အခန်း ၇၆၈

အခန်း (၇၆၈) နောက်ကျောကို ဓားနှင့်ထိုးမည့် အတွဲ၊ တံခါးပိတ်ကျင့်ကြံခြင်း နှင့် နောက်ဆုံး အမြတ်ထုတ်ခြင်း

ကြယ်မြစ် တပိုင်းသူတော်စင်မှာ အလွန်ပင် စိတ်ပျက်လက်ပျက် ဖြစ်နေ၏။

သူသည် ယဲ့ဖုန်းနှင့် ပူးပေါင်းဆောင်ရွက်ရန် သဘောတူခဲ့ခြင်းမှာ သူတော်စင်တက်လှမ်းခြင်း ကပ်ဘေးကို ဖြတ်သန်းခွင့် ရရှိနိုင်လိမ့်မည်ဟု မျှော်လင့်သောကြောင့် ဖြစ်၏။

သို့သော် ရှေးဟောင်း မြင့်မြတ်သော အစစ်အမှန်နဂါးနှင့် စကားပြောဆိုပြီးနောက် ရှန်ကျိုးတိုက်ကြီး၏ မိုးကြိုးရေကန် နန်းတော်မှာ ပိတ်ဆို့ခံထားရပြီး သူတော်စင်တက်လှမ်းခြင်း ကပ်ဘေးကို ယာယီ ထောက်ပံ့ပေးနိုင်မည် မဟုတ်ကြောင်း သိလိုက်ရသည်။

ထိုသတင်းကို ကြားလိုက်ရသော် ကြယ်မြစ် တပိုင်းသူတော်စင်မှာ ပြင်းထန်စွာ ထိတ်လန့်သွားရသည်။

သို့သော် နောက်ပိုင်းတွင် သူသည် အခြေအနေကို လက်ခံလိုက်သည်။

အနည်းဆုံးတော့ ယဲ့ဖုန်းက သူ့ကို မလိမ်ခဲ့ပေ။ ရှန်ကျိုးတိုက်ကြီးနှင့် အဆက်အသွယ် ရရှိထားသည်မှာလည်း အမှန်ပင် ဖြစ်၏။

အကြောင်းမှာ...

ရှန်ကျိုးတိုက်ကြီး၏ မိုးကြိုးရေကန် နန်းတော် ပိတ်ဆို့ခံထားရခြင်းနှင့် အနီးအနားတွင် ရှန်ကျိုးတိုက်ကြီးသာလျှင် မဟာလောကကြီး(အထက်ကမ္ဘာ) ဖြစ်နေခြင်းကြောင့် သူသည် စောင့်ဆိုင်းနေရုံမှတစ်ပါး အခြားမရှိတော့ပေ။

နောက်ထပ် အရေးကြီးသော အချက်တစ်ချက်လည်း ရှိသေးသည်။

အစစ်အမှန်နဂါး နယ်မြေကဲ့သို့ပင် ကြယ်တာရာ ကောင်းကင်ယံသည်လည်း မိုးကြိုးနန်းတော်၏ လွှမ်းမိုးမှုကြောင့် ရှန်ကျိုးတိုက်ကြီး၏ လက်အောက်ခံ ဖြစ်လာခဲ့ရသည်။ ထို့ကြောင့် သူတို့သည် တစ်လှေတည်းစီး တစ်ခရီးတည်းသွား ဖြစ်နေသည့်အတွက် လေသွားရာအရပ်သို့သာ လိုက်ပါရတော့မည်။

ယဲ့ဖုန်းအပေါ်တွင်မူ ကြယ်မြစ် တပိုင်းသူတော်စင်သည် အတော်လေး ယုံကြည်မှု ရှိနေသည်။

တစ်နေ့တွင် ယဲ့ဖုန်းသည် မိုးကြိုးရေကန် နန်းတော်၏ တံဆိပ်ကို ဖွင့်လှစ်ပေးနိုင်ပြီး လူတိုင်းအတွက် သူတော်စင် လမ်းစဉ်ကို ဖော်ဆောင်ပေးနိုင်လိမ့်မည်ဟု သူ ယုံကြည်ထားသည်။

"ဒါဆို ခင်ဗျား နောင်တရသလား"

ယဲ့ဖုန်းက ကြယ်မြစ် တပိုင်းသူတော်စင်ကို မေးလိုက်သည်။

"ကျွန်တော် အစပိုင်းမှာတော့ နောင်တရမိပါတယ်။ ဒါပေမဲ့ ရှန်ကျိုးတိုက်ကြီးကပဲ အနီးအနားမှာ ရှိတဲ့ တစ်ခုတည်းသော မဟာလောကကြီး ဖြစ်နေတော့ ဒီအတိုင်း တွေးနေတာက အလကားပါပဲ။ ခင်ဗျားကို အစွမ်းကုန် ကူညီပေးတာကမှ သူတော်စင် လမ်းစဉ်ကို ပွင့်လာနိုင်မလားလို့ပါ"ကြယ်မြစ် တပိုင်းသူတော်စင်က လေးနက်စွာ ဖြေလာ၏။

ယဲ့ဖုန်း ခေါင်းညိတ်လိုက်ပြီး သူတို့နှစ်ဦးထံသို့ ချဉ်းကပ်သွားရာ သူ၏ အရှိန်အဝါမှာ တဖြည်းဖြည်း မြင့်တက်လာပြီး အဆင့် (၂) တပိုင်းသူတော်စင် အဆင့်သို့ ရောက်ရှိသွား၏။

"ခင်ဗျား... ခင်ဗျားက အဆင့် (၂) တပိုင်းသူတော်စင်ပဲလား" ရှေးဟောင်း မြင့်မြတ်သော အစစ်အမှန်နဂါးမှာ မျက်လုံးများ ပြူးကျယ်လျက် အော်ဟစ်လိုက်သည်။

ကြယ်မြစ် တပိုင်းသူတော်စင်မှာလည်း အတော်လေး အံ့ဩသွား၏။

သူတို့၏ အမြင်တွင် ယဲ့ဖုန်းသည် အလွန်အစွမ်းထက်သဖြင့် အနည်းဆုံး အဆင့် (၄) တပိုင်းသူတော်စင် ဖြစ်ရမည်ဟု ယူဆထားခဲ့သည်။

သို့သော် သူသည် အဆင့် (၂) တပိုင်းသူတော်စင်မျှသာ ဖြစ်နေသည်။

"အမှန်အတိုင်း ပြောရရင် ခင်ဗျားတို့ကို စတွေ့တုန်းက ကျွန်တော်က အထွတ်အထိပ် ကောင်းကင်ဧကရာဇ်ပဲ ရှိပါသေးတယ်။ အဆင့်တက်တာ မကြာသေးပါဘူး" ဟု ယဲ့ဖုန်း ဝန်ခံလိုက်သည်။

"နောက်ဆုံး (၃) လအတွင်းမှာ ကျွန်တော် အဆင့် (၄) တပိုင်းသူတော်စင် အဆင့်ကို ရောက်နိုင်မှာပါ။ ပြီးရင်လည်း သူတော်စင်ဖြစ်ဖို့ အခက်အခဲတွေကို ရင်ဆိုင်ရတော့မယ်"

"ကျွန်တော်တို့မှာ တူညီတဲ့ ပန်းတိုင် ရှိပါတယ်"

"ရှန်ကျိုးတိုက်ကြီးရဲ့ ကံကြမ္မာသားတော် တစ်ယောက်အနေနဲ့ မိုးကြိုးရေကန် နန်းတော်ရဲ့ တံဆိပ်ကို ဖွင့်လှစ်ပေးပြီး ရှန်ကျိုးတစ်ခွင်လုံးအတွက် သူတော်စင် လမ်းစဉ်ကို ဖွင့်ပေးဖို့ ကျွန်တော် ဘာမဆို လုပ်မှာပါ"

ယဲ့ဖုန်း၏ အသံမှာ ပြတ်သား လေးနက်လှသည်။

ထိုစကားကို ကြားလိုက်ရသော် ကြယ်မြစ် တပိုင်းသူတော်စင် အနည်းငယ် စိတ်လှုပ်ရှားသွား၏။

"ဂိုဏ်းချုပ် ယဲ့မှာ အဲဒီလောက် အစွမ်းရှိမယ်လို့ ကျွန်တော် ယုံကြည်ပါတယ်" ကြယ်မြစ် တပိုင်းသူတော်စင်သည် လေးနက်သော အမူအရာဖြင့် မတ်တတ်ရပ်လိုက်သည်။

ရှေးဟောင်း မြင့်မြတ်သော အစစ်အမှန်နဂါးမှာမူ ခေါင်းကို ကုတ်နေရှာ၏။

ရှန်ကျိုးတိုက်ကြီး၏ ကောင်းကင်တာအို အကြွင်းအကျန်များ၏ အကူအညီဖြင့် သူသည် မြင့်မြတ်သော နတ်ဘုရား ပုံစံကို ပြန်လည် တည်ဆောက်ပြီး စစ်မှန်သော သူတော်စင်အဆင့်ကို ရရှိထားသဖြင့် ရေတိုအတွင်းတွင် နောက်ထပ် အဆင့်တက်ရန် မဖြစ်နိုင်တော့ပေ။ သို့သော် အတုအယောင် ကောင်းကင်တာအို တစ်ပါးဖြစ်သည့်အားလျော်စွာ သူသည် ကောင်းကင်ဘုံနှင့်အတူ သက်တမ်းရှည်လျားပြီး သက်တမ်းအတွက် ပူပန်စရာ မလိုတော့ပေ။

သို့သော် ရလဒ်အနေဖြင့် သူသည် ရှန်ကျိုးတိုက်ကြီး၏ ကန့်သတ်ချက်အောက်တွင် ရှိနေရသည်။

ရှန်ကျိုးတိုက်ကြီး ရှိနေသရွေ့ သူသည် သေဆုံးမည် မဟုတ်ပေ။

ရှန်ကျိုးတိုက်ကြီးသာ ပျက်စီးသွားပါက သူလည်း သေချာပေါက် ပျက်စီးသွားပေလိမ့်မည်။

ထို့ကြောင့် ကြယ်မြစ် တပိုင်းသူတော်စင်၏ လေသံကို အတုယူ၍ ရှေးဟောင်း မြင့်မြတ်သော အစစ်အမှန်နဂါးက လေးနက်စွာ ပြောလိုက်၏။

"ကျွန်တော်လည်း ယုံကြည်ပါတယ်"

ယဲ့ဖုန်း ခေါင်းညိတ်လိုက်သည်။

ရှန်ကျိုးတိုက်ကြီးကို တိုက်ခိုက်တော့မည့် ကြယ်တာရာ အစွမ်းထက် မျိုးနွယ်စုများကို တွေးမိသောအခါ သူသည် မေးစေ့ကို ပွတ်သပ်ရင်း စဉ်းစားကာ ထိုသတင်းကို ပြောပြလိုက်ရာ ကြယ်မြစ် တပိုင်းသူတော်စင်၏ အာရုံကို ဆွဲဆောင်လိုက်နိုင်သည်။

"ဒီ ကြယ်တာရာ အစွမ်းထက် မျိုးနွယ်စုတွေက တကယ်ကို ရွံစရာကောင်းလိုက်တာ"

ကြယ်မြစ် တပိုင်းသူတော်စင်မှာ တိုက်ခိုက်လိုစိတ်များ ပြင်းထန်လာသည်။ "ဂိုဏ်းချုပ် ယဲ့... သူတို့ကို ကျွန်တော် သွားပြီး ရှင်းပစ်လိုက်ရမလား"

"မလုပ်နဲ့... မလုပ်နဲ့" ရှေးဟောင်း မြင့်မြတ်သော အစစ်အမှန်နဂါးက အလျင်အမြန်ပင် တားဆီးလိုက်သည်။ "ဒီ ကြယ်တာရာ အစွမ်းထက် မျိုးနွယ်စုတွေရဲ့ နောက်ကွယ်မှာ မျောလွင့် တောင်တန်းက နတ်ဘုရားမျိုးနွယ်စုတွေ ရှိနေတယ်။ သူတို့က အစွမ်းထက်ပြီး ကိုင်တွယ်ရ ခက်တယ်။ ခင်ဗျားသွားရင် ဒဏ်ရာအကြီးအကျယ်နဲ့ ပြန်လာရလိမ့်မယ်"

ရှေးဟောင်း မြင့်မြတ်သော အစစ်အမှန်နဂါးသည် ကြယ်မြစ် တပိုင်းသူတော်စင်ကို တိုက်ပွဲထဲ မဝင်စေချင်ပေ။

ကြယ်မြစ် တပိုင်းသူတော်စင်မှာ အဆင့် (၄) တပိုင်းသူတော်စင် ဖြစ်သော်လည်း သူသည် အတုအယောင် ကောင်းကင်တာအို မဟုတ်ပေ။ အကယ်၍ အသတ်ခံရပါက ပြန်လည် မွေးဖွားနိုင်မည် မဟုတ်ပါ။ သူသည် နောက်ဆုံးတွင်မှ တွေ့ရသော လုပ်ဖော်ကိုင်ဖက်ကို လွယ်လွယ်လေး မပျက်စီးသွားစေလိုပါ။

"ဟုတ်ပါတယ်... ခင်ဗျားတို့ အခု အချိန်မှာ လှုပ်ရှားလို့ မဖြစ်သေးပါဘူး"

ယဲ့ဖုန်း ဖြည်းညင်းစွာ ပြောသည်။

"ဒါပေမဲ့ ကြယ်တာရာ အစွမ်းထက် မျိုးနွယ်စုတွေက ရှန်ကျိုးတိုက်ကြီးကို အာရုံစိုက်နေတဲ့အချိန်မှာ ခင်ဗျားတို့ တိုက်ခိုက်လိုက်ပါ။ ရုတ်တရက် အလစ်ဝင်တိုက်တာ အကောင်းဆုံးပဲ"

ထိုစကားကြောင့် သူတို့နှစ်ဦးမှာ ခဏမျှ ရပ်တန့်သွား၏။

အလစ်ဝင်တိုက်မည်လား။

ဘယ်နေရာကို တိုက်ရမလဲ။

ယဲ့ဖုန်း ဆက်၍ ရှင်းပြသည်။

"နတ်ဘုရားမျိုးနွယ်စု ဝင်စားသူတွေနဲ့ ကြယ်တာရာ အစွမ်းထက် မျိုးနွယ်စုတွေ ရှန်ကျိုးတိုက်ကြီးကို ဝိုင်းပတ်ထားတဲ့အချိန်မှာ သူတို့ရဲ့ အခြေစိုက်စခန်းတွေက အားနည်းနေမှာပဲ။ အဲဒီအချိန်မှာ ခင်ဗျားတို့က 'နောက်ကျောကို ဓားနှင့်ထိုးမယ့် အတွဲ'ဖြစ်လာမှာ။ တစ်ယောက်က သူတော်စင်အဆင့်၊ တစ်ယောက်က အဆင့် (၄) တပိုင်းသူတော်စင်၊ ဘယ်သူမှ တားလို့ မရနိုင်ဘူး"

"ခင်ဗျားတို့ရဲ့ စွမ်းအားနဲ့ ဆိုရင် ရှန်ကျိုးတိုက်ကြီးကို တိုက်ခိုက်ဖို့ ရဲဝံ့တဲ့ ဘယ် ကြယ်တာရာ အစွမ်းထက် မျိုးနွယ်စုကိုမဆို အမှုန့်ခြေပစ်လို့ ရတယ်"

"အဲဒီအချိန်ကျရင် ခင်ဗျားတို့ အကျိုးအမြတ် အကြီးကြီး ရလိမ့်မယ်"

"တွေးကြည့်လေ... အရမ်း စိတ်လှုပ်ရှားစရာ ကောင်းတယ် မဟုတ်လား"

သူ ပြောနေစဉ်မှာပင် ယဲ့ဖုန်း၏ အပြုံးမှာ ပို၍ လှည့်ဖြားသလို ဖြစ်လာသည်။

"အိုး... ဒါက တကယ် ရက်စက်တာပဲ"

ရှေးဟောင်း မြင့်မြတ်သော အစစ်အမှန်နဂါးမှာ အသက်ရှူနှုန်း မြန်လာသည်။

သူသည် မိမိနှင့် ယဲ့ဖုန်းမှာ ရန်သူမဟုတ်ဘဲ မဟာမိတ်များ ဖြစ်နေသည်ကို ရုတ်တရက် အားရသွား၏။ မဟုတ်ပါက သူ၏ အိမ်မှာ မည်သည့်အချိန်တွင် အလစ်ဝင်တိုက်ခံရမည်ကို သိနိုင်မည် မဟုတ်ပေ။

"ကောင်းလိုက်တာ" ကြယ်မြစ် တပိုင်းသူတော်စင်မှာ ယဲ့ဖုန်း၏ ဗျူဟာကို လက်ခုပ်တီး၍ အားပေးလိုက်သည်။

"ဒါဆိုရင် သဘောတူပြီနော်။ အချိန်တန်ရင် ခင်ဗျားတို့နှစ်ယောက် သဘောရှိတဲ့အတိုင်း နောက်ကျောကို ဓားနှင့်ထိုးကြပါ"

"ပြဿနာ မရှိပါဘူး"

"ကျွန်တော်တို့ကိုပဲ အားကိုးလိုက်ပါ"

...

ကြယ်တာရာ ကောင်းကင်ယံမှ ထွက်ခွာလာပြီးနောက် ယဲ့ဖုန်းသည် ဟင်းလင်းပြင်ကို ဖောက်ထွင်း၍ ရှန်ကျိုးတိုက်ကြီးသို့ ပြန်လည် ရောက်ရှိလာကာ မိုးကြိုးနန်းတော်ထဲသို့ ဝင်ရောက်သွား၏။

"တံခါးပိတ် ကျင့်ကြံဖို့ အချိန်တန်ပြီ"

ယဲ့ဖုန်း မိမိကိုယ်ကို သတိပေးလိုက်သည်။

"ရှေးဟောင်း နတ်ဘုရား ရုပ်ခန္ဓာ ပုံဖော်ခြင်း နည်းစနစ်" ၏ ပဉ္စမတွဲတွင် ဖော်ပြထားသော နောက်ဆုံး အချက်အလက်များအရ ရုပ်ခန္ဓာသူတော်စင် ဖြစ်လာရန်မှာ အလွန် ပြင်းထန်သော ဒုက္ခများကို ခံနိုင်ရည်ရှိပြီး မိမိ၏ စိတ်ဆန္ဒဖြင့်သာ တွန်းလှန်ရမည်ကို ယဲ့ဖုန်း သိရှိထားသည်။

ထိုအခါမှသာလျှင် သူသည် အမြင့်ဆုံး ရုပ်ခန္ဓာ ကျင့်ကြံသူ တစ်ယောက် ဖြစ်လာနိုင်မည်။

လက်ကို ဆန့်ထုတ်လိုက်ရာ သူ၏ လက်ဖဝါးပေါ်တွင် မူလစွမ်းအားတစ်ခု ပေါ်လာပြီး ရင်ဘတ်ဆီသို့ ပြင်းထန်စွာ ရိုက်ချလိုက်၏။

"ဘုန်း"

ယဲ့ဖုန်း တစ်ကိုယ်လုံးမှာ ကမ္ဘာကြီးတစ်ခုလုံးဖြင့် အတိုက်ခံလိုက်ရသကဲ့သို့ ခံစားလိုက်ရပြီး တစ်ကိုယ်လုံး အကြိမ်ကြိမ် ပေါက်ကွဲနေသကဲ့သို့ ဖြစ်သွား၏။

အပြင်ပန်းတွင် ဘာမျှ မဖြစ်သကဲ့သို့ ထင်ရသော်လည်း ခန္ဓာကိုယ်အတွင်းတွင်မူ အဆက်မပြတ် ပျက်စီးပြီး ပြန်လည် တည်ဆောက်နေသည်။

"ဘယ်လောက်တောင် နာကျင်လိုက်သလဲ"

ယဲ့ဖုန်း နာကျင်မှုကြောင့် အသက်ရှူနှုန်း မြန်လာသည်။

ခဏကြာသော်...

သူသည် ဖျော့တော့သော ရွှေရောင် မြူခိုးငွေ့များဖြင့် လွှမ်းခြုံခံလိုက်ရသဖြင့် အပြင်ဘက်မှ သူ၏ အသံကို မကြားနိုင်တော့ဘဲ အတွင်းတွင် ဘာဖြစ်နေသည်ကိုလည်း မမြင်နိုင်တော့ပေ။

...

အချိန်များ ကုန်လွန်သွား၏။

(၇) ရက် ကုန်ဆုံးသွား၏။

“ဝုန်း…”

မြူခိုးဂိုဏ်း၏ အထက်တွင် ဧရာမ ကောင်းကင်ဘုံကပ်ဘေးတစ်ခု ကျရောက်လာသည့်အခါ လူတိုင်း မော့ကြည့်လိုက်မိကြ၏။ ရုပ်ပုံလွှာတစ်ခုမှာ ကောင်းကင်သို့ ပျံတက်သွားကာ ကပ်ဘေး တိမ်တိုက်ထဲသို့ ဝင်ရောက်သွားပြီး ကျရောက်လာသော လျှပ်စီးများကို ဝါးမြိုလိုက်သည်ကို တွေ့လိုက်ရသည်။

"အစောင့်အရှောက် ဟူဖေးဖေးပဲ"

"အစောင့်အရှောက် ဖေးထျန်း က အဆင့် (၄) တပိုင်း သူတော်စင် အဆင့်ကို တက်လှမ်းဖို့ ကြိုးစားနေတာလား"

မြူခိုးဂိုဏ်း တပည့်များသာမက အင်အားစု အသီးသီးမှ ကြည့်ရှုသူများမှာလည်း တုန်လှုပ်ချောက်ချားသွားကြပြီး သူတို့၏ မျက်လုံးများတွင် အံ့ဩမှုများ ပြည့်နှက်နေသည်။

"အစောင့်အရှောက် ဖေးထျန်းရဲ့ ပါရမီက ဂိုဏ်းချုပ် ယဲ့ထက် ဘာမှ မလျော့ဘူး။ ဂိုဏ်းချုပ် ယဲ့တောင် အဆင့် (၂) တပိုင်းသူတော်စင်ပဲ ရှိသေးတာကို အစောင့်အရှောက် ဖေးထျန်းက အဆင့် (၄) တပိုင်း သူတော်စင် အဆင့်ကို ခြေချတော့မယ်"

"ဟုတ်တယ်လေ"

"အစောင့်အရှောက် ဖေးထျန်းက ဘာလို့ မြူခိုးဂိုဏ်းထဲ ဝင်လာတာလဲ... ဂိုဏ်းချုပ် ယဲ့ရဲ့ အလှတရားကို လိုချင်လို့များလား"

"..."

ဟူဖေးဖေး၏ ကပ်ဘေးကြောင့် အင်အားကြီး ပညာရှင်များစွာမှာ အချိန်အကြာကြီး ဆွေးနွေးနေကြသည်။

နာရီအနည်းငယ် ကြာပြီးနောက်...

ကပ်ဘေး တိမ်တိုက်များ ဘေးသို့ ရှဲသွား၏။

[ဟူဖေးဖေး၏ အဆင့်တက်စွမ်းအင် - (၃၀) ရာခိုင်နှုန်း]

ကပ်ဘေး မတိုင်မီက ဟူဖေးဖေးတွင် စွမ်းအင် (၁၀) ရာခိုင်နှုန်း ရှိပြီး ကပ်ဘေးအတွင်း (၁၅) ရာခိုင်နှုန်း နှင့် မိုးကြိုးရေကန်မှ (၅) ရာခိုင်နှုန်း စုပ်ယူလိုက်သဖြင့် လက်ရှိ (၃၀) ရာခိုင်နှုန်းသို့ ရောက်ရှိသွား၏။

"နောက်ဆုံးတော့ အောင်မြင်သွားပြီ"

"နောက်တစ်ဆင့်... အရင်းအမြစ်တွေကို ဆက်ပြီး လုယူဖို့ပဲ"

ဟူဖေးဖေးသည် ဟွမ်ယွမ်တုတ်ကို ကိုင်လျက် တစ်ချက်ရိုက်လိုက်ရာ ဟင်းလင်းပြင်မှာ ပွင့်ထွက်သွားတော့သည်။ သူမက တစ်ဖန် ပြန်လည်၍ စိမ်းပြာရောင် တားမြစ်နယ်မြေထဲသို့ ဝင်ရောက်သွားကာ လနီဂိတ်တံခါးအထက်တွင် ရပ်လိုက်ပါ၏။

"ငါ့အတွက် ပေါက်ကွဲပေးလိုက်စမ်း"

သူမသည် တုတ်ကို လက်နှစ်ဖက်ဖြင့် ဆုပ်ကိုင်၍ ရိုက်ချလိုက်ရာ ကြောက်မက်ဖွယ် စွမ်းအားများ လှိုင်းထန်သွားပြီး လနီဂိတ်တံခါးမှာ ပြင်းထန်စွာ တုန်ခါသွားကာ ပြိုကွဲလုနီးပါး ဖြစ်သွား၏။

ယခုတစ်ကြိမ်တွင် သူမ စွမ်းအင် (၀.၀၁) ရာခိုင်နှုန်း ရရှိလိုက်သည်။

"ဂိုဏ်းချုပ် ပြောတာ... မြင့်မြတ်သော နတ်ဘုရား ပုံစံ မူလစွမ်းအားကို စုပ်ယူပြီး ပြန်လည် ဖြည့်တင်းလိုက်ရင် လနီဂိတ်တံခါးကတစ်ဆင့် စွမ်းအင် (၆၀) ရာခိုင်နှုန်း ထပ်ရနိုင်တယ်တဲ့"

"ဆိုလိုတာက လနီဂိတ်တံခါးက နောက်ဆုံးမှာ ငါ့ရဲ့ စွမ်းအင်ကို (၉၀) ရာခိုင်နှုန်းအထိ ပို့ပေးနိုင်ပြီးရင် ဒီအရာက အသုံးမဝင်တော့ဘဲ ဖျက်ဆီးပစ်လို့ ရပြီပေါ့"

ဟူဖေးဖေး တွက်ချက်လိုက်သည်။

လနီဂိတ်တံခါးကို ဆက်လက်၍ တိုက်ခိုက်ပြီး နောက်ဆုံး ကျန်ရှိနေသော အရင်းအမြစ်များကို လုယူရန် ကြိုးပမ်းရမည်သာ။

...

မျောလွင့် တောင်တန်း။

ကံကြမ္မာ သမီးတော်သည် တံခါးပိတ် ကျင့်ကြံခြင်းမှ နိုးထလာသည့်အခါ အနားယူနေသော လင်းဝေသူတော်စင်ဧကရာဇ်၏ မူလဝိညာဉ်ကို ရှာလိုက်သည်။

"နင့်ရဲ့ ဒဏ်ရာ သက်သာသွားပြီလား"

"အမိန့်အတိုင်းပါပဲ အရှင်မ... ကျွန်တော့်ရဲ့ မူလဝိညာဉ် ဒဏ်ရာ သက်သာသွားပါပြီ။ ဒါပေမဲ့ နတ်ဘုရားရုပ်ခန္ဓာ မရှိတော့လို့ ခွန်အားရဲ့ (၇၀) ရာခိုင်နှုန်းတောင် မထုတ်နိုင်တော့ပါဘူး"

"ကိစ္စမရှိပါဘူး... အဲဒါလုံလောက်ပါတယ်"

ကံကြမ္မာ သမီးတော်သည် အဝေးကို ကြည့်လိုက်ရာ သူမ၏ မျက်နှာမှာ ပို၍ အေးစက်သွား၏။ "ကြယ်တာရာ ကောင်းကင်ယံကို သွားပြီး မျိုးနွယ်စုတွေကို လျှို့ဝှက်စွာ ဦးဆောင်ကာ ပုန်ကန်ဖို့ စေခိုင်းလိုက်"

ထိုစကားကို ကြားလိုက်ရသော် လင်းဝေ သူတော်စင်ဧကရာဇ်၏ နှလုံးသားမှာ တင်းကျပ်သွားတော့သည်။

--