ်ထုတ်ခြင်းလုပ်ငန်းများမှ လွတ်ကင်းသွားနိုင်ပြီး ပိုမိုပေါ့ပါးသော အတွေ့အကြုံကို ခံစားနိုင်မည် ဖြစ်၏။

နောက်ဆုံးတွင် မည်သူက ထင်ရှားပေါ်လွင်လာမည်နည်းဆိုသည်မှာ စနစ်၏ စစ်ထုတ်ခြင်း လုပ်ငန်းစဉ်အပြီးတွင် လူတွေ့စစ်ဆေးမှုများ၌ ထိုကံကောင်းသူများ၏ စွမ်းဆောင်ရည်အပေါ်တွင်သာ မူတည်ချေသည်။

ဤအများပြည်သူသို့ အလုပ်ခေါ်ယူခြင်းက မည်သို့သော မိစ္ဆာများနှင့် နတ်ဆိုးများကို ဆွဲဆောင်နိုင်မည်နည်း သို့မဟုတ်... ပုန်းအောင်းနေကြသည့် ဖီးနစ်နှင့်နဂါးများပါလာမလားဆိုသည်ကို သူ သိချင်နေခဲ့မိသည်။

ကျန်းယဲ့၏ ရိုးရှင်းသည်ဟု ထင်ရသော လက်ရေးဖြင့် ရေးထားသည့် အလုပ်ခေါ်စာက အင်တာနက်ပေါ်တွင် လွှင့်တင်လိုက်သည်နှင့် တစ်ပြိုင်နက် ၎င်း၏ အချက်အလက်များက အလင်းထက်ပင် မြန်ဆန်သော အရှိန်အဟုန်ဖြင့် ကမ္ဘာတစ်ဝှမ်းရှိ ထိပ်တန်း ဆုံးဖြတ်ချက်ချမှတ်သူများ၊ ရှေးဟောင်း မိသားစုများ၏ ခေါင်းဆောင်များနှင့် ဘဏ္ဍာရေး လုပ်ငန်းရှင်ကြီးများ၏ စားပွဲခုံများပေါ်သို့ ရောက်ရှိသွားခဲ့ချေပြီ။

ဥရောပရှိ ရာစုနှစ်ပေါင်းများစွာ သက်တမ်းရှိသော ရဲတိုက်ကြီးတစ်ခုအတွင်း။

အဘိုးအိုမြို့စားကြီးက ငယ်ရွယ်လှပသော အမျိုးသမီး အဖော်များ ဝိုင်းရံလျက် လက်ဖက်ရည်ကြမ်းကို အေးဆေးစွာ သောက်သုံးနေခဲ့သည်။

ကျန်းယဲ့ ပေးခဲ့သော သက်တမ်းတိုးဆေးလုံးကို သောက်သုံးပြီးကတည်းက တစ်ချိန်က အားနည်းနေခဲ့သော သူ၏ ခန္ဓာကိုယ်က တက်ကြွမှုကို ပြန်လည်ရရှိလာခဲ့ပြီး အရေတွန့်များ လျော့နည်းသွားကာ သူ၏ ဆံပင်ဖြူများမှာလည်း အနက်ရောင်သို့ ပြောင်းလဲသွားချေသည်။

သူ၏ လက်ရှိ ခန္ဓာကိုယ်အခြေအနေမှာ လူငယ်တစ်ဦးနှင့်ပင် နှိုင်းယှဉ်နိုင်လောက်အောင် ကောင်းမွန်နေသဖြင့် သူ၏ ကိုယ်ပိုင် ဆရာဝန်ပင် အံ့အားသင့်ခဲ့ရသည်။

"ဒေါက်... ဒေါက်... ဒေါက်" စာကြည့်တိုက် တံခါးကို ညင်သာစွာ ခေါက်လိုက်သံ ထွက်ပေါ်လာသည်။

သစ္စာရှိ အဘိုးအိုအိမ်တော်ထိန်းက ဦးညွှတ်ကာ ဝင်လာပြီး တိုးညှင်းစွာ ပြောလိုက်၏။ "အရှင်... ကျွန်တော်တို့ သတင်းတစ်ခု ရရှိထားပါတယ်။ မစ္စတာကျန်းယဲ့ရဲ့ ရီယဲ့ခရီးသွားအေဂျင်စီက အချိန်နှင့် ဟင်းလင်းပြင် ခရီးသွားလမ်းညွှန်တစ်ယောက် ခေါ်ယူဖို့ အလုပ်ခေါ်စာတစ်ခုကို အခုလေးတင် လူသိရှင်ကြား ထုတ်ပြန်လိုက်ပါတယ်..."

"ဘာ...."

ထိုသတင်းကို ကြားလိုက်ရသောအခါ အဘိုးအိုမြို့စားကြီးသည် သူ၏ သက်တောင့်သက်သာရှိသော ထိုင်ခုံမှ ခုန်ထလိုက်ပြီး အလွန်အမင်း စိတ်လှုပ်ရှားသွားသဖြင့် သူ၏ လက်ထဲရှိ အဖိုးတန် ကြွေပန်းကန်လေးကိုပင် ပြုတ်ကျလုမတတ် ဖြစ်သွားရသည်။

သူက ဇဝေဇဝါဖြစ်နေသော အမျိုးသမီး အဖော်ကို ဘေးသို့ တွန်းဖယ်လိုက်ပြီး သူ၏အသံမှာ စိတ်လှုပ်ရှားမှုကြောင့် အနည်းငယ် တုန်ယင်နေ၏။ "မြန်မြန်.. လေယာဉ်တစ်စင်း ချက်ချင်း ပြင်ဆင်လိုက်... မဟုတ်ဘူး... သီးသန့်လေကြောင်းလိုင်းတစ်ခုကို လျှောက်ထားလိုက်.. အလုပ်အင်တာဗျူး ဖြေဖို့ တရုတ်နိုင်ငံကို ငါကိုယ်တိုင် သွားမယ်"

သူ၏ သခင်ဖြစ်သူ၏ တောက်ပကာ စိတ်အားထက်သန်နေသော အသွင်အပြင်ကို ကြည့်ပြီး အိမ်တော်ထိန်းသည် သူ့ကို စိတ်ပျက်အောင် မလုပ်ရက်သော်လည်း ခက်ခဲစွာဖြင့် သတိပေးချက်တစ်ခုကို ပေးလိုက်ရလေသည်။

"အရှင်... ကျွန်တော့်ရဲ့ ပွင့်လင်းမှုကို ခွင့်လွှတ်ပေးပါ။ အလုပ်လိုအပ်ချက်တွေမှာ အသက်ကန့်သတ်ချက်က ၂၀ ကနေ ၆၀ အတွင်းလို့ ရှင်းရှင်းလင်းလင်း ဖော်ပြထားပါတယ်။ အရှင်က... အရှင်က အဲဒီကန့်သတ်ချက်ထက် အများကြီး ကျော်လွန်နေပါပြီ..."

အဘိုးအိုမြို့စားကြီး၏ အလွန်အမင်း ဝမ်းသာနေသော မျက်နှာအမူအရာမှာ တစ်စက္ကန့်ခန့် အေးခဲသွားရသည်။

မုန်တိုင်းပေါင်းများစွာကို ဖြတ်သန်းခဲ့ရသော သူ၏ စိတ်သည် ပုံမှန်အခြေအနေသို့ ပြန်ရောက်သွားပြီးနောက် မေးခွန်းထုတ်စရာ မလိုလောက်အောင် အာဏာပါသော လေသံဖြင့် ပြောလိုက်၏။ "အသက်အရွယ် ဆိုတာ ဘယ်တုန်းကမှ ပြဿနာ မဟုတ်ခဲ့ဘူး.."

"အဲဒါက သာမန်လူတွေအတွက် ကန့်သတ်ချက်တစ်ခုသက်သက်ပဲ။ ငါ့ရဲ့ တန်ဖိုး.... ငါ့ရဲ့ အတွေ့အကြုံတွေနဲ့ အမည်မသိကမ္ဘာကြီးအပေါ် ငါ့ရဲ့ စိတ်အားထက်သန်မှုတွေကို မစ္စတာကျန်းဆီ ငါကိုယ်တိုင် သွားပြီး ပြသမယ်။ သူ ချွင်းချက်တစ်ခု လုပ်ပေးဖို့ ငါ သူ့ကို ဖျောင်းဖျနိုင်မယ်လို့ ယုံကြည်တယ်"

အခန်း ၅၀၉ပြီး၏။