အခန်း ၇၇၃

အခန်း (၇၇၃) ကြယ်တာရာ မျိုးနွယ်စုများ၏ အထွတ်အထိပ် ပညာရှင်များကို ဖြတ်တောက်သွားသော ဆံပင်တစ်မျှင်

“သေစမ်း”

“ယဲ့ဖုန်း... မင်းက သေချင်လို့ ပြန်လာရဲတာလား”

ဝိညာဉ်ဝါးမြို မျိုးနွယ်စု ဘိုးဘေးမှာ သူ၏ ဒေါသကို မထိန်းချုပ်နိုင်တော့ချေ။

“ငါတို့ မရှိတဲ့အချိန်ကို အခွင့်ကောင်းယူပြီး ငါတို့ရဲ့ ဘိုးဘေးနယ်မြေကို တိုက်ခိုက်တယ်... ငါတို့ရဲ့ မျိုးနွယ်စုဝင်တွေ အားလုံးကို အမြစ်ပြတ် သုတ်သင်တယ်... မင်း ဒီလို လွတ်မြောက်သွားတာကို ခွင့်ပြုမယ့်အစား သေတဲ့အထိ ငါ တိုက်ခိုက်သွားမယ်”

ရှေ့ဖြစ်ဟော မျိုးနွယ်စု ခေါင်းဆောင်က ဒေါသတကြီး ဟိန်းဟောက်လိုက်၏။

“ယဲ့ဖုန်းကို သတ်”

“ချီတက်ပြီး သူ့ကို ခုတ်ပိုင်းပစ်”

အခြားသော ကြယ်တာရာ အစွမ်းထက် မျိုးနွယ်စုများ၏ ခေါင်းဆောင်များကလည်း အော်ဟစ်နေကြရာ သူတို့၏ အသံများမှာ ကောင်းကင်နှင့် မြေကြီးကို တုန်လှုပ်စေပြီး ဟင်းလင်းပြင်ပင် ပြင်းထန်စွာ လှိုင်းထနေတော့သည်။

ဤစကားများကို ကြားလိုက်ရသော် ယဲ့ဖုန်း၏ နှုတ်ခမ်းထောင့်လေး တွန့်ကွေးသွား၏။

ဒါက အကြီးစား နားလည်မှုလွဲခြင်းပင်။

သူ၏ မူလအစီအစဉ်မှာ နောက်ကျောကို ဓားနှင့်ထိုးမည့် အတွဲက ရန်စကာ ကြယ်တာရာ ကောင်းကင်ယံတစ်ခွင်မှ အစွမ်းထက် ပညာရှင်များ၏ ဝိုင်းဝန်းတိုက်ခိုက်မှုကို ခံရစေရန် ဖြစ်၏။

ထို့နောက် သူ ထွက်ပေါ်လာပြီး ရန်သူများကို အမြစ်ပြတ် ချေမှုန်းရန် ဖြစ်၏။

သို့သော် ကြယ်တာရာ အစွမ်းထက် မျိုးနွယ်စုများ၏ ခေါင်းဆောင်များက သူသည် သူတို့၏ အိမ်များကို အခွင့်ကောင်းယူ၍ တိုက်ခိုက်ခဲ့သည်ဟု အမှန်တကယ် ယုံကြည်သွားကြပြီး မြူခိုးဂိုဏ်းကို ဝိုင်းဝန်းတိုက်ခိုက်လာကြလိမ့်မည်ဟု မည်သူက သိမည်နည်း။

သူ၏ အစီအစဉ်နှင့် ကွဲလွဲနေသော်ငြား ယဲ့ဖုန်းမှာ ထိတ်လန့်ခြင်း မရှိချေ။

အဆုံးတွင် ကြယ်တာရာ ကောင်းကင်ယံမှာဖြစ်စေ၊ မြူခိုးဂိုဏ်းထဲမှာဖြစ်စေ သူသည် ကြယ်တာရာ အစွမ်းထက် မျိုးနွယ်စုများ၏ ခေါင်းဆောင်များကို ဝိုင်းဝန်းတိုက်ခိုက်ရမည်မှာ အတူတူပင် ဖြစ်၏။

ထို့ကြောင့် ယဲ့ဖုန်းသည် ရှေ့သို့ တစ်လှမ်း တိုးလိုက်၏။

“အိမ်ကို အလုခံရတာ ဘယ်လို ခံစားရလဲ”

သူ ကျယ်လောင်စွာ ရယ်မောလိုက်သည်။

ယဲ့ဖုန်း၏ စကားပြောဆိုမှုတွင် အနုပညာတစ်ခု ပါဝင်နေ၏။

သူက လုယက်ခဲ့သည်ဟု မပြောခဲ့ဘဲ လုယက်ခံရခြင်းက မည်သို့ ခံစားရသနည်းဟုသာ မေးခွန်းထုတ်ခဲ့ခြင်း ဖြစ်၏။ ဤစကားစုကို သေချာစွာ စဉ်းစားကြည့်ပါက ယဲ့ဖုန်း၏ ကောက်ကျစ်မှုကို ဖော်ပြနေ၏။

သူသည် လုယက်မှုကို ဝန်မခံခဲ့ဘဲ အပြစ်တင်ခံရခြင်းမှ ရှောင်လွှဲခဲ့သည်။

သို့သော် သူ၏ စကားများမှာ လူတိုင်းကို ဒေါသထွက်စေရန် လုံလောက်နေသေး၏။

ဒေါသထွက်နေသော ခေါင်းဆောင်များက အခြား အဓိပ္ပာယ်တစ်ခုအဖြစ် ကြားလိုက်ကြသည်။

၎င်းမှာ...

လူကြီးမင်းတို့... ခင်ဗျားတို့ရဲ့ အိမ်တွေကို ကျွန်တော် လုယက်ခဲ့တယ်။ စိတ်လှုပ်ရှားနေကြလား ဟူ၍ပင်။

“သူ့ကို သတ်”

“အာ”

အစွမ်းထက် ခေါင်းဆောင်များမှာ ဒေါသလွန်ကဲနေကြပြီး အားလုံး စုရုံးကာ ကြောက်မက်ဖွယ် အရှိန်အဝါများကို ထုတ်လွှတ်လိုက်ကြရာ ဟူဖေးဖေး လွင့်စင်သွားပြီး ယဲ့ဖုန်းထံသို့ ပြေးဝင်လာကြတော့သည်။

ထိုအချိန်တွင်...

ယဲ့ဖုန်း၏ အတိတ်က ကြီးကျယ်ခမ်းနားသော အောင်မြင်မှုများ ၊ သူ၏ ကြောက်မက်ဖွယ် ခွန်အားများကို သူတို့ ဂရုမစိုက်ကြတော့ဘဲ အားလုံးက သူ့ကို သတ်ချင်နေကြသည်။

သူတို့အတွက် ယဲ့ဖုန်း သေကိုသေရမည်။

မြောက်မြားစွာသော အစွမ်းထက် ပညာရှင်များ၏ ပြင်းထန်သော တိုက်ခိုက်မှုကို ရင်ဆိုင်ရချိန်တွင် ယဲ့ဖုန်းသည် တည်ငြိမ်နေပုံပေါ်၏။ လူအုပ်ကြီး အံ့အားသင့်သွားစေရန် သူသည် တစ်ပေခန့်ရှည်သော ဆံပင်တစ်မျှင်ကို ပေါ့ပေါ့ပါးပါး ဆွဲနှုတ်ကာ ပစ်ပေါက်လိုက်သည်။

“ဝီ…”

ဟင်းလင်းပြင်သည် ဤဆံပင်မျှင်၏ ဖိအားကို မခံနိုင်တော့သည့်အလား ၎င်းကို ဖြတ်၍ အနက်ရောင် မျဉ်းကြောင်းတစ်ခု ပေါ်လာသည်။

၎င်းသည် ဟင်းလင်းပြင်ကို ဖြတ်ကျော်သွား၏။

တစ်ချက်ကြည့်လိုက်လျှင် ဓားခုတ်ရာတစ်ခုနှင့် တူနေသည်။

၎င်းက ဆံပင်မျှင်ကို ကောင်းကင်နှင့် မြေကြီးကို ခွဲခြမ်းပစ်နိုင်သော၊ လေးလံ၍ ကြီးစိုးကာ ကြောက်မက်ဖွယ်ကောင်းသည့် အရှိန်အဝါများ ဖုံးလွှမ်းထားသော ပြိုင်ဘက်ကင်း ရတနာဓားတစ်လက်အဖြစ် ထင်မှတ်ရစေပြီး ခေါင်းဆောင်များထံ ဖြတ်သန်းသွားသည်။

“ရွှစ်…”

ရှေ့ဖြစ်ဟော မျိုးနွယ်စု ခေါင်းဆောင် ဦးဆောင်သော အသားတောင်ကြီး မိစ္ဆာမှာ ပထမဆုံး ထက်ပိုင်း ခွဲခံလိုက်ရပြီး ၎င်း၏ ခန္ဓာကိုယ်မှာ ပြိုကျသွားကာ ပြန်လည် မဖွဲ့စည်းနိုင်တော့ဘဲ ဥက္ကာပျံတစ်လုံးကဲ့သို့ မြေပြင်ပေါ်သို့ ပြုတ်ကျသွားပြီး နက်ရှိုင်းသော မီးတောင်ဝတစ်ခုကို ဖန်တီးလိုက်သည်။

“မကောင်းတော့ဘူး”

“လမ်းဖယ်ကြ”

“အား”

ရှေ့ဖြစ်ဟော မျိုးနွယ်စု ခေါင်းဆောင်သည် ယဲ့ဖုန်း၏ ဆံပင်မျှင်၏ ကြောက်မက်ဖွယ်ကောင်းသော သဘောသဘာဝကို ပထမဆုံး အာရုံခံမိပြီး နောက်ဆုတ်ရင်း အရေးတကြီး အော်ဟစ်လိုက်သည်။

သို့သော် ထိုဆံပင်မျှင်မှာ သူ့ထံသို့ တည့်တည့် ဦးတည်နေ၏။

ထိုအခိုက်အတန့်တွင်...

ကူက နှလုံးကွဲမတတ် အော်ဟစ်ကာ ကာကွယ်ရေး နတ်ဘုရား စွမ်းရည် မြောက်မြားစွာကို ချက်ချင်း အသုံးပြုလိုက်သော်လည်း ၎င်းတို့အားလုံးမှာ ဟင်းသီးဟင်းရွက်များကို လှီးဖြတ်သကဲ့သို့ အလွယ်တကူ ခုတ်ပိုင်းခံလိုက်ရပြီး ဆံပင်မျှင်၏ လွှမ်းခြုံမှုကို ခံလိုက်ရတော့သည်။

“မလုပ်နဲ့”

ရှေ့ဖြစ်ဟော မျိုးနွယ်စု ခေါင်းဆောင်သည် ယဲ့ဖုန်း၏ ဆံပင်မျှင်ဖြင့် ထက်ပိုင်း အခုတ်မခံရမီ ထိုစကားလုံးကိုသာ ပြောနိုင်ခဲ့ပြီး သူ၏ ရုပ်အလောင်းမှာ ကောင်းကင်မှ ကျဆင်းလာသည်။

“သူက အဆင့် (၄) တပိုင်းသူတော်စင် တစ်ပါးကို ဆံပင်တစ်မျှင်နဲ့ သတ်လိုက်တာလား”

“ဘုရားရေ”

“ယဲ့ဖုန်းက ရုပ်ခန္ဓာ သူတော်စင် လမ်းစဉ်ကို ရောက်သွားတာလား”

အစွမ်းထက် မျိုးနွယ်စု အသီးသီးမှ ခေါင်းဆောင်များမှာ တစ်စုံတစ်ခုကို တွေးမိပြီး ထိတ်လန့်သွားကြသည်။

ရှန်ကျိုးတိုက်ကြီး တစ်ခွင်လုံးတွင်...

တိုက်ပွဲကို စောင့်ကြည့်နေသူများမှာလည်း လေပူများကို ရှူသွင်းလိုက်ကြသည်။

ရုပ်ခန္ဓာ သူတော်စင် လမ်းစဉ်။ အဲဒါ တကယ် ဖြစ်နိုင်လို့လား။

အစပိုင်းတွင် မြောက်များစွာသော လူများမှာ သံသယဖြစ်နေကြသော်လည်း ယဲ့ဖုန်း၏ ဆံပင်မျှင်က အဆင့် (၄) တပိုင်းသူတော်စင် ကို အလွယ်တကူ သတ်ဖြတ်လိုက်သည့် မြင်ကွင်းကို ပြန်လည် သတိရလိုက်သောအခါ အားလုံး ဆွံ့အသွားကြပြီး မယုံကြည်နိုင်အောင် ဖြစ်သွားကြသည်။

“ရွှစ်…”

ယဲ့ဖုန်း၏ ဆံပင်မျှင်မှာ ရက်စက်စွာ သတ်ဖြတ်နေဆဲပင်။

၎င်းသည် ဟင်းလင်းပြင်ကို ဖြတ်သန်း ပျံသန်းကာ ဝိညာဉ်ဝါးမြို မျိုးနွယ်စု ဘိုးဘေး၏ မာနကို အလွယ်တကူ ချေမှုန်းပစ်ပြီး ပြန်လမ်းမရှိသော လမ်းသို့ ပို့ဆောင်ပေးလိုက်သည်။

ကျန်ရှိနေသော တိုက်ခိုက်ရေးသမားများမှာ ရူးသွပ်စွာ ထွက်ပြေးနေကြ၏။

သို့သော် သူတို့ ထိတ်လန့်သွားရသည်မှာ ဆံပင်မျှင်က အလွန် မြန်ဆန်လွန်းနေသည်ပင်။ ၎င်းက ဟင်းလင်းပြင်ကို ဖြတ်သန်းသွားသည်နှင့် သူတို့၏ သက်စောင့်စွမ်းအားကို လုံးဝ ဖြတ်တောက်လိုက်ပြီး သူတို့ သေဆုံးကာ လမ်းကြောင်းမှ ပျောက်ကွယ်သွားကြတော့သည်။

“ဘုန်း ဘုန်း ဘုန်း…”

ကြယ်တာရာ အစွမ်းထက် မျိုးနွယ်စု အသီးသီးမှ အစွမ်းထက် ပညာရှင်များ၏ ရုပ်အလောင်းများမှာ မြူခိုးဂိုဏ်း အနီးရှိ မြေပြင်ပေါ်သို့ ဖက်ထုပ်များကဲ့သို့ ပြုတ်ကျလာပြီး မီးတောင်ဝများနှင့် ဥက္ကာပျံ ဝင်တိုက်သည့် ကျင်းများနှင့် ဆင်တူသော စက်ဝိုင်းပုံ ကျင်းများ ဖန်တီးလိုက်သည်။

လုပ်ငန်းစဉ် တစ်ခုလုံးမှာ နှေးကွေးပုံရသော်လည်း တကယ်တမ်းတွင် လျင်မြန်လှ၏။

လူများ မျက်တောင် အကြိမ်အနည်းငယ် မခတ်မီမှာပင် ကြယ်တာရာ အစွမ်းထက် မျိုးနွယ်စုများမှ ကျူးကျော်လာသော စစ်သည် သောင်းပေါင်းများစွာမှာ ထက်ပိုင်း ခုတ်ပိုင်းခံလိုက်ရပြီး သူတို့ထဲမှ နောက်ဆုံး တစ်ယောက်အထိ သေဆုံးသွားခဲ့ရသည်။

“တိုက်ခိုက်ဖို့ တန်တဲ့သူ တစ်ယောက်မှ မရှိဘူး”

ယဲ့ဖုန်းသည် ဗလာဖြစ်နေသော ဟင်းလင်းပြင်ကို ကြည့်ကာ သက်ပြင်းတစ်ချက် ချလိုက်ပြီး ဆံပင်တစ်မျှင်မှာ လုံးဝ ပျောက်ကွယ်သွားသည်အထိ အလိုအလျောက် လောင်ကျွမ်းသွားတော့သည်။

ထိုအချိန်တွင် ကမ္ဘာကြီး တစ်ခုလုံး တိတ်ဆိတ်သွား၏။

မျက်လုံးအားလုံးမှာ ယဲ့ဖုန်းထံသို့ စုရုံးရောက်ရှိသွား၏။

သူသည် ယခင်ကဲ့သို့ပင် အရပ်ရှည်ရှည်နှင့် ခန့်ညားစွာ ရပ်နေပြီး သူ့ထံမှ မည်သည့် အစွမ်းထက် အရှိန်အဝါမျှ ထွက်ပေါ်နေခြင်း မရှိပေ။

သို့သော် ထိုနေရာတွင် ရပ်နေရုံ၊ ဘာမျှမလုပ်ဘဲ နေရုံဖြင့် သူသည် တုန်လှုပ်၍ မရနိုင်သော အရှိန်အဝါတစ်ခုကို ထုတ်လွှတ်နေသည်။

ယဲ့ဖုန်းသည် ရှေးဦးနတ်ဘုရား တောင်ကြီးတစ်ခုနှင့် တူနေ၏။

မယိမ်းယိုင်နိုင်ပေ။

သစ်မာ လွင်ပြင် အောက်တွင်...

ချောင်ကျားရှီးသည် ယဲ့ဖုန်း၏ အစုလိုက်အပြုံလိုက် သတ်ဖြတ်မှုကို လက်သီးများ တင်းတင်းဆုပ်ကာ ကြည့်နေသည်။ သူ၏ မျက်လုံးများမှာ စိတ်လှုပ်ရှားမှုကြောင့် နီရဲနေ၏။

“တပည့်... မင်း ခန့်မှန်းတာ မှန်တယ်”

“မင်းရဲ့ ဂိုဏ်းချုပ်က ရုပ်ခန္ဓာ သူတော်စင် လမ်းစဉ် ကျင့်ကြံသူ တစ်ယောက် ဖြစ်လာပြီ။ ပြီးတော့ သူ့ရဲ့ ဆံပင် တစ်မျှင်ချင်းစီတိုင်းက သေစေနိုင်တဲ့ နတ်ဘုရား လက်နက် ဖြစ်လာနိုင်တယ်”

“သူ့ရဲ့ ခွန်အားနဲ့ဆိုရင် သူတော်စင်တွေကို သတ်ဖြတ်တာက အားစိုက်ထုတ်စရာ မလိုဘူး”

“အတုအယောင် ကောင်းကင်တာအို လောက်တောင် မကောင်းတဲ့ ကြယ်တာရာ အစွမ်းထက် မျိုးနွယ်စုတွေက ဒီသခင်တွေအတွက်တော့ ပုရွက်ဆိတ်တွေပဲ”

ရှေးဟောင်း လူ့ဘီလူး နတ်ဘုရားသည် ဤမျှ စကားများများ ပြောခဲလှ၏။

“ဆရာ... ကျွန်တော်... ကျွန်တော် တစ်နေ့ကျရင် ဒီလောက် အစွမ်းထက်လာနိုင်မလား” ချောင်ကျားရှီးက စိတ်လှုပ်ရှားစွာ မေးလိုက်သည်။

“အင်း... ဖြစ်နိုင်ပါတယ်”

ရှေးဟောင်း လူ့ဘီလူး နတ်ဘုရားသည် လုံးဝ သေချာခြင်း မရှိပေ။

၏ယဲ့ဖုန်းသည်လည်း ရုပ်ခန္ဓာ သူတော်စင် လမ်းစဉ်ကို အောင်မြင်ခဲ့သော်လည်း စွမ်းအားကြီးမားသော လူစွမ်းကောင်းကြီး (၅) ဦး၏ တိုက်ခိုက်မှုကို ဘယ်လို တောင့်ခံနိုင်ခဲ့သည်ကို ရှေးဟောင်း လူ့ဘီလူး နတ်ဘုရား မသိပေ။

ရှေးဟောင်း လူ့ဘီလူး နတ်ဘုရား၏ အသိပညာအရ ရုပ်ခန္ဓာ သူတော်စင် လမ်းစဉ် ကျင့်ကြံသူ တစ်ယောက် ဖြစ်လာရန် နောက်ဆုံး စမ်းသပ်ချက်မှာ စွမ်းအားကြီးမားသော လူစွမ်းကောင်းကြီး (၅) ဦး၏ တိုက်ခိုက်မှုကို အချိန်အတိုင်းအတာ တစ်ခုအထိ ခံနိုင်ရည်ရှိရန် ဖြစ်၏။

အကယ်၍ တစ်စုံတစ်ယောက်သည် ၎င်းကို ရှင်သန်နိုင်ပါက စမ်းသပ်ချက် အောင်မြင်ပြီပင်။

ဟုတ်ပါ၏... အချိန်အတိုင်းအတာ တစ်ခုအထိ ခံနိုင်ရည်ရှိပြီးနောက် တစ်စုံတစ်ယောက်သည် ဆက်လက်၍ ခုခံနိုင်သေးသည်။ ဖိအားကို ဆန့်ကျင်၍ ခုခံလေလေ ရုပ်ခန္ဓာ သူတော်စင် လမ်းစဉ် ကျင့်ကြံသူ တစ်ယောက် ဖြစ်လာပြီးနောက် သူ၏ ခွန်အားမှာ ပိုမို အားကောင်းလာလေလေ ဖြစ်၏။

ရှေးဟောင်း လူ့ဘီလူး နတ်ဘုရားသည် ယဲ့ဖုန်း မည်မျှ ကြာအောင် တောင့်ခံခဲ့သည်ကို မသိပေ။

ထို့ကြောင့် သူ၏ တိကျသော ခွန်အားကို အကဲဖြတ်ရန် ခက်ခဲသည်။

သို့သော် သူ မသိခဲ့သည်မှာ ယဲ့ဖုန်းသည် ခဏတာ တောင့်ခံခဲ့ရုံသာမက စွမ်းအားကြီးမားသော လူစွမ်းကောင်းကြီး (၅) ဦးကို အမှန်တကယ်ပင် ဖောက်ခွဲပစ်ခဲ့ခြင်း ဖြစ်၏။

ထို့ပြင် ၎င်းက အကြောင်းရင်းပင်။

ရုပ်ခန္ဓာ သူတော်စင် လမ်းစဉ် ကျင့်ကြံသူ တစ်ယောက် ဖြစ်သော်လည်း ယဲ့ဖုန်းသည် တူညီသော လမ်းစဉ်ရှိ အခြား ကျင့်ကြံသူများထက် အဆပေါင်းများစွာ ပို၍ အစွမ်းထက်နေသည်။

သို့သော် ယဲ့ဖုန်းကိုယ်တိုင်ပင် ဤအချက်ကို မသိခဲ့ပေ။

“ဒီနေ့ကစပြီး ဂိုဏ်းချုပ်ကို စံပြအဖြစ် သတ်မှတ်မယ်။ ကြိုးစားလေ့ကျင့်ပြီး ဂိုဏ်းအတွက် ဝန်ထုပ်ဝန်ပိုးတွေကို မျှဝေနိုင်ဖို့ အကြီးအကဲ အဆင့် ရှိတဲ့ ရုပ်ခန္ဓာ ကျင့်ကြံသူ တစ်ယောက် အမြန်ဆုံး ဖြစ်လာအောင် ကြိုးစားမယ်” ဟု ချောင်ကျားရှီးက ကြေညာလိုက်ပြီး သူ၏ လက်သီးများကို ဆုပ်ထားကာ သူ၏ ခန္ဓာကိုယ်မှာ တိုက်ခိုက်လိုစိတ်များဖြင့် ပြည့်နှက်နေ၏။

*

ဟင်းလင်းပြင်ထဲတွင်...

ယဲ့ဖုန်းသည် ပတ်ဝန်းကျင်ကို ကြည့်လိုက်ရာ နောက်ထပ် စိန်ခေါ်သူများကို မတွေ့ရတော့ပေ။

“အရမ်း အထီးကျန်တာပဲ”

သူ မိမိကိုယ်ကို တီးတိုးရေရွတ်လိုက်သည်။

[ကြယ်တာရာ အစွမ်းထက် မျိုးနွယ်စုများ၏ အကြံအစည်များကို ဖျက်ဆီးခြင်း - ၇၅% ပြီးစီးမှု]

ယဲ့ဖုန်းသည် တာဝန် တိုးတက်မှုကို စစ်ဆေးရန် အချိန်ယူလိုက်ရာ (၇၅) ရာခိုင်နှုန်းအထိ တက်သွားသည်ကို တွေ့လိုက်ရသည်။

ယခင်က တပည့်များသည် တိုးတက်မှု၏ (၃) ရာခိုင်နှုန်းကိုသာ ပြီးစီးခဲ့သည်။

ကြယ်တာရာ ကောင်းကင်ယံတွင် နောက်ကျောကို ဓားနှင့်ထိုးမည့် အတွဲ၏ တိုက်ခိုက်မှုကြောင့် တာဝန် တိုးတက်မှုမှာ (၂၇) ရာခိုင်နှုန်းအထိ တဟုန်ထိုး မြင့်တက်သွားခဲ့ပြီး ၎င်းမှာ သိသာထင်ရှားသော ခုန်ပျံကျော်လွှားမှု တစ်ခု ဖြစ်၏။

ထို့နောက် မြူခိုးဂိုဏ်းသည် ကြီးမားသော ရန်ငြိုးကို ဆွဲဆောင်ခဲ့သည်။

ထိုအချိန်တွင် တာဝန် တိုးတက်မှုမှာ (၃၈) ရာခိုင်နှုန်းသို့ တိုးလာသည်။

ယဲ့ဖုန်း ပေါ်လာသောအခါ တိုးတက်မှုမှာ (၅၀) ရာခိုင်နှုန်းသို့ ရောက်ရှိသွား၏။

ဤတိုက်ပွဲအပြီးတွင် ကြယ်တာရာ အစွမ်းထက် မျိုးနွယ်စုများ၏ ခေါင်းဆောင်အားလုံး သေဆုံးသွားသဖြင့် တာဝန် တိုးတက်မှုမှာ (၇၅) ရာခိုင်နှုန်းသို့ ရောက်ရှိသွားပြီး ဤလုပ်ငန်းခွဲကို အပြီးအပိုင် ပြီးစီးရန် နောက်ဆုံး (၂၅) ရာခိုင်နှုန်း ကျန်ရှိနေသေးသည်။

“လေးပုံတစ်ပုံပဲ ကျန်တော့တယ်။ ကွာဟချက်က ဘယ်မှာ ရှိနေနိုင်မလဲ” ယဲ့ဖုန်း တွေးတောလိုက်သည်။

အစပိုင်းတွင် ရှေ့ဖြစ်ဟော မျိုးနွယ်စု နှင့် အခြား ကြယ်တာရာ အစွမ်းထက် မျိုးနွယ်စုများကို သတ်ဖြတ်ခြင်းဖြင့် တာဝန် တိုးတက်မှုကို အပြီးသတ်နိုင်မည်ဟု သူ ထင်ခဲ့သည်။

သို့သော် သူ အံ့ဩသွားသည်မှာ (၂၅) ရာခိုင်နှုန်း လိုအပ်ချက် ရှိနေသေးခြင်း ဖြစ်၏။

“ဒီနောက်ကွယ်မှာ ကြိုးကိုင်သူ ရှိနေနိုင်မလား”

“နတ်ဘုရားမျိုးနွယ်စုက တစ်ယောက်ယောက်များလား”

“လင်းဝေ သူတော်စင်ဧကရာဇ်လား ဒါမှမဟုတ် ကံကြမ္မာရဲ့ သမီးတော်လား”

ယဲ့ဖုန်း နက်နက်ရှိုင်းရှိုင်း စဉ်းစားခန်း ဝင်သွား၏။

သို့သော် မြူခိုးဂိုဏ်းသည် တိုက်ပွဲကြီးတစ်ခုကို ဖြတ်သန်းခဲ့ရပြီး လူများ၏ နှလုံးသားများကို ငြိမ်သက်စေရန် လိုအပ်ကြောင်း စဉ်းစားမိသဖြင့် ယဲ့ဖုန်းသည် ပတ်ဝန်းကျင်ကို ကြည့်လိုက်ပြီး အဝေးတွင် တုန်လှုပ်နေဆဲဖြစ်သော ရှောင်ချန်းထျန်းကို ခေါင်းညိတ်ပြလိုက်သည်။

ထို့နောက် ယဲ့ဖုန်းက ကျယ်လောင်စွာ ကြေညာလိုက်၏။

“မြူခိုးဂိုဏ်းရဲ့ တပည့်တွေ... ငါ့အမိန့်ကို နာခံကြ။ တိုက်ပွဲကြီး ပြီးသွားပြီ။ စစ်တလင်းကို အမြန်ဆုံး ရှင်းလင်းကြ။ ကြယ်တာရာ အစွမ်းထက် မျိုးနွယ်စုတွေရဲ့ ရုပ်အလောင်းတွေက အဖိုးတန်တယ်။ ကောင်းကင်နှင့် မြေကြီး ရတနာတွေထက် မနိမ့်ကျဘူးဆိုတာ မှတ်ထား။ တစ်ခုမှ မလွတ်စေနဲ့”

ထိုသို့ ပြောပြီးနောက် ယဲ့ဖုန်းသည် ဂိုဏ်းချုပ် ခန်းမဆောင်သို့ ပြန်သွားခဲ့သည်။

သူသည် ကံကြမ္မာ ရတနာပုလဲကို ထုတ်ယူကာ လက်ဟန်များ ရေးဆွဲ၏။ နောက်ကွယ်မှ ကြိုးကိုင်သူ၏ မည်သူမည်ဝါဖြစ်ကြောင်း တွက်ချက်ရန် ကံကြမ္မာ စွမ်းအားကို အသုံးပြုလိုက်လေသည်။

ထိုအခါ သူ၏ အမြင်တွင် ပုံရိပ် မြောက်မြားစွာ ဖြတ်ပြေးသွား၏။

...

မြူခိုးဂိုဏ်းရှိ တိုက်ပွဲ သတင်းမှာ လျင်မြန်စွာ ဟိုးလေးတကျော်ဖြစ်

သွား၏။

ရှန်ကျိုးတိုက်ကြီးရှိ ကြယ် (၄) ပွင့် အဆင့်အထက် အင်အားစုများသည် သတင်းကို အမြန်ဆုံး ရရှိခဲ့ကြလေသည်။ ယဲ့ဖုန်းသည် ရုပ်ခန္ဓာ သူတော်စင် လမ်းစဉ် ကျင့်ကြံသူ တစ်ယောက် ဖြစ်လာနိုင်ခြေ အလွန်များကြောင်း သိလိုက်ရသောအခါ မြောက်များစွာသော အစွမ်းထက် ပညာရှင်များမှာ အလိုအလျောက်

ပင့်သက်ရှိုက်လိုက်မိကြသည်။

သို့နှင့် မြူခိုးဂိုဏ်း၏ ဂိုဏ်းဂုဏ်သတင်း ရမှတ်များ နှင့် ယဲ့ဖုန်း၏ ယုံကြည်မှုစွမ်းအားမှာ တဟုန်ထိုး မြင့်တက်လာတော့သည်။

--